ئامێدیێ، مەحموود نهێلی:

ژ ئەنجامێ كەفتنا درۆنەكا مینرێژكری ل نێزیك سەیرانیان ل بانیا چەلكێ ل ناوچەدارییا دێرەلۆكێ‌، كەسەك برینداربوو.
مەسعود تاهر، هاریكارێ رێڤەبەرێ ساخلەمیا ئامێدیێ بۆ ئەڤرۆ دیار كر، كەسەكێ بریندار گەهاندە نەخۆشخانا ئامێدیێ، كو ژ ئەنجامێ كەفتنا درۆنەكێ ل بانیا چەلكێ ل دێرەلۆكێ‌ بریندارببوو و گۆت: «پشتی مە چارەسەریێن دەسپێكی بۆ كرین بۆ نەخۆشخانا تەنگاڤیان ل دهوكێ هاتە هنارتن».
ل دووڤ ئاخفتنا وان كەسێن نێزیك جهێ روودانێ درۆن ژلایێ چیایێ‌ مەتینا ڤە هاتیە ئاراستەكرن و ناهێتە زانین كا یا پەكەكێ بوویە یان ژی یا لەشكرێ توركییا، لێ بێ كو تەقە لێ بهێتە كرن كەفتیە خوارێ و ئەڤ روودانە ژێ‌ دروست بوویە.
هەر ژ ئەنجامێ تەقینا ڤێ درۆنێ زیان ب چەندین ترۆمێلێن سەیرانیا گەهشتیە ژ وانا ژی ترۆمبێلا هونەرمەندێ كوچك و دیوانا تاها هێتووتی.

هەولێر، قائید میرۆ:

ئەندامەكێ ژوورا بازرگانی و پیشەسازیا هەولێرێ دیاركر، ژوورا وان پڕۆژەیەك بەرهەڤكریە و تێدا پێشنیاركریە تڕۆمبێلێن ب كارەبێ كار دكەن بهێنە ب كارئینان ب مەرەما پاراستنا ژینگەها هەرێما كوردستانێ و دبێژیت: ژبلی كو دۆستێن ژینگەهێ نە كاریگەری ل سەر ئابوورێ‌ وەلاتیان ژی هەیە.
رەشید مستەفا ئەردێلی، ئەندامێ ژوورا بازرگانی و پیشەسازیا هەولێرێ بۆ رۆژناما ئەڤرۆ دیاركر، ب مەرەما پاقژ راگرتنا ژینگەها هەرێما كوردستانێ و پاراستنا ئابوورێ وەلاتیان، ژوورا بازرگانی و پیشەسازی پڕۆژەیەك بەرهەڤكریە و پێشكەشی سەرۆكایەتیا جڤاتا وەزیران هاتیە كرن و گۆت: «مە داخوازكریە ترۆمبێلێن كارەبایی بهێنە بكارئینان، 15 بازرگان ژی هاتینە راسپاردن بۆ ئینانا ترۆمبێلێن ب كارەبێ كار دكەن، چونكی ئەڤان ترۆمبێلان چەندین مفایێن خۆ هەنە، ژ وان ژی دۆستێن ژینگەهێ نە و كاریگەری ل سەر ئابوورێ‌ وەلاتیان ژی هەیە».
رەشید مستەفا گۆت» داخوازێ ژ بازرگان و وەلاتیان دكەین ترۆمبێلێن ب كارەبێ كار دكەن بكار بینن، ژ مە پێشنیاركریە جهێ شەحنكرنا وان ژی ل هەموو وەستگەهان بهێنە ڤەكرن، هەتا وەلاتی بشێن ل هەر جهێ بخوازن و پێدڤی هەبیت ترۆمبێلێن خۆ شەحن بكەن».

رەمەزان زەكەریا:

ل ئاكرێ رێیەكا نوو بۆ سەرێ گری دهێتە دروستكرن، كو ب چواڕیانا سیپەی ڤە دێ هێتە گرێدان، رێ بۆ هاتنوچوونا وەلاتیان دێ‌ ب ساناهی كەڤیت.
زێرەڤان تەمۆ، پەیڤدارێ باژێرڤانیا ئاكرێ بۆ ئەڤرۆ گۆت: «سەرۆكێ باژێرڤانیا ئاكرێ ل گەل هژمارەكا ئەندازیارێن باژێرڤانیێ و دەڤەرداریا ئاكرێ دووڤچوونا كارێ وێ‌ رێیا نوو دكەن، كو بڕیارە ل ڤان نێزیكان بهێتە ڤەكرن».
گۆتژی: «رێیا نوو ل سەرێ گری بۆ چواڕیانا سیپەیێ ئاكرێ دهێتە دروستكرن و دێ‌ ئاسانكاریان بۆ هاتنوچوونا گەشتیاران كەت».

پەروین سەلاح:

لاوین سەروەر، سەرپەرشتێ رێكخستیاCNO بۆ رۆژناما ئەڤرۆ دیاركر، ئەڤرو راگەهاندن ب ئامرازێن خۆڤە پشكداریەكا ب هێز ل ژینگەها جڤاكی و سیاسی و ئابووری و كلتۆری دا هەیە، ب تایبەت بۆ دروستكرن و ئاراستەكرنا رایا گشتی و دەستنیشانكرنا كێماسیان و دبێژیت: مە وەكو تۆڕا هەماهەمگیا رێكخستیان CNO ئوفیسا دهوك، ب فەر دیت خولا پێگەهاندنا شیانان د وارێ راگەهاندنێ دا ڤەكەین.
لاوین گوت: «دۆرێن 200 كور و كچان فۆرمە پێشكێشكربوون، مە ب هەڤكاریا ناڤەندا خانی لژنەكا هەلسەنگاندنێ پێكئینا ژ بۆ چاڤپێكەفتنێ و پشتی چاڤپێكەفتنێ‌ پتری 80 كچ و كوران هاتینە وەرگرتن».
خویا ژی كر، خول دێ بو ماوێ سێ حەفتیان یا بەردەوام بیت ب تیۆری و پراكتیكی ڤە، وانە ل سەر هەرسێ بابەتێن (بێژەری، پێشكێشكاری و پەیامنێری) دێ‌ هێنە پێشكێشكرن، دیسا وانێن مەیدانی ژی راهێنان هەنە ب پێشكێشكرنا راهێنەر و مامۆستایێن شاهرەزا د وارێ‌ راگەهاندنێ دا و گۆت: «دەرچوویێن ڤێ خولێ دێ‌ بنە خودان باوەرنامەكا باوەرپێكری ژ لایێ ناڤەندا خانی وCNOشیانێن وان دێ‌ باشتر لێهێن و پتر دێ نێزیكی ئارمانجێن خۆ بن».