عەمەر هەرگۆشی

خەلكەكی زۆر ل سەرتاسەرێ كوردستانی بێی هندێ كو چاڤ ب سەركردەیێن خۆ كەفتبیت، پەیوەندیەكا روحی یا ل گەل سەركردەیان پەیداكری، ئەگەرا هەرێ مەزنا ڤێ چەندێ ژی دگەریێتەڤە بۆ ڤێ هندێ كو زۆرداری و تەپەسەریەكا زۆرا ل سەر خەلكێ كوردستانێ هەبووی، هەروەسا خەلكی گەلە حەز ژ وڵاتێ خۆ و ئازادیا گەلێ خۆ دكر و ب تنێ هیڤی و ئومێدا وان بۆ رزگاریا كورد و كوردستانێ شۆرشا بارزانیێ نەمر و پارتی دیموكراتی كوردستان بوو، ژبەر ڤێ هندێ سەدان هزار زارۆكێن كوردستانێ دەما هەست ب ئێش و ژانێن گەلێ خۆە دكرن فێری هندێ ببوون كو ب زارۆكیا خۆ بكەڤنە خەیالێن سەرۆك بارزانی و ئازاد و رزگاریا وڵاتێ خۆ د لویلیا تفەنگا پێشمەرگەهێن بارزانی را ببینن، ل سەر ڤێ چەندێ خەلكێ بەشخۆراڤێ كوردستانێ هیڤێن خۆ ل سەر سۆز و و وەفایا خۆ بۆ سەرۆك بارزانی بیناكرن و ژ هەمی لایەكی ڤە جەنابێ سەرۆك بارزانی یێ بوویە سیمبۆل و خۆشتڤیتێ هەمیان.
ئەو پێشوازیا گەرم ژ لایێ خەلكی ڤە، لێ دهێتە كرن و ئەو گازی و هاوارێن خەلكی هەمی ئەنجامێ وێ خوشەویتی و رێزێ یە یا خەلكێ كوردستانی بۆ جەنابێ وی هەی٠
هەلبەت سەرۆك بارزانی د هەمی ژیانا خۆ دا هەول یا بۆ دابینكرنا مافێن گەلێ كوردستانی دای كو ل هەر جهەكی هەبن و چو جاران درێغی نەكریە د هاریكاریكرن و رزگاركرنا كوردان و بۆ جارەكێ ژی غافل نەبوویە ژ هەلوەستێ خۆ یێ نەتەوەیی ژبەر ڤێ هندێ ژی ل هەمی سەردانێن خۆ چ بۆ باكور چ بۆ رۆژئاڤا پێشوازیەكا گەرم یا بێوێنە لێ دهێتەكرن و ب هیڤی و ئومێدێ كورد و كوردستانێ دزانن٠
ئەڤرۆ ل هەردەرەكی زۆردای ل سەر كوردان هەبیت دەنگێ سەرۆك بارزانێ بۆ بەرگریكرنێ ل كوردایەتیێ ل وێرێ یی بلندە، ل هەردەرەكی زۆرداری ل سەر كوردان هەبیت ل وێرێ قەستا بن دەستهەلاتا بارزانی دكەن كو دزانن دێ دپاراستی بن و دێ وەكی ماڵا خۆ حسابێ بۆ كەن، نها هەرێما كوردستانێ یا بوویە ئومێدا هەمی بەلەنگازان و هەمی كورد قەستا ژیانەكا ئارام و بێ مەترسی ل هەرێمێ دكەن، ئەڤێ چەندێ رێزەكا مەزنا دایە حوكمەتا كوردستانێ ل ناڤ هەمی كوردان و داڤا ئەقینیا هەڤولاتیان بۆ سەرۆك بارزانی ب هێزتر بوویە و هێشتا كورد ب زاروكینیا خۆ ب خەیال و ئەڤینیا خۆ بۆ سەرۆك بارزانی مەزن دبن.
هەمی پارتی شانازیێ ب هندێ دبەن كو ئەڤرۆ لسەر دەستێ سەرۆك بارزانی كوردستانێ قووناخێن مێژووی یێن باش یێن برین و هەوڵێن سەرۆك بارزانی ل پێناڤی ئاشتیێ و برایەتیێ و ئێكرێزیا گەلێ كوردستانێ گەهاندنا گەلێ كوردستانێ ب ئارمانچێن نەتەوەیی دبەردەوامن و ئەڤرۆ هیڤی و ئومێدێن گەلێ مە دەولەت سەرێ خوینا شەهیدان و قەهرەمانێن مللەتێ مە ژ هەمی دەمەكی پترن و ب هێزترن و مومكینترن٠
هەر سەردانەكا سەرۆك بارزانی بۆ ناڤ كوردان راستیەكا دیتر خۆیا دبیت ئەو ژی ئەوە كو ئەو رێز و ئەڤینا كوردان ژ دویرڤە بۆ خەباتا گەڵێ كوردستانێ و سەرۆك بارزنی ژ وێ رێزێ كێمتر نینە یا ژ نێزیك ڤە بۆ جەنابێ وی هەی، ئەو گرنژین و تەبایی و رێزە هێزەكا دی ددەتە پێشمەرگەها كو پتر ل سەر رێبازا كوردینێ ئامادەی بەرخودان و قوربانیدانێ بن و پتر ژ هەمی دەمەكی هەوڵێن برایەتی و تەبایێ بدەن دائەو رێزە و ئەو ئەڤینە یا بەردەوام بیت كو بارزانیێ نەمر بەرێ بناخێ وێ یێ دەینای٠
هەمی پێشمەرگە خۆ ب قەرزارێ ڤان كوردان دزانن كو هەمی رەنگێن زورداریێ دیتی و خەباتا پارتی و پێشمەرگەها ژبیر نەكری و هەمی جاران ب خەیاڵێن رزگاریێ و ئازادیێ هێدی هێدی مەزن دبن.

عەمەر هەرگۆشی

پارتی هەولەكا زۆر دا كو د ڤان هەلبژارتنان دا؛ رێكوردا هەلبژارتنان بشكێنیت و بۆ جارا ئێكێ یە د دیرۆكێ دا پارتەكا سیاسی ل سەرانسەرێ ئیراقێ پتر ژ ئێك ملیۆن دەنگێن دەنگدەران ب دەستخۆڤە بینیت. ئەوە كارەكێ مەزنە و پێدڤی ب ئەركەكێ مەزن دكر، رەنگە گەلەكا وەسا هزركربیت كو دەما پارتی بەحسا ئێك ملیۆن دەنگان دكر، مەبەست ژێ بانگەشەیا هەلبژارتنان بیت، بەلێ ئاشكرابوو كو پارتی شیا ڤێ هزرێ سەربێخیت و دەنگێن خۆ ب خەبات و راستگۆیی و دادپەروەریا خۆ ژ میلۆنان دەرباز بكەت و زێدەتر ژ هەمی دەمەكی ببیتە جهێ ئۆمێدا گەلێ كوردستانێ.
پارتی شیا نیشا خەلكێ كوردستانێ بدەت كو پلان و بەرنامەیێ پارتی بەرنامەكێ راست و دروستە و یێ د خزمەتا خەلكێ كوردستانێ دا و شیا باوەریێ ب جەماوەرێ كوردستانێ بینیت كو پارتا تەنگاڤیایە و دەستێ درێژێ خزمەتگوزاریان دێ یی بەردەوام بیت و ل بن سیبەرا حوكمەتا هەرێما كوردستانێ، كو هەمی پێكهاتە و تەخێن جودا جودا یێن گەلێ مە دێ د پاراستی بن و هەمی دێ ب مافێن خۆ یێن نەتەوایەتی شاد بن. ب ڤێ چەندێ پارتی و جەماوەرێ كوردستانێ ب ئێك هزر و ب ئێك باوەر بڕیار دا؛ سندۆقێن دەنگدانێ ژ رەنگێ زەر پڕ بكەن و هێزەكا مەزن بدەنە پارتی كو بكاریت ل بەغدا رۆلەكی مەزن د دابینكرنا مافێ گەلێ كوردستانێ و جێبەجێ كرنا دەستووری و سەقامگیركرنا سیستەمێ فیدرالی بلەیزیت.
هەلبەت دەما پارتی خۆدانا زێدەتر ژ ملیۆنەك و سەد هزار دەنگان بیت هەلوەستێ وێ و بڕیارێن وێ پتر دهێنە ل بەرچاڤ وەرگرتن و كەس نكاریت بریارەكا دژبەرا مافێن گەلێ كوردستانێ و بەرژەوەندیێن بالایێن نەتەوەیێ كورد ل سەر پارتی و گەلێ كوردستانێ بسەپینیت.
گەلێ كوردستانێ ب هەمی تەخێن جڤاكی ڤە دیاركر كو گەلێ كوردستانێ و پارتی ژێكجودا نابن و پارتی دەنگێ مللەتییە و هەر گەفەك ل سەر گەلێ كوردستانێ گەفە ل سەر پارتی وە هەر گەفەك ل سەر پارتی گەفە ل سەر تەڤایا گەلێ مە و حوكمەتا هەرێمێ.
ئەوە سەركەفتنەكا مەزنە بۆ بزاڤا رزگاریا نەتەوەییا كورد، كو پارتی شیا پێداگیریێ ل بەرهەمێ خوینا شەهیدان و قوربانیێن گەلێ كوردستانێ بكەت و ل سەر رێبازا پیرۆزا بارزانی ڤێ باوەرییا مەزنا گەلێ كوردستانێ ب دەستخۆڤە بینیت. ڤێ جارێ ئەركێ پارتی بەرانبەر خاك و گەلێ كوردستانێ قورستر و مەزنتر بوو كو دڤێت ژ هەمی دەمەكی پتر خۆ بەرهەڤ بكەت ژ بۆ پتر خەبات و قوربانیدانێ دا بكاریت ل ئاستێ وێ باوەریێ و متمانەیێ بیت، ئەوا گەلێ كوردستانی دایە كاندیدێن پارتی و رێبازا پیرۆزا بارزانیێ نەمر.
سەركەفتنا ئێك ملیۆنی گرنگە، چونكو خەلكی پارتی و بەرنامەیێ پارتی پەسندكر و گەهشتن باوەرەكێ كو ئەوێ كوردستانێ دپارێزیت و رزگاردكەت و ب هەردو دەستان د خزمەتا گەلێ كوردستانێ دایە پارتییە و ئەێ بشێت پلانێن داگیركەر و ناحەزێن خانەوادەیێن پێشمەرگەیان تێك بدەت هەر پارتییە.

عەمەر هەرگوشی

جوانترین رەنگێ پێكڤەژیانێ ل كوردستانێ ل ژێر كاریگەریا پارتی و ئاموژگاریێن سەرۆك بارزانی یێ هاتیە خەملاندن و یێ بویە جهێ باوەریەكا مەزن ل نك هەمی پێكهاتەیان و خەلكێ كوردستانێ و جیهانێ، پارتی كاریە نموونەیەكی جوانێ برایەتی و دۆستایەتی و هەڤدو خۆشویستنێ ل كوردستانێ پیادە بكەت و بێ جوداهی خزمەتا هەمیان وەكهەڤ بكەت و بەرەڤانیەكا ب هێز ژ مافێن هەمی پێكهاتەیا بكەت، نها كوردستان یابوویە مەلبەند و پایتەختێ برایەتی و پێكڤەژیانێ و هەمی پێكهاتەیێن جودا جودا كوردستانێ ب مالا خۆ دزانن و یا بوویە پەناگا و سێبەرا هەمی لێقەومایا ل ئیراق و سووریا و ژ هەمی لایەكیڤە پەنای بۆ هەرێما كوردستانێ دئینن, ئەو پێكهاتەیێن ل هەرێما كوردستانێ دژین، پشكداریەكا بەرچاڤ د دامودەزگەهێن حوكمەتێ دا دكەن و ل هەلبژارتنێن گشتی دا یێن شیای چ ب رەنگەكی راستەوخۆ چ ب كۆتا ببنە نوونەرێن خەلكی و پشكداریێ د پەرلەمانی دا بكەن و مفای ژ ڤێ پرۆسەیا دیموكراستەتێ وەرگرن كو پارتی دیموكراتی كوردستان بنەمایێ وێ ب موكمی دەینای. دەمێ كو كریستیانێتن ئیراقێ ژبەر زۆرداریێ درەڤیان و قەستا هەرێما كوردستانێ دكرن، هەمی وەكی پێكهاتەیێن دی ل كوردستانێ دهاتنە پاراستن و رێزداركرن كو ئەو چەندە ببوو هۆكارەك كو هەرێما كوردستانێ وەك بنگەهەكی دیارێ پاراستنا مافێن مرۆڤان و پێكهاتەیان بهێت هەژمارتن، ئێك ژ ئەگەرێن پێشوازیێن گەرمێن پاپایێ پیرۆزێ ڤاتیكانێ ل پێشوازیكرنا سەرۆك بارزانی و جەنابێ نێچیرڤان بارزانی دگەریێتەڤە بۆ وێ رۆلێ پیرۆزی پارتی كو د خزمەتا هەمی پێكهاتەیان دابوو، هەروەسا سەردانا جەنابێ پاپایێ ڤاتیكانێ بۆ هەرێما كوردستانێ و ژ نێزیكڤە سەرەدانا كریستانان و هەمی پێكهاتەیێن كوردستانێ كر و ستایشێ رۆلێ پارتی و جەنابێ سەرۆك بارزانی كر كو ب ڤێ رەنگێ مرۆڤدۆستانە خزمەتا هەمی پێكهاتەیان دكەن و مافێن وان دپارێزیت.
ئێك ژ ئەگەرێن سەركەفتنێن پارتی د هەمی هەلبژاتنان دا ئەو دادپەروەریە كو پارتی د ناڤبەرا پێكهاتەیان دمەشینیت ئو ب گیانەكی ئێكگرتی و برایانە ئەو پكهاتەیێن كوردستانێ د هەلبژارتنان دا دەنگێ خۆ ددەنە لیستا پارتی.
ئەڤرۆ پارتی ژ هەمی دەمەكی رژدترە كو پێداگیریێ ژ مافێن هەمی پێكهاتەیان بكەت و یابوویە پارێزەر و پێشمەرگێن رۆژێن تەنگاڤیان كو هەمی پێكهاتەیا بێ جوداهی ب مافێن خۆ شاد بكەت و ژ هەمی زۆرداری و تەپەسەریەكێ بپارێزیت.
یا فەرە هەمی گەلێ كوردستانێ لیستا ٢٧٥ ب لیستا تەڤایێ و برایەتیێ و ئارامیێ بزانن و دەنگێ خۆ بدەنێ دا كوردستان زێدەتر ئارام ببیت و پێكهاتە ژی پتر ب ماف و خۆزیكێن خۆ شاد ببن و پتر ژی د پاراستی بن.

عەمەر هەرگۆشی

جەنابێ سەرۆك بارزانی داخوازێ ژ پارتییان دكەت كو ل هەر جهەكی زولم و زۆرداری هەبیت؛ ل وێرێ بۆ وان ببنە پشت و پەنا، هەلبەت پارتی قوتابخانا پەروەردەكرنا كوردایە كو ل خاك و گەلێ خۆ خۆدی دەركەڤن، ل هەر جهەكی زۆرداری و بنپێكرنا مافێ كوردان هەبیت ل وێرێ د ئامادە بن، د دیرۆكا خۆدا كەس پێشییا پارتیا ل دویڤ دەنگێ بەلەنگازان نە چوویە و كەس بەراهیكا پارتی نەگەهشتیە جهەكی كو غەدر و زۆلم لێ دهێتە كرن داكو بەرەڤانیێ ژێ بكەت و گیانێ خۆ بكەنە قوربانی، دا زۆرلێكری و بێگونەهێن وەلاتی رزگار بكەت، دیرۆكا پارتی یا تژییە ژ داستانێن خۆ گوریكرنێ ل دادپەروەریێ و بەرەڤانیكرنێ ژ ماف و ژیان و شەرەفا كوردایەتیێ.
هەمی ئومێدا جەنابێ سەرۆك بارزانی ئەوە كو هەمی پارتی مرۆڤێن رۆژێن تەنگاڤیان بن ، مرۆڤێ رۆژێن مێرینیێ و قەهرەمانیێ بن و ل كیڤە دەنگێ بەلەنگازەكی و زۆرلێكریەكی بگەهتە گوهێ وان؛ ل وێ درێ پێشییا هەمیان ئامادەبن، ئامادەی گیان بەخشین و فیداكاریێ بن دا ئەو كوردستان ب خوینێ ئاڤ دای ل بن دەستێن بیانییان نەمینیت و ئەو زۆرداریا ل سەر گەلێ كوردستانێ دهێتە سەپاندن بۆ هەتا هەتایێ رابیت، ئەركێ پارتییان ڤێ جارێ زۆرێ گرانە پێدڤییە جەماوەرێ كوردستانێ دەنگێ خۆ بدەنە ڤێ لیستا پارتی ئەوا هەمی شیانێن خۆ دمەزێخیت؛ دا بەرەڤانیێ ژ ماف و كەرامەتا كوردایەتیێ بكەت و گیان ل سەر دەست بن دا زۆرداریێ ل وەلاتێ مە تونە بكەت و ل كیڤە غەدر و زولم هەبیت؛ ل وێرێ ببنە گول د بەر سەرێ خەلكی ڕا و ل وێرێ رۆلێ خۆ یێ‌ كوردپەروەری و ولاتپارێزیێ خۆ بلەیزن. كەس نەما نەزانیت كو پارتی ئاشقا خزمەتكرنا زورلێكرا و بەشخوراوێن كوردستانێ یە و كانیك و سەروچاڤێ هێزا پارتی ژی؛ ئەو بەلەنگاز و زۆرلێكراون كو رۆژەكی پارتی هاری وان كریە كو ژ زۆرداریێ رزگار ببن كو بگەهنە مافێن خۆ یێن رەوا.
شانازیەكا مەزنە بۆ هەمی گەلێ كوردستانێ كو پارتی ب پاقژی ل سەر رێبازا بارزانیێ نەمر رزگاركرنا گەلێ كوردستانێ ژ بن دەستیێ كریە ئارمانج و بەرگریكرن ژ مافێن نەتەوەیێن گەلی كوردستانێ كریە ئەركێ ب لەز و پێشینەیێ خۆ د خەباتا بێ قوسیان دا.
هەمی پارتی ب شانازیڤە د خزمەتا ئەمرێن سەرۆك بارزانینە و ب شەرەف دزانن ل كیڤە زۆرداری ل كوردان بهێتەكرن ب سەر و مال د ئامادەبن ل وێرێ و پێشیا هەمیان د ئامەدەی گیانفیدایێ ببن، هەمی گەلێ كوردستانێ شانازیێ ب سەرۆك بارزانی دبەن كو چ جاران بەشخۆرا و زۆرلێكراوێن كوردستانێ ژبیر نەكرینە؛ هەمی جاران ب ئەركێ كوردایەتی و پارتایەتیێ خۆ دزانیت كو ل ڤێ مەیدانێ یی ئامادە بیت ئەوا دبیتە قەلغانا پاراستنا مللەتێ كورد و مافێن نەتەوایەتیێن كوردان.
دا پارتی بشێت ب هێزتر و رژدتر پێداگیریێ ژ مافێن گەلێ كوردستانێ بكەت و رۆلەكی نەتەوایەتی پیرۆزتر ل بەغدا بلەیزیت، پێدڤیە هەمی ولاتدۆست و كورد پەروەرە لیستا ژمارە ٢٧٥ ژبیر نەكەن و چاڤا پارتی ل تەنگاڤیا بوویە قەلغانا پاراستنا كوردان وەسا كورد ژی ببنە ئەگەرێ زێدەترێ ب هێزكرن و سەرئێخستنا لیستا پارتی د هەلبژارتنان دا.

عەمەر هەرگۆشی

د دەمەكی دا كو پارت و لایەنێن ئیراقی ب گەرمی دەست ب بانگەشەیا هەلبژارتنان كریە، ئەمریكا خۆیا كر كو دێ هێرشێ بەتە…
جهێ نیگەرانیێ یە كو ئەو بەرنامەیێ ئەمریكا بۆ ئیراقێ و ئیراقیان هەیی ب تەمامی ل گەل وی بەرنامەی ئەوێ كو هێز و لایەنێن ئیراقی بۆ ئیراقێ هەی جودایە، دیارە كو جوداهی و دژایەتیەكا زۆر یا د ناڤبەرا هەردو بەرنامەیان دا هەی، نها ئەو جوداهی یێن گەهشتینە گۆپیكێ و ئێدی هند یا مای ئاگر بباریت، هەمی لایەنێن عیراقی ب دودلیڤە چاڤەریی هەلبژارتنا دكەن و گومانا هەی كو هەتا وەختێ‌ هەلبژارتنان چ شەڕ نابن، ئەمریكا و ئیسرائیل درژدن كو دڤیا هەژمۆنا ئیرانی ل سەر ئیراقێ نەمینیت و ئیران ژی هەمی هەولان ددەت كو هەژمۆن و كاریگەریێن خۆ ل سەر ئیراقێ زێدە كەت د ڤێ ناڤبەینێ دا بەرژەوەندیێن بلند یێن ئیراقیان دهێنە بنپێكرن و خوینەكا زۆرا ئیراقیان دهێتە رێژتن بێی كو خزمەتەكا ئیراقێ پێ بهێتە كرن.
تازە ئەمریكا رژدتر بەرنامەیێ ئابلۆقا ئابۆری دئێختە سەر هندەك لایەنان و ناڤێ هندە لایەنێن دی یێن دیار یێن ئیراقی دئێخیتە د ناڤ لیستا تیرۆرێ دا.
نەتانیاهۆ ب ئاشكەرا ڕاگەهاند كو پشتی غەزە هێشتا رێكەكا درێژ یا ل پێش وان و شەرێن مەزن یێن مایین كو چاڤدێر دبێژن مەبەستا وی ئیراق و ئیرانن، ژ بۆ ڤێ چەندێ ژی ئامادەكاری دهێن كرن، دیسا دهێتە راگەهاندن كو ئیران ژی ئامادەكاریێن خۆ دكەت و ئیسرائیل دبێژێت ئیران مۆشەكێن دوور هاڤێژێن خۆ ڤەدگوهاستیە د ئیراقێ دا ژ ئیراقێ را ئیسرائیلێ‌ ب ئارمانج بگریت.
دیارە كو ئیراق د رەوشەكا خراب دا دبۆریت و هەمیان گومانا هەی كو د ڤان كاودانان دا هەلبژارتن بهێنە ئەنجامدان، دیارە كو برینێن ئیراقیان ب هەلبژارتنان ناهێنە دەرمانكرن و چارەسەریا ژی بۆ ڤان گرفتێن چەند سالە یێن هەلاویستی پەیدا نابن.
هەمی ئیراقی ب كورد و عەرەب ڤە دخوازن هیچی دی ئیراق نەبیتە مەیدانا ئێكلایكرنا بەرژەوەندیێن بیانیان و هیچی دی خوینا ئیراقیا بۆ مەرامێن بینیا نەهێن رێژتن، ئەڤرۆ ئیراقیان ژ هەمی دەمەكی پتر پێدڤی یا ب ئاشتیێ و برایەتیێ و ئێكرێزیێ هەی، هەر وەلاتەكی یان لایەنەكی بەرژەوەندیا ئیراقێ و ئیراقیا بڤێت پێدڤیە ل سەر دەستێ هەڤكاریێ و خزمەتێ بۆ درێژ بكەت، هەمی ئیراقی دزانن ئێدی چەك و بۆمبە و شەڕ گرفتێن ئیراقیان چارەسەر ناكەن و برینێن ئیراقیان دێ كویرتر كەن،
هەمی جاران ئیراقی زەرەرمەندێن ئێكێ بووینە ل شەڕان و كەس هندی ئیراقییان نەبووینە قوربانێن وان بریاران یێن ژ دەرڤە ل سەر ئیراقێ دهێن پیادەكرن.

عەمەر هەرگۆشی

چ گومان تێدا نینن كو هەمی حوكمەتێن ئێك ل دویڤ ئێك؛ یێن ل هەرێما كوردستانێ هاتیە دامەزراندن ل سەر دەستێ پارتی بووینە و هەمی جاران پارتی ب دەنگێ گەلێ كوردستانێ كو باوەریا ئێكێ‌ بوویە حوكمەتینی یا كری و ل شوینا تبلێن پارتی ب درێژاتیا دەسهەلاتا حوكمەتا خۆ ب هەمی رووێن دەسهەلاتداریێ و حوكمەتینیێ ڤە دیارن و جهێ شانازیا هەمی كورد پەروەرەكی دلسۆزن، سەرباری ڤێ چەندێ كو گرفتێن مەزن ژلایێ دوژمن و ناحەزان ڤە بۆ هەرێمێ هاتنە چێكرن، لێ بەلێ پارتی شییا هەرێما كوردستانێ بپارێزیت و خزمەتێ‌ بكەت و بكەتە نموونەیاكا جوان یا دیموكراسیەتێ ل ناڤچە و قۆناخێن باش یێن پێشكەفتنێ ب خۆڤە ببینیت، ئەو ژیبوون و دەسهەلاتا قانوونێ و پێشخستنا كەرتێ پەروەردێ و ساخلەمیێ و..هتد، ب هەونتە نەهاتینە، سەرەرای هەڕەشە و ئابلۆقێن ئابۆری و هێرشێن سەربازی بۆ سەر هەرێمێ؛ ئەڤرۆ هەرێم یا بوویە پەناگەهەكا گرنگ بۆ هەمی ئاوارە و بەلەنگازان كو قەستا ئێمنایەتێ و پاراستنا ژیانا خۆ دكەن. حوكمرانیا پارتی ل سەر بنەمایێن دیموكراسیەتێ و پاراستنا مافێن مرۆڤی و سەروەریا قانوونێ یا بوویە جهێ ئومێدا هەمی ئازادیخواز و دیموكراتپەروەرێن ناڤچێ‌، كەس نینە ل هەرێما كوردستانێ هەست ب ڤێ جوداهیا ئاڤەدانی و خزمەتگوزراییان نەكەت ل ناڤبەرا هەرێما كوردستانێ و ناڤچەی، ب تایبەتی ل گەل ئیراقا كو ئەم پشكەك لێ و سەروچاڤێن داهاتا مە د دەستێ وان دا.
هەمی هایدارن كو جهێ پارتی لێ بیت و دەستێ خزمەتكاریێ گەهشتبتێ ئاڤەدانی و ئارامی و بزاڤەكا جوانا پێشكەفتنێ یا ب خوە ڤە دیتی، ئەو چەندە ل كەس ڤەشارتی نینە و هەمی ئەو سەركردە و بیانی یێن سەرەدانا كوردستانێ دكەن ستایشا وێ رۆلێ پیرۆزێ پارتی دكەن و حێبەتی دمینن كو دبینن ب شیانێن كێم و د كاودانێن خراپ دا گوهۆرینەكا بەرچاڤ ل سەر دەستێ پارتی یا ل هەرێما كوردستانێ پەیدابووی، ئەڤێ چەندێ باوەریەكا ب هێزا بۆ گەلێ كوردستانێ و پارتی یا ل دەرڤە و ناڤخۆ چێكری و دەنگدان بۆ لیستا پارتی دەنگدانە بۆ بەردەوامبوونا ڤێ ئاڤەدانیێ یا هەمی گەلێ كوردستانێ ل پێش چاڤێن خۆ دبینیت.
ئەڤرۆ گەلێ كوردستانێ یێ ل بەر روویێ گوهۆرینێن مەزن دا و هەرەشەیێن گەلەك مەزن یێن ل سەر ناڤچێ هەیین، ئەو باوەریا جەماوەری ب پارتی بۆ رۆژەكا هۆسایە كو گەلێ كوردستانێ ل پارتی و خوینا شەهیدێن خۆ، خۆدی دەركەڤن و ل سەر پیان راوەستن، دەنگێ خۆ بدەنە وێ پارتێ یا هەمی جاران ل سەرپیا راوەستای، داكو مافێن گەلێ كوردستانێ و خاكا كوردستانێ پاراستی بیت و دەستێ ئاڤەدانیێ و خزمەتگوزاریێ بگەهیتە هەمی دەڤەرێن كوردستانێ و قوسیری نەهێتەكرن ژ بۆ دابینكرنا خواستەك و داخوازیێن جەماوەری، ئەو باوەریا پارتی د ناڤبەرا خۆ وە جەماوەری دا چێكری یا شەڤەك و رۆژەكان نینە، ئەنجامێ خەباتا هەشتێ‌ سالێن بەرگریكرنێ و قوربانیدانێ و خۆ نەچەماندنێ یە كو ئەڤرۆ بوویە ئەمانەتێ بەردەستێ هەمی كوردەكێ خۆدان وژدان و كورد پەروەر، دەنگدان بۆ پارتی هەڤكاریەكا مەزنە بۆ كوردستانەكا ب هێز و پایەدار و ئێكگرتی و مزگینیەكا مەزنە بۆ خانەوادێن شەهیدان و پێشمەرگەیی و هەمی ماندینەناسێن وەلاتی.
د رۆژەكا هۆسا دا گەركە ئەم هەمی ب ئەركێ خۆ یێ وەلاتپارێزی رابین و دەنگی بدەینە لیستا ژمارە ٢٧٥ دا كو پارتی ب دەستەكی درێژتر داكۆكیێ وەك هەر جار ل مافێ گەلێ كوردستانێ بكەت و پێنگاڤەكا دی مە ژ رزگاریا ئێكجارەكی نێزیك بكەت.

عەمەر هـەرگـۆشـی

پەیوەندیێن ئیراقێ و ئەمریکا هەر رۆژ ئالۆزیێن پتر ب خۆڤە دبینن و ئومێدا چارەسەریا ب لێکتێگەشتن و دۆستانە یا کێم دبیت و بەرەژەنگێن ئالۆزیێن مەزن یێن زێدەتر لێ دهێن، هەمی جاران ئەمریکا هەولددەت حوکمەتا ئیراقی خۆ ژ ئیرانێ دویر بگریت و هەژموونا ئیرانی ل سەر ئیراقێ کێم بکەت، ب تایبەتی زۆر هەولێن دای هندەک گرۆپێن سەر ب حەشدا شەعبی ڤە کو ژلایێ ئیرانێڤە پشتەڤانی لێ دهێت کرن هاریکاریێن وان ژلایێ حوكمەتێڤە قوت بکەن، دیارە پشتی هەمی هەولان یا بۆ ئەمریکا خۆیا بووی کو ئێدی دەولەتا ئیراقێ نکارە خۆ، کو وێ خواستەکا ئەمریکا بجهـ بینە، لەو ئەمریکا دەست ب ڤەکشاندنا هێزێن خۆ ژ گەل ئیراقێ و هندەک ژ وان گرۆپ و لایەنێن ناڤ حەشدا شەعبی ئێخستنە د ناڤ لیستا تیرۆرێ دا، کو ژ نوکە پێڤە دێ سەرەدەریێ وەکی تیرۆرست دێ دگەل کەن و دێ داخوازێ ژ ئیراقێ کەن هەمی جۆرێن ئالیکاریان لێ ببڕن و چەکێ د دەستێ وان دا تونە بکەن، بێگومان ئەو هژمارەکا زۆرن نێزیکی هەفت گرۆپانە کو (٧٠ ٠/٠) ژ تەڤایا چەکدارێن هەشدێ پێک دئینن، دیارە کو ئەڤ یەکە باندۆرەکا خراپ دێ ل سەر رەوشا ئیراقێ و هەماهەنگیا دناڤ بەرا ئیراقیاندا هەبیت، چونکی بۆ هیچ لایەنێن ناڤخۆیی و دەرەکی نابیت پەیوەنیا دگەل گرۆپێن تیرۆڕست چێبکەن، ئان هاریکاریێ دگەل بکەن،ل دویڤ مەرجێن ئەمریکی ئەو گرۆپ نکارن د هەلبژاردنێن بهێن یێن ئیراقێدا پشکداریێ بکەن و ئەمریکا دێ هەلوەستێ توند بەرانبەری هەر حکومەتەکێ کو ئەو تێدا پشکدار بن هەبیت، بەلێ ئیرانێ ژی گۆتنا خۆ یا هەی دڤێت حەشدا شەعبی ب هەموو گرۆپێن سەر ب وێڤە رۆلێ سەرەکی د دەسەڵاتا ئیراقێ دا هەبیت و دژی ئارمانجێن ئەمریکی خۆ بەرهەڤ بکەن و بەرژەوەندیێن ئیرانێ ل ئێراقێ نە ئێخنە بن مەترسیان، ئەڤ دو هزرێن دژ هەڤ یێن ئەمریکی ئیرانی ژ هەمی دەمەکێ پتر یێن ترسناک بووی و ژ هەمی دەمکێ زێدەتر یێن بووینە گەڤ ل سەر ئیراقیان و بەرژەوەندیێن ئیراقی. چاڤدێرێن سیاسی تەکەز دکەن کو ئیراق یا د ناڤ تۆنێلەکا تاری دا و ب ڤێ رەنگی زۆر سەخت و قورسە ل دوماهیکا تونێلێژی رۆناهی هەببینیت، ب تایبەتیژی کو ژێکڤەقەتیان و دوبەرەکی ل سەرتاسەرێ ئێراقێ یا بوویە دیاردەو هەتا ڤێ گاڤێ ئیراقی نەشیاینە ل سەر بەرنامەیەکی نیشتمانی و نەتەوەیی یێ دیارکری ئێک بگرن و پێکڤە بۆ بەرژەوەندیا ئیراقێ دخزمەتا ڤی بەرنامەی دابن٠
جهێ داخێ یە کو هەتا نوکە نە ئیرانێ نە ئەمریکا بەرنامەیەکی دیارکری کو د خزمەتا ئیراقایان دابیت دەستنیشان و دیار نەکریە کو دلێ تەڤایا ئیراقیان پێخۆش ببیت،هەردو هێزێن دیارکری دڤێت ناکۆکیێن دنڤبەرا خۆ دا ل ناڤ ئیراقێ و ل سەرکیستێ سەروەری و بەرژەوەندیێن بالایێن گەلێ ئیراقێ ئێکلا بکەنەڤە و بۆ ساڵێن بهێن ژی جۆکێن خوینێ ل پایتەختێ جوان یێ ئیراقێ(بەغدا) ڕاببن و ژبیرا خەلکی ببەنەڤە کو بەغدا ل سەردەمەکی سەروچاڤێن شارستانیێ و ئەڤینێ بوو٠

عەمەر هەرگۆشی

سەرۆك بارزانی تەمەنەك د خزمەتا كورد و كوردستانێ دا تەرخانكریە و هەمی ئاستەنگ برینە و تو جاران سەنگەرێن خەبات و قوربانیدانێ چۆل نەكرینە، هەمی جاران مل ب ملێ پێشمەرگەی ڤە د سەنگەرێن رزگاریا كوردستانێ دا بوویە، ئەڤرۆ ب شانازیڤە یێ ئامادەیە مل ب ملێ پێشمەرگەی ڤوە بچیتە رۆژئاڤا، داكو زولم و ستەمێ ل سەر گەلێ مە یێ رۆژئاڤا راكەت، جەنابێ وی خەمەكا مەزن ژ ژانا گەلێ كورد دخۆت ل هەر جهەكی زۆلم لێ بهیتەكرن ب ئەركێ نەتەوەیێ خۆ رادبیت ل هەنبەر وێ سۆزێ یا دایە گەلێ كوردستانێ د هەمی دەرفەت و دەلیڤەیان دا تەكەز دكەت یان كوردستان یان نەمان.
دەما زۆرداری و داگیركارێ گەهشتە گوپیتكێ و ئێدی خەلكێ كۆبانێ ب تایبەتی و رۆژاڤا ب گشتی تووشی هێرشێن مەزن بوون ژ لایێ داعشێ ڤە، ب لەزوبەز پێشمەرگێن قەهرەمان ڤرێكرنە كۆبانێ، دا زۆرداریێ ل سەر ڕاكەن و وەلاتێ شرین و بندەست رزگار بكەن، ڤێجا پێشمەرگە شیان پشتی شەڕێن سەخت كۆبانێ ژ دەستێن داعشا رزگار بكەن و ئارامیێ و ئاشتیێ بۆ بزڤرینەڤە، سەرۆك بارزانی هەمی شیانێن خۆ یێن مەزاختین بۆ خزمەتا كوردینێ و هەمی جاران یێ بەرهەڤ بوویە بۆ قوربانیدانێ ل پێناڤ ئازادیی و شەرەفا كوردینیێ، ئەو شیایە ب خەبات و مانیدیبوونا خۆ ببیت جهێ ئومێدا گەلێ مە ل رۆژئاڤا و جەماوەرێ كوردستانی هەمی جاران چاڤ ل رێ بوویە پێشمەرگێن بارزانی ل رۆژئاڤا جهێ پیێ خۆ قایم بكەن و ئەركێ پاراستنا ئەزیزێن مە ل رۆژئاڤا بگرنە ئەستوێ خۆ ل هەنبەر وێ ئێكێ ژی پارتی هەمی جاران داخواز كریە رێ پێ بهێتە دان ب ئەركێ نەتەوەیی و كوردایەتیا خۆ راببیت و رێكێ بدەنێ پێشمەرگەهێن گیانفیدا چەپەرێن خۆ قایم بكەن ل رۆژئاڤا و خەونێن نەیار و دوژمنێن گەلێ مە بنئاخ بكەن و رۆژئاڤا ببیتە كولیلكەكا گەش و ئازاد ژ خاكا كوردستانێ و ئاشتی و ئارامی و برایەتی تێدا پەیدا ببیت، لێ بەلێ كاودانێنم ناڤخۆ و ئەقلیمی ئەو رێیە نە دایە پارتی و هەمی جاران بەربەست و پەنگۆرە بووینە د رێكا پارتی دا كو ئەو ئومێدا پارتی و پێشمەرگەی بهێتە دی.
مە هەمیان دیت دەما جەنابێ سەرۆكی سەردانا رۆژئاڤاكری گەلێ كوردستانێ چەند ب رێز و ئەشق ڤە پێشوازی لێ د كر و وەكی خیزێ چەما ل دەردورێ وی كۆم ببوون، ئەم دزانین جەنابێ وێ چەند ئاشقێ قامشلۆ، كۆبانێ ، عفرین و تەڤایا خاكا كوردستانێ یە، لەوما یێ ئامادەیە ل گەل پێشمەرگەی بچیتە رۆژئاڤا و قەرێ وێ خۆشەویستیا گەلێ مە بۆ وی بدەتەڤە و ئەركێ نیشتمانیێ خۆ ژی بەرانبەر رۆژئاڤا ئەدا بكەت و بۆ جیهانێ و ناڤچەیێ‌ خۆیا كەت كو ئەو مرۆڤێ بریار دای كو بۆ چ زورداران خۆ نەچەمینیت هەتا رزگاریا ئێكجارەكی ل سەر خەبات و قورباندانا خۆ دێ یی بەردەوام بیت و حسابێ بۆ چ زۆرداران ناكەت.

عـەمـەر هـەرگـۆشی

دەما پارتی بەرنامەكێ نیشتمانی بۆ سالەكا دیاركری دادرێژیت كاودانێن ناڤخۆیی و دەرڤە، باندۆرەكا راستەقینە یا ل سەر بەرنامێ وێ هەی، پارتی دخوازیت بار دۆخێن هەرێمێ د ئارام و گونجای بن؛ دا بكاریت ب ساناهی ئەو بەرنامێ حوكمەتێ یێ گشتگیر بئێختە د وارێ جێبجێكرنێ و راستەوخۆ د خزمەتا كوردستانێ و هەمی هەڤوەلاتیان دا بیت, دەما كو ل هەرێمێ گرفێن مرۆڤ كوشتنێ شەڕ و ئاژاوە چێدبن، راستەوخۆ كاریگەریا هەی ل سەر رەوشا خزمەتگوزاری و ئێمناتیا كوردستانی، دەلیڤە بۆ ڤەبەرهێنانێ كێم د بن و مەترسی دكەڤیتە سەر كار و چالاكیێن حوكمەتێ، ئەو گرفتێن ل لالەزار هاتیە چێكرن باندۆرەكا مەزن ل سەر حوكمەتێ و چالاكیێین حوكمەتێ یا هەی، دەرزەكا مەزن ئێخستە ناڤ ئێكرێزی و تەڤاییا گەلێ كوردستانێ و بەربەستەكا مەزن بوو، كەفتە د رێكا حوكمەتا هەرێمێ دا كو دەستێ خزمەتگوزاریا بگەهیتە هەمی كونجێن كوردستانێ، نها پارتی و هەمی دەسهەلاتدارێن حوكمەتێ مژویلی هندێنە ب دانوستاندن و برایانە وان گرفتان چارەسەر بكەن و لەزێ بكەن ئاسەوارێن وان كارێن نەخواستی ل سەر جڤاكێ نەهێلن، جارێ ئەركێ سەرەكی یێ حوكمەتێ یێ بوویە ئەو كو چارەسەریان بۆ كێشەیێن هەلاویستی پەیدا كەت و دیسا باوەریا گەلێ كوردستانێ ب حوكمەتا هەرێمێ و دامودەزگەهێن وێ موكمتر لێ بكەت، كەس ناخوازیت د دەمەكی دا كو گەلێ مە ب قۆناغەكا سەخت دا تێدپەریت و چەند مەهەكە فەرمانبەرێن كوردستانی د بێ مووچەنە و هەمی ناحەزێن كوردستانێ خەونان ب نەمانا حوكمەتا هەرێمێ ڤە دبینن گەلێ كوردستانێ ژی ب دەستێن خۆ برینا گیانێ خۆ كویرتر لێكەت و گرفت و كێشەیێن تازە دروست كەت كو گەلێ كوردستانێ زەرەرمەند ببیت و ناحەزێن كوردستانێ ژی سۆدمەند ببن، ئەڤرۆ هەمی كوردەكی خودان وژدان یێ كەفتیە ل بەر بەرپرسیاریەتیەكا مێژوویی كو هاریكارێ حوكمەتا هەرێمێ بیت و ب ئەركێ نیشتمانیێ خۆ رابیت د خزمەتا حوكمەتا هەرێما كوردستانێ دا بیت، داكو بكاریت روویێ راستەقینەیێ ئاشتیخوازانە و مرۆڤ دۆستانەیێ گەلێ كوردستانێ نیشا جیهانا دیموكراتخواز و مرۆڤپەروەر بدەت، ئەم هەمی دزانین گرفتێن كوردستانێ ب شەڕ و ئالۆزیان چارەسەر نابن گفتۆگو ئاشتی ب تنێ رێكن بۆ بهیزكرنا گیانێ كوردایەتی و پاراستنا ئێكرێزیا گەلێ كوردستانێ.
پارتی د دیرۆكا خۆ دا، هەمی جاران رێكێن ئاشتیێ و برایەتیێ یا گرتی و چو جاران هەتا ناچار نەبوو بیت، دەست بۆ چەكێ بەرگریێ نەبریە، نوكە ژی هەلوەست و پەیڤا پارتی ئەوە كو هەمی كەس رێكا لێك تێگەهشتنێ بگرن و هەولددەن د هەمی چارەسەریان دا یاسا سەروەر بیت و ب گوڕەی یاسا و دەستووری كێشەیان چارەسەر بكەن و هندی زویە ل سەر میزا دانوستاندنان لایەنێن ناكۆك خڕڤەكەن.
ئەڤرۆ ژ هەمی دەمەكی پتر گەلێ كوردستانێ پێدڤی ب ئێكگرتنێ یا هەی و چونكو ئەركێ ل پێشیا پارتی و گەلێ كوردستانێ ئەركەكی قورسە و هندێ دئینیت كو ئەم كێشەیێن ناڤخۆ قوربانی هندێ بكەین كو ب گیانەكێ ساخلەم و ئێكگرتی ببینە هاریكارێن بەرنامەیێ حوكمەتا هەرێمێ.

عـەمـەر هـەرگـۆشی

ئەو دۆخێ خراپ یێ ئابۆرێ كوردستان تێدپەریت و رۆژانە رەوش ئالۆزتر دبیت؛ ئەنجامێ وێ چەندێ یە كو باوەری هەبوو كو بەغدا دێ یا بەردەوام بیت ل ئەركێ دەستووری و یاسایێ خۆ ل هنارتنا بودجە و مووچەیێن فەرمانبەرێن كوردستانێ، هەروەسا فەرمانبەران ژی ژیانا خۆ ل سەر بنیاتێ ڤێ مووچەی رێكخست ئەوێ كو مهانە بۆ دهاتە دیاركرن، لەوما هەر گیرۆبەونەك ل مووچەی دێ شپرزەیێ ئێختە ناڤ هەر مالەكا مووچەخۆر و كاریگەری، دێ ل سەر كار و چالاكیێن حكومەتێ ژی هەبیت. هەبوونا بەرنامەكی دروست بۆ پێشەرۆژێ گرنگیەكا مەزن و باندۆرەكا مەزن یا ل سەر ژیان هەڤوەلاتیا هەی، چ ژ لایێ هەڤوەلاتی ڤە؛ چ ژ لایێ حوكمەتێ ڤە. ئەم هەمی دزانین نە دۆخێ سیاسی نە یێ‌ ئابۆری د ئیراقێ دا یی جێگیر نینە وە چو جاران مرۆڤ نزانیت ئەو ئیراقا دەستێن بیانیان تێ كەفتی هەتا كەنگی دێ شێت خۆ ل سەر پیان گریت و هەتا كەنگی دێ شێت مووچەی و بودجەی بۆ كوردستانێ دابین كەت. ب راستی ئەو مووچەیێ ژ بۆ فەرمانبەرێن هەرێمێ هاتیە دیاركرن مووچەیەكێ خەیالی یە كو دەردۆرێ ئێك ملیار دۆلارێ هەیڤانەیە، ئەرێ گەلو ئەگەر ئیراق تووشی گرفتاریان بوو، یان وەكی نوكە مووچە نەهاتن ڤرێكرن، حوكمەتا هەرێمێ دكارە ئەڤێ مووچێ فەرمانبەران ژ لایێ خۆڤە دابین بكەت، ئەوە مەزنترین ئاستەنگ و كێشەیە ل پێشیا حوكمەتا هەرێمێ چونكو ئەستەمە حوكمەت بكاریت ئەڤی پارەی ژ داهاتێ ناڤخۆ یانژی ژ پارێ نەفت و گازێ دابین بكەت، لەوما بەری كێشە ئالۆزتر ببن و برینێن خەلكی كویرتر ببن چارەسەریا پەیدا كەن و ژ لایەكی حوكمەتێ ڤە بەرنامە بۆ ڤێ پرسێ هەبیت و ژ لایێ دیترڤە هەڤوەلاتیژی سەرێ رییا خۆ بزانیت و بەرنامەكی دیار بۆ ژیانا خۆ دابنیت، مەزنترین گرفت ئەوە مرۆڤ ل هیڤیا بەرنامەكی بیت كو ئەو بەرنامە ب خۆ دبن هەرەشەیان دابیت و یێ مسۆگەر نەبیت، ب سەدان هەزار هەڤوەلاتیێن هەرێمێ چاڤێ ل سەرێ هەیڤێ ئیراق مووچەی ڤرێكەت، باشە ئەم هەمی دزانین ئیراق یا د قەیرانان دا و رەنگە زوی یان درەنگ دێ تووشی گرفتێن گەلەك مەزن بیت كو ب خۆ رەنگە بێ پارە ببیت و نكاریت مووچەیێ‌ هیچ كەسی بدەت هینگی خەلكێ كوردستانێ رەنگە دێ تووشی گرفتێن ئابۆری یێن مەزن بیت، ژ بەر هندێ پێدڤیە هەڤوەلاتی و حوكمەتا هەرێمێ بەرنامەك بۆ ڤان تەنگاڤیان هەبیت و پشتا خۆ ب داهات و ئیمكاناتێن ل بەردەست ببەستن و ل گۆڕ شیان و پێچێبوونا مووچەی دابەش كەن، ئەوا نوكە ل هەرێمێ خەلك چاڤەرێ دكەت مووچەیە چونكو خەلك یێ راهاتی بێی ئێكودو مووچەی وەگرن و كێماسیێن خۆ چارەسەر بكەن. برینا مووچەی ل دەڤ پڕانییا هەڤوەلاتیان راوەستانا ژیانێ یە كو ب راستی ژی مافێ سەرەتایێ وانە، لەوما پێدڤییە هەمی بزانن كو ئەگەر ئەو رەوشە بەردەوام بیت، گرفتێن مەزنتر دێ چێبن، ئەز ب مسۆگەری ڤە دزانم ب هیڤیا ئیراقێ ڤە ئەو گرفتە دێ د بەردەوام بن و رەنگە قورستر و كاریگەرتر ژی لێ بێن.