به‌غدا ئه‌گه‌ر چه‌ندا لاواز و بێده‌سته‌لات ژى بیت، ناڤه‌ندا شه‌رعیه‌ته‌ك نێڤده‌وله‌تیه‌ پایته‌ختێ وه‌لاته‌كێ یه‌ ب ناڤێ عێراقێ، ئانكو ل كوردستانێ ریفراندۆم هاته‌ ئه‌نجامدان، زۆر هه‌لویست و كارڤه‌دان هه‌بوون، لێ سه‌رئه‌نجام پرس ل به‌غدا ئێك ئالى دبیت و ئاریشا كوردستانێ، ب كورتى ل گه‌ل به‌غدایه‌, ته‌نگاڤبوونا (ئه‌نقه‌ر و ته‌هرانێ) یا ئاشكرا یه‌ بۆچى، ئه‌ڤان به‌غدایه‌كا لاواز دڤێت نه‌وه‌كو به‌غدایه‌كا ب هێز و خودان سه‌روه‌رى و ده‌سهه‌لات. به‌غدا بۆ كوردستانێ مه‌ره‌مه‌ ئانكو رازى و نه‌رازیبوونا هه‌ر ئالیه‌كێ، د ڤێ پرسێ دا، بهایه‌كێ تایبه‌ت ل بازاركرنا سیاسى دا نابیت. تركیا و ئیران دوچه‌مسه‌رێن ب هێزن ل ڤێ ده‌ڤه‌رێ، لێ مسۆگه‌ر ئه‌و هێزا ئه‌و پێ ناڤدار نه‌ سه‌رده‌مێ وێ مایه‌ و نه‌ژى باندۆرا وێ مایه‌ و گرۆڤه‌ ژى ل سه‌ر ره‌نگڤه‌دانا هه‌لویستێ وان دیاره‌، ئه‌گه‌ر ئه‌ڤه‌ رۆژه‌ك با ژ رۆژێن ئه‌و ب تێگه‌هێ هێزێ دئاخفتن، ره‌نگه‌ نوكه‌ كوردستان داگیركرى با، ته‌نگاڤیا ئه‌نقه‌ره‌ و ته‌هرانێ ژ هندێ یه‌ كاره‌كێ دیمۆكراتى و زه‌لال و ب رێیه‌كا ئازاد هاتیه‌كرن، له‌ورا سه‌رئه‌نجامێن وێ دێ ب بوورینا ده‌مى و ده‌وله‌تا دیفاكتۆیێ ته‌مام بن. بۆ تركیا و ئیرانێ ئه‌و چه‌نده‌ جهێ مه‌ترسیێ یه‌ كه‌س ل ڤێ ده‌ڤه‌رێ زه‌مانه‌تا پاراستنا به‌رژه‌وه‌ندیێن وان نه‌كه‌ت, ئه‌گه‌ر نو, تركیا و ئیران به‌رپرسن ژ گه‌شه‌بوونا كوردستانێ و لاوازیا عێراقێ دكووراتیێ دا. كوردستان باشتر دزانیت چاره‌سه‌ریا مه‌ د جودابوونێ دا ل گه‌ل به‌غدایه‌, هندا ئه‌وا به‌غدا كرى په‌له‌ژانیه‌كا بێ سه‌روبه‌را نه‌خواندى بوو، دوور بوو ژ لۆژیكا سیاسى و شویه‌كا میدایى و پرۆپاگه‌نده‌كا هه‌لبژارتنان بوو, ئه‌گه‌ به‌غدا قه‌نج دزانیت كوردستان نازڤریته‌ ڤه‌ پێشى 25/9 ب هیچ ره‌نگى. لێ كوردستان وێ ژى دزانیت به‌غدا گرێكا مه‌ ڤه‌ دكه‌ت، رازیبوون و ئه‌ێكرنا ڤێ پرۆسێ ل به‌غدا ته‌مام دبیت نه‌ك ل جهه‌كێ دى، ئه‌ڤجار نوكه‌ بیت یان پشتى وه‌خته‌ك دى بیت. كوردستان نوكه‌ د سه‌رده‌مێ هه‌مبێزكرنا (صه‌دمێ) دایه‌ باج ل سه‌ر هیچ هه‌لویسته‌كى نینه‌، هه‌تا ره‌ش ئارام بیت و هه‌مى بزڤرن سه‌ر لۆژیكا خوه‌. و پاشى هه‌مى رێك دچن به‌غدا…..

ئه‌وا گه‌لێ كوردستانێ ڤیا ب رێیه‌ك دیمۆكراسى و ب ئالاڤه‌كێ سه‌رده‌میانه‌ و ل به‌رامبه‌ر هه‌مى جیهانێ ئه‌نجامدا و ئه‌نجامه‌كێ ماقیل و به‌ر ئاقل دیار كر، كو مله‌ته‌كێ كه‌ڤنارێ رۆژهه‌لاتێ دیرۆك و جوگرافیا یێ زولمه‌كا مه‌زن لێكریه‌, كوردستانێ ئه‌ڤ جیهانا دیمۆكراسى و ئازاد هه‌مى راستێ شه‌رمه‌كا مه‌زن كر، كوردستانێ هه‌مى بها و سه‌نجێن ئازادیخواز و دیمۆكراسیێ ل ڤێ جیهانێ ئێخستن به‌ر (ئیمتحانێ) و ل ئاست ئازایه‌تیا گه‌لێ كوردستانێ هه‌مى جیهان هاته‌ زمان هنده‌ك ب (دژ) و هنده‌ك (نیڤ دژ) و هندك (پشته‌ڤان) و هنده‌ك (بێ ده‌نگ) و هنده‌ك (حێبه‌تى). ئه‌ڤه‌ پرۆسه‌كا درێژه‌ ئانكو ئه‌ڤ كارێ مه‌ ئه‌نجامداى گه‌له‌ك ژ رێفراندۆمه‌كێ پتر بوو و ئه‌نجامێن وێ هه‌ر ئه‌و نینه‌ ئه‌وا هاتى راگه‌هاندن، هێشتا گه‌له‌گ ئه‌نجام یێن ماین, كوردستانێ دووماهیك ب سه‌د سالێن سه‌ره‌ده‌ریه‌كا سه‌قه‌ت ل گه‌ل به‌غدا ئینا و جیهان هه‌مى هاتیه‌ سه‌رخه‌تێ، شێوه‌كێ دى یێ سه‌ره‌ده‌ریێ لازم و پێویسته‌ بۆ قووناغا داهاتى. هه‌مى ئه‌و هه‌لویستێن هاتین وه‌رگرتن ژى ژ لایێ جیران و به‌غدا ڤه‌، ب تنێ بۆ هندێ نه‌ كو وان هه‌لویست هه‌بوونه‌ و ژبلى ڤێ جارێ تشته‌ك دى پێجینابیت بكه‌ن و سه‌رده‌م سه‌رده‌مێ خه‌ندقان دن و هێرشا نینه‌ و ئانكو ب راستى هه‌ر ئێك گریا خوه‌ دكه‌تن ب قه‌مه‌ت ئێشانا خوه‌ ژ رێفراندۆما كوردستانێ ده‌نگڤه‌دان هه‌بوویه‌, هه‌مى گه‌فێن وان ژ ترسا وانه‌. جارێ دیار نینه‌ نه‌ته‌وه‌ێن ئێگرتى و ئه‌مریكا و فرنسا چى ئه‌لترناتیفك دى هه‌یه‌ بۆ كوردستانێ و ئێراقێ لێ وه‌ك دیار پرسا كۆنفدرالیێ دهێته‌كرن و ئه‌ڤه‌ چاره‌سه‌ریه‌كا تام ناڤه‌ندیه‌ ژمن ڤه‌ بۆ ڤێ قووناغێ باشه‌ و چونكو دێ ده‌وله‌تا كوردستانێ ب هه‌مى سازیێن خوه‌ ڤه‌ ئاڤابیت, بتنێ هنده‌ك رێكه‌فتن دێ ل گه‌ل عێراقێ هه‌بن ل وارێن ئابوورى و به‌ره‌ڤانیێ، ئه‌ڤ جیهانه‌ نه‌چاره‌ رێكه‌كا سیاسى په‌یدا بكه‌ت نه‌چاره‌ ل به‌رامبه‌ر ملیۆنان ده‌نگان رێزێ بگریت و وه‌ك ناڤ بژیڤان و بێته‌ ناڤ مه‌یدانێ. پشتى ریفراندۆمێ قه‌ت وه‌ك به‌رى رێفراندۆمێ نابیت و كاروانه‌كێ درێژه‌ و ئه‌نجام هێدى هیدى دیار دبن..

هه‌مى دیرۆكا جیهانێ پشكه‌كا قومارێ تێدایه‌ ژ شۆره‌شا فرنسى و ئه‌نجامێن وێ هه‌تا شۆره‌شا سه‌ربخوه‌یا ئه‌مریكى یان شۆره‌شێن (پۆلیفار). بێگومان دیرۆك د بزاڤێ دایه‌ و چو ده‌مه‌كێ دیرۆك ل چو قووناغه‌كێ نه‌ (قرسیه‌) و خوه‌ ل بزاڤه‌كا به‌رده‌وام دا دبینیت. ل ڤێ جیهانێ چو وه‌لاته‌ك ئاڤا نه‌بوویه‌ هه‌كه‌ د هنده‌ك قووناغێن سه‌خت دا نه‌ بۆریبت. كوردستانێ هه‌مى قووناغێن مله‌ته‌كێ هێژاى وه‌لاته‌كێ سه‌ربخوه‌ بره‌یه‌. سیاسه‌تا به‌رژه‌وه‌ندیخوازا جیهانێ ژى هه‌مى گاڤێ د گوهاتنێ دایه‌ و چو جاره‌كێ بۆ هه‌تا هه‌تا وه‌ك خوه‌ نه‌مایه‌. ئاشكرا هه‌كه‌ سیاسه‌تا جیهانێ وه‌ك خوه‌ مابا و نه‌هاتبا گوهارتن، ره‌نگه‌ ئه‌م ل گۆر رێكه‌فتنا (سیڤه‌رێ) ژمێژه‌ ده‌وله‌ت باین؟! لێ هه‌مى گاڤێ به‌رژه‌وه‌ندى د پاوان خوازیا خوه‌دا به‌رده‌وامن د گوهۆرینا سه‌متا خوه‌دا. سه‌ركردایه‌تیا كوردى و لۆژیكێ نوكه‌ سه‌ركێشیا سیاسه‌تێ ل كوردستانێ دكه‌ت قه‌نج دزانیت ده‌رفه‌تا نوكه‌ رۆخساى ژ هه‌مى ئالیان ڤه‌ ئاسان دوباره‌ نابیت, پشتى هه‌ر شه‌ره‌كێ جیهانى نه‌خشه‌ دهێنه‌ گوهارتن. شه‌رێ داعشێ شه‌ره‌كێ جیهانى بوو ،بێگومان دێ ده‌رهاڤێشته‌یێن خوه‌ هه‌بن و نه‌خشه‌ وه‌ك به‌رێ نازڤرن ڤه‌. چونكو وان ره‌نگه‌ نه‌خشه‌یان ژینگه‌ها داعشێ ئافراند، كوردستان جێ (مجازفه‌كێ). كه‌ت ب راگه‌هاندنا سه‌رخوه‌بوونێ. لى قه‌ت دڤیا ئه‌م ژبیر نه‌كه‌ین بێ ئه‌ڤ (مجازفه‌) یان ره‌نگ (قوماره‌) به‌دیلێ وێ بۆ مه‌ دیاره‌ زڤرینه‌ بۆ ده‌وله‌ته‌كا سه‌نترالا (تایفه‌گه‌ریا) (تیوكراتیا) چه‌رخێن ناڤین لێ ب (بۆیاغا شیعه‌یان) ڤێ جارێ. مه‌رجێ سه‌ركه‌فتنا هه‌مى شۆره‌شه‌كێ سه‌ركه‌فتن زامن نینه‌. لێ ترس ژ زامنیا سه‌ركه‌نه‌كه‌فتنێ نه‌ به‌هانه‌یه‌ كوردستان تووشى بێ هه‌لویستیێ بیت, كوردستان ب مودێله‌كا سه‌رده‌میانه‌ و ب پاشبه‌نه‌ده‌ك دیمۆكراتى و سڤێل روى ب روریێ جیهانێ دبیت سه‌نگێ (مه‌حه‌كێ) بۆ جیهانێ دێ راپه‌راندنا مافه‌كێ بنجینه‌یێ مرۆڤان بۆ كوردستانێ قه‌بوول كه‌ت یان نه‌. لێ ل ڤى جیهانێ زۆر وه‌لاتێن سه‌ربخوه‌ هه‌نه‌ و نه‌ ئه‌ندامێن (یۆ ئێ نێ) نه‌، لێ ده‌وله‌تێن (دیفاكتۆیێ) جیهان هه‌مى سه‌ره‌ده‌ریێ ل گه‌ل دكه‌ت. نموونه‌ (تایوان) (قوبرسا تركى) و گه‌له‌كێن دى. ئانكو ب كوردى و كوردى ئه‌مێ مافه‌كێ خوه‌ یێ ره‌وا ژ جاره‌نڤێسا خوه‌ تاقى كه‌ین دێ خوه‌ ل ئه‌نجامێ (رد الفعل) گرین و هه‌ناسه‌كا درێژ دڤیا هه‌بیت هه‌تا ئه‌نجام دیار بن. بێگومان نوكه‌ گه‌لێ كوردستانێ كه‌فتیه‌ بن باندۆرا (شه‌ره‌ك ده‌روونى)، لێ دڤیا ده‌ربازكه‌ین و گوه ل داخۆیانیێن لابه‌لا نه‌ده‌ین. هه‌كه‌ قومار ژى بیت بۆ ئارمانجه‌كا (ماقیل و نه‌بیله‌)؟؟!

راسته‌ تا نوكه‌ چو هێزه‌كا سیاسى ل كوردستانێ به‌رۆكێ (نه‌خێر) نه‌گرتیه‌ به‌ر، لێ ئه‌ڤه‌ وێ چه‌ندێ ناگه‌هینیت كو گه‌لێ كوردستانێ هه‌مى و سه‌دا سه‌د ل گه‌ل ریفراندۆمێ یه‌، هه‌كه‌ خوه‌ بۆ مه‌ره‌مێن سیاسى ژى بیت، د خوه‌ دا ئه‌ڤه‌ ژى كاره‌ك خراب نینه‌، ئه‌م هه‌ولا ئاڤاكرنا جڤاكه‌كێ سڤێل و دیمۆكراتى دده‌ین، لێ ژ به‌ر كو ئارمانج ئه‌وه‌ رێفراندۆم پتریا ده‌نگان مسۆگه‌ر كه‌ت، ب رێژه‌كا رێزدار و جهێ دلخۆشیێ. فه‌ر بیره‌كێ ل ده‌نگێن كه‌سانێن (خه‌مسار)، ئانكو وان كه‌سان بكه‌ین ئه‌وێن گه‌له‌ك سیاسه‌ت بۆ وان نه‌ گرنگ و نه‌گرنگ ژى ب چو ره‌نگى ئه‌ڤ وه‌لاته‌ دهێته‌ برێڤه‌برن و ره‌نگه‌ نه‌ گرنگه‌ ژى كوردستان ببیت ده‌وله‌ت یان نه‌‌و، لێ مسۆگه‌ر ئه‌و ژى هه‌ڤوه‌لاتینه‌، ره‌نگه‌ مژوولیا وان یان ب ژیانێ ڤه‌یه‌ د ناخێ خوه‌ دا هنده‌ بیر ل سیاسه‌تێ ناكه‌ن. ئالیه‌كێ دى كه‌سانێن (دوودلن)، ئه‌ڤ توخمه‌ كه‌سه‌كن كه‌فتینه‌ ل بن باندۆرا هه‌وا پرۆپاگه‌ندا هه‌ڤدژ، تووشى دودلیێ بوونه‌ ده‌نگى بده‌ن یان نه‌، پشكداریێ بكه‌ن یان نه‌. ئه‌ڤه‌ هه‌مى ل سه‌ر وێ گۆتارێ دمینیت ئه‌وا د ئاره‌سته‌كرنا جه‌ماوه‌رى دا دهێته‌كرن، هندى یا دوور بیت ژ حزباتیێ دى هنده‌ یا جه‌ماوه‌رى بیت. ئه‌ڤجا بۆ ڤان، ره‌نگه‌ ده‌نگێن هه‌تا نوكه‌ نه‌ مسۆگه‌ر ئه‌وه‌ بیره‌كا رژد لێ بێته‌كرن، ئه‌وان ژى راكێشن سه‌ر سندۆقێن ده‌نگدانێ و مسۆگه‌ركرنا ژماره‌كا نۆرمال و جهێ رێزێ. كوردستان وه‌لاتێ مه‌ هه‌میانه‌ و هه‌تا وه‌لاتێ وانه‌ یێن ل دژى هه‌مى پرۆسێ، لێ هندێ نا گه‌هینیت بۆچوون و به‌رژه‌وه‌ندیێن سیاسى و ئابوورى جاران دبنه‌ هه‌لویستێن سیاسى ژى. مسۆگه‌ركرنا ده‌نگێن به‌لێ مسۆگه‌ره‌. لێ دێ رێزێ ل نه‌خێر ژى گرین دبن هه‌ر بهانه‌كێ دا بیت….

ب كورتى و كوردى كورد دڤیا وێ راستیێ بسه‌لمینن كو كورد دكۆمكوژیێن دیرۆكێ دا درست بووین ل ڤێ ده‌ڤه‌را میزۆبۆتامیا به‌رپرس نینن، فه‌رمانێن ل سه‌ر كوردێن ئێزدى و كۆمه‌لكوژیا (سێمێلى) و یێن وه‌كى وێ كورد وه‌ك مله‌ته‌ك بێ ده‌سته‌لاتا سیاسیا خوه‌سه‌ر ژێ به‌رپرس نینه‌، كورد خودانێن كۆمكۆژیا كه‌ركووكێ نینن وه‌ك نه‌ته‌وه‌، ئه‌ڤه‌ ره‌ڤین نینه‌ ژ روودانێن بۆرى و رووداى, لێ ل ده‌مێ هه‌لبژارتنان مانا ل گه‌ل كوردستانێ بۆ نه‌ته‌وه‌ێن جودا جودا, پرسێن دیرۆكى سه‌رهلدده‌ن, ئه‌رێ ئه‌ڤ مله‌تێن دى پێدڤى ب چه‌ند (مقدارێ) باوه‌ریێ نه‌ كو جاره‌كا دى ئه‌و فه‌رمان و كۆمكوژى و تێهه‌لدانێن دروست بووین دوباره‌ نابن، ئه‌وا راستى بیت بۆ برایێن مه‌ یێن جێواز ژ مه‌ ژ ئالیێ نه‌ته‌وه‌ى و ئاینى ڤه‌, ئه‌وه‌ ب كورتى ژ 1961 كو بزاڤا كوردى نیمچه‌ ده‌سته‌لاته‌ك هه‌بوویه‌، چو روودانه‌كا هێژاى هندێ بیت بێته‌ به‌حسكرن نینه‌, ئه‌ڤه‌ گرۆڤه‌كێ ب هێزێ كوردانه‌ ده‌مارگێریا نه‌ته‌وه‌ى هه‌یه‌ و نه‌ژى یا ئاینى و مه‌زهه‌بى ل سه‌ر ئاستێ گشتى. هه‌مى رۆژهه‌لات ناس و گه‌رۆك و كوردولۆژیكێن كوردناس وێ راستیێ دسه‌لمینن كوردان شیانا حه‌واندنا ژبلى خوه‌ هه‌یه‌، مانا (مه‌سیحى و ئێزدی و كاكه‌ى و ئه‌هلێ حه‌ق و عه‌له‌وى) ل ناڤ كوردستانێ به‌سه‌ بۆ هندێ وێ راستیێ بسه‌لمینن, لێ ئه‌ڤه‌ هندێ نا راگه‌هینیت كورد ئینكارا هنده‌ك سه‌رپێجى و (زلم كاریه‌كێ) نه‌كه‌ن د درێژیا دیرۆكێ دا, ئه‌م دڤیا (دل و وژدان) فرهه‌بین ل خوه‌ و خه‌له‌تێن خوه‌ ببۆرین. مه‌ دڤێت ده‌وله‌ته‌كێ ئاڤا بكه‌ین. دڤیا دڤێ ده‌وله‌تێ دا هه‌مى مافه‌كێ سیاسى و جڤاكى و كلتۆرى بۆ مله‌تێن د گه‌ل كوردان دژین مسۆگه‌ر بكه‌ین. ژ (حوكمێ زاتى هه‌تا هه‌رێمێن فیدرالى) بۆ (مه‌سیحى و توركمان و ئێزدیان)، دڤیا د ڤێ ده‌وله‌تێ دا مه‌سیحى ب (كلدان و سریان و ئاشۆرى و ئه‌رمه‌ن) ڤه‌ توركمان (سونه‌ و شیعه‌) ڤه‌ ئێزدى و كاكه‌ى و جهى و زه‌رده‌شتى و هه‌مى ئاین و نه‌ته‌وه‌ ب ئه‌و په‌رێ ئازادیێ بژین و شانازیێ ب تایبه‌تمه‌ندێن خوه‌ بكه‌ن وه‌ك وان دڤێت نه‌ وه‌ك مه‌ دڤێت, كوردستانه‌كا تێدا مه‌سیحى و توركمان و ئێزدى ئازاد و هاوتا نه‌بن ل گه‌ل پرانیا خه‌لكێ كوردستانه‌كا سه‌قه‌ته‌. هه‌مى پیرۆزیێن ڤان نه‌ته‌وه‌ و ئاینان دڤیا پیرۆز و رێزدار بن. (ئالا و زمان و كلتۆر)، ڤان مله‌تان دڤیا ب قه‌مه‌ت ئالا و زمان و كلتۆرێ كوردى بهادار و ب رێز بن.كوردستان ب ڤى ره‌نگى جوانه‌ ئه‌م هه‌مى كوڕێن ڤێ وه‌لاتینه‌, نه‌ گرنگه‌ كێ ژ به‌رى كێ ل سه‌ر (به‌را نڤیسیه‌) گرنك ئه‌م فێرێ هونه‌رێ سه‌ره‌ده‌ریا شارستانى بین, گرنگ مه‌ هه‌مى ئالیان ده‌رس و عیبره‌ت ژ دیرۆكێ وه‌رگربیت, ده‌وله‌تا كوردستانێ دڤیا گه‌شه‌كێ وه‌سا بخولقینیت و ژێرخانه‌كا یاسایى یا موكم ئاڤا بكه‌ت ببیته‌ قیبله‌گه‌ها هه‌مى خه‌لكێ كوردستانێ ب هه‌مى نه‌ته‌وه‌ و ئایین ڤه‌، ده‌وله‌تا كوردستانێ د هه‌مى سمول و مه‌راسیمێن (تشریفاتى) دا دڤیا ره‌نگڤه‌دانا پێكهاتێ خوه‌ دیار بكه‌ت. زۆر ئاسانتره‌ ئه‌م پێكڤه‌ وه‌ك هه‌ڤوه‌لاتى بژین ل شینا ب كه‌رب و دلنه‌خۆشى بژین. ئاین و نه‌ته‌وه‌ هه‌مى پیرۆز و بهادارن و بۆ وژدان و خودێ نه‌, لێ كوردستان بۆ مه‌ هه‌میانه‌, دڤیا ل ڤى وه‌لاتى تاكه‌كه‌سه‌ك ژى هه‌ست ب سته‌مێ نه‌كه‌ت. هه‌كه‌ نه‌‌و ئه‌و هینگێ هێشتا ئه‌م ئازاد نه‌بووینه‌، هندى كه‌سه‌ك ل ڤى وه‌لاتى هه‌ست ب ره‌نگه‌گێ نه‌ژادپه‌رستیێ بكه‌ت هه‌ست ب بێ رێزى ب باوه‌رێن خوه‌ بكه‌ت ئه‌و هێشتا ئه‌م ئازاد نه‌بووینه‌ ب كوردى هه‌ما ئه‌م هه‌مى وه‌رجه‌كێ ئارامه‌ و ئازادى و یه‌كسانیا نه‌ته‌وه‌ى بۆ مله‌تێن دگه‌ل خوه‌ به‌رجه‌سته‌ نه‌كه‌ین ئه‌و هێشتا ئه‌م نه‌ دئازاد و سه‌ربخوه‌نه‌.

ئه‌وا راست بیت ریفراندۆم بخوه‌ وه‌ك پرۆسه‌ تشته‌ك پیرۆز نینه‌، هه‌مى گاڤێ هه‌مى مله‌ته‌كێ مافێ ئه‌نجامدانا وێ بۆ هه‌ر پرسه‌كێ هه‌یه‌، وه‌ك دیار زۆر گڤاشتن ل به‌غدا دهێنه‌كرن، بۆ هندێ جارێ نوكه‌ كوردستانێ ژ ده‌ست نه‌ده‌تن و ده‌ڤه‌رێ نوكه‌ تووشى هیچ ژبه‌ر ئێك ترازانه‌كێ نه‌كه‌ن، وه‌ك دیار ئه‌و (55) سه‌ده‌مێن كوردان بۆ ئه‌نجامدانا پرۆسا جودابوونێ ژ عێراقێ دیاركرین عێراق نه‌چاربوویه‌ یان ب كورتى شیعه‌ نه‌چار بووینه‌ چاره‌كێ بكه‌ن و عێراق ژ سه‌رده‌ستێ وان پارچه‌ نه‌بیت, وه‌ك دیار هه‌مى وه‌لاتان و ره‌نگه‌ ئیرانێ ژ هه‌مى ئالى پتر هه‌ولا هندێ دابیت شیعه‌ێن عێراقێ راكێشیته‌ هنده‌ك (تنازلاتان) بۆ مانا كوردستانێ، ئانكو ئه‌و سه‌ده‌مێن كورد پێ یاخیبۆین، نه‌هێلن و ب راستى ژى زه‌حمه‌ت نینن, كوردستانێ دڤێت پشكداریا سیاسه‌تا عێراقێ بیت ماف و ئه‌ركێن وێ پاراستى بن و سه‌ده‌مێن جودابوونێ نه‌مینن, بۆ ته‌خه‌كا سیاسیا عێراقى نوكه‌ ئه‌ڤه‌ ره‌نگه‌ محال بیت لێ د هه‌مان ده‌م دا (چاره‌یه‌) دبیت ب بریاره‌كا نێڤده‌وله‌تى هنده‌ك زه‌مانات بۆ ئالێن كوردى دابین ببن. دبیت كورد د ڤێ مانۆرێ دا یاریان ناكه‌ن ئه‌ڤ جاره‌ درژدن و عێراقێ هه‌لۆیسته‌ك و بهانه‌كا جهێ باوه‌ریێ نینه‌, برینا بۆدجا كوردستانێ و نه‌جێبه‌جێكرنا ماده‌یا 140 عێراق خستیه‌ د گۆشه‌كا لاواز دا ل به‌رامبه‌ر لایه‌نێ كوردى، من باوه‌رى ب چو په‌یمانه‌كا شیعه‌یان نینه‌، لێ د سیاسه‌تێ دا هه‌ر گاڤا ئاسته‌كێ باشێ به‌رژه‌وه‌ندیا به‌رجه‌سته‌ بۆ دڤیا مرۆڤ یاریكه‌ره‌كێ باش بیت و هه‌مى هه‌له‌یه‌كێ كو كێمترین زیانا ل ده‌ڤ خوه‌ بهێلیت په‌یره‌و كه‌ت. عێراق راستى وێ باوه‌ریێ هاتیه‌ كوردستانێ بریارا خوه‌ دایه‌ و ره‌نگه‌ د كه‌نالێن دبلۆماسى دا هه‌مى جیهان عێراقێ سووچبار بكه‌ت كو نه‌شیا هه‌رێمه‌كا خوه‌ رازى بكه‌ت یان هه‌ر چو نه‌بیت بهانان بۆ جودابوونێ نه‌ رۆخسینیت, ریفراندۆم بخوه‌ نه‌ ئارمانجه‌ رێیه‌كه‌ بۆ ده‌ربازبوونێ ژ قوناغه‌كێ بۆ ئێكا دى. دبیت دانوستاندن ل سه‌ر بهێنه‌كرن, عیراق ئاماده‌یه‌ چ بكه‌ت كو هه‌رێما كوردستانێ هندا نه‌كه‌ت, كى ئاماده‌یه‌ زه‌ماناتان بده‌ته‌ كوردستانێ كو ئه‌م ل سه‌ر ده‌ڤه‌رێن خوه‌ یێن ژ ده‌رڤه‌ تووشى شه‌رى نابین ئانكو ده‌ڤه‌رێن مادیا 140.عیراق ئاماده‌یه‌ قه‌ربۆیا ئابووریا كوردستانێ بكه‌ت وه‌ك زڤراندنا بودجا چار سالان بۆ كوردستانێ كو دبنه‌ نێزیكى (50) ملیار دۆلاران, ب راستى هه‌كه‌ ئه‌ڤه‌ بهێته‌كرن نه‌ خرابه‌ هه‌یامه‌كا دى ژى عێراقى بین پشكدارى ده‌سته‌لاتێ بین خودان ئابووره‌كا ب هێز بین و خودان هه‌مى ئاخا كوردستانێ بین، باوه‌ر ناكه‌ن ئه‌ڤ لۆژیكه‌ ل عیراقێ هه‌بیت, ژ من ڤه‌ عیراقێ ژ لایێ ده‌روونى ڤه‌ خوه‌ حازركریه‌ ژ ده‌ستدانا كوردستانێ قه‌بوول بكه‌ن نه‌ك چاره‌سه‌ر كرنێ…

گۆڕان و (نه‌خێره‌ك)
شه‌رمین…؟!
گۆران دویه‌م هێزا سیاسیا كوردستانێ یه‌ ب گۆره‌ى هه‌بوونا كورسیكێن په‌رلمانێ كوردستانێ و ئه‌گه‌ر ب وێره‌كى دژاتیا رێفراندۆمێ بكه‌ت، بێ گومان دێ ل به‌رامبه‌ر جه‌ماوه‌رێ خوه‌ و به‌رۆكا (به‌لێ) تووشى شكه‌ستنه‌ك مه‌زن بیت. ژ من ڤه‌ گۆران زۆر شه‌رمینانه‌ تووشى دودلیێ بوویه‌. ئه‌سته‌مه‌ بشێت بریاره‌كا لۆژیكانه‌ بده‌ت ب وى مه‌رجى جه‌ماوه‌رێ خوه‌ ژده‌ست نه‌ده‌ت, به‌یانا گۆڕانێ دیار بوو رێفراندۆم وه‌ك پرسه‌كا نشتیمانى ژ (ئه‌وله‌ویه‌تێن) بزاڤا گۆڕان نینه‌, ئانكو پرسه‌كا نۆرماله‌ و ره‌نگه‌ د دانوستاندنێ دا ل گه‌ل پارتى سه‌ركێشا پرۆسا رێفراندۆمێ دا بگه‌هیته‌ وێ باوه‌ریێ یان پشته‌ڤانیا رێفراندوۆێ بكه‌ت یان هه‌ر چو نه‌بیت دژایه‌تیێ نه‌كه‌تن. گۆڕان قه‌نج دزانیت نوكه‌ ل سلێمانیێ ل سه‌ر میراتێ كاك ( نێوشیرانى) شه‌ڕه‌كێ مه‌زن هه‌یه‌. نه‌مازه‌ سه‌رهلدانا نیمچه‌ بزاڤه‌كا یاخیبۆیا پشته‌ڤانیا (نه‌خیر) بكه‌ت.گۆڕان نوكه‌ د شه‌ڕى دایه‌ ل سه‌ر پاراستنا جه‌ماوه‌رێ خوه‌. نه‌ك چو پرسه‌كا نشتیمانى و نه‌ته‌وه‌ى. هه‌كه‌ پارتى مانا جه‌ماوه‌رێ گۆڕانێ بۆ مسۆگه‌ر بكه‌ت، بێ گومان گۆڕان حزبه‌كا سیاسیا كوردستانێ یه‌ یه‌كه‌م كارێ وێ پاراستنا سه‌نگا جه‌ماوه‌ریا خوه‌یه‌ كو نوكه‌ (كۆمپانیا نالیا) و (ئێكه‌تى) شه‌ڕى ل سه‌ر میراتێ گۆرانێ دكه‌ن. به‌یانا گۆرانێ زۆرا لاواز بوو ژبۆ كوردستانه‌كا نوكه‌ د چه‌ندین قه‌یران و مه‌ترسیان دا. گۆرانێ مینا هه‌مى ئالیێن داخوازا پاشخستنا رێفراندۆمێ دكه‌ن. ده‌مه‌ك دیار نه‌كریه‌ كو گونجاى ئه‌نجامدانا پرۆسه‌كا گرنگ بیت, پارتى پێدڤى ب هه‌ناسه‌كا درێژه‌ هه‌ر چونه‌ بیت گۆڕان نه‌چیته‌ به‌رۆكێ نه‌خێر. گۆرانێ نوكه‌ چو خه‌مه‌ك نینه‌، ژ بلى هندێ جه‌ماوه‌رێ خوه‌ هندا نه‌كه‌ت. وه‌ك بێژى جه‌ماوه‌رێ پارتى (قوتوبه‌ند) كریه‌. شه‌رمینیا گۆڕانێ ژڤێ پرۆسێ رك وه‌ك هندێ یه‌ دل ل سه‌ربیت و ژ كه‌یسگرتنا ئه‌نجامان بترسیت ل ده‌مێ هه‌لبژارتنان. به‌رۆكێ به‌لێ دشێن گۆتنا گۆرانێ بۆ پشته‌ڤانیا سه‌رخوه‌بوونێ قه‌نج بكاربینن. د ئاراستا سیاسى دا و دشێن چاڤێ خوه‌ ل خوه‌ ڤه‌دزینا گۆڕانێ بنقینن, لێ مسۆگه‌ گۆران دێ پووشمانێ هندێ بیت خوه‌ ژ كاره‌كێ مینا رێفراندۆمێ ڤه‌دزیت, ده‌مێ داهاتى زه‌حمه‌ترین ده‌مه‌ تنێ بۆ بزاڤا گۆرانێ. پشتى پارتى تنازل ژ هه‌مى مه‌رجان كرى و گۆڕان راستى راسته‌كا دژاوركر, تنێ مخابنى دوویه‌م حزبا كوردستانێ بكه‌ڤیته‌ ڤێ ره‌وشا كه‌س حه‌سوودیێ پێ نه‌بیت.

نوكه‌ ئه‌سته‌مه‌ كه‌سه‌ك سیاسى بیت و بشێت خوه‌ دوور رابگریت ژ تجاره‌تێ، تجاره‌ت نوكه‌ و ل ڤى سه‌ده‌مى وه‌ك دینامۆیا سیاسه‌تێ یه‌، سیاسه‌ت ژى بخوه‌ جێبه‌جێكرنا به‌رنامه‌ و خواسته‌كێن تجاره‌تێ یه‌، لێ ل وه‌لاتێ مه‌ نه‌ سیاسى قه‌نج كارێ سیاسه‌تێ دكه‌ت و نه‌ ژى تجار ته‌مام تجاره‌تێ دكه‌ت. وه‌ك بێژى جێمكه‌كێ نه‌ته‌مامێ بێ ڤه‌رێژه‌، نه‌مه‌رجه‌ تجار سیاسى بیت یان پشته‌ڤانێ سیاسه‌ته‌كا وه‌لاتێ خوه‌ بیت, هه‌ر وه‌سا بۆ سیاسه‌تمه‌داران ژى هه‌یه‌ تجاره‌ت و بازرگانیێ بكه‌ن لێ ل گۆر بنه‌ما قانوون و رێساێن وه‌لاتێ خوه‌, ب كوردى من دڤێت بێژم سیاسى و بازرگان د ئێك كڤان دا كۆم دبن، لێ ب مه‌رجێ رێزێ ل قانوون و رێساێن وه‌لاتێ خوه‌ بگریت. ئه‌ڤجا چى سیاسه‌ت سه‌ركێشیا بازرگانه‌كێ بكه‌ت یان بازرگانه‌ك سه‌ركێشیه‌كا سیاسى بكه‌ت. گه‌له‌گ جاران سیاسیه‌ك دێ ب بازرگانه‌كێ كاره‌كێ كه‌ت و جارا ژى بازرگان ژى كارا ب سیاسیا دكه‌ن. ئه‌ڤا نوكه‌ ل كوردستانێ روودده‌ت نه‌مازه‌ ل سلێمانیێ و ئه‌و بازرگانێ دڤێت كه‌مپینا (نه‌خێر) بۆ رێفراندۆمێ راگه‌هینیت. تشته‌ك نۆرماله‌ تجاره‌ك بۆ مه‌ره‌مه‌كا تیجارى كاره‌كێ سیاسى ژ ڤى ره‌نگى بكه‌ت, دبیت ئه‌و د (به‌ریكا) خۆرا ل دیمه‌نێن سیاسى ته‌ماشه‌ دكه‌ت. هه‌مى ئاره‌ستا سیاسیا هه‌رگاڤ د به‌رژه‌وه‌ندیا بازرگانا دا ژى نینه‌, د دیرۆكێ دا گه‌له‌ك جاران بازرگان بووینه‌ سه‌ده‌مێ وه‌رچه‌رخانێن مه‌زن و جاران ژى بووینه‌ كاره‌سات ب سه‌ر مله‌تێ خوه‌ دا. بازرگانه‌ك ژ قازانج و خوساره‌تا مادى پێڤه‌تر نه‌شێت بیر بكه‌ت و بهاێن نه‌ته‌وى و نشتیمانى ره‌نگه‌ د قووناغه‌كا دى دابن. سه‌رمایه‌ هه‌مى (گاڤێ كولاڤه‌) یه‌ و ترسنۆكه‌ د گوهارتنا سیسته‌م و ره‌وشا ئه‌و تێدا قه‌به‌ بووى دترسیت، هنده‌ك ئیمتیازاتێن خوه‌ ژ ده‌ست بده‌ت, ئه‌ڤجا نۆرماله‌ بزاڤه‌كا سیاسى ب پشته‌ڤانیا بازرگانه‌كێ یان به‌روڤاژى كاره‌كێ بكه‌ن بۆ ئارمانجه‌كا نیڤ سیاسى نیڤ بازرگانى. ئه‌و ده‌وله‌تا كوردستانێ دڤێت دامه‌زرینیت ره‌نگه‌ ژینگه‌هه‌كا خۆش نه‌بیت بۆ هنده‌ك بازرگانان، نه‌مازه‌ ل وارێ دانا باج و خه‌راجان دا بازرگان ژى ره‌وشێ ل گۆر به‌رژه‌وه‌ندیا خوه‌ شلۆڤه‌ دكه‌ن. كێ دبێژیت كوردستان ژینگه‌هه‌كا باش نابیت بۆ وان كه‌سێن ژ نیشكه‌كێ ڤه‌ ده‌وله‌مه‌ند بووین؟ كى دبێژیت ده‌ستپاكى پشتى سیاسیان دۆرا تجارانه‌؟. كى دبێژیت ئاستێ باجێ زێده‌ نابیت ل سه‌ر تجاران یان هنده‌كا ژ وان، ئانكو تجار د وارێ به‌رژه‌وه‌ندیا خوه‌ دا دحه‌قن چاوا بیر بكه‌ن, لێ بریارا بلند و مه‌زن مله‌ت دده‌ت, ئه‌ڤه‌ پرۆسه‌كا دژواره‌ بۆ تجاران لێ بۆ مله‌تا وه‌رچه‌رخانه‌كا سیاسیا و ده‌سپێكه‌كا نووى یه‌.

داگیركرنا نه‌رم و باندۆرا گۆتگۆتكان و هه‌لپه‌رستیا ره‌وشێ، وه‌ل پشكه‌كا هه‌ڤوه‌لاتیێ مه‌ كریه‌ ب (عه‌ن قه‌سد) یان بێ مه‌ره‌م ببیته‌ پالێ نه‌یارێن كوردستانێ، ب راستى هندى وه‌لاته‌ك هه‌بوویه‌ نه‌مازه‌ ئه‌وێن ل قووناغا رزگاریا نه‌ته‌وه‌ى دا ده‌رباز بووین راستى ڤى به‌شێ (نه‌خۆشێ) وه‌لاتێن خوه‌ بوونه‌، دژایه‌تیا رێفراندۆمێ (رایا جێواز)، نینه‌ ئه‌ڤ بابه‌ته‌ ناچیته‌ خانا ئازادیا مرۆڤى، به‌لكو یاخیبوونه‌كا بێ بنستره‌كا به‌رئاقله‌ و كاردانه‌ڤه‌یه‌كا (نه‌رینى) یه‌، ل به‌رامبه‌ر هنده‌ك پرسێن دى وه‌ك نه‌بوونا عه‌داله‌تێ و خزمه‌تگوزارێن ژیانى. ئه‌ڤه‌ ساده‌ترین خاندنه‌ بۆ هنده‌ك هه‌لۆیستێن نه‌رینى ده‌رباره‌ى پرسه‌كا نه‌ته‌وه‌ى، ره‌وایه‌ تاك یان كه‌سى به‌رهنگارى یان دژایه‌تى ل گه‌ل حوكمه‌تێ یان هه‌تا ل گه‌ل سیسته‌مى هه‌بیت، لێ دژایه‌تى ل گه‌ل وه‌لاتیان بها و تۆرێن وه‌لاتى. ئه‌ڤه‌ بابه‌ته‌ك دى یه‌. نزانم ئه‌وێن ل دژى سه‌رخوه‌بوونێ یان دژى ئه‌نجامدانا رێفراندۆمێ چ ناڤه‌كێ بۆ بكاربینین؟. ب هه‌ر حالێ هه‌ى كوردان وه‌ك نه‌ته‌وه‌ هیچ بهانه‌ك نینه‌ قووناغه‌كا وه‌كى ئه‌ڤرۆ بۆ دیاركرنا چاره‌نڤێسێ خوه‌ ب ده‌رفه‌ت نه‌زانیت، ده‌وله‌ت دهێنه‌ ئاڤاكرن. ئه‌ما سیسته‌م و حوكمه‌ت دهێنه‌ هه‌لبژارتن، هه‌ڤوه‌لاتى پتر ژ ده‌رفه‌ته‌كێ یا هه‌ى د مه‌یدانا سیاسى دا ده‌نگێ خوه‌ ل گۆر دیتنا سیاسیا خوه‌ بكاربینیت, لێ د پرسێن وه‌ك قورتالبوونا نه‌ته‌وه‌ى دا یان ئازادى و سه‌رخوه‌بوونه‌ یان بنده‌ستى و نۆكه‌ریه‌ بۆ داگیركه‌ران. بژارده‌یا (3) نینه‌، مخابنى و گه‌له‌ك ژى مخابنى هنده‌ك ده‌نگ هه‌بن ل دژى هه‌مى پرۆسا رێفراندۆمێ بن. ب ئازادیا كه‌سى بزانن، نزانم ئاریشا ڤى ره‌نگێ بیركرنێ ژ چى ڤاله‌هیه‌كا هزرى و هوشیاریه‌كا نه‌ته‌وه‌ى سه‌رچاڤه‌ دگریت. هه‌تا كه‌نكێ هه‌ڤوه‌لاتى ب ره‌نگه‌كێ ئاریشه‌ ل گه‌ل سیسته‌م و ده‌سته‌لاتا سیاسیا وه‌لاتێ خوه‌ هه‌یه‌. ئه‌ڤه‌ نۆرماله‌ و ل هه‌مى جیهانێ ژى كار بۆ ئازادیا سیاسیا مرۆڤان هاتى كرن، لێ ئاریشه‌ ل گه‌ل وه‌لاتى راستى نه‌ك جهێ پرسیارێ یه‌، به‌لكو جهێ حیبه‌تیێ یه‌؟! هه‌مى وه‌لاتێن د كویراتیێ دا دژى سه‌رخوه‌بوونا نه‌ته‌وه‌یه‌كا رۆژهه‌لاتا ناڤین، زۆر گره‌ڤێ ل سه‌ ڤى نموونێ سه‌قه‌تێ بیركرنا هنده‌ك كه‌سان دكه‌ن، ئانكو گره‌ڤێ ل سه‌ر وان یاخیبووێن كورد بخوه‌ دكه‌ن كو رێفراندۆمێ بایكۆت كه‌ن یان نه‌خێر ده‌نگى بده‌ن. ئه‌ڤه‌ ب راستى پرسیاره‌كێ دیار دكه‌ت و به‌رسق زۆرا ب زه‌حمه‌ته‌ ئه‌رێ وه‌ختا مرۆڤ و نه‌یارێ خوه‌ د ئێك چه‌په‌ر دا بیت چى رامانا وێ هه‌یه‌, چ دبێژن ڤى ره‌نگێ هه‌لۆیستى؟. ناڤێ ڤێ هه‌ڤال به‌ندیێ چیه‌؟! لێ دیرۆك ب سه‌دان نموونه‌یان ژ دیرۆكا مه‌ بۆ مه‌ وه‌ك كورد دیار دكه‌ت هه‌مى گاڤێ د ناڤ كوردان دا ته‌خه‌ك په‌یدا بوویه‌ بچیته‌ خانا ل به‌رامبه‌ر نه‌ك بۆ هیچ مه‌ره‌مه‌ك سیاسى یان سه‌ر خستنا قوتابخانه‌كا سیاسى یان بیر دۆزه‌كا دى، به‌لكو ب تنێ بۆ شكاندنا به‌رمبه‌ره‌. ب تنێ بۆ هندێ، نه‌یارێن مه‌ هۆستایه‌كا مه‌زنان د ڤى وارى دا هه‌ى و ل گۆر قووناغێ ڤى (سلوكێ) خومالیێ كوردى بكاردئینن. راستى (مهزه‌له‌ یه‌). لێ مه‌ وه‌ختێ ماى چاره‌سه‌ر كه‌ین. پرۆسه‌ بخوه‌ ژى به‌رسڤ دانه‌.

هه‌ر كه‌سێ ئاگه‌دارى مێژویا نێزیك یا كوردستانێ بیت نه‌مازى ل سه‌رو به‌ندێ رێكه‌فتنێن (سیڤه‌ر و لوزانێ) بیت دێ قه‌نج زانیت بوجى ده‌رفه‌تێن ده‌وله‌ت بونێ ژ ده‌ستێ كوردا جون.جما (بریتانیا) خوه‌ ل(وعدا بلفور) كره‌ خودان و بوجى ل سوزا خوه‌ بو كوردا لێڤه‌بو. ئه‌وا راست بیت دیر ژ هه‌مى هێجه‌ت و بهانه‌كا هنده‌ك(ئه‌كادیمى) ڤه‌ دگێرن تاكه‌ سه‌ده‌مێ ژ ده‌ست دانا گه‌له‌ك ده‌رفه‌تا ژ ده‌ستێ كوردا ئه‌و بویه‌ كورد ل هیج قوناغه‌كێ دا (ئێك گرتى) نه‌بوینه‌ و هه‌رگاف پتر ژ سه‌نته‌ره‌كێ هێزێ هه‌بوینه‌ یان د گرێكێن عه‌شیره‌تگه‌ریێ دا ئالوز ماینه‌ یان بوینه‌ قوربانى ململانا مالبات و خێزانێن مه‌زن یان ده‌روێشیا رێجكێن ئاینى.ئانكو ئاشكرا ئه‌وێن وى وه‌ختى سیاسه‌ت دكر هنده‌ ژیر و شایسته‌ نه‌بون ببنه‌ سه‌نتراله‌كێ بهێز هه‌مى هێزا د خودا خرڤه‌ كه‌ت, ئه‌ڤا نوكه‌ ل كوردستانێ دبیت رك و رك وه‌ك وێ یا یا ب كێمى ڤه‌ ژ به‌رى (100) سالا دبو.ئه‌ف مله‌ته‌ پێتڤى ب ئالیه‌كێ یه‌ قوربانیا بده‌ت.پێتڤى ب ئالیه‌كێ یه‌ هه‌مى ئالیا رازى كه‌ت.پێتڤى ب ئالیه‌كێ یه‌ هه‌مى ئالیا هێجه‌ت بر كه‌ت.نوكه‌ ژى مه‌زنترین گره‌ڤا نه‌یارێن كوردا ێن سیاسى ئه‌وه‌ كورد ئێك راو بوجون نینن.وه‌ك هه‌مان بهانا ژ به‌رى (100) سالا. ژمن ڤه‌ ئه‌ ف ئه‌رك و (سه‌رسپیاتیا) ڤێ جارێ دكه‌ڤیته‌ ستویێ پارتى و پارتى قه‌نج كحمێ مێژویێ دزانیت و له‌ورا ئاماده‌یه‌ نه‌خوشترین تنازلا بكه‌تن بو هندێ ڤى كاروانى ل كوناره‌كێ ئێك لاكه‌تن.پارتى خوه‌ ملزم دبینیت هه‌مى به‌ربه‌سته‌ك سیاسى بو ئه‌نجام دانا رێفراندومێ راكه‌ت.هه‌مى پروسا رێفراندومێ بو پارتى گرنگه‌ له‌ورا دبینین پارتى تنازل ل دیف تنتازلێ ل مه‌یدانا سیاسى بو هه‌ڤركێن خو دكه‌ت و گه‌له‌ك چوتێن سیاسى ل ڤى وه‌لاتى راست ڤه‌ كه‌تن.لێ دكیراتیێ دا پارتى رابه‌رایه‌تیا خوه‌ بو پروسه‌كا ژ قه‌بارێ رێفراندومێ ب هێژارى هندێ دزانیت پتر تنازلا بكه‌تن.پرسا سه‌رخو بونێ پرسا پارتى ب تنێ نینه‌ و ل سه‌ر ناڤێ هیج حزبه‌كێ تاپو نینه‌ رێفراندوم ملكێ هه‌مى خه‌لكێ كوردستانێ یه‌ لێ پارتى ب حكمێ سه‌نگ و قه‌بارێ خوه‌ ب ئه‌رك دزانیت باجا سه‌ركه‌فتنا ڤێ پرسێ بده‌تن و ئه‌ڤه‌ مێژو دێ ڤى هه‌لویستى نه‌رخینیت.ئێك هه‌لویستى د پرسا رێفراندومێ دا مه‌رجێ سه‌ر كه‌فتنێ یه‌.(50+1) ئه‌نجامه‌كێ لاوازه‌ ل پرسه‌كا نه‌ته‌وه‌ى دا.له‌ورا هه‌مى ئالى هه‌ست ب مه‌ترسیێ دكه‌ن,هه‌مى حزب هندى روژا رێفراندومێ نێزیك دبیت ئه‌و نێزیكى ئێك هه‌ویستیێ دبن.تنازلكرنا پارتى ماقیلیه‌ بو پارتى و خه‌لكێ جاف ل ئالیچن دى یه‌ ژى بیجه‌ك تنتازلێ بكه‌ن….