گه‌له‌ك بیرمه‌ند و زانا و زانایێن زمانى دبێژن: ناڤ پشكه‌كه‌ ژ پێكهاته‌یا كه‌ساتیا نه‌ته‌وى، ب ڕه‌نگه‌ك دن ناڤ ده‌ربرینه‌ ژ ئاستێ مرۆڤى د هه‌موو بیاڤان دا. ژبه‌ر گرنگیا ناڤى به‌رده‌وام گه‌نگه‌شه‌ ل سه‌ر هه‌یه‌ و داگیركه‌ران هه‌ولدایه‌ ناڤێن خوه‌ ل سه‌ر ملله‌تێن دن بسه‌پینن و ژ وانا ئیسلاما عه‌ره‌بى و داگیركه‌ریا عه‌ره‌بى و كوردستان باشترین نموونه‌یه‌ كو ناڤێن كوردى به‌رده‌وام دهاتنه‌ ئاسته‌گكرن و ناڤێن عه‌ره‌بى پیرۆزى ددایێ و نوكه‌ ژى باسكێ ئیسلاما سیاسى هه‌مان رۆلى د پیرۆزكرنا ناڤێن عه‌ره‌بى دا دبینیت.
ناڤ كرن گه‌وهه‌رێ ناڤكه‌رى دیار دكه‌ت نه‌ك یێ هه‌لگرێ ناڤى چنكو هه‌ژارى چ گونه‌ها خوه‌ نینه‌ و تنێ یا گوهلێبووى دبێژنێ ناڤێ ته‌ ئه‌ڤه‌یه‌، لێ ناڤهه‌لگرێ ڤێ جارێ یێ مه‌زنه‌ و به‌لكو سه‌رۆككۆمارێ توركیایه‌ و شوونگرێ میرێ قه‌ته‌رێ ناڤێ هه‌سپێ خوه‌ كریه‌ ئه‌ردۆغان!! دبیت جامێرى ب ڤى ناڤێ خوه‌ خوه‌ش بیت و دیارى ژى بۆ ناڤلێكه‌رێ خوه‌ هنارتبن!!(چنكو هه‌ما به‌حسێ وى و توركیا ب نه‌كامى هاته‌كرن و ب تایبه‌ت پرسا كوردى و دیمۆكراتیێ ئێكسه‌ر ب به‌رسڤ دهێت و گه‌فێن مه‌زنتر ژ یێن هه‌ڤالێ خوه‌ سه‌ددامێ دكتاتۆر دكه‌ت و خوه‌ تۆ دبێژى كلیلا چه‌كێن ئه‌تۆمى یێن هه‌موو دونیایێ د ده‌ستێن وى دانه‌!!) لێ هه‌تا نوكه‌ “لێڤا ژێرى ل یا ژوورى نه‌دایه‌”.
مافێ وى یه‌ ب ڤى ناڤى خوه‌ یێ نوو خوه‌ش ببیت لێ بۆچى شوونگرێ میرێ قه‌ته‌رێ شێخ ته‌میم حه‌مه‌د ناڤێ هه‌سپێ خوه‌ كره‌ ئه‌ردۆغان، سه‌ده‌م چنه‌؟ ئه‌ڤ ناڤ كرنه‌ دێ بیته‌ سه‌ده‌مێ تێكچوونا په‌یوه‌ندیێن توركیا و قه‌ته‌ر؟ وه‌ك دیار په‌یوه‌ندیێن قه‌ته‌ر و توركیا روونێ هنگڤ كرینه‌ و موویه‌ك دبه‌ر ڕا ناچیت!!
یا دیار و به‌ڵاڤ ناڤكرنا سه‌رۆكێن وه‌ڵاتان ب ناڤێ سه‌گ و ئاژه‌ڵان دیارده‌كا كه‌ڤنه‌ و بۆ به‌رژێركرنێ بكاردهێت و راوێژكارێ ئه‌لمانیا بسماركى ناڤێ سه‌یێ خوه‌ كربوو سۆڵتان و ل وى ده‌مى سۆڵتان پر عاجز بوو و په‌یوه‌ندیێن وان تێكچوون، هه‌تا سۆلتانێ (سه‌یێ بسماركى) ئه‌لمانى نه‌ سه‌كتى په‌یوه‌ندیێن وان نه‌زڤڕین. ل ڤى سه‌رده‌مى مه‌ گوه لێنه‌بوویه‌ سه‌رۆكه‌ك ب ناڤێ ئاژه‌ڵان بهێته‌ ناڤكرن پتر ب ناڤێن: دكتاتۆر، فاشى، شۆفینیست، دڕاكۆلا و …هتد دهێنه‌ ناڤكرن و پتر ڕه‌نگڤه‌دانا سیاسه‌تێیه‌ و نوكه‌ د مه‌دیا جیهانى دا ئه‌ردۆغان ب سۆڵتانێ سته‌مبۆڵێ دهێته‌ ناڤكرن چنكو هه‌موو ده‌رگه‌هێن دیمۆكراتیێ گرتینه‌ و سیاسه‌ته‌كا پۆپۆلیست په‌یاده‌ دكه‌ت.
لێ شێخ ته‌میمى ناڤێ هه‌سپێ خوه‌ كر ئه‌ردۆغان! دبیت ژ حه‌ژێكرنا شێخى بۆ هه‌سپێ و وى و سیاسه‌تا ئه‌ردۆغانى بیت. لێ ب دیتنا من شێخى ژ ترسا مامێ تره‌مپ سه‌رۆكێ ئه‌مریكا ئه‌ڤ ناڤه‌ ل سۆڵتانێ سته‌مبۆلى كریه‌ چنكو شێخ دزانیت سۆڵتان به‌رامبه‌رى ڤێ به‌رژێركرنێ بێده‌نگ نامینیت دێ هه‌لۆیسته‌كێ تۆند ده‌ربریت؛ ب ڤێ چه‌ندێ ئه‌و موغازه‌لا ئه‌مریكا دكه‌ت و مه‌ره‌ما شوونگرى دیاره‌ چاڤێ وى یێ ل كورسیكێ میراتیێ و دیرۆكا كۆده‌تایان ل ڤى وه‌ڵاتێ بچووك دیاره‌.
مامێ تره‌مپ مێزا سیاسه‌تێ ل جیهانێ وه‌رگێرایه‌ و نه‌فیر عام و سه‌فه‌ربه‌رلك ل ته‌رۆریستێن ئیسلامى و پشته‌ڤانیێن وان راگه‌هاندیه‌ و ده‌ست ب ئاده‌كرنا پشته‌ڤانیێن وان كریه‌ و چووڤێ ته‌مبى كرنێ ل وان دهه‌ژینیت، ئه‌ڤجا ترسێ گه‌هێن شوونگرێ شێخێ قه‌ته‌رى گرتن و ناڤێ هه‌سپێ خوه‌ كره‌ ئه‌ردۆغان دا دلێ مامێ تره‌مپ نه‌مینیت و هه‌روه‌سا دبێژیتێ ئه‌ڤا میرێ مه‌ دكه‌ت، ئه‌ز ل دژم و ده‌م هاتیه‌ ئه‌ز شوونا وى بگرم و دا وه‌كو به‌رێ گوهداریا فه‌رمانێن هه‌وه‌ بكه‌ین و ژبن ده‌رنه‌كه‌ڤین.
ب هه‌ر ئاویى بیت شێخێ شوونگر نه‌ ژبه‌ر ڤیانا وى بۆ سۆڵتانێ سته‌مبۆلێ ناڤێ هه‌سپێ خوه‌ كره‌ ئه‌ردۆغان به‌لكو دا مامێ تره‌مپ رازى بكه‌ت و قه‌ته‌رێ ژ ته‌هلكه‌تا پشته‌ڤانیا ئیسلاما سیاسى قۆرتال بكه‌ت و ئه‌و ژى ل سه‌ر ته‌ختێ میراتیێ ژ شوونگریێ ببیته‌ میر.
ژ ناڤكرنا شوونگرى و گڤاشتنێن رۆژئاڤا و نوكه‌ رۆسیا ژى هاتیه‌ سه‌ر هێلا رۆژئاڤا و زێده‌بارى ره‌وشا ناڤخۆیا توركیا دیار دبیت كو شاهیا ریفراندۆمێ گه‌له‌ك ناڤه‌كێشیت و ئه‌ردۆغان دێ ب گه‌له‌ك ناڤێن دن هێته‌ ناڤكرن و بۆ هه‌ر ناڤه‌كى دبێژم: ناڤدار بى به‌گم.

دبێژن: (ئاڤ د ده‌نیدا گه‌نى دبیت!) ئێدى ئه‌و ئاڤ ناهێته‌ ڤه‌خوارن، خوه‌ بكێرى ئاڤدانێ ژى ناهێت چنكو یا پرى میكرۆبه‌ و زیانێ دگه‌هینیته‌ سروشتى، ئه‌ڤه‌ دسروشتیدا و د ژیانێ دا ژى ب هه‌مان ره‌نگییه‌ و ب تایبه‌تى دسیاسه‌تێدا و نموونه‌ دمشه‌نه‌ لێ یا هه‌رى نێزیك و نوكه‌ ئه‌م به‌رخۆرێن وێ دبینین ئه‌ردۆغانێ سه‌رۆكێ توركیایه‌. ژ سالا 2002ێ وه‌ره‌ ئاكپارتى ب سه‌رۆكاتیا ئه‌ردۆغانى ده‌ستهه‌لاتا توركیا د ده‌ستاندایه‌، د ڤى ماوێ درێژ دا گه‌له‌ك گوهۆڕین كه‌فتنه‌ زهنیه‌تا سه‌ركرداتیا توركیا و ب لۆژیكه‌كێ نوو سه‌ره‌ده‌رى ل گه‌ل كێشێن ناڤخوه‌یى و ده‌ره‌كى كرن و گه‌له‌ك تابۆ و هێلێن سۆرێن ئه‌تاتۆركى كێشاین به‌زاندن ب تایبه‌ت ده‌رباره‌ى كێشا كورد ل باكور.
سه‌ده‌مێن ڤێ گوهۆڕینا سیاسه‌تا توركى گه‌له‌ك فاكته‌ر هه‌نه‌ و یێن هه‌رى به‌رچاڤ نه‌مانا دوو باسكیا جیهانێ و گلۆبالیزم و هلكشیانا ئێكه‌تیا ئه‌ورۆپى وه‌ك هێزه‌كا ئابوورى و جڤاكى كو د سه‌ر جوداهیێن ئتنى و سه‌رهاتیێن دیرۆكى یێن پرى شه‌ر و هنگام دا شیایه‌ وه‌ك ئێكه‌تیایه‌كا هه‌مئاهه‌نگ و خوه‌دى باندۆر ل سه‌ر سیاسه‌تا جیهانێ خوه‌ بده‌ت نیشاندان.
ئێكه‌تیا ئه‌ورۆپى و ئه‌ندام بوون د ڤێ ئێكه‌تیێ دا خه‌ون و داخازا مێژینه‌یا ده‌ستهه‌لاتدارێن توركیایه‌ لێ ئارمانجێن ئێكه‌تیا ئه‌ورۆپى و جیهانبینییا وێ دگه‌ل یێن ده‌وله‌تا توركیا تم دناكۆك و ل هه‌ڤ ناكن. دڤێتن توركیا گه‌له‌ك پاریێن ته‌حل ب داعووریتن تا خوه‌ د گه‌ل مه‌رجێن ئه‌ورۆپا ب گونجینیتن، ژ وان مه‌رجێن توركیا گه‌له‌ك پێ د ئێشیتن پرسا مافێن مرۆڤى، كێشا گه‌لێ كورد و ئاشنابوونا تورگیایه‌ ل گه‌ل دیرۆكا خوه‌ و دانپێیانه‌ ب وان كوشتارێن توركیا چ ل سه‌رده‌مێ ده‌وله‌تا ئۆسمانى ئه‌نجامداین (كوشتارا گه‌لێ ئه‌رمه‌ن و ئاسورى و كوردێن ئێزدى) یان ژى یێن ل سه‌رده‌مێ كۆمارا توركیا هاتینه‌ ئه‌نجامداین(كوشتارا دێرسمێ، گه‌لیێ زیلان و مه‌راشێ)، كو هه‌تا نوكه‌ توركیا چ به‌رهه‌ڤیێن بڤى ره‌نگى نه‌كرینه‌ و تم پاساوا بۆ وان روودان و كریاران دبینیت.
د سه‌ر ڤان هه‌موو ئاسته‌گیان ڕا لێ ده‌وله‌تا تورك چ جارا بێهیڤى نه‌بوویه‌ تم ب خه‌ونا ئه‌ندامبوونێ ده‌رگه‌هێ ڤێ ئێكه‌تیێ قۆتایه‌ و دانوستاندن ل گه‌ل كریه‌ و ئێكه‌تیا ئه‌ورۆپى ژى بئێك جارى ده‌رگه‌ه ل توركیا نه‌گرتیه‌ و یاریا تۆم و جێرى ل گه‌ل كریه‌، ئه‌ڤێ یاریێ به‌رده‌وام كریه‌ هه‌تا بهارا عه‌ره‌بى ده‌ستپێكرى و سه‌رتیشك گه‌هشتینه‌ سوریا. ئێدى سیناریۆیێ ئه‌ندامبوونا توركیا گه‌هه‌شته‌ قۆناغه‌كا نوو و توركیا 180 پله‌یا مه‌نگه‌نێ سیاسه‌تا خوه‌ گوهۆڕى و ته‌ڤى كۆربه‌قا سوریێ بوو ب مه‌ره‌ما بكار ئینانا كێشا سوریێ وه‌ك كارته‌كا فشارێ بۆ سه‌ر ئێكه‌تیا ئه‌ورۆپى ب تایبه‌ت كێشا ئاواره‌یان و د ڤه‌ بیاڤى دا توركیا شیا چه‌ند ده‌ستكه‌فتێن ئابوورى ب ده‌ستڤه‌ بینیت.
هه‌لبه‌ت ته‌ڤى بوونا توركیا بۆ كێشێن ناڤخوه‌ یێن سوریا نه‌ ژ پێخه‌مه‌تا راوه‌ستاندنا كوورها شه‌رێ تائیفى و ئتنى بوو به‌لكو دا ل پێگه‌هێ كوردان بده‌ت كو پشتى گرۆپێن تۆندڕه‌وێن ئیسلامى سه‌ر ژ ئۆپوزسیۆنا سوری وه‌رگرتى، پێگه‌هێ كوردان ل شه‌رێ دژى تیرۆرێ بلندبوو و بوویه‌ جهێ متمانا هه‌ڤپه‌یمانیا ناڤده‌وله‌تیا دژى تیرۆرێ. ئه‌ڤێ چه‌ندێ ده‌وله‌تا توركیا حێچ و هاركر، نه‌خاسمه‌ ل پێش چاڤێن توركیایه‌، ژ ئه‌نجامێ كه‌فتنا رژێما سه‌ددامێ دكتاتۆر(9.04.2003) ده‌وله‌تا دیفاكتۆیا هه‌رێما كوردستانێ هاته‌ سه‌ر ده‌پێ شانۆیا جیهانێ و ژ ترسا دووباره‌ بوونا هه‌مان سیناریۆیى ل رۆژئاڤایێ كوردستانێ، توركیا وه‌ك تاكه‌ كارتا فشارێ دده‌ستدا ماى بۆ ئه‌ندامبوونا ئێكه‌تیا ئه‌ورۆپى كێشا سوریێ داخه‌بتاندن هه‌روه‌ك مه‌ ل ژوور ئاماژه‌ پێداى شیا چه‌ند ده‌ستكه‌فتێن ئابوورى ب ده‌ستڤه‌ بینیت لێ د ئه‌نجامدا بۆ توركیا گه‌له‌ك گران ڕاوه‌ستا و بۆ سه‌ده‌م كو ئێدى ئێكه‌تیا ئه‌ورۆپى ل كێشێن ناڤخوه‌یا توركیا بزڤڕیت ب تایبه‌ت كێشا دیمۆكراتیێ، ئازادیا هزرێ و ڕاگه‌هاندنێ، مافێن مرۆڤى كو حكومه‌تا ئاكه‌پێ ئه‌ڤ پره‌نسیپه‌ بنپێ كرنه‌ و به‌ره‌ف دیكتاتۆریا ته‌ك پارتى دچیت نوكه‌ توركیا بوویه‌ زیندانه‌كا مه‌زن بۆ ئۆپوزڤسیۆنا علمانى و گرتنا پرانیا ئه‌ندام په‌رله‌مانته‌رێن كورد و هه‌ر كه‌سێ ب ئاوازێ ئه‌ردۆغانى نه‌له‌یزیت؛ ژبلى كێشێن ئابوورى كو نوكه‌ توركیا د كریزه‌كا كوور دا ده‌رباز دبیت و بهایێ لیرێ توركیا ژنیڤه‌كا بهایێ خوه‌ پتر ژ ده‌ستدایه‌ و پرانیا وه‌به‌رهێنه‌رێن بیانى پشتا خوه‌ دانه‌ توركیا و بازارێ توركیا بجه هێلانه‌.
توركیا د قۆناغه‌كێ دا ده‌رباز دبیت گه‌له‌ك یا چاره‌نڤیسازه‌ و ئابووره‌كێ هه‌رفتى، ناڤخوه‌یه‌كا ژ هه‌ڤ ڤه‌قه‌تاى لێ د سه‌ر هندێ ڕا ئه‌ردۆغانى و تیما خوه‌ ده‌رگه‌هه‌كێ پرى مه‌ترسى ل خوه‌ ڤه‌كر كو دخازن دستۆرێ علمانیێ توركیا بگوهۆڕن، ب ڤێ خوه‌سته‌كا خوه‌ ته‌ڤایا جیهانا رۆژئاڤا و هێزێن دیمۆكراتخاز و علمانى ل خوه‌ كرنه‌ دوژمن ب تایبه‌ت ئێكه‌تیا ئه‌ورۆپى و ترۆكرنا وه‌زیرێن ئه‌ردۆغانى ل ئه‌لمانیا، هۆله‌ند و وه‌لاتێن دن یێن ئێكه‌تیێ، مرۆڤ نه‌شێت حه‌سوودیێ ب ره‌وشا نوكه‌ یا توركیا ببه‌ت. ئه‌ردۆغان و تیما خوه‌ ئه‌ڤرۆ لبه‌ر ده‌رگه‌هێ ئێكه‌تیا ئه‌ورۆپا سه‌رگه‌دان مانه‌ و ب دووراتیا رۆژێ ژ عه‌ردى ژ پره‌نسیپێن ئێكه‌تیا ئه‌ورۆپى ل سه‌ر ئاڤابووى، دووره‌ و كه‌فتیه‌ بن گڤاشتنێن جیهانا رۆژئاڤا و دیمۆكراتخاز. ئه‌ڤه‌ خوه‌ش ده‌لیڤه‌یه‌ بۆ كوردان هه‌لكه‌فتى ب تایبه‌ت هه‌رێما كوردستانێ كو پرسا ده‌وله‌تبوونێ ژ پرسا موزایه‌ده‌یا سیاسى بۆ وارێ پراكتیكى بهێته‌ ڤه‌گوهازتن چنكو هه‌ردو زلهێزێن هه‌رێمى توركیا-ئیران ل به‌ر گڤاشتنێن رۆژئاڤا و به‌ره‌یێ دیمۆكراتخازێ جیهانێ شیانێن دژاتیا برایرا كوردان نه‌مایه‌.

توركیا و ئیران چ ل سه‌رده‌مێ سۆلتان و شاهان بیت چ ل ڤى سه‌رده‌مى بیت، خوه‌ وه‌ك دو زلهێزێن هه‌رێمى نیشا دده‌ن و زه‌ڤله‌كێن خوه‌ جار جار نیشا هه‌ڤ و مه‌یلدارێن خوه‌ دده‌ن، ب ڤێ زهنییه‌تێ سه‌ره‌ده‌ریێ ل گه‌ل هه‌ڤ دكه‌ن ئانكو وه‌ك دو باسكێن ڕكابه‌رێن سه‌رهشك و ژهه‌ڤنه‌باوه‌ر. ب درێژیا دیرۆكا هه‌ڤچه‌رخا ڤان هه‌ردو ده‌وله‌تان تم ناكۆكى و هه‌ڤڕكى بوویه‌ و هه‌كه‌ جارنا خاڤبوونه‌ك كه‌فتبیت ته‌ڤنێ په‌یوه‌ندییێن وان، گه‌له‌ك نه‌ڤه‌كێشایه‌ دوباره‌ چه‌په‌ر ل هه‌ڤ گرتنه‌ ئانكو په‌یوه‌ندیێن وان تم پێلدارن و نه‌جێگیرن.
ئه‌ڤ پێلدارى و نه‌جێگێریا په‌یوه‌ندیان د نابه‌ینا ڤان هه‌ردوو زلهێزێن هه‌رێمى دا بزاڤا ئازادیخوازا كوردى ل هه‌ر چار پارچێن كوردستانێ دكارت مفاى ژێ ببینیت، ب تایبه‌ت حوكمه‌تا هه‌رێما كوردستانێ كو مینا ده‌وله‌ته‌كا دیفاكتۆ ل رۆژهه‌لاتا ناڤین جهێ خوه‌ كریه‌ و دانپێنانه‌كا ناڤنه‌ته‌وى یا ئین دارێكت بده‌ستڤه‌ ئینایه‌.
دوورى هه‌ژموونا هه‌ردو ده‌وله‌تێن توركیا و ئیرانێ ئه‌ڤرۆ هه‌ولێر بوویه‌ ناڤه‌نده‌كا ناڤنه‌ته‌وى ل شه‌رێ دژى تیرۆرێ ل وى ده‌مێ هه‌ردوو ده‌وله‌تێن ناڤبرى ب پشته‌ڤانیا تیرۆرێ دهێنه‌ گونه‌هباركرن ب نه‌خاسمه‌یى ئیران كو وه‌ك ده‌وله‌ته‌كا نه‌قۆله‌ و تێكده‌را ئاسایش ده‌ڤه‌رێ و زوخاندن و ڤه‌ژاندنا ناكۆكیێن تائیفى رۆلى دگێریت تا وى ڕاده‌ى ئیدارا نوو یا ئه‌مریكا ئیرانێ ب پشته‌ڤانیا تیرۆرێ ناڤ بكه‌ت و راسته‌ راست داخوازا قه‌له‌مكرنا تبلێن وێ بكه‌ت.
دڤێت نه‌هێته‌ژبیركرن كو د سیاسه‌تا نوو یا ئه‌مریكا دا جهێ زلهێزێن هه‌رێمى نه‌مایه‌ و ل ده‌مێ هه‌ردو زلهێزێن هه‌رێمى د ناڤ خوه‌ دا دناكۆكن، ئه‌ڤ ده‌رزا د ناڤبه‌را توركیا-ئیرانێ دا و هه‌لویستێ نوو یێ ئه‌مریكا، گڤاشتن و مه‌ترسیا هه‌ردو ده‌وله‌تان (توركیا – ئیران) ل سه‌ر سیاسه‌تا حوكمه‌تا هه‌رێما كوردستانێ كێم دبیت هه‌كه‌ نه‌بێژین هه‌ما نامینیت، ئه‌ڤه‌ژى خوه‌ش ده‌لیڤه‌یه‌ بۆ كوردان هلكه‌فتى كو دوورى ده‌ستێوه‌ردان و هه‌ژموونا هه‌ردو هێزێن هه‌رێمى(توركیا – ئیران) بڕیارا چاره‌نڤیسێ خوه‌ بده‌ن.
ل ده‌مێ پێشیا مه‌ دا ناكۆكى د ناڤبه‌را توركیا – ئیرانێ دا دێ كوورتر لێهێن و دانێ وان د قازانه‌كێ دا ناكه‌لیت، هه‌لبه‌ت ئه‌ڤه‌ ژى ب پشته‌ڤانیا ئه‌مریكایه‌ بۆ هشككرنا هه‌موو سه‌ره‌كانیێن په‌یدابوونا تیرۆرێ دپاشه‌رۆژێدا.
هه‌ركه‌س دزانیت توركیا – ئیران سنگرێ هه‌رى ب هێزێ دژى ده‌وله‌تبوونا كوردستانێیه‌ و چه‌ند ناكۆكى د ناڤبه‌را وان دا هه‌بن ژى لێ ل سه‌ر پرسا كوردى هه‌ڤ دگرتن و چیایێ ناكۆكیێن وان ب چاڤ زلقوتانه‌كێ دهه‌رفت، لێ ئه‌ڤرۆ ئه‌و چه‌ند نه‌مایه‌ چنكو هه‌ردو ده‌وله‌ت (توركیا ـ ئیران) د له‌په‌قوتا خوه‌ تافیلكرنێ دانه‌ بۆ جڤاكا ناڤده‌وله‌تى ژ تۆمه‌تا تیرۆر و پێشلكرنا مافێن مرۆڤى و نكارن مینا به‌رێ بۆ نه‌هێلانا فۆبیا كوردى ل هه‌ڤ بكه‌ن و ببنه‌ سه‌ده‌م بۆ خه‌ندقاندنا هه‌ربزاڤه‌كا كوردى بۆ سه‌رخوه‌بوونێ.
سه‌ركرداتیا سیاسیا كوردى ب تایبه‌ت جه‌نانێ سه‌رۆكێ هه‌رێما كوردستانێ مه‌سعود بارزانى ئه‌ڤێ چه‌ندێ باش دزانیت كو مه‌ترسیا هه‌ردو ده‌وله‌تا توركیا – ئیران ل سه‌ر بڕیارا ڕاگه‌هاندنا سه‌ربه‌خۆیا كوردى نه‌مایه‌ و ژ هه‌ڤكێشا دژاتیێ ده‌ركه‌فتنه‌ و سه‌رێ وان شۆرى كێشێن ناڤخوه‌یى بوویه‌ یا ژ هه‌موویان گرنگتر بۆ وان مانا ده‌وله‌تێن وانه‌ د سنۆرێن نوكه‌ دا!!
گه‌له‌ك كه‌س و لایه‌ن ل كوردستانێ وه‌سا هزر دكه‌ن هه‌روه‌سا باگه‌شێ دكه‌ن كو جه‌نابێ سه‌رۆكێ هه‌رێمێ پرسا ڕاگه‌هاندنا ده‌وله‌تا كوردى بۆ موزایه‌ده‌یا سیاسى و خوه‌ ڤه‌دزین ژ قه‌یرانا هه‌رێما كوردستانێ بكاردئینیت. هه‌لبه‌ت ئه‌ڤ دیده‌ گرۆڤا ئیفلاسا سیاسى نیشان دده‌ت چنكو ڤه‌خاندنا ره‌وشا سیاسیا هه‌ر ده‌وله‌ته‌كێ ژ ڤان یێن كوردستان داگیركرین وێ یه‌كێ دده‌ت خۆیاكرن كو ده‌م بۆ ڕاگه‌هاندنا ده‌وله‌تا كوردى گه‌له‌كێ گونجایه‌ و نابیت ب چ هێجه‌تان ئه‌ڤ هه‌له‌ ژ ده‌ست كوردان بچیت.
پێداگیریا سه‌رۆك بارزانى بۆ پرسا ده‌وله‌تبوونێ ژ قۆناغا موزایه‌دا سیاسى و بازدان ل سه‌ر قه‌یرانان ده‌رباز بوویه‌ چنكو هه‌رێما كوردستانێ ده‌وله‌ته‌ك دیفاكتۆیه‌ ژبلى بێهێز بوونا ده‌وله‌تێن داگیركه‌رێن كوردستانێ و نێزیكبوونا ب داوى هاتنا شه‌رێ تیرۆرێ و لێكڤه‌كرنا كێكا ب سه‌ركه‌فتنێ ل سه‌ر تیرۆرێ كو باهرا كوردا تێدا هه‌یه‌ ژ زارده‌ڤێ رایه‌دارێن ئه‌مریكى و ئه‌ورۆپى و ڤه‌خاندنا جه‌نابێ سه‌رۆكێ هه‌رێمێ بۆ كۆنفه‌راسا ئاسایشا ناڤنه‌ته‌وى ژده‌رڤه‌ى ده‌له‌گسیۆنا حوكمه‌تا عێراقێ ل مونشنا ئه‌لمانى(17ـ 192/2017 ) و چاڤپێكه‌فتن و دیدارێن جه‌نابێ وى ل گه‌ل پرانیا لایه‌نێن پشكدار د شه‌رێ تیرۆرێ دا گرۆڤێ هندێنه‌ كو ده‌وله‌تا دیفاكتۆیا كوردستانێ گه‌هشتیه‌ قۆناغا دوایێ و ڕاگه‌هاندنا وێ چ شۆكا بۆ ده‌وله‌تێن داگیركه‌رێن كوردستانێ ب خوه‌را نائینیت و باشترین نموونه‌ ژى توركیایه‌ كو خوه‌ بۆ ڤێ ڕاگه‌هاندنێ ئاماده‌ دكه‌ت و هلدانێ ئاڵایێ كوردستانێ ل باله‌فرخانا ئه‌نقه‌ره‌ و ل هه‌موو دیدارێن جه‌نابێ وى ل سه‌ره‌دانا ڤێ داویا سه‌رۆكێ هه‌رێما كوردستانێ بۆ توركیا (26/2/2017) گرۆڤێن ڕه‌پ و رووتن بۆ لایه‌نێن كوردستانى كو ڕاگه‌هاندنا ده‌وله‌تا كوردى چ په‌یوه‌ندى ب موزایه‌دا سیاسى ڤه‌ نین به‌لكو پێدڤیه‌كا ڤێ قۆناغێیه‌ و ده‌ربڕینه‌ ژ هه‌لویستێ نه‌ته‌ویێ جه‌نابێ سه‌رۆكێ هه‌رێما كوردستانێ و ڤه‌خاندندنا ره‌وشا په‌یوه‌ندیێن داگیركه‌رێن كوردستانێیه‌ و گه‌هشتیه‌ وێ قۆناغێ كو ئێدى دانێ وان د قازانه‌كێ دا نه‌كه‌لیت و چ كاریگه‌رى و باندۆر ل سه‌ر بڕیارا كوردان نه‌مینیت و ژ خوه‌ ره‌وشا سیاسیا عێراق – سووریا نه‌هه‌وجه‌ى چ شرۆڤایه‌.

ده‌ما ناڤێ ناتۆ دهێت، ئێكسه‌ر هشێ مرۆڤى بۆ وێ په‌یمانناما ب سه‌رۆكاتیا ئه‌مریكا دچیت ئه‌وا د چارى نیسانا 1949 دا ل نابه‌ینا وه‌ڵاتێن ئه‌ورۆپا رۆژئاڤا و ئه‌مریكا دا هاتیه‌ دامه‌زراندن بۆ به‌رسینگگرتنا هه‌ژموونا سۆڤیه‌تا به‌رێ ل سه‌ر ئه‌ورۆپا چنكو پشتى ب داوى هاتنا شه‌رێ جیهانیێ دووێ (1945 ـ 1939) ئه‌و وه‌ڵاتێن سۆڤیه‌تێ ژ ده‌ستێ نازیان رزگاركرین، كومۆنیست لێكرنه‌ ده‌ستهه‌لاتدار و هه‌روه‌سا پشته‌ڤانیا پارتێن كومۆنیست كرن بۆ گه‌هشتنا ده‌ستهه‌لاتێ ل هه‌موو ئه‌ورۆپا. په‌یمانناما ناتۆ رۆله‌كێ سه‌ره‌كى دیت د هه‌لوه‌شیانا سۆڤیه‌تێ و ته‌ڤ وه‌ڵاتێن باسكێ وارشۆ دا (باسكێ وارشۆ سۆڤیه‌تێ ل هه‌مبه‌رى ناتۆل 14 ى گولان1955 دامه‌زراند).
ل رۆژهه‌لاتا ناڤین ژى په‌یماننامه‌ك وه‌ك یا ناتۆ ل سالا (1955) ب ناڤێ په‌یمانناما به‌غدا هاته‌ دامه‌زراندن ل نابه‌ینا (توركیا، ئیران، پاكستان، بریتانیا و عیراقا مه‌لكى) بۆ به‌رسینگگرتنا هه‌ژموونا سۆڤیه‌تێ و بزاڤێن رزیگاریخوازێن ده‌ڤه‌رێ ب تایبه‌ت یا كوردى، هه‌ژیه‌ بێژین په‌یمانناما به‌غدا ژى هه‌ر ب پشته‌ڤانیا ئه‌مریكا هاتبوو دامه‌زراندن. ئه‌ڤ په‌یماننامه‌ زوو هاته‌ هلوه‌شاندن ئه‌و ژى ب سه‌ده‌ما كۆده‌تای ل 14/7/ 1958 عیراقێ و خوه‌ڤه‌كێشانا ده‌ستهه‌لاتدارێن نوو ژ وێ په‌یماننامێ.
وه‌لاتێن عه‌ره‌بى ب تایبه‌ت یێن كه‌نداڤا فارسى ژ ترسا هه‌ژموونا ئیرانێ (چ ل سه‌رده‌مێ شاهى چ پشتى شۆره‌شا ملله‌تێن ئیرانى) هه‌رده‌م بزاڤ كریه‌ به‌ره‌یه‌كى بدامه‌زرینن داكو ببیته‌ سنگره‌ د رێكا ئیرانێ دا، لێ ته‌ڤ بزاڤێن هاتینه‌ كرن دبه‌ر ئاڤێدا چوون و سه‌رنه‌گرتن (سه‌ده‌م نه‌ بابه‌تێ مه‌یه‌). لێ ئه‌ڤه‌ ده‌مه‌كه‌ جاره‌ك دن به‌حسێ گرنگیا هه‌ڤپه‌یمانیه‌كێ د نابه‌ینا وه‌لاتێن عه‌ره‌بى دا دهێته‌ كرن، لێ ڤێ جارێ ب ناڤێ ناتۆیا عه‌ره‌بى و نه‌ ب چ ناڤێن عه‌ره‌بى كو ئه‌ڤه‌ ب خوه‌ جهێ راوه‌ستیان و هزركرنێ یه‌!! سه‌رگرتن و سه‌رنه‌گرتنا ڤێ هه‌ڤپه‌یمانیێ په‌یوه‌ندى یا ب جیۆسیاسیا ده‌ڤه‌رێ ڤه‌ هه‌ى و كانێ ئه‌ڤ هه‌ڤپه‌یمانیه‌ دێ چ رۆل ل شه‌رێ دژى تیرۆرێ و ئیسلاما تۆندڕه‌و (ب هه‌ردو باسكێن سوننه‌ و شیعه‌ ڤه‌) گریت!! هه‌كه‌ ئه‌ڤ ناتۆیه‌ تنێ بۆ به‌رسینگگرتنا ئیرانێ بیت، سه‌رناگریت چنكو دێ بیته‌ سه‌ده‌مێ كوورترلێكرنا كێشێن تائیفى ل ده‌ڤه‌رێ و باسكێ تۆنده‌ڕه‌وێ (سوننه‌ و شیعه‌) بهێزتر لێ بهێن و هه‌ر ئه‌ڤه‌یه‌ سه‌ره‌كانیێن تیرۆر هێزا خوه‌ ژێ دستینیت، ئه‌ڤجا نه‌به‌ر عاقله‌ ئه‌مریكا پشته‌ڤانیێ ل به‌ره‌یه‌كى بكه‌ت، ببیته‌ سه‌ده‌مێ ب گۆرترلێكرنا تیرۆرێ، دڤێت نه‌هێته‌ ژبیركرن چ وه‌لات مینا ئه‌مریكا ب كریارێن تیرۆرێ سووریێ وێ نه‌هاتیه‌ ئێشاندن و شكاندن.
هه‌كه‌ ژ ترس و هه‌ژموونا ئیرانێ بۆ وه‌لاتێن كه‌نداڤا فارسى ناتۆیه‌كا عه‌ره‌بى ژ فه‌را بیت و بزاڤێ بۆ دكه‌ن پا ناتۆیه‌كا كوردى د رۆژا ئه‌ڤرۆ دا بۆ نه‌ته‌وا كورد چه‌ندا فه‌ره‌؟ دیرۆكا نوو یا كوردان وێ ڕاستیێ نیشا مه‌ دده‌ت كو چ هێزێن سیاسى ب سه‌رێ خوه‌ نه‌شێت پاپۆڕا بزاڤا ئازادیخوازا كوردى بگه‌هینیته‌ كنارێ ده‌وله‌تبوونێ. ده‌لیڤه‌ بۆ ناتۆیه‌كا كوردى گه‌له‌ك دبه‌رهه‌ڤن چنكو ته‌ڤ ده‌واه‌تێن رۆژهه‌لاتاناڤین و ده‌وله‌تێن داگیركه‌رێن كوردستانێ د ته‌نگاڤترین قۆناغ دا دژین و ته‌ڤ ل چه‌كێن لێبوورینێ به‌رامبه‌رى ئه‌مریكا و رۆژئاڤا دگه‌رهن دا خوه‌ ژ تۆمه‌تا پشته‌ڤانیا تیرۆرێ رزگار بكه‌ن. جیهان ته‌ڤ پشكدارى شه‌رێ تیرۆرێ بوویه‌ و پێگه‌هێ كوردان د ڤى شه‌ریدا دیاره‌ و پشته‌ڤان دزۆرن د به‌رامبه‌ر دا هه‌ژموونا داگیركه‌رێن كوردستانێ به‌ره‌ف لاوازیێ ڤه‌ دچیت ب تایبه‌ت پشتى هاتنا دۆنالد تورامپى سیاسه‌تا نوو یا ئه‌مریكا رێكى ل هێزێن هه‌رێمى دگریت و ته‌ڤ كرنه‌ پاشكۆیێن ئه‌مریكا. هه‌ر بزاڤه‌كا كوردان نێزیكى هه‌ڤبكه‌ت ب تایبه‌ت د به‌ره‌یه‌كێ نیشتمانى و دژى تیرۆرێ دا ئه‌مریكا و رۆژئاڤا دێ پشته‌ڤانیێ لێكه‌ن چنكو ناتۆیا كورى ئوتۆماتیك دێ دژى تیرۆرێ و تۆندڕه‌ویێ بیت ب سه‌ده‌مێ وێ دیرۆكا ته‌حلا كوردان هه‌ى ل گه‌ل تیرۆر و تۆندڕه‌ویێ. ناتۆیا كوردى بارمته‌یا ده‌وله‌تا كوردیه‌ و لێكترازان و قه‌بخازى درێژكرنا نیركێ داگیركرنێیه‌.