كۆڤان حسێن
قه‌ت نه‌چوویه ئاقلێ من كو پرسا هه‌رێمێ و عیراقێ پرسه‌كا ئابوورى بیت، كلتووره‌كێ ب مخابنى ڤه ل ده‌ف مه سه‌رهلدایه ئه‌م خوه د كێشان دا سۆجبار دبینین و گه‌له‌ك (هه‌كه و منگرتیا) دكه‌ینه بهانه بۆ زۆره‌كا هاوكێش. راده‌یا گرێكه‌كا هه‌ست ب كێماسیكرنێ، خه‌ریكه زال دبیت وه‌ك هه‌ر تشتێ كوردستانێ (ره‌ش) بكین. بی جاره‌كێ ژی پرسیار بكه‌ین، ئه‌رێ ژ سالا1920 هه‌تا نوكه و ئه‌و هه‌مى مه‌ینه‌ته ژ به‌رهندێ بۆ مه(گاز) دفرۆت؟!. ژ راست بۆ هندێ بوو ئه‌م سه‌ر راستێن سامانێ وه‌لاتێ خوه بین.100 سالان هه‌مى داهاتێ كوردستانێ چوویه به‌غدا و چى هاتیه كوردستانێ ژ (ئه‌نفالان) پێڤه‌تر؟؟ راسته كوردستان ژ 1991 هه‌تا نوكه راستى هنده گڤاشتنان نه‌بوویه. راسته كوردستانێ وه‌ك هه‌مى وه‌لاته‌كێ تێرا خوه گه‌نده‌لى و خرابى هه‌نه، لێ د هه‌مان ده‌م تێرا خوه هند شانازى و ده‌ستكه‌فت ژی هه‌نه راسته (میزاجێ) ئابوورى و سیاسیێ مه نوكه ده‌رفه‌تێ ناده‌ت ببنین، لێ نه‌یارێن كوردستانێ قه‌نج هه‌ست ب وى ده‌ستكه‌فتێ كوردى دكه‌ن و وه‌ك گه‌ف بۆ سه‌ر ئاسایشا خوه دزانن، برسیكرن سیاسه‌ته‌كا كه‌ڤناره ژ نه‌چاریا خوه یا سیاسى ئالیه‌ك دژى یێ دى بكارئینایه. هه‌ر (تنازله‌كا) ژ برسا بێته‌كرن (ده‌مكى) یه، هه‌رگاڤا ده‌رفه‌ت روخسا مله‌تێن زیندى (تۆلێ) ڤه دكه‌ن. به‌غدا ب ئاگه‌هیا ئه‌نقه‌ره و ته‌هرانێ ده‌رفه‌ته‌كا زێرین بۆ روخسایه پترترین (تنازلان) ژ كوردان مسۆگه‌ر بكه‌ن. لێ هه‌تا كیڤه؟ برسیكرن و گڤاشتن هه‌تا سیڤاندا هه‌ره‌سێ. ئه‌نجامه‌كێ مسۆگه‌ر نینه بۆ دیالۆكا هاوسه‌نگ و شه‌ره‌فمه‌ندانه. بۆ ئاریشێن وه‌لاته‌كێ دبێژنێ عیراق كو هه‌مى (چه‌ك) ب هه‌مى رێیان دژى كوردستانێ بكارئیناینه. ژ من ڤه برسیكرنا مه یان هه‌تا (فه‌تساندنا) كوردستانێ و نه‌هێلانا وێ وه‌ك قه‌واره‌ك سیاسى دستوورى ئارمانجه ئه‌گه‌ر بۆ بچیته سه‌ر. ب حوكمێ جوگرافیا یێ كورد زورانبازیێ ل گه‌ل (3) نه‌ته‌وه‌ێن مه‌زن و خودان پاشبه‌نده‌ك (درنده) دكه‌ن. سه‌ركه‌فتن ب سه‌ر هه‌میان یان ئه‌سته‌مه یان پێدڤى لۆژیكه‌ك مه‌زن و خۆراگریه‌ك (ئه‌فسانه‌یى) ژ جه‌شنێ خۆراگریا (لینیگراد)؟ئه‌م نه برسى نه ب رامانا برسێ وه‌ك ئیدیه‌م به‌لكو ئه‌م (مه‌حتلین) ژ هنده‌ك پێدڤى و كه‌رستان. یا درست ئه‌م مه‌ترسینه د مه‌ودایێ درێژدا بۆ ئه‌ڤێن نوكه ل به‌غدا كو جارێ نه‌شێن ( ب تۆپ و فرۆكان) وه‌ك تركیا و ئیرانێ كوردان بكوژن. برسیكرن باشرین چه‌كه. سه‌ركه‌فتنا مه د ڤى شه‌ڕى دا ئێكگرتن و ئێك بریارى و خوه راست كرن و (ئیصلاحه). نه‌مازه ل ڤێ ره‌وشێ دنیا هه‌مى مژوولى ناڤخوه‌یێ خۆیه ژ ئه‌نجامێ كاره‌ساتا كۆرۆنایێ..
نووترين نووچه
- سەرۆك بارزانی و بالیۆزێ فرەنسا كێشەیێن د ناڤبەرا هەولێرێ و بەغدایێ دا گەنگەشەكرن
- مەسرور بارزانی و پاتریك دۆرێل دوپاتیێ ل گرنگییا رێزگرتنێ ل قەوارەیێ دستووریێ هەرێما كوردستانێ دكەن
- دڤێت دادگەها فیدرال ب گۆرەی دستووری بهێتە دروستكرن
- پەرلەمانتارەك: هەولێر و بەغدا نێزیكی رێككەفتنێ بووینە
- چاڤدێرەكا سیاسی: پێدڤیە ئیراق مافێ وەلاتیان ب دستووری بپارێزیت نەك ب بڕیارا سیاسی
- سەرۆكێ هەرێمێ و قونسلێ هندستانێ دوپاتیێ ل پێشڤەبرنا هەڤبەندییان دكەن
- هنارتیێ سەرۆكێ ئەمریكا دێ ل گەل مەسرور بارزانی كۆمبیت
- پارتی خۆ ب بەرپرس دزانیت و ژ بەرپرسیاریان ژی خوە نادەتە پاش
- هەلبژارتنێن ڤێجارێ پارتی زێدەتر ژ ئێك ملیۆن دەنگان دێ بدەستڤە ئینیت
- 160 هەڤپەیمانی و ئالیێن سیاسی لیستێن ناڤێن بەربژارێن خوە بۆ هەلبژارتنان پێشكێش كرینە
كۆڤان حسێن
ما هه‌رێما كوردستانێ بۆ چیه..؟!
كۆڤان حسێن
ئه‌ڤ پرسیارا رۆمانسیا كه‌ڤن د لۆژیكێ داكیركه‌رێن كوردستانێ دا، سه‌رده‌مانه‌كه كارى بۆ (شه‌رعیكرنا) ڤێ پرسیارێ دكه‌ن، هه‌ر ب تنێ پسیاره‌كا ژ ڤى ره‌نگى ل ناڤ كوردستانێ بئازرینن، مه‌زنترین ده‌ستكه‌فته. ئانكو بۆ چیه كوردان كیانه‌ك هه‌بیت. بۆ چیه ب زمانێ خوه زانستى وه‌ربگرن؟، بۆ چیه سازى و حوكمه‌ت و دادگه‌ه و له‌شكر هه‌بن, ئه‌ڤه یێن (مه) تێرا مه هه‌میان هه‌نه. ل بن ناڤێ برایه‌تیا ئیسلامى و جاران برایه‌تیا گه‌لان ب هزران سالان بووینه قوربانێ ڤێ به‌رسڤێ و ڤێ پرسیارێ. هه‌رێما كوردستانێ ب هه‌مى گه‌نده‌لى و خرابكارى و كێماسیێن خوه‌ڤه تاكه قه‌وارێ فه‌رمى و دانپێدایى 40 ملیۆن كوردایه ل ڤێ جیهانێ. قه‌ت ژ كه‌سه‌كێ پاشبه‌ندا وى ئیسلامى سیاسى رادیكال حێبه‌تى نینم وه‌لاتێ خوه به‌رامبه‌ر خه‌لكى كێم ببینیت، ئه‌و ئافریێ زاته‌كێ هه‌ڕفاندیێ چاڤترساندیێ خوه كێم زانێ كۆمه‌كا فاكته‌رایه. ئه‌گه‌ر مه ل كوردستانێ ژ راست داوا كارێ گشتى هه‌بیت و پیچه‌ك زاخێ تێدا هه‌بیت دیڤا ئه‌ڤه نۆرمال ده‌رباس نه‌بیت. ئه‌گه‌ر ژ راست مه (پارێزه‌ر) هه‌نه بۆ هه‌مى كاره‌كێ خۆبه‌خش كاردكه‌ن، دێ گرۆپه‌كێ فشارێ بۆ سكالا تۆمار كه‌ن. ئه‌ڤ هه‌رێمه رۆژانه ب هه‌مى كێماسیێن خوه‌ڤه دیار دبیت چه‌ند پاریه‌ك زڤر و ئاسته‌نگه‌كا مه‌زنه بۆ خودانێن ڤێ بیرۆكێ یان یێن ب زانین یان نه‌زانین بووینه خزمه‌كارێن ڤێ بیرۆكا (چنه) كرنا كوردستانێ.
قه‌ت وێ خوه كێم ناسكرى (ئه‌لترناتیفا) هه‌رێمێ دیار نه‌كریه و ئه‌ڤه ژ پرسیارێ گرنگتره كا چ ره‌نگێ (پۆستالێ) هێژاى داگیركرنا وه‌لاتێ خوه دیتیه..؟ نه‌مانا هه‌رێمێ ئانكو ب درستى ئه‌نفال ڤه. ئانكو كورد هه‌مى ببن (پشتى كیش) و كۆلبه‌ر. مخابنى ل ڤى وه‌لاتى سه‌ده‌م چ بن، كه‌سان هه‌بن هه‌راجا روومه‌تا وه‌لاتێ خوه بكه‌ن و ل ڤى وه‌لاتى سیاسى و ئه‌كادیمى و چالاكڤان هه‌بن بێ ده‌نگ بن..
دیسا (تركیا)!
كۆڤان حسێن
هه‌ژمۆنا تركیا ب تنێ كاریگه‌رى ل سه‌ر كوردستانا عیراقێ نینه، دیسا كوردێن عیراقێ ب تنێ نینن نوكه دبنه قوربانى پاوانخوازیا تركیا، تركیا ژ كه‌نداڤى یا باكۆرێ ئه‌فریقیا هه‌تا ئه‌ورۆپا و ئاسیا ناڤین یا سیاسه‌ت و پرۆژه‌كێ (ئیمپراتۆرخوازى) ل به‌ر چاڤێن جیهانێ دهاژۆت و بۆ هه‌ر ده‌ستوه‌ردانه‌كا خوه، كۆمه‌كا بهانه و سه‌ده‌مان به‌رچاڤ دكه‌ت، پتریا وان یان پرسێن مێژووینه، په‌یوه‌ندى ب رابردویێ ئوسمانیان ڤه هه‌نه یان ده‌هان جوینان هنده‌ك هاوبیرێن خوێن (ئیخوانى) نه، لێ كوردستانا عیراقێ زق و زق باجا ڤێ سیاسه‌تا تركیا دده‌ت ب بهانا هه‌بوونا هێزێن پارتیا كریكارێن كوردستانێ. بخوه بهانه‌كا لاوازه و قه‌ت هندێ پرناكه‌ت شه‌رعیه‌تێ بده‌ته داكیركارى و هێرشكرنێ. په‌كه‌كه ده‌رئه‌نجامێ (100) سالێن ئینكارا سیاسه‌تا ئه‌نقه‌ره یه، په‌كه‌كه هه‌ر چه‌نده مه‌یدانا خه‌باتا وێ باكۆره كۆمه‌كا پرسان ل سه‌ر شێوه و خه‌بات و ئارمانجا وێ هه‌نه، لێ ب خوه ئاریشه‌كا ناڤخوه‌یا تركیا یه و ب رێیا سه‌ربازى چاره‌سه‌ر نابیت، تركیا و په‌كه‌كه دره‌نگ یان زوى، دڤیا بگه‌هنه وێ باوه‌ریێ شه‌ڕ شه‌ڕى دئافرینیت و پرسه چاره‌سه‌ر نابیت. پرسا په‌كه‌كێ ل سنۆرێن باشۆر نینه و تركیا ژی وێ راستیێ بزانیت هه‌تا هه‌تا ئینكار فایده ناكه‌تن، ب هه‌ر حالى ئه‌ڤه لۆژیكێ داگیركه‌رانه، چاوانیا به‌رسنگرتنا ڤێ تاوانا ب ناڤێ شه‌ڕێ تیرۆرێ دهێته كرن, پرسه‌كا ژدله. تركیا بێ ل به‌رچاڤكرنا هه‌مى یاسا و ل هه‌مى جهێن جیهانێ یا سیاسه‌ته‌كێ دهاژۆت. كه‌سێ شیانا هندێ نینه بزانیت هه‌تا كیڤه ده‌ستیر دایه ژ ئالێن زلهێزان ڤه بچیت، ئه‌ڤ سیاسه‌تا تركیا و ئه‌ڤ به‌رسڤدانا په‌كه‌كێ دى بازنێ گرتى دا پترى 40 سالا جهێ راوه‌ستیانێ یه, هه‌كه تركیا رازى نه‌بیت ژبلى چاره‌سه‌ریا سه‌ربازى ئه‌ڤه په‌كه‌كه دڤیا ته‌كتیكا شه‌ڕى بگوهۆریت ب وى چه‌كى تركیا ژێ ترسیت و نه‌چارى دانوستاندنان بكه‌ت. ئه‌ڤ شه‌ڕێ كلاسیكى بێ ئه‌نجامه و قوربانى ژ قه‌بارێ ئارمانجێ مه‌زنترن. تركیا هه‌مى چه‌كى هه‌مى شیانان، هه‌مى هێزا نه‌رم و زڤر ئێخستیه خزمه‌ت ئارمانجا خوه و هێشا په‌كه‌كه د بازنێ شه‌ڕێ (ملیتان و گه‌ریلا) دا قه‌تیس بوویه و ئه‌ڤه بۆ تركیا نموونه‌ترین و ئاساناترین شه‌ره.
ده‌مێ هندێ یه ژ راست باكۆر ژبێده‌نگیا خوه هشیار بیت و هێدى باشۆر و باكۆر باجا ڤى شه‌ڕێ بێ ئه‌نجام نه‌ده‌ت.
كورۆنا مه‌رگێ مرۆڤایه‌تیێ..؟!
كۆڤان حسێن
قه‌ت گومانێ نابم ئه‌ڤه شه‌ڕه‌ك سیاسی بیت وه‌ك هنده‌ك بۆ دچن، قه‌ت جارا ئێكێ ژى نینه مرۆڤایه‌تى راستى په‌ژى و ئاتافه‌كا ژڤى ره‌نگى بیت، ئه‌گه‌ر به‌رێ ئالاڤێن په‌یوه‌ندیا لاواز بوون، ئه‌ڤ په‌ژیه هه‌تا دهات ل سنۆره‌كێ دا دمان، ناسكرنا ڤێ په‌ژیێ كارێ نۆشدار و بسپۆرانه، ل سه‌ر جڤاكى ب تنێ پێگێرى ب وان شیره‌تان ئه‌وێن سه‌لامه‌تیا گشتى دپارێزن، یا راست دڤیا خوه نه به‌عجینین، لێ دڤیا سڤك ژی وه‌رنه‌گرین، هه‌كه قه‌یرانا دارابى ڤه‌ده‌ر كه‌ین ئه‌ڤه كورۆنا پشتى داعشى (ته‌حه‌دایه‌كا) مه‌زنه بۆ جیهانێ ب گشتى بۆ كوردسانێ ب تایبه‌تى، چونكو ل سه‌نگه‌رێن پێشیێ نه، ڤێ په‌ژیێ دێ شینا خوه ل سه‌ر هه‌مى ئالێن ژیانێ هێلیت, مسۆگه‌ر دێ چاره هه‌بیت، لێ كه‌نگى و ل كیڤه و چه‌ند دێ بازار ل سه‌ر هێته‌كرن دێ كه‌ڤیته بن قانوونا مافێ مولكداریێ یان دێ ئه‌رزان و به‌ش بی بۆ هه‌مى كه‌سێ. ڤێ كورۆنایێ ده‌رگه‌هێن زۆر بابه‌تان ڤه‌كرینه، سه‌رئه‌نجام مه‌رم ژ هه‌بوونا هه‌مى ده‌ستهه‌لاته‌كێ سیاسى بۆ جڤاكى بیت هه‌تا ل ناڤ مالێ بیت، بۆ پاراستنا به‌رژه‌وه‌ندیا مرۆڤایه. ئه‌ڤجا پاراستنا مرۆڤان پیرۆزترین مه‌ره‌مه، جڤاك هه‌مى دڤیا میناكا چینێ مله‌ته‌ك ملیارى و پتر ب هێز و باوه‌رى و پێگیرى راستى ڤێ ئاتافێ بوون و خه‌ریكه سه‌ربكه‌ڤن. ئانكو تاكه هێزا مه پێگێریه ب وێ یا ده‌ستهه‌لاتێن ساخله‌میێ دبێژن. ژمن ڤه كورۆنا دووره ژ سیاسه‌تێ و مرۆڤا ئه‌تۆم و كیما دژى ئێك بكارئیناینه لێ (میكرۆب و ڤایرۆس) ب فه‌رمى جلكێن سه‌ربازان نه‌كرینه به‌ر. پشتراستم زانست دێ سه‌ركه‌ڤیت سه‌ر ڤێ ڤایرۆسێ هه‌كه هێزا مرۆڤانن هاریكار بیت. جڤاكێ كوردستانێ ئه‌ڤرۆكه داخواز كریه به‌رهنگارى ڤى شه‌ڕێ بیت یێ كو جیهان هه‌مى ڤه‌گرتى ب دسپلینه‌كا موكم ب رێنمایێن ساخله‌میێ.
قه‌یران…. باشن؟!
كۆڤان حسێن
وه‌ك مێژوو ڤه‌دگێریت، پرانیا داهێنانان و په‌یداكرنا هه‌وجه‌یێن مرۆڤان ژ مالبچووكى، قه‌یرانان هه‌مان متاى درست بووینه، ئانكو قه‌یران فاكته‌ره‌كێ سه‌ركیێ سه‌رهلدانێ و داهێنانا گه‌له‌ك ژ پێدڤێن ژیانا ئه‌ڤرۆ بووینه، هه‌ر چه‌ند جهێ مه د لیستا داهێنانێ دا ل سه‌ر ئاستێ دونیایێ هه‌مابێژه نینه, لێ ئه‌ڤه هندێ نا گه‌هینیت، ئه‌م ژی هێدى بۆ قه‌یرانێن خوه ل ئه‌لترناتیفه‌كێ بگه‌رهێین بیرۆكراتیا حوكمه‌تا گه‌له‌كا ب له‌ز نینه بۆ چاره‌سه‌ركرنا پرانیا قه‌یرانان. ئه‌م قه‌نج قه‌یرانێن خوه ناس دكه‌ین و دبیت مه تێرا هندێ ژی ئه‌و كه‌س و شیان و هزره ژی هه‌بن هه‌ر چو نه نیڤ چاره‌كێَ بۆ هنده‌ك ژ قه‌یرانێن مه دابنن. ئه‌ڤ هه‌مى زانكۆ و زانستێ دهێته خواندن بۆ چیه، هه‌كه پشكه‌كا چاره‌سه‌ریێ په‌یدا نه‌كه‌ت، ئه‌ڤ سامانێ مه‌زنێ حوكمه‌تێ و بازرگانان بۆ چى یه گه‌ر ل وارێ چاره‌سه‌ریا دا نه‌هێته وه‌به‌رهێنان. راسته پشكه‌ك ژ قه‌یرانێن مه سیاسینه، لێ پشكه‌ك ژی نه سیاسینه، زانستى و ئابوورى نه نه‌مازه ئابوورا مالێ، ئابوورا سه‌رده‌مێ قه‌یرانێ. تشتێ جهێ حێبه‌تیێ ئه‌وه ل وارێ تیوه‌رى دا مه مه‌زنترین ژمارا كه‌سان هه‌یه، لێ د وارێ پراكتیكێ دا ئه‌م ل هنده‌ك وارا ل بن سفڕێ دانین، مله‌ته‌ك پێنچ ملیۆنى، 30 زانكۆ یێن هه‌یین، هه‌یڤێ ملیار دۆلاران بهاڤێته سویكێ، نه‌شێت پشكه‌ك قه‌رانێن وه ب داهێنانه‌كا كوردى چارسه‌ركه‌ت. به‌رئاقله ئه‌ڤه هه‌مى مه هه‌بن هێشتا كێم گاز و كاره‌با بین؟! هێشتا گلێش ئاریشا مه بیت؟! هێشتا حوكمه‌ته‌ك نه‌زانیت چه‌ند كه‌س ل وه‌لاتى كاردكه‌ن و چه‌ند بێكارن، به‌لێ ب داتاێن راستى؟ بۆ خه‌لكى قه‌یران خێر و به‌ركه‌ت بوونه و ژ ئازارێن خوه ئافراندن كریه بۆ مه, مخابن بوویه عه‌یبه و مزایدا سیاسى و فرسه‌تا شكاندنا ئێكودو و متایه‌كێ گه‌نگه‌شێ و چو دى نه..!
قه‌یران…. خولكێ وه‌لاتى..؟!
كۆڤان حسێن
هیچ وه‌لاته‌ك نینه ل گۆر جهێ خوه و شیانێن خوه و پلانێن خوه جارجاران تووشى قه‌یرانان نه‌بیت, ب كورتى قه‌یران جێمكێ گه‌شه‌پێدانێ یه وه‌ختا تازه وه‌لات جهێ خوه ل سه‌ر نه‌خشێ دكه‌ن، نه‌بوونا ناسنامه‌كا ئاشكرا بۆ ئابوورا وه‌لاتى و نه‌بوونا پلانێن ژیانێ ل وه‌لاته‌كێ سویكا وێ ڤه‌كرى هه‌رده‌م هه‌ڤوه‌لاتى راستى گرفت و قه‌یرانان دبیت، هه‌تا ڤێرێ نۆرماله لێ كاره‌سات هینگێ دروست دبیت وه‌ختا قه‌یرانا سه‌ده‌مێن سیاسى هه‌بن, گومان تێدا نینه قه‌یرانا ئابووریا كوردستانێ پاشخانه‌كا سیاسى هه‌یه، به‌هرا پتراوێ ڤه‌دگه‌ریت بۆ وى ئاستێ سیاسیێ د ناڤبه‌را به‌غدا و هه‌ولێرێ دا كو كوردستان راستى قه‌یرانا كرى و قه‌یران ژی تازه تێرا خوه هه‌یه ب ده‌هان قه‌یرانا ن بئافرینیت, لێ هنده‌ك قه‌یرانان سیمایه‌ك سیاسى كوردى بخوه ژی هه‌یه و جاران سه‌رهلده‌ن و ئه‌ڤه نه‌خۆشترین قه‌یرانن پتر ژ خوه هه‌ڤوه‌لاتیان ئازار دده‌تن, لێ ئه‌ڤه هه‌مى ره‌نگه خواندنێن بابه‌تى بن بۆ قه‌یرانێن كوردستانێ و حوكمه‌تێ، پتر ژ بهانه‌كێ هه‌بن كا بۆچى ئه‌م د ناڤ ڤان قه‌یرانان دا دژین. لێ ئه‌ڤه هه‌مى ده‌ستهه‌لاتا كوردستانێ بێگونه‌ه ناكه‌ت، كو ها وه‌خته عه‌مرێ ڤێ سه‌ربۆرێ بیته 30 سال و هێتشا ل هنده‌ك سێكته‌ران دا زۆرا هه‌ژاره نه‌مازه یێن خزمه‌تگوزارى یێن رۆژێ ژ گازێ و غازێ و كاره‌بێ. ئه‌ڤ متایه هه‌كه حوكمه‌تێ شیانا دابینكرنا وان نینه، باشتره سویكا وێ ڤه‌كه‌ن و هه‌ڤڕكیێ په‌یدا كه‌ن. هه‌تا هه‌كه بازرگانى ژی بیت ب ئاسان و ئه‌رزانتر به‌رده‌ست ببیت. راسته كوردستانێ سه‌ربۆره‌كا دژوارا بۆراندى ل سالێن قه‌یرانێ دا راسته بارێ سازیێن حوكمه‌تێ پتر ژ پێدڤى گران بوویه، لێ دیسا دڤیا هه‌ر چو نه‌بیت پلانێن جودا هه‌بن بۆ به‌رهنگاریا قه‌یرانا یپَشوه‌خته. هنده‌ك قه‌یرانێن كوردستانێ (وه‌رزی) نه، ئانگو گرێداى وه‌رزێن سالێ نه، ئاسانتره بۆ حوكمه‌تێ ب درێژیا سالێ بیر ل به‌رهنگاریان بگریت و هیچ قه‌یرانه‌كا كوردستانێ ئه‌سته‌م نینه چاره‌سه‌رنه‌بیت, ل ئالیه‌ك دى ژیانا هه‌ڤوه‌لاتیان ژی شه‌پرزه‌یى یپێڤه دیاره و ره‌وشنبیریا بازاركرنێ ئابوورێ مالێ و پالسه‌نگ راگرتنا ژیانێ ل وه‌لاته‌كێ هه‌رده‌م نه ژ لایێ سیاسى ڤه سه‌قامگێره و نه ژ لایێ ئابوورى ڤه ژێ پشتراسته. ئانكو ل سه‌ر حوكمه‌تێ فه‌ره هه‌مى پێدڤیان به‌رده‌ست كه‌ن یان سویكا وان پڕ كه‌ن, ل سه‌ر هه‌ڤوه‌لاتیان ژی فه‌ره بێ پلان و به‌رنامه نه‌بن ب هیڤیا هات و باتێ ڤه..
سه‌رۆك وه‌شزیره‌ك (بێ شانس)!
كۆڤان حسێن
سه‌رئه‌نجام عیراقێ كه‌سه‌ك دبێژن ده‌ست پاقژ، به‌لێ لاواز و بێ شانس بۆ ئیداره‌كرنا قووناغا نوكه، ده‌ستنیشان كر، لێ سه‌رۆك وه‌زیره‌ك هیچ ئالیه‌ك سیاسى هه‌تا نوكه و ب خودانێ وێ ناسناكه‌ت و هیچ فراكسیۆنه‌كا زه‌لال ل په‌رله‌مانى نینه ئاشكرا پشته‌ڤانیا وى بكه‌ت، پێشوازیا ئه‌مریكا و دبیت یا مه‌رجه‌عیه‌تا شیعه‌یان پرسێ ئێكلاكه‌ن. ب هه‌ر حالێ هه‌ى ره‌وشا عیراقێ هندا ساناهى نینه ب هانا سه‌رۆك وه‌زیره‌كێ پاك و ژ پاشخانه‌كا ده‌وله‌مه‌ندا ره‌وشێ ب ساناهى بگوهۆریت، لێ د خوه دا گوهارتن ب تنێ باشه نه‌مازه بۆ وه‌لاته‌ك وه‌ك عیراقێ كو چاڤ ل هندێ یه گوهارتنان بكه‌ت، نه‌مازه د وارێ خه‌زمه‌تگوزارى دا. ئه‌ڤ راسپاردنه یا بێ مه‌رج و به‌رنامێ ڤه‌شارتى نینه، دبیت هه‌ر ئالیه‌كێ هنده‌ك ژ مه‌رجێن خوه مسۆگه‌ر كر بن ب كوردان ڤه. لێ ئه‌وا جهێ گومانێ ئه‌وه هه‌تا چه‌ند دێ پشته‌ڤانى ل (محه‌مه‌د ته‌وفیق عه‌لاوى) هێته‌كرن، تایبه‌ت ل پرسێن سنۆرداركرنا چه‌كى ل وه‌لاتى، گومان پترن ژ گه‌شبینیێ، عیراقێ دڤیا زوى یان دره‌نك بگه‌هنه وێ باوه‌ریێ وه‌لات ب هه‌مان لۆژیكێ جاران برێڤه ناچیت و سیاسیێن شیعه‌یان دڤیا وێ راستیێ په‌سه‌ندب كه‌ن كو ب فۆرما خوه نه‌شیان وه‌لاته‌كێ ئاڤا كه‌ن. ده‌رفه‌تان بۆ روخسایى نه‌شیان وه‌ك پێدڤى بۆ خزمه‌تا وه‌لاتى بكاربینن, عیراق وه‌ك ده‌وله‌ك یان وه‌ك هنده‌ك ئیماراتێن چه‌كداران دڤیا ل ڤێ ره‌وشێ ئێكلا بیت. ئه‌ڤه كاره‌كێ ساناهى نینه و ململانا خه‌لكێ دى ل عیراقێ بۆ عیراقیان ئاسان نینه ژێ قورتال بن. عه‌لاوى بۆ كوردان كه‌سه‌ك به‌رنیاسه میانره‌وه‌ك ئیسلامیه و سه‌ركردایه‌تیا كوردان باش ناسدكه‌ن. وه‌ك دیار كه‌سه‌ك باوه‌رى ب دستوورى و دیمۆكراسیه‌تێ هه‌یه هه‌كه نه‌هێته گوهارتن. كورد د ڤێ قووناغێ دا به‌غدایه‌ك ئارام ب باشیه‌ك بۆ خوه دزانن هه‌كه ج به‌رنامێن دى نه‌بن بۆ عیراقێ.
تاكه چاره‌یا كوردان..
كۆڤان حسێن
روودان و پێشهات هنده ب له‌زن گه‌له‌ك خواندنان هه‌لناگرن. دبیت شاره‌زا ژى هێدى ب وان روودانێن وه‌ك سۆپرایزه‌ر دهێنه دیتن ئاشنا و ب ئاگه‌ه نه‌بن، ل ڤێ ده‌ڤه‌را ئه‌م تێدا ژ كه‌ڤن وه‌ره یان مه‌یدانا زۆرانبازیا زلهێزان بوویه، یان ژى جهێ بایه‌خ و پاوانكرنێ بوویه. ئیمپراتۆرێن مه‌زن ل ڤێرێ شه‌ڕێ مان و نه‌مانێ یێ كرى هه‌مى كوردستان یان كاڤل بوویه یان نێرێ بنده‌ستیێ كیَِشایه. نوكه هه‌مان سیناریۆ خوه دوباره دكه‌ت، بێلایه‌نى ره‌نگه تاكه فریادره‌سا كوردستانێ و تێرا هندێ شاره‌زا و ب ئاگه‌ه بین هێزێن شه‌ڕكه‌ر كوردستانێ نه‌كه‌ن مه‌یدانا شه‌ڕى یان كوردستانێ هنده قه‌تیس كه‌ن ئێكێ ژ دوویان بهه‌لبژێریت. هه‌مى سه‌ربۆرا سیاسیا كوردستانێ و هه‌مى شیانێن سیاسێن كورد لێ قووناغێ دا دێ بلیمه‌تیا خوه دیاركن كا ب چ ره‌نگى، دێ شێن كوردستانێ ب كێمترین زیان ژ ڤێ گێله‌شۆكێ رزگاركه‌ن. ئه‌مریكا و ئیران عیراقێ و كوردستانێ وه‌ك مه‌یدانا شه‌ڕى دبینن و عیراقیان ب كورد و عه‌ره‌ب ڤه ب تاگێرێن وه دنیاسن وه‌سایه ژى لێ ب وى مه‌رجى زیان نه‌بن. تاكه هیڤى و فریادره‌سا كوردستانێ ئێكرێزى و ته‌ڤایا هێزێن وێ یێن سیاسیه و ئێك گۆتاریا كوردى و راگرتنا پالسه‌نگا هێزێ د ناڤبه‌را شه‌ڕكه‌ران و نوونه‌رێن وان دا. پاراستنا سه‌ربۆرا كوردستانێ ئه‌ركێ هه‌ره سه‌ره‌كیێ ڤێ قووناغێ یه و دیاره ل سه‌رێ هه‌مى كاره‌كێ بیت. ئه‌مریكا وه‌ك پێدڤى هه‌ڤالا هه‌ڤالێن خوه نینه و سه‌ربۆرا كوردان د گه‌لدا دیاره و ئیران ب حوكمێ جوگرافیایێ جیرانێ هه‌تاهه‌تایێ كوردستانێ ب ئاسان نینه بێته فه‌رامۆشكرن یان د یاریا جیۆسیاسى دا حساب بۆ نه‌هێته‌كرن ژ لایێ كوردستانێ ڤه. پاراستنا ئاستێ گۆتاره‌كا كوردى یا پالسه‌نگ و خوه دیركرن ل ڤێ قووناغێ ژ ململانا سیاسى و نه‌یاره‌تیا رۆژانه‌یا سیاسى بۆ كوردستانێ زامه‌نێ مان و به‌رده‌وامیا ڤى كیانێ كوردیێ پڕى شانازى و پڕى كێماسى ژی یه. هه‌مى چاڤ ل سه‌ر هه‌لویستێ سیاسیێن كوردایه و سه‌ره‌ده‌ریا وان ل گه‌ل روودانان و راگرتنا به‌لانسێ. دیاره ئه‌مریكا و ئیرانێ شه‌ڕێ ب وه‌كاله‌ت دڤێت و ئه‌ڤه پیسترین شه‌ره وه‌لاتان وێران دكه‌تن هیڤیه كورد وه‌كیلێ كه‌سێ نه‌بیت هه‌رچونه ڤێجارێ….
(العراق) میت…(مع وقف التنفیژ)!
كۆڤان حسێن
ئه‌و وه‌لاتێ پڕانیا مێژوویا وى شه‌ڕێن ناڤخوه و ده‌ره‌كى، ئه‌و وه‌لاتێ هیچ بنه‌مایه‌كێ ئێكرێزیا نشتیمانى نه‌هه‌ى, ئه‌و وه‌لاتێ بریتانیا بۆ مه‌ره‌مه‌كا هندا ئاڤاكرى. هنده ئالۆزه، نوكه سه‌رێ كه‌سێ ژێ ده‌رناچیت، حه‌تا وى راده‌یێ هنده‌ك خۆزیان ژ جه‌نه‌راله‌كێ دكتاتۆر بخوازن، ئه‌ڤ وه‌لاتێ بێ ناسنامه‌كا نشتیمانى به‌رده‌وام د ژینگه‌ها بێباوه‌ریێ دا سه‌د سال ژی ده‌رباز كرین و هیچ پێشكێش نه‌كرى و هه‌مى ده‌مى ل بنێ لیستا وه‌لاتان دهێت هه‌تا ل سه‌ركه‌راتا مرنێ ژی كه‌سێ نه‌ڤێت بمریت، هه‌مى گاڤێ ب پیلان و به‌رنامێن رۆژێ ژیێ وێ درێژ دكه‌ن. گه‌ر نه, هیچ گومان ل ده‌ف كه‌سێ نه‌مایه، لى وه‌لاتێ دبێژنێ عیراق هیچ بنه‌مایێ وه‌لاته‌كێ به‌رێز تێدا نه‌مایه و دووماهی بریارا كو گه‌له‌گ خواندن بۆ هاتیه‌كرن، بریارا ده‌ركرنا هێزێن بیانى و ئه‌مریكى ب تایبه‌تى بوو. چاوا دیار بوو سێ مله‌ت، سێ هزر، سێ خواندنێن سیاسى، سێ ترس، سێ دیتن، سێ دیدگا، سێ هه‌ر تشت بۆ ڤى وه‌لاتى هه‌نه. خالێن هه‌ڤپشك هه‌ما بێژه نینن. ب گۆر ڤان خواندنان بیت، عیراقێ هیچ ئاسۆیه‌ك نینه، ره‌وشا وێ ده‌ربازى قووناغه‌كا باشتر بیت ئه‌گه‌ر هه‌ما لۆژیكێ سیاسیێ، نوكه و بیرا ته‌نگا نوكه و سیاسه‌تكرنێ ب درووشمان به‌رده‌وام كه‌ت. ده‌رفه‌تێن باش بۆ عیراقێ هه‌بوون ژ سوباتا خوه هه‌لویست لێ نه‌بوونا شووناسه‌ك سیاسى عیراقى نشتیمانى ئاڤاكه‌ر. یان دێ عیراقێ پارچه كه‌ت كو ئه‌ڤه باشترین چاره‌سه‌ره یان دێ د ڤێ گێله‌شۆكا خوه‌دا وه‌ك وه‌لاته‌ك فاشل و پرى پاره، به‌لێ بۆ هنده‌كێن دى بۆ ده‌مه‌كێ دى به‌رده‌وام بیت، هه‌تا ئه‌وا هنده‌ك دى بۆ حه‌ز دكه‌ن ببیت. ژ ده‌ستدانا ده‌ستپێشخه‌ریێ و نه‌بوونا دیتنه‌ك عیراقى نشتیمانى وه‌ك عیراقى حه‌ز دكه‌ن هه‌بیت و مژوولكرنا وێ، رۆژانه ئاسۆ پتر تارى دبن. ئه‌ڤ وه‌لاته بێ حه‌زا حه‌لكێ وێ بێ خواندنا به‌گراوه‌ندێ نه‌ته‌وه‌ى و كلتووریێ وێ هاتیه ئافراندن. ب ڤى ره‌نگى بیت، نه‌هه‌لبژارتن، نه‌دیمۆكراسى، نه هیچ كه‌لیشه‌ك و دارشتنه‌ك تێرا هندێ نینه ب ڤى لۆژیكى وه‌لاته‌ك ئاڤا بیت ل ناڤ وه‌لاتێن جیهانێ، رێزدار بیت ل گۆر پێڤه‌رێ وه‌لاتێن پێگه‌هشتى. بۆ كوردان قه‌ده‌ره‌ك ره‌شه ب نه‌چارى ل وه‌لاته‌كێ ژبلى كوردان بخوه ده‌ست ل هه‌لبژارتنا ڤێ ژیانێ ل ڤێ جوگرافیایێ نینه..
ئه‌رێ چاكسازى به‌س مووچه‌نه؟!
كۆڤان حسێن
رێخستنا موه‌چه‌یان و په‌یداكرنا ئاسته‌كێ جهێ رازیبوونێ ژ عه‌داله‌تێ گرنگه و دبیت گرنگترین ژی بیت د وارێ دابه‌شكرنا سامانێ نه‌ته‌وه‌ى د،. لێ مسۆگه‌ر چاكسازى هه‌ر ب تنێ مووچه نینه ل كوردستانێ، پتر ژ كه‌رته‌كێ ژ واره‌كێ پێدڤى ب چاكسازى و پێداچوونێ یه. نه‌بوونا ناسنامه‌كا ئاشكرا بۆ سیته‌مێ وه‌لاتى و دارشتنا سیاسه‌تێن پێدڤى ل گۆر وێ ناسنامێ دێ وه‌لاتى ژ گه‌له‌گ ئاریشه و قه‌یرانان قورتال كه‌ت، چاكسازى پرۆسه‌كا درێژ و رى سه‌رگێژیه بۆ وه‌لاتێن تازه پێگه‌هشتى قه‌ت ل كه‌رته‌كێ یان بابه‌ته‌كێ مینا مووچه‌یان قه‌تیس نابیت سه‌خمه‌راتى گرنگیا وێ. كوردستان ل په‌روه‌ردێ ل ئابوورێ ل جڤاكى ل ساخله‌میێ ل مه‌یدانا كارى ل ئیدارى پێدڤى ب نویگه‌رى و وه‌رارێ یه. ئاماده‌سازیا جڤاكى بۆ چاكسازیێ و گرتنا ده‌رگه‌هێن بێهنا گه‌نده‌لیێ ژێ دهێت و ئیداره دانا بیرۆكراتیه‌ته‌كا ساخله‌م و چالاك و خولقاندنا پشته‌ڤانیه‌كا جڤاكى و به‌رپاكرنا ره‌وشه‌نبیریه‌كا گشتى وه‌ك پشته‌ڤان بۆ چاكسازیێ ب ته‌مه‌ت چاكسازیێ گرنگه. نه‌بونا سه‌ربۆرا ئیداره‌دانا ده‌وله‌تێ نه عه‌یبه‌ن، لێ مان د گێژه‌ڤانكا گه‌نده‌لى و ئاسێبوون ل گرێكێن حوكمرانیه‌كا نه‌ساخله‌م و ئاریشه دا عه‌یبه‌ك مه‌زنه، خه‌لكێ سه‌ربۆرێن جوان و سه‌ركه‌فتى هه‌نه ل جڤاكێن مینا جڤاكێ مه پرۆسه‌كا چاكسازیا سه‌ركه‌فتى ئه‌نجامدایه. فاكته‌رێن سه‌ركه‌فتنا هه‌ر پرۆسه‌كێ ل سه‌ر ئیراده و زه‌مینه‌سازیا جڤاكى دراوه‌سیت. بریارا سیاسى ئاره‌ستا هه‌مى چاكسازیه‌كێ به‌لانس دكه‌ت ل گۆر ئه‌و بیردۆزا سیاسى یان ئه‌و ئایدولۆژیا باوه‌رى پێ هه‌ى ده‌وله‌تێ ئه‌ندازه دكه‌ت. جڤاكێ كوردستانێ گه‌هشتیه ئاسته‌كێ هشیاریا سیاسى ل ژینگه‌ها تازه‌یا پشى چاكسازیێ هاریكاربیت. نه‌مازه ئه‌گه‌ر پشكه‌ك ژ بنه‌ماێن عه‌داله‌تێ تێدا به‌رجه‌سته ببن. چاكسازیا نوكه به‌حس لێ دهێته‌كرن ژمن ڤه ده‌ستپێكه و پێنگاڤا ئێكێ یه بۆ ڤه‌كرنا ده‌رگه‌هى ل سه‌ر چه‌ندین وار و سێكته‌رێن دى. چاكسازى ل قووناغه‌كێ ب تنێ ناوه‌ستیت و بریاره‌ك یان قانوونه‌ك هه‌مى پرسێ چاره‌سه‌ر ناكه‌ت. لێ هه‌بوونا ئیراده‌كا سیاسى و ئاماده‌باشیه‌كا جه‌ماوه‌رى و گڤاشتنا هه‌ى ئاینده‌كێ گه‌ش چاڤه‌رێ كوردستانێ دكه‌ت, دڤیا قووناغا درووشمان ده‌رباس بكه‌ین. و هه‌مى كه‌ره‌ستێ سه‌ركه‌فتنا هه‌ر جڤاكه‌كێ ل كوردستانێ به‌رده‌سته ژ شیانێن مرۆڤى هه‌تا سامانێ سروشتى.
نيشاندان
WP Facebook Auto Publish Powered By : XYZScripts.com