چ ده‌ما وه‌كو نوكه حوكمه‌تا ئیران نه‌كفتیه بن بارێ گرانێ ته‌نگه‌زاری و گڤاشتێن ناڤخوه‌یی و ده‌ره‌كی، ل سه‌ر ئاستێ ناڤخوه‌یی ئابووره‌كێ هلوه‌ریای كو پترپشت ب په‌ترۆلێ ڤه گرێدایه و بهایێ په‌ترۆلێ ژی نه یێ جێگیره و زیانه‌كا مه‌زن گه‌هاندیه هه‌موو بیاڤێن دن یێ ئابوورا ئیرانێ. ژ خوه عه‌مبارگۆیا ئابوورری ل سه‌ر ئیرانێ و درێژ بوونا ده‌مێ عه‌مبارگۆیێ شیانێن ئابوورری یێن ئیران ئیفلیج كرنه، زێده‌باری پرۆگرامێ ئه‌تۆمی و تاقیكرنێن ل سه‌ر دروسكرنا سارۆخێن بالیستی و دوورهاڤێژ بارێ ئابووررا ئیرانێ گران كریه و هه‌موو كه‌رتێن دن هاتنه پشته‌گوه كرن، ئه‌ڤێ چه‌ندێ باندۆره‌كا نه‌رێنی ل سه‌ر ره‌وشا ئابووریا وه‌لاتیان هێلایه و بهایێ هه‌ر تشتی ب هه‌ژمارێن فه‌له‌كی زێده دبن و بێهن ل وه‌لاتیان ته‌نگ كریه و نه‌رازیبوون گه‌هه‌شتیه ئاستێن هه‌ری بلند.
گڤاشتنێن ده‌ره‌كی ل سه‌ر حوكمه‌تا ئیرانێ كو پتر رژێما ئیران ته‌نگاڤ كریه، وه‌كه هێزه‌كا نه‌قۆله ده‌ست ل كارووبارێن ناڤخوه یێن وه‌لاتێن رۆژهه‌لاتا ناڤین ب تایبه‌ت كه‌نداڤا فارسی، عێراق، سوریا، لبنان، به‌حره‌ین، یه‌مه‌ن و هه‌ر وه‌لاته‌كێ شیعه لێبن د كوربه‌قا عێراق و سووریێ دا گه‌هه‌شتیه وی راده‌ی كو زیانێ بگه‌هینیته ئاسایشا ناڤنه‌ته‌وی و گه‌له‌ك شرۆڤه‌كارێن سیاسی بهێزبوونا تیرۆرێ كو ئه‌ڤرۆ بوویه ئافاته‌كا جیهانی بۆ ده‌ستتێوه‌ردانا ئیرانێ د كارووبارێن ده‌ڤه‌را رۆژهه‌لاتا ناڤین دا دزڤڕینن. ب ڤی ئاوایی ئیران بوویه سه‌ده‌ما گه‌شبوونا شه‌رێ تایفی ل ده‌ڤه‌رێ و بهێزبوونا تیرۆرێ.
كه‌یفا رژێما ئیران ب رێككه‌فتنا ئه‌تۆمی ل گه‌ل وه‌لاتێن رۆژئاڤا گه‌له‌ك هاتبوو و ب سه‌ركه‌فتن بۆ خوه دهه‌ژمارت، رژێمێ وه‌سا هزر دكر برێكا ڤێ رێككه‌فتنێ دێ گرێ كوورا ئابووریا وێ ڤه‌بیت و دێ ژ گرفتا ئابووری رزگاربیت كو ئه‌ڤه چه‌ندین سالن پشتا ئابوورێ وێ قراندیه و گه‌هشتیه لێڤا هلوه‌شیانێ و ئه‌گه‌ر بهێزا ئیتلاعات، پاسدار و به‌سیجێ نه‌بوویا نوكه ژ مێژه پێلێن بهارا عه‌‌ره‌بی رژێم د ناڤ خوه دا بۆ زبلدانا دیرۆكا پێچ كربا. رێككه‌فتنا ئه‌تۆمی د گه‌وهه‌رێ خوه دا بۆ لخاڤ كرنا رژێمێ بوو و شكاندنا سوویێ وێ بوو لێ رژێمێ ئه‌ڤ رێككه‌فتنا ل سه‌ر ئاستێ ناڤخوه ب سه‌ركه‌فتنه‌كا نه‌ته‌وی هه‌ژمارت و مه هه‌موویان دیت كانێ چاوا ب زۆرێ خه‌لك كێشانه سه‌ر جادان و شاهی گێران.
ب سایا سیاسه‌تا شاشا ئیران و نه‌قۆله‌ییێن وێ و گوهۆرینا ده‌ستهه‌لاتێ ل ئهمریكا بهارا كه‌یفا ئیرانێ بوونه رۆژكورتێن پایزی و هه‌ر زوو سه‌رۆكێ نوو یێ ئهمریكا ئه‌و رێككه‌فتن ب قێزه‌وترین رێككه‌فتن د دیرۆكا ئهمریكا دا بناڤكر، (ریسێ رژێما ئیرانێ كره‌ڤه هری). هه‌رچه‌نده هێشتا زوویه مرۆڤ بریارێ بده‌ت لێ سیاسه‌تا نوو یا ئهمریكا گوهۆڕینه‌كا بهێز یا كه‌فتیێ و د ڤێ سیاسه‌تێ دا رۆلێ هێزێن هه‌رێمی نامینیت(توركیا، سعودیا، ئیران لێ ژ ئیسرائیلێ ناگریت) زێده‌باری سیاسه‌تا فره لایه‌نی ئانكو ئهمریكا دخوازیت وه‌كه پۆلیسه‌كێ جیهانی ره‌فتارێ بكه‌ت.
رژێما ئیرانێ كه‌فتیه د ته‌نگه‌زاریه‌كا ئێكجار ته‌نگاڤ دا و ژ هه‌ر لایه‌كیڤه ته‌نگ یێ لێ دهێنه شداندن و ئه‌ڤه د به‌رژه‌وه‌ندا بزاڤا ئه‌ازادیخوازا كوردی و ب تایبه‌ت حوكمه‌تا هه‌رێما كوردستانێ دا یه. ب لاواز بوونا ئیرانێ باسكێ شیعه دێ بێهێز بیت، نوكه ل سه‌ر ئاستێ ناڤده‌وله‌تی هه‌لبه‌ت ب زۆخاندنا ئهمریكا بزاڤێن دهێنه كرن كو پاسدارێن ئیرانى و عه‌شدا شه‌عبی بێخنه د لیستا تیرۆرێ دا و هه‌رده‌ما ئه‌ڤه هاته كرن، هنگی دێ بارێ بزاڤا كوردی و حوكمه‌تا هه‌رێمێ دێ گه‌له‌ك سڤك بیت. هێزێن كوردی دهێته خاستن خوه ئێكلا بكه‌ن د بن سیهوانا سیاسه‌ته‌كا نه‌ته‌وی دا ل هه‌ڤ كۆم ببن، ب به‌نێ هێزێن هه‌رێمی (ئیران و توركیا) نه‌له‌یزن چنكو د سیاسه‌تا نوو یا ئهمریكا دا جهێ ڤان هێزان نینه، ئه‌ڤه سه‌رده‌مه‌ك زێرینه بۆ كوردان و ئه‌ڤه جارا یه‌كه‌مه زلهێزا بێ هه‌ڤڕك (ئهمریكا) پشتا خوه دده‌ته هێزێن هه‌رێمی و ب ته‌نا سه‌رێ خوه نه‌خشێ سیاسه‌تا هه‌رێمێ دكێشیت.
نووترين نووچه
- چەتینەر چەتین: مەسرور بارزانی دشێت رۆلەكێ كاریگەر د پرۆسەیا چارەسەركرنا كێشەیا كوردی دا بگێڕیت
- دخوازین بەرسڤا باوەری و دەنگێن ب پارتی هاتینە دان بدەین
- گەلێ كورد پێدڤی ب ئێكگۆتاری و پەیڕەوكرنا رێنمایێن سەرۆك بارزانی یە
- ماكرۆن كار دكەت باوەریێ بۆ ترەمپی دروست بكەت دا کو هێزێن ئەمریكی ژ رۆژئاڤایێ كوردستانێ نەڤەكێشیت
- مەسرور بارزانی و سەرۆككۆمارێ توركیا كۆمبوون
- ژ بودجا 2024 ژ 20 ترلیۆن دیناران بەغدا تنێ 10 ترلیۆن بۆ هەرێمێ یێن هنارتین
- پسپۆرەكێ وزێ یێ ئەمریكی: ئیراق خوە بریندار دكەت دا زیانێ ب ئابوورێ كوردستانێ بگەهینیت
- پارتێن سیاسی پشتەڤانیێ ل قۆناغا ئاشتیێ ل تورکیا دکەن
- ل نێزیك كۆنفرانسێن ناڤخوەیی یێن پارتی ل دەڤەرێن كوردستانی دێ هێنە ئەنجامدان
- فراكسیۆنا پارتی: ل گەل درێژكرنا دەمێ كۆمسیۆنێ نینین
محه‌مه‌د چه‌لكي
وێ شه‌ر ده‌ركه‌ڤه!!
(وێ شه‌ر ده‌ركه‌ڤه) ئه‌ڤ رستا د ناڤ كڤانان دا یا سه‌ركرده‌كێ ته‌ڤ ده‌مێ یه ب ناڤێ ئالدار خه‌لیل ل ده‌ر مافێ وێ ئاخفتنا دهێته كرن كو حوكمه‌تا ئهمریكا لبه‌ره ل باكورێ سوریا و رۆژاڤایێ كوردستانێ هه‌رێمه‌كا ئارام بدامه‌زرینن!! جارێ ئه‌ڤه تنێ گوتنه و هێشتا چ كار بۆ نه‌هاتنه كرن، هه‌رچه‌نده حوكمه‌تا توركیا كون دبنێ هاونا دا ڤه‌كرن هندی داخازا دامه‌زراندنا هه‌رێمه‌كا ئارام ل باكورێ سوریێ دكه‌ت و هه‌تا ئه‌ڤرۆ ژی كه‌سه‌كی ئه‌ڤ داخزا توركیا ب دو ئانێن قه‌لپ ژی نه‌كرینه.
هه‌لبه‌ت مه‌ره‌ما توركیا یا دیاره ژ دامه‌زراندنا هه‌رێمه‌كا ئارام ل سوریێ نه بۆ پارستنا خه‌لكێ سڤیله ژ كرایێن هۆڤانه یێن كۆمكێن ته‌رۆریست و رێژما ئه‌‌سه‌دێ دكتاتۆر به‌لكو بۆ فه‌تساندنا هه‌ر بزاڤه‌كا ببیته سه‌ده‌م بۆ دروستبوونا ستاتۆیه‌كا كوردی و هه‌ر ئه‌ڤه‌یه بوویه سه‌ده‌م هه‌موو بزاڤێن توركیا د به‌ر ئاڤێ دا بچن.
دامه‌زراندنا هه‌رێمه‌كا ئارام ئه‌گه‌ر ل بن سیهوانا یۆئێنێ بیت د به‌رژه‌وه‌ندیا كوردان دایه و نموونا باشوورێ كوردستانێ برایارا 668 و كۆسۆڤۆ برایارا 819 نمونێن هه‌ری به‌رچاڤن و ژ هێزێن سیاسی یێن رۆژاڤایێ كوردستانێ دهێته خاستن پشته‌ڤانیا هه‌ر بزاڤه‌كا دهێته كرن بۆ دامه‌زراندنا هه‌رێمه‌كا ئارام ل سوریێ چنكو دێ رێك ل به‌ر توركیا و رژێما سوریێ هێته گرتن بۆ هه‌ر نه‌قۆلیه‌كا بكه‌ن ل دژی ڤێ هه‌رێمێ.
حوكمه‌تا هه‌رێما كوردستانێ گرنگیا ئه‌ڤێ چه‌ندێ باش دزانیت ب تایبه‌ت سه‌رۆكێ هه‌رێما كوردستانێ مه‌سعود بارزانی له‌وا هه‌ر ل ده‌ستپێكا كێشا سوریا هه‌موو بزاڤ و شیانێن خوه بۆ ڤێ مه‌ره‌مێ ته‌رخانكرن و بزاڤا لێكنێزیك كرنا هێزێن سیاسی یێن رۆژاڤا كر و به‌رده‌وامی دایه ڤێ سیاسه‌تێ و دامه‌زراندنا پێشمه‌رگێن رۆژاڤا هه‌ر بۆ ڤێ مه‌ره‌مێ بوویه داكو هه‌رده‌ما بریارا دامه‌زراندنا هه‌رێمه‌كا ئارام ل باكورێ سوریێ بده‌ركه‌ڤیت چ ڤاله‌هیێن قانۆنی په‌یدا نه‌بن و كورد ژێ مافدار بن.
ل شوونا رایه‌دارێن په‌یه‌دێ ئه‌ڤی هه‌لویستێ نیشتمانی یێ حوكمه‌تا هه‌رێما كوردستانێ و یێ رێزدار سه‌رۆكێ هه‌رێمێ ب هه‌ند وه‌ربگرن و مفای ژ سه‌ربۆرا هه‌رێما كوردستانێ بگرن ب هه‌موو هێزا خوه دژاتیا ڤی پرۆژێ نه‌ته‌ویێ سه‌رۆك بارزانی دكه‌كه‌ن و ئه‌ڤه ب خوه دژاتیه‌كا سۆر و سۆره بۆ هه‌موو پره‌نسیبێن نیشتمانی و نه‌ته‌وی، ئه‌ڤێ چه‌ندێ ڤه‌كری و بێ شه‌رمانه دبێژن: سه‌رده‌مێ ده‌وله‌تا نه‌ته‌وی چوویه!!
ل ده‌ما په‌یه‌دێ دامه‌زراندنا كانتۆنا راگه‌هاندی ژ هه‌موو لایه‌نێ سیاسێن كوردستانی دهاته خاستن ب هه‌موو شیانێن خوه ڤه ل دژی ڤی پرۆژێ نه‌نیشتمانی و نه‌نه‌ته‌وی ده‌ركه‌فتبان لێ مخابن وه‌كو پێدڤی نه‌هاته كرن، هه‌لبه‌ت ئه‌گه‌ر دامه‌زراندنا وان كانتۆنان رایا ته‌ڤ لایه‌نێن په‌یوه‌ندیدار وه‌رگرتبان و ب ئێك هه‌لویست سه‌ره‌ده‌ری ل گه‌ل رژێما ئه‌‌سه‌دی و.ئوپۆزسیۆنا سوری بكربایه هنگی باوه‌ر دكه‌م دا پێگه‌هێ كوردان بهێزتر كه‌ڤیت و دانپێنانه‌كا ناڤنه‌ته‌وی وه‌رگریت. په‌یه‌دێ هه‌ر ل ده‌ستپێكا كێشا سوریێ ژ ده‌رڤه‌ی كۆده‌نگیا هێزێن كوردی ل رۆژاڤایێ كوردستانێ ب رێككه‌فتنه‌كا نهێنی دگه‌ل رژێما ئه‌‌سه‌دی ده‌ست ب سه‌ر رۆژاڤایێ كوردستانێ گرت; دا دلێ رژێما ئه‌‌سه‌دی ژێ نه‌مینیت ناڤێ كوردستانێ ژ هه‌ر بزاڤ و چالاكیێن خوه ده‌رخستن و ب ڤێ چه‌ندێ ژی نه‌راوه‌ستا هێرشی هه‌ر سمبۆله‌كا نه‌ته‌وی كرن باشترین نمونه ژی ئالایێ كوردستانێ یه كو ل كانتۆنێن خوه قه‌ده‌خه كرنه.
سیاسه‌تا په‌یه‌دێ هه‌موو د به‌رژه‌وه‌ندیا رژێما ئه‌‌سه‌دی دا ب دووماهی هات و ده‌نگۆیا دامه‌زراندنا هه‌رێما ئارام ل باكورێ سوریێ په‌یه‌ده و رژێم شێت هار كرنه چنكو دزانن ئه‌ڤه دووماهیكا وانه و دوباره بوونا ئه‌زموونا باشورێ كوردستانێ و كۆسۆڤۆیه، ژبه‌ر هندێ هۆسا ب دژواری ل دژی هێزا پێشمه‌رگێن رۆژاڤا ده‌ركه‌فتن و ئالدار خه‌لیلی دووری هه‌موو پره‌نسیبێن كوردانه و گوت: (هه‌رده‌ما پێشمه‌رگێن رۆژاڤا بهێنه رۆژاڤایێ كوردستنێ وێ شه‌ر ده‌ركه‌ڤه)، دیاره ژبیرا ئالدار خه‌لیل و په‌یه‌دێ چوویه ملله‌تێ كورد نه‌فره‌تێ ل هه‌ر كه‌سی دكه‌ت یێ شه‌رێ براكوژیێ بكه‌ت و یێ ملله‌تی نه‌فه‌رت كر ئێدی جهێ ل سه‌ر ئاخا پیرۆزا كوردتانێ نامینیت.
4.02.17
هه‌رزێله‌یا بریارێن حكومه‌تێ
چ فیلاتى و هۆشمه‌ندى تێدا نینه ده‌ما مرۆڤ بێژیت: حكومه‌تا هه‌رێمێ تنێ بریار ده‌رخستن پێ مایه و شیانا دابینكرنا بچووكترین خزمه‌تگوزارێن ئێكسه‌ر په‌یوه‌ندى ب ره‌وشا ژیارا خه‌لكى ڤه هه‌ى نینه، وه‌سا نه‌هێته تێگه‌هشتن كو ئه‌ڤ بێ په‌لێژانیه و ئه‌ڤ شه‌پلینا حكومه‌تێ كه‌فتیێ ده‌رئه‌نجام و به‌رهه‌مێ دابه‌زینا بهیایێ پترۆلێ ژ نشكه‌كێڤه و زێده‌بارى شه‌رێ تیرۆرێیه كو حكومه‌تا هه‌رێمێ ته‌كه‌زیێ ل ڤان هه‌ردوو ئه‌گه‌ران دكه‌ت!! لێ دراستیدا ئه‌و هه‌ردوو هۆكار پشكه‌كن ژ وان سه‌ده‌مێن ڤێ قه‌یرانا حكومه‌ت نیڤ شه‌له‌لى كرى و ئالزاندى.
بۆ شرۆڤه‌كار و شاره‌زایێن بیاڤێ ئابوورێ، پیشه‌سازى و ووزێ دهاته پێشبینى كرن كو شلقه‌ك ببهایێ پترۆلێ بكه‌ڤت بهایێ وێ بهێته‌خارێ و وه‌لاتێن به‌رهه‌مدار بتایبه‌ت یێن ئابوورا وان پشتبه‌ستنێ پێ دكه‌ت ژ مێژه‌یه هزرا ڤێ چه‌ندێ كریه و به‌رهه‌ڤیێن خوه بۆ رۆژه‌كا هۆسا كرنه، ژبه‌رهندێ ئه‌و وه‌لات تۆشى چ گرفتێن مه‌زنێن ئابوورى نه‌بوون. دبیت سه‌ده‌مێن شه‌پلینا حكومه‌تا هه‌رێمێ د بیاڤێ به‌رهه‌م ئینان و فرۆتنا پترۆلێ دا كێم ئه‌زموونیا وێ بیت و ئه‌ڤه ژى ره‌وایه لێ خراب به‌رهه‌م ئینان و فرۆتن ب وى ره‌نگێ مه هه‌مایان دیتى نه‌ڕه‌وایه و دڤیابا حكومه‌تا هه‌رێمێ سه‌ربۆر ژ كریزا سالێن 1973 یێن ده‌وله‌تێن به‌رهه‌مدار كه‌فتینێ بدیتبا و كه‌سێن شاره‌زا ل وه‌زاره‌تا سامانێن سروشتى دامه‌زراندبان و ژ گێولیا كه‌سۆكى پاراستب. ژبلى كو حكومه‌تێ پشتبه‌ستى بتنێ ب كه‌رتێ پترۆلێ ڤه به‌ست و هه‌موو بیاڤێن دن پشته گوه كرن كو ئه‌گه‌ر ب نه‌خشه‌كێ ئابوورى یێ ته‌كوز یێ دومرێژ هاتبایه نه‌خشه كرن كو هه‌موو دزانن هه‌رێما كوردستانێ خودانا كه‌ش و هه‌وایه‌كێ لباره بۆ هه‌ر بزاڤه‌كا ئابوورى كو شوونا پترۆلێ بگرن وه‌ك: چاندن، خودانكرنا ته‌رش و كه‌والى، په‌له‌وه‌ر و كه‌رتێ گه‌شتوگۆزارێ.
د سه‌رڤان شاشیان گشتان ڕا هه‌تا ئه‌ڤرۆ ئه‌ژى هه‌ر رایه‌دارێن حكومه‌تێ ل سه‌ر ده‌هودووا خوه‌نه و به‌رده‌وامیێ دده‌ن ساسه‌تا خوه یا ئابوورى كو ئه‌ڤه‌ژى كاره‌ساته‌كا جڤاكى كو دێ ئاشته‌واریا جڤاكى ئێخیته دمه‌ترسیێدا، ژبلى مه‌زن كرنا باندۆرا شه‌رێ تیرۆرێ ل سه‌ر كوورتر لێكرنا قه‌یرانا هه‌رێما كوردستانێ.
ب ڤه‌دیتنا هێجه‌تان بۆ ڤێ قه‌یرانا هه‌رێما كوردستانێ و خوه بازدان ل سه‌ر سه‌ده‌مێن سه‌ره‌كى ئه‌وێن مه ئاماژه پێكرى نه‌ك قه‌یران ناهێته چاره‌سه‌ركرن به‌لكو قه‌یران دێ كوورتر لێهێت و هه‌ر نوكه هێدى هێدى ده‌رئه‌نجامێن نه‌باشێن درێژبوونا قه‌یرانێ یێن دهێنه شكه‌فا جڤاكێ كوردستانێ ئه‌و ژى لێكترازانا جڤاكى و تێكچوونا بهایێن مه یێن جڤاكى یا ژ هه‌موویێ مه‌زنتر كو كاره‌ستێن مه‌زن ب خوه دئینیت ئه‌و ژى بێ بها بوونا حكومه‌تێیه د چاڤێن جڤاكى دا كو ئه‌ڤرۆ ب باشى د ناڤ جادا كوردستانێ دا پێ دئێته هه‌ستكرن و گوت گه‌تكێن مینا چاڤێ حكومه‌تێ یێ ل به‌رووكێن وه‌لاتیان و كانێ دێ ب چ ره‌نگ پاره‌یان كۆمكه‌ت نه‌خاسمه پشتى حكومه‌تێ كۆمه‌كا بریارێن هه‌رزێلكى ده‌رێخستین كو ته‌ڤ نه بۆ باشتر لیكرنا ره‌وشا وان یا ئابوورى بوو وه‌ك بریارا ژمارێن ترۆمبیلان، سه‌رپێچیێن قانوونێن هاتنوچوونێ و یا ژ هه‌موویێ سه‌یرتر بریارا پارێن گلێشى!! ئانكو وه‌لاتى گه‌هشتیه وێ باوه‌رێ كو حكومه‌ت ب ئه‌ركى خوه نارابیت و بۆیه ته‌ڤشوویێ به‌رێخوه، ئه‌ڤه ده‌ستپێكه‌كا مه‌ترسیداره چنكو هه‌رده‌ما سیهانه‌تا حكومه‌تێ ژ لایێ خه‌لكیڤه كێم بوو هنگى خه‌لك دێ بۆ خوه ل پارێزڤانه‌كى گه‌رهن كو وان بپارێزن و ئێدى رێز بۆ چ بریارێن وێ حكومه‌تێ نامینیت هه‌روه‌كو به‌رى چه‌ند رۆژان مه دیتى كانێ چه‌وان ب سه‌ده‌مێ كێشه‌كا جڤاكى چه‌ند هزان مرۆڤ كۆمبوون و گه‌ف ل دادگه‌هێن حكومه‌تێ كرن كو بریارێ دبه‌رژه‌وه‌ندا وان بده‌ن و كه‌سێ گونه‌هبار هه‌لبه‌ت ل گۆڕه‌ى دیتنا وان(هه‌رچه‌نده هه‌ركه‌س به‌رامبه‌رى قانوونێ یێ بێ گونه‌هه هه‌تا داگه‌ه بریارێ بده‌ت)، ئه‌ڤ خرڤه‌بوونێن هۆسا بێى ده‌ستووریا جهێن شوله‌ژێ، پێشلكرنا سیهانه‌تا حكومه‌تێیه و ده‌ستپێكه‌كا مه‌ترسیداره ل سه‌ر ئاشته‌واریا جڤاكى.
حكوممه‌تا هه‌رێمێ ئه‌گه‌ر تنێ بریاران بده‌رێخیت و هێجه‌تان بۆ شكه‌سته‌نێن خوه ببینت و چ نه‌خشه رێكێن ته‌كوز بۆ قه‌یرانێ نه‌بینیت و ب مجدى ل سه‌ر كار نه‌كه‌ت، ئه‌ڤ سیهانه‌تا هه‌تا نوكه ماى ژى نامینیت و ئاشته‌واریا جڤاكى دێ ل هه‌رفتێ بهارا عه‌ره‌بى راوه‌ستیت و دێ ریسێ بۆ ده‌له‌تبوونێ هاتیه هلچنین، بیته هرى.
28.01.2017
سیته‌مه‌كێ نوو یێ جیهانێ برێڤه‌یه
سه‌ركه‌فتنا دونالد ترومپى د هه‌لبژارتنێن سه‌رۆكاتیا ئهمریكا دا كو گه‌له‌ك د وێ باوه‌رێ دا بوون كو نه‌كانه دید و بۆچوونێن وى یێن پۆپۆلستى ئه‌وى بگه‌هینن سه‌رته‌ختێ فه‌روه‌ریێ ل وه‌لاته‌كێ دیموكراتى وه‌كو ئهمریكا و بالاده‌ستیا عه‌قلانیێ لێ خودان هه‌ژموون و بریار ژبلى كه‌ڤناریا ده‌زگه‌هێن ده‌وله‌تێ و خودان سه‌ربۆره‌كا كێم وێنه د به‌رهنگاریا كێشه و گه‌فێن روو ب رووى بووین د دیرۆكێ دا.
شرۆڤه‌كار و پۆلیتۆلۆگ ل سه‌رانسه‌رى جیهانى ماتمایى مانه ل سه‌ر ڤى ره‌وتێ سه‌رۆكێ نوو یێ ئهمریكا هه‌لبژارتى كو پۆپۆلیست دهێته ناڤكرن چنكو ب سه‌ركه‌فتنا دیدا گلۆبالیزمێ سه‌ر دوو باسكیا جیهانێ (باسكێ وارشۆ ب سه‌رۆكاتیا ئێكه‌تیا سۆڤیه‌تێ و باسكێ ناتۆ ب سه‌رۆكاتیا ئهمریكا)كو تێدا به‌رژه‌وه‌د و بلند ڕاگرتنا مافێ مرۆڤى سه‌ردێرا سیسته‌مێ جیهانێ یێ نوو بوو، ئه‌ڤێ چه‌ندێ وه‌كر پیرۆزیا سنۆران نه‌مینیت و بۆ سه‌ده‌م كو هێزێن هه‌رێمى په‌یدا ببن ل سه‌ر كیستێ زلهێزێن جیهانێ(روسیا و رۆژئاڤا بتایبه‌ت ئهمریكا)، دڤێت نه‌هێته ژبیركرن كو پشتى هه‌لوه‌شیانا ئێكه‌تیا سۆڤیه‌تا به‌رێ جیهان به‌ره‌ف ئێك جه‌مسه‌ریێ چوو لێ گه‌له‌ك نه‌ڤه‌كێشا هێزێن هه‌رێمى په‌یدا بوون و رۆژ بۆ رۆژێ رۆلى چینێ یێ ئابوورى به‌ره‌ف هلكشانێ چوو و هه‌روه‌سا ره‌سیا ژى ل خوه مكۆر هات و بزاڤ كر كو دیسا هه‌ژموونا خوه ل سه‌ر ئاستێ جیهانێ په‌یدا بكه‌ت.
ب خاڤبوونا هه‌ژموونا ئهمریكا و دیاربوونا ئێكه‌تیا ئه‌ورۆپى وه‌ك هێزه‌ك ئابوورى و هه‌ڤ ڕك بۆ ئهمریكا و هێزا نوو یا چینێ و ل سه‌ر ئاستێ سیاسى ژى پشته‌ڤانیا ئه‌ورۆپا بۆ پرسێن دیمۆكراتى، مافێ مرۆڤى و ده‌ستتێوه‌رنه‌دان د ناڤخۆیا وه‌لاتێن جیهانا سیێ دا، ئه‌ڤه بۆ هۆكاره‌كا دن بۆ بهێزبوونا هێزێن هه‌رێمى ل رۆژهه‌لاتا ناڤین(توركیا، سعودیا، ئیسرائیل و ئیران) و هه‌روه‌سا ل جیهانێ ژى مینا پلنێن ئاسیا(ئه‌ندونیسیا، چین، تایوان ومالیزیا) و چه‌ندین وه‌لاتێن دن.
ل رۆژهه‌لاتا ناڤین په‌یدابوونا هێزێن هه‌رێمى بۆیه سه‌ده‌م كو ده‌ڤه‌ر به‌ره‌ف شه‌ره‌كێ ناڤخوه‌یى یێ دژوار بچیت چنكو ل ڤێ ده‌ڤه‌رێ پرسێن دیمۆكراتیك و ئه‌تنى و جڤاكى سێگۆشه‌كا بڤه بوویه و نه‌هاتنه چارسه‌ركرن، مینا پرسا كوردى، كێشا فله‌ستینێ ژبلى دانپێنه‌دان ب بچووكترین مافێ مرۆڤى و ژ خوه پرسا دیمۆكراتیێ و شێوێ برێڤه‌برنا ده‌ستهه‌لاتێ ب چ ره‌نگه خه‌به‌ردان و هزر تێداكرن نه دهاته كرن و چ بیاڤ بۆ نه‌هێلابوو و هزركرن د ڤان بیاڤان مه‌زنترین تاوان بوویه.
به‌رده‌وام بوونا شه‌رێن ناڤخوه ل رۆژهه‌لاتا ناڤین ب تایبه‌ت ل سوریا كو بوویه كۆربه‌قه‌كا ناڤده‌وله‌تى و باندۆره‌كا نه‌گه‌تیڤ ل پێكڤه‌كاركرنا هێزێن هه‌رێمى د شه‌رێ دژى تیرۆرێ دا هێلایه و سه‌ره‌داڤێن چاره‌سه‌ریێ ئالۆز بوونه و ئه‌ڤێ چه‌ندێ وه‌كریه كو تیرۆریست ب كه‌یفا دلێ خوه ل جیهانێ بهێن و بچن و هه‌ر جهێ بڤێت گۆرزێ خوه بداوه‌شینن وئاسیاشا جیهانێ شلۆق كریه.
تیرۆرا ئه‌ڤرۆ به‌رووكا جیهانێ گرتى هه‌رچه‌نده ب تیرۆرا (ئیسلامى) دهێته ناڤكرن، به‌رهه‌مێ خاڤبوونا هه‌ژموونا ئه‌مریكایه ل سه‌ر ئاستێ جیهانێ و چاڤنقاندنا وێ بۆ په‌یدابوونا هێزێن هه‌رێمى بۆ وێ چه‌ندێ بوو كو بكارن رێكێ ل پێلا ئاواره و تیرۆرستان بگرن لێ ڤان هێزان ئه‌ڤ چه‌نده بۆ خوه بده‌لیڤه زانى دا هه‌ژموونا خوه ل ده‌ڤه‌رێ مه‌زن بكه‌ن ب تایبه‌ت توركیا كو دخاست بهێجه‌تا شه‌رێ تیرۆرێ هه‌ژموونا ئۆسمانیان ساخ بكه‌ته‌ڤه ژبلى بكار ئینانا كارتا ئاواره‌یان بۆ ئه‌ندامبوون د ئێكه‌تیا ئه‌ورۆپى دا. ئه‌ڤ ته‌ڤ ل هه‌ڤیا ئهمریكا د سیاسه‌تا ده‌رڤه دا رێك ڤه‌كر كو دووباره روسیا وه‌ك زلهێزه‌كا خودان هه‌ژموون دیار ببیت ب تایبه‌ت پشتى داگیركرنا گزیرتا كرم و دامه‌زراندنا مۆشه‌كێن ئه‌تۆمى به‌ره‌ف ئه‌ورۆپا و بێ ده‌نگیا ئهمریكا ل سه‌ر ڤان كریكاران لایه‌نێ راستڕه‌و و هزر رازیست و پۆپلیست بهێز بكه‌ڤیت و سیسته‌مێ گلۆبالیزم و پێكڤه‌ژیانێ و دیمۆكراتیێ بێخیته دمه‌ترسیێدا. هه‌لبه‌ت ب سه‌ركه‌فتنا باسكێ رازیست و پۆپۆلیست دێ هه‌موو كولتۆرێ پێكڤه‌ژیان و دیمۆكراتیێ و رێزگرتنا مافێن مرۆڤى ژبن به‌ت و ئه‌ڤه ژى دێ رێكێ ل به‌ر پێكدادنا كولتۆران خوه‌ش كه‌ت.
وه‌ك مه به‌رى نوكه رۆهنكرى كو ژ سه‌ده‌مێن خاڤبوونا رۆلى ئهمریكا د سیاسه‌تا ده‌رڤه دا ئه‌ڤ بێشۆڕه‌یى و لێكترازان د به‌رژه‌وه‌ندیان دا ل سه‌ر ئاستێ جیهانێ په‌یداكر و بوو سه‌ده‌م كو لایه‌نێ پۆپۆلیست ل ئهمریكا بسه‌ركه‌ڤیت و ل ئه‌ورۆپا ژى یێ خوه رێك دئێخیت و پشته‌ڤانیێ ل سیاسه‌تا سه‌رۆكێ نوو یێ ئهمریكا دكه‌ن.
ب سه‌ركه‌فتنا لایه‌نێ پۆپۆلیست ل ئهمریكا جیهان یا به‌ره‌ف سیسته‌مه‌كێ نوو یێ مه‌ترسیدار دچیت كو تێدا ئهمریكا هه‌ژموونه‌كا ته‌ك لایه‌ن په‌یاده بكه‌ت و پشته‌ڤانیێ دێ ل لایه‌نێ ئه‌نتى دیمۆكراتى كه‌ت، ئه‌ڤه ژى دێ رێكێ ل به‌ر هه‌ژموونا هێزێن هه‌رێمى گریت و رۆلێ وان نامینیت، لێ دبه‌رامبه‌ردا دێ هێزێن ئه‌نتى دیمۆكراتى و رازیست بهێز ئێخیت و توركیا ئه‌ردۆغانى یا خوه بۆ ڤێ قۆناغێ به‌رهه‌ڤ دكه‌ت، فه‌ره حوكمه‌تا هه‌رێما كوردستانێ خوه بۆ ڤێ قۆناغێ به‌رهه‌ڤ بكه‌ت چنكو هێشتا ئه‌ڤ سیسته‌مه د قۆناغا ئاماده‌بوونێ دایه.
24.01.2017
سه‌رۆكێ ئهمریكا سه‌فه‌ربه‌رلك ڕاگه‌هاند
سه‌رۆكێ ئهمریكا یێ نوو(دونالد ترومپ) د یه‌كه‌م په‌یڤا خوه دا به‌رمله‌كێ هۆشداریان دا، هۆشداریێن هه‌رى به‌رچاڤ كو ترس و ساویر په‌یداكریه پرسا پاراستنێ و هه‌ڤپه‌یمانیان و پرسا تیرۆرێ، جیهان هه‌موو ب خوه ڤه گێژكر و هه‌ر وه‌لاته‌ك ل گۆڕه‌ى به‌رژه‌وه‌ندیێن خوه ئه‌ڤ په‌یڤا وى شرۆڤه‌كرن كانێ چه‌وان د هه‌وا هه‌لبژارتنان دا دیدێن خوه ڤه‌كرى دگوتن و بێى رتۆش و زمانێ دبلۆماسیان وه‌سان ب هه‌مان هه‌ناسه و په‌یڤ و دید، نه‌خشێ سیاسه‌تا خوه دووباره‌كرن ئانكو چ گوهۆرین د سیاسه‌تا وى دا روو نه‌دا وه‌كو دهاته پێشبینى كرن و گه‌له‌ك شرۆڤه‌كاران ددا خویاكرن كو ئه‌ڤ ره‌نگه ده‌ربرینه یێن هه‌لبژارتنانه و ده‌ما بگه‌هیته كۆچكا سپى دێ ب زمانه‌كێ دن ئاخڤیت!!
بۆچى سه‌رۆكێ نوو یێ ئهمریكا هه‌ر ل سه‌ر هه‌مان ره‌وتێ بۆ خوه هه‌لبژارتى ما كو د زانستێ سیاسى دا ب پۆپۆلیست دهێته پێناسه‌كرن و پارتا كۆمارى ژى پشته‌ڤانیا وى دكه‌ت هه‌رچه‌نده پارتا كۆمارى باش دزانیت كو سیاسه‌تا پۆپۆلستى ژبلى نه‌ئارامى و لیكترازانا جڤاكى ل سه‌ر ئاستێ ناڤخوه و تێكدانا ئاسایشا جیهانى تشته‌ك دت لێ په‌یدا نابیت؟ خوه‌پیشاندنێن دژى ترومپى ل ئهمریكا و سه‌رانسه‌رى جیهانێ وێ یه‌كێ ته‌كه‌ز دكه‌ت كو سیاسه‌تا پۆپۆلستى لێكترازانا جڤاكى په‌یدا دكه‌ت و كولتۆرێ پێكڤه‌ژیانێ دئێخیته دمه‌ترسیێدا.
ب سه‌ركه‌فتنا دونالد ترومپى ل سه‌رانسه‌رى جیهانێ باسكێ پۆپۆلیست بهێز كه‌فتیه ب تایبه‌ت ل ئه‌ورۆپا كو مه‌ترسى ل سه‌ر سیسته‌مێ دیموكراتیێ و پێكڤه‌ژیانێ په‌یدا دكه‌ت، ئه‌ڤ باسكه ب تامه‌زرۆیى ل به‌ندا هه‌وا هه‌لبژارتنانه دا به‌ڕكێ لبن پارتێن سوسیال ده‌موكرات و لیبه‌رال و كه‌ڤنپارێزان(كۆنزه‌رڤاتیڤ) ده‌ربێخن، ل ئه‌لمانیا ئه‌ى ئێف دى و ل فه‌ره‌نسا به‌ره‌یا نیشتمانى و هتد.
مه گوت سه‌رۆكێ ئهمریكا به‌رمله‌كێ هۆشداریان دا و ل سه‌ر ڤان هۆشداریان هه‌ر ده‌وله‌ته‌ك ل گۆڕه‌ى به‌رژه‌وه‌ندێن خوه كه‌فتیه له‌په‌قۆتێ و ترس ئێخستیه دلێ گه‌له‌ك ده‌وله‌تان، لێ یا په‌یوه‌ندى ب كێشا كوردى ڤه هه‌ی و ب تایبه‌ت هه‌رێما كوردستانێ پرسا تیرۆرێیه و كوردستان بوویه سه‌نگه‌رێ پێشیێ یێ شه‌رێ تیرۆرێ، ئه‌ڤجا هه‌ر گوهۆڕینه‌كا ب كه‌ڤیته شێوێ روو بروو بوونا وێ دێ كێنجا خوه ل هه‌رێما كوردستانێ كه‌ت.
هه‌رچه‌نده هێشتا زوویه مرۆڤ پشتا خوه ب سیاسه‌تا نوو یا ئهمریكا راست بكه‌ت چنكو به‌رژه‌وه‌ندیێن وه‌لاتان به‌رده‌وام دهێنه گوهارتن لێ بۆ شه‌رێ تیرۆرێ ئه‌ڤێ جارێ ئهمریكا یا رژده و یه‌كه‌م جاره هۆسا ڤه‌كرى د روودانه‌كا هۆسا گرنگ دا ئه‌و ژى راده‌ستكرنا ده‌ستهه‌لاتێ بۆ سه‌رۆكێ نوو سه‌فه‌ربه‌رلكیێ ل سه‌ر تیرۆرا شیسلامێ رابگه‌هینیت، هه‌رچه‌نده تیرۆر یا بێ دینه لێ د ڤان سالێن دووماهیێ دا پرانیا كریارێن تیرۆرى ئه‌وێن هاتینه ئه‌نجامدان باسكێ ئیسلاما تۆندڕه‌و ئه‌نجامداینه و ل كوردستانێ ژى چه‌ندین كریارێن تیرۆرستى ئه‌نجامداینه.
هشككرنا سه‌ره‌كانیێن تیرۆرێ پشكه‌كا گرنگه ژ سیاسه‌تا نوو یا ئهمریكا و سه‌رۆكێ نوو یا ب ستۆیێ خوه‌ڤه گرتى كو چ ته‌نگ سستیێ نه‌ئیخیته ڤى باده‌كى ژبلى بزاڤكرن بۆ ڤه‌گه‌راندنا سه‌نگا خوه ل رۆژهه‌لاتا ناڤین و كورۆپه‌كرنا رۆلێ روسیا، توركیا، سعودیا و ئیرانێ ل ڤێره هه‌رێما كوردستانێ دكاریت مفاى بۆ پرسا سه‌ربخۆیا كوردستانێ ژێ ببینیت و ببیته پشكه‌ك ژ وى باسكى یێ نووكه ئهمریكا ل سه‌ر كار دكه‌ت ئه‌و ژى به‌ره‌یه‌كێ جیهانى ل دژى تیرۆرێ(تیرۆرا ئیسلامى) و نه‌هێلانا هێزێن هه‌رێمى توركیا، سعودیا و ئیران چنكو به‌رهه‌مێ هێزێن هه‌رێمى تیرۆرێ گه‌له‌ك گه‌شه‌كر و بوویه گه‌فه‌كا مجد ل سه‌ر ئاسایشا جیهانى و كولتۆرێ پێكڤه‌ژیانێ.
ب كێمبوونا رۆلێ هێزێن هه‌رێمى(توركیا، سعودیا و ئیران) دێ گه‌فا توركیا و ئیرانێ ل سه‌ر پرسا سه‌رخۆبوونا كوردستانێ كێم بیت و دڤێت نه‌هێته ژبیركرن كو ژ مێژه‌یه ئهمریكا هه‌رێما كوردستانێ وه‌ك ده‌وله‌ته‌ك دیفاكتۆ ناس دكه‌ت و سه‌ره‌ده‌ریێ دگه‌ل دكه‌ت و ل شه‌رێ دژى تیرۆرێ ژى رۆلێ هه‌رێما كوردستانێ دیاره.
ده‌مێ ل پێشیا مه ب گه‌له‌ك سه‌رپرایزا یێ ئاڤسه و ره‌ندۆڵا دونالد ترومپى ژێ داگرتیه، پرس ئه‌وه كانێ هه‌رێما كوردستانێ دكاریت مزێ وێ دڤێت ژ ره‌ندۆڵا وى بكێشیته ده‌رێ و خه‌ونا مه بكه‌ته راستى(خه‌ونا ده‌وله‌تبوونێ)!!
21.01.2017
گه‌له‌ك بخێر و خوه‌شى هاتى نڤیسه‌رێ (بیاڤێ)
چه‌ند خوه‌شه ده‌ما د كه‌ش و هه‌وایه‌كێ هه‌موو ده‌لیڤه و بیاڤ ب كراسه‌كێ ڕه‌شبینى و نووچه‌یێن دلساركه‌ر دا خوه ب سه‌ر هه‌موو كونجێن ژیانا مه دا گرتین و بالاده‌ستیا هزرێن توندڕه‌و و نه‌په‌ژراندنا یێ جودا كو بوویه تیتا ڤى سه‌رده‌مى ل رۆژهه‌لاتا ناڤین و كوردستان ژى دگه‌ل، هنده‌ك ده‌نگێن نه‌رم یێن ب عه‌قلانیێ خه‌ملاندى سنۆر و گڤاندێن هنده‌ك ته‌خ و چینان راچاندین بۆ به‌رده‌وامى دان ب لێكترازان و كێشمه‌كێشێن مه وه‌ك نه‌ته‌وه دئێخیته دگومانێدا و هه‌ر ل كنارانێن روودانان ب حه‌سره‌ت ته‌ماشه‌ى كاڵبوونا خه‌ونێن مه‌زنێن خوه بكه‌ین، هه‌بن و ب دلخوه‌شى ل رۆژا 19.01.2017 ده‌نگه‌كى د ستوونه‌كا نوو یا رۆژناما ئه‌ڤرۆ دا ب ناڤێ (بیاڤ) په‌ردا ڤێ تارمایا ستوور چڕاند و وه‌ك مێهڤانه‌ك روح سڤك ل و تژى هه‌گبه‌یا وى مزگینى و ئه‌ڤین سلاڤى مه‌كر و ئه‌ڤى مه‌رده مێرى(د. سالار عوسمان) سۆز ژى یا دا كو هه‌موو پێنجشه‌مبیان كه‌لێن شه‌كرا ئه‌ڤین و هه‌ڤپه‌ژراندن و هه‌ڤ ئه‌ڤاندنێ ل گه‌ل مه پارڤه بكه‌ت و ماره‌كرنا په‌یڤێن مه‌لایێ جزیرى ل گه‌ل یێن نالى ل گۆڤه‌ندا حاجى قادرێ سۆفیێ رێبازا خانیێ مه‌زن، گۆڤه‌ندا سێپى و شێخانیێ پێ گه‌رم بكه‌ت.
ئه‌ڤ پێنگاڤه د ڤێ شه‌ڤڕه‌شا سه‌مایا په‌یڤێن مه‌لایێ جزیرى ل په‌یڤێن نالى نامۆ بووى دا و ئه‌ز پاشا و تو حاشا، ئه‌ز ئه‌شۆ و تو ئه‌هریمه‌ن و حاشا و حاشا یێن تیك و ده‌رز وه‌سا د نابه‌ینا مه دا ڤه‌كرین، ئێدى لێكنێزیك بوون بوویه ده‌رباز بوون ژ زڤرۆكا به‌رمۆدا و هه‌موو ژى ب سایا سیاسه‌تمه‌دارێن حه‌یرانێن دوو فلسا كو هه‌ر رۆژ ل سه‌ر به‌نه‌كى دله‌یزن مینا گولبه‌رۆژێ، ب خوه پێنگاڤه‌كه به‌ره‌ف خوه ب خوه و ڤه‌ژاندنا شاده‌مارێن مه ب هه‌زار ره‌نگان پێكڤه گرێده‌ت.
دشاشن یێن بزاڤێ دكه‌ن درزه‌كێ د نابه‌ینا مه دا ئاڤا بكه‌ن(كرمانجیا سه‌رى و كرمانجیا ژێرى)، دبه‌رێدا سه‌رنه‌كه‌فتنه و ژ ناها وێڤه ژى ب سه‌ر ناكه‌ڤن، لێ مخابن سیاسیێن مه درزه‌ك په‌یداكریه و ترسا هندێ په‌یدابوویه كو بشێن د ڤێ درزێرا پێكۆلا هندێ بكه‌ن؛ لێ د. سالار عوسمانى به‌رپێكه‌ك لێدا و ب هندێ ژى رانه‌وه‌ستا به‌لكو ب شێوه‌یه‌كێ سۆرمانجى ئانكو كرمانجى و سۆرانى تێكه‌ل سلاڤى مه‌كر. لڤێره فه‌ره ئاماژه بده‌مه وێ چه‌ندێ كو یه‌كه‌م كه‌سێ سۆرمانجى ب كار ئیناى ره‌حمه‌تى سامى عه‌بدلره‌حمان بوو.
د ته‌نگاڤترین ده‌م دا تیرۆژێن هیڤیا ژ كه‌ڤلۆژانێن سخنتیا دهه‌لێن و وه‌رچه‌پ دكه‌ڤن هه‌ر بیاڤه‌كى و ئاسۆیێن پر ره‌هه‌ندى ل به‌ر ملله‌تان ڤه‌دبن. ئه‌ڤرۆ ملله‌تێ مه د قۆناغه‌كێ دایه كو مرۆڤ ئێره‌ییێ خوه ب سۆمالێ دبه‌ت، لێ دیسان ژى مرۆڤ شادمان دبیت ده‌ما كه‌سێن وه‌كو نڤیسه‌رێ(بیاڤێ) هه‌بن و ب ئارامى و دوورى ده‌مارگیرى و تاگیرى ل چاره رێكان دگه‌رهن و ده‌ستێن خوه ددانن سه‌ر برینان و پرا د ناڤبه‌را ته‌خێن جڤاكێ كوردستانێ دا ئاڤا دكه‌ن، ئه‌ڤ بزاڤا د. سامان عوسمانى بیرا من ل نڤیسه‌رێ یابانى نوبوئه‌كى نوتوهارا ئینا ده‌ما دبێژیت: كێشه نه ئه‌وه ئه‌م نه‌فره‌تان ل ئهمریكا بكه‌ین یان نه، كێشه ئه‌وه ئه‌م رۆلێ خوه ب راستى ناس بكه‌ین و پاشى خوه بیێ دله دلیدان ره‌خنه بكه‌ین پاشى وێ رێكێ بهه‌لبژێرین یا شاشیان چاره‌سه‌ر دكه‌ت و ناهێلیت دپاشه‌رۆژى دا دووباره ببن.
هه‌ستپه‌روه‌رى چ پاشه‌رۆژا ئاڤا ناكه‌ن چنكو هه‌ست پرسه‌كه كه‌سۆكیه و پێگیرى ب هه‌ستان سه‌رپشك كرنا وێ د بریاراندا ژبلى ته‌حه‌م و ئاخینكان تشته‌ك دن ژێ په‌یدا نابن. ره‌خنه و ئازادیا ره‌خنه‌گرتنێ بۆ هه‌ر تشته‌كى پێنگاڤا ئێكێ یه به‌ره‌ف ڤه‌دیتنا چاره رێكان بۆ هه‌ر پرسه‌كێ.
17.01.2017
دبیت كۆنفراسێ ئه‌ستانه دوباره‌بوونا رێككه‌فتنا جه‌زائیر((6/03/1975) بیت!
بریاره ل 23.01.2017 ل ئه‌ستانه پایته‌ختێ كازاخستانێ كۆنفراسه‌ك ل نابه‌ینا هێزێن چه‌كدار یێن ئوپۆزسیۆنا سورى و حوكمه‌تا به‌شار ئه‌سه‌دى دا بهێته ئه‌نجامدان بۆ ڤه‌دیتنا چاره رێیه‌كێ كو دووماهیكه‌كێ بۆ كێشا سووریێ بینن و ئه‌ڤ كوشتو كوشتاره ب داوى بهێت، یا سه‌یر ئه‌وه بۆ ڤێ كۆنفراسێ ئوپۆزسیۆنا سیاسى یا نه‌چه‌كدار و هه‌روه‌سا په‌یده ژى نه‌هاتیه ڤه‌خاندن. نه ڤه‌خاندنا ئوپۆزسیۆنا سیاسى كارێ مه پێڤه نینه لێ نه‌ڤه‌خواندنا په‌یه‌دێ بۆ مه جهێ پسیار و گومانێ یه كو نهێنیه‌كا ڤه‌شارتى ل پشت ڤێ چه‌ندێ هه‌یه كو ئێكسه‌ر په‌یوه‌ندى ب كێشا كوردى ل سووریێ و ده‌ڤه‌را رۆژهه‌لاتا ناڤین ب گشتى هه‌یه.
ئاماده‌كارێن ڤێ كۆنفراسێ(رۆسیا و توركیا) دبێژن: ئه‌ڤ كۆنفراسه بزاڤه‌كه بۆ بێده‌نگكرنا چه‌كیه و پاشى دێ به‌حسێ باده‌كێن دن ل دووڤدا ئێته‌كرن! ئه‌رێ گه‌لۆ ما په‌یه‌ده نه‌خودان هێزه‌كا چه‌كداره و فه‌رمان و سه‌فه‌ربه‌رلك ل سه‌ر داعش و گرۆپێن ب تیرۆرست دهێنه هه‌ژمارتن، نه‌راكریه و هه‌تا ڕاده‌كى باش گورزێن گران لێ خستینه و رۆژانه ئه‌ردى ژ له‌پێن وان ده‌ردخینن!! ی‌و ڤێ نه‌ڤه‌خاندنێ په‌یه‌دێ خوه ماتكریه و كپێن ژ خوه نه‌ئینایه، ئه‌گه‌رێن ڤێ بێده‌نگیا وێ گه‌لۆ چنه؟! ئه‌ڤ بێ هه‌لویستیه وێ گومانێ بهێز دئێخیت ئه‌وا د ناڤ هێزێن كوردى دا دبه‌لاڤ كو په‌یه‌ده پشكه‌كه ژ رژێما ئه‌سه‌دى! ژبلى په‌یدابوونێ وێ یا سه‌یر و بله‌ز ل سه‌ر ئاستێ كوردستانێ وه‌ك هێزه‌ك بالاده‌ست و نه روو بروو بوونا وێ ل گه‌ل رژێمێ و دبه‌رامبه‌ردا ل گه‌ل هێزێن كوردى نه‌كۆك و دگه‌ل حوكمه‌تا هه‌رێمێ ژى په‌یوه‌ندى و ره‌وش دیاره!!
كێشا سووریێ ژ كێشه‌كا ناڤخوه‌یى بوویه كێشه‌كا ناڤده‌وله‌تى و كێنجا خوه ل سه‌ر ئاسییشا ناڤده‌وله‌تى هشتیه ژ زێده‌بوونا كریارێن تیرۆرستى هه‌تا بگه‌هته كێشا ئاواره‌یان، لێ ژبه‌ر تێكهه‌لێشى و هه‌ڤبریا به‌رژه‌وه‌ندێن زلهێزێن جیهانێ و یێن ده‌ڤه‌رێ (تاگیرێن تائیفى و ئتنى) كێشا سووریێ ڤه‌كێشا و ژ لایه‌ن نه‌شیان ئه‌جندا خوه بسه‌پینن و پێكڤه كووس بوونه. ژبه‌ر ڤێ چه‌ندێ روسیا و توركیا پشتى ناكۆكیێن دژوار و گه‌له‌ك جاران نێزیكى روو بروو بوونا له‌شكرى دبوون ل سه‌ر ئاخا سووریێ(ئێخستنا فرۆكا جه‌نگى یا رۆسیا)، گه‌هشتنه وێ باوه‌رێ فه‌ره پێكڤه كار بكه‌ن بۆ بێده‌نگكرنا چه‌كان، هه‌لبه‌ت هه‌ر ئێك ل گۆڕه‌ى به‌رژه‌وندێن خوه!
كێنجا توركیا و هه‌ڤالبه‌ندێن وێ (سعودیا، ئیمارات و قه‌ته‌ر) ل سه‌ر ته‌ڤایا گرۆپێن چه‌كدار و ئوپۆزسیۆنا سووریا دیاره و هه‌روه‌سا كێنجا رۆسیا ل سه‌ر ئه‌سه‌دى دیاره به‌لكو مانا ئه‌سه‌دى هه‌یا ئه‌ڤرۆ ب سه‌ده‌مێ پشته‌ڤانیا رۆسیایه، ژبه‌ر كێنجا ڤان هه‌ردوو هێزان پێشبینى دهێته‌كرن كو ئه‌ستانه ببیته قۆناغا دانوستاندێن رژد و ئه‌نجامێن ئه‌رێنى ژێ په‌یدا ببن.
د به‌رامبه‌ردا دێ چ هێته شكه‌فا رۆژئاڤایێ كوردستانێ، سه‌ره‌ڕاى ڤێ قۆربانیا هه‌تا ئه‌ڤرۆ هاتیه‌دان و دژواریا شه‌رێ تیرۆرێ كو د به‌رژه‌وندا رژێما سوورى و رۆسیا و توركیایه لێ دیسا رۆسیا چ هه‌لویست بۆ پشكداركرنا په‌یه‌دێ د كۆنفراسێ ئه‌ستانه دا نیشان نه‌دا، ئه‌ڤه‌ژى وێ گومانێ پشتراست دكه‌ت كو تڤه‌نگا په‌یه‌دێ د به‌رژه‌وه‌ندیا رژێما سووری دایه و تڤه‌نگه‌كا ب كرێ بوویه و زلهێزێن جیهانێ ب ئۆینه‌كا تێكهه‌لكێش راچاندیه و ب ساناهى كولاڤ كرنه سه‌رێ په‌یه‌دێ.
وه‌ك دیار كۆنفراسێ ئه‌ستانه بیێ پشكداریا كوردان دێ هێته ئه‌نجامدان و هه‌ر بریاره‌كا ژێ بده‌ركه‌ڤیت دێ كێنجه‌كا نه‌رێنى ل سه‌ر ره‌وشا رۆژئاڤایێ كوردستانێ هێلێت ب ره‌نگه‌ك كاره‌ساتى. ئه‌ڤ كۆنفراسه بیرا مرۆڤى ل رێككه‌فتنا جه‌زائیرێ 06.03.1975ێ دئینیت ده‌ما شاهێ ئیرانێ ل گه‌ل سه‌ددامى رێككه‌فتن كرى و بۆ مه كوردان بۆ سه‌ده‌ما كاره‌ساتێن جه‌گبڕ، د وێ رێككه‌فتنێ دا ژى كورد نه دئاماده بوون وه‌سان دیاره ل ئه‌ستانه هه‌مان سیناریۆ دێ دووباره بیت.
سال بۆ سالێ خوه‌زیا پار(گۆران)
مه ساله‌ك ده‌رباز كر(٢٠١٦) و ده‌ربازی ساله‌كا نوو بووین(٢٠١٧)به‌لێ چ تۆڤ سال مه ده‌رباز كر، ب تایبه‌ت بۆ مه خه‌لكێ كوردستانێ چنكو چ تشتێن ڤێ هه‌رێمێ ل خه‌لكه‌كی دن ناچن و ب هه‌موو شێوه‌یان ڤه هه‌رێمه‌ك ناوازه‌یه; ئه‌ڤجا چ ژ لایێ وه‌لاتیێن وێ ڤه یان ژی ژ لایێ سیاسه‌تمه‌دار و ڕایه‌دارێن وێ ڤه بیت! !
ناوازه‌یا خه‌لكێ هه‌رێمێ فه‌ره بچیته د په‌ترووكا شكاندنا پیڤه‌ران دا و باوه‌ر دكه‌م خه‌مخۆرێن كۆمكه‌رێن شكاندنا پیڤه‌ران های ژ ڤێ هه‌رێما سه‌ره‌رای قۆربانی، هه‌وێن ئه‌نفالان، دانپێنه‌دان ب سنۆرێن جۆگرافی یێن كوردستانێ و هه‌لكه‌فتا دروستبوونا ده‌وله‌تا دیفاكتۆیا كوردستانێ، هێشتا خه‌لكه‌ك هه‌بیت (نه‌هندكن ژ وانا خوه ب سیاسی و نیشتمانپه‌روه‌ر دزانن!) چاره‌سه‌ریا هه‌موو كێش و بێشێن هه‌رێمێ ب ڤه‌گه‌رهان بۆ به‌غدا ببینن; نینه و دبت ئه‌ڤه مافێ وان بیت چنكو ته‌رۆرێ و مه‌ترسیا وێ سه‌ر ژ هه‌ر تشتی ستاندیه. ئه‌گه‌ر نه نه‌ته‌وه‌یه‌ك ب قاسی كوردان (دبێژن ژ ٤٠ ملیۆنان پێترن) مایه داگیركری و ئه‌و بهۆستا ڕزگاركری ژی ئانینیبیته به‌ر بازاری! !
من گۆت خه‌لكێ هه‌رێمێ و من قالا سیاسیێن هه‌رێمێ و ڕایه‌دارێن وێ نه‌كر، دبت بۆ هه‌وه سه‌یر بیت و ئاورێن تووژ و تۆنجان ل من ببارینن! وه‌راستی دڤێت من ده‌ستێن خوه یێ ژ هه‌موو سیاسه‌تمه‌دارێن ڤێ هه‌رێمێ شووشتین چنكو ئه‌و ب خوه بوونه گرفت و ئاریشه د پێشكه‌فتنا ڤێ هه‌رێمێ دا و ڤه‌گه‌راندنا وێ بۆ سه‌رده‌مێ به‌ری په‌یدابوونا ئه‌له‌كتریكێ(كه‌هره‌بێ) ئانكو سه‌رده‌مێ چرای، وه‌كو دبێژن ئه‌ڤه خوه‌شه یا نه‌خوه‌شتر ل پاشه!
ڕاستیه‌ك ژ ئه‌زمۆنا ڤێ هه‌رێمێ یا هاتیه شكه‌فا كوردی و بوویه قاچكێ ده‌ڤێ خه‌لكێ و تنازێن خوه پێ دكه‌ن و سۆز و پلان و نه‌خشه ڕێكێن وان بۆ چاره‌سه‌ركرنا گرفتێن ڤێ هه‌رێمێ و گه‌هاندنا وێ بۆ كنارێ ئارامیێ، ئه‌و ژی سیاسه‌تمه‌دار و ڕایه‌دارێن حوكمه‌تا هه‌رێمێ نه; ب تایبه‌ت ژی پراسا ڕێكخستنا ناڤ مالا كوردی بۆ ڕوو ب ڕوو بوونا وان مه‌ترسیێن ل سه‌ر هه‌بوونا پێگه‌هێ كوردان و پرسا سه‌ربه‌خۆبوونێ!
مرۆڤ حێبه‌تی دمینیت كو ڕایه‌دار و سیاسه‌تمه‌دار هنده یاریێن بێ بنه‌ما بده‌می دكه‌ن، هه‌رچه‌نده باش دزانن كو ئێدی ده‌م نه د به‌رژه‌وه‌ندا هه‌رمێ و خه‌لكێ وێ دایه، لێ دیسا هه‌ر یێ قه‌وانا سالێن به‌رێ لێ دده‌ن و ڕۆژ بۆ ڕۆژێ ژی ڕه‌وشا خه‌لكی یا به‌ره‌ف كمباخترێ دچیت.
ڕه‌وشا ئابووری و ژێرخنا ئابووری ل سه‌ر لێڤا هه‌رفتنێیه و چ نه‌خشه ڕێكێن باوه‌ر پێكری د ئه‌جندا حوكمه‌تێ دا نینن، هه‌كه هه‌بن ژی نه ددیارن و جهێ گۆمانێ نه چنكو هه‌موو سۆز و پلانێن حوكمه‌تێ یێن به‌ری نوكه دایین ته‌ڤ خرش ده‌ركه‌فتن و تنێ خوه‌ش خوه‌شك بوون دا وه‌لاتیان پێ مژوول بكه‌ن.
د نوكه دا بێهنا ل خه‌لكی ته‌نگ بووی( ژ لایێ ئابووری ڤه) و چاڤه‌رێی پێنگاڤێن مجده ژ ته‌ڤ لایه‌نێن سیاسی ئه‌گه‌ر وه‌كو پێرار و پار هه‌ر لایه‌نه‌ك بزاڤێ بكه‌ت ئۆبالا ڤێ ڕه‌وشێ بۆ لایه‌نێ دن پال بده‌ت و خوه وه‌كه موویێ ژ ماستی كێشای نیشان بده‌ت هه‌روه‌كو هنده‌ك لایه‌ن دكه‌ن، هندی كۆمبوون بهێنه كرن چ ژ ڕه‌وشێ ناهێته گوهارتن، خه‌لك دێ نه‌چارت بیت بۆ خوه ل هند چاره‌یێن دن بگه‌رهت و ئه‌ڤه لێ گه‌رهانه دێ بۆ لایه‌نێن سیاسی بیته سال بۆ سالێ خوه‌زیا پار.
٠٧. ٠١. ٢٠١٧
كۆنفراسا زانكۆیا ئه‌مریكى كورددستان ـ دهۆك و خه‌نجه‌را كوردى!!
دوو رۆژا به‌رى ساخكرنا رۆژا ئالایێ كوردستانێ(17/12)، ل دهۆكێ كۆنفرانسه‌ك ل زانكۆیا ئه‌مریكى كوردستان ل سه‌ر پرسا سه‌رخوه‌بوونا كوردستانێ هاته ئه‌نجامدان و گه‌له‌ك كه‌سێن ناڤدار و شه‌هره‌زایى پرسا كوردان د ڤێ كۆنفرانسێ دا هاتبوونه ڤه‌خاندن و ئاماده ببوون. پرانیا وان دید بۆچوونێن خوه ل سه‌ر پرسا سه‌رخوه‌بوونا كوردستانێ ده‌ره‌هیكرن. هه‌رچه‌نده پرسا سه‌رخوه‌بوونا هه‌ر ملله‌ته‌كى تایبه‌ته ب وى ملله‌تى ب خوه ڤه، لێ د هه‌مان ده‌م دا ژى پرسه‌ك ناڤنه‌ته‌ویه.
هه‌ر كه‌س یێ ئازاده ب تایبه‌ت هه‌ڤالێن دۆزا كوردى، كانێ چه‌وان ئه‌و ل چاره‌سه‌ریا پرسا كوردى دمه‌یزینن تایبه‌ت د ڤێ قۆناغا دیرۆكیا دۆزا گه‌لێ مه تێدا ده‌رباز دبیت و ئه‌و ئاسته‌نگى و كه‌له‌مێن دهێنه د رێكا وێ دا.
ل دارخستنا ڤى كۆنفرانسى و د ڤى ده‌مى دا كو شه‌رێ داعشێ یێ به‌ره‌ف دووماهیێ ڤه دچیت، هه‌رچه‌نده مه‌ترسیا سه‌رهلدانا گرۆپێن تیرۆریستى ژ ناڤ نه‌چوویه لێ هه‌ر چه‌وان بیت، ده‌ستپێكا قۆناغه‌كا نووى ب رێڤه‌یه و مافێ مه كوردانه كو ل خوه مكۆر بهێین و راوێژیى ب دۆست و هه‌ڤالێن دۆزا خوه بكه‌ین، دا وه‌كو جاران ژ وان گوهۆڕین و به‌رخوردێن ژ پێكدادان و ناكۆكیێن د ناڤبه‌را زلێهێزێن جیهانێ دا په‌یدا دبن، ده‌ستڤاله نه‌ده‌ركه‌ڤین و مفا و مزه‌ك بهێته د شكه‌فا كوردى دا.
ل دارخستنا ڤان ره‌نگ كۆنفرانسان ژبلى ب ره‌واكرنا دۆزا گه‌لێ كورد ل سه‌ر ئاستێ ناڤگینێن ناڤنه‌ته‌وى و دانپێدانێ ب ڤێ ره‌واتیێ، پالدانه‌كه‌ك مه‌عنه‌ویه بۆ ته‌ڤ لایه‌نگرێن پرسا سه‌رخوه‌بوونا كوردستانێ و بهێز كرنا هه‌لویستێ وان د ناڤ قادا نه‌ته‌وى و ناڤنه‌ته‌وى دا.
د ئه‌ڤى كۆنفرانسى دا گه‌له‌ك پرس هاتنه ئازراندن ب تایبه‌ت یێن په‌یوه‌ندى ب پرسا سه‌رخوه‌بوونا كوردستانێ ڤه هه‌ین و ئه‌و ئاسته‌نگ و كه‌له‌مێن دئێنه د رێكا گه‌هشتنا ڤێ ئارمانجا پیرۆزا گه‌لێ كورد دا، لێ یا ژ هه‌موویێ بالكێشتر پرسا خه‌نجه‌را كوردى بوو كو ژ لایێ دوستێ گه‌لێ كورد زه‌لماى خه‌لیل زاده یه‌كه‌م بالیۆزێ ئهمریكا ل عێراقا پشتى سه‌ددامى ئاماژه پێداى؛ هه‌رچه‌نده خه‌نجه‌ر د كولتۆرێ كوردى دا هێمایه بۆ غه‌درێ و خیانه‌تێ و هه‌روه‌سا ده‌ستهه‌لى و ده‌ستنه‌داهێلانێ. هه‌رچه‌وان بیت مه‌ره‌ما بالیۆزى خیانه‌ت بوو كو كورد ل سه‌ر ڤێ پرسا گرنگ یه‌ك هه‌لویست نینن و ئه‌گه‌ر ل سه‌ر ڤێ په‌رته‌وازه بوونێ به‌رده‌وامبن، نه‌كانه(مه‌حاله) بگه‌هن و بكارن ده‌وله‌تا خوه یا سه‌ربخوه رابگه‌هینن!!
ئه‌ڤه نیڤشكێ ته‌ڤ دیبه‌یت و گوتارا بوو ئانكو ده‌م هاتیه ته‌ڤ لایه‌نێن سیاسى ناكۆكیێن ناڤخوه‌یى لابده‌ن و ته‌ڤ شیانان بۆ گه‌هشتنا پرسا سه‌رخوه‌بوونا كوردستانێ بده‌نه كار، ده‌م نه ده‌مێ هه‌لویست فرۆتنێ یه و گه‌رم كرنا ناكۆكیانه به‌لكو ده‌م ده‌مێ هه‌ڤگرتن ورێكخستنا ناڤ مالا كوردیه و دا ئێدى ئه‌م به‌ندا ل هیڤیا خه‌لكێ ب دوماهیك بینین و ئێدى نه‌بێژین: هه‌وارا … دووره برانۆ… كورد خائینۆ
17.012.2016
برایێ مه‌لا هشیاری ره‌حما خودێ لێ بیت
كوشتنا هه‌ر مرۆڤه‌كی ب هه‌ر هێجه‌ته‌كا هه‌بیت نه‌ره‌وایه و ب توندی ل دژم و ئه‌وا ل گه‌ل ره‌حه‌متی مه‌لا د. هشیاری هاتیه كرن تاوانه‌كا مه‌زنه، چونكی مه‌لا مرۆڤه‌كێ خودان هزر و جیهانبیه‌كا تایبه‌ت ب خوه ڤه بوو، بلا وه‌سا نه‌هێته هژمارتن كو من باوه‌ری ب ره‌وتا وی یا سیاسی هه‌یه نه‌خێر، به‌لكو گه‌له‌ك ل دژی هزرێن ئیسلاما سیاسی مه و ب ئافاته‌كا مه‌زن ل سه‌ر پاشه‌رۆژا ڤی مله‌تی و شێوێ ده‌ستهه‌لاتداریێ دزانم، لێ كوشتنا هه‌ر مرۆڤه‌كی و ب هه‌ر هێجه‌ته‌كێ بیت ل دژم نه‌شێم بێ ده‌نگ بمینم.
چه‌وا ل سالێن چلان و هه‌تا هه‌فتیان ژ سه‌دا بۆری خه‌لك ب لێشاو دبوون كومۆنیست ب هه‌مان شێوه ئه‌ڤرۆ ل رۆژهه‌لاتا ناڤین و جیهانا سێیه‌مین خه‌لك ب لێشاو تێكه‌لی ره‌وتا ئیسلاما سیاسی دبن. دبیت بۆ گه‌له‌ك كه‌سێن د دیاردێن سیاسی بگه‌هن ئه‌ڤێ لێشاوێ ب كاره‌كێ ئاسایی و زڤرین بۆ هیمێن جڤاكی بزانن، لێ د راستی دا وه‌سا نینه، به‌لكو به‌رهه‌مێ بێهیڤیاتی و نه‌بوونا چ جێهگر و ئاسوویێن رۆهن بۆ پاشه‌رۆژێ.
ب هێزبوونا ره‌وتا ئیسلاما سیاسی گه‌فه‌كا مجده بۆ ئاسییشا جڤاكی و ب هه‌ڤره ژیانێ، ل هه‌ر وه‌لاته‌كی كو ئه‌ڤ ره‌وته لێ بهێز بكه‌ڤیت، ده‌مۆكراتی و مافێن مرۆڤی لێ به‌ره‌ف ئفلیجبوون و نه‌مانێ دچن ب سیسته‌ماتیك جڤاكێ به‌ره‌ف ژێك دابران و لێكترازانێ دبه‌ت و هێدی هێدی وه‌لات به‌ره‌ف شه‌رێن ناڤخوه‌یی دبه‌ت.
ل كوردستانێ مخابن ئه‌ڤ ره‌وته هندی وێڤه‌تره بهێز دكه‌ڤیت، هه‌لبه‌ت سه‌ده‌م گه‌له‌كن لێ یا ژ هه‌موویان به‌رچاڤتر حكوومه‌تا هه‌رێمێ ب خوه‌یه كو هه‌تا نوكه نه‌شیایه ده‌مۆكراتیا راست په‌یدا بكه‌ت و ئاسوویه‌كێ گه‌ش یا پری هیڤی بۆ ته‌ڤ ته‌خێن جڤاكێ كوردستانێ فه‌راهه‌م بكه‌ت یا ژ ڤان هه‌موویان گرنگتر ئه‌وه كو په‌رله‌مانێ كوردستانێ قانوونه‌ك ده‌رخستبا تێدا رێ نه‌دابا دامه‌زراندنا پارتێن نه‌ژادپه‌ره‌ست و ئۆلپه‌ره‌ست، چونكی ئه‌ڤ هه‌ردو ره‌وته دژی ده‌مۆكراتیێ نه، نه‌به‌ر ئاقله تو ل وه‌لاته‌كێ ده‌مۆكرات رێكێ بده‌یه ره‌وتێن دژی ده‌مۆكراتیێ.
ره‌وتا نه‌ژادپه‌ره‌ست و ئۆلپه‌ره‌ست د گه‌ل هه‌ستێن ته‌خێن نه‌خوینده‌وار، ئاستێ زانستیێ نزم و كێمده‌رات داخڤن و هه‌ستێن وان دبزڤینن، ب زمان لۆسیا هیڤی به‌خش خه‌لكی سه‌ردا دبه‌ن كو د راستی دا ژبلی ئه‌زمان هوولاتیێ پێڤه تشته‌ك پێڤه ناهێت.
وه‌ك مه ل سه‌ری ئاماژه پێدای ره‌وتا ئیسلاما سیاسی ل كوردستانێ یا بهێزه و ل په‌رله‌مانێ كودستانێ خوه‌دی ده‌نگه‌ك بهێزن، هه‌رچه‌نده ڤێ ره‌وتێ چ پرۆژێن ئابووری و فه‌رهه‌نگیێن پێشكه‌فتی نینن كو ب جیهانبینیا وان كوردستان ژ كۆما قه‌یرانان رزگار ببیت، لێ وه‌ك مه گۆتی ب تنێ د گه‌ل هه‌ستێن خه‌لكێ كوردستانێ داخڤن و داشۆپینه و د گه‌وهه‌رێ خوه دا گووزه‌كا پووچن، به‌رهه‌مێ ئیسلاما سیاسی ل هه‌ر وه‌لاته‌كێ لێ بهێز یان ده‌ستهه‌لاتدار دیاره و پێدڤی چ نموونا نینه.
نها ل كوردستانێ ئه‌ڤ ره‌وته خودان سه‌نگه و هه‌روه‌سا وه‌سا خوه دایه نیشادان كو یێ ره‌وتنه‌رمه و دژی ته‌رۆر و باوه‌ری ب ده‌زگه‌هكرنا حكوومه‌تێ هه‌یه (هه‌ر چه‌نده من باوه‌ری پێ نینه) ب تایبه‌ت د وارێ سه‌ركرداتیێ دا كو به‌رده‌وام هنده‌ك كه‌سێن خودان شیان ژ ناڤ ڤێ ره‌وتێ ده‌ر دكه‌ڤن!! پارتیێن كوردستانی ته‌ڤ و ژ وان ژی ره‌وتا ئیسلاما سیاسی هندی مه ل بیره چ گوهۆرینێن جدی د سه‌ركرداتیا وان دا روو نه‌دانه و په‌رێ هه‌ر وه‌كو به‌رێ!! جامێران چه‌وا دخوازن ده‌سته‌كا سه‌ركرداتیا خوه ب هه‌لبژێرن ئه‌و گرفا وانه، لێ بگه‌هته رادێ خوه پێشنڤێژێن مزگه‌فتان ده‌ما مه‌لایه‌ك ئه‌مرێ خودێ بكه‌ت كورێ وی یان برایه‌كێ وی ببیته پێشنڤێژ هینگێ هه‌ڤكێشه به‌رۆڤاژی دبیت، یا راست ئه‌ڤه داهێنانه‌كا ئه‌نتیكه‌یه و بۆ ڤی ره‌وتێ دزڤریت!!
حێبه‌تی بووم ده‌مێ من خواندی كو برایه‌كێ خودێ ژێ رازی بیت د. هشیاری دڤێت ل هه‌مان مزگه‌فتا ره‌حمه‌تی ببیته مه‌لا و گوتاربێژ، ئه‌ڤه مابوو ل كوردستانێ روو نه‌دای مه‌لاتی ژی ببیته شوونگری و ژ مالێ ده‌رنه‌كه‌ڤیت، یا راست سیاسی و شوونگرێن بنه‌مالێ گێره ژ سیاسه‌تێ چێكر ڤێجا ئه‌ڤا مای بلا مه‌له‌یێن مه ژی بكه‌ن، نه‌خێر ب ڤی ده‌ست و داری دێ گه‌هینه رێزا وه‌لاتێن پێشكه‌فتی!!.
نيشاندان
WP Facebook Auto Publish Powered By : XYZScripts.com