NO IORG
Authors Posts by كۆڤان حسێن

كۆڤان حسێن

كۆڤان حسێن
220 POSTS 0 COMMENTS

4

كۆڤان حسێن
بۆ كاره‌كێ به‌ركه‌فتى و جهێ سه‌ربلندیێ بیت، قه‌د كورد د خه‌ما خوینرشتنێ نینن، ده‌ما بابه‌ت به‌ركه‌فتى بیت و ناكه‌ڤنه‌ خه‌ما حه‌یفه‌كێ ل جهه‌ك هه‌ژى بهێته‌دان، رامانا وێ ئه‌و نینه‌ كوشتن تشته‌ك باشه‌، لێ ئه‌ڤه‌ دونیا هه‌یى كوشتن یا هه‌ى، یا هه‌یى د رێیا هێژا دا یا هه‌یى دچیته‌ خانه‌یا جهاله‌تێ دا، هه‌ر زاته‌كێ كوردان د به‌ر كوردینێ دا شه‌هید دا بیت جهێ سه‌رفه‌رازیێ یه‌. ژبلى وێ ژ راست بیت تاوانه‌ و هیج بهانه‌كێ هه‌لناگریت. كه‌رتكه‌ك ئاخێ بۆسته‌ك ئه‌ردى ژن ره‌ڤاندنه‌ك هه‌ر بهانه‌كا ئه‌رزانا نوكه‌ كورد ل سه‌ر دهێنه‌ كوشتن، هه‌مى گیانێ مرۆڤه‌كێ نائینن, ئه‌ڤ قه‌سابخانه‌یا مه‌ بۆ گیانێ خوه‌ دانا ژبلى خه‌مساریێ و جه‌هاله‌تێ ناڤه‌ك دى هه‌لناگریت, ئه‌ڤ زانكۆ و په‌یمانگه‌هه‌ ئه‌ڤ ئاغا و كویخه‌ ئه‌ڤ عه‌شیر و بنه‌ماله‌، ئه‌ڤ حزب و سه‌نته‌ره‌ ئه‌ڤ میدیا و هه‌لاهه‌لایه‌ ئه‌ڤ پێشكه‌فتنا ئه‌م نازێ پێ دبه‌ین ئه‌ڤ ئارمایا هه‌یى .بۆ چنه‌ ئه‌گه‌ر ل سه‌ر ساده‌ترین سه‌ده‌م كه‌سه‌ك بێته‌ كوشتن. قوربانیێن كوشتنا ره‌ش و روودانێن سه‌یاران گه‌له‌ك ژ قوربانێن شه‌ڕێ داعشێ پترن. چاره‌ چیه‌ قانوون هه‌تا كه‌نگى دێ وه‌ك لاستیكێ بیت، كوردستان پێدڤى ب ژ جه‌كرنێ یه‌ ژبلى پێشمه‌رگه‌ى و یێن كارێ وان دخوازیت چه‌ك بهێته‌ قه‌رده‌غه‌ كرن و بازارێ وان بهێته‌ گرتن. ژبلى ڤێ هیچ شیره‌ت و ئامۆژگارى و نه‌سیحه‌ت و هیڤى فایده‌ ناكه‌ن. 30 ساله‌ كوردستانێ لیسته‌كا درێژا قوربانیێن به‌رئه‌لاهیا چه‌كێ هه‌یه‌، نه‌ته‌وێن ئێگرتى ژبه‌رى چه‌ند سالان دیاركر كو بهایێ (كلاشینكۆفه‌كێ) ل یه‌مه‌نێ بهایێ (مریشكه‌ك ساخه‌) به‌ر به‌لاڤترێن وه‌لاته‌ چه‌ك تێدا به‌لاڤ و ئه‌رزان، به‌لێ باوه‌رناكه‌م هندى كوردستانێ كوشتن هه‌بیت ل سه‌ر بێ قیمه‌تترین بابه‌ت. هه‌ر چه‌نده‌ چه‌ك د كه‌ڤندا پشكه‌ك ژ راپێچانا كوردان بوویه‌ ژ خه‌نجه‌رێ هه‌تا (ناتۆیێ) یى. لێ ژ راستى فه‌ره‌ كوردستان بیره‌كێ ل ڤێ پرسێ بكه‌ت. دوماهیه‌كێ بۆ ڤان روودانێن بێ واته‌ دیار كه‌ت. ئه‌ڤ كوشتنا به‌لاش جه‌رگبره‌ هه‌ ررۆژ ل ڤى وه‌لاتێ مه‌ تازیه‌ و گیانێ تۆلڤه‌كرنێ و كوشتنێ خورت دبیت. زانكۆیێن كوردستانێ داخواز كرینه‌ دووڤچوونه‌كا زانستى بۆ ڤێ دیاردێ بكه‌ن، ئه‌رێ سه‌دمێن ڤێ كوشتنێ چنه‌ ژ هه‌ژاریه‌؟ ژ نه‌خوانده‌واریێ یه‌ ژ چیه‌ بێگومان سه‌ده‌م هه‌نه‌ دێ چاره‌ ژى هه‌بن. باژێرێن مه‌ نه‌خانده‌وار و هه‌ژار ژى بوون هندى ڤێ سه‌رده‌مێ كوشتنا بێ رامان نه‌كریه‌. ژ چه‌ككرن نوكه‌ پێدڤیه‌كا ژیانێ یه‌، ژبلى ڤى! كه‌س ئارام نینه‌ و نابیت و دبیت ل سه‌ر ساده‌ترین سه‌ده‌م ئه‌م ده‌رسۆكێ ڤاژى بكه‌ین و تازیه‌كا به‌رده‌وام دانین….

10

(1)
د میتالۆجیا گرێكییان دا ئه‌فسانه‌كا بالكێش هه‌یه‌، دبێژن مرۆڤ د به‌رێ دا ئێك ره‌گه‌ز بوون، هه‌م نێر و هه‌م مێ بوون، د روودانه‌كێ دا ب ڤیانا خوه‌دا خوه‌ندا ژی ڤه‌بوون و ژ هینگێ هه‌تا نوكه‌ وه‌ك كه‌سه‌ك ل نیڤا خوه‌ یا دى بگه‌ریت و باركوردێ وان وه‌ك ئێك بیت،كه‌سێ نیڤا خوه‌ نه‌دیتیه‌، ئه‌ڤێن دبێژن مه‌ یا دیتى، ئه‌و بخوه‌ وه‌سا ته‌خمین دكه‌ن پشتى بۆرینا ده‌مى، دیار دبیت باركورد و كۆدێ وان ئێك نینه‌, هه‌مى چیرۆكێن ئه‌ڤینێ هه‌ول و بزاڤن بۆ دیتنا كۆدێ دیتر، ئه‌وێ هه‌مى كه‌س ل پارچا خوه‌ یا دى دگه‌رهیت, ڤێجا ئه‌ڤ رۆژا ئیشقێ شه‌قیبوونه‌كا مرۆڤانه‌ بۆ دووڤچوونێ ل پشكه‌كا وندا و وه‌ك دیار ناهێت دیتن ژى ژ سه‌ربۆرێن ئاشقان دیارى ره‌وش ب چى ره‌نگى یه‌…سلاڤ ل ئه‌ڤینداران
(2)
هه‌مى گاڤێ ل هه‌مى شارستانیان دا ئه‌ڤینێ په‌یوه‌ندیه‌ك بنچینه‌یى دگه‌ل جوانیێ هه‌یه‌، راسته‌ جوان رێژه‌یی یه‌، لێ پیڤه‌ره‌كه‌ سه‌ره‌كیه‌ ژى بۆ هه‌لبژارتنێ و ئه‌ڤینێ. دبیت جوانى ژ جهه‌كێ بۆ ئێكێ دى جێوازى هه‌بن ل گۆر شارستانى و جوگرایا جیهانێ. لێ جوانى، هه‌تا به‌رى هه‌یامه‌كێ دانه‌كا خوداى بوو كه‌س نه‌ دشیا د نه‌خش و ئه‌ندازه‌یا وێ ده‌سڤه‌بده‌ت، هه‌تا (نشته‌رگه‌ریێن جوانكرنێ) هاتین هێدى تشته‌ك ب جوانیا خوداى نه‌ما، و نه‌ما كه‌س ب وێنێ و رازى بیت، ڤان هه‌یامان كابرایه‌كێ (چینى) ژنه‌كا جوان دخوازیت و پشتى چه‌ند زارۆیێن كریت ژدایكدبن ژ ژنكا خوه‌ ب گومان دكه‌ڤیت بۆچى زارۆیێن وى دكرێت؟. ل دادگه‌هێ دۆسیێ ڤه‌دكه‌تن و دیار دبیت ژنكا ژماره‌كا زۆرا (عه‌مه‌لیات تجمیل) یێن كرین و زاۆ یێن ب داییا خوه‌ یا (ئۆرجینالا) بێ (پۆتكس و فیله‌ر و سلیكۆن) ڤه‌ چووین.
و ئه‌ڤجا.. ئاشق و ئه‌ڤیندارێن نوكه‌ چه‌ند دێ دیاربن دخاپاندینه‌، ده‌ما به‌رهه‌مێ دروست ده‌ردكه‌ڤیت… سلاڤ ل ئه‌ڤینداران

18

كۆڤان حسێن
جودا ژ هه‌مى جارێن دیتر، نه‌مازه‌ پشتى هه‌لبژارتنا پارتى وه‌ك خودان پترین كوسی و ئێكه‌ما كوردستانێ زۆر ب بێده‌نگى یاریا سیاسیا خوه‌ دكه‌ت هه‌تا نوكه‌ ژبلى هنده‌ك گۆتنان وه‌ك پارتى هێشتا ب فه‌رمى تشته‌ك زه‌لال نه‌گۆتیه‌ ژبلى هندێ ئه‌و ل گه‌ل باسكه‌كێ زۆرێ گومانا وى چوویه‌ هه‌ڤپه‌یمانیه‌كێ كو ژ راستى هه‌لویستێن هێلا سه‌دڕى هه‌مى گاڤێ له‌قله‌قۆك بێ هیچ ئاسۆیه‌كێ رۆهنن و هیج پرۆژه‌كى ئاشكرا بۆ پرسا كوردى و ئاریشێن وێ یێن 100 سالى نه‌ك هه‌ر نینن، به‌لكو زۆر جاران ژى دژوار سه‌رده‌رى كریه‌ هه‌ر چونه‌ بیت ل میدیایێ. ئه‌و چ خالن پارتى و سه‌دڕى دگه‌هینن ئێك ژ بلى یا ئاشكرا نه‌ڤیانا نوورى لمالكى، دبیت په‌یاما بارزانى بۆ هنده‌ك نابژیڤانا ئاشكرا بیت كو بارزانى دیاركریه‌ ل گه‌ل ئالیه‌كێ نا چنه‌ حوكمه‌ته‌كێ نانى مه‌ بڕیت و مووشه‌كا ره‌وانه‌ى كوردستانێ بكه‌ت، نه‌مازه‌ هه‌كه‌ ئه‌لترناتیفه‌كێ شیعى ب هێز هه‌بیت، سه‌ربۆرا كوردا ل گه‌ل شیعه‌یێن وه‌لائى ئاشكرا بوو كو (زه‌واج متعه‌) یه‌ و به‌رژه‌وه‌ندیا باسكێ شیعه‌یان هه‌تا راده‌كێ بوو. هه‌مى ئاشكرا دیاردكه‌ن ل دستوورى و ده‌ستكه‌فتیێن كوردى پووشمانن، هه‌ر چه‌نده‌ پارتى سه‌ركه‌فتى نه‌بوویه‌ ل ئێكرێزیا كوردى دا لێ پارتى سه‌ركه‌فتى بوویه‌ ل په‌یداكرنا به‌ره‌یه‌كێ ب هێز ل گه‌ل سونه‌ و هێزا مه‌زنا شیعه‌یان. ئێكرێزیا كوردى پرسێن لۆكال و پۆست نینن، ئاشكرایه‌ كورد ژى وه‌ك شیعه‌یان بووینه‌ دوبه‌ره‌ ل سه‌ر شێوه‌ و ده‌سته‌لاتا ل به‌غدا. وه‌ك سیاسه‌ت ئه‌ڤه‌ نۆرماله‌ لێ وه‌ك رۆمانسیه‌ت كوردان پێ خۆشه‌ ئێك ئال بن و ئه‌ڤه‌ ل ڤى سه‌رده‌مى زۆرا زه‌حمه‌ته‌. گه‌ر ئه‌سته‌م نه‌بیت.كورد ژى دابه‌شى به‌ره‌یێ ئیرانێ و مقاوه‌مێ بوونه‌ و ئالیه‌ك ژى دگه‌ل دی دا كه‌نداڤى و ئه‌مریكا و پرۆژێ (ئیبراهیمى) بوونه‌، ئه‌ڤه‌ ئاشكرایه‌. لێ چه‌ند كوالسیۆنا پارتى سه‌دڕى و سونه‌ دێ خورار بیت نه‌مازه‌ ئوپوزسیونه‌كا خودان درون و مووشه‌ك هه‌یه‌. هه‌ولویستێ ڤێ كوالسیۆنێ چیه‌ ل سه‌ر پرسێن كوردى، پارتى چ ته‌نازول و گه‌ره‌نتى دایه‌ ڤان لایه‌نان یان به‌روڤاژى نه‌مازه‌ پارتى سه‌ركێشا باسكێ محافزكار و نه‌ته‌وه‌یێ كوردى دكه‌ت هه‌تا وێ رادێ ئالێن دى یێن ئیراقى پارتى ب چو داخواز بناڤ دكه‌ت. ئه‌ڤ ئێكگرتنا ڤان هه‌ڤدژان، مۆدێله‌كا نوو یا سیاسه‌تێ یه‌ ب سپۆنسه‌ریا ئه‌مریكا یان شانس و قوماره‌كا سیاسی یه‌ ژ نه‌چارى هاتیه‌كرن. یانژى دابه‌شبوونا كوردان دژى تاكتیكه‌ك سیاسى یه‌ بۆ هندێ ل سه‌ر هه‌ردو سه‌ران بله‌یزن.

5

كۆڤان حسێن
پشتى روودانێن 31 ئابێ پارتى ته‌مامیا كوردستانێ كۆنترۆل كر و نه‌یارێ سه‌ره‌كیێ خوه‌ ژ مه‌یدانێ رامالى، وى ده‌مى سه‌رۆكێ ئیرانێ (هاشمێ ره‌ڤسنجانى) د سه‌ره‌دانه‌كا فه‌رمى دا بۆ ل ئه‌فریقیا، ب له‌ز هاته‌ كۆنگره‌ك رۆژنامه‌ڤانى و دیاركر ئیران ب هیچ ره‌نگى رازى نابیت ئالیه‌ك سیاسى ب تنێ ل كوردستانا ئیراقێ بالا ده‌ست بیت، ته‌مامیا چیرۆكێ ئاشكرایه‌ و ب چ ره‌نگى جاره‌كا دى به‌لانسا هێزێ هاته‌ راستكرن و پارتى و ئێكه‌تى ب كریار گه‌هشتن وێ باوه‌ریێ كو دڤیا (به‌لانسا ترسێ) وه‌ك خوه‌ بمینیت و رێكه‌فتنا ستراتیژى تالیێ سه‌رگرت و ژ راستى ژى وه‌سا هات گۆتن جوداهى د ناڤبه‌را پارتى و ئێكه‌تیێ دا وه‌ك یا د ناڤبه‌را (كۆكا كۆلا و پێپسى كولا) دایه‌، ئه‌و هه‌مى رێكه‌فتن و دابه‌شكرنا ده‌ستهه‌لاتێ ل بن چاڤدیریا ئه‌مریكا هه‌تا نوكه‌ ژى دهێنه‌كرن، پارتى و ئێكه‌تى جاران میدیا سیبه‌را خوه‌ وه‌سا ئاراسته‌ دكه‌ن، دێ بێژى ره‌نگه‌ سوبه‌هى ببیته‌ شه‌ڕ, د بنه‌كۆكا خوه‌دا هه‌ردو ئالى وه‌سا رێكه‌فتى نه‌ ب هیچ ره‌نگى شه‌ڕێ (گه‌رم) نه‌كه‌ن و هه‌ر كه‌سێ بیت مه‌ترسى بۆ سه‌ر ڤێ رێكه‌فتنا نه‌ راگه‌هاندى ژ من ڤه‌ دێ هێته‌لادان وه‌ك دانا (لاهۆرى). كو ژ راستا گه‌ف بوو بۆ سه‌ر به‌رژه‌وه‌ندیێن پارتى و ئێكه‌تى یێن ستراتیژى. د ناڤبه‌را پارتى و ئێكه‌تیێ دا ده‌ستهه‌لات و سامان و په‌ترۆل سه‌نگێ مه‌حه‌كێ نه‌، نه‌ك پۆسته‌ك ل ڤێرێ و وێراهه‌. ب رێز فازل میرانى زۆر جاران دیاركریه‌ كو به‌دیلێ ئێكه‌تیێ بۆ پارتى هه‌ر ئێكه‌تیه‌ و ژ به‌رى چه‌ند رۆژان ژى سه‌عدى پیره‌ گۆت كى دبێژیت رێكه‌فتنا سیاسى یا ستراتیژى نه‌مایه‌؟. كێ به‌لگه‌ك هه‌یه‌ نه‌مایه‌. ب كورتى بیاڤه‌كێ مانۆرێ یێ باش هه‌یه‌ پارتى ئێكه‌تى یاریێ تێدا دكه‌ن. جارا ئالێن سیاسێن كوردستانێ پێ مژوول دكه‌ن و جاران ژى جادده‌یا خوه‌ پێ سیار و جۆش دكه‌ن. ژ راستى پارتى و ئێكه‌تى ژ قالبێ لۆكالیێ ده‌ركه‌فتینه‌ بۆ ناڤ یاریه‌كا هه‌رێماتیك و راگرتنا به‌لانسا هێزێ و ئه‌گه‌ر ئه‌ڤ چه‌نده‌ پشكه‌ك ژى، ژێ راست بیت باشه‌ كوردان ژى شیانا له‌یزنێ ل سه‌ر چه‌ند هێلان هه‌بیت، به‌لێ ب ئاگه‌ه و هشیاریا ئێكودو، زۆرن ئه‌و گرژیێن د ناڤبه‌را پارتى و ئێكه‌تیێ دا دروست دبن، لێ هه‌مى په‌رواز و چارچووڤه‌ كرینه‌ ژ هێلا سۆر ده‌رباس نه‌بن، دبیت مه‌ به‌لگه‌ ل سه‌ر ڤێ چه‌ندێ نه‌بن، لێ ب ده‌هان روودانان ئه‌ڤ چه‌نده‌ پشتراستكریه‌، هه‌بوونا ڤان هێزان و یاریا وان یا نه‌په‌نى جارێ هیچ بیاڤه‌ك بۆ ئۆپۆزسیۆنه‌كا ژ راست نه‌هێلایه‌، ئه‌گه‌ر ئه‌م ده‌وله‌ت باین دا وه‌ك ئه‌مریكا ب (جۆت حزبا) یان وه‌ك بریتانیا ب (جۆت حزبا) به‌رچاڤ بین و ل زۆر وه‌لاتێن جیهانێ ژ ئه‌نجامێ ململانه‌كا دژوار سه‌رئه‌نجام دویانیه‌ك جێمكه‌ك سیاسى ئافریه‌ و ژیانێ ل وێ وه‌لاتى ئاره‌ستا دكه‌ت، قه‌ت باوه‌ر ناكم و نه‌كه‌ن د ناڤبه‌را پارتى و ئێكه‌تى دا دابران دروست بیت، ئه‌ڤه‌ جارێ بۆ ڤێ قووناغێ گه‌له‌ك دووره‌، لێ دبیت ترسا پارتى ژ فره‌كویخاتیا ئێكه‌تیێ جاران هنده‌ بابه‌ت ببنه‌ رۆژه‌ڤ و پاشى دهێنه‌ ژبیركرن.

4

 

 

كۆڤان حسێن
براده‌ره‌ك خوینده‌ڤانه‌كى باشه‌ ژ جامێریا خوه‌ لینكێ په‌رتووكه‌كێ ل سه‌ر پرسا كوردى ب دیتنه‌ك عه‌ره‌بى بۆ من هنارت ب سۆپاسى ڤه‌ په‌رتووكه‌ك تازه‌یه‌ و یا پڕى پێزانین و ده‌وله‌مه‌ندیه‌ ژ ناڤه‌رۆكا خوه‌ڤه‌. ب راستى نه‌ك هه‌ر ئه‌ڤ په‌رتووكه‌ به‌لگه‌ هه‌ر كه‌سێ ل سه‌ر كوردان نڤیسى، نه‌مازه‌ ژ ئالیێ سیاسى ڤه‌ دێ تووشى شۆكه‌كا مه‌زن بیت كا كوردان چ خاله‌كا لاواز هه‌یه‌ و ب چ ب شاره‌زاى جار ب ناڤێ خێل و عێلا، جار ب ناڤێ دین و ته‌ریقه‌تان نه‌ك به‌رس كورد ڤێكرا به‌رده‌انه‌، به‌لكو تژى بیرا كوردان ئه‌و ژه‌هره‌ كریه‌ هه‌تا نوكه‌ ژى ئه‌م ژ پاشماێن وێ خلاس نه‌بووینه‌. هه‌مى ده‌رده‌سه‌ریا مه‌ سیچێن داگیركه‌ران نینه‌، پشكه‌ك تاوان قه‌به‌حه‌تا مه‌ بخوه‌یه‌ وه‌ك كورد. لێ تشتێ سه‌رنجا مرۆڤى رابكێشیت، ئه‌وه‌ نوكه‌ شانده‌ك كوردى ل به‌غدایه‌ بۆ پرسێن كوردى، راستى ئه‌وه‌ ئه‌و ئه‌جندایێن نوكه‌ شاندێ كوردى ل به‌غدا دانوستاندنێ ل سه‌ر دكه‌ت، ژ ناڤه‌رۆكا خوه‌ڤه‌ هه‌ر هه‌ما پرس و بابه‌تن یێن ل ده‌ستپێكا چه‌رخێ بیستێ دئێنه‌ ئالۆگۆر كرن و هه‌مان بیاڤه‌ تێدا كورد یارێ دكه‌ن و هه‌مان لۆژیكه‌ سه‌رده‌ریێ ل گه‌ل دكه‌ت و كورد هێشتا ب رێژه‌ك مه‌زن هه‌مان قه‌ومێ وى سه‌رده‌مێ جه‌هاله‌تێ یه‌، لێ ب قات و ریباتن ڤێ جارێ. په‌رتو و به‌لاڤ و پڕ بۆچوون و تاگێرى بۆ ڤى و یێ دى. ئاشكراتر بۆ ناڤه‌ندێن ئوسمانیێن نوو و سه‌فه‌وى یێن تازه‌. چه‌رخه‌كێ سیاسى یه‌ قه‌ده‌غه‌یه‌ كورد ژ ڤێ چغزێ ده‌ركه‌ڤن یاریێ سه‌ربه‌خوه‌ بكه‌ن. ب حوكمێ جوگرافیا و مێژوویێ ئه‌م مه‌حكومین ب ڤێ قه‌ده‌رێ، لێ هێشتا كوردان نه‌شیایه‌ وه‌ك پێدڤى رێچكه‌ك كوردى دیاركه‌ت. شه‌همزاریا مه‌زنا مه‌ ئه‌وه‌ هه‌مى ده‌م و قووناغان كورده‌ك ئاماده‌ هه‌یه‌ ژ بازنێ ده‌ركه‌ڤیت و جاشاتیێ بكه‌ت، نه‌ك ژ نه‌ڤیانا خوه‌ و پاشخانه‌كا سیاسى به‌لكه‌ ژ ركا كاره‌كێ یان ره‌فتاره‌كا پرى پرسه‌ك كه‌سۆكى ب دیتنا وێ ژ نه‌ته‌وێ مه‌زنتره‌. ئه‌ڤه‌ متایه‌كێ هه‌رگاڤیێ ئاماده‌یه‌ بۆ داگیركه‌ران گره‌ڤێ ل سه‌ر بكه‌ن. خۆزى مێژوویا مه‌ ب ڤى ره‌نگى نه‌با. لێ دیارى د مێژوویا هه‌مى نه‌ته‌وه‌ و گه‌لان دا هه‌ما چیرۆك و چیڤانۆك هه‌نه‌.كێم نه‌ته‌وه‌ هه‌نه‌ وه‌ك كوردان ئه‌م كاره‌ساته‌ نه‌بن. لێ كێم نه‌ته‌وه‌ هه‌نه‌ وه‌ك كوردان نه‌شیا بن ڤێ پرسێ ئێكلاكه‌ن. باوه‌ر بیت ئه‌و بابه‌تێن نوكه‌ دئێنه‌ به‌حسكرن ل به‌غدا، هه‌ما بابه‌تن یێن به‌رێ ل ئیستانبۆلێَ و ته‌هرانێ و پاشى له‌نده‌ن و قاهیره‌ و لۆزانێ و سیڤه‌رێ دهاتن گۆتن و هه‌تا نها ژى ب شاره‌زایا ئینگلیزان وه‌ك پرسا كه‌شمیرێ بۆ ده‌مێ ب چه‌رخا چاره‌سه‌رى نه‌بن. دێ حوكمه‌ته‌ك دى ل به‌غدا ژ دایك بیت، دێ شیرى ده‌ته‌ هه‌ما ئالۆزیا سه‌د سالى ب ناڤ و ئالاڤه‌كێ نوو و كورد ژى دێ هه‌ر خوه‌ جه‌لده‌ ده‌ن و ئێكودو تاوانبار كه‌ن وه‌ك بێژى نه‌زانن ئه‌و بتنێ كۆمبارسن بۆ ڤێ یاریێ…

0

كۆڤان حسێن
هه‌بوونا ناڤێ پلنگى د زمانى دا بێگومان نیشانا هه‌بوونا ڤى توخمێ ده‌هبایه‌ ل كوردستانێ، هه‌بوونا پلنگى هند روودانه‌كا مه‌زن نینه‌، تشتێ گرنگ ئه‌وه‌ ئه‌ڤ ده‌هبه‌ ژ مێژه‌ ل جوگرافیا زاخۆ و ده‌وروبه‌ران نه‌هلایه‌ دیتن لێ نه‌ ژ مێژه‌ ل ده‌وروبه‌رێن گاره‌یى هاتیه‌ دیتن، ژبلى دیتنا وى ب به‌رده‌وامى ل سنوورێ برادۆست و گه‌رمیانێ ل كوردستانا ئیراقێ، ل گۆر هنده‌ك ژێده‌ران دووماهی شێر ل ده‌ڤه‌را ئاكرێ ل سالا 1932 هاتیه‌ دیتن ل سه‌ر ده‌مێ نێچیره‌كا پادشاهى یا وى ده‌مى. ئه‌ڤه‌ هه‌مى ئاسانه‌ لێ تشتێ نه‌ ئاسان سه‌رده‌ریا نه‌ دروست یا رایا گشتى ل سه‌ر هه‌بوونا ڤى ده‌هبه‌یى و ڤه‌رێژا وێ یا پڕى بابه‌تێن نه‌ هێژاى رۆژه‌ڤێ هاتین گۆتن وێ راستیێ دیار دكه‌ت كو هێشتا ل وه‌لاتێ مه‌ ب گشتى ره‌وشه‌نبیریا سه‌رده‌ریكرنێ ل گه‌ل ڤان بابه‌تان نه‌هاتیه‌ گشیكرن، ل دووماهیا سالێن نۆتان دا، پلنگه‌ك ل سنوورێ گاره‌یى هاته‌ كوشتن، هینگێ ژى ئه‌ڤ بابه‌تێ ئازریایى و گرنگیا هه‌بوونا (مه‌حمیا) دبیته‌ بابه‌ت بۆ هندێ هه‌بوونا خوه‌زایا گشتى بێته‌ پاراستن د ژینگه‌ها خوه‌دا بمینن دوور ژ زیانێ، چونكو درنه‌ده‌نه‌ و پاشى پاراستنا وان نه‌مازه‌ یێن ل به‌ر نه‌مانێ. راسته‌ بابه‌تێن ژ هه‌بوونا پلنگى گرنگترین هه‌یین، لێ پلنگ و به‌ڕاز و گورك و هه‌مى ده‌هبه‌ و درنده‌یێن كیڤى و ب مه‌ترسى ل كوردستانێ ئاكنجین ڤى وه‌لاتى نه‌ و خودان شووناسه‌كا تایبه‌ت یا ده‌ڤه‌را كوردستانێ نه‌. فه‌ره‌ هه‌وه‌كا گشتى هه‌بیت ل سه‌ر هه‌مى ئاسته‌كى بۆ پاراستنا ژیانا كیڤى ل كوردستانێ و بلا حوكمه‌تێ بۆدجه‌ بۆ پاراستنا وان هه‌بیت. ژ لایه‌ك دى ڤه‌ ل سه‌ر ئاستێ جڤاكێ دا ژى ئه‌م كوشتنا ڤان دڕنده‌یان ب نۆرمالى و وه‌رنه‌گرین. هه‌بوونا ڤان گیاندارێن كیڤى زه‌نگینیا وه‌لاتى دیاردكه‌ن و هنده‌ك گیاندار بۆ هنده‌ك وه‌لاتان بوونه‌ سۆمبلێن نه‌ته‌وه‌ى.كى دزانیت ئه‌ڤ پلنگه‌ هاتیه‌ چێ؟ ئه‌رێ بتنێ یه‌؟ ئه‌رێ چ وه‌كریه‌ ئه‌و بهێته‌ ڤێرێ؟ ئه‌رێ چى ل جهێ وى روودایه‌ هه‌تا ئاواره‌ بیت؟! بێگومان نه‌هاتیه‌ گه‌شت و سه‌یرانێ. بێگومان ئه‌وه‌ جارێ یێ بیانى یه‌ ل ڤى ده‌ڤه‌را تایبه‌ت، لێ هاتى دیتن چونكو ل بیراهیا كه‌سێ نینه‌ پلنگ ل ڤێ ده‌ڤه‌رێ هاتبیته‌ دیتن. ب هه‌ر حالێ هه‌یى گیاندار سنووران ناسناكن و نه‌دووره‌ ره‌وشا ژینگه‌هێ وه‌ بكه‌ت گه‌له‌ك توخمێن دى ژ گیاندار ل ڤى وه‌لاتى دیار ببن.
خۆزى كوردستانێ ل به‌هدینان جهه‌كێ پاراستى وه‌ك (مه‌حمیه‌) هه‌بیت بۆ پاراستنا ژیانا گیاندارێن كیڤى، نه‌ك باخچه‌كێ ته‌نگ و كێم خزمه‌تگوزاى ببیته‌ جهێ زیندانكرنا گیانداران ل ژینگه‌هه‌ك نه‌ساخله‌م دا. ئه‌گه‌ر گیاندار زمان هه‌بیت، بێگومان مه‌ساجا ڤێ پلنگى دێ ئه‌و بیت كه‌س خه‌له‌ت نه‌بیت بهێته‌ سنوورێ ڤى وه‌لاتێ نه‌زانیت سه‌رده‌ریێ ل گه‌ل ماف و پێدڤیێن گیانداران بكه‌ت، خۆزى ئیدارا پارێزگه‌ها دهۆكێ رۆژه‌كێ بیر ل هه‌بوونا مه‌حمیه‌كا تایبه‌ت بكه‌ت، هه‌ر چونه‌ وه‌ك ده‌ڤه‌را بارزان، به‌لێ ب مۆركه‌ك فه‌رمى.

51

كۆڤان حسێن
ل دووماهیا شه‌ڕێ ناڤخوه‌یێ ئه‌مریكا رۆژنامه‌ڤانه‌كى رۆمالا شه‌ڕى دكر و شه‌ڕ راوه‌ستیا و هێدى ده‌نگوباس نه‌مان، رۆژه‌كێ سه‌رنڤیسه‌رى په‌یوه‌ندى ب رۆژنامه‌ڤانى و گۆتێ بۆچى ده‌نگوباس نینن؟. په‌ریشانێ رۆژنامه‌ڤان ژى گۆت ده‌نگوباس نینن و كارێ من رۆمالا جه‌نگى یه‌ و جه‌نگ راوه‌ستیا، سه‌رنڤیسه‌رێ رۆژنامێ گۆتێ ئه‌ڤه‌ نه‌خۆش بهانه‌یه‌ بۆ مه‌ ده‌نگوباس نه‌بن (گوتگوتكا) فرێكه‌، گرنگ رۆژنامه‌ ڤالا نه‌بیت، ئه‌ڤه‌ دیده‌نێ زۆره‌كا رۆژنامه‌یێن ئه‌مریكى یه‌ و ب هزاره‌ها رۆژنامه‌ و گۆڤار لێ به‌لاڤدن و رژاندن و دیاركرنا بابه‌ته‌كێ هندى ده‌هاڤێژته‌ بۆ وان گرنك و بازارى پێ بكه‌ن هنده‌ راستى گرنگ نینه‌ و جاران ژى دچیته‌ د خانا (ئیبتزازێ) دا، ئه‌ڤه‌ هه‌ر كه‌سێ ل میدیایێ كار بكه‌ت ڤان هونه‌ر و رێیا با دزانیت، ئارمانج گرتنا مسرۆر بارزانى قه‌د (لوجه‌ لله) نینه‌ و ناچیته‌ د خانا دژایه‌تیا گه‌نده‌لیێ دا وه‌ك نوكه‌ بوویه‌ بابه‌تێ میدیایێ, ئه‌گه‌ر بریار بیت دووڤچوونا هه‌بوون و شیانان تاكه‌ كه‌سان بهێته‌كرن ل بن ناڤێ (من این لك ئه‌ڤه‌؟) بێگومان دێ ده‌رگه‌هێ جه‌هنه‌مێ ڤه‌بیت، چونكو ل ڤى وه‌لاتى كه‌س ژ راستى كه‌س هنده‌ پاك نینه‌ ل گۆر پیڤه‌رێ ئه‌خلاقى وه‌ك فریشته‌ دیاربیت، ئه‌م ل جیهانه‌كا تایبه‌تا رۆژهه‌لاتى دژین زۆر ژ تشتێن ل جیهانێ گه‌نده‌لى ل گۆر كۆلتوورێ مه‌ شانازى و رومه‌تداریه‌. ئارمانج گرتنا سه‌رۆكێ حوكمه‌تێ و راكێشانا وى و سه‌رقالكرنا وى ب هندێ هه‌ر رۆژ به‌رسڤا رۆژنامه‌كا زه‌ر بده‌ت, ژ راستى كاك مه‌سرۆر ستۆپ و نه‌ما ئێدى كه‌سێن ڤالا و بێ به‌رنامه‌، هه‌وه‌ سه‌رقال و مژوولێ به‌رسڤدانا هنده‌ك بابه‌تان كه‌ن كو ژ خه‌یالێ ڤه‌هاندینه‌. په‌یداكرنا سیناریۆیان بۆ ماله‌كا ب روومه‌ت وه‌ك بنه‌مالا بارزان كارێ نوكه‌ نینه‌ كه‌ڤنه‌ شۆپه‌كا درێژه‌ و هه‌تا نوكه‌ هه‌نه‌ نه‌گه‌هایه‌ هیچ قۆناغه‌كێ و هیچ پرسه‌كا ژ ڤى ره‌نگى ژى پشتراست نه‌بوویه‌. هنده‌كا هه‌مى عه‌مرێ سیاسى و شیانێن خوه‌ هه‌تا مرنێ بۆ ڤێ كه‌یسێ ته‌رخانكرن و (صفر الدین) ده‌رچوون و شه‌همزارى وێ هه‌مى كه‌ربێ بوون یا دارشتى. سیته‌مێ داراى و بانكى ل ئه‌مریكا هنده‌ ساده‌ نینه‌ كه‌سه‌ك ل چ ئاستێ بیت بشێت ده‌رباس كه‌ت یان پاراسپى كه‌ت و رژدیكرنا ل سه‌ر ڤى بابه‌تى مسۆگه‌ر دچیته‌ د خانه‌كا دى یا سه‌رێ سیاسى دا ل گه‌ل پارتى و به‌رنامێ پارتى. شه‌ڕێ گه‌نده‌لیێ و به‌رپاكرنا چاكسازیێ قه‌ت رێیه‌كا خه‌ملاندى نینه‌ ب (گولا) به‌رنامێ حوكمه‌تێ یان راستتر بێژین به‌رنامێ كاك مه‌سرۆرى زۆر (كون ستێرك) ئازراندنه‌ و ئه‌ڤه‌ به‌رژه‌نكه‌ك وێ یه‌، ڤێجا خودێ دزانیت كا داهێنه‌رێ ڤێ پرسێ و یێن ل پشت وێ ل كیڤه‌ هاتیه‌ (پێڤه‌دان) ئه‌ڤجا كاروانێ چاكسازیێ و شه‌ڕێ گه‌نده‌لیێَ و پێشكێكرنا خزمه‌تگوزاریان بۆ كوردستانێ باشترێن به‌رسڤه‌. نه‌ هه‌ر پرسه‌كا كه‌سێ به‌رسڤ نه‌دا راسته‌. بێده‌نگى به‌رسڤا زكره‌شایه‌ ل ناڤخوه‌ و ده‌رڤه‌. ئه‌ڤجار پرۆژێ پارتى جهێ باوه‌ریا خه‌لكێ یه‌ و جهێ شۆك و نه‌ره‌حه‌تیا هه‌مى ئه‌نتى پارتیایه‌ و پاشى نه‌یارێن پرۆژێ نه‌ته‌وه‌ى. هه‌ركه‌سێ جورئه‌ت بكه‌ت پۆسته‌كێ وه‌ك سه‌رۆك وه‌زیران وه‌ربگریت چ حزب بیت یان كه‌سه‌ك بیت بێگومان تێرا هندێ هشیارن بزانن به‌رامبه‌ر دێ په‌نایێ بۆ هه‌مى ره‌نگه‌ شه‌ڕه‌كى ببه‌ن، نه‌مازه‌ شه‌ڕێ ده‌روونى و سڤككرنا تشتێ ب بها و مژوولكرنا حوكمه‌تێ ب بابه‌تێن لاوه‌كى ڤه‌.به‌لێ ستۆپ كاك مه‌سرۆر به‌لێ ستۆپ ژ به‌سڤدانا ده‌نك و باسێن(دره‌و و زه‌ر).

1

كۆڤان حسێن
جارێ تاكه‌ سازیا مایى میدیا زه‌ر و بێ سه‌روبه‌ر، فۆكسا خوه‌ ئاراستا نه‌كرى سازیا هێزا پێشمه‌رگه‌یه‌، نه‌ گرنگه‌ بیرا سیاسیا هه‌لگرێ چه‌كى چیه‌، هندى ناڤێ وى پپَشمه‌رگه‌ بیت لێ ژ راستى هێزا پێشمه‌رگه‌ى نه‌ تاكه‌ سازى یێن جهێ شانازیا نشتیمانى و نه‌ته‌وایه‌تى بیت. ئه‌م نا چینه‌ وى ئاستێ وه‌سا دیار كه‌ین كو دێ چاوانیا هونه‌رێ جه‌نگ و شه‌ڕان نیشانى ده‌رجه‌دارێن هێزا پێشمه‌رگه‌ى كه‌ین. ئه‌و ب خوه‌ هه‌مى سه‌ربۆر و شانازینه‌ بۆ ئه‌ركێ خوه‌، لێ ژ راست هێزا پێشمه‌رگه‌ى كو ل شوینا جیهانێ شه‌ڕێ تیرۆرێ دكه‌ت (60) وه‌لات ئه‌ندامێن فیدراسیۆنا شه‌ڕێ تیرۆرێ نه‌ ل سه‌ر ئه‌ردى تنێ هێزێن ئیراقێ و كوردان باشۆر و رۆژئاڤا د شه‌ڕى دانن. ئه‌رێ ژ راست جیهانێ ئه‌ركێ خوه‌ به‌رامبه‌رى قوربانیا هێزا پێشمه‌رگه‌ى ئه‌دا كریه‌؟. ئه‌رێ شه‌ڕێ نوكه‌ یێ تیرۆرێ شه‌ڕه‌ك (جه‌بهه‌وى) نینه‌ شه‌ڕه‌ك پارتیزانى یه‌ و پێدڤى هنده‌ك ئالاڤێن دى یێن شه‌ڕكرنێ نه‌ وه‌ك پرسێن هه‌والگرى و چه‌كه‌كێ نه‌ (ته‌قلیدى) مینا (دروونا) و هێزا ئاسمانى. ئه‌رێ ئه‌ڤ جیهانه‌ بۆچى هێزا پێشمه‌رگه‌ى هێژاى هندێ نابینیت چه‌كێ ئاسمانى ژ ره‌نگێ باله‌فرێن (f 16) بده‌نه‌ هێزا پێشمه‌رگه‌ى چ به‌ربه‌ست هه‌نه‌ چه‌كێ پێشكه‌فتى شوینا جیهانێ هه‌میى شه‌ڕى دكه‌تن ب چه‌كه‌ك هێَشتا یێ شه‌ڕێ جیهانیێ دوویێ یه‌.
دبیت بهانه‌یێن هندێ هه‌بن كوردستان نه‌ ده‌وله‌ته‌، ئه‌رێ نابێژین بۆچى نه‌ ده‌وله‌تین، چونكى به‌رسڤێ ژ خاپینۆكیا زۆره‌كا ب بهایێن سیاسى پشتى رێفراندۆمێ بۆ گه‌لێ كوردستانێ دیار بوون. ئه‌رێ بۆچى داعش جاره‌كا دى كوردستان راستى ڤێ گێژه‌ڤانكێ كر؟. ئه‌رێ بۆ هندێ نینه‌ دورویاتیا فیدراسیۆنا شه‌ڕێ تیرۆرێ دیاركه‌ت. سه‌ره‌ده‌ریا ل گه‌ل هێزا پێشمه‌رگه‌ى وه‌سا بیت وه‌ك صۆپا ل وه‌رزێ هاڤینى، ئانكو ئه‌گه‌ر شه‌ڕ نه‌بیت هێزا چه‌كدار گرنگ نینه‌. ژ راستى هه‌بوونا هێزه‌كا چه‌كدارا ب هێز پڕى چه‌ك و راهێنان بۆ هندێ نینه‌ ل جیهانێ شه‌ڕ دروست بیت، به‌لكه‌ بۆ هندێ شه‌ڕ نه‌بیت ئانكو هێز ئه‌وه‌ بشێت په‌نا برنا به‌ر هێزێ سنوور داركه‌ت, تیرۆر ل وان گۆشا شه‌ڕى دكه‌ت ب هه‌مى ره‌نگ و ئالاڤه‌كێ هێزه‌كا نیمچه‌ ل گۆر پیڤه‌رێن شه‌ڕان یا ل ئاستێ خوه‌ هه‌بیت. تیرۆر هزره‌كه‌ ب ساناهى بدوماهی ناهێت و به‌رهنگاربوونا تیرۆرێ هه‌مى گاڤێ ب چه‌كى نینه‌, یا راست پڕى باژێرێن مه‌ هزرێن داعشێ نه‌ ل زۆر هه‌لكه‌فتان دا سه‌رێ خوه‌ هلدده‌ن و وه‌ك گه‌فا مه‌زن ئه‌ون نه‌ك یێن چه‌ك و به‌رامبه‌رى پێشمه‌رگه‌ى. ئه‌رێ ئه‌م ڤى شه‌ڕێ ب وكاله‌ت بۆ جیهانێ به‌رامبه‌رى چ دكه‌ین و گه‌نجێن خوه‌ قوربان دكه‌ین؟، راسته‌ ئه‌م به‌ره‌ڤانیێ ژ خوه‌ دكه‌ین لێ یار راست بیت ئه‌م ره‌نگڤه‌دانا جڤاكه‌ك نێڤده‌وله‌تى دكه‌ین یێن كورد پشتى رێفراندۆمێ هێژاى ئازادیێ نه‌ دیتین. ئه‌ڤ شه‌ڕه‌ هه‌مى شه‌ڕێ مه‌ نینه‌، داعش بۆرصه‌كا نیڤده‌وله‌تیه‌ ل گۆر هنده‌ك به‌رژه‌وه‌ندیان دهێته‌ ئارسته‌كرن, جوداهى چیه‌ (حه‌شد یان داعش) هێرشى كوردستانێ بكه‌ن. سیاسیێن كوردستانێ دێ كه‌نى كه‌هن وێ باوه‌ریێ ره‌نگێ ره‌ش بیت یان سپى د چاڤێن نه‌یاران دا ئێكه‌، گه‌ندل بیت پان پاك هه‌ر كورده‌…

1

كۆڤان حسێن
د گوتارا سیاسیا كوردستانێ دا، مشه‌ دئێته‌ گوتن كو ڤالاهیه‌ك د ناڤبه‌را حوكمه‌تێ و وه‌لاتیان دا هه‌یه‌، ژ راست ڤالاتى هه‌یه‌ یان په‌یداكرنا ڤالاهیه‌كێ یه‌ و مه‌ره‌مه‌ك سیاسى، گوتارا سیاسیا نوكه‌ وى ره‌نگى دارشتیه‌ نه‌ك حوكمه‌تا كوردستانێ، به‌لكو هیچ حوكمه‌ته‌كێ ئه‌و شیانه‌ نینن و ئه‌ركێ وێ ژى نینه‌ ڤى حوكمه‌تا شیان مه‌زن و خودان ڤه‌رێژ په‌یدا ببن، ئه‌رێ ئه‌رێ حوكمه‌تێ ئه‌وه‌ وه‌ك باب ره‌فتارێ بكه‌ت ژ هه‌مى ئالاڤێن به‌رهه‌مئینان و دابه‌شكرنێ به‌رپرس بیت و یه‌كسانیێ په‌یدا كه‌ت وه‌ك هنده‌ كۆمۆنیست بۆ دچن، یان ل گۆر گرێبه‌ستا جڤاكى پرۆسا حوكمرانى و ده‌وله‌تداریێ پرۆسه‌كا دو سه‌ره‌ ل سه‌ر هه‌ر دو ئالیان ئه‌رك و ماف هه‌نه‌. چاوا ڤان سالێن بۆرى تژى سه‌رێ مه‌ كریه‌ كو حوكمه‌ت هه‌مى وار و سێكته‌ران و وه‌لاتى ب تنێ ب كاربه‌ره‌كێ بێ ئه‌رك و كار و پشكداریه‌. ئه‌رێ ئه‌م وه‌لاتى د حوكمه‌تێ ناگه‌هین یان حوكمه‌ت ئه‌ركێ خوه‌ جێبه‌جێ ناكه‌ت؟. هێشتا حوكمه‌تا مه‌ ناسنامه‌كا ئاشكرا نینه‌ و هێشتا وه‌لاتى ژى نه‌گه‌هشته‌ وێ باوه‌ریێ كو حوكمه‌ت ل كوردستانێ نه‌ ئاشكرا به‌ر ب بازارێ ئازاد و لیبرالیا سیاسى و ئابۆرى ڤه‌ دچیت و ئه‌ركێ حوكمه‌تێ ب تنێ هنده‌ك ئه‌ركێن كێمن. ئانكو بهێزترین سیك و بازار ل به‌رامبه‌ر لاوازترین حوكمه‌ت د وارێ خزمه‌تگوزاریێن رۆژانه‌ دا، ئاشكراتر بێژین ته‌نێ ده‌زگه‌هه‌ك ئاسیشێ و پۆلیسێن بهێز د گه‌ل دادگه‌هه‌ك سه‌ربه‌خوه‌ و سه‌ربارى ل دارخستنا قانوونان بۆ ژیانێ، حوكمه‌تێ ل ڤى سه‌رده‌مى و ل گۆر ڤێ پێناسا نوكه‌ ل دونیایێ كار پێ دئێته‌كرن هیچ ئه‌رك و به‌رپرسیاره‌تیه‌ك دى، نینه‌ جڤاك و سیكا ئازاد شیانا هندێ هه‌یه‌ خوه‌ رێك بێخیت و ب ملیۆنان ده‌رفه‌تێن ژیانێ و بكارخستا شیانان په‌یدا بكه‌ت، ب ئاشكرا ره‌نگه‌گ نه‌ ئاشنابوونێ هه‌یه‌ د ناڤبه‌را وه‌لاتیێ هه‌ر تشتێ ب مافێ خوه‌ دزانیت بێ ل به‌ر چاڤكرنا ئه‌رك و قه‌رباێ كار و به‌رهه‌مێ وێ د جڤاكى دا و حوكمه‌ته‌ك خوه‌ نه‌چار دبینیت سه‌ره‌ده‌ریێ ل گه‌ل تێگه‌هه‌ك جودا و شیانه‌كا سنۆردار كرى دا كار كه‌ت. تایبه‌تكرنا هه‌مى سێكته‌ر و وارێن ژیانێ ژ گرنگترین سیمایێن حوكمه‌تێن ڤى سه‌رده‌مى یه‌، لێ هێشتا ل كوردستانێ و ئیراقێ جورئه‌ت نه‌كریه‌ ئاشكرا بێژن, لێ ب كریار به‌ر ب هندێ ڤه‌ دچن. ئه‌رێ ئه‌ڤه‌ پتر د خێرا جڤاكێ دایه‌، یان به‌روڤاژیا وێ كو سیسته‌مه‌ك ئابۆرى و سیاسى جودایه‌ و تاقیكریه‌ ژى ل زۆر وه‌لاتان و نه‌شیا یه‌ سه‌ركه‌فتنێ بینیت. ئه‌م وه‌ك وه‌لاتى ب قه‌ده‌ر قورساتیا خوه‌ داخواز كرینه‌ بۆ خوه‌ ئاشناكرن و گونجاندنا ڤى سیسته‌مى. به‌رڤاژى وێ هه‌ر رۆژ ره‌وته‌ك سیاسى دێ یاریان ب هه‌ستێن وه‌لاتى كه‌تن و كه‌سێ شیانا گوهۆرینێ نینه‌، كى ره‌وتا بێته‌ سه‌ر ده‌ستهه‌لاتێ دێ درێژیى دده‌ته‌ ڤى سیسته‌مى كو بانكا نێڤده‌وله‌تى و سازیێن دى یێن ئابۆرى یێن سه‌رمایه‌داریێ برێڤه‌دبن. (جبریل رجوب) سه‌رۆك وه‌زیرێ كه‌ڤنێ لیبیایێ گوت (معه‌مر قه‌زافى) ژ من خواست ئه‌ز رێكه‌كێ بینم راسته‌وخوه‌ پاره‌یێن (گازێ و داهاتێ) ده‌وله‌تێ راسته‌وخوه‌ بده‌م وه‌لاتیان ل گۆر سه‌رژمێریێ و ب یه‌كسانى. دیار كر كو مله‌تى پاره‌ دڤێن و پرۆژه‌ و جاده‌ و زانكۆ و خه‌سته‌خانه‌ و ئاسایش و پۆلیس و ژێرخانا وه‌لاتى نه‌ گرنگه‌ بۆ مله‌تى. هه‌مى كه‌س د به‌ریكا خۆرا سه‌یرى ده‌وله‌تێ دكه‌ت. جبریل رجوب ئاشكرا كر گوت من گوته‌ (قه‌زافى) ب ڤى ره‌نگى دێ ده‌وله‌ت هه‌ڕفیت و كه‌سێ ئه‌ڤه‌ نه‌كریه‌ سه‌رده‌مێ سۆمه‌ریان هه‌تا نوكه‌. گوت تو بكه‌ و ئه‌ز ئه‌نجامان قه‌بوول دكه‌م. ب هه‌ر حالێ هه‌یى قه‌زافى ژى جارا راست دبێژیت و دبیت وه‌سا بیت لێ كه‌سێ تاقی نه‌كریه‌..

4

كۆڤان حسێن
هه‌ر چه‌نده‌ بابه‌ته‌ك تایبه‌ت و زانستى یه‌ و فه‌ره‌ یێن بسپۆر ژێ باخڤن، لێ جارا پێشه‌یا رۆژنامه‌ڤانیێ وێ ده‌رفه‌تێ دده‌ته‌ مرۆڤى ژ هه‌لیل و مه‌لێن وه‌لاتێ خوه‌ باخڤیت، نه‌مازه‌ وكى هنده‌ك رویدانێن سه‌یر یان مژدار درست دبن. ژ به‌رى چه‌ند رۆژان ل بابه‌ته‌ك ئابۆرى ل ئاژانسه‌كێ دیاركربوو ل وه‌لاتێ سویدێ ره‌نگه‌ پاره‌ كاش نه‌مینن و نوكه‌ كته‌كا كێما دانعه‌مران پاره‌یێن كاش بكاردئینن وه‌ك رێزگرتن بۆ دابونه‌ریتان و سوید وه‌لاته‌كێ ئسكه‌نده‌نافیێ پێشكه‌فتى یه‌، وره‌نه‌ چاڤلێكرنا وێ بۆ مه‌ زه‌حمه‌ت بیت. لێ بۆ زانین ل (صۆمالێ) ژى خه‌ریكه‌ پاره‌یێن كاش نه‌مینن و كۆمپانیێن ته‌له‌فۆنان هلگرتنا پاره‌یان زۆر كێم كریه‌ و هه‌ر كه‌س دشێت ب بلانسا ته‌له‌فۆنێ پاره‌یێن خوه‌ بده‌ت. ئانكو ئه‌گه‌ر ئیراده‌یه‌ك هه‌بیت ئه‌سته‌م نینه‌ ئه‌م ژى ژ ڤێ گێژڤانكا پاره‌یان و وێ گه‌نده‌لیا تێدا دهێته‌كرن قورتال بین. نه‌بوونا بانك و ئاسانكاریێن وان ل كوردستانێ باشترین ده‌رگه‌هێ گه‌نده‌لى و بێئا گه‌هیا حوكمه‌تێ و سازیێن وێ یه‌ ل سه‌ر قه‌بارێ پاره‌ى و هاتنوچوونا وان و نه‌بوونا داتایێن پێدڤى بۆ دی جون و زاڤا پاره‌یان ل وه‌لاتى. هه‌مى رۆژێ سیناریۆیا تالانكرنا پاره‌ى ل بن ناڤێ ل وه‌لاتێ مه‌ رویده‌ن، ئه‌ڤه‌ چ پاره‌نه‌ یێن چنه‌؟ ژ كیڤه‌ هاتنه‌ و كیڤه‌ دچن؟. هه‌مى جارێ كه‌سه‌ك دێ كۆژمه‌كێ پاره‌ی حه‌به‌لۆش كه‌ت و ل سه‌ر شاشێن تیڤیان رۆندكان رێژن و ئه‌م وه‌لاتى ژى بۆ ب خه‌م دكه‌ڤین و حوكمه‌ت ژى هه‌ر خوه‌ های ژێ ناكه‌ت و دادگه‌ه ژى زۆرا كه‌ڤنه‌ د ڤى وارى دا. ئه‌رێ رستا (پارێن من چوون) چه‌ندا بێگونه‌هه‌.! ئه‌ڤه‌ پاره‌یێن چنه‌ بۆچى حوكمه‌ت دزانیت پاره‌یێن ته‌ چوون. بۆچى نزانیت یان ئاگه‌ه نینه‌ وه‌ختا پاره‌ بۆ ته‌هاتین؟ ئه‌رێ ئه‌ڤ پاره‌ ژ رویێ قانوونى ڤه‌ پاقژن ژ رویێ ئایینى و ئه‌خلاقى ڤه‌ حه‌لالن، ئه‌ڤه‌ سازیێن داراى و بانكى دڤیا هه‌بن داهات و خه‌رجیێن كه‌سێ و ژێده‌رێن وان ئاشكرا و زه‌لال بن و هێدى كه‌س تووشى ڤێ شه‌لاندنێ نابیت و كه‌سێ شیان نینن ژ باج و خه‌راجان ژى بره‌ڤیت و راستیا هه‌بنا هه‌ژارى و نه‌داریێ ژىدێ ل ڤێرێ دیار بیت هنده‌ك كه‌س تووشى شه‌لاندنێ بوونه‌، هه‌مى كه‌سێ هزرا هه‌ژاره‌كێ برسى بۆ دكر. ئه‌رێ قه‌بارێ وى پاره‌ چه‌نده‌ یێ نوكه‌ د مالان ڤه‌ و بێكار و مراندى ئه‌رێ ئه‌ڤ پاره‌ چاوا دزڤریت؟ كێ های ژێ یه‌؟. ب راستى بۆ حوكمه‌تێن ئیراق و كوردستانێ كێماسیه‌كا مه‌زنه‌ سیسته‌مه‌ك بانكى مۆدێرین و سه‌رده‌میانه‌ ل ڤى وه‌لاتى نه‌بیت. بۆچى كۆمپانیه‌ك دشێت كارتا پارا دروست كه‌ت و كه‌س نه‌شێت سه‌خته‌كاریێ بكه‌ت یان حیلێ بكه‌ت؟ یان ژ قه‌رى بره‌ڤیت؟. بۆچى حوكمه‌ته‌ك نه‌شێت ڤێ چه‌ندێ بكه‌ت و هه‌مى بانكێن وێ بتنێ (قاسن) هه‌مى خه‌ما حوكمه‌تێ یه‌ پڕ كه‌ت و سه‌رێ هه‌یڤێ ڤالا بكه‌ت؟.دبیت ئه‌م هویراتێن ڤێ پرسێ نه‌زانین، چونكو زانسته‌كێ سه‌ربه‌خوه‌یه‌. لێ وه‌ك وه‌لاتیه‌ك ساده‌ دبێژین بۆچى پارێن مه‌ ژى نابن (ژماره‌ و كارت) ڤى پاره‌یى هه‌میێ ژ مالا بینن ده‌ر بۆ وه‌به‌رهینانێ و فایده‌ى ژێ بكه‌ن وه‌ك زۆر وه‌لاتان.

website security
WP Facebook Auto Publish Powered By : XYZScripts.com