محه‌مه‌د چه‌لكى
د به‌ر ده‌رگه‌هێ خه‌ستێ ڕا بۆرى*، پته‌ پتا پیره‌مێره‌كى ل گه‌ل په‌رستاره‌كێ شریتا ته‌خمینێن وى پچاند، ل سه‌ر ملێ خوه‌ زڤڕى، گۆپالێ پیره‌مێرى و لڤینا وى سه‌رنج بۆ خوه‌ ڕاكێشا، وه‌ح خوه‌ لڤینا پیره‌مێرێن مه‌ ژى ئاماژێن شه‌رى ژێ قلۆز دبن، سه‌یره‌ ئه‌ڤ ملله‌ته‌ ژ شه‌ران تێر نابت، ده‌نگێ ناخێ وى لێ زڤڕاند: ئه‌م یێن ب ڕستا” شه‌ر چێتره‌ ژ به‌تالیێ، یێن هاتینه‌ فرشككرن” ئه‌ڤجا تۆ ل هیڤیا چى! بێى هه‌ستا وى و هه‌چكو ئێكى بده‌ست به‌رێ وى دا سه‌متا پیره‌مێرى. بلندیا ده‌نگێ پیره‌مێرى په‌رستار شه‌پلاندبوو و خوه‌ كپێن ژێ نه‌دهات، تنێ ب ئاماژا ده‌ستان مرۆڤى دزانى دخوازت تشته‌كى ببێژت، لێ پیره‌مێرى رێ نه‌ددا. ده‌ما مامێ عه‌لۆ نێزیكى وان بوو، ب دروستى گوه ل ئاخفتنێن وان بوو و پیره‌مێرێ دبێژتێ: چ مروه‌ته‌ ئه‌ڤه‌ سه‌رێ سێ رۆژانه‌ ب ڤێ پیراتیا خوه‌ڤه‌ دهێمه‌ خه‌ستێ و هوینێ دبێژن:”ده‌رمان نینن”، چاوا عه‌قل باوه‌ر بكه‌ت كو ل خه‌ستێ ده‌رمان نه‌بن، پا بۆچى ل ده‌رمانخانان هه‌ر تشێ بخوازى یێ هه‌یى و ل خه‌ستێ نه‌بن، یانژى تشته‌كێ ل بن ڤى كۆڵاڤى ڤه‌ هه‌ى! ئه‌زمانێ په‌رستارى نه‌دلڤى دا بێژى ئه‌ڤ مرۆڤه‌ى كه‌ڕ و لاله‌! چه‌ند مامێ عه‌لۆ نێزیكه‌ وان دبوو، هێرسا پیره‌مێرى بلندتر دبوو هه‌روه‌كو یێ داخوازا هاریكاریێ دكه‌ت یانژى یێ نهێنیه‌كێ دیار دكه‌ت و بده‌نگه‌ك بلندتر گۆت: به‌س بێژنه‌ من و من تێبگه‌هینن: چاوا چێ دبت ل خه‌سته‌خانێ ده‌رمان نه‌بن! هه‌ما باشتره‌ ده‌رگه‌هێ وێ بگرن و دا ئه‌مژى بێهیڤى ببین و ل سه‌ر جهكێن خوه‌ بده‌ردێن خوه‌ بمرین، ژ ده‌وله‌ت سه‌رێ هه‌وه‌ و كوندزێن ئه‌ڤ وه‌ڵاته‌ كریه‌ بارمتێ حه‌زێن خوه‌، مه‌ شیانێن چوونا خه‌ستێن تایبه‌ت و ده‌رڤه‌ى وه‌ڵاتى ژى نینه‌، ئه‌ڤجا مرنێ بخێر وه‌ره‌. ره‌نگێ په‌رستارى په‌تخى دیاردكر، لێ په‌یڤا ل سه‌رێ ئه‌زمانى و بنێ ئه‌زمانێ وى ده‌رمان نینن بوو! ئه‌ڤه‌ژى دبوو سه‌دما بلندبوونا كێرفێ پیره‌مێرى. هه‌رچه‌نده‌ وه‌كو دیار پیره‌مێر یێ مافدار بوو، لێ دلێ مامێ عه‌لۆ ب په‌رگالا په‌رستارى سۆت، ده‌ما مرۆڤى به‌رسڤ بۆ پرسیاره‌كێ نه‌بن، مرۆڤ وه‌كو لێهبۆكان دیار دبت، له‌و مامێ عه‌لۆ ب لایێ پیره‌مێرى ڤه‌ چوو و گۆتێ: مامۆ ئه‌ز دزانم تۆى مافدارى لێ نه‌گونه‌ها ڤى جامێریه‌ كو ده‌رمان ل خه‌ستێ نه‌بن، نه‌یى ژ خودێ دهێت!
+ تۆ ژكیڤه‌ بۆ من په‌یدا بووى، ئه‌بۆقاتێ بێ چانته‌!
ـ دێ چمه‌ ده‌ف نۆشدارى.
+ هه‌ هه‌ هه‌ هشیارى خوه‌به‌ له‌هیا ده‌رمانا ته‌ژى ب خوه‌ ڕا نه‌به‌ت؟
ـ یێن ئێشا ته‌ به‌لكو نه‌بن لێ یێن من، ما تو خێڤزانكى دابزانى كو ده‌رمانێن ئێشا من نینن؟
+ ل ڤى وه‌ڵاتى پێدڤى ناكه‌ت مرۆڤ خێڤزانك بت دابزانت كا چ هه‌یه‌ و چ نینه‌!
ـ ماده‌م ڤێ دزانى بۆچى شه‌ڕه‌ده‌ڤێ دگه‌ل ڤى جامێرى دكه‌ى!
+ چونكو ئه‌و ژى پشكه‌كه‌ ژ ڤى سیسته‌مى.
ـ ما سیسته‌مێ مه‌ى چاوایه‌؟
+ نیعمه‌تا خودێ یه‌!
ـ ئانكوى بدلێ ته‌یه‌؟
+ به‌لێ و سه‌دجارا به‌لێ!
ـ پا ئه‌ڤه‌ چ گۆپاله‌ هۆسا دهه‌ژینى!
+ وه‌كو كوحمه‌تا مه‌ دا بده‌مه‌ به‌رخوه‌ ده‌ما دهلنگڤم!
ـ ما حوكمه‌تا مه‌ یا له‌نگه‌؟
+ نه‌خێر یا شه‌ش پێیه‌!
ـ سوپاس بۆ خودێ من مرۆڤه‌ك دیت په‌سنا حوكمه‌تا مه‌ بكه‌ت!
+ مانێ یا ژهه‌ژیه‌!
ـ ژبه‌ر چ؟
+ چونكو چ جاش و سیخۆر نه‌مان كو خه‌لات نه‌كربن ب پۆستێن بلند!
ـ خوه‌ ڤێ جارێ ژى!
+ ل لیستا وه‌زیر، گزیر و په‌رله‌مانته‌را مێزكه‌.
ـ مانه‌ فهێتیه‌!
+ ژبیرچوون نیعمه‌تا خودێ یه‌!
ـ تۆ وه‌دبێژى!
+ ئه‌گه‌ر ژبیرچوون نه‌بت، چوونا نۆشداران دێ ژبڕینا هنگڤێ هۆزۆمیران ب زه‌حمه‌تتر بت. هه‌ر بژیت ژبیرچوون.
* پێنجشه‌مبێ ئه‌ز چوومه‌ خه‌سته‌كێ ل دهۆكێ، نۆژشدارى گۆت: مه‌ ده‌رمان نینن!!

محه‌مه‌د چه‌لكى
ـ سه‌ر چاڤان ئه‌زبه‌نى .. نه‌خێر دێ هه‌ر ئه‌و بت یا ته‌ گۆتى… داخوازا لێبۆرینێ دكه‌م، من هزرا هندێ نه‌كربوو.. به‌لێ ئه‌زبه‌نى ئه‌وا تۆ دخوازى دێ گران ل سه‌ر مه‌ كه‌ڤت، هه‌ر چه‌نده‌ ژ من زێده‌یه‌ ژى به‌س مانێ هوون باشتر دزانن، ده‌م هاتیه‌ گوهۆرین و گه‌نجێن ڤى زه‌مانى رێزا چو ناگرن. به‌لێ ئه‌ز به‌نى، نه‌خێر دێ هه‌ر وێ كه‌م یا جه‌نابێ هه‌وه‌ فه‌رمان دكه‌ت.. ئه‌سته‌غفیره‌الله‌ ژ من زێده‌یه‌.
+ هههههه … مێرێ ب سه‌د مێران ئه‌و چو خوه‌ به‌ژێركرنه‌، تۆ دگه‌ل كێ دئاخفتى؟
ـ سه‌یدا بوو، سه‌یدا.
+ ڤێجا ئه‌و چ سه‌یدایه‌ هۆى گرنگ تۆ هۆسا ب ئێك به‌ژنا خوه‌ڤه‌ رابۆیه‌ ژپێرڤه‌ و دبه‌را خوه‌ دچه‌ماند و ده‌ستدان سینگێ خوه‌؟
ـ ئه‌زمان حولى به‌، مه‌ره‌مێن ته‌ بێى زه‌حمه‌ت دێ بجه هێن!
+ ئانكو ته‌ دره‌و دكرن!
ـ تۆ ژى شولێ مه‌زن نه‌كه‌، ماڵا ته‌!
+ مانێ جامێرى تو نه‌ ددیتى ڤێجا ئه‌و چ خوه‌ چه‌ماندن و ده‌ست ل سینگى بوو؟ ئه‌ز ڤێ تێ نه‌گه‌هه‌شتم!
ـ تۆ چ جاران تێناگه‌هى، له‌و ره‌وشا ته‌ یا رێنگزه‌ وه‌كو پشیكێ هه‌ر هه‌یام هه‌یام كنجرێن ته‌ یێل بن هنگلێن ته‌، ل دو گیتێن ئه‌رزانتر دگه‌رهى دا لێ بهێورى، ته‌ ئه‌و ره‌وش پیرۆز بت!
تۆڕه‌بوونێ خوه‌ ل مێشكێ مامێ عه‌لۆ دا و بێهنا وى چككر و ئێدى هه‌و كارى لغاڤێ تۆڕه‌بوونا خوه‌ بگرت و بهێرسه‌كا تژى نه‌رازیبوون و په‌یڤێن زڤر و بتیفكلێن كۆچه‌رى به‌رسڤا ئه‌فه‌ندى دا:
+ ئه‌گه‌ر گه‌هه‌شتنا مه‌ره‌م و هیڤییان ب سالسكى، خوه‌ كێمكرن، ژ ده‌ستدانا رومه‌تێ بت، ئه‌ز ژى دبێژم: به‌لێ من ئه‌ڤ ره‌وشه‌ پیرۆز بت!
ـ ب ئه‌نیا میرێ بۆتان كه‌م ئه‌ڤان ئۆلیێن تۆ ل سه‌رێ گرێن بلند دبینى، باهرا پترا خودانێن وان په‌یڤا هه‌رى مشه‌ ل سه‌ر زارێن وان “ئه‌زبه‌نى یه‌” و خوه‌زى هه‌ر تنێ ئه‌ڤه‌ بایه‌ به‌لكو یێن بووینه‌ قه‌ره‌ولێن به‌رپرسێن بلند كانێ دێ ب چ ره‌نگ تشته‌كى ژ ڤێ حوكمه‌تا مه‌ چه‌قینن، رۆژ رۆژا چه‌نه‌بازنه‌، چه‌نه‌بازان!
+ وه‌ى بۆ حالێ حوكمه‌تا مه‌!
ـ ما مه‌ حوكمه‌ته‌ك مایه‌؟
+ ئه‌گه‌ر ئه‌ڤا ته‌ گۆتى ڕاست بت، ئاریشه‌كا مه‌زنه‌ و سه‌ره‌داڤێن رۆهن بوونا گه‌له‌ك پرسێن ل جه‌م من بووینه‌ گرێ هشك، دیار دبن.
ـ ئانكو جه‌نابێ ته‌ ڤێ چه‌ندێ نزانت!
+ ئه‌گه‌ر من زانبیت ژى، لێ من نه‌دخواست وه‌سا خوه‌ تێبگه‌هینم!
ـ مانێ جه‌نابێ ته‌ به‌س یێ ل مه‌ى بهێجه‌ته‌ و په‌له‌نداران د مه‌ وه‌ردكه‌ى!
+ دل پێڤه‌مانى و بێده‌نگى ل سه‌ر خوه‌هریێ پشكه‌كه‌ ژ رازیبوونێ.
ـ وه‌ى عه‌مفه‌رم مامێ عه‌لۆ ل دویماهیێ ته‌ دان ب شاشیا خوه‌ كر.
+ “هه‌وارا ل په‌ى گورگییه‌”!
ـ ئانكو چاوا؟
+ سه‌یره‌ ل ڤى وه‌ڵاتى ئه‌گه‌ر ته‌بڤێت سه‌رێ ته‌ى ته‌نابت، به‌رویكا ته‌ گه‌رم بت و كوڕو كچێن ته‌ بهێنه‌ دامه‌زراندن، فه‌ره‌ هزرێ د روومه‌ت و وه‌ڵاتێ خوه‌ دا نه‌كه‌ى، مه‌ بهندێ كر له‌و د نابه‌ینا چاڤ نقینه‌كێ دا مه‌ … ژ ده‌ستدان.
ـ ئانكو تۆ من گونه‌هبار دكى ب بێ روومه‌تى و نه‌ نیشتمانپه‌روه‌رى؟
+ چاوا تێبگه‌هى، تێبگه‌هه‌!
ـ باشتره‌ مرۆڤ ته‌ تێكڤه‌ نه‌ده‌ت!
+ ماده‌م ل به‌ر زه‌نگا تێله‌فۆنا “سه‌یدا”ى ڕاببیه‌ ژپێرڤه‌ و خوه‌ بچه‌مینى، به‌لێ و وێڤه‌تر ژى …

محه‌مه‌د چه‌لكى

ده‌نگوباسێن حه‌فتیا چووى، گێولێ مامێ عه‌لۆى یێ نه‌خوه‌ش كرى. چاڤێ وى ل حكومه‌تێ بوو كو ڤێ پاییزێ مزگینییه‌كا خوه‌ش بده‌ت وه‌ڵاتیان و پیچه‌كێ درێژبوونا ماوێ قه‌یرانێ و به‌رفرهه‌بوونا گه‌نده‌لیێ و سالوسكیا هنده‌ك لایه‌نێن سیاسى بۆ داگیركه‌رێن كوردستانێ، ژبیرا وه‌ڵاتیان ببه‌ت. نزا ده‌ستهه‌ڵاتدارێن مه‌ چ ژ وه‌ڵاتیان دڤێت. ئه‌گه‌ر ئه‌ڤا ل كوردستانێ ل رۆژا نیڤرۆ دهێته‌كرن، ل وه‌ڵاته‌كێ دن بایه‌ نوكه‌ پتریا ده‌ستهه‌ڵاتدارێن مه‌ ل پشت شفشێن زیندانان بانه‌، دا كه‌نه‌ په‌ند بۆ نفشێن بهێن.
مه‌ ملله‌ته‌كێ دلۆڤان هه‌یه‌ و هه‌موو هیڤیا وى یا بوویه‌ پارستنا ڤى چرایێ دبێژنێ حكومه‌تا كوردستانێ دا هه‌ر بمینت هل. به‌لێ دیسا مرۆڤى ماف هه‌یه‌ گازندان بكه‌ت و ده‌نگێ خوه‌ بگه‌هینت ده‌ستهه‌ڵاتێ و دا ژ ڤێ چلخانا نه‌بانا ل كێشێن وه‌ڵاتیان هشیار ببت و ئاڤرویه‌كێ لێ بده‌ت.
مامێ عه‌لۆ ل په‌رتوكخانا به‌درخانیا مژولى خاندنا په‌رتوكه‌كێ بوو و قه‌له‌م و په‌ر ل سه‌ر مێزێ بوون و جار جار تشته‌ك دنڤێسى و ژ ڤێ دنیایێ باركربوو و دگه‌ل په‌رتوكێ نقومى هزران ببوو، ئه‌فه‌ندى ئه‌ڤ ره‌وش و په‌رگالا مامێ عه‌لۆ ب ده‌رفه‌ت زانى كو هنده‌ك په‌له‌ندارا تێ وه‌ربكه‌ت و گوتێ:
هه‌چكو ته‌ لبه‌ره‌ ببیه‌ نڤیسه‌ر، یا راست یێن وه‌كو ته‌ ژ پرێزێ دكێمن؟
+ ببمه‌ چ نابمه‌ نڤیسه‌ر!
ما نڤیسه‌ران چ ل ته‌ كریه‌؟
+ ئێ ته‌ گۆت: تۆ یێ ژ پرێزێ كێمى، ڕامانا وێ ئه‌وه‌ نڤیسه‌ر نه‌ هند وه‌جێ دگه‌هینن و ئه‌گه‌ر ئه‌ز ژى ببمه‌ نڤیسه‌ر ما دێ چ ژ پرێزێ گوهۆڕم؟
ئه‌رێ …
+ ئه‌گه‌ وه‌سا بت پا بۆچى ژ كه‌ڤندا و هه‌تا ئه‌ڤرۆ هه‌موو ده‌ستهه‌ڵاتدار خوه‌ ژ نڤیسه‌ران دده‌نه‌ پاش و هزار و ئێك رێكا دگرن بۆ بێده‌نگ كرنا وان، ما ئه‌ڤه‌ نه‌ گرۆڤه‌ كو جامێر ب وه‌جن!
تۆ دێ هێرڤه‌ هێى و وێڤه‌ چى به‌س دا ره‌خنێ ل ده‌ستهه‌ڵاتێ بگرى.
+ ڤێجا زكۆ وه‌ره‌ نه‌په‌قه‌!
ئها ئه‌ڤیه‌ كێش ده‌ما مرۆڤى گۆته‌ ته‌ مویه‌كێ خارێ ل پێش چاڤێن ته‌، ده‌ست دهاڤێژى په‌له‌ندارا و ڕاست و چه‌پ دهاڤێژى.( ئه‌فه‌ندى دخازت، مامێ عه‌لۆى بده‌ت ئاخفتنێ).
+ ئه‌فه‌ندیوووو ئێ ب خودێ ئه‌گه‌ر سه‌ر خاترا ڤێ ره‌وشا كمباخ نه‌بایه‌ كو دترسم نه‌یارێن چرایێ مه‌(حكومه‌تا كوردستانێ) مفاى ژێ ببینن وه‌ك هنده‌ك نه‌جامێر دكه‌ن، دا وه‌سا ره‌خنێ ل ڤێ ده‌ستهه‌ڵاتێ كه‌م یا ئه‌حمه‌دێ خانى ل به‌ر مووریكه‌كا بچویك بایه‌!
ب سه‌رێ ته‌ كه‌م ئه‌ڤه‌ كولندێ (ده‌ر نه‌ڤه‌كرینه‌) و هه‌ر بۆ وان نه‌خه‌مه‌!
+ دبت وه‌سا بت، لێ ئه‌ز ناخازم بچمه‌ د ناڤ به‌ره‌یه‌كى دا كو نه‌حه‌ز مفاى ژێ ببینن، یانژى بێڤهیتیێ ل ناڤ خه‌لكى به‌ڵاڤ كه‌م.
مه‌ بهندێ كر له‌و ئه‌م د رێنگزین.
+ ما ته‌ نه‌گۆت: (كولندێن ده‌ر نه‌ڤه‌كرینه‌)، پا ئه‌ز دبێژم نه‌كولندن ژى!
چه‌وان ..
+ ئه‌گه‌ر كولند بانه‌ ئانكو دا شیان هه‌بن دقه‌یراناندا بسه‌ر كه‌ڤن.
ئانكو نه‌كولندن ژى!
+ به‌لێ ئه‌گه‌ر نه‌وه‌سا بایه‌ ما دا چه‌وان خوه‌ ل خه‌ندقینا خه‌لكێ مه‌ د ده‌ریا ئیجه‌ دا بێده‌نگ كه‌ت و ب بها كه‌فتنا پانزینێ و هه‌ر تشتى لێڤا ژوورى ل یا ژێرى نه‌دا.
ئه‌ڤه‌ پاداشتێ هه‌لبژارتنانه‌.
+ هندى پاداشت ئه‌ڤه‌ بت، باوه‌ربكه‌ ئێدى خه‌لك ژى ب هیڤیێن خرش ناهێن خاپاندن و هه‌لبژارتنێن بهێت دێ رێژه‌ ژ ڤێ جارێ كێمتر بت و ئه‌گه‌ر چ سزایێن دن نه‌ده‌ن!
ما دێ شێن؟
+ ئه‌رێ وه‌الله‌، به‌س هیڤى خازم وه‌كو بهارا عه‌ره‌بى لێ نه‌هێت.
تۆ دبێژى سۆزدان و هیڤیێن خرش دێ بهاره‌كا عه‌ره‌بى به‌رهه‌م ئینیت؟
+ ئه‌ڤه‌ قانوونا دیرۆكێیه‌!
2018.10.13
دهۆك

محه‌مه‌د چه‌لكى
گۆتنه‌كا هه‌ى دبێژت.” ژ سالۆخێن باشێن هه‌ر كه‌سه‌كى: پشتدانا هه‌ر لڤینه‌كا په‌یوه‌ندى ب ویڤه‌ نه‌”، ئه‌نكو مایتێكه‌ر نه‌بت.
كه‌ربێت مامێ عه‌لۆ گه‌له‌ ژ په‌یڤا مایتێكه‌ر ڤه‌ دبت، ب هزرا وى هه‌موو ده‌ما مایتێكه‌رى نه‌یا شاشه‌ و ب ئه‌زمان درێژى ناهێته‌ هه‌ژمارتن، به‌س ما تۆ بۆ كێ دبێژى، مرۆڤێن ڤى سه‌رده‌مى باهرا پتر یێن بووینه‌ ته‌ڤشۆیێ به‌را خوه‌ و هه‌ر لڤینه‌كێ دبن سیبه‌را به‌رژه‌وه‌ندیا خوه‌ ڕا دبن و ئه‌گه‌ر مفا بۆ وى تێ هه‌بت، پشته‌ڤانه‌ و بلا باهرا پترا ملله‌تى بچته‌ ئێك ئاڤا مه‌زن! گه‌له‌ك كه‌س ره‌خنه‌گران ژى د كه‌نه‌ ناڤ لیستا مایتێكه‌ران دا ب تایبه‌ت ده‌ستهه‌ڵات و ئۆلدار، نه‌ خوه‌زیا وى كه‌سى یێن ئه‌و لێ پشته‌رێ ببن، یا وى ژبنى چوو ب تا یبه‌ت ل جه‌م پارتێن ئیسلامى یا ژ وان جامێران ڤه‌ خودێ پێدڤى ب پاسه‌وانییا وانه‌، ژ ڤێ ڕه‌فتارا وان یا دوورى ره‌وشتى، نوكه‌ ئیسلام یا بوویه‌ پێتڕانكا هه‌موو جیهانا مۆدێرن، مخابن پارتێن مه‌ یێن سیاسی ژى رێكا ئیسلاما سیاسى گرتنه‌ و به‌رگه‌یا ڕه‌خنێ ناگرن و ژبه‌ر هندێ وه‌رارا جڤاكى خه‌تمییه‌، ” ئه‌ز چیا و تۆ چیا، كى دێ ژ گۆلكێ ڕا هه‌ڕت گیا”ى.
مامێ عه‌لۆ یێ مژویله‌ ب لیسته‌كرنا وان تشتێن ده‌ستهه‌ڵات، پارت و ڕه‌وتێ ئیسلاما سیاسى ب مایتێكرن د هه‌ژمێرن، ژ ده‌نگ، ویق ویق و نڕینا ترۆمبێلا هه‌وارهاتنێ ڤه‌جنقى، جاده‌ ژ حه‌ره‌ستۆكا ترۆمبێلا و ململانێ یا په‌یاده‌یان، رێك ل ترۆمێلا هه‌وارهاتنێ گرتیه‌، وه‌ح … كه‌نگى ئه‌م دێ فێرى ره‌وشتێ ڕێكورێبارا بین. ل هه‌موو دنیایێ هه‌كو ده‌نگێ ترۆمبێلا هه‌وارهاتن و پۆلیسى هات، جاده‌ بۆ دهێته‌ ڤه‌كرن و په‌یاده‌ خوه‌ دوورى جادێ ڕادگرن، تنێ ل جه‌م مه‌ نه‌بت!
– ها مامێ عه‌لۆ ئه‌و تۆ ب چڤه‌ى مژویلى؟ هه‌چكو یێ تشته‌كى دنڤێسى، ب ڕاستى تۆ یێ ژ دیوانێ كێمى؟
+ دیوانا چ؟
– تۆ ژى خوه‌ ل مه‌ بكه‌ى رۆژنامه‌ڤان و ل فه‌یسبۆك و تۆڕێن جڤاكى بارانا شیه‌ره‌ت و دیدێن فه‌لسه‌فى یێن خه‌لكى بناڤێ خوه‌ به‌ڵاڤ بكه‌ى، ل مه‌ ببارینى. خوه‌ ل مه‌ بكى سۆقراتێ زه‌مانى!
+ به‌لكو یێ مافدار بى، به‌س ئه‌ز نابینم ئه‌ڤ دیارده‌ شاش بت.
– باوه‌ربكه‌ یا بوویه‌ یا گێلما گاڤانى! ئها وێ رۆژا هه‌ كابرایه‌كى هنده‌ك ڕاستیا كه‌سه‌كى دیاركربوو، دیرۆكا وى دیاركربوو، مانێ جامێرى نوكه‌ یێ بوویه‌ به‌رپرس و به‌رویكێن وى دپڕن، ئه‌زمان حولى و داڤدۆز ژى دمشه‌نه‌، ڕاڤه‌ رویڤى ل نڤیسه‌رى ڕاكرن و تا گه‌فێن دادگه‌ه و نزا چ و چ لێ كرن.
+ ما بۆچى دێ مایتێكه‌ر بت، ئه‌گر لاپه‌رێن دیرۆكا گه‌له‌ك كه‌سێن ئه‌ڤرۆ د پۆستێن بلند دا ڤه‌ده‌ین، باوه‌ربكه‌ ئه‌م دێ ل (زڕكا) ئاكنجى بین!
– مه‌ بهندێ كر له‌و ئه‌م درێنگزین!
+ مامۆ یا ب زه‌حمه‌ته‌، به‌س ئه‌ز وه‌سا باشتر دبینم كو كایا كه‌ڤن بلا هه‌ر ل بێده‌رێ بمینت و جار جار بده‌ینه‌ باى!
– مانێ وى جامێرى هه‌ر ئه‌ڤه‌ یا گۆتى!
+ كا به‌رێ خوه‌ بده‌ ئه‌ڤێ لیستێ!
– ڤێجا لیستا چیه‌؟
+ لیستا مایتێكرنێن “نیڤ” بڤه‌ كو سه‌رێ ته‌ ژ ئاریشه‌ و هێرڤه‌ و وێڤه‌ یێ پاراستى بت.
(تاپۆكرنا عه‌ردێن ته‌جاوز ل ده‌ف به‌رپرسه‌كى)…
(ڕانه‌گرتنا ترۆمبێلێن جام ڕه‌ش ل ترافیكان و جهێن قه‌ده‌غه‌!)…
(مه‌لایه‌كێ یه‌كگرتوویا ئیسلامى ل ته‌وافا لاله‌شێ)…
(ئیسلاما سیاسى، ئیسلام بێ رووى كر ل جیهانێ كریه‌ دینێ تیرۆریستان)…
(داهاتێ پارتێن كوردستانێ)…
(قاسم سلێمانى هند ل سلێمانیێ و ل .. چ دگه‌ڕهت!)…
(ئه‌ڤ گره‌ و جهێن دلڤكه‌ر هه‌موو هاتنه‌ سیمه‌كرن، ژ نوكه‌ وێڤه‌ دێ نه‌ورۆزێن خوه‌ ل كیڤه‌ پیرۆز كه‌ین!)…
(جادێن كوردستانێ دێ كه‌نگى ته‌سه‌ لێ غه‌ریب بن!)…
(ئه‌ڤ هه‌موو رۆژێن بهێندانێ په‌رله‌مانته‌ر دزانن، چه‌ند زیانێن ئابوورى ل خزینا كوردستانێ دده‌ن!)…
(هه‌بوون و نه‌بوونا په‌رله‌مانێ كوردستانێ چ ل ره‌وشا برێڤه‌برنا ده‌ستهه‌ڵاتێ ل كوردستانێ ناگوهۆڕت!)…
(رژدیا ئوپۆزسیۆنا كوردستانێ ل سه‌ر په‌رته‌وازه‌یا كۆده‌نگیا كوردان ل به‌غدا!)…
(بایكۆت و خوه‌پیشاندن مافێ وه‌ڵاتیانه‌!)…
(ئێكگرتنا ده‌زگه‌هێن ئێمناهیێ و پێشمه‌رگه‌ى!)…
(خوه‌ لبه‌ر كۆچكێ باڵاڤیا ژى به‌حسێ داهاتێ ناڤخوه‌ و گۆمركا نه‌كه‌!)…
– پا ته‌ چ هێلا!
+ ژبه‌ر هه‌وا هه‌لبژارتنا، ئه‌گه‌ر …
– پا ب گومبه‌ندا شێخێ ل به‌غدایێ(عه‌بدالقادر گه‌یلانى) هندى خودانێ ڤان دیدا بى، دێ هه‌ر ناڤێ ته‌ عه‌لۆ بت و نابیه‌ عه‌لى ئاغا!
رۆژا 18.09.09
به‌رلین
هژمار 2428
رۆژا 2018.09.23

محه‌مه‌د چه‌لكى

ـ ئه‌رێ مامێ عه‌لۆ تو چاوا بانگه‌شا ڤێ هه‌وا هه‌لبژارتنا دبینى؟
+ ژ كیش لایڤه‌؟
ـ مه‌ دین نه‌كه‌، ما بانگه‌شا ژى لا هه‌نه‌!
+ ئه‌رێ ب سه‌رێ وى كه‌سى كه‌م، یێ هه‌تا ئه‌ڤرۆ ژ بلى سیبه‌را به‌رویكا خوه‌ و كه‌سوكارێن خوه‌ پێڤه‌تر هزرا خوه‌ د تشته‌كێ دن دا ناكه‌ت و دیوانا وى ژ یا ئه‌حمه‌دێ خانى گه‌رمتره‌، بانگه‌شێ وه‌سا لایه‌نێن هه‌ین هندى حه‌زا به‌رپرسێن گه‌نده‌ل بۆ په‌یداكرنا مافێ حه‌ویانێ(ئیقامێ) ل وه‌لاته‌كێ رۆژئاڤا.
ـ كا تۆ ب خێرا مرى و مایێن خوه‌، هنده‌ك لایه‌نێن بانگه‌شێ په‌ردێ ل سه‌ر نا هلینى!
+ هه‌ما ل لاپه‌رێن رۆژنامه‌، تیڤیان، تۆڕێن جڤاكى و جادا مێزه‌ بكه‌ دێ دیار بت كانێ چه‌ند لایه‌ن هه‌نه‌، باوه‌ربكه‌ جه ل جاده‌ و ئێخلا نه‌مایه‌ مرۆڤ لێ ده‌رباز بت. هه‌ما به‌حسێ مێهڤانداریا ژ نشكاڤه‌ هه‌ر نه‌كه‌!
ـ ڤێجا مێهڤانێ ژ نشكاڤه‌ كینه‌!
+ هه‌ما ل هه‌وێن به‌رى نوكه‌ سه‌حكه‌، كا پشتى ئه‌نجام ده‌ركه‌تین: ئه‌ندام په‌رله‌مانه‌كى هه‌ما بۆ رویمه‌تى ژى وه‌ك سوپاسیه‌ك بۆ ده‌نگده‌رێن خوه‌ ده‌رگه‌هێ ئێكى قۆتایه‌! یان هه‌ر چ نه‌بت شیڤخارنه‌ك دانایه‌، نه‌ خێر لێ د هه‌وا بانگه‌شێ دا هیزار و زه‌نگێن ده‌رگه‌ها ژ ترافیكێن سه‌ر جادان پتر بكاربوون. هه‌ما ته‌ هند دیت پێخته‌كا خودان ده‌رسۆكێن ستوو ل خودانا خواركرین ل به‌ر ده‌رگه‌هه‌كى قیتبوون و په‌یێڤین خۆش ژ ده‌ڤان دپه‌شن، ئه‌و كه‌سێن هه‌ما چ نه‌مایه‌ دێ ره‌نگ و رویبارێ وان ژ بیرا ته‌ چت، ته‌ هند دیت یێ ل به‌ر ده‌رگه‌هێ ته‌ قیتبووى.
ـ ئه‌گه‌ر نه‌هێن دێ گازندا كه‌ن و بهێن ژى هه‌ر دێ گازندا كه‌ن!
+ ئانكو تۆ دبێژى ئه‌ڤ خه‌لكه‌ یێ بێ نان و خوێ یه‌!
ـ پیچه‌كێ!
+ ب ئیجازا ته‌ و په‌رله‌مانته‌رێن ڤان خۆلێن چووین، ئه‌رێ چه‌ند ئاریشێن خه‌لكى هاتنه‌ چاره‌سه‌ركرن!
ـ ئێ .. ما بده‌ستێ جامێرایه‌!
+ مه‌ ئه‌و ژى قه‌یبله‌، پا بۆچى دێ زه‌حمه‌تێ كێشن و ئه‌ڤێ خه‌بسێ و مه‌سره‌فێ هه‌میێ كه‌ن، ئه‌گه‌ر هه‌ر چ پێ چێ نه‌بت مانه‌باشتره‌ ل …
ـ ژێ ب گه‌رهه‌، ئه‌گه‌ر ته‌ به‌حسێ مه‌سره‌فێن زێده‌كر، هینگێ شۆل دێ مه‌زن بت، دێ به‌رێ مه‌ ده‌یه‌ كه‌ڤرى!
+ كه‌ڤرێ چ خوه‌ پالێ گلێشبه‌ر(كه‌ناسى) یا تێ ئینایه‌ده‌ر كانێ خه‌لكێ مه‌ چ مه‌سره‌فه‌كا بێ ڕامان دكه‌ت.
ـ ماده‌م ئه‌م دوه‌تۆڤین پا بۆچى گازندان ژ حوكمه‌ت و په‌رله‌مانى دكه‌ین.
+ هه‌ما ژێ بگه‌رهه‌، ب سه‌رێ ته‌ كه‌م ئها ئه‌ڤه‌ ژ به‌ژنا مه‌ دهێن.

محه‌مه‌د چه‌لكى

(هۆكارێن خوه‌ پاراستنێ، ترسه‌) ئه‌ڤه‌ ده‌مه‌كه‌، مامێ عه‌لۆ خوه‌ ژ دیوان و كۆمبوونێن هه‌ڤال و هۆگرا دویر ڕادگرت. گه‌له‌ك حه‌ز ژ تنێبوونێ دكه‌ت. به‌رى نوكه‌ وه‌كو ئه‌وى ب خوه‌ دگۆت: “ل بازارى ژ ساڤارى مشه‌تربوو”! ئه‌ڤ دوورپه‌رێزا وى یا بوویه‌ سوحبه‌تا گه‌رما هه‌ڤاڵان، هه‌ر ئێك ب ڕه‌نگه‌كى شرۆڤه‌ دكه‌ت و سه‌ده‌مان دكه‌نه‌ گلواز. ته‌ڤ ژى ژ گۆتگۆتكاكان پێڤه‌تر تشته‌ك دن نینه‌. هه‌ما تۆ لبه‌ر چاڤێن خه‌لكى غه‌واره‌بووى، بلا خوه‌ بۆ ده‌مه‌كێ كن بت، ئه‌ڤجا لیستا ئانكۆیا ژ پرۆژه‌ و سۆزێن ده‌ستهه‌ڵاتێ و ئۆپۆزسیۆنێ به‌رى هه‌لبژارتنان، گه‌له‌ك درێژتره‌، بێ ڤه‌كۆلین و دویفچوون هه‌لبه‌ت گونه‌هبار یێ دیاره‌، ده‌ستهه‌ڵاته‌! ئه‌ڤجا خوه‌شمێرێن تۆڕێن جڤاكى و په‌هله‌وانێن سه‌ر ئه‌ركانێن تیڤییان دێ باسكان هه‌لده‌ن و ب تۆمتۆمكا ڤێ ده‌ستهه‌ڵاتا ده‌روجیران ته‌ڤ ژ مێشێن هنگڤینى بزه‌ڤه‌رتر كارى بۆ ژناڤبرنا وێ دكه‌ن، داده‌ن. ئه‌ڤ بێ به‌رپرسیاریا بێ ڕامان و هه‌لبه‌ستنا هه‌ر كاره‌كێ خراب بۆ لایه‌نێ نه‌مینا من هزردكه‌ت، مامێ عه‌لۆ گه‌له‌ك بێزار كریه‌، هه‌رچنده‌ به‌رده‌وام ڕه‌خنێ لڤان كارێن بێ وه‌ج دگرت، لێ كى ڤى زه‌مانى گوهدارییا شیره‌تێ دكه‌ت، ماشه‌الله‌ هه‌موو سۆقراتن. مامێ عه‌لۆ ژ زڤێریا ته‌مباڤا مالخولیان و هزركرنێ بۆ بێهندانێ، قه‌ستا چایخانا هنارۆكێ كر و ل جهه‌كى بتنێ رونشت، هێشتا جهێ خوه‌ گه‌رم نه‌كرى وى هند گوهلێبوو:
ها …. هه‌یڤا بن عه‌ورى ته‌ خوه‌ لكیڤه‌ هنداكریه‌؟
+ ل كلێسا خوه‌!
ئه‌و چ كلێسه‌ وه‌سا یا گه‌رم كو مامێ عه‌لۆى ژ جڤات و سوحبه‌تا ڤه‌ده‌ر دكه‌ت!
+ ئه‌رێ مامۆ ما ما غه‌واره‌بوونا من زیانه‌ك گه‌هاندیه‌ كه‌سه‌كى؟
نه‌خێر …
+ دێ پا ژ من بگه‌رهه‌ و هه‌ره‌ سه‌ر رێكا خوه‌.
ئه‌ڤه‌ ده‌مه‌كه‌ تۆ ژ پرسیاران دڕه‌ڤى! دبت سه‌ده‌مێ خوه‌ غه‌واره‌كرنا ته‌ “بهێجه‌تا سلكێ خوه‌ بگه‌هینى كۆتلكێ”؟
+ هوین دسه‌یرن.
ڤێجا بۆچ ئه‌م دسه‌یرین!
+ به‌رێ خوه‌ بدێ ب گۆتنا ته‌ ئه‌ز یێ غه‌واره‌مه‌ و جه‌نابێ ته‌ وه‌سا هه‌ستدكه‌ت كو سه‌ده‌مێن وێچه‌ندێ گه‌له‌كن و به‌لكو خوه‌ شرینكرن بت لبه‌ر ده‌ستهه‌ڵاتێ و دا پۆسته‌كێ بلند خه‌لاتى من بكه‌ت.
مانێ ده‌ستهه‌ڵاتا مه‌ یا هۆسایه‌ و هه‌رده‌ما ته‌ ڕه‌خنه‌ك ئاراسته‌كر، ل ده‌مه‌كێ كن دێ ته‌ بپۆسته‌كێ بلند خه‌لات كه‌ت.
+ تۆى سه‌هواى، ئه‌ڤه‌ تنێ ژ وان دگریت یێن جاشاتى و جاشقه‌له‌مى كرى.
ئانكو تۆ پشته‌ڤانیێ ل ڕه‌خنه‌گرێن ده‌ستهه‌ڵاتێ دكه‌ى.
+ ئه‌ڤجا زكۆ وه‌ره‌ نه‌په‌قه‌!
هه‌رده‌ما مرۆڤى ڕاستیا ته‌ گۆت، دێ زه‌ختا خوه‌ بلندكه‌ى!
+ ڕه‌خنه‌گرێن ده‌ستهه‌ڵاتێ پارێزڤانێن ڕاسته‌قینه‌ یێن كوردستانێ نه‌ و ناخازن ئه‌ڤ چرایێ مه‌ هه‌ى ببته‌ گۆرى به‌ریك و كورسیكێن به‌رپرسان و گه‌نده‌لكاران.
ما مه‌ ژ ده‌وله‌تسه‌رێ وان تۆڤه‌ كه‌سان چرایه‌ك مایه‌!
+ هۆكارێ خوه‌ پاراستنێ ترسه‌ و یێ نه‌ترست بزاڤا خوه‌ پاراستنێ ناكه‌ت.
ئێ باشبوو ته‌ ب خوه‌ ئه‌ڤه‌ گۆت.
+ من چ گۆت.
تۆ ژ ترسا خوه‌ ڤه‌دشێرى و خوه‌ غه‌واره‌ دكه‌ى!
+ وێ پرسیارێ ژ به‌رپرسێن مه‌ بكه‌!
2018.09.06 به‌رلین

محه‌مه‌د چه‌لكى
– ئه‌رێ مامێ عه‌لۆ بابێ ته‌ چ خاندیه‌؟
+ ل خاندنگه‌ها ژیانێ!
– ههههه نه‌یا بكه‌نییه‌!
+ ما چ كارێ ته‌ پێ هه‌یه‌، ئه‌هریمه‌نى ژمێژه‌یه‌ به‌لا خوه‌ ژێ ڤه‌كری!
– ئانكو ئه‌ز ژ ئه‌هریمه‌نى بێ وه‌جترم؟
+ هه‌رچه‌نده‌ مه‌ره‌ما من نه‌ ئه‌وبوو لێ ته‌ بۆ وى ئاقارى بر.
– ئانكو ئه‌ز یێ بێ وه‌جم!
+ ئه‌سته‌غفیره‌الله.
– بۆ من یا بوویه‌ مه‌ره‌ق ئه‌ز بزانم كانێ تۆ بۆچى پاشناڤى بكارنائینى! چونكو هه‌موو كه‌س حه‌ز ژ خوه‌ قۆڕه‌كرنێ دكه‌ن!
+ پاشناڤ خوه‌ ڤه‌شارتنه‌ ژ ڕاستیا خوه‌.
– تێنه‌گه‌هه‌شتم.
. ڤێجا وه‌ره‌ زكۆ نه‌په‌قه‌! ما ئه‌ز ب فه‌ره‌نسى دئاخڤم .
– نه‌خێر ، به‌س ئه‌ز دمه‌ره‌ما ته‌ نه‌گه‌هه‌شتم.
+ پاشناڤ ژ پیشێ مرۆڤ دكه‌ت، دهێته‌ نیاسین، به‌رهه‌مێ ڕه‌نجا وى كه‌سییه‌ و دبیته‌ جهێ شانازیێ، پاشناڤ خوه‌ دانه‌ نیاسینه‌ بۆ كه‌سێ بیانى و دخازت خوه‌ ژێ جودا بكه‌ت و تایبه‌تمه‌ندیێ بده‌ت خوه‌.
– پا ئه‌ڤا ل كوردستانێ دهێته‌ په‌یڕه‌وكرن هه‌ر وێ مه‌ره‌مێ دگه‌هینت!
+ به‌لكو.
– ئانكو تۆى نه‌ى پشت ڕاستى؟
+ مانێ من گۆت، پاشناڤ ڕه‌نگه‌ ڕه‌ڤینه‌ ژ ڕاستیا خوه‌.
– ئانكو ئه‌و كه‌سێ پاشناڤه‌كێ مه‌زن بناڤێ خوه‌ڤه‌ په‌رچوومه‌ بكه‌ت ، كه‌سه‌كى گه‌لحۆ و ته‌رلانه‌یه‌!
+ پا تۆ پرسیارێن بێ ڕامان دكه‌ى؟
– ما تشته‌كێ بڕامان د ڤى وه‌ڵاتی دا مایه‌!
+ ئه‌رێ.
– وه‌كو.
+ ئۆپۆزسیۆن بوون.
– تۆ و خودێ ئه‌ڤه‌ ئۆپۆزسیۆنه‌!
+ پا ئۆپۆزسیۆن ب شاخن مامۆ!
– ئه‌گه‌ر ئۆپۆزسیۆن تنێ دژاتیا حكومه‌تێ بت، ما كه‌نگى دبیته‌ ئۆپۆزسیۆن! ئه‌گه‌ر وه‌سا بیت ملله‌تێ كورد بارا پتر ئۆپۆزسیۆنه‌!
+ ئه‌ز نه‌ ئۆپۆزسیۆنێ ب ئۆپۆزسیۆن دزانم نه‌ ژى باوه‌ریێ ب ئۆپۆزسیۆن بوونا ڤى ملله‌تى دئینم.
– وه‌ح تۆ ته‌ڕ و هشكا بهه‌ڤڕا دسۆژى!
+ ل ڤى وه‌ڵاتى هه‌ر تشت بێ ڕامان بوویه‌ و ته‌ڤ لهه‌ڤیه‌كا مه‌ترسیدار وه‌ك په‌ژیكا ڤه‌گرا پایزێ د ناڤ ملله‌تى دا به‌ڵاڤبوویه‌، ژبه‌رهندێ هه‌ر تشتێ مه‌ خوه‌ دووباره‌ و سه‌دباره‌ دكه‌ت.
– چاره‌؟
+ ئه‌م فێرى پرسیارێن ب ڕامان ببین.
2018.09.01
به‌رلین

محمد جلكى
مامێ عه‌لۆ پشتى ژ خاندنا رۆژناما بێزار بووى، ده‌ست هاڤێت دویركارێ(ریمۆن كۆترۆلێ) و قه‌ناتێن تیله‌فزیۆنێ قۆلپاندن. رۆژناما و قه‌ناتێن تیڤییان قیما وى نه‌شكاند. ته‌ڤ بزمانه‌كێ زڤر په‌یڤان رێز دكه‌ن و ئه‌ڤ زمانه‌ به‌رى نوكه‌ یێ نامۆبوو، ڕاگه‌هاندنێ پیرۆزى هه‌بوو و رێز ل خانده‌ڤان و بینه‌رێن خوه‌ دگرتن لێ نوكه‌! نه‌رۆژنامه‌ڤان یێن بووینه‌ رۆژنامه‌ڤان و رۆژنامه‌ڤانێن قیمه‌تا په‌یڤێ و خانده‌ڤانى دزانن ل دوور ئاخینكان دادعویرن یان ژى ژ ترسا ڤى كه‌شێ تۆقاندنا ده‌ڤه‌ر گرتى، چولبڕ خوه‌ هلاندنه‌، مابۆچى نه‌، ئه‌رێ كه‌یسێ كیش رۆنامه‌ڤانێ بته‌مۆمژى هاتیه‌ تیرۆركرن، دیاربوویه‌! ئه‌رێ چه‌ند جارا رۆژنامه‌ڤان ژ هۆلان هاتنه‌ ده‌رێخستن و ئاڤرۆیا وان هاتیه‌ شكاندن، چونكو ئه‌و رۆژنامه‌ یان كه‌ناله‌ نه‌ لگه‌ل ئایدۆلۆجیا سه‌یدایه‌! هێ هێ ملله‌تێن دنیایێ لكیڤه‌نه‌ و ئه‌م لكیڤه‌نه‌، ملله‌تێن دن ڕاستیان ل هه‌ڤ ناڤه‌شێرن و ئه‌م به‌ڕێن ئه‌رتۆشیان بسه‌ر دادین، ئه‌ڤجا فس فس پاله‌وان یێن بووینه‌ گیڤارا و جه‌مه‌دانیێن خوه‌ خار دكه‌ن و شیره‌تێن نیشتمانپه‌روه‌ریێ دفڕۆشن، ئه‌و بخوه‌ بێى فیتا داگیركه‌رێن كوردستانێ لڤینه‌كێ ناكه‌ن. چ سه‌یرستانه‌ ئه‌ڤ وه‌ڵاته‌! دڤان هزرانداى نقۆبوو هه‌كو خاتوینێ بگزمى ژێ پرسیاركر:
– ئه‌رێ هه‌تا كه‌نگى دێ د خلوه‌تا بێ مفایا خوه‌ دا بى؟
+ دێ زِكۆ وه‌ره‌ نه‌په‌قه‌! مفا و بێ مفایا چ؟
– ئێ ب خودێ ته‌ ئه‌م كوشتین، كار و كه‌سپێن ته‌ یێن بووینه‌ خاندن و قۆلپاندنا كه‌نالێن تیڤیان یا ژ هه‌موویى نه‌خوه‌شتر ل مه‌ بهێرس دكه‌ڤى! ما ئه‌ڤه‌ حاله‌ دگه‌ل ته‌!
+ ببووره‌، بۆ ڤێ تۆ یا مافدارى.
– تۆ ژى وه‌كو حوكمه‌تا مه‌یى.
+ ئه‌و چه‌وا؟ یا ژ من ڤه‌ حوكمه‌تا مه‌ نه‌ وه‌كو چو حوكمه‌تایه‌!
– تۆى سه‌هۆى.
+ دێ ڤێجا وه‌ره‌ سه‌حكه‌ ڤێ خاتوینێ چ بۆ من یا دبیته‌ (ئه‌فڵاتۆن).
– ما فیلاتیه‌، كێ هندى حوكمه‌تا مه‌ سۆزدانه‌ و نه‌ ژدل سۆپاسیان پێشكێشى ملله‌تى دكه‌ت! به‌س چ هاتیه‌ شكه‌فا ملله‌تى؟ هه‌ر “ئه‌زمانه‌ و په‌حنكا ده‌ڤى”.
+ هه‌ما دو به‌ر و گۆمتله‌ك ڤێك كه‌فتن، دێ كه‌ینه‌ ستۆیێ حوكمه‌تێ!
– ژ كه‌ره‌ما خوه‌ ژ بابه‌تى نه‌ڕه‌ڤه‌!
+ بابه‌تێ چ!
– خوه‌ خشیم نه‌كه‌، بابه‌تێ هێرسبوونا ته‌ یا رۆژانه‌!
+ ڤان رۆژنامه‌ و تیڤى و كه‌نالێن ڕاگه‌هاندنێ زِكێ من په‌قاند.
– ئێێێێێێێێێێێێێێێێ گوهداریێ نه‌كه‌ داى ته‌نا بى و سه‌رێ مه‌ژى داى ته‌نا بت!
+ پا ل فه‌یسبۆك و تۆڕێن جڤاكى مێزه‌ بكه‌م!
– ئه‌رێ وه‌ڵا مانێ یا بوویه‌ مۆده‌، خوه‌ مه‌ڵایێ مزگه‌فتێ ل سه‌ر د ئاخڤت و گۆت:” مرۆڤ نوكه‌ نه‌شێت بێى تۆرێن جڤاكى هه‌دار بكه‌ت چونكو مرۆڤ دكارت دوورى چاڤێن ڕه‌قیبان په‌یاما خوه‌ بگه‌هینت”، ئه‌ڤجا ئه‌و چیه‌ ل وان ده‌ران دگوزه‌رت، نزانم، به‌س مه‌ڵاى وه‌گۆت!
+ ئانكو فه‌یسبۆك و … بووینه‌ به‌نیشتێ ده‌ڤێ مه‌ڵاى! ئها “ئه‌ڤ زه‌ره‌ ژ مه‌حفویرێ كێم بوو”!
– تۆ ژ مه‌ڵاى بگه‌رهه‌، كا چاره‌كێ ل خوه‌ بكه‌ و مه‌ ژ ڤێ هێرسبوونا خوه‌ یا بێ وه‌ج قۆرتال بكه‌!
+ چو گاڤا مۆچه‌ نه‌ما نۆچه‌ و كوردستان و به‌خته‌وه‌ریا مرڤێن وێ بوونه‌ ئامانجا لایه‌نێن سیاسى هینگێ دێ ئارام بم و هێرسا من نامینت.
– ئه‌ڤه‌ هیڤییه‌كا دویر ده‌رازه‌ و یا مه‌ ژبنى چوو!
+ ئه‌ز وه‌سا نابینم، رۆژگار هه‌رده‌م دئاڤسن ژ رویدانێن نه‌به‌رهزر.
به‌رلین

محمه‌د چه‌لكى/ به‌رلین
مامێ عه‌لۆ دبێژت: ئه‌گه‌ر ته‌ بڤێت سه‌رێ ته‌ یێ ته‌نابت و دوژمن و نه‌حه‌زا ل خوه‌ زێده‌ نه‌كه‌ى، فه‌ره‌ تۆ خوه‌ ژ ڤان تشتان بده‌ى دوور و هندى ژته‌ بهێت ل جه‌م وان كه‌سان لێڤا ژوورى ل یا ژێرى نه‌ده‌.
ـ ل ده‌ف به‌رپرسێن بلند پرسیار نه‌كه‌ و بێژى: بۆچى مۆچه‌، هه‌ر مایه‌ نۆچه‌!
ـ وه‌زیر، رێڤه‌به‌ر و رێڤه‌به‌رێن گشتى دێ كه‌نگى خانه‌نشین بى!
ـ ل جه‌م به‌رپرسێن گۆمركا.: ئه‌رێ رۆژانه‌ داهاتێ هه‌وه‌ چه‌نده‌ و …!
ـ ل با به‌رپرسێن ئاساییش و پاراستنێ به‌حسێ كریارێن تیرۆرێ ئه‌وێن ل كوردستانێ دهێنه‌ ئه‌نجامدان، دیتنا ته‌رمێن ژنان .. و فره‌حزبایه‌تیێ بكه‌ى!
ـ ل جه‌م به‌رپرسه‌كى بێژى: ئه‌رێ هه‌وه‌ چه‌ند خزمه‌ت هه‌یه‌ هه‌تا هوون بووینه‌ به‌رپرس، یان كه‌سكى هوون ل پشت په‌ردان بۆ ڤى پۆستى دیاركرنه‌ و چ په‌یوه‌ندى بشیان و باوه‌رنامانڤه‌ نینه‌! یان هه‌ما پرسیارێ ژێ بكه‌ى: ئه‌رێ مۆچێ ته‌ چه‌نده‌؟
ـ ل ده‌ف ئۆپۆزیسۆنێ قالا هه‌لبژارتنان بكه‌ى و بێژى: ئه‌نجام ددروستن!
ـ ل ده‌ف نۆژداران به‌حسێ چوونا ژ ده‌رڤه‌ یا نه‌خۆشان بكه‌ى!
ـ ل ده‌ف به‌رپرسێن دائیرا كه‌هره‌بێ پرسیار بكه‌ى: دێ كه‌نگى كه‌هره‌با مه‌ وه‌كو یا وه‌لاته‌كێ ئه‌فریقا لێهێت و ژ نڕه‌ نڕا ده‌نگێ موه‌لیدان رزگار بین!
ـ ل حزوورا دوكانداره‌كى بێژى: ئه‌ڤ دوكانا بره‌خ ته‌ ڤه‌ یا ئه‌رزانتره‌!
ـ پۆلیسێ هاتنووچوونێ: بۆچى هوین خودانێن ترۆمبێلێن جامڕه‌ش و بلند ل كۆنترۆڵا ناراوه‌ستین!
ـ ل حزوورا په‌رله‌مانته‌رێن كوردستانێ یێن ڤێ خۆلێ پرسیار بكه‌ى: ئه‌رێ ووژدانا هه‌وه‌ قه‌بوول دكه‌ت دڤێ قه‌یرانێ دا و هه‌ژارییا وه‌كو په‌ژیكه‌كێ ل ناڤ ملله‌تى به‌ڵاڤ هوین 48 ملیۆن دینارا وه‌ربگرن! هه‌رچه‌نده‌ باپراترا ڤێ خۆلێ هوون ل مال بوون، یان ل ده‌رڤه‌ى وه‌ڵاتى بوون!
ـ ل حزوورا به‌رپرسه‌كێ وه‌زاره‌تا ته‌ندروستیێ: ئه‌رێ ئه‌ڤه‌ چ ده‌رمانێن ئێكسپایه‌رن هنده‌ ده‌ست بسه‌ردا دهێته‌گرتن! دێ كه‌نگى ئه‌م بێ ترس ده‌رمانان ژ ده‌رمانخانان وه‌رگرین!
ـ ل حزوورا پارێزگه‌رێ دهۆكێ پرسیاربكه‌ى: ئه‌رێ فرۆكخانا دهۆكێ یا نیڤده‌وله‌تى چ لێهات!
ـ ل حزوورا به‌رپرسه‌كێ وه‌زاره‌تا گه‌شتوگۆزارێ: ئه‌رێ پرۆژێ چیایێ زاوا و … یێن مایین چ لێهاتن!
ـ ل حزوورا به‌رپرسه‌كێ وه‌زاره‌تا پێشمه‌رگه‌ى: ئه‌رێ چیرۆكا بندیوار و ئێكگرتنا هێزێن پێشمه‌رگه‌ى گه‌هشته‌ كیده‌رێ!
ـ ل حزوورا به‌رپرسه‌كێ وه‌زاره‌تا په‌روه‌ردێ: دێ كه‌نگى سیسته‌مه‌كێ جێگیرێ ئێكگرتى یێ خواندنێ ل ڤى وه‌ڵاتى هێته‌ په‌یڕه‌وكرن!
ـ ل حزوورا ئه‌ندامه‌كێ حزبه‌كا ئیسلامى بێژى: داعش نموونه‌یا حكۆمڕانیا ئیسلاما دروسته‌ و ژ فه‌رموودێن پێغمبه‌رى و قۆرئانا (مه‌دینێ) ده‌رنه‌كه‌فتیه‌!
ـ ژ خوه‌ ئه‌گه‌ر ته‌بڤێت ل ڤى وه‌ڵاتى نانه‌كێ ته‌نا بخۆى و سه‌رێ ته‌ چ جارا نه‌ئێشت، گوهبده‌ ڤێ گۆتنا مه‌زانان:” ئه‌زمانۆى بڕیبه‌، سه‌رۆى ڤه‌هوسى به‌”! و ئه‌گه‌ر نه‌ْ به‌رپێكێن خوه‌ په‌یت بكه‌ و به‌رپرسیارایا هه‌ر روودانه‌كێ تو بخوه‌یى و گازندا ژ تالع و به‌ختان نه‌كه‌! ئه‌ڤه‌ من یا خوه‌ گۆت و تۆ یێ ب كه‌یفا خوه‌یى.