كۆڤان حسێن
د بنه‌كوكێ دا ئه‌ز ل گه‌ل هندێ نینم هیج پێگه‌ و (منصبه‌ك) دى ل كوردستانێ زێده‌ بیتن و بخوه‌ به‌رپرسێن مه‌ ژ مه‌ زێده‌نه‌ و حوكمه‌ت ب هه‌موو ئاڤاهیێ خوه‌ڤه‌ پێدڤى ب هندێ یه‌ خوه‌ (رشیق) كه‌تن. لێ ب راستى ژی هێدى كراسێ(قه‌زایێ) بۆ زاخۆ ته‌نگه‌ و دبیت جهێن دى ژی هه‌مان سه‌خله‌تێن زاخۆ هه‌بن. لێ ده‌مه‌ك درێژه‌ ئه‌ڤ بابه‌ته‌ هاتى ئازراندن و كاره‌كێ د شیانا حوكمه‌تا كوردستانێ دایه‌ نه‌ وه‌ك پارێزگه‌هان ب ئاسته‌نگه‌ و سه‌ربۆرا گه‌رمیان و راپه‌رینێ ل سلێمانیێ دبیت یا سه‌ركه‌فتى بیت, دبیت بۆ پارتى زه‌حمه‌ت بیت وه‌ك حزبا ده‌سته‌لاتدار لێ ده‌ڤه‌رێ هنده‌ك جوداهیێ بكه‌ت د ناڤ باژێران دا. لێ ئه‌ڤا زاخۆ هه‌ست پێدكه‌ت، جودایه‌ و ئاشكرا دبێژین خه‌لكێ زاخۆ هه‌ست ب هندێ دكه‌ن ژ ئه‌نجامێ ئاستێ خوه‌ یێ ئیدارى و بیرۆكراتى زور(مغدۆره‌) و ره‌نگه‌ پێدڤى نه‌كه‌ت ل سه‌ر هه‌مى ئاسته‌كێ رۆنكرنا ب ده‌ینه‌ رۆلێ لى وه‌لاتى باژێره‌كێ بریارا سیاسى و ئیداری و خزمه‌تگوزارى و ئه‌منى و حه‌تا دووماهیێ نه‌ بیت دبیته‌ قوربانى زاخۆ وه‌ك نموونه‌. قه‌ت ئه‌ڤ بابه‌ته‌ بۆ هندێ نینه‌ ژ شان و قیمه‌تێ پارێزگه‌ها خوه‌ دهۆكێ كێم بكه‌ین، لێ قه‌ت به‌رئاقل نینه‌ ژی زاخۆ چه‌ندى ل ئاستێ بریارا خزمه‌تگوزاریان و سیانا ل په‌راوێزێ بیت. هه‌ر كه‌سێ ل قه‌زا نه‌ ژیت هه‌ست ب هندێ ناكه‌ت، له‌ورا دبێژم دهۆك چه‌ند هه‌ست ب ئێشانێ دكه‌ت به‌رامبه‌ر هه‌ولێرێ زاخۆ هنده‌ هه‌ست ب ئێشێ دكه‌ت، زاخۆیان ئیداره‌كا سه‌ربه‌خوه‌ دڤێت بریارا ئیدارى و سیاسیى و خزمه‌تگوزارى و ئه‌ڤێن دى هه‌بن. ل سه‌ر سێ سنۆرایه‌ و ل سه‌ر ده‌ریایه‌كا پترۆلێ یه‌ و دڤیا ئه‌ڤه‌ ل به‌ر چاڤ بێت وه‌رگرتن و پشك و به‌ر خوه‌ ل ئیداره‌دانا وان هه‌بیت، ئیدرا سه‌به‌خوه‌ قه‌ت داخوازا هندێ نینه‌ قونسلخانه‌یان ببینن زاخۆ بۆ هندێ یه‌ كوالێتیا ژیانێ و ئاستێ قه‌بارا حوكمه‌تێ و خزمه‌تێن وێ ل ڤێ ده‌ڤه‌رێ بنه‌جه ببن. پارتى وه‌ك حزبا بالا ده‌ست دڤیا د پرۆژێ چاكسازیا گشتى دا زاخۆ وه‌ك ئیداره‌كا سه‌ربه‌خوه‌ راگه‌هینیت و هه‌مى جۆمكێن بریارا ل گه‌رمیانێ و راپه‌رینێ هه‌ین بۆ زاخۆ مسۆگه‌ر كه‌ت. بۆ حوكمه‌تا كوردستانێ و بۆ پارتى ب تایبه‌تى پێدڤیه‌ بگه‌هنه‌ وێ باوه‌ریێ (قه‌زا) بوو زاخۆ بچویك و ته‌نگه‌ و هێشتا سه‌رده‌مێ ئوسمانیا وه‌ره‌ قه‌زایه‌.. مانه‌ به‌سه‌.. پاشى زاخۆ وه‌ك باژێر خه‌مسار و بێ به‌هر نه‌بوویه‌ ل ئاست پرسێن نشتمانى و نه‌ته‌وه‌ى دا وه‌ك هه‌مى باژێرێن دى….!؟

كۆڤان حسێن

حیكمه‌ت ژ هه‌بوونا په‌رله‌مانى نوونه‌رایه‌تیا مله‌تیه‌ و پاشى ده‌ربرینا ره‌نگڤه‌دانێن جڤاكیه‌ ل ئاست دارشتنا هه‌مى سیاسه‌تێن وه‌لاتى ل وارێن ئابوورى سیاسى جڤاكى و سه‌ربازى و چاڤدێریا خه‌رجێن ده‌وله‌تێ و دابه‌شكرنا سامانێ نه‌ته‌وه‌ى ب عه‌داله‌ت, جه‌مكێ عه‌داله‌تێ گه‌له‌كێ دهه‌لگریت و هه‌مى ئالى سروودا و مارشا ل ده‌مێ هه‌لبژارتنان دا پێ دبێژن، مخابنى ل وه‌لاتێ مه‌ ب تنێ عه‌داله‌تێ د دابه‌شكرنا سامانێ نه‌ته‌وه‌ى دا وه‌ك پێدڤى جهێ خوه‌ نه‌گرتیه‌ و په‌رله‌مان كو دڤیا سه‌رۆكانیا عه‌داله‌تێ بیت و چاڤێ ملله‌تێ بیت ل هه‌ر لادانه‌كا نه‌ عادل دا، یا درست ئه‌وه‌ په‌رله‌مان جهێ هندێ بیت ده‌مێ حوكمه‌ت یان هه‌ر سازیه‌كا دى نه‌ عادل بیت دنگ هه‌بیت، ل كوردستانێ هه‌ست ب هندێ دئێته‌كرن په‌رله‌مان تووشى هێرشه‌كا دژوارا سڤكرنێ هاتیه‌ و پاشى وه‌سا د بیردانكا تاكێ كورد هاتیه‌ كو په‌رله‌مان جهێ پاره‌ په‌یداكرن و ده‌وله‌مه‌ندبوونێ، ئه‌ڤه‌ ئه‌گه‌ر چى پیلان بیت ژی و شیانێن مه‌زن بۆ هاتبنه‌ مه‌زاختن و ده‌زگه‌هێن بالا یێن دشێَن ئاراستا رایا گشتى بكه‌ن ل پشت ڤێ وێنه‌كرنا پرى گومان بیت ژی، ل كوردستانێ سه‌رۆكاتیا په‌رله‌مانى و هه‌مى فراكسیۆنا ژی نه‌شیایه‌ وه‌ك پێدڤى ئاراستا رایا گشتى و (میزاجێ) جه‌ماوه‌رى بخوینن و هنده‌ك ره‌فتار و هه‌لویستێن خوه‌ ل گۆر سه‌متا شه‌قامى پێڤن و بكێشن, هیچ پارتیه‌كا ل په‌رله‌مانى كورسی هه‌یین ژ پاداشت و مووچێ په‌رله‌مانتارێن خوه‌ قازانج ناكه‌ت به‌رامبه‌ر ئه‌و گومان و نه‌رازیبوونا جه‌مارى ژێ درست دبیت. ئانكو نزانم و من پێزانێن دروست و باوه‌رپێكرى نینن كا ل جیهانێ مووچه‌ و پاداشتێ په‌رله‌مانتاران چیه‌ و چه‌نده‌, لێ یا ئه‌ز ژێ پشتراست هه‌مى حزبێن كوردستانێ و ل سه‌رێ وان پارتى باوه‌ریه‌كا مه‌زن و ب هێز ب چه‌مكێ عه‌داله‌تێ هه‌یه‌ و پرى ئه‌ده‌بیاتێن ڤان حزبان شلۆڤه‌كرنا ڤى چه‌مكى یه‌. ژ ڤێرێ پرسیاره‌ ئه‌رێ ئه‌ڤه‌ عه‌داله‌ته‌؟! راسته‌ (منصب) و پله‌یان حورمه‌ت و بهایێ خوه‌ هه‌یه‌. راسته‌ شیانا و كفائه‌تا بهایێ خوه‌ هه‌یه‌, لێ ب ژ عه‌داله‌ت و (ئینصاف) بۆ هندێ ئه‌و چه‌مكێ هه‌وه‌ باوه‌رى پێ هه‌یى ژده‌ستنه‌ده‌ن و ئه‌و مله‌تێ هوون نوونه‌رایه‌تیا وى دكه‌ن بێ ئومێد نه‌بیت ژ زادێ فه‌قیر و ژاران كو ئه‌و ژى رۆژه‌كێ عه‌داله‌ت بهێته‌ دى, راستى مووچه‌ و ئیتیازاتێن په‌رله‌مانتارا ل وه‌ختێ به‌رفره‌هیێ هاتینه‌ دارشتن لێ پێداچوون ل گۆر نوكه‌یا روژێ فه‌ره‌, ل گه‌ل هندێ كو ره‌نگه‌ باشترین چاره‌سه‌رى ئه‌و بیت په‌رله‌مانتار بێ خانه‌نشین بیت و هه‌ر ئێك ل گور بسپۆریا خوه‌ بچیته‌ جهێ خوه‌ یێ به‌رێ. ڤان مووچه‌ و خانه‌نشینى و ئیمتیازان. مخابنى دبێژن په‌رله‌مان سڤككریه‌ د چاڤێ ده‌نگده‌ران دا, نه‌ نهێنیه‌ بێژم خه‌لك وه‌سا ب چاڤه‌كێ پرى حه‌قارت و سڤك سه‌ح دكه‌ته‌ هه‌ر كه‌سێ رۆژه‌كێ بڤێت بیته‌ ئه‌ندام په‌رله‌مان. حورمه‌تا په‌رله‌مانى ژ خانه‌نشینیا چه‌ند كه‌سان كو ب حه‌زا خوه‌ و بۆ ئارمانجێن حزبا خوه‌ بووینه‌ په‌رله‌مانتار و ئیمتیازێن وان پیرۆزتره‌، ئه‌و چاكسازیا ب ئێكجارى ڤێ پرسێ دانه‌ به‌زینیت ئاستێ عه‌داله‌ته‌ك قه‌بوولكرى چاكسازى نینه‌. یا دروست په‌رله‌مانتاران پشتى خلاسبوونێ هیچ ئیمتیازه‌ك و خانه‌نشینیه‌ نه‌بیت. هندى دكارى دا پێدڤیه‌ هه‌مى شیان بۆ بهێنه‌ به‌رده‌ستكرن و پاراستن و پاشى هه‌ر ئێك بۆ كارێ خوه‌. پارتێن كوردستانێ حورمه‌تا په‌رله‌مانى نه‌كن قوربانى گه‌رمكرنا هنده‌ك كه‌سان. حورمه‌تا په‌رله‌مانى ڤه‌گه‌رینن ڤه‌ و خالا ده‌سپێكى ژی ئه‌وه‌ ڤێ (تصورا) دروست بى ل (زهنیه‌تا) خه‌لكێ دا راستكه‌نه‌ڤه‌. ب لادانا هه‌نێ ئمتیازه‌ك تایبه‌ت ب په‌رله‌مانتار و وه‌زیر و گزیران ڤه‌.

كۆڤان حسێن
حوكمه‌ت داهاتیا كوردستانێ ره‌نگێ سیاسیێ وێ جبیت، بێگومان دێ حوكمه‌ته‌كا پرى ئاسته‌نگى بیت و ئه‌ڤ وه‌لاته‌ تازه‌ پێدڤى ب هنده‌ك راپه‌راندنێن تایبه‌ته‌. كوردستانێ مسۆگه‌ر قووناغا ساڤاتیێ ده‌ربازكریه‌ و هێدى سه‌رده‌مێ پێگه‌هشتنێ و ژیان پێدڤى ب هنده‌ك قانوونێن تایبه‌ته‌ وه‌ك رێكخستنا كارى و هه‌بوونا ژماره‌كا داتاێن تایبه‌ت ب كارى و ده‌رفه‌تێن وێ. وه‌لات پێدڤى ب ژێكڤاڤارتنا هنده‌ك كه‌رتایه‌ وه‌ك كه‌رتێ ساخله‌میێ و دووماهیئینانێ ب ڤێ بازرگانیا نوكه‌ ب شیان و ساخله‌میا مرۆڤان دهێته‌كرن. شۆركرنا هنده‌ك ده‌سته‌لاتا بۆ ئاستێن خارێ و كێمكرنا وان به‌ربه‌ستێن بیروكراتى و كێمكرنا په‌نجه‌ران كو سه‌ده‌مه‌كێ گه‌نده‌لیا ڤى سیسته‌مینه‌, حوكمه‌تا داهاتى میراته‌كێ مه‌زنێ گه‌نده‌لیا ئیدارى و سیاسی یێ بۆ مایى هه‌مى وه‌لات پێدڤى ب سه‌رژنى پێداچوونێ یه‌ ژ ئابوورى حه‌تا هێزا سه‌ربازى و بگره‌ بازارێ كوردستانێ و په‌یداكرنا سیسته‌مه‌كا ئاشكرا بۆ بازارى و دیاركرنا شیانێن حوكمه‌تێ ب سه‌ربازارى دا و پاراستنێن مافێ بكاربه‌ران. خه‌لكى باوه‌رى ب پارتى دا ب هندێ كوردستانه‌كا ب هێز ئاڤا كه‌ت یان هه‌ چونه‌ هه‌وى وێ بده‌ت, پرسێن كوردستانێ ئه‌وێن په‌یوه‌ندى ب ئابوور و ژیانا خه‌لكێ ڤه‌ هه‌یین و راستكرنا وان كێماسیان و نه‌هێلانا وێ گه‌نده‌لیا ل سه‌كته‌رێ گشتى و تایبه‌ت دا, ره‌نگه‌ پتر باندۆرا خوه‌ هه‌بیت ل ده‌ف خه‌لكێ ژ چێكرنا جادده‌یه‌كێ ل گه‌ل گرنگیا وێ. مخابنى جارا ئه‌م دبێژین گه‌نده‌لى كلتوورێ مه‌یه‌ و بێى كو بزانین كلتوورێ گه‌له‌گ مله‌تان بوو، لێ خوه‌ ب ژێرخانه‌كا قانوونان ژێ قورتالكر یان كێمتر كر. واسته‌كارى و ب هه‌در دانا مالێ گشتى و لاوازیا داخواكارێ گشتى و نه‌بوونا چاڤدێریێ و نه‌بوونا سزایێن قانوونى زۆر كه‌س ل ڤى وه‌لاتى بووینه‌ سه‌مبولا گه‌نده‌لیێ و پرسیار ژی ل سه‌ر ب سه‌دان كه‌سان په‌یدا بووینه‌ ب چى ره‌نگى ژ چى ژێده‌رى ل سه‌ر حسابا مالێ گشتى ده‌وله‌مه‌ند بووینه‌!؟ پارتى و هه‌ڤالبه‌ندا سیاسیا خوه‌ پێدڤى ب هه‌وله‌كا باشا په‌یوه‌ندیێن گشتیه‌ بۆ ڤه‌گه‌راندنا باوه‌ریێ ب سازیێن حوكمه‌تێ، ئه‌و ژى دێ ب پاككرنا پرێزا حوكمه‌تێن چووى بیت و پاقژكرنا ده‌همه‌نێن حزبا بیت ژ گه‌نده‌ل و بوارێن گه‌نده‌لیێ په‌یدا دكه‌ن.

كۆڤان حسێن
هه‌ر وه‌ختا روودانه‌ك درستبوو نه‌مازه‌ ئه‌گه‌ر یا دلته‌زین بیت، مه‌ كلتووره‌كێ گریانێ و شینیان یێ ئاماده‌ یێ هه‌ى ئه‌م ل سه‌ر حه‌سره‌تان بكه‌ینه‌ گرى و پاشى ئاسان ل هنده‌ك بهنا بگه‌رین و سه‌ده‌مان بۆ په‌یدا كه‌ین و كه‌سێ حه‌تا نوكه‌ جورئه‌ت نه‌دایه‌ خوه‌ بێژیت ئه‌رێ ئه‌ڤێن ڤان ره‌نگه‌ رێیا دگرن به‌ر ب هه‌مى ڤیان و شیانان، دروستن یان خه‌له‌تن؟! ئه‌رێ ئه‌و ژ راست پێدڤى ب كۆچ و سه‌فه‌ره‌كا ب ڤى ره‌نگى مه‌ترسى نه‌؟! ئه‌رێ مرۆڤ ل ڤى وه‌لاتى هنده‌ ئازاده‌ خوه‌ و كه‌سوكار و مالبات و مله‌تێ خوه‌ تووشى خه‌م و ئازاره‌كا ژ ڤى ره‌نگى بكه‌ن؟! ئه‌رێ تاكێ پێگه‌هشتى ئازاده‌ ژیانا زارۆك ژنا بێخنه‌ ڤێ مه‌ترسیێ؟! هندى كورده‌ك چووبیت ده‌رڤه‌ى وه‌لاتى (خودێ یێ خلاس) كرى. پاشى ئه‌رێ ژ راستى ژیان ل ڤى وه‌لاتى هنده‌ ئه‌سته‌م و شێلایه‌ كو تێرا تراژیدیه‌ك هۆسا بیت كه‌س خوه‌ و زارۆكێن خوه‌ باڤێژیته‌ ڤێ دوزه‌خێ؟! كۆچ پرسه‌كا جیهانیه‌ و ژماره‌كا وه‌لاتان هیچ ژیانه‌ك نینه‌ و خه‌لكێ وێ كۆچێ دكه‌ن و ب هزرا ل ده‌ریا سپى و ده‌ریاێن دى بێ سه‌ر و شوینن، ئه‌رێ گه‌نجێ مه‌ بۆ كارى و بزاڤه‌كا بازرگانى دچیته‌ ده‌رڤه‌؟! ئه‌گه‌ر سه‌ده‌م ئه‌ڤه‌ ئه‌ڤه‌ حوكمه‌تا كوردستانێ دشێت وه‌ك بنگلادشێ وه‌ك لبنانێ و ئه‌ندۆنۆسیا (پالا و كاركه‌ران) فرێكه‌ته‌ جیهانێ ب رێكێن ئارام و مسۆگه‌ر، ئه‌گه‌ر سه‌ده‌م سیاسینه‌ و ل ڤى وه‌لاتى سه‌ركوتكرنا سیاسى و زیندانێن سیاسى هه‌نه‌، دڤیا ئه‌م پرسیارا حالێ خوه‌ بكه‌ین. ڤێ چوونا هزرا پرسیار ل سه‌ر راستى و درستى پێدڤى ب راوه‌ستیانه‌كا جڤاكى و كۆمه‌لایه‌تى هه‌یه‌، ب ڤى ره‌نگى ژیانا ب سه‌دان به‌لكه‌ ب هزران د مه‌ترسیێ دایه‌ چوونا ده‌رڤه‌ پتر بوویه‌ مودێل و چاڤلێكرن و بازدانه‌كا بێ رامانه‌, هیچ جاره‌كێ رۆلێ ره‌ڤه‌ندا كوردى ل سه‌رده‌مه‌كێ ل وارێن سیاسى ئابوورى ژبیر ناكه‌ین و رۆژه‌كێ ئه‌و هێزا ب زوێنه‌را ئابوورا وه‌لاتى بوون. لێ ب راستى نوكه‌ بابه‌ت ب ره‌نگه‌ك دیه‌. هه‌مى قورانێن ڤان روودانان جه‌رگبرن و قوربانى بریاره‌كا بێ ڤه‌خواندنن. یێ ب وى قوربانى راستى قوربانى كلتۆره‌كێ مژدارێ مه‌یه‌. ئه‌ڤ پرسه‌ ژ هندێ ده‌ركه‌فت ب نازكى و گریان ڤه‌ ل سه‌ر باخڤین ده‌ربازى دیاردێ بوویه‌ پێدڤیه‌ جڤاك هنده‌ك تێگه‌هێن خوه‌ راست كه‌ت یان پێداچوونێ پێدا بكه‌تن، تاك ئازاده‌ ل ڤى وه‌لاتى كه‌نگى سه‌فه‌رێ بكه‌ت، لێ قه‌ت ئازاد نینه‌ كاره‌ساته‌كێ درست كه‌تن و هزار پسیارا په‌یدا كه‌تن، قه‌ت نابێژین ل ڤى وه‌لاتى كێماسى و نه‌ عه‌داله‌تى نینه‌ و قه‌ت نابێژین به‌هشته‌. لێ مسۆگه‌ر تیرۆرا هندێ سه‌ده‌م هه‌نه‌ ئه‌م خوه‌ ژ كاره‌ساتێن ژڤى ره‌نگى بده‌ینه‌ پاش. كه‌سه‌كێ ڤیا كۆچێ بكه‌ت و شیانێن مه‌زاختنا (قه‌جاخچیا) هه‌بن. دڤیا تێرا هندێ ژی هه‌بن ب رێیه‌ك ئارام بجیت هه‌ر چوونه‌ بێ زارۆ؟! هیچ وه‌لاته‌كێ شیانا رێگریێ ل كۆچێ نینن. لێ رێیێن كۆچێ نابێژم یاسایى بن، لێ هه‌ر چوونه‌ دڤیا ئارام و ساخله‌م بن ل دی شیانا سه‌ر ئه‌نجام ل ڤى وه‌لاتى كه‌س زێده‌ نینه‌، قوربانیێن ئیجه‌ خوساره‌تن بۆ مله‌تى, پتر ژ قوربانیێ …

كۆڤان حسێن
راسته‌ پارتى 70 ساله‌ و پتر سیاسه‌تێ دكه‌ت لێ ب راستى هێشتا پارتى ل ئالیه‌تێ هنده‌ك بریاران دا، په‌له‌په‌له‌ پێڤه‌ دیاره‌ و زۆر جاران ژی ژ (خۆشمرۆڤیا) خوه‌ تووشى (صه‌دمه‌) ڤه‌جنقینان دبیت.خۆشمرۆڤى و جامێرى و (سمبێل گرتن) د سیاسه‌تى دا ب تنێ كاره‌سات ب دووڤدایه‌. حه‌تا نوكه‌ ژی مژداره‌ پێداگریا پارتى ل سه‌ر هه‌بوونا به‌ربژاره‌كێ بۆ سه‌رۆكاتیا عێراقێ و پتر ب گومانم پشتى برێز نێچریڤان بارزانى دیاركرى بۆ پارتى مسۆگه‌ر بوو و ئه‌وان نه‌كر؟! ئه‌رێ پارتى ڤیا ئه‌ڤا بووى؟ بۆ خورتكرنا پێگه‌هیێ خوه‌ ل كوردستانێ؟! ئه‌رێ پارتى ئێكه‌تى پالدا سه‌نگه‌ره‌كێ دو جاران خوساره‌ت بۆ هندێ ل كوردستانێ ب سه‌نگ پشتا پارتى بگریت و دوقولیا حوكمه‌تێ ته‌مام كه‌ت؟! كوردستانێ هه‌لبژارتنه‌كا پاك و كێمئاریشه‌ ئه‌نجام دا. هه‌ر ئالیه‌ك نوكه‌ بۆ حالێ خوه‌ دنالیت و دبیت بۆ ده‌مه‌كێ هنده‌ك (كێجه‌لێن) سیاسى بهێنه‌كرن و سه‌رئه‌نجام حوكمه‌تا زۆرینه‌یا سیاسیا (پارتى و ئێكه‌تى) دێ هێته‌ ئاڤاكرن و د كووراتیا خوه‌دا ب هێزبوونا ئێكه‌تیێ خزمه‌تا ئارمانجا كیرا پارتى دكه‌ت و پارتى ژ هه‌مى رێكه‌فتنه‌كا لابه‌لا قورتال دكه‌تن نه‌مازه‌ ل گه‌ل ئێكه‌تیێ پارتى سه‌ربۆره‌كا سه‌ركه‌فتى هه‌یه‌. سیاسه‌ت هونه‌ره‌ نه‌ هه‌ست و نه‌ستن خه‌لكێ كوردستانێ حه‌تا راده‌یه‌كا زۆر قه‌بارێ هه‌مى ئالیان دیاركریه‌ و ئاشكرا بۆ پارتى دبێژیت دڤیت ل گه‌ل ئێكه‌تیێ رێكبكه‌ڤى، ئه‌ڤه‌ قه‌ده‌را كوردستانێ یه‌ و لۆژیكێ سیاسیێ كوردى ژی هنده‌ پێرا گه‌هشتیه‌ كو كه‌س ب زمانێ لێترازانێ یان چه‌كى بیر بكه‌ت، كوردستان به‌رپرسیاره‌تیا هه‌مى ئالیانه‌ یا خوساره‌تا ژ به‌رى یا قازانجكریا. پارتى و كه‌له‌ك كاراكته‌رێن وێ هه‌ست ب خوساره‌تێ كرن ل پرسا سه‌رۆكاتیا عێراقێ دا. پارتى پێدڤى ب ڤێ هه‌ستكرنێ نه‌بوو لێ مسۆگه‌ر ئێكه‌تى پێدڤى ب سه‌ركه‌فتنه‌كا سه‌مبۆلى بوو پشتى هه‌لبژارتنان هه‌تا به‌لانسا ده‌روونیا خوه‌ راگریت. لێ ده‌مێ پارتیان هه‌ست ب خوساره‌تێ كرى، ئه‌ڤه‌ بۆ وێ سۆزا پارتیانه‌ ڤه‌دگریت كو ره‌نگه‌ هه‌تا سه‌ركردایه‌تیا پارتى ژی جاران سۆزانه‌ بریارا یان هه‌لویستان دده‌ت, ئه‌نجام پارتى ل یاریه‌كێ سه‌رنه‌كه‌فت وه‌ك ڤیایى، لێ هێشتا عه‌مرێ سیاسى هنده‌ مایه‌ پارتى ڤێ شكه‌ستنا سۆزدارى پركه‌ت و ل كوردستانێ حوكمه‌ته‌كا ب هێز و خزمه‌ته‌كا كوالیتى به‌رز بكه‌ت. باشتر ل غاردانه‌كێ ل مه‌یدانه‌كێ پارتى تێدا فه‌قیر و ژاره‌!….

كۆڤان حسێن
هه‌تا 2003 یێ عێراق وه‌لاته‌كێ كۆمارى سه‌نترال بوو و سازیا سه‌رۆكاتیێ تێدا مه‌زنترین هێز هه‌بوو و هه‌مى شیانێن ده‌وله‌تێ د خزمه‌ت دا بوون. ل گۆر رێكه‌فتنا 11 ئادارا 1970 یێ جێگرێ سه‌رۆك كۆمارێ عێراقێ پشكا پارتى بوو، لێ به‌ربژارێ پارتى نه‌هات قه‌بوولكرن، چونكو كورده‌ك فه‌یلى و شیعه‌ بوو (حه‌بیب محه‌مه‌د كه‌ریم) بوو، د هه‌مان ده‌م دا سكرتێرێ پارتى ژی بوو. لێ هه‌مان پۆست بوو پارتى بناڤ ما هه‌تا 2003 كو (تاها محیه‌دین مه‌عرووف) بۆ كو ئێك ژ دامه‌زرێنه‌رێن پارتى 1946 بوو، لێ (پارتیا كارتۆنى) ئه‌وا حوكمه‌تا عێراقێ دروست كرى. پشتى 2003 جاره‌كا دى جێگرێ سه‌رۆك كۆمارێ عێراقێن پشكا پارتى بوو( د. رۆژ نوورى شاویس)، ل سه‌رده‌مێ (غازى عجیل ئه‌لیاوه‌ر) بوون ژبلى پرسه‌ك سۆمبولى، نوكه‌ سه‌رۆكاتیا عێراقێ چو بهایه‌ك نینه‌ وه‌ك راپه‌راندن و ل گۆر ده‌ستوورى ژ هه‌مى ده‌سته‌لاته‌كێ هاتیه‌ ڤالاكرن، ب تنێ ناڤه‌ و بوو هنده‌ك مه‌به‌ستێن پرۆتوكۆلى دهێته‌ بكارئینان. (مام جه‌لال) وه‌ك كارێزمایه‌ك سیاسى بخوه‌ ژ پۆستى مه‌زنتر بوو و ئه‌و پۆست پرى بزاڤ و شیان كربوو. وه‌ك (عورف) ئه‌و پۆسته‌ پشكا كوردایه‌، لێ بێگومان پێدڤى ب سازانه‌كا نشتمانیا كوردى هه‌یه‌، هه‌تا بهێته‌ پركرن. وه‌ك دیار هیچ سازانه‌ك نه‌هاتیه‌ كرن و هه‌ر ئالیه‌ك ب پشكا خوه‌ دزانیت و پارتى ره‌نگه‌ د كووراتیێ دا و هه‌تا قاعیدا پارتى ژی گه‌له‌ك په‌رۆشى ڤى پۆستى نینه‌ن لێ چونكو سازانه‌ك نه‌هاتیه‌كرن، دبیت بۆ پركرنا ڤى پۆستێ به‌ربژار هه‌بیت و ره‌نگه‌ ب تنێ ژی گڤاشتن بن یان سیناریۆیا ره‌تكرنه‌كا دبلۆماسی بیت بۆ هنده‌ك كه‌سان ب تایبه‌ت؟! ئه‌ڤ پۆسته‌ بۆ پارتى قورسه‌ و ره‌نگه‌ پارتیه‌ك نه‌ته‌وه‌ى و جوداخواز و رێفراندۆمچى و گه‌له‌ك شایسته‌ نه‌بیت, لێ د سیاسه‌تێ دا تشتێ حه‌رام نینه‌ و پارتى ڤێ یاریێ دكه‌ت و ل جهه‌كێ بلندێ وه‌ك سه‌رۆكاتیا عیراقێ كو پارتى و حوكمه‌تا كوردستانێ مه‌زنترین ئالۆزى ل گه‌ل ڤێ ده‌وله‌تێ هه‌یه‌. ب باوه‌ریا من پارتى ئه‌ڤ پۆسته‌ نه‌ڤیایه‌ و نه‌ڤێت، لێ دبیت پر كه‌ت بۆ سه‌نگ راگرتنا هنده‌ك پرسێن سیاسى ل ناڤخوه‌یێ كوردستانێ و ئه‌ڤه‌ دبیت ڤێراگه‌هشتنه‌كا سیاسى بیت بۆ ڤى پۆستى هه‌ر چونه‌ن ل دژى كوردستانێ نه‌هێته‌ بكارئینان یان وه‌ك موزایده‌كا سیاسى پێ نه‌هێته‌كرن. پارتى رۆژه‌كێ حزبه‌كا عیراقى نه‌بوویه‌ و هه‌مى بیر و فه‌لسه‌فا پارتى رك بۆ كیانه‌ك كوردستانى بوویه‌، ڤێجا ل بن چ ناڤه‌كێ بیت, سه‌رۆك كۆمارى بۆ پارتى ناهێته‌ حه‌باندن، لێ دبیت ل ڤێ قووناغێ دا پارتى ئاره‌ستا سیاسى یا خوه‌ بۆ مه‌ره‌مێن ته‌نیكى بگوهۆریت و دبیت ب شیعه‌ و سنه‌یان ژی ده‌رفه‌ت بیت حزبه‌ك وه‌ك پارتى جودا خواز (ئحتیوا) بكه‌ن ل پۆسته‌ك سیادى سه‌رێ ده‌وله‌تێ پێ بده‌ن و ره‌نگه‌ سوپاسدار بنن پارتى ڤى پۆستى وه‌ربگریت.

كوڤان حسین

هه‌مى پێشبینى ئه‌ون پارتى یان هندى خوه‌ یان پتر ده‌نگان كۆم كه‌ت و مه‌زنترین كوتلا په‌رله‌مانى مسۆگه‌ر كه‌تن، هه‌تا نه‌یارێن پارتى ژی وێ راستیێ ناڤه‌شێرن كو پارتى حزبا ئێكى بوو خولا ڤێ جارێ ژی یا په‌رله‌مانێ كوردستانێ، هه‌مى ئالێن دى هه‌ڤركیێ ل سه‌ر پلا دویێ و سیێ ململانێ دكه‌ن و ئه‌ڤه‌ بخوه‌ ژی ئاماژه‌كه‌ كو پارتى ب به‌رنامێ خوه‌ بۆ چار سالێن دى ژی هه‌ دێ سه‌متا سیاسه‌تێ ل ڤى وه‌لاتى هاژۆت، لێ یار گرنگ ئه‌وه‌ پشتى هه‌لبژارتنا ئه‌رێ لیستا سه‌ركه‌فتى تێرا هندێ ده‌نك و كورسى مسۆگه‌ر كرینه‌ حوكمه‌ته‌كێ ئاڤا كه‌ت یان نه‌جاره‌ جاره‌ك دى كوالسیۆنه‌كا سیاسى ئاڤا كه‌ت؟! حوكمه‌تا ئێكه‌تیا نشتمانى سه‌ربۆره‌كا سه‌ركه‌فتى نه‌بوویه‌, حوكمه‌ته‌ك پرانیا  سیاسى یا ب هێز ب فراكسیۆنه‌كێ یان پتر بۆ ڤێ قووناغێ گونجایتره‌. باشتره‌ ئالێن سه‌ركه‌فتى هه‌ر زوى حوكمه‌ته‌كا سیاسى ئاڤا كه‌ن و نه‌ كه‌ڤنه‌ به‌ر بازارێ سیاسى و ده‌رفه‌تا هندێ نه‌ده‌ن مزایده‌ و ئاسته‌نكرنا پرۆسا سیاسى سه‌ربگریت. حوكمه‌تا بنكه‌ فراوان دیار بوو هه‌بوو هندێ بۆ ل ده‌لیڤه‌كێ دا بهه‌رفینن و پشته‌ڤانیا په‌رله‌مانى بۆ نه‌هێلن ل كوردستانێ سیاسه‌تكرن حزبایه‌تیه‌ و تۆمارا سالێن بۆرى وێ راستیێ دیار دكه‌ت. پارتى و ئالیه‌ك دى خودان كورسى ل په‌رله‌مانێ كوردستانێ حوكمه‌ته‌كا زورینێ ئاڤا كه‌ن و سۆزێن خوه‌ بجهبینن زۆر ژ هندێ پتر د قازانجا كوردستانێ دایه‌ بزڤرن ڤه‌ سه‌ربۆره‌كا شكه‌ستى ل حوكمه‌تا بنكه‌ فراوان دا. ئانكو فه‌ره‌ ئه‌و ئالێن كێم ده‌نگان ژی بینن ب بریارا گه‌لێ كوردستانێ رازى بن و بخوه‌ نه‌چنه‌ حوكمه‌تێ چونكو ئه‌گه‌ر مله‌ت وان هێژاى حوكمرانیێ نه‌بینن. چ بێ رامانیه‌ دچنه‌ حوكمه‌تێ بمینن ئوپوسیۆنه‌كا سه‌خت و دژوار د چارچووڤێ وه‌لاتى دا. كوردستانێ پێدڤى ب ئوپوزسیۆنه‌كا بهێزه‌ كا چاوا پێدڤى ب حكومه‌تا بهێزه‌. كه‌سێ ل به‌ر نینه‌ بچیته‌ سه‌ر كورسیكا ئۆپوزسیونێ وه‌ك دیار فلمێ حوكمه‌تا بنگه‌ فراوان فێجارێ ژی دێ هنده‌ك مزایدا ل سه‌ر كه‌ن. خه‌لكێ كوردستانێ پێدڤى ب حوكمه‌ته‌كێ یه‌ بهێزترین پشته‌ڤانیا په‌رله‌مانى هه‌بیت، له‌ورا فه‌ره‌ ده‌نگدانێ دا ئه‌ڤه‌ ل به‌ر چاڤ بیت. فراكسیۆنه‌كا ب هێز و پر كورسى. زامه‌نێ ئارامیه‌كا چار سالیا سیاسیه‌ ل كوردستانێ

كۆڤان حسێن
داخۆیانیا به‌ره‌یێ توركمانى مخابنى وه‌ك پێدڤى گرنگى پێنه‌ هاته‌دان و ئه‌و ئاماده‌باشیا دیاركرى بوو دیالۆكێ ل سه‌رپرسا كه‌ركووكێ. ژمنڤه‌ وه‌رچه‌رخانه‌كا سیاسى بوو د هزرا سه‌ركردایه‌تیا به‌ره‌یێ توركمانى دا، یاراست ئه‌وه‌ دڤیا كورد به‌ره‌یێ توركمانى وه‌ك هه‌ى ناسبكه‌ت و ئه‌و ژی نوونه‌رایه‌تیا ژماره‌كا زۆرا توركمانێن كوردستانێ دكه‌ن و بیر و فه‌لسه‌فا خوه‌یا تایبه‌ت هه‌یه‌ و هه‌ڤپشێن كوردان ن ل ڤى وه‌لاتى و ڤێ راستیێ بێى عاتیفه‌ قه‌بوول بكه‌ین كاچاوا ئه‌وان ئه‌و راستى قه‌بوول كر كو كوردستان كیانه‌كێ مێژوى و جوگرافى و سیاسیه‌. نه‌ما ئینكارا ناڤێ كوردستانێ بكه‌ن.توركمان برا و هه‌ڤپشێن كوردانن، ل ڤى وه‌لاتى وه‌ك كلدانى و ئاشۆریان.ڤێ راستیێ وه‌ك هه‌یى دڤیا باوه‌ر بكه‌ین و كار بۆ هندێ بكه‌ین خالێن هه‌ڤپش په‌یدا بكه‌ن و ئێدى پرسا كه‌ركووكێ چه‌ند پرسا كوردایه‌، هنده‌ پرسا توركمانانه‌ ژى وه‌ك هه‌ڤوه‌لاتیێن ره‌سه‌نێن وێ پارێزگه‌هێ. كه‌ركووك پرسا وێ سه‌رئه‌نجام د ناڤبه‌را كورد و توركمانان دا چاره‌سه‌ر دبیت و عه‌ره‌ب بخوه‌ هاورده‌نه‌ و ڤێ راستیێ دزانن. سه‌رده‌مانه‌كى عه‌ره‌ب ل پشت ترسا توركمانان ژ كوردان خوه‌ حه‌شاردده‌ن. لێ وه‌ك دیار توركمان گه‌هشتن وێ باوه‌ریێ یان باوه‌رى پێهاته‌كرن د گه‌ل كوردان ماف بۆ مسۆگه‌رترن. نه‌مازه‌ هه‌مى فكرا سیاسیا كوردى یا نه‌ژادپه‌رست نینه‌.هه‌تا توركمانان ژی ئه‌و گومانا كویر ل سه‌ر كوردستانیا كه‌ركووكێ نینه‌ و نه‌شێن ڤێ راستیا مێژووى و جوگرافى ئینكار بكه‌ن لێ وه‌ك ره‌نگڤه‌دان زۆر جاران هه‌لویستێن توند دیار كرینه‌. باوه‌شا كوردان دڤیا هنده‌ فره‌هه‌ بیت بۆ توركمانان كو نه‌ما كه‌س وان هه‌مبێز كه‌ت ژ كوردان گه‌رمتر. داخۆیانیا به‌ره‌یێ توركمانى بۆ كوردان ل سه‌ر پرسا كه‌ركووكێ پێنگاڤه‌كا ب وێرانه‌ و دڤیا ب گرنگى بێته‌ وه‌رگرتن. سه‌ر ئه‌نجام توركمانا دانپێدانه‌كا سیاسى و كلتوورى و چه‌ند پۆسته‌ك دڤێن و ئه‌ڤه‌ هیچ ژ بهایێ كوردان كێم ناكه‌ت و دڤیا ب مه‌ردینیه‌ ك مه‌زن ڤه‌بێته‌ وه‌رگرتن و پرسا كوردستانیا كه‌ركووكێب سازانا كوردى توركمانى چاره‌سه‌ر ببیت.

كۆڤان حسێن
هه‌ر چونه‌ ل ڤێ كوردستانا باشۆر، هیچ ئالیه‌كێ هندى پارتى جه‌ماوه‌ره‌ك ماندى و دلسۆز نینه‌ و هه‌مى گه‌ره‌كا هه‌لبژارتنا دا ئه‌ڤ چه‌نده‌ دۆپات دبیت، چونكو پارتى حزبا جینه‌كا دیاركرى نینه‌، چونكو پارتى پاوانێ وێ وه‌لات و هه‌مى مله‌ته‌, بێگومان د ناڤ پارتى دا نه‌ك ل سه‌ر ئاستێ ئایدولوژى و هزرى و به‌لكو دوور ژ بالبالانێ .پارتیان ب خوه‌ ژ حزبا خوه‌ كۆمه‌كا گازندا و لۆمه‌هى و نازدار ره‌خنه‌ هه‌نه‌، ڤان رۆژان ل سه‌ر تۆرێن جڤاكى ئاشكرا دهێنه‌ به‌حسكرن، ئه‌ڤ ره‌نگه‌ ره‌وشه‌ هه‌مى گاڤێ ل سه‌ر و به‌ندێ هه‌لبژارتنان و ده‌سنیشانكرنا هنده‌ك كاراكته‌ران پتر دئازریت و ئه‌ڤه‌ دیارده‌ك نۆرماله‌ پارتى ب سه‌رێ خوه‌ تێرا ده‌وله‌ته‌كێ شیان و كاراكته‌رێن هێژا یێن هه‌ین، گازنده‌كرن ل سه‌ر تۆرێن جڤاكى بۆ پارتیه‌كێ (ملتزم) ب (پره‌نسیپێن) حزبایه‌تى و (ده‌سپلینا) حزبى كاره‌كێ باش نینه‌, لێ ما ئه‌م ل چى سه‌رده‌مینه‌ هه‌تا داخوازێ ژ هه‌مى پارتیان بكه‌ین كو ب ملیۆنانن پێگریێ ب ده‌سپلینا پارتى بكه‌ن؟ باشتره‌ ئه‌و جهێ یان كه‌سێ گازنده‌ ژێ دهێته‌كرن ب ناڤ یان ئاماژه‌ ئه‌و پێگێریێ ب (ده‌سپلینا) پارتى بكه‌ن و نه‌ هێلن ئێك تاكه‌ كه‌س ژی ژ پارتى ڤارێ بیت نه‌مازه‌ ئه‌گه‌ر پرسێن ژیانێ یان هنده‌ك بابه‌تێن ب راستى هێژاى هندێ نین نكو تاكه‌ كه‌سه‌ك ژی ژ پارتى دلماى بیت. دیار بوو پارتى دلسۆزترین جه‌ماوه‌ر هه‌یه‌ و دیاره‌ ژی پارتى ل سه‌ر ئاستێ گشتى خزمه‌تا ده‌ڤه‌رێن خوه‌ ب پیڤه‌ره‌ك باشتر ژ هه‌مى عێراقێ و كوردستانێ كریه‌، به‌لكو پارتى گۆژمه‌كێ خزمه‌تگوزارێن تایبه‌ت ب كاراكته‌رێن خوه‌ ژی كریه‌. لێ ئه‌ڤ بابه‌تێ گازندێن پارتیان ل سه‌ر تۆرێن چڤاكى سڤك نه‌هێته‌ وه‌رگرتن و كه‌س ب تایبه‌تى بۆ خوه‌ حساب نه‌كه‌ت پشتراستم ئه‌ڤه‌ ژ دلسۆزیه‌ وه‌دیاره‌ ل ئاسته‌كێ تاكه‌كێ پارتى هه‌ست ب سته‌مه‌كا تایبه‌ت كریه‌. ئه‌ز شیره‌تان ل كه‌سێ ناكه‌م و رێیێ ژی نیشا كه‌سێ ناده‌م، لێ ب تنێ دبێژم پارتى ب ده‌ردێ هنده‌كێن دى نه‌بن. ده‌گه‌هێن خوه‌ ڤه‌كن كه‌س ژ پارتى زێده‌ نینه‌، گازنده‌كرن نیشانا زیندیبوونێ یه‌ و پاشى نیشانا هندێ پارتى وه‌ك دیار ده‌گه‌هێ ره‌خنه‌ ره‌خنه‌ ل خوه‌گرتنێ كو بنه‌مایه‌كێ رێخستنا پارتی لاواز كریه‌، ره‌خنه‌كه‌ر نه‌ خائینن و نه‌لاداینه‌ ژی نه‌ ژی یاخى و ڤه‌ده‌رن. ژ من ڤه‌ لیژنه‌یه‌ك ب ده‌سهه‌لات و شیان دێ هه‌میان چاره‌سه‌ركه‌ت، بلا پارتى نه‌ بیته‌ قوربانى هنده‌ك خه‌مسار و بیرۆكراتێن كێم ئاگه‌ه ژ مه‌ترسیا ڤێ دیاردێ.

كۆڤان حسێن
تاكه‌ شانسێ مله‌ته‌كێ هه‌ى كو بریارا سیاسیا خوه‌ ل سه‌ر شێوه‌ و ئه‌ندازیا رێڤه‌برنا وه‌لاتێ خوه‌ بده‌ت هه‌لبژارتنه‌، هه‌ر چه‌نده‌ هه‌لبژارتن هه‌مى وێنه‌یێ دیمۆكراسیه‌تێ نینه‌ و زۆر دیمۆكراتیه‌تێن تازه‌ براژرده‌ێن خراب به‌رهه‌م ئیناینه‌، رۆلێ مالێ سیاسى ئاستێ ژیانێ و گه‌شه‌بوونا سامانێ مرۆڤى نه‌ریتێن جڤاكى و گۆتارا میدیایێ تا راده‌یه‌كا باش دیار دكه‌ن، هه‌لبژارتن بۆ كوردستانێ پتر ژ رامانه‌كێ هه‌یه‌, ئه‌گه‌ر ل كوردستانێ شیان هه‌لبژارتنه‌كا پاك و بێ ئالوزى ئه‌نجام بده‌ن، ئانكو شه‌رعیه‌ت دان ب ته‌خه‌كا سیاسیا كوردى ل سه‌ر ئاستێ ناڤخوه‌ و جیهانێ ده‌ربه‌كا راست و ڤه‌زایا چڤاكێ كوردستانێ بیت، ل به‌رامبه‌ر عێراقه‌كا هه‌مى پرۆسا سیاسیا وێ پشتى هه‌لبژارتنا كه‌فتى به‌ر گومانا سه‌خته‌كاریێ. ئانكو بهێزبوونا بنگه‌ه و سه‌نگا گۆتارا كوردى ل سه‌ر ئاستێ عیراقێ, چو بهانه‌ك چو هێجه‌ته‌ك نینه‌ هه‌لبژارتن بهێنه‌ پاش ئێخستن. پرۆسه‌كا سیاسیا ماقیلا مله‌ته‌كێ نابیت بیته‌ قوربانێ حه‌زا چو سیاسیه‌كێ یان گرۆپه‌كێ. كوردستانێ ب تێرا خوه‌ هه‌لبژارتن پاشخستینه‌ و پێدڤیه‌ دووماهی ب ڤى پێشنیازا سه‌قه‌ت بهێت. هه‌لبژارتن هه‌مى گاڤێ دڤیا ل ده‌مێ یاسایێ خوه‌ دا بێنه‌كرن بێى گوهدانا هیچ بهانه‌كێ، ژبلى ئه‌ڤێن ژتاقه‌تا مرۆڤان ڤه‌ده‌ر، هه‌لبژارتن بۆ كوردستانێ دڤیا بیته‌ مودێله‌كا وه‌رزانه‌ و پێڤه‌رێ خوه‌ سازدانا سیاسى و مه‌یدانا ناسكرنا هه‌مى هێزا و دووماهیك بریارا سیاسیا, هه‌ڤوه‌لاتى دێ ل هه‌لبژارتنا دا سه‌نگ و بهایێ هه‌مى ئالیان دیار كه‌ن و ره‌وایه‌تیا كاروانێ ئابورى ئاسایشێ و سیاسه‌تێ و هه‌مى كه‌رتا هه‌لسه‌نگینن. پاشخستن ره‌ڤینه‌ و ره‌ڤینه‌كا شه‌رمینه‌ ژی ژ بریارا گه‌ل و دادگه‌ها مله‌تى, هه‌ڤوه‌لاتى ژی ساده‌ نه‌مایه‌ ل ڤى وه‌لاتى و ده‌نگ ژی ره‌نگه‌ هێدى بێ حساب و كتاب نابن. ره‌وایه‌تیدان ب سیاسیا هێدى نه‌ دیكۆره‌ به‌لكو ئه‌نجام و به‌رهه‌م مه‌حه‌كێ هه‌لسه‌نگاندنێ نه‌.كێ گومان ژ ئه‌دائا خوه‌ هه‌یه‌ كێ نه‌شیایه‌ ل ئاست داخوازیا جه‌ماوه‌رێ خو بیت كێ نه‌شیایه‌ ل ئاست به‌رپرسیاره‌تیا سیاسى دا بیت، باشتره‌ ناڤمالا خوه‌ رێك بێخیت و پێداچوونا خوه‌ بكه‌تن نه‌ك مافێ هه‌لبژارتنا ژ مله‌تى بستینیت..