دلهین حەمدی

ل بەراهیێ ب پارچە شعرەكا (پیرەمێردێ شاعێر) بابەتێ خۆ دەست پێ دكەم دەما كو دبێژیت:.
عەشرەت هاوارە عەشرەت هاوارە
كەوتوومە ئاراس ئاو بێ بوارە
ڕێم نییە منیش شوێن ئەوان بكەوم
پیرم هەنگاوێك بنێم ئەكەوم
ژناڤچوونا كۆمارا كوردستانێ ل مهابادێ بارزانیێ نەمر و هەڤال و هەڤ بیروباوەرێن وی كو نێزیكی (٥٠٠)كەسان بوون بڕیارا ڕەتكرنا بندەستیێ و داگیركاریێ هەلبژارتن و ئۆمێدا دوبارە ڤەژاندن و خەباتێ د ناخێ گەلێ كورد دا زیندی كرن و دانە دیاركرن كو ئێدی گەلێ كورد ژی هەروەكی گەلانێن دیتر یێن جیهانێ دڤیت ب مافێن خۆ یێن ڕەوا شاد ببن و ژ بۆ ڤێ چەندێ ژی ل (١٨ی خزیرانا ١٩٤٧ێ) پشتی (٥٣) ڕۆژان شەڕ و بڕینا سنوورێ (ئیران، ئیراق، توركیا) یێ و ڕوی ب ڕویبوونا سۆپایێ ڤان هەر سێ دەولەتان و ژناڤبرنا هێرشێن دوژمنان د ڕێڕەوەكێ دویر و درێژ و سەخت دا بارزانیێ نەمر و هەڤالێن وی شیان ل ڕویبارێ ئاراس دەربازببن و بچنە د ناڤ ئاخا ئێكەتیا سۆڤیەت دا ژ بۆ داكوكی كرنێ لسەر ماف و سەروەریێن گەلێ كورد و بدەستڤەئینانا پشتەڤانیێ ژ بۆ كوردان، د چارچۆڤەیێ مانا نەمر (مەلا مستەفایێ بارزانی) ل ئێكەتیا سۆڤیەت كو (١٢) سالان ڤەكێشابوو شیوعیەت گەلەكا بهێز بوو ژبەر ڤێ چەندێ ژی بارزانیێ نەمر پاشگەز نەبوو ل سەر بیروباوەرێن خۆ یێن نەتەوەیی، هەروەسا پاشەڕۆژا گەلێ خۆ دبینی و دزانی كو دڤێت سوودێ ژ شیانان وەربگرن و دەرفەتان ژی ژ دەستنەدەن و بۆ ڤێ چەندێ ژی هەول دا پتریا هەڤالێن خۆ فڕێ كرنە ل بەر خواندنێ و زانستێن سیاسی و ئابووری و مرۆڤایەتی و…هتد. چونكی دزانی كو بنەمایێ هەرە موكم یێ ئاڤاكرنا هەر وەلاتەكێ زانست و زانینە، چوونا بارزانیێ نەمر بۆ ئێكەتیا سۆڤیەتا جاران ژ ئەگەرێ وێ چەندێ بوو كو ئەمریكایێ ب چاڤێن گۆمان ڤە بەرێ خۆ ددا هەلوەستێ بارزانی و هەڤالێن وی و ب یاخیبوویی ل قەلەم ددان و ئەڤە ژی ل سەر زارێ (جۆرج ئاڵن) بالیۆزێ وی وەختی یێ ئەمریكایێ ل تەهران ب ڕۆژنامەڤانان هاتبوو ڕاگەهاندن.
ڤەگەریانا نەمر (مەلا مستەفایێ بارزانی) بۆ ئیراقێ ل (شەشی چڕیا ئێكێ یا سالا ١٩٥٩) ڕویدانەكا گرنگا مێژوویی تۆمار كر و ل سەر ئاستێ بلند ل ئیراقێ و مسرێ پیشوازییەكا گەرم ل بارزانی و هەڤالێن وی هاتەكرن و ئەڤە ژی سەلمێنەرێ وێ چەندێ یە كو بڕیارا نەمری بڕیارەكا ڕاست و درست و نەتەوایەتی بوو د وی وەختی دا، ئەڤجا (٧٨)ەمین سالڤەگەڕا ڤێ داستانا نەتەوایەتی و شەڕەفمەندانە دا سەرێ ڕێز و نەوازشێ بۆ گیانێ پاكێ شەهیدێن ڤێ داستانێ و سەرجەم شەهیدێن ڕێیا ڕزگاریخوازا گەلێ كوردستانێ و سەركاروانێ وان بارزانیێ باب و كاك ئیدریسێ هەمیشە زیندی دچەمینین و سۆز و وەفایان ژ بۆ ڕێ و ڕێبازا وان یا پیرۆز دوپات دكەین.

دلهین حەمدی

سەرۆك (مسعود مستەفا بارزانی) ل بەرنامەیێ ب ناڤودەنگێ (the capitol hill show) دهێتە مێهڤان كرن و د دیدارەكێ دا ژی دگەل كەنالێ (شمس) یێ عەرەبی كو ب هەر سێ زمانێن (عەرەبی، كوردی، ئێنگلیزی) دهاتە پەخشكرن، بەرسڤا ژمارەیەكا پرسیارێن گرێدایی ب مێژوویا خەباتا چەكداری و سیاسی و كارگیری یا نەتەوێ كورد دا، سەرۆك بارزانی ڕادگەهینیت د ماوەیێ (٣٠) سالێن ڕابووری دا پێشكەفتنەكا مەزن ل هەرێما كوردستانێ بدەسڤەهاتیە و د ڤان چەند سالێن دوماهیێ دا ژی زنجیرەیەكا قەیران و كێشەیێن ئێك لدویڤ ئێك و دروستكری كاروانێ پێشكەفتنا هەرێما كوردستانێ سست دكەن، هەروەسا ئاماژێ ب وێ چەندێ ژی دكەت كو پەیوەندیێن كوردان دگەل ئەمریكایێ دباشن و چاڤێ مە ل هندێ یە باشتر بن و ئەمریكایێ ڕۆلەكێ سەرەكی ژی هەبوویە ل دانانا بەرێ بنیاتێ ئەزموونا سەركەفتی یا هەرێما كوردستانێ، هەر د چارچووڤەیێ دیدارێ دا، سەرۆك بارزانی تیشكێ دئێخیتە سەر وێ چەندێ كو د بابەتێن هەستیار و چارەنڤیسساز دا پرس و ڕاوێژ ب كوردان نەهاتیە كرن و مە دڤێت ب دیالۆگ و ڕێكێن ئاشتیانە دگەل نەتەوەیێن دیتر ب مافێن خۆ شادببین.
گرنگترین لێدوانێن سەرۆك بارزانی د ڤێ دیدارێ دا :
● كورد ل پێشییا نەتەوەیێن دیتر ل ڤێ دەڤەرێ ژیاینە و ب درێژاهیا مێژوویێ ژی غەدر ل مە هاتیەكرن.
● پشتەڤانێن هەلوەستێ ئێكگرتی یێ كورداینە ل سووریایێ ژ بۆ مسۆگەركرنا مافێن خۆ یێن نەتەوەیی.
● مە نەڤیایە هیچ كێشەیەك ل گەل وەلاتێ ئیرانێ هەبیت و د نها دا ژی پەیوەندیێن مە دگەل ئیرانێ ئاسایی و دباشن.
● بڕیارێن تڕەمپی وێرەكانە و ل جهێ خۆ دانە و ئەوا ب ئەمریكایێ دهێتەكرن ل جیهانێ د سەرجەم پرسان دا ب هیچ وەلاتەكێ دیتر ناهێتە كرن.
● هیچ وەختەكێ كوردستانێ گرفتا ئایین و مەزهەبی ل گەل هیچ لایەنەكێ نەبوویە و خەلكێ كوردستانێ ژی زۆر یێ ب لێبۆرینە و چاڤێ وان ل تۆڵڤەكرنێ نینە.
● گەلەك جاران بارودۆخ ب نەچاری شەڕ و بەرهنگارییان ب سەر مرۆڤی دا دسەپینیت.
● مە دەرفەتا هندێ نەبوو وەك پێویست مفای ژ ئاخا دەولەمەندا ئیراقێ و كوردستانێ وەربگرین و داهات و سامانێ ئیراقێ بۆ قڕكرن و ژناڤبرنا كوردان دهاتە بكارئینان.
● دەستوور بۆ نوكە ژی یێ گونجایی یە ئەگەر لایەنێن ئیراقی پێگیریێ پێ بكەن.
● كوردان وەك پێدڤی د وارێ سیاسی و بازرگانی دا دەرفەتا ئازادانە پێ نەهاتیەدان.
● ڕاپەڕینا خەلكێ كوردستانێ ل بهارا (١٩٩١)ێ و ڕزگاربوون ژ زۆرداریێ خۆشترین وەختێ ژیانا من بوو.
ل ڤێرێ بۆ مە دیار دبیت كو پەیام و گۆتارێن سەرۆك بارزانی چەند گرنگیا خۆ هەیە، هەم ل ناڤخۆ و هەم ل ئاستێ هەرێمی و نیڤدەولەتی و دەوروبەران ڤە ژی، سەركردە و لایەنێن سیاسی یێن ئیراقی ژی گەلەك ب گرنگی ڤە ل پەیامێن سەرۆك بارزانی دنێڕن و هەرگاڤ ب بنیاتنەر وەسف دكەن، ل دوماهیێ ستافێ كەنالێ (شمس) یێ عەرەبی سوپاسیا سەرۆك بارزانی كرن ژ بۆ ڤێ دەرفەتێ كو دیدارەكا گەلەك سۆدبەخش و پڕ ڕامان دگەل كەنالێ وان ئەنجام دا.

دلهین حەمدی

ئەورۆپا بۆ كوردان هاریكار و پالپشت و پارێزەرا دەسكەفتیانە و ب ڕێز و ستاییش ڤە بەرێ خۆ ددەتە ئەزموونا قەوارەیێ هەرێما كوردستانێ و ڕۆلێ سەرۆك بارزانی بلند دهەلسەنگینن بۆ پاراستنا نەتەوە و ئایین و كەمینەیان، پارتیا دیموكراتا كوردستانێ ب ڕێیا ڕێكخستنێن خۆ كاری ژ بۆ بهێزكرنا پەیوەندیان و ناساندنا دۆزا ڕەوا یا گەلێ كورد و كوردستانێ دكەت، هەروەسا پێداچوون و دوبارە رێكخستنا هەیكەلیەتێ كارێ ڕێكخستنی ل ئەورۆپا دەست پێ كریە د چارچووڤەیێ نووبوونەڤێ و ئەو گوهۆڕینێن د واقعێ كێشوەرێ ئەورۆپایێ دا ڕوی ددەن، هەروەسا پارتیا دیموكراتا كوردستانێ هەرگاڤ د هەول و بزاڤێن بەردەوام دا بوویە كو پەیوەندیێن ئێكەتیا ئەورۆپایێ ب گشتی ل گەل هەرێما كوردستانێ بەر ب پێشڤە ببەت و ئەو كولتوورێ پێكڤەژیانێ و هەڤدو قەبوولكرنێ و دیموكراسیەتێ ل هەرێما كوردستانێ ئەورۆپیان پێ سەرسام بكەت، ژ لایێ خۆڤە ژی ئێكەتیا ئەورۆپایێ ڕۆلێ پارتیا دیموكراتا كوردستانێ بلند دهەلسەنگینیت ژ گشت ڕوییەكێ ڤە، هەروەسا سەرسامیا خۆ دیاردكەت ل بەرامبەری پارتیا دیموكراتا كوردستانێ كو چاوا شیایە د ناڤ دەڤەرەكا پڕ كێشە و ئالۆزی یا مینا ئیراقێ دا پێكڤەژیانا نەتەوە و ئایینان و دیموكراسیەتێ د ناڤا هەرێما خۆ دا بەرجەستە بكەن.
ل (٢٩-٣٠)ی نیسانا ڕابووری كۆنگرەیێ پارتیا گەلانێن ئەورۆپایێ ل باژێڕێ (ڤالنسیا) ل وەلاتێ ئیسپانیایێ دهێتە سازدان و پارتیا دیموكراتا كوردستانێ ژی تاكە حزبا كوردستانی بوو كو ب فەرمی هاتیە ڤەخواندن ژ بۆ پشكداریكرنا كۆنگرەی، پارتیا گەلانێن ئەورۆپایێ ڕێكخراوەكا فڕە حزبی یە و زێدەتر ژ (٨٠) پارتیێن سیاسی ل ئەورۆپایێ تێدا ئەندامن و خۆدانا مەزنترین كوتلەیا پەرلەمانی یە ل پەرلەمانێ ئێكەتیا ئەورۆپایێ و نێزیكا (٢٠٠) ئەندامان ژی هەنە، د چارچووڤەیێ كۆنگرەی دا نوونەرێ مەكتەبا پەیوەندیێن دەرڤە یێ پارتیا دیموكراتا كوردستانێ (دارا باراوی) چاڤ پێكەفتن دگەل چەندین كەسانێن دیارێن د ناڤا پارتیێن سیاسی و ئەندامێن پەرلەمانێ ئێكەتیا ئەورۆپایێ ئەنجامدا و داوی پێشهات و گوهۆرینێن دەڤەرێ ل گەل دا گوتوبێژ كرن و جەخت كر لسەر پەیاما ئاشتیخوازیا گەلێ كوردستانێ و سیاسەتا حەكیمانەیا سەرۆك بارزانی و پارتیا دیموكراتا كوردستانێ بۆ بدەستڤەئینانا ئاشتیێ و سەقامگێریێ و پێكڤەژیانێ بۆ هەمی پێكهاتەیێن ئایینی و نەتەوەیی.
جهێ ئاماژە پێدانێ یە كو پارتیا گەلانێن ئەورۆپایێ (EPP) گرۆپەكێ سیاسی یێ مەزن و كاریگەرە د ناڤا سیاسەتا ئەورۆپایێ دا و نوونەراتیا ئایدۆلوژیەتا ڕاستڕەوان دكەت وەك مەزنترین پارت ل پەرلەمانێ ئەورۆپایێ و ڕۆلەكێ چارەنڤیسساز ژی دگێریت د سیاسەتا ئێكەتیا ئەورۆپایێ دا ژ گشت ڕوییەكێ ڤە و پارتیێن ئەندام تێدا ژ سەركردەیێن سەرەكی یێن سەرانسەری ئەورۆپایێ وەكی حزبا (CDU) یا ئەلمانی و (PO) یا پۆلەندی پێك دهێت و ئەڤە ژی كاریگەریەكا بەرچاڤ دكەنە سەر شێوازێ بڕیاردانێ د ناڤ ئێكەتیا ئەورۆپایێ دا ب شێوەكێ گشتی.

دلهین حـەمـدی

هەروەكی یا دیار هەر سال ئێكی ئەیارێ جەژن و ڕۆژا كرێكاران یا جیهانی یە و بیرۆكەیا ڤێ جەژنێ ڤەدگەڕیتەڤە بۆ (٢١) نیسانا (١٨٥٦) ل وەلاتێ ئوستڕالیایێ و پاشی گەهشتە وەلاتێ ئەمریكا، ئێكەم جار كو (١)ی ئەیارێ ب جەژنا كرێكاران هاتیە نیاسین ل سالا (١٩٨٢)یێ بوو ل باژێڕێ نیۆیۆرك ل ئەمریكایێ و ل وی وەختی كرێكاران ئەڤ جەژنە گێڕا و پشتی هینگی ئەڤ هەلكەفتە ل وەلاتێن جیهانێ ژی بەربەلاڤ بوو و ل وێ ڕۆژێ دا كرێكارێن لێزان و كاڕا و دەست ڕەنگین هاتنە خەلاتكرن و ڕێز لێ گرتن، ئەگەرێ ناساندنا ڤێ ڕۆژێ وەك جەژنا كرێكاران بۆ نەڕازیبوونا كرێكاران ڤەدگەڕیتەڤە ب مەرەما كێمكرنا دەمژمێرێن كاركرنێ بۆ (٨) دەمژمێرێن ڕۆژانە و ل (١)ی ئەیارا (١٨٨٦)ێ كرێكارێن ویلایەتا شیكاگو ل ئەمریكایێ هەر هەمیان بایكۆتا كاری ڕاگەهاندن و ڕژیانە سەر جاددەیان و ژمارەیا وان (٣٥٠ _ ٤٥٠) هزار كرێكاران دهاتنە خەملاندن و پێداگر بوون لسەر داخوازیێن خۆ و درووشمێ (٨ دەمژمێر كاركرن، ٨ دەمژمێر بێهنڤەدان، ٨ دەمژمێر خەو) بلندكربوون و جددییەتا وان ڕۆژ بۆ ڕۆژێ خەلكێ زێدەتر ل دەوروبەرێن خۆ خڕڤەدكرن و د ئەنجام دا پارێزگارێ ویلایەتا شیكاگو دهێتە سەر خەت دگەل خۆپیشاندەران و لێ چ بدەستڤە ناهێت و پاشان پۆلیس دەست ب جموجولان دكەن و هێزێ بكار دئینن بۆ بەڵاڤكرنا خۆنیشادەران و هەر د ماوەیێ ڤێ چەندێ دا ژی بومبەك د ناڤ كۆمەكا پۆلیسان دا دپەقیت و ژمارەكا پۆلیسان دهێنە كۆشتن و پشتی (١١) سالان دهێتە سەلماندن كو پۆلیسان ب خۆ ئەو بومبە دانابوو داكو ببیتە هێجەت و پتر ڕوی ب ڕوی كرێكاران ببن و د ئەنجام دا ب ئاگر و ئاسن و كوشتن و دەستەسەركرنێ بەرسڤا كرێكار و خۆپیشاندەران هاتە دان و ئەڤ كوشتارە ژی ب (هایماركت) هاتە بناڤ كرن و پاشان سەرۆكێ وی وەختی یێ ئەمریكایێ (كرۆفەر گلیفلاند) ژ ترسا هندێ كو ئەڤ كار و كارڤەدانە ببنە ئەگەرێ شەڕەكێ ناڤخۆیی یێ درێژخایەن دهێتە سەر خەت و دان ب مافێن كرێكاران دادنیت و داخوازیێن وان جێبەجێ دكەت و ب هەڤكاری دگەل كۆنگرێسێ ئەمریكایێ ڕۆژا (١)ی ئەیارێ ب ڕۆژ و جەژنا كرێكاران هاتە دەستنیشان كرن و ڤێ چەندێ ژی بال ب سەر جیهانێ هەمیێ دا كێشا و هەمی وەلاتێن جیهانێ ئەڤ ڕۆژە وەك جەژنا كرێكاران پەسەندكرن.

دلهین حەمدی

بێگومان ئەڤە ڕویدانەكا گرنگ بوو د مێژوویا گەلێ كورد دا ل هەرێما كوردستانێ پشتی وان نەهامەتی و ئەنفالكرن و قڕكرنێن ب سەرێ گەلێ كورد هاتین لسەر دەستێ ڕژێما دیكتاتۆرا بەعسی ل بن سەركردایەتی و سەرۆكاتیا (سەدام حسێن)، ل (١٩) نیسانا (١٩٩١) بڕیارنامەیا (٦٨٨) ژ لایێ ئەمریكا و فڕەنسایێ ڤە وەك چەترەك بۆ پاراستنا باشورێ كوردستانێ هاتە جێبەجێكرن كو ب هێلا (٣٦) یا ناڤچەیا دژی فڕینێ دهێتە نیاسین و گرنگیا ڤێ بڕیارنامێ چەند تەوەرەكان ب خۆ ڤە دگریت ژ وان:.
١⁄خەلكێ هەرێما كوردستانێ ژ زۆلم و زۆرداریا بەعسیان پاراست.
٢⁄دۆزا كوردی ژ پرسەكا ناڤچەیی ڤەگوهاست بۆ پرسەكا نیڤدەولەتی.
٣⁄جڤاتا ئاساییشا نیڤدەولەتی ب فەرمی ئاماژە ب تاوانێن ڕژێما بەعسی كرن ل دژی هەڤوەلاتیێن باشورێ كوردستانێ كو هەتا ڤێ ڕژێمێ چەكێ كۆمەلكۆژ ژی بكارئینایە ل دژی خەلكێ باشورێ كوردستانێ و ئەڤە ژی بوو ئەگەرێ هندێ كو ل بهارا سالا (٢٠٠٣) یێ ڕژێما سەدامی بهێتە هەڕفاندن.
پەیوەندیێن د ناڤبەرا وەلاتێ فڕەنسایێ و هەرێما كوردستانێ ل سەردەمێ سەرۆكاتیا (فرانسوا میتران) د ماوێ سالانێن (١٩٨١-١٩٩٥)، زۆر بهێز بوون و ل وی وەختی (دانیال میتران)ا هەڤژینا سەرۆكێ فڕەنسایێ و خانما ئێكێ یا فڕەنسایێ ڕۆلەكێ سەرەكی و بەرچاڤ هەبوو د پشتەڤانیكرنا كوردان و بدەستڤەئینانا ڤێ بڕیارێ كو بوویە ئەگەرێ پاراستنا خەلك و ئاخا هەرێما كوردستانێ، ل سالا (١٩٨٢) یێ خانما ئێكێ یا فڕەنسایێ ڕۆلەكێ كارا هەبوو د پێكئینانا (ئینستیتیۆتا كوردی) ل پاریسێ و ل سالا (١٩٨٢)یێ یاسایەك ڕێخست و ڕێ ب (١٠٠٠) پەنابەرێن كورد دا كو ژ لایێ فڕەنسایێ و ب ڕەزامەندیا سەرۆك و حوكمەتا وی وەلاتی ڤە بهێنە وەرگرتن، هەروەسا ل سالا (١٩٩١) سەرەدانا هەرێما كوردستانێ دكەت و ژ نێزیك ڤە هایداری ڕەوشا ئاوارەیان دبیت لسەر سنوورێ د ناڤبەرا ئیران و ئیراقێ دا و دوبارە ل تەمموزا سالا (١٩٩٢) یێ بۆ چاڤدێریكرنا دامەزراندنا پەڕلەمانێ هەرێما كوردستانێ سەردانا هەولێرا پایتەخت دكەت و هەرگاڤ د پەیامێن خۆ دا ژی دایە دیاركرن كو (هەولا مە بۆ هندێ یە دەنگێ كوردێن زۆلم لێ كری و جینۆسایدكری بگەهیتە جیهانێ)، د ئەنجامێ ڤان هەمی هەولێن پڕ ژ هەست و سۆزێن مرۆڤایەتی ژ لایێ سەرۆك و خانما ئێكێ یا فڕەنسایێ ڤە هەرێما كوردستانێ دهێتە دامەزراندن و ژ لایێ سەقامگیریێ و پێشكەفتنێ ڤە ژی رۆژ بۆ رۆژێ وەرارێ ب خۆ ڤە دبینیت و هەتاكو بوویە جهێ باوەریێ ژ لایێ جیهانا ژ دەرڤە و ولاتێن گرنگێن هەرێمی و نیڤدەولەتی ژی و د ئەنجام دا كونسولخانە و نوونەراتیێن خۆ لێ ڤەدكەن و د گشت بواران دا ژی پەیوەندیێن خۆ دگەل هەرێما كوردستانێ پێشڤە دبەن.
ل دوماهیێ نابیت ڕۆلێ سەركردایەتیا وەلاتێ فڕەنسایێ یا وی وەختی و هەروەسا ڕۆلێ (دانیال میتران)ێ د دیرۆكا گەلێ كورد دا بهێنە ژبیركرن، هەروەسا د سیستەمێ خواندن و پەروەردەیێ دا ژی دڤێت ڕۆلێ ڤان مرۆڤدۆستان بهێتە بەرجەستەكرن داكو نەوەیێ نوكە و داهاتیێ هەرێما كوردستانێ مفای ژێ ببینن و ڕۆل و گرنگی و دۆستایەتیا وان ژبیر نەكەن.

دلهین حەمدی

ب ڤی دەقێ ئاخفتنا نەمر (عەبدولرەحمان قاسملۆ) سەركردەیێ دیارێ كورد و شەهیدێ دەستێ ڕەشێ تیرۆرا كۆمارا نەئیسلامیا ئیرانێ دەست ب بابەتێ خۆ دكەم دەما كو دبێژیت (د ڕێیا ئازادیێ دا نەتەوەیەكێ زیندی دڤێت قوربانیێ بدەت بەس پا نەتەوەیەكێ بڤێت زیندی بمینیت و نیشا بدەت كو یێ سەربەخۆیە و د ناڤ گەلانێن زیندی دا جهێ خۆ هەیە دڤێت بهایێ ئازادیا خۆ بدەت و ئازادیێ ژی د مێژوویێ دا یا سەلماندی كو بهایێ وێ یێ گرانە و بێ بها ژی ناهێتە وەرگرتن).
ب شێوەیەكێ گشتی نوكە جیهان د قۆناغەكا دی دا دەرباز دبیت، نەتەوە و پێكهاتەیێن جودا لسەر ئاستێ جیهانێ بۆ بدەستڤەئینانا ماف و ئازادیێن خۆ ل جهێ كو پەنایێ بۆ داگیركاریێ و هێزێ ببەن هەولا خەباتا مەدەنی و بێی توندوتیژی ددەن، پێخەمەت گەهشتن ب ئارمانجان و ڤی جۆرێ خەباتا مەدەنی ژی پشتی ساڵێن نۆتان ل سەدەیێ ڕابۆری و ژناڤچوونا ئێكەتیا سۆڤیەتا جاران و زالبوونا چەمكێ دیموكراسیەتێ لسەر وەلاتێن جیهانێ ڕەنگڤەدانەكا زۆر هەبوو و د نوكە دا جیهان ب شێوەكێ گشتی وەسا هزر دكەن كو خەباتا مەدەنی بەدیلەكێ نوی یێ شەڕ و توندوتیژیێ یە بۆ گەهشتن ب ماف و ئازادیان یان ژی دشێین بێژین خەباتا مەدەنی شێوازەكێ دیموكراسیانەیە بۆ مەبەستا دەربڕینا نەڕازیبوونێ و هەولدان بۆ گوڕینكاریێ د جڤاكێ دا ب پشتبەستن ب هێزا جەماوەری و ب شێوەیەكێ نەتوندوتیژانە ئەڤجا چ ب ڕێیا خۆنیشاندان و ڕێپیڤانان بیت یان ب ڕێیا بایكوت و مانگرتنان یان هەر ئامرازەكێ نەتوندوتیژانە كو نەبیتە هەڕەشە و مەترسی بۆ سەر ئاساییشا وەلاتی، گەلەك وەلات شیاینە ب ڕێیا خەباتا مەدەنی ژ سیستەمەكێ دەسهەلاتخوازی و دیكتاتۆری و نەدیموكراتی ڤە بەر ب سیستەمەكێ دیموكراتی ڤە بچن، بۆ نموونە ئۆرۆگوای ل سالا (١٩٨٤) و كۆلۆمبیا و ڤەنزوێلا ل سالا (١٩٨٥)، یان ئەو خەباتا كو (ماهاتما غاندی) بۆ هندستانێ و (نێلسون ماندێلا) بۆ ئەفریقیا باشۆر كری لێ هەتا نوكە ژی گەلەك نەتەوە بەردەوامن ل خەباتكرنێ ژ بۆ گەهشتن ب ماف و ئازادیێن خۆ و نموونەیا هەرە پێش چاڤ ژی نەتەوەیێ كوردن ل ڕۆژهەلاتا ناڤەڕاست كو نەتەوەیەكێ زۆر ئاشتیخواز و مرۆڤدوستن ل دەڤەرێ و بسەر چار وەلاتێن خۆسەپێن و ڕژێمێن نەدادپەروەرانە دا هاتینە دابەشكرن و بەری ژناڤچوونا ئێكەتیا سۆڤیەتا جاران ب ڕێیا شۆڕەشێن ئێك لدویڤ ئێك یێن چەكداری و خەباتا بێی ڕاوەستان داخوازا مافێن خۆ كرینە لێ پشتی سالێن نۆتان و ژناڤچوونا ئێكەتیا سۆڤیەتا جاران خەباتا خۆ یا چەكداری دگوهۆڕن بۆ خەباتا مەدەنی و دیموكراسی و دیالۆگێ ل گەل ڤان وەلاتێن خۆسەپێن و داگیركەر لێ شۆفینیەتا ڤان وەلاتان ڕێكێ نادەت كو ل نەتەوێ كورد بگەهن و دان پێ دانانێ ب ماف و ئازادیێن وان یێن سروشتی و خۆدایی بكەن كو درێژەدانە ب ژیانێ د جوگرافییەكا دیاركری دا وەك هەر نەتەوەیەكا ڤێ جیهانێ.
هەروەكی (د. عەبدولرەحمان قاسملۆ)، ئاماژە پێ كری كو ئازادیێ بهایێ وێ یێ گرانە و بێ بها ژی ناهێتە وەرگرتن كەواتە دڤێت نەتەوێ كورد ب شێوەكێ گشتێ دەست د ناڤ دەستێ ئێك دا بكەن و ئێكگرتنا خۆ دیاربكەن ب ڕێیا گرێدانا كونگرەیەكێ نەتەوەیی یێ ئێكگرتی و سەرانسەری و ب شێوازێن دیموكراسیانە هەولێن خۆ چڕتر لێ بكەن و پەیام و ئێك گۆتاری و زەرەرمەندیا خۆ بگەهیننە جیهانا ژ دەرڤە ب تایبەتی ئەنجومەنێ ئاساییشا نیڤدەولەتی و بارەگایێ نەتەوێن ئێكگرتی كو نوینەرێن سەرجەم نەتەوە و وەلاتێن جیهانێ تێدانە كو ئایا یا ڕەوایە نەتەوەیەكێ چەند ملیۆن كەسی و خودان جوگرافییەكا پان و بەرین ماف و ئازادیێن وان بهێنە بن پێ كرن كو ئەڤە زێدەتر ژ سەد سالانە.

دلهین حەمدی

ل ڕۆژا پێنجشەمبی ڕێكەفتی (٢٧ ⁄ ٢ ⁄ ٢٠٢٥) شاندێ ئیمڕالی یێ دەم پارتیێ پشتی كۆمبوون ل گەل عەبدولا ئۆجەلانێ ڕێبەرێ زیندان كریێ پەكەكێ ئەنجامدای د پرێس كۆنفڕانسەكێ ڕۆژنامەڤانی دا، پەیاما ئۆجەلانی ب هەردو زمانێن كوردی و توركی دخوینن و بەلاڤ دكەن، د پەیامێ دا ئۆجەلان داخوازا چەك دانان و خۆهەلوەشاندنێ ژ پەكەكێ دكەت، هەروەسا داخوازا گرێدانا كۆنگرەیەكێ ژی ژ پەكەكێ دكەت و دبێژیت پەكەكە ل دەمەكێ هاتە پێكئینان كو ڕێیا دیموكراسیێ هاتبوو گرتن، هەروەسا پێدڤیە زمانێ ئاشتی و دیموكراسیێ بهێتە پێشخستن، ئۆجەلانی ڕاگەهاند ژی كو دی بەرپرسایەتیا ڤێ بڕیارێ ب ستۆیێ خۆ ڤە گرم و دێ گەرەنتیا گوتوبێژێن ئاشتیێ ژی كەم.
د بنەڕەت دا ئەڤ پڕۆسێسە ژ ئەنجامێ كێشە و ئالۆزیێن ڤێ دوماهیێ ل ڕۆژهەلاتا ناڤەڕاست و شەڕێ ئیسڕائیلێ دگەل بزاڤا حەماس و گڕۆپێن تێكدەرێن مینا حزبولا یا لوبنانی پەیدابوو و ئیسڕائیلێ ژی پلان كریە كو ڕێڕەوەكێ ئەمنی ل دەڤەرێ دروست بكەت و كوردان تێدا بالادەست بكەت داكو دەستێ هاریكاریا ئیرانێ بۆ حزبولا یا لوبنانی، هەروەسا دەستێ هاریكاریا توركیایێ بۆ حەماسێ بهێتە بڕین، هەر ژبەر ڤێ چەندێ (دەولەت باهچەلی) یێ سەرۆكێ مەهەپێ و هەڤپەیمانێ سەرەكی یێ ئەردوغانی ئەڤ پڕۆسێسا ئاشتیێ ئینا د گۆڕەپانێ دا داكو وەلاتێ ئیسڕائیلێ ژ خۆ ڕازی بكەن كو توركیا گڕنگیێ ب كوردان ددەت و داخواز ژ (عەبدولا ئۆجەلان) ڕێبەرێ زیندان كریێ پەكەكێ كر بهێتە پەڕلەمانی و گۆتارا خۆ پێشكێش بكەت لێ ژ ڤێ چەندێ پاشگەز بوون و داخواز ژ شاندێ دەم پارتیێ كرن كو بچنە ئیمڕالیێ و پەیاما ئۆجەلانی دگەل خۆ بینن و ب ئۆجەلانی ڕابگەهینن كو دڤێت پەكەكە دەست ژ چەكان بەردەت و خۆ بهەلوەشینن داكو پڕوسێسا ئاشتیێ ب سەركەفتیانە بڕێڤە بچیت، ل ڤێرێ ڕێبەرێ پەكەكێ هەمان پەیامێ ئاراستەی حزبا خۆ دكەت و داخوازا چەك دانانێ و خۆهەلوەشاندنێ و سازدانا كونگرەی ژ پەكەكێ دكەت، یا جهێ سەرنجێ ل ڤێرێ ئەوە كو د ماوێ پڕوسێسا ئاشتیێ دا حوكمەتا توركیایێ هەر قەیۆم لسەر باژێرڤانیێن كوردان دسەپاندن و ئوپەراسیۆن و بومبەبارانێن ل دژی پەكەكێ ژی هەر د بەردەوام بوون و هەتا پشتی پەیاما ئۆجەلانی ژی ئۆپەراسیۆن ل دژی پەكەكێ د بەردەوام بوون ل چیایێ مەتینی، هەر ژ بەر ڤێ چەندێ ب هزرا من ئەڤ پێنگاڤا دەولەتا توركیایێ جهێ گومانێ یە و باوەر ناكەم كو پرسا كوردی چارەسەر بكەن، چونكی وەلاتێ توركیایێ هەر د كەڤن دا هەتا نوكە یا بەرنیاسە ب پیلان و پیلانگێڕی و كۆمەلكۆژی و كۆدەتایان ب تایبەتی ل دژی گەلێ كورد.
ل ڤێرێ سەرۆك (مسعود بارزانی) پشتەڤانیا خۆ ژ بۆ ڤێ پڕۆسێسا ئاشتیێ دوپات دكەت و هیڤی خواست كو پەیاما ئۆجەلانی بگەهیتە ئەنجامەكێ كو د بەرژەوەندیا گشت لایەكێ دا بیت، هەروەسا (نێچیرڤان بارزانی) سەرۆكێ هەرێما كوردستانێ دبێژیت هیڤیدارین پەكەكە پابەندی پەیاما ئۆجەلانی ببیت و جێبەجێ بكەت، ژ لایێ خۆڤە (سالح موسلم) ئەندامێ دەستەیا سەرۆكاتیا پارتیا یەكێتیا دیموكرات (پەیەدێ) دبێژیت ئەم ئامادەینە گوتوبێژان دگەل توركیایێ بكەین پێخەمەت ئاشتیێ و پشتەڤانیا پەیاما ئۆجەلانی ژی دكەم و هەر وەختێ كو ئەگەرێن چەك هەلگرتنێ نەمان چەك ژی د گۆڕەپانێ دا نامینن، (مەزلوم عەبدی) فەرماندارێ گشتی یێ هەسەدێ ژی دبێژیت پەیاما ئۆجەلانی یا ئەرێنی یە و چەك دانان بۆ پەكەكێ یە نەك بۆ مە.

دلهین حەمدی

پشتی ژناڤچوونا ڕژێما سەدام حسێنی ل بهارا سالا ٢٠٠٣یێ كورد بوونە ستوینا سەرەكی یا دامەزراندنا دەولەت و حوكمەتا نوی یا ئیراقێ و هەتا د وارێ نڤیسینا دەستوورێ هەردەمی یێ ئیراقێ دا ژی ڕۆلەكێ بەرچاڤ و كارێگەر گێڕایە سەرەڕای لێك نێزیككرنا لایەنێن سیاسی یێن ئیراقێ و خڕڤەكرنا وان ل سەر ئێك مێزا دانوستاندنێ، پشتی بۆرینا (١١) سالان حوكمەتا ئیراقێ پێگەهێ خۆ موكم دكەت و ئێدی هەولا دژایەتیكرنا كوردان ددەن و ل هاڤینا سالا (٢٠١٤) كو وی وەختی (نووری مالكی) سەرۆكوەزیر و فەرماندێ گشتی یێ هێزێن چەكدارێن ئیراقێ بوو ب بڕیارەكێ بودجە و مووچەیێ هەرێما كوردستانێ دبڕیت و سەرەڕای ڤێ چەندێ ژی هەر ل سەردەمێ مالكی دا ڤالاهیا ئەمنی د ناڤ ڕێزێن سوپایێ ئیراقێ دا پەیدا دبیت و د ئەنجام دا ئیراق دكەڤیتە بەر هێرش و پێلەكا دژوار یا تیرۆرستێن داعشێ و هەتا چەند باژێڕێن ئیراقێ ژی داگیردكەن ژ وان باژێڕێ مووسل كو گرنگییەكا ئێكجا زۆر بۆ ئیراقێ ب گشتی هەیە و ژ لایێ هەرێما كوردستانێ ڤە ژی كورد دكەڤنە بەر شەڕەكێ بێ ئەمان ل گەل ڤێ ڕێكخراوا تیرۆرستی كو شەش سالان ڤەكێشا و د ئەنجام دا چەند هزار شەهید و بریندار و پەككەفتی هاتنە تۆماركرن و د گەرمە گەرما ڤی شەڕی دا ژی، هەر حوكمەتا ئیراقێ پشت ل كوردان دكر و ڕێ نەددا كو هاریكاریێن سەربازی یێن نیڤدەولەتی ب دروستی بگەهنە دەستێ هێزێن پێشمەرگەی، د سەرەدەریكرنا نوكە یا حوكمەتا هەرێما كوردستانێ دگەل حوكمەتا ب ناڤ فیدڕال یا بەغدا پشتی كو حوكمەتا هەرێمێ دۆسیەیا نەفتێ و داهاتێ ناڤخۆ ژی ڕادەستی حوكمەتا ناڤەند كری ب مەرجێ دەستەبەركرنا مووچەیێ فەرمانبەران و خەلكێ هەرێما كوردستانێ لێ هەم جار حوكمەتا ناڤەندی یا بەغدا كێشەیان بۆ مووچەیێ فەرمانبەرێن هەرێما كوردستانێ دروست دكەت یان هەر نافڕێ كەت.
ئەڤا من دایە دیاركرن وێ چەندێ دگەهینیت كو ئیراق ب هەڤپشكیا كوردان یا ڕازی نینە، بەلكی دڤێن مەركەزیەتێ ل هەرێما كوردستانێ بچەسپینن و ناڤێ هەرێما كورستانێ نەهێلن، ژ بەر ڤێ چەندێ ژی ڤیابا كوردان مفا ژ رویدانێن ساڵا (٢٠٠٣)یێ و هەڕفینا ڕژێما سەددامی وەرگرتبان پێخەمەت دروستكرن و ڕاگەهاندنا دەولەتا كوردستانێ، چونكی ئیراق هەر د كەڤن دا یا نوقوم بوویە د سیستەمێ تائیفەگەریێ و عەشیرەتگەریێ د ناڤبەرا شیعە و سوننەیان دا لێ هەتا نوكە ژی كورد هەر خەونا ب هەڤپشكیا ڕاستەقینە ڤە دگەل بەغدا دبینن، د وارێ ڕوی ب ڕوی بوونا تیرۆرێ دا ژی هەتا نوكە حوكمەتا ئیراقێ ئاماژە ب ڕۆلێ پێشمەرگەی و هێزێن ئەمنی یێن هەرێما كوردستانێ نەكریە و سەركەفتنا ل سەر داعشێ ژی ب دەسكەفتێ هێزێن ئەمنی یێن ئیراقێ زانییە نەك هێزێن پێشمەرگەی و نموونە ژی لسەر ڤێ چەندێ ل (١٥) ئادارێ دۆنالد تڕەمپێ سەرۆكێ ئەمریكایێ ڕادگەهینیت كو ب هەڤكاری دگەل هێزێن ئەمنی یێن ئیراقێ و هەرێما كوردستانێ ئەم شیاین مەزنترین ئەمیرێ داعشێ یێ بەرنیاس ب (ئەبۆ خەدیجە) ل ئیراق و سووریایێ ژناڤببەین لێ سەرۆكوەزیرێن ئیراقێ بێی كو ئاماژێ ب ڕۆلێ هێزێن ئەمنی یێن هەرێما كوردستانێ بكەت ڤێ ئوپەراسیۆنێ ب مولكێ هێزێن ئەمنی یێن ئیراقێ دزانیت ب هەڤكاریا هێزێن هەەڤپەیمانان و ئەڤە ژی ڕاگەهاندنا ڕەتكرنا هەڤپشكیێ یە.

دلهین حەمدی

ئەگەر ئەم لسەر ناڤەڕۆكا بابەتی ڕابوەستین دێ بینین كو هەرجار ملیشیاتان ب مۆشەك و درۆنان هەولێرا پایتەخت دكرنە ئارمانج، لێ نها سۆدێ ژ بارودۆخێن ناڤخۆیی یێن هەرێما كوردستانێ دبینن و ب ڕێیا گرۆپێن تێكدەر دچنە د ناڤ خڕڤەبوون و خۆنیشادانێن خەلكێ هەرێما كوردستانێ دا هەروەكی بەری چەند ڕۆژەكا ل بن دریشمێ مامۆستایێن نەڕازی ئەڤ گرۆپێن تێكدەر دچنە د ناڤ ڕێزێن مامۆستایێن نەڕازی و گرەڤكرتی ل باژێڕێ سلێمانیێ و هەولدان خۆنیشادان و نەڕازیبوونێن خۆ وەك مامۆستایێن نەڕازی و گرەڤگرتی بیننە هەولێرا پایتەخت ژ بۆ مەرەمێن خۆ یێن تیكدەرانە، ل ڤێرێ هێزێن ئاساییشا ناڤخۆ یا هەرێما كوردستانێ ژ هەژی ڕێزگرتن و سۆپاسییەكا بێ پایانن، هەرچەندە خۆنیشادەران ب بەرا هێرشی وان كرن و چەند بریندارەك ژی هەبوون، لێ ب هێمنانە و ڕەوشت بلندی چوونە د ناڤ مامۆستایێن نەڕازی یێن خۆنیشادەر و ب لێك تێگەهشتنێ جارەكا دی ڤەگەڕاندنەڤە و یا پتر جهێ سەرنجڕاكێشانێ ئەفسەرەكێ هێزێن ئاساییشێ وەك كارەكێ مرۆڤایەتی ئاڤا ڤەخوارنێ لسەر مامۆستایێن نەڕازی دابەش دكر.
ل ڤێرێ وەزارەتا ناڤخۆ یا هەرێما كوردستانێ ڕاگەهاندنەكێ لسەر ڤێ ڕەوشێ بەلاڤ دكەت و ددەنە ڕاگەهاندن كو ئەڤە چەند ڕۆژەكن ل سنوورێ سلێمانیێ خڕڤەبوونا ژمارەیەكا فەرمانبەران دهێتە دیتن و ژ لایێ مە ڤە ژی وەك حوكمەتا هەرێما كوردستانێ ماف و داخوازیێن فەرمانبەران و گشت چین و تۆێژێن هەرێما كوردستانێ خالا ئێكێ یا كارنامەیا كارێ حوكمەتا هەرێما كوردستانێ بوویە و ژ بەر ڤێ چەندێ ژی ب بەردەوامی ل گەل حكومەتا فیدڕال د دانوستاندنان دا بووینە و تا ڕادەیەكێ باش ژی ڤان دانوستاندنان پێشڤەچوون ب خۆڤە دیتینە، لێ ئەوا جهێ سەرنجێ لدەف مە ئەوە كو كۆمەكا كەس و لایەنێن دەرەكی و ناڤخۆیی ل ئیراقێ و هندەك گرۆپێن ڤەدەر ل یاسایێ مینا پەكەكێ دڤێن ڤان خۆنیشادانان بۆ مەرەم و مەبەستێن خۆ یێن گۆمانكری بكاربینن و مفای ژ ڤێ دەرفەتێ وەربگرن بۆ تێكدانا ئێمناهیا هەرێما كوردستانێ و ئەم وەك وەزارەتا ناڤخۆ یا هەرێما كوردستانێ ب هەمی شیانێن خۆ دێ ڕێگریێ ل ڤان جۆرە هەوڵان كەین.
هەر لسەر ڤێ چەندێ ل باژێڕێ سلێمانیێ لایەنێن تێكدەر دەهان پاسێن پڕ ژ خەلكێ عەرەب ئامادەكربوون داكو بەشداری خڕڤەبوونێ و خۆنیشادانێ بكەن چونكی د ڕاستیێ دا نەدشیان خەلكی خڕڤەكەن و مەرەم ب ڤێ چەندێ تێكدانا بارێ ئێمناهیا هەولێرا پایتەخت بوو، ژ لایێ خۆ ڤە (ناسح عەبدولرەحمان)، نڤیسەرێ بەرنیاسێ حەلەبچەیی نامەیەكێ ئاڕاستەی خەلكێ هەولێرا پایتەخت دكەت و دبێژیت (من خۆ هاڤێتە بەر پێیێن هەوە وەكی مە نەكەن، مە خەلەتی كر و هوین نەكەن، مە ل خۆ تێكدا و هوین ل خۆ تێكنەدەن).

دلهین حەمدی

ئێك ژ بنەمایێن هەرە ب هێز یێن ئاڤاكرنا هەر كیان و قەوارەیەكێ نەتەوەیی ئێكدەنگی و ئیرادەیەكا بهێزن كو دبنە ئەگەرێن رێكخستنا هزر و بیرێن هەر تاكە كەسەكێ ژ بۆ خزمەتكرن و گەهشتن ب ئارمانجان، ئەگەر ئەم نموونەیەكێ ژی ل سەر ڤێ چەندێ وەربگرین دێ بەحسێ جوهیێن ڕۆژهەلاتا ناڤەڕاست ب گشتی كەین كو ب سەر وەلاتێن ڕۆژهەلاتا ناڤەڕاست دابەش ببوون و ل سەردەمێ شەڕێ جیهانیێ دوویێ ژی تووشی قڕكرنەكا مەزن ببوون ل سەر دەستێ سۆپایێ نازییان، ئێدی ڤێ چەندێ هەستێ وان یێ نەتەوایەتی و مرۆڤایەتی ڤەلڤاند و جوهیێن ڕۆژهەلاتا ناڤەڕاست ب گشتی و ل هەر وەلاتەكێ هەولدان و ل هەڤدوو خڕڤەبوون و ل دوماهیێ گەهشتنە ڕێكەفتنەكێ و بڕیار دان كو ب سەروەت و سامانێ خۆ قەوارەیەكێ بۆ ئاكنجیبوونێ و پەروەردەكرنا نەوەیێ خۆ یێ داهاتی بكڕن و دابمەزرینن و ل دوماهیێ پلانا وان سەرگرت و قەوارەیێ ئیسڕائیلا نوكە ژ عەرەبان كڕین و لێ ئاكنجی بوون و بوونە خۆدان وەلات و سەروەری، د بنەڕەت دا ژی كۆمەلگەها جوهییان یا پڕە ژ زانا و بلیمەتان و پشتی كو دەولەت دامەزراندین و قەوارەیێ خۆ یێ سەربەخۆ ڕاگەهاندین بوونە جهێ سەرنجڕاكێشانا وەلاتێ ئەمریكایێ و وەلاتێن ڕۆژئاڤایی، د وارێ تەكنەلوژیا سەردەم و سیستەمێ بڕێڤەبرنێ ژی وەلاتێ ئەمریكایێ سۆدێ ژ فان زانایێن جوهی وەردگریت و هەر ژ بەر ڤێ چەندێ ژی گرنگییەكا ئێكجار زۆر ب دەولەتا ئیسڕائیلێ و كۆمەلگەها جوهییان ددەن .ئەگەر ئەم سەرنجێ بێخینە سەر نەتەوێ كورد ژی دێ بینین هەر ل سەردەمێ دابەشبوونێ هەتاكو نوكە د وارێ خۆڕێكخستن و ئێكدەنگیێ دا هیچ جۆرە وەرارەك ب خۆ ڤە نەدیتیە كو بشێن دووبارە سەروەری و شكۆمەندیا بەری سەد سالان بدەستخۆڤە بینن بەلكی پتر پەرتەوازەیی و ژێك ڤەقەتیان لسەر جڤاكا كوردی یا زالە و نموونەیەكا هەرە سەرنجڕاكێش ژی لسەر ڤێ چەندێ ئەوبوو كو بەری ب دوماهی هاتنا سالا (٢٠١٣) ڤیابا كۆنگرەیێ نەتەوا كورد ب بەرهەڤبوونا (٧٢) حزب و (١١٤) ڕێكخراوان ل هەر چار پارچێن كوردستانێ هاتبا گرێدان لێ ژبەر كێشە و گرفتێن كەڵەكەبوویی هێز و لایەنێن كوردستانی نەشیان ڤی كۆنگرەی گرێ بدەن، ئەگەر ئەڤ كۆنگرە هاتبا گرێدان نەتەوا كورد هەم لسەر ئاستێ ناڤخۆ هەم لسەر ئاستێ هەرێمی و نیڤدەولەتی دا پێشكەفتنەكا ئێكجار زۆر ب خۆ ڤە بینن، ژ بەر ڤێ پەرتەوازەیا نەتەوا كورد ل هەر چار پارچێن كوردستانێ دەسهەلاتێن ناڤەندی یێن وان دەولەتا زال بووینە بسەر ئیرادەیا گەلێ كورد و كارتێكرن ژی ل بارێ ژین و ژیان و ئابۆر و خۆبڕێڤەبرنا كوردان ژی كریە.

ب ڤێ پارچە شعرا پیرەمێردێ شاعێر دوماهیێ ب بابەتێ خۆ دئینم دەما كو دبێژیت:.
بە چوڕە چوڕە ئەدرێ مەعاشمان
هێشتا هەر نەزان ئەیگێڕێ ئاشمان
شەرتی ئەوەلمان ڕێكی ناوخۆیە
ڕێك نەبین نابین بە هیچ درۆیە