كوشتنا هه‌ر مرۆڤه‌كی ب هه‌ر هێجه‌ته‌كا هه‌بیت نه‌ره‌وایه‌ و ب توندی ل دژم و ئه‌وا ل گه‌ل ره‌حه‌متی مه‌لا د. هشیاری هاتیه‌ كرن تاوانه‌كا مه‌زنه‌، چونكی مه‌لا مرۆڤه‌كێ خودان هزر و جیهانبیه‌كا تایبه‌ت ب خوه‌ ڤه‌ بوو، بلا وه‌سا نه‌هێته‌ هژمارتن كو من باوه‌ری ب ره‌وتا وی یا سیاسی هه‌یه‌ نه‌خێر، به‌لكو گه‌له‌ك ل دژی هزرێن ئیسلاما سیاسی مه‌ و ب ئافاته‌كا مه‌زن ل سه‌ر پاشه‌رۆژا ڤی مله‌تی و شێوێ ده‌ستهه‌لاتداریێ دزانم، لێ كوشتنا هه‌ر مرۆڤه‌كی و ب هه‌ر هێجه‌ته‌كێ بیت ل دژم نه‌شێم بێ ده‌نگ بمینم.
چه‌وا ل سالێن چلان و هه‌تا هه‌فتیان ژ سه‌دا بۆری خه‌لك ب لێشاو دبوون كومۆنیست ب هه‌مان شێوه‌ ئه‌ڤرۆ ل رۆژهه‌لاتا ناڤین و جیهانا سێیه‌مین خه‌لك ب لێشاو تێكه‌لی ره‌وتا ئیسلاما سیاسی دبن. دبیت بۆ گه‌له‌ك كه‌سێن د دیاردێن سیاسی بگه‌هن ئه‌ڤێ لێشاوێ ب كاره‌كێ ئاسایی و زڤرین بۆ هیمێن جڤاكی بزانن، لێ د راستی دا وه‌سا نینه‌، به‌لكو به‌رهه‌مێ بێهیڤیاتی و نه‌بوونا چ جێهگر و ئاسوویێن رۆهن بۆ پاشه‌رۆژێ.
ب هێزبوونا ره‌وتا ئیسلاما سیاسی گه‌فه‌كا مجده‌ بۆ ئاسییشا جڤاكی و ب هه‌ڤره‌ ژیانێ، ل هه‌ر وه‌لاته‌كی كو ئه‌ڤ ره‌وته‌ لێ بهێز بكه‌ڤیت، ده‌مۆكراتی و مافێن مرۆڤی لێ به‌ره‌ف ئفلیجبوون و نه‌مانێ دچن ب سیسته‌ماتیك جڤاكێ به‌ره‌ف ژێك دابران و لێكترازانێ دبه‌ت و هێدی هێدی وه‌لات به‌ره‌ف شه‌رێن ناڤخوه‌یی دبه‌ت.
ل كوردستانێ مخابن ئه‌ڤ ره‌وته‌ هندی وێڤه‌تره‌ بهێز دكه‌ڤیت، هه‌لبه‌ت سه‌ده‌م گه‌له‌كن لێ یا ژ هه‌موویان به‌رچاڤتر حكوومه‌تا هه‌رێمێ ب خوه‌یه‌ كو هه‌تا نوكه‌ نه‌شیایه‌ ده‌مۆكراتیا راست په‌یدا بكه‌ت و ئاسوویه‌كێ گه‌ش یا پری هیڤی بۆ ته‌ڤ ته‌خێن جڤاكێ كوردستانێ فه‌راهه‌م بكه‌ت یا ژ ڤان هه‌موویان گرنگتر ئه‌وه‌ كو په‌رله‌مانێ كوردستانێ قانوونه‌ك ده‌رخستبا تێدا رێ نه‌دابا دامه‌زراندنا پارتێن نه‌ژادپه‌ره‌ست و ئۆلپه‌ره‌ست، چونكی ئه‌ڤ هه‌ردو ره‌وته‌ دژی ده‌مۆكراتیێ نه‌، نه‌به‌ر ئاقله‌ تو ل وه‌لاته‌كێ ده‌مۆكرات رێكێ بده‌یه‌ ره‌وتێن دژی ده‌مۆكراتیێ.
ره‌وتا نه‌ژادپه‌ره‌ست و ئۆلپه‌ره‌ست د گه‌ل هه‌ستێن ته‌خێن نه‌خوینده‌وار، ئاستێ زانستیێ نزم و كێمده‌رات داخڤن و هه‌ستێن وان دبزڤینن، ب زمان لۆسیا هیڤی به‌خش خه‌لكی سه‌ردا دبه‌ن كو د راستی دا ژبلی ئه‌زمان هوولاتیێ پێڤه‌ تشته‌ك پێڤه‌ ناهێت.
وه‌ك مه‌ ل سه‌ری ئاماژه‌ پێدای ره‌وتا ئیسلاما سیاسی ل كوردستانێ یا بهێزه‌ و ل په‌رله‌مانێ كودستانێ خوه‌دی ده‌نگه‌ك بهێزن، هه‌رچه‌نده‌ ڤێ ره‌وتێ چ پرۆژێن ئابووری و فه‌رهه‌نگیێن پێشكه‌فتی نینن كو ب جیهانبینیا وان كوردستان ژ كۆما قه‌یرانان رزگار ببیت، لێ وه‌ك مه‌ گۆتی ب تنێ د گه‌ل هه‌ستێن خه‌لكێ كوردستانێ داخڤن و داشۆپینه‌ و د گه‌وهه‌رێ خوه‌ دا گووزه‌كا پووچن، به‌رهه‌مێ ئیسلاما سیاسی ل هه‌ر وه‌لاته‌كێ لێ بهێز یان ده‌ستهه‌لاتدار دیاره‌ و پێدڤی چ نموونا نینه‌.
نها ل كوردستانێ ئه‌ڤ ره‌وته‌ خودان سه‌نگه‌ و هه‌روه‌سا وه‌سا خوه‌ دایه‌ نیشادان كو یێ ره‌وتنه‌رمه‌ و دژی ته‌رۆر و باوه‌ری ب ده‌زگه‌هكرنا حكوومه‌تێ هه‌یه‌ (هه‌ر چه‌نده‌ من باوه‌ری پێ نینه‌) ب تایبه‌ت د وارێ سه‌ركرداتیێ دا كو به‌رده‌وام هنده‌ك كه‌سێن خودان شیان ژ ناڤ ڤێ ره‌وتێ ده‌ر دكه‌ڤن!! پارتیێن كوردستانی ته‌ڤ و ژ وان ژی ره‌وتا ئیسلاما سیاسی هندی مه‌ ل بیره‌ چ گوهۆرینێن جدی د سه‌ركرداتیا وان دا روو نه‌دانه‌ و په‌رێ هه‌ر وه‌كو به‌رێ!! جامێران چه‌وا دخوازن ده‌سته‌كا سه‌ركرداتیا خوه‌ ب هه‌لبژێرن ئه‌و گرفا وانه‌، لێ بگه‌هته‌ رادێ خوه‌ پێشنڤێژێن مزگه‌فتان ده‌ما مه‌لایه‌ك ئه‌مرێ خودێ بكه‌ت كورێ وی یان برایه‌كێ وی ببیته‌ پێشنڤێژ هینگێ هه‌ڤكێشه‌ به‌رۆڤاژی دبیت، یا راست ئه‌ڤه‌ داهێنانه‌كا ئه‌نتیكه‌یه‌ و بۆ ڤی ره‌وتێ دزڤریت!!
حێبه‌تی بووم ده‌مێ من خواندی كو برایه‌كێ خودێ ژێ رازی بیت د. هشیاری دڤێت ل هه‌مان مزگه‌فتا ره‌حمه‌تی ببیته‌ مه‌لا و گوتاربێژ، ئه‌ڤه‌ مابوو ل كوردستانێ روو نه‌دای مه‌لاتی ژی ببیته‌ شوونگری و ژ مالێ ده‌رنه‌كه‌ڤیت، یا راست سیاسی و شوونگرێن بنه‌مالێ گێره‌ ژ سیاسه‌تێ چێكر ڤێجا ئه‌ڤا مای بلا مه‌له‌یێن مه‌ ژی بكه‌ن، نه‌خێر ب ڤی ده‌ست و داری دێ گه‌هینه‌ رێزا وه‌لاتێن پێشكه‌فتی!!.

پشتی ده‌وله‌تا توركیا ژ بن قه‌رێن بانكا ناڤنه‌ته‌وی ده‌ركه‌فتی، رایه‌دارێن وێ وه‌سا هزر كرن و ب تایبه‌ت سه‌رۆكێ ئاكه‌پێ(ئاكپ) ئه‌ردۆگان كو ئێدی ئه‌و توركیا به‌رێ نه‌مایا گیرۆده‌یا ده‌وله‌تێن رۆژئاڤا بیت و ل گۆره‌یا سیاسه‌تا وان برێڤه‌ بچیت و ب تایبه‌ت ژی ئه‌لمانیا كو په‌یوه‌ندیه‌كا گه‌له‌ك ب هێز هه‌ر ژ كه‌ڤندا دگه‌ل توركیا هه‌یه‌ و ره‌ڤه‌نده‌كا مه‌زنا توركی لێ دژیت و هه‌له‌به‌ت ئه‌ڤ ره‌ڤه‌نده‌ كه‌فتیه‌ ل بن باندۆرا كولتۆر و شێوێ ژیانا ئه‌لمانی و ڤێ ره‌ڤه‌ندێ باندۆره‌كا مه‌زن د ئاڤاكرنا ئابوور و پیشه‌سازیكرنا توركیا دا هێلایه‌ و دیاره‌.
ئابوورێ توركیا ب ته‌ڤنه‌كێ ته‌ڤنپیركی ب ئابوورا رۆژئاڤا ڤه‌ گێرادایه‌ و هه‌ر رۆژئاڤا بوویه‌ سه‌ده‌مێ پێشكه‌فتنا توركیا و ب هه‌موو مه‌تۆدان هه‌ر ژ سالێن (1950)ێ و هێرڤه‌ رۆژئاڤا خواستیه‌ توركیایه‌كا ب هێز و پێشكه‌فتی به‌رامبه‌ری سۆڤیه‌تا به‌رێ و بلۆكێ وارشۆ(د سالا 1991ێ هه‌لوه‌شایه‌) و د هه‌مان ده‌م دا وه‌كه‌ پێشبه‌ره‌كی بۆ وه‌لاتێن موسلمان بهێته‌ قه‌بوولكرن.
د ڤێ سیاسه‌تێ دا رۆلێ توركیا رۆژ بۆ رۆژێ به‌ره‌ف هلكشانێ چوو هه‌تا هاتیه‌ سه‌ردمێ ئه‌ردۆگانی و توركیا بۆ توركیا ئه‌ڤرۆ ئانكو رۆلێ ئاك پارتی نه‌هندێ مه‌زنه‌ وه‌كو پشته‌ڤان و حه‌یرانێن سیاسه‌تا ئه‌ردۆگانی دیار دكه‌ن، به‌لكو پرۆسه‌سه‌ك بوویه‌ د بن چاڤدێریا رۆژئاڤا دا كو توركیایه‌كا ب هێز ل ده‌ڤه‌رێ هه‌بیت به‌رامبه‌ری سۆڤیه‌تا به‌رێ و هه‌ڤالبه‌ندێن وێ و پشتی نه‌مانا سۆڤیه‌تێ دیسا توركیا گرنگیا خوه‌ بۆ رۆژئاڤا ژ ده‌ست نه‌دا، چونكى مه‌ترسیا ئیسلاما سیاسی و ئیرانێ بۆ به‌رژه‌وه‌ندیێن رۆژئاڤا جهێ سۆڤیه‌تا به‌رێ گرتیه‌.
توركیا وه‌ك سه‌نگه‌رێ پێشیێ یێ دژی ته‌رۆر و راوه‌ستاندنا پێلا كۆچبه‌ران بۆ ئورۆپا دهێته‌ هژمارتن و هه‌ر ژبه‌ر ڤان ئه‌گه‌رانه‌ كو رۆژئاڤا سه‌ره‌ده‌ریه‌كا تایبه‌ت دگه‌ل توركیا دكه‌ت و وه‌كو زارۆكه‌كێ نازاندی گرنگیێ پێ دده‌ن. حكوومه‌تێن ئێك ل په‌ی ئێكێن توركیا گرنگیا پێگه‌هێ وه‌لاتێ خوه‌ بۆ رۆژئاڤا ناسكریه‌، و گه‌له‌ك ب زیره‌كی ئه‌ڤ پێگه‌هه‌ بكار ئینایه‌ تا راده‌كێ وه‌سا بگه‌هته‌ هندێ كو ته‌ڤ سه‌رپێچیێن وێ د ده‌رحه‌قێ مافێ مرۆڤی دا چ ره‌گڤه‌دانێن هشك به‌رامبه‌ر نه‌ ده‌ركه‌ڤن.
ژ سه‌دمێن ڤێ بێده‌نگیا رۆژئاڤا به‌رامبه‌ری سیاسه‌تا گشتیا توركیا، باوه‌ریه‌ك ل ده‌ف رایه‌دارێن توركیا چێ بوویه‌ كو هه‌چیا بكه‌ن چ ره‌نگڤه‌دانان ب خوه‌را نائینیت، ب تایبه‌ت ل ڤی سه‌رده‌می كو هه‌ما به‌حسێ ته‌رۆرێ هاته‌ كرن، هه‌موو ده‌نگ بێ ده‌نگ دبن!! راسته‌ ته‌رۆر ئافه‌ته‌كا ڤی سه‌رده‌می یه‌ و سه‌ده‌مێن په‌یدابوونا گرفتا ته‌رۆرێ دزۆرن، لێ دیسا ب هێجه‌تا شه‌رێ ته‌رۆرێ نابیت مافێن مرۆڤی بهێنه‌ بن پێ كرن و مه‌ودایێ ئازادیا هزرێ و تاكه‌كه‌سی بهێته‌ لغاڤكرن.
بزاڤا كۆده‌تایا (15/7/2016) كو پرانیا چاڤدێرێن سیاسی لێ ب گۆمانن كو راستیه‌ك بۆ هه‌بیت، به‌لكو سینارۆیه‌كه‌ ئه‌ردۆگانی یێ هه‌لبه‌ستی دا ده‌ستبه‌ردایی بیت بۆ گوهۆرینا دستوورێ علمانیێ توركیا؛ ئه‌نجامێن ژ كۆده‌تایێ دیار بوون كو ئه‌و گۆمان بوونه‌ راستی و هه‌وه‌كا به‌رفرها گرتن و دادگه‌هكرنێ ل سه‌ر هێزێن ده‌مۆكراتخاز و علمانی و كه‌سێن ناڤدار و ب باندۆر ل توركیا هه‌موو راپێچانه‌ زیندانان و هێشتا ئه‌ڤ هه‌وه‌یا به‌رده‌وامه‌ و ته‌ڤ ژی ب تۆمه‌تا ته‌رۆرێ دهێنه‌ گونه‌هباركرن، ب سایا ڤێ سیاسه‌تێ توركیا بوویه‌ زیندانه‌كا مه‌زن بۆ ئه‌لیته‌ و هێزێن ده‌مۆكراتخاز و هه‌ر كه‌سێ ل به‌ر شمشالا سۆلتانێ نوویێ ستانبۆلێ نه‌ له‌یزیت،جهێ وی زیندانه‌.!!
ل سه‌ر ڤێ سیاسه‌تا هشكا ئه‌ردۆگانی رۆژئاڤا و ب تایبه‌ت ئورۆپا نه‌رازیبوونێن خوه‌ ددانه‌ خویاكرن و ددانه‌ دیاركرن كو به‌رده‌وامیا ڤێ سیاسه‌تێ دێ گران ل سه‌ر توركیا كه‌ڤیت.
توركیا ل وێ باوه‌رێ نینه‌ كو رۆژئاڤا و ئورۆپا دێ گه‌فێن خوه‌ كه‌نه‌ راستی، ژبه‌ر پێگه‌هێ توركیا و پرسا كۆچبه‌ران كو ئه‌ڤرۆ ل ئورۆپا پرسا هه‌ری گه‌رمه‌. ئه‌وا توركیا هزر نه‌دكر ل (24/11/2016) په‌رله‌مانێ ئورۆپی كره‌ راستی و هه‌موو ده‌رگه‌هێن وه‌رگرتنا توركا بۆ ناڤ ئێكه‌تیا ئورۆپی هاتنه‌ گرتن و ئه‌ڤه‌ پێنگاڤیا ئێكێ یه‌ و یان دژی عه‌مبارگۆیا ئابووریه‌.
ئه‌گه‌ر توركیا ل خوه‌ نه‌زڤریت و ل سه‌ر ده‌ه و دوا به‌رده‌وام بیت، د ده‌مكێ نێزیك دا دێ ئه‌مبارگۆیا ئابووری ل په‌ی هێت و ئه‌ڤه‌ ژی دێ بیته‌ ده‌ستپێكا هه‌لوه‌شیانا ئابوورێ توركیا.

كێش و بێشێن حكوومه‌تا هه‌رێمێ رۆژ بۆ رۆژێ یێ زێده‌ دبن و حكوومه‌ت ب خوه‌ ژی بوویه‌ پشكه‌ك ژ هه‌ڤكێشه‌یا ڤان كێشان، هه‌ر ژبه‌ر هندێ یه‌ مه‌ودایێ چاره‌سه‌ریێ تاری دهێته‌ پێش و هڤیێن چاره‌سه‌ركرنا كێشێن هه‌رێمێ ل ده‌ف خه‌لكێ كوردستانێ نه‌ماینه‌، ژبه‌ر ڤی ئه‌گه‌ری ره‌نگه‌ بێشۆریه‌كا مه‌زن خه‌لك و رایه‌دارێن حكوومه‌تێ گرتینه‌ و سه‌ره‌داڤێن چاره‌سه‌ریێ ل به‌ر هندا بووینه‌.
گرفت و قه‌یران تووشی هه‌ر مله‌ته‌كی و حكوومه‌ته‌كێ دبن، لێ هه‌ر ده‌مێ گه‌له‌ك نه‌خشه‌ رێك بوونه‌ به‌نیشتێ ده‌ڤێ هه‌ر كه‌سه‌كی و هه‌رێ وى و بابێ وی نه‌خشه‌ رێكه‌كێ پێشكێش بكه‌ت، هه‌روه‌كو ئه‌ڤرۆ ل كوردستانێ دهێته‌ دیتن كو چ پارت و هه‌تا بگه‌هته‌ كه‌سێ دو ئه‌لیف بێتكێن سیاسه‌تێ ژی بزانیت، نه‌خشه‌ رێكه‌ك پێشكێشی حكوومه‌تا هه‌رێمێ دكه‌ت و ب راستی ژی حكوومه‌تا مه‌ ژی یا وه‌كو گایێ مه‌رگه‌هیا لێ هاتی و هه‌ر كه‌سێ هه‌بیت، پرۆژێ چاره‌سه‌ریێ ژێ وه‌ردگریت!! ب زێده‌بوونا نه‌خشه‌ رێكان، چاره‌سه‌ری ب زه‌حه‌مه‌ت دكه‌ڤیت و بێ باوه‌ریێ دكه‌ته‌ ستوڤانكێ حكوومه‌تێ.
كێشێن حكوومه‌تا هه‌رێمێ نه‌یێن ئه‌ڤرۆ و دوهینه‌ به‌لكو یێن به‌ری نوكه‌نه‌ و نه‌بوونا ئیراده‌كا بهێزه‌ بۆ روو ب رووبوونا كێشه‌یان، چونكو رایه‌دارێن مه‌ ب خوه‌ پشكه‌كن ژ كێشێ و به‌لكو هه‌تا راده‌كێ هه‌ما ئه‌و ب خوه‌ كێشه‌نه‌ د رێكا هه‌ر چاره‌سه‌ریه‌كێ دا.
د كاودانه‌كێ هوسان دا كو رایه‌دار ب خوه‌ كێشه‌ بن بۆ حكوومه‌تێ، وه‌لاتی نه‌چاره‌ ئه‌و ژی بهێته‌ د ناڤ كێشمه‌ كێشا قه‌یران و كێشێن حكوومه‌تێ دا و خوه‌دی ده‌نگ بیت و ل به‌رژه‌وه‌ندیێن خوه‌ ببیته‌ خودان و ئه‌ڤه‌ ژی ب كاره‌كێ ئه‌رێنی دهێته‌ هژمارتن كو وه‌لاتی ب ده‌نگێ خوه‌ و نه‌رازیبوونا خوه‌ ژ حكوومه‌تێ هشیار بكه‌ت و ب هه‌ژینیت دا ب مجدی ل رێكێن چاره‌سه‌ریێ بگه‌ریت و ئه‌و كه‌سێن د ناڤ حكوومه‌تێ دا كو ب دیتنا وه‌لاتیان هه‌ر ئه‌ون یێن هه‌رێما كوردستانێ تووشی ڤێ قه‌یرانێ كری و ئیراده‌یا چاره‌سه‌ریێ مراندی.
خوه‌نیشادان و نه‌رازیبوونێن وه‌لاتیان نیشانا ژینداریا جڤاكی یه‌ و ل وه‌لاتێن ده‌مۆكراتیك ئه‌ڤێ چه‌ندێ ب مافێن وه‌لاتیان دزانن و د ده‌ستووری دا جهێ ڤان ره‌نگه‌ چالاكیان هاتیه‌ كرن و مه‌ ژی ل هه‌رێما كوردستانێ ئه‌ڤ مافه‌ هه‌یه‌ و د ده‌ستوورێ هه‌رێمێ دا جهێ خوه‌ كریه‌. ئانكو وه‌لاتی دمافدارن كو ده‌نگێ نه‌رازیبوونا خوه‌ بگه‌هیننه‌ حكوومه‌تێ و دڤێت حكوومه‌ت ژی ب مجدی ل چه‌ره‌سه‌ریا خوه‌سته‌كێن وه‌لاتیان بگه‌ریت و ب راشكاوانه‌ هه‌موو باده‌كێن په‌یوه‌ندیدار رابه‌ری جه‌ماوه‌ری بكه‌ت دا قه‌ناعه‌تێ بۆ وان چێ كه‌ت كو حكوومه‌ت یا رژده‌ ل سه‌ر چاره‌سه‌ریا خوه‌سته‌كێن وان. ئه‌ڤا نوكه‌ ل كوردستانێ روو دده‌ت نه‌ جهێ دل خوه‌شیا خه‌لكی یه‌ و حكوومه‌ت ب راشكاوانه‌ ل باده‌كا مووچه‌یان ب تایبه‌ت یێن مامۆستایان نه‌بوویه‌ خودان و خوه‌ كه‌ڕ كریه‌ و تنێ هێجه‌تان رێز دكه‌ت و هێجه‌ت ژی قه‌ناعه‌تێ بۆ خه‌لكێ چێ ناكه‌ن كو وان ژ مه‌یدانێن خوه‌نیشادانێ ب ڤه‌كێشیت.
ئه‌ڤه‌ ده‌مه‌كێ درێژه‌ مامۆستا چالاكیێن مه‌ده‌نی ئه‌نجام دده‌ن و یا ژ هه‌موویێ نه‌خوه‌شتر ئه‌و كو پرۆسا خواندنێ دایه‌ راوه‌ستاندن و ئه‌ڤه‌ ژی گونه‌هه‌كا مه‌زنه‌ ل نفشێ نوو دهێته‌ كرن. نه‌یا به‌ر ئاقله‌ مامۆستا ئه‌ڤێ چه‌ندێ بكه‌ن و دكارن هه‌لبه‌ت ئه‌گه‌ر نیه‌ت دسافی بن خوه‌ بكه‌نه‌ دو جوون، كو جوونه‌ك ده‌وامێ بكه‌ن و جوونا دن به‌رده‌وامیێ بده‌نه‌ چالاكیێ ب ڤی ئاوایی هه‌م دێ پرۆسا خواندنێ برێڤه‌ چیت و هه‌م ده‌نگێ مامۆستایان دێ گه‌هیته‌ جهێن شۆله‌ژێ.
خه‌مساریا حكوومه‌تا هه‌رێمێ یا به‌رچاڤه‌ و خوه‌ ل كێشێن وه‌لاتیان ناكه‌ته‌ خودان و سه‌ده‌م ددیارن ئه‌و ژی پر ره‌نگیا حكوومه‌تێ و نه‌بوونا پرۆگرامه‌كێ ئێكگرتی بۆ برێڤه‌برنێ هه‌ر ژ رۆژا ئه‌ڤ حكوومه‌ته‌ (كابینا ٨) هاتیه‌ دامه‌زراندن و هه‌تا ئه‌ڤرۆ حكوومه‌ت پێكڤه‌ نیڤ ئۆپۆزسیۆن و نیڤ رێڤه‌به‌ره‌!! ئه‌ڤجا چه‌وا دێ شول برێڤه‌ چن هه‌م تو وه‌زیر بی و هه‌م ئۆپۆزسیۆن هوون و خودێ هه‌وه‌ حكوومه‌ته‌كا وه‌كو یا هه‌رێمێ كوردستانێ ل كیژان به‌رپه‌رێ دیرۆكێ خواندیه‌!.
خه‌مساریا حكوومه‌تێ و رایه‌دارێن وێ دڤێت نه‌بیته‌ سه‌ده‌م كو ئه‌م هه‌موو ل دژی وێ بده‌ركه‌ڤین و دا برژینه‌ سه‌ر جاده‌یان و هه‌وارا خوه‌ بگه‌هینینه‌ به‌رده‌رێن داگیركه‌ران و ئه‌و داگیركه‌رێن هه‌ر ده‌مێ بیڤا خوه‌ بینن، چ یا ژ ده‌ستی بهێت دێ ل دژی مه‌ بده‌ن خه‌بتاندن و سه‌ربۆرێن مه‌ د ڤی واری دا دزۆرن و هه‌وجه‌ی چ دووباره‌ كرنێ نینه‌!.
خوه‌نیشادان مافه‌كێ بنگینێ وه‌لاتیانه‌ و نابیت ب هێجه‌تان ئه‌ڤ مافه‌ بهێته‌ زه‌وت كرن، لێ د هه‌مان ده‌م دا دڤێت نه‌هێته‌ ژبیركرن و ل وه‌لاتێن ده‌مۆكرات ژی رێك ب نه‌قۆله‌یا خوه‌نیشانده‌را ناهێته‌ دان ب تایبه‌ت ئه‌گه‌ر بگه‌هیته‌ پرسێن سه‌روه‌ری و ئێمناهیێ و بانگكرنا عه‌بادی (سه‌رۆك وه‌زیرێ عیراقێ)ل نك هنده‌ك خوه‌نیشانده‌را زه‌نگه‌كا نه‌ ته‌ندروسته‌، دبیت هنده‌ك هێجه‌تان بۆ ڤێ دیاردا نه‌ ته‌ندروست ببینن كو حكوومه‌تا هه‌رێمێ ل په‌ی ده‌نگێ خوه‌نیشانده‌ران ناهێت و ل خوه‌سته‌كێن وان نابیت خودان!! هه‌ر چه‌وا بیت رێزدار عه‌بادی هه‌تا هه‌فكێیێ د كێشان دا و قه‌یرانا ل هه‌رێمێ ژی به‌رخۆردێ سیاسه‌تا چه‌وتا عه‌بادی و یا یێ به‌ری وی مالكی یه‌ ده‌رمافێ هه‌رێما كوردستانێ و هێلانا كێشێن د ناڤبه‌را هه‌رێمێ و عیراقێ دا هه‌لاویستی ژ وانا كێشا بۆدجێ باده‌كێ په‌ترۆلا كوردستانێ.
بانگكرن ل عه‌بادی د ڤی ده‌می دا كێشێن خوه‌نیشانده‌ران چاره‌سه‌ر نابن، به‌لكو دێ ئالۆزتر لێهێن و ب راستی عه‌بادی گێره‌ ژ كێشێن عیراقێ چێ كر هه‌تا یێن هه‌رێما كوردستانێ ژی بهێنه‌ سه‌ر، ب بانگكرن ل عه‌بادی چ خوه‌سته‌كێن خوه‌نیشانده‌ران و هه‌رێما كوردستانێ بده‌ست ڤه‌ ناهێن.

دۆنالد ترامپ سه‌رۆكێ هه‌لبژارتیێ ئه‌مریكا یێ (45) ل ده‌ستپێكا هه‌وا هه‌لبژارتنان و هه‌تا هه‌لبژارتن هاتینه‌ كرن ژی ب ئێك زمان یێ پری هێرش و زۆخاندن، بۆچوونێن خوه‌ دگۆتن، ئانكو شێوێ ده‌ربرینا وی نه‌هاته‌ گوهارتن. ب زمانه‌كێ ساده‌یێ نه‌دیپلۆماتیك ل سه‌ر كێشێن ناڤخوه‌ و یێن سییاسه‌تا ده‌رڤه‌یا ئه‌مریكا دئاخفت.
ل سه‌ر ئاستێ ناڤخوه‌ جڤاكێ ئه‌مریكی شلقاند و هێشتا ئه‌ڤ شلقاندنه‌ یا به‌رده‌وامه‌، باوه‌ر دكه‌م دێ گه‌له‌كه‌ك ڤه‌كێشیت هه‌تا باسكێ دژی سیاسه‌تا ترامپی هێور ببن و دبیت ژی و هه‌ر ئه‌ڤه‌ دهێته‌ چاڤه‌رێكرن كو تیما ترامپ گه‌هاندیه‌ سه‌ر كورسیكێ ل كۆچكا سپی، نه‌رمیێ ل سه‌ر گه‌له‌ك باده‌كێن هه‌ستیار مینا سیسته‌مێ خه‌سته‌بوونێ و كۆچبه‌ران نیشان بده‌ن. ئه‌ز ل سه‌ر كێشێن ناڤخوه‌یێن ئه‌مریكا ده‌نگ ناكه‌م، هه‌ر چه‌نده‌ كێشێن ناڤخوه‌یێن هه‌ر وه‌لاته‌كی باندۆرا خوه‌ ل سه‌ر هه‌ر وه‌لاته‌كی دهێلیت.
لێ یا گرنگ بۆ مه‌ سیاسه‌تا ده‌رڤه‌یه‌ كانێ دێ گوهۆرین كه‌ڤنه‌ سیاسه‌تا ئه‌مریكا ئان نه‌، ئه‌گه‌ر به‌لێ بیت دێ چ باندۆرێ ل سه‌ر ره‌وشا هه‌رێما كوردستانێ و كێشا كوردی ل رۆژهه‌لاتا ناڤین هێلیت؛ ئه‌گه‌ر نه‌خێر بیت دیسان دێ چ گوهۆرینان ب خوه‌ڤه‌ بینیت؟!.
یا دیاره‌ پارتا كۆماریا ئه‌مریكی خوه‌دی سیاسه‌ته‌كا جودایه‌ ژ یا دیمۆكراتیان و كۆماری پتر د كه‌ڤن پارێزن و گرنگیه‌كا مه‌زن دده‌نه‌ سیاسه‌تا ده‌رڤه‌ و به‌رۆڤاژی دیمۆكراتان كو گرنگیه‌كا مه‌زن دده‌ن سیاسه‌تا ناڤخوه‌. گوهۆرینێن مه‌زن كو بوونه‌ سه‌ده‌مێن گوهۆرینا روویێ جیهانێ ل سه‌رده‌مێ كۆماریان بوویه‌ و نموونا هه‌ری زیندی سه‌رده‌مێ رۆنالد ریگان (1981-1989) كو نێزیكیه‌كا به‌رچاڤ هه‌یه‌ ل گه‌ل جیهان بینیا دۆنالد ترامپی. رۆنالد ریگانی ژی د هه‌وا هه‌لبژارتنان دا هێرشێن توند دكرنه‌ سه‌ر بلۆكێ وارشۆ و داخواز ژ هه‌ڤال به‌ندێن خوه‌ یێن د بلۆكێ ناتۆ دا كر كو پتر ده‌ست بهاڤێژنه‌ به‌روكێن خوه‌ بۆ موكۆمكرنا چه‌په‌رێن خوه‌پاراستنێ و دانانا سیسته‌مێ شه‌رێ ستێر پارێزیێ. ل وی سه‌رده‌می هه‌موو ل دژی سیاسه‌تا ریگانی ده‌ركه‌فتن، لێ ل داویێ بۆ هه‌موویان دیار بوو كو ئه‌و یێ راست بوو و ئه‌و سیاسه‌تا هشك به‌رامبه‌ری بلۆكێ وارشۆ بۆ سه‌ده‌م بلۆكێ وارشۆ ب سۆڤیه‌ت ڤه‌ ب هه‌لوه‌شیت و ئورۆپایه‌كا ئێكگرتی هاته‌ مه‌یدانێ.
هه‌ر ل سه‌ر رێیا ریگانی دۆنالد ترامپ ل دژی تیرۆرا ئیسلاما سیاسی ب هشكی هاتیه‌ مه‌یدانێ و داخواز ژ بلۆكێ ناتۆ دكه‌ت ده‌ست بده‌نه‌ به‌روكێن خوه‌ بۆ دامه‌زراندنا سیسته‌مه‌كێ هه‌والگێری و ته‌نكینكییێ پێشكه‌فتی، چونكی نه‌ربه‌ر ئاقله‌ هه‌موو تشت ژ ئه‌مریكا بن و ئورۆپی و هه‌ڤالبه‌ندێن وێ ل مالێن خوه‌ پالدای بن و ب ئاسووده‌یی بژین؛ تارمپ دبێژیته‌ هه‌ڤالبه‌ندێن ئه‌مریكا: (یێ پاراستن بڤێت، دڤێت پاران ب مه‌زێخیت، چ تشت ب هه‌روه‌ نینه‌)، ئه‌ڤی هه‌لویستێ ترامپی ئه‌ندامێن ناتۆیێ هه‌ژاندن و ئێخستنه‌ د بارۆڤه‌كا بێ شۆره‌ییێ دا.
ئه‌مریكا سه‌رده‌مێ دۆنالد ترامپی نه‌ ئه‌مریكا سه‌رده‌مێ باراك ئۆبامایه‌، دۆنالد ترامپ ژ ته‌خه‌كا بێزنسمان هاتیه‌ و هه‌ر تشتی ل گۆره‌ی كرین و فرۆتنێ دپیڤیت بڤی ره‌نگی دۆنالد ترامپ هاتیه‌ مه‌یدانێ سیاسه‌تێ و فیگۆره‌كێ بێزنسمانیه‌ و ریالستانه‌ ل كێشان مێزه‌ دكه‌ت و ڤه‌كری باوه‌ریێن خوه‌ دبێژت، بێی پێچ و ڤه‌كری و ئه‌ڤ ره‌نگ فیگۆره‌ هه‌تا نوكه‌ د سیاسه‌تێ دا نامۆیه‌ ژبه‌ر هندێ هه‌ر بۆچوونه‌كا دبێژیت بارۆڤه‌كێ د مه‌یدانا سیاسه‌تێ دا رادكه‌ت.
بێزنس پێدڤی ب ته‌ناهی و ئارامیێ هه‌یه‌ و د جیهانا ئه‌ڤرۆ دا ته‌رۆرێ سه‌قایه‌كێ پری ترس و ساویر ئێخستیه‌ جیهانێ و گه‌فه‌كا جدیه‌ ل سه‌ر ئاساییش و ئارامیا جیهانێ. د هه‌وا هه‌لبژارتنان دا پرسا تیرۆرێ و پشته‌ڤانیا وێ گه‌له‌ك دهاته‌ كرن و ترامپی ب توندی هێرشی ده‌ستهه‌لاتا ئۆبامی دكر، كو ب مجدی سه‌ره‌ده‌ری دگه‌ل تیرۆر و پشته‌ڤانێن وێ نه‌دكر. هه‌ر كه‌سێ هه‌ست ب ڤێ ته‌نگسستیا ئه‌مریكا دكر، به‌لكو هنده‌كا ئه‌ڤ خه‌مساریا ئه‌مریكا ب هندێ گونه‌هبار دكر كو تیرۆر دروست كریا وێ ب خوه‌یه‌ بۆ گه‌هه‌شتنا هنده‌ك مه‌ره‌مێن سیاسی و بازرگانی!.
ده‌مێ ل پێشیا مه‌ ب سه‌رۆكاتیا ئه‌مریكا دێ شه‌رێ تیرۆرێ گه‌رم بیت و به‌لكو ته‌نگێ ل كه‌مه‌را پشته‌ڤانێن وێ ژی ب شدینیت ( توركیا، سووریا عه‌ره‌بی، ئیران و كووریا باكوور)، ئه‌ڤه‌ ژی دێ به‌رپیێن هه‌رێما كوردستانێ فرهه‌تر لێ كه‌ت و گڤاشتنێن توركیا و ئیرانێ دێ كێمتر لێهێن.
هه‌رێما كوردستانێ ئه‌ڤرۆ ناڤه‌ندا سه‌نگه‌رێ پێشیێ یا شه‌رێ تیرۆرێ یه‌ و ئه‌ڤ پێگه‌هه‌ دڤێت بهێته‌ قۆزتن دا بكارین ژ بارۆڤا به‌رخوردێن شه‌رێ تیرۆرێ بێ زیان ده‌ر بكه‌ڤین.

كه‌فتنا باژارێ مووسل د ده‌ستێن داعش دا (10/6/2014) ب وێ ساناهیێ و بێ به‌رخوه‌دان و راده‌ستكرنا وێ خه‌بلخانێ بۆ تیرۆرستێن داعش، ژ وێ رۆژێ هه‌تا ئه‌ڤرۆ بوویه‌ جهێ پرسیار و گومانێ و هه‌ڤیره‌كه‌ هندى وێڤه‌تر دچیت پتر دبیته‌ شیلماقه‌ و سیاسه‌تمه‌دارێن عیراقێ ب تایبه‌ت یێن باسكێ پێكهاتا شیعه‌ ب تایبه‌تتر مالكى دهێنه‌ گونه‌هباركرن كو وان ب زانابوون و بێ به‌رخوه‌دان ده‌ڤه‌رێن پێكهاتا سونه‌یان راده‌ستى داعش كرن، دا خوه‌ ژ كێشا خوه‌نیشادانێن وێ پێكهاته‌یێ رزگار بكه‌ن، هه‌ژیه‌ بێژین ئه‌و دو سال بوون ده‌ڤه‌رێن سونه‌یان ببوونه‌ مه‌یدانێن خوه‌نیشانده‌ران و داخوازا باشترلێكرنا ره‌وشا خوه‌ دكرن.
دوور ژ تاگیریا خودانێن ڤێ بۆچوونێ لێ ئه‌گه‌ر مرۆڤ ل ره‌وشا عیراقێ مێزه‌ بكه‌ت، پشتى كه‌فتنا مووسلێ و ده‌ڤه‌رێن دن وه‌سا دیار دبیت كو نه‌خشه‌ك هه‌بوویه‌ و ل گۆڕه‌ى ئه‌جندایه‌كا نهێنى هاتیه‌ ئه‌نجامدان و هه‌موو سه‌رتیرێن ڤێ تۆمه‌تباریێ بۆ مالكى و ئیرانێ دچن و سه‌ده‌م گه‌له‌كن، لێ یێن به‌رچاڤ و حاشا نه‌هه‌لگر ددیارن و د سێ خالان دا كۆم ڤه‌دبن:
1- به‌ركناركرنا سوننا و ده‌سته‌به‌ركرنا وان د پرۆسا سیاسیا عیراقێ دا.
2- دامه‌زراندنا كڤانێ شیعى ژ ئیرانێ هه‌تا بگه‌هیته‌ سه‌ر ده‌ریایێ سپى (سووریا و لبنان) دا ب ڤى كڤانى رێكێ ل به‌ر به‌ره‌یێ سوننى ب سه‌رۆكاتیا توركیا- سعودیێ بگریت، هه‌روه‌سا وه‌كه‌ كارته‌كا فشارێ دگه‌ل رۆژئاڤا بۆ پاراستنا به‌رژه‌وه‌ندێن خوه‌ بكار بینیت.
3- فشار دروستكرن بۆ پرۆژێ ده‌وله‌تبوونا هه‌رێما كوردستانێ ب تایبه‌ت پشتى سه‌رۆكێ هه‌رێما كوردستانێ مه‌سعود بارزانى ئه‌ڤ پرۆژه‌ بلندكرى و هه‌موو ئایینده‌یێ خوه‌ یێ سیاسى پێڤه‌گرێداى.
ئه‌م ل سه‌ر خالا ئێكێ و دویێ خه‌به‌ر ناده‌ین، چونكى به‌رخۆرێ وێ ئه‌جندایێ دیاره‌ و ده‌ڤه‌ر به‌ر ب شه‌ره‌كێ نێڤنه‌ته‌وى بریه‌ و ئاینده‌یێ ڤێ ده‌ڤه‌رێ به‌ر ب تۆنیله‌كا تارى بریه‌ و جیهان ته‌ڤ مژوولى ڤێ كێشێ یه‌، هه‌ر چه‌نده‌ پرۆسه‌ پێكڤه‌ گرێدایه‌ و كار ل هه‌ڤ دكه‌ن، لێ یا بۆ مه‌ گرنگ خالا سێی یه‌، چونكی په‌یوه‌ندى یا ب پاشه‌رۆژا هه‌رێما كوردستانێ و ته‌ڤایا كێشا كوردى ڤه‌ هه‌ى ل ده‌ڤه‌رێ.
هه‌رێما كوردستانێ پشتى چه‌ندین سالێن هشك و پرى سه‌ختى ده‌رباز كرین و ب سایا وێ سیاسه‌تا نه‌رم و خوه‌ دوورى شه‌رێ تائیفى و ئتنى گرتى، شیا باوه‌ریا زلهێزێن جیهانێ ب سیاسه‌تا خوه‌ بینیت و ببیته‌ پێگه‌هه‌كێ ئارام بۆ ته‌ڤ پێكهاتێن عیراقى بێى جوداهى سه‌ره‌ڕاى وێ دیرۆكا ته‌حل یا هه‌رێما كوردستانێ ل بن سیهانه‌تا حكوومه‌تێن ئێك ل په‌ى ئێكێن عیراقێ دیتى، به‌رهه‌مێ ڤێ سیاسه‌تێ هه‌رێم بره‌ قووناغا ده‌وله‌تا دیفاكتۆ و ره‌نگه‌ دانپێدانه‌كا ناڤنه‌ته‌وى ب ده‌ستڤه‌ بینیت.
دیاربوونا پێگه‌هێ كوردان دوژمنێن كوردستانێ هار و شێت كرن و ژ هه‌موویا پتر ئیران، چونكى هه‌رێما كوردستانێ سنگره‌یه‌ به‌رامبه‌رى ئه‌جندایا ئیرانێ و ژبن برنا هه‌موو نه‌خشێن وێ كو سه‌ركرداتیا باسكێ شیعه‌ و ده‌ڤه‌را رۆژهه‌لاتا ناڤین بكه‌ت. ژبه‌رهندێ هه‌موو رێك گرتنبه‌ر دا سه‌ركرداتیا كوردى ده‌ستبه‌ردارى پرۆژێ ده‌وله‌تبوونێ ببیت، د ڤێ بزاڤا ئیرانێ دا مالكى وه‌ك داره‌دستێ ئیرانێ ل دژى ڤى پرۆژه‌ى ده‌ركه‌فت و ئه‌و بوو گرژى ئێخسته‌ په‌یوه‌ندیێن هه‌رێمێ و عیراقێ ل ده‌ستپێكێ سیاسه‌تا زه‌ڤله‌ك نیشادانێ و ب هێزا دیجله‌ دخواست كوردستانێ بۆ سه‌رده‌مێ ئه‌نفالان ببه‌ت و ئه‌وا سه‌دامێ دكتاتۆر نه‌شیاى ئه‌نجام بده‌ت، ئه‌و ب ده‌سته‌ڤه‌ بینیت. شكه‌ستنا سیاسه‌تا زه‌ڤله‌ك نیشادانێ ئه‌ڤجا بادا سیاسه‌تا برسیكرنا هه‌رێما كوردستانێ و هه‌تا ئه‌ڤرۆ ژى ئه‌و سیاسه‌ت یا به‌رده‌وامه‌، لێ دیسا ئه‌ڤێ ژى سه‌رنه‌گرت و ئه‌ڤجا بادا سیاسه‌تا نه‌گریسا هه‌ر داگیركه‌ره‌ك دگریته‌ به‌ر (ژێكڤه‌كه‌ و بسه‌ركه‌ڤه‌) و د ڤێ سیاسه‌تێ دا مخابن ده‌رزه‌كا مه‌زن ئێخستیه‌ د ناڤ مالا كوردى دا ب هێجه‌تێن بێ بنه‌ما كو نه‌ده‌مێ دامه‌زراندنا ده‌وله‌تێ یه‌ و چ كار بۆ ده‌وله‌تبوونێ نه‌هاتیه‌ كرن، خودانێن ڤێ سیاسه‌تێ ژبیرا خوه‌ برنه‌ كو ده‌ما ده‌وله‌تا عیراقێ و پرانیا ده‌وله‌تێن ده‌ڤه‌رێ هاتینه‌ راگه‌هاندن، نه‌ ل ئاستێ چارێكا ئه‌ڤرۆ هه‌رێم گه‌هشتیێ بوو!!
ب نێزیكبوونا رزگاربوونا مووسلێ و به‌رخۆرێ ژێ په‌یدا دبیت، ئیرانێ مالكى دووباره‌ ئینایه‌ سه‌ر هێلێ و دوورى هه‌ر ئه‌ته‌كێته‌كا ره‌وشتى و سیاسى هێرشى سه‌ر جه‌نابێ سه‌رۆكێ هه‌رێمێ كر، هه‌لبه‌ت ده‌ركه‌فتنا مالكى د ڤى ده‌می دا مه‌ره‌م ژێ په‌رده‌پۆشكرنا رۆلێ خوه‌یه‌ د كه‌فتنا پارێزگه‌هێن سوننا دا و ژبلى گه‌رمتكرنا كێشێن عیراقێ یه‌، چونكی عیراقه‌كا فیدرال و ئارام دێ رێكێ بۆ گه‌له‌ك گوهۆرینێن بنچینه‌یى ل ده‌ڤه‌رێ ڤه‌كه‌ت و ئه‌ڤه‌ ژى ل دژى پرۆژێ ئیرانێ یه‌.

ناهێته‌ مانده‌لكرن كو هه‌رێما كوردستانێ ب كۆمه‌كا كێشا ڤه‌ دنالیت و پرانیا وان كێشان نه‌گه‌هشتنه‌ بن به‌سته‌كا مه‌ترسیدار كو ئێدى چ چاسه‌ر بۆ نه‌بن، به‌لكو د شیان دایه‌ ب بهێن فرهه‌یى و ل به‌ر چاڤگرتنا به‌رژه‌وه‌ندێن بلندێن نه‌ته‌وى ب هێسانى بهێنه‌ چارسه‌ركرن، هه‌لبه‌ت ئه‌گه‌ر نییه‌ت دسافى بن، ئانكو ل به‌ر چاڤگرتنا به‌رژه‌وه‌ندێن نه‌ته‌وی و ره‌وشا ئه‌ڤرۆ هه‌رێم و رۆژهه‌لاتا ناڤێن تێدا ده‌رباز دبیت. مخابن هه‌تا نوكه‌ ئه‌ڤ نییه‌ت سافییه‌ ل جه‌م لایه‌نێن سیاسى یێن هه‌رێمێ په‌یدا نه‌بوویه‌ و خه‌لكێ كوردستانێ ل سه‌ر ڤێ مه‌ژى هشكیا لایه‌نێن سیاسى عه‌جێب گرتى مایه‌.
ل ده‌مه‌كى داگیركه‌رێن كوردستانێ د ب هێزترین قووناغێ دا دبۆرن و فشارا ده‌وله‌تێن رۆژئاڤایى و ب تایبه‌ت یا ئه‌مریكا ل سه‌ر وان زێده‌ دبیت و هه‌رێما كوردستانێ ستاتۆیه‌كێ دانپێنایێ ناڤده‌وله‌تى وه‌رگرتیه‌ و سه‌ره‌ده‌رى وه‌ك ده‌وله‌ته‌ك دیفاكتۆ ل گه‌ل دهێته‌ كرن. ئه‌ڤ پێگه‌هه‌ رۆژ بۆ رۆژێ یێ ب هێز دكه‌ڤیت ب تایبه‌ت د شه‌رێ دژى تیرۆرێ دا كو كورد وه‌ك هێزه‌كا سه‌ره‌كى د مه‌یدانێ دانه‌.
ئه‌و چه‌مبه‌را سایكس-پیكۆى بۆ خه‌ندقاندنا بزاڤا رزگاریخازا نه‌ته‌وا كورد دروستكرى، ئه‌ڤرۆ یا هه‌لوه‌شیاى و سنوورێن وان یێن كه‌فتینه‌ به‌ر هرٍه‌بایێ گلۆبالیزمێ و دوژمنێن سه‌ره‌كى یێن دۆزا كوردى، توركیا-ئیران ژ هه‌ر ده‌مه‌كى پتر د بێ هێزن و یێن ل بن گڤاشتنێن رۆژئاڤا و ب تایبه‌ت ئه‌مریكا، ژخوه‌ ره‌وشا عیراقى-سووریا ئه‌م هه‌موو یێ دبینین و هه‌وجه‌ ناكه‌ت مرۆڤ ل سه‌ر خه‌به‌ر بده‌ت.
د ڤێ هه‌لا دیرۆكى دا لایه‌نێن سیاسى یێن هه‌رێمێ ژ هه‌ر ده‌مه‌كى پتر ژهه‌ڤ دوورن و ل سه‌ر ئه‌جندایێن ده‌وله‌تێن هه‌رێمى پارڤه‌ بوونه‌ و دۆزا سه‌ره‌كى ژبیرا خوه‌ دبن، تشتێ ل هه‌رێما كوردستانێ ئه‌م هه‌موو شانازیێ پێ دكه‌ین، په‌رله‌مانه‌. لێ حه‌یف و مخابن لایه‌نێن سیاسى ئه‌و ژى بۆ مه‌ نه‌هێلا و ل جهێ سه‌كۆیا په‌رله‌مانى ببیته‌ جهێ چاره‌سه‌ركرن و هێوركرنا كێشێن د ناڤبه‌را لایه‌نێن سیاسى دا و ڤه‌دیتنا نه‌خشه‌رێیان بۆ كێشێن هه‌رێمێ، ئه‌و ب خوه‌ ژى بوویه‌ پشكه‌ك ژ كێشێن هه‌رێم توشبووى. ل چ جهێن ڤێ جیهانێ تو په‌رله‌مانه‌كى وه‌كو یێ كوردستانێ نابینى هۆسا كه‌فتبیت بن باندۆرا لایه‌نێن سیاسى و گه‌وهه‌رێ خوه‌ ژ ده‌ستدا بیت و ببیته‌ دارلاستیكێ د ده‌ست سیاسیان دا. هه‌لبه‌ت ده‌ما په‌رله‌مانته‌ر ئه‌جندایا پارتا خوه‌ ل سه‌ر خه‌لكێ بسه‌پینیت و ژ خوه‌سته‌كێن خه‌لكى ب دوور بكه‌ڤیت، دێ بیته‌ بوریزانا پارتا خوه‌.
نه‌ ئه‌كتیفترین په‌رله‌مانته‌رێن كوردستانێ یێن ڤێ خۆلێنه‌، چونكی ئه‌و دشیان ل ده‌ستپێكا خۆلا گڤاشتنان ل سه‌ر حكوومه‌تێ دروست بكه‌ن، بۆ هه‌ر باده‌كه‌كێ كو گومانا گه‌نده‌لیێ لێ هه‌بیت و هه‌روه‌سا بۆ هه‌ر پرسه‌كا قانوونى، لێ نه‌كرن، بۆچى نه‌كرن، ئه‌ڤه‌ پرسیاره‌كه‌ دڤێت بهێته‌ به‌رسڤدان، لێ كى دكاریت به‌رسڤێ بده‌ت!!
سه‌یره‌ ئه‌ڤه‌ ساله‌ك ب سه‌ر ژكار كه‌فتنا په‌رله‌مانى ڤه‌ چوو و د ڤى ماوه‌ى دا مه‌ نه‌دیت و گولێ نه‌بوو، په‌رله‌مانته‌ران ده‌نگه‌كێ نه‌رازیبوونێ دیار كربیت یان ژى گڤاشتن ل سه‌ر ڤێ په‌رته‌وازه‌یا لایه‌نێن سیاسى كربیت، بۆچى؟ بۆچى ب ساناهى كه‌فتنه‌ د ناڤ ململانا سیاسییا هه‌رێمى دا!!
ره‌وشا ئه‌ڤرۆ هه‌رێم تێرا ده‌رباز دبیت گه‌له‌كا هه‌ستیاره‌ و پێدڤى ئێكرێزیا ته‌ڤ لایه‌نێن سیاسیه‌ و فه‌ره‌ كێشێن ناڤخوه‌یى بهێنه‌ سرٍكرن و هه‌موو شیان بهێنه‌ بشافتن بۆ ده‌ربازبوون ژ ڤێ قووناغێ، قۆناغا ب دووماهیك هاتنا شه‌رێ تیرۆرێ و پاراستنا ده‌ستكه‌فتێن مه‌ یێن نه‌ته‌وى، لێ په‌رله‌مانته‌رێَن مه‌ چ كر!! كۆمبوون ژ ده‌رڤه‌ى سه‌كۆیا په‌رله‌مانى(19/10/2016) ژبلى فهێتیا نه‌بانگكرنا لایه‌نێ سه‌ره‌كى و فراكسیۆنا ژ هه‌موویان مه‌زنتر كو پارتیه‌. ل جاى ئاڤه‌كێ ب گرژیا د ناڤبه‌را لایه‌نێن سیاسى دا بكه‌ت رابوو ب كورتر لێكرنا كێشێن ناڤبه‌ر وان و ب ڤێ كۆمبوونا بێ واته‌ و نه‌ پێدڤى هه‌موو ره‌نگێن شرعیه‌تا خوه‌ ژ ده‌ستدان.

“سنوورێن خوه‌ بزانه‌” ئه‌ڤ هه‌ڤوكا پرى گه‌ف و بێ رێز ئامێز یا سه‌رۆك كۆمارێ توركیا ئه‌ردۆغانى (سۆلتان ئه‌ردۆغانى) یه‌، كو ده‌رمافێ سه‌رۆك وه‌زیرێن عیراقێ حه‌یده‌ر ئه‌لعه‌بادى گۆتى، ده‌ما ناڤبرى گازنده‌ ژ هه‌بوونا هێزێن توركى ل باشیكێ كری و نه‌رازیبوونا عیراقێ ژ پشكداریا توركیا د شه‌رێ رزگاركرنا مووسل دا دیاركرى.
ئه‌وه‌ عیراق ب ساتۆرا مسته‌ر سایكس-پیكۆى هاتیه‌ داتراشتن و ب خۆرتى ل ئه‌تله‌سا ده‌وله‌تێن جیهانێ زێده‌كرى و بیێ گوهدانا خوه‌سته‌كێن موزایكا پێكهاته‌یێن د ڤى وه‌لاتێ ب خۆرتى ناڤ لێ داناى (عیراق)، په‌یوه‌ندیێن ڤێ (عیراقێ) دگه‌ل ده‌وروبه‌ران به‌رده‌وام ب كێش و ڤه‌كێشه‌ ب تایبه‌ت ل گه‌ل ئیران و توركیا. هه‌موو ژى ل سه‌ر سنوورێن ڤێ ده‌وله‌تێ بوویه‌ و توركیا ژ هه‌موو هه‌ڤسووێن (عیراقێ) پتر ژ هه‌بوونا ڤێ ده‌وله‌تێ(عیراقێ) نه‌رازیه‌!! هه‌لبه‌ت هێجه‌تێن توركیا دبێ بنه‌مانه‌، چونكو ئه‌گه‌ر وه‌ك توركیا دبێژیت: عیراق پشكه‌ك بوو ژ ده‌وله‌تا ئالى ئۆسمێن و ب تایبه‌ت ویلایه‌تا مووسل؛ ل گۆر ڤێ لۆژیكێ دێ ئه‌تله‌سا جیهانێ ل سه‌ر چه‌ند ده‌وله‌ته‌كان مینیت!! ما كێ هندى بریتانیا جیهان ڤه‌گرتبوو!! ئانكو لۆژیكێ ده‌وله‌تا تورك ل سه‌ر دئاخڤیت، هینگێ مافێ ئه‌رۆم و یونانى و ئیتالیایه‌(خودانێن ئمپراتۆریا رۆما كه‌ڤن) داخوازا ڤه‌گه‌ریانا ئه‌ردێ خوه‌ بكه‌ن كو توركیا نوكه‌ ل سه‌ر فه‌روه‌ریێ دكه‌ت!! توركیا ب خوازیت یان نه‌خوازیت عیراق ده‌وله‌ته‌ و سه‌روه‌ریا سنوورێن وێ دكه‌ڤیته‌ بن سهانه‌تا نه‌ته‌وێن ئێكگرتى و هه‌ر پێشلكرنه‌كا سنوورێن وێ پێشلكرنا باوه‌رناما نه‌ته‌وێن ئێكگرتیه‌.
لێ بۆچى توركیا هوسا ب بێ مننه‌تى و ب كه‌پى بلندى سنوورێن عیراقێ به‌زاندن و د سه‌ر هندێ را ژى گه‌فان ل سه‌رۆكوه‌زیرێن عیراقێ دكه‌ت و ب بێریزى دبێژیتێ (سنوورێن خوه‌ بزانه‌) ما خوه‌ نه‌ عیراق ویلاته‌كا توركیایه‌ و چ گاڤا بخازیت دێ تومه‌تا ده‌ست هه‌بوون د كۆده‌ته‌یا 15/07/2016 دا بگریت و ڕاپێچى زیندانێ بكه‌ت!! سه‌ده‌مێن ڤێ گۆرێغبوونا ئه‌ردۆغانى دزڤریت بۆ سه‌فه‌ربه‌رلكا ل سه‌ر شه‌رێ تیرۆرێ و بێ باسكیا جیهانێ و زێده‌بارى به‌رخۆردێ گلۆبالیزمێ و ژبلى ره‌وشا عیراقێ یا ناڤخۆیى كو هه‌ما بتنێ ناڤ مایه‌ ده‌وله‌ت وه‌كه‌ دن چ نه‌مایه‌. راسته‌ به‌رسڤا ئه‌لعه‌بادى پیچه‌كێ هه‌ستیێ ئه‌ردۆغانى حه‌لاند، لێ نه‌بوویه‌ سه‌ده‌مێ په‌یداكرنا هزره‌كێ ژ لایێ توركیا ڤه‌ كو خوه‌ ژ كۆربه‌قكا كێشێن عیراقێ بڤه‌كێشیت.
ئه‌ردۆغان ژ هه‌ر كه‌سى باشتر دزانیت شه‌رێ تیرۆرێ یێ به‌ره‌ف دووماهیێ ڤه‌ دچیت و نێزیكه‌ دێ قووناعا پشتى شه‌رێ تیرۆرى ده‌ست پێ كه‌ت و لایه‌نێن په‌یوه‌ندیدار دێ كێكا شه‌رێ تیرۆرێ ل هه‌ڤ پارڤه‌كه‌ن!! ترسا ئه‌ردۆغان ل گۆر به‌رژه‌وه‌ندیێن توركیا دجهێ خوه‌دایه‌ و نه‌خشه‌كێ نوو یێ رۆژهه‌لاتا ناڤین ب رێڤه‌یه‌ و دڤى نه‌خشه‌ى دا پێگه‌هه‌كێ كوردان هه‌یه‌، ژبه‌رهندێ بیێ پرسا ده‌وله‌ته‌كێ بكه‌ت ب تایبه‌ت هه‌ڤپه‌یمانێن خوه‌(ئه‌مریكا و ناتۆ) بكه‌ت، داكه‌فته‌ ناڤ ئاخا سوریێ و عیراقێ دا بشێت رێكێ ل هه‌ر په‌یدابوونه‌كا ستاتۆیه‌كێ كوردى بگریت.
ده‌ما گۆتیه‌ سه‌رۆك وه‌زیرێن عیراقێ (سنوورێن خوه‌ بزانه‌) و بۆ پارستنا به‌رژه‌وه‌ندیێن مه‌ یێن نه‌ته‌وى ئه‌م چ سنووران ناس ناكه‌ین و دێ وێ كه‌ین یا د به‌رژه‌وه‌ندا مه‌ دابیت، لێ د ڤه‌خواندنا سیاسى دا ئه‌ڤه‌ جۆره‌كێ تێكه‌تنه‌كا سیاسیه‌ و چال بۆ توركیا هاتیه‌ ڤه‌دان دا درێكا ڤێ گۆرێغبوونێ دا ئه‌وا ب سه‌رێ سۆڤیه‌تا به‌رێ هاتى، ده‌ما كه‌فیه‌ كۆربه‌قكا ئه‌فغانستانێ و ل داویێ بۆ سه‌ده‌ما هلوه‌شیانا سۆڤیه‌تێ و په‌یدابوونا چه‌ندین وه‌لاتێن سه‌ربخۆ، ب سه‌رێ توركیا بینن و هه‌ر ئه‌ڤیه‌ سه‌ده‌مێ بێ ده‌نگیا ئه‌مریكا و ناتۆ بۆ وێ گه‌فا دوورى ئه‌ته‌كێتا سیاسى یا ئێكسه‌ر ل عیراقى كرى و سه‌نگه‌ر گوهۆڕینا توركیا و نێزیكبوونا وێ دگه‌ل روسیا!! “سنوورێن خوه‌ بزانه‌: دێ بیته‌ په‌یالا “ژه‌هرا ئیمام خومه‌ینى” ده‌ما بریارا راوه‌ستندنا شه‌رێ عیراق-ئیرانێ ڤه‌خارى، و ئه‌ردۆغان ژى دێ ژ ڤه‌رێژا “سنوورێن خوه‌ ب زانه‌” كه‌ڤیته‌ چالا سۆڤیه‌تا به‌رێ ل ئه‌فغنستانێ كه‌فتیێ و دێ هه‌مووده‌رگه‌هان بۆ شه‌ره‌كێ ئتنى ل ده‌ڤه‌رێ ل تاق هێلیت و هه‌ر ئه‌ڤیه‌ یا ئه‌وا دبێژنێ هه‌رایا دروستكرى(فه‌وزا ئه‌لخه‌لاق). خودێ مه‌ ژ ده‌ك و دولابێن زلهێزا بپارێزیت، تنێ ئه‌و دزانیت چ د بن هنگل و پاخلێن وان دا هه‌یه‌!!

“یاریكرن ب گه‌ودێ مرى، كوشتیان و بێ ده‌ستهه‌لاتان كلوا بێ ره‌وشتیێ یه‌”
هه‌ر ده‌ستهه‌لاته‌ك و ئه‌و ده‌ستهه‌لات ب چ ناڤ بیت، دكاریت ل گه‌ل فه‌روه‌رلێكه‌رێن خوه‌ هه‌ر جۆره‌ ته‌عدایه‌كێ لێ بكه‌ت، بێی رێگرى لێ بهێته‌كرن؛ چونكو هێز و قانوون پشته‌ڤانیا وێ دكه‌ت و چ ژ هێجه‌تێن قانوونى ب ساناهیتر نینن و قانوون ب خوه‌ شووره‌كێ دوو ده‌ڤه‌، چه‌وا دخوازى دكارى بكار بینى.
مرۆڤاتیێ به‌رده‌وام خه‌بات كریه‌ كو قانوون وه‌سا بهێنه‌ داڕێشتن د به‌رژه‌وه‌ندیا خه‌لكى دا بن و هه‌موو كه‌س به‌رامبه‌ر قانوونێ وه‌ك هه‌ڤ بن بێى جوداهیێن ئولى، ڕه‌گه‌زى، نه‌ژادى، چینایه‌تى و د ره‌نگپیستى دا رێك ل به‌ر پێشێلكارێن مافێن مرۆڤى بهێته‌گرتن و حه‌زێن وان یێن ساده‌ بهێنه‌ لغاڤكرن. د ڤى كاروانێ درێژێ خه‌باتێ دا دیرۆكێ ناڤێن گه‌له‌ك خه‌باتكه‌رێن مافێن مرۆڤى بۆ مه‌ پاراستینه‌ و ب تایبه‌ت یێن هزرمه‌ندێن شۆڕه‌شا فه‌ره‌نسى(1789).
مافێن مرۆڤى و پێگێریكرن ب پاراستنا مافێن وى ل ڤێ ده‌ڤه‌را دبێژنێ رۆژهه‌لاتا ناڤین هێشتا جهێ خوه‌ نه‌كریه‌ و رۆژانه‌ ئه‌ڤ مافه‌ دهێنه‌ بنپێكرن، ئه‌ڤجا چ ژ لایێ ده‌ستهه‌لاتا سیاسى ڤه‌ بیت یان ژى ژ لایێ خه‌لكى ب خوه‌ڤه‌ بیت و ب پێشلكرنا ڤان مافان شلقێن مه‌زن ب جڤاكى ناكه‌ڤن و هه‌روه‌كو كریارێن ئاسایى بن؛ ژبلى هنده‌ك جاران كو ده‌ستهه‌لات بخوازیت هنده‌ك كه‌یسان وه‌ك بازار پێكرن، راببیت ب پرۆته‌ستۆكرن و خوه‌پیشاندنان ئه‌نجام بده‌ت و نموونه‌ ل سه‌ر ڤان خوه‌پیشاندانان دزۆرن و ل كوردستانا مه‌(كێسا دوعایێ، سیمۆن و كوشتنا مۆیسقارێ گۆربه‌هه‌شت زاهد بریفكانى) نموونێن هه‌رى زیندینه‌، لێ كێسێن دى هه‌موو دنڤاندینه‌ و كه‌سه‌ك پرسێ لێ ناكه‌ن!!
بنێكرنا مافێن مرۆڤى هوسا ب ساناهى و بێى ره‌نگڤه‌دانه‌كا بهێز بۆ راگرتنا ڤى ره‌نگێ سه‌ره‌ده‌ریكرنا هۆڤانه‌ و سادیستانه‌ ل گه‌ل مرۆڤى، په‌یوه‌ندى ب كولتۆرێ ده‌ڤه‌رێ ڤه‌ هه‌یه‌ و كو خوه‌ درێژى دیرۆكێ دكه‌ت و ل سه‌ر ڤان بنپێكرنا چیرۆكێن گه‌له‌ك دلته‌زین هه‌نه‌ و دێ هنده‌كا بۆ خوانده‌ڤانى ڤه‌گێڕم دا د ڤێ سادیستیا خه‌لكێ ده‌ڤه‌رێ تێ بگه‌هن و كانێ بۆچى ده‌ما مرۆڤ دهێته‌ بێرێزكرن و یارى ب گه‌ودێ وى دهێته‌كرن، چ ده‌نگێن نه‌رازى دیار نابن، نه‌ د دیرۆكێ دا و نه‌ ژى ئه‌ڤرۆ، به‌لكو پاساوا بۆ هه‌ر كریاره‌كێ دبینن و چیرۆكا ئۆمو قه‌رفه‌ ل سه‌رده‌مێ محه‌مه‌د پێغه‌مبه‌رى (س) ب ساخى ب دو حێشترا ڤه‌ گرێدای بوو و پاشى هه‌ردو حێشتر دانه‌ به‌ر شڤتانا و بۆ دو ئاراستێن جودا چوون و هه‌روه‌سا كوشتنا حه‌مزه‌ى مامێ پێغه‌مبه‌ری (س) و خوارنا دلێ وێ ژ لایێ هندێ ڤه‌ و چیرۆكا نه‌سر بن ئه‌لحجاج ل سه‌رده‌مێ عومه‌رێ كورێ خه‌تابى كو خۆرته‌كێ گه‌له‌كێ لاواز بوو، دهێته‌ ڤه‌گێران كو ژنكا هه‌لبه‌ست ب جوانیا وى دگۆتن و ئه‌ڤ نووچه‌یه‌ گه‌هشته‌ عومه‌رى و گازیكرێ و ئینا دیوانا خوه‌، ده‌ما لێ مێزه‌كرى و ئه‌و لاوێ ده‌لال دیتى، گۆته‌ سه‌رتراشه‌كى سه‌رێ وى ب نیڤى بتراشن و درێژ ناكه‌م، هه‌ر یاریه‌كا ب گه‌ودێ وى كرى دیسا هه‌ر لاو دهاته‌ خویاكرن، ل داویێ نه‌فى به‌سرا كر.
هه‌لبه‌ت چه‌ندین چیرۆكێن دن یێن ب ڤى ته‌رزى هه‌نه‌ گه‌له‌ك جاران بێریزیكرن ب ئاوایه‌كێ شه‌هیان گێران هاتینه‌ ئه‌نجامدان و لاپه‌رێن دیرۆكێ دپڕن ژ ڤان شه‌هیانان و یاریكرن ب گه‌ودێ مرۆڤى، ئه‌ڤجا چ یێ ساخ بیت یان ژى پشتى كوشتنێ و بۆ هه‌ر كریاره‌كێ پاساو هه‌نه‌، هه‌لبه‌ت پاساو چ ژ بهایێ بنپێكركرنا مافێن مرۆڤى نائیننه‌خار و بۆ چ سه‌رده‌مان.
ژبه‌رهندێ یه‌ ده‌ما ل ده‌ڤه‌را مه‌ بێریزیكرن ب مرۆڤان دهێته‌كرن و یارى ب گه‌ودێ وى دهێته‌كرن، نابیته‌ سه‌ده‌ماچ شلقێن مه‌زن، به‌لكو پاساوا بۆ هه‌ر كریاره‌كێ دبینن و د ڤان رۆژان دا ده‌زگه‌هێن راگه‌هاندنێ ناڤێ ژنه‌كێ به‌لاڤكرن ب ناڤێ ئوم هه‌نادى كو سه‌رێن داعشان دكه‌لینیت و یاریا ب گه‌ودێ وان دكه‌ت و وه‌كو پالاوانه‌كا چه‌رخێن ناڤین دده‌نه‌ دیاركرن و پاساوا بۆ دبینن.
راسته‌ داعش تیرۆرستن و كریارێن چه‌رخێن ناڤین دووباره‌ دكه‌ن و نابیت ب سڤكاتى لێ بهێته‌ مێزه‌كرن، لێ دیسا ژى هه‌ر مرۆڤن و تنێ د رێكا دادگه‌هێرا دڤێت سه‌ره‌ده‌رى ل گه‌ل بهێته‌كرن، ئه‌گه‌ر نه‌ پاساو ڤه‌دیتن ب سه‌ناهیه‌ بۆ هه‌ر بێریزیكرنه‌كێ و دولابا بنپێكرنا مافێن مرۆڤى دێ یا به‌رده‌وام بیت و كێش و بێشێن ده‌ڤه‌رێ دێ ئالۆزتر لێهێن و كولتۆرێ چه‌رخێن كه‌ڤن دێ یێ سه‌ردار بیت و ئه‌م ژى ب چاڤێن زیق ل وه‌لاتێن پێشكه‌فتى مێزه‌ كه‌ین و ئاخینكا بۆ ته‌ناهیا وان رادهێلین.

“ئه‌گه‌ر شه‌رم نه‌كه‌ى، هه‌ر تشت یێ حه‌لاله‌”
هه‌موو دزانن كو سیاسه‌ت هونه‌رێ برێڤه‌برنێ یه‌، هه‌لبه‌ت سیاسه‌ت ب خوه‌ ژى ده‌ربرینه‌كا راسته‌قینه‌یا ره‌وشا ئابووریه‌. ده‌ما مه‌ بڤێت د سیاسه‌تا هه‌ر وه‌لاته‌كى بگه‌هین و بزانین كانێ بۆچى هنده‌ك جارا پێنگاڤێن دوورى لۆژیكێ دهاڤێژیت، فه‌ره‌ مرۆڤ ل ره‌وشا ئابووریا وى وه‌لاتى مێزه‌ بكه‌ت، هینگێ دێ بۆ رۆهن بیت كو خوه‌سته‌كێن ئابوورى و ره‌وشا وێ وه‌سا دخوازیت كو حكوومه‌ت وان پێگاڤان بهاڤێژیت.
ل گۆر ڤى تێگه‌هى ئه‌گه‌ر ئه‌م ل ره‌وشا سیاسه‌تا حكوومه‌تا هه‌رێمێ مێزه‌ بكه‌ین و ل سه‌ر ب راوه‌ستین، دێ ئه‌ڤ گێله‌شۆكیا ئالۆز و هه‌ر لایه‌نه‌ك ژبه‌رپرسیاریێ دڕه‌ڤیت و ئوبالا ڤێ كاره‌ستا قه‌یرانا ئابوورى دده‌نه‌ پال یێ دیتر و خوه‌ وه‌كو “موویێ ژ ماستى كێشاى” خوه‌ پاك و بێ گه‌رد دهه‌ژمێرن، ب خوه‌شكى رۆهن بیت.
حكوومه‌تا هه‌رێما كوردستانێ ل سه‌ر تاسه‌ك ڤاله‌ هاتیه‌ دامه‌زراندن ئانكو نه‌خوه‌دى ژێرخانه‌كا ئابووریا بهێزه‌ و چ فابریكێن 500 كاركه‌ر لێ كار بكه‌ن، نینن، و ئابووره‌كا ژسه‌دى 95 ل سه‌ر فرۆتنا په‌ترۆلێ یه‌ و بازارێ په‌ترۆلێ ژى وه‌كو خودانكرنا مێشێن هنگڤینى لێ هاتیه‌” مێش ساله‌كێ خودانى دئینن پێش و ده‌ها دكه‌نه‌ ده‌روێش”، بازاره‌كێ له‌ق له‌قۆك و سه‌ره‌ڕاى كێش و بێشێن وه‌لاتێن خودان په‌ترۆل كو ئێكسه‌ر كێنجا خوه‌ ل سه‌ر بهایێ وێ دهێلێن، ناهێلێن قوون تووتیك ب بهایێ په‌ترۆلێ بكه‌ڤیت.
نه‌ جێگیریا بهایێ په‌ترۆلێ كێنجا خوه‌ ل سه‌ر سیاسه‌تا وه‌لاتێن به‌رهه‌مدار هشتیه‌ و به‌رده‌وام تووشى گرفتێن ئابوورى و سیاسى دبن و سعودیا و ئیران و عیراق باشترین نموونه‌ نه‌. هه‌ر شلقه‌كا ب بهایێ په‌ترۆلێ بكه‌ڤیت ئێكسه‌ر كێنجا خوه‌ ل سه‌ر سیاسه‌تێ دهێلیت. قه‌یرانا ئابووریا هه‌رێما به‌رهه‌مێ نه‌جێگیریا بهایێ په‌ترۆلێ یه‌ و زێده‌بارى نه‌ ب ده‌زگه‌هبوونا وه‌زاره‌تا په‌ترۆلا هه‌رێما كوردستانێ یه‌ و كه‌فتنا وێ ل بن گێولێ چه‌ند كه‌سه‌كان، قه‌یران كوورتر لێ كریه‌.
ده‌رباز بوون ژ ڤێ ریپا بلندبوون و نزمبوونا بهایێ په‌ترۆلێ ب ده‌زگه‌هكرنا ده‌وله‌تێ یه‌ و پرانیا وه‌لاتێن به‌رهه‌مدار ئه‌ڤ رێكه‌ هه‌لبژارتیه‌ و بزاڤێ دكه‌ن ئابوورێ خوه‌ پر جۆره‌ بكه‌ن و پویته‌یا (ئیعتیماد) ل سه‌ر په‌ترۆلێ كێم بكه‌ن، دا ژ دلۆڤانیا له‌قه‌له‌قۆكیا بهایێ په‌ترۆلێ رزگار ببن.
وه‌ك ل سه‌رى مه‌ دیاركرى حكوومه‌تا هه‌رێمێ ل سه‌ر تاسه‌ك ڤالا هاتیه‌ دامه‌زراند و خوه‌دى بنگه‌هك ئابوورێ بهێز و ده‌زگه‌ه كرى نینه‌ و ژبلى كێم ئه‌زموونیا خوه‌ برێڤه‌برنێ و سه‌ره‌ده‌ریا دگه‌ل قه‌یران و هه‌ر كاره‌ساته‌كا نه‌ چاڤه‌رێكرى، یێن ئیدیۆما حكوومه‌تا ساڤا بۆ حكوومه‌تا هه‌رێمێ ئافراندى دمافدارن، حكوومه‌ته‌كا ساڤایه‌ ب هه‌مووپیڤه‌ران و رایه‌دارێن وێ ژى دخازن ده‌مێ ساڤاتیێ درێژ بمینیت و به‌لكو هه‌ما ناخازن رابیت سه‌ر پییا!! ئه‌ڤه‌یه‌ كاكلا كێشێ و ته‌ڤ لایه‌نێن سیاسى ژى ڤێ ئێكێ باش دزانن، لێ خوه‌ پێ هایدار ناكه‌ن، چنكو بازارى پێ دكه‌ن و شه‌ره‌ هه‌لویستییێ ل ناڤ جادا كوردستانێ پێ دكه‌ن.
ل رۆژا ئه‌ڤ كابینه‌(كابینا هه‌شت) هاتیه‌ دامه‌زراندن نه‌ خودان پرۆگرامه‌ك هه‌ڤگرتى و ل سه‌ر رێككه‌فتى بوویه‌ به‌لكو ل سه‌ر پارڤه‌كرنا كێكا حكوومه‌تێ بوو، ژبه‌ر هندێ یه‌ ته‌ڤ لایه‌نێن وێ پێكڤه‌ رۆلێ ئۆپۆزسیۆنێ دگێرن و چ لایه‌ن خوه‌ ب به‌رپرسێ ڤێ قه‌یرانێ نزانن و هه‌ر ئێك ئۆبالا ڤێ قه‌یرانێ پالده‌ته‌ لایه‌نێ دى، ئانكو یێن بانگه‌شا “حكوومه‌تا بنكه‌ فراوان” ددا هزرا هندێ نه‌كربوو كو حكوومه‌تا بنكه‌ فراوان دێ بیته‌ حكوومه‌تا قه‌یرانێن مه‌زن!! ل هه‌موو جیهانێ تو راستى حكوومه‌تا وه‌كو یا هه‌رێمێ ناهێى كو یا بێ ئۆپۆزسیۆنه‌كا كارا بیت و د هه‌مان ده‌م دا هه‌موو لایه‌نێن پشكدار د حكوومه‌تێ دا رۆلێ ئۆپۆزسیۆنێ بگێرن، راست هاتیه‌ گۆتن: “هندى بمینین دێ هه‌ر بینین”!!