عەمەر هەرگۆشی

د دەمەكی دا كو ئیراق د قووناخەكا گەلەك سەخت و پڕ كێشەدا دبۆریت و ئاستەنگ و گەفێن مەزن ل سەر ئاخا ئیراقێ و خەلكێ ئیراقێ هەنە، مژویلی رێكخستنا هەلبژارتنانە، ئیراقێ پێدڤی یاب هندێ هەی كو ئەو گەفێت ل سەر ئیراقێ ژ ئیراقێ دویر بێخن و خاكا ئیراقێ نەكەنە مەیدانا شەر و پێكدادانا چونك و چجا دیموكراتیەت و جڤاكا مەدەنی دناڤ خوینێ و شەرادا سەرناگریت.
ئەم هەمی دزانین كو هەتا ڤێگاڤێ ئیراق یا د بن هەژمۆنا كاریگەرا ئیرانێ دا، ئیسرائیل و ئەمریكی ژی خۆ ب دوژمنێن ئیرانێ و دویڤەلانكێن وان دزانن و هێشتا خوینا د ناڤبەرا وان دا هاتیە رێتن هشك نەبوویە و ئاریشەیێن د ناڤبەراوان دا دژوارتر و بێ چارەسەرتر یێن مایین، ژ بەر ڤێ هندێ كەس باوەرناكەت كو ئیراق د ڤان چەند مەهێن داهاتی دا دێ هندا بێ گرفت بیت كو هەلبژارتن تێدا بهێنە ئەنجامدان. دوهی پارتا عەبادی ب ئاشكەرا گۆت ئەم پشكداریێ‌ د هەلبژارتنان دا ناكەین سەدڕی و موقتەدا سەدڕ و شیعە ب گشتی حەزكەن هەلبژارتنان بۆ مە دێ سالەكێ پاش بێخن، دیسا دوهی باسێ هندێ هەبوو كو مووچەیێ حەشدا شەعبی ببڕن كو هژمارا وان زێدەترە ژ 800 چەكدارنا كو بێگومان دێ كاریگەریەكا دژوار ل سەر رەوشا سەقامگێریا ئیراقێ هەبیت. ژ بەر ڤێ چەندێ گەلەك سەختە د ناڤ ڤان كاودانان دا هەلبژارتن بهێنە ئەنجامدان، ل سەر ڤێ چەندێ را ئەگە ئیراق شاما شەریف بیت باشە ئەگەر كورد پشكداریێ ژی بكەن و دەنگێن پێدڤی ژی بینین مادێ 140 د بەرژەوەندیا كوردان دا هێتە گوهۆرین؛ ئەو ئیراقا ئەم ناس دكەین كو چ حسابان بۆ كوردان و دەستووری و پەرلەمانی ناكەت و بەس مژویلی مووچەبڕینێ‌ و بودجەبڕینێ‌ دوژمناتیكرنا كورد و كوردستانێ یە، هەمی لایەنێن ئیراقی پشتەڤانیا دادگا فیدرالی دكەن كاردئینن بۆ دژبەریا گەلێ كوردستانی و تەهمیشكرنا پەرلەمانی و دەستووری و رێكەفتنێن د ناڤبەرا كوردان و حوكمەتا ئیراقێ دا.
رەنگە ئەگەر هەلبژارتن بهێنە ئەنجامدان هندەك سەروچاڤ بهێنە گوهارتن، بەد بلا چو جار كورد ل هیڤیا هندێ نەبن كو ئەو ئیراقیێن ئەم دناسین ئەقل و هزرێن خۆ د ڤان دەمێن نێزیك دا ل بەرامبەر مافێن گەلێ كوردستانێ و خواستەكێن رەوا یێن گەلێ كوردستانێ بگوهۆرن و لاپەرەكێ تازە ل گەل كوردان ڤەكەن و برینێن كو ب دەستێن وان ل گیانێ مللەتی كورد ڤەكری ب دەستێن خۆ دەرمان بكەن، بلا چو جاران ژی كورد هند دلخۆش و باوەر نەبن كو ئەو دەسهەلاتدارێن ئیراقی كو كوردان تاقیكرنەكا تال و دژوارا ل گەل هەیی، جارەكا دی ژ نویكا وان تاقی بكەین چونكو عەرەب ب خۆ دبێژن (من جرب المجرب عقله مخرب)٠
خوزیكا كوردان ب گشتی مەرجێن خۆ بۆ پشكداریێ د هەلبژاتنێن ئیراقێ دا هەبان و خۆزی چو جاران كورد ل بەر هەر موسیقایەكێ دیلان نەكربا كو عەرەب بژەنن و ئەم تێ نەگەین.

عەمەر ئەرگۆشی

نوكە ل سەر ئیراقێ ب فەرە كو شەڤ و رۆژان تێكهەل بكەت دا ئێكەتییا رێزێن خەلكێ ئیراقێ ب هێز بێخیت و ب سەر ڤان ئاستەنگان دا بسەركەڤن كو بووینە هەڕەشە ل سەر ئیراقێ و هەمی ئیراقییان، چو جار وەكی نوكە گەف و هەڕەشەل سەر ئیراقێ نەبووینەو چو جار ژی وەكی نوكە ئیراقیان پێویستی ب ئاشتیێ و برایەتیێ و هەڤگرتنێ نەبوویە.
جهێ داخێیە كو حوكمەتا ئیراقێ و لایەنێن ئیراقی، نەك هەر خەمێ ژ تەبایێ ناخۆن؛ بەلكی هەمیێ زێدەتر تەلهان بۆ ئێك دادنن و پتر یێ ناكۆكییان ئالۆز دكەن و پتر برینێن ئیراقییان كویر دكەن و پتر قەدەرا ئیراقییان دئێخنە بەر شەڕەكێ وێرانكەر و مەینەتی و مالوێرانیان پتر دكەن، هەتا نوكە مرۆڤ تێناگەهیت د ڤان كاودانێن سەخت و ئالۆز دا بۆ حوكمەتا ئیراقێ و لایەنێن ئیراقی دەست بۆ بڕینا مووچە و قووتێ خەلكێ كوردستانێ بریە و ل جیاتی هندێ كو سۆز و خۆشەویستییا خەلكێ كوردستانێ بۆ خۆ دەستەبەركەن و برایەتی و تەباییێ ب هێز كەن یێن كەربا خەلكێ كوردستانێ بەرامبەر خۆ زێدە دكەن و خۆ دئێخنە بەر نەفرەتا خەلكێ زۆرلێكریێ كوردستانێ. پرسیار ل ڤێرێ ئەوە ئەرێ مادا دونیا خراپ بیت كو ئەو مەها بۆری ژی مووچە وەك ساڵێن بۆری ڤرێكربا؟ ئەم تێناگەین چ گرفت و ئاریشەیێن ئیراقێ ب بڕینا مووچەیێ فەرمانبەرێن كوردستانێ دێ چارەسەر بیت یان چ بڕینا ئیراقیان دێ پێ دەرمان بیت؟ هەمی دزانین ئەو سیاسەتا رەگەزپەرستیا دەسهەلاتدارێن ئیراقی بوو كو ئیراق هندە ساڵە د تۆنێلێن تاری دا دبۆرینیت و هێشا نە رۆناهی و نە ئازادی و نە دادپەروەری نە دیتیە. ئەو حوكمەت و دەسهەڵاتدارێن د ڤێ كاودانێن بەرتەنگ دا بەرژەوەندیا ئیراقێ و ئیراقییا ل پێشچاڤێن خۆ نەگرن ل جیاتی هندێ كو ئاریشەیێن ئیراقییا چارەسەر بكەت، تازە ژنیكا دەرزا د بەینا گەلێ كوردستانێ و دەسهەلاتدارێن ئیراقی فرەهتر لێ بكەت و تۆڤێ دوبەرەكی و رق و كینا بچینیت و ببتە ئەگەرا ل ناڤبرنا ڤان پەیوەندیێن ب هێز یێن گەلێ كوردستانێ ب دلسۆزی و وەفاداریا خۆ د گەل هەمی ئیراقیا بنیات نای، مخابن حوكمەتا ئیراقی وەلامێن قەنجیێن كوردسانیا و دلسۆزیا كوردستانیا ب ڤێ رەنگێ چەپەلێ مووچە بڕینێ بدەتەڤە و د ڤێ جەژنا پیرۆزا حاجییا دا دژی دەستوور و هەمی بنچینەیێن مافێ مرۆڤی مووچە و پاریێ دەڤێ خەلكێ كوردستانێ قوت بكەن و جەژنا هەڤدو بێ پارە پیرۆز كەن.
ئەم باوەرین راستی دێ بسەركەڤیت و دادپەرەوەری دێ جهێ خۆ گریت و گەلێ كوردستانێ ژی ل سەر دەستێ جەنابێ سەرۆك بارزانی و پارتی دێ ب هەمی مافێن خۆ یێن نەتەوەیی شاد بیت و ئەوێن واز ژی ل كولتوورێ پیسێ دژە كورد نەئینای دێ شەڕمەزاری گەلێ كوردستانێ و هەمی دیموكراتخوازێن دەڤەرێ بن و باجا قورسێن كریارێن خۆ یێن نە ژ هەژی دێ دەن.
گەلێ كوردستانێ رۆژێن گەلەك سەختتر یێن دیتی بەس چو جاران ئامادە نەبوویە دەستان ژ مافێن خۆ هەلبگریت و واز ل خەبات و تێكۆشانێ بینیت ئان خۆ بۆ چ زۆردار و دوژمنێن گەلێ كوردستانێ بچەمینیت، گەلێ كوردستانێ قووناخێن زۆر یێن بڕین و نێزیكی سەركەفتنا ئێكجارەكی یە و مووچەبڕین بەس دێ هێزێ دەتە پێشمەرگەها كو ل سەر رێبازا كوردایەتێ و مرۆڤ دۆستیێ رژدتربن.

عەمەر ئەرگۆشی

خەلكێ كوردستان جەژنا خۆ یا قوربانێ بێ مووچە دەربازكر و ل بەندا هندێنە كو مافێن وا ل سەر دەستێ حوكمەتا ئیراقێ نەهێنە بنپێكرن و بەرێ رەنج و ئارەقا وان ب هەدەر نەچیت، ئەڤ وەلاتیێن كورد مژویلی كار و كەسابەتا خۆنە و كێماسی د ئەركێ پیرۆزێ خۆ دا نەكریە و هندەكان ژ پێخەمەتی خزمەتا گەل و وەلاتی پتر ل ئەركێ ژبۆ هاتیە دیاركرن ئەنجامداینە، كو گەرە ژبلی مووچەی دیاری و بەخشیشان ژی بدەنێ وە توجا مافێن هەڤوەلاتی بنپێ نەكەن و تێكەلی كێشەیێن د ناڤبەرا حوكمەتا ئیراقێ و یا هەرێما كوردستانێ دا نەكەن، ئانكو نەكەنە گرفتەكا سیاسی وە ئەگەر خۆ دا نەكە ژ لایێ حوكمەتا هەرێمێ ژی هەلە و كێم و قاسی هەبن، رەوا نیمە مووچەخۆر باجا هەلەیێن لایەنەكی دیاركری بدەت، ئەوا نوكە ل ئیراق ل دژی هەرێما كوردستانێ دكەت شەڕێ راستەقینەیێ ئیرادەیا گەلێ كوردستانێ یە و چ پاسا و بەرهندێ ناكەڤن د رۆژا جەژنێ‌ دا پاریێ دەڤێ كاسبكار و فەرمانبەرێ كوردستانێ بۆ ب رەوا نەبینن،گەلێ كوردستانێ رۆژێن تەنگاڤتر و دیكتاتۆرێن دڕندەتر یێن دیتین و چو جاران خۆ بۆ كەسێ‌ نەچەماندیە و ل سەر خەباتا خۆ یا نەتەوەیی رژدتر و بەردەوامتر بوویە، ئەڤ مووچە بڕینە راستیەكێ خۆیا دكەت، كو ئەو بەرپرسێن ئیراقی ئەوێن كو زێدەتر ژ بیست سالانە ل گەل نوونەرێن گەلێ كوردستانێ كار بۆ بنیاتنانا ئیراقەكا نوی دكەن كو گەلێ كوردستانێ ژی ب مافێن خۆ یێن نەتەوەیی شاد ببیت، هەتا ڤێگاڤێ ئەو مووچەیەكی سادە بۆ گەلێ كوردستانێ و فەرمانبەرێن وێ ب رەوا نزانن، ڤیجا گەلێ كوردستانی ئێدی چاڤەڕێی چ مافەكی ژ ڤان رەنگێ مرۆڤان بكەت، ئێدی خەلكێ ماندینەناسێ كوردستانێ ل هیڤییا چ خێرەكێ بن ل حوكمەتا ئیراقێ، ئەو حوكمەتە هەتا ڤێ گاڤێ بەندەكا دەستووری یا پەیوەندیدار ب حوكمەتا هەرێمێ ڤە جێ بەجێ نەكری ل بیست سالێن رابردوو دا كو گەلێ كوردستانێ هەمی شیانێن خۆ مەزاختینە دا پشكداریەكا چالاك د حوكمەتا ئیراقێ دا بكەت، داكو بكاریت د بەرژەوەندیا هەمی ئیراقیا ب ئەركێ نەتەوەیی و مرۆڤ دۆستانە رابن و د خزمەتا خۆشگوزەرانی پێشكەفتنا ئیراقێ‌ دابن، مخابن چ جاران لایەنێن ئیراقی؛ ئەڤ چاكی و دلسۆزیا گەلێ كوردستانێ و لایەنێن كوردستانی ل بەرچاڤان وەرنەگرتیە و هەمی جاران ب كریار هەولا لاوازكرنا حوكمەتا هەرێما كوردستانێ یا دای و د بەردەوام بووینە ل بودجە بڕین و مووچە بڕینێ و گەلەك جاران ژی درۆن یێن ئاراستەی هەرێمێ كرین و ب كریار هێرشێن سەربازی ژی یێن كریە سەر هەرێمێ، شەرێ دۆژمنكارانە ژی ل دژی هەرێمێ راگەهاندبوو.
ئەو مووچە بڕینە ل ڤان رۆژێن تەنگاڤیان نیەتا خرابا حوكمەتا ئیراقێ و لایەنێن دەستهەلاتدارێن ئیراقی دیار دكەت كو وان دڤێن گرفتێن مەزن بۆ هەرێمێ چێكەن و ل سەر سیاسەتا دژە كورد و دژە كوردستان بەردەوام بن. گەلێ كوردستانێ نكاریت دەهان سالێن دیتر پشكداریێ د حوكمەتا ئیراقێ دا بكەت، دا نیەتپاكیا خۆ نیشا ئیراقیان بدەت. ئەوا ل سەر ملێ كوردان پێدڤی بوو ل پێناڤی برایەتی و تەبایی و بەختەوەریا ئیراقیان ئەنجامدا، پشتی وان هەمی سالان گوهۆڕینەك ب سەر ئەقلێ ئیراقیان دا نەهات كو دانێ ب مافێن نەتەوەی یێن كوردان دا بینن ئەوا ئەم ب چاڤێن خۆ دبینین بەردەوامبوونە ل دژایەتیكرنا خەلكێ كوردستانێ و مافێن رەوا یێن گەلێ كوردن،كو ئێدی ئەز باوەر ناكەم تازە ئاڤ بۆ جۆكا سروشتییا خۆ بزڤرتەڤە و تازە بێن باوەریێ ب حوكمەتا هەرێمێ و داخوازیێن رەوا یێن هەرێما كوردستانێ بكەن و ئەز باوەرم حوكمەتا هەرێمێ ژی وەك خزمەتكار و بەرەڤانەكا ب هێز ل گەلێ كوردستانێ و مافێن مللەتی، دێ یا بەردەوام بیت ل خزمەتكرن و پاراستنا مافێن گەلێ كوردستانێ.

عەمەر هەرگۆشی

خەلكێ كوردستانێ سەرب هەر دەولەتەكێ بن هزرا وان یا ل سەر ئاخا وان یا پیرۆز، چو جاران ب هەر هێجەتەكێ بیت نەشیاینە دەستان ژ ئاخا خۆ بەردەن و د ئامادە بووینە ل پێناڤی ڤێ ئاخێ هەر تشتەكی گۆری بكەن. نەحەزێن كوردستانێ ژی بۆ دژی كوردان كێماسی نەكرینە و هەمی جۆرێن چەكان بكارئیناینە دا كو گەلێ كوردستانێ ناچار بكەن كو دەستان ژ ئاخا خۆ و مافێن خۆ بەردەن و ب ژێردەستیێ قایل ببن، میژوویا كوردان یا پڕە ژ بزاڤێن دوژمنێن مللەتێ مە بۆ داگیركرن و ژ ناڤبرنا گەلێ مە، لێ هەر جار هەولێن وان ل سەر دەستێ پێشمەرگەیێن پارێزەرێن ڤی وەلاتی یێن هاتینە پویچكرن و ژ ناڤبرن. پارتی هەر ژ رۆژا دامەزراندنا خۆ ل سەر دەستێ بارزانیێ نەمر هەتا ڤێگاڤێ ل مەیدانا خەباتێ ب ڕەنگەكێ پیلایی راوەستایە و ئەركێ پاراستنا ڤێ ئاخێ و ڤی مللەتی یا ب ستۆیێ خۆڤە گرتی، ب شاهدەییا گەلێ كوردستانێ و چو جا زۆرداری ل سەر گەلێ كوردستانی قەبوول نەكریە، ڤێ گاڤێ كو ئاسۆیەكی گەش و پاشەرۆژەكا گەش ل پێشییا گەلێ كوردستانێ یە و پارتی ژ هەمی دەمەكی ب هێزتر ل مەیدانا خەباتێ یە و كاریە دۆزا گەلێ مە بگەهینتە كنارێن رزگاریا ئێكجاری و پێگە و سەنگەكا موكم ل كۆربەنێن نێڤدەولەتی پەیدا بكەت، ئەو گەفێن مووچەبڕینێ هەرەشەیێن دیتر بۆ پارتی ن تشتەكی تازەنە، پارتی بۆ هندێ یا هاتیە دامەزراندن كو بەرەڤانیێ ل دادپەروەریا كێشەیا كوردی بكەت و د تەنگاڤیان دا ببیتە پارێزەرێ گەلێ كوردستانێ و خاك و گەلێ كوردستانێ بپارێزیت، ئەو دوژمنێن هەمی جۆرێن‌ چەكی و هەمی میتۆدێن ناڤبرنێ دژی مللەتی بكارئینای و هێشتا ژی ل سەر شەڕێ دژی گەلێ كوردستانێ ب رەنگەكێ نوی دبەردەوامن، د پشتراستین ل سەر دەستێ پارتی دێ سەرشۆڕ و شەرمەزار بن، هەرگیز رەوا نینە گەلێ كوردستانێ پشتی وان هەمی قوربانیان و پشتی وان هەمی پشتەڤانییێن نێڤدەولەتی و بنەمایێن دەستووری ژ نوی ئافرەتەك، یان لایەنەك یان ژی دەسهەلاتا ئیراقێ بڕیارێ ل سەر مافێن گەلێ كوردستانێ ل سەر مووچەی و بودجەی بدەت. ئەڤە ڕامانەكا مەزن دگەهینیت، ئەو ژی ئەوە كو هەتا نوكە تێنەگەهشتینە كو جەنابێ سەرۆك بارزانی ل گەلەك بیرەوەرییان یێ ئەمركری (قابلی قەبوول نیە) ئانكو ئەو مللەتە ژ لایێ پارتی ڤە یێ هاتیە پاراستن و هەتا نوكە ب شانازیڤە هەمی پلانێن دوژمنان دژی گەلێ مە ل سەر دەستێ پارتی یێن ل ئەردی داین هەرگیز قەبوول ناكەت ب كارەكێ نادەستووری و نایاسایی زۆرداریێ ل گەلێ كوردستانێ بكەن.
ڤێ گاڤێ ژی گەلێ كوردستانێ ب ئێك رێز د ئامادەنە بەرگریێ ژ مافێن خۆ بكەن و پێشمەرگەیێن دلسۆز و گیانفیدایێن كورد و كوردستانێ بن.
پێدڤیە نەحەزێن كوردستانێ زانیبایە كو خەباتا گەلێ كوردستانێ ژ پێناڤی پاراستنا مافێن گەلێ خۆ یا بەردەوامە و
چو جاران خەبات بۆ پارە و مووچەی نەبوویە، بەلكی بۆ سەربلندی و ئازادی و سەرفرازیێ بوویە و چو جاران ژی گەلێ كوردستانێ فێری هندێ نەبوویە سەرێ خۆ بۆ زۆردارەكی بچەمینیت و زۆرداریێ قەبوول بكەت.

عـەمـەر هـەركـۆشی

د هەلوەستەكی چاڤەرێكری دا (پەكەكێ‌) خۆ هەلوەشاند و ل سەرداخوازا رێبەرێ خۆ یێ زیندانكری برێز ئۆجەلان، دێ‌ چەكی دەینن و دوماهیێ ب شەڕێ پێنجی سالی یێ خۆ ل دژی دەولەتا تورك ئینن.
ئەڤێ چەندێ كەیفەكا مەزن ئێخستە دلێ هەمی ئاشتیخوازێن دەڤەرێ و ژبۆ هەمی گەلێ كوردستانێ و خانەوادێن گەریلایێن سەرێ چیا و زیندانیێن د ناڤ دیواران دا مزگینیەكا مەزن بوو، كو ئێدی هەمی دێ ب ئێكودو شاد بن و ئاشتی و ئاڤەدانی دێ جهێ شەڕی و وێرانكرنێ گریت، ئاشق و هەوادارێن برێز ئۆجەلان ژی وەك هەر گاڤ دێ دەستێن هەڤدو گرن و دەست ب شەهیانان كەن.
یا گرنگ و دلخۆشكەر ئەوە كو هێزێن پەكەكێ‌ تشتەك ل سەر ملێ خۆ نەهێلا ئەوا پێدڤی بوو ئەنجامدا ل پێناڤی ئاشتیێ و برایەتیێ، نها ژی تۆپ كەفتە د مەیدانا دەولەتا توركیا دا كو ل هەمبەر وێ چەندێ هەلوەستەكی ئاشتی و جوامێرانە راگەهینیت و دوماهیێ‌ ب دوژمنایەتی و شەڕان و مالوێرانیێ بینیت و ئاشتیەكا سەرتاسەری بهێتە ئەنجام و ئێدی داوایێ ب رژتنا خوین و رۆندكێن كورد و توركان بینن، گەلێ كوردستانێ ژی ب بێهنەكا تەنگ ڤە چاڤدێریێ دكەن كو مافێن رەوا یێن گەلێ كوردستانێ بهێنە دابینكرن و هەمی گرفتێن نیشتمانی د رێیا دیالۆگ و لێك تێگەهیشتنێ بهێنە چارەسەركرن. بێگومان جەنابێ سەرۆك بارزانی ژ مێژە هەولێن ئاشتیێ و براتیێ د ناڤبەرا پەكەكێ‌ و دەولەتا تورك ددەت لێ دیاربوو ناحەزێن ئاشتیی و ناحەزێن گەلێ مە ئاستەنگ بۆ ڤێ چەندێ چێدكرن و ئاگرێ شەڕی خۆشتر لێ دكر وە چو جارا نەهێشتیە ل باكۆر د رێكا دیالۆگێ و كارێ سیاسی و مەدەنی دا و ب گۆڕەی بنچینەیێن یاسایا نێڤدەولەتی و بریارین نەتەوێن ئێكبووی بهێتە چارەسەركرن، ئیرۆ دەلیڤەك مەزن ل پێشیا گەلێ مەیە كو ل بەر رۆناهیا گورانكاریێن دەڤەرێ و زۆلالبوونا راستی و دادپەروەریا كێشەیا نەتەوەییا كوردی گەلێ كوردستانێ وەك هێزەكا ئێكگرتی و ئێك رێز هەول دەن مافێن رەوایێن گەلێ كوردستانێ دابین كەن و ئێدی چو جاران رێكێ نەدەن چەك ل دژی گەلێ مە بهێتە بكارئینان، چونكی و پشتی پێنجی سالێن شەڕێ ل ناڤبەرا پەكەكێ‌ و دەولەتا تورك كێشە ئالۆزتر بوون و چارەسەری سەختر لێهاتن. ڤێجا ئەو كێشەیێن ب سالان ل ئەنجامێ شەڕی دروست بی رەنگە ب رێكا دیالۆگی د دەمەكی كێم دا بهێنە چارەسەركرن. هەمی دزانن ئاشتی و برایەتی بەختەوەری سۆز و خۆشەویستیێ دروست دكەت، لێ شەڕ رق وكینە و مالوێرانیێ و بەدبەختیی یە. هیڤیا گەلێ كوردستانێ ل باكور ئەوە كو ئەو ل هەڤهاتنە سەربگریت و ئێدی چەكدارێن پەكەكێ‌ د ناڤ خاكا هەرێمێ چەكێ بێ مۆلەت هەلنەگرن ئەو سەدان گوندێن ل سەر سنوورێ هەرێمێ كو بینە قوربانیا وی شەڕێ نا رەوا چۆل بكەن و چ بهانە د دەستێ دەولەتا تورك دا نەمینن كو بكەتە مەیدانا شەڕی ئو ئەو ئارامی و ئاشتییا كو نێزیكە ل توركیا بەرقرار ببیت، ڤان ناڤچەیێن ل سەر سنووری ژی ب خۆڤە بگریت و ژیان بۆ سروشێ خۆ یێ ئارام و ئاڤەدان ڤەبگەریێت دەولەتا توركیا ژی رێزێ ل مافێن نەتەوەیی یێن گەلێ كوردستانێ بگریت و وەكی برا پێكڤە بژین.

عەمەر هەرگۆشی

گەلێ مە ل رۆژاڤا پشتی خەباتەكا سەخت شیایە پارێزگاریێ ل خاكا خۆ بكەت و نموونەكی زیندی و دیار ل دەسهەلاتداریا كوردی پێشكێش كەت، نوكە دەولەتا سووری د دۆخەكی سەختێ سیاسی و ئابۆری دا دەرباز دبیت و كاریگەریەكا خراپ ل سەر رۆژاڤا یا هەی، دەسهەلاتدارێن سووریا د پێكۆلەكا دیاردانە كو دەسهەلاتا كوردی یا رۆژئاڤا نەهێلن و ب گفتوگۆ یانژی ب شەڕ خاكا رۆژاڤا بگەریێتەڤە بن دەسهەلاتا سووریا ل هەمبەر ڤێ چەندێ دەسەلاتا كوردی هەول ددەت د رێكا گفتوگۆ و دانوستاندنا ڕا بشێت مافێن نەتەوەیی یێن كوردی دەستەبەر بكەت و د دەستووری دا دەستكەفتێن مەزن بۆ كوردان جێبەجێ بكەن، هەلبەت ڤێ چەندێ پێدڤی یا ب ئێكگرتنێ و هاریكاریا د ناڤبەرا كوردا ندا هەی، هەر جار هێزا كوردان یا د ئێكەتیا رێزێن كوردان دا هەبوو، سەركەفتن و دەسكەفت دێ مەزنتر بن، ئەگەر گەلێ كوردستانێ ئێكگرتی بیت، پارتی دیموكراتی كوردستان د دیرۆكا خۆدا هەول دایە هەر جار رێزێن گەلێ كوردستانێ د مكوم و پاراستی بن بۆ ڤێ چەندێ قوربانیێن مەزن ژی داینە، جەنابێ سەرۆك بارزانی وەك رابەر و خەمخۆرەكی ڤێ مللەتی، هەمی جاران تەكەزی یا ل ئێكەتیێ و هەماهەنگیا گەلێ كوردستانێ كری كو ب گیانەكی برایانە و كوردانە یێ ئێكگرتی د سەنگەرێ تفاقێ و برایەتێ و كوردایەتیێ دا بن، ئەو هێرش و مەترسیێن ل سەر گەلێ مە ب مەترسی دزانیت بۆ سەر هەمی كوردان و ب فەر دزانیت هەمی كورد پێكڤە د هاریكاربن دا بشێن گەلێ مە ل رۆژاڤا ژ كارەسات و مەینەتان بپارێزیت، لەو هەمی جاران دەستپێشخەریێن ژدل دكەت، داكو هەمی پێكڤە چارەسەریا بۆ وان ئاریشەیان ببین، یێن كو بووینە ئاستەنگ و ئالینگەر د رێكا كوردینیێ دا، جەنابێ سەرۆك بارزانی د رێكا نوونەرێ تایبەتیێ خۆ دا پشكداری د كۆمبوونا ئێكرێزیا كوردی دا كریە و خەمەكا مەزن ل ئێك هەلوەستییا كوردان دخۆت و هەمی هاریكاریێن حوكمەتا هەرێما كوردستانێ و گەلێ كوردستانێ دئێخیتە د خزمەتا تەڤایی و ئێكرێزی و ئێك هەلوەستییا كوردان دا بۆ دانوستاندنێ ل گەل دەسهەڵاتدارێن سووریا بۆ گەهاندنا كوردان ب مەرام و مافێن نیشتمانی و نەتەوەیی یێن خۆ، هیڤییا پارتی ئەڤەیە كو ئەو پێكڤە كاركرنە د بەردەوام بن و كو دلێ هەمی كوردستانیان زۆر پێ خۆش دبیت و ناحەز و نەیارێن كوردان ژی كو خەونێ ب ناڤچوونا كوردان ڤە دبینن پێ یەكێتیێ دلپەست و خەمبار دبن.
جهێ خۆشحالیێ یە كو ئەڤرۆ جەنابێ سەرۆك بارزانی بوویە جهێ ئۆمێدا هەمی زۆریلێكریێن كوردستانێ و هەمی گەهشتینە ڤێ باوەرێ كو هەمی چارەسەری و دەرمانێن كێشەیا گەلێ مە یێن ل دەڤ جەنابێ بارزانی و كریارەكێ خێرێ و بەرەكەتێ یە و ل كیژان جهێ كوردستانێ كێشە هەبیت، ئامۆژگاری و هەلوەستێ پیرۆزێ جەنابێ وی ل وێ دەرێ یە.

عەمەر ئەرگۆشی

ل ڤان دەمێن دەربازبووی دا، چەند جەژنێن ئایینی و نەتەوەیی پێكڤە ل كوردستانێ هاتنەكرن، ژ هەمی لایەكیڤە هاتنە پیرۆزكرن و رێزداركرن، كولتۆر و بەرنامەیێ پارتی ئەوە كو كوردستانێ بكەتە وارێ پێكڤەژیانێ و هەڤدو قەبوولكرنێ ریز ل پیرۆزیێت هەڤدو بگرن، گەلێ كوردستانێ ب هەمی تەخ و چینێن جڤاكی و هەمی كێمەنەتەوایەتی و ئایین ڤە د سەربەست و ئازاد بووینە، هەر جار پارتی موكم بوویە ل سەر باوەریا خۆ كو چ جوداهی د ناڤبەرا خەلكێ جودا جودایێ كوردستانێ دا نەبیت و هەمی د ئەرك و مافی دا د یەكسان بن و چوجاران ل سەر بنەمایێ دینی ئان مەزهەبی ئان نەتەوەیی جیاوازیێ د ناڤبەرا تاكێن جڤاكێ دا نەكەن. د جەژنا ئەكیتۆ یا برایێن ئاشۆری و جەژنا پیرۆزا چارشەمبیا سۆرا برایێن ئێزدی و جەژنا پیرۆزا رەمەزانێ و جەژنا پیرۆزا قیامەتا مەسیحیان دا جەنابێ سەرۆك بارزانی وەك هەردەم پیرۆزباهی ل هەمیان كر و تێكە ل موكمكرنا برایەتی و هەڤكاری و رێز و خۆشەویستیێ كر دناڤبەرا هەمیان دا، هەر جار پارتی رێزەكا بێ پایان ل ئایینێن جودا یێن كوردستانێ دگریت و ب ئەركێ ل سەر ملێ خۆ دزانیت ئازادیێ و تەناهیێ بۆ هەمیان دابین بكەت دابشێن ئازادانە پەیرەویا ئاینا خۆ بكەن و د خزمەتا خودایێ بێ شریك و بێ هەڤال دابن.
پارتی د مێژویێ دا هەر جار پێگیری ل مافێن وانا كریە و ب ئەركێ خۆ زانیە خزمەتا داخواز و حەزێن وان یێن رەوا بكەت و چ جاران د دیرۆكێ دا نەبوویە كو هیچ لایەنەكێ ئایینی گازندە ژ پارتی كربن كو بەربەستەك بۆ وان چێ ببیت و پارتی د هەوارا وان نە چوبیت، ئەڤە ژی سەرچاڤە یا ل عەدالەتا بارزان گرتی كو ل سەردەمێ شێخ عەبدولسەلام و شێخ ئەحمەدێ بارزانی، مەسیحیان و جوهیان و موسلمانان د ئێك تراری دا ئاڤ ڤەدخوار و خوارن اوان ژی د ئێك مەنجەلێ دا دكەلی و زبارە و خۆشی و نەخۆشیێن وان پێكڤە بوون چ جیاوازی د ناڤبەرا وان دا نەبوون. ئەو پەروەردە و دادپەروەریا بارزان كو جەنابێ سەرۆك بارزانی ب شانازی ڤە پەیرەو دكەت یا بوویە هێڤێنێ پێكڤەژیانەكا دروست و هەژی كو هەمی خەلكێ كوردستانێ و ناڤچە و جیهان شانازیێ پێ دبەن، مەزنترەترین شانازی بۆ پشكا مللەتێ كورد دەما پاپایێ ڤاتیكان پێشوازی ل جەنابێ سەرۆك نێچیرڤان بارزانی كری ل ڤاتیكان، وەك رێزەك بۆ وێ مێژوویێ یا پارتی نەخشاندی ل پێناڤی خزمەتكرنا هەمی ئایینان ب یەكسانی، دیسا سەردانا پاپایێ پایە بلندێ ڤاتیكانێ بۆ كوردستانێ بهایەكی دیتر بوو كو دایە سیاسەتا جەنابێ سەرۆك بارزانی و حوكمەتا هەرێما كوردستانێ. خەلكێ كوردستانێ ئەو پێكڤەژیانە پیرۆز بیت و خودێ تەمەنێ جەنابێ سەرۆك بارزانی درێژ بكەت كو بناغەیێ یەكێتی و برایەتیەكا پتە و یێ دەینای د ناڤبەرا تەڤایا پێكهاتەیێن كوردستانێ دا.

عەمەر ئەرگۆشی

بێگومان ئافرەتا كورد د دیرۆكا كەڤن و نوی دا چ وەك كورد چ وەك ئافرەت مافێن وێ یێن هاتیە بنپێكرن و نەشیایە وەك پیدڤی رۆلێ خۆ یێ پیرۆز بلەیزیت د رێڤەبرنا جڤاكێ دا و پشكداریكرن د دەسهەڵاتێ داو نوێنەرایەتیكرنا بەرژەوەندیێن خۆ د ناڤ جڤاكێ دا، هەلبەت پارتی هەمی جاران باوەریەكا موكم هەبوویە كو پیدڤیە ئافرەت وەك نیڤا جڤاكێ ببتە خودان هەمی مافێن خۆ وە ئەڤ نیڤا جڤاكێ ب دروستی و باش بهێتە پاراستن و خزمەتكرن، چونكو بێ رۆلێ پیرۆزی ئافرەتی مەحالە جڤاك دروست و پێشكەفتی بمینیت.
خەمخۆریا جەنابێ سەرۆك بارزانی و پارتی ل دۆزا ئافرەتان پێشینەكا درێژ یا هەی سەربۆرەكا پڕ ژ هەماهەنگی و هەڤكاری و پشتەڤانیكرن ل ئافرەتێ و مافێن ئافرەتی هەمی جاران پارتی خۆ ب خودانا چارەسەرییا گرفت و ئاریشەیێن ئافرەتێ یا زانی و شوین دەستێ پارتی ل خزمەتا ئافرەتێ چ د رێكا یەكێتی ئافرەتان چ ب هەڤكاری و پشتەڤانیا حوكمەتی و دامودەزگەهێن وێ. ئەو رۆلێ ئافرەت د ناڤ پارتی و حوكمەتێ و دەستهەلاتێ دا دلەیزیت، هەمی ئەنجامێ وێ ب دەنگڤە هاتن و خەمخۆریا پارتییە بۆ ئافرەتێ. دیارە پارتی ب فەر دزانیت ئافرەت د هەمی وارێن ژیانێ دا پشكداریەكا چەلەنگتر بكەت و گرنگیەكا پتر ب ئافرەتا كورد بهێتەدان، لەوما پارتی پشتەڤانی و هاریكاریا ئافرەتان دكەت دا كۆنفرانسێ ببەستن كو هەمی هزرمەند و رۆناكبیر و چالاكڤان پشكداریێ تێدا بكەن، دا بشێن نەخشەرێیەكێ بۆ خوە دەینن كو هاریكاربیت بۆ موكمكرنا پێگێ ئافرەتان د ناڤ جڤاكێ دا ب ڤێ چەندێ پارتی تۆپێ د ئێخیتە مەیدانا ئافرەتان دا و ب رەنگەكی لەیستكێ پێ بكەن پارتی دێ هاریكار و پشتەڤان بیت و پارتی وەك هەر جار دێ ل سەر وێ رێبازا بارزانی و عەدالەتا بارزان بەردەوام بیت كو پتر ژ سەد سالانە ل سەر دچیت و ئافرەتێ شكۆمەند دپارێزیت.
گەرەكە ژبیر نەكەین سەرباری كۆسپێن مەزنێن جڤاكێ د رێكا ئافرەتێ دا پارتی شیایە هەتا رادەكی باش رۆلەكی بەرچاڤ بدەتە ئافرەتێ و نموونەیێن ب ڤێ رەنگی گەلەك دزۆرن و ژمارەكا بەرچاڤا ئافرەتێ خودی پێگەیەكی باشن د ناڤ دامودەزگەهێن حكومەتێ و پارتی دا و پێدڤیە رۆلێ مەزنێ ئافرەتێ د شەڕێ داعش دا چو جاران نەهێتە ژبیركرن. ئومێدێ دكەین ئافرەت د ڤێ ئەركێ خۆ یێ پیرۆز دا د سەركەفتی بن و هەمی لایەك ئالیكار بیت دا پێنگاڤەكا مەزن ل سەرئێخستانا ئافرەتا كورد د ئەركێ خۆ یێ نەتەوەی دا بچیتە پێش و بشێن ب پشتبەستنێ ب شیانێن خۆ پاشەرۆژەكا گەش ب خۆ مسۆگەر و دابین بكەن، ئەڤە ژی ئۆمێدا هەر مرۆڤەكی خەمخۆرێ گەل و وەلاتی یە.

عـەمـەر ئـەرگـۆشی

وەك رۆژەكا دیار د دیرۆكا گەلێ كورد دا كو بوویە نیشانا بەرگریكرنێ و تێكشكاندنا دەسهەڵاتا زۆرداریێ و رزگاركرنا تەپەسەرا ژ چەوساندنەوێ و ئەزیەتدانێ، ب درێژاهیا سالی وەلاتیێن كورد چاڤەرێی نەورۆزێ دكەن كود ڤێ رۆژێ دا هەستا خۆیا نەتەوەیی دەرببڕن و ئاگری ل بەرزایێن ولاتی هلكەن و دەست ب داوەت و شەهیانا بكەن و سۆز و رێزێ بۆ ڤێ رۆژا پیرۆز كو كاوەیێ ئاسنگەر دویماهیك ب دەسهەلاتا خوینمژا زوحاكی ئینای.
ئەو رۆژە بۆ گەلێ كوردستانێ زۆرە پیرۆز و ب بایەخە هەمی توێژ و تەخێن جڤاكی ل ڤێ رۆژێ ب جلێن كوردی و گوهۆرنێن كوردی و ب هەستەكا ئێكگرتی ڤە دەستی دئێخنە ناڤ دەستێ هەڤدو و پێكڤە بەردەوامیێ ب خەباتا خۆ یا نەتەوەیی ددەن و دبیتە نیشانا ئێكگرتنا گەلێ كوردستانێ ل هەر چار پارچا و ل هەر جهەكی كورد لێ هەبن.
هەمی لایەنێن سیاسی و پارت و رێكخراوێن جڤاكا مەدەنی گرنگیەكا زۆر ب ڤێ رۆژا دیرۆكی ددەن و جەماوەرێ كوردستانێ ژی ل بەر رۆناهیا ئاگرێ نەورۆزێ زێدەتر پەیامێن سەركردایەتیا كوردی دكەنە رێباز و ب هەستەكێ برایانە و ئێكگرتی د خزمەتا دۆزا رەوایا كوردی دا د بن، نەورۆز ژبلی هندێ كو كوردان ل خۆ كۆم دكەت، دیسا ژی دبیتە ئەگەرا هوشیاركرنا زێدەترا خەلكێ كوردستانا كو پێگیریێ ل سەر مافێن نەتەوەیی یێن خۆ بكەت و ب رەنگێ كاوەی ب هەمی تشتێن بەردەست بكاربینن بۆ بەرگریكرنێ ل خاك و زمان و كولتۆرێ كوردی و چو جارا خۆ نەچەمینن بۆ زۆردارا و هەردەم دگەل پێشمەرگە و خەباتكەرێن ولاتی بن و هەردەم وەك چریسكا رۆناهیا نەڤرۆزێ رێكا راستیێ و كوردایەتێ بۆ خەلكی رۆهن كەن و رێكا رزگاریا گەلێ مە رۆشەنتر و ئاسانتر بكەن.
ئەگەر مە بڤێت ئەم زێدەتر بهای بدەینە نەڤرۆزێ گەرەكە ئەڤرۆ ل هەمی دەمەكی زێدەتر ئەم ئێكگرتی بین و زێدەتر ژ هەر دەمەكی ئامادەبین بەرەڤانیێ ژ مافێن گەلێ خۆ بكەین و هەتا رزگاریا ئێكجارەكی بێهنا خۆ نەدەین، ئەو دۆخا گەلێ كوردستانێ تێدا دەرباز دبیت ژ هەمی نەڤرۆزچیان دخوازیت كو سەنگەرا شەهید و پێشمەرگەها قایم بپارێزن و خزمەتا گەل و ولاتی د ڤێ رۆژا پیرۆز دا بكەنە ئارمانج.

عەمەر ئەرگۆشی

ئەم هەمی دزانین هەرێما كوردستانێ جهەكێ سترتیژی د نەخشەیێ ناڤچەی دا هەیە و حوكمەتا هەرێما كوردستانێ ژی گرنگیەكا زۆرا هەی د ناڤ كۆڕبەندێن نیڤدەولەتی، رۆلێ وێ یێ پیرۆز د سەقامگێریێ و ئاشتیێ دا گەلەك گرنگە بۆ ناڤچێ و جیهانێ، نكۆلی ناهێتە كرن كو حوكمەتا هەرێما كوردستانێ یا بوویە جهێ شانازیا هەمی هێزێن دیموكراتیخواز و ئاشتیپەروەر كو كاریە ل گەل كۆمەلگا جیهانی شوین دەستێ خۆ د هەمی وارێن پاراستنا مافێ مرۆڤان دا و ب هێزكرنا دیموكراتیەتێ و پێشڤەبرنا وەلاتێ خۆ دیار كریە.
ژبەر هندێ جڤاكا جیهانی گەلەك بلەزن دا كو هندی زوی یە حوكمەتا هەرێما كوردستانێ بهێتە پێكئانین، دابشێن چێتر ل گەل حوكمەتا هەرێمێ سەرەدەریێ دگەل وان پێشهاتەیان بكەن ئەوێن بووینە هەڕەشە ل سەر ناڤچەیێ،ژ لایەكی دیترڤە گەلێ كوردستانێ ل بەندا پێكئینا حوكمەتێ بێهنا لێ تەنگ بووی حەز كەن رۆژەكێ زویتر حوكمەتێ پێكبینن دا زویتر ژ ڤان ئاریشەیان رزگار ببن یێن بێ چارەسەری مای.
گەلەك ڤێ چەندێ ب ڤالاهیەكا سیاسی دزانن كو هەتا ڤێگاڤێ حوكمەت و پەرلەمان ژبەر گیرۆبوونا پێكئینانا حوكمەتێ نەشیاینە ب ئەركێ خۆ یێ نیشتمانی و نەتەوەیی رابن و ئەو بەڵێنێن لایەنێن سیاسی ل بانگەشەیێن هەلبژارتنێ داین بهێنە جێبەجێ كرن.
ئەو بارودۆخێ ل دەردرێ هەرێمێ گوزەرێ دكەت وەسا ژ دەسەڵاتدارێن هەرێمێ دخوازیت كو ب لەز حوكمەتێ پێكبینن كو ئەو هەڕەشە كاریگەریێ ل سەر هەرێمێ و هەڤوەلاتیێن هەرێمێ نەبیت، نوكە ژ هەمی جاران پتر پێدڤییە كورد ئێكگرتی بیت و ناكۆكیێن ناڤخۆ بكەنە قوربانی بەرژەوەندیا نەتەوەیی و بەرژەوەندیا گشتی،چونكو ئەو ئاگرێ لوبنان و سووریا و یەمەن رەنگە بگەهیتە ئیراقێ و وی دەمی ل ڤالاهیا پێك نەئانینا حوكمەتێ، گەلێ كوردستانێ رەنگە خۆدا نەكەت تووشی زیانێن قورس ببیت، ئەوا دهێتە چاڤەرێكرن، ئەوە كو هەولێر ببیتە چەقا چارەسەریا كێشەیان و چاڤكانیا رێنما و ئاموژگاریان بۆ هەمی لایەنێن دەرەكی و ناڤخۆیی، لەوما ئەگەر حوكمەتەكا ئێكگرتی یا ب هێز بكەڤیتە سەر پیان هینگی دێ قورسیەكا زێدەتر دەتە كێشەیا نەتەوەیا كوردی و زێدەتر و ب ساناهیتر دێ خۆزیێن شەهیدان و هەمی كوردستانیان هێنە جی.
ئەركێ نەتەویێ هەمی تاكەكی كوردستانی یە ئەڤرۆ ل هەمی دەمەكی زێدەتر ببنە پاسەوانێن گەلێ كوردستانێ و خزمەتكارێن وێ، پەرلەمانی ئەوێ ب دەنگێ مللەتێ مە د پرۆسەیاكا دیموكراتیا باوەرپێكری هاتیە هەلبژارتن.
جهێ باسێ یە كو هەرێما كوردستانێ یا بوویە روانگەیا هەمی كوردستانیان و ژێ دهێتە خواستن كو ناڤمالا خۆ رێك بیێخن داب بەرپرسیاریێن خۆ یێن ناڤخۆیی و كوردستانی و هەرێمایەتی و جیهانی رابیت كو ركابەری و ئالنگاری دزۆرن.