زێدەتری 44 ملیۆن دینار داهاتیێ یاریێ بۆ زیانڤێكەفتیان هاتنە كۆمكرن
ل شەڤا دەربازبوویی و ب بەرهەڤبوونا د. عەلی تەتەر پارێزگارێ دهۆكێ و د. نەوزاد عەبدوللا بەرپرسێ لقا ئێك یا پارتی دیموكراتی كوردستان و فەرماندە مەنسۆر بارزانی، تیما تەپا پێی یا یانەیا دهۆك فەستیڤالەكا جوان د ناڤا یاریگەها خوە دا نیشان دا و سەركەفتنەكا گرنگ ل سەر یانەیا جەوییە ئینا ب دو گۆلان بەرانبەر گۆلەكێ كو ئێكەم خوسارەتی گەهاندە تیما بەغدایی و خودانا سەرێ لیستا رێزبەندیێ، ئەوا ژ چارچووڤەیێ هەڤڕكیێن گەڕا 20ێ یا خولا ستێرێن ئیراقێ ئەوا ب حازربوونا زێدەتری 20 هزار كەسان ل یاریگەها دهۆكێ هاتیە كرن.
د نیڤا ئێكێ دا هارون ئەحمەد شیا گۆلا ئێكێ بۆ ئەلهۆیێن چیا بینت پشتی بۆرینا 39 خولەكان ئەوێ بوویە باشترین یاریزانێ یاریێ، د نیڤا دویێ دا هێرشبەرێ تونسی گۆلا دویێ بۆ دهۆكێ ئینا د خولەكا 67ێ دا، تیما مێڤان گۆلا ئێكانە ژلایێ هێرشبەرێ خوە موهەنەد عەبدولرەحیم د خولەكا 81ێ دا تۆماركر، دڤێ یاریێ دا سێ یاریزان ژبەر ئەگەرێن جودا هاتبوونە دوورئێخستن، یاریزانێ جەوییە ئیبراهیم بایش د نیڤا ئێكێ دا پشتی یارییا زڤڕ بەرانبەر یاریزانێ دهۆكێ كری، هەروەسان دەرئەنجامێ ناكۆكی و لێككەفتنا دناڤبەرا چەند یاریزانێن دهۆك و جەوییە پشتی هاتنا خوارێ یا دو كەسێن نە بەرپرس ژ جەماوەرێ دهۆكێ بۆ ناڤا یاریگەهێ، گۆلپارێزێ جەوییە محەمەد حەمید ب كارتا سۆر هاتە دوورئێخستن پشتی دربەك ب ئێك ژ جەماوەرەكێ یانەیا دهۆكێ دانایی، هەروەسا پیشەكارێ دهۆكێ ژی موسیس لۆكاس هاتە دوورئێخستن پشتی دادڤانێ یاریێ ڤەگەڕیایە سیستەمێ ڤارێ.
پشتی سەرۆكێ یانەیا دهۆك د. عەبدوللا جەلال راگەهاندی كو دێ داهاتیێ یارییا تیما دهۆك بەرانبەر جەوییە هەمی بۆ زیانڤێكەفتیێن لافاوا باژێرێ دهۆكێ هێنە پێشكێشكرن، یانەیا دهۆك دیاركر كو شیان كۆژمەیێ 44 ملیۆن و 122 هزار دیناران كۆمڤەكەن و سۆپاسییا هەر لایەكی و پشتەڤانەكێ هەڤكار بوویی.
د پرێسكۆنفرانسێ رۆژنامەڤانی دا ئەحمەد خەلەف راهێنەرێ تیما یانەیا دهۆك گۆت: مە یارییەكا مەزن نیشان دا بەرانبەر تیمەكێ خودانا سەرێ لیستێ یە و بهێزترین تیمە د خولێ دا، سۆپاسییا هەمی یاریزانان دكەم ب گیانەكێ كۆم و مۆرالەكا بلند یاری كری، جەماوەرێ مە كلیلكا سەركەفتنێ بوو، ژلایێ خوەڤە محەمەد سالح گۆلپارێزگێ دهۆكێ گۆت: ئەم گەهشتینە ئارمانجا خوە و سەركەفتنەكا دیرۆكی بوو، جەماوەرێ مە ئەگەرێ سەركەفتنێ بوو ژبەركو پشتەڤانیەكا مەزن ل مە كر.
