محه‌مه‌د چه‌لكى
دبێژن: هه‌ر ملله‌ته‌ك خودان چه‌ند تایبه‌تمه‌ندیانه، گه‌له ب زه‌حمه‌ته ئه‌و تایبه‌تمه‌ندى ل جه‌م ملله‌ته‌ك دن په‌یدا ببن، چ فیلاتى تێدا نینه چونكو ئه‌گه‌ر ملله‌ته‌ك دن ژى خودان هه‌مان تایبه‌تمه‌ندى بت، هنگى نابنه تایبه‌نمه‌ندى. بیرا مامێ عه‌لۆ ناهێت كانێ ئه‌ڤه د كیژان په‌رتووكێ دا خاندیه یان ژ براده‌ره‌كى بهیستیه، هه‌ر چه‌وان بت، ئه‌ڤێ هزرێ ئه‌و ڕاكێشا ناڤ بۆ چه‌ند تایبه‌تمه‌ندیێن ئه‌ڤرۆ ل كوردستانێ په‌یدابووین و ب دیتنا وى ل ناڤ چ ملله‌تێن دن په‌یدا نابنن، چونكو نه‌به‌ر عاقله ئێكى شه‌شێ سه‌ره‌تایى(بنه‌ڕه‌تى) ب هزار پالا پێڕانان ئه‌گه‌ر ب دوماهى ئینا بت و ئه‌ڤرۆ خودان به‌كالۆریۆس و … پله و پایایێن بلند بت د ده‌ستهه‌لاتا كوردى دا.
ژ وان تایبه‌تمه‌ندیێن ب زه‌حمه‌ته تۆ ل ناڤ هنده‌ك ملله‌تێن دن ببینى و ئه‌ڤرۆ ل سه‌یرستانا مه ژ شمه‌كێن كه‌رخه‌سپالێن ئیرانى و توركى دمه‌شه‌ترن:
• پرانیا خه‌لكێ سه‌یرستانێ ئوپۆزسیۆنن!
• گه‌نه‌راله و زانكۆیا سه‌ربازى ب چاڤ ژى نه‌دیتیه!
• هه‌ر كه‌س ب ده‌ڤ دژى گه‌نده‌لیێیه، لێ گه‌نده‌لى بوویه كولتۆر و چاڤێ هه‌ر كه‌سى یێ لێ گه‌ڕا وى بهێت، داببت گه‌نده‌ل!
• پرانیا خانده‌ڤانان هۆزانڤانن ئانكو دهه‌ستیارن، لێ هه‌ستا نیشتمانى ب عانه‌كى دفرۆشن و ما هوه هه‌ژمارا جاشا به‌رامبه‌رى پێشمه‌رگه‌ى ژبیركرییه، ما رۆژێن وه‌كو 16 ئۆكتۆبه‌ر گه‌هشتیه كه‌ڤز بگرت!
• سیسته‌مێ برێڤه‌برنێ نه رۆژهه‌لاتى و نه رۆژئاڤایى یه، نه‌ئیسلامى و نه‌رافزییه، خۆمالى و كوردیه(ئانكو به‌ته‌ماى خودایه)!
• ل هه‌موو جیهانێ ئێك پسۆلا كاره‌بێ هه‌یه یا مه دوونه!
• مۆهر كرن ل سه‌ر په‌یمانه‌كێ، گرێبه‌سته‌كێ و … خوه ژێ ڤه‌كێشان یا پابه‌ند نه‌بوون ب به‌د ره‌وشتى دهێته هه‌ژمارتن، لێ ل سه‌یرستانا مه ب تایبه‌ت ل جه‌م پارتیێن سیاسى پابه‌ند نه‌بوون ب مۆهركرنێ ژ ئاڤ ڤه‌خارنێ ب ساهیتره هه‌ر نوكه ل ره‌وشا دامه‌زراندنا حوكمه‌تا هه‌رێمێ مێزه بكه‌ن، كانێ به‌دره‌وشتى ل جه‌م هنده‌ك لایه‌نێن سیاسى گه‌هشتیه چ ئاست!
• باران بارین نعمه‌ته لێ ل سه‌یرستانا مه زه‌یقه‌ته و جاده هه‌رفینه و حكومه‌ت ژى دێ چێكه‌ین، زیان پێكه‌فتیان دێ قه‌ره‌بۆكه‌ین و پشتى چه‌نده‌كێ هه‌موو ژبیر دكه‌ن!
• ژبیركرن نعمه‌ته‌كا خودێیه لێ ل بامه ما چ ژبیر بكه‌ین و چ ژبیر نه‌كه‌ین هندى هند ئاریشه و گرفتێن بوینه كه‌له‌ك و چاره‌سه‌رى یێن ماینه پیڤیا(هیڤیا) خودێ، ئه‌ڤجا ژبیركرن ب خوه ژى مه یا ژبیركرى.
• “شولكه‌رێ خوه‌به، خۆشتڤیێ خه‌لكى به” ته‌ڤان ژبیر كریه و چاڤێ ته‌ڤان یێل ده‌رگه‌هێ حكومه‌تێ و هزار و ئێك فێلا تاقى دكه‌ن دا كۆلاڤه‌كى بكه‌نه سه‌رێ حكومه‌تێ و هاریكاریه‌كێ ژێ بچه‌قینن!
• مرۆڤێن لیبه‌ڕال و دیمۆكراتخاز و پشته‌ڤانێن مافێن ژنێ ته هند دیت ژنا دووێ ئینا و ریهدێنا خوه درێژكر و ژ مه‌لاى پێترێ یێل مزگه‌فتێ، ژ خوه هه‌ر به‌حسێ ژینگه‌هپارێزان نه‌كه و یێن بووینه گۆشتفرۆشێن گیاندارێن كویڤى و كه‌وان و ئه‌ودیو كرنا …
• هه‌موو پێكڤه سیاسى و كارزانن ژ خوه پرێزا سیاسه‌تێ دیاره و بۆ كارزانان ژى كاركه‌رێن بیانى رۆژ بۆ رۆژێ یى زێده دبن و رێژا بێكاریێ گه‌هشتیه ئاستێ مه‌ترسیدار … ئه‌ڤه‌و چه‌ندین تابه‌تمه‌ندیێن دن، خانده‌ڤانێ گراڤى تۆد كارى یێن مایین لێ زێدى بكى و بێژى: ئه‌م بۆ چ دباشین!
2019،05،18
نووترين نووچه
- نێچیرڤان بارزانی و ئەردۆگان دوپاتیێ ل پێشڤەبرنا پەیوەندیێن ئەنقەرە ل گەل بەغدا و هەولێرێ دكەن
- بابەتێ ئەنباركرنا ئاڤێ یێ گرنگە بۆ پشتڕاستبوونێ ژ ئاسایشا ئاڤێ
- پێدڤییە هەلبژارتن د سەقایەكێ ئارام و ب زەلالی بهێنە ئەنجامدان
- مەسرور بارزانی: نابیت سەرژمێرییا گشتی بۆ هیچ ئارمانجەكا سیاسی بهێتە بكارئینان
- دبیت هێرشا ئیسرائیلێ ل سەر ئیراقێ ببیتە ئەگەرێ ژناڤبرنا سیستەمێ سیاسی و ئابووری و لەشكری ل ئیراقێ و ژناڤچوونا حوكمەتا وێ
- دەنگی بدەنە پارتی و دەستێ پارتی ل ڤێ دەڤەرێ ب هێز بكەن
- دروستكرنا بەنداڤان پشكەكە ژ ستراتیژییەتا حوكمەتێ بۆ مفاوەرگرتنێ ژ ژێدەرێن ئاڤێ
- بۆ چاكسازیێ د كەرتێ ساخلەمیێ دا كارێ باش یێ هاتییە كرن
- پارتی بۆ خزمەتكرنا مللەتی یا هاتییە دامەزراندن
- ل 20 ڤێ مەهێ دێ بەرسڤا هەموو ئاخڤتن و بێرێزی و ئەزمان درێژییەكا بەرامبەر پارتی دەین
محه‌مه‌د چه‌لكي
تشتێن هه‌ڤ ته‌ریب
محه‌مه‌د چه‌لكى
(سیاسه‌تمه‌داریێن رۆژهه‌لاتى و بازرگان و وژدان دوو هێلێن هه‌ڤته‌ریبن ب قانوونا فیزیكى و ب قانوونا هێزێ دگه‌هن هه‌ڤ) م.چ
سه‌ربۆرێن ژیانێ و خره‌جرێن وێ مامێ عه‌لۆ كریه مرۆڤه‌كێ هێمن و تێبڕ،
ڤێ چه‌ندێ ژى گه‌له‌ك سه‌رگێژى بۆ ئیناینه و ل ناڤ هه‌ڤالا وه‌ك پربێژ و مایتێكه‌ر دیاربوویه و هه‌رده‌ما ته گۆت مامێ عه‌لۆ هه‌موو گوهێن خوه دڤه‌چنن و ل به‌ندێنه كانێ ڤێ جارێ مامێ عه‌لۆ كى كرییه ئارمانجا توانجێن خوه. ژ كه‌ڤندا مرۆڤێن ڕاستگۆ ل ناڤ جڤاكێن پاشناڤ پیرۆز و پارێزڤانێن كه‌ڤنه‌شۆپیا جڤاكى هه‌رده‌م ئارمانجن بۆ به‌رژوه‌ند پارێزێن نیڤ كوله! ژ به‌ر هندێ توانحێن خه‌لكى چ باندۆرێ ل مامێ عه‌لۆ ناكه‌ن و وه‌كو ئه‌و دبێژت: “ڕاستیا بێژه و برێكا خوه هه‌ره”. لێ دیسا ژى هنده‌ك جاران ژ ڤى تبعه‌تێ خوه‌ى نه‌رازییه كو ل هنده‌ك جها نابت مرۆڤ بده‌ت بۆرى و ئه‌و دده‌ت بۆرى چونكو هه‌ر جهه‌كى تایبه‌تمه‌ندیا خوه هه‌یه و تۆپز ل كه‌ندال ئاخفتن ژى ژ بلى سه‌رگێژیێ پێڤه‌تر بۆ خودانى نازڤڕت، چونكو مرۆڤ به‌ندێن به‌رژه‌وه‌ندێن خوه‌نه!
به‌رى جه‌ژنێ پرانیا تیڤیان ل سه‌ر سه‌رپێچیێن بازارى ژ زێده‌گاڤى و ئێكسپاریه‌را خۆشاكێن خارن و ڤه‌خارنێ نۆچه ل په‌ى نۆچه‌ى به‌لاڤ دكرن كو ژ لایێ پۆلیسان ڤه دهاتنه به‌لاڤكرن و وان ژى ل سه‌ر شاشه‌یێن خوه به‌لاڤ دكرن. ئه‌و ئامار گه‌له‌ك دمه‌ترسیدار بوون چونكو خۆشاكێن ده‌م بسه‌رڤه چوویى دژه‌هرینن و دبنه سه‌ده‌ما نه‌خوه‌شیێن مه‌ترسیدار و یا ژ وێ كۆڤانتر ژى ده‌ست ب سه‌ر ده‌رمانێن ئێكسپایه‌ر ژى هاتبوو گرتن، وه‌ى بۆ ڤى ملله‌تى كو حوكمه‌ت نه‌شێت سنۆرێن خوه كۆنترۆل بكه‌ت و رێكێ ل هاتنا خۆشاك و ده‌رمانێن ئێكسپایه‌ر بگرت! ئه‌ڤا پۆلیسان دیاركرى، ئه‌گه‌ر ل وه‌لاته‌كێ دن بایه سه‌رۆكێ حوكمه‌تێ دا روونشتنه‌كا بله‌ز ئه‌نجامده‌ت و داواكارێ گشتى ڕاسپێرت بۆ ل دویڤچوونێ بكه‌ت و به‌رپرسێن ڤێ كاره‌ساتێ چه‌نگل كێشى دادگه‌هێ كه‌ت و داببانه په‌ند و كه‌سه‌كێ دن ئه‌و وێره‌كى نه‌بت خۆشاك و ده‌رمانێن ئێكسپایه‌ر بهینته كوردستانێ.
پشتى ب داوو هاتنا نۆچه‌یان مامێ عه‌لۆ گۆت:
• چه‌ند ل ڤى وه‌لاتى تۆ باسێ ره‌وشتى بكه‌ى، هند خه‌لك ژ ره‌وشتى كویڤى دبن.
• ته‌ڤ ددئۆلدارن لێ ئێك پره‌نسیبێن ئۆلى بجه نائینن و بیره‌وه‌ریێن ئۆلى بۆ به‌رژه‌وه‌ندا خوه بركار دئینن.
• سیاسه‌تمه‌دار باسێ ئێكرێزیا نیشتمانى دكه‌ن، لێ مه‌رجێن ئێكرێزیێ دڤێت ل گۆره‌ى به‌رژه‌وه‌ندا پارتیا وى بت و نیشتمان دڤێت ل گۆره‌ى نه‌خشێ وى بهێته دیزاین كرن ئه‌گه‌ر نه … ئها ئه‌ڤێ تایبه‌تمه‌ندیا سیاسیێن مه ئه‌م ژ پێڤاژوویا دیرۆكێ ده‌رخستینه و كرینه كاشۆیێن ده‌ستێن ده‌وله‌تێن داگیركه‌ر
• كاره‌با و مووه‌للیده هێلێن هه‌ڤ ته‌ریبێن ژیانا مه‌نه و گه‌رما و سه‌رما ژ مێهاڤنداریێ بوونه مالخۆیێن مالێ لێ نه‌یێن به‌رپرسان.
• پرانیا خه‌لكى هه‌ڤ ته‌ریبى ئۆپزسیۆنێ نه و ئۆپۆزسیۆن عاشقێ ده‌ستهه‌لاتێیه و ده‌ستهه‌لات ب هێله‌كا هه‌ڤ ته‌ریب ل گه‌ل كێشێن خه‌لكى ب رێكێڤه‌یه.
• تۆ خانده‌ڤانێ گراڤى هیڤیێن ته هه‌ڤ ته‌ریبى چنه چونكو ل ڤى وه‌لاتى ئه‌گه‌ر هیڤیێن ته هه‌ڤ ته‌ریبى چ نه‌خشه‌یان نه‌بت دێ وه‌كو وان خانمان ل ته هێت ئه‌وێن لێڤ و روومه‌تێن خوه ب سلیكۆنێ وه‌كو خانمێن ناڤدارێن سینه‌مایێ لێكرین و هێش نه‌شته‌رگه‌رى ب داووى نه‌بووى فشیان و ئێدى “ژ عه‌یدا كه‌لێ بوون و سه‌یرانا رووبارى”.
2019, 06, 08
چ ژ مه كێم نینه
محه‌مه‌د چه‌لكى
پشتى مۆركرنا ل هه‌ڤكرنا پارتى و ئێكه‌تیێ بۆ پێكئینانا حوكمه‌تێ، هه‌ر چه‌نده ڤێ بگره و ڤه‌كێشێ گه‌له‌ك ڤه‌كێشا لێ هه‌ر باشبوو ل داویێ پێكهاتن و پێكهاتن چه‌ند پاشكه‌فت بت ژى هه‌ر ژ پێك نه‌هاتنێ باشتره، به‌س ڤێ چه‌ندێ دلێ مامێ عه‌لۆ هه‌ر خوه‌ش نه‌كره ب گۆتنا وى وى باوه‌رى ب ڤان رێككه‌فتنان نینه چونكو جه‌ماعه‌تێن ئێكه‌تیێ دهزار دل و هزرا بۆچوونن، سپێدێ تشته‌كى دبێژن و رۆژ ناچته كه‌ربه‌ندا نیڤرۆ ته دیت 180نمران چه‌پدان و بۆ ئێڤارى هه‌موو مۆركرنێن خوه ره‌شكرن. ل سه‌ر ڤێ مۆركرنێ بوویه هۆلكا تیڤى و شرۆڤه‌كارێن سیاسیێن بێكار و ته‌ڤ ل سه‌ر دئاخڤن و هه‌موو ژى بئێك زمان دئاخڤن و خوه‌دى ئێك بۆچوونن، دێ بێژى ئێكى بۆ گشتان نڤیسیه و جامێر ئه‌زبه‌ر دخوینن، بێى هێرڤه و وێڤه گۆته خودانێ چایخانێ: مامۆ بخێرا خوه وێ تیڤیێ ناته‌مرینى و دبه‌را بوو پرته پرتا وى و ئه‌ڤ گۆتنه ژ ده‌ڤى ده‌ركه‌فتن:
ب خودێ و ب هه‌موو پیرۆزیان كه‌م چ ژ مه كێم نیه ب مه‌رجێ:
• ئه‌گه‌ر ئاسۆده‌یا جڤاكى ب وێنێن سێلفیان بت، تۆ كه‌سه‌كى ژ خه‌لكێ كوردستانێ كه‌یفخۆشتر نابینى!
• ئه‌گه‌ر سه‌قامگیریا سیاسى ب كۆمبوونێن لایه‌نێن سیاسى بت، كوردستان دێ ل رێزبه‌ندا ئێكێ بت.
• ئه‌گه‌ر پێشكه‌فتنا زانستى ب دكتۆرا و ماسته‌ر و باوه‌رنامێن بلند بت، چ ژ مه كێم نینه.
• ئه‌گه‌ر ل رۆژهه‌لاتا ناڤین ده‌ستهه‌لات هه‌موو رێكان دگرن دا ئوپۆزسیۆنێ بێ روومه‌ت بكه‌ن، ل كوردستانێ پارت و كۆمه‌ل و یانێن جڤاكى ئه‌ندامێن خوه و یا هه‌رى نوى هه‌تكبه‌ریا نه‌وه‌ى نوێ ل ئه‌ندام په‌رله‌مانا خوه.
• ئه‌گه‌ر سیاسه‌تا ئه‌مریكا ل رۆژهه‌لاتا ناڤین سه‌رخۆریا(فه‌وزا) ته‌ڤایى بت دا نه‌خشێن نوى ژ په‌یوه‌ندیان بۆ ده‌ڤه‌رێ ل گۆڕه‌ى خوه‌سته‌كێن خوه بكێشت، ئێكه‌تیا نیشتمانى و نه‌وه‌ى نوێ ل كوردستانێ هه‌لبه‌ستنا تۆمه‌تان بۆ ئه‌ندامێن خوه و ژ بۆ لایه‌نێن دن هون ژ من باشتر دزانن كا چ دكه‌ن!
• ئه‌گه‌ر پارێزگه‌ها سلێمانیێ پایته‌ختێ ره‌وشه‌نبیریا كوردستانێ بت، هه‌ولێر پایته‌ختێ سیاسه‌تێ بت، چ ژ مه دهۆكیان كێم نینه ژ بلى هنده‌ك نۆشدارێن ده‌روونى و بلا دهۆك ببته پایته‌ختێ نه‌خۆشێن ده‌روونى.
• ئه‌گه‌ر تێگه‌هه‌شتن و زانین ب حرحر و ده‌ركه‌فتنا سه‌ر ئه‌ركانێن فه‌یسبۆك و یوتیۆبێ بت، كه‌س ژ ئه‌بۆ چیۆ و مه‌لایێ كه‌له‌كێ و پێغه‌مبه‌ر حامى (گه‌نجه‌كێ زاخۆییه خوه ب پێغه‌مبه‌ر ددته نیاسین) زاناتر نینه و د ڤى بیاڤى دا ژى چ ژ مه كێم نینه!
• داگیركه‌رێن كوردستانێ چ نه‌مایه ب سسه‌رێ گه‌لێ كورد نه ئینا بت، ل جهێ كورد ببن ئێك و ل دژى وان ده‌ربكه‌ڤن و سه‌رخوه‌بوون ببته ئارمانج و خالا هه‌ڤگرتنێ، كه‌س هندى كوردان یێ په‌رت و ژ هه‌ڤ دوورتر نینه و بۆ دژاتیا هه‌ڤ مه چ كێمانى نینه!
• ئه‌گه‌ر بیركارى ب ماكا زانستان بهێته هه‌ژمارتن و ئه‌ز باوه‌ر دكه‌م وه‌سایه چونكو سیاسییێن مه تنێ پشككرنێ(ته‌قسیم، دابه‌شككرن) ژێ فێربوونه و بۆ پشككرنێ چ ژ مه كێم نینه!
ئو ب دیتنا هه‌وه چ ژ مه كێمه، دا وه‌كو شرۆڤه‌كارێن سیاسیێن كورد بێ هویربینى و لێكۆلین بكه‌ینه ڕاپۆرت و بدانینه به‌ر شول پێچیبوویێن كوردستانێ، ببوورن سه‌ركرداتیا سیاسیا ئێكگرتیا كوردستانێ!
سۆتن
محه‌مه‌د چه‌لكى
خوه كوشتنا حاكم گۆرانى (2019.04.30) وژدانا مامێ عه‌لۆ و یا پتریا كوردستانیان هه‌ژاند و ئێشاند. هه‌ر چه‌نده خوه كوشتن ڕه‌ڤینه ژ ئه‌ركێ به‌رپرسیاریێ و ره‌نگه‌كه ژ ده‌ستداهێلانێ و ئه‌ز نه ل گه‌ل ڤان جۆره كریارانم لێ حاكمى ب ڤێ كریارێ په‌رده ژ سه‌ر خه‌مساریا سیاسه‌تڤان و كاربده‌ستێن ڤى وه‌لاتى هلاند د پرسێن چاره‌نڤیساز دا. به‌رى حاكم گۆرانى و خوه كوشتنا وى (ئه‌ڤ خوه كوشتنه قێریه‌كه به‌رامبه‌ر وژدان نڤستیێن سیاسه‌تمه‌دار و تاكێ كورد) ریفراندۆمێ په‌رده بێ رتۆش ل سه‌ر خاڤیا هه‌ستا نه‌ته‌وى ل جه‌م تاكێ كورد ڕاكربوو و ژ ئه‌نجامێ ڤێ هه‌ست نزمیێ 16 ئۆكتۆبه‌رێ هاته ژ شكه‌ڤا كوردى. هندى مامێ عه‌لۆ هزرا خوه دكه‌ت و سه‌ده‌مێن ڤێ بێده‌نگیا مه‌دیا كوردى و سیاسه‌تمه‌دارێن كورد و ملله‌تێ كورد چ ل هه‌رێما كوردستانێ یان ژ ده‌رڤه‌ى كوردستانێ بۆ پرسا خوه كوشتنا حاكم گۆرانى چنه! لێ كه‌سه‌ك ل سه‌ر ڤێ پرسێ ب به‌رسڤ نه‌هات كو فه‌ربوو بده‌نگ هاتبانه و ده‌روونناس و جڤاكناسێن كورد ئه‌ڤ دیارده شرۆڤه كربانه. راسته د تۆرێن جڤاكى دا ب به‌رفرهه‌یى ل سه‌ر هاته نڤیسین، لێ پرانى بۆ شینگرانێ بوون و ناچنه د خانا شرۆڤێ دا كو چاره بۆ هه‌ر مرۆڤه‌كێ ده‌روون نه‌خوه‌ش و دخازت دوماهیێ بژیانا خوه بینت، بهێته دیتن و ئه‌ڤ ره‌نگ شینگێرانه نه‌راسته‌وخوه دبنه هانده‌ر بۆ مرۆڤێن ده‌روون نه‌خۆش كو مرنا خوه بكه‌نه روودان چونكو مرۆڤێ ده‌روون نه‌خوه‌ش و بێده‌ستهه‌لات ل ده‌لیڤه‌كى دگه‌رهت دا هه‌بوونا خوه بهایه‌كى بده‌تێ و بۆ جڤاكێ بده‌ته دیاركرن كو ئه‌و ژى دكارت هنده‌ك كارێن واته‌دار بكه‌ت، ب تایبه‌ت ل جه‌م مه كوردان كو سومبۆل ژ چارچۆڤێ نه‌ته‌وه‌یى ده‌ركه‌تنه و بوونه پێخارن بۆ بنه‌مال و مریدێن خوه. هێش مامۆ عه‌لۆ نه‌گه‌هه‌شتیه چ ئه‌نجامان و سه‌رێ وى ببوو ته‌مباڤ ژ هزركرنێ و كۆڤانا حاكم گۆرانى، هه‌ڤاله‌كێ دێرینێ وى ده‌ستێ خوه ل ملى دا و گۆتێ: ـ خوه‌زى من جاره‌كێ تۆ دیتبایه ل تۆ سه‌ر هشێن خوه، مال تڕنێس دێ تۆ ژى وه‌كو ڤى خه‌لكى به و كیش مێرگا پرى گوله ل وێرێ پالده و سه‌یرانا خوه بكه؟
ل جه‌م من ئه‌و واره لێ نه‌بهاره!
ـ ما بهاره‌كا وه‌كو ئه‌ڤ ساله خوه‌ش هه‌یه!
ما ب به‌ر دكه‌ڤت وه‌كو مه‌مێ ئالان بێژم!
ـ مه‌مێ چ گۆتبوو؟
ببووره… چ نه‌گۆتیه!
ـ چ زویكا دچیه دبۆتلیدا.
ما چ نه‌چمه دبۆتلیدا، نساخیا ژبیرچوونێ ئه‌ڤ ملله‌ته گرتیه و هه‌ر كه‌س بوویه حه‌یرانێ به‌رویكا خوه و بلا ملله‌تێ وى بچته ئێك ئاڤا مه‌زن!
ـ شۆل مه‌زن بوو، ته ئه‌ڤ كارێ خوه نه‌هێلا، هه‌ر ته‌ڤشویه‌كى ل به‌ته‌نه‌كێ دده‌ى.
نه ده‌نگێ ته‌ڤشووى و ماهۆلێن بێده‌رامه‌تان و نه ژى رۆندكێن دایكێن شه‌هیدان و بێسه‌روشوونان وژدانا ڤى ملله‌تێ ته‌ڤشویێ به‌رێخوه هشیار دكه‌ت.
ـ ملله‌ت!
ئه‌رێ ملله‌ت، مێزه‌كه ل تونسێ بوعزیزى ژ كه‌ربێن پۆلیسه‌كى خوه سۆت(2010.12.17) و بۆ سه‌ده‌م رژێما بن عه‌لى بهه‌لوه‌شت و حاكمێ مه خوه كوشت ژ كه‌ربێن گه‌نده‌لچى، ئۆكتۆبه‌رچیان و عێراقچیان، لێ هێشتا ل سه‌ر پێكئینانا حوكمه‌تێ هنده‌ك لایه‌ن هێجه‌تان دبینن و وه‌ریسێ هێجه‌تان بداوى ناهێت، ژ ده‌وله‌ت سه‌رێ وان چاره‌سه‌ریا كێشه و گرفتێن ڤێ سه‌یرستانێ ده‌ربازبوونا ژ زڤڕ‌وكا به‌رمۆدا گه‌له‌ك ب زه‌حمه‌تتره و سه‌ره‌داڤێن چاره‌سه‌ریێ هه‌رچه‌نده گه‌له‌ك ب ساناهینه و گرێهشكێن داڤ ئالزیایى تێدا نینن، لێ به‌رژه‌وه‌ندیا هنده‌ك كه‌سان وه‌سان دخازت كو كێشه هه‌ر بمینن دا سیاسه‌تا ففتى تاكه چاره‌سه‌ر بت، ئه‌ڤجا ملله‌ت هڕكێ و هندى تۆ خودانێ ڤان تۆڤه كه‌سان بى، گه‌له‌ك ئۆكتۆبه‌رێن دى دچاڤه‌رێنه! ئاخ نێ سۆتم و به‌لێ پا من یا خوه گۆت!
پیسكه‌رێن وه‌لاتى
محه‌مه‌د چه‌لكى
(خۆشه وه‌كى جه‌ننه‌تێ، ئه‌ڤ جهێ كوردا یه‌قین
قابله بۆ له‌زه‌تێ، گه‌رم و نه‌رم و باش و هین …
تازه‌یه لێ خۆش بهار، باخ و ره‌ز و دار و بار
جنس و كولیلكا هزار، گاڤ و ده‌ما سۆر و شین..) نالبه‌ند.
مامێ عه‌لۆ چه‌ند هزرا خوه د ڤێ هه‌لبه‌ستێ دا دكه‌ت و ل كه‌توارێ ئه‌ڤرۆێ دمه‌یزینت، ژ كۆڤاندا چ نامینت كو شاخێن وى ژوردا ل بلندیا چیایێ ئاگرى بمه‌یزنت. جوانیا كوردستانێ نه تنێ هه‌لبه‌ستڤان و هونه‌رمه‌ندێن كوردستانێ حه‌یرانى جوانیا خوه كرنه، به‌لكو هه‌ر كه‌سێ ب رێبارى ژى رێكا وى كه‌فتبته كوردستانێ حه‌یرانى جوانیا سروشتێ وێ بوونه. مخابن ئه‌ڤرۆ ئه‌و جوانى و سپه‌هیاتى هێدى هێدى نامینت و هه‌موو ژى ژ ده‌وله‌ت سه‌رێ خوه‌دانێن وێ بخوه‌یه. گر، نهال و ده‌رگه‌لى، كانى، مێرگ و كنارێنێن رویبارا گشت هاتنه پاوانكرن و ئولى دبێته ئولیێ وێڤه هه‌ره. ئه‌ڤه هه‌موو ل به‌ر چاڤێن باژێرڤانى و رایه‌دارێن حوكمه‌تێ دهێته ئه‌نجامدان، بێى كو جامێر مویه‌كى ژ خوه شاش بكه‌ن و سنووره‌كى بۆ ڤێ تێكدانێ بدانن.
مامێ عه‌لۆ دێژت: ب ڤى ده‌ستودارى هه‌تا چه‌ند سالێن دن، باوه‌ر ناكه‌م جهه‌ك بمینت بۆ گه‌شتیار و سه‌یرانچیان. ژ بلى ڤێ بێدادیا ل سروشتێ كوردستانێ دهێته كرن ژ لایێ هنده‌ك كه‌سێن گه‌ز و مه‌قه‌سێن ڤى وه‌لاتى دده‌ستاندان، خوه وه‌لاتى ژى پشكداریێ د ڤێ هه‌رماندنێ دا دكه‌ن و چ جهێ سه‌یرانكه‌ران به‌رێ خوه دایێ، ژ به‌رماكێى وان تۆ نكارى لێ بێهنا خوه ڤه‌ده‌ى….
ترسا مامێ عه‌لۆ ژ ڤێ پیسكرنا سروشتێ كوردستانێ ئه‌وه پیسكرن شۆر ببته هه‌موو گه‌هێن وه‌رارێن جڤاكى و سیاسى و ئه‌و ژى مینا گه‌نده‌لیێ ببته كولتۆر (ژ زار ده‌ڤێ به‌رپرسێن حوكمه‌تێ).
ترسا مامێ عه‌لۆ ڕه‌واتى تێدا هه‌یه و فهێتیا په‌رله‌مانته‌را نه‌وه‌ى نوێ كو هه‌ڕه‌شه لێ هاتیه كرن: ئه‌گه‌ر ل گۆڕه‌ى گێولێ سه‌رۆكێ وێ(شاسوار عه‌بدالواحد) ته‌ڤگه‌رێ نه‌كه‌ت، ژ وێرێ وێڤه هوون چیرۆكێ دزانن.. ده‌ستپێكه‌ك مه‌ترسیداره و ب ڤێ زهنییه‌تێ وه‌رارا جڤاكى و سیاسى و هشیاریا جڤاكى بۆ مافێن خوه پاشڤه دئێخت و بێ باوه‌ریێ دكه‌ته سیمایێ جڤاكى.
هه‌تا نوكه هنده‌ك ژ سیاسیێن كوردستانێ تنێ سروشت و بازرگانى ل كوردستانێ هه‌رماندنه و خه‌لك ژى ژ وان فێربوونه سروسشتێ كوردستانێ دهه‌ڕمینن (ل سه‌یرانكه‌ران مێزه بكه‌ن)، لێ ئه‌ڤا ل دژى په‌رله‌مانته‌را نه‌وه‌ى نوێ هاتیه‌كرن، ده‌سپێكا هه‌رماندن و پیسكرنا ئه‌و پشكا ماى ژ ڕه‌وشتێ كورداتێى یه. هه‌رده‌ما سروشت و ڕه‌وشت پیسبوون، ژیان ب كوته‌ك دكه‌ڤت و یاسایا دارستانێ سه‌روه‌ر دبت و بها و نۆرمێن پیرۆز دبنه قۆربانى حه‌زێن چ جار تێرنه‌بوویێن مرۆڤان.
سه‌ر خلۆله‌یى
محه‌مه‌د چه‌لكى
ـ ته‌خێره هۆساى زه‌وق خوه‌ش، وه‌سا سه‌رێ خوه بادده‌ى، ما تشته‌ك چێبوویه ل ڤى وه‌لاتێ هه‌موو لێ بووینه رۆژنامه‌ڤان و پیڤاز و سیرێن هه‌ڤ سپى دكه‌ن و ئه‌م پێ هایدار نه‌بووین؟
• تۆ ژ عه‌مرێ خوه بتنێ یێ فێرى گازندا و په‌له‌ندار هاڤێتنێ بووى، مال كلێس ما د گوهێ گاى دای نڤستى.
ـ ئه‌گه‌ر ئارامى لێ په‌یدا ببت ما بۆچى نه …
• نه‌خێر تۆ نه‌ى پڤداى!
ـ ئه‌ز تێ ناگه‌هم بۆچى یێ پڤداى نه‌بم، ما تشته‌كێ كه‌یفخوه‌شكه‌ر ل ڤى وه‌لاتى مایه هه‌تا یێ پڤداى نه‌بم!
ـ كتكێن كوره بتنێ تشتان نابینن!
• ئه‌ڤه مابوو ته ئه‌ز پێ گونه‌هبار نه‌كریم، دوباره پرسیار دكه‌م: سه‌ده‌مێن ڤێ زه‌وق سیاریا ته چیه؟
ـ پرانیا مرۆڤێن ڤێ جیهانێ په‌سنێن مه دكه‌ن و تو ژى به‌س یێ فێرى په‌له‌نداران دهاڤێى و كه‌سه‌ك نه‌شێت ده‌ڤێ ته بدانته سه‌رێك، به‌س نه‌كامیان پێ دكه‌ى!
• قه‌وانا په‌سنان، په‌سن په‌سن، كه‌سێ مالا ڤى ملله‌تى وێران نه‌كر ژ بلى په‌سنان، وه‌ح پا ئه‌م ملله‌ته‌ك سه‌ر خلۆله‌ینه، ب خوه‌ش خوه‌شكان دچینه سه‌رێ گر و ملان!
ـ ئه‌گه‌ر مرۆڤ ب خوه په‌سنێن خوه بكه‌ت، دیاره نێزیكى ڕاستیێ نابت، به‌لكو خوه هلكێشان و ڤه‌شارتنا كێمى و كه‌تنێن خوه دكه‌ت.
• ره‌حمه‌تا خودێ ل دایبابێن ته بت، ئه‌گه‌ر ته بڤێت ئێكى ل ئاتافه‌كێ بده‌ى، هلده په‌سندانا وى و وه‌كو ڤێ دووماهیێ ل شه‌رێ داعشێ، هه‌وویان وه‌سا په‌سنێن مه دكرن و دگۆتن: شه‌ركه‌رێن ئازا، قاره‌مانێن رۆژهه‌لاتى، ترس نه‌ناس و … ل داویێ هه‌كو مه گۆتى: مه دڤێن سه‌ربخۆ بین و چیرۆكا ریفڕاندۆمێ دیاره كانێ چاوا هه‌موویان پێكڤه گۆتن: بڤه‌یه و نابت سنوور بهێنه تێكدان. ڤێجا تۆ ب خودێ كه‌ى ڤى قه‌وانى به‌س لێ بده و بێژه فلان زاناى یان فلان رۆژنامه‌ڤانى یا هۆ گۆتیه و دڤێت ئه‌م ژى ل په‌ى وى بێژین ئامین و بكه‌ڤینه چه‌پا…
ـ چه‌ندێ شاره‌زاى دێ هه‌ر وێ بێژى یا دلێ ته دخوازت، من چ پرسیار ژ ته كر و ته به‌رێ مه دا كیڤه، ئێ ب خودێ ئه‌گه‌ر ئه‌ز ل جهێ رایه‌دارێن ڤى وه‌لاتى بامه دا ته كه‌مه شێورمه‌ندێ كاروبارێن سیاسى و په‌یوه‌ندیێن ده‌رڤه یێن حوكمه‌تێ!
• هندى كۆرێن جاش و خیانه‌تكاران مابن، وان ئاگه‌ه ژ كه‌سه‌كێ دن نینه!
ـ سه‌ده‌مێن ڤێ زه‌وق بلندیا ته چیه؟
• پاى چیر درێژى … به‌رى هه‌ر تشتى تۆ شاش یێ تێگه‌هه‌شتى ئه‌ز نه‌ى بزه‌وقم به‌لكو یێ تۆڕه‌مه، به‌رێ خوه بده فه‌یسبۆك و تۆرێن جڤاكى و هه‌یا بگه‌هیه رۆژنامه‌یان گشت یێ به‌حسێ كابرایه‌كێ عه‌ره‌ب دكه‌ن كو خوه‌زیا دڕاهێلت ببت كورد. ل گۆر دیتنا جامێرى كورد دناوازه‌نه و دخوازت ببت كورد. ئه‌ز یێ ب خولی سه‌ریا مه و ڤى كه‌سێ دبێژنێ: فادى عاكۆم، تۆ خێرێ ژ من نه‌كه‌ى ئها ئه‌ڤه ئه‌ز گه‌هه‌شتیم ڤى عه‌مرى و خوانده‌ڤانه‌كێ مجدم هێشتا ناڤێ وى جامێرى ب به‌ر گوهێ من نه‌كه‌فتیه! بابۆ مالا ته ئاڤا، به‌س مامۆ ئه‌گه‌ر مه‌ره‌ما ته خۆش جامێری و مه‌ردیا مه بت، تۆ دره‌نگ یێ بسه‌ر هه‌لبووى و ئه‌م نه‌ماینه كوردێن به‌رى ریفڕاندۆمێ و هه‌ر كه‌سێ دوو په‌یڤێن په‌سنان كۆمى سه‌ر هه‌ڤ كرن و هنارتنه كوردستانێ دێ ب ده‌فته‌ران ده‌لار فرنه پۆستێ وى… پشتى ریفڕاندۆمێ مه سه‌ر خلۆله‌یى ل گه‌ل هه‌لوێستێن هه‌وه و پرانیا ده‌وله‌تێن جیهانێ یێن برینه مۆزه‌خانا دیرۆكێ…
ـ خوه‌زى مامێ عه‌لۆ سه‌ركردێن مه ژى هۆسا بیر كربا…
• مامۆ ئه‌و سیاسه‌تێ دكه‌ن و جامێرا ئه‌و ب خوه نه دسه‌ر خلوله نه، به‌س مه چیه ئه‌م ب زڕنا زڕنا بێژێن بێكار ڕادبینه چه‌پا!
كه‌یسا ئه‌نفالان
محه‌مه‌د چه‌لكى
نۆچه‌یا ڤه‌دیتنا پێنج گۆڕێن ب كۆمه‌ل یێن ئه‌نفالبوویان ل سه‌ماوه (12.نیسانێ.2019) مینا ئاگره‌كى ل چلێ هاڤینێ به‌رببته پویش و په‌له‌خا ساله‌كا پرى باران، چاوا چ هێزێن ئاگر ڤه‌مراندنا نه‌شێن وى ئاگرى بڤه‌مرینن و لغاڤ بكه‌ن، وه‌سا كه‌له‌گرى ب هه‌ستێن بریندار بوویێن ماما عه‌لۆ ڤه چوو و شریتا هه‌وێن ئه‌نفالان و با سه‌روشوینان ل به‌ر چاڤان دووباره بوو، ئه‌و رۆژێن ژ بلى چیان كه‌سه‌ك ل هانا مه نه‌هاتى و كۆڤانا ژ هه‌موویا مه‌زنتر كوردێن كرێگرتى بوون كو ل پێشیا له‌شكه‌را دراكۆلایا به‌غدا كه‌فتین و ل ئه‌نفالبوویان دكره قێرى و دگۆتن:” وه‌رنه حوكما زاتى … و ئاخفتنێن وه‌سا چڤێل دگۆتن خوه مرۆڤ شه‌رم دكه‌ت ل دیوانا ته‌له‌دینه‌كى بێژت”، وه‌ى پا كۆڤانا وان رۆژا مه‌زنه، مخابن مه زویكا ژبیركر و كه‌سێن هاوار دكرنه ئه‌نفالبوویان و ئاخفتنێن روومه‌تشكاندنا دگۆتنا، هه‌مان ئه‌و كه‌س و مالباتێن وان ل رێزا پێشییا ئه‌نفالبوویان كۆلاڤ خار ل سه‌را دیوانان دروونن و بۆ هه‌ر پۆسته‌كا بلندا حوكمه‌تا ژى چ ئه‌و یان كورێن وان یێن ب نانا جاشاتى و خیانه‌تا ڤى ملله‌تى مه‌زن بووین، كه‌سێن یه‌كه‌مینن بۆ پر كرنا وان پۆستان. وه‌ى ل ڤا سوسره‌تا كو هێشتا با سه‌روشینێن مه نه‌هاتینه دیتن و یان جار جار ب هه‌ر رێكه‌كا هه‌بت گۆڕه‌ك ل بیابانا عه‌ره‌بى دهێته دیتن و تازى و شینى ل هه‌ر ماله‌كا ئه‌نفالبوویان دووباره دبته‌ڤه و هیڤیێن ڤه‌دیتنا ره‌فاتێن خوه‌شتڤیێن خوه كو ل بن دار به‌روویه‌كا شاهدا وا كاره‌ستا ب ره‌نگه‌ك هه‌ژى بهێته ڤه‌شارتن و د همبێزا كوردستانا خوه دا بۆ هه‌تا هه‌تایا سه‌را خوه ب سینگا وى ڤه بنوسینن. چه‌ند بێژه‌رى ئاگه‌هیه‌ك ل سه‌ر وان گۆڕان ده‌رهى دكر ئاگرا ب هه‌ست و جانا ماما عه‌لۆى كه‌فتى گۆڕتر دبوو و بێهنا وى ته‌نگتر لێ دهات و په‌ست و فشارا خوینا وى هه‌موو پیڤه‌ر به‌زاندن و دونیا ل به‌ر چاڤان تارى بوو. شیانێن خوه هه‌موو جه‌ماندن كو بكارت خوه ل به‌ر ڤى نوچه‌ى بگرت و ب هه‌ر شیانه‌كا بت خوه بگه‌هینت مال، لێ ده‌ما بێژه‌رى جلك و پێدڤیێن تایبه‌تێن ئه‌نفالبوویان بۆ بینه‌ران په‌خش كرن، سه‌رنجا وى بۆ بویكا لاستیكا ب سینگا زارۆه‌كا سا سالى چوو، تنا چه‌ند هه‌ستیكێن زراڤ ل دوور كه‌مه‌را بویكا لاستیكى وه‌رهابوون و وه‌كه دن چ ژ وا زارۆكا به‌رى هه‌وا ئه‌نفالا ناز بۆ دایبابێن خوه دكرن و یارى ب بویكا خوه دكرن، تنا هنده هه‌ستیك مابوون، ئێدى ماما عه‌لۆ شیانێن خوه ل به‌ر گرتنا ڤى دیمه‌نا تراجیدى نه‌مان و ل سه‌ر كورسیكى خویل بوو و كه‌فته سه‌ر عه‌ردى. ئه‌وێن ل چایخانا ته‌ڤ به‌ر ب ماما عه‌لۆ ڤه چوون، بله‌ز سوارى ترۆمبێله‌كا كرن و بۆ نه‌خۆشخانا ته‌نگاڤیان برن. پشتى پشكنینێن پێدڤى، ده‌ما ماما عه‌لۆ ب سه‌ر خوه‌ڤه هاتى، نۆژدارى ژێ پرسى: – ئه‌گه‌ر تۆ ل ده‌ما پێدڤى نه‌ئینابى، مه نه دكارى ته رزگار بكه‌ین، تۆ نابێژى ئه‌و چ خه‌مه هۆ ده‌مل ده‌ست تۆ ئێخستى؟ • هه‌ستیكێن خوه‌شتڤیێن من تێر نه‌دیتین. – ما كه‌سه‌ك هه‌یه خه‌مێن هه‌ستیكێن مریان بخۆت؟ • مامۆ ئه‌م ملله‌ته‌كین خه‌ما چ تشتا ناخۆین ژ بلى زك و بن زكان، له‌و هه‌ر رۆژه‌كا هه‌ستیكێن عه‌زیزێن مه ل قۆلاچه‌كا دونیایا دهێنه دیتن. ئه‌را ب ئه‌نیا بابا ته كه‌م(هه‌لبه‌ت ئه‌گه‌ر هێشتا بابا هه‌وه ل ژیانا بت)، خه‌لك وه‌سا ل هه‌ستیكێن خوه‌شتڤیێن خوه خودان ده‌ردكه‌ڤن و هه‌موو شیانا دمه‌زێخن دا هه‌ستیكێن وان بۆ همبێزا ئاخا وه‌لاتا خوه بزڤرینن و چیرۆكا سه‌ربازا ئیسرائیلى و ڤه‌گه‌راندنا هه‌ستیكێن وى بۆ ئیسرائیلێ هێشتا یا گه‌رمه. – دیاره ده‌ردا ته گه‌له‌ك یا گرانه، لێ ئه‌ز وه‌كه نۆژدار ته ئاگه‌هدار دكه‌م، ئه‌گه‌ر تۆ ل سه‌ر ڤا هه‌ستیاریا خوه یا به‌رده‌وام بى، ل نێزیكترین ده‌م دا ل شاخكا بیه مێهڤان. مێهڤانداریا شاخكا بۆ من خوه‌شتره ژ دیمه‌نێن ڤه‌كۆلانا گۆڕێن ئه‌نفالبوویان و بێ به‌رپرسیاریا رایه‌دارێن حوكمه‌تا مه بۆ كه‌یسا ئه‌نفالان.
عاجز بوون
محه‌مه‌د چه‌لكى
• ژ سه‌ر و قودشیمێ ته دیاره، گه‌له‌ك یێ عاجزى، ڤێ جارێ كه‌رێ ته ل كیده‌رێ هلنگفتیه؟
– خوه‌زى جاره‌كێ بتنێ وه‌كو مرۆڤا ته زانیبا ب ئاخڤى!
• تۆ وه‌كو مه‌سئولێن مه‌یى، هه‌رده‌ما ته به‌حسێ گه‌نده‌لى و دامه‌زراندن و ڤه‌گوهاستنا به‌رپرسان كر، ئێكسه‌ر دێ ئاخفتنێن “خاجۆكى كه‌ن*” و فشارا خوینا وان دێ خوه ل بلندترین ئاست ده‌ت و په‌یڤێن مرۆڤ شه‌رم دكه‌ت ل دیوانا زارۆكه‌كى بێژت دێ كه‌نه سویلاڤا گه‌لى عه‌لى به‌گێ و به‌رده‌ن… مالا ته‌نه‌چت به‌رێ میراتێ، من بتنێ پرسا سه‌ده‌مێ نوعیم شۆڕیا ته كریه، تۆ هۆسا دبن خوه چووى و “دۆن كیشۆتى” په‌لاندارا دوه‌شینى!
– ما ئه‌ز یێ “نه‌رویجى*” مه دا سه‌ده‌مێن عاجز بوونێ د سه‌یر و سه‌مه‌ر بن!
• بۆ سه‌رك بادانێ ئه‌شهه‌دو بیللا ته یا ژ هنده‌ك به‌رپرسێن ڤێ سه‌یرستانێ زێده‌كرى، به‌رسڤدان ب پرسكرنێ، ڕه‌ڤینه و ترسه ژ ڕاستی خویابوونێ!
– كا تۆ ناچى… پاشى ما دیار بوونا سه‌ده‌مێن عاجز بوونا من دێ چ ژ ره‌وشا ته گوهۆرت، هه‌تا هنده بۆ ته خه‌م بت! یا دن ژ بیر نه‌كه “ئێشا ل هه‌ڤالى تیرا ل كه‌ندالى” یه وه‌كو پێَشینانێن مه گۆتى!
• نه هه‌رێ مامێ عه‌لۆ ژى وه‌كو خوه نه‌مایه و یێ فێرى “سه‌رك بادانێ” بووى، حه‌یف بۆ ته!!
– دێ ڤێجا زكۆ نه‌په‌قه!
• مانێ من دڤێت سه‌ده‌مێن زك په‌قینا ته بزانم! ئه‌ڤ قودیشم شۆڕیا ته یا بێ سه‌ده‌م نینه!
– سه‌ده‌مێن وێ چ بن، نه ده‌ستهه‌لاته، دا دلێ ته ره‌حه‌ت بت!
• ئه‌ڤه تۆ یه‌كه‌مین كه‌سى ل ڤێ مه‌مله‌كه‌تێ هه‌لبه‌ت ژ بلى مه‌سئول و هه‌ڤال و هۆگرێن وان سه‌ده‌مێن عاجز بوون و بێ مه‌عده بوونا وان نه ده‌سهه‌لات بتّ!
– ئه‌ز نه “عه‌بۆقاتێ” ده‌ستهه‌لاتێ مه و بلا ئه‌و ب خوه پارێزڤانیێ ژ خوه بكه‌ت، لێ ده‌رهه‌قێ عاجزى و بێ قودیشمیا خوه دێ بۆ ته عه‌یان و به‌یان كه‌م، هه‌ر چه‌نده گه‌له‌كن لێ دێ كن ڤه‌گێرم، دا خانده‌ڤان نه‌بێژن: مامۆ عه‌لۆ “یێ دیوان دڕه”، كه‌ربێن من هندى دنیایه‌كێ ژ ڤان كه‌سان ڤه‌دبن:
× یێن ل سه‌یرانا گلێشێن خوه ل پاش خوه دهێلن!
× شۆفێر و سوارێن ترۆمبێلان هه‌كو گلێشى یان قۆپكێن جگارێن خوه د په‌نجه‌رێ ڕا دهاڤێژن!
× شۆفێَرێن ته‌كسیان، سنێله‌یێن ترۆمبێلان ژ مالێن خوه ددزن و هه‌ر شۆفێره‌كێ بربه‌زانكانێ ل ریكێن ته‌نگ و ترافیكان دكه‌ن.
× دكاندارێن بازارى دگه‌ل زارۆكان دكه‌ن!
× نووژداران و سه‌ره‌ده‌ریا وان دگه‌ل نه‌خوه‌شان!
× باش بازرگانێن كوردستانێ و ڤه‌كێشانا وان بۆ كالایێن كه‌رخه‌سپاله و نێزیكى ده‌م بسه‌رڤه‌چوونێ!
× فه‌رمانبه‌رێن رویڤى(یێن ل هێجه‌تا دگه‌رهن دا نه‌چنه ده‌وامێ)!
× خودانێن مووه‌لیدان و دائیرا كه‌هره‌بێ و شێوێ بهه‌ڤڕا كاركرنا وان! مانێ هه‌وجه ناكه‌ت هوین باش دزانن چه‌وایه!
× مامۆستایێن كوردستانێ هه‌ر ژ باخچه‌ى بگه‌ره هه‌تا دگه‌هته یێن زانكۆیان و شێوێ ده‌رچوواندنا خویندكاران!
× هنده‌ك ژ هونه‌رمه‌ند و سترانبێژان بتایبه‌ت ژى سترانبێژان كو تنێ زمان كوردیه ئه‌و ژى سه‌قت و شاش بكارئینانا په‌یڤێ وه‌كو دن گێلما گاڤانییه و چ په‌یوه‌ندى ب هونه‌ر و مۆسیقا كوردى ڤه نینه…
• هه‌ما ژێ ب گه‌رهه و به‌س درێژ بكه، ته زكێ من ئێشاند.
– ئه‌ڤێن من گۆتین لێ لێكن و ته‌نه‌شیا خوه ل به‌ر بگرى، پا ئه‌گه‌ر هه‌موویان رێزكه‌م، یێ پشتڕاسم، دێ لاڤایان بۆ ده‌ستهه‌لاتێ كه‌ى!
• ئانكو جامێران بسه‌رمه‌ڤه‌نه …
– تۆ گه‌له‌ك یێ شاشى، هه‌ما ل ره‌وشا ئه‌ڤرۆ یا وه‌لاتێ جه‌زائیرێ مێزه بكه دێ بۆ ته دیار بت كو وه‌لاتى میرێ میرانه ئه‌گه‌ر بخازت یێ وه‌لاتپارێز بت، نه وه‌كو ته‌رلانێن مه و ئه‌و تشتێن من ل ژوور ژێ خه‌به‌رداین و یێن مایین هێش پترن، ئها ئه‌ڤه‌نه سه‌ده‌مێن عاجز بوون و بێ قودیشمیا من.
*”خاجۆكى” هێمایه بۆ ئاخفتنێن بێ ڕامان.
*”نه‌رویج” ل گۆر پیڤه‌رێن یۆئێنێ وه‌لاتیێن وێ ئاسۆده‌ترین مرۆڤن.
بێرێزیكرنا ئالاى براوه‌ستینن!!
محه‌مه‌د چه‌لكى
ئاڵا وه‌ك هێما و ناسناما نه‌ته‌وه‌یى دهێته هه‌ژمارتن و ڕه‌نگێن ئاڵاى ده‌ربرینێ ژ پێكهاته‌یا وه‌ڵاتى دهێته‌كرن و پاراستنا وى ژ ئه‌ركێن هه‌رى گرنگ و فه‌ره. د هه‌ر كێلیه‌كێ و ده‌مه‌كى دا ل بن چ پاساوا نابت ئاڵا بهێته داخستن یان نه‌وى كرن، د مه‌رگه‌سات و چامێن مه‌زن دا یێن ب سه‌ر گه‌ل و نه‌ته‌وان دا دهێن، ژ بۆ رێزگرتنا وێ چام و كۆڤانێ ئاڵاى پیچه‌كێ نزمتر دكه‌ن، وه‌كو دن ل بن چ پاساوێن دن ناهێته خار یان نزمكرن. ل كوردستانێ ژ به‌ر گرنگیا ئاڵاى و پیرۆزیا وى رۆژه‌ك هاتیه دیاركرن بۆ پیرۆز ڕاگرتنا وى (12.17)، د ڤێ رۆژێ دا چه‌ندین چاڵاكیێن جۆربه‌جۆر دهێنه ئه‌نجامدان و قووناغێن ئاڵا تێدا ده‌ربازبووى بۆ وه‌ڵاتیان و ب تایبه‌ت بۆ نفشێ نوو دهێته دیاركرن و بئه‌ڤینكرن. وه‌ك دهێته زانین ئاڵایێ مه به‌رى سه‌رهلدانا پیرۆز (1991) هلدان و هه‌لگرتنا وى قه‌ده‌غه بوو و دڤێت نه‌هێته ژبیركرن كو ئه‌ڤ ئاڵایه ئه‌مانه‌تا یه‌كه‌مین سه‌رۆككۆمارێ كوردستانێیه بۆ بارزانیێ نه‌مر و نه‌ته‌وا كورد. د سه‌ر هه‌موو نه‌خوه‌شى و ئاسته‌نگیان ڕا بابێ روحیێ نه‌ته‌وا كورد بارزانى ئه‌ڤ ئاڵایه پاراستیه و تا گه‌هشتیه سه‌رۆك بارزانى و جه‌نابێ وى ئه‌ڤ ئه‌مانه‌ته دایه په‌رله‌مانێ كوردستانێ و ته‌ڤایا گه‌لێ كورد ل هه‌ر جهه‌كێ هه‌بت. مخابن گه‌له‌ك كه‌سێن نه‌به‌رپرس یێن هه‌ین كو رێزگرتنێ ل ئاڵاى ناكه‌ن و ئه‌ڤ نه‌برپرسیه ل بن هه‌ر پاساوه‌كى بت ب چ ڕه‌نگان ناهێته په‌ژراندن و فه‌ره لێ پرسین ل وان كه‌سان بهێته كرن. ب تایبه‌ت كو مه رێكخراوه‌ك هه‌یه ب ناڤێ (پارستنا ئاڵاى) و كارێ ڤێ رێكخراوێ چاڤدێریكرنه ل هه‌ر بێرێزیه‌كا ل ئاڵاى دهێته‌كرن. د گه‌رهانه‌كێ دا من ئاڵا ل دو جهان دیت و هه‌ردو جه ژى جهێن فه‌رمینه، ئاڵا هاتیه بێریزیكرن*، ئه‌گه‌ر د جهێن فه‌رمى دا بێرزى ل ئاڵاى بهێته‌كرن پا ل جهێن نه‌فه‌رمى دێ ب چ ڕه‌نگ بت! ئه‌گه‌ر ئه‌م بێرێزیێ ل ئاڵایێ خوه بكه‌ین پا دوژمن د مافدارن قه‌ده‌غه و بێرێزیێ لێ بكه‌ن. هیڤیخوازم جهێن شۆله‌ژێ (هه‌ر چه‌نده ئه‌م ته‌ڤ به‌رامبه‌رى ئاڵاى به‌رپرسیارین، لێ جهێن فه‌رمى ئاوایه‌ك قانوونى هه‌یه) ب زووترین ده‌م ل ئاڵاى خوه‌دى ده‌ركه‌ڤن و كه‌سێن بێرێزیێ ل ئاڵاى دكه‌ن ڕاپێچى دادگه‌هان بكه‌ن داببن په‌ند و كه‌سه‌ك دن چاڤ ل وان نه‌كه‌ت. (ناڤێن هه‌ردو جهێن ئاڵا لێ هاتیه بێرێزیكرن ل ده‌ف من دپارستینه)
ڕه‌هه‌ندێن نیشتمانى
محه‌مه‌د چه‌لكى
گه‌شتا نۆچه‌یێن تیڤى و تۆرێن جڤاكى ل ڤێ مه‌مله‌كه‌تا دبێژنێ كوردستان (سه‌یرستان)، هه‌ر ئێك ب قه‌وانه‌كى ڤه‌دگێرت و تشتێ هه‌موو ل سه‌ر دكۆك ئه‌وه: ژ مێشێ دكه‌ن گامێش، ئه‌ڤجا دوروێشۆ وه‌ره پێش! ڤاڤێرتن و گه‌ڵاله بوونا ڕاستیێ ژ سه‌ركه‌فتنا فه‌رهادى ل چیایێ بێستۆنى بساناهیتره! ژ بلى ڤێ گێله‌شۆكیێ، یا ژ هه‌موویێ كۆڤانتر ئه‌وه وه‌سا نۆچه‌ى ب په‌یڤێن كویڤى و نامۆ ژ گوهداران گرمۆڵه دكه‌ن، مرۆڤ گه‌له‌ك جاران وه‌سان هزر دكه‌ت كو ئه‌ڤێن نۆچه‌یان دنڤیسن خوه رۆژه‌كێ ژى وانێن زمانێ كوردى وه‌رنه‌گرتینه و شه‌هره‌زایى د پێكهاته‌یا جڤاكێ كوردستانى دا نینه!
یا ژ هه‌موویێ سه‌یرتر و كۆڤانتر ده‌ما تو ژ میدیاكاره‌كى دپرسى و بێژیێ: مامۆ هوون ڤێ ڕستێ یان ڤێ په‌یڤێ شاش دبێژن و دنڤێسن. بێهنا وان دێ خوه ل سه‌رێ دفنا وان ده‌ت و به‌رسڤ ژى ئه‌ڤه‌یه: خوه تو ژ فلان و فیسارى زاناتر نینى و ئه‌و ژى ب ڤى ڕه‌نگى بكاردئینت! نموونا هه‌رى زه‌ق ئه‌ڤ ڕسته‌یه: ئه‌ز باوه‌رم! ل جهێ بێژت: ئه‌ز باوه‌ر دكه‌م. ڕستا ئێكێ وێ ڕامانێ دده‌ت كو ناڤێ وى باوه‌ره، وه‌كو ئه‌ز مامێ عه‌لۆ مه، لێ یا دن ب ڕامانا: ئه‌و باوه‌ر دكه‌ت! ما شاشى و كولفه‌همیا ژ ڤێ مه‌زنتر هه‌یه!! مامێ عه‌لۆ د ڤان هزران دا بوو هه‌كو هه‌ڤالێ وى مامۆستا ئه‌حمه‌د زه‌رۆى ده‌ست ل ملى دا و گۆتیێ:
• دێ هه‌ڕه ل كلێسا خوه روینه و هندى مرۆڤ ته دبینت تۆ یێ ل به‌رامبه‌ر ته‌له‌فزیۆنێ و گوهداریا نۆچه‌یان دكه‌ى، كا نابێژى ڤێ گوهداریێ چ ل پرێزا ته زێده‌كریه، “هه‌ى مال تڕنێز”!
ـ ئه‌وا ل ته زێده‌كرى یا ل من ژى زێده‌كرى!
• ئه‌رێ دا چ بێژم؟
ـ ته وه‌كو ڤى كابرایێ ل سه‌ر تیڤیێ دئاخفت، كر!
• جامێرى چ گۆت؟
ـ ل نابه‌ینا هه‌ر ڕسته‌كێ دگۆت: ئه‌ز باوه‌رم و دا ڤێرا چت، من هزردكر ناڤێ وى باوه‌ره، پاشى ل بن شاشێ ناڤێ وى نڤێسیبوو … تۆمه‌ز كابراى ب ڕامانا ئه‌ز باوه‌ردكه‌م دگۆت و تو ژى وه‌كى كابراى تۆپز ل كه‌ندال د ئاخڤى و نزانى كا چ دبێژى!
• ژ مێژه من یا گۆتى: تۆ هه‌ڤالجێمكێ …
ـ سه‌یدایێ من ئه‌و فلیاتى بلا بۆته بت و ماشه‌لله مانێ نڤیسه‌رى و ئه‌ز ره‌به‌نێ خودێ ل خواندنگه‌ها ژیانێ فێرى هنده‌ك تشتان بوومه!
• هاته بیرا من!
ـ چ هاته بیرا ته!
• دێ ل ڤان رۆژا كابینا نوى هێته دامه‌زراندن و هه‌موو لایه‌ن ل سه‌ر پارڤه‌كرنا پله و پۆستان پێكهاتنه!
ـ ئه‌ڤه كێ گۆته ته!
• ڤى كه‌نالێ تۆ لێ مێزه‌دكه‌ى!
ـ هههههه … نوكه نۆچه‌یه‌كێ بله‌ز به‌ڵاڤكر و تێدا هاتبوو: كۆمبوونا هه‌ردو مه‌كته‌بسیاسیان ب داوى هات و ل ڤان نێزیكان دوباره دێ كۆمبنه‌ڤه … دبێژن هنده‌ك مژارێن هه‌ستیار هه‌نه و پێدڤى پتر ڤه‌كۆلینێنه!
• پا به‌رده‌ڤكه‌كى ژ وان دگۆت: مژارێن ره‌هه‌ندێن نیشتمانى هه‌ین دیدێن مه گه‌له‌ك د ژێك جودانه!
ـ “كه‌رۆ نه‌مره هه‌تا قیڤار شین دبن!”
• یێ ڕه‌شبین نه‌به!
ـ ئه‌ڤه ئه‌ز هه‌یم هه‌ر ئه‌ڤ حزبه وه‌دبێژن و تۆ ب خودكه‌ى ته ملله‌ته‌ك وه‌كو مه دیتیه كو ل سه‌ر مژارێن ره‌هه‌ندێن نیشتمانى هه‌ین ژ هه‌ڤ جودا و دناكۆك بن! ما مرۆڤ ل سه‌ر مژارێن نیشتمانى ژهه‌ڤ دوور دكه‌ڤن!
• پا ئه‌ڤه مه دیتن!
ـ له‌وا دبێژم: یێن نه‌شێن ل سه‌ر مژارێن نیشتمانى هه‌ڤ بگرن و هه‌ڤ دید بن دێ به‌رده‌وام 16 ئۆكتۆبه‌ر دوباره بن، ژ به‌ر هندێ دێ گه‌له‌ك یا ب زه‌حمه‌ت بت ئه‌ڤ لایه‌نه بشێن د ده‌مه‌ك نێزیك دا كابینا نوو پێكبینن.
نيشاندان
WP Facebook Auto Publish Powered By : XYZScripts.com