(تال كو بێته‌ فورسه‌ت موهله‌ت ل نك حه‌رامه‌
من ئه‌مرێ نۆحی نینه‌، ساقی و وه‌ره‌ ب له‌ز خوه‌ش) مه‌لایێ جزیری.
په‌یداكرنا كۆده‌نگیێ ل سه‌ر پرسێن نه‌ته‌وه‌یی، جڤاكی، ئاڤه‌دانی، سیاسی و هه‌ر نه‌خشه‌ڕێیه‌كا په‌یوه‌ندیه‌كا ئێكسه‌ر ب جڤاكێ ڤه‌ هه‌ی، خه‌یاله‌ و دیده‌كا هه‌لبه‌ستڤانیه‌، چونكو ل ڤێره‌ به‌رژه‌وه‌ندی سه‌ری ژ هه‌ر تشتی دستینیت و ته‌رازیێ بۆ لایێ خوه‌ دادگێریت!! هه‌ر بزاڤه‌كا بهێته‌كرن بۆ په‌یداكرنا كۆده‌نگیێ تنێ ده‌م كوشتنه‌ و درێژكرنا ماوێ چاره‌سه‌رنه‌كرنا وێ كێشێ یه‌ یا بزاڤ بۆ دهێته‌كرن.
پرسا ڕیفراندۆمێ ئه‌وا ئه‌ڤرۆ ل هه‌رێما كوردستانێ سه‌ر ژ هه‌ر كێشه‌كا دن مینا مووچه‌، كێمیا كه‌هره‌با گشتی، خزمه‌تگۆزاری، كه‌رتێ ساخله‌میێ و كێشێن دن یێن جڤاكێ كوردستانێ ژ به‌ر دنالیت، ستاندیه‌ و سه‌ده‌مێن ڤێ سه‌ر ژێ ستاندنێ ددیارن، ئه‌و ژی سه‌ركرداتیا سیاسیا هه‌رێما كوردستانێ ب ڕژدی ل پرسا ڕیفراندۆم و ئاكامێن ژ وێ ڕیفراندۆمێ دهێنه‌ ڕۆژه‌ڤێ ده‌ركه‌فتیه‌ و ئاماده‌یه‌ بۆ هه‌ر ئانكۆیه‌كا نه‌خواستی. ئه‌ڤ ڕژد بوونه‌ هه‌لبه‌ت ژ ڤاله‌هیێ نه‌هاتیه‌ وه‌كو دژبه‌رێن ڕیفراندۆمێ دده‌نه‌ خۆیا كرن به‌لكو ڤه‌خاندنا ڕه‌وشا سیاسیا ده‌ڤه‌را ڕۆژهه‌لاتا ناڤین و وان گوهۆرینێن پشتی 11/9/2001 ب خوه‌ ڕا ئینایی مینا شه‌رێ ته‌رۆرێ، ئێكجه‌مسه‌ریا جیهانێ ب سه‌رۆكاتیا ئه‌مریكا، شۆره‌شا ئاگه‌هیان كو بوویه‌ سه‌ده‌ما ب گۆندبوونا جیهانێ و ئازادی و مافێ مرۆڤی و بنپێ كرنا ڤان هه‌ردو تێگه‌هان پیرۆزیا سنۆران نه‌هێلان. ب ڕه‌نگه‌ك گشتی ئه‌و سنۆرێن پۆلایینێن ده‌وله‌تان و ده‌ستبه‌رداییا ده‌وله‌تێ د كریارێن بنپێ كرنا ئازادی و مافێ مرۆڤی دا جیهان لێ خۆشنابیت و مرۆڤ دكارت ب هه‌ڤساربوونا كریارێن ده‌وله‌تان بناڤ بكه‌ت. ب هه‌ڤسار بوونا ده‌وله‌تان ب تایبه‌ت بۆ ڕه‌وشا كوردستانا داگیركری باشترین ده‌لیڤه‌یه‌ بۆ دیاركرنا چاره‌نڤیسێ خوه‌، چنكو هه‌ر سه‌رپێچیه‌كا ده‌وله‌ته‌كا داگیركه‌را كوردستانێ بكه‌ت ژ لایێ زلهێزێن جیهانی ده‌وله‌تێن ده‌مكۆرات ب هه‌روه‌ ناچیت و نموونێن مینا دانانا هێلا 36 ب دژی حوكمه‌تا سه‌ددامێ خوونرێژ و یا كۆسۆڤۆ و بۆسنا و هرسكۆڤینا.
ڕه‌وشا ئه‌ڤرۆ یا هه‌رێما كوردستانێ كو مینا ده‌وله‌ته‌كا دیفاكتۆ سه‌رده‌ری ل گه‌ل دهێته‌ كرن، ب تایبه‌ت پشتی حوكمه‌تا هه‌رێما كوردستانێ شیای خوه‌ دووری شه‌رێ تاییفی بگریت و ل هه‌مبه‌ری ته‌رۆرێ ژی خودان پێگه‌هه‌كێ باش و ڕۆله‌كێ دیار هه‌یی، ئانكو حوكمه‌تا هه‌رێما كوردستانێ خودان سه‌نگه‌كه‌ك ناڤده‌وله‌تیه‌ و هه‌ر بریاره‌كا بده‌ت ل داویێ جیهان دێ ڕێزێ لێ گریت. یا ژ هه‌موویێ گرنگتر یا كو باسكێ ئه‌نتی ڕێفراندۆمێ هزرا خوه‌ تێدا نه‌كری یان ژی ناخوازن هزرا خوه‌ تێدا بكه‌ننه‌ ڤه‌خاندشنا ڕه‌وشا هه‌رچار ده‌وله‌تێن داگیركه‌رێن كوردستانێیه‌ كو ئه‌ڤه‌ ب خوه‌ گونه‌هه‌كا سیاسیه‌ ئه‌و دكه‌ن و خه‌لكێ تێهنیێ دیتنا ده‌وله‌تا كوردستانێ پێ تێزێن بێ بنه‌ما سه‌ردا دبه‌ن.
ڕه‌وشا ده‌وله‌تێن داگیركه‌رێن كوردستانێ د خرابترین ڕه‌وش دا ده‌رباز دبن ب تایبه‌ت هه‌ردو ده‌وله‌تێن خوه‌ مینا زلهێزێن هه‌رێمی دده‌نه‌ ناسكرن توركیا و ئیران. مێزه‌ی ڕه‌وشا ده‌وله‌تا توركیا بكه‌ین: په‌یوه‌ندیێن وێ ل گه‌ل ئه‌مریكا و ئه‌لامنیا هه‌ما ئه‌وه‌ ناگه‌هت قۆتبوونێ و ل گه‌ل ئێكه‌تیا ئه‌ئورۆپی گه‌هشتنه‌ بن به‌ستێ و ژبلی تێكچوونا بارێ ناڤخوه‌یێ توركیا و گه‌هه‌شتیه‌ سه‌ر گڤاندا شه‌رێ ناڤخوه‌.
ئیران ژی د ڕه‌وشه‌كا خرابتر دا ده‌رباز دبیت و هه‌وجه‌ی هندێ ناكه‌ت مرۆڤ ل سه‌ر باخڤیت و ڕه‌وشا ئێراق و سووریێ دیاره‌ و هه‌ما ده‌وله‌ته‌ك نه‌مایه‌ ب ناڤێ ئێراق و سووریا. ئه‌ڤجا گه‌ف و نره‌ نرا توركیا، ئیران، ئێراق و سوریا هلوه‌شیای هه‌موو تڤه‌نگێن داوه‌تیا و هه‌ورا په‌ی گورگیه‌.
ئه‌ڤه‌ باشترین ده‌مه‌ كو داگیركه‌رێن كورستانێ نۆقمی كۆمه‌كا كێشانه‌ و نكارن ب ساناهی خوه‌ ژێ قۆرتال بكه‌ن و به‌رهه‌ڤیا هه‌لوومه‌رجێن سیاسیێن ناڤده‌وله‌تی بۆ هه‌ر بریاره‌كا كورد بده‌ن و دێ پشته‌ڤانیا ویستا كوردان بكه‌ن. گه‌له‌ك سه‌یره‌ كو به‌ره‌یێ ئه‌نتی ڕێفراندۆمێ ڤان هه‌لوومه‌رجان و ڕه‌وشا ناڤخوه‌یا داگیركه‌رێن كوردستانێ ل به‌ر چاڤ وه‌رناگرن و ل داویێ فه‌ره‌ بێژین كو ماف دهێنه‌ ستاندن نه‌ك به‌خشین.

د ڕۆژنامه‌گه‌ریا ئیراق و كوردستانێ دا گه‌له‌ك ل سه‌ر پۆست داعشێ هاتیه‌ نڤیسین و گه‌نگه‌شه‌ كرن، ئه‌ڤه‌ وێ چه‌ندێ دیار دكه‌ت كو داعش دێوه‌كێ ب مه‌ترسیه‌ و هزار ڕوویه‌ و مینا هه‌ربایێ ڕه‌نگێ خوه‌ دگوهۆرت!! یا سه‌یر ئه‌وه‌ هه‌ر لایه‌نه‌ك د گۆشه‌نیگایا به‌رژه‌وه‌ندیێن خوه‌ ڕا لێ مێزه‌ دكه‌ت كو ئه‌ڤه‌ ب خوه‌ كۆده‌نگیێ ل سه‌ر نه‌خشێ پۆست داعشێ په‌یدا ناكه‌ت و دوباره‌ زه‌مینه‌یێ خوه‌ش دكه‌ت بۆ وه‌رارا داعشێ و هشكنه‌كرنا زه‌مینه‌یا داعش هه‌بوونا خوه‌ ژێ وه‌ردگرت.
به‌ری هه‌ر تشتی داعش هه‌بوونا خوه‌ ژ پرتووكا پیرۆزا ئیسلامێ و فه‌رمۆده‌یێن پێخه‌مبه‌ری وه‌ردگرت هه‌لبه‌ت، ل گۆره‌ی خوه‌ندنا خوه‌ بۆ وان تێكستێن پیرۆز، ژ به‌ر هندێ داعش مینا هه‌ربایێ دكارت ته‌ڤی خه‌لكێ وه‌لاتی ببت و خوه‌ مینا وه‌لاتیه‌كی پیشا بده‌ت و ل ده‌مێ ڤیا ژی كریارێن ته‌رۆرستی ئه‌نجام بده‌ت ئانكو ب داوی بوونا داعشا نوكه‌ داعشه‌ك دن د ڕێ دایه‌. ڕاگه‌هاندنا ب داویبوونا داعشێ ژ لایێ سه‌رۆكوه‌زیرێن ئیراقێ ڤه‌ دووره‌ ژ ڕاستیێ و بازدانه‌ ل سه‌ر زه‌مینه‌یا داعشان په‌یدا دكه‌ت.
تێكدانا زه‌مینه‌یا داعش ژێ په‌یدا دبت ژ كارێن فه‌رێن ڤی سه‌رده‌میه‌ و لێ وه‌ك دیار چ پێنگاڤێن ژدل بۆ تێكدانا وێ زه‌مینه‌یێ نه‌هاتنه‌ هاڤێتن و ئه‌گه‌ر چ بن یا گرنگ نینه‌، لێ یا گرنگ بۆ هه‌رێما كوردستانێ كو یا پێنگاڤێن داویێ دهێڤێژت بۆ ڕیفراندۆم و ڕاگه‌هاندنا ده‌وله‌تا سه‌ربه‌خۆیا كوردستانێ زه‌مینه‌یا په‌یدابوونا داعشێ ل كوردستانێ نه‌هێلیت ب تایبه‌ت د پرسا ئاواران دا دڤێت گه‌له‌ك یا مجد بیت كو زووكا وان ئاواره‌یان بۆ جهێن ژێهاتی بڤه‌گه‌رینن، هه‌لبه‌ت برێكا ئون و حوكمه‌تا ئیراقێ، چنكو مانا ئاواران ل هه‌رێما كوردستانێ ژبلی بارگرانیا ئابووری و كێمكرنا هه‌لێن كاری بۆ بێكارێن هه‌رێما كوردستانێ گه‌فه‌كن ل سه‌ر ئاساییشا نه‌ته‌وی.
ده‌م هاتیه‌ ڤه‌كری ل سه‌ر هه‌موو كێشه‌یان ب ڕاشكاوی باخڤین دا مه‌ترسیان ل سه‌ر ڕێكا ڕیفراندۆم و سه‌ربه‌خۆیا كوردستانێ ناس بكه‌ین. ده‌ڤه‌رێن داعش لێبووی ده‌ستهه‌لاتدار هه‌ر ئه‌و ده‌ڤه‌رن یێن پتره‌ ژ50 سالان بانگه‌شا نه‌ته‌وه‌په‌رسیا ئه‌ره‌بی لێ دهێته‌ هه‌لدێران و پرانیا خه‌لكێ وێ ده‌ڤه‌رێ پشكداری د هه‌وێن ئه‌نفال و كاڤلكرنا كوردستانێ دا ڕۆل دیتیه‌ و چ تێگه‌هشتن بۆ مافێن مه‌ یێن نه‌ته‌وی نینن و ب هشكی دوژمناهیا خوه‌سته‌كێن مه‌ یێن نه‌ته‌وی دكه‌ن و چ دانپێنان پێ ناكه‌ن. ڕاسته‌ ژ ئه‌نجامێ شه‌رێ داعشێ ده‌ڤه‌رێن وان كاڤل بوونه‌ و زیانه‌كا ئێكجار مه‌زن گه‌هشتیه‌ وان، لێ سه‌رارای هندێ كو كوردستانێ سینگێ خوه‌ بۆ ڤه‌كر و حه‌واندن، ب جدی و سه‌رگه‌رمیه‌كا هشك هه‌چكو نه‌با دیتی نه‌باران ل دژی پرسا ڕیفراندۆمێ ب تایبه‌ت ده‌ڤه‌رێن ل به‌ر به‌زه‌یا ماددێ140 مایین، ده‌ردكه‌ڤن و بهێلێن سۆر ناڤ دكه‌ن!! ئانكو سه‌ربه‌خۆیا كوردستانێ ل جه‌م وان هێله‌كا سۆره‌ و نابیت ئیراق بهێته‌ پارچه‌كرن!!
زه‌مینه‌یا پۆست داعش نه‌ ژ لایێ حوكمه‌تا ئیراقێ ڤه‌ و نه‌ ژی ژ هێلا سوننێن ئیراقێ ڤه‌ چ سینارۆیێن هه‌لته‌كاندنا وێ زه‌مینه‌یێ نه‌هاتنه‌ كێشان و كار بۆ نه‌هاتیه‌ كرن هه‌لبه‌ت هه‌تا پێنگاڤێن رژد بۆ نه‌هێلانا وێ زه‌مینه‌یێ نه‌هێنا هاڤێتن، ته‌ناهی مه‌هاله‌ بهێته‌ شكه‌فا ئیراقیان؛ پرسیار ئه‌وه‌ بۆچی چ پێنگاڤ بۆ نه‌هێلانا وێ زه‌مینه‌یێ نه‌هاتنه‌ هاڤێتن؟، ب دیتنا من هه‌ردو باسكێن ئیسلاما شیعی و سوننی وێره‌كیا ده‌ستدان و ڤه‌خواندنه‌كا دی بۆ تێكستێن پیرۆزێن ئیسلامی نینن كو ل گۆره‌ی ڤی سه‌رده‌می سه‌ره‌ده‌ریێ ل گه‌ل بكه‌ن، چنكو هه‌ردو باسك ڕه‌وتیا هه‌بوونا خوه‌ ژ وان تێكستان وه‌ردگرن ژبلی چاره‌سه‌رنه‌كرنا پرسێن جڤاكی یێن گرنگێن مینا هه‌لێن كاری، نه‌هێلانا جوداهیێن تایفی و ب دامه‌زراو كرنا ده‌ستهه‌لاتێ و هتد.
چ ڕاستی بۆ بداویهاتنا داعشێ نینه‌ و نه‌ ل ده‌مێن پێشیا مه‌ بداوی دهێت، لێ بۆ كێشا كوردی خوه‌دی یه‌ك هه‌لوێستن و ل دژی پرسا ڕیفراندۆم و سه‌ربه‌خۆیا كوردستانێ ئێك ده‌نگن. خوه‌ بادان ژ پرسا ڕیفراندۆمێ و خه‌ون دیتن ب ئیراقه‌كا فیدرال و ده‌مۆكراتیك ڤه‌، تنێ ڕه‌ڤینه‌ ژ به‌رخۆردێن پشتی ڕیفراندۆمێ چنكو پێنه‌ڤێت دێ هه‌رێما كوردستانێ باجا سه‌ربه‌خۆیا ده‌ت و ما گه‌لۆ ماف دهێنه‌ ستاندن یان هه‌ما ب هه‌روه‌ دهێنه‌ وه‌رگرتن!! پۆست داعش ئانكو ئیلا ئه‌لوه‌را دوڕ، ئه‌رێ پشتی ڤان نه‌هامه‌تیان هه‌موویان گه‌لێ كورد یێ ئاماده‌یه‌ بچیته‌ڤه‌ دبن نیركێ ئیراقه‌كا پۆست داعش دا؟

درێژبوونا كێشا سووریا و تراژیدیا وێ بالا خوه‌ ل سه‌ر ته‌ڤ كێشێن جیهانێ دا شێشایه‌ و بوویه‌ كێشه‌كا جیهانی یا ژماره‌ ئێك. چاره‌سه‌ریا وێ و نه‌هێلانا سه‌ده‌مێن هلپژینا وێ ب ڤی ڕه‌نگێ دراماتیكی خالا هه‌موو دانووستاندن و كۆمبوونێن نهێنی یێن زلهێزێن جیهانیه‌.
ڤه‌خواندنا ڤان دانووستاندن و كۆمبوونێن نهێنی یێن زلهێزێن جیهانی ل سه‌ر كێشا سووریێ دوور ژ چاڤێن مه‌دیایێ وه‌ك وان كۆمبوونێن ل سه‌ر ده‌مێ شه‌رێ ئێكێ یێ جیهانێ(194-1918) دهاتنه‌ كرن ل سه‌ر لێكڤه‌كرنا ئاخا زه‌لامێ نه‌خوه‌ش( ئیمپراتۆریا ئۆسمانی) و ژ ئه‌نجامێ وان هه‌ڤدینن و كۆمبوونێن نهێنی په‌یمانناما سایكسـ پیكۆ هاته‌ ئه‌نجام. ب هه‌مان ڤه‌خاندن و لێكچوونه‌كا ڤان كۆمبوونێن نهێنی یێن زلهێزێن جیهانی یێ ئاماده‌كاریا نه‌خشه‌كی دكه‌ن كو ژ یێ سایكسـ پیكۆی جوداتره‌ چنكو به‌رهه‌مێ وێ په‌یماننامێ زۆرداریه‌كا سۆر و سۆر و بێ وێنه‌ ل گه‌له‌ك نه‌ته‌وه‌ و په‌یگرێن ئۆلێن دن یێن ل ڕۆژهه‌لاتا ناڤی دژین، هاته‌ كرن ژ وان نه‌ته‌وان كورد كو بۆ سه‌ده‌مێ پارچه‌كرنا كوردستانێ و بێبه‌هر كرنا نه‌ته‌وا كورد ژ ستاتۆیه‌كا سه‌ربه‌خوه‌، بۆ مڵه‌تێن نه‌ ئیسلام ژی ژ،بلی كوشتن و تالانكرنێ نه‌چار كرنا ئاخا باب و كالان بجه بهێلن و كۆچبه‌ری جیهانێ ببن و یێن مایین ژی دبێ به‌هرن ژ كێمترین مافێن مرۆڤی و تراژیدیا مه‌سیهی، ئێزدی، درۆز، قۆپتی و ئه‌له‌ویان دیاره‌ و هه‌وجه‌ی چ نموونان ناكه‌ت و ڕه‌وشا وان یا دیاره‌.
چوونا هنری كیسنجه‌ری بۆ موسكۆ ل 29.06.2017 و كۆمبوونا وی دگه‌ل سه‌رۆكێ ڕۆسیا ڤلادیمیر پۆتین دوور ژ پرۆتۆكۆلێن سیاسی و دیپلۆماتیك د ڤی ده‌می دا كو لایه‌نێن پشكدار د كۆربه‌قا سووریێ دا ژ كاس كه‌فتنه‌ و چ لایه‌نان شیانێن سه‌پاندنا ڕۆژه‌ڤا خوه‌ ب سه‌ر لایه‌نێن دن دا نینه‌ و شه‌ر هه‌ر یێ درێژ دبیت و چ ئاسۆیێن ل هه‌ڤهاتنێ دیار نینن و ئه‌و بزاڤێن دهێنه‌ كرن ژ لایێ ده‌وله‌تعێن هه‌رێمی ڤه‌ ب تایبه‌ت توركیا و ڕۆسیا بۆ ب داوی هاتنا كێشا سووریێ هه‌موو ب هه‌روه‌ چوون و دێ چن و دبێ نه‌جامن چنكو سه‌ده‌مێن بووینه‌ هلپژینا ڤێ كێشێ ل به‌ر چاڤ ناهێنه‌ گرتنب تایبه‌ت توركیا چنكو ژ وێ ئێكێ دترسیت كو ستاتۆیه‌كا كوردی وه‌كو یا باشورێ كوردستانێ ببیته‌ ده‌وله‌ته‌كا دیفاكتۆ و دوور نینه‌ دپاشه‌رۆژێدا هه‌ردو ده‌وله‌تێن دیفكاتۆ هه‌ڤ بگرن و ببیته‌ ده‌وله‌ته‌كا سه‌ربه‌خۆ، هنگی دێ باندۆره‌كا نه‌رێنی ل ئێكتیا ئاخا توركیا هێلیت.
ڕۆژ بۆ ڕه‌ئۆژێ ترسا توركی ژ ستاتۆیا كوردی یا زێده‌ دبیت ب تایبه‌ت پشتی باشورێ كوردستانێ پرسا ڕیفراندۆمێ كریه‌ ڕۆژه‌ڤ و مه‌ودایێ پاشگه‌زبوونێ نه‌هێلای و پشته‌ڤانیا ئه‌مریكا بۆ په‌یه‌دێ بڤێ هێزێ و چوونا كیسنجه‌ری بنهێنی و بێیكو ڕۆسیا یان ژی ئه‌مریكا ڤێ چه‌ندێ ئاشكه‌را بكه‌ت، دده‌ت خوویاكرن كو په‌یماننامه‌ك برێڤه‌یه‌ بناڤێ كیسنجه‌رـ پۆتین بۆ ڕۆژهه‌لاتا ناڤین ل شوونا په‌یمانناما سایكسـ پیكۆ.
به‌ری ب داوی بوونا كێشا سووریا و چه‌سپاندنا نه‌خشێ پشتی سایكسـ پیكۆ چنكو دیار نینه‌ كانێ ئه‌وه‌ نه‌خشه‌ دێ یێ چاوا بیت و كانێ دێ د به‌رژه‌وه‌ندا مڵه‌تێن ڕۆژهه‌لاتا ناڤین دابیت بۆ نه‌هێلانا وان تراژیدیێن ژ ئه‌نجامێ وێ پایمانناما نه‌گریس ب سه‌ر گه‌ل و نه‌توه‌ و ئۆلێن ده‌ڤه‌رێ دا هاتین یان ژی ل گۆر به‌رژه‌وه‌ندێن زلهێزان دابیت و ده‌ڤه‌ر به‌ر ب شه‌ره‌كێ دژوارتر ژ یێ نوكه‌ ڤه‌ بچیت.
ژبه‌ر هندێ هندی زووتره‌ هێزێن كوردستانیته‌ڤ شیانێن خوه‌ بكه‌ن ئێك و پشكداری ڕیفراندۆمێ ببن و ده‌وله‌تا دیفاكتۆی كوردستانێ بڤه‌گوهێزن بۆ ده‌وله‌تا سه‌ربه‌خۆیا كوردستانێ و باشو و ڕۆژاڤا هێزێن خوه‌ بكه‌ن ئێك لبن چ ئالا و ناڤ دا بیت نه‌گرنگه‌ یا گرنگ ده‌ڤه‌ر یا به‌ره‌ف گوهۆرینێن مه‌زن ڤه‌ دچیت و بهیڤیا زلهێزێن جیهانێ و ئه‌و نه‌خشێ د ڕێدا نه‌ دیاره‌ تشته‌ك بهێته‌ شكه‌فا كوردی، تنێ ب ئێك هه‌لوێستێ نیشتامانی ئه‌م دكارین بگه‌هینه‌ ئارمانجێن خوه‌ یێن نه‌ته‌وی.

ده‌ما مرۆڤ ل پرێزا ره‌وشا سیاسیا لایه‌نێن په‌یوه‌ندیدار ب سیاسه‌تكرنێ ڤه‌ ژ پارت و كۆمكێن سیاسه‌ت بۆ خوه‌ كریه‌ پیشه‌ ل عیراقێ یا ئه‌م كورد ب تنێ ناڤێ فیدرالیێ لێ زێده‌ دكه‌ین، مێزه‌ بكه‌ت دێ دلێ وى ژ سیاسه‌ت و هه‌ر په‌یڤه‌كا تامه‌كا سیاسه‌تێ ژێ بهێت، دێ ره‌ش بیت و دبیت نه‌كو پشتا خوه‌ بده‌ت سیاسه‌تێ به‌لكو هندى خولوله‌یا دنیایێ هه‌بیت بڕه‌ڤیت هندى هند سیاسه‌تكرن یا هه‌ر ماندى و له‌وتاندى. ئه‌گه‌ر ژ من باوه‌ر نه‌كه‌ن هه‌ما پیچه‌كێ ل داخۆیانیێن وان كه‌س و لایه‌نان بكه‌ن، كانێ چاوا دێ ئه‌مبۆڵانس جاددان خمخمینن و ب ده‌ستخستنا ته‌ختێن نه‌خۆشخانان دێ ب تاسێن تژى زێر ژى ل خه‌لكى بیته‌ هزره‌ت!! تو لایه‌نه‌كێ سیاسى ل ڤێ عێراقا ب ناڤ ده‌وله‌ت و ب ناڤ فیدڕاڵ نابینى ژ نه‌خۆشیا تاگیرپه‌ره‌ستیا (ته‌عه‌سوب) هشك بێ پشك بیت، ئه‌گه‌رێن ب كولتۆربوونا ڤێ نه‌خۆشیێ د ناڤ جڤاك ولایه‌نێن سیاسى دا نه‌ ئه‌ركێ ڤێ گۆتارێ یه‌ و دێ مه‌ره‌ما مه‌ ب ئاقاره‌كێ دندا به‌ت، لێ یا من پێ مه‌ره‌م ئه‌وه‌ بێژم سیاسه‌تكرن ل گه‌ل ڤان تۆڤه‌ كۆمك و لایه‌نان بۆ سه‌ركرداتیا سیاسیا كوردستانێ دێ چه‌ندا ب زه‌حمه‌ت بیت و چه‌ندا ب زه‌حمه‌ته‌!!
مخابنه‌ سه‌ره‌ڕاى وێ دیرۆكا پڕى سه‌ربۆڕا سه‌ركرداتیا سیاسیا كوردستانێ هه‌ى ل گه‌ل هه‌موو لایه‌نێن مژوولى سیاسه‌تێ ل عێراقێ. نیڤ په‌ژیكا عێراقیان لایه‌نێن مه‌ یێن كوردستانى ژى گرتنه‌ چنكو هه‌تا ئها ئه‌ڤرۆ ژى ل بن چه‌تره‌كا خوه‌سته‌كێن ته‌ڤ كوردستانى ل سه‌ر دكۆك(ده‌وله‌تا سه‌ربه‌خۆیه‌)، كۆم نه‌بوونه‌ و دپه‌لاته‌نه‌، ب هێجه‌تێن خوه‌ تو نه‌شێى شێته‌كى ل كوردستانێ پێ قایل بكه‌ى!!
هه‌رچه‌نده‌ تاگیرپه‌ره‌ستیا لایه‌نێن عێراقى و ناكۆكیێن ل ناڤبه‌را وان و ڤى شه‌رێ تائیفیێ دۆمدرێژێ دیرۆكى (هه‌ڤدژیا سوننه‌ ـ شیعه‌) نه‌بوویه‌ سه‌ده‌م كو ل سه‌ر داگیركه‌ریا كوردستانێ جوداهیه‌ك ب كه‌ڤیته‌ هه‌لویستێ وان نه‌خێر به‌لكو مینا هه‌ڤن و موویه‌ك دبه‌ر هه‌لویستێ ئێكگرتیێ وان ڕا ناچیت و ئه‌ڤه‌ بۆ سه‌ركرداتیا كوردستانى یا رۆهن و ئاشكه‌رایه‌ لێ بۆچى لایه‌نێن سیاسیێن كوردستانى خوه‌دى ئێك هه‌لویست نینن!! ئه‌ڤه‌ بۆ تاكێ كوردستانى یا بوویه‌ جهێ حێبه‌تى و گۆمانێ!! ب تایبه‌ت د ئه‌ڤى سه‌رده‌مى دا كو رۆژ بۆ رۆژێ پێگه‌هێ كوردان ل رۆژهه‌ڵاتا ناڤین یێ مكۆمتر و گرنگتر لێ دهێت. هه‌لبه‌ت مرۆڤ دكاریت بێژیت كابێ كوردان یێ هاتى و ل مه‌یدانێ یێ چكه‌ بۆ بریاردانێ چنكو ده‌وله‌تێن داگیركه‌رێن كوردستانێ ته‌ڤ د لیستا پشته‌ڤانیا تیرۆرێ دا ناڤنڤیسن.
هه‌ر ل پشتى 11.09.2001ێ و لێدانا تیرۆرستێن قاعیده‌ ل بورجێن نیۆیۆركێ، جهیان و زلهێزێن جیهانى ب سه‌رۆكاتیا ئه‌مریكا سه‌فه‌ربه‌رلك ل سه‌ر تیرۆرێ و پشته‌ڤانێن وێ ڕاكرنه‌ و جهێ كوردان ژى د ڤى شه‌رى دا یێ دیاره‌ و ناڤ و بانگێن پێشمه‌رگێن كوردستانێ ل مه‌یدانێن شه‌رێ تیرۆرستێن داعش چ ل باشوورێ كوردستانێ بیت یان ژى ل رۆژئاڤایێ كوردستانێ بیت، په‌ڵاته‌ى جیهانێ بوویه‌ و بوویه‌ سمبۆلا ئازادیێ و داعش و تیرۆر به‌زێن.
ب هه‌موو پیڤه‌رێن سیاسى، جڤاكى، كولتۆرى و ناڤنه‌ته‌وى وه‌رزێ سه‌ربه‌خۆیا كوردستانێ ب رێڤه‌یه‌ و ته‌په‌ یا د یاریگه‌ها لایه‌نێن كوردستانى دا چ سنگرێن مه‌زن كو ببنه‌ رێگر د گۆلكرنا كوردان دا نه‌میانه‌ چنكو داگیركه‌رێن كوردستانێ(توركیا، ئیران، عێراق و سوریا) هه‌ر ئێك ب ئاریشێن خوه‌ڤه‌ یێ مژووله‌ سوریا و عێراق هه‌ر ب ناڤ ماینه‌ ده‌وله‌ت و ئیران و توركیا ژى شیانێن دژاتیا گۆڵا كوردان نه‌مایه‌ ژبلى كو باشوورێ كوردستانێ ئه‌ڤه‌ ژ مێژه‌یه‌ بوویه‌ ده‌وله‌ته‌ك دیفاكتۆ و جیهان ل به‌ندا په‌نالًتیا كوردانه‌.
وه‌رزێ ده‌وله‌تا سه‌ربه‌خۆیا كوردستانێ ب رێڤه‌یه‌ لێ به‌رى ئه‌ڤ وه‌رزه‌ بهێت كوردستانى ل به‌ندا وه‌رزێ ئێكگرتنا لایه‌نێن سیاسینه‌ و هه‌ر ئه‌ڤیه‌ دێ وه‌رزێ سه‌ربه‌خۆیا كوردستانێ كه‌ته‌ راستى و بخه‌مل ئێخیت.

د دیرۆكا هه‌ر ملله‌ته‌كی دا هنده‌ك رۆژ د تایبه‌تن و خودان جهه‌ك بالكێش و دیارن به‌لكو هه‌ما دبن پشكه‌ك ژ پێناسه‌ و پێكهاته‌یا وی یا كه‌سی و هزری ژبلی دبن خالا كۆده‌نگیێ و ملله‌تی ب هه‌ڤرا دكه‌ته‌ دیواره‌كێ تێكبه‌ستی و چ تشت نكارن وێ تێكبه‌ستیێ خۆله‌ل بكه‌ن یان ژی ده‌رزه‌كێ ل خۆرستیا وێ تێكبه‌ستیێ په‌یدا بكه‌تن. ل جه‌م ملله‌تێ مه‌ ژی چه‌ند رۆژ هه‌نه‌ كو ب به‌ژن و بالا خوه‌ دگه‌هنه‌ به‌ژنێن چیایێن كوردستانێ و چیا ب خوه‌ ژی ب هاتنا ناڤێن وان رۆژان، به‌ژنا خوه‌ دچه‌مینن و كۆلاڤێ رێزێ بۆ خار دكه‌ن. هه‌لبه‌ت رۆژێن هۆسا گه‌شدار و ب واته‌ دمه‌شنه‌ چنكو دیرۆكا مه‌ ئه‌وه‌ ژ رۆژا باپیرێن مه‌ یێن میدی(ئیمپراتۆریا ماد) ل هه‌ڤ نه‌كری و جله‌وێ سه‌ركرداتیێ راده‌ستی خارزایێن خوه‌ یێن فارس كری و هه‌یا ئه‌ڤرۆ، به‌رخوه‌دان و خه‌باته‌ ل هه‌مبه‌ر بێ دادیێ و داگیركاریێ ژبه‌ر هندێ دیرۆكا مه‌ یا پره‌ ژ رۆژێن گه‌شدار كو مرۆڤێ كورد ب قه‌هره‌مانانه‌ ل هه‌مبه‌ر داگیركاری و زۆركاران ژیانا خوه‌ كریه‌ گۆری ملله‌تێ خوه‌، د ڤی بیاڤی دا فلۆكلۆرێ كوردی یێ مشته‌ و سه‌رهاتیێن وان قه‌هره‌مانان ب هه‌ستێن دلشه‌واتی تۆماركرنه‌ ژ وێ لیستا واته‌دار و درێژ هه‌ما تنه‌ دێ دو نمۆنان ژێ گرم چنكو هه‌ردو رۆژان په‌یوه‌ندیكا تێكبه‌ستی پێكڤه‌ هه‌یه‌ و ژ هه‌ڤ ناهێن جوداكرن، هه‌ردو رۆژ ئه‌ڤه‌نه‌:
1- رۆژا ناڤ ل قه‌هره‌مانێن بۆ ئازادیا كوردستانێ گیانێ خوه‌ دكه‌ن قۆربان(پێشمه‌رگه‌) هاتیه‌ كرن، باوه‌ر ناكه‌م ئه‌وه‌ ژ وێ رۆژێ هه‌تا ئه‌ڤرۆ و هندی مرۆڤێ كوردستانی ل سه‌ر روویێ ئه‌ردی هه‌بیت، په‌یڤه‌ك د فه‌رهه‌نگا زمانێ كوردی دا هه‌بیت مینا په‌یڤا پێشمه‌رگه‌ ل به‌ر دلان ب رێزتر و ئه‌ڤینتر هه‌بیت; خوه‌شبه‌ختانه‌ پیرۆزیا ناڤێ پێشمه‌رگه‌ی نوكه‌ ل جیهانێ بوویه‌ سه‌مبۆلا مێرچاكی و تیرۆست به‌زێن ئانكو بوویه‌ مرۆڤه‌ك جیهانی و رێز په‌یدا كریه‌.
2- 2- 26 گولانێ یه‌ ئه‌و رۆژا پێشمه‌رگێن كوردستانێ پێ ل ئه‌نیا داگیركه‌رێن كوردستانێ دانای و یه‌كه‌م گوله‌ به‌ردایه‌ نه‌خشێ 6.03.1975ێ هه‌ره‌س ب هه‌ره‌سێ ئینای. 26ی گولانێ و پێشمه‌رگه‌ دو په‌یڤێن ب هه‌ڤرا تێكبه‌ستینه‌ و مرۆڤ نكارت ناڤێ 26ی گولانێ بینیت ئه‌گه‌ر ئێكسه‌ر ناڤێ پێشمه‌رگه‌ی و خه‌بات و جانگۆریا وان نه‌هێته‌ بیرا مرۆڤی.
پیرۆزه‌ ئه‌و رۆژ یا قه‌هره‌مانێن كورد ب په‌یڤا پێشمه‌رگه‌ هاتینه‌ ناڤكرن و پیرۆز ئه‌ 26ی گولانێ و ته‌ڤ قه‌هره‌مانێن وێ و پێشمه‌رگێن وێ یێن پێ ل نه‌خشێ داگیركه‌ران دانای و گوله‌یێن به‌رخوه‌دانێ په‌قندینه‌ سینگێ داگیركه‌رێن كوردستانێ و هیڤی ل دلێن چرمسی گه‌شكرین، ترس و ساویر ل دلێ داگیركه‌ران و نۆكه‌رێن وێ چاندین. ئه‌‌ڤرۆ ب سایا وێ قه‌هره‌مانیا پێشمه‌رگێن كوردستانێ و ب تایبه‌ت یێن 26ی گولانێ كوردستان ل سه‌ر نه‌خشێ جیهانێ خودان ناڤ و گرانیه‌ك مه‌زنه‌ و بوویه‌ ده‌وله‌ته‌ك دیفاكۆ و هه‌ر كه‌سێ دو پێناسێن سیاسه‌تێ بزانیت، دزانیت كو ده‌وله‌تا دیفاكۆ دانپێنانه‌ك ناڤنه‌ته‌ویه‌ ب سه‌رخوه‌به‌خوونا كوردستانێ.
د ئه‌ڤێ رۆژا پیرۆز دا 26ی گولانێ ئه‌ز به‌ژنا خوه‌ ل به‌ر ته‌ڤ پێشمه‌رگێن كوردستانێ و كه‌سێن جهێ خوه‌ د ناڤ رێزێن 26ی گولانێ دا كری دچه‌مینم، هوون هه‌بوونا مه‌نه‌ و ب هه‌بوونا هه‌وه‌ ئه‌م دپاراستینه‌ و ئالایا ره‌نگین ل گوپیتكا چیایێن مه‌ دێ مینیت پێلدار و بلند.. بژیت پێشمه‌رگه‌. هه‌ر گه‌شاوه‌ بیت ئالایێ 26ی گولانێ بلند كری.
26.05.2017 دهۆك

ل بن عه‌سمانى هه‌ر تشت دكاریت خوه‌ ده‌هباره‌ بكه‌ت و چه‌ند سه‌ربۆر هه‌بن، هه‌ر ژ خالا سفرێ دهێته‌ڤه‌ ده‌ستپێكرن. ئه‌گه‌ر هوون ژ من باوه‌ر نه‌كه‌ن گوهداریا سه‌رۆك و مه‌رۆكێن ڤێ رۆژهه‌ڵاتا ناڤین و جیهانا كو بۆ رێزگرتن دبێژنێ: جیهانا سێیه‌مین دا هوون حنێریا سه‌دباره‌ بوونێ ژ ده‌ڤێ موباره‌كێ وان سه‌رۆك و مه‌رۆكان ببهیزن! ببوورن نه‌ تنێ سه‌رۆك و مه‌رۆكان به‌لكو هه‌ر كه‌سێ دو زه‌گزه‌گه‌ ل په‌ى بچن! بێى كو بایه‌كێ نه‌رمێ شه‌رمێ روویێ وان بگه‌زیت، هه‌وجه‌ى چ نموونا ناكه‌ت لێ هه‌ما بۆ دلێ هه‌وه‌ دێ چه‌نده‌كا رێزكه‌م دا هوون نه‌بێژن ئه‌ڤ مرۆڤه‌ بادل هه‌وا دئاخڤیت:
ئه‌ز ژ ناڤمالا مه‌ ده‌ستپێ ناكه‌م، بلا ئه‌و بۆ داویێ بیت چنكو یێن مه‌ هه‌موو پیڤه‌ر به‌زاندنه‌ و دلێ مرۆڤێ كوردستانى یێ تژى كرى.
1ـ هێشتا زنگێنا كۆتنێن ئاغایێ كۆچكا سپى ژ گوهێن ئه‌ردۆغانى نه‌ده‌ركه‌فتین مانێ هه‌وه‌ جامێر دیت ده‌ما ژ ده‌رگه‌هێ كۆچكا سپى ده‌ركه‌تى(یا ڕاست ده‌رێخستى) دا بێژى “كه‌رێ ژ ناڤ ماشا كریه‌ ده‌رێ” یه‌، د سه‌ر ڤێ سووشكاندنێ ڕا وه‌زیرێ ده‌رڤه‌ یێ توركیا داخوازا لادانا مارك گوركى ژ ئاغایێ سه‌رۆكێ وى ڤه‌چغاندى كر چنكو مارك گۆرك پشته‌ڤانیا تیرۆرێ دكه‌ت، هه‌لبه‌ت ل گۆر پیڤه‌رێن توركیا.
2ـ هه‌لبژارتنێن ئیرانێ و هه‌رزێلیا بریارێن وێ و هه‌چیێ نه‌ شاره‌زاى ڤێ رژێما ژ هه‌موو پره‌نسیبێن مرۆڤى و دیمۆكراتیێ دوور و رۆژ ناچن پێخته‌كا ئازادیخاز و دیمۆكراتخازن راپێچى زیندان و ژوورێن سێداره‌دانێ نه‌كه‌ت. هه‌لبژارتنێن ئیرانێ یاریه‌كا بێ شه‌رم و بێتامه‌ چنكو كى بهێته‌ سه‌ر ته‌ختێ ده‌ستهه‌ڵاتێ نه‌شێت بیێ فیتا ئیمام خامه‌نائى بچیته‌ دژوورا خوه‌ یا نڤستنێڤه‌ چ جاى چاكسازى و رێزگرتنا مافێن مرۆڤى و دڤێت جیهان ژى باوه‌ریێ ب دیمۆكراتیا كۆمارا ئاخۆندا بكه‌ت.
3ـ رۆسیا و سوریا ژ لێدانا هێزێن هه‌ڤپه‌یمانیا دژى داعشێ ل له‌شكه‌رێ سوریێ و چه‌ته‌یێن وێ دنیگه‌رانن، دیاره‌ نه‌خوه‌شیا ژبیرچوونێ هه‌ردوو ده‌وله‌ت گرتنه‌ ما به‌رى تره‌مپ بچیته‌ د كۆشكا سپى دا نه‌گۆتبوو: هه‌ر كه‌سێ نه‌قۆلیا بكه‌ت و ببیته‌ گه‌ف ل سه‌ر به‌رژه‌وه‌ندیێن بلندێن ئه‌مریكا، دێ سنۆره‌كى بۆ وان نه‌قۆلیان ده‌ینیت، ئها ئه‌ڤه‌ جامێرى گۆتنا خوه‌ بجه ئینا نه‌ب تنێ ل سووریا به‌لكو ل سه‌رانسه‌رى جیهانێ جامێر تڕانا نزانیت، به‌رژه‌وه‌ندى به‌رژه‌وه‌ندیه‌ و ب ده‌نگێ بلند یێ دبێژیت: نه‌رم و ڤچیا ده‌ورێ سیاسه‌تا مسته‌ر ئۆباماى نه‌ما و خوه‌ دگه‌ل ڕه‌وتێ سیاسه‌تا نووى بره‌همینن ئه‌گه‌ر یا هه‌وه‌ ژبنى چوو.
4 ـ ئه‌ڤه‌ تره‌مپ هاتیه‌ د كۆچكا سپى دا هه‌موو ده‌نگێن زڕت دبه‌ردان و دگۆتن نزا دێ چ و چ ل ئه‌مریكا و رۆژئاڤا كه‌ین ب تایبه‌ت ل عێراق و ئیرانێ (هه‌موو رێكخستنێن ل بازنا وێ دزڤڕن)، زڕتێن وان یێن كرینه‌ فس و نوكه‌ یێن بووینه‌ خودان پرۆژێن چاكسازیێ و ره‌وتێ سه‌در وه‌ك نموونه‌.
5 ـ ره‌وشا ناڤ مالا مه‌ هوون یێ دبینن و رۆژ بۆ رۆژێ هێجه‌ت دزۆرن دا هه‌ر سنگه‌پێ ل جهێ خوه‌ بمینیت و هندى كۆمبوون بهێنه‌ كرن، ژڤانه‌كێ نوو بۆ كۆمبوونه‌كا دى دێ هێته‌ دیاركرن ئانكو كۆمبوون تنێ بۆ ده‌م كوشتنێیه‌ دا ره‌وش هه‌ر مینا خوه‌ بمینیت لێ هه‌ما باشه‌ گوهداریا ئاغایێ كۆچكا سپى دكه‌ن، ئه‌گه‌ر نه‌ یا مه‌ دا ژبنى چیت.
به‌رده‌وامیا ڤێ ره‌وشێ دێ زیانه‌كا مه‌زن گه‌هینته‌ كێشا كوردى و پرسا ریفراندۆم و سه‌رخوه‌بوونێ و وێ باوه‌رێ ل جه‌م تاكێ كوردستانێ دروست دكه‌ت كو مه‌ره‌مه‌كا ڤه‌شارتى ل پشت ڤێ ل هه‌ڤ نه‌كرنێ هه‌یه‌ نه‌خاسمه‌ پشتى به‌ڵاڤ بوونا ده‌نگۆیا كو به‌رپرسه‌كێ سلێمانیێ ل ئه‌لمانیا 360 شۆڤه‌ ئاڤكرنه‌. ئه‌ڤ ده‌نگۆیه‌ ڕاست بیت یان نه‌ چ ژ كێشێ ناگوهۆڕیت به‌لكو وێ ڕامانێ دگه‌هینیت، به‌رده‌وامیا ڤێ ڕه‌وشێ د به‌رژه‌وه‌ندیا هنده‌ك كه‌سێن حه‌فك ستوور دایه‌ و بلا وه‌ڵاتى و دۆزا پیرۆزا كوردى بچن ئێك ئاڤا مه‌زن!! مانێ هوون ژ من باشتر دزانن كو ل نابه‌ینا حه‌فك ستوورێن كوردستانێ موویه‌ك دبه‌را ناچیت.

به‌رى ئه‌ردۆغان رێكا كۆچكا سپى بگریت دا د گه‌ل ئاغایێ نوو یێ وێ ته‌ڤ كێشێن بووینه‌ سه‌ده‌ما سه‌ر ئێشیا توركیا و به‌ركنار بوونا توركیا ل كێشێن ده‌ڤه‌رێ گه‌نگه‌شه‌ بكه‌ت. ته‌ڤایا ده‌زگه‌هێن ڕاگه‌هندنا توركى و یێن ل چه‌رخا سیاسه‌تا توركیا دزڤڕن، ئه‌ڤ دیداره‌ ب دیرۆكى دهه‌ژمارتن و قه‌وانێ به‌رێ نووژه‌نكرن كو توركیا و ئه‌مریكا هه‌ڤالبه‌ندێن دیرۆكینه‌ و نابیت ب چ ڕه‌نگا ئه‌ڤ هه‌ڤالبه‌ندیه‌ بهێته‌ جه‌مداندن و نڤاندن!!
ڤه‌دانا قه‌وانێ په‌یوه‌ندیێن كه‌ڤن ل ده‌مه‌كیه‌ كو رۆژئاڤا و ب تایبه‌ت ئه‌مریكا ژ سیاسه‌تا ئه‌رۆدغانى دنیگه‌رانن. سه‌ده‌مێن نیگه‌رانیێ ژى ددیارن ل سه‌ر كێشا سووریا و پشته‌ڤانیا توركیا بۆ گرۆپێن تیرۆرست و تۆنده‌ڕه‌وێن ئیسلامى ل سه‌رانسه‌رى جیهانێ سه‌ره‌ڕاى ڤێ یه‌كێ ژى پشتدانا وى بۆ هیمێن دیمۆكراتیێ و هه‌ڤبه‌ندی گرێدان ل گه‌ل رۆسیا!! لێ ڕاگه‌هاندنا ئه‌ردۆغانى خوه‌ دسه‌ڕا باز دده‌ن ناخوازن په‌رده‌ ل سه‌ر بهێته‌ ڕاكرن چنكو هینگى دێ روویێ توركیا دیار بیت بتایبه‌ت پشتى سولتان ئه‌ردۆغانى كورسیێ فه‌روه‌ریێ ل توركیا بده‌ستڤه‌ ئیناى، دخوازیت رۆله‌كێ هه‌رێمى بگێریت و چاوا و كۆسا نه‌ گرنگه‌ یا گرنگ ئه‌وه‌ كو ئه‌ڤ رۆله‌ پێ بهێته‌ سپارتن.
د نوكه‌ دا په‌یوه‌ندیێن توركیا ل گه‌ل ته‌ڤ زلهێزێن جیهانێ رۆسیا ـ ئه‌مریكا و هه‌ڤالبه‌ندێن ناتۆ نه‌ ل ئاستێ خوه‌سته‌كا ئه‌ردۆغانیه‌ به‌لكو د ئاستێ هه‌رى نزمدایه‌، ڕاسته‌ ل گه‌ل رۆسیا باشترن لێ توركیا دخوازیت هه‌ر د به‌ره‌یێ رۆژئاڤا دا جهێ خوه‌ بگریت و چوونا وێ بۆ همبێزا رۆسیا تنێ دا رۆژئاڤاى نه‌چار بكه‌ت، خوه‌سته‌كێن توركیا ل به‌ر چاڤ بهێنه‌ وه‌رگراتن. خوه‌سته‌كێن توركیا ددیارن دژاتیا هه‌ر ستاتۆیه‌كا كوردیه‌ و خوه‌ ئه‌و ستاتۆ (ل ئه‌مریكا لاتین و ئه‌فریقا بیت).
دۆزا كوردى ل هه‌رچار پارچێن كوردستانێ توركیا ب كێشا خوه‌ دزانیت و هه‌رشه‌ ل سه‌ر ئاسایشا خوه‌ یا نه‌ته‌وى دزانیت و ل سه‌ر ڤى تێگه‌هى ل سه‌ر ئاستێ ناڤنه‌ته‌وى سیاسه‌تێ دكه‌ت. هار و حێچبوونا توركیا ل ڤى ده‌مى سه‌ده‌مێن پێشكه‌فتنا دۆزا كوردیه‌ ب تایبه‌ت ل باشور كو بوویه‌ ده‌وله‌ته‌ك دیفاكتۆ و ده‌وله‌تبوونا وێ ب هه‌موو پیڤه‌ران نێزیكه‌ چنكو ده‌وله‌تێن دیفاكتۆ دانپێنه‌كا ناڤنه‌ته‌وى په‌یدا دكه‌ن و تنێ ل به‌ندا بریارا داویا سه‌ركردێن خوه‌ دمینیت و سه‌ركرداتیا باشور ب تایبه‌ت سه‌رۆكێ هه‌رێمێ رێزدار مه‌سعود بارزانى بریاردانه‌ و یێ به‌رهه‌ڤیێن داویێ دكه‌ن. ل رۆژئاڤا ژى ب هه‌مان شێوه‌ سیاسه‌تا كانتۆنا (دیتنێن مه‌ ل سه‌ر چبن چ ژ كیشێ ناهێته‌ گوهۆڕین) شیایه‌ جهێ خوه‌ بگریت و ئه‌مریكا ئێكسه‌ر هاتیه‌ سه‌ر هێلێ و پێدانا چه‌كى هۆسا ئێكسه‌ر دانپێنانه‌ك راسته‌وخۆیه‌، چنكو ئه‌مریكا ئه‌ڤه‌ جارا ئێكێیه‌ ئێكسه‌ر چه‌كى بده‌ته‌ بزاڤه‌كا نه‌ته‌وى.
پێشكه‌فتنا دۆزا كوردى و په‌یداكرنا ڤان هه‌موو دۆست و هه‌ڤاڵان ل قادا سیاسه‌تا ناڤنه‌ته‌وى هه‌موو ڤه‌دگه‌ڕت بۆ هندێ كو كورد شیانه‌ مفاى ژ سیسته‌مێ گڵۆبالیزمێ و شه‌رێ تیرۆرێ بگرن و چه‌مبه‌را پۆڵاینا داگیركه‌رێن كوردستانێ بشكێنن و ته‌ڤى سیاسه‌تا دژى تیرۆر و تۆندڕه‌ویێ ببن و ل ناڤخوه‌ ژى په‌یاده‌كرنا سیاسه‌تا پێكڤه‌ژیانێ و رێزگرتن ل باوه‌رێن جودا وه‌كو مه‌سیحى، ئێزدى و بێ دینى كو ئه‌ڤه‌ ل وه‌ڵاتێن ئیسلام لێ ڕه‌ها تشته‌ك نوویه‌ و به‌رى نوكه‌ ل چ وه‌ڵاتێن ئیسلامى و ل رۆژهه‌ڵاتا ناڤین ئه‌ڤه‌ نه‌كریه‌ و ژبه‌ر هندێ بانگخوازێن ئیسلاما تۆندره‌و هێرشى سه‌ر هه‌رێما كوردستانێ و رۆژئاڤا دكه‌ن. ب شێوه‌یه‌ك گشتى دۆزا كوردى دانپێنانه‌ك ناڤنه‌ته‌وى په‌یداكریه‌، ژ ئه‌نجامێ ب داویبوونا شه‌رێ تیرۆرێ كو ل داوى وه‌رزێ خوه‌ دژیت، شكه‌ڤا كوردى یا پڕِه‌ ژ سۆرپرایزێن تۆقینه‌ر بۆ داگیركه‌رێن كوردستانێ و ب تایبه‌ت توركیا كو ئێدى ب شێوه‌یه‌ك راسته‌وخۆ به‌حسێ وێ ل سه‌ر مه‌حفوورا زلهێزان دهێته‌ كرن كو یا به‌ره‌ف به‌لقانبوونێ (وه‌ڵاتێن به‌لقان: سربیا، كرواتیا، چیایێ ڕه‌ش، بۆلگاریا، سلۆڤینیا، مه‌كه‌دۆنیا، كۆسۆڤۆ و ئه‌لبانیا) دچیت.
بۆ رێگرتنا ب به‌لقانبوونا توركیا و ڤه‌گه‌راندنا رۆلێ توركیا ل سه‌ر مه‌حفوورا سیاسه‌تا جیهانێ و خه‌ندقاندنا خه‌ونا ده‌وله‌تبوونا كوردستانێ ئه‌ردۆغان نه‌چاركریه‌ كو رێیا كۆچكا سپى بگریت و داگێرانێن بژان بۆ ئاغایێ كۆچكا سپى بكه‌ت، لێ به‌رسڤا پرسیارا كو ئه‌ردۆغان و مه‌حبووێن وى ناخوازن چ جارا گوه لێ ببیت و ژێ دره‌ڤن ئه‌وژى سه‌ده‌مێن پڕ چه‌ككرنا یه‌په‌گێ و راده‌ست نه‌كرنا فه‌تحوڵا گوله‌نه‌!! ژبه‌ر نه‌قۆله‌یێن ئه‌ردۆغانى و پشته‌ڤانیا وى یا راسته‌وخۆ بۆ گرۆپێن تۆندڕه‌و و گه‌فێن وى یێن به‌رده‌وام بۆ پڕكرنا ئه‌ورۆپا ژ كۆچبه‌ران، ئاغایێ كۆچكا سپى تنێ بیست خۆله‌ك ژ ده‌مێ خوه‌ دانه‌ سۆڵتانێ بچووك. هزر بكه‌ن د بیست خۆله‌كان دا دێ چ هێته‌ به‌حس كرن!! وه‌كو ئه‌م دزانین ده‌ه خۆله‌ك ژێ وه‌رگه‌راندننه‌ ئانكو ب هه‌موو پیڤه‌ران ئه‌ردۆغان د كۆچكا سپی دا سویێ وى هاته‌ شكاندن و ڤه‌چغاندن و ب سه‌ر و دلێ شكه‌ستى ڤه‌گه‌ریا ناڤ كێشێن توركیا چنكو نه‌شیا هاریكاریا ئه‌مریكا بۆ یه‌په‌گێ ب ڕاوه‌ستینیت و نه‌ ژى فه‌تحه‌ڵا گوله‌ن كه‌له‌مچه‌ كرى ڤه‌گه‌رانده‌ توركیا.
نیڤ بیست خۆله‌كێن ئه‌ردۆغانى ل كۆچكا سپى ئه‌ڤ دیدارا دیرۆكى ئه‌گه‌ر ب دیرۆكى بهێته‌ هه‌ژمارتن وه‌كو مه‌حبووبێن ئه‌ردۆغانى دبێژن كو ب راستى ژ سوشكاندنێ پێڤه‌تر تشته‌ك دن نینه‌، ب ده‌ستپێكا پایزبوونا خه‌ونێن ئه‌ردۆغانى دهێته‌ هه‌ژمارتن و سه‌ره‌داڤێن چاره‌سه‌ریا كێشێن رۆژهه‌ڵاتا ناڤین ئه‌مریكا ئێخستنه‌ د ده‌ست خوه‌ دا و تۆپزه‌ك بوو ل ئه‌ردۆغانى و رۆسیا و ئیرانێ دا.

ل ڤێ سه‌یرستانا دبێژنێ كوردستان رۆژ ناچیت ئه‌گه‌ر روودانه‌كا سه‌یرتر ژ سه‌یرێ په‌یدا نه‌بیت، خوه‌ دێ بێژى كار و كۆكێن مه‌ ژ یێن مرۆڤێن ل سه‌ر ڤێ گۆیا زه‌مینێ دجوداترن و پیڤه‌ر به‌زینێن هه‌موو پیڤه‌راینه‌. یا راستى ژى پیڤه‌ر به‌زینێن مینا مه‌ ل بن خولۆله‌یا عه‌سمانى په‌یدا نابن و هه‌ما بله‌ز لاپه‌ڕێن دیرۆكا خه‌باتا ملله‌تێن خه‌باتكرى ل دژى داگیركران ڤه‌ده‌ن كا ئێكى هندى ڤى ملله‌تى جاش و خۆفرۆش و چاڤساخى بۆ داگیركه‌ران كریه‌ و دیسا ژ لایێ حوكمه‌تا وان ڤه‌ خه‌لات ژى كربن!!
یا ژ هه‌موویێ حنێرتر سه‌ره‌ڕاى هه‌بوونا حوكمه‌تا هه‌رێما كوردستانێ و 25 سالێن ئازادیێ هێشتا هه‌بن ل دژى سه‌رخوه‌بوونا كوردستانێ ب هێجه‌تن بێ بنه‌ما ب ده‌ركه‌ڤن و كى ته‌خا خوه‌ ب ره‌وشه‌نبیر و وه‌ڵات پارێز دهه‌ژمێرن!
لێ روودانا ڤێ جارێ گه‌له‌كا ژ یێن دن سه‌یرتر بوو ب هه‌موو پیڤه‌ران و ئه‌گه‌ر هنده‌ك پیڤه‌ر مابن خه‌لكێ ڤێ سه‌یرستانێ نه‌به‌زاند بن، چنكو یێن ڤێ جارێ نه‌مرۆڤێن ئاسایى بوون دادوه‌ر بوون دادوه‌ر!! ئه‌و ژى به‌رى چه‌ند رۆژه‌كان ل دادگه‌هه‌كا سه‌یرستانێ كه‌سه‌ك ب 11 ساڵان ل سه‌ر دزینا شیر و په‌مپه‌رسان كو دهێنه‌ هه‌ژمارتن ژ پێدڤیێن زارۆكێن ساڤا، هاته‌ سزادان. نه‌ پۆلیس و نه‌ ژى دادگه‌هێ چ رۆنكرن ل سه‌ر چاوانی و ئه‌گه‌رێن ئه‌نجامدانا ڤێ دزیێ نه‌هاتنه‌ دان چنكو جهێ پرسیارێیه‌ بۆچى وى كه‌سى تنێ ئه‌و هه‌ردو پێدڤیێن زارۆكى دزینه‌ و چ تشتێن دن نه‌؟ هه‌ر چه‌نده‌ دزى هه‌ر دزیه‌ و كاره‌كێ نه‌ڕه‌وایه‌ لێ ڤێ دزیێ تایبه‌تمه‌ندیه‌ك هه‌یه‌ و ل چ دزیێن دن ناچیت، دڤیا ژ لایێ دادگه‌هێ ڤه‌ ل به‌ر چاڤ هاتبایه‌ وه‌رگرتن، وه‌ك هوون ته‌ڤ دزانن كو ئه‌ڤه‌ سه‌رێ چه‌ند ساڵانه‌ ژبلى فه‌رهوودكرنا سه‌ر عه‌رد و بن عه‌ردێن سه‌یرستانێ و یاریا نیڤ مۆچێ هه‌ر مایه‌ نۆچه‌ و ب ڤى ده‌ستودارێ هه‌ى هه‌ر دێ مینیت نۆچه‌ ژى، كاره‌كته‌رێن ڤێ فه‌رهوودێ ل پێش چاڤن و حوپ حوپا وانه‌ نه‌ داده‌ورێن گراڤى نه‌ ژى پۆلیسێن چاڤ زیق ئه‌و دل نینه‌ دبه‌ر سیها وان ڕا ژى بچن و پسته‌كێ ژى ل سه‌ر ڕه‌فتارێن وان بكه‌ن چ جاى به‌حسى دادگه‌ه كرن و لێپرسینێ!! لێ بۆ مرۆڤه‌كێ ژبنێ گوهى دا ژیانا زارۆكه‌كى بپارێزیت، ده‌ستێ خوه‌ درێژ كریه‌ و دزى كریه‌ ب ڤى سزایێ گران بهێته‌ سزدان، جهێ راوه‌ستان و لێپرسینێیه‌!!
ژ بێ شه‌نسیا رایه‌دارێن ڤێ هه‌رێمێ و ب تایبه‌ت یێن دادگه‌هان ئه‌زمان درێژ ل ڤى وه‌ڵاتى دمشه‌نه‌ (رۆژنامه‌ڤانێن ب وژدان) و ئه‌ڤ سزایه‌ ژ هۆڵا دادگه‌هێ ڕه‌ڤاند و ده‌ملده‌ست بوو مژاره‌كا ڕایا گشتى، ئه‌گه‌ر نه‌ ئه‌و كه‌یس مینا گه‌له‌ك كه‌یسێن دن دا ب بێده‌نگى ڕابۆریت و گه‌هته‌ كاروانێ كه‌یسێن لیژنه‌ بۆ هاتینه‌ دامه‌زراندن، مانێ هوون دزانن لیژنه‌ دروستكرن ئانكو به‌ڕك ب سه‌ردا دادان و نڤاندن!!
دزى هه‌ر دزیه‌ و ب به‌دڕه‌وشتى دهێته‌ هه‌ژمارتن لێ دزیێن بۆ به‌رده‌وامیدانا ژیانێ دهێنه‌كرن ژ لایێ مۆڕالى ڤه‌ دهێنه‌ په‌ژراندن و ب قه‌هره‌مانى دهێنه‌ ناڤكرن و چیرۆكێن مینا: رۆبین هۆد و عه‌لیكێ بچووك و ..هتد ل به‌ر رۆناهیا ڤێ دزیێ ئه‌زماندرێژان ئه‌ڤ روودانه‌ كره‌ مژاره‌كا ڕایا گشتى و به‌ڕه‌ڤان ژ هه‌موو ته‌خێن جڤاكێ كوردستانێ په‌یدا بوون و باوه‌رى ب دادوه‌ر و پۆلیسان خلۆله‌كر و ئێخستن بن گۆمانا خه‌لكى.
خوه‌دى ده‌ركه‌فتنا جڤاكێ كوردستانێ ل ڤى دزیكه‌رى (رۆبین هودێ كوردى) و ب ڤى ڕه‌نگى نه‌ ژ عه‌ده‌تێ جڤاكێ مه‌یه‌ و مه‌ جڤاكه‌كێ پاسیڤ هه‌یه‌، ژ به‌ر هندێ نیركێ داگیركارى و پاشڤه‌مانێ ل كوردستانێ درێژ بوویه‌، ژ خوه‌ به‌حسێ گه‌نده‌لى و خیانه‌تكارى و ده‌ستكیسیا داگیركه‌رى هه‌ر نه‌كه‌. ب ڤێ خوه‌دى ده‌ركه‌فتنێ ل كه‌یسێ ڤى دزیكه‌رى ب ده‌ستپێكا پێلا لێگه‌رهان ل دز و گه‌نده‌لان دهێته‌ هه‌ژمارتن و دبێژم: مه‌ دزێ خوه‌ گرت به‌گم!!

ل 12.04.2017 و ل پێش چاڤێن خه‌لكه‌كێ بۆش و ل نیاڤا بازارێ هه‌ولێرێ حه‌لاجه‌كێ سه‌رسپى و تژى سینگێ وێ په‌یڤ و ڤیان( فه‌رهاد پیربالێ ب عه‌شق و ڤیانا هه‌موو مرۆڤان سه‌رمه‌ست)، بارانا بۆكس و پالپێڕانان لێ بارى و پاشى ئه‌و دیمه‌نێ ئازار به‌خش بخێرا نه‌ڤیێن ئه‌دیسۆنى و رڤێشتا وى، پشتى چه‌ند چركه‌كان هاته‌ د به‌رووكا مه‌ دا، وه‌ى پا وى دیمه‌نى ئه‌ز ئێشاندم و من خوه‌ و هه‌موو مرۆڤێن ل ڤێ سه‌یرستانێ دژین، سووشكاندى دیتن. دیمه‌نه‌كێ هندى بێژى یێ ب ئازار و ڕامان به‌خش بوو، یێ ب ئازار بوو چنكو پیره‌مێره‌كێ سه‌رسپى و بێپه‌لێژان و ل سه‌ر دێمى وى گرنژین ژ لایێ دوو زڕته‌كێن چ ژ بها و ره‌وشتێن مرۆڤاتیێ نزانن دهێته‌ ئێشاندن و خه‌لكه‌ك مینا ته‌ماشه‌ڤانێن ته‌شابه‌ت لێ دمه‌یزینن و ره‌نگڤه‌دانه‌كێ ناكه‌ن!! ب ڕامان بوو چنكو ئه‌ڤێ روودانێ هه‌موو بانگه‌شیا مه‌ ژبۆ سه‌روه‌ریا قانوونێ، مێرگا پێكڤه‌ژیانێ، ئازادیا هزرێ و په‌یده‌كرنا هه‌موو تشتێن جوانێن مرۆڤاتیێ ل ڤێ سه‌یرستانێ(كوردستانێ) خرش ده‌ردكه‌فتن. ده‌ما ده‌زگه‌ه و خاندنگه‌ه و په‌رستگه‌هێن وه‌ڵاتی شیانێن په‌روه‌رده‌كرنا مرۆڤان نه‌بیت بۆ سه‌ره‌ده‌ریكرنێ دگه‌ل مرۆڤان، ما نه‌باشتره‌ ده‌رگه‌هێن وان بهێنه‌ گرتن!! پرسیاره‌كه‌ ژ كه‌سێن كاربده‌ست و رایه‌دارێن ڤى وه‌ڵاتى دكه‌م.
ده‌ما وان زڕته‌كێن ژ ره‌وشتى دشووتى فه‌رهاد پیرباڵ دئێشاندن، هنگى فه‌رهاد بتنێ نه‌بوو به‌لكو هه‌موو مرۆڤێن ل ڤێ سه‌یرستانێ دژین، بوون و مرۆڤبوونا مه‌ دئێخسته‌ به‌رلێپرسینێ!!
هه‌ر وه‌ڵاته‌ك ب فه‌رهادێن خوه‌ى جوانه‌ و ده‌ما رێز ل فه‌رهادان نه‌هێت گرتن، هنگى وه‌ڵات بێ جوانى دمینیت و قانوونا دارستانێ لێ دبیته‌ سه‌روه‌ر و ژیان لێ دبیته‌ جه‌هه‌ننه‌م.
ل هه‌ر وه‌ڵاته‌كێ زڕته‌ك لێ دمشه‌ بن، روومه‌تا مرۆڤان دهێته‌ بنپێ كرن و پرۆسه‌سا وه‌رارا شارستانیێ لێ سنگه‌پێ دبیت و ب سیسته‌ماتیك به‌ره‌ف دیكتاتۆرى و سۆماڵى بوون، سووریا بوون و راوه‌ندا بوونێ دچیت و ژ مالباتا شارستانیێ ده‌ردكه‌ڤیت.
ل هه‌ر وه‌ڵاته‌كێ فه‌رهاد لێ دمشه‌بن، ڤیان، پێكڤه‌ژیان و وه‌رارا شارستانیێ ب گۆر دكه‌ڤیت و گولێن شارستانیێ لێ گه‌ش دبن و ئارامى لێ دبیته‌ خوه‌جه و هه‌ر كه‌س مژوولى ژیانا خوه‌ دبیت، بێیكو برایێ خوه‌یێ مرۆڤ ئازار بده‌ت و ره‌وشتێ مرۆڤبوونێ دبیته‌ سالار.
به‌رووكێن فه‌رهادان تژى ڤیانن و یێن زڕته‌كان تژى كین.
دێمێ فه‌رهادان گرنژینێ دبه‌خشیت، یێن زڕته‌كان سه‌همێ.
ده‌ستێن فه‌رهادان گولان دچینن و چرایان ل شه‌ڤ ڕه‌شان هلدكه‌ن، یێن زڕته‌كان دێمان بریندار دكه‌ن و دلان دسۆژینن.
دلێن فه‌رهادان جهێ هه‌موو مرۆڤان لێ هه‌یه‌ و ئارامى و حه‌سكرنێ ل سه‌ر پارڤه‌ دكه‌ت، یێن زڕته‌كان تنێ یێن ئاغایێن وان.
چاڤێن فه‌رهادان جوانیێ د هه‌رلڤینه‌كێ، هه‌ر دێمه‌كى دا دبینن، یێن زڕته‌كان دحوتمن و تنێ تاریێ دبینن.
كورت و كرمانج فه‌رهاد مرۆڤن و زڕته‌ك ل سه‌ر په‌یاده‌كرنا رێكا مرۆڤاتیێ دسه‌ر گه‌دانن و فه‌ره‌ فه‌رهاد ده‌ستێن وان بگرن و داننه‌ سه‌ر ڕێكا مرۆڤبوونێ.
ئه‌گه‌ر ئه‌م بخازین سه‌یرستانا مه‌ ببیت كوردستان و گولێن پێكڤه‌ژیانێ لێ گه‌ش ببن و مرۆڤ لێ ببن مرۆڤ، ل سه‌ر مه‌ ئه‌ركه‌ ئه‌م پێكڤه‌ ببین فه‌رهاد و دلێن خوه‌ ب مه‌ستیا عه‌شقا فه‌رهادان پر بكه‌ین، ئێدى ده‌مێ دوو دلیێ نه‌مایه‌.
وه‌رن پكێڤه‌ ل مرۆڤبوونا خوه‌ ببین خودان و زڕته‌كان هینى ڤیانێ و ره‌وشتێن پاك بكه‌ین دا فه‌رهادێن مه‌ د مه‌ستیا ڤیانێ دا مه‌ست بمینن، نه‌ك سه‌ر شكاندى و ڤه‌چغاندى.
15.04.2017
دهۆك