‏‏نیهاد سالح

‏‏ژینگەه ئەو ستوونا ب هێز یا ژیانێ و ناسنامەیا نەتەوەیی یە، كو مانا نفشێ مرۆڤان ل سەر قادا گەردۆنی پێڤە گرێدایی یە، پاراستنا وێ نەبتنێ پاقژكرنە، بەلكو ئەركەكێ پیرۆز و نیشتمانی یە و دكەڤیتە سەر ملێ هەر تاكەكێ جڤاكی، ژینگەهپارێزی هەڤسەنگییا د ناڤبەرا ڤیان و ساخلەمی و ئارامیێ دایە، چونكو ئەو ژێدەرێ سەرەكی یێ ئۆكسجین و جوانیێ یە. مخابن, ئەڤڕۆ ئەڤ جوانییە دبیتە قوربانییا كێمبوونا هوشیارییا جڤاكی، دا كو مرۆڤ ب ئارامی ل هەنبەر خۆدێ و جڤاكی بژیت، پێدڤییە ژینگەها خۆ پاقژ ڕاگریت، وەك دهێتە گۆتن: «ئەوێ دارەكێ بچینیت، ل هەنبەر خۆدێ و مرۆڤایەتیێ یێ ئارامە.»
‏بنیاتێ قوتابخانە و مێشكەكێ بیرمەند، ژ ئیمان و باوەرا خۆدایی و مرۆڤایەتیێ دەستپێدكەت، بەریا پتر ژ 150 سالان، د ڕێبازا بارزانی دا، ژینگەهپارێزی وەك بنەمایەكێ سەرەكی و باوەریەكا نەهێتە گوهۆڕین هاتیە چەسپاندن. قەدەغەكرنا نێچیرا زیندەوەرێن كیڤی، بڕینا دارێن كەسك و تێكدانا سروشتێ دەشت و وەلات و زناران، نموونەیەكا پێشەنگ و بەردەوامە، پێدڤییە ئەڤ نموونەیا هوشیارییێ بۆ هەمی كوردستانێ بهێتە ڤەگوهاستن. ئەڤ ڕێبازە نیشاددەت كو پاراستنا ژینگەهێ و گەهشتن ب ئازادیێ، د ئێك شۆپ و مەودایێ مێژوویی دا دمەشن؛ لەوما هەر دارەكا دهێتە چاندن یان پاراستن، ڕێزگرتنە ل وێ ئازادییا ب خوین هاتی.
‏ئەڤ ئاخ، ئاڤ، هەوا و زیندەوەرێن ئەڤڕۆ ئەم ب ئازادی تێدا گەشت و سەیرانان دكەین، ب خوینا هزاران شەهیدان هاتیە پاراستن، هەر بهۆستەكا ئەڤێ ئاخێ، هەر بەرەك و دارەك، نیشانەكا بەرگریێ یە و پارچەیەكە ژ لاشێ جانگۆریێن مە. هەر پارچەكا گلێشی یا دهێتە هاڤێتن یان هەر دارەكا دهێتە بڕین، بێڕێزییە ب وێ خوینا پاقژ یا بۆ ئازادییا نیشتمانی هاتیە ڕشتن. دایكێن نیشتمانپەروەر جەگەرێن خۆ بەخشین دا كو مرۆڤێ كورد ب سەرفرازی بژیت، لەوما پاراستنا پاقژیا ژینگەهێ، كێمكرنا بارێ خەما وان دایكانە كو ب ڕۆندكێن چاڤێن خۆ لاشێ كوڕێن خۆ یێن شەهید شۆشتین، وەفاداری بۆ شەهیدان ئەوە ئەم وەلاتەكێ ئاڤا و پاقژ ڕادەستی نفشێن پاشەرۆژێ بكەین.
‏‏د بیاڤێ قانوونی دا، برینا داران ب مەرەما بازرگانی و پیسكرنا ژینگەهێ ب تاوانەكا مەزن دهێتە هەژمارتن، ل دویڤ قانوونێ، هەر كەسێ 3 سەرپێچیان ئەنجامبدەت دێ هێتە سزادان ب كۆژمێ 500 هزار هەتا 3 ملیۆن دیناران. هەروەسا بڕیارا نوی یا ڕێڤەبەرییا هاتنوچوونا دهۆكێ، كو سزایێ 40 هزار دیناران ل سەر هەر شۆفێرەكێ گلێشی ژ جاما ترۆمبێلێ پاڤێژیتە دەرڤە، پێنگاڤەكا گەلەك گرنگ و پێدڤی یە، ئەڤ سزایە ب ڕێیا هەمی سیستەمێن تۆماركرنا سەرپێچیان وەك كامیرەیێن چاڤدێریێ دهێنە چەسپاندن، دا كو ئێدی قانوون ڕێ نەتە چ كەسێ دێم و جوانییا باژێڕ، گوند و ژینگەها مە تێك بدەن، یاسا ل ڤێرێ وژدانا جڤاكی و بجهئینانا عەدالەتا خۆدایی یە ل سەر عەردی، بۆ ڕێزگرتن ل پیرۆزیا ژیانێ.
‏‏ل دوماهیێ، ژینگەهپارێزی ئەركەكێ ئایینی، ئەخلاقی، نەتەوەیی و مرۆڤی یە، پێدڤییە گەشت و سەیرانێن مە ڕەنگدانەڤەیا ئاستێ شارستانیەت و ڕەوشەنبیرییا مە بن، پاقژ ڕاگرتنا جهێن گەشتیاری، ڕێزگرتنە ل وێ ئەمانەتا خودێ دایە مە و ل وێ خوینا گرانبها یا شەهیدان ڕشتی. وەرن ئەم هەمی پێكڤە سروشتێ كوردستانێ بپارێزین، چونكو ژینگەه مالا مەیە و پاراستنا وێ، پاراستنا ژیانێ بخۆ یە، دڤێت ئەم بگەهینە وێ باوەریێ كو مفایێ دارەكا زیندی، 1000 جاران پترە ژ بهایێ زێڕ و ئەلماسی. پاراستنا ڤێ ئاخێ، ئیمزاكرنا پەیمانا وەفاداریێ یە دگەل خۆدێ و جڤاكی و كەرامەتا نیشتمانی.

‏‏نیهاد سالح رەشید

‏‏كۆڕێ لۆتكەیا بەرخۆدانێ د زنجیرەیا ستەمكاریێ دا د دیرۆكا سیاسی یا دەولەتا ئیراقێ دا، ئەقلییەتا حوكمڕانیێ هەمی دەمان ل سەر بنەمایێ نكۆلیكرن و حەلاندن و ژێبرنا ناسنامەیا نەتەوەیی یا گەلێ كورد ئاڤا بوویە، ژ سەردەمێ مەلكان بگرە هەتا گەهشتنا دكتاتۆریەتا بەعسا فاشی، زنجیرەكا بەردەوام یا دوژمنكاریێ، توندوتیژیێ و زۆرداریێ ل دژی گەلێ مە هاتە پەیڕەوكرن، كو ئارمانجا وێ یا دوماهیێ جینۆسایدكرنا ئیرادەیا كورد و گوهۆڕینا دیمۆگرافیا كوردستانێ بوو، داستانا «كۆڕێ» ل نیسانا ١٩٩، تەنێ بەرەڤانییەكا سەربازی یا سادە نەبوو، بەلكو راوەستانەكا دیرۆكی و فەلسەفی بوو ل هەمبەر وێ «ستراتیژیا پاقژكرنێ» یا كو رژێمێن ئێك ل دویڤ ئێكێن بەغدا باوەری پێ هەبوو، ل ویستگەها كۆڕێ، مەنتیقێ هێزێ و تانكێن داگیركەران ل بەرانبەر مەنتیقێ حەق و ئیرادەیا نەتەوەیی یا گەلێ مە ب سەرپەرشتیا راستەوخۆ یا سەرۆك مەسعوود بارزانی تێكشكەست و هەڕفی.
‏ژ مەنتیقێ ژناڤبرنێ‌ بۆ پارادایما دانوستاندنێ، سەركەفتنا پێشمەرگەیێن قەهرەمان ل كۆڕێ، وەرچەرخانەكا جیۆپۆلۆتیك و ستراتیژی د هەڤكێشەیا هەڤڕكیێن كورد و بەغدا دا دروست كر، بۆ ئێكەم جار د مێژوویێ دا، رژێما دكتاتۆر یا ئیراقێ نەچار بوو چۆكێ بۆ ئیرادەیا نەتەوەیی دابەت و ل جهێ زمانێ ئاگر و كیمیاوی، زمانێ دانوستاندنێ بكاربینیت، ئەڤ ویستگەهە بوو بەیاننامەیا مەزن یا مانێ، كو تێدا پێشمەرگەی ڕێ ل كارەساتەكا دی یا مرۆڤی گرت كو رژێما بەعس پیلان بۆ دارێژت بوو دا كو قەوارەیێ سەرهەلدانێ ب تەمامی ژناڤ ببەت، كۆڕێ سەلماند كو هەرچەندە ستەمكار یێ ب هێز و چەك بیت، لێ ئیرادەیا نەتەوەیی كو ل سەر بنەمایێ دادپەروەری و حەقێ رەوا ئاڤا بووبیت، چ جاران ناهێتە بەزاندن، ئەڤ سەركەفتنە بنەمایێ وێ قەوارەیا سیاسی بوو كو ئەڤرۆ وەك هەرێما كوردستانێ پێناسە دكەین، هەڤڕكیێن سەردەم و بەردەوامیا ململانێیا سیاسی، ئەڤرۆ كو ٣٥ ساڵ ب سەر وێ داستانێ دا دەرباز دەبن، ئەنجامێن وێ بۆ مە رۆنتر دبن؛ ئەم دبینین كو هەر چەندە شێوازێ حوكمڕانیێ ل بەغدا گوهۆڕیە، لێ هێشتا هندەك ناڤەندێن بڕیارێ و ئەقلییەتێن شۆفینی هەول ددەن ب هەمان مەنتیقێ فشارێ، لێ ب رەنگەكێ یاسایی، دارایی و ئابووری، مەترسیێ ل سەر هەرێما كوردستانێ دروست بكەن، فشارێن بڕینا بودجەی، مووچەی و هەولدان بۆ لاوازكرنا دەستهەلاتێن دەستووری یێن هەرێمێ، درێژەپێدەرا هەمان وێ زنجیرا ستەمكاریێ یە كو جاران ب تانكان دهاتە كرن، ل ڤێرێ پێدڤیا مە ب ڤەگەڕیانێ هەیە بۆ «روحا كۆڕێ» ئەو روحا كو تێدا تەبایی، ئێكرێزی و پێگری ب رێبازا پیرۆزا نەتەوەیی تاكە چەكی جەوهەری بوون بۆ تێكشاندنا هەمی پیلانان.
‏سەركردایەتی و پاراستنا قەوارەیێ نەتەوەیی، سەركەفتنا مە د هەمی قووناغێن دژوار دا، هەردەم گرێدایێ وێ چەندێ بوویە كو سەركردایەتییا مە ب رێبەریا حەكیمانە یا سەرۆك بارزانی، هیچ دەمەكێ ل سەر مافێن نەتەوەیی و دەستووریێن گەلێ مە سازش نەكریە و شكۆیا كوردستانیان نەكریە قوربانی بەرژەوەندیێن دەمكی، داستانا كۆڕێ وانەیەكا هەردەمی و زیندی ددەتە بەرەبابێن ئەڤرۆ كو مانا مە وەك مللەت، د بڕیارا مەیا سەربەخۆ و پاراستنا قەوارەیێ هەرێمێ دایە، پەیاما مە بۆ هەمی لایەنان ئەوە: «كۆڕێ بەیاننامەیا هەتا هەتایە كو چ هێز نەشێت ب بڕیاران كوردستانێ ژناڤببەت.» وەفاداری بۆ خوینا شەهیدێن كۆڕێ، ل ڤی سەردەمی د پاراستنا ئێكرێزیا ناڤخۆیی و راوەستان ل هەنبەر فشارێن نەدەستووری یێن بەغدا دا خۆ دەردێخین و وەكو چیایان نالڤن و وەكو برویسیان ئارمانجان دگرن.

نیهاد سالح رشید

درۆنێن ڕەش ئەڤرۆ نە تەنێ ئاسمانێ مە یێ پاقژ دهەژینن، بەڵكو دڤێت ب وێ ڕێكێ بەرزترین پیرۆزیا مە، كو ڕوومەت و ئیرادەیا مەیه، بشكێنن. هێرشكرنا سەر مالا جەنابێ نێچیرڤان بارزانی، سەرۆكێ هەرێما كوردستانێ، نە تەنێ كارەكێ ترسنۆكانە یێ سەربازی یە، بەڵكو ئاشكرایەتییەكا بێ پەردەیە دژی گەلەكێ كو د دیرۆكێ دا چ جاران ل بەرامبەر چ جەرباندنەكێ چۆك نەدانایە. دوژمن ب ڤێ هەولا خوە یا بێ وژدان نزانن كو كوردستان تاقیكرنا ترسێ نینە، بەڵكو تاقیكرنا ئیرادەیێ یە. ئەڤ هێرشە نەك هەر ورەیا مە لاواز نەكر، بەڵكو ئاگرێ نیشتمانپەروەریێ د دلێ مە دا گەشتر كر و ئیرادە وەكو زنجیرەیا چیایان ب هێز ئێكڕێزی كر.
دانانا خالان ل سەر پیتان
جەنابێ سەرۆك مەسعود بارزانی د هەلوەستەكێ ڕوون دا دووپات كر كو: «ئەڤ هێرشە ب لژنە و برۆسكەیان چارەسەر نابن؛ دڤێت بەغدا خۆ ئێكلا بكەت.» ئەڤ هەلوەستێ د ڤی دەمێ چارەنڤیسساز دا، وەك بڕیارەكا مێژوویی هات بۆ دانانا خالان ل سەر پیتان. سەروەرێ كوردان ب ڤێ پەیاما ڕاستەوخۆ نیشانی بەغدا دا كو سەردەمێ چاڤەڕێبوونا بڕیارێن بێ ئەنجام و لژنەیێن بێ مفا ب دووماهی هات. ئەڤ پەیامە سێ خالێن كورت د خۆ دا دگریت: بێمفاییا لژنەیان، ئێكلاكرنا بڕیارێ، و پاراستنا قەوارەیێ هەرێمێ وەك هێلا سۆر. كوردستان بڕیارە، نە تەنێ خاكە.
دهۆك: ئاسێگەها پیرۆز و ڕەواتیا مانێ
ئەوێن ئەڤرۆ ب هێزا مووشەكان هێرشی مە دكەن، بلا بزانن ئەڤ خاكە پاراستیێ خودایێ مەزنە. چیایێ جودی ل كوردستانێ، كو د قورئانا پیرۆز دا ب شانازی باس لێ هاتییە كرن: «وَاسْتَوَتْ عَلَى الْجُودِيِّ»، تەنێ پارچەیەك جوگرافی نینە؛ بەڵكو نیشانەیا سەركەفتنا حەقیێ یە ل سەر زۆرداریێ. ئەو جهێ ڕزگاربوونا سەفینا نوح (س) و مانەڤەیا مرۆڤایەتییێ یە. كوردستان ژی ئەو كەلها پۆڵایینە كو هەر كەسێ بڤێت وێ بشكێنیت، دێ خۆ د ناڤ لاپەڕێن ڕەش یێن دیرۆكێ دا بینیت. ئیرادەیا مە ژ هەمی چەكخانەیێن وان ب هێزترە، چونكو مە باوەری ب ڕاستیا دۆزا خۆ هەیە.
ئێكڕێزی: چارەنڤیس و بەرسڤا تیرۆرێ
ئێكڕێزی بۆ مە نە هەڵبژاردنە، بەڵكو چارەنڤیسە. بلندترین هەلوەستێ نیشتمانی یێ ئەڤرۆ، ئێكگرتنا ناڤمالا كوردستانێ یە كو بەرسڤەكا كێم وێنەیە دژی ڤێ بوردۆمانێ. دوژمنێ هزر چەپەل ب هەر ڕەنگەكێ تیرۆرێ دڤێت مە بێ ئومێد بكەت و دەنگێن مە جودا بكەت، لێ نزانن كو ئەم ل دەمێن مەزن دا، زۆرتر دبینە ئێك. هەر وەك جەنابێ سەرۆك مەسعود بارزانی دووپات كری: «ئیرادەیا گەلێ مە ب چ چەكان ناهێتە تێكشكناندن». ئێكڕێزیا مە، مەزنترین شكەستنە بۆ نەیاران و پیڤانەكا هەرە بهێزا پاراستنا كەرامەتا مە یە.
هێزا مە وەك تاشەبەریێن چیاینە
بلا هەمی جیهان بزانن؛ هێز و خۆڕاگریا گەلێ كورد وەك تاشەبەریێن چیایێن مە نالڤن و ناهێنە گوهۆڕین. مە فێری چەماندنێ ناكەن، چونكو پشتا مە ب وان چیایان ڤە هاتییە گرێدان كو چ جاران چۆك نەداناینە. ئەم ناچەمین و نامرین، ئەم دێ هەر مینین ئازا و سەربلند؛ وەك چیایێ جودی یێ پیرۆز، وەك مەتین و گارە یێن خۆڕاگر، وەك زوزك و هندرین یێن دژوار، و وەك زنجیرەیا زاگرۆس یا مێژوویی. كوردستان كەلها نەشكێنە، و گەلێ وێ زنجیرەیا چیایێن بهێزە، گرێدای و نەگۆڕن. ئەم نەدشكێین، نەدچەمین، و دێ هەر ب سەربلندی ل سەر ڤی خاكی ژین.

نیهاد سالح رشید

د وێ سپێدەیا خویناوی دا، دەمێ پەتێ سێدارێ ل بەرامبەر قامەتا بلند یا پێشەوا قازی محەمەد تەواندی، مێژوویێ ب خوین نەخشەڕێكا نوی بۆ مان و نەمانا كوردان كێشا. ئەو دەنگێ ژ بن سێدارێ هاتی، نە تنێ خاترخواستنەك بوو، بەلكو هاوارەكا ئەزەلی بوو بۆ نەتەوەیەكێ كو د ناڤ گەمارۆیا ئاگری دا، ناسنامەیا خۆ ب خوین و قوربانیێ دپارێزیت. ئەڤرۆ، پشتی تێپەربوونا زێدەتر ژ هەشتێ سالێن پڕ ژ ستەم، هێشتا وەسێتناما پێشەوا وەك «دەستوورێ مانێ» ل سەر مێزێن سیاسەتا ئەڤرۆ دبریسقیت؛ چونكو دوژمن ب هەمان كین و حەسیدی، د هەوڵا خەندقاندنا ئارمانج و مافێن مە دایە.
شكۆیا سێدارێ و كاروانێ خوینا پێشەوایان خەباتا كورد، ناسنامەیا وان قارەمانانە یێن كو سێدارە كرینە نیشانا شانازیێ. ژ شێخ عەبدولسەلامێ بارزانی ل مووسلێ ب سەربلندی چوو بەر سێدارێ، تا شێخ سەعیدێ پیران، سەید ڕەزا، ئیحسان نووری پاشا، سمكۆیێ شكاك و شێخ مەحموود. ل ناڤ جەرگێ ڤێ خەباتێ دا، مەلا مستەفا بارزانی وەك قوتابیەكێ دلسۆزێ كۆمارێ و هەلگرێ ئالایێ‌ كوردستانێ، ژ مەهابادێ بەر ب ئاراس ڕێكا مانێ گرتە بەر و بۆ سیمبۆلا بەرخوەدانێ. وان وەریسێ سێدارێ ماچیكرن دا كو نەتەوا كورد ل بەرانبەر پەتێ سێدارێ و بن دەستیێ سەرێ خۆ نەچەمینیت.
سویندا دایكان و خۆراگرییا پێشمەرگەی
پایەیا بلند یا ڤێ خەباتێ ل سەر شانیێن دایكێن جەگەر سۆتی ڕاوەستیایە؛ ئەو دایكێن ب خۆراگرییا پۆلایێن جەگەرێن خۆ پێشكێشی ئاخێ كرین و رۆندك كرینە هێڤێنێ شۆرشێ و هێزا پۆلایین ددەتە پێشمەرگەیێن قارەمان كو وەك زێڕەڤانێن نەتەوەیی ل سەنگەرێن مەترسیێ خوینا خۆ دڕێژن دا ئاخ ب ئازادی بمینیت. ئەگەر ل دویڤ وێ فیداكاریا پێشەوا ل سەر سێدارێ بۆ ناسنامەیا مە، ئەڤرۆ پێشمەرگە ب سینگی خۆ ڕەوڕەوا داگیركەریێ ڕادەگریت.
ل بەر سیبەرا ڕێبەریێ و وەفاداری بۆ ئالایی و د ڤێ جەنجەلا سیاسی و گەمارۆیا ئاگری دا، سەرۆك مەسعود بارزانی وەك خۆدانێ گەلێ كورد، ئەركێ گرانێ پاراستنا ڤێ پەیامێ ل سەر ملێن خۆ هەلگرتییە، ئەو ئەڤرۆ هەلگرێ وێ ئالایێ یە كو قازی محەمەد سپاردبوو بارزانیێ نەمر. سیاسەت و سەباتا سەرۆك بارزانی ل سەر بنەمایێ ئێكدەنگیێ و پاراستنا سەروەریا كوردستانێ، وەرگێڕانا كریارا وەسیەتا پێشەوایە. ئەو ڕێبەرێ ڕێكا «مانونەمانێ» و ڕاوەستیایە ل بەرانبەر هەر جۆرە تەسلیمبوونەكێ یان پاشەكێشیەكێ ژ مافێن رەوا.
د قودرەتا ئێكگرتنێ؛ پەناگەها ڕزگاریێ دوژمنێن مە ژ هەر جار دژوارترن؛ چاڤ ب ئارامیا مە رانەبووین، د هەولا هندێ دانە وێ ئازادیا ب خوینا سەروەران هاتیە دەست نەهێلن. حەسویدییا وان ب قەوارە و ناسنامەیا مە، یا وەل وان كرین كو هەمی ناكۆكیێن خۆ یێن مێژوویی ل لایەكێ دانن و تنێ ل سەر خەندقاندنا ئارمانج و مافێن مە ببەنە ئێك. پێشەوا دبێژیت: «ڕەمزا سەركەفتنا هەوە د ئێكرتنێ دایە». ئەڤرۆ پاراستنا قەزیا كوردی، پێدڤی ب وێ چەندێ هەیە كو ئەم ئێكگرتنێ بكەینە سەنگەرێ خۆ، چونكو دوژمن جوداهیێ نا‌ئێخیتە د ناڤبەرا چ كوردان دا، ئارمانجا وان ژناڤبرنا رەه و ڕیشالێن مەیە.
یان سەربلندی، یان فەنابوون!
وەفاداری بۆ خوینا قازی محەمەد و ئازارێن دایكێن شەهیدان، تنێ ب ئێك ئارمانجیێ دهێتە سەلماندن، وەسیەتا پێشەوا «سروودا مانێیە» بۆ هەر كوردەكێ خودان شەڕم، ل ڤێ سەردەمێ ئاگری، بێی ئێكگرتن چوو پەناگەهێن مە نینن، بلا مێژوو ل سەر مە نەنڤیسیت كو ئەم بەرەبابێن دۆزا پارچەبوونێ بووین؛ یان دێ پێكڤە بەرەڤ گوپیتكا سەروەریێ هەڵكشێین، یان دێ د ناڤ حەسیدی و كینا داگیركەران دا فەنا بین. ڕێكا مە ڕوونە: ئێكگرتن قەدەرا مە یە و سەركەفتن پاداشتێ خوراگرییا مەیە.

نیهاد سـالـح رەشـید

‏ئازادی نەخەلاتە ب ساناهی بهێتە بەخشین، بەلكو قوربانیدانە ب خوینێ دهێتە نڤیسین. دیسا كوردستان كەفتە بەر پەلامارەكا دوژمنكارانە و بێ پاساو، وەكو جەنابێ سەرۆك مەسعوود بارزانی ڕاگەهاندی: «پێشمەرگە ئازیزترین و بە نرخترین سەرمایەی گەلەكەمانە»؛ لەوما هەر تیرەكا غەدرێ ئاراستەی ڤێ هێزا پیرۆز بیت، هێرشە بۆ سەر ڕەوشت و كەرامەتا هەمی كوردەكی. ئەو مۆشەكێن ب نامەردی لاشێ گەنجێن مە دكەنە ئارمانج، نزانن كو هەر دلۆپەكا خوینا ڤان شەهیدان چرایەكێ نوی یە و مۆرەكا سۆرە ل سەر ناسنامەیا ئازادی و دەولەتبوونێ، كو دبیتە كەڤرەكێ بنگەهین ل شەنگستەیێ ئاڤاكرنا دەولەتا سەربەخۆیا كوردستانێ ل پاشەڕۆژێ دهێتە دانان.
‏كاروانێ شێرێن نەمر.. شەش ستێرێن گەش
‏شەش شێرێن نیشتیمانی؛ (كەیوان، رامین، ڕێبەر، پشتیوان، شەهاب، زكری) نە ب مرنێ، بەلكو ب شەهیدبوونێ ژیانەكا نوی دەستپێكرن. چیرۆكا شەهید كەیوان، دیرۆكەكا پڕ ل سەربلندی یا ڤێ نەتەوەیێ یە. كەیوان كوڕێ قارەمانەكێ بریندارێ شەڕێ تیرۆرستێن داعشە، ئەڤرۆ ب مۆشەكێن غەدرێ یێن ئیرانێ گیانێ خۆ فیدا كر. ئەڤە مەزنترین بەلگەیە كو كوردستان د ناڤبەرا بەرداشێن زۆرداریێ دا دهێتە گڤاشتن، بەلێ چ جاران ناهێتە شكاندن. كەیوان كو تەنێ دەه هەیڤ بوون جلیێن زاڤاینیێ پۆشین و هەڤژینا وی ل چاڤەرێیا جگەرگۆشەیەكێ بوو كو كەیوان نەگەهشتە وێ ڕۆژێ ب باوەش بكەت؛ بابێ وی یێ بریندار دبێژیت: «كەیوان یێ هەمی كوردانە، ئەو قوربانیێ خاكی یە و كورێ ڕێبازا بارزانی یە.»
‏ڕێبازا بارزان.. قوتابخانا شەرەف و مانێ
‏مەزنترین هێزا مە، لێڤەگەڕ و مەرجەعێ مە سەرۆك بارزانی یە. پتری سەد سالانە مە ب ڤێ ڕێبازێ خەبات یا كری و ئەم ل سەر ڤێ ئەزموونا گران یێن بەردەوامین. وەكو بابێ شەهیدەكی ب سەربلندی ڤە دبێژیت: «ئەم ب زووری كێم دمرین، ئەم هەر شەهید دبن، ئەم دزانین دێ كورێن مە شەهید بن، بەلێ ئەڤە ڕێبازا مەیە، ئەم دگەل بارزانی نە و چ جاران لێڤە نابین». ئەڤە فەلسەفا مللەتەكی یە كو ب مرنێ نامریت، بەلكو ب شەهیدبوونێ دژیت. هەر ئەو بابێ پڕ شەرەف دبێژیت: «ئەم فێری هندێ بووینە دەستان بدەینە چەكی بۆ «چوونێ» نەك بۆ «هاتنەڤە»؛ ئەگەر بنەمالا مە هەمی ببنە قوربانی، ئەم ڕێكا خۆ یا پیرۆز لا نادەین.»
مرادا شەهیدبوونێ و خۆڕاگرییا پۆڵایین
‏هەلوەستێ بابێ شەهید پشتیوان، مەزناهیا ڤێ نەتەوێ نیشا جیهانێ ددەت، دەمێ ب گرنژینڤە دبێژیت: «دڵتەنگ نینم، چونكو كورێن هەمی كوردستانێ ب كورێن خۆ دزانم.» ئەو ب باوەریەكا توند داكۆكیێ ل سەر وێ چەندێ دكەت كو سەر و مالێ مە فیدای بارزان و كوردایەتیێ بیت. هەروەسا، داستانا شەهید شەهاب، كو مرادا وی دڤیا شەهید بیت چونكو بنەمالا وان هەر شەهید دبن، ئەو ژی گەهشتە مرادا خۆ و ئەو پلا پیرۆز وەرگرت. پێنج برایێن وی ئامادەنە خۆ گۆری ئاخێ بكەن، ئەڤە پەیامەكا زەلالە: چەند مە شەهید بكەن، پتر هێزێ ددەنە مە. ٣٠ بریندارێن مە ب ئازارێن خۆ، داستانا خۆڕاگریێ دبەنە سەرێ چیا و ئاسمانی و دبێژنە دوژمنی: ئیرادەیا مە ناهێتە هەژاندن.
‏ئەم ب هەمان دەنگێ كەسوكارێن شەهیدان دبێژین: ژیانا بندەستیێ قەبوول ناكەین و ئازادیێ تنێ ب خوینێ دكڕین. سەرۆك، ئالا، پێشمەرگە، خاك و نشتیمان پیرۆزیێن مە نە كو ب چ مۆشەكێن ناهێنە هەژاندن. هەتا سەرۆك بارزانی مەرجەع و ڕێبەرێ مە بیت و هەتا دایكێن كورد ب ڤێ مەردیێ كورێن خۆ پێشكێشی نیشتیمانی بكەن، كوردستان دێ هەر ب سەربلندی مینیت، هەبوونا مە ب وان ڤەیە، و كەرەمەتا مە ب ڤێ خوینێیە؛ خوین بۆ رزگاری و ئازادی و دەولەتبوونێ یە.

نیهاد سالح

ریفراندۆم ژ دایكبوونا دەولەتا كوردستانێ، و بریارەكا جەرگ پولای یا نشتیمانی ژ لایێ رێبەرێ نشتیمانی مەسعود بارزانی ڤە بوو، ریفراندۆما سەرخۆبوونا كوردستانێ بۆ پاراستنا ئاخ و مافان و نەچەماندن ل بن دارێ زۆرداریێ و پاراستنا ناسنامە و زمان و ئالا و پیرۆزیێن گەلێ كوردە و قەبیلنەكرنا قانوونێن دژی مرۆڤایەتیێ یێن رژێمێن ئێك ئێكە یێن ژناڤچوویێن ئیراقێ ل هەنبەری گەلێن كوردستانێ بكارئیناین.
كوردستانیان ل سەرانسەری دونیایێ بریارا ریفراندۆمێ بجهئینا، هەر چەندە دژیایەتی ژلایێ ئیراقێ‌ و توركیا و ئیران و ئەمریكا و ئەورۆپا و دەولەتێن عەرەبی هتد.. هەبوو. بەلێ ئەڤ دژیایەتیە بەر ب بارۆڤەیێن ئەشقا نشتیمانپەروەران كەڤتن و بەرزەبوون، گەل دوور ژ حسابا دژبەری و دوژمنان بریارا سەرخۆبوونا كوردستانێ دان، چونكو دوژمن رۆژانە ژەهرا خۆ ل ناڤ جەرگێ مە درێژیت، ریفراندۆم مەلزەما ئیرادە و هێز و دادپەروەری و ڤیان و ژیانا مللەتێ كوردە ل سەر بنگەها ماف پاراستن و هێزا گیانی، دڤێت جیهان رێزێ لێ بگریت، نیەتێن پاقژ رێنیشادەرن بۆ ئامانج و هیڤیان، هزرمەندیا سەرۆك بارزانی ژبۆ ئارمانجەك باش بوو، ل 7ی حوزەیرانا 2015 كۆمبوونەك ب سەرپەرشتیا سەرۆك مەسعود بارزانی ل پیرمام ب ئامادەبوونا هەمی پارت و لایەنێن كوردستانێ هاتە ئەنجامدان، بڕیارا راپرسیێ دا كو ڕۆژا 25 ئیلۆنا 2017ێ وەكو ڕۆژا ئەنجامدانا ڕیفراندۆما سەرخۆبوونا هەرێما كوردستانا ئیراقێ و ناڤچەیێن كوردستانی یێن دەرڤەی ئیدارا هەرێمێ، ریفراندۆم بتنێ دەنگدان نەبوو، بەلكو پەیمانا نیشتمانپەروەریا هەمی كوردێن جیهانێ بوو كو مافێن خۆ دخوازن، تشتێ قایل و پشتراست دكەن بەری بكەڤن خەوێ، خۆ ل هەڤدو دكەن و ب تەڤاهیا رۆژێ گەشبینن، تێكۆشانێ دكەن دا ژ بن دەستی و میحنەتا بیانیان ئازادبن و نەفرەتا كەسەكێ قەبیل ناكەن.
راپرسیا مللەتەكێ دل سپی و خودان خەونێن مەزن و پڕ مرۆڤایەتی، بوویە تاپۆیا رەش بۆ سەرخۆبوونا كوردستانێ، ئەگەرێن ریفراندۆمێ چ بوون؟ مللەتێ كورد بەر ب جینۆساید و ئەنفال و كوشتارێن ب كۆم و گوند خرابكرن و كێمیابارن و عەرەبكرن و مال سۆتن و تالانكرن و بهایێ مرۆڤ و ئایین و پیرۆزیان وێرانكرن و كورد برسی و دەربەدەر و بن ئاخكرن، نەجێبەجێكرنا دەستووری و تایبەت مادێ 140 و نەهێلانا شەراكەت و برایەتیێ و قوتكرنا مووچەیێ فەرمانبەران و كێمكرنا بۆجەیا هەرێمێ و هەولا حەلاندنا كوردان ل سەر ئەردی، لەورا گەلێ كوردستانێ ستەما دوژمنی قەبوول نەكر و شۆرشا نشتیمانی ب ریفراندۆمێ كرن ب خوینێ گوتن بەلێ بۆ سەرخۆبوونا كوردستانێ، بۆ ئازادی و سەرخۆبوونێ و وارەكێ بێ ئێش و ئازار و دژواریێن ژیانێ ل 25/9/2017 ێ خەلكێ كوردستانێ ب هەمی لایەن و پارت و ئۆل و ئایینان ب تەخ و چینێن جڤاكی ڤه 93% پتر گۆت بەلێ بۆ سەرخۆبوونا كوردستانێ، دیسا سوپایێ ئیراقێ هەولا جینۆسادان دا دژی كوردان، بەلێ سەرۆك و پێشمەرگەی شەڕێ كوردستان یان كورد قران كر و كورد مان و دوژمن شكەست و شەرمزار ڤەگەریان، چەند كارەسات دژوارتر لێهاتبن و هەولا ژناڤبرنا خەلكێ كوردستانێ هاتبیت كرن، بەلێ ئەم نامرن و تەسلیم نابن، سۆز و پەیمان بۆ رزگاریێ نوی دكەن، كارەسات بووینە چیرۆك و وانە و نامە بۆ جیهانێ چاوا مللەتێ كورد دهێتە ژناڤبرن.
دیرۆك خۆیا دكەت و باسێ مێرخاسی و مێرانی و سەركەفتن و دەولەتبوونا كوردان كریە چاوا سال ب سال خوین و رۆندك هاتینە باراندن و ڕشتن، مخابن لایەنەكێ كرێگرتی و هەلگرێن بیر و بۆچوونێن فاشل و گەمار بوونە ئالەتێن دابرینا ئاخا كوردستانێ و دەڤەرێن عەرەبكرنێ، بەلێ چو جاران خائین نابنە دەستهەلات، هەر سەرفەرازی بەهرا مللەتێ شەرەفمەند و خۆدانێن دەنگێن بەلێ بۆ سەرخۆبوونا كوردستانێ یە، ریفراندۆم تاپۆیا دەنگێن ئازادی و خەباتا بێ ڤەمان و دادی و ئومێدەكا گەش بۆ دەولەت بوونێ یە، ئەم جان فیایداینە كراسێ مرنێ ل بەر خۆ بكەین دەست ژ بهۆستەكا ئاخا كوردستانێ بەرنەدەین، مەسعود بارزانی دبێژت: (ئەم دێ مرنێ هەلبژێرین و خۆ بۆ كەسێ ناچەمینین.) ئەڤرۆ ئەم خۆدانێن ریفراندۆمێ نە و هەناسا ئازادی و دەولەتبوونێ ئەم هەلدكێشین

نیهاد سالح

مللەتێن خودان رێبەر چو جاران نامرن، هەر مللەت و نەتەوە و وەلاتەكێ هەبیت دوژمن هەنە و ئەو دوژمنە سەرۆكانیا داگیركرن و تێكدان و وێرانكرنا وی وەلاتی نە، مللەتێ كورد گەلەك نەیار هەنە، برایەتیا دوژنی ئاگرە، هەڤالینیا گورگی كارەساتە، بۆ هەر وەلاتەكی ئازادی گیانە بێ ئازادی مرن و نەمان ئەگەرن، گەلێ كوردستانێ زیانا چ گەل و وەلاتان نەڤیایە و نەڤێت، ب درێژاهیا دیرۆكێ ل قادا خەباتێ شۆرەش و بەرخۆدان د بەردەوامن بۆ بەرەڤانی كرن ژ گەل و ئاخ و نشتیمانی.
هەر دەما جیهان ژناڤچوو مللەتێ كورد شۆرەشێن نشتیمانی ب دوماهی دئینیت، بەلێ هەر مللەتەك زیندی دمینیت، چونكو خودانا ب هزاران شەهیدانە، ب دەهان سالان ستەم و تالان و وێران كرن ب سەری هاتینە و خودێ مافێ مەزلۆمی بۆ بكەرێن زولمێ ناهێلیت، ئەڤە ژبۆ هندێ كوردستان وەلاتەك پڕ زاخ و خێر و بەرەكەت و سروشتێ جوانە، چیا و دول و نهال و زنار و دەشت و رویبار و كانی و كانزایێن سروشتی و كەش و هەوایەكێ گونجای بۆ هەمی بەروبومێن چاندنێ، و كارگەهێن پیشەسازی، جهەك پیرۆزه خودایێ مەزن دبێژت: (وَاسْتَوَتْ عَلَى الْجُودِيِّ) ڤێ چەندێ وەكر گەلەك نفشێن بیانی مینا تورك و فارس و عەرەب هتد… دلتێبەردانا خێر و بەرەكەت و پیرۆزیا كوردستانێ بكەن و ب مولكێ خۆ بهەژمێرن، و ب درێژاهیا دیروكێ هەمی هەولێن داگیركرنێ ئەنخام داینە، كورد ب سەدان جاران جینۆساید كرینە، بەلێ شۆرەش و تێكۆشینا گەلێ كوردستانێ بەردەوامە بۆ ژیانەكا پڕ سەروەری، سەرۆك مەسعود بارزانی دبێژت: (من ژیێ خو هەمی دەربازكر ب شەڕەك مەشروع ڤە و من باوەری ب كەرب و كینێ نینە) ژ چاخێن كەڤنار و پاش ژ سالێن 1919، 1930، 1961، 1976، هەتا ئەنفالێن رەش ل 1988، سەرهلدانا 1990ێ، كۆچبەریا ملیۆنی بۆ سنوورێن ئیران و توركیا، 2014ێ شەڕێ داعش، 2017 داستانا پردێ و سحێلا، 2025 برینا رزق و مووچەیێ خەلكێ هەرێمێ، بەلێ چۆك نەهاتە دانان بۆ چ دوژمنان، ئەڤڕۆ ژی هەر ئەو رۆژن كو مللەتێ كورد بەرەڤانیێ ژ ئاخ و مافێن خۆ بكەت، و بزانن كوردستان ژ كولوخێن شەهیدان ل شینوارێن توب و كێمیابارانان، رویبارێن خوینێ سۆڕ كرین، برینێن دلێ مە پرت پرت كرین و جهێن زیندان و ئەشكەنجەدانان ل وەلاتێ مە بوون جهێن پارك و بێهنفەدانان، خوزەیێن عەسكەری كرینە قافكێن گولان و گول تێدا چاندن, خۆیا دبیت مللەتێ كورد نەفرەتان ل شەڕێن وێرانكەر دكەت و تولان ڤەناكەت، نەچارە بەرەڤانیا مان و ئاخێ بكەت، و ئامادەیە پێشوازیا ئاشتی و ئازادیێ بكەت، ژ بەر هندێ گەلێ كورد وەكو مللەتەكێ دێرین ل رۆژهەلاتا ناڤەراست جەرگ و دلێن خۆ كرینە مەتال د بەرەڤانیكرنێ دا بۆ بدەستڤەئینانا راستییێ یا كو دگەل زولم و زۆرداریا هەر دیكتاتۆرەكێ فاشیزم جیاواز، پشتی هەر وێرانكرن و تالانكرن و قوت برین و گۆڕێن ب كۆم و هەمبیزكرنا چەكێن كیمیاوی یێن لناڤ جیهانێ قەدەغەكرین بوونە پالدەر بسپۆر و شارەزایێن ئاڤەدانی و شارستانی دروست بكەن و سەرۆك و حوكمەتا هەرێما كوردستانێ ب زنجیرەیا كابینەیێن خۆ ل جهێ هەر كارەساتەكێ نەخش و نیگارێن تازە ل كوردستانێ بهێن كێشان، ئەڤڕۆ ئەم دبینن جادە و جاددەیێن هەرێمێ پاقژ و لێكداینە، گەشەكرنا سازیێن حكومی ب ئەلكترۆنی، كارەبا 24 دەمژمێری، ئارامی و جوانیا كوردستانێ دلێ دوژمنی پەقاند، لەوما دیسا دڤێت ڤێ ئارامیێ بكەنە شەڕ و خرابی، مخابن لایەنێن كرێگرتی ل هەرێما كوردستانێ پشتەڤانیا دوژمنێ دوهی و ئەڤرۆ و سوباهی دكەن و خەنجەران ل پشتا پێشمەرگەی ددەن و خیانەتا گەلێ كورد و دەستوورێ ئێتیمان دەگ ل سەر دای پێشل دكەن، پیلانێن مەزن بۆ خەلكێ كوردستانێ دارێژن دا كو جینوسایدێن نڤستی هشیاربن و ئەنجام بدەن.
پەند و شیرەت بۆ ئەوێن ئەڤڕۆ بووینە حزب و كرێگرتیێن بیانیان، سەنگەرێ گەل ئێك سەنگەرە دڤێت ئەم ل گەل بارزانی بن داكو سەنگەرێ شەڕەف و كەرامەتا گەلێ مە ب ماف و ئاخا پیرۆزا كوردستانێ ڤە پارستی و ژیان ب شادی و ئازادی ڤەژیت، دبێژین هەمی نەحەز و دوژمنان ل قیامەتێ ژی مللەتێ كورد نامریت، چونكو مللەتەك خودێ ناس و مافپەرەور و پڕ مرۆڤایەتیێ یە، دونیا دهەژیت خراب نابیت، مللەتێ كورد ب جیۆناسیدان نەچەمیان و خلاس نابن.

نیهاد سـالـح

پشتی ئازار و برینێن كۆر ناخ و لاشێ گەلێ كوردستانێ ئازاندین، بابەلیسكێن ژیانێ هەمبێزا گەلێ مە گرت ب سەروكاتیا بابێ روحیێ نەتەوەیا كورد مەلا مستەفا بارزانی كو سەركردە و سەرۆكاتیا سێ شۆرەشان كریە و د هەشت كۆنگرەیان دا بۆ سەرۆكاتیا پارتی هاتیە هەلبژارتن، خەباتا وی بۆ گەل پیرۆزە، چونكو هیج ساتەكی بۆ خۆ نەژیایە لێ‌ بۆ مللەتێ خۆ ژیایە.
بارزانی ژ كۆمارا كوردستان ـ مهاباد ڤەدگەریێت باشورێ كودستانێ ل سنوورێ سێ دەولەتێن دوژمن بۆ كۆمەكا پێشمەرگەیان دبێژت: (ئەز مرۆڤەك دیموكراتیخوازم، تفەنگا خۆ رادەستی چ دوژمنان ناكەم) بارزانی ل گەل 518 پێشمەرگەهان ل رویبارێ ئاراز دەربازی سۆڤیەت دبیت، زمانێ رۆسی و هونەرێن سەربازی و پێزانینێن ئابووری خواندن، نێزیكی 12 سالان ل رۆسیا پاشی ڤەردگەریت ئیراقێ، ل سەر رێكا خۆ سەردەدانا (جەمال عەبدولناسر) سەرۆكێ مسرێ دكەت، ل 6/10/1958 دگەهیت بەغدا، جەماوەرێ كورد و عەرەب پێشوازی لێ كر، بارزانی خەباتا بدەستڤەئینانا مافێن گەلێ كوردستانێ بەردەوام كر، ل 7/10/1958 سەرەدانا سەرۆك كۆمارێ ئیراقێ (عبدالكریم قاسم) دكەت و ئاهەنگ ب ناڤێ (أنصار السلام) دهێنە بەرهەڤكرن گەلەك سۆز پێدان، مخابن هەموو سۆز وەكو بلقێن ئاڤێ پەقین، بەلێ بارزانی نەخشە دارێژتن، كۆنگرەیێ چارێ یێ پارتی ب (120) نوونەران بارزانی وەكو سەرۆك هەلبژارت، ژبەر ناكۆكیا د ناڤبەرا حوكمەت و پارتیدا ل سەر ناڤێ پارتی و مافێن كوردستانیان د ئاڤاكرنا ئیراقا نوی دا وەك نەتەوا دویێ، بریار هاتەدان كۆنگرەیێ پێنجێ ببەستن، ل گولانا 1960 كۆنگرەسێ پێنجێ هاتە بەستن، چ گوهۆرین د سەركردایەتیا پارتی دا روونەدان، رژێمێ دەست دا پرۆپاگندەیان، دڤییا دوبەرەكیێ ل ناڤ پارتی و تەخ و چین و ئایینان دا دروست بكەت، لێ پارتی و بارزانی وەكو شلخەكا ب هێز مان، لێ ماف نەدا پارتی بەرەڤانیێ ژ مافێن كوردستانیان بكەت، ل وان پەیمانێن داینێ لێڤەبوون.
بازێ چیا نانەكا كەڤن و سۆتی ل چانتێ خۆ دكەت، ڤەگەریت بارزان سەركێشییا شۆرەشا ئیلۆنێ ل 11/9/1961 دكەت، هەتا 6/3/1975 گەلەك سەركەفتن و ئاستەنگ هاتنە پێش، گەلێ كوردستانێ ب ئێكرێزی و برایەتی د قادا خەباتێ دا بەرگیری دكر، ئافرەتا كورد رۆل د پەروەردەكرنا كەسایەتێن پاشەرۆژێ دا هەبوو، قوتابی و لاو و جۆتیار پشت و پەنابوون بۆ پاشەرۆژەكا گەشتر، بارزانیێ نەمر دبێژیت: (قوتابی سەرێ رمێنە د هەمی شۆرەش و راپەرینان دا) بارزانی فێرگەها شۆرەش و كوردایەتیێ یە ل ناڤ جیهانگێریا دونیایێ كورد ب بارزانی هاتینە نیاسین، ئەو ب گەلێ كورد ناڤ و دەنگە.
ڤەگەریانا بارزانی ژ رۆسیا دەستكەفتێن دیرۆكی ب دەستڤەئینان بۆ كوردستانێ وەكی رێكەفتنا 11 ئادارێ سالا 1970 دانپێدانا حوكمەتا ئیراقێ ب مافێن گەلێ كورد (ئوتون می)، دامەزراندنا ئێكەتیا نڤیسەرێن كورد، دامەزرانا كۆمەلا رەوشەنبیریا كورد، دامەزراندنا كوری زانیاری كورد، دامەزراندنا ئێكەتیا زانایێن ئیسلامێ، بەلاڤبوونا گۆڤارا رۆژی كوردستان ب كوردی و عەرەبی، گێرانا كۆنگرەیێ سێیێ نڤیسەرێن كورد، ل 1/1/1974 وەشانا رۆژنامەیا برایەتی ئێكەمین رۆژنامەیا رۆژانە یا كوردی ل ئیراقێ،
چەند رژێمێن ئیراقێ لێڤەبوون و كەف و پیلان بۆ كوردان و بارزانی دگێران، لێ بارزانی دیرۆكە؛ نەچەمیا و بوویە هێڤێنێ ئاشتی و دادیێ.
ئەی ئیراق دوهی ژبیر نەكە یاریا ب بەرێن سۆتی نەكە ل جهەكی ئاگر لێ دزێت، رێبازا بارزانی بۆ گەلێ رۆژێ زیندیە، ب ئیرادەیەكا مەزنتر ژ گرانیا ئەرد و ئەسمانی، سەرێ رێزێ بۆ گیانێ مستەفا بارزانی دچەمینن، ئەوێ هەر بهۆستەكا كوردستانێ ب مالا خۆ دزانی و بەرەڤانی ژێ دكر، ئەڤرۆ رێبازا ئێكانەیا نشتیمانی مەسعود بارزانی خودانە و هەر ئەو مللەتە.

نيهاد سـالح

ل هەر نەورۆز و بهارەکا نوی دا گەلێ کوردستانێ سەرێ هندەك زۆحاك و خوینمێژان دهەریشینن، ئەڤ ساله هەر ل دەستپێکا مەها ئارادرێ ئێکگرتن و ئێکرێزی و ئێك هەلوەستیا گەلێ کوردستانێ ب رابەریا سەرۆك و مەرجەعێ گەلێ کوردستانێ سەرۆك مەسعود بارزانی دگەل پرۆسا ئاشتیێ ل هەر چار پارچێن کوردستانێ و رەڤەندا کوردی ل دەرڤەی وەلاتی گەلەك پەیامێن پڕ ئومێد و گەش ب کوردستانیان گەهشتن، ئێکبوونا مللەتێ کورد د نەورۆز و سەرسالا کوردی دا دوژمن هەژاندن و تەواندن، ئالایێ کوردستانێ ل سەرانسەری جیهانێ بلند خۆیابوو.
نەورۆز هەر سال ل 21ی ئادارێ کو دبیته سەر سالا کوردی و رۆژەك نیڤدەولەتی، ب خەمخۆری و خەباتا گەلێ کوردستانێ مەشخەلێن ئازادیێ سەنگەر ب سەنگەر ل بلنداهییا چیایێن کوردستانێ بخوینێ نڤیسینه و ڤێ یادێ ساخ دکەن و پیرۆز دکەن، ئەڤا مە ب چاڤ دیتی ل نەورۆزا ئەڤساله ل 2025ێ کۆ هەمی قولاچێن کوردستانێ و جیهانێ ب ئاگرێ ئازادی و نەورۆزێ رۆهن بوون، كۆ ب ملیۆنان گەلێ مە لێ پشكدار بوون، دڤێت ئاماژە ب وان ئاهەنگێن نشتیمانی و نەوەیی بدەین کو ل رۆژهەلاتێ کوردستانێ و باشۆرێ کوردستانێ، و رۆژئاڤایێ کوردستانێ و باکورێ کوردستانێ، و رەڤەندا کوردستانی ل ئەورۆپا بدەین کو بۆ هەر ئاهەنگەکێ زێدەتری سەدان هزار كوردستانی لێ بەرهەڤبوون، پەیاما سەرۆك بارزانی و نێچیرڤان بارزانی ل باژێرێ ئامەدا باکورێ کوردستانێ ب هەر چار پارچێن کوردستانێ هاتە گەهاندن و خواندن، هەر وەسا پەیامێن جودا جودا ب گەلێ ئازادیخواز گەهشتن، پەیاما سەرۆك بارزانی ل باژێرێ کۆلن یا وەلاتێ ئەلمانیا بۆ گەلێ کوردستانێ و جیهانێ گەلەك نامەیێن ڤەشارتی گەهاندن، هەر چار پارچێن كوردستانێ ل ئاهەنگێن نەورۆزێ ب ئالایێ پیرۆزێ كوردستانێ و جلوبەرگێن کوردی و سروودێن نشتیمانی ب هەلوەستێ ئیکگرتنا گەلێ کوردستانێ بو ئازادیێ ئارمانج گرتن، ئاگرێ نەورۆزێ ب پشكداریا سەدان هەزار وەلاتیان ب جلوبەرگێن کوردی و سروودێن نشتیمانی ل ئیستەنبوولا پایتەختێ وەلاتێ تورکیا ب پەیامێن ئاشتیێ و پەیاما رەجەب تەیب ئەردۆغان، سەرۆ کۆمارێ تورکیا، کۆ راگەهاند: (ب جۆش و خرۆش مه نەورۆز ساخ کر، و ئارمانجا مه ئەوە نەورۆزێ بکەین جەژنەکا فەرمی) ئەڤ چەندە بوون جهێ دلخۆشی و تێرامانێ كو هەردەمێ كورد ببن ئێك چ دەستكەفتەكێ نەتەوەیی یێ مەزن ب دەستڤە دهێت.
هەلوەستێ گەلێ مە ب عشق و هەمبێزەکا کۆرا نشتیمانی ب رەنگ و دەنگ و واتایێن جێواز ئاهەنگێن نەورۆزێ و سەر سالا کوردی ل جیهانێ دەنگڤەدان و پەیامدار بوون، هیڤیدارین ئەڤ ئێکگرتنە وێ چەندێ نیشا مە بدەت کۆ ئێگرتن هێڤێنێ سەرکەفتنا مەیە، راستە دوژمنێن مە توورە دبن، بەلێ ئەوا مە هەی دهێتە پاراستن، و ئەوا مە دڤێت دەست مەڤە دهێت، لەورا دەستخۆشیێ ل گەلێ خۆ دکەین تایبەت رێکخەرێن ئەڤان ئاهەنگێن مەزن یێن ئامەد و کۆلن و ئیستەنبۆل، ئۆمێدەوارم هەمی دەمەکی ئێکگرتن و ئێکرێزییا گەلێ کوردستانێ ل بن چاڤدێدیا بنەمایێن رێبازا بارزانی دا بهێت پارستن و گەشە کرن.
کوردستانا مەزن بێهنا ئازادیێ هەلدکێشیت، گەل مینا ڤۆلکانەکا بهێز دلێ زوحاك و خوینمێژان شەوتاند، لەورا نەورۆزا ئەڤ ساله ب ئاگرێ خەتیران و پەیامێن سەرۆك بارزانی و دلێ پڕ برایەتیا مللەتێ کورد، کوردستان بەرەف ئارمانجێن نشتیمانی و دەولەتبوونێ دبەت، و کەد و زەحمەت و خوینا شەهید و ئازادیخوازان ژیانێ دبەخشن و دلێ پتری 60 ملیون گەلێ کوردستانێ ئارام و شاد بکەن، بژیت یەکبوون، بژیت کورد، بژیت کوردستان.

نیهاد سالح

مەلا مستەفا بارزانی بەغدا ب جه دهێلیت و ل باژێرێ سلێمانیێ ڕا دەربازی ئیرانێ دبیت و ڤەدگەریتە بارزان و سەركێشیا شۆرەشا ئەیلوولا مەزن ب سەركردایەتیا پارتی دیموكراتی كوردستان دكەت، شۆرەشەكا چەكداری و سیاسی و جڤاكی و ئابووری دكەت كو ره و ریشالێن خۆ دەربازكرن بۆ هەر چار پارچەیێن كوردستانێ.
شۆرەشا ئەیلوولێ بوو هێزەكا مەزن و كاریگەر كو مەزنترین شۆرەشا گەلێ كوردستانێ یە، هەر ل 11 ئەیلوولا سالا 1961هەتا كو شەشی ئادارا سالا 1975 ڤەدكێشیت، د ڤێ شۆرەشێ دا گەلەك سەركەفتن و سەرئەڤرازی و سەرنشیڤی و ئاسنەنگ هاتنە پێش، ب سەدان گوندێن كوردان هاتنە سۆتن، تەرش و تەوال و ئەردێ چاندنێ هاتە ژناڤبرن، لەورا تەخا هەژار ل گەل شۆرەشێ ئێكرێز و ئێك ئارمانج بوون و بەرگیری ژ خۆ دكرن، و ئافرەتا كورد وەكو قارەمان رۆلێ سەرەكی دگێران تایبەت د ئاڤاكرن و پەردوەردەكرنا كەسانێن نشتیمان پەروەر دا بۆ پاشەرۆژێ، قوتابی و لاو و جۆتیارێن كوردستانێ ل مەیدانا خەباتێ دوور نەكەفتن و هیڤیێن پاشەرۆژەكا گەش و ئازاد دڤیان، لەورا شۆرەشا بارزانی دوژمنێن گەلێ كوردستانێ نەچاركرن، كو دانپێدانێ ب مافێن گەلێ كوردستانێ بكەن، پارتی دیموكراتی كوردستان كو ژ ڤەرێژا رێبازا بارزانی دروست بوویە, ب ئارمانجا مافێن نەتەوەیی و نیشتمانی و دەولەتداریێ بزاڤێن شۆرەشێ و داستان و بەرخودانێن شۆرەشێ و خۆنەچەماندنا شۆرەشێ، وەل دوژمنی كرن، كو خۆ بەرامبەری شۆرەشێ و پارتی و رێبەرێن رێبازا بارزانی بچەمینن، ئەڤێ چەندێ رێكەفتنا مێژوویا (11 ئادارا 1970) لێ دروست بوو، كو (دیمۆكراتیەت بۆ ئیراقێ و ئوتونۆمی بۆ كوردستانێ) ئەڤ رێكەفتنامە بۆ رێخوشكەر ب ئازادی و مەدەنی خەباتا سیاسی بهێت كرن لسەر بنیاتێ بنەمایێن رێكەفتنا دوقۆلی، مینا دەركەفتنا رۆژنامەیا خەبات كو بەری هینگی قەدەغەبوو، ب فەرمی مولەت هاتە وەرگرتن بۆ دامەزراندنا ئێكەتیا نڤیسەرێن كورد تایێ هەولێرێ‌، دامەزراندنا كوری زانیاری كورد ل بەغدا، دامەزراندنا ئێكەتیا زانایێن ئیسلامێ ل كوردستانێ، بەلاڤبوونا گۆڤارا رۆژی كوردستان ل بەغدا ب زمانێن كوردی و عەرەبی، گێرانا كۆنگرەیێ سیێ یێ نڤیسەرێن كورد، رۆژنامەیا برایەتی دبیته ئێكەم رۆژنامەیا رۆژانەیا كوردی ل سەرانسەری ئیراقێ دهێت وەشاندن، ئەڤ رێكەفتنامە مەزنترین دیكیۆمێنت و بەلگەنامەیا گەلێ كوردستانێ یە كو ئەو مافێن ئەڤرۆ د دەستوورێ هەردەمێ ئیراقا فیدرال دا هاتین هەر ژ ئەنجامێن ڤێ رێكەفتنا مەزنن، هزار سلاڤ ل رێبەرێ نەتەوەیی جەنابێ بارزانیێ نەمر و كاك ئیدریسێ هەردەم ساخ بن، سلاڤ بۆ سەرۆك و پێشمەرگە و رێبەرێ گەلێ كوردستانێ سەرۆك مەسعود بارزانی كو هشیاری و لێزانینا جەنابێ وی دێ گەلێ كوردستانێ گەهینتە كنارێ تەناهیێ، سلاڤێن پڕ گول و نوور ل جانێ وان پێشمەرگە و پارێزڤانێن كوردستانێ بن كو گیان گۆری ئازادی و دەستكەفێن وەلاتی كرین.
ئەوێن هەولا حەلاندنا مللەتێ كورد ددەن د ساخن، بەلێ پارتی و رێبەرێن رێبازا بارزانی هەلگرێن ئالایێ ئازادی و دیموكراتی و پێكڤەژیانێ، ل پێ پێ رێبازا بارزانیێ نەمر و پێشەوایێن رێبازا بارزانی ب خۆراگری و باوەری ب خۆبوون د ڤان هەمی ئاستەنگێن هەرێمی و نیڤدەولەتی دا چەندەك هویر ژ خەبات و خۆراگریا وێ كێم ناكەت هەر دێ خودانا دۆزا كوردستانی بیت ل هەر چار پارچەیێن كوردستانا پارچەكری و هێمایێ خۆنەچەماندنا گەلێ كوردستانێ، دوهی رێكەفتنا 11 ئاداری و فیرالی و ریفراندۆم، ئەڤرۆ پارتی ب رابەریا سەرۆك بارزانی ب شەڤ و رۆژ دێ بۆ مافێن رەوا یێن گەلێ كوردستانێ خەبات و بەرخۆدانێ دكەت و بەردەوام بن تاكو كوردستان ب ماف و دەولەتبوونا خۆ شاد بیت.