نەهلا ئەحمەد

ب راستی ژی جهێ‌ سەر سۆرمانێ‌ یە هێشتا هندەك كەس هەنە نە د وەرزشێ‌ نە د قارەمانیێن وەرزشی دگەهن و خۆ دكەنە قارەمان و قارەمانییان ڤەدكەن، یا من دڤێت بێژم ئەگەر هین نەشێن بریاران بدەن و پەشێمان ببن و نەشێن بڕیارێن ئێكلاكەر و بێ‌ ترس بدەن، چ قارەمانیان نە ڤەكەن گەلەك باشترە ژ قارەمانیەكێ‌ كو دو جارا بریارێ‌ بدەن دووڤدا بهێتە پاشئێخستن و جارا سێیێ‌ ب هەلوەشینن و پووشمان ببن ژ ڤەكرنا وێ‌ … ل پار سال قارەمانیا فوتسالێ‌ یا پێلستانك هەبوو كو كەناڵێ‌ پێلستانك و هندەك كۆمپانیان ب ستویێ‌ خوڤە گرتبوو و چەندین یانەیان پشكداری دكر كو یاسایا وێ‌ ژی ئەو بو یاریزانێن ژیێ‌ وان كێمتری 18 سالی پشكدار بن ب خۆشحالی ڤە هندەك یانەیان ژ پارێزگەهێن هەرێمێ‌ پشكداریكر، ب راستی ژی راهێنەرێن هندەك یانەیا ب باشترین ئاست یاریزان بەرهەڤكربوون و یاریزان هەبوون د ژیێن 12 سالی دا و كێمتر باشترین ئاست پێشكێشكرن بەلگەژی یاریزانێن یانەیا ئافرەتێن دهۆك دڤی ژی دا هەبوون … یا من دڤێت ل ڤێرێ‌ بێژم نزانم ئەوێن بریاران ددەن لدووڤ دا ب بریارێن خو پەشێمان دبن یارییا ب هەستێن یاریزانان دكەن یان ژی خۆشیێ‌ ژ بریارێن خۆ دبەن… ئەرێ‌ باشە ئەگەر هین نەشێن ببن سپونسەرێن قارەمانیێ‌ بۆچی دێ‌ بێژن بلا قارەمانی بهێتە كرن و لدووڤ دا دێ‌ ژ بریارا خۆ پووشمان بن و بێژن ناهێتە كرن پاشی دیسانڤە دێ‌ بێژنە یانەیا خۆ بەرهە بكەن دێ‌ قارەمانی هێتە كرن پاشی ژ نیشكەكێ‌ ڤە دێ‌ یانەیان ئاگەهداركەن كو قارەمانی هاتە هەلوەشان و ناهێتە كرن، ب راستی ژی سەیرە نزانم هین ئەڤان بریارێن ژ نیشكەكێ‌ ڤە چاوان ددەن و كینە ئەڤان بریاران ددەن … ئەرێ‌ هەوە هزر كرییە كو یانە هەبوویە نێزیكی بۆ ماوەیێ‌ دو مەهە دەست ب ڕاهێنانێن كرینە بۆ قارەمانیێ‌، دیسان هەوە ژ نیشكەكێ‌ ڤە بڕیاردا قارەمانی دێ‌ هێتە هەلوەشاندن ئەرێ‌ ئەوێن ئەڤ بریارە داین هزر د وێ‌ چەندێ‌ دا نەكرینە كو یانەیان چەند پارە مەزاختن ژ هاتن و چۆنا یاریزانان ئەرێ‌ هەوە هزر نەكرینە كا هەوە چەند كارتێكرن ل دەروونێ‌ یاریزانان كر ئەرێ‌ دێ‌ یاریزانان ئێدی چەند باوەری ب بڕیارێن هەوە هێت، فەرە هەر بڕیارەكا بهێتە دان بێی دودلی و بێی ترس و بەرژەوەندی بهێتە دان، یا من دڤێت ل ڤێرێ‌ بێژم ئێدی دڤێت یانە و فدراسیۆنێن وەرزشی ڕێكێ‌ نەدەنە ئەوان بازرگانا كارتێكرنێ‌ ل دەروونێ‌ یاریزانان بكەن و نە بنە ئەگەرێ‌ كێمكرنا قارەمانیا و وەرزشێ‌ ل هەرێما كوردستانێ‌، بلا ئەم ببینە ڕێخوشكەر كو كچێن باژێرێن مە یێن كوردستانێ‌ شیانێن خۆ دیار بكەن نەبینە ئەگەر كو پەشێمان ببن یاریێ‌ بكەن بلا ببینە ئەگەر یارییا فوتسالێ‌ و هەر قارەمانیەكا بهێتە كرن پێشڤە ببەین بگەهنینە گوپیتكێ‌ نەبینە ئەگەر وان جورە قارەمانیان نەهێلینە ساخ.

نەهلا ئەحمەد

د جیھانا وەرزشی دا گەلەک ئامیرە دھێنە بکار ئینان بۆ راھێنانێن ھەر یارییەکێ ژ لایێ یاریزانان ڤە، باندێن بەرگێریێ ژی بووینە جھێ ھندێ کو ژ پێش ئامیرەیێن وەرزشی یێن دناڤ ھولێن وەرزشی دا بھێنە بکارئینان، ب تایبەتی بۆ وان کەسێن دەم نەبیت قەستا ھولێن وەرزشی بکەن بۆ ئەنجامدانا راھێنانێن لەشجوانیێ دیسان کەسێن ناڤ سالڤە چووی دشێن باندێن بەرگێریێ ل مال بکار بینن، ئەڤ باندێن لاستیکی دڤان سالێن دووماھیێ دا لدەف یاریزان و راھێنەرێن پێشکەفتی بشێوەیەکێ بەرچاڤ گرنگی پێ دهێتەدان و ھەتا بۆ مە دیار بوویە ب شێوەیێن رەنگان ژی جودانە، ھەر رەنگەکی ھێزەک و ئاستەکێ جودا ھەیە ھندەک ژ رەنگێن باندێن بەرگێریێ کۆ بۆ نموونە رەنگێ باندی یێ کەسک کێشا٤ کیلوگرام ھەیە و ستویراتی یا وی ٥,٣٥ملم ە ، رەنگێ شین ھێزا وی ٤,٥ کیلوگرامە و ستویراتیا ئەڤی رەنگی ٠,٥ملم ە ، رەنگێ رەش ژ ھەمی رەنگا ب ھێزترە کێشا وی ١٣ کیلوگرامە و ستویراتی یا وی ١,٢ملم ە ، دشێن باندێن بەرگێریێ بۆ راھێنانێن گرێدای ب پێ کو یاریزانێن فوتبۆلێ یان ژی دەستان کۆ یاریزانێن باسکێت بۆل و ڤۆلی بۆڵ و تەپا دەستی ھند…. بکاربینن بێی ھیچ زیانەکێ، ئەگەر ژلایێ راھێنەرێن خۆدان ئاست و شەھرەزا د پروگرامێن خو دا بکارئینان، ئەڤ باندە ژلایێ راھێنەرانڤە دھێنە بکارئینان بۆ یاریزانان لدووڤ ئاست و کێشا یاریزانی بۆ نموونە یاریزانەک ھەیە ئاستێ وی ناڤنجی یە دێ راھێنانا باندی ئاستێ ناڤنجی بکارئینیت و یاریزان ھەیە تووشی ھنگاڤتنێ بوویە و پشتی ژ ھنگاڤتنێ زڤرییە راھێنانان ئاستێ وی دخازیتە ھندێ کو باندا کێشا وێ ژ ھەمیان کێمتر بھێتە بکارئینان، راھێنەر ددەنە دیار کرن ژ بۆ چالاکبوونا یاریزانی گرنگیێ ددەنە باندێن بەرگێریێ و یانەیێن مە ژی ژبۆ بکارئینانا ئەڤێ باندێ دبێ بەھر نینن ئەڤ چەندە ژی ژلایێ راھێنەرێ شیانێن لەشی یێ یانەیێن مە یێن کوردستانی ژی دهێتە بکارئینان، لڤێرێ بۆ مە دیار دبیت باندێن بەرگێریێ یێن دھێنە بکارئینان و بووینە جھێ گرنگی پێدانێ لدەف راھێنەرێن خۆدان ئاست، ھاتیە دیارکرن باندێن بەرگێریێ مفایێن ھەرە باش ژی ھەنە ئەڤ مفایە دو پشکا بخۆڤە دگرن، پشکا ئەدائا کارکرنێ پێکدھێت ھەڤسەنگی و ھەماھەنگییا یاریزانی، ئەدائا لێدانێ، ھێزا ماسولکا، شیانێن خۆ بلندکرنا راست ل دەف یاریزانی و ھند… , پشکا ساخلەمیێ ژی پێکدھێت ژ رێژەیا دوھنێ لەشی کێم دکەت، ھێزا زێدەبوونا ماسۆلکا بەرب پێشڤە دبەت، لێدانێن دلی چالاک دکەت ل دەمێ بێھنڤەدانێ دا، دبیتە ئەگەرێ گونجاندنا پەستانا خۆینێ ،(تحمل) یا ماسۆلکێ و ھند…، بەروڤاژی مفایان زیانێن وێ ژی ھەنە ئەوژی ئەگەر بشێوەیەکێ خەلەت ھاتنە بکار ئینان ژلایێ بکارھێنەران ڤە چ ل ھولێن وەرزشی بیت یان ژی ژلایێ یاریزانا ڤە بیت دبیتە ئەگەرێ ھنگاڤتنا ماسۆلکێن لەشی ئانکو دڤێت بشێوەیەکێ زانستی ب سەرپەرشتیا راھێنەرێن خۆدان سەربۆر و خودان شیان ڤە بھێنە بکارئینان .

نەهلا ئەحمەد سلێمان

یا خۆیایە كو ئەڤە نێزیكی دو سالایە دهۆك د بوارێ‌ وەرزشێ‌ دا یا گەشێ‌ دكەت هەر ژ زارووكان هەتا كو كەسێن دان عەمر بەرێ‌ هەمی یان كەڤتیە وەرزشێ‌ ئەڤە ژی بوویە جهێ‌ دلخۆشییا هەر كەسەكێ‌ حەز ل وەرزشێ‌ هەی و ب تایبەت كەسێن وەرزشڤان، بێ‌ گومان ئەڤە ژی ب سانەهی نەهاتیە بەلكو هندەك كەس هەبووینە ئەو وەرزشا مری ل دهوكێ‌ ساخ بكەن ب تایبەتی ئەم بەحسا یانەیا دهۆك یا وەرزشی بكەین كو هندەك كەسێن خەمخور هەبووینە وەرزشێ‌ ل یانەیێ‌ بگەهیننە گوپیتكێ‌ ئەڤە ژی ب سانەهی ناهێت و ئەو كەسێن خەمخور یێن كو ب شەڤ و روژان كار كریین و ب پارەیەكێ‌ گەلەك كێم وەرزش ل دهوكێ‌ ساخ كر و نیشا یانەیێن ئاسیا دا كو دهۆك د وەرزشێ‌ دا پێشەنگە بەلگە ژی بو ڤێ‌ چەندێ‌ ب دەست ڤە ئینانا كوپاكەنداڤی و كوپا  ئیراقێ‌ د ئێك سال دا ب راستی ژی ئەڤە ببو جهێ‌ دلخۆشیا هەمی خەلكێ‌ پارێزگەها دهۆكێ‌، یا من دڤێت ل ڤێرێ‌ دیار بكەم ئەگەر مە بڤێت وەرزشا دهوكێ‌ و روویێ‌ جوانێ‌ دهوكێ‌ نیشا خەلكەكێ‌ ژ دەرڤە و كەسێن بیانی بدەین دڤێت ئەم روویێ‌ جوانێ‌ پشتەڤانیێ‌ و رەوشتێ‌ وەرزشی نیشا هەمی یانەیان بدەین ژبەر كو بەری ببینە وەرزشڤان بلا مە رەوشتەكێ‌ باش و بەرز هەبیت كو د وەرزێ‌ ئەڤ سالە دا پشتەڤانیەكا جوان ل تیما خو و ل وەرزشا پارێزگەها دهۆكێ‌ بكەین ئەوژی ب ریێا بەرپرسێن وەرزشی و كەسێن دەستهەلات ل یانەیێ‌ هەیی كو ئەم ب درووشمێن جوان و ب دەستپێكێن جوان و جودا وەكۆ وەرزێ‌ بوری پێشان بدەین و كەسێن دبنە ئەگەرێ‌ تێكدانێ‌ و دووبەرەكیێ‌ و دەزگەهێن راگەهاندنێ‌ یێن كو ب درستی كارێن خو ئەنجام نەدەن هەر ل دەستپێكا وەرزی ئەو كەس و ئەو دەزگەه بهێنە دوور كرن ژ یاریگەهێ‌، بڤی شێوەی ئەم هەمی پێكڤە دێ‌ دیار كەین كو دهۆك ئێكەمینە د بوارێ‌ وەرزشێ‌ دا بەلكو نەبتنێ‌ وەرزشا یارییا فوتبۆلێ‌ دا هەروەسان یارییا باسكێت بۆلێ‌ و یارییا تێنسێ‌ و یارییا تایكواندۆیێ‌ و هند.