عـەمـەر ئـەرگـۆشی

باژاڕێ سلێمانیێ كو ب پایتەختێ رەوشنەبیریێ دئێە ب ناڤئینان و ناڤەندا شۆرەش و ڕاپەرینان دئێت ناسكرن، ئەڤرۆ گونەهە ل بن پەردێ هەر ناڤ و نیشانەكی نڤیسەر و رەوشەنبیر لێ بهێنە ئازاردان و خەونێن جوانێن وان بهێنە پەرچقاندن، ئەز بێژم تاوانەكا مەزنە كاوە گەرمیانی و ئامانج بابان د خوینا خۆیا سۆر دا بگەڤزن بتنێ كو ل دویڤ ڕا و بۆچوونێن خۆ هەستا خۆیا دەڕبری و باوەریا خۆیا ب ڤێ ئازادیا ڕادەربڕینێ ئینایی یا دەستەڵات بانگەشێ بۆ دكەت، یان چێتر بێژین زۆر دخۆش باوەر بووینە ب ڤان بەڵێنان ئەوێن یەكێتی نیشتمانی ددەتە هەڤوەلاتیان سەبارەت دیموكراتیەتێ و ئازادیا رادەڕبرینێ و پاراستنا مافین مرۆڤان، ل چەند رۆژێن بۆرین دا ل دەڤەرا سلێمانیێ گرتنا نڤیسەر و رۆژنامەنڤیسان یا بوویە ئارمانجا هێزێن ئێمناهیێ و سێ نڤیسەرێن دیار یێن گەلێ مە یێن هاتینە رەڤاندن ژ هندێ ژی پتر دەما هندەك هەڤەلاتیان خۆنیشادان كر و رێگری ل تانكەران كر، بێ دودلی و بێی گوهدانە یاسایێ ب دارێ زۆرێ هەمی تەفرۆ توناكرن و رێك نەدا دەنگێ ئازادیێ بگەهیتە گوهێن كەس، بەس دەما هندەك كۆم دبن دا تشتێن نەشیا و ل دژی پارتی و حوكمەتا هەرێمێ بێژن ئەو دێ هەمی بلندگویان بەنە بەر دەمێ وان و هەمی دەزگەهێن راگەهاندنێ ئێخنە د خزمەتا وان دا. واتە ئەوان ئازادیەك بۆ گەلێ كوردستانێ نەڤێت ئەگەر د خزمەتا دەسهەلاتا خۆسەپێنا یەكێتی دا نەبیت وە ئەو چوجار د ئامادە و بەرهەڤ نینە گوهداری ئاوازەكێ بكەن ئەگەر د خزمەتا بەرپرس و دەزگەهێن وان دا نەبیت وە ئەگەر بۆ خەلكێ سلێمانیێ و گەلێ كوردستانێ ژی دەرمانێ سەر برینان بیت، یا خۆیایە كو گەلێ مە ل بن دەستهەلاتا خۆسەپێن باجێ قورس ددەت و ئازادی و دیمۆكراسیەت و پێشكەفتن یا پاشەكشەیێ دكەت و هەڕەشەكا مەزن یا چێبووی ل سەر وان سۆز و بەڵێنان كو یەكێتی نیشتمانی ل بانگەشەیا هەلبژارتنان هاوار بۆ دكر.
ئەڤرۆ ئەركێ نڤیسەر و رۆژنامەنڤیس و هەمی خەلكێ هوشیارێ گەلێ مە ئەوەیە كو ل گەلێ خۆ خوەدی دەربكەڤن و راستی و رەوایێ بێخنە پێش چاڤێن خەلكی و تێبكۆشن بۆ هندێ داكو بشێن ڤان سۆزان بئینە جی ئەوێن شۆرش و حوكمەتا كوردستانێ دایە خەلكی، ئەو بێرێزیا ل بەرامبەر هەڤوەلاتیان دهێتەكرن ل سلێمانیێ نە دیموكراسیەت قەبوول دكەت نە هیچ كوردەكێ وەلاتپارێز.
ئەڤرۆ ئەركێ پارتی دیموكراتی كوردستان زۆر قورسە كو د هەوارا خەلكێ سلێمانیێ بچیت و د گەل یەكێتیا هەڤپەیمان هەمی رێكارەكی بگرنە بەر بۆ هندێ كو كۆتایێ ب ڤان پێشێلكاریێن مافێ مرۆڤان بینن و پێكڤە وەڵاتەكی برێڤەببەن كو جهێ ستەمكاریێ و زۆرداریێ تێدا نەبیت و دەستێ خزمەتگوزایا حوكمەتا هەرێمێ ب هەمی قوژبن و كۆژیێن وەلاتی بگەهت و هەمی كورد ل پێش یاسایێ یەكسان بن و كەس بێی یاسا نە هێتە سزادان.

عەمەر ئەرگۆشی

بێگومان گەلێ كوردستانێ گەلەك ژ مێژە باجەیا قورسا شەرێن سەپاندی ل سەر مللەتێ مە ددەت و مالوێرانی و چەرمەسەری و خوینەكا زۆرا گەنجێن مە ب ناهەق و غەدر دهێتە رێتن، ئەگەر پرۆسەیا ئاشتیێ زویتر دەست پێكربا ل ڤان چەند سالێن بۆری دا ناڤچە دا گوهۆرینەكا بەرچاڤ ب خۆڤە بینیت و ئەڤرۆ گەلێ مە دا ل قووناخەكا دیترا سەرفرازیێ و پێشكەفتنێ بیت.
بێگومان ئەو نەیارێن حەز ژ ئازادیێ و ئارامیا گەلێ كوردستانێ نەكەن، هەمی جاران كار بۆ هندێ دكەن كو كوردستان ئارامیێ ب خۆڤە نەبینیت و گەلێ كوردستانێ تەپەسەر و بەندەوار بمینیت ئەو هەر جار دژی هندێنە پینگاڤ ل پێناڤ ئاشتیێ و برایەتی بێنە هاڤێتن، شانازیە بۆ بزاڤا رزگاریخوازیا كورد كو زێدەباری وێ زۆرداریێ یا كو ل سەر گەلێ كوردستانێ دهێتە پیادەكرن هێشتا گەلێ كوردستانێ یی رژدە ل سەر چارەسەریێن ئاشتیانە و برایانە و هەرجار سەركردایەتیا سیاسیا كورستانی یا ب فەر زانی كو دەستێ ئاشتیێ درێژكەن بەری كو هزرێ ل تولەسەندنێ و بكارئینانا هێزێ بكەن.
بەرێ بناخێ ڤێ پرۆسا ئاشتیێ ب پێشنیازا جەنابێ سەرۆك بارزانی یا هاتیەدانان و ئەڤرۆ خەریكە بەرهەمێ ڤێ دێ هێتە كاری و پەیاما ئاشتیێ ژلایێ بەرێز ئۆجەلان ڤە هاتە راگەهاندن كو بۆ ئەگەرا مزگینیەكا خۆش بۆ خەلكێ هەمی پارچێن كوردستانێ كو نێزیكی مانگەكێ یە هیچ جۆرێن هێرشا و شەڕی نە هاتینە ئەنجامدان و ئەگەر ئەو پرۆسا ئاشتیێ ژ هەمی لایەكی ڤە بهێتە پشتەڤانیكرن ئەوا بێ شك شەر و كوشتار نامینیت و هەردو گەلێن تورك و كورد دێ مفا داربن و ئێدی خوین ژ گیانێ كەس ناهێت و هەردو لایەن هیچی دی خوینێ و فرمێسكان نارێژن و رەنگە پێكڤە بشێن هەنگاڤێن باش بەر ب و ئاڤەدانیێێ و موكمكرنا بناخێ دیموكراتیەتێ و پاراستنا مافێن مرۆڤی بێتە هاڤێژتن. پێدڤیە ل سەركوردان بەری چاڤەرییكرنێ‌ ل هێز و لایەنێن دیتر بكەن بۆ پشتیەڤانیێ گەرەكە كورد د ناڤ خۆدا پشتەڤان و برابن و لەسەر ئارمانجێن دویر و نێزیكێن نەتەوەیی یێك هەلوەست بن و پشت و پەنایێن هەڤدو بن. هەمی دزانین پشتی چەندان سالێن شەڕ و مالوێرانیێ هەمی لایەن زیان كر و كەس قازانج نەكر و خوین ژ گیانێ هەمیان هات و كەس بسەرنەكەفت و ئەگەر ئەڤ شەڕە بەردەوام بیت، ئەو هەمی دێ زێدەتر زیانێ بینن و كەس سەركەفتی نابیت و كەس نەشێت ب شەڕی لایەنێ بەرامبەر ژناڤببەت چارەسەریا دویماهیێ ژی هەر پەنابرنە بۆ رێیا ئاشتی و برایەتیێ و هندی زویتر بیت قازانج زێدەترە وەك و كورد دبێژن زیان ل نیڤەكێ ژی ڤەگەریێت هەر قازانجە.

عەمەر ئەرگۆشی

ژ كەڤن دا گەلێ كوردستانێ دەردێ بندەستیێ و زۆرداریێ دكێشیت و هەمی مەراما گەلێ مەژی ئەڤەبوویە، ب ئاشتی و برایەتی بشێت ل سەرخاكا خۆ ب سەرفرازی بژیت،هەرچەندە چو جاران گەلێ كوردستانێ درێغی ل بەرگریكرنێ نەكریە ژ هەمی مافێن خۆ؛ ب هەمی رێكێن رەوا، ژ وان ژی ب هەمی جۆرێن چەكێن ل بەردەست، بەس د سەر هندێ را چو جاران پارتی دەرفەتەك ژ دەست نەدایە ئەگەر بۆ ئاشتیێ و چارەسەریەكا برایانە هاتبیتە پێش بۆ گەلێ مە،ب تایبەتی پارتی چو جار ل سەر دەلیڤەكێ باز نەدایە ئەگەر هندی چریسكەكێ رۆناهایا ل دەڤەرێ چارەسەریا كێشا كوردی هەبووبیت، گەلە جاران بزاڤا رزگاریخوازیا كوردی ب سەروەریا پارتی یا د دۆخێ هەلبەز و دابەزێ دا بوو، ئان كو دانوستاندن و شەڕی دا بوو، ئانژی د شەڕی و ئاشتیێ دا بوو، بەس هەمی جاران هەتا گەلێ مە ناچار نەبووبیت بۆ بەرگریكرنێ ژ خوە و خاكا خوە دەست بۆ چەكی نەبریە و شەڕ دویماهیك بژاردە بوویە بۆ پارتی و زۆر جاران ژی هێژ دەستێن دوژمنی ب خوینا كۆڕێن كوردستانێ د سۆر و لوولیێن تفەنگێن وان هێژ د گەرم ل كورد كوشتنێ،پارتی داخوازا ئاشتیێ و برایەتیێ كری و ب كریار ڤە یا چوویە پێش و ل گەل دوژمنی دانیشتی. هەمی جار باوەریا پارتی ئەو بوویە كو ئەوا ب ئاشتیێ دەستەبەر دبیت، ب شەڕی ب دەست ناهێت و گەلێ كوردستانی د ئاشتیێ و برایەتیێ دا دێ پێشكەڤیت و ولات دێ ئاڤەدانتر بیت و د شەڕی دا مالۆێرانی دێ زۆر بن و زیان ژی دێ زێدەتر بن،ئەوا گرنگە بێژین پارتی هەمی دەمان خەمخۆرەكێ ب هێز بوویە ل گەلێ مە ل هەمی پارچەیێن كوردستانی و هەمی جار هەولا دایی كێشەیا كوردی ب رێكێن ئاشتیانە بێتە چارەسەركرن ل باكور ل ساڵا ١٩١٣ دەستپێشخەریا ئاشتێێ راگەهاند و تێكدەران هەر زوی دەست ب تەقینان كر وەك ئاماژەك كو نەڤێت ل پرۆسەیا ئاشتیێ سەربگریت، جارەكا دی جەنابێ سەرۆكێ كوردستانێ كاك نێچیرڤان بارزانی ل توركیا بوو، بۆ مەرەما ڤەژیاندنا پرۆسا ئاشتی ل باكۆر، د هەمان رۆژێ دا تەقینەوەیەكا دی ئەنجام دا و جارەكا دی هەولێن ئاشتیێ ل باربرن. ڤێجا پرسیار ئەوە ئەگەر هینگی پرۆسا ئاستیێ سەرگرتبا دا نوكە گەلێمە ل باكۆر دا چەند سۆدمەند بیت؟ هەتا نوكە كێشا گەلێ مە چەند پێشكەفتنێ ب خۆڤە بینیت؟ ئەرێ گەلا ئەگەر هینگی پرۆسا ئاشتیێ سەرگرتبا و پەرلەمانتارێن هەدەپێ ژ پێنجی پەرلەمانتاران ببانە هەفتێ، دا چ ۆولەكی پیرۆز د ناڤ پەرلەمانێ توركیا دا دخزمەتا كورد و كوردستانێ دا وێ لەییزتبان؟ ژبلی وێ چەندێ گەلێ مە د ناڤ ئاشتیێ دا دا زۆرێ سۆدمەند و پاراستی بیت كو د دۆخێ شەڕی دا تووشی مالۆێرانی و دەردەسەریان بیت، قوربانیێت زۆر دێ ل دویڤ خۆ هێلیت. ژبلی ڤێ چەندێ گرفتێن مەزن بۆ حوكمەتا هەرێمێ چێكرینە ب درێژیا سنوورێ هەرێمێ و توركیا، هەرێما كوردستانێ بوویە مەیدانا شەڕی و ب دەهان هەزار هەڤوەلاتی ئاوارە و دەر ب دەر بووینە، گوندێن وان هێژ دوێرانن و هەتا نوكە شنگال باجا دۆخێ شەڕی ددەت و سیاسەتا شەڕی و خۆسەاندنێ لێ بەردەوامە و ل رۆژاڤا ژی گەلێ مە باجا سیاسەتا شەڕی ددەن و ئەگەر ئەو سیاسەتە بەردەوام بیت، خۆیایە كو مالۆێرانی دێ پتر بن. باشە ئەگەر هینگی پرۆسا ئاشتیێ سەرگرتبا، دا گەلێ مە وێ هەمی قوربانیان دەت ئان ئەو هەمی مالۆێرانی و خوین رشتنێ یا رۆژانە دبینین دا هەبیت.

عومەر ئەڕگۆشی

گەلێ كوردستانێ ل بەندا گورانكاریا ل دەڤەرێ، چاڤ یێ ل هندێ ئێدی ژیانەكا ئارام و بێ دەردەسەری ل سەر خاكا خۆ ببەتە سەر كو ئێدی هەرەشەیێن داگیركرنێ و ئەزیەت دانا گەلێ مە كوتایی پێ بێت، یا خۆیایە كو حوكمەتا هەرێمێ ل دەهان ساڵێن ڕابردوو دا كار یێ ل سەر ڤێ چەندێ كری كو هەرێما كوردستانێ دۆستان مشە بكەت و نەیار و دوژمنان كێم كەت یان ژی نەهێلیت، هەر چەندە ئەوێن ناحەزێن خاكا مە و ئازادیا مە، ئەو چو جاران نابنە دۆستین هەرێما كوردستانێ و ب چ تەڕزان قایل نابن كورد ب ئارمانجێن نەیەوەیێن خۆ بگەهن و جهێ پێن خۆ ل سەر خاكا خۆ قایم بكەن.

دیارە سەركردایەتیا سیاسیا كوردستانێ هەست ب ڤێ مەترسیێ دكەت، لەوما بێ بهێندان یا بەردەوام بوویە كو پەیوەندیێن سیاسی و ئابووری و دیپلۆماسی ل گەل جیهانا ئازاد و دیموكراسی دا موكم كەت و ببتە كارەكتەرەكی ب هێز ل سونگێن ناڤدەولەتی و یاریكەرەكی دیار ل سەر گۆرەپانی ناڤچە و ل گورانكاریێن چاڤەروان كری ل دەڤەرێ، ئەم گەلەك جاران دبێژین كوردستان یا د دەستەكی ئەمین دا، ئانكو كارەكی باش یێ هاتیەكرن كو ل ڤان گورانكاریێن ل ناڤچەیێ نەك هەر گەلێ كوردستانێ یی پاراستی بیت، بەلكو حوكمەتا هەرێما كوردستانی و بریارێتن وێ و هەلوەستێن وێ رۆلەكی گرنگ بلەیزن ل دیاركرنا چارەنڤیسێ خەلكێ دەردۆرێ هەرێمێ.

ب ڤێ چەندێ جارەكا دی گەلێ كوردستانێ ل ئەنجامێ سیاسەتا حەكیمانە یا پارتی دێ پێنگاڤەكا دی ل رزگاریا ئێكجاری نێزیك كەت و هەوڵێن دۆژمنێن خاكا مە و گەلێ مە دێ ب بادا بەت. ئەڤرۆ ژبلی هندێ كو كوردستان یابوویە رەمز و نیشانا پێكڤەژیانێ و تەناهیێ و چەسپاندنا دیموكراتیەتێ و بنیاتنانا جڤاكەكا سیڤیل.
یا بوویە ئومێدا دیموكراتخوازا و پەناگایەكی ئارام بۆ خەلكێ زۆرلێكری و پەریشانێن دەڤەرێ. ئەڤە هەمی نیشانا ڤێ چەندێ یە كو حوكمەتا هەرێما كوردستانێ رێچكەكا راست یا برێڤەبرنێ یا گرتی كو سەرفەرازی و رزگاری دێ ژێ پەیدا بیت، ئەم دلنیاینە كو سەرباری هەرەشەیێن ل سەر ناڤچەیا رۆژهەلاتا ناڤین، دێ گەلێ كوردستانێ نە ب تنێ دێ یی پاراستی بیت، بەلكی دێ قایمتر خۆ ل سەر پییان گریت.