ب مه‌ره‌ما ئه‌نجامدانا به‌ریكانه‌كا ره‌وشه‌نبیری بۆ گه‌نجان و قوتابییان دێ به‌ریكانه‌كا ره‌وشه‌نبیری راگه‌هینین، به‌ریكانه دێ دو ته‌وه‌ران ‌ڤه گریت:

* ته‌وه‌رێ دیرۆكی:
شۆرشا ئه‌یلوولێ و ره‌هه‌ندێن وێ یێن سیاسی و جڤاكی و دیبلوماسی و ره‌وشه‌نبیری ب خۆڤه گریت

* ته‌وه‌رێ ئه‌ده‌بی:
دێ تایبه‌ت بیت ب هه‌لبه‌ستا (شێعرا) كوردی د سه‌دسالییا بیستێدا، پشكدار دشێت د ڤان ته‌وه‌راندا ڤه‌كۆلینا خۆ بنڤیسیت:
نویكرن د شێعرێدا، قوناغێن شێعرا كوردی د سه‌دسالییا بیستێدا، پێشه‌نگێن نویكرنێ د شێعرا كوردیدا، شێعرا كوردی و هزرا نه‌ته‌وهیی، كاریگه‌رییا شێعرا بیانی ل سه‌ر شێعرا كوردی
بۆ هه‌رته‌وه‌ره‌كی سێ ڤه‌كۆلین وه‌ك سه‌ركه‌تی دێ هێنه ژێگرتن و خه‌لاتكرن.

* مه‌رجێن پشكداریێ:
– ئاستێ كه‌سێ پشكدار د قوناغا ئاماده‌یی و زانكۆیێدا بیت.
– ته‌مه‌ن د ناڤبه‌را 18 – 28 سالیێدا بیت.
– ڤه‌كۆلین ل چ جهان نه‌هاتبیته به‌لاڤكرن.
– وه‌ك ڤه‌كۆلینا ده‌رچوونێ نه‌هاتبیته پێشكه‌شكرن.
– به‌لگه‌یه‌ك دگه‌لدا بیت كو ئاستێ خواندنێ و ته‌مه‌نی یێ پشكداری ده‌سنیشانكه‌ت.
– ڤه‌كۆلین ژ 6000 – 8000 په‌یڤان به‌رپه‌رێن A4 فونتێ ی فۆنتێ یونی كو 14 بۆ ناڤه‌رۆكی و 12 بۆ په‌راوێزان ده‌رباز نه‌بیت.
– بنه‌مایێن زانستی د ڤه‌كۆلینێدا هه‌بن ب دروستی ئاماژه ب ژێده‌ران بكه‌ت.
– ڤه‌كۆلین نه وه‌رگێران بیت ژ زمانه‌كێ دیتر.
– د ده‌مێ هه‌لسه‌نگاندنێدا ناڤێن خودانێن ڤه‌كۆلینان ناهێنه به‌رچاڤكرن.
– هه‌ر گومانه‌ك د ڤه‌كۆلینێدا هه‌بیت كو ئێكێ دی نڤیسییه یان ژ جهه‌كی هاتییه‌وه‌رگرتن دێ هێته دووركرن ژ به‌ریكانێ
– ژ 1 نیسانێ – 10 گولانێ دێ ڤه‌كۆلین هێنه‌وه‌رگرتن.

– ڤه‌كولین دێ ل سه‌ر ڤان سێ هژماران 07504582404 و 07504738033 و 07504818126 ب وایتساپ و ڤایبر و تیلیگرام و ئێمێلێ
Musediq. [email protected] بگه‌هنه مه‌.

• دو لیژنه ژ كه‌سێن تایبه‌تمه‌ند و خودان ئه‌زموون بۆ هه‌لسه‌نگاندنا ڤه‌كۆلینان هێنه‌پێكئینان، ئێك بۆ ڤه‌كۆلینێن دیرۆكی، ئێك بۆ هه‌لسه‌نگاندنا ڤه‌كۆلینێن ئه‌ده‌بی.
• د هه‌ردو ته‌وه‌راندا هه‌رئێك ژ سێ ڤه‌كۆلین سه‌ركه‌تی دێ ب خه‌لاتێن دراڤی هێنه خه‌لاتكرن (ئانكو شه‌ش خه‌لات) بۆ هه‌ردو ته‌وه‌ران.
• بۆ هه‌رئه‌ندامه‌كێ لیژنێ و هه‌ر سه‌ركه‌تییه‌كی نیشانه‌كا رێزگرتنێ هێته‌رخانكرن.
• هه‌رشه‌ش ڤه‌كۆلین دێ د په‌رتووكه‌كێدا هێنه‌چاپكرن و د ئاهه‌نگا راگه‌هاندنا سه‌ركه‌تییاندا هێنه‌دابه‌شكرن.

دگه‌ل رێزگرتنێ

‌هەڤال فندی

دەمژمێر8:30ێ سپێدێ یە، د خەوەكا خۆش دا بوو، زەنگا موبایلێ لێدا، ژ نشكەكێڤە هەلبەهی و ب چاڤێن خەووكی تەماشەی ناڤێ پەیوندیكاری كر، لێ نكاری ناڤێ وی بخوینیت و ب تۆرەیی ڤە و ب دەنگەكێ بلند بەرسڤا وی دا و گۆتێ:
– “بەلێ كەرەمكە، تە چ دڤێت؟”
ئێكسەر پەیوندیكەری گۆتێ:
“- تو چەوا هوسا بەرسڤا من ددەی؟ ما ناڤێ من ل دەف تە دیار نەبوو؟ ما تو من نانیاسی؟”
چاڤێن خو پەرخاندن و پالا خۆ دا بالیفێ و پشتا خۆ راستكر. پشتی چەند چركەیەكا گۆتێ:
– “ب بۆرە سەیدا من نەزانی؟ كو جەنابێ وەیە، بەلێ سەیدایێ هاریكارێ دەرهێنەری ئەمر بكە.
– پەیوەندیكەری گۆتێ:
– “دێ هەر چ زوی یە جلكێن خۆ بكە بەرخۆ و وەرە ڤی لوكێشنی ئەوێ نها دێ بۆ تە فریكەم، لێ بێ گیروبوون، چونكو دەرهێنەرێ فلمی و هەمی ل كاست ل هیڤییا تە نە.”
– “باشە لێ من دڤێت بزانم چ چێبوویە، وە چ كار ب من هەیە؟”
– “ههههههه، مزگینی بۆ تە، تو وەك قەهرەمانێ فلمی یێ هاتییە دەستنیشانكرن، ئەڤە پشتی، كو من ل دەف دەرهێنەری گەلەك پەسنا تە كری، دێ نها بگەهە لوكێشنی چونكو ئەم هەمی ل بەندا تەینە.”
قیرینەكا مەزن بەردا و رابوو سەمایێ و گۆت:
– ““ئەز بوومە پالەوان.. پالەوان.”
چوو بەرامبەر وێنەیێ دەیكا خۆ، یاكو بەری 4 سالان ب ئەگەرا رویدانەكا ترافیكێ وەغەركری و گۆتی:
– “دایێ تە های ژێ هەیە چ چێبوویە. ئەز دێ ب مە ستێر، تە هەر جار دگۆتە من، تو دێ بییە كەسەكێ مەزن و ژێهاتی. ئەها ئەڤرۆ ئەوان بها و شیانێن من یێن هونەری و زارڤەكرنێ زانیین. ئەڤە ژی هەمی ژ ئەنجامێ لاڤایێن تە نە.”
راستە بابێ من ل دژی وێ چەندێ بوو، كو وەك ئەكتەر كار بكەم و هەر جار دگۆتە من: (كوڕێ من، ئەڤە كارێ تە نینە تو زارڤەكەرەكێ نە سەركەفتی و بكێر ناهێی .. تو ئەندنزیارێ ئەلكتریكی و شارەزیی د ڤی بواری دا، باشتر ئەوە د چارچووڤێ بسپوری یا خۆ دا كار بكەی)، دێ باب تە دیت، ژ ئەڤرۆ پێڤە ئەز دێ ب مە پالەوان، ئەوا تە دگۆتی وەسا دەرنەكەت، چونكی تە شیانێن من یێن زارڤەكرنێ نە دنزانین.”
چوو هەمبەر خۆدیكێ و سەحكرە سەروسیما و بەژن و بالا خۆ، ئەڤجا ل گەل گۆتی:
– “ئەز چ بكەمە بەرخۆ و چەوا بۆ ڤێ رۆژا مەزن و پیرۆز خۆ بەرهەڤ بكەم! نێ هەمی یێن ل چاڤەڕێیا من، ژ دەرهێنەری بگرە هەتا دگەهتە ئەكتەر و وێنەگر و كومبارس و هاریكاران. نها، پێدڤییە ئەز پیچەك خۆ گران بكەم و داخازێن خۆ بلند بكەم، داكو ئەو ژی هزرەكێ بۆ من بكەم.”
– بلەز خۆ ب جلكێن خۆ یێن بۆ هەلكەفت و جەژنان كاركر، پڕچێ خۆ جێلی كر و بێهن و گولاڤ ل خۆ رەشاندن و بەر ب ئوتومبێلێڤە چوو. بلەز هاژووت، داكو زویتر بگەهیتە جهێ لوكێشنێ. ل دەمێ هاژووتنا ئوتومبیلێ، د سەرێ وی دا، هزرەك دهات و ئێك دچوو، خەونێن جوان بۆ خۆ درستن؛ چونكی ل دەمەكێ نێزیك دێ بیتە ناڤەكێ مەزن د قادا سینەمایێ دا. د وان هزران دا بوو، ژنشكەكێ ڤە، بێی كو های ژ رێكێ و دەمی هەبیت خۆ دیت یێ كەهشتییە جهێ مەبەست. هەر زوی ژ ئوتومبێلێ هاتە خوارێ و سەحكرە دەردۆرێن خۆ، دیت كو دەرهێنەر و هەمی ستافێ كاری ل هیڤییا وی نە!! سەرێ خۆ بلند كر و پێنگاڤێن گران بەر ب وانڤە هاڤێت. هەمیان ب گرنژینەكا فرەهڤە سەح دكرێ!! دەمێ نێزیك بووی، ب كەیفخۆشیڤە سلاڤ ل وان كر، هەمی راوستییان و ب ئێك دەنگ گۆتێ:
– “ئەڤە درەوا ئێكێ نیسانێ بوو!!”

ژینێ رێكانی

ئەڤ شەڤە
خەوڕەڤین بوو
من خەیال دكرە بەفر و
تنێ‌ ئەز و تاڤە هەیڤ دهشیارین
ئەز و گرنژین سەمایێ‌ دكەین
هەست مەست دبن
دبنە گولالیێن بەفرێ‌
رویكێن سۆرە گولێن
عەشقا دل داگیركری
دتەزینیت.
بەفر خاتوینەك دل سارە
تارییا شەڤا دمێژیت
بێدەنگیێ‌ دكەتە ئاواز
ژداڤێن پرچا هیڤیێن ل كۆلانان
بدەهمەنێن ژڤانێن
هێشتا ل دەمی دنەبان، دژەنیت.
سەمایا سحرا شەڤێن عەشقا مە همبێز كری
پەیكەرێ‌
لالیا ژڤانێن مە
ل كۆچە و كۆلانێن ڤی باژێرێ‌
سیمایێ‌ عەشقێ‌ ژبیركری،
جانی و عەشق لێ‌ ئاشنا كری
هەیڤێ‌ دێمێ‌ خوە یێ‌ لبەر میكیاج كری.
د ڤێ‌ شەڤێ‌ دا
ل بەر ئاوازێن بێدەنگیا تاڤە هەیڤێ‌ دا
سروودێن لالەشێ‌
ب خەمگینی
ب دەهمەنێن
پنیێن عەورێ‌ كۆڕەژار همبێز كری
دهەلاویسم
پرتێن عەشقا
ئەڤ دلە هنجنی ژ بێكەسی
بەرماكێن پرتێن كۆلانێن مە ژبیركری
كت و كت تەڤان دێ‌ ڤێدەم
ل ناڤ مێدەكا هیڤیێن بژالە بووین پێچم
گیانێ‌ من
هەتا كەنگی
ب شەپرزەیی
چاڤەڕێی پێژنا تەبم
ل ڤی وەلاتێ‌
ژ كەلاوەیێن عەشقێ‌ تژی
ژی لێ‌ پێلێن “زێ‌“ینە و
كۆتەلەكا كولب ڤێ‌ كەفتی
ئو ئەز لێ‌ كەسەك نەفرەتی دبم.
ناوسكێن سینگێ‌ من
بۆ همبێزا هەناسێن تە
مالخۆلیانە و
ئاوازێن زەنگلا دێرا لپشت مالێن مە
بارمتە بوونا گیانێ‌ مە
دپێلێن “زێی” وەردكەت
ل دەفتەرا عەدەما زەمەنی دا
ل پەیا رێكا
خەجێ‌ و سیامەند ل شاخێن كویڤی هلنگفتین
ب پیتێن گر و ژ پەرتووكا یاخی بووین
نڤێسین ناڤێ‌ مە.