مه‌ گه‌له‌ك جاران ژ ده‌زگه‌هێن راگه‌هاندنا عه‌ره‌بى و جیهانى ده‌رباره‌ى بزاڤا رزگاریخازا كوردى بهیستیه‌ كو “تڤه‌نگا كوردى ب كرێ یه‌”، ب تایبه‌ت د سالێن هه‌شتیان دا ژ چه‌رخێ بۆرى و دیسا ل ڤى سه‌رده‌مى یا دووباره‌ دبیت. پێ نه‌ڤێت دوژمنێن دۆزا گه‌لێ كورد هه‌موو ب چاڤه‌كى لێ دمه‌یزنن و هندى بشێن دێ بزاڤا مه‌ یا ڕه‌وا شێلى كه‌ن و ژ مژارا وێ یا سه‌ره‌كى ده‌نه‌پاش و ڤالا كه‌ن و ئه‌ڤه‌ نه‌تشته‌ك نوویه‌ و ب تنێ ب سه‌ر گه‌لێ كورد دا نه‌هاتیه‌ و هه‌موو ملله‌تێن وه‌كو كوردان ئاخا وان هاتینه‌ داگیركرن د ڤێ گونه‌هباریێ دا ده‌رباز بوونه‌. هه‌رچه‌نده‌ ئه‌ڤه‌ تۆمه‌ته‌كا گرانه‌ و باوه‌ر ناكه‌م هه‌بن باوه‌ریێ ب ڤێ چه‌ندێ بینن و ب تایبه‌ت بۆ نڤشێ مه‌ كو د شۆره‌شا ئه‌یلولێ دا بووى و پشكدارى د شۆره‌شا نوویا كوردستانێ دا كرى و هه‌تا گه‌هایه‌ ئه‌ڤرۆ. لێ دوور ژ سوزداریا نه‌ته‌ویى و نیشتمانپه‌ریا رووكه‌شى كو ئه‌ڤرۆ بوویه‌ سیمایێ پرانیا تاكێ كوردستانى ب ره‌نگه‌ك وه‌سا جاش و ئاژانێن ده‌وله‌تێن داگیركه‌رێن كوردستانێ ئه‌ڤرۆ گه‌هشتنه‌ جهێ بریاردانا حوكمه‌تا كوردستانێ و مالباتێن هه‌موو هه‌یێن خوه‌ د پێخه‌مه‌تى رزگاریا نیشتمانى دا ب مه‌ردى مه‌زاختین، دوورپه‌رێز مانه‌ و ب چاڤێن زیق ل ڤێ بێ دادیێ دمه‌یزنن!!، ما گه‌لۆ ده‌م نه‌هاتیه‌ ئه‌م پرۆسه‌سا شۆره‌ش تێدا ده‌ربازبووى و ب تایبه‌ت دید و تۆمه‌تێن داگیركه‌ران پالداینه‌ بزاڤا رزگاریخازا كوردى بدانینه‌ به‌ر ڤه‌كۆلین و گه‌نگه‌شێ و هه‌ر كه‌سێ هه‌ڤكارى و ده‌ستكیسى بۆ داگیركه‌ران كرى دانینه‌ به‌رچاڤێن نڤشێ نوو؟! ئه‌ڤرۆ ده‌مێ پاسا و پوزشان نه‌مایه‌ چنكو حوكمه‌تا هه‌رێمێ و لایه‌نێن سیاسى ل چ ده‌ما وه‌كو ئه‌ڤرۆ ژ هه‌ڤدوو دوور نه‌كه‌فتنه‌ و تیك و درزێن مه‌زن نه‌كه‌فتینه‌ دید و بۆچوونێن وان ل سه‌ر پرسێن چاره‌نڤیسازێن حوكمه‌تا كوردستانێ و لایه‌نێ پتر ڤێ دوور هه‌ڤیێ گه‌رم دكه‌ت هه‌لگرێن تڤه‌نگا ب كرێ یا كوردانن. ئه‌ز وه‌سا هزر دكه‌م ئه‌ڤ ژێك دووركه‌فتنه‌ به‌رخۆڕێ وێ سیاسه‌تا حوكمه‌تا هه‌رێمێ گرتیه‌به‌ر ژ لێ نه‌پرسینا وان كه‌سێن هه‌ڤكارى و ده‌ستكیسیا داگیركه‌ران كرى د رۆژێن شۆره‌ش و به‌رخوه‌دانێ دا و هه‌ر ئه‌و بوون تڤه‌نگا ب كرێ یا كوردن یا ده‌زگه‌هێن راگه‌ندنا عه‌ره‌بى و جیهانى ئه‌م پێ ناڤ دكرین و باندۆره‌كا نه‌رێنى ل سه‌ر كه‌ستیا كورد دكر و بێهڤى دكر ژبلى سویێ شۆره‌شا كوردى پێ دهاته‌ شكادن. پرانیا كوردان پشتى سه‌رهلدانێ و دامه‌زراندنا حوكمه‌تا هه‌رێمێ وه‌سا هزر دكرن، ئێدى سه‌رده‌مێ ب كرێ گرتنا تڤه‌نگا كوردى ب سه‌رچوو و تڤه‌نگا كوردى دێ بۆ پاراستنا حوكمه‌تا هه‌رێما كوردستانێ ئێته‌ ئاراسته‌ كرن و ئه‌و لاپه‌رێ پرى فهێتى هاتیه‌ لادان و بوویه‌ پشكه‌ك ژ دیرۆكێ. لێ هه‌ركه‌سێ ل ره‌وشا ئه‌ڤرۆ ب مه‌یزنت ژ هه‌ڤڕكیێن ناڤخوه‌ كو هه‌ر لایه‌نه‌كێ سیاسى ژ سه‌ر دیدا خوه‌ رژده‌ و داگێرانێ بۆ لایه‌نێ دن ناكه‌ت و داگیركه‌ران ب دادوه‌ر دهه‌لبژێرن بۆ چاره‌سه‌ركرنا ئالۆزیێن ناڤخوه‌ و دبه‌رامبه‌ردا داگێرانێ ژ به‌رژه‌وه‌ندیێن بلندێن نه‌ته‌وى دهێته‌ كرن بۆ داگیركه‌ران و پاراستنا ئه‌زموونا حوكمه‌تا كوردستانێ ب ڤى ره‌نگێ هه‌ى یا به‌ره‌ف ئاسۆیه‌كا نه‌دیار دچت و مفا ژ ڤێ هه‌لا جیهانى یا ژ په‌یدابوون و به‌رفرهه‌بوونا شه‌رێ دژى تیرۆرێ كو پرانیا ده‌وله‌تێ داگیركه‌رێن كوردستانێ چ راسته‌وخۆ و یان نه‌راسته‌وخۆ تێوه‌ر بوونه‌، ناهێته‌ دیتن و گوتنا تڤه‌نگا كوردى بۆ كرێ یه‌ مرۆڤ دترست راست ده‌ربكه‌ڤت چنكو ته‌ڤ هێزێن كوردى بێ مه‌رج ته‌ڤى شه‌رێ دژى تیرۆرێ بوونه‌ و بێى كو پشكا كوردى ژ مزێ شه‌رێ تیرۆرێ بهێته‌ دیاركرن و وه‌كو دیار شه‌رێ دژى تیرۆرێ هێدى هێدى یێ به‌ره‌ف دووماهیێ دچت و شكه‌فا كوردى یا ل هیڤیا فریێ گاى ئه‌و ژى ب سه‌ده‌ما ڤێ هه‌ڤڕكیا نه‌ نیشتمانى و نه‌ نه‌ته‌وه‌یى كو دووباره‌ پرسا تڤه‌نگا كوردى ژ هه‌موو ده‌ما زێده‌تر ئینایه‌ به‌ربازارى و بازار پێ دهێته‌ كرن و مه‌ نه‌چار دكه‌ت بپرسین: ئه‌رێ ما هه‌تا كه‌نگى تڤه‌نگا كوردى بۆ كرێ یه‌؟!

ل 23.06.2016 بریتانیان بریارا خوه‌ دان و خوه‌ ژ ئێكه‌تیا ئه‌ورۆپى ڤه‌كێشا، ئه‌و ئێكه‌تیا ئه‌ڤه‌ سه‌رێ 43ێ ساڵانه‌ بوویه‌ قیبله‌یا پرانیا وه‌لاتێن ئه‌ورۆپى كو ببنه‌ ئه‌ندام د ڤێ ئێكه‌تیێ دا و وه‌لاتێ ژ هه‌موویان كاسۆتر بۆ ئه‌ندام بوونێ و كون دبنێ هاونان كرین، توركیایه‌ و هه‌رچه‌نده‌ ره‌وشا وێ یا ئابوورى ژ گه‌له‌ك وه‌لاتێن بووینه‌ ئه‌ندام باشتره‌ لێ هێشتا ئه‌ورۆپا ده‌رگه‌هێن ئه‌ندامبوونێ بۆ توركیا ڤه‌نه‌كرینه‌، چنكو ئێكه‌تیا ئه‌ورۆپا مه‌رجێن تایبه‌ت هه‌نه‌ بۆ ئه‌ندامبوونێ ومه‌رجێ ژ هه‌موویا گرنگتر سیسته‌مێ دیمۆكراتى و ل به‌رچاڤ گرتنا مافێن مرۆڤیه‌ كو توركیا ب دووریا عه‌رد و عه‌سمانى ژڤان مه‌رجان دووره‌. بریارا ده‌ركه‌فتنا بریتانیا ژ ڤێ ئێكه‌تیێ چ ژ ره‌وشا گشتیا ڤێ ئێكه‌تیێ نائینت خار چنكو ئێكه‌تیه‌ك ئاره‌زوومه‌ندانه‌یه‌ و بیاڤێ ده‌ركه‌تنێ ژ ڤێ ئێكه‌تیێ بۆ هه‌ر ئه‌ندامه‌كى هه‌یه‌ و مافه‌كێ سروشتیێ وانه‌، ئه‌ڤجا ڤى مافى په‌یده‌ بكه‌ن (هه‌روه‌كو بریتانیا په‌یاده‌كرى)، یان ژى نه‌كه‌ن، په‌یوه‌ندى ب خاسته‌كا وه‌لاتییان ڤه‌ هه‌یه‌. یا فه‌ره‌ ئه‌م بزانین بۆچى بریتانیان ئه‌ڤ بریاره‌ دان ل ده‌مه‌كى سیسته‌مێ گلۆبالیزمێ یێ سه‌رده‌سته‌ و جیهان یا به‌ر ب ئێكبوونه‌كا بانكى و كولتۆرى دچت و سنوورێن نه‌ته‌وه‌یى گرنگیا خوه‌ ژ ده‌ستدانه‌! هه‌رچه‌نده‌ د ناڤ ئێكه‌تیا ئه‌ورۆپى دا بریتانیا خوه‌دى تایبه‌تمه‌ندیه‌كا تایبه‌ت بوو لێ دیسان ژى باسكێ دژى ئێكه‌تیێ ب سه‌ركه‌فت و خوه‌ ژ ڤێ ئێكه‌تیێ ڤه‌كێشان و ئه‌ڤه‌ ناهێته‌ وێ هه‌ژمارێ كو ل وه‌لاتێن دن یێ ئه‌ورۆپى هه‌ڤدژێن ئێكه‌تیێ نینن به‌لكو ل پرانیا وه‌لاتێن ئه‌ورۆپى هه‌نه‌، چنكو ئێكه‌تیێ ب دێژیا ته‌مه‌نێ خوه‌ نه‌شیا باندۆرا ڤى باسكى بنبڕ بكه‌ت، وه‌سا نه‌ئێت هزركرن كو رایه‌دارێن ئێكه‌تیا ئه‌ورۆپى پشته‌گوه كربن نه‌خێر به‌لكو ب مجدى كار ل سه‌ر كریه‌ و هه‌موو بزاڤ كرنه‌ شوینه‌وارێن هه‌ردوو شه‌رێن جیهانى( 1914-1918، 1939-1945) نه‌هێلن و هه‌روه‌سا بنبڕ كرنا هه‌موو ئه‌گه‌رێن په‌یدابوونا شه‌رى د پاشه‌رۆژێ دا و ژبۆ ڤێ مه‌ره‌مێ ژى گه‌له‌ك قانوون ده‌رخستنه‌ و رێك ل به‌ر نه‌ته‌وه‌په‌رستێن تۆندڕه‌و ته‌نگ كرنه‌ و روو ب روو قانوونێ كرنه‌. د سه‌ر ڤێ هه‌موویێ ڕا ئه‌ڤ باسكه‌ هێدى هێدى یێ بهێز دكه‌ڤت و باندۆرا وان ل سه‌ر سیاسه‌تا ناڤخوه‌ و ده‌رڤه‌ یا ێكه‌تیێ دیاره‌ و سه‌ده‌م ژى گه‌له‌كن لێ یێن ژ هه‌موویان بالكێشتر ئابوورى و ئیسلاموفۆبیا و پرسا كۆچبه‌رانن. هه‌تا نوكه‌ بروسل نه‌شیایه‌ كریزا ئابوورى لخاڤ بكه‌ت و وه‌لاتیێن ئه‌لمانیا، بریتانیا و فه‌ره‌نسا ژ سیاسه‌تا ئابووریا حوكمه‌تێن خوه‌ دزیزن چنكو ئه‌و وه‌سا هزر دكه‌ن حوكمه‌تێ ئه‌و ژ سه‌خمه‌راتى راگرتنا ئابوورێن ژبه‌رێكچوویێن یونان، ئسپانیا و ئیرله‌ندا باج ل سه‌ر داهاتى زێده‌كرنه‌، ژبلى ئاڤه‌دانكرنا ئه‌ورۆپا رۆژهه‌لات. یادن ئیسلاموفۆبیا كوپراانیا وه‌لاتیێن ئه‌ورۆپى ڤه‌گرتیه‌ و ئێكه‌تى ب مجدى ل سه‌ر ڤێ چه‌ندێ ڕانه‌وه‌ستایه‌ و پێنگاڤێن راوه‌ستاندنا مه‌ترسیا ئیسلاما سیاسیا تۆندڕه‌و ل سه‌ر ئێمناهایا وه‌لاتیان هه‌ر ژسالێن 1980ێ و هێرڤه‌ و چه‌ندی كریارێن تیرۆریستى ل پرانیا پایته‌ختێن ئه‌ورۆپا ئه‌نجامداینه‌ و ئه‌ڤێ چه‌ندێ ترسه‌كا مه‌زن ل جه‌م تاكێ ئه‌ورۆپى په‌یداكریه‌. سه‌ده‌مێ هه‌ر بالكێشێ دن پرسا ئاوارانه‌ و كێشێن پشتى ئاكنجیكرنێ كو تاكێ ئه‌ورۆپى گه‌له‌ك ژێ دترست چنكو سیاسه‌تا ڕه‌هماندنێ(ئینتیگراسیۆنێ) شكه‌ستن خاریه‌ و پرانیا ئه‌نجامده‌رێن كریارێن تیرۆرستى ل ئه‌ورۆپا سه‌ر ب ره‌ڤه‌ندا ئیسلامینه‌ و كو هه‌تا ئه‌ڤرۆ نه‌شیانه‌ خوه‌ ل گه‌ل كولتۆرێ ئه‌ورۆپى بڕه‌همینن و ئه‌ڤ ئاواره‌ ژى هاتن بوونه‌ سه‌ربار. ئه‌ڤ هه‌رسێ خالێن مه‌ دیاركرین سه‌ده‌مێن سه‌ره‌كینه‌ بۆ بهێزبوونا باسكێ نه‌ته‌وه‌په‌رست و دژى بیانیان و ئه‌گه‌ر رایه‌دارێن ئێكه‌تیا ئه‌ورۆپى ل خوه‌ مكۆر نه‌هێن و رێچاره‌كێ نه‌بینن، دێ چامێن سه‌یر ژ ڤه‌رێژا ریفراندۆما بریتانیا په‌یدابن و ژبلى مه‌ترسیا لێكترازانا ئێكه‌تیا ئه‌ورۆپا مه‌ترسیا هندێ دێ په‌یدابت كو باسكێ نه‌ته‌وه‌په‌رست و ئه‌نتى بیانى بهێته‌ سه‌ر ته‌ختێ ده‌ستهه‌لاتێَ، هنگى ئاسایشا جیهانى دێ كه‌ڤیته‌ دمه‌ترسیێدا و ئه‌زموونا ئه‌لمانیا نازى هێشتا گه‌له‌ك ده‌م ب سه‌رڤه‌ نه‌چوویه‌ و نه‌هاتیه‌ ژبیركرن.

به‌رى چه‌ند رۆژه‌كا هه‌وه‌كا “پاقژكرنا ژینگه‌هێ” بۆ رۆژه‌كێ ب تنێ ل كوردستانێ هاته‌ ئه‌نجامدان ( ل دهوكێ ئه‌ڤه‌ جارا دویێ یه‌ د ئه‌ڤ ساله‌ دا) و ئه‌گه‌ر نه‌یێ شاش بم، ژ لایێ حوكمه‌تێ ڤه‌ هاتبوو ئه‌نجامدان ئانكو پیچه‌كێ فه‌راتى تێدا هه‌بوو و كه‌سێن تێدا پشكداربووى هه‌روه‌كو ئێكى ب خوه‌ گۆتى: ” بۆ رویمه‌تى مه‌ژى پشكدارى كر”. هه‌رچه‌نده‌ یا گرنگ نینه‌ كانێ ب فه‌رمانا كێ ئه‌ڤ هه‌وه‌ هاتیه‌ ئه‌نجامدان و پاقژى وه‌كو دهێته‌ گۆتن:”ژ ئیمانێ یه‌”، لێ ده‌ما حوكمه‌ت ب هه‌وه‌كێ رادبیت ئاماژه‌یه‌ كو دیارده‌كا نه‌ جان هه‌یه‌ و دڤێت بهێته‌ بنبڕكرن! ئه‌گه‌ر ما دێ چه‌وا ده‌مێ كارمه‌ندێن خوه‌ ب هه‌روه‌ ده‌ت و كارێن وان راوه‌ستینیت، مانێ هوون ژ من باشتر دزانن كانێ بارێ سه‌ر ملێن كارمه‌ندێن حوكمه‌تێ چه‌ندێ گرانه‌ و رۆژێن بێهندانان نێزیكه‌ دێ هندى رۆژێن كارى لێ هێن؟! گه‌له‌ك جارا كه‌یفا من ب حوكمه‌تا هه‌رێمێ دهێت و ده‌ستا بۆ دقۆتم بۆ زیره‌كى و شه‌هره‌زایی و تێبڕینا وێ بۆ بازدانا وێ دسه‌ر ئاریشێن به‌رووكا خه‌لكێ كوردستانێ گرتین و خه‌لكى بێده‌نگ بكه‌ت و ئه‌و ژى ل سه‌ر ده‌ه و دویا خوه‌ به‌رده‌وام بیت كو ئه‌ڤه‌ ل چ جهێن جیهانێ نه‌بوویه‌! ئه‌گه‌ر راست بیت كو پاقژى ژ “ئیمانێ بیت” و هه‌ر كه‌س ئه‌ڤێ دزانیت: به‌لێ بۆچى كه‌س پێگیریێ پێ ناكه‌ت و ژ ده‌وله‌ت سه‌رێ ئه‌ڤى خه‌لكى ئه‌ڤ كوردستانا هنده‌ سروشتێ وێ یێ جان هه‌ما چ نه‌مایه‌ دێ بیته‌ گلێشستان! ئه‌گه‌ر چى مه‌گه‌له‌ك ره‌خنه‌ ل حوكمه‌تێ هه‌نه‌ لێ ده‌رباره‌ى راكرنا گلێشى هیچ كێماسیه‌ك نه‌كریه‌ و هه‌ر جهه‌كێ هاتبیته‌ ته‌خمینكرن كو دو مرۆڤ سه‌رێن خوه‌ پێكڤه‌ بنن، ئها ل وێرێ هزرا راكرنا گلێشى كریه‌ و ژبلى تیمێن پاقژیێ خوه‌ د رۆژێن بێهندانانێ دا ژى كار دكه‌ن. ئه‌ز خوه‌زیا رادهێلم كو ئه‌ڤ گرنگیا حوكمه‌تێ دایه‌ زێده‌كرنا رۆژێن بێهندانێ و راكرنا گلێشى دابایه‌ ڤه‌دیتنا چاره‌سه‌ریێ بۆ قه‌یرانێن ڤێ هه‌رێما ژ هه‌وێن ب عه‌ره‌بكرن و ئه‌نفالان ڤه‌ره‌ستى، باوه‌ر بكه‌ن دا ب ده‌مه‌كى كێم گه‌هینه‌ رێزبه‌ندا وه‌لاتێن پێشكه‌فتى و بێژینه‌ قه‌یرانان باى باى! ژینگه‌ها كوردستانێ یا پاقژه‌ و پێدڤى چ هه‌وه‌ێن پاقژیێ ناكه‌ت” ژبلى راكرنا گلێشى” چنكو ژینگه‌ه ب گلێشى پیس نابیت به‌لكو ب دویكێل و به‌رمایێ كارگه‌هان و ب تایبه‌ت ژى یێن كیمایى و ماشه‌للاه هندى هند كارگه‌ه ل كوردستانێ دمشه‌نه‌ بۆ سووند ژى مه‌ كاركاره‌كێ بێكار نینه‌! و ڤان كارگه‌هان ژینگه‌ها مه‌ پیس كریه‌ و چ نه‌مایه‌ ته‌خا ئۆزۆنى دێ ل كوردستانێ كون بیت و ئه‌وا عه‌ره‌بێن شۆفینى ب درێژیا دیرۆكێ نه‌شیاین ڤى ملله‌تى قۆتبڕ بكه‌ن، دێ كونا ئۆزۆنى مه‌ قۆتبڕ كه‌ت! وه‌ى عه‌فه‌رم حوكمه‌ت پا ته‌ گویفك برنه‌ قه‌یرانێن هه‌رێمێ و به‌رده‌وام به‌ ل سه‌ر بازدانێ ل سه‌ر قه‌یرانان و هێجه‌تان رێزكه‌، مانێ ئه‌وێ رۆژێن بێهندانێ زێده‌ بكه‌ت و گلێش راكرنێ ب پاقژكرنا ژینگه‌هێ خه‌لكى دسه‌ردا ببه‌ت و پێڤه‌ مژوول بكه‌ت، دێ هه‌ر ئه‌ڤه‌ ئێته‌ شكه‌فا ملله‌تى. نزا حوكمه‌تا مه‌ ژبیرا خوه‌ بریه‌ بازدان ل سه‌ر قه‌یرانان نه‌چاره‌سه‌ریه‌ به‌لكو ئاریشه‌ ئالۆزتر دبن و هه‌تا ده‌مه‌كى مرۆڤ دكارت ژ ئاریشان بڕه‌ڤیت و كولاڤان بكه‌ته‌ سه‌رێ خه‌لكى لێ ل دوماهیێ هه‌موو به‌ره‌پشت بۆ حوكمه‌تێ دزڤڕیت، دیسا فه‌ره‌ حوكمه‌ت و خه‌لك بزانن گلێش هاڤێتن بۆ جهێن تایبه‌ت ب گلێشى ڤه‌ كاره‌كێ شارستانیه‌ و به‌روڤاژى ژى راسته‌ و ئه‌گه‌ر حوكمه‌ت ده‌رباره‌ى گلێشى سزایێن تۆند ژى بده‌ت یا مافداره‌ لێ رۆژه‌كێ یان چه‌ند مه‌هان جاره‌كێ هه‌وێن پاقژیێ ئه‌نجام بده‌ت سروشتێ كوردستانێ پێ ناهێت پاراستن و پاقژكرن و هه‌روه‌كو چه‌وان ئه‌ڤه‌ سه‌رێ چه‌ند ساڵانه‌ ب گۆتن شه‌رێ گه‌نده‌لیێ دهێته‌ كرن لێ هه‌تا ئه‌ڤرۆ ئه‌ڤ دیاردا نه‌شارستنى نه‌هاتیه‌ بنبڕكرن و فرته‌ فرتا گه‌نده‌لكارانه‌، مخابن گه‌هشتتیه‌ وى ڕاده‌ى مرۆڤ دشێت بێژت: كوردستان یا بوویه‌ مه‌یدانا گلێشى و گه‌نده‌لكاران.

هندی وێڤه‌تر دچیت توركیا ب سه‌رۆكاتیا ئه‌ردۆغانی یا ژ دیمۆكراتی و سیسته‌می په‌رله‌مانی دوور دكه‌ڤیت و هه‌موو پیڤه‌رێن دیمۆكراتیێ بن پێ دكه‌ت و بێی كو ره‌خنه‌ و گڤاشتنێن ناڤخۆیی ژ پارتێن سیكولار و جڤاكێ سڤیل موویه‌كی ژ ئه‌ردۆغانی شاش بكه‌ن یان هه‌ر چ نه‌بیت، پیچه‌كێ گورێغ بوونا وی كێم بكه‌ت و گوهداریا ده‌نگێن نه‌رازی یێن ناڤخۆیی بكه‌ت و ل سه‌ر سیاسه‌تا تاكڕه‌ویا خوه‌ یێ رژده‌ و ب ڤی ره‌نگی ژیانا په‌رله‌مانی ل توركیا چ سهانه‌ت بۆ نه‌مایه‌ و كه‌فتیه‌ بن فه‌رمانێن قه‌ڕه‌قۆشیێن ئه‌ردۆغانی و گه‌ز و مه‌قه‌سێن په‌رله‌مانی ئه‌ڤرۆ د ده‌ست ئه‌ردۆغانی دا كراسێن قانوونا دووری پره‌نسیبێن دیمۆكراتی و مرۆڤاتیێ، كه‌ر دكه‌ن. په‌رله‌مان نه‌ ب تنێ جهێ ده‌ركرنا قانوونایه‌ و چاڤدێریێ ل كارێن حوكمه‌تێ بكه‌ت، به‌لكو جهێ پارستنا پارسه‌نگا هێزێن جڤاكی یه‌ و پاراستنا به‌رژه‌وه‌ندێن هه‌موو تاكێن جڤاكی یه‌ و هه‌رده‌مێ ئه‌ڤ پارسه‌نگه‌ هاتنه‌ تێكدان، هینگی هه‌ڤگرتنا جڤاكی ده‌رز دكه‌ڤنێ و ته‌ڤنێ جڤاكی ژبه‌رێك دچیت و ئێدی وه‌لات به‌ر ب ره‌هه‌ندێن مه‌ترسیدار و ئاسۆیێن ل به‌ر هه‌ر پێشهاته‌كێ ڤه‌دبن، دچیت. ئه‌ڤرۆ رێك توركیا ب سه‌رۆكاتیا ئه‌ردۆغانی گه‌هشتیه‌ ئه‌ڤێ قووناغێ و نێزیكبوونا فاتحه‌ خاندن ل سه‌ر سیسته‌مێ دیمۆكراتیا توركیا یا دیار دبیت و هه‌ر ژ ئه‌ڤێ ترسێ یه‌ كو په‌رله‌مانێ ئورۆپی هۆشداری دایه‌ حكوومه‌تا ئاكپارتی كو ئه‌گه‌ر ل سه‌ر ڤێ ده‌ه و دویا خوه‌ یا به‌رده‌وام بیت، دێ هه‌موو ده‌رگه‌هێن ئێكه‌تیا ئورۆپا لێ هێنه‌ گرتن و په‌رله‌مانتاره‌كێ سه‌ر ب پارتا كه‌سكا بریتانی ڤه‌ گۆت: [ل سه‌ر ڤێ سیاسه‌تا ئه‌ردۆغانی توركیا بۆ هزار سالێن بهێت ژی نابیته‌ ئه‌ندام د ئه‌ڤێ ئێكه‌تیێ دا].
ئاكپارتی و ب تایبه‌ت ئه‌ردۆغانی په‌رله‌مانێ توركیا ل گۆڕی خوه‌سته‌كێن خوه‌ لغاڤ كریه‌ و پیرۆزی و هه‌بوون (ماهیه‌ت) بۆ نه‌هێلایه‌ و ژ قه‌رقوده‌كێ بێگیان پێڤه‌ نه‌مایه‌، ئه‌گه‌ر نه‌، ما ل كیژان په‌رله‌مانێ دونیایێ چێ بوویه‌ پارێزبه‌ندی ژ 152 په‌رله‌مانته‌ران بهێته‌ راكرن و د هه‌مان ده‌م دا ژی له‌شكر و پله‌دارێن له‌شكری ژ دادگه‌هكرنێ بهێنه‌ پاراستن؟! ئه‌ڤه‌یه‌ حنێرا په‌رله‌مانێن دبنه‌ دیلێن حه‌زێن تاكه‌ كه‌س و ته‌ك پارتیان. دبیت ئه‌ردۆغان دلێ خوه‌ ب وێ یه‌كێ خوه‌ش بكه‌ت كو پارتیا وی ب ده‌نگێن وه‌لاتیێن توركیا هاتیه‌ سه‌ر ته‌ختێ سه‌لته‌نه‌تێ و یا دڤێت بكه‌ت یێ ده‌ستوور دایه‌، لێ ژبیر كریه‌ یان ژی ژ بیرا خوه‌ دبیت كو هتله‌ر ژی ب پرانیا ده‌نگێن وه‌لاتیێن ئه‌لمانی هاتبوو سه‌ر ته‌ختێ سه‌لته‌نه‌تێ لێ دووماهیك چ چێ بوو؟ ئه‌لمانیا كێشا شه‌ره‌كێ مالوێرانكه‌ر هه‌تا ئه‌ڤرۆ ژی گه‌لێ ئه‌لمان یێ باجا گورێغ بوونا رژێما هێتله‌ری دده‌ت.
راكرنا پارێزبه‌ندیێ ل سه‌ر په‌رله‌مانته‌ران دێ گه‌له‌ك گران ل سه‌ر رژێما ئه‌ردۆغانی كه‌ڤیت، چنكو به‌ریا ئه‌ردۆغانی ژی حوكمه‌تێن توركیا رێكا شه‌ری دگه‌ل كوردان هه‌لبژارت بوو و هه‌موو ده‌رگه‌هێن دانوستاندنێ ل گه‌ل كوردان ب كلیلێن نه‌ته‌وه‌په‌رستیا تۆندڕه‌و دائێخست بوون، لێ ئه‌نجام مالوێرانی و شلۆق بوونا پێگه‌هێ توركیا ل ده‌ڤه‌رێ و ل جیهانێ هاته‌ شكه‌فا توركیا و زیانه‌كا مه‌زن گه‌هشته‌ ئابوورێ توركیا و لیرێ توركیا پتر ژ نیڤه‌كا بوهایێ خوه‌ ژ ده‌ست دا. دڤێت توركیا و ل پێشیێ ئه‌ردۆغان ب خوه‌ ل ره‌وشا پشتی ده‌ستپێكرنا پرۆسا ئاشتیێ ل گه‌ل كوردان مێزه‌ بكه‌ت، كانێ چه‌وان پێگه‌هێ توركیا و ئابوورێ وێ لوتك ڤێكه‌تن و قه‌به‌ بوو و ل سه‌ر ئاستێ جیهانێ و ده‌ڤه‌رێ هزار و ئێك هزر بۆ دهاته‌ كرن و ژ رۆژا ئه‌ردۆغانێ بریارا نه‌فیرعام ل سه‌ر كوردان و هێزێن سیكولار و رۆژنامه‌ڤان دای كا ره‌وشا توركیا گه‌هشتیه‌ چ ئاست؟ بۆ توركیا و هه‌روه‌سا ته‌ڤ داگیركه‌رێن كوردستانێ دڤێت ڤێ ئێكێ بزانن كو كورد ل بن چ گه‌فان و هێرشێن هۆڤانه‌ ده‌ستبه‌رداری مافێن خوه‌ نابن و دیرۆكێ ئه‌ڤه‌ ب پیتێن زێرین نڤیسی یه‌ و گۆرێغ بوونا ئه‌ردۆغانی دێ ب رێكا گۆرێغ بوونا سه‌ددامی ڤه‌ چیت و دێ هه‌مان چاره‌نڤیس هه‌بیت.

توركیا ل سه‌ر شوونوارێن هه‌رفتیێن ئیمپراتۆریا ئۆسمانی هاتیه‌ ئاڤاكرن و ژ لایێ قانوونی ڤه‌ دبیته‌ شوونگرێ راسته‌قینه‌ یێ ئیمپراتۆریا ئۆسمانی و هه‌ر ل سه‌ر ڤی بنگه‌هی ناڤگینێن نێڤده‌وله‌تی سه‌ره‌ده‌ریێ ل گه‌ل دكه‌ن و توركیا ب خوه‌ ژی ئه‌ڤێ چه‌ندێَ دزانیت و هه‌تا نوكه‌ ده‌ستبه‌رداری ژ لیوا مووسل نه‌كریه‌ ب هێجه‌تا هندێ كو وان بێی شه‌ڕ خوه‌ ژێ ڤه‌كێشایه‌ و هه‌ر ب خاكێ ئوَسمانیان دهه‌ژمێرن و هه‌ر جار جار ئه‌ڤی كه‌یسی ل گه‌ل ده‌وله‌تا عیراقێ دئازرینن!! كه‌یسێ به‌روكێ ده‌وله‌تا توركی گرتی و وه‌كو نووژێ مایه‌ ب قركا وێ ڤه‌، كه‌یسێ جینۆسایدا گه‌لێ ئه‌رمنه‌ ل 1915 كو تێدا پتر ژ ملیۆن و 500 هزار ئه‌رمه‌نی هاتنه‌ كوشتن!! گه‌لێ ئه‌رمه‌ن د سه‌ر وێ كاره‌ستا جه‌رگ بڕ دا قه‌ت ده‌ستبه‌رداری ژ مافێن خوه‌ نه‌كریه‌ و به‌رده‌وام كه‌یسێ ناساندنا جینۆسایدا گه‌لێ خوه‌ هێلایه‌ ساخ و هه‌موو ده‌رگه‌هێن ناڤگینێن ده‌وله‌تی قووتانه‌ و هه‌تا نوكه‌ پتر ژ بیست و نه‌ه ده‌وله‌تان دانپێدان ب ڤێ جینۆسایدێ كریه‌ و یا هه‌ری دووماهیك ئه‌لمانیایه‌ كو ل 2/6/2016 په‌رله‌مانێ ئه‌لمانی دان ب جینۆسایدا گه‌لێ ئه‌رمه‌ن كر. هه‌رچه‌نده‌ ئه‌ڤ دانپێدانه‌ ژ لایێ په‌رله‌مانێ ئه‌لمانی یا چاڤه‌رێكری بوو، لێ ده‌وله‌تا توركی هزركر كو ب گه‌فێن سۆلتانێ نوویێ ستانبۆلێ (ئه‌ردۆغان) دێ پێستوورك ئه‌لمانیا گرت و دێ ده‌ستبه‌رداری ڤی كه‌یسی بیت!! پشتی دانپێنانێ ب جینۆسایدێ توركیا ب گه‌ل و حوكمه‌ت ڤه‌ روویێ راستێ خوه‌ یێ فاشی و نه‌ژادپه‌رستی نیشا جیهانێ دا و درووشم و په‌یڤێن نه‌ ژ ره‌نگ هاتنه‌ گۆتن و بۆ ڤی سه‌رده‌می ئه‌ڤ په‌یڤه‌ فهێتیه‌ك مه‌زنه‌!! و هێرشی سه‌ر قونسولخانا ئه‌لمانیا و په‌رله‌مانێ ئه‌لمانیا كرن و ئه‌لمانیا تاوانبار كر ب نازیه‌تێ، هه‌رچه‌نده‌ ئه‌لمانیا دانپێدان ب هه‌موو تاوانێن ل سه‌ر ده‌مێ نازیه‌تێ كریه‌ و د گه‌ل دیرۆكا خوه‌ ئاشنا بوویه‌ و مفا ژ وێ سه‌ربۆرێ وه‌رگرتیه‌ و رێكا راستا دیمۆكراتیێ هه‌لبژارتیه‌ و هه‌تا نوكه‌ ژی پارتا نازی و هه‌موو پارتێن نه‌ژادپه‌ره‌ست د قه‌ده‌غه‌نه‌ ژبلی دانا قه‌ره‌بوویێن شاشێن سه‌رده‌مێ نازیان و چه‌ندین ناڤگین و كۆمه‌لێن جڤاكێ سڤیل و ئینستتیوَتێن زانستی دامه‌زراندینه‌ بۆ نه‌هێلانا هه‌ر هزره‌كا نازی و نه‌ژادپه‌ره‌ستی!! ب سایا سیاسه‌تا ئه‌ردۆغانی توركیا كه‌فتیه‌ د ناڤ كۆمه‌كا ئاریشان دا و ئه‌و پێگه‌هێ سه‌رده‌مێ شه‌رێ سار هه‌بوو، نه‌مایه‌ و ئێدی رۆژئاڤا چاڤێن خوه‌ ل شاشیێن توركیا نانقینیت و ب تایبه‌ت ده‌رباره‌ی باده‌كێن مافێن مرۆڤی، علمانیه‌تا ده‌له‌تێ، ئازادیا مه‌دیایی، پرۆسا ئاشتیێ دگه‌ل كوردان، پشته‌ڤانیا گرۆپێن تۆندڕه‌و و بازاركرن ب پرسا ئاواره‌یان، چاره‌سه‌ركرنا ڤان باده‌كان وه‌كو دیار د گه‌وریا ئه‌ردۆغانی دا ناچن و ل ده‌مه‌كێ نێزیك ناهێنه‌ چاره‌سه‌ركرن و كێشێن توركیا دگه‌ل رۆژئاڤا و ب تایبه‌ت ل گه‌ل ئه‌مریكا دێ زێده‌ بن و ئه‌گه‌ر توركیا هه‌ر ل سه‌ر ڤێ سیاسه‌تا خوه‌ به‌رده‌وام بیت، چاره‌نڤیسێ وێ ژ یێ یۆگسلافیا باشتر نابیت. دانپێنانا ئه‌لمانیا ب جینۆسایدا ئه‌رمه‌نان د ڤی ده‌مێ ئاریشێن توركیا د گه‌ل رۆژئاڤا گه‌هشتیه‌ بلندترین ئاست، دێ بیته‌ ده‌ستپێك بۆ ناساندنا جینۆسایدا دێرسمێ(1937-1938) و وان كۆمكوژیێن ل گه‌ل ئه‌رۆم و یونانیێن توركیا هاتینه‌ ئه‌نجامدان.
توركیا دڤێت وه‌كو ئه‌لمان و سپی پێستێن ئه‌فریكا باشوور و شیلی دان ب وان كۆمكوژیان بكه‌ت ئه‌وێن د سه‌رده‌مێ ئۆسمانیان و كۆمارا توركیا دا هاتینه‌ ئه‌نجامدان، ئه‌گه‌ر نه‌ دێ هه‌ر جهێ له‌ك و لومێن جیهانا پێشكه‌فتی بیت و دێ هه‌ر باجێ ده‌ت و به‌رده‌وام دێ كه‌ڤته‌ بن باندۆرا هه‌پاره‌یێ دیرۆكا خوه‌ چنكو ئه‌ڤ سه‌رده‌مه‌، سه‌رده‌مێ مافێ مرۆڤی و دیمۆكراتیێ یه‌ و جهێ ده‌وله‌تێن نه‌قۆله‌ و تیرۆریست پارێز نینه‌ و ب سه‌رڤه‌ چوونا ده‌می ل سه‌ر قوبحه‌تێ، نابیته‌ سه‌ده‌ما ژبیرچوونێ.

ئه‌ڤێ جارێ بیێ خوه‌ پێگیری مه‌رجێن گوتارنڤیسینێ بگرم دێ ئێكسه‌ر و سیقل دیق دێ چمه‌ ناڤ بابه‌تی و نه‌هه‌وجیه‌ سه‌رێ خانده‌ڤانی گێژ بكه‌م؛ ئه‌و ژی ئه‌ڤه‌یه‌ و به‌لكو هه‌وه‌ ژی گوه لێ بوویه‌ كو دێ په‌رله‌مانته‌رێن مه‌ ڤه‌گه‌ڕهنه‌ به‌غدا!! به‌لێ نه‌ گوتنه‌ كیش به‌غدایێ!! به‌غدایا سه‌رده‌مێ هاروون ره‌شیدیه‌ یان یا مه‌ئمونی!! ئه‌رێ ما تشته‌كێ نوو ل به‌غدا روودایه‌ و مه‌ نه‌زانی بت؟ هون ب خودێ كه‌ن سیاسه‌تمه‌دارێن مه‌ های ل خوه‌ هه‌یه‌ كو به‌غدا یا ب زرته‌پۆزێن سه‌درێ ته‌له‌دین ڤه‌ مایه‌ موبته‌لا و هێشتا حوپ حوپا وانه‌ و سه‌رێن ریا ل هه‌ركه‌سێ تشته‌كی ژ ئه‌لیف بێتكێن سیاسه‌تێ دزانت، به‌رزه‌كرینه‌!! یان نه‌كه‌ خودێ نه‌كه‌ت و مه‌ نه‌زانی بت، قه‌یرنا مووچێ بوویه‌ بڕینا هنگڤێ-هۆز و میرا ژ وان ژی گرتبت و ترسا نه‌دانا كریا خانی و قستێ خانی و ترۆمبێلێ، ده‌كودولابێن سیاسه‌تكرنێ ژبیرێ بربن! نه‌خێر باوه‌ر ناكه‌م و باوه‌ر دكه‌م كو هوون ژی باوه‌ر ناكه‌ن كو هه‌ما پێله‌كا نه‌رما ڤێ قه‌یرانا ره‌وشتێ سیاسه‌تمه‌دارێن مه‌ ئینایه‌ به‌ربازارێ ڤاله‌هیا به‌رووكێن خه‌لكێ ڤێ هه‌رێما د گێله‌شۆكا نه‌خشه‌كێشانا ده‌ڤه‌رێ دا ل فریادره‌سه‌كی دگه‌رهت، گرتبت. پا ئه‌گه‌ر چنه‌ جاره‌كا دی په‌رله‌مانته‌رێن ب هزار ده‌رده‌ سه‌ریا ژ زڕته‌پۆزێن سه‌دری و مالكی و نزا كێ و كێ رزگار بووین و پشتی هنده‌ك په‌رله‌مانته‌ر هۆ باش هاتینه‌ نه‌رمژاندن كو ب دیتنا من ئه‌و نه‌رمژاندنا هه‌ر تاكه‌كێ كورد بوو ل هه‌ر پارچه‌كا ڤێ دونایایا به‌ردڕیایی، جاره‌كا دی به‌رێ وان بده‌نه‌ به‌غدا. دبێژن: “مار گه‌ستی، ژ وه‌ریسی دترست” لێ نزا بۆچی سیاسه‌تمه‌دارێن مه‌ نه‌ سه‌بۆڕا ژ شاشیێن خوه‌ دگرن و نه‌ ژی پێگیریێ ب هه‌لویستێن خوه‌ دكه‌ن و هه‌موو شاشی و كه‌تن و قه‌یرانێن به‌رووكا هه‌رێما كوردستانێ گرتین و دگرن، دێ سه‌ده‌مان پالده‌نه‌ داگیركه‌ر و نه‌حه‌زێن چاڤێن وان ب ئه‌زموونا كودستانێ نا ڕابن!! جاره‌ك چیه‌ خوه‌ بۆ ده‌رمانی ژی بت، ب درێژیا دیرۆكا بزاڤا ئازادیخازا كوردی سه‌رۆكه‌كێ كوردان هه‌بت دان ب شیاشیێن خوه‌ كربت، وه‌ح ما ئه‌ڤه‌ ل جیهانێ بوویه‌!! نه‌خێر سه‌ركرده‌ و سیاسه‌تمه‌دارێن مه‌ دپاكن و ئه‌م ملله‌ته‌كێ پت پتی و نان كۆرین!! ل ده‌ستپێكا داگیركرنا په‌رله‌مانێ عێراقێ ژ لایێ ره‌وتێ سه‌در ڤه‌ هه‌موو سیاسه‌تمه‌دارێن مه‌ هاتنه‌ سه‌ر هێلێ و وه‌سا ددان خویاكرن كو هه‌ما به‌ندكێ مه‌ و عێراقێ پچیا و ب راستی ژی ژ به‌ری هینگێ وه‌ره‌ ده‌وله‌ته‌ك نه‌مایه‌ ب ناڤێ عێراق لێ د سه‌ر هندێ ڕا به‌ندكێ مه‌ و عێراقێ هه‌ر یێ مایی و ئه‌گه‌رێن نه‌ قووت بوونا ڤی به‌ندكی هه‌ر سیاسه‌تمه‌درێن كورد ب خوه‌نه‌ و هه‌موو لایه‌نێن عێراقی ڤێ چه‌ندێ باش دزانن و له‌وما ته‌ڤ هه‌لویست و داخویانیێن سیاسه‌تمه‌دارێن كورد ئه‌و وه‌كو تڤه‌نگێن داوه‌تیان دبینن هه‌ر ب ڤی ره‌نگی سه‌ره‌دریێ د گه‌ل كێشا كوردی دكه‌ن. د سه‌ر بێریزكرنا ل گه‌ل په‌رله‌مانته‌رێن كورد هاتیه‌ كرن دا كو لایه‌نێن عێراقێ ڤێ جارێ پال دده‌نه‌ زرته‌پۆزێن سه‌درێ ته‌له‌دین لێ ئه‌ڤه‌ نه‌جار ئێكێ یه‌ حوكمه‌تا عێراقێ ڤێ بێرێزیێ ل په‌رله‌مانته‌ر و سیاسه‌تمه‌دارێن كورد دكه‌ت و نه‌ژی دێ دووماهیك جار بت، لێ یا گرنگ ئه‌وه‌ سیاسه‌تمه‌دارێن مه‌ 160 پله‌ مه‌نگه‌نێ سیاسه‌تكرنێ ب گوهۆڕن و ل پێشیێ ناڤمالا مه‌ رێك بێخن و سیاسه‌تا سنێله‌تیێ بهێلن و ڤی عه‌ده‌تێ باسك باسكانێ و یێ نه‌ دگه‌ل من نه‌یاره‌ و ب كورسیكی ڤه‌ په‌رچوومه‌ بوون، بهێلن و ئێك هه‌لویستی د پرسێن نه‌ته‌وه‌یی دا. بریارا ڤه‌گه‌ریانا په‌رله‌مانته‌رێن مه‌ د دڤی ده‌می دا شاشیه‌كا مه‌زن و شكه‌ستنا ئاڤروویا سیاسه‌تمه‌دارێن مه‌یه‌ و هه‌روه‌كو پیره‌مێردێ مه‌زن گوتی: ” بیبه‌نه‌ به‌رده‌م عه‌رشی عێراقی
بلێن یار باقی و هه‌م سوحبه‌ت باقی
ده‌ك خه‌جاڵت بن له‌ ڕوَی مه‌حشه‌را
ئێمه‌یش خاكی غه‌م ئه‌كه‌ین به‌سه‌را”
28. 05. 2016

دووهی 22. 05. 2016 پارتیا ده‌ستهه‌لاتدارا توركیا ئاكپارتی كۆنگره‌كا ئاورته‌ گرێدا، ئه‌ڤ گۆنگره‌ د ده‌مه‌كی دا دهێت رۆژهه‌لاتا ناڤین یا ل سه‌ر سێله‌كا سۆرا شاریایی سنگه‌پێ بووی و زلهێزێن جیهانێ هه‌موو پێڤه‌ دمژوولن دا ڤی ئاگری ل گۆڕه‌ی خوه‌سته‌كێن خوه‌ مینا به‌ری رێككه‌فتنا سایكس-پیكۆی ل هه‌ڤ دجه‌من و نه‌خشه‌ریێان ل پشت په‌ردێن تاری بۆ به‌نا رۆژهه‌لاتا ناڤین دكێشێن! و زێده‌باری پرس نه‌كرن ب حوكمه‌ت و نوێنه‌رێن خه‌لكێ ڤێ ده‌ڤه‌رێ بۆ چه‌وانیا نه‌خشێ پشتی سایكس-پیكۆی. ئاها د ڤی ده‌می دا ئاكپارتی و یاراست هه‌ما ده‌وله‌تا توركی( چنكو ئه‌ڤرۆ ده‌وله‌تا توركی نه‌مایه‌ به‌لكو ئاكپارتی-ئه‌رۆغان هه‌موو تشتن) یا كۆنگرێ خوه‌ گرێ دده‌ت بۆ راستڤه‌كرنا داود ئۆغلۆی یا زیرۆ كێشه‌ كو ب دیتنا ئه‌ردۆغانی ڤێ سیاسه‌تێ زیان گه‌هاندیه‌ پێگه‌هێ توركیا ل ئه‌ر ئاستێ ناڤخوه‌ و یێ ده‌رڤه‌. سه‌ر ئاستێ ناڤخوه‌، پرۆسا ئاشتیێ د گه‌ل په‌كه‌كێ كو بێ ئه‌نجام ب داوی هات، هه‌رچه‌نده‌ ئۆباللا شه‌ری پتر بۆ لایێ په‌كه‌كێ ڤه‌ دادگێریت، چنكو پشتی هه‌لبژارتنێن مه‌ها خزیرانا پار كو بۆ جارا ئێكێ بوو كورد ب وی سه‌نگێ له‌گال داكه‌ڤنه‌ ناڤ په‌رله‌مانێ توركیا ب ناڤێ هه‌ده‌په‌. ته‌ڤلی نه‌بوونا هه‌ده‌پێ د حوكمه‌تا داود ئۆغلۆی دا هه‌م بوو سه‌ده‌م ده‌وله‌تا توركیا ژ رێككه‌فتنا دۆغمه‌چی سه‌رایی پاشگه‌ز ببت و هه‌م شكه‌ستن بوو بۆ سیاسه‌تا داود ئۆغلۆی یا ناڤخوه‌یی كو نه‌شیا ده‌نگێ چه‌كی بێ ده‌نگ بكه‌ت؛ ژبلی ئاسته‌نگكرنا دادوه‌ران و رۆژنامه‌ڤان و ه‌ستپێكرنا كوشتنا رۆژنامه‌ڤێن، نهێنیێن ده‌وله‌تێ كفش كرین ب تایبه‌ت پشته‌ڤانیا گرۆپێن تۆندڕه‌و مینا داعش و جه‌بهه‌تول نوسره‌ و ئه‌ڤێ چه‌ندێ گه‌له‌ك سه‌رگێژی بۆ توركیا چێكرن و هێشتا توركیا ل سه‌ر ئاستێ ده‌رڤه‌ باجێ دده‌ت و سویێ وێ د ناڤ هه‌په‌یمانیا دژی تیرۆرێ دا یێ شكه‌ستی. ل سه‌ر ئاستێ ده‌رڤه‌ ژی: ده‌ستێوه‌ردانا توركیا بۆ كاروبارێن سووریا و عێراقێ ب ره‌نگه‌كێ كێمتر و كێشا ئاواره‌یان و ئاره‌سته‌كرنا وان بۆ ئه‌ورۆپا و یا ژ هه‌موویێ پتر ل سه‌ر داود ئۆغلۆی گران كه‌فتی راوه‌ستنا وی ل دژی بالاده‌ستیا ئه‌ردۆغانی ل سه‌رهه‌ر بریاره‌كێ و برێڤه‌برنا ده‌وله‌تێ ئانكو ئه‌و ده‌نگێ نه‌رازیبوونێ بوو ل دژی ته‌ڤایا سیاسه‌تا ئه‌ردۆغانی و به‌رده‌وام ئه‌ردۆغانی گڤاشتن ل سه‌ر سیاسه‌تا وی دكرن و ل داویێ نه‌چار بوو ئه‌ندازیارێ سیاسه‌تا زیرۆ كێشه‌ به‌رامبه‌ر وان گڤاشتان خوه‌ ڕانه‌گرت و ده‌ستی سه‌رۆكوزیریێ به‌رده‌ت. ب ده‌ستبه‌ردانا ئۆغلۆی ژ پۆستێ خوه‌ رێ بۆ ئه‌ردۆغانی دێ خوه‌ش بت كو هه‌موو ئه‌جندایێن خوه‌ بدته‌ سه‌پاندن و هه‌ر ئه‌ڤیه‌ یا ئه‌ورۆپا و رۆژئاڤا دترسن كو ئێدی توركیا ژ سیكۆلاریا ده‌وله‌تێ و ده‌وله‌تا سه‌رده‌م دوور بكه‌ڤت و به‌ره‌ف دكتاتۆریێ بچت و ئه‌ردۆغان ڤێ خه‌ونا خوه‌ ناڤه‌شێرت و ڤه‌كری دبێژت و پتر چاڤێ یێ ل رۆژهه‌لاتا ناڤین و روومه‌تا ئوسمانیان بڤه‌گه‌رینت و مینا سۆلتانه‌كی فه‌رمان دده‌ستێن وی دابت و نێزیك بوونا وی دگه‌ل سعودیێ هه‌ر بۆ ڤێ مه‌ره‌مێ یه‌. یا سه‌یر ژ وێ كونگرێ ئه‌وه‌ پارتا ئاكپارتی پتر بۆ لایێ راستڕه‌وێ فاشستیڤه‌ دچت ب تایبه‌ت مه‌هه‌پێ كو كوَنگره‌ ب دروشمێن مه‌هه‌پێ ڤه‌ هاتبوو خه‌لاندن: ته‌ك ئالا، ته‌ك زمان، ئێك وه‌لات، ئه‌ڤ دروشمه‌، دروشمێن فاشستینه‌ و به‌رده‌وامی دانا سیاسه‌تا ئه‌تاتوركیه‌ كو ئه‌ڤرۆ مه‌هه‌په‌ ب هه‌موو شیانێن خوه‌ پاراستنێ ژێ دكه‌تن و زه‌نگه‌كا ب مه‌ترسیه‌ بۆ پرۆسا دیمۆكراتی و نه‌ته‌وه‌یێن ل توركیا دژین ب تایبه‌ت نه‌ته‌وا كورد كو ئه‌ڤرۆ ب سایا سیاسه‌تا شاشا په‌كه‌كێ زیانه‌كا مه‌زن گه‌هشتیه‌ بزاڤا كوردی ل باكوور. هلدانا ڤان دروشمه‌یان بۆ رازیكرنا مه‌هه‌پێ یه‌ داكو وان بۆ ئه‌جندایا خوه‌ رابكێشت، به‌رامبه‌ری گوهارتنا قانوونا بنگه‌هینا ده‌وله‌تا تورك كو ژ په‌رله‌مانیێ بكه‌ته‌ سه‌رۆكاتی. كۆنگرێ ئاكپارتی مینا چ كۆنگرێن ئاسایی نه‌بوو و تێدا ئه‌ردۆغان مینا په‌هله‌وانێن سێركی دهاته‌ نمایشكرن و ستایشا وی و حنێرایا وی د سیاسه‌تێ و خزمه‌تكرنا توركیا نوو دا دهاته‌ كرن و وه‌ك فه‌ریاد ڕه‌سێ هه‌موو كێشێن توركیا دهاته‌ ب ناڤكرن كو ئه‌ڤه‌ ب خوه‌ وێ ئێكێ ڕادگه‌هینت ئێدی ئكپارتی پارتیا جارا نه‌مایه‌ و بوویه‌ ئاك ئه‌ردۆغان و یا دلێ ئه‌ردۆغانی بخازت دێ وێ ئێكێ كه‌ت و بێی كو ئێك هه‌بت وێره‌كیێ بده‌ت خوه‌ و بێژت: سۆلتانم دوو موویێن خار یێن ل پشت برهێن ته‌، چنكو سه‌ربۆرا داود ئۆغلۆی یا ل پێش چاڤ. د ڤێ جیهانا پری كێشه‌ و قۆلپانێ دا و خاڤیا ته‌ڤنێ پێكهاته‌یێن ل توركیا دژین دا ب په‌یاده‌كرنا ڤێ سیاسه‌تا نهۆیا پشی داود ئۆغلۆی ژ لایێ ئه‌ردۆغانی ڤه‌ دێ توركیا به‌ره‌ف روو ب روو بوونا گوڵۆڵكه‌كا ئاریش بت و هه‌رده‌ما ئه‌و گۆَڵۆڵك ڤه‌بوو ئێدی ئه‌وا ب سه‌رێ یۆگسلافیا هاتی دێ ل جای یا توركیا “یار گۆزه‌لێ گۆزه‌لێ بت” و ئه‌ڤ گڵۆڵكه‌ ل باكورێ كوردستانێ یێ ژبه‌ر ده‌ست ده‌ركه‌فتی و یا گرێل دبت و چاڤێن ئه‌ورۆپا و رۆژئاڤا یێ ل سه‌ر گۆڵۆڵكا توركیا و كۆنگرێ ئاكئه‌ردۆغانی كاشۆیێ خوه‌ ڤه‌وه‌شاند و هه‌موو ئانكۆ و ڕه‌هه‌ند دچاڤه‌رێكرینه‌.

بزاڤا ئازادیخازا كوردی ل هه‌ر چار پارچێن كوردستانێ د گه‌له‌ك ئه‌ڤرازی و نشیڤیان دا ده‌رباز بوویه‌ و هه‌تا گه‌هشتیه‌ ڤێ قۆناغێ و د ڤێ رێ دا بوویه‌ خودان هنده‌ك ساخله‌تێن تایبه‌ت، دبت ژ لایه‌نه‌كی بۆ یێ دن هنده‌ك جوداهی هه‌بن ئه‌ڤه‌ ژی ڤه‌دگه‌رت بۆ ئایدولۆجیا هه‌ر لایه‌نه‌كی، لێ ساخله‌تا هه‌موویان ل هه‌ڤ كۆم دكه‌ت و ته‌ڤ سه‌ر دكۆك ئازادیا كوردستانێ یه‌ و رزگاربوونه‌ ژ نیڕكێ داگیركاریێ. ئانكو شۆڕه‌ش و به‌رخوه‌دانێن گه‌لێ كورد بۆ رزگاربوون و پاراستنا به‌رژه‌وه‌ند و روومه‌تا كورده‌. ئه‌ڤه‌ مینا قانوونه‌كا نه‌ڤیسكیا بزاڤا ئازادیخازا كورده‌ و پرانیا لایه‌نێن كوردی ژ پارت و رێكخستنێن كوردستانی پێگیری ب ڤێ چه‌ندێ كریه‌؛ بۆ نموونه‌ ل ده‌ما شه‌رێ چه‌كداری دا پێشمه‌رگێن كوردستانێ هه‌رده‌م خوه‌ ژ وان خالان دوورگرتیه‌ یێن زیان گه‌هشتبا خه‌لكێ كوردستانێ و داگیركه‌رێن كوردستانێ ئه‌ڤ ساخله‌تا مرۆڤانه‌یا شۆره‌شێن كوردی ب ده‌لیڤه‌ دیتیه‌ و مۆلگه‌ه و سه‌نگه‌ر ل ناڤ گوندان و ل ناڤ باژاران بجه كرینه‌ چنكو دزانین پێشمه‌رگه‌ داكو زیان نه‌گه‌هته‌ خه‌لكێ كوردستانێ هێرشی وان مۆلگه‌ و سه‌نگه‌ران نه‌كرینه‌ ژ ڤان نموونا دێ دوان ژێ گرم ئێك ل سه‌رده‌مێ كۆمارا كوردستانێ ل مهابادێ؛ ده‌مێ كۆمار هاتیه‌ چه‌مبه‌ركرن و هه‌موو رێكێن به‌رخوه‌دان و خوه‌پاراستنێ لێ هاتینه‌ قووتكرن، بۆ پاراستنا خه‌لكێ كوردستانێ و ب تایبه‌ت یێ مهابادێ سه‌رۆككۆمارێ كوردستانێ رێكا خوه‌ راده‌ستكرنێ هه‌لبژارت و خوه‌ كره‌ قۆربانی خه‌لكێ كوردستانێ كو ئه‌ڤه‌ بلندترین ئاستێ خوه‌ قۆربانی كرنه‌ د پێخه‌مه‌تی خه‌لكێ كوردستانێ. یا دن ژی ل سه‌رده‌مێ شۆڕه‌شا گولانا نیشتمانی و پێشكه‌فتنخاز باره‌گایێن شۆڕه‌شێ ل سه‌ر هێلا سنوورێ باكوورێ كوردستانێ بوون و ل وان خالان یێن دووری گوندێن باكوور و باشوورێ كوردستانێ هه‌رچه‌نده‌ ل سالا 1976ێ حوكمه‌تا فاشیا به‌غدا ب درێژیا 15-30 كیلۆمه‌تران ژهێلا سنووری گوند ڤه‌گوهازتبوون و ده‌ست ب سیاسه‌تا ڤه‌گۆهازتن وب عه‌ره‌بكرنا كوردستانێ كربوو، لێ دیسا ژی شۆڕه‌شێ باره‌گایێن خوه‌ ل دووری گوندان دانا بوون. پشتی شۆڕه‌شێ جهێ باش كری و بۆ گه‌فه‌كا مجد ل سه‌ر رژێما به‌غدا، حوكمه‌تا به‌غدا هه‌وارا بره‌ به‌ر عه‌رشێ ده‌وله‌تا تورك و رێككه‌فتنه‌كل گه‌ل واژوو كر و تێدا مافدا هه‌ردوو ده‌وله‌تا ب درێژیا 30 كیلۆمه‌تران ب سه‌ر سنوورێن هه‌ڤ بچن و ل شۆڕه‌شگێرین كورد بده‌ن. بۆ ڤێ مه‌ره‌مێ ژی ده‌وله‌تا تورك ل ده‌ستپێكا هاڤینا 1983ێ هێرش كره‌ سه‌ر باره‌گایێن شۆڕه‌شێ. هه‌لبه‌ت شۆڕه‌شێ شیانێن به‌رخوه‌دانێ هه‌بوون و دكاری زیانێن مه‌زن ب گه‌هینته‌ فاشستێن تورك لێ دبه‌رامبه‌ردا دا زیانه‌كا مه‌زن گه‌هیته‌ خه‌لكێ سڤیلێ كورد ژ هه‌ردوو پارچان، هه‌ژیه‌ بێژین ب درێژیا هێلا سنووری مالباتێن پێشمه‌رگان لێ بوون و ئه‌و ده‌ڤه‌رێن داگیركه‌رێن به‌غدا ڤه‌گوهازتین و وێران كرین، مالباتبَن پێشمه‌رگه‌ی ئاڤه‌دان كربوون، ژبه‌رهندێ شۆرشه‌شێ بریارا ڤه‌كێشانێ دا و روو ب روویا دگه‌ل دوژمنی نه‌كر. ل ڤێره‌ دیار دبت كو مه‌ره‌م ژ شۆڕه‌شێ تنێ پاراستنا به‌رژه‌وه‌ندا نه‌ته‌وه‌ییه‌ و هه‌رده‌ما زیان پتر بت، نابت به‌رده‌وامی ب وێ شۆڕه‌شێ بهێته‌دان. د ڤی واری دا په‌كه‌كه‌ وه‌ك تاكه‌ پارتیا كوردان پێگیری ب ڤێ ساخله‌تێ نه‌كریه‌ به‌لكو بزاڤ كریه‌ ژ ده‌رڤه‌ی ره‌فا پارتیێن كوردان سیاسه‌تێ بكه‌ت و دكه‌ت. هه‌رچه‌نده‌ بانگه‌شا كوردستانیێ دكه‌ت و لێ د پراكتیكدا دووره‌ ژ كوردستانیێ و ژ هه‌موو پره‌نسیبێن خوه‌ یێن ده‌ستپێكی پاشگه‌ز بوویه‌ و سیمایێ كورداتیێ پێڕه‌ نه‌مایه‌ وپتر وه‌ك پارته‌كا چه‌پڕه‌وا توركیا بزاڤێ دكه‌ت و پتریا شیانێن خوه‌ بۆ لێدانا بزاڤا ئازدیخازا كوردی مه‌زاختنه‌ و چ پارتیێن كوردستانی ژ شه‌ره‌نگێیا وان قۆرتال نه‌بووینه‌ و ڤێ دووماهیێ ژی سۆر و سۆر دژاتیا حوكمه‌تا هه‌رێما كوردستانێ دكه‌ت. یا ژهه‌موویێ گرنگتر په‌كه‌كه‌ ئه‌ڤرۆ بوویه‌ بارگرانیه‌كا مه‌زن د رێكا ئازادیا كوردستانێ دا و سیقل دیق دژی ده‌وله‌تا كوردینه‌ و ب پاشڤه‌ڕۆتی ناڤ دكه‌ن و هه‌ر ژبه‌ر هندێ یه‌ ئه‌ڤرۆ پرانیا هێزێن خوه‌ ئانینه‌ باشوورێ كوردستانێ نه‌ك بۆ بهێندانا پێشمه‌رگێن خوه‌ به‌لكو بۆ دوو مه‌ره‌مایه‌، ئێك دا توركیا بكه‌ت به‌هانه‌ و هێزێن خوه‌ بینته‌ ناڤ ئاخا كوردستانێ و ببته‌ مه‌یدانا شه‌ری و یا دن ژی بۆ پشته‌ڤانیكرنا قۆلپا ئیرانێ كو ئه‌ڤ هه‌ردوو قۆلپه‌ ل دژی ده‌وله‌تا كوردستانێ بزاڤێ دكه‌ن. پرسیاره‌كا دجهێ خوه‌دایه‌ هه‌تا كه‌نگی په‌كه‌كه‌ دێ ل ده‌رڤه‌ی به‌رژه‌وه‌ندا بزاڤا ئازادیخازا كوردی سیاسه‌تێ كه‌ت؟

به‌ری دو رۆژا سه‌د سال ب سه‌ر په‌یمانناما سایكس-پیكۆی ڕا ده‌رباز بوون و ئه‌و په‌یمانناما بوویه‌ سه‌ده‌م كوردستان بۆ جارا دووێ پارڤه‌ ببت و بیێ كو پرس ب ملله‌تێ كورد بهێته‌ كرن. ئاكامێن ڤێ په‌یماننامێ ل سه‌ر گه‌لێ مه‌ گه‌له‌ك گران سه‌كنین و هه‌ر ژ ئاسمیله‌كرنێ بگره‌ هه‌تا پاكتاوا نه‌ته‌وی و ب عه‌ره‌ب، فارسی و تورك كرنا كوردستانێ. د ڤان سه‌د سالێن چوویی دا باهرا كوردا تنێ مالوێرانی و شه‌رێ خوه‌پاراستنێ بوو. هه‌لبه‌ت نه‌ ده‌لیڤێ هندێ یه‌ كاره‌ساتێن ب سه‌ر گه‌لێ مه‌ دا هاتین د ڤێ گوتارێ دا رێز بكه‌ین نه‌خێر تنێ دخازم بێژم ئه‌ڤ كاره‌ساتێن ب سه‌ر سه‌رێ گه‌لێ مه‌ دا هاتین ڤه‌رێژا وێ په‌یماننامێ یه‌. داگیركه‌رێن كوردستانێ گه‌له‌ك مفا ژ په‌یمانناما سایكس-پیكۆی دیتن و ته‌ڤا كار ل سه‌ر تێكدانا ئێكرێزیا جڤاكا كوردستانێ كرن و ره‌وتێ شۆڕه‌ش و به‌رخوه‌دانێن مه‌ به‌ره‌ف لۆكالیێ برن و چ شۆڕه‌شێن كوردی نه‌شیان ببنه‌ شۆڕه‌شێن سه‌ر تا سه‌ری ژبلی شۆڕه‌شا 11 ئه‌یلولێ ب رێبه‌ریا بارزانیێ نه‌مر و ئه‌ڤه‌ بوو وه‌رچه‌خانه‌ك دیرۆكی و بارزانی ژی بوو سمبوَلا به‌رخوه‌دان هیڤیا نه‌ته‌وا كورد. ئانكو 11 ئه‌یلوولا كوردی (ئه‌مریكا ژی خودان 11 ئه‌یلوله‌) و ب رێبه‌ریا بارزانیێ نه‌مر و پارتی ده‌ستپێكا مراندنا په‌یمانناما سایكس-پیكۆ و هزرا لۆكالیا كوردی بوو چنكو پارتی و حیكمه‌تا برزانیێ نه‌مر هه‌موو سنوورێ ده‌ستكردێن كوردستانێ ژ هۆلێ راكرن و ته‌ڤ كورد ل بن سیهوانا كوردایه‌تیێ جه‌ماندن. دبت هه‌ر ئه‌ڤ خاله‌ ژی بت پارتی نازا پێ دكه‌تن چنكو هه‌تا به‌ری 11 ئه‌یلولا كوردی هزرا لۆكالی و عێراقچیتی، سووریچی، ئیرانیزم و توركچیتی ل سه‌ر پرانیا كوردان یا زاڵ بوو ئه‌ڤ عێراقچیتیه‌ ل ده‌ف گه‌له‌ك كه‌سێن ناڤ بزاڤا ئازادیخازا كوردی هه‌تا سالێن هه‌شتیان ژ چه‌رخێ بووری مابوو و سه‌ره‌ڕای وێ مالوێرانیا مه‌ ژ داگیركه‌رێن كوردستانێ دیتین ب مخابنیڤه‌ خوه‌دیێن هزرا لۆكالی هه‌تا رۆژا ئه‌ڤرۆ ل سه‌ر ده‌ه و ووا خوه‌ دبه‌رده‌وامن. وه‌ك چه‌وا 11 ئه‌یلولا كوردی هزرا لۆكالی و په‌یمانناما سایكس-پیكۆی به‌ره‌ف مراندنێ برن وه‌سا 11 ئه‌یلولا ئه‌مریكی(11. 09. 2001) ژی پیرۆزیا سنوورێن ده‌وله‌تان نه‌هێلا و سیسته‌مێ گلۆبالیزمێ ل سه‌ر جیهانێ دا سه‌پاندن و بالاده‌ستیا ئه‌مریكا ل جیهانێ نه‌جهێ ئاخفتنێ یه‌ و ئه‌گه‌ر ئه‌ڤ بالاده‌ستیه‌ نه‌بایه‌ نه‌ رژێما سه‌ددام دا ژناڤ چت و نه‌ژی بهارا عه‌ره‌بی دبوو تۆفان و تسۆنامی ل سه‌ر ده‌ستهه‌لاتێن گه‌نده‌ل و دكتاتۆر و گه‌ڕا دولابا بهارا عه‌ره‌بی هێش نه‌ راوه‌ستایه‌ و ره‌وشا مسر، لیبیا، جه‌زائیر، مه‌غرب،سوریا، تونس و عێراق یا ل به‌ر چاڤه‌. یا بۆ مه‌ گرنگ عێراق و سووریا و ب تایبه‌ت عێراق كو مه‌ كوردا پێگه‌هه‌كێ خۆرت و ده‌وله‌ته‌كا دیفاكتۆ هه‌یه‌ و ب ڤی ره‌نگی سه‌ره‌ده‌ری دگه‌ل دهێته‌ كرن. د ره‌وشا ئیرۆ عێراق تێدا كو چ بنه‌مایێن ده‌وله‌تێ لێ نه‌ماینه‌ و ژبلی كو عێراقێ ب خوه‌ دان ب حوكمه‌تا هه‌رێما كوردستانێ دایه‌ و هه‌رێمێ ژی پێنگاڤێن سه‌قامگیركرنا ئارامی و خوه‌شگوزه‌رانیێ هاڤێتینه‌ و كوردستانی د ڤێ ده‌ڤه‌را هزرا تۆندوتیژیێ و شه‌رێ تائیفی و تیرۆریستی لێ دبه‌لاڤ، ئارام و سه‌قامگیر ژبلی هه‌بوونا نه‌خشه‌ رێیا سه‌رخوه‌بوونێ یا كو ژ لایێ سه‌رۆكێ هه‌رێمێ ڤه‌ رێزدار مه‌سعود بارزانی هاتیه‌ راگه‌هاندن كو د ڤێ نه‌خشه‌رێ دا رێبازا بارزانیێ نه‌مر دێ فاتحا دووماهیێ ل سه‌ر ڤه‌شارتنا په‌یمانناما سایكس-پیكۆی خوینین. مخابن ل جهێ ته‌ڤ لایه‌نێن سیاسی یێن هه‌رێمی ل بن ڤێ سیهوانێ كۆم ببن و بزاڤا قه‌تاندنا به‌ندكێ عێراقێ ببته‌ ڕاستی جاره‌ك دن هزرا لۆكالی سیبه‌را خوه‌ كێشایه‌ سه‌ر هنده‌ك لایه‌نان و هێجه‌تێن بێ بنه‌ما رێز دكه‌ن وه‌كو هێشتا مه‌ ده‌زگه‌ه و بنیاتێ ده‌وله‌تێ نینه‌ و توركیا و ئیران و نزا كی و كی دێ تۆڕه‌ بن، بیێ هزرا خوه‌ بكه‌ن كانێ ده‌ما ئه‌تاتوركی یان شاه ره‌زا خانێ ئیرانی ده‌وله‌تێن خوه‌ ڕاگه‌هاندین ره‌وشا وان ژ ئا ئه‌ڤرۆیا مه‌ باشتر نه‌بوویه‌. ره‌وشا ناڤ ده‌وله‌تی و پشته‌ڤانیا زلهێزێن ئه‌ڤرۆ بۆ هه‌رێما كوردستانێ خوه‌ش ده‌لیڤه‌یه‌ و دووباره‌ نابت بۆ قه‌تاندنا به‌ندكێ عێراقێ.

دبێژن دووماهی و ده‌ستپێكا هه‌ر سه‌دساله‌كێ ئاتافێن مه‌زن روو دده‌ن و به‌لكی ب راستی ژی وه‌سا بت چنكو د ڤان سێ سه‌د سالێن بووری دا گوهۆرینێن وه‌سا بژان یێن رووداین كو سیمایێ جیهانێ بۆ هه‌تا هه‌تایێ هاته‌ گوهارتن و ژ وانا شۆره‌شا فه‌ره‌نسی، شه‌رێ ئێكێ یێ جیهانێ كو ژ ڤه‌رێژا وێ رێككه‌فتنا سایكس-پیكۆی(16. 05. 1916) كو بۆ رۆژهه‌لاتا ناڤین بوویه‌ سه‌ده‌مێ جینوساید و شه‌رێن ئتنی و تائیفی یێن دژوار و ئه‌ڤرۆ ئه‌ڤ شه‌ره‌ بوونه‌ گه‌فێن جدی ل سه‌ر ئاسایشا جیهانێ، هێرشا تیرۆرتێن قاعیده‌ بۆ بورجێن نیۆیۆرك ل 11. 09. 2001 و ئه‌ڤێ روودانێ ژی ئێدی چ پیرۆزی بۆ سنوورێن ده‌وله‌تان نه‌هێلا و مینا گولله‌كا دلۆڤانیێ بوو بۆ جه‌سته‌یێ رێككه‌فتنا سایكش-پیكۆی به‌لێ ئه‌ڤ گولله‌ ب نێچیرڤانیه‌كا شه‌هره‌زا و هێدی هێدی ل جه‌سته‌یێ ڤه‌رێژا وێ دده‌ن و سنوورێن ڤان وه‌لاتان ئیناینه‌ به‌ر بازاری. دبت كو كورد زه‌ره‌رمه‌ندێن ئێكێ بن ژ ئه‌نجامێن وێ رێككه‌فتنا شۆم و كوردستان بیێ خوه‌سته‌كا كوردان ل سه‌ چار ده‌وله‌تێن ژ هه‌ڤ جودا هاته‌ پارڤه‌كرن، ژ وێ رۆژێ هه‌تا ئه‌ڤرۆ كورد د به‌رخوه‌دان و خه‌باتێ دانه‌ بۆ هلاندنا ڤێ حه‌یفێ و ژبه‌ر گه‌له‌ك سه‌ده‌مان (كاب و پلا)* كوردان نه‌هات؛ لێ گوهارتنێن 11. 09 ب خوه‌را ئانین و هێش مه‌نگه‌نێ گوهارتنان نه‌ راوه‌ستایه‌ و هه‌ر ل گه‌ڕه‌ و مرۆڤ دكارت بێژت كاب و پلا كوردا هاتیه‌ و ئه‌گه‌ر هنده‌ك گێله‌شۆكی د ئێك هه‌لویستا لایه‌نێن سیاسی دا هه‌بت ژی باوه‌ر ناكه‌م ئه‌ڤێ جارێ كورد ده‌ست ڤاله‌ ژ ڤه‌رێژا 11. 09ێ بمینن. هه‌ر چه‌نده‌ دهێته‌ خاستن كورد ل بن چه‌ترا ریفراندۆمێ ئه‌وا سه‌رۆك بارزانی هلدای خرڤه‌ ببن و ناكۆكی و خره‌پشانێ ل سه‌ر مزێ داهاتیێ كوردستانێ بۆ قۆناغا پشتی ریفراندۆمێ بهێلن؛ چنكو ده‌وله‌تێن داگیركه‌رێن كوردستانێ ته‌ڤ ل سه‌ر وێ چه‌ندێ دكۆكن كو نه‌خشێ سایكس-پیكۆی كێشای هه‌روه‌كو خوه‌ بمینت و ل پێشیا گشتان توركیا هه‌روه‌كو سه‌رۆكوه‌زیرێ توركیا یێ به‌رێ ئه‌حمه‌د داوودئۆغلۆی پشتی ڤه‌گه‌را خوه‌ ل بروكسل ل 19. 03. 2015 بۆ مه‌دیا توركی گوت: “ئه‌م و ئیران ل دژی ساكس-پیكۆیه‌كا نوو نه‌ و ئه‌م ب چ ئاوایان رێ ناده‌ین گوهۆڕین د نه‌خشێ ده‌ڤه‌رێ دا بهێته‌ كرن”. هه‌لبه‌ت ئیران و عێراق و سووریا ژی خودان هه‌مان هه‌لویستن، لێ دیاره‌ داوودئۆغلۆی ژبیر كریه‌ بۆ پرسێن چاره‌نڤیسازێن به‌رژه‌وه‌ندیێن خوه‌، زلهێزێن جیهانێ چ جارا پرسێ ب وان ناكه‌ن و ما مسته‌ر سایكس-پیكۆی ل ده‌ما رێككه‌فتین پرس بۆ سۆلتانێ توركیا و شاهێ ئیرانێ كربوون!! هه‌روه‌كو مه‌ ل ژوور ئاماژه‌ پێدای 11. 09. 2001ێ دووماهیك گولله‌ ب ته‌ختكێ ئه‌نیا وێ رێككه‌فتنا شۆم كه‌فت و نه‌خش و ته‌ڤنێ هه‌ڤالبه‌ندیا هاته‌ گوهارتن و د هه‌ڤ كێشا نوو دا كورد خوه‌دی پێگه‌هه‌ك مكۆمن، دوژمنێن دوزا كوردی هه‌ست دكه‌ن بۆ مه‌ وه‌كو مه‌لایێ گولێ لێ هاتیه‌ لێ دراسیتدا وه‌سا نینه‌ و ئه‌ڤه‌ به‌رهه‌مێ وێ سیاسه‌تا راسته‌ یا حكومه‌تا هه‌رێما كوردستانێ هه‌ر ژ ده‌ستپێكێ گرتی به‌ر ئه‌و ژی پێكڤه‌ژیان و ده‌ربازبوون ژ كینا تۆلهلدانێ و نه‌هێلانا یێ به‌رامبه‌ر ب هێجه‌تێن بێ بنه‌ما و ئه‌ڤ ژی بۆ وه‌لاتێن پێشكه‌فتی تشته‌ك هه‌ژی پشته‌ڤانی و هاریكاریێ یه‌ و ل رۆژهه‌لاتا ناڤین ئه‌ڤه‌ ئه‌زموونه‌ك تاقانه‌یه‌. به‌رهه‌مێ سیاسه‌تا راستا هه‌رێمێ ده‌رحه‌ق ئتن و ئولێن جودا ل كوردستانێ زلهێز ئانینه‌ سه‌ر وێ باوه‌رێ پشته‌ڤانیێ ل هه‌رێمێ بكه‌ن و هێرشا داعشێ بۆ سه‌ر كوردستانێ باشترین گرۆڤه‌ كو ئێدی پێگه‌هێ كوردان ل ده‌ڤه‌رێ هۆكاره‌كێ بهێزه‌ بۆ سه‌قامگیری و ئارامیێ. ژ پێرابوون و بزاڤێن سه‌رۆكێ هه‌رێمێ مه‌سعود بارزانی ل سه‌ر ئاستێ ده‌رڤه‌ و ناڤخوه‌ وه‌سا دیار دبت كو جه‌نابێ وی باش د ره‌وشا پشی 11. 09ێ گه‌هشتیه‌ له‌و هوَسان یێ رژده‌ ل سه‌ر پرسا سه‌ربه‌خۆبوون و ریفراندۆمێ. بزاڤێن توركیا و ئیرانێ بۆ ساخ هێلانا رێككه‌فتا سایك-پیكۆی هه‌وارا دووڤ گورگیه‌ و له‌و یا فه‌ره‌ ته‌ڤ كورد ل بن چه‌ترا سه‌رۆك بارزانی هلدای كۆم ببن و هه‌موو ناكۆكی بهێنه‌ پاش خستن دا ڤێ جارێ پاپۆرا خه‌ون و هیڤیێن مه‌ بگه‌هته‌ كه‌نارێ ئێمناهیێ و ب پێلدانا ئالایێ كوردستانێ ل باره‌گایێ یۆئێنێ شاد ببین. ئامین
• كابانێ و پل هاتن، یاریه‌كه‌ دهێته‌ كرن ب كابێن په‌زی و بزنا، ل ده‌مێ ئێك خوسره‌ت دبت ل دووماهیكا یاریێ ده‌رفه‌ته‌كێ دده‌نێ كو كابێ خوه‌ بهه‌لاڤێت و ئه‌گه‌ر ل سه‌ر چكی خوه‌ گرت، هنگی دێ وی ماف هه‌بت جاره‌كا دی بزڤڕت ناڤ یاریێ و گه‌له‌ك جارا یا بوویه‌ سه‌ده‌م خوساره‌تیا خوه‌ بزڤڕینت و دبێژنه‌ ڤێ ده‌رفه‌تێ پل هات.
14. 05. 2016