هەولێر، قائید میرۆ

سەرۆكێ كۆمەلا كرێدارێن كوردستانێ ئاشكراكر، ل سەرانسەری هەرێما كوردستانێ زێدەتری 200 هزار خێزانێن كرێدار هەنە و ئاڤاكرنا یەكەیێن ئاكنجیبوونێ ژی نەشیایە ئاریشەیا كرێداران چارەسەر بكەت و كرێداران شیانێن كڕینا وان یەكەیا نینە هەروەسا دبێژیت: هژمارەكا زۆرا وەلاتیێن عەرەب ل هەرێما كوردستانێ ئاكنجیبووینە و كاریگەری لسەر كرێداران پەیداكریە ب شێوەیەكی نوكە هندەك پێشمەرگەیێن بەرێ یێن سەردەمێ شۆڕەشێ كرێدارێن وەلاتیێن عەرەبن ل هەرێما كوردستانێ ل دهۆكێ ژی ئەو حالەتە هەنە.

بەرهەم سەردار، سەرۆكێ كۆمەلا كرێدارێن كوردستانێ بۆ رۆژناما ئەڤرۆ دیار كر» ل سەرانسەری هەرێما كوردستانێ زێدەتری 200 هزار كرێدار هەنە و رەوشا كرێداران یا باش نینە، چونكە هەتا نوكە حوكمەتا هەرێما كوردستانێ نەشیایە قەیرانا ئاكنجیبوونێ چارەسەر بكەت، زۆربەیا پڕۆژێن دهێنە ئاڤاكرن ژی كرێدار نەشێن بكڕن، چونكە ب بهایەكێ زۆر بلند دهێنە فرۆتن و د شیانێن كرێداراندا نینە.
زێدەتر گۆت: ئەو كەسێن ناڤێن خوە وەكی كرێدار تۆمار كری، هەموو فەرمانبەر و كاسب و پێشمەرگەیێن بەرێ نە و داهاتێ وان یێ هەیڤانە بەهرا كڕینا یەكەیێن ئاكنجیبوونێ ناكەت، چونكە مرۆڤێ كرێدار ب تنێ‌ دشیاندایە كریا هەیڤانە پەیدا بكەت و نەشێت پارێ زێدە پاشەكەفت بكەت بۆ كڕینا خانیەكی یان یەكەیەكا ئاكنجیبوونێ، مخابن گیرۆبوونا مووچەی ژی كاریگەری ل سەر رەوشا كرێداران پەیداكریە، هەتا كرێدارەك مووچەیەكی وەر بگریت دو كریێن خانی بدەت و دو كریێن موەلیدێ بدەت و دو جارا كارتا ئینتەرنێتێ بكڕیت ئەڤە قوتابخانە ژی دێ هێنە ڤەكرن، ئەڤە هەموو بوویە بارەكێ گران لسەر كرێداران.
سەرۆكێ كۆمەلا كرێدارێن كوردستانێ ئەو یەك ژی دیار كر، پێدڤیە حوكمەتا هەرێما كوردستانێ قانوونا هژمارە 16 یا سالا 2011ێ راستڤەكەت و بێی پێشەكی یەكەیێن ئاكنجیبوونێ ل سەر كرێداران بهێنە بەلاڤكرن، بەرۆڤاژی ب ڤی شێوەیێ نوكە وەلاتیێن كرێدار نەشێن مفادارببن.
سەرۆكێ كۆمەلا كرێداران گۆت» ئەو 20 هزار شوقێن بڕیارە بۆ كرێداران بهێنە ئاڤاكرن و سەرۆكێ حوكمەتا هەرێما كوردستانێ بڕیار ل سەر ئاڤاكرنا وان دەركری هێشتا نەچووینە د بیاڤێ بجهئینانێ دا و ئەرد ژی بۆ نەهاتیە دیاركرن، چونكە هەتا نوكە چو وەبەرهێنەر بەرهەڤ نینن بۆ ئاڤاكرنا شوقێن كرێداران ب ڤی بهایێ حوكمەتێ دیاركری، ئەڤە د دەمەكی دایە دڤێت هەتا نوكە 50%ێ یا پڕۆژێ شوقێن كێم دەرامەت و كرێداران هاتبانە بجهئینان، د دەمێ بیست رۆژاندا نێزیكی 120 هزار كەسان فۆرمێن وەگرتنا شوقەیێن حوكمەتێ پێشكێش كرینە و پێنج هندی شوقەیێن دهێنە ئاڤاكرن فۆرم هاتینە پێشكەش كرن، ئەڤە ژی نیشانا ڤێ چەندێ یە حوكمەت نەشیایە قەیرانا ئاكنجیبوونێ چارەسەر بكەت.
بەرهەم سەردار ئاماژەكر» هەتا نوكە مۆهلەت ب ئاڤاكرنا 230 هزار یەكەیێن ئاكنجیبوونێ هاتیەدان و ژبەر نەبوونا قانوونەكێ بهایێ وان یەكەیێن ئاكنجیبوونێ ژلایێ وەبەرهێنەری دهێتە دیاركرن و چو چاڤدێری ل سەر نینە و وەبەرهێنەر ب كەیفا خۆ بهایێ یەكەیێن نیشتەجێبوونێ دیار دكەن و زێدەتر د فرۆشنە وەلاتیێن عەرەب، ل هەرێما كوردستانێ زێدەتری 680 هزار یەكەیێن ئاكنجیبوونێ ل سەر ناڤێن وەلاتیێن عەرەب هاتینە تۆماركرن و تاپۆكرن، ئێك ملیۆن و 34 هزار عەرەب ل هەرێما كوردستانێ هەنە 21%ێ یا وەلاتیێن كوردستانێ عەرەبن و ئەگەر ئەو رێژەیە بگەهیتە 30%ێ، ماف هەیە داخوازا كۆرسیێن جڤاتا پارێزگەهێ بكەن و داخوازا پۆستێ قایمقامی بكەن.
ل گورەی ئامارێن بەردەست 31 هزار زارۆكێن عەرەب ل هەرێما كوردستانێ پەیدابووینە و رەگەزنامەیا هەرێما كوردستانێ وەرگرتیە و 7 قوتابخانە بۆ وەلاتیێن عەرەب هاتینە ڤەكرن، هاتنا ڤێ هژمارا زۆرا وەلاتیێن عەرەب مەترسیە ل سەر پاشەڕۆژا هەرێما كوردستانێ، وەبەرهێنەر ژی ب تنێ بۆ مفایێ خوە یێ مادی بەرهەڤە هەموو یەكەیێن خوە بفرۆشیتە وەلاتیێن عەرەب و رۆژەك دێ هێت هەرێما كوردستانێ دێ باجا ڤێ شاشیێ دەت، بیرا من دهێت ل سالا 2006ێ تنێ رێژەیا وەلاتیێن عەرەب ل هەرێما كوردستانێ 2%ێ بوو، من داخوازكر رێگری بهێتەكرن ل هاتنا وەلاتیێن عەرەب، بەرۆڤاژی زێدەبوونا رێژەیا وەلاتیێن عەرەب دێ پەشیمانی ل دووڤدا هێت و وەكی كەركووكێ دێ ببنە ئاریشە بۆ هەرێمێ، بەلێ چو پلان نینە ژلایێ حوكمەتێ و رەوش گەهشتیە ئاستەكی فەرمانبەر و پێشمەرگەیێن بەرێ هەنە كرێدارێن وەلاتیێن عەرەبن ل دهۆكێ ژی ئەو حالەتە هەنە و پێشمەرگەیێن پشكداری شۆڕشێ كری كرێدارێ وەلاتیێ عەرەبە، سەدان نموونە ژی ل بەر دەستێ مە هەنە و كرێدار هەیە شەڕێ داعش برینداربوویە و كرێدارێ وەلاتیەكێ عەرەبێ خەلكێ زیقارە.

رەمەزان زەكەریا

ل سنوورێ دەڤەرداریا ئاكرێ و ناوچەداریێن گردەسێن و بجیل و گردەسێن سالانە رێژا بەرهەمێ سامانێ ئاژەلی زێدە دبیت، ب رادەیەكی هەمبەری چەند سالێن بووری نوكە گەلەك زێدەتر بوویە، د هەمان دەم دا رێژا بەرهەمئینانا شیری و گوشتی ژی زێدە بووە.

ئەندازیار عیماد ئەحمەد، بەرپرسێ پشكا سامانی ئاژەلی ل رێڤەبەریا چاندنا ئاكرێ بۆ ئەڤرۆ گۆت: سالانە ل سنوورێ دەڤەرداریا ئاكرێ رێژا سامانێ ئاژەلی زێدەتر دبیت و وەلاتی پتر گرنگیێ ب ڤی سامانەی ددەن بۆ بابەتێ شیری و كرین و فرۆتن و گوشتی سالا 2018 دووماهی ئامار بۆ رێژا ئاژەلێن شیردەر گوشتی هاتە ئەنجامدان، بەلێ نوكە ئەو رێژە گەلەك بلند بوویە.
ناڤبری گۆتژی: ل دەڤەرێ رێژا مەر و بزنا دگەهیتە پتری 600 هزارایە، چێل و گولك 50 هزار هەنە، ئەڤ رێژە شیردەرن و یێن گوشتی نە ژی، ب ڤی رەنگی پتری 650 هزارا سەر ئاژەل هەنە ل ئاكرێ و دەردورێن وێ.
خویاكر: سالانە رێژا سەر ئاژەل و مەر و بزنا گەلەك زێدە بوویە، گەهشتیە دناڤبەرا 650 بۆ 700 هزاران، رۆژانە ل وەرزێ شیری 100 بۆ 120 تەنێن شیری دهێنە بەرهەمئینان، بەلێ ب تایبەت وەرزێ بۆهاری پاشی رێژا شیری كێم دبیت، بەلێ هەیڤا 2 بۆ 8 رێژا شیری گەلەك یێ زێدەیە، لێ پشتی هەیڤا هەشت رێژا شیرێ مەر و بزنا كێم دبیت ب تنێ یێ چێلا دمینیت.