محه‌مه‌د چه‌لكى
ـ بلا ب خێرا نه‌ه باب كالێن ته‌ بت، پیچه‌كێ بێهنا وێ تێله‌فزیۆنێ ڤه‌ناكى!! دێ بێژى تۆ یێ ئاڤا خوریكا دگێرینى و ل سه‌ر كه‌ناله‌كى نا راوه‌ستینى، وه‌الله‌ ته‌ بێهنا مه‌ مالق كر!!
+ ما چێترنینه‌ ژ مسه‌لسه‌لێن توركى یێن ژبلى بێ ره‌وشتیێ پێڤه‌تر تشته‌كێ دى نابێژن، ئو خاتوینێن وه‌ك ته‌ ژ سپێدێ هه‌تا ئێڤارێ ل به‌ر تێله‌فزیۆنێ نارابن و ئه‌ڤ مسله‌سله‌ خلاس ئێكا دى ده‌سپێكر.
ـ هه‌ما هه‌ر چ نه‌بت به‌حسێ كوشتن و سه‌ربرینێ ناكه‌ن، سه‌د جارا دچێترن ژ ده‌نگوباسێن ژبلى كوشتن و به‌لاڤكرنا كینێ به‌حسێ تشته‌كێ دى ناكه‌ن و پاشى …
+ به‌رێخوه‌ بده‌یێ چ یا بده‌ڤ و ئه‌زمان كه‌فتى و دێ بێژى نه‌ڤى چڕكا ئه‌فڵاتۆنییه‌! كچێ ب رێیا ده‌نگوباسان دێ زانم كانێ چ هه‌یه‌ و چ نینه‌، به‌س بێژه‌ من كانێ چ فایده‌ د ڤان مسه‌لسه‌لێن توركى هه‌یه‌، ها!
ـ چاڤێن ته‌ ب من نارابن كو پیچه‌كێ بێهنا خوه‌ ڤه‌ده‌م!
+ چاڤ پێ نه‌ڕابوونا چ! ڕاستى من ژ نه‌خشێن لویله‌په‌رێن ته‌ ل سه‌ر مه‌حفویرێن ئه‌رتۆشى نه‌خشكرین، شه‌رمه‌!
ـ ڤێجا وێ پرسیارێ ژ حوكمه‌تا خوه‌ بكه‌!
+ حوكمه‌تا من چ په‌یوه‌ندى ب روینشتنا هه‌وه‌ڤه‌ هه‌یه‌ یا هوون ژ سپێدێ هه‌تا حه‌فت نیڤه‌كێن شه‌ڤێ ل به‌ر تێله‌فزیۆنێ ڤه‌ دروینشتى و ل مسه‌لسه‌لێن توركى مێزه‌ دكه‌ن، ها!!
ـ هه‌ما تۆ ل ده‌نگوباسا مێزه‌كه‌ و ژ تشته‌كێ دى نه‌ئاخڤه‌ كانێ بۆ ته‌ دێ چ پێڤه‌ هێت، عه‌لۆیێ نه‌ترۆ!
+ دێ ڤێجا زكۆ نه‌په‌قه‌! ئه‌ز یێ نه‌ترۆمه‌!
ـ به‌حسێ چوویان نه‌كه‌، نوكه‌ تۆ چدكه‌ى؟ یان یێن ل چه‌یخانێ و یان یێ پالداى، نێ جهێ پاشیێن ته‌ ل سه‌ر قه‌نه‌په‌ى دیاره‌ …هههههه
+ لا حه‌یله‌لوه‌ڵا …
ـ ئێ ته‌ دیت من ژته‌ بر…ههههه
+ ما من جاره‌كێ گۆتیه‌ ته‌ وه‌ره‌ دا به‌ریكانه‌كێ بكه‌ین، ماشه‌ڵا بۆ ئه‌زمانێ هه‌وه‌!
ـ پا پیێن خوه‌ هندى به‌ركا خوه‌ درێژ بكه‌ و زه‌حمه‌ت نه‌بت ژ وى كه‌نالى ڤه‌ گوهێزه‌ بۆ كوردماكسێ، ده‌مێ مسه‌لسه‌لا من هات!
+ كچێ تۆ ب ڤێ بسكا سپیڤه‌ و مسه‌لسل هه‌ى هاوار، كه‌سێ ئه‌ڤ ملله‌ته‌ پویچ نه‌كر ژبلى ڤان مسه‌لسلان.
ـ ئه‌رێ ڤان مسه‌لسه‌لان گۆتیه‌ هه‌وه‌ زه‌ڵامان ببنه‌ جاش و وه‌ڵاتفرشیێ بكه‌ن و بووینه‌ تڤه‌نگا بكرێ، و ب شه‌ڤ رۆژ هوون یێ بسه‌ر و چاڤێن ئێكڤه‌ و ئێك ژ هه‌وه‌ تاگێریێ بۆ یێ دن ناكه‌ت، دێ بێژى هوون بابكوشتیێن هه‌ڤن و وه‌كو تۆم و جێرى ل به‌رێك دڕاوه‌ستاینه‌، هه‌ى عه‌لۆ ئه‌فه‌ندى!!
+ تۆ ژ قه‌ستى خوه‌ ناهه‌لبژێرى بۆ په‌رله‌مانى یا بۆ ئه‌ندام سه‌ركرداتیا پارتیه‌كێ!!
ـ په‌رله‌مان بلا بۆ كوڕه‌ جاش و ئه‌ندام سه‌ركرداتى بۆ وان كه‌سێن هه‌ر رۆژه‌كێ ل سه‌ر به‌نه‌كى گۆڤه‌ندێ دگێرن، بت. یێن وه‌كو من دعاقل كێمن و مانێ هوون دبێژن: “نه‌ خوه‌زیا وێ مالێ یا مه‌زن لێ ببن ژن.”
+ ته‌ ئه‌ڤ زانینه‌ ژ كیڤه‌ بده‌ست خستیه‌ و ئه‌ز پێ نه‌حسیامه‌!!
ـ ژ حوكمه‌تا هه‌تا سه‌د سالێن دێ هه‌ر مینت ساڤا!!
+ ما مرۆڤ ژ حوكمه‌تا فێر دبت؟
ـ به‌س نه‌ حوكمه‌تا ل هێجه‌تا دگه‌رهت دا بێهندانا په‌یدا بكت و ژ ده‌رزیكێ هه‌تا باجانسۆركێ ژ ده‌رڤه‌ دئینت!!
+ ته‌ درێژ كر، هه‌ما ل مسه‌لسه‌لێن توركى مێزه‌ بكه‌ و ئه‌ز ده‌نگێ خوه‌ ناكم!!
ـ ئه‌م كورد هۆسا دباشین هه‌ر تشتى ب نیڤه‌رۆ دهێلین و ل كێشێن گرنگ دنه‌باینه‌ و دوماهیێ دبینه‌ پالێن پویشى.
+ پا خاتوینا ده‌لال چاره‌ چیه‌؟
ـ ل ئه‌حمه‌دێ خانى بزڤڕین و نڤیسینێن وى بۆ خوه‌ بكه‌ینه‌ قۆرئان و ژ فه‌رموودێن وى ده‌رنه‌كه‌ڤین.
ـ وه‌لله تۆ ڕاست دبێژى.

محه‌مه‌د چه‌لكى
په‌رگالا مامێ عه‌لۆى گه‌له‌ك شه‌پرزه‌ و داماى خویا دكر و بێى حه‌زا مرۆڤى سه‌رنج بۆ خوه‌ ڕادكێشا، ئه‌فه‌ندى نه‌دخاست ئه‌ڤێ ده‌رفه‌تێ ژ ده‌ستێن خوه‌ بكه‌ت، چونكو ئه‌ڤه‌ ده‌مه‌كه‌ مامێ عه‌لۆى یا خوه‌ ژ دیوان، ناڤ بازارى و چایخانا دایه‌ پاش و د كونجا خانیێ خوه‌ڤه‌ هه‌لتوتیه‌. كه‌س ڤێ دویره‌ په‌رێزییا مامێ نزانت، سه‌ده‌مێن ڤێ دویره‌ په‌رێزیێ یێن بووینه‌ ئانكویێن ئه‌فه‌ندى و هۆگرێن مامێ عه‌لۆ و هه‌ر ئێك ڤێ یه‌كێ بۆ سه‌ده‌مه‌كى دزڤرینت، لێ كه‌سێ ژ زارده‌ڤێ مامێ عه‌لۆى تشته‌ك گوه لێ نه‌بوویه‌. ژبه‌رهندێ ئه‌فه‌ندى ئێكسه‌ر به‌ر ب مامێ عه‌لۆ ڤه‌چوو و دا بۆڕى:
– ئوهۆپ هه‌یڤا بن عه‌ورى دیار بوو، چییه‌ خوه‌ لبه‌ر ده‌ستهه‌ڵاتێ شرین دكه‌ى، مانێ تۆ باشتر ژ هه‌ر ئێكى دزانى، یێ پیچه‌كێ خوه‌ غه‌واره‌ كر، ته‌ هندیت بوو وه‌زیر یان رێڤه‌به‌ره‌كێ گشتى و گره‌كێ دلڤه‌كه‌ر ل كیده‌رێ مابیت ل سه‌ر ناڤى تاپۆ بوو.. هركێ ملله‌ت!
مامێ عه‌لۆى گێولێ به‌رسڤدانێ نه‌بوو، لێ دزانى ئه‌فه‌ندى گه‌له‌ك یێ چیڕ درێژه‌ و بساناهى به‌رووكا وى به‌رناده‌ت، له‌و ژ نه‌دل گۆت:
+ ئه‌گه‌ر دخازى من بده‌یه‌ ئاخفتنێ باشتره‌ تۆ خوه‌ فێرى ئاخفتنێ بكه‌ى! ئه‌ڤه‌ كارێ ترسنۆكایه‌!
– من قه‌بویله‌ كو یێ ترسنۆكم، به‌س بێژه‌ ئه‌ڤه‌ ده‌مه‌كه‌ نه‌یى دیارى، سه‌ده‌م چنه‌؟
+ هه‌ره‌ بۆ خوه‌ ڤێ پرسیارێ ژ سیاسه‌تمه‌دارێن خوه‌ و مامێ ترامپ بكه‌!
– ئه‌ڤه‌ چیه‌؟ هه‌چكو شول مه‌زنبوو!
+ نه‌ ب گۆڕا باپیرێ ته‌ كه‌م، شول وه‌سا یێ بچویك بووى نان په‌یداكرن یا
بوویه‌ فلیه‌كا مه‌زن!
– تێ نه‌گه‌هه‌شتم!
+ ما ئه‌گه‌ر ئه‌فه‌ندیێن مینا ته‌ تێ گه‌هشتبانه‌ و ڕاستى د ده‌مێ خوه‌ دا بۆ ڤى ملله‌تێ ب پیچه‌كێى درازى دیاركربان تۆ دبێژى دا ره‌وش ئه‌ڤرۆ هۆسا بت، ئه‌ز و تۆ ڕاستى هه‌ڤ نه‌دهاتین و ته‌ شێلكه‌كا پرسیارێن بێ ڕامان ب سه‌رمن دا نه‌ دباراندن!
– پندڤینا ته‌ ژ سیاسه‌تمه‌دارێن مه‌ به‌لكى ته‌ مافدار ببینم لێ ژ مامێ ترامپ بۆچى؟
+ مه‌رما من ئه‌وه‌ كو سیاسه‌تمه‌دارێن مه‌ ژبلى سیاسه‌تێ بازرگانى ژى قۆرخكرنه‌ و دڤیابا د مامێ ترامب گه‌هه‌شتبانه‌ چونكو وه‌كو وان بازرگانه‌ و بازرگان باوه‌ریا خوه‌ ب كه‌سێ نا ئینت و ب گۆمان ل هه‌ر سۆز و بریاره‌كێ دنێرت و هه‌ر تشى ل گۆڕه‌ى به‌رژه‌وه‌ندیا خوه‌ دپیڤت و تشته‌ك دن بۆ وى نه‌خه‌مه‌ و وه‌كو هوین دزانن كو بازرگان ژ ره‌وشتى دشویشتینه‌ و هه‌ر ژبه‌ر ڤێ چه‌ندێیه‌ مه‌زنان گۆتیه‌: (كێ دنیا دۆته‌، یێ كڕى و فرۆته‌).
– دیسا ته‌ چه‌پدا سیاسه‌تێ و ژ پرسا من ڕه‌ڤى!
+ ل وه‌ڵاتێ مه‌ هه‌ر تشت ب پیڤه‌رێ سیاسه‌تێ دهێته‌ پیڤان و ره‌وشت و نیشتمانپه‌روه‌رى و مرۆڤاتى عانه‌كێ سۆر نائینن و سیاسه‌ت ب خوه‌ژى بوویه‌ بازرگانى و ئه‌ڤه‌ ژ من ناگرت چونكو چ ژ بازرگانیێ نزانم، به‌لىِ بۆ دویرپه‌رێزیا من سه‌ده‌م دیسا هه‌ر سیاسه‌ته‌!
– چه‌وان؟
+ ئێێێێێێێێ ما به‌رهه‌مێ سیاسه‌تێ ئه‌م نه‌كرینه‌ پالێ پویشى و …. وه‌نه‌كه‌ ته‌مام كه‌م …
– هه‌چكو ته‌ ژى لبه‌ره‌ ببییه‌ بازرگان!!
+ كه‌ڕافى بت.
– ئێ پا ده‌ردێ ته‌ چیه‌؟
+ ئه‌ڤ خوه‌ش باوه‌ریا سیاسه‌تمه‌دارێن مه‌ گرتى!
– ئه‌ز نه‌شێم ئێدى د ته‌ بگه‌هم، جار یێ دبێژى: سیاسه‌تمه‌دارێن مه‌ بازرگانن و بازرگان ل هه‌ر پرۆسه‌كێ بگۆمانن، و جار یێ دێژى سیاسه‌تمه‌دارێن مه‌ دخوه‌ش باوه‌رن، ئه‌ڤه‌ چ لێ هات. ئه‌ز دترسم سه‌رێ دیناتیا ته‌ ده‌ستپێكر…
+ ل گۆردیتنا من گرفتا هه‌وه‌ ئه‌فه‌ندیا ترسه‌ و یا سیاسه‌تمه‌دارێن مه‌ نه‌بوونا گۆمانێ یه‌ ئانكو دخوه‌ش باوه‌رن و ب خوه‌ش خوه‌شكا دهێنه‌ دسه‌ردا برن و له‌و ئه‌ڤرۆ ل دوماهییا شه‌رێ ته‌رۆرێ ئه‌م بووینه‌ پالێن پویشى. یا دن ئه‌گه‌ر بازرگانێن مه‌ ببانه‌ سیاسه‌تمه‌دار باوه‌ر دكه‌م دا ره‌وش به‌ره‌ف باشیێ چت و ره‌وش دا بره‌نگه‌ك دن بت …
– جهێ تێهزرینێ یه‌.
+ بێ ترس بێژه‌: بازرگانێن سیاسه‌تمه‌دار دسه‌ركه‌فتینه‌ و سیاسه‌تمه‌دارێن بازرگان دزیان پێ كه‌فتینه‌!
– ئێێێێ ب خودێ تۆ نه‌یێ تێكه‌ڤه‌دانێى…
2019.01.5
دهۆك
-

محه‌مه‌د چه‌لكى
تشتێ ل ده‌ف مامێ عه‌لۆى بوویه‌ مه‌ره‌ق و جهێ سۆرماینێ، ئه‌ڤ لهیێ سۆز و گۆتنانه‌ یێن به‌رپرسێن مه‌ دده‌ن و بێى ئێك پرسا بجهئینانا وان ژێ بكه‌ن. ئه‌ڤه‌ ئه‌م یێن نێزیكى ساله‌كا نوو دبین، هه‌مى پرس ل ڤى وه‌ڵاتى دهه‌لاویستینه‌، نه‌ مۆچه‌ بوو نوچه‌، نه‌ هه‌ڵامه‌تێ پاشكه‌فتا مۆچه‌ى ژ هه‌یڤێن فه‌رمانبه‌ران فرى به‌لكو ساڵ ل ده‌ف مه‌ یێن بووینه‌ نه‌ه هه‌یڤ، نه‌ كاره‌با بوو 20 ده‌مهژمێر، نه‌ كه‌س ئێدى پرسا ماددێ 140 دكه‌تن و نه‌ژى پرسا ئێكگۆتاریا كوردان ل به‌غدا و ناڤخوه‌یا كوردستانێ دهێته‌ كرن. هه‌رچه‌نده‌ ره‌وشا كوردان نه‌یا دلخوه‌ش كه‌ره‌ و داگیركه‌رێن كوردستانێ نێزیكه‌ یێ به‌ره‌یه‌كێ ئێكگرتى ل دژى كوردان پێك دئینن! ته‌ڤ یێ پرسا پێكئینانا حوكمه‌تێ دكه‌ن لێ ژبلى پارتى كه‌س یێ رژد نینه‌، هه‌موو ژ ئوپۆزسیۆنبوونێ دترسن، لێ دیسا بۆ پێكئینانا حوكمه‌تێ پێنگاڤه‌كێ پێشڤه‌ ناچن، كۆمبوون كۆمبوونێ راده‌ستى كۆمبوونه‌كا دن دكه‌ت، پارتێن ڤێ كوردستانامه‌ د سه‌یرن د گڤاندا به‌رژه‌وه‌ندیێن خوه‌ ڕا ل پرۆسه‌سا ده‌ستهه‌ڵاتداریێ دمه‌یزینن!! بێى بۆ به‌رژه‌وه‌ندیا گشتى چه‌پ ده‌ن! هه‌رچه‌نده‌ هه‌لبژارتنان سه‌نگا هه‌ر لایه‌نه‌كى دیاركریه‌ لێ دیسا بۆ پرسا پێكئینانا حوكمه‌تێ دسه‌د دلن!
ره‌وشا هه‌رێمێ ئێدى به‌رگه‌یا په‌رته‌وازه‌یا لایه‌نێن سیاسى و پێكنه‌ئینانا حوكمه‌تێ ناگرت، ب تایبه‌ت پشتى ئه‌مریكا بریارا ڤه‌كشانا هێزێن خوه‌ ل سووریا داى و هه‌یڤا هنگڤینیا كوردان ـ ئه‌مریكا زوو بوو پاییز و بێى ره‌وشا كوردان به‌ر ب كناره‌كێ ئێمن له‌نگه‌ر بگرت! چه‌ند مامێ عه‌لۆ هزرا خوه‌ دكه‌ت، پتر دتنگژت ب تایبه‌ت د ڤان هه‌ڤۆك و گۆتنان دا كو ب دیتنا وى چوو پێڤه‌ ناهێن و ژبلى خوه‌ خاپاندنێ و ئه‌زمان و په‌حنكا ده‌ڤى ..: ل سه‌ر ئاستێ گوردستانێ:
ـ ئوپۆزسیۆن خودان ئێكگۆتار بت!
ـ ل به‌غدا فه‌ره‌ ئه‌م ببینه‌ خودان ئێكگۆتار!
ـ سیسته‌مێ په‌روه‌ردێ ببیته‌ علمانى و ب لاتینیكرنا نڤیسینێ!
ـ شه‌مبى و ئێكشه‌مب رۆژێن بهێندانێ بن!
ـ شه‌شى كانوونا ئێكێ نه‌ بهێندانا فه‌رمى بت!
ـ ژبلى جه‌ژنێن ئاینى و نه‌ورۆزێ چ بهێندانێن فه‌رمى نه‌بن!
ـ كێمكرنا ساخكرنا بیره‌وه‌ریێن جیهانى وه‌ك رۆژێن: هه‌وا دژى جگاره‌ كێشانێ، رۆژا فرینێ و چ و چ …!
ـ رۆژا پاقژیێ و نه‌هێلانا توندوتیژیێ ل دژى ژنان و …!
ـ داربڕین و سنۆرداركرنا نێچیرێ!
ـ سانسۆركرنا كلیپ و سترانێن چ تاما مۆزیك و خۆمالیێ تێدا نه‌!
ئو چه‌ندین تشتێن دى و ل سه‌ر ئاستێ جیهانى:
ـ پێشمه‌رگه‌ ژ پێش جیهانێڤه‌ شه‌رێ تیرۆر و داعشێ دكه‌تن!
ـ ئه‌مریكا شاشیا ڤه‌كشیانا ژ عێراقێ ل سووریێ دوباره‌ ناكه‌ت!
ـ رۆژئاڤا پشته‌ڤانیێ ل دیمۆكراتخازێن رۆژهه‌ڵاتا ناڤین دكه‌ت!
ـ رۆژئاڤا پشته‌ڤانێ مافێن مرۆڤییه‌ ل رۆژهه‌ڵاتا ناڤین!
ـ ئه‌مریكا پشتى ئیسرائیلێ كورد وه‌ك هه‌ڤپه‌یمان قه‌بوولكرنه‌ و د به‌رژه‌وه‌ندیا ئه‌مریكا دایه‌ پشته‌ڤانیێ ل پرۆژێ كوردان بكه‌ت چونكو ئه‌ڤ پرۆژه‌ د به‌رژه‌وه‌ندیا پاراستنا ئێمناهییا ئیسرائیلێ دایه‌!
ـ سعوودیا توركیا د به‌ره‌یه‌كێ دژى هه‌ڤ دانه‌!
ـ توركیا دژاتیا ئیسرائیلێ و ئیرانێ دكه‌ت!
هندى بێژین تشتێن چو پێڤه‌ نه‌هێت دمشه‌نه‌ و مامێ عه‌لۆ ژى ناگه‌هت هه‌موویان ڤاڤێرت، خانده‌ڤانێ ده‌لال تو ژى دكارى پشكداریێ دهزركرنێ دا بكه‌ى بۆ وان تشتێن چو پێڤه‌ ناهێن، له‌و دبێژم بخاترا هه‌وه‌ و هه‌تا ساله‌كا نوو ئه‌م هوون پێكڤه‌ ل دیوانانا مامێ عه‌لۆ بگه‌هین ئێك.

محه‌مه‌د چه‌لكى
ئه‌ڤه‌ ده‌مه‌كه‌ دو ئاخفتن ته‌نێ یێن ل سه‌ر زارێ سه‌رۆك كۆمارێ توركیا، ئه‌و ژى هێرشكرن بۆ سه‌ر رۆژئاڤایێ كوردستانێ و پرسا كوشتنا خاشقچى نڤیسه‌رێ به‌رنیاسێ سعودى یه‌، بۆ كوشتنا خاشقجى(2018.10.2) و ب وى ڕه‌نگێ هاتیه‌ كوشتن، هندى مرۆڤ ل سه‌ر بده‌نگ بهێت، هێشتا كێمه‌، ب چ پاساوا نابت ئه‌ڤ كه‌یسه‌ بهێته‌ داخستن هه‌تا تاوانبار ڕاپێچى دادگه‌هێ ببن. لێ بۆ رۆژئاڤایێ كوردستانێ ڤێ رژدیا ئه‌ردۆغان و رژێما وى دكه‌ن، هیچ پاساوه‌ك نینه‌ ژبلى بنپێكرنا مافێن مرۆڤى و پاراستنا به‌رمایێن داعشێ. ناهێت ماندال كرن رۆلێ كوردان ل دژى تیرۆرێ چ ل باشورێ كوردستانێ بت یات ل رۆژئاڤایێ كوردستانێ و بدووماهى ئینانا ئه‌قسانا داعشێ.
ده‌ما مامێ عه‌لۆ ل ڤێ ره‌وشێ دنێڕت چ پاساوا بۆ ڤێ حێچبوونا ئه‌ردۆغاى و رژێما وى نابینت، تشێ بۆ مامێ عه‌لۆى بووى مه‌ره‌ق ئه‌ڤ بێده‌نگیا ئه‌مریكایه‌ ل سه‌ر گه‌فێن ئه‌ردۆغانى، د ڤان هزران دا كوور چوبوو خارێ هه‌كو ئێك ژڤان ریهدرێژێن شه‌روال كورت ب تیفكلڤه‌ لێ پرسى:
• ها مامێ عه‌لۆ ما ده‌م نه‌هاتیه‌ بهێیه‌ سه‌ر ڕییا ڕاست!!
+ مه‌ره‌ما ته‌ ب ڕێكا ڕاست چیه‌؟ مامێ عه‌لۆ ب ڤێ پرسیارێ پر غه‌یدى.
• ڕێكا خودێ و پێغه‌مبه‌رى!
+ هه‌ما بێژه‌ ڕێكا ئه‌ردۆعانى یان یا سه‌یدایێ سعودى!
• ب ئه‌نیا ته‌ كه‌م ب ڕێیا ئه‌ردۆغانى ئاڵایێ ئیسلامێ یێ بلند بت و ما ته‌ نه‌دیت پێر د ئێك ده‌م دا شنگال و مه‌خموور دانه‌به‌ر و زه‌ڵامه‌ك نه‌بوو نه‌ سۆرێ چاڤشینێ ئه‌مریكى و نه‌ هرچا رۆسى و نه‌ ژ ئه‌زمان درێژێن ڤێرێ هه‌ما بێژنێ دوو مویێن خار یێن ل پشت چاڤێن ته‌!
+ ڤێجا كه‌یفا ته‌ هاتیه‌!
• ئه‌رێ وه‌ڵا وه‌سا كه‌یفا منا هاتى هه‌ر نه‌بێژه‌!
+ كوشتنا مرۆڤان و ڤێجا ئه‌و مرۆڤ هه‌ر ژ نه‌ته‌وا ته‌ بن، كه‌یفا ته‌ پێ بهێت، من چ ئاخفتن نینن بێژم، ئه‌ڤجا ژ كه‌ره‌ما خوه‌، خوه‌ ژ رێیا من ڤه‌ده‌.
• تنێ بوسلمان برایێن من و یێن دن ئه‌سته‌غفیرالله‌.
+ ما یێن ل رۆژئاڤایێ كوردستانێ و مه‌خموور و شنگالێ نه‌ بوسلمانن!!
• یێن بوسلمانان بكوژن حه‌قێ وان كوشتنه‌ و یێن رۆژئاڤا و پێشمه‌رگێن ڤێره‌ بوونه‌ سه‌ده‌م ده‌وله‌تا ئیسلامێ ژ ناڤبچت، ئه‌ڤجا خودێ ئه‌ردۆغان ل سه‌ر وان موسه‌ڵه‌ت كر، بلا كورێ وان د شامێ ڕا ده‌ربكه‌ڤت!
+ سه‌یره‌ تۆ ب ڤێ هه‌لچوونێ به‌حسێ ئه‌ردۆغانى بكه‌ى، ئه‌گه‌ر تۆ پیچه‌كێ ل ره‌فتارێن ئه‌ردۆغانى مێزه‌ بكه‌ دێ بۆته‌ دیار بت كو ئه‌و تنێ فاشى و نه‌ته‌وه‌په‌رسته‌كێ بێ به‌ڤڵه‌.
• ما ده‌م پشته‌ڤانیێ ل بوسلمانان دكه‌ت چ بكه‌ت بلا بكه‌ت و خودێ دێ پشته‌ڤانێ وى بت، ئامین.
+ ما نێ ته‌ یا خوه‌ گۆت، تۆد كارى پیچه‌كێ گوهداریا من بكه‌ى؟
• ئه‌گه‌ر دێ ژ رێیا خودێ ده‌ركه‌ڤى، ئه‌ڤه‌ من گوهێن خوه‌ گرتن!
+ نه‌ ئه‌ردۆعان و نه‌ چ رێژێمن ئه‌ڤرۆ كارى بۆ بلندكرنا ئاڵایێ خودێ دكه‌ن، هه‌ر ئێك بۆ به‌رژه‌وه‌ندێن نه‌ته‌وا خوه‌ دكه‌ت، ئیسلام و پرسا پشته‌ڤانیا بوسلمانا ل جیهانێ تنێ دا به‌رژه‌وه‌ندێن توركیا پێ بپارێزت. ل دووڤچوونا كه‌یسێ كوشتنا خاشقچى تنێ بۆ هندێیه‌ دار ژێما سعودى پێ بدۆشت و بهایێ لیرێ خوه‌ پێ بلند بكه‌ت. بۆ زانینا جه‌نابێ ته‌ ئه‌و مزگه‌فتێن ل كوردستانێ هه‌ین ژ یێن ل توركیا پترن، هه‌لبه‌ت ل دووڤ رێژا سه‌رنشینان.
• ته‌ چ مایه‌ بێژێ؟
+ بۆ كولندێن ده‌رنه‌ڤه‌كرى، مرۆڤ چ بێژت بێ مفایه‌!

ـ هنده‌ دێ زكێ من په‌قت.
+ كێ كۆته‌كی ل ته‌ كریه‌ كو هندێ بخۆی (كا نه‌ ژ ته‌، ما كادین نه‌ ژ ته‌یه‌).
ـ پانێ هنده‌كا گر و نهال هه‌موو یێن داعویراین، خوه‌ ئیسكه‌ك ب تنێ ژی ناهێتێ؟!
+ ما ده‌ریا ژ ئاڤێ تژی دبت؟
ـ نه‌خێر، به‌س به‌گێ من دبێژن: جه‌هه‌نه‌م ژی تژی نابت.
+ ئه‌و خودایی یه‌.
ـ ئانكو هه‌ر تشتێ بداوی نه‌هێت، خودایی یه‌؟
+ وه‌دبێژن!
ـ ب وێ چه‌ندێ بت، ره‌وشا مه‌ یا ئه‌ڤرۆ خودایی یه‌…
+ مه‌ره‌ما ته‌ پێ چیه‌؟
ـ ئێ ما كه‌نگی ئاریشه‌یه‌ك ل ڤی وه‌ڵاتی چاره‌سه‌ر بوویه‌، كێشه‌ یا دبێته‌ یا دن زه‌حمه‌ت نه‌بت، پیچه‌كێ وێڤه‌تر ناچی دا جهێ من خوه‌ش بت!!
+ سه‌ده‌مێن پڕانییا كێشان ئه‌م ب خوه‌نه‌!!
ـ وه‌ی هزار ره‌حمه‌ت ل دایبابێن ته‌ بن، پا ته‌ كه‌لێ شه‌كره‌كا سه‌مه‌رقه‌ندی شكاند و ته‌ كره‌ مه‌سه‌لا “ته‌یركێ ویت ویتانی”.
+ ئاخفتنێن ب تیفكل نه‌كه‌!!
ـ تیفكلێن چ و حالێ چ … ما خه‌لك به‌رپرسه‌ ژ ڤان كێشان… ئه‌گه‌ر تنێ ب هندێ بهێته‌ تومه‌تباركرن: كو به‌رگه‌یا هه‌ر نه‌خوه‌شی و ته‌حلیه‌كێ دگرت، لێ ئێك نابێژت سه‌ده‌مێن ڤێ به‌رگه‌گرتنێ چنه‌ و بۆ ڤێ به‌رگه‌گرتنێ بهێته‌ خه‌لاتكرن…
+ ب دیتنا ته‌، سه‌ده‌م چنه‌؟
ـ دا ئه‌ڤ چرایێ دبێژنێ حكومه‌تا هه‌رێما كوردستانێ هه‌ر بمینت هل.
+ ئه‌ز ڤێ به‌رگه‌گرتنێ ب ترسنۆكی دزانم، فه‌به‌رێ خوه‌ بده‌ فه‌ره‌نسا، چه‌وا باج پیچه‌كێ زێده‌كرن، خه‌لك دارژیا سه‌ر جادان.
ـ زكێ من چ نه‌مایه‌ ب په‌قت و ئه‌فه‌ندی ژی یێ خه‌لكێ خوه‌ڕاگرێ كوردستانێ پالده‌ت بۆ … جه‌نابێ دزانت یان هه‌ما دخازی خوه‌ د سه‌ردا ببه‌ی، ئه‌فه‌ندیێ من جوداهیه‌كا مه‌زن د ناڤبه‌را مه‌ و وان دا هه‌یه‌!
+ وه‌كو …
ـ ئه‌وان ده‌وله‌تا خوه‌ یا هه‌ی و خوه‌نیشادانێن وان نابنه‌ سه‌ده‌مێ نه‌مانا ده‌وله‌تا فه‌ره‌نسی و حوكمه‌تا فه‌ره‌نسی نه‌چاره‌ كێشێن وان چاره‌ بكه‌ت، د به‌رامبه‌ر دا ئه‌گه‌ر ل كوردستانێ خه‌لكێ مه‌ ل سه‌ر ب بوهابوونا تشتان خوه‌نیشاندانان بكه‌ت، هه‌لبه‌ت چاره‌ ل كوردستانێ گه‌له‌ك ب زه‌حمه‌تن ژبه‌ر گه‌له‌ك سه‌ده‌مانك داگیركه‌رین كوردستانێ دێ ڤێ ره‌وشێ كه‌نه‌ به‌هانه‌ و ریسێ مه‌ دێ كه‌نه‌ هری!!
+ ماده‌م ڤێ دزانی پا بۆچی هندی پندڤی و دبێژی: چ نه‌مایه‌ دێ زكێ من په‌قت!
ـ ژ ڕكێن ئه‌فه‌نده‌ێن مینا ته‌ و بازرگانێن به‌رگه‌گرتنا ڤی ملله‌تی ب بیڤ دزانن بۆ گرانكرنا هه‌ر تشتی..
+ پا كا حكومه‌تا ته‌؟
ـ چاره‌یێن وێ یێن برێڤه‌!
+ ڤێجا رێكا خه‌ستێ بگره‌!!

ـ ئه‌ز قۆربانی وی كه‌سی ببم یێ گۆتی: سه‌گ به‌ژ قه‌ومێ خوه‌ به‌
ـ خوه‌ زه‌همه‌ت نه‌ده‌ مۆدێلێ ڤان گۆتنان نه‌مایه‌.
ـ پا مۆدێلێ چیه‌؟
ـ مۆدێلێ برایێ خوه‌ بشكه‌ پێستشر و لێ بسه‌ركه‌ڤه‌
ـ ل هه‌موو ده‌م و چه‌رخا یێن هۆسا هه‌نه‌.. لێ باوه‌ر ناكه‌م یا گشتگیر بیت.
ـ تو ب خوه‌ ژی باوه‌ر ژ خوه‌ ناكی لێ ته‌ دڤێت وه‌سا باوه‌ر بكه‌ی كو هه‌ر كه‌س نیشتماپه‌روه‌ره‌.. یان هه‌ستا نیشتمانپه‌روه‌ریێ ل داویێ هه‌ر دێ بسه‌ركه‌ڤت.
ـ ڕاسته‌ وه‌سا هزر دكه‌م.
ل سه‌ر وی بالگهی نه‌ نڤه‌!
ـ بۆچی
ـ چونكو به‌رژه‌وه‌ندی میرا هه‌ر لڤینه‌كا مرۆڤیه‌.. هه‌ر تشتی بۆ گه‌هه‌شتنا به‌رژه‌وه‌ندیێ دكه‌نه‌ بازبه‌ر.. یان ب ڕه‌نگه‌ك دن: مرۆڤ پێخه‌مه‌تا گه‌هه‌شتنا به‌رژه‌وه‌ندیێن خوه‌ هه‌ر پیرۆزیه‌كێ د كه‌نه‌ قۆربان!
ـ باوه‌ر بكه‌ هه‌تا نوكه‌ من هزر نه‌ دكر كو تو هندێ ب ئاقلی..به‌س بێژه‌ تو چاوا گه‌هه‌شتیه‌ ڤێ پێزانینێ؟
ـ ژ ئه‌زموونان.
ـ ما ئه‌م ژ ئه‌زموونان فێر دبین؟
ـ به‌لێ به‌س هنده‌كێ!
ـ ئه‌گه‌ر هۆسا بت.. ڕامانا وێ ئه‌وه‌ بازبه‌را به‌رژه‌وه‌ندیان دێ ل پێشیا هه‌ر لڤینه‌كێ بت.. پا ب خودێ شۆل ب زه‌همه‌ت كه‌فت.
ـ ئه‌ڤه‌ یاسه‌یه‌ك نه‌گۆره‌.. ژ قه‌ستا نه‌هاتیه‌ گۆتن:” هه‌ڤالێن هه‌ر ده‌می و نه‌گۆر نینن..لێ به‌رژه‌وه‌ندی د نه‌گۆرن”.
ـ و بۆ گه‌هشتنا به‌رژه‌وه‌ندیان مرۆڤ د گه‌له‌ك بازبه‌ران ڕا ده‌رباز دبت.
ـ باشبوو تو تێگه‌هه‌شتی.
ـ یا بۆ مشن بوویه‌ مه‌ره‌ق بزانم: ئه‌گر به‌رژه‌وه‌ندیێن مرۆڤی د گه‌ل یێن نیشتمانی نه‌ گۆنجین؟ مرۆڤ چ بكه‌ت باشه‌؟!
ـ هینگێ تو و شیرێ خوه‌.

محه‌مه‌د چه‌لكى
دیارییه‌ بۆ: “خیانه‌تكارێن هێشتا نه‌هاتین، خه‌لاتكرن”
پشتى هزركرنه‌كا كویر مامێ عه‌لۆ دبێژت:
(بیرئانین و پیرۆز ڕاگرتنا رۆژێن ب هه‌ژمار چ د جیهانى بن یان نیشتمانى، مینا: رۆژا جیهانییا ئۆتیسمێ، زارۆكا، دایكان و … یێن نیشتمانى مینا: نه‌ورۆز، رێككه‌فتا 11 ئادارێ، رۆژا رۆژنامه‌گه‌رییا كوردى و …تد ل هه‌رێما كوردستانێ گرنگیه‌كا زێده‌ پێ دهێته‌دان و گه‌له‌ك ژ ڤان رۆژان یێن بووینه‌ بێهندانا فه‌رمى، د بیاڤێ بێهندانێن فه‌رمى دا هه‌رێما كوردستانێ هه‌موو پیڤه‌رێن جیهانى به‌زاندنه‌. سه‌ده‌مێن ڤێ مه‌رداتیا حوكمه‌تا هه‌رێمێ بۆ فه‌رمانبه‌رێن خوه‌ ناهێته‌ زانین، لێ مرۆڤ دكارت هنده‌ك ئاكۆیان ل جه‌م خوه‌ رێز بكه‌ت و بێژت لێ دیسا ژى هه‌ر دێ ئانكۆ و به‌لكو مینت، به‌لكو سه‌ده‌م دلخوه‌شكرنا فه‌رمانبه‌رانه‌ و بارسڤكرنه‌ دا بۆ خوه‌ دبه‌را كاره‌كێ دن بكه‌ن و بارێ دارایی یا خوه‌ سڤكتر بكه‌ن، چنكو هه‌تا نوكه‌ حوكمه‌تێ ب ئه‌گه‌را هه‌ر سه‌ده‌مه‌كا هه‌بت، نه‌كاریه‌ چارسه‌ریا كێشا ئابوورى بكه‌ت.
بێهندان و پیرۆزكرنا رۆژێن ناڤدار و ب هه‌ژمار یا بوویه‌ نووچه‌كێ دلخوه‌شكه‌رێ فه‌رمانبه‌رێن كوردستانێ، چاڤێن فه‌رمانبه‌ران ژ ئه‌ركانێن تیڤییان ڤه‌نابن به‌لكو رێزدار به‌رده‌فكێ حوكمه‌تێ نۆچێ “سوبه‌هى” بێهندانه‌، ڕابگه‌هینت، به‌رده‌فكێ حوكمه‌تێ ل كوردستانێ خۆشه‌ویسترین و ناڤدارترین كه‌سه‌ ل سه‌ر ئاستێ كوردستانێ!
هه‌لبه‌ت ئه‌ز نه‌ ل دژى ب بیرئانین و پیرۆز ڕاگرتنا رۆژێن بهه‌ژمارم كو بلند ڕاگرتنا خه‌بات و خزمه‌تا وان جامێران یێن بكارێن خوه‌ خزمه‌تا مرۆڤاتیێ كرى، نه‌خێر لێ حنێر یا دهندێدا پرانیا وان رۆژان خه‌لكێ كوردستانێ هه‌ر گوه لێ نه‌بوویه‌ كانێ ب چ ڕه‌نگ ئه‌و رۆژ ناڤدار بوونه‌ و مرۆڤاتى قه‌رێ وان جامێران(چ ژن بن یان مێر) ب پیرۆزكرن و بیرئانینا وێ رۆژێ پیچه‌كێ ل سه‌ر ملێن خوه‌ سڤك بكه‌ن.
د دیرۆكا كوردى یا هه‌ڤ چه‌رخ دا مه‌ چه‌ندین رۆژێن گه‌ش هه‌نه‌ كو بوونه‌ سه‌ده‌مێن وه‌رچه‌رخانێن گرنگ د ئاڤكرنا كه‌ساتیا كورد دا و بوونه‌ پشكه‌ك ژ ته‌ڤنێ وى یێ هزرى، لێ حوكمه‌تا مه‌ پشتا خوه‌ یا دایێ و باس لێ ناكه‌ت، ژبلى ژبیركرنا وان كه‌سێن ئه‌ڤ رۆژه‌ ئافراندین یان بووینه‌ سه‌ده‌مێن وێ ئافراندنێ.
ته‌ڤنێ جڤاكى و هزرى ل سه‌ر دیرۆكێ دهێته‌ نژنین، رۆلێ سه‌ره‌كى دبینت د ئاڤاكرنا كه‌ساتیا مرۆڤى دا، ب بیرئانین و ساخكرنا وان روودان و كه‌سان ئه‌ركێ حوكمه‌تێ یه‌ و ژبۆ ڤێ مه‌ره‌مێ حوكمه‌ت ڕادبت ب دامه‌زراندنا چه‌ندین بنگه‌هێن ڤه‌كۆلین، ئه‌رشیفكرن و په‌یمانگه‌هان دا بڤى ئه‌ركێ نیشتمانى هه‌ڵسن.
به‌رى دامه‌زراندنا پارتێن سیاسى ل كوردستانێ فلوكلۆرێ كوردى ب ڤى ئه‌ركى ڕابوویه‌ ئه‌ڤجا چ ب ستران یا چیرۆك و كى ژ مه‌ هه‌یه‌ گۆه ل ستراننێن ب سه‌رهلدانێن به‌درخانیان، شاكر ئاغایێ ئه‌رتۆشى، مه‌لا سه‌لیم، عه‌مێ گۆزێ، براهیم پاشیێ مللى و شێخ عه‌بدولسه‌لامێ بارزانى، شه‌رێ گه‌لیێ مزویركا و ژ سترانێن هه‌رى بالكێش كو ب خیانه‌تا كوردان هاتیه‌ گۆتن یا كاویس ئاغاى” كورد خائینۆ”، نه‌ ببت.
خیانه‌ت و خیانه‌ت كرن پشكه‌كه‌ نه‌ دابڕایه‌ ژ ته‌ڤنێ جڤاكا كوردى هه‌ر ژ دیرۆكا كه‌ڤن هه‌یا ئه‌ڤرۆ، خیانه‌تكرن دێمێ هه‌رێ بێ روومه‌تا جڤاكایه‌، چ پاساو نه‌شێن ئاكامێن ژ خیانه‌تێ په‌یدا دبن، ڤه‌شێرن، ژله‌و ئه‌ز بفه‌ر دبینم كو حوكمه‌تا مه‌ ده‌زگه‌هه‌كێ ڤه‌كۆڵینێ بۆ ڤێ دیاردا قێزه‌وه‌ن بدامه‌زرینت و ته‌ڤ گه‌هێن دیرۆكا مه‌ یا خیانه‌ت تێدا هاتیه‌كرن ئه‌رشیف بكه‌ت و سه‌ده‌مێن په‌یدا بوون و به‌ربه‌ڵاڤیا خیانه‌تكاریێ د ناڤ جڤاكا مه‌ دا بهێنه‌ رۆهنكرن و بۆ ڕایاگشتیا كوردستانى دیار بكه‌ن.
د هه‌ر جڤاكه‌كى دا خیانه‌ت دهێته‌ نه‌فره‌ت كرن و كه‌سێن خیانه‌تكار دبێ روونه‌ و تم دستۆ شكه‌ستینه‌، مخابن تنێ د ناڤ مه‌ كوردان دا رێز ل خیانه‌تكاران دهێته‌ گرتن و ب پۆست و پلێن بلند دهێنه‌ خه‌لاتكرن.
ژبۆ بلند ڕاگرتنا ڤێ دیاردێ دیاردا خیانه‌تكاریێ ئه‌ز داخازێ ژ حوكمه‌تا مه‌ یا گراڤى دكه‌م، رۆژه‌كێ بۆ بلند ڕاگرتنا خیانه‌تكاریێ ل ناڤ كوردان بكه‌نه‌ بێهندانا فه‌رمى و چالاكیان ل ڤێ رۆژێ ئه‌نجام بده‌ن و ئه‌و خیانه‌تكارێن هه‌تا نوكه‌ نه‌هاتینه‌ خه‌لاتكرن ب پۆستێن بلند، خه‌لات بكه‌ن. وه‌ك هون دزانن مه‌ گه‌له‌ك رۆژێن بێهندانێ هه‌نه‌ كو نه‌ نێزیك و نه‌ دوور چ په‌یوه‌ندى ب مه‌ ڤه‌ نینه‌ و به‌لكو گه‌له‌ك ژ وان رۆژان یێن بووینه‌ سه‌ده‌ما ڤه‌قه‌تاندنا مه‌ ژ كاروانێ مرۆڤاتیێ و هێلاینه‌ بێ ده‌وله‌ت. ئه‌ڤجا بلا مه‌ رۆژه‌ك بۆ خیانه‌تكارێن كورد هه‌بیت ب ناڤێ رۆژا خیانه‌تێ. هوون چ دبێژن.

محه‌مه‌د چه‌لكى
باران بۆ سروشتى ملحه‌مه‌.
باران بۆ جوتیاران نعمه‌ته‌،
باران بۆ گه‌نده‌لچیان، جه‌رده‌ڤانان، دز و فێلبازان نعمه‌ته‌،
باران بۆ هه‌لبه‌ستڤان، هونه‌رمه‌ند و ئه‌فراندكاران سروش به‌خشه‌،
باران بۆ ئه‌ڤینداران شویشتنا شوینوارێن رۆندكانه‌،
باران بۆ نێچیرڤانان، دوعا ده‌یبابانه‌،
باران بۆ كوژه‌كان، هه‌ودانا برینایه‌،
باران بۆ زارۆكان، كلیلدانا ده‌رگه‌هانه‌،
باران بۆ ماسى، ڤه‌كرنا هه‌موو سكرانه‌،
باران بۆ رێڤنگان، پالادانه‌ بۆ گه‌هه‌شتنا قۆناغا ئارمانجان،
باران بۆ هه‌ژارێن خانیێن خو
ه‌ لبه‌ر كنارێ رووباران و نهلان ئاڤاكرین، مرنه‌كا ئه‌رزانه‌،
باران بۆ خودانێن خانیێن ل سه‌رێ گران ئاڤاكرین، سمفۆنیه‌كا كلاسیكه‌،
باران بۆ بازرگانێن گازێ ل كوردستانێ، وه‌رزێ گران كرنا گازێیه‌،
باران بۆ خودانێن مووه‌لیدان، وه‌رزێ قوتكرنا كاره‌بێیه‌،
بۆ نۆژداران پركرنا قاسێیه‌،
بۆ ده‌رمانخانان فرۆتنا ده‌رمانێن ده‌مێ وان كێم ماین یان …
بۆ شۆفێرێن ته‌كسیان چاڤ قه‌رمینه‌ ل سه‌رێ رێكان …
بۆ ده‌ستهه‌ڵاتداران ئه‌فراندنا رۆژێن بێهندانێنه‌،
بۆ ئۆپۆزسیۆنێ ده‌رخستنا سینگییه‌ ل سه‌ر تیڤیان،
بۆ خانه‌نشینان قه‌ركرنا پارانه‌ بۆ چوونا ده‌ف نۆژداران!
بۆ بێكارێن وه‌ڵاتێ من، چوونا كافیانه‌ و كێشانا نارگیلانه‌!
بۆ رۆژنامه‌ڤانان تێله‌فونكرنا به‌رپرسانه‌!
ئو تۆ ئه‌ى خانده‌ڤان؟
2018.11.17
دهۆك

محه‌مه‌د چه‌لكى
هۆڕه‌باى و چپكێن بارانێ مامێ عه‌لۆ بێزار كربوو و سه‌رێ وێ یێ چه‌ماندیبوو و شه‌ر ل گه‌ل شۆستێ جادێ دكر دا زوو خوه‌ بگه‌هینت، جهێ گازا سپى دفرۆشن. هێش نه‌گه‌هه‌شتى وى جهى، زه‌ڵامه‌كى ژ ڤان یێن كار و كه‌سپێن وان پیڤانا جادا و رێكێ ل كریار و دوكانداران ته‌نگ دكه‌ن، ژ بلى ململانا وان دگه‌ل ئافره‌تان و ئاخفتنێن سه‌قه‌ت ئاراسته‌ى وان دكه‌ن، كو یا وه‌لێ هاتى ئافره‌ت بێى لێزمه‌كێ خوه‌ بۆ كڕینا پێدڤیێن خوه‌ نه‌چته‌ بازارى. وه‌ ڕاستى دڤێت ئه‌ڤێ دیاردێ دلێ من ژ ڤان سه‌قه‌ته‌ مرۆڤان یێ ڕه‌ش كرى. بێكارێن دهۆكێ بارا پتر داد قڕژنه‌ بازارى، ب گۆتنا وان په‌یاسێ دكن، وه‌ى پا چڤێلی یه‌ تۆ بێكار بچیه‌ بازارى، بازار ئانكو جهێ كڕینا پێدڤیێن ناڤمالێ یه‌ نه‌ك په‌یاسان، جهێ په‌یاسان ناڤ سروشتى، پارك، به‌ر كنارێن رووبار و جهێن ئارامه‌. ل دهۆكێ مه‌ چه‌ندین جهێن دلڤه‌كه‌ر هه‌نه‌ كو مرۆڤ ده‌مێ خوه‌ یێ ڤاڵا لێ ببوورینت مینا پاركێ بارزانیێ نه‌مر، پاركێ دلشاد مه‌حه‌مه‌د سه‌عید، پاركێ پانۆڕاما ئازادى، گه‌لیێ دهۆكێ و چه‌ندین جهێن دن، به‌س ما تۆ بۆ كێ دبێژى، هه‌موو عه‌بۆقاتێن بێ چانته‌نه‌! وى زه‌ڵامى گۆته‌ مامێ عه‌لۆ:
ـ هه‌چكو به‌ڕكا ته‌ یا دڕیاى؟
+ عه‌زیزێ مامێ نه‌ ئه‌ڤرۆیه‌ به‌ڕكا من دڕیاى.
ـ نه‌ نه‌ تۆ نه‌ى پندڤى!
+ پندڤینا كه‌سێن مینا من نه‌ ژ وى كه‌تواری یه‌ یێن مینا ته‌ هه‌ر ژ سپێدێ هه‌تا ئێڤارێ باس لێ دكه‌ن و ژبنڤه‌ ژبنڤه‌ ژى سێ چار مۆچێن هێرڤه‌ و وێڤه‌ وه‌ردگرن!
ـ ئانكو تۆ من ب گه‌نده‌لیێ گونه‌هبار دكى!
+ دز ژ پێژنا ل پشت خوه‌ دترست.
ـ به‌س ته‌ نه‌گۆت پندڤینا ته‌ ژ چی یه‌!
+ ژ كێرا مسته‌ر سایكس ـ پیكۆى و تره‌مپێ سه‌رخوه‌شێ مال و باڵاده‌ستیا ئه‌مریكا.
ـ ما تۆ هاتیه‌ گازێ یان شرۆڤێن سیاسى بۆ مه‌ بكه‌ى؟
+ مانێ ته‌ به‌حسێ به‌ڕكا من یا دڕیاى كر، به‌ڕكا من بۆ جارا ئێكى یا ب كێرا مسته‌ر سایكس-پیكۆى هاتیه‌ زڤێل زڤێل كرن و ئه‌وا ماى ژى مسته‌ر تره‌مپى لبه‌ره‌ ل سه‌رخاترا چاڤێن ئه‌ردۆغانى ته‌مام بكه‌ت.
ـ مانێ هه‌ر كه‌س ته‌ڤشوویێ به‌رێ خوه‌یه‌!
+ لێ ئه‌م ته‌ڤشوویێن خه‌لكینه‌ و له‌و به‌ڕكا مه‌ هه‌ر یا دڕیایه‌.
ـ ئو ته‌ چ ل به‌ره‌؟
+ هه‌ر بمینم ته‌ڤشوویێ به‌رێ ملله‌تێ خوه‌!!

محه‌مه‌د چه‌لكى
ـ سپێده‌ باش!!
+ ….
ـ ئه‌زبه‌نى … سپێدا هه‌وه‌ باش!
+ فه‌رموو … خوه‌ سه‌رێ خوه‌ ژى بلند نه‌كر و هه‌ر یێ مژوولى مۆبایلا خوه‌ بوو..
ـ ئه‌ز به‌نى هه‌چكو خه‌به‌ره‌كێ خوه‌ش یێ هه‌یى …
+ خه‌به‌رێ چ … دیسا هه‌ر یێ مژوول بوو و چ گرنگى ب هه‌بوون و سلاڤ و پرسیارا وى نه‌دا!
ـ نه‌مانا پاشكه‌فتا مۆچێ ب زۆرێێێێێێێێێێێێێێێ!
+ ڤێجا كه‌نگى ئه‌ڤه‌ كێشه‌یه‌ …
ـ جه‌نابێ هه‌وه‌ پاشكه‌فتا مۆچه‌ى ب كێشه‌ نزانت؟ ژ كه‌ره‌ما خوه‌ كێشا ژ ڤێ گرنگتر ئه‌ڤرۆ چیه‌؟
+ پرسیارێن ژ خوه‌ زێده‌ نه‌كه‌ … ما ئه‌ز حوكمه‌تم! هێشتا ئه‌فه‌ندى به‌رێ خوه‌ ژ مۆبایلێ نه‌ وه‌رگێرایه‌ و …
ـ ژ ده‌ستویریا ته‌، به‌س حوكمه‌ت عه‌ینه‌ن وه‌كو ته‌یه‌!
جرفه‌ك ب ئه‌فه‌ندى كه‌فت و دابێژى ستنگێ پێڤه‌دا و گۆت:
+ وه‌الله‌ وه‌بیللاه ئه‌گه‌ر ئه‌ز حكومه‌ت بام، هندى دنیا هه‌یه‌ دا ئه‌ز ڕه‌ڤم!
ـ دوباره‌ ڕه‌ڤ!
+ ئه‌رێ عه‌ینه‌ن ڕه‌ڤ، ما ئه‌ڤه‌ ره‌وشه‌ حوكمه‌ت تێدا!
ـ تێ نه‌گه‌هه‌شتم!
+ نێ ئه‌گه‌ر جه‌نابێ ته‌ و ئه‌زماندرێژێن ژ تۆخمێ ته‌ تێ گه‌هه‌شتبان، نوكه‌ ژ مێژه‌ مه‌ گۆتبایه‌ ئاریشه‌یان باى باى.
ـ جه‌نابێ هه‌وه‌ من تۆمه‌تبار دكه‌ت ب ئه‌زماندرێژیێ!
+ ئه‌رێ جه‌نابێ ته‌ هزر د په‌ستێن ل سه‌ر حوكمه‌تێ كریه‌ و ب چار و نه‌وه‌ڵا بێژه‌ ژ هه‌ر لایه‌كی ڤه‌ چه‌مبه‌ر كریه‌ و ژبلى ئه‌فه‌ندى و بیڤپه‌رێسێن هه‌ر رۆژه‌كێ ب سه‌ر به‌نه‌كى دله‌یزن، ئاریشه‌یان بۆ ژبن پیستێ حه‌فتیاران دده‌رێخن و كار و كۆكێن وێ دئالزینن!
ـ پێدا نه‌چه‌، من زانى ته‌ ل كیده‌رێ دا …
+ ماڵا خودێ ئاڤا ته‌ ڤێجارێ زانى .. دێ كا بێژه‌ دا چ بێژى؟
ـ ئه‌زبه‌نى ته‌ لبه‌ر من به‌رزه‌كر..
+ هه‌رده‌ما ڕاستى هاته‌ هۆلێ، ده‌ڤێن هه‌وه‌ د ئالزن!
ـ نه‌ ئه‌زبه‌نى یا لبیرا من ..
+ پا دێ كه‌للێ* خوه‌ ب شكێنه‌؟
ـ یێن دبێژن: دێ خۆلا نوو یا په‌رله‌مانى ڤان رۆژان ئێكه‌م روونشتنا خوه‌ كه‌ت.
+ ئێێێێێێێێێێێ، هه‌ر كه‌س ڤێ دزانت!
ـ لێ ڤێجارێ نه‌وه‌كو خۆلێن به‌رێ یه‌! ڤێجارێ زووكا ده‌ستپێكر!
+ چونكو هه‌ر لایه‌نه‌كى به‌رومنێن خوه‌ زانین و حرحر و نڕنڕێن وان چ نه‌مابوو ریسێ مه‌ بكه‌ن هرى، به‌س ملله‌تى به‌رسڤا خوه‌ دا …
ـ ئانكو ئه‌نجام ب دلێ ته‌ بوون؟
+ نه‌ هه‌ما ب دلێ من بوون به‌لكو كه‌یف خوه‌ش كرم!
ـ سه‌یره‌ …
+ بۆچى سه‌یره‌؟
ـ چونكو رێژا پشكداریێ د هه‌لبژارتنان دا یا دلخوشكه‌ر نه‌بوو.
+ تۆ نه‌شێى خه‌لكى نه‌چار بكه‌ى پشكداریێ د هه‌لبژارتنان دا بكه‌ن و ئه‌ڤه‌ ئێكه‌ ژ سیمایێن دیمۆكراتیێ!
J ڤێ كێم پشكداریێ تۆ ب چ ڤه‌دگه‌رینى؟
+ بۆ دیمۆكراسیبوونا هه‌رێما مه‌!
ـ ئه‌ڤه‌ ناهێته‌ هه‌ژمارێ ب ئوپۆزسیۆنا بێده‌نگ!
+ مه‌رج نینه‌ به‌لكو ڤاڤێرتن بت و ئێدى سیاسه‌ت بۆ سیاسیا بت و خه‌لك مژوولى ژیانا خوه‌ بت، پاشى ژبیر نه‌كه‌ دیمۆكراسى ئانكو رێزگرتن ل خه‌لكى!
ـ دا ببینین كا ئه‌ڤ جامێره‌ دێ چكه‌ن؟
+ دێ دباشتر بن.
ـ چاوا یێ پشتڕاستى!
+ ئه‌زموون رێ نیشانده‌ره‌.
ـ به‌س ئه‌گه‌ر ئه‌و ژى ل په‌رله‌مانى مژوولى مۆبایلێ نه‌بن وه‌كو ته‌!
** كه‌للێ شه‌كرێ ئانكو مه‌ره‌ما خوه‌ بێژه‌!