نەهلا ئەحمەد
ئەرێ وەكۆ یا پێدڤی پشتەڤانی ل یانەیێن ئافرەتان یێن وەرزشی دهێتە كرن؟ ئەرێ وەكۆ پێدڤی پشتەڤانی ل كچێن وەرزشڤان ل پارێزگەها دهۆكێ دهێتە كرن؟ ب راستی ژی ئەم وەكۆ رەگەزێ مێ و ب تایبەت كەسێن وەرزشڤان گەلەك د بێ پشتەڤانین، یا خۆیایە چەندین سالە وەرزش ب شێوەیەكێ باش بەر ب پێشڤەچوونێ یە هەر ژ یاریا فوتبۆلێ و باسكێتبوڵ و پایسكل سواری و ڤۆلیبوڵ و هەتا… بەلێ مخابن ئەم دبینین دگەل پێشڤەچۆن و ماندیبوونا وەرزشڤانێن كچ هیچ پشتەڤانیەك نینە نە ژ لایێ ماددی ڤە و نە ژی ژ لایێ مەعنەوی ئەرێ ئەگەر ب ڤی ئاوایی بیت ئەڤ جورە وەرزشە بەر ب نەمانێ ڤە ناچن؟ ب تایبەتی ژی ژ لایێ كچان ڤە ئەرێ ئەگەر ئەڤ نە پشتەڤانیە یا بەردەوام بیت دەرگەهێن یانەیێن ئافرەتان ئەوێن هەین ئەوژی ناهێنە گرتن؟ … یا كۆ خویا ژی ل پارێزگەها دهۆكێ و ل ئیدارەیا سەربەخۆیا زاخۆ مە باشترین كچێن وەرزشڤان هەنە ئەرێ مانە گونەهەكا مەزنە ئەڤ یانەیە و ئەڤ وەرزشڤانێن باش و خۆدان شیانێت مەزن ژ ناڤ بچن و شیانێت وان بەرزە ببن.. ئەرێ كی بەرپرسە ژ نە پشتەڤانیا ئافرەتان ل پارێزگەها دهۆكێ؟ ئەگەر ئەم هزرا خۆ بكەین ئەو پشتەڤانیا ماددی یا بۆ ئێك یاریزانێ رەگەزێ نێر دهێتە كرن ب باوەرم دێ ب وی پارەیی قارەمانیەكا هەرە باش ژ بۆ یانەیێن ئافرەتان هێتە برێڤە برن.
وەكۆ یا دیار هەر تشتێ پشتەڤانی نەبیت ژ ناڤ دچیت ئەڤچا ژ بۆ هندێ كۆ ئەڤ یانەیە بمینن و ب دەستكەفتێن خۆ یێن مەزن ڤە یا پێدڤیە ژ لایێ بەرپرسێن مە ڤە ب تایبەتی یێن ئافرەت پشتەڤانی هەر چ نەبیت ژ لایێ مەعنەوی ل ئەڤان یانەیان و ئەڤان یاریزانان بهێتە كرن نموونە یانەیا ئافرەتێن دهۆك یا تایبەتمەند ب كچێن وەرزشڤان ڤە كۆ ئەو یانە و ئەو یاریزان هەست ب هندێ ب كەن كۆ هندەك كەس هەنە پشتەڤانیا ئەوان دكەن و ئاگەه ژ ئەوان هەیە و پتر بشێن خزمەتا وەرزشا پارێزگەهێ و وەلاتێ خۆ بكەن.
