نایف مەحموود

چاردەی ئادارا سالا ١٩٠٣، ئەو ڕۆژا پڕشنگدار یاكو دیرۆكا نەتەوەیەكی شانازیەكا مەزن پێ دبەت، ژبەركو سالڕۆژا ژ دایكبوونا ڕێبەرێ گەلێ كورد (مستەفا بارزانی) یە، بابێ ڕوحی و نەتەوەیی، ئەو سەركردەیێ دەگمەن و خۆدان ناسناڤەكێ گران كو ئەستەمە كەسایەتیەكێ مینا ڤی چەڤەنگێ لێهاتی و لێزان د مێژوویا كوردان دا دوبارە ببیت، ئەو لەهەنگێ هەر ژ پێگهەشتنا ژیێ خۆ تەڤلی ژیانا شۆڕشگێری و سیاسی بووی ژ پێخەمەت هشیاركرن و قۆرتالكرنا نەتەوەیەكی ژ بندەستی و كولەتیێ…، تاكو بچینە د ناڤ هویركاریێن ئەڤی بازێ ل بلنداهیا چیایێن كوردستانێ سیبەرا خۆ ل خاكا كوردستانێ دكر، ژ پێناڤ بەرقەراركرنا مافێن گەلێ كورد و سەخمەراتی ژیانەكا تەنا و ئاسۆدە، پێدڤیە ڕۆپەلێن دیرۆكێ ڤەكەین و پێنگاڤ پێنگاڤ ژیانا ئەڤی كاریزمایێ ژیێ خۆ هەمی تەرخان كری هلشكێڤین بۆ ئاشنابوون ژ وێ خەبات و تێكۆشینا ل هەنبەر دوژمن و نەیاران ئەنجام دای، داكو ئاخینك و زێمارێن گەلەكێ زیندی ڤەژینیتە بوهارا ئازادیێ و تیرۆژكێن ڕۆژەكا گەش ل هەمی كوژی و كولان و جهێن كوردستانێ بەلاڤەكەت. ژ وێ ئازایەتی و دلێریا ئەڤی قەهرەمانێ ژ نیڤ سەدەیەكێ پتر ژیانا خۆ بۆ بدەستڤەئینانا مافێن نەتەوا كورد تەرخانكری دهێتە زانین كو بارزانی باوەریەكا ڕەها ب خەباتا دژی زۆرداریێ و ڕەتكرنا ژیانا ژێردەستیێ هەبوو، ئەڤ تایبەتمەندیە ژ خەسلەتێن دیارێن كەسایەتیا جەنابێ وی بوو. هەژی گۆتنێ یە مەلا مستەفا بارزانی د كاودانەكی دا چاڤێن خۆ ل دونیایێ ڤەكرن ئەو دەمێ كورد د سەردەمەكێ تژی نەهامەتی و تژی ئازار دا د ژیان، ل وی سەردەمێ شێخ عەبدولسەلام بارزانی د قادا خەباتێ دا بۆ سەربەخۆییا كوردستانێ، ئەوبوو ل سالا ١٩١٤ ل مووسلێ‌ سەرا ڕێكا ڕزگاریخوازا گەلێ كورد دهێتە سێدارەدان و پاشان چەند سالەكان و ل سالا ١٩١٩ هەستا كوردایەتیێ و نیشتمانپەروەریێ د دلێ بارزانی دا دبیتە ئاگر و ڤۆلكان، ل وی دەمی وەك سەرپەرشتێ هێزەكا چەكداری ب هانا شێخ مەحموودێ حەفید دچیت ل سلێمانیێ و ل سالا ١٩٢٠ (شێخ ئەحمەد بارزانی) ب نوونەراتیا خۆ؛ مەلا مستەفای فرێدكەتە باكوورێ كوردستانێ بۆ هندێ چاڤ ب (شێخ سەعیدێ پیران) بكەڤیت و هەماهەنگیێ ل گەل بكەت بۆ تەڤلیهەڤبوونا شۆڕشێ. بێگۆمان چەندین وێستگەهێن دی یێن قووناغا ژیانا سیاسی یا جەنەرال مستەفا بارزانی د پاش دا هاتن و بەردەوامی دا خەباتێ و دەستهەلاندن ل هەمی وان قووناغێن سەختێن ب سەر كوردان دا هاتین و هیچ وەختەكی سازش و داگێران ل سەر مافێن گەلێ خۆ نەكر، بەلكی ئەو هەست و جۆش و مێرخاسیا ل دەف جەنابێ بارزانی هەیی، ڕوحا كوردایەتیێ د ناڤا دل و مێشكێ تاكێ كورد دا ڤەژاند، بوو قوتابخانا ئاڤاكرنا هەستا نەتەوەیی ل دەف كوردستانیان، ڤێ چەندێ وەكر خەلكێ كوردستانێ پشتەڤانیێ ل وێ شۆڕشێ بكەت یاكو بارزانی سەركێشیا وێ دكەت. لەوما ژ گرنگترین شۆڕشێن ل سەردەمێ بارزانیێ نەمر بەرپابووین، شۆڕشا ئیلۆنێ بوو، ئەو شۆڕشا ل دژی زۆرداری و داگیركاریا كوردستانێ بەرپابووی ل ١ ئیلۆنا ١٩٦١ و هەتا ١٩٧٥ ئەڤ شۆڕشە ب سەرپەرشتی و سەركردایەتیا بارزانی یا بەردەوام بوو ل دژی دەستهەلاتدارێن بەغدا. خۆیایە كو ئەڤ شۆڕشە ١٤ سالان ڤەكێشا و د ڤێ شۆڕشێ دێ كورد بوونە خۆدان چەندین دەستكەفتێن مەزن و ژ وان ژی ڕێكەفتناما ١١ ئادارا سالا ١٩٧٠، ئەو ڕێكەفتنا مافێ (ئۆتۆنۆمی) ب كوردان هاتیەدان و دهێتە زانین كو د مێژوویا گەلێ كورد دا ئەڤە ئێكەمین ڕێكەفتن بوو د ناڤبەرا مەلا مستەفا بارزانی و دەستهەلاتدارێن وی وەختی یێن بەغدا هاتیە مۆركرن كو تێدا كورد ببنە خۆدان مافێن خۆ یێن ڕەوا و ئێك ژ خالێن گرنگ یێن وێ ڕێكەفتنێ ژی دانپێدان ب مافێ كوردان وەك نەتەوەكێ گرنگ د چارچووڤێ ئیراقێ دا و زمانێ كوردی ببیتە زمانێ سەرەكی یێ ناڤەندێن خواندنێ ل گوند و باژێڕ و وان بەشێن كوردنشین، لێ ب مخابنی ڤە خیانەت و چاڤشۆڕیا سەرانێن بەغدایێ ئەو پەیماننامە شكاند و ل سالا ١٩٧٥ هەلوەشاند، ئەوا ب ناڤێ ڕێكەفتنا جەزائیر دهێتە ناڤكرن یا كو د ناڤبەرا شاهێ ئیرانێ و سەدام حسێنێ هاتیە مۆركرن و نەچوو وارێ جێبجێكرنێ، بەلێ ل پشتی بێ ئەنجامبوونا ڤێ ڕێكەفتنێ ل ٢٦ گۆلانا سالا ١٩٧٦ شۆڕشا گولانێ ل دژی نەعەدالەتخوازیێ و بێ مروەتیا ڕژێما ئیراقێ بەرانبەر ملەتێ كورد بەرپابوو ب سەرپەرشتیا ڕێزدار (مەسعود بارزانی) ب هەمان دەوس و ڕێبازا مەلا مستەفا بارزانی. هەلبەت ئەڤە دلۆپەكە ژ وێ دەریا خەبات و تێكۆشینا بارزانی بوو، ئەو كاریزمایێ بوویە سیمبۆلا نەتەوەكێ زیندی، ئەو سەركردێ دیرۆكی یێ بوویە قوتابخانا كوردایەتیێ و سەرمەشقێ بزاڤا ڕزگاریخوازا گەلێ كورد. خۆشبەختانە و ئیرۆ ب سایا وێ حنێری و قەهرەمانیا بارزانیێ نەمر كورد د هەمان ڕێچك و ڕێباز دا ڤێ خەباتێ د شۆپینن و كاروانێ وێ ڕێبازێ ب سەرۆكاتییا لێڤەگەر و پێشمەرگێ كوردستانێ ڕێزدار (مەسعود بارزانی) یا بەردەوامە، بەرهەمێ وێ خەباتێ ژی نها كوردستان یا ئازادە، كوردستان یا ئاڤا و ئاڤەدانە و تیرۆژكێن ڕۆژێن گەشتر ژی ل پێشن و نها بەرهەمێ وێ خەباتا بارزانیێ نەمر بۆ ئازادی و ڕزگاریا كوردستانێ كری زیق و ئاشكەرا دهێتە دیتن، گەلێ كوردستانێ د كەشتیا ئاشتی و ئارامیێ دا ژیانەكا سەربەرزانە ل ژێر چەترا حوكمرانیا خۆمالی دەرباز دكەت.

نایف مەحموود

ئەم دزانین سماق دەمێ دهێتە شووشتن زاخ و ترشاتی و تاما وێ د وێ ئاڤێ دا كوم دبن و سماق بۆ خۆ وەك دندكا وێ ئەو تام و ترشاتی ژێ دچن و چ زاخ پێڤە نامینیت، بەلێ ئەڤ دەستەواژە دناڤ كلتۆرێ مە یێ كوردەواری و دناڤ جڤاكا مە دا نە ئەو مەبەستە یا ل سەری مە ئاماژە پێ كری و ئەو ڕاڤەكرنە دایێ، هەلبەت سماقا شووشتی ئەو ناسنەڤە ئانكو بۆ وان جۆرە مرۆڤان دهێتە بكار ئینان یێن لایەنێ ڕێزگرتنێ، لایەنێ بێ بەربرسایەتیێ، لایەنێ كێم خەمیێ، دیسان لایەنێ نە گۆهداریێ و ئەزمان درێژیێ ل دەف هەبیت بەرامبەر دۆرهێلێ ژیانێ و بەرامبەر مرۆڤان.
وەختێ ناڤێ كەسەكی دهێتە گۆتن و خودانێ ڤان هەموو ساخلەت و ڕەفتار و دیاردەیێن نە شرین بیت، هینگێ دێ ڤی ناسناڤی بڤی كەسی بەخشین یێ كو بوویە هەلگرێ ڤان هەموو تایبەتمەندیان و دبێژینێ فلان كەس سماقا شووشتیە و چ هەستێ كەسایەتی و پایەبلندیێ ل دەف نینە! ئەڤ كەسە ل شوینا هندەك ساخلەت و تایبەتمەندیێن جوان ل دەف خوە پەیدا بكەت، ل شوینا ببیتە كەسەكێ خودان ڕێز و حورمەت دناڤ جڤاكیدا و خەلك ب كەسایەتی و ڕەوشتێ وی د داخبار بن و بكەنە نموونەیێ ناساندنا جڤاكی، بەرۆڤاژی یێ ڕابووی خۆ بڤی ڕەنگ و سیمایێ شكەستی خەملاندی و خۆ كریە لێبۆكێ ناڤ دیوان و جڤات و ناڤ خەلكێ خۆ.
دبیت ئەڤ ناسناڤە یێ نەخۆش بیت دەمێ دكەڤیتە سەر بەژن و بالا هندەك كەسان، بەلێ ئەڤە وێ چەندێ دگەهینیت كا مرۆڤ چ د چینیت دێ وی هەلینیت و مرۆڤ دشێت ناڤ و دەنگی كەسایەتیەكا ب هێز و پیرۆز ب خۆ ب بەخشیت، مرۆڤ دشێت هەر ناسنەڤەكی ل خۆ پەیدا بكەت ل گۆڕەی وێ پەروەردە و رەوشەنبیری و كەسایەتیا هەی، مرۆڤ دشێت ببیتە خۆدیكا جوانی و ناسناڤێن جوان. ژبەر هندێ دەمێ بۆ هندەك مرۆڤان چ خەم نەبیت و گرنگ نەبیت كا چ بها و سەنگ هەیە ل ناڤ جڤاكی ل وی دەمی دشێت بەرپرسایەتیێ ژ ڤی ناسناڤێ سڤك هەلگریت و دبیت ژی هندەكان پێ نەخۆش بیت یێن كو د كەڤنە بەر مەقاسا ڤێ دەستەواژێ، لێ نزانن ئەو ب خۆ یێن بووینە بەلا سەرێ خۆ و ئەڤەژی ڕەنگڤەدانا وێ كەسایەتیێ یە یا بو خۆ چێكری، لەوا دەمێ مرۆڤی نەڤێت شەرمزاری بۆ كەسایەتیا مرۆڤی ب زڤڕیت دڤێت ببینە ئەو مرۆڤ یێن دبنە میناكێن ناسناڤێن جوان و پیرۆز نەكو ب ڤان ناسناڤان خۆ بكەتە علكێ دەڤێ خەلكی و پاشی ب زەحمەتە مرۆڤ بشێت ببیتە جهێ باوەریێ و ڕێز وڕۆمەتێ دناڤ خەلكێ خۆدا.

نایف مەحموود

ژ ڤێ ڕەوشا نها كوردێن ڕۆژئاڤا تێدا وەسا دهێتە خۆیاكرن كو پلان و ئارمانجێن دوژمنان دژی ماف و بەرف پێشچوونا قەزیا كوردی یە، پیلانگێری و كینا نەیارێن كوردان ل هەر چار پارچێن كوردستانێ بەردەوام د ئاشەكرانە و دخوازن كورد بێ ناڤ و ناسنامە و خاك و وەلات بن، دخوازن كورد ژ كوردبوونا خوە حەز نەكەن و مافێن خوە نە خوازن، ناخوازن كورد ل هەر جهەكی بەرەف پێش بچن و ببنە خۆدان كیان و سەربەخۆییا خوە وەرگرن، تا داوی چڕكە ژی د ئامادەنە هەناسا كوردان چك بكەن و داكو سەرێ خوە نەهەلینن. هەر وەختێ دەرفەتەك بو كوردان هاتبیتە پێش ل هەر پارچەكا كوردستانێ بیت، ل وی دەمی ئاگر كەفتیە بن پێت دوژمنی و كەربا خوە دژی هەبوون و ئازادیا كوردان دەردبڕن، جارەكادی نەیار و داگیركەرێن كوردستانێ كێلبێن خوە دهوسین و دەڤێن خوە ب خوینا مە كوردان سۆر دكەن. ل كوردستانا باشوور و پشتی ئازادیا ئیراقێ، كورد شیان هندەك ژ مافێن خوە دەستەبەربكەن و هندەك ژ ئارمانجێن خوە بپێكن؛ ئەڤە ژی ب سایا وێ خەبات و خوین و قوربانیدانا سالێن شۆڕەش و داستانان، لێ د زكێ نەیارێن كوردستانێ ڕا ناچیت و دخازن ڤێ چەندێ ژ مە بستینن و جارەكادی مە ب زڤڕیننە خالا سفرێ. ل ڕۆژئاڤایێ كوردستانێ ژی و پشتی كەفتنا ڕژێما ئەسەدی و وەرگرتنا دەستهەلاتێ ژ لایێ جولانی ڤە و ب حوكمێ وان ڕێكەفتن و لهەڤهاتنێن دناڤبەرا حوكمەتا سووریا و مەزلۆم عەبدی سەرۆكێ هێزێن سووریا دیموكرات ڤە هندەك ژ ئاماژە و بەرەف پێشچوونێن دلخۆشكەر هاتنە ڕۆژەڤێ و پێشبینیا هندەك دەستكەفتێن ڕەوا بۆ كوردێن ڕۆژئاڤا هاتنە كرن، ژبەركو هێزێن ڕۆژئاڤایێ كوردستانێ دەستەكێ بالا هەبوو د تێكشكاندنا تیرۆرستێن داعش و شەڕێ مان و نەمانێ ژ پێش هێزێن هەڤپەیمان ڤە دكر ل دژی ڤێ ڕێكخراوا هۆڤ و دووركەفتی ژ هەمی پەیرەوێن مرۆڤایەتیێ، هەروەسا ڕۆلەكێ كاریگەر ژی هەبوو د ڕۆخاندنا ڕژێما دیكتاتۆرا بەشار ئەسەدی دا، بەلێ ب مخابنی ڤە و لڤێ دوایێ جارەكادی دۆست و دوژمنێن كوردان كراسێ خیانەتێ و پیلانگێریێ دژی كوردێن ڕۆژئاڤا ل بەر خوە كر، جارەكادی كەفتنە چەپەرێن دوژمنكاریێ بەرامبەر مافێن وان و د ئامادە نینن دانپێدانێ ب خۆسەریا ڕۆژئاڤا دا بكەن، یان ئەگەر چنە بیت كورد بەشەكێ كاریگەرێ دەستهەلاتا نوی یا حوكمەتا سووریێ بن، بەلكی بەرۆڤاژی بزاڤێن هێرشێن نەهێلان و قڕكرنا كوردان دكەن، ژ كوچكرن و دەربەدەری و كوشتن و بن پێكرنا مافێن مرۆڤی و حەتا ڕادێ یاریپێكرن ب هەستێن گەلەكێ زیندی و بن دەست. ئەڤا نوكە ل ڕۆژئاڤا د قەومیت و ئەڤ شەڕێ گرانێ ل سەر سەرێ كوردان دباریت نیشانا ستەم و شەڕەنگێزیەكا سۆر و سۆرە ل هەنبەر چاڤێن هەمی جیهانێ ژی ئەڤ تۆندوتیژی و دڕەندەییا بەرانبەر هەمی چین تەخێن جڤاكا سڤیل دهێنە ئەنجامدان، هەلبەت ئەڤە واتایا وێ چەندێ د گەهینیت كو ئەڤ پیلانگێریە د بێ پشت و بێ هاریكاری نینن و ژدەرڤەی سوپایێ عەرەبی یێ سووری پالپشتی و دژایەتیكرنا كوردان ژ وەڵاتێن زلهێز و ئەقلیمی ژی دیار دبیت، گەلۆ كەنگی ئەڤە ڕاستیا دیموكراسیەت و ئازادیێ یە دەما چریسكێن وێ دگەهنە ڕەخەكێ كوردان، ڤێجا دێ ژ نوی بەرۆكێ ڕێگریێ ل مە ڤەكەن و ناهێلن ئەم ژی بگەهینە وێ خاستێ یا خودێ ب هەمی گەلانێن جیهانێ بەخشی؟ ما ئەڤە نە ستەمەكا ئاشكەرایە ل گەلێ كورد دهێتەكرن؟ حەتا كەنگی ئەڤ جۆرێن هۆڤاتی و دڕندەییێ دێ ل سەر گەلێ كورد د بەردەوام بن و ئاگرێ ڤان پیلانگێرایا ل سەر گەلێ مە باریت؟ ڕاستی ژی جهێ حێبەتیێ یە ئەڤا د دەرهەق كوردان دا دهێتەكرن و دیار دبیت ژ ڤێ جیهانا بێ چاڤ و گوه و كەڕ بتنێ ژیان و ئازادی بۆ وان ڕەوایە و بۆ مە كوردان ژی مالوێرانی، ڕەڤ و كوشتن و تالانی، بەلێ ئەڤە و ب سەدان هزار پیلانێن دی دژی نەمانا مە كوردان دێ چن گۆڕی و گۆڕبەگۆڕ بن، كورد دێ مینن گەلەك زیندی و ب سەربەرزی و نە ل ژێر دەستی ل سەر دفنا تەڤ دوژمنان هەر دێ هەبن و هەر مینن.

نایف مەحموود

جڤاك ئەو پێكهاتەیە یا كو ئاكنجیەكێ مرۆڤان پێكدئینیت، ئەڤ جڤاكا مە ژی ژ خێزان، بنەمال، ئیجاخ، گوند و هۆز بەرجەستە بوویە و تێكەلیەكا هەمەڕەنگ ژێ پەیدابوویە، ئەڤ تێكەلیە ژی ل سەر بنەمایێ خزمایەتی و پەیوەندیێن دۆستایەتی و هەڤالینی و…هتد چێبوویە. ئەو جڤاكێ خۆەڕستی و بهێز و یێ كێمترین ئارێشە ژێ پەیدا دبن ئەوە یێ ل سەر بنەمایێ رێزگرتنێ، وەفایێ، دلسۆزیێ و ڤیان و باوەریێ مامەلێ دگەل هەڤ دكەن، هەردەم خواستا ڤی جڤاكی بەرهەڤكرنا ژینگەهەكا ڕەوشەنبیرە ژ بۆ وێ ئێكێ ئێكڕێزی و بیروباوەرێن خۆە یێن نەگۆڕ بچەسپینن داكو ب تەناهی و ئارامی بژین د كێمترین نەخۆشی و تەحلاتی ژیانێ دەرباز دكەن. ئەوا مە دڤێت ئاماژێ پێ بكەین خالا ب دانینە سەر پیتا ئەوە كو مە جڤاكەكێ ساخلەم هەبیت دەربڕینێ ژ جڤاكەكێ مرۆڤ دۆست و جڤاكەكێ ب ڕێز و وەفا و هەڤگرتی بكەت، ل شوینا كەرب و كین و نەڤیان و دوبەرەكیێ كو ئەڤە ب خۆ موركا خرابكرنا دیوارێ پەیوەندین مرۆڤایەتیە، هەلبەت ئەو دیاردەیا ڤێ نەساخیا جڤاكی پەیدا دكەت ئەوژی دیاردا غەیبەتێ و بەحسكرنا ل سەر عەیب و كێماسییێن خەلكەكی یە، یانژی بەحسكرن و هاڤێتنا مرۆڤ و خزم و كەس و نێزیكێن خوە و هێش وێڤەترە و ڤێجا ب هەر ڕەنگەكێ هەبیت دێ ب تمتمكێ دادەت و تۆزێ ژێ داقوتیت و كەتە پاتەكێ بێ نڤێژ! گەر ئەڤە ڕەنگەڤەدانا هزر وبیرێن مە بیت، ئەرێ ما ئەڤە نابیتە هێڤێنێ پویچكرنا پەیوەندیێن جڤاكی؟ ئەرێ ما ژبەرمایكێن ڤێ دیاردا شاش و بێ بها نەڤیان و هەڤڕكی پەیدا نابیت؟ ئو ڕەنگە بگەهیتە ڕادێ سەرهلدانا ئارێشێن مەزن و پاشی كون ژ پاتەی مەزنتر لێ بهێت و دوژمنكاری پەیدا ببیت. ب ڕاستی ڤێ دیاردێ و ڤێ چاڤپێنەڕابوونا دل و دەروونێ جورەكێ مرۆڤان ڤەگرتی بازنێ پەیوەندیێن جڤاكی تا ڕادەكی بچووك كریە و ژبەر ڤێ چەندێ ئێدی ل شوینا جوانكرنا سیمایێ جڤاكی و خۆرتكرنا پەیوەندیان دناڤبەرا تاك و خێزان و ژینگەهێ هەمیێ دا دیاردا كرێتكرنا ڕۆیێ جڤاكی د ڤەژەن و وەراركرنێ دایە و ب سەدان نموونە و سەربۆڕێن تەحل و نەژهەژی ژبەر ڤێ ڤایرۆسێ بوویە ماكا ژ بەرئێكچوونا پەیوەندیێن جڤاكی ب رۆن و ئاشكەرایی د هێنە دیتن و ئێدی گهەشتیە حكمێ نەفرەتكرنێ ژ هەڤدو و د فەرهەنگا هندەك ژ تەخێن جڤاكا مە دا. ئەڤجار دا ب هەڤڕا سەنگەرێ ڤێ دیاردا كرێت بگرین، ل جهێ هەڤدو بەرباران بكەین و بكەڤینە چەپەرێ حقد وعینادێ دگەل ئێك بلا بەرۆڤاژی دەرگەهێ ئاڤاكرنێ ل گەل هەڤ ڤەكەین، دەرگەهێ ڕێزگرتنێ ل بیر و باوەرێن هەڤدو ڤەكەین، ببینە دەرازینكا هیڤی و ئومێدان بۆ هەڤدو و شادیێ و بەختەوەریێ ل سەر جڤاكێ خوە پارڤەبكەین، ئەڤا دی هەمی پاشڤەمانەكا سۆر و سۆرە ژ وێ باوەریا جڤاكی بەرەف كنارێ ئارامیێ و پێشڤەچوونێ دبەت.

نایف مەحموود

پارتی وەك براوەیا هەردو هەلبژارتنان، هێزەكا بێ ڕكابەرە ل سەر ئاستێ هەرێما كوردستانێ بۆ ب دەستڤەئینانا پڕانیا دەنگێن خەلكی، هەروەسا زۆرینەیا كورسیكێن پەڕلەمانی ب دەستڤەئیناینە و ئەڤە بۆ ماوێ چەندین خۆلێن هەلبژارتنانە كو پارتی دبیتە حزبا ژمارە ئێك و بەرپرسیاری وەرگرتنا كورسیكا دەستهەلاتێ وەردگریت. هەلبەت ئەڤ چەندە د زڤڕیت بۆ هندەك خالێن گرنگ یێن كو پارتی دكەتە خۆدانا ڤی سەنگێ مەزن دناڤا ناڤخۆیی و ژدەرڤەی كوردستانێ ژی. ئێك ژ وان خالێن گرنگ ژی ئەوە پارتی نێزیكی سەدەیەكا خەباتا بێ ڕاوەستیان ژ پێناڤ ماف و بەرژەوەندییێن دۆزا گەلێ كورد كار كریە و قۆربانیەكا مەزن بۆ ڤێ چەندێ دایە، هەروەسا پارتی خۆدانا چەندین سەركردەیێن حەكیم و لێهاتی بوو یە د ئاستێ شۆڕەشێن گەلێ كورد دا و تا كورد گەهاندینە ڤێ قۆناغا پڕشەنگ، قۆناغا فیدرالی و ڤێ ئازادی و سەربەستیا چەندین سالە ل كوردستانێ بەرقەرار بووی، خالەكا دی یا جەوهەری كو پارتی كریە حاكمێ كورسیكا دەستهەلاتێ ئەوە كوردستان گەهاندیە ڤێ ئاستێ پێشكەفتنێ د وارێ ئاڤەدانی و پرۆژە و خزمەتگۆزاری و … هتد. خۆشبەختانە ئەڤە هەمی د وی ماوەی دا بوویە كو پارتی دیموكراتی كوردستان وەك داینەموویا ب ڕێڤەبرنا حوكمرانیا هەرێمێ بوویە، ئو ژبلی ڤێ سەقامگیری یا هەی، ژبلی پاراستنا وان دەستكەفتێن مەهەین و پاراستنا خاك و سنوورێن هەرێما كوردستانێ ژ دەستێن دۆژمن و نەیارێن كوردستانێ كو ئەڤە ب خوە هەمی ب وێ هیمەت و دلسۆزی و كوردایەتیا پارتی بوویە مینا چیایێن كوردستانێ بوویە مەتال و قەلغان ل بەر سینگێ وان و نەكارینە بگەهنە وان ههیڤیێن وان یێن چەپەل كو كوردان ژ ماف وداخوازیێن وان پاشگەز بكەن. ئەو هەڤسەنگیا پارتی ل هەرێما كوردستانێ ڕاگرتی بۆ هندێ ڕەوشا كوردستانێ تێك نەچیت و ئەڤ ساقامگیریە هەر بمینیت، گەلەك جاران پارتی ژ بەهرا خۆە ل سەر هندەك لایەنێن دی یێن هەرێمێ پارڤەكرینە بۆ هندێ ئێكڕێزیا مالا كوردی و پێكڤەژیان ب هێزتر بن، ڕێزگرتن ل خەباتا یێ بەرامبەر ژی د فەرهەنگا پارتی دا نیازپاكیەكا بەردەوامە بۆ هەر ڕەوش و دۆخەكێ هەی. ل هەمبەر ڤێ چەندێ پارتی بەرپرسایەتیەكا مەزن دكەڤیتە سەر ملی ژ بۆ پاراستنا ڤێ هەڤسەنگیێ و ڤێ سەقامگیریا هەی، ئەڤ بەرپرسایەتیە ئەوا كو پارتی بوویە هەلگرێ ڤی بارێ گران شانازی و سەروەریەكا مەزنە بەرامبەر وان دۆخ و كاودانێن ڕۆژەڤێ، بەرامبەر ئەو هەمی ئالنگاری و كوسپێن دكەڤنە د ڕێیا پێشڤەچوونا كوردستانێ دا. ئەڤ بەرپرسایەتیا مێژوویی ئەوا ئەڤ حزبا تێكۆشەر و خودان خەبات و تێكوشینەكا بەردەودام پەیرەو دكەت د ڤێ بەرپرسایەتیێ دا جهێ پەسەندەكا مەزنە د چاڤێن خەلكێ كوردستانێ دا و رێز لڤێ شانازیێ دهێتە گرتن، ئەڤجار پێدڤیە ئەڤ پارت و لایەنێن زۆرجاران دڤێت سەنگا ڤێ بەرپرسایەتیێ د ستویێ پارتی دا كێم ب نرخینن هەلبەتە دڤێت ئەڤ خاندنە نەهێتە كرن بەلكی بەرۆڤاژی رێزێ ل ڤێ چەندێ بگرن كو پارتی ڤەڕێژا خەباتەكا دوم درێژ یا سالێن بەرەڤانیێ یە ژ ماف و دەستكەفتێن گەلێ كورد، لەوما ڕەوایە بێژین پارتی تا ئەڤرۆ شیایە بارێ ڤێ بەرپرسایەتیێ ب ئەمانەت هەلگریت و ڕۆژ بۆ ڕۆژێ ڕەوشا كوردستانێ بەرەف باشتر و باشتر ڤە ببەت.

نایف مەحموود

ئەگەر ڕۆپەلێن دیرۆكێ ڤەكەین و چپكەكێ ژ وێ دەریا خەبات و قوربانیدانا گەلێ كورد بەحس بكەین، دیسا هندەك ژ هۆركارتیێن شۆڕش و داستانێن مێژوویێ بۆ مە ڤەگێڕاین دژی ستەمكاری و ملهۆریا زۆرداران؛ هەلبەت دێ بۆ مە خۆیا بیت كو نەتەوا كورد و سەركردێن وان شۆڕش و داستانان ژ سەردەمێ شێخ عبدولسەلام بارزانی و مەلا مستەفا بارزانی و حەتا بگەهیتە ئەڤرۆ وێ قوناغا سەرۆك بارزانی پێشرەویا خەبات و تێكۆشینا دۆزا ڕەوایا كوردستانێ كری مل بۆ ب دەستڤەئینانا ئارمانج و ماف و ئازادیان نەداناینە و بەلكی هەردەم ل سەنگەرێ كێفەرات و بەڕەڤانیێ بووینە. بێگۆمان ئەو ئالایێ بوویە سیمبۆلا گەلەكێ زیندی و گەلەكێ هشیار د ناخ و هزرا نیشتیمان پەروەراندا بوویە ستوین و چیایێ ئەسمانێ كوردستانێ و خەمل و ڕەنگینیا خوە ب سەر جان و بەدەنێ تاكێ كورد دا ئینایە خوار. ئەڤ ئالایێ كوردستانێ د هەستیارترین چڕكە ساتێن ژیانێ دا ئەوێن ب سەرێ ملەتێ كورد هاتین ژ جینۆساید و ئەنفال و قڕكرن و وێرانكرن و دەربەدەریێ، بەلێ خۆدانێن دەستێ ڤی ئالای د ئامادە نەبووینە بەژنا ڤی ئالای بۆ زۆرداران بچەمینن و خوە ڕادەستی ئیرادەیا شكەستن و چۆك دانانێ بكەن بەرانبەری دوژمنی. بەلێ بەروڤاژی ل شوینا ڤی ئالای بدەنە دەستێن دوژمنان بەلكی گیانێ خوە كریە قوربانی و ژ پێناڤ بلند ڕاگرتنا ڤی ئالای هزارەها شەهیدان سەرێ خوە دا بەر هەبوون و زیندیبوونا وی و حەتا نها ل بەر دفنا نەیارێن وەلاتی بەرز و بلندە و مینا تەیرەكێ باز و بلند شاپەرێن ڤی ئالای ل سەر چیا و شاخ و بلنداهیێن ڤی وەلاتی دهەژیت و مینا كەوێن ڕباد ل قادا سەنگەر و چەپەرێن پارێزڤانی بەرخوەدانیێ دانیێ دقەبیت و دبێژیتە دوژمنێن گەلێ كورد هندی ڕحەك د قالبێ كوردەكی دا مابیت ئەڤ ئالایە ل سەر سەرێ هەوە دێ برسقیت و كەژاوە بیت. نەیارێن كوردستانێ زۆر جاران ڤیایە ڤی ئالای ل سەر پیان داننە خارێ و كوردان ل سەر نەخشەیێ جیهانێ بەرزە بكەن یان ژی بكەنە پاشكویێن خوە، بەلێ د ڕاستی دا ئەڤێ هیڤیێ خەونێت وان بن گۆڕكرن و د گەوریا وان دا خەندقین، ژبەرڤێ چەندێ ڕۆمەتا ئالایێ كوردستانێ د دلێن هەمی خەلكێ كوردستانێ دا ئەشقەكا ئەبەدیە و چ جار ژ هەیبەت و بهایێ ڤی ئالایێ بوویە سیمبۆلا شەهیدێن كوردستانێ كێم نابیت و بەلكی ئەڤ ئالایە تاجا سەرێ هەمی خەلكێ كوردستانێ یە و دێ هەر بەرز و بلند بیت و چەقێ ناڤ چاڤێن دوژمنی یە تاكو ئەڤ وەلاتە ل بن سیبەرا ڤی ئالای بیت× دێ كوردستان یا ئاڤەدان و پاراستی بیت و زۆردار و چاڤپێنەڕابوویێن كورد و كوردستانێ دێ د خۆها خەم و حەسرەتێن خوە دا كەلن و بەژنا ڤی ئالای وەلاتێ مەژی ل بەر چاڤێن وان دێ یا خەملاندی بیت ب هەر چار ڕەنگێن خوە یێن پڕی ڕامان ڤە، دێ هەرمینیت كراسێ ل بەر بەژنا لاو پێشمەرگەو خەلكێ كوردستانێ.

نایف مەحموود

هەرێما كوردستانێ ل ژێر دەستهەلات و حوكومڕانیا خومالی ڕۆژ بۆ ڕۆژێ بەر ب كنارێ پێشكەفتنێ و ئاڤەدانیێ ڤە دچیت، ژ لایێ سەقامگیری ژی ڤە ناوچەیەكا ئارامە ژبلی كو ئەگەر نەحەز و نەیارێن گەلێ كورد هەولا تێكدانێ و چێكرنا ئالۆزیێ تێدا بكەن كو ئەڤە ب خۆ ئەو نەفس ڕەشی یە ئەوا ڤان نەیاران د سینگی خۆ دا هەلگرتی و هەر وەخت دخازن ڕەوشا كوردستانێ بشێوینن و نە ئارامیێ تێدا پەیدابكەن، لێ ئەڤ بزاڤێن وان یێ چەپەل و نەزۆكا نە دێ د سینگێ وان دا بنە ڤولكان و پەقن و هەر ناگەهنە وێ خاستا ڕەشەنگێزانە ئەوا ئەو پێ د ئاشنا بەرامبەر پێشڤەچوونا هەرێما كوردستانێ ئەوا ژلایێ سەركردایەتیەكا ب هێز و حەكیم و دانا ڤە دهێتە پاراستن، ئەو هەرێما پێشمەرگێ قەهرەمان و هێزێن ئەمنی و ئاساییشەكا باوەرپێكری و ئەكادیمی ڤە بەرگریێ لێ دكەت، ئەو هەرێما ئەڤرۆ پارتی لێ خودان و حوكمران ب حوكمێ زۆرینەیا دەنگێن خەلكێ كوردستانێ و هەلبژارتن و دیموكراسی بوویە سیمبۆلا پاراستنا ماف و ئازادیێن خەلكێ كوردستانێ. ژ بەر ڤێ چەندێ و ژبەر ڤێ پێشكەفتنا هەی د هەمی بوارەكیدا ڕەنگە نەیارێن كوردان ب ڤێ چەندێ د پێ د خۆش نەبن ل هەنبەر ئەوا وان هەی و كو حەتا نها نەكارینە ب گەهنە وێ چەندێ ئەوا ئەڤە چەندین سالێن كورتە كوردستان گەهاندیە ڤێ قوناغا پڕی گەشەكرن و ئاڤەدانی و خزمەتگۆزاری. هندەك ژ وان وەلاتێن ئەقلیمی ئەوێن ل دەردوورێن كوردستانێ نە شیانە ڕكابەریێ د ئاستێ وێ گەشەسەندنێ دا بكەن ئەوا كوردان ئەڤرۆ بنیاتێ ئاڤاكرنێ ل سەر دانای و ڕۆژ بۆ ڕۆژێ دیوارێن وێ بلند دبن بۆ گوپیتكا شارستانیەت و ئاڤەدانیێ، ئەوژی مینا پرۆژێ كارەبا ڕۆناكی یا ٢٤ دەمژمێران كارەبێ پێشكێشی هەڤوەڵاتیێ خوە دكەت، ئەڤ پێشكەفتنا د وارێ جادە و كوڕنیش و تاوەر و گەلەك پرۆژێن دی یێن كو د كەڤنە د خزمەتا خەلكێ كوردستانێ دا، هەلبەت ئەڤە وێ خەمخۆری و وێ دلسۆزیێ دگەهینیت یا كو حوكمەتا هەرێمێ ب سەرۆكاتیا ڕێزدار مەسرۆر بارزانی پەرۆشێ جێبجێكرنا ڤان پلان و پرۆژەیانە یێن كو د بانگەشەیێن هەلبژارتنان دا ددەتە خەلكێ خوە بێی كو ڤێ چەندێ بكەتە منەت لسەر گەلێ خۆ. ڤێجار ژبەر ڤێ پێشڤەچوونا بلەز ئەو لایەن و میلیشیاتێن چاڤ ب ڤێ چەندێ ڕانەبن هەلبەت دێ هەولا شكاندن و ڕێگرتنێ كەن داكو ڤێ پێشڤەچوونێ ب ڕاوەستینن یان ژی ئابوورێ هەرێمێ لاواز بكەن بۆ هندێ ئێدی ئەڤ چەندە یا بەردەوام نەبیت، دیسا لێدان ل ژێرخانا ئابووری و پەقاندنا وێستگەهێن نەفتێ و غازێ پلانەكا دی یا ڤان نەحەزانە كو ڕێگریێ ل هەمبەر وەراركرنا هەرێمێ بگرن داكو ئەڤ سیمایێ پێشكەفتنێ بەرزەببیت و ل پێش چاڤێن جیهانێ وندا ببیت، چونكی ئەڤ پێشكەفتنە دێ ل داهاتی ئاماژەیێن چێكرنا دەولەتەكێ پێشكێشی كیانێ كوردی كەت و ئەڤە دێ بیتە زەنگا مەترسیێ ل سەر كینا وان یا بەردەوام ل هەمبەر كوردان و ڕەنگە هزر بكەن پێشڤەچوون و دەولەتا كوردان لێدانە ل بەرژەوەندیێن وان لێ دبێژین نەخێر كورد هیچ جارەكی مەترسی نەبووینە ل هەمبەر بەرژەوەندی و سەقامگیریا چ وەلاتان بەلكی بەروڤاژی كورد گەلەكێ ئاشتی خواز و مروڤ دۆستن بۆ هەر نەتەوە و ملەتەكێ ل جیهانێ نەخاسمە وەلاتێن هەڤ تۆخویب. گرنگە ئەڤ هێرشێن ترسنوكانە یێن ل هەمبەر گەلەكێ خودان سەروەری و خەبات و شەهید و قۆربانیدان بهێنە ڕاوستاندن چونكی نەیا ڕەوایە ئەڤ دوژمنكاریە یا بەردەوام بیت بەرامبەر ڤێ پێشكەفتنێ ژبەركو ئەڤە بخۆ ڕاستیا وێ ئێكێ د سەلمینیت كو هەردەما كورد بهوستەكێ بەرەف پێش بچن هینگێ دڤێت دۆژمن پیلانەكێ دابڕێژیت دا پاشڤە بچیت نەكو دو بهۆستێن دی پێشڤە بچیت، بەلێ دخوازین بێژین پێشكەفتنا كوردستانێ واتە ئاماژەیا بەرقەراركرنا ئاشتی و تەناهیێ یە بۆ ناڤخۆ و دەوروبەرێن وێ ژی. ژبەر ڤێ چەندێ ئەڤ نیازێن خراب و پیلانێن ژەهركری نەشێن ڕێگریێ ل ڤێ پێشڤەچوونێ بگرن بەلكی دێ گەرموگۆڕیەكا دی تە كاروانێ ڤێ ئاڤەدانیێ و ئەڤ هێرش و پەلامارێن تیرۆرستان دێ د شەرمزاركری بن و كوردستان ژی دێ ل سەر سكەیێ خۆە یێ پێشكەفتنێ بەردەوام بیت.

نایف مەحموود

كۆڕبەندا مێپس یا جیهانی ئەوا ل زانكۆیا ئەمریكی ل باژێڕێ دهۆكێ دهێتە سازكرن؛ نیشانا پێشكەفتنا گەلێ كوڕدە ل بەشێ باشوورێ كوردستانێ و سیمایێ ڕەنگڤەدانا ئاڤەدانی و گەشەكرنا ڕویێ سیاسی و ئابووری و دیمۆكراسیەتێ یە، هەروەسا بهێزترین ئالاڤێ گەهاندنا پەیاما ئاشتیێ یە بۆ وەلاتێن بیانی كو كوڕد پارچەكن ژ حەزكرنا چەسپاندنا ئاشتیێ‌ و بەرقەراكرنا ئازادیێ بۆ دەڤەرێ، گێڕانا ڤی كۆڕبەندی ژلایێ ئەكادیمی و زانستی و دیبلۆماسی ڤە؛ هێزەكا دی یا كاریگەرە بۆ بەرچاڤكرنا كەتوارێ كوردستانێ د ڤی سەردەمێ جیهانگیری دا، سەردەمێ وەراركرنا هزرا ئاشتی خۆازی و گەشەكرنا ئەقلێ سیاسی و ئالۆگۆكرنا هزر و ئایدیایێن بازڕگانی و…هتد. بێگومان داخوازكرن و هاتنا سەركردە و كەسایەتیێن سیاسی ژ دەرڤەی كوردستانێ، ئاماژەیا وێ یەكێ ددەت كو كوردستان ژ لایێ جیوپولوتیكی ڤە ستراتیژیەتا خوە یا گرنگ هەیە ل دەڤەرێ نەخاسمە د ئالیێ پەیوەندیێن سیاسی و ئابووری دا، كوردستان جهەكێ ستراتیژیە د وارێ پێكڤەگرێدانا بەرژەوەندیێن ئەقلیمی و هەتا دگەهیتە ئاستێ وەلاتێن زلهێز، لەورا د هەڤكێشەیێن ڤان وەلاتان دا هەرێما كوردستانێ ژ لایێ سنوورێن جوگرافی ڤە باندۆرەكا هەرە مەزن یا گوهۆڕینێن سیاسیە و ب تایبەت د نەخشەیێ جیهانی دا. هەلبەت ئەو برگە و گۆتارێن د ڤێ كۆڕبەندێ دا د هێنە پێشكێشكرن ژ گۆتارێن سەركردەیێن سیاسی وان پەنەل و گفتوگۆیێن دهێنەكرن ژ لایێ واقعی و سیاسی ڤە كاریگەریا خوە هەیە ل سەر چارەكرنا كێشە و گرفتێن ڕۆژەڤێ، جاران لێكتێگهەشتن و كەشەكێ برایانە و دۆستانە جهێ واقعەكێ ئالۆز و ژێك دووراتیێ دگرن. ژ گۆتنێن كاریگەر یێن ڤێ كۆڕبەندێ دەمێ سەرۆك بارزانی دبێژیت» ڕەوایە خیلافات و جیاوازی د ناڤبەرا حوكمەتان دا هەبن، لێ برایەتی و تەباییا گەل و وەلاتان ژ ڤان ناكۆكیان مەزنترە»، ل ڤێرە پێدڤی ب هەلوەستەیەكێ یە دەمێ سەرۆك بارزانی ڤێ پەیاما ئاشتیخوازانە پێشكێشی ئامادەبوویان دكەت و د بێژیتێ ئەم گەلەكێ مرۆڤ دۆست و ئاشتیخوازین لێ بۆ ماف و بەرژەوەندیێن خوە یێن خوەزایی هیچ جارەكێ د ئامادە نینین داگێرانێ ل سەر بكەین و ببینە پاشكۆیێن وەلاتەكی دی و دەست ژ خەون و ئارمانجێن خوە بەردەین. تەوەرەكێ دی یێ گرنگێ ڤێ كۆڕبەندێ ئەو بەرهەڤیا نوونەرێن هەرچار پارچێن كوردستانێ مزگینی و دلخۆشیەكا دی یا ڤی چاخی بوو دەما سەركردێن بەشێن دی یێن كوردستانێ پەسنا سەرۆكێ حوكمەتێ دكەن ژ بۆ ڕێكخستنا ڤی كۆڕبەندێ بوویە ئەگەرێ كۆمڤەكرنا وان و ئاماژە ب هندێ دا كو باشترین دەرفەتە بۆ ئێكبوونا كوردان و ئاماژەیەكا بهێزە بۆ دۆست و نەیارێن كوردا كو ئەو پارچەكرنا كوردان یا ل ڕێكەفتنا سایكس پیكۆ هاتیە مۆركرن نەبوویە ئەگەرێ ژێكڤەبوونا دلێن كوردستانیان، هەردەم و هەر كاودانەكێ هاتبیتە پێش كوردان دلسۆزی و دەستێ هاریكاری و برایەتیێ بۆ هەڤ درێژ كریە مینا هاریكاریا پێشمەرگەی د شەڕێ كوبانێ دا، پەیوەندیەكا ڕاستەوخۆ ل گەل كوردێن ڕۆژئاڤا پشتی كەتنا ڕژێما ئەسەدی و هەروەسا پرۆسا پێڤاژوویا ئاشتیێ ل وەلاتێ توركیا. ئەڤە هەمی ئەو بەلگەنە كو كوڕد د كاودانێن هەستیار دا ل سەر هێلن و بۆ خوەڕاگرتن و هەبوونا خوە ب هێز و ئێكگرتینە. ئەڤ ئێكگرتنە هێڤێنێ بەر ب پێشچوونا دۆزا كوردیە ل هەر چار پارچێن كوردستانێ و ب تایبەت د ڤی وەختی دا چونكی، جیهان و دەڤەر ل سەر پێلێن هندەك گۆڕانكاریانە و ڕەنگە قازانجا كوردان بەر بكەڤیت، ژبەرهندێ ئەڤ یەكبوونە دەرفەتەكا گرنگە بۆ لێكتێگهەشتن و ئالوگۆركرنا پەیوەندیێن سیاسی، وە پێدڤیە هەردەم كوڕد خوە د ڤی بازنەی دا ببین و ڤی شێوازێ پەیوەندیان بەردەوام خۆرتتر لێ بكەن داكو فوكسا وەلاتێن زلهێز و هەڤپەیمانان و وەڵاتێن ئەقلیمی بكەڤیتە د خزمەتا بەر ب پێشچوونا دۆزا گەلێ كوڕد دا؛ ل هەر چار پارچەیێن كوردستانێ و ل داهاتی ژی دێ ئاسۆیێن گەشتر چاڤەڕێی كوڕد و كوردستانیان كەت و ڕۆژ بۆ ڕۆژێ دێ خەونێن گەلێ كوڕد بنە ڕاستی و ئێدی دێ بەرهەمێ ڤێ ئێكبوونێ د هەلاتنا ڕۆژێن سەركەفتن و شانازیا گەلێ خوە دا بینین.

نایف مەحموود

هەلبەت هەر مرۆڤەك یێ كو د گەهیتە قوناغا پێگهەشتنێ، شەنگستەكێ جوان و ب ڕێك و پێك یێ ژیانێ بۆ خۆ ب دانیت و ل سەر بچیت هینگێ دێ شێت كەسەكێ ئەكتیڤ و كارا و سەركەفتی بیت، دێ شێت د پڕانیا قوناغ و وێستگەهێن ژیانێ دا دەستكەفت و ئەنجامێن باش ب دەست خوە ئێخیت، چونكی د هزر و ناخ و سایكولۆژیا خۆ دا وەسا خۆ ڕێكخستیە كو یێ ب زاڤ و زانا بیت د كار و ڕوتینات و ئەركێن خۆ یێن گرنگ و فەر دا ئەوێن خۆشبەختی و ئارامیێ پێشكێشی دەروون و گیانێ وی دكەن.
لێ بەرۆڤاژی جۆرەكێ مروڤان خۆ ب مرۆڤێن تەمبەل و خەمسار و بێی بەرپرسایەتی دایە نیاسین و هەموو دەمان ل سەر بالگەهێ بێخیرەتیێ دنڤێت و هەردەم گۆتیە خۆ و گۆتیە دەوروبەرێن خۆ ئەز نزانم یان ب زەحمەتە یان شولا من نینە و ئەڤە ژ ئاقل و شیانێن من مەزنترە، ڕاستە خودێ هەركەسی شیانێن تایبەت ل دەف پەیدا كرینە لێ كەس دبن هێلا سفرێ دا نینە و كراسێ نەزانینێ ژی نەكریە بەركەسێ، بەلكی مرۆڤ ب خۆیە جاران بۆ خۆشیا گیانی دێ بێژیتە خەلكی ئەز نزانم ڤی كاری ئەنجام بدەم ڤێجا ب تایبەت دەمێ كارەك د هێتە پێش و پێدڤی ب هاریكاری و شیانێن وی هەبیت ل وی دەمی دێ بێژیتە یێ بەرامبەر ئەز نزانم، وە د ڕاستی د بیت بزانیت ژی یان بشێت ژی بەلێ وەك جۆرە نە مەردایەتیەكێ پێشكێش دكەت دا كەس خۆ هەوجە نەكەت یان ژی ئەڤ چەندە بۆ وی خۆشیا گیانی یە و یێ ئارامە، هەما دێ خۆ د ڤی قالبی دا ڕازی كەت و دێ هوسا خۆ دناڤ جڤاكی دا دەتە نیاسین دا كەس زوو ب ب زوو خۆ مۆحتاج نەكەت بۆ ئەنجامدان و یانژی ب بەرئێكڤەئینانا كارەكی.
لەوما ئەڤ دەستەواژا (نەزانی خۆشیا گیانی) گەلەك جاران ئاریشەیە بۆ وی كەسی ب خۆ كو كارتێكرنەكا خراب و نەرێنی ل سەر ژیانا وی ژی كریە و دبیت گەلەك كار و پێدڤیاتێن وی مابن ل جهــ و بەرەف پێش نە چبن، ل وی دەمێ دێ زیانێن دەروونی و حەتا نەساخیێن جەستەیی ڕەنگڤەدانا خۆ ل سەر ژیانا وی كەن، ئەڤجا ژ بەر بەهانەیا هندێ كو ئەڤ چەندە بۆ خۆ كریە ئالاڤێ خۆ پێ قورتالكرنێ ژ بەرپرسایەتیێ و داكەس ژی داڤ و داخوازیان ژێ نەكەت هەما ل وی قوڕنەتی دێ مینیتە د جهدا و خزمەتا ناڤ و دەنگی و كەسایەتیا وی ژی ناكەت، ژبەركو خەلكەكی ئەو دالەهی نابیت.

نایف مەحموود

هەلبژارتن وەكو ڕەهندێ پەیرەوكرنا سیستەمێ دیموكراسی ئێك ژ ئالاڤێن وەرگرتنا كورسیكا بەرپرسایەتیێ یە و ڕێكا جوداكرن و ڤاڤارتنا سیستەمێ دیموكرسی و سیستەمێ دیكتاتۆریتێ یە. لەورا ئەڤ قۆناغا جیهان ئەڤرۆ تێدا دەرباز دبیت پڕانیا وەلاتان گەهشتینە وێ باوەرێ كو هەلبژارتن تاكە ڕێكا گهەشتنا كورسیكا دەستهەلاتێ یە و سندۆقێن دەنگدانێ و ڕایا خەلكی بۆ ژێگرتنا بەرپرسایەتیێ ب لایەنەكێ سیاسی یان كاندید و كەسایەتیێن بەربژار و جهگرێ شەڕ و كوشتار و خۆسەپاندنا ب كوتەكی یە، ڤێ چەندێ ژی لاپەڕێن دیرۆكێ ب حوكمێ چیڤی و كوتەكیێ تژی كرینە و سەرئەنجام و ل داویێ دەستهەلاتا وان هەلوەشایە و كەفتیە بەر لەعنەت و نەفرەتێن دیرۆكێ و ئێك ژ وان دەستهەلاتان ژی دەستهەلاتا فاشستا ڕژێما بەعس ئەوا باجا دفن بلندی و زۆلم و ستەما خۆ دای و ژناڤچووی. ژ بوونا ڤێ ئێكێ پشتی چەسپاندنا سیستەمێ دیموكراسی ل ئیراقێ و پراكتیزەكرنا چەندین گەڕێن هەلبژارتنان و پشكداریا كوردان د ڤێ پرۆسێ دا ب هەمی وان بیروباوەرێن خەباتا مەدەنی و دیموكراسی و شارستانی مل دانە بەر گەشەكرنا ئەقلیەتا هەڤدو قەبوولكرنێ و ماف و ئازادیێن تاك و گەلانێن ئیراقێ و تا ئیرۆ ژی كوردان دەستێ ئالیكاریێ بۆ ڤی ڕێڕەوێ حوكمرانیێ ل ئیراقێ درێژ كریە و باوەریەكا ڕەها ب ڤی ڕەهندێ ئاشتیخۆازی و ئازادیێ هەیە. ئەڤجار ئەم وەك تاكێ كورد ڤێ تێگەهشتنێ چاوا د ناخ و وژدانا خوەدا بغولغلینین و چاوا بكەینە دەلیڤا بەرجەستەكرنا دادیێ ل سەر هەلبژارتنا دروست و هەلبژارتنا ڕاستیێ د میزانا بیروباوەرێن خۆ یێن ئازاد دا، ڕاستە هەركەس ئازادە چاوا دەربڕینێ ژ بۆچوونا خۆ یا ئازاد بكەت و چاوا بڤێت وەسا ئەركێ خۆ وەك تاكەك كەسەك بجهبینیت بەرانبەر ژێكجوداكرنا چەپ و ڕاستان. لەوما ژ هەژی ئاماژێ یە كو خەلك و هەڤوەلاتی وەسا تێبگەهن پشداریكرن د ڤێ پرۆسا پیرۆز و زۆر گرنگدا ئەوا كاریگەریا خۆ ل سەر ئاشتیێ و پێكڤەژیانێ‌ و هەڤدو قەبوولكرنێ هەی، ئێدی چەپەرێ بەرسینگرتنا توندوتیژی و خوین ڕێتن و شەڕەنگێزیێ یە و ژبلی سەنگێ مەحەكێ هەلبژارتنان و سندۆقێن دەنگدانێ گوللە و فیشەك و تانك و تۆپ جهێ ڤێ پرۆسێ دگرن جارەكا دی ڕێك خۆش دبیت بۆ سەرهلدانا حوكمێ دیكتاتۆری و تاكلایەنیێ. ل ڤێرێ ژی هەژیە بزانین كو كاریگەریا ڤان هەلبژارتنان ل سەر گوهۆڕینا ژین و ژیار و خۆشگۆزەرانیا خەلكی هەیە و ڕەنگڤەدانێن خۆ یێن ئەرێنی هەنە ب حوكمێ هندێ هەر لایەنەك بزاڤێ بكەت بكەڤیتە د هەڤڕكیا پێشكێشكرنا پرۆژێن خزمەتگۆزاری و دانانا پلانێن باش بۆ پاشەڕۆژێ ژبۆ هندێ كو خەلك باوەریا خۆ یا دەنگدانێ بۆ دوپات بكەت و ڤی لایەنی هەژی وێ بەرپرسایەتیێ ببینیت بۆ خزمەتكرنێ. هەلبەت ڕەوایە بێژین و ژبیر ژی نەكەین كو ئەم ڤێ گاڤێ یێ د گەرمە گەرما بانگەشا هەلبژارتنێن خۆلا شەشێ یا پەڕلەمانی ئیراقێ داینە و كورد ژی بەشەكێ گرنگێ پێكهاتا ڤێ دەولەتێ نە و ب مافێن خۆ یێن دەستووری یاسایی پشكداریێ د ڤان هەلبژارتنان دا دكەت و ئێك ژ وان لایەنێن كوردان یێن كاریگەریا خۆ یا ڕاستەوخۆ هەی ل سەر گۆرەپانا سیاسی یا ئیراقێ ئەوژی پارتی دیموكراتی كوردستانە ئەو پارتا ژ نیڤ سەدەیەكێ پتر خەبات ژ بۆ چەسپاندنا دیموكرسیەتێ ل ئیراقێ كری و ئەڤرۆ ژی ئێك ژ كاریگەرترین حزبا سیاسی یە و خۆدان جەماوەرەكێ زۆرە و تاكە حزبا بێ ڕكابەرە ژ لایێ زۆرینەیا دەنگان ڤە ل پەرلەمانێ ئیراقێ و كوردستانێ و تێگهەشتنا پارتی بۆ ڤێ بیردۆزێ ژی بتنێ خەلكە سەرچاوەیێ گەهشتنا كورسیكا دەستهەلاتێ و ب تنێ باوەری ب ڤێ ڕێكێ و ڤی چەمكی هەیە خزمەتا گەل و وەلاتێ خۆ بكەت و ژبلی هەلبژاتنان چ ڕێكێن دی د فەرهنگا پارتی دا د باوەرپێكری نینن و دیسا د زهنیەتا سەركردایەتیا پارتی دا هەرتشتێ هەڤدژ د گەل دیموكراسیەتێ لادانە ژ پەیرەوێ ئاشتیخۆازی و پێكڤەژیانێ ژبەر ڤێ چەندێ پێدڤیە ئەم ڤێ باوەریێ ب هزر و هەست و نەستێن خۆ یێن ئازد داڕێژینە سەر سندوقان وی لایەنی و وی كەسی بهەلبژێرین یێ كو بكاریت ب ڤێ بەرپرسایەتیا گران ڕاببیت و ببیتە لێڤەگەرێ داڤ و داخوازی و مافێن خەلكی و پارێزگاریێ ل وان دەستكەفت و ماف و ئازادیێن خەلكێ كوردستانێ بكەت بەرژەوەندیێن خەلكی ل بەراهیا بەرژەوەندیێن حزبایەتی و تاكەكەسی دانیت داكو نموونەیەكا جوان و سەربۆڕەكا سەركەفتی نیشا ڕكابەرێن خۆ بدەت.