كۆڤان حسێن
هه‌ركه‌سێ دیرۆكا كوردان بخوینیت، نه‌مازه‌ ئالیێ وێ یێ جڤاكى دێ ژ قه‌بارێ ناكۆكێن عێل و خێل و عه‌شیره‌تا مینیت حێبه‌تى كوردان چ ده‌ره‌ده‌سه‌رى ب سه‌رێ خوه‌ ئیناینه‌ ل ڤێ پشكا ژیانێ چه‌ند كه‌س بۆینه‌ قوربانى بۆ سه‌ده‌مێن هیچ و پیچ، ئه‌گه‌ر ئه‌ڤه‌ رابردویێ مه‌بیت و حه‌تا نوكه‌ ئه‌كه‌ر مله‌ته‌ك چه‌كدار بین تڤه‌نك ب بهایێ (بزنه‌كێ) بیت دوور نینه‌ پانۆرامایێن كوشتنێ و جه‌كهلگرتنێ ل گه‌له‌ك جهێن دى دوباره‌ بن، ئه‌ڤا بووى و دبیت خوه‌ دوباره‌كرنا دیرۆكه‌كا پرى شه‌همزاریه‌, لێ ئه‌وا دبیته‌ جهێ پرسیارێ ئه‌وه‌ ڤان هنده‌ زانكۆ و په‌یمانگه‌ها ڤان هنده‌ سه‌نته‌ر و ناڤه‌ندێن روشه‌نبیرى ڤان هنده‌ حزبێن سیاسى ڤان هنده‌ گۆتارێن ئاینى ڤان رهسپى و ماقوولان چى رۆل هه‌یه‌ هه‌ر چونه‌ بیت، نابێژین ئاریشا نه‌هێلن ئه‌م مرۆڤین دێ هه‌ر ئاریشه‌ هه‌بن، لێ هه‌ر چونه‌بیتن ئاریشه‌ نه‌بنه‌ سه‌ده‌مێ له‌شكركێشیى و كورد نه‌زڤرن ڤه‌ سه‌ر مارشا كه‌ڤنه‌په‌رستیا خوه‌ (شه‌ر داوه‌تا مێرانه‌)، شه‌ڕێ كێ؟! شه‌ڕ بۆ كێ؟.. شه‌ر سه‌را چێ؟. ئه‌ڤ روودانێن روودده‌ن زه‌نگا مه‌ترسیێ نه‌ بۆ سه‌ر ئاشتیا جڤاكى و زڤرینه‌كا پرى شه‌رمه‌ بۆ سه‌رده‌مێ پێِش ناسۆسیالزیمی و هزرا نه‌ته‌وه‌یا كوردى، عه‌شیر سه‌نگێ جڤاكێ كوردى نه‌، هیچ نكۆلیه‌ك لێناهێته‌كرن، لێ عه‌شیره‌تگه‌ری وه‌ك ده‌مارگێرى كاره‌ساته‌ كوردان نه‌ریتێن جوان د عه‌شیره‌تگه‌ریا خوه‌دا هه‌نه‌، لێ مخابن د خافله‌كیێ دا روویێ قه‌شه‌فرێتێ عه‌شیره‌تێ نیشان دده‌ن، سه‌ر ئه‌نجام حوكمه‌ت په‌رله‌مان ل گۆر قانوونێ هنده‌ك پێنگاڤان بهاڤێژن ئێكه‌م كار كێمكرنا چه‌كى یه‌ و پاشى ئاریشه‌ هه‌ر گاڤ د ناڤبه‌را دو كه‌سان دانن، رێیه‌ك هه‌بیت ئاریشه‌ ل وێرێ قه‌تیس بیت و ته‌شه‌نێ نه‌كه‌ت, یادى یان دڤیا حاشاتیێ ژ پێشكه‌فتنێ و جڤاكێ سڤیل و ئارمیێ بكه‌ین یان دڤیا بزڤرین بۆ سه‌رده‌مێ پیِش كوردبوونێ و بریارێن كۆچك و هنده‌ك سه‌ركه‌شان، یان دڤیا دووماهیێ ب ڤێ ره‌وشى بینینن چه‌ك بۆ هێزا چه‌كداره‌ ب تنێ. عه‌شیره‌ت به‌رێزه‌ هه‌تا ریزێ ل قانوونێ و ئاشتیا جڤاكى بگریت, نه‌گاڤا سه‌رێ دو بزنان ڤێككه‌فت، چه‌كدار كۆم بن. وه‌لاتى تاقه‌تا ڤان ره‌نگه‌ ململانان نینه‌، نه‌مازه‌ وه‌ختێ ببنه‌ سه‌ده‌مێ نه‌ ئارمیا جڤاكى. پرانیا ئاریشه‌یان ل سه‌ر ئاخێ نه‌، حوكمه‌ت پرسا ئاخێ ئێكلاكه‌ره‌ ل گۆر قانوون و حه‌فانیه‌تا هه‌ر ئالیى و كه‌سه‌كێ و حوكمه‌ت جڤاك ناڤه‌ندێن جڤاكى تایبه‌ت عه‌شیر مینبه‌رێن دێر و مزگه‌فت په‌رستگه‌ها ناڤه‌ندێن روشه‌نبیرى و حزب ڤان دیاردان وه‌ك تاوان و لادان بژمێرن یان. داوه‌تا مێرایه‌ و كورد هه‌مى خۆشمێرن…

كۆڤان حسێن
هه‌ر هه‌یام هه‌یام میدیا كوردستانێ هویرهویركێن تاوانه‌كا وژدان هه‌ژین به‌لاڤ دكه‌ن و دبیته‌ بابه‌تێ رۆژه‌ڤێ و رایا گشتى ب ده‌هان خواندن و شرۆڤه‌ بۆ دهێنه‌كرن، تاوانێ هیچ ناسنامه‌ك نینه‌ ژ تاوانێ پێڤه‌تر و تاوانباران ژی هیج به‌ره‌ڤانیه‌ك نینه‌، نه‌مازه‌ تاوانێن نوكه‌ ب ڤیدیۆ و به‌لگه‌نه‌, لێ ئه‌وا نه‌ نۆرمال ره‌نگ و ره‌گه‌زێن تاوانێ نه‌, جڤاكێ كوردستانێ دڤیا یێ به‌رهه‌ڤ بیت ل به‌رامبه‌ر ڤێ ڤه‌كرنا گشتگێر و جڤاكه‌ك فره‌ حه‌تا راده‌یه‌كێ دێ ره‌نگ و شێوه‌یێ تاوانێن جودا بینیت. هیچ جڤاكه‌ك نینه‌ تاوان تێدا نه‌بن و زۆر جاران ژی ره‌نگ و شێوه‌یێ تاوانێ رایا گشتى حه‌تا وێ رادێ دئازرینیت ره‌نگه‌ پۆلیس و دادگه‌ه ژی بكه‌ڤن بن باندۆرا رایا گشتى، هیج ره‌نگه‌ سزایه‌كێ ل هیچ وه‌لاته‌كێ سنۆر بۆ دووماهیا تاوانان نه‌دانایه‌، ئانكو سزا ب تنێ به‌س نینه‌ بۆ كێمكرنا تاوانا عیراقێ ب گشتى و كوردستانى ژی د گه‌لدا ژینگه‌هه‌ك ل بارا بۆ تاوانا جڤاكه‌ك تازه‌ ژبن چه‌ندین جه‌نگان قورتالبووى تازه‌ پێدڤى ب دارشتنه‌كا سیاسه‌ته‌كا جڤاكیا سه‌رده‌مانه‌یه‌ زۆرن سه‌ده‌مێن تاوانێ، لێ بێكارى كێم هوشیارى و هه‌ژارى و ده‌وله‌ته‌كا پرى گه‌نده‌لى و نه‌بوونا سه‌روه‌ریا قانوونێ و نه‌بوونا ره‌وشه‌نبیریا هه‌ڤوه‌لاتیبوونێ. لاوازیا هه‌ستێن ئاینى و وژدانى و نه‌بوونا سانداره‌ك بۆ خێزانێ و قه‌بارێ وێ و گه‌له‌ك پرسێن دى ژینگه‌ها تاوانێ نه‌, ئه‌ڤ تاوانه‌ نه‌ مولكێ هیچ جوگرافیا و مله‌ته‌كێ یه‌, ئانكو تاوانێ راسته‌ بكه‌رێن هه‌ین لێ ل ڤێ ژینگه‌هێ دێ تاوانێن مه‌زنتر رووده‌ن ئه‌گه‌ر ره‌وش ب ڤى ره‌نگى بیت, سه‌رئه‌نجام دڤیا قانوون دوور ژ هه‌ر گڤاشتنه‌كا عاتفى رێره‌وا خوه‌ بینیت و تاوانبار ب گونه‌هه‌ هه‌تا بریارا دووماهیێ, ئه‌ڤه‌ تاوانه‌ روودانا كوشتنا (دلینێ) یا دلسۆژه‌، لێ بلا وانه‌ك بیت بۆ جڤاكى و ده‌سته‌كێ داد و باره‌ نه‌بیت..

كۆڤان حسێن
پشتى سیمایێن قه‌یرانێ كێمبووین وه‌ك بێژى ئه‌ڤ وه‌لاته‌ برسیێ به‌ستن و گرێدانا كۆنگره‌یێن نێڤده‌وله‌تیه‌ و حه‌تا نوكه‌ ژى پیڤه‌رێ نێڤده‌وله‌تى و لۆكالى ل ده‌ف من بخوه‌ ئاشكرا نینه‌, ب هه‌ر حالێ هه‌ى هه‌بوونا ڤان هه‌مى كۆنگره‌ و پێشانگه‌هان نه‌ ئاریشه‌یه‌ و دبیت رتووشه‌ك پێدڤى بیت بۆ وه‌رارا ل كوردستانێ هه‌یى وه‌ك رۆخسار و (كمالیات) بیت. لێ پرسا هه‌ره‌ گرنگ ئه‌ڤه‌ ئه‌رێ ئه‌و وار و سێكته‌رێن هنده‌ كۆنگره‌ بۆ دهێن به‌ستن ج ئه‌نجامه‌ك هه‌یه‌؟! كى دێ دووڤچوونا وان هه‌مى راسپاردان و وێ (تنزیرێ) كه‌ت یا هاتیه‌ گۆتن و دبیت یاباش بیت ژی. ئاخر كاره‌ساتا وه‌لاتێ مه‌ ل دووڤچوونا پرسان دایه‌ نه‌ك د ده‌ستنیشانكرنێ دا. ماشاللا كورد هه‌مى بووینه‌ ده‌ستنیشانكه‌ر و ئاماژه‌كه‌ر و دیاركه‌ر لێ كه‌س ل ڤى وه‌لاتى خوه‌ ئه‌ركدار نابینیت دووڤچوونا وان هه‌مى ئه‌نجامێ كور و كۆنفرانسێن نیڤده‌وله‌تى بزانیت, كۆنگرێ نیڤده‌وله‌تى یه‌ ژمارا مێهڤانان جارا ژ ژمارا خودان مالا پتره‌ ژ مارا وینه‌ و سێلفیان ژ ژ مارا په‌نه‌ل و پشكداریا كارا پتره‌. كۆنگره‌ نه‌خرابن لێ پرى پیستێ خوه‌بن و بشێن یا دڤێت بگه‌هیت بگه‌هینن یان دێ مینیت شكل و كه‌لیشه‌كێ پرۆتوكولى بێ ناڤه‌رۆك.

كۆڤان حسێن
پارتى تاكه‌ حزبا كوردى یه‌ ئێك ژ درووشمێن سیاسى ل كۆنگرا حزبان و خوه‌ دا هه‌تا دووماهیێ هاژۆتى، ئه‌و ژی پرسا مافێ چاره‌نڤێسى و پرسا رێفراندۆمێ بوو، رك و رك به‌رامبه‌ر دونیایێ خوه‌سته‌كا مله‌ته‌ك بن ده‌ست دا دیار كرن و باجا وێ ژی دا ئه‌گه‌ر خوین بیت ئه‌گه‌ر گۆشه‌ گێرى بیت، جیهان بۆ به‌رامبه‌رى درووشمێن خوه‌ تۆزه‌كێ یا زه‌لال نه‌بوو، بلا هه‌ر حالێ پارتى د وێ راستیێ گه‌هشتیه‌ كو جارێ جیهانێ ئه‌و ئاماده‌ى تێدا نینه‌ دانێ ب مافێ مله‌ته‌كێ داگیركرى، بكه‌ت بۆ سه‌ربخوه‌بوونێ و ناڤخوه‌ و عیراق و جیهان هه‌مى راستى به‌خته‌ك دژواركر ل پرسا رێفراندۆمێ دا. نوكه‌ پارتى ب قورسى د وزێ راستیێ گه‌هشتیه‌ جارێ به‌غدا نه‌ك فریاد ره‌سا نوكه‌ یه‌، به‌لكو قووناغه‌كا به‌روه‌خته‌ بۆ بۆراندنا ژیانه‌كا سیاسى و ئابوورى. نه‌خشێ سایكس پیكۆ هه‌تا سه‌رێ خوه‌ راگر نابیت ده‌ڤه‌رێ خواندنه‌كا دى دڤێت بۆ بهێته‌كرن، ئاسایكرنا په‌یوه‌ندیان ل گه‌ل به‌غدا قه‌ت د هندێ دا قه‌تیس نینه‌ پرسا گاز و غازێ عیراق ئه‌گه‌ر دروست بیت بێژم وه‌لاته‌ك داگیركه‌ره‌ نه‌ته‌وه‌یه‌ك ژبلى عه‌ره‌با دیمۆگرافیا وێ پێك دئینیت. عیراقێ پرسا ناسنامێ و دیتنه‌كا سیاسى یا هه‌مى بو خوه‌ ژیانكرنه‌كا سیاسیا ساخله‌م كورد ئه‌گه‌ر بریار بیت عیراقێ بن دڤیا ل گۆر مه‌رج و شه‌رێن شانازیا نه‌ه‌وه‌یا وه‌ عیراقێ بن ل ڤێ قووناغێ، چوونا به‌غدا و ئاسایكرنا په‌یوه‌ندیان بۆ ڤێ قووناغێ بۆ ژیانا رۆژانه‌ و ئابووره‌كێ باشتر بۆ هه‌ڤوه‌لاتیێن خوه‌. وه‌ك لادانا به‌ربه‌ستان ل به‌ر سه‌نگ و سه‌متا پارتى ئه‌ڤ بریارا ژێرانه‌ دایه‌ نه‌ك وه‌ك ستراتیژ و پاشگه‌ز بوون ژ مافێ چاره‌نڤێسى. بۆ پارتى چوونا به‌غدا چوونا جهه‌ك غه‌ریب نینه‌ پارتى 80 ساله‌ ل به‌غدا سیاسه‌تێ دكه‌ن و به‌غدا ژی سه‌نگا پارتى دزانیت، له‌ورا باوه‌ر دكه‌ منه‌ به‌غدا و نه‌ژى پارتى وه‌ك پرانیا سیاسیا كوردستانێ زیانێ بكه‌ن د ڤێ قووناغێ دا, خوه‌ بێلایه‌نگرتن ل سه‌نگه‌ر گرتنێن سیاسى نوكه‌ ل ڤێ ده‌ڤه‌رێ د خێرا دۆزا كوردى دایه‌ نه‌مازه‌ پشتى رێفراندۆمێ.

كۆڤان حسێن

دبێژن مه‌رج نینه‌ داگیركارى ب هنارتنا تانك و زیرپۆشان بیت، هه‌مى جاران و ره‌نگه‌ شه‌رێن بهێن ژی ب رووبۆرتان بن، لێ قه‌د دارێژه‌رێن شه‌را رۆلێ خلخلاندنا به‌رمبه‌رى خوه‌ ب بێ بها وه‌رناگرن و رۆژانه‌ ئه‌م د نووچه‌یان دا په‌یامێ په‌یوه‌ندى ب (مادێ بێهوشكه‌ر) ڤه‌ گوهلێ دبین. ئه‌رێ هه‌ما ب كولانى ئه‌ڤه‌ چیه‌؟! رك و رك یان لاوازیا حوكمه‌تێ یه‌ و دڤیا ل ڤى وارى دا داخوازا هاریكاریا جڤاكێ نێڤده‌وله‌تى بكه‌تن و داخوازا نه‌خشه‌ و به‌نامێن به‌رهنگاربوونا ڤى ئاتافا مه‌زن بكه‌ت، یان هنده‌ك مافیا و سه‌رێن مه‌زن ل پشت ڤى كارینه‌. د هه‌ردو حاله‌تان دا جهێ مخابنیێ یه‌، ئه‌ڤه‌ شه‌ره‌ك تازه‌یه‌، ئه‌ڤه‌ داگیركرنه‌ك تازه‌یه‌ ئه‌ڤه‌ وێرانكرنه‌كا دیه‌ ئه‌ڤه‌ ئه‌نفاله‌كا تازیه‌. وه‌لاته‌كێ بچووك و جڤاكه‌كێ به‌رته‌نگ و كێم مرۆڤ و ب ڤى ره‌نگى گیرۆ ده‌یێ مادێن بێهۆشكه‌ر بین، قه‌ت ئه‌ڤ پرسه‌ شلۆڤه‌كرنا هلناگریت و حوكمه‌ت و پاشى جڤاك ل خوه‌ حالى نه‌بن، ئه‌نفال دێ داوه‌ت و سه‌یران بن ژ روویێ قوربانیان ڤه‌، چاوا درسته‌ و چاوا دبیت ئه‌ڤ ماده‌ ب به‌رفره‌هى و ئاسانى و ئه‌رزانى به‌رده‌ست بیت؟! قه‌ت ئه‌ڤه‌ پرسا بكڕا و كارهێنه‌ران نینه‌ و ئه‌ڤه‌ (حرب ئه‌فیۆنه‌كا) تازیه‌ ل گه‌ل وه‌لاتێ مه‌ دئێته‌كرن ب ئاگه‌ه یان بێ ئاگه‌ها هه‌مى چه‌مكێن ده‌سته‌لاتا سیاسى و ئاینى و جڤاكیا ڤى وه‌لاتى. بابه‌ت هێشتا ل ده‌سپێكێ یه‌. كاره‌سات بۆ داهاتوى مسۆگه‌ر كریه‌، ئه‌گه‌ر ئه‌ڤ وه‌لاتێ زووتر هشیار نه‌بیت. مه‌رحه‌با هزار قه‌یران ئه‌گه‌ر كوردستانى ب ڤى ره‌نگى بمینیت ل ڤى شه‌رێ نهێنى دا.

كۆڤان حسێن

ل پرانیا وه‌لاتێن دیمۆكراسیه‌كا په‌رله‌مانى هه‌یى، پشتى هه‌لبژارتنان تووشى گیرۆبوونا ئاڤاكرنا حوكمه‌تێ دبن، نه‌مازه‌ وه‌ختا پارتیه‌ك نه‌شێت پرانیه‌كا باش ب ده‌ستڤه‌بینیت ل كوردستانێ، ب راستى ئه‌وێ چاڤدێریا گۆتارا سیاسیا ئالیێن سیاسى بكه‌ت، دێ بۆ دیار بیت ئاستێ تێگه‌هشتنا مه‌ ڤان ئالیان چه‌ند بۆ چه‌مكێ دیمۆكراسیه‌تێ ب دوفاقیه‌ و چه‌ند بۆ ئالیه‌تا هه‌لبژارتنان بێ بهایه‌، پارتى هه‌بیت ل كوردستانێ ده‌نگان وه‌ك پیڤه‌ر قه‌بوول نه‌كه‌ت، بۆ راده‌ستكرنا ده‌ستهه‌لاتێ، پارتى هه‌بیت ل كوردستانێ داخوازا هندێ بكه‌ت ئاستى هێزه‌كا چه‌كدار ب ملكێ خوه‌ بزانیت وه‌ك (گه‌ف) پارتى هه‌بیت ل كوردستانێ بیر ل جوداهیا جوگرافى بكه‌ت. پارتى هه‌بیت ل كوردستانێ پشكدارى حوكمه‌تێ بیت و گۆتارا ئوپۆزسیۆنێ گۆتارا وان بیت، پارتى هه‌یه‌ ل كوردستانێ ب ژماره‌كا كێما كورسیكا گه‌فا كۆده‌تایى بكه‌ت و هێزا له‌شكرى ل كوردستانێ هانده‌ت. ل كوردستانێ حزب هه‌یه‌ خوساره‌ته‌كا شه‌همزارى ئینایه‌ بخوه‌ هنده‌ك حزبێن دى دكه‌ته‌ ئه‌گه‌ر؟ حزب هه‌یه‌ ل كوردستانێ سۆشیال دیمۆكراته‌ و باوه‌رى ب دیمۆكراتیێ نینه‌ و پرى گوهێ ڤى جڤاكێ دیمۆكراتى و جڤاكێ ئازاد و ڤه‌كرنا مێشكى و روشه‌نگه‌راتى دكه‌ت. ئه‌گه‌ر ئه‌ڤه‌ ره‌وشا سیاسیا نوكه‌ بیت یا دئێته‌ گۆتن ژبلى یا نه‌ ئێته‌ گۆتن ب راستى هێشتا زویه‌ بۆ ئاڤاكرنا حوكمه‌تێ و دبیت ده‌مه‌ك دی ژى هه‌ڤوه‌لاتى باجا ده‌نگدانان بده‌ت هه‌تا سه‌متا حوكمه‌تێ راست ببیت.

كۆڤان حسێن
ئێك ژ سێكته‌رێن هه‌ر هه‌ستیار و رى ئالۆزى پرسا گه‌نده‌لیێ یه‌ ل كوردستانێ كو خۆشبه‌ختانه‌، هه‌موو ئالى ل سه‌ر هه‌موو ئاسته‌كێ دانێ ب هه‌بوونا وێ دده‌ن. هه‌بوونا گه‌نده‌لیێ ل كوردستانى زۆر سه‌ده‌م هه‌نه‌ و ئێك زیان هه‌یه‌، خه‌لكێ سه‌ربۆرێن سه‌ركه‌فتى ل سه‌ر ڤى كه‌یسى هه‌نه‌، بۆ پارتى كو باوه‌ریا پرانیا خه‌لكێ ب ده‌ستڤه‌ ئینایه‌ ل سه‌ر ڤێ پرسێ قورسایا خوه‌ وه‌ك حزبه‌ك مه‌زن بێخیت كار و سنۆره‌كێ بۆ ڤێ په‌نجه‌شێرا راستى گه‌لێ مه‌ بى كێم كه‌ت یان، پارتى ژ هه‌ر حزبه‌كا دى پتر شیانا دژایه‌تیكرنا گه‌نده‌لى و تۆرێن وێ هه‌ی ژ به‌ر ژماره‌كا هۆكاران, پارتى بخوه‌ حزبه‌كا سه‌نترالا ب هێزه‌ وه‌ك په‌یكه‌ر ئه‌ڤه‌ مه‌زنتر شیانه‌ پارتى هه‌ر كه‌س و تۆره‌كێ ده‌ستپیس و گه‌نه‌ده‌ل لاده‌ت، نه‌مازه‌ ئه‌وێن ل سه‌ر پارتى دهێنه‌ ژمارتن، حوكمه‌تا داهاتى بێگومان حوكمه‌تا پارتیه‌ و پارتى هه‌موو قورسایا خوه‌ بۆ سه‌ركه‌فتنا ڤێ حوكمه‌تێ بێخیته‌ كار كوردستانه‌كا ب هێز دێ دهندێ دا بیت پارتى ب ستافێ خوه‌یێ حكومی و كوتلا خوه‌یا په‌رله‌مانى ل سه‌ر ڤى كه‌یسى بهێز كار كه‌ن، گه‌نده‌لى نیڤه‌كا وێ ب زه‌لالى و رۆنیا سه‌ره‌ده‌ریێ چاره‌سه‌ر دبیت و كه‌رتێن ساخله‌مى و باژێرڤانى و سامانێن سروشتى ل سه‌رده‌مێ حوكمه‌تا پارتى دا دڤیا زه‌لالترین كه‌رت و ئاشكراترین ته‌ورێن ڤه‌كرى بن بۆ میدیا و چاڤدێرا قورغكاریا هه‌ى و ل هنده‌ك بابه‌تان دا سنۆره‌ك بۆ بهێته‌ دانان، گه‌نده‌لى كه‌سه‌ك نینه‌ بێته‌ كوشتن یان زیندانى كرن, یا راست پرۆسه‌كا دژوار و زه‌حمه‌ته‌، لێ مسۆگه‌ر ئه‌گه‌ر ئه‌ڤ پرسه‌ ب پارتى چاره‌سه‌ر نه‌بیت هیج ئالیه‌ك دى شیانا هندێ نینه‌, راسته‌ ب رۆژه‌كێ چاره‌سه‌ر نابیت لێ دیاره‌ دڤیا رژدیا پارتى ل ده‌سپێكێ ل سه‌ر ڤى كه‌یسى، خه‌لك هه‌ست پێبكه‌ت، پرۆسا دژایه‌تیا گه‌نده‌لى و دستپیسیێ پرۆسه‌كا دژواره‌، لێ ب قه‌د دژایه‌تیا تیرۆرێ گرنگه‌ و هه‌ما شیان بۆ ڤێ پرۆسێ پێدڤینه‌, گه‌نده‌لیێ ژی په‌یكه‌رێ خوه‌ تۆرێن خوه‌ و زه‌لام و زمان و ژماره‌ و جوگرافیا خوه‌ هه‌یه‌, شه‌ڕێ ڤى كه‌یسێ بۆ پارتى دكه‌ڤیت و پارتى داخوازكریه‌ ڤێ عه‌یبێ ل سه‌ر كوردستانێ راكه‌ت یان هه‌ر چونه‌ بیت، كێم بكه‌ت و دوور نه‌چیت ل ده‌وردبه‌رێن خوه‌ ده‌سپێبكه‌ت، دا كاریكه‌رى بهێزتر بیت, كوردستانه‌كا ب هێز ب هێزا پارتیه‌كا ب هێز دهێته‌ چاڤه‌رێكرن.

كۆڤان حسێن كه‌ڤنه‌

ئه‌و بنه‌مایێ مرۆڤان ده‌ست ژ هنده‌ك سه‌روه‌رێن وه‌ به‌رداى بۆ حوكمه‌ته‌كێ مه‌رجێن ژیانه‌ك ب روومه‌ت ئاڤا بكه‌ت، حوكمه‌تا ده‌ربرینێ ژ ئه‌و چیا بله‌ز و دیرا مله‌ته‌كێ مه‌كه‌ت هه‌ر تشته‌، به‌س نه‌ حوكمه‌ته‌ ل گۆر گرێبه‌ستا جڤاكى، تاك و جڤاك بۆ گه‌نگه‌شه‌كا (بیزه‌نتیا) بێ دووماهیا ڤان گرۆپ و حزبان ده‌ستبه‌ردارى سه‌روه‌ریا خوه‌ نه‌بوویه‌, ئێكه‌م كارێ حوكمه‌تێ ئه‌وه‌ ئاشتى و ئارامیێ په‌یدا كه‌ت و هه‌موو حزب و گرۆپ ژی بۆ ڤێ مه‌ره‌مێ جار سالا جاره‌كێ خوه‌ ب كاندێن خوه‌ڤه‌ به‌ربژار و بازار دكن، مله‌ت بۆ پاراستنا خوه‌ ئاسایشا خوه‌ ل گۆر به‌رژه‌وه‌ندیا خوه‌ هه‌لبژارتنان دكه‌ت، مخابنى ل وه‌لاتێ مه‌ وه‌سا دیار مه‌ هه‌لبژارتن بۆ هه‌ڤركیا حزبا كریه‌ و ژ ئه‌نجامێ وێ خه‌ریكه‌ ترسا ژده‌ستدانا ئارامى و ئاسایشێ درست ببیت؟! مله‌تى ب كورتى حوكمه‌ته‌كا ئایدولۆژى یان حوكمه‌تا به‌رژه‌وه‌ندیخوازا حزبى نه‌ڤێت, باشترین حوكمه‌ت ئه‌وه‌ وه‌ك ئاسایشێ ژیانه‌كا ب روومه‌ت و سه‌رفراز بۆ هه‌ڤوه‌لاتیێن خوه‌ دابین كه‌ت و ژ ئالیێ ژیانێ ڤه‌ كوالێتیا ژیانێ ل سێكته‌رێن جودا جودا دا پێشكه‌فتنێ به‌رجه‌سته‌كه‌ت، گیرۆبوونا حوكمه‌تان هه‌ر چه‌نده‌ ل وه‌لاتێن دیمۆكراتى حه‌تا راده‌كا به‌ر ئاقل نۆرماله‌، لێ وه‌ك دیار ل وه‌لاتێ مه‌ ده‌بازى قووناغه‌كا تازه‌ بوویه‌, دوور ژ وان هه‌موو بنه‌ما و پره‌نسیێن دیمۆكراتى، ئه‌وێن دیار د ئه‌ده‌بیاتێن ڤان حزبان دا هه‌ین. ئاشكرا و سۆر و سۆر مله‌تى پێدڤى ب هندێ نینه‌ كى وه‌زیره‌ كى گزیره‌ مله‌تى ژیانه‌كا به‌خته‌وه‌ر و حوكمه‌ته‌كا خزمه‌تگوزار دڤێت، حوكمه‌ته‌ك دووماهیه‌كێ بۆ گه‌ندلكاران ل ڤى وه‌لاتى دابنیت حوكمه‌ته‌ك سنۆره‌كى بۆ قورغكاریێ بۆ (استغلالێ) بدانیت حوكمه‌ته‌ك خوارنه‌كا ساخله‌م و ده‌رمانێن ساخله‌م دوور ژ سه‌خته‌كاریێ و (ته‌زویرێ) به‌رده‌ست كه‌ت، حوكمه‌ته‌ك ده‌رفه‌تێن كارى په‌یدا بكه‌ت و گه‌نجێن مه‌ ژ لێوارێ (قومارێ و مخدراتا) بپارێزیت، حوكمه‌ته‌ك كاره‌بێ و ئازا پارقژ به‌رده‌وام په‌یدا كه‌ت، مله‌تى بۆ ڤا مه‌ره‌مان ده‌نگدایه‌ نه‌ك بۆ دیاركرنا قه‌بارێ ڤى لایه‌نى یان لایه‌نێ دى ل گه‌ل ل به‌رڤافگرتنا ئاستێ خزمه‌تێن هه‌تا نوكه‌ كرین ده‌نگ دایه‌، هیچ بوار و ده‌راڤ و بهانه‌ نه‌ماینه‌ ل ئاست كێم خزمه‌تكرنێ ده‌مێ كه‌دێ یه‌ یان حوكمه‌ته‌كا دروست ئاڤا بكه‌ن یان سه‌روژنى هه‌لبژارتنان بكه‌نه‌ ڤه‌.؟!

كۆڤان حسێن
هه‌لبژارتنان ل كوردستانێ گه‌له‌ك ژ بهایێ خوه‌ یێ سمبۆلیك ژ ده‌ست دا پشتى ئه‌وا نوكه‌ دبیت، ئێكه‌تى ب ئاسته‌نكرن و مه‌رجگرتنا خوه‌ بۆ پشكداریا حوكمه‌تێ سه‌رجه‌م پرۆسا هه‌لبژارتنان ئێخستیه‌ به‌ر گومانێ، وه‌ك ئه‌و پێناسا خوه‌ دكه‌ن حزبه‌كا سۆشیال دیمۆكرات و باوه‌رى ب بریارا خه‌لكى هه‌یه‌ قه‌ت وه‌سا ره‌فتار ناكه‌ن، ب ڤى ره‌نگێ ئاسته‌نكرنێ سه‌ر ئه‌نجام وه‌ختا ئێكه‌تى ل بن هه‌ره‌شا (ئه‌جنداێن) خوه‌ بسه‌كنیت رك و رك ئێكه‌تى سه‌ركه‌فتیا هه‌لبژارتنایه‌، نه‌كو پارتى، چونكو پارتى خوه‌ د گۆشه‌كا ته‌نگ دا دبینیت و وارێ (مناورێ) بۆ پارتى زۆر ته‌نگه‌ ئه‌گه‌ر ژ گرێیا شه‌رێ ناڤخوه‌ و دو ئیداره‌ى ده‌رنه‌چووبیت، یاریا ئێكه‌تى دكه‌ت په‌یامه‌كه‌ بۆ هه‌موو خه‌لكێ كوردستانێ كو هه‌لبژارتن سه‌نگ و شیانا ئێكه‌تیێ دیار ناكه‌ت و ئه‌وان هنده‌ك پیڤه‌رێن دى بۆ شه‌راكه‌ت و پشكداریێ هه‌نه‌ نه‌كو هه‌لبژارتن، ره‌وشا كوردستانێ دبیت پارتى نه‌جار كه‌ت بچیته‌ به‌ر بارێ مه‌رجێن نه‌ به‌رئاقلێن ئێكه‌تیێ، ئێكه‌تیێ ده‌نگده‌رێن خوه‌ و سه‌روه‌ریا خوه‌ ل مه‌یدانا خوه‌ ژ ده‌ست دایه‌. پارتى زه‌ره‌مه‌ندا ئێكێ یه‌ ژ گیرۆبوونا حوكمه‌تێ و نه‌ ئاسایكرنا ره‌وشێ، ئێكه‌تى و ب جه‌مسه‌رێن خوه‌ یێن بێ بریار تێرا هندێ هه‌یه‌ مه‌یدانێ خراب كه‌ن یان ئالۆز كه‌ن, كوردستانێ ژ ماره‌كا پرۆسا ل به‌ره‌ ب ڤى لۆژیكێ نوكه‌ نه‌ بۆ پارتى هێژایه‌ ئێكه‌تیێ هێجه‌ت بر نه‌كه‌ت نه‌ بۆ ئێكه‌تیێ خه‌مه‌ رۆسه‌ ئالۆز بیت، هه‌موو یارى نوكه‌ بۆ پارتى دزڤریت چ ره‌نگه‌ سه‌ره‌ده‌ریێ بكه‌ت حوكمه‌ته‌كا بێ ئێكه‌تى درست كه‌ت، كو ره‌نگه‌ نوكه‌ بۆ راگرتنا بالانسه‌نكێ دروست نه‌بیت، نه‌مازه‌ ئێكه‌تى ئاشكرا ل میحوه‌ره‌كێ یه‌، ئاسان نابیت پارتى ل په‌راویزێ بهێلیت, پارتى باوه‌ریا خه‌لكێ ب ده‌ستڤه‌ ئینایه‌، لێ نه‌ تێرا هندێ یه‌ ب سه‌رێ خوه‌ حوكمه‌تێ ئاڤا كه‌ت، گیرۆبوونا حوكمه‌تێ پارتى خوساره‌ته‌ بۆ كوردستانێ پارتى نه‌جاره‌، ئه‌ڤجاره‌ ژی وێ قوربانیێ بده‌ت یا هه‌رجار داى, حوكمه‌ته‌ك ب هێز بێ ئێكه‌تى لاوازه‌ نه‌مازه‌ لایه‌نێن دى دوور نینه‌ سباهى مزایدان ل سه‌ر پارتى بكه‌ن، وه‌ك هه‌رجار كرین. ب هه‌ر نه‌رخ و بهایه‌كێ بیت پارتى حوكمه‌تێ ل گه‌ل ئێكه‌تیێ ئاڤا كه‌ت، بۆ پارتى كوردستان دڤیا گرنگتر بیت ژ هنده‌ك مه‌رجێن ئێكه‌تیێ. ئێكه‌تى باجا وێ یاریێ ده‌ت یا وان كرى لێ پارتى هه‌تا ڤێرێ دڤیا ل خه‌لكێ خوه‌ خودان ده‌ركه‌ڤیت و یاریێ ته‌مام كه‌ت ئه‌گه‌ر لبه‌رجاڤگرتنا هنده‌ك داخوازیێن ئێكه‌تیێ ژی بیت بۆ ئاینده‌ى نه‌ زیانه‌ به‌لكو مه‌زناهیه‌ بۆ پارتى ژیانا خه‌لكى ….

كۆڤان حسێن
خه‌لكى سه‌ربۆرێن زۆر سه‌ركه‌فتى و هێژا هه‌نه‌ د وارێ خۆرێخستنێ دا. ب مخابنى ڤه‌ ل وه‌لاتێ مه‌ ئه‌و تشتێ ب ده‌ست نه‌كه‌ڤیت (ژماره‌ و داتانه‌) ژبلى ژ مارا مووچه‌خۆران حوكمه‌تا مه‌ و جڤاكێ مه‌ قه‌ت نزانیت چه‌ند ده‌لڤه‌یێن كارى و ده‌رگه‌هێن به‌رده‌وامێن ژیانێ ل كوردستانێ هه‌نه‌ ل گۆر ژمارا مرۆڤان و پێدڤیا وان هه‌ڤوه‌لاتى چه‌ند بكارن بكه‌دن و به‌رهه‌م هه‌یه‌ و چه‌ند ژی بێكار و به‌رهه‌من.؟! یاراست ئه‌وه‌ ته‌كسى ل هه‌موو جیهانێ ژێده‌ره‌كێ باشێ ژیانێ یه‌ و دشێت نۆرمال ژیانه‌كا ماقوول بۆ خودانێ خوه‌ په‌یداكه‌ت و هه‌ر كه‌سێ ته‌كسى هه‌یه‌ بێكار نینه‌ وه‌ك یادروست. مووچه‌خۆر و ته‌كسى ره‌نگه‌ پێدڤى ب هنده‌ك راوه‌ستیانا بیت قه‌ده‌غه‌كرنا ته‌كسیان ل فه‌رمانبه‌ران ب ئێكجارى و بێ هیچ ڤه‌خواندنه‌ك یان گه‌نگه‌شه‌كا جڤاكى دبیت، پیچه‌ك ل پێڤه‌ دیار بیت ئانكو باشه‌ لێ دبا هنده‌ك رێنما هه‌بان بۆ نموونه‌ فه‌رمانبه‌رێ ته‌كسیێ بهاژۆت وه‌ك كاره‌كێ لاوه‌كى ژ ده‌رڤه‌ى ده‌واما خوه‌ (باجه‌ك) بۆ هاتبا دانان ل شوونا قه‌ده‌غه‌كرنێ ل هه‌موو دونیایێ دو كارى كاره‌ك عه‌یب نینه‌، به‌لكو شانازیه‌ كه‌سه‌ك كاركه‌ره‌ك باش بیت، به‌لێ ب وى مه‌رجى كارێ دویێ ده‌رفه‌تا دویێ بیت یا ئێكێ بۆ بێكاران بیت.
كارێ دویێ ده‌رفه‌ته‌ بۆ پشكرنا كوالێتیا ژیانێ نابیت، حوكمه‌ت ل دژى رابوه‌ستیت، لێ دبیت ل گۆر قانوونێ رێنمایى بۆ ده‌ربكه‌ڤن، نه‌ك بۆ ته‌كسیان ب تنێ به‌لكو بۆ سه‌رجه‌م ده‌رفه‌تێن كارى ئه‌وێن ل كوردستانێ هه‌ین و حوكمه‌تێ داتا و پێزانین ل سه‌ر نینن یان به‌ف ناكه‌ت. باشتر حوكمه‌ت خوه‌ رێكبێخیت، دا جڤاكى ژی رێكبێخیت ژ ژماره‌ و داتا و ئه‌لكترۆنى بێ حیله‌ و گه‌نده‌لى….؟!