دبیت په‌یڤا داعش پشتى هه‌یامه‌كا دى بیته‌ ئیدیه‌مه‌كێ سیاسى بۆ ره‌نگه‌گێ توندره‌وى و هۆڤاتیا مرۆڤان بهێته‌ بكارئینان، یان بۆ هه‌ر كاره‌كێ درونه‌د بهێته‌ بكارئینان، داعشێ نموونه‌كا زه‌لاتا هۆڤاتیا مرۆڤان نیشا دا، ئیدیه‌مه‌ك ل فه‌رهنگا سیاسى و زانستێ تاوانێ زێده‌ كر، ئێدى داعش و فاشیزم و نازیزم و شوفینیزم و گه‌له‌كێن دى دێ هێنه‌ گۆتن بۆ ره‌فتارێن مرۆڤان، داعش وه‌ك بزاڤه‌كا تیرۆرستى دبیت ژناڤ بچیت و دبیت شینوارێن وێ یێن (فیزیكى) وه‌ك رێكخراو نه‌مینن یان لاواز ببن، لێ هزێن داعشێ و ره‌فتارێن داعشێ كت كته‌ دێ گه‌له‌ك مینن، هه‌مى جڤاكێن ده‌ڤه‌رێ پێدڤى ب (ڤاكسینه‌كا) تایبه‌تن بۆ خوه‌ پاراستنێ ژ هزرا داعشێ، ل كوردستانێ ژى ئه‌گه‌ر جڤاك و ده‌وله‌ت دهشیار نه‌بن ئه‌و ژینگه‌ها داعش دخولقینیت ره‌نگه‌ ده‌رفه‌تا دووباره‌بوونا هنده‌ك كه‌سێن هه‌لگرێن هزرا داعشێ په‌یدا بن، هزرێن داعشێ ل ژینگه‌هێن هه‌ژار و جڤاكێن بێ كار و وه‌لاتێن بێ عه‌داله‌ت و نه‌خوینده‌وار و پرى گه‌نده‌لى سه‌رهل دده‌ن، و ل كوردستانێ ژى ژینگه‌هه‌ك وه‌سا هه‌یه‌ و ئاماژه‌ ژى هه‌نه‌ كو ئه‌ڤ ره‌نگه‌ هزرا درونده‌ جهێ خوه‌ بگریت و زۆر كه‌س هه‌نه‌ ب راستى یان داعشن یان (داعش كێم ربعه‌كن)؟! ئه‌ڤه‌ مه‌ترسیه‌كا مه‌زنه‌ و دبیت ل ده‌مێ شه‌رى هه‌ست پێ نه‌هێته‌كرن، لێ دبیت پشتى ده‌مه‌كێ دى گه‌ف بن ل سه‌ر ئاسایشا جڤاكى. كوردستان پشتى شه‌رێ داعشێ پێدڤى ب شه‌ره‌كێ دى یه‌ دگه‌ل هه‌ژاریێ دگه‌ل بێ كاریێ دگه‌ل گه‌نده‌لیێ دگه‌ل قورغكاریێ دگه‌ل ژێده‌رێن هزرى یێن هزرا داعشێ دگه‌ل (جه‌هاله‌تێ) دگه‌ل فاكته‌رێن توندوتیژیێ ب هه‌مى ره‌نگ و ناڤا، ئه‌ڤ شه‌ره‌ ب پێشمه‌رگه‌ى ناهێته‌ كرن، ب چه‌كێ(میلان) ناهێته‌كرن. ب ژماره‌كا یاسایێن دژوار و ب ژماره‌كا رێنماى و په‌روه‌رده‌كا ساخله‌م و مینبه‌ره‌كا (ئیسلامیا) كورده‌واریا دروست و دوور ژ وان نڤشت و پرتووكێن توندیێ دكه‌نه‌ ئالاڤێ مرۆڤان. دهێته‌كرن، هندى ل وه‌لاتێ مه‌ دادى و وه‌كهه‌ڤى و كار و پرۆژێن مرۆڤ دوست هه‌بن، هندى هه‌ژارى و نه‌دارى و نه‌خوینده‌وارى ل وه‌لاتێ مه‌ ل كێمێ بده‌ت هنده‌ جڤاك موكم دبیت ل به‌ر هزرێن داعشێ و هه‌ر هزره‌كا دى یا توندره‌و. هندى ژیانا سیاسى یا ساخله‌م و زه‌لال بیت هندى جڤاك ئاگه‌دارى هه‌مى پێشهات و ڤه‌رێژا سیاسیان بیت هندى به‌شداریا ئه‌رێنى یا ب هێز بیت د دروستكرنا بریارا سیاسى و ئابوورى دا.
هنده‌ك جڤاك دێ خوه‌ ب خودانێ وه‌لاتێ خوه‌ زانیت و ده‌رفه‌ت بۆ هزێن داعشێ و یێن وه‌ك داعشێ كێمتر دبیت، ب باوه‌رم كه‌سێن هزرا داعشێ هه‌ى كه‌سێن ب تنێ خوه‌ پیرۆز و راست دزانن پرى كوردستانێ نه‌، ژ من ڤه‌ ب تنێ وه‌خت نه‌دیاره‌ ئه‌گه‌ر دێ رۆژه‌كێ راستى گیانێ ڤى جڤاكى بن.

لڤى وه‌لاتێ پرى قه‌یران دا.روژانه‌ ئه‌سته‌م دبیت مروڤى باوه‌رى ب پروژه‌كێ هه‌بیت یان باوه‌ریى ب ئه‌نجامێ كومبونه‌كێ یان كونفرانسه‌كێ هه‌بیت,بێ ده‌نگیا ده‌سته‌لاتێ و زه‌لالتر بێده‌نگیا(نیجیرڤان بارزانى) بوراه‌كێ بهێز خولقاندیه‌ بو به‌رپا بونا گوتگوتكا و زێدبونا بازارێ مزایدێن سیاسى و یارى كرنێ ب نان و قوتێ خه‌لكێ,ئه‌ف ره‌وشه‌ تا سه‌ر به‌رده‌وام نابیت,یارى ێن ب هه‌ستێن خه‌لكێ و هیڤێن خه‌لكێ دهێته‌كرن,بازار و مزایده‌ ب بها و ره‌ڤشتێن جڤاكێ مه‌ دهیچته‌ كرن,ئالێن سیاسى نه‌ما جهێ باوه‌ریا خه‌لكێ بن ب پارتى ڤه‌ ژى,هه‌لگرتنا دریشمێ ده‌وله‌تێ بتنێ به‌س نینه‌ بو ژیانه‌كا روژانه‌یا كاسبكاره‌كێ ڤى وه‌لاتى,نه‌مانا باوه‌ریێ ژمن ڤه‌ پشتى (داعشێ)مه‌زنترین گه‌ڤه‌ ل سه‌ر سه‌ربورا سیاسیا كوردستانێ.وه‌لاته‌ك بێ به‌رلمان حكومه‌ته‌ك قه‌یرانى و ده‌یندار و حزبێن بێ هه‌لویست و مزایده‌جى,وه‌لات راستى قه‌یرانا باوه‌ریێ كریه‌ و ئاشكرا تر بێژین راستى لاوازكرنا هه‌ستێ نشتمانى و نه‌ته‌وه‌ى بویه‌.بێ ده‌نگیا شه‌قامى ب گشتى و ل هه‌ولێرو دهوكێ بتایبه‌تى هه‌تا پشتى شه‌رێ داعشێ دێ به‌رده‌وام بیت ,ئه‌گه‌ر سیاسێن كوردستانىچ نه‌ گه‌هن ئه‌نجامه‌كێ و حكومه‌ت بیر ل پركرنا به‌ریكا موجه‌خورێن خو نه‌كه‌تن,هیج زه‌ماناته‌ك نینه‌ ئه‌ف ره‌وشه‌ بڤى ته‌رزێ نوكه‌ به‌رده‌وام بیت,دڤێ قه‌یرانێ دا تازه‌ بو مله‌تى هنده‌ك پرس گرنگ بوینه‌,تازه‌ مله‌ت بیر لهندێ دكه‌ت هنده‌ك كه‌رت و هنده‌ك بابه‌ت لڤى وه‌لاتى زێده‌نه‌,هنده‌ك بریار ب له‌ز هاتینه‌ داین,بێ عه‌داله‌تى و بێ به‌رنامه‌ى وه‌لات راستى هه‌مى ره‌نگه‌ قه‌یرانا كریه‌.ئه‌ف قه‌یرانه‌ هنده‌ گاریگه‌ر بونه‌ باوه‌رناكه‌م ب باشبونا ره‌وشا ئابورى قه‌یران ب دوماهیك بهێن,ئاستى باوه‌ریێ ب سیاسیا ب حكومه‌تێ زور لاواز بویه‌,تاكه‌ سازیا ماى جهێ رێزێ و باوه‌ریێ سازیا هێزا پێشمه‌رگه‌یه‌, كوتانوكه‌ ماى بێ لایه‌ن د گێلوشوكا سیاسیا وه‌لاتى دا,تاكه‌ سازیه‌ مله‌تى باوه‌رى پێ هه‌بیت ,ب په‌یامێن وان ب بریارێن وان,پارستنا ڤێ سه‌ربورێ راسته‌ ئه‌ركێ پێشمه‌رگه‌یه‌,لێ تاسه‌ر بڤى ره‌نگى نه‌مینیت,كوردستانێ بتێراخوه‌ قه‌یران هه‌نه‌.تاوێ رادێ قه‌یران ده‌بازى هه‌مى ئاست و قوناغه‌كێ بویه‌,ژیان دوه‌لاته‌كێ قه‌یرانى دا ئاسان نینه‌,ژیانه‌ لبن هنده‌ك گڤاشتنێن ده‌رونى.ژیانه‌ ل ژینگه‌هه‌كا بێ عه‌داله‌تا فاحش دا,ژیان لڤێ ره‌وشێ دا.وه‌لاتیچن خه‌لكێ ژى توشى قه‌یرانا دبن,لێ ئه‌ز باوه‌رم كوردستان بتنێ راستى قه‌یرانا باوه‌ریێ بویه‌,قه‌یرانێن دى جاره‌ دبن یا باوه‌ریێ دێ دووم درێژ بیت.

سازیا(دى دبلیو) سازیه‌كا ئه‌لمانى میدیایه‌. ئێك ژ سازیێن هه‌ره‌ پێشكه‌فتى یه‌ ل ئورۆپا د وارێ میدیایێ دا. زۆر ب هه‌ڤسه‌نگانه‌ په‌یاما خوه‌ به‌لاڤ دكه‌ت و هنده‌ك بهایێن خوه‌ یێن تایبه‌ت ب میدیایێ و ره‌وشتێن میدیایى ڤه‌ هه‌نه‌، تشتێ بالكێش ئه‌وه‌ ئه‌ڤ سازیا مه‌زنا ئورۆپى ل ڤان رۆژێن بوورى په‌نه‌له‌كا تایبه‌ت ب سه‌رخوه‌بوونا كوردستانێ ب دیتنا گه‌نجان رێكخست، ئه‌ڤ په‌نه‌له‌ بۆ كوردستانێ و د میدیا ئورۆپى دا ده‌رفه‌ته‌كا زێرین بوو، ئه‌لمانیا سیاسه‌تا (حیادێ) پشتى جه‌نگا جیهانیا دویێ تا راده‌كى لادایه‌ ل جیهانێ ژى ئه‌لمانیا هێدى هێدى ل جهه‌كێ هه‌ژى سه‌نگا ئابووریا خوه‌ دگه‌ریت، یه‌كه‌م گوهارتن ل ئه‌لمانیا به‌شدارى بوو ل ئه‌فغانستانێ و تازه‌ هه‌لویستێ ئه‌لمانیا یێ سیاسى و سه‌ربازى بوو بۆ كوردستانێ كو تا نوكه‌ (4)جاران وه‌زیرا به‌ره‌ڤانیا ئه‌لمانیا سه‌ره‌دانا كوردستانێ كریه‌ و ئاشكرا هاریكاریا هێزا پێشمه‌گه‌ى كریه‌ نه‌مازه‌ ب چه‌كێ (میلان) ئه‌ڤ بهادانا ئه‌لمانى ب كوردستانێ كاره‌كێ بالكێشه‌ لێ یا نوو نینه‌، ئه‌لمانیا ژ مێژه‌ چاڤ ل سه‌ر كوردستانێ یه‌، ژ سه‌رده‌مێ میرێ (رواندوزێ) تا سه‌ر ده‌مێ نازیان هه‌رده‌م ئه‌لمانیا بهایێ جیوستراتیژیێ كوردستانێ ناس كریه‌. بایه‌خ دانا سازیه‌كا ئه‌لمانیا ناڤدار ب پرسا سه‌رخوه‌بوونا كوردستانێ ل په‌یدا كرنا نه‌راسته‌وخۆیا پشته‌ڤانیێ یه‌ بۆ كوردستانه‌كا سه‌ربخۆ، بێگومان هندى سازیه‌كا ئورۆپى نه‌مازه‌ یا میدیا یا دوست بیت بۆ مافێن ره‌وایێن كوردستانێ بێگومان رایا گشتیا ئورۆپى زێده‌تر گرێداى میدیایێن خوه‌ یێن هه‌ڤسه‌نگن، ئه‌ڤه‌ ده‌ستكه‌فته‌كێ مه‌زنه‌ بۆ كوردستانێ، ب سه‌ربۆرا خوه‌یا تایبه‌ت دگه‌ل ڤێ سازیا مه‌زنا ئورۆپى یا میدیا من وه‌سا ناس كریه‌ ژبلى پیشه‌بوونا وان د كارى دا دلوڤانیه‌كا مه‌زن هه‌یه‌ و كوردستان د ژوورا په‌یامێن وێ دا جهه‌ك تایبه‌ت و ب بایه‌خ هه‌یه‌ و گرنگیێ ب هه‌مى وارێن ژیانێ ل كوردستانێ دده‌ن، پشته‌ڤانیا سازیه‌كا میدیا یا مه‌زن بۆ مافێ كوردستانێ ل گرێدانا به‌رنامه‌ و په‌نه‌له‌كا تابه‌ت ب ڤێ ره‌وشێ ل كوردستانێ ب خوه‌، گوهارتنه‌كا مه‌زن بوو د وارێن پشته‌ڤانیا جیهانێ دا بۆ سه‌رخوه‌بوونا كوردستانێ، بێگومان رایا گشتیا ئه‌لمانى زۆرا ئه‌رێنى یه‌ د پشته‌ڤانیا كوردستانا عیراقێ دا و كوردستانێ ب ده‌ڤه‌ره‌كا ئارام ناس دكه‌ن.

هه‌مى سه‌ربۆرێن سه‌ركه‌فتى ل جیهانێ ل سه‌ر ملێن مامۆستا ئاڤا بووینه‌. هه‌مى تاك و كه‌سه‌كێ جڤاكى ژى قه‌ردارێ مه‌ردینیا مامۆستایه‌ كێم یان زێده‌، مامۆستا ژ هندێ ب سه‌نگ و قیمه‌تتره‌ ئه‌م ل به‌رپه‌رێن رۆژناما سه‌نگ و قه‌بارێ وى ب هه‌لسه‌نگینین، لێ وه‌ك دیار مامۆستا ب هه‌مى بارگرانیا خوه‌ڤه‌ و د ڤێ قه‌یرانێ دا بووینه‌ كه‌ره‌ستێ سیاسه‌ته‌كا دوور ژ گیانێ كارێ مامۆستای و گیانێ (استازا) و گیانێ دانا بێ به‌رامبه‌ر. وه‌ك نموونه‌ مامۆستا بووینه‌ و ئه‌و گه‌ف ئه‌وا ئالیێن سیاسى د ململانا سیاسى دا مامۆستا و بارێ قورسێ مامۆستایێ بكه‌نه‌ سه‌نترالێ گڤاشتن و مزایدێن سیاسى ل كوردستانێ، مامۆستا چه‌وا د هۆلێن وانه‌ گۆتنێ دا ده‌رسا دده‌ن ژ من ڤه‌ بۆ سیاسیا ژى مامۆستا دڤیا ده‌رسه‌كێ بده‌ن، بارێ ژیانێ قورسه‌ به‌لێ مامۆستا و پرۆسا په‌روه‌ردێ كه‌رستێ گڤاشتنێن سیاسى نینه‌، ره‌وشا خرابا مامۆستاى به‌شه‌كه‌ ژ ره‌وشا خرابا جڤاكى ب گشتى. مامۆستایه‌تى هه‌ربینێ ده‌رس گۆتن نینه‌ وه‌ك ئه‌ز تێ دگه‌هم، به‌لكو مامۆستا ب خوه‌ وه‌ك كاراكته‌ره‌ك سه‌ره‌كى د جڤاكى دا ب خوه‌ نموونه‌كا زیندیا قوربانیدانێ یه‌، ئه‌و (قدوه‌یه‌) بۆ سه‌ركێشیا جڤاكى ب گشتى، مامۆستا هێژاى هندێ نینه‌ راستى ڤێ ره‌وشێ هاتى، لێ ئه‌م ل وه‌لاته‌كى دانین هه‌م د حاله‌تێ شه‌ڕى دایه‌ و هه‌م د حاله‌تێ قه‌یرانێ دایه‌. مامۆستا هه‌تا ئه‌سمانى حه‌قن گازندا و گڤاشتنا بكه‌ن، هه‌تا ئه‌سمانى مافێ وانه‌ ل پرسا ژیانا خوه‌ بێ ده‌نگ نه‌بن، لێ مامۆستا نه‌حه‌قن وه‌ختێ گه‌فا راوستاندنا پرۆسا خواندنێ بكه‌ن، خواندن هه‌ر ب تنێ وه‌زیفه‌كێ حكوومى نینه‌، به‌لكو به‌رپرسیاره‌تیه‌كا ئه‌خلاقیه‌ گیانێ (سه‌یدایێ) دبن هه‌ر بار و ره‌وشه‌كێ ڤه‌ دڤێت پاراستى بیت، مامۆستا ئه‌ون ئه‌وێن هه‌مى جڤاك چاڤ ل هه‌لویستى وان دكه‌ت، راسته‌ ئه‌م د قه‌یرانێ داینه‌، راسته‌ ئه‌م د شه‌رى داینه‌، راسته‌ ژیان قورس بوویه‌ و راسته‌ ئه‌ڤێ ره‌وشێ دوم دا، لێ پرسه‌كا نشتیمانى گشتی یه‌، سه‌ربارى هندێ حكوومه‌تێ تانوكه‌ وه‌ك پێدڤى رۆنكرن نه‌داینه‌ رایا گشتى، ئالیێن سیاسى ب مخابنى ڤه‌ وه‌ك متایه‌كێ گڤاشتنا سیاسى دژى ئێك و دو بكار دئینن، كه‌دا مامۆستا وه‌ك جینه‌كا مام ناڤه‌ندى تووشى ئالۆزیه‌كا ئابوورى بوویه‌ و زیان گه‌هاندیه‌ بازار و ئاستێ ژیارا وه‌لاتیان، لێ هه‌مى ئه‌ڤ قه‌یرانه‌ هندێ نائینیت وه‌ك متایه‌كێ سیاسى بهێنه‌ بكارئینان و پاشى گه‌فا راوه‌ستاندنا پرۆسا خواندنێ بكه‌ن، فێركرن ئه‌ركه‌ نه‌ك وه‌زیفه‌یه‌، مامۆستا ب پیرۆزیا خوه‌ڤه‌ تا نوكه‌ ل ئاستێ ڤى ئه‌ركى بوویه‌.

پارتى ژ ئه‌نجامێ دابه‌زینێ ژ چیا بۆ باژێران ژ ئوردیگایێن په‌نابه‌ریێ بۆ ئیدارا وه‌لاته‌كى. پارتى بوویه‌ سازیه‌كا مه‌زن و ئورگانه‌كێ ب قه‌ره‌بالغ و تێر كاراكته‌ر. راسته‌ پارتى ژ هه‌مى ئالێن دى پتر كۆنگره‌ گرێدانه‌، لێ پرانیا كۆنگرێن پارتى نه‌ د وه‌ختێ خوه‌ دا هاتینه‌ ئه‌نجام دان. یان ئاوارته‌ بووینه‌ یان گیرو بووینه‌، پرانیا سازیێن پارتى وه‌ك كادرێن پارتى ب خوه‌ ئاماژێ بۆ دكه‌ن پێدڤى ب دووباره‌ پێداچوون و گوهارتنانن. سازیێن پارتى هه‌مى و هه‌یكه‌لێ وێ و فه‌لسه‌فا رێكخستنا وێ وێ پێدڤى ب چاكسازیه‌كا مه‌زنه‌، پارتى دڤیا دگه‌ل قه‌بارێ ئارمانجا نوكه‌ هه‌لگرتى بۆ ده‌وله‌تبوونێ بیر و فه‌لسه‌فه‌ و رێكخستنا خوه‌ ب شێوازه‌كێ دى ساز بكه‌ت، ناهێته‌ ڤه‌شارتن و ئاشكرا سه‌رۆك بارزانى دیار كریه‌ پارتى پێدڤى ب چاكسازیێ یه‌، ب وى ئاواى بیت دگه‌ل قه‌بارێ نوكه‌ بگونجیت، پارتى دڤیا به‌رسڤا هنده‌ك پرسیارا هه‌بیت، ل سه‌ر هه‌نوكه‌یا كوردستانێ و ئاینده‌ى، ئه‌رێ بۆچى پارتى ب تنێ نوكه‌ خوه‌ میراتگرا ڤێ حكوومه‌ت و سه‌ربۆرا كوردستانێ دزانیت ل ده‌مه‌كێ هه‌مى ئالى پشكدارى ژیانا سیاسى نه‌، پشكداری ل حكوومه‌تێ و پشكداری ل ژیانا سیاسى ژێك جودانه‌، ژ لایه‌كێ دى ڤه‌ كاركرن ل گه‌ل هه‌یكه‌لێ پارتى بێته‌ خومالیكرن و كارێ سیاسى و بازرگانى د ناڤ كاراكته‌رێن پارتى دا بێته‌ جودا كرن، ئه‌و په‌رێ شه‌فافیه‌تێ ل سه‌ر ملك و دارایی یا پارتى دیار بیت. ئاستێ په‌یوه‌ندیێن پارتى یێن نه‌ته‌وه‌ى زێده‌تر زه‌لال بن و پارتى سه‌نگا خوه‌یا جاران ڤه‌گه‌رینیت گه‌ر بۆ به‌ره‌ف ئاره‌ستا چاره‌سه‌ریا پرسا كوردى ل پارچێن دى یێن كوردستانێ، چاكسازى د پارتى دا ب تنێ دڤێت گوهارتنا هنده‌ك كه‌س و كاراكته‌را نه‌بیت. به‌لكو دڤیا پارتى به‌رسڤ بۆ زۆره‌كا پرسێن سیاسى و ئابوورى و جڤاكى یێن كوردستانێ هه‌بیت، كاركرنا پارتى ب تێگه‌هێ (بنكه‌ و رێكخراو) بۆ شێوه‌یێ په‌یوه‌ندیێن هه‌نوكه‌یێن كوردستانێ نه‌گونجیا و ئه‌ڤ هه‌یكه‌لێ(به‌لشه‌فیكا) بۆ پارتى (70) سال سه‌را ده‌رباز بوون. پارتى بۆ چاكسازیێ پێدڤى ب هنده‌ك بریارێن ب وێره‌ك هه‌یه‌، وه‌ك دیار پارتى ژ هه‌مى ئالیان پتر پێدڤى ب كۆنگره‌كێ (نوعى) هه‌یه‌، گوهۆرینێ د هه‌مى ئاستێن پارتى دا بكه‌ت، پارتى ده‌وله‌مه‌ندترین حزبا كوردستانێ یه‌ ژ ئالیێ هه‌بوونا شیانێن گه‌نج و تازه‌ ڤه‌، ره‌وشا كوردستانێ و عیراقێ و شه‌رێ داعشێ، ئه‌ڤجا هندی پارتى له‌زێ ل چاكسازیا خوه‌ نه‌كه‌ت و پرۆژێ سه‌رۆك بارزانى بۆ چاكسازیا پارتى زێده‌تر گیروبوونێ هه‌لناگریت و هه‌لكه‌فت ب له‌ز ده‌رباز دبن، پارتى ل سه‌ر و به‌ندێ گوهۆرین و چاكسازیا راستى خافیه‌كا به‌رچاڤ بوویه‌، له‌ورا چاكسازى بۆ پارتى روتینه‌كا دی یه‌ بۆ ئارمانجا مه‌زنا كوردستانێ كو پارتى سه‌ركێشیا وێ دكه‌ت.

سالا (1994) بالێ سه‌ربازیێ حزبا كۆمۆنیستا كۆلۆمپى یا ناڤدار ب (فارك) ده‌ست دا چه‌كى بۆ به‌رقراركرنا تێگه‌هێن خوه‌ یێن (چه‌پ)، كۆلۆمپیا ب هه‌مى هێزا خوه‌ به‌رهنگارى بزاڤێن چه‌كدارێن ڤێ رێكخراوێ بوو، ب هزاران كه‌س هاتنه‌ كوشتن ب هزاران كه‌س بێ سه‌روشوونن، ده‌وله‌تێ هه‌مى هێزا خوه‌ ب كارئینا بۆ نه‌شرینكرنا ڤێ رێكخراوێ تا تاوانباركرنا وان ب ره‌ڤاندنا بارمتا و بازرگانیا (تریاكێ) و بازرگانیا (مرۆڤا) سه‌ر ئه‌نجام پشتى (50) سالان حكوومه‌تا كۆلۆمپى و رێكخراوا (فارك) گه‌هشتنه‌ رێكه‌فتنه‌كا سه‌رانسه‌رى و هه‌تا هه‌تا بۆ ئاریشێن شه‌رێ ناڤخوه‌یێ كۆلۆمپى، كۆلۆمپیا ب ناڤ و بانگێ خوه‌ ل جیهانێ (50) سالا خوساره‌ت بوو. كۆلۆمپیا د ڤى شه‌رى دا باشترین شیانێن خوه‌ یێن مرۆڤانى خوساره‌ت بوو، كۆلۆمپیا پرانیا كه‌سێن خودان شیانێن خوه‌ خوساره‌ت بوو، ئه‌نجام رێكه‌فتن بۆ پێدڤیه‌كا فه‌ر بۆ كۆلۆمپیا، تازه‌ هه‌ر دو ئالى كار دكه‌ن بۆ ڤاڤارتنا شۆره‌شگێرا ژ تیرۆرستان، بۆ جوداكرنا داخوازیێن باسكێ چه‌پێ كۆلۆمپى ژ (مافیا).
(50) سال تێرا هندێ هه‌بوون كۆلۆمپیا بۆ خه‌لكێ خوه‌ باشتر و خۆشتر بیت، (فارك) كه‌ڤنترین گرۆپا شۆره‌شگێرا جیهانێ یه‌ تا نوكه‌ خه‌باتا چه‌كدارى به‌رده‌وام دكه‌ت، سه‌رئه‌نجام گه‌هشته‌ رێكه‌فتنه‌كا سیاسى، ل توركیا ژى هیڤى ئه‌وه‌ توركیا ژ به‌رى (په‌كه‌كێ) بگه‌هیته‌ وێ باوه‌ریێ پرسا كوردى و په‌كه‌كێ ب چه‌كى و داگیركرنێ ب دووماهیك نائێت، زوو یان دره‌نگ توركیا بگه‌هیته‌ وێ باوه‌ریێ یا كۆلۆمپیا گه‌هشتیێ هیچ هێزه‌ك نه‌شێت مله‌ته‌كێ رازى بكه‌ت هه‌تا هه‌تا بن ده‌ست بیت، توركیا هه‌مى په‌سنێن تیرۆرێ ب دیف هه‌ر بزاڤه‌كا ئازادیخوازا كوردى بكه‌ت، هیج ژ راستیا هه‌بوونا نه‌ته‌وه‌یه‌كێ بێ ناسنامه‌ كێم ناكه‌ت، توركیا باشتره‌ نوكه‌ و ژ به‌رى نه‌چار بیت، ژبه‌رى پتر زیانێن مادى و مرۆڤى به‌ر بكه‌ڤن، ژبه‌رى پتر خوساره‌ت بیت، دانێ ب هندێ بده‌ت (ئوجه‌لان) و (په‌كه‌كه‌) لاینه‌كێ (معادلێ)نه‌ باشبن یان خراب د چ ئاقارى دابن نوكه‌ ل مه‌یدانێ نوونه‌رایه‌تیا كوردى دكه‌ن ل توركیا.
باوره‌ ناكه‌ن گه‌لێ تورك زارۆكێن وان زێده‌بن هه‌تا ب كوشتن بده‌ن؟! تورك و حكوومه‌تا توركى ب نه‌شرینكرنا (په‌كه‌كێ) قازانجێ ناكه‌ت، دگه‌ل هه‌مى تێبینیێن مه‌ ل سه‌ر په‌كه‌كێ و رێباز وان، لێ بارۆلا بن ده‌ستیا نه‌ته‌وه‌یه‌كێ هه‌لگرتیه‌ و ئه‌ڤه‌ راستیه‌كا فه‌ره‌ توركیا بزانیت، توركیا ئارم و ره‌حه‌ت نابیت هه‌تا پرسا كوردى چاره‌سه‌ر نه‌بیت، (داعش) دێ چیت و نامینیت، لێ گه‌لێ كورد ب حوكمێ تاریخ و جوگرافیا یێ ل توركیا یه‌، شه‌ركرنا دوقولیا توركیا دگه‌ل (په‌كه‌كێ و داعشێ) كومیدیایه‌.

پارتى نوكه‌ خوه‌ ب هه‌لگرا ئالایێ سه‌رخۆبوونێ دزانیت و د هه‌مى واره‌كى ژى دا بزاڤێ بۆ دكه‌ت, باروه‌رناكه‌م پارتى سه‌رخۆبوونێ وه‌ك پرۆپاگنده‌كا سیاسى ب كار بینیت. یان بۆ ره‌ڤینێ ژ هنده‌ك قه‌یرانێن كوردستانێ بیت، وه‌ك نه‌یارێن پارتى دبێژن, لێ تشتێ بالكێش ئه‌وه‌ مانا پارتى ب ڤێ قورسایه‌تیێ ئایه‌ باوه‌ریه‌ ب عیراقێ یان (شعره‌ معاویه‌) یه‌ هێشتا ئه‌م عیراقینه‌ ل سه‌ر كاغه‌زێ؟َ راستى دبیت پارتى ژى د ڤى وارى دا سیاسه‌ته‌كا كه‌توارانه‌ ئه‌نجام بده‌ت, سه‌رخۆبوون پرۆژه‌یه‌ و مه‌رج نینه‌ سه‌ر بگریت و مه‌رج نینه‌ ژى سه‌خۆبوون نوكه‌ بیت.
به‌غدا بۆ كوردان هێشتا پایته‌خته‌, هه‌ر چه‌نده‌ هیچ مه‌رجه‌كێ پایته‌ختبوونێ بۆ كوردان تێدا نه‌مایه‌, لێ ب حوكمێ تاریخ و جوگرافیایێ به‌غدا جیرانه‌كا ئه‌زه‌لیه‌ بۆ كوردستانێ, بابه‌تێ ژێ ستاندنا باوه‌ریێ ژ به‌رێز هشیار زێبارى ئه‌و چه‌نده‌ ئازراند كو زێبارى سیاسیه‌كێ پارتیه‌ ل به‌غدا و مانا وى ل ده‌ستهه‌لاتا به‌غدا, راستى بۆ پارتى جهێ پرسیارێ یه‌ ل ڤى ئاستێ بلند هێشتا د حكوومه‌تا عیراقێ دا؟! ئه‌رێ پارتى هێشتا پیچه‌كا باوه‌ریێ ب به‌غدا مایه‌ یان ژى ب ئه‌ڤا پارتى دكه‌ت ب تنێ گڤاشتنه‌ ل سه‌ر به‌غدا؟! باوه‌ر ناكه‌ن پارتى و بارزانى ب تایبه‌تى هیج ره‌نگه‌ باوه‌ریه‌ك ب ئێگرتنا عیراقێ ما بیت و هه‌بوونا كه‌سایه‌تیه‌كێ پارتى وه‌ك هشیار زێبارى ل به‌غدا ره‌نگه‌ بۆ پارتى قورس بیت، لێ د سیاسه‌تێ دا مه‌حال نینه‌ هێشتا روویێ دروستێ رۆژهه‌لاتا ناڤین ب تمامى زه‌لال نه‌بوویه‌ و پارتى خواندنا خه‌له‌ت ناكه‌ت بۆ پێشهاتێن ب له‌ز ل ده‌ڤه‌رێ, حكوومه‌تا عیراقێ ب خوه‌ رۆژانه‌ وێ راستیێ دیار دكه‌ت كو حكوومه‌ته‌كا به‌رپرس نینه‌ ژ وه‌لاتیێن خوه‌ ل سه‌رئاستێ هه‌مى عیراقێ و ئه‌و ب خوه‌ پالده‌ره‌كا سه‌ره‌كیه‌.
كورد و پاشى سونه‌ ژى بیر ل شێوه‌كێ دى یێ په‌یوه‌ندیێ دكه‌ن دگه‌ل به‌غدا مینا (كومنویلسه‌ك عیراقى) بۆ وه‌لاتێن سه‌ربخۆ؟َ! ئه‌ز باوه‌رم ئه‌گه‌ر پارتى نه‌چارى هه‌لبژارتنێ بكه‌ن به‌غدا یان سه‌رخۆبوونێ، پارتى بێ دودلى دێ سه‌رخۆبوونێ هه‌لبژێریت. لێ چ ره‌نگێ سه‌رخۆبوون و د چ قه‌باره‌ى دا؟َ! هشیار زێبارى ژى ب خوه‌ به‌شه‌كه‌ ژ حكوومه‌ته‌كا گه‌نده‌ل ل به‌غدا وه‌ك كه‌س دبیت یێ پاك بیت، لێ ئه‌و بخوه‌ ئه‌ندامێ حكومه‌ته‌كا تائیفى و گه‌نده‌له‌, ئه‌ڤه‌ راستیه‌كه‌ دڤێت باوه‌ریێ پێ بینین و پاشى پارتى كۆمه‌كا نه‌یارێن سیاسى ل عیراقێ و كوردستانێ هه‌نه‌ دبیت هشیار زێبارى باجا سیاسه‌تا پارتى بده‌ت ل به‌غدا و پارتى دڤیا پتر ئاماده‌ بیت باجێ بده‌ت نه‌مازه‌ بۆ پرۆژێ سه‌رخۆبوونێ.

ئه‌و تشتێ هه‌ره‌ باش بۆ(په‌كه‌كێ) ل سووریا دهاتى ژمارتن ئه‌و بوو باژێرێن كوردان دپاراستى بوون ژ هێرشێن هێزا ئه‌سمانیا سوورى كو بربرا پشتا هێزا (به‌شار ئه‌سه‌دى)یه‌، كوردێن سووریا ره‌نگه‌ ژ ڤێ ره‌وشێ ب مه‌زنترین زیان ده‌ربكه‌ڤن، تاك ره‌وه‌یا(په‌كه‌كێ) و رێكه‌فتنێن وێ یێن نه‌ئاشكرا و بێ زه‌مانات دگه‌ل سووریا و ڤه‌كرنا (نوونه‌رایه‌تیێ) ل(موسكو) هێجه‌ته‌ك نه‌ئینا ده‌مێ حكوومه‌تا سووریا ب بۆچوونا من بریارا ژناڤبرنا هه‌ر تشته‌كێ كوردى دایه‌، مژداریا په‌یوه‌ندیێن (په‌كه‌كێ) ل سووریا و شێوه‌یێ سه‌رده‌ریا وێ دگه‌ل وه‌لاتیان و هه‌لویستێ وێ یێ مژدار ل هه‌ر پرۆژه‌كێ ناڤێ كوردستانێ تێدا بیت، پاشى مژداریا په‌یوه‌ندیان دگه‌ل ئه‌مریكا و بێ هه‌لویستیا ئه‌مریكا هه‌مبه‌رى شه‌رى ل (حه‌سه‌كێ) پتر ژ پرسیاره‌كێ ل سه‌ر په‌یوه‌ندیێن (په‌كه‌كى) دئازرینیت.
نێزیكبوونا رۆسیا و توركیا و پاشى هه‌لویستێ توركیا ژ حكوومه‌تا بشار ئه‌سه‌دى و ئه‌و گوهارتنێن ب خوه‌ ڤه‌ دیتین. ژ(په‌كه‌كێ) ناخوازیت پێداچوونه‌كێ ب هه‌لویستێ خوه‌ دا بكه‌ت یان داخوازا هه‌لویستى ژ هه‌ڤالێن خوه‌ بكه‌ت؟ ئه‌و تشێ نه‌دیار هه‌لویست و رێكه‌فتنێن (په‌كه‌كێ)نه‌ دگه‌ل حكوومه‌تا سوورى، خرابتر ئه‌و سیسته‌مێ (تولیتاریێ) (دكتاتۆریێ) خوه‌ فه‌رزكرنێ یه‌ د ناڤ كوردێن سووریا دا سه‌پاندێن. تاكره‌وى و خوه‌ مه‌زن دیتن و بێ هه‌لویستى و چه‌په‌رگرتن ژ خوه‌ مه‌زنتر دێ ئه‌نجامێن كاره‌ساتبار هه‌بن. مخابنى(په‌كه‌كێ) د ڤان سالان دا بۆ كوردێن سووریا دۆست دروست نه‌كرن، به‌لكو ژ ئه‌نجامێ چه‌په‌ر گرتنا خراب كوردێن سووریا دوور نینه‌ تووشى شكه‌ستنه‌كا مینا سالا 1975 یا باشوورێ كوردستانێ ببن، ئه‌گه‌ر نه‌ شه‌ركرنا (په‌كه‌كێ) د به‌رۆكێ ئه‌مریكا دا دژى داعش ئه‌رێ هندێ نائینیت ئه‌مریكا ئاسمانى بۆ سووریا ل سه‌ر كوردستانێ قه‌ده‌غه‌ بكه‌ت؟ ئه‌رێ پاراستنا(چار گوشێن ئه‌منى)یێن بشار ئه‌سه‌دى د هه‌مى باژێرێن كوردى دا تایبه‌ت ل قامیشلو هندێ نائینن جارێ باله‌فر نه‌رابن سه‌ر كوردستانا سووریا، ئه‌رێ نڤیسنگه‌ها موسكو یا (په‌كه‌كێ) هندێ ناكه‌ت رۆسیا گڤاشتنا ل سووریا بكه‌ت كوردستانێ خراب نه‌كه‌ن؟! مخابنى بۆ كوردستانا سووریا ژ ئه‌نجامێ خوه‌ زالبوونێ و ژ ئه‌نجامێ نه‌خواندنا كه‌توارى بۆ روودان و نه‌زانینا هێزێ و چه‌په‌ر گرتنا نه‌دروست، نه‌دووره‌ ئه‌ڤه‌ لێ لێ بن و لولو یێن ماین!.