د داخویانیەکێ دا سەرۆکێ یانه‌یا زاخۆ یا وەرزشی بۆ رۆژناما ئەڤرۆ دیار کر ئەو چاڤەرێ بەرسڤا دووماهیێ یا دو یاریزانانه‌ و ئارمانجا وان بەرانبەر بەحری ژ كۆپا ئیراقێ سەرکەڤتنە.
زێدەتر عەمار فەرهاد گۆت: ئەو کێماسیێن د ناڤ تیما مە یا پشکدار د خولا ستێرێن ئیراقێ یا تەپاپێی دا هەتا ڕادەیەکێ باش چاره‌سه‌ربووینه‌ ب ئینانا یاریزانێن نوو و مە د ڤی ماوەیی دا یارییەکا هەڤالینی ئەنجامدا و رێکخستنەکا باشتر ژی دناڤ تیمێ دا دروست بوویە گه‌شبینم تیما مە دێ ئاست و ئەنجامێن باشتر ب دەستڤە ئینیت، ڕاوەستیانا خولێ یا باش بوو ژبەرکو مە مفا ژێ وه‌رگرت، ئەم چاڤەرێ دو یاریزانێن دیتر هەکە وان شیان دەستبەرداربوونا خوه‌ بینن دێ هەڤبەستا وان ئیمزا کەین لێ هەکە نەشیان ئەم چو یاریزانێن دیتر نائینن ژبەرکو هەر هەڤبەستەکا ئەم گرێدەین پێدڤییە ئاستێ وی یاریزانی ژ ئاستێ یاریزانێن مە باشتر بیت و بشێت زێدەهیەکێ ل تیمێ پەیدا بکەت.
ناڤبری گۆت ژی: ئارمانجا مە بۆ یارییا ئێکێ ژ كۆپا ئیراقێ بەرانبەر بەحری سەرکەڤتنە ئه‌وا دێ ل شه‌مبییا بهێت ل به‌غدا هێته‌ كرن و مە شیان هەنە کو سەرکەڤتنێ توماربکەن و هەمی بەرهەڤی ژی بۆ وێ یاریێ ژلایێ تیمێ ڤە هاتینە ئەنجامدان، هه‌‌رچه‌نده‌ یاریی د یاریگەها مە دا نینە لێ مە باوەری ب تیما خوە هەیە کو دێ شێت بەرب قۆناغا دیتر ژ جاما ئیراقێ ڤە چیت و ئێکەم سەرکەڤتنێ ژ جامێ پێشکێشی جەماوەری کەن.

ل سەر راسپاردا سەرۆك بارزانی و ل ژێر دورشمێ‌ مرۆڤ دۆستی و ژینگەهـ پارێزی بۆ ماوەیێ‌ چەند رۆژە هەڤڕكیێن قارەمانییا بارزانیێ‌ نەمر یا تەپا پێی ل بازنەیا دهۆك و مووسل بەردەوامە ئەوا نەهـ تیم ژ ناڤەندێن لاوان ل سنۆرێن هەردو باژێرێن ناڤهاتی پشكداربووینە و یاریێن وان ل یاریگەهێن جودا ل ژێر چاڤدێرییا نڤێسینگەها مەلا مستەفا بارزانی دهێنە كرن.
ئازاد ئەحمەد كارگێرێ‌ مەكتەبا سكرتارەتییا لاوان پشكا وەرزشی بۆ رۆژنامەیا ئەڤرۆ گۆت: پشتی ب دووماهی هاتنا قارمانیێن ل بازنەیا هەولێر و سۆران، سلێمانی و هەلەبجە و كەركووك و گەرمیان و دەربازبوونا هەر تیمەكێ‌ ژ بازنەكێ‌ بۆ چارگۆشەیا زێرین ئەڤە بۆ ماوەیێ‌ حەفتییەكە ل بازنەیا دهۆك و مووسل قارەمانی بەردەوامە هەتا شەمبییا بهێت دێ‌ پلێتا چارێ‌ بۆ چارگۆشەیێ‌ هێتە ئێكلاكرن، ئەڤ قارەمانییە دهێتە هژمارتن بۆ جارا ئێكێ‌ ل سەر ئاستێ‌ وەرزشا كوردستانێ‌ كو ل سەر راسپاردەیا جەنابێ‌ سەرۆك بارزانی ل ژێر دورشمێ‌ مروڤ دۆستی و ژینگەهـ پارێز یاریێن دووماهیێ‌ ب پشكدارییا 26 تیمێن گرێدایی یێن ناڤەندێن لاوان ل سنۆرێن باژێرێن كوردستانێ‌ ل دووڤ بازنەیێن دیاركری دهێنە كرن و یاریێن وان بشێوەیێ‌ كۆم ئێك قۆناغ ل ژێر چاڤدێرییا نڤێسنیگەها رێزدار مەلا مستەفا بارزانی و ژلایێ‌ ئێكەتییا لاواێن دیموكراتی كوردستان ڤە هێتە بڕێڤەبرن.
هەروەسان گۆت: ئەڤ قارەمانییە بشێوەكێ‌ رێكخستی هاتییە بڕێڤەبرن و جوانترین شێوە یاریێن وێ‌ دهێنە كرن كو هەر گرۆپەك ل باژێرەكی یارییان خوە كریینە، لەوما ژی دبیتە مەزنترین چالاكییا یارییا تەپا پێی ل سەر ئاستێ‌ كوردستانێ‌ و مەرەما سەرەكی ژی ئەوە هەمی وەرزشڤان و لاوێن كوردستانێ‌ ب گەهنە هیڤیێن خوە و پشكداری قارەمانییا تەپا پێی بن و هەروەسان ژی بۆ پێشئێخستنا ئاستێ‌ وەرزشێ‌ یە.

قەیس وەیس:

فیدراسیۆنا باسكێت بۆلا ئیراقێ‌ داخوازنامە بۆ 19 یاریزانێن یانەیێن پشكدار د خولا پلا نایاب دا هنارتینە ژبۆ پشكداریێ‌ د كەمپێ‌ راهێنانێ‌ دا ئەوا بڕیارە سوبەهی ل هۆلا ئەلشەعب پایتەختێ‌ ئیراقێ‌ بەغدا ب سەرپەرشتیا راهێنەرێ‌ كرواتی و یانەیا زاخۆ میلان نیسێج، خوە بەرهەڤكرن بۆ ڤاڤارتنێن كۆپا ئاسیا و مۆدینالا جیهانی ژ وانا دو یاریزانێن یانەیا زاخۆ و ئێكێ‌ خەلكێ‌ دهۆكێ‌ نە.
د داخویانیەكێ‌ دا د. خالد نەجم جێگرێ‌ دویێ‌ یێ‌ سەرۆكێ‌ فیدراسیۆنا باسكێت بۆلا ئیراقێ‌ گۆت: ژبۆ خوە بەرهەڤكرن بۆ دو گرنگترین قارەمانیێن مەزن یێن نێڤدەولەتی 19 یاریزان بۆ كەمپێ‌ راهێنانێ‌ یێ‌ هەلبژارتیێ‌ مە هاتینە داخوازكرن و سوبەهی ئێكەم یەكا خوە یا راهێنانێ‌ ب سەرپەرشتییا راهێنەرێ‌ كرواتی میلان نیسێج هیتە بڕێڤەبرن و دووڤدا دێ‌ بەر ب وەلاتێ‌ بەحرەین چن بۆ دانانا كەمپێ‌ دویێ‌ و ئەنجامدانا دو یاریێن هەڤالینی دگەل هەلبژارتیێ‌ بەحرەین ل18 و 19ێ‌ شوباتا بهێت بەری بكەڤینە د ڤاڤارتنێن هەڤپشك یێن كۆپا ئاسیا و مۆندیالا جیهانی ئەوا دێ‌ ئێكەم یارییا خوە یا كۆما سێیێ‌ ل 23ێ‌ شۆباتا بهێت بەرانبەر سعۆدیێ‌ ل بەغدا كەت، یاریی دویێ‌ ل 26ێ‌ هەمان مەهـ بەرانبەر فلەستینێ‌ ل وەلاتێ‌ ئوردنێ‌ كەت.
ل دۆر یاریزانێن كورد ناڤهاتی گۆت: ژ سەرجەمێ‌ 19 یاریزانان چار یاریزانێن كورد دگەل هەلبژارتیێ‌ ئیراقێ‌ دانە ئەو ژی موراد عەلی و محەمەد محسن ژ یانەیا زاخۆ، فەرید رەعدی خەلكێ‌ دهۆكێ‌ و یانەیا دیفاع ئەلمەدەنی و محەمەد عەبدولخالق خەلكێ‌ هەولێرێ‌ و یانەیا دیفاع ئەلمەدەنی، هەرچار یاریزان ل دووڤ ئاست و شیانێن وان هاتینە ژێگرتن و گەشبینن دێ‌ مفایەكێ‌ مەزن ژێ‌ وەرگرین.

یانەیا ئاكرێ‌ ب فەرمی هێرشبەرێ‌ خوە یێ‌ هەلبژارتیێ‌ ئۆلمپیێ‌ غانا بۆ دەزگەهێن راگەهاندنێ‌ دا ناساندن، ژبۆ پشكداریێ‌ دگەل تیما وان یا تەپا پێی د خولا پلا نایاب و كۆپا كوردستانێ‌ دا.
د داخویانیەكێ‌ دا هۆزەڤان زاهد ئەندامێ‌ كارگێری و سەرپەرشتێ‌ تیما تەپا پێی یا یانەیا ئاكرێ‌ بۆ رۆژنامەیا ئەڤرۆ گۆت: ب فەرمی یاریزانێ‌ غانی و هێرشبەرێ‌ هەلبژارتیێ‌ ئۆلمپیێ‌ غانا ئیسحاق مینساهـ هاتییە د ناڤ رێزێن تیما مە یا تەپا پێی و ئەڤرۆ دێ‌ پشكداری یەكەیا راهێنانێ‌ بیت، ئەڤچەندە ژی ل دووڤ پلانا كارگێریێ‌ و داخوازییا كادرێ‌ راهێنانێ‌ ژبۆ ب هێزكرنا رێزێن تیمێ‌ تایبەت هێلا هێرشبەریێ‌ ژبەركو ئەم پێدڤی ب هێرشبەرەكێ‌ گۆلكەر هەبووین و گرێبەستا وی هات پشتی دووڤچوونا سیڤیێ وی هاتیە كرن و گەهشتینە وێ‌ چەندێ‌ كو دێ‌ شێت ئەوێ‌ كێماسییا دناڤ تیمێ‌ دا چارەسەركەت.
هەروەسان ناڤهاتی گۆت: مەرەما ئینانا یاریزانەكێ‌ ب تایبەتمەندیێن خوە یێن هێرشبەریێ‌ ئەم بشێن مفایی ژ شیانێن وی وەربگرین بۆ هەردو خولێن پلا نایاب و كۆپا كوردستانێ‌ دا و ئاریشەیا هێرشبەرێ چارەسەربكەت تایبەت د نوكە دا تیما مە د خولێ‌ دا 27 خال كۆمكرینە و سەرێ‌ لیستێ‌ دهێت و ئارمانجا مە یا وەرزێ‌ ئەڤ سالە ئەم پاراستنا ڤێ‌ رێزبەندیێ‌ بكەین و بەر ب ناسناڤێ‌ خوە یێ‌ ئێكێ‌ یێ‌ كوردستانێ‌ بچین، هەروەسان بزاڤێ‌ بكەین ژبۆ ب دەستڤە ئینانا كۆپا كوردستانێ‌، سەرباری ئەركێ‌ مە ب سانەهی نابیت لێ‌ یا د شیان دا بیت دێ‌ شەڕی بۆ كەین.

بڕیارە ل ئێكشەمبییا بهێت هەڤڕكیێن پێنج قارەمانیێن جودا ل سەر ئاستێ‌ پەروەردەیێن قەزیان ل سنۆرێ‌ پارێزگەها دهۆكێ‌ بۆ قۆناغێن سەرەتایی، بنەرت و ئامادەیی یێن كوڕان و كچان ب پشكدارییا نەهـ پەروەردەیێن سنۆرێن قەزایان بهێنە ئەنجامدان.
ل دۆر ڤێ‌ یەكێ‌ ئێحسان حەسەن رێڤەبەرێ‌ چالاكیێن وەرزشی و دیدەڤانی ل رێڤەبەرییا گشتی یا پەروەردەیا پارێزگەها دهۆكێ‌ گۆت: ل دووڤ بەرنامەیێ‌ سالانە و وەرزێ‌ 2023-2024ێ‌ درێژەپێدان ب چالاكیێن وەرزشی یێن قوتابخانەیان بڕیارە پێنج قارەمانیی ل سەر ئاستێ‌ هەلبژارتیێن پەروەردەیان بڤی رەنگێ‌ بهێنە كرن، ل 28ێ‌ ڤێ مەهێ‌ قارەمانییا فوتسالێ‌ ل سەر ئاستێ‌ كوڕان بۆ قۆناغا سەرەتایی هێتە كرن، ل7ی شوباتا بهێت ل سەر ئاستێ‌ كچان هەمان قارەمانی بۆ قۆناغا بنەرت هێتە ئەنجامدان، هەروەسان ل19ی شوباتێ‌ قارەمانییا تەپا مێزێ‌ ل سەر ئاستێ‌ كوڕان و كچان بۆ قۆناغا ئامادەیی هێتە ئەنجامدان، دووڤدا ل 21ێ‌ هەمان مەهـ قارەمانییا باسكێت بۆلێ‌ بۆ هەردو رەكەزان و قۆناغا ئامادەیی هێتە ئەنجامدان، قارەمانییا پێنجێ‌ یا ڤۆلی بۆلێ‌ ل سەر ئاستێ‌ كوڕانە بۆ قۆناغا ئامادەیی دێ‌ ل29ێ‌ شوباتا بهێت دەستپێكەت.
هەروەسان ناڤهاتی دیاركر هەڤڕكیێن ئەڤان قارەمانییان دێ‌ بۆ ماوەیێ‌ مەهەكێ‌ بەردەوامبن و دووڤدا دێ‌ بۆ هەر یاریەكێ‌ هەلبژارتیێ پەروەدەیا گشتی یا پارێزگەها دهۆكێ‌ هێتە ژێگرتن ب باشترین یاریزانێن قارەمانیێ‌ خوە بەرهەڤكرن بۆ قارەمانییا كوردستانێ‌ ل سەر ئاستێ‌ پەروەردەیێن گشتی و گۆت: ئارمانجا یا سەرەكی ژ ئەڤان قارەمانییان پەروەردەییە و بلندكرنا ئاستێ‌ وەرزشا قوتابخانەیان كو قوتابی ل سەر سیستەمەكێ‌ ئەكادیمی و پەروەردەیی رابیت و تەندروستیەكا ساخلەم و بیتە خودان هەلوەستێ‌ بهێز، ئەنجامدانا قارەمانییان پەروەردەییە زێدەتر ژ دەستڤە ئینانا ناسناڤان و بەرانبەر قوتابیێ‌ وەرزشڤان راستییا هەر ئەنجامەكی قەبوولبكەت، هەروەسان دیاركرنا قوتابیێ‌ بەهرەمەندە لەوما هیڤییا مە ئەوە یانەیێن وەرزشی ژی خوە لڤان یاریزانێن بەهرەمەند بكەنە خودان و دێ‌ بنە یاریزانێن باش بۆ پاشەرۆژا وەرزشا كوردستانێ‌.

قەیس وەیس:

چاڤەڕێ‌ دهێتە كرن ئەڤرۆ ل دەمژمێر 2:30 پشتی نیڤرۆ هەلبژارتیێ‌ ئیراقێ‌ یارییا خوە یا سێیێ‌ و دووماهیێ‌ ژ چارچووڤەیێ‌ كۆما چارێ‌ یا قارەمانییا كۆپا ئاسیا 2023ێ‌ ل یاریگەها سەد ل وەلاتێ‌ قەتەر بەرانبەر هەلبژارتیێ‌ فێتنام بكەت و پێشبینی دهێنە كرن راهێنەرێ‌ ئیراقی ب كۆمەكا باش یا یاریزانێن یەدەك پشكداریێ‌ بكەن.
هەلبژارتیێ‌ ئیراقێ‌ ئەوا دەربازبووونا خوە بۆ قۆناغا 16ێ‌ مسۆگەر كری پشتی دو سەركەفتن ل دووڤ ئێك ل سەر هەر ئێك هەلبژارتیێ‌ ئەندۆنیسیا 3-1 و چاپانێ‌ 2-1 و ب كۆمكرنا شەش خالان سەرێ‌ لیستێ‌ دهێت، هەلبژارتیێ‌ فێتنام بێ‌ خال رێزا چارێ‌ و دووماهیێ‌ دهێت.
هەرچەندە راهێنەرێ‌ ئیراقێ‌ یێ‌ ئسپانی خیسۆس كاساس دیاركر یارییا ئەڤرۆ دێ‌ بۆ سەركەفتنێ‌ بیت ژبەركو ئەڤ ئەنجامە دێ‌ د رێزبەندییا نێڤدەولەتی و پاراستنا سەرێ‌ لیستێ‌ مفایی گەهینتێ‌ تایبەت بۆ ڤاڤارتنێن مۆندیالا 2026ێ‌ و دێ بزاڤێ‌ كەن سەركەفتنا سێیێ‌ بینن، لێ‌ ل دووڤ دەنگۆباسێن هاتینە بەلاڤكرن و پێشبینیان كو دێ‌ كۆمەكا باش یا یاریزانێن یەدەك پشكداری ڤێ‌ یاریێ‌ بن كو دێ‌ بیتە دەلیڤە بۆ وان ئەو ئاستێ‌ خوە نیشان بدەن.