ل وه‌لاتێن مه ئاین ل پێشیا هه‌ر تشته‌كى یه و گرنگتره ژ ئاڤڤه‌خوارنێ، هه‌مى كاربوبارێن خوه بازرگانیا خوه، مفایێن خوه ئه‌م بجدهێلین بۆ ئه‌نجامدانا نڤێژێ (اژ نودی للصلاه من یوم الجمعه فأسعوا الى ژكر الله و ژروا البیع ..)، له‌ورا ئه‌ڤه بیاڤێ ئایینى نێزیكترین رێكه بۆ ڤه‌كێشانا خه‌لكى و ته‌رویجا هاتنا وان، بازرگانى ژى هونه‌ره، هونه‌رێ بده‌ستڤه‌ئینانا دراڤى ب رێكێن نێزیك. به‌رى چه‌نده‌كێ هه‌ڤاله‌كێ چالاك ل سه‌ر فه‌یسبۆكى (محمد مزووری) ڤیدیۆكا ب ڤى ره‌نگى شاندبوو، كابرایه‌كێ عیراقێ ره‌وشا گه‌شتوگوزار یا ئاینى تێكڤه‌دا، تشتێ سرنجراكێش ئه‌وه كو د ڤان رێوره‌سمان ژ كه‌یفێن ئاینى دا و خلوه‌تبوون ل گه‌ل خودایى و كه‌سێن پیرۆز دا كه‌سێ های ژ مه‌زاختنا دراڤى نینه، ده‌رباره‌ى چلیا ئیمان الحوسه‌ینى و سه‌ره‌دانا شیعه‌یێن ئیرانێ ب تنێ بۆ كه‌به‌رلایێ دیاره كو هه‌تا نها دوملیۆن گه‌شتیارێ ئاینى شیعى ئیرانى هاتیه ئه‌داكرنێ، هه‌روه‌سا ل به‌ر ژى چار ملیۆنێن دیتر ژى بهێن، ئه‌ڤه ته‌نها شیعه‌یێن ئیرانێ ونه‌ك زێده‌تر، ژ بلى یێن قه‌ته‌ر، به‌حرین، سعوودیه، یه‌مه‌ن، پاكستان، ئازه‌ربه‌یجان، رۆژهه‌لاتا ئاسیا، وه‌لاتێن عه‌ره‌بی و ئه‌فریقیا و ئه‌ورۆپا و ئه‌مریكا..هتد. هه‌ما یێن ئیرانێ ب تنێ د سالێ دا دبنه شه‌ش ملیۆن كه‌س، هه‌ر كه‌س بۆ كرینا ڤیزێ 40 دۆلاران دده‌ته حوكمه‌تا عیراقێ كه واته سه‌رجه‌مێ وى گۆژمى ب دبیته 240 ملیۆن دۆلار، دبینه 312 ملیۆن دینارێن عیراقى، ئه‌ڤه ژى ژ بلى كڕینا بهایێ فرۆكێ و كڕینا كه‌لوپولان و مه‌زاختنێ، ئه‌زنزانم هنده‌ك به‌حسا هه‌ڤژینیا ده‌مكى دكه‌ن (زاج متعه)،كا هه‌یه‌یان نه!!, كا چه‌ند دراڤ دهێته د عیراقێ دا؟!. گۆت ژ ره‌خه‌كى ژى په‌لپه‌لا حوكمه‌تێ یه گازندا دكه‌ن، كو ره‌وشا ب هاتنا گه‌شتیاران تێكچیت و دلناده‌ت جاده‌یێن خوه دروست بكه‌ن. باشه ئه‌ڤه چپكه‌كه ژ ده‌ریایه‌كى ژ بلى داهاتێن وه‌كو دى، بڕینا رێژه‌كا باش ژ مووچه‌یێن كارمه‌ندێن عیراقێ بۆ حه‌شدا شه‌عبی، هه‌لبه‌ت دێ ره‌وشا حه‌شدا شه‌عبی خۆش كه‌ن د دستوورى فه‌رمى كه‌ن، مووچه‌یێن وان مه‌زێخن، بلا یێن پێشمه‌رگه‌ى ژى نه‌ده‌ن، كو پێشمه‌رگه مه‌زنترین پشته‌ڤانێ وان بوو د ڤان شه‌رێن ل دژى داعشێ.
ب راستى كه‌یسا مفاوه‌رگرتن گه‌شتیاریا ئایینى كارگه‌ها دراڤى په‌یدا دكه‌ت بۆ گه‌نجینه‌یا وه‌لاتى، ل ڤێره پسیار دكه‌م، ئه‌رێ مه بژاره هه‌نه بۆ ڤى بیاڤى یانپێگوهۆرێ وى یێ گوزارى چیه؟!،گه‌له‌ك شاره‌زا و تایبه‌تمه‌ند، گه‌له‌ك به‌حسا گه‌شتیاریا سروشتى دكه‌ن، ل ڤێره ژى دبیت هند ئه‌ڤ جۆره ل ده‌ف مه یا لاواز بیت، چونكو ب ره‌نگه‌كى دوورى یا ئاینى یه، كو خه‌لك تێكهه‌لى هه‌ڤ دبن وجلكێن بێ په‌رده بۆشى دكه‌نه‌به‌ر خوه، كو دوورى كلتۆر و دابونه‌ریتان بوویه، سه‌ره‌راى هندێ كو ئه‌ڤ دۆخه ل جهان ناهێته كرنترۆلكرن وه‌كو ده‌مه‌كى ل مووسل دگۆتن حاشاى مه‌زارگه‌هێ (نه‌بى یوونس) یا بوویه جهێ مه‌وعدێن ئاشقان!. لێ ژ جوداهیا
نووترين نووچه
- نێچیرڤان بارزانی ب فەرمی بۆ وەلاتێ قەتەرێ دهێتە ڤەخواندن
- نێچیرڤان بارزانی و مەسرور بارزانی پیرۆزباهیێ ل شیرەتكارێ نوو یێ ئەلمانیایێ دكەن
- سەرۆكێ حوكمەتا هەرێمێ دوپاتیێ ل بهێزكرنا پەیوەندییان ل گەل هندستانێ دكەت
- خسرۆ گۆران: روودانێن دەڤەرێ كاریگەری ل سەر هەلبژارتنێن ئیراقێ نابیت
- نێزیكی 50 هزار تیرۆرست و كەسوكارێن وان مووچەیێ شەهیدان ژ حوكمەتا ئیراقێ وەردگرن
- بەغدا ب نە هنارتنا مووچەیێ خەلكێ كوردستانێ قەرەبوویا كێمبوونا داهاتییێن خوە دكەت
- نێچیرڤان بارزانی سەرەخوەشیێ ل ئەیاد عەلاوی دكەت
- مەسرور بارزانی: ئیراقێ پێدڤی ب حوكمڕانییەكا دادپەروەرانە هەیە
- تێكگەهشتنەكا باش هەیە و د زووترین دەم دا حوكمەت دێ هێتە پێكئینان
- وەزارەتا كۆچ و كۆچبەران سكالا دژی داخوازیێن مە بۆ مافێن ئاوارەیان تۆمار كریە
شیرزاد نایف
سپۆنسه‌رى خۆلیا سه‌رى!
بیاڤێن به‌لاڤكرنا مه‌دیایى ل ڤان دووماهیان گه‌له‌ك مشه بووینه، سه‌ره‌راى وێ ئێكێ كو پارێزگه‌ها دهۆكێ نه ل به‌راوردى هه‌ولێرێ و سلێمانیێ یه ب هه‌ر تشته‌كى، به‌لێ وه‌كو دى وه‌كو دزانین هه‌مى ده‌زگه‌هێن میدیایى و به‌رهه‌ڤكرنا به‌رنامه و تۆماركرنا كلیپێن سترانا و برێڤه‌برنا هه‌مى چالاكیێن هونه‌رى و وێژه‌ى دخوازیت پشته‌ڤانیا داراى هه‌بیت، یا كو دبێژنێ سپۆنسه‌رى چونكو ل ڤى سه‌رده‌مى هه‌مى تشت ب پاره‌یى دهێته‌كرن، خوه ئاڤ ڤه‌خوارن ژى یا بپاره‌یه، كو به‌رى چه‌ند ساله‌كا مه گوه لێدبوو كو ل وه‌لاتێن بیانى ئاڤ ڤه‌وخوارن ژى ب پاره‌یه، مه باوه‌رنه‌دكر!، نها ل ده‌ف مه خرابتره خوه ئه‌و یا ماى بێنهلكێشان ب پاره بیت، هونه‌رمه‌ند و كه‌سێن میدیایى و وه‌رۆزشى ژى تێرا خوه بێزار بووینه و كه‌فتینه كولانان ڤێ قیرانێ كارتێكرن لێ كریه، ستویێ خوار دكه‌ن و په‌نایێ دبه‌نه به‌ر حه‌فكستوور و كیخه‌یێن ڤى باژارێ بچووك، به‌لێ بده‌ستڤه‌ئینانا پشته‌ڤانیێ چه‌نده‌كێ یا ب زه‌حمه‌ت كه‌فتى، كه‌سێن ده‌وله‌مه‌ند ل باژارێ مه دكێمن و چه‌ندى من بهیستیه به‌س ئێك زه‌نگین ل دهۆكێ هه‌یه، ئه‌و ژى نه دهۆكى یه، وه‌كو دى ژى یێن گرگره و پێچێبوویى ته‌مه‌تى تبلێن ده‌ستانه ل دهۆكێ، ئه‌و ژى هاری كێ بكه‌ن و كێ نه‌كه‌ن، فتره و زكاتێن خوه ژى یێن كرینه مه‌رج و دووڤچوون و (شه‌ت و شریت). دبیت رامانا سپۆنسه‌ریێ ئه‌و نه‌بیت یا گه‌له‌ك خه‌لك هزر لێ دكه‌ن، كو خوازۆكى یه و قه‌رچكرن، به‌لێ دبیت ریكلامكرنا وێ كۆمپانیێ بیت یا نوى كه‌س و لایه‌نى. دا به‌رهه‌مێ وى ب ره‌واج بكه‌ڤیت و خه‌لك قه‌ست بكه‌نێ، جاران سۆنسه‌ریا راست و دروست چه‌ندین جاران فایده‌ى پتر دكه‌ن ژ ئه‌و پیچا پاره‌یێ مه‌زاختى بۆ وان تیمێن گه‌رۆك، یا باش ئه‌وه لایه‌نێن په‌یوه‌ندیدار میكانزمه‌كا گونجاى و پیشه‌ى بدانن یا كارا بیت، ل دووڤ قانوونه‌كا ب دادوه‌رى سپۆنسه‌ریان بۆ لایه‌نێن به‌رهه‌مدار پارڤه‌كه‌ن، دا نه‌بیته (هیڤیا ده‌را خۆلیا سه‌را) !!. كو كه‌سێن داهێنه‌ر ره‌زیل نه‌بن و ستویێ خوه خوار بكه‌ن، هه‌كه تشته‌ك ب جوسته‌یى ڤه گه‌هشتێ، هنده‌ك كیخه بدانن وه‌كو (سه‌ده‌قه)، و هه‌كه كه‌سێ چو بۆ نه مه‌زاخت ژى ئه‌و ژى بچن و بێوژدانى گازندا بكه‌ن و بێژن (ده‌عم نینه).ده‌رباره‌ى وێ میكانزما من به‌حس ژێ كرى دێ پتر رۆلێ خۆ گێریت، هه‌كه زه‌نگینێن دهۆكێ خلاس بوون، دێ كارن په‌نایێ به‌نه ده‌رڤه‌ى دهۆكێ و سپۆنسه‌ریان رێكئێخن. چونكو جڤاكێ مه هێشتا یێ شه‌رمینه و تاكێن وى نه‌شێن ب بسته‌ى ڤه بچن ل به‌ر ده‌رگه‌هێن كۆمپانیان و ده‌وله‌مه‌ندان بچن و چیرۆكا خوه بۆ وان بڤه‌گوهێزن و تێبگه‌هینن كا سپۆنسه‌رى چ تشته؟!. هه‌ر وه‌كو كارێ پارێزه‌ران و هشكه‌سالیا ب سه‌ر دا دهێت، دڤێت د كارا بن و بچن بۆ خوه ل ئایشا بگه‌رن دا چاره‌سه‌ر بكه‌ن. مرۆڤ دكاریت بێژیت هه‌مى ئاریشه‌یێن مه یێن درایى ته‌ڤلى هه‌ڤ بووینه، هه‌مى ژى ل هیڤیا سپۆنسه‌ریا ماینه، خوه ئه‌ركێن پێشمه‌رگه‌ى ژى كه‌فتینه سه‌ر ملێن ڤان جۆره پشته‌ڤانیا، هه‌ر زه‌نگینه‌كى كۆمه‌ما هه‌ژاران ب دووڤ ڤه نه‌هه‌نه، هه‌ر دێ ئێكێ نیزیك هه‌بیت، كو به‌ریكا وى بۆ خوه بڤه‌كێشیت، چ برا بیت یان پسمام یان جیران، ئه‌م یێن كه‌فتینه سه‌ر به‌ختێ ئێكودو. ژیانا مه یا وه‌لێهاتى دڤێت هه‌مى كاروبارێن مه ب پاره‌ى بهێنه دابینكرن و به‌ریكێن هه‌میان ڤالا بووینه، ئاڤاهیێن مه پله ئێكن و سه‌روبه‌رێ مه یێ ئه‌فریقى یه، ئه‌ڤجا زه‌نگین چ بكه‌ت، هه‌ژاران تێر كه‌ت یان سپۆنسه‌ریا سترانا بكه‌ت؟!..
له‌شكر د ناڤبه‌را عه‌شیره‌تێ و حزبێ و گرۆپێ دا
له‌شكر سازیه‌كا مه‌زن و ب هێز و ب ناڤوده‌نگه، نهێنیا هێزا وێ ژى ده‌سپلینه (زه‌بتوره‌بت) هه‌كه نه بیت ناهێته كۆنترۆلكرن و دێ بیته به‌ره‌لاهیه‌كا گه‌له‌كا كرێت، ئه‌ڤ ده‌سپێلینه واته پێگیریكرن ب فه‌رمانا حه‌تا دهێته بده‌ستڤه ئینانا گه‌له‌كا ب زه‌حمه‌ته، ده‌وله‌ت تێكۆشان و مه‌زاختنێن زۆر پێ دده‌ت حه‌تا بده‌ستڤه دئینیت، ئه‌ڤ ره‌وشا نه یا به‌رهه‌ڤ بۆ په‌یداكرنا ده‌سپیلینا له‌شكرى ژى ل عیراقێ و هه‌رێمێ ژبه‌رده‌ست ده‌ركه‌فتیه هه‌ر ژ سالێن پشتى 2003، هینگى پیچه‌كا گیانێ پێگریكرنا له‌شكرى مابوو، به‌لێ ب بۆرینا ده‌مێ ئێكجار سازیا له‌شكرى بهۆژیا و نه‌ما، كه‌س ب كه‌سێ نه‌بوو، رێزگرتن بوو هه‌لم د ناڤبه‌را سه‌ربازا و ئه‌فسه‌ران دا، ئێشا گه‌نده‌لیێ ل هه‌ستى دا، له‌ورا و پشتى شه‌رێ داعشێ ب سه‌ر مه‌دا هاتى ئه‌م پێدڤى ب خوه بووین، نه‌چار بووین مه ل پێگیریا خۆبه‌خش گه‌ریا، ئه‌ڤه ژى ل كیڤه هه‌یه، د ناڤ عه‌شیره‌تان دا، هه‌یه، ئاغا فه‌رمان دكه‌ت و تاك سینگێ خۆ بۆ ئاگرى ڤه‌دكه‌ن و دكه‌نه مه‌تال، تشته‌كێ جانه بۆ ئه‌ركێ له‌شكرى، له‌ورا ئه‌و نهێنیا پێڤكڤه گرێدانا رێزێن له‌شكرى خۆ گرت. ژلایه‌كێ دى ڤه، حزبا مافى هه‌بوو كو كیانێ خوه ب هێز بیخیت، له‌ورا هێزێن هه‌رى ب هێز یێن حزبێن مه‌بوون، ئه‌وان ژى رۆله‌كێ ئێكجار ئینا، هه‌ر حزبه‌كێ هند مه‌زاختنا مه‌زن ل له‌شكرێ خوه كرینه، ئێدى نه‌چار نین، به‌رده‌نه د ناڤ سازیا حوكمه‌تێ دا، ئه‌و ژى دحه‌قن هه‌تا راده‌كى هند بۆ خوه مه‌زنكرین و گه‌شه كرین، كیانێ خوه لاواز بكه‌ت و ئه‌وا كری دئاڤێ دا به‌رده‌ت، دڤێت ماف بهێنه پاراستن حه‌تا كو ئه‌رك بهێنه‌دان، حزبا ب هه‌مى هێزا خودێ دایێ چوونه دچه‌په‌رێن به‌رگریكرنێ دا، چ ب ئه‌گه‌رێ پاراستنا خوه و به‌رژه‌وه‌ندیا سازی و پرۆژێن خوه، چ ب گه‌را خه‌مخۆرى و كه‌رامه‌ت و شه‌ره‌فا خوه، وه‌كو دبێژن (شله كه‌ته مله)، هه‌روه‌سا ژى ژ لایه‌كێ دى ڤه، وه‌ختێ شه‌ر دهێنه‌كرن، هه‌مى كاروبار شێلى دبن وچاڤدێرى ل سه‌ر سازیێن لۆجستى كێم دبیت، دبیت هنده‌ك جۆره گرۆپ په‌یدا ببن، كه‌یسا خوه ل ره‌وشا شێلى ببینن، جۆره‌كێ بێدادیێ په‌یدا ببیت ـ ئه‌ز چو كه‌سان ده‌ستنیشان ناكه‌م د ڤێ بڕگێ دا ـ هه‌ما نموونه‌یێن سروشتینه، ئه‌ڤه نه‌خۆشترین دیاره‌ده‌یه، به‌لێ قاره‌مانیا تاكێ كورد خوه دایه به‌ر سه‌رێ ڤان هه‌مى كێماسیان، لێ ل دووماهیێ دێ بێژین نهێنیا هه‌رى مه‌زن یا پێگیریكرنا پێشمه‌رگه‌ى بۆ هه‌مى فه‌رمانێن مرنێ ژ حه‌زژێكرن و كارێزماتیا سه‌رۆك بارزانى یه، له‌ورا هه‌مى هه‌لنگفتنێن بچووك دده‌نه ره‌خه‌كى و ته‌حه‌مولا هه‌مى نه‌خۆشیان دكه‌ن، خودێ كه‌ره‌ما ل گه‌ل ڤى مرۆڤى كرى كو ملله‌تێ وى ب كوراهى حه‌زژێ بكه‌ن، ئه‌و ژى نعمه‌ته‌كه هه‌م بۆ مله‌تێ و هه‌م بۆ وى بخوه ژى، چونكو ئه‌ڤه ئێكه ژ مه‌رجێن كیانبوونێ و سه‌ربه‌خوه‌یێ و ده‌له‌تبوونێ، من نه‌ڤێت ئه‌ز ژى وه‌كو پێشمه‌رگه‌ك و ته‌ڤلى ڤێ سه‌ربۆرێ بووى بڤه‌شێرم كو ناڤێ سه‌رۆك مه‌سعوود بارزانى ئه‌و په‌لا سۆره یا نه‌هلێت ئاگرێ كوردبوونێ و نه‌ته‌وه‌بوونێ بڤه‌مریێت، هیڤیێن ملله‌ته‌كینه، تاكێن كوردستانى ژ بچووكان بگره هه‌تا مه‌زنان ژ خوه ناگرن كه‌س سه‌رۆكاتیێ لێ بكه‌ت ژ بلى بارزانى، له‌ورا وه‌كو فه‌رمانده‌كێ له‌شكرى سه‌ركه‌فتن بده‌ستڤه‌ئینا و ناڤێ پێشمه‌رگه‌ى بوویه ماركه‌كا جیهانى سه‌ره‌راى جاران بێسه‌روبه‌رى هه‌بیت د رۆخسارى،لۆجستى، چه‌كدارى، شاشییێن مه‌كته‌بى، رێژه‌كا گه‌نده‌لیێ، سستبوون د ده‌سپلینێ دا، به‌لێ ئه‌وان زانایێن له‌شكرى راست گۆت ده‌مێ گۆتین، مه‌رجێ له‌شكرى ئه‌وه فه‌رماندێ گشتى یێ قاره‌مان بیت، ئه‌و ب تنێ دێ كاریت ڤى له‌شكرێ قاره‌مان بێخیته سه‌ر سكه‌یێ له‌شكرێن رێكوپێك یێن جیهانى و مه هیڤینه رۆژه‌كێ ببینه پشكه‌ك ژ رێخستۆیێن قۆلپ و هه‌ڤپه‌یمانێن له‌شكرى یێن مه‌زن و ب مافێن خوه هه‌میان شاد ببین و ماده‌م ملله‌تێ سووند خواریه كو (ئه‌م هه‌مى پێشمه‌رگه‌ینه)، دێ سه‌ركه‌فتن چاره‌نڤیسێ مه بیت.
هرچا رۆسى و ده‌وسا كوردى!
پشتى ئیرانێ هرچا خوه نڤاندى وه‌كو ب زارێ جادێ ل ده‌ف مه دبێژن، ئه‌گینه‌ده‌یا خوه د ره‌هورویشالێن خوه د عیراقێ دا برینه‌خار، ل گه‌ل حوكمه‌تا شیعى یا مالكى و عه‌بادى ل عیراقێ، ئه‌ڤرۆ ئیران یا بێده‌نگه به‌لێ وه‌كو دیار ب زمانحالێ خوه یێ عیراقێ وه‌كو من ئاماژه پێ دایى، ئه‌و په‌یوه‌ندیا ئابوورى رۆسى ـ كوردستانى د كۆربه‌ندێ سانپوترس دا هاتیه خورتكرن، كو هه‌ر وه‌كو توركیا نیگه‌رانیا خوه ل هه‌مبه‌ر ده‌رببریت.
هه‌مى په‌یوه‌ندیێن سیاسى و ئابووورى و جڤاكى بۆ كورد و كوردستانێ قه‌ده‌غه‌نه و حه‌رامن به‌لێ بۆ وان حه‌لالن، ل ده‌مه‌كێ هه‌رێما كوردستانێ ب گونه‌ها تێكه‌هه‌لیێن ئیسرائیلێ تاوانباردكرن یێن وه‌كو مالكى و عه‌ره‌بێن خوه ددان موسلمان!!، ب دیتنا من ئه‌ڤ تێكهه‌لیه باراپتر سیاسى یه ژ كو ئابوورى بیت، چونكو هه‌كه رۆسیا بخوازیت ده‌ستێ هه‌رێمه‌كا بچووك وه‌كو یا مه بگریت ب به‌راوردى ل گه‌ل وه‌لاتێ ـ كێشوه‌رێ دكارین بێژن ـ رۆسیا دبیت زۆرا ب ساناهى بیت، به‌لێ كۆربه‌نده‌كێ سیاسى یه پتر، ژ به‌ر ته‌ماكاریێن هه‌میان ل سه‌ر ڤێ پارچا ئه‌ردى، عیراق و شامێ!!، رۆسیا ب تێكه‌هلیا هه‌رێمێ دى دربه‌كێ نه‌راسته‌وخوه ل ده‌سپێكێ ل توركیا ده‌ت، به‌لێ ب دیتنا من تێكه‌هلیا مه ل گه‌ل توركیا دبیت ب مفاتر بیت ژ یا رۆسى، نه‌خاسمه هه‌مى وه‌كو ئێكن و كه‌سێ دلسۆز نینه د سیاسه‌تێ دا، هه‌كه نه نۆكه بۆتین به‌ره‌ڤانى نه‌دكر ژ به‌شار ئه‌سه‌دى و كیمیابارانكرنا ملله‌تێ وى یێ هه‌ژار! ژ به‌ر قه‌رێن وى ل سووریێ، ژ لایه‌كێ دى ڤه، رۆسیا دبیت هند تێكهسین ل گه‌ل ئیرانێ نه‌بیت، چونكو ئه‌وێ به‌هرا خوه بریه ژ كێكا عیراقى!، به‌لێ ده‌رباره‌ى لێدانا دربه‌كێ نه‌راسته‌وخوه ل ئه‌مریكا ل ڤێره مرۆڤ نه‌كاره وێ ئێكێ خۆیا بكه‌ت، به‌لێ ئه‌و ژى تشته‌كه دێ مینیته د ناڤ نانه‌كێ دا بۆ رۆژه‌كێ ژ رۆژان، ب كوردى دبێژن ب هێجه‌تا سلكێ خوه گه‌هانده كوتلكێ، رۆسیا دخوازیت پیگه‌ك هه‌بیت ب ره‌خ سووریێ ڤه، به‌لێ ئه‌م كورد نه‌خساره‌تین ژ ڤێ به‌لانسێ، دا مه ژى حزۆرا خوه هه‌بیت د ناڤ مه‌حافلێن مه‌زنێن نێڤده‌ولى دا و ناڤوده‌نگ و دانپێدان مه پێدڤینه، بلا ل بن سیبه‌را هرچێ بین بلا هرچ مه بخۆت، ئه‌ز دوور نابینم دیرۆك خوه دوباره بكه‌ت و مهابادا جاران نووكه‌ته‌ڤه، بۆ راده‌كێ دبیت پتر بیت ژ وێ ویلایه‌تێ چونكو رۆژه‌ڤ نه‌مایه وه‌كو و خوه و مامێ ترامپ ژى یێ ل سه‌ر خه‌تى، كو ژ ره‌خه‌كى ڤه یێ سه‌خبیریا هێزێن پێشمه‌رگه‌ى دكه‌ت.. و ئه‌و تلۆفك و ملۆفكێن ده‌وروبه‌رى هه‌رێمێ ژى هه‌ر یێن خوه د هه‌ڤلاڤێژن ب كه‌ربا وان رێ ناده‌تێ ئارام ببن، نه‌وێرن رۆسیا گومان بكه‌ن هه‌ر یێن تبلا خوه دكه‌نه ناڤ چاڤێن هه‌رێما ئاشتیخواز هه‌ر وه‌كو مژارا هرچێ و ده‌وسێ كو یێن دبێژینێ ئه‌ڤه رۆسیا یێن دبێژن نه ئه‌ڤه كوردستانه!!.
كوردستانا مه‌زن و مالكى یێ بچووك
هه‌ر وه‌كو زمانحالێ ئیرانا شیعى ده‌م هاتیه كو زڕنایێ بۆ بقوتیت و قووناغه‌كا نوو ژ ئاسۆیه‌كێ ڤه‌شارتى هاته پێش، مالكیێ ب چو سیفه‌ت هاته سه‌ر خه‌ت و گه‌فێن بێ بنه‌ما دكه‌ته‌ڤه؟!، یێ دبێژیت بۆ كوردان نینه بیر ل ئازادیێ و سه‌ربه‌خوه‌یێ بكه‌نه‌ڤه، دڤێت ب ئاگر و ئاسنى بهێنه سه‌ركوتكرن و .. ب راستى ئه‌ز دلناده‌م هند خوه ماندى بكه‌م كا چ گۆتیه یان ژ نه‌گۆتیه، به‌لێ یارى یا دیاره و هه‌مى تشت د كفشن، نه‌یا دووره پێ خوه بهاڤێته مه‌یدانێ و تشته‌كى بێژیت، تنێ ئه‌م دێ هنده‌ك پیلێن دۆمینێ ئێخینه به‌رئێك، دێ راستیا یاریكه‌رێ نه‌زان دیار بیت، كا ئه‌و پوولێن د ده‌ست وى دا چنه!!، ئیران ـ حه‌شدا (شه‌عبی ـ شیعى) ـ ئیسرائیل ـ كۆژیه‌كه لێنانا وێ یا ئاشكرایه، نه‌خاسمه پشتى حه‌جى ترامپ هاتیه ده‌ڤه‌رێ، ئیران مالكى و عه‌بادى وه‌كو قۆریه‌كێ دو چملبك لێكرینه، هه‌ر ئێكى ب جۆره‌كى پالدده‌ت بۆ ئه‌جینه‌ده‌یێن خوه یێن ته‌ماكار ل سه‌ر كاڤله وه‌لاتێ عیراقێ، ژمێژ وه‌ره ئیران سترانا (مه‌رگبه‌ر ئیسرائیل) لێدده‌ت، له‌ورا مالكى یێ هه‌رێما كوردستانێ تاوانبار دكه‌ت ب په‌یوه‌ندیێن ل گه‌ل ئیسرائیێ، به‌لێ ژبیرا خوه دبه‌ت كو سه‌رۆكێن موسلمان و عه‌ره‌با هه‌تا به‌رى سێ رۆژان چاوا چوون د گه‌رده‌نا ئیڤانكایێ وه‌ربوون وه‌كو مێشان!!، ژ ره‌خه‌كێ دى ژى ڤه، میلیشیێن تیرۆرست یێن حه‌شدا شه‌عبی یا بێ دیرۆك و ره‌سه‌ناتى سه‌نگه‌ران دكۆلن ل به‌رامبه‌ر پێشمه‌رگێ خوه‌دان دیرۆك و خه‌بات و قوربانى، ئه‌ز ژى وه‌كو پێشمه‌رگه ده‌نگێ خوه ل گه‌ل یێ سه‌رۆك بارزانى بلند دكه‌م و دبێژمێ: هه‌كه دمه‌ردن وه‌رنه مه‌یدانێ و به ختێ تاقی بكه‌ن!!، بلا هنده‌ك كوردێن له‌نگ و جاشێن د ناڤ په‌كه‌كێ دا ژى ل گه‌ل وه‌بن ـ ب مخابنی ڤه ـ. دیسا ده‌نگێ خوه ل گه‌ل یێ بارزانى بلند دكه‌ین و دبێژینه مالكى: كوردستان یا مه‌زنه و تو زۆر بچووكترى ژ وێ چه‌ندێ كو ئیراده‌یا ملله‌ته‌كێ ره‌سه‌ن بهژینى!!، ده‌نگێ مالكى ب قراله‌كى ژى نائینیت، ب چو سیفه‌تا فه‌رمى ئه‌و دهۆلێ دقوتیت؟، ب راستى وه‌سفه‌كا دروست من بۆ دیت و من ل سه‌ر لاپه‌رێ خوه یێ فه‌یسبۆكى ژى من به‌لاڤه‌كر، كو مالكى یێ بوویه وه‌كو كاره‌با موولیدێ هه‌ر گاڤ سێركتێ وى دهێته خار و ئیران بۆ ب دارى بلند دكه‌ت. ئه‌ڤجا ئه‌و پێشمه‌رگێ هێز و مه‌زنیا خوه زانى و پتر هایدارى پشتراستیا وێ بوویى ئه‌ڤه ژ هێرشا تیرۆرستیا داعشێ وه‌ره، ئێدى بۆ ئاسنگ و ئاگرى ژى ده‌ستێ وى یێ ل سه‌ر برینێ و دزانیت كه‌نگى و چاوا و ب چ قه‌ده‌ر بزۆتێ خوه بداوه‌شینیت و كه‌سێ ل به‌رامبه‌ر سینگێ خوه نابینیت!!، ژ نیكا بووكا بارانا ئیرانێ، دێ دو فلسێن حرام ریكلاما خوه كه‌ت، چو ل سلێمانیێ بیت یان ل ده‌وروبه‌ری شنگالا بریندار ب رێیا هنده‌ك كرێدارێن خوه، ده‌ستێ خوه درێژكه‌ته پێشمه‌رگه‌ى، ئه‌و پێشمه‌رگێ عه‌شقا شه‌هیدبوونێ و غیره‌تێ سه‌رێ وى گرتى.. كى دێ هه‌ژینیت؟! هه‌تا دوهى ته نانێ كوردان دخوار و ب خێر و قه‌نجیا وى پێشمه‌رگه‌ى نه‌با تو نه دوێریایی بچیه به‌رێڤه‌ى هه‌ولێر و دهۆكێ، پێشمه‌رگه‌ى (معزز مكرم) پاراستنا ته دكر وه‌كو په‌نابه‌ره‌ك و مێهڤانه‌ك و هه‌ڤپشكێ خه‌باتا دژى ئێك دوژمن، ئه‌ڤرۆ تو دچى و ده‌ستێ خوه درێژ دكه‌یه وه‌لاتێ ئه‌نفالكرى، وه‌لاتێ حه‌لبجه‌یا شه‌هید و بارزانا قوربانیان یا بریندار، جهێ ب خودانكرنا شێران، ب راستى ته سه‌لماند كو تو یێ بچووكى و كوردستان هه‌را مه‌زنه.
وه‌لاتیبوونا ب گومان
سه‌ره‌راى زێده‌بوونا هه‌مى به‌لگه‌نامه‌یێن قانوونى و فه‌رمیكرنا مه وه‌كو وه‌لاتیێن كوردستانى و هه‌ر وه‌سا عیراقی، به‌لێ ئه‌م گومان یا پڕى هه‌ستیێ مه بووى، یا ژ مه ڤه ئه‌م هێشتا ئاواره‌ینه ل وه‌لاتێ خوه، مه ئه‌م باوه‌ریا موكم نینه ب خوه كو ئه‌م ل ڤى وه‌لاتى د سه‌ر راستین، ما ته دیتیه ئێك ل سه‌ر ئه‌ردێ خوه بیت و ئه‌و هه‌ستا ژیبوونێ نه‌بیت؟! هه‌مى ژى ژ سیاسه‌تا حوكمه‌تێن هاتینه عیراقێ و ده‌سهه‌لات لێ كرین، وه‌كو مامۆستایه‌كێ زانكۆیێ گۆتى، پێشمه‌رگه ئه‌ڤه نێزیكى چار سالانه گیانێ خوه گورى ڤى ئه‌ردى دكه‌ت و به‌رگیریێ ژ سه‌روه‌ریا عیراقێ دكه‌ت ل دووڤ بڕگه‌یێن دستوورى، به‌لێ بۆچى مووچێ وى ناهێـته دان ژ لایێ حوكمه‌تا عیراقێ ڤه و بۆچى دێ یێ سێ سالان ل سه‌ر ئێك ده‌نه كارمه‌ندێن مووسل كو بۆ داعشا تیرۆرستى خزمه‌ت دكرن؟!هه‌ر چه‌نده ئه‌ڤه نه‌ك ئه‌و مژارا گۆتارا منه، به‌لێ پێلا سه‌حبه‌تێ ئه‌م برینێ. به‌لێ مژارا ژ پۆسته‌كێ مه یێ سرنجراكێش هات سه‌ره‌راى هه‌بوونا ڤان به‌لگه‌نامه‌یان: ره‌گه‌زناما بارێ كه‌سایه‌تى، ره‌گه‌زناما عیراقى، پلێتا ته‌مۆینى یا ئازۆقه‌ى، پلێتا پێزانینان، ناسنماما نشتیمانى، په‌سه‌ندا موختارى، په‌سه‌ندا حزبى، په‌سه‌ندا سالێن خزمه‌تێ ژ ده‌ف فلانى (ئه‌و ژى هه‌ما ئیمزایا وى یه و ل سه‌ر كاغه‌زه‌كا پاكیتا جگاران ژى دمه‌شینن!!)، كونیا حزبی، راستككرنا ده‌رچوونا ناسنامێ ل جهێ ژدایكبوونێ، بایۆمه‌ترا ده‌نگدانێ یا كه‌ڤن، بایۆمه‌ترا ده‌نگدانێ یا نوو، هه‌كه به‌رزه‌كربیت، بچیته كومسیۆنێ و پاشى بچیته دادگه‌هێ و بیست و بینج هزار دیناران بده‌ت ژ بلى مه‌زاختنێ و هاتنوچوونێ، هه‌روه‌سا بایۆمه‌تركرنا ناسنامێ بۆ مووچه‌ى ل به‌نكێ، ناسناما فسفۆرى دڤێت هه‌بیت، ناسناما ئۆفیسا تو كار لێ دكه‌ى، پاسپۆرتا فسفۆری، ڤیزه و میزه، ناسناما ژۆرا بازرگانى، ئاكنجیبوون هه‌كه تو ئاواره بى، هه‌كه ته به‌رزه‌كربیت ژى دڤێت ل رۆژناما فه‌رمه بلاڤ بكه‌ى، مۆله‌تا هاژۆتنێ، سه‌نه‌وى، وه‌كاله‌ت، سه‌نه‌ویا ژمارێن عیراقێ، كاتا ئیحسائێ، عه‌به‌ره‌ساتر، ، ژ بلى ڤان هه‌مى تشتان هه‌كه ته واسته هه‌بیت، چاڤێ سه‌رى یه، ترانزێته هه‌كه ته ئه‌ڤه هه‌مى نه‌بن ژى، ل ده‌مێ زالگه‌هان و ده‌رگه‌هێن ئۆفیسا هه‌كه ناڤچاڤێن ته د ته‌حل بن، باوه‌ر ژ ڤان هه‌مى به‌لگه‌نامه‌یێن ته ناكه‌ن!، ئه‌رێ باوه‌ر ژ به‌ریكا ته دكه‌ن و كا ته چ هه‌یه د به‌ریكا خوه دا، تو هندى .. وه‌كو مسرى دبێژن”عندك ئرش تسوه ئرش”، ل دووماهیێ ژى هه‌كه من ئێك ژبیر كربیت ژى ب خێرا خوه بۆ من كۆمێنت بكه‌ن ل سه‌ر لاپه‌رێ من یێ فه‌یسبۆكا من یا بایۆمه‌ترى و ئه‌ز ب خێر و هنگ ژى ب سلامه‌ت و ئه‌م هه‌مى ژى ب گومان.!!
له‌شكرێ مێریان
له‌شكرێ مێریا ژى له‌شكركێ خوه‌به‌خشه و نموونه‌یا دلسۆزیێ و دادوه‌ری و یه‌كسانیێ یه، جهێ حێبه‌تیا مه‌مرۆڤانه ل هه‌مى سه‌رده‌م و زه‌مانان، زانا دبێژن ستراتیجیێن له‌شكرێ مێریان گه‌له‌ك ژ یێ مرۆڤان باشتره. زانستى دیاركریه كو مێرى تووشى شه‌رێ به‌رگریا كیماوى بووینه، باوه‌ربكه‌ن یان نه، به‌رێ ئه‌و مێریێن ره‌ش كه‌ره‌سته‌كێ كیمیاوى وه‌كو كه‌فێ هه‌یه، ژ سه‌رێ وێ دهێته ده‌ر و به‌رگریێ دكه‌ت ل وى ده‌مێ كیماوى لێ دهێته ره‌شاندن، به‌لێ مرۆڤان ژنووبه‌رى سه‌د سالان ئه‌ڤ كه‌ره‌سته دروست كریه و بكارئینایه، بۆ دلسۆزیێ ژى د لۆته‌كیا خوه دایه، مه گه‌له‌ك جاران دیتیه كو ئه‌و خوه دكه‌نه قوربان و خوه دكه‌نه پره‌ك دا هه‌ڤالێن وان ل سه‌ر پشتا وان را ده‌رباز ببن، ئه‌ڤجا چو شه‌رم و چو نیگه‌رانێ پێ نه‌ڤێن هه‌كه ئه‌م بۆ خوه مفای ژ ڤى سیسته‌مى ببینین، كاروبارێن مێریان وه‌كو گوله‌كێ برێڤه‌دچیت، چونكو مێرى دزانن كو د له‌شكرى دا دادوه‌ری و وه‌كهه‌ڤى نه‌وه‌كو ژیانا ئاشتیانه‌یه، دڤێن ل سه‌ر بنیاتێ ئێك بوونێ و یه‌كسانیێ بیت. چما ئه‌م بۆ خوه سیسته‌مێ وان ناكه‌ینه سه‌ربۆر و بۆ خوه مفای ژ سه‌روبه‌رێ وان وه‌ربگرین، مانێ هه‌مى تشت، زانسته و سه‌ربۆره. ره‌وشا له‌شكرێ مه ژى ژبلى ل سه‌ر ئاستێ عیراقا فیدال دیاربكه‌ین، چونكو ب ئێكجار ل ئاستێ سفڕێ یه، به‌لێ بۆ نموونه له‌شكرێ مه، كو ل ده‌مه‌كى كو ناڤێ پێشمه‌رگه‌ى د چه‌رخێ زیرێنێ پیرۆزیا خوه دایه، پشتى ئه‌فسانه‌یا مه‌زنا داعشێ شكاندى، ملله‌ت ژ ڤى كابووسێ شه‌رڤ و رۆژێن خه‌لكیى لێ كرینه دۆزه‌خ كو شه‌ره‌ف و مال و مولكێ خه‌لكى كه‌فتیه د ته‌قه‌له‌قێ دا، چاره‌نڤیسێ ڤى رووبه‌رێ مه‌زنێ عه‌ردى، ڤان سازیێن مه‌زن ب وه‌رزاره‌تان و دادگه‌ه و په‌روه‌رده و ساخله‌می، مرۆڤێن مه‌زن زارۆ، بچووك و پیر هه‌مى ملله‌ت، ل سه‌ر به‌ختێ تاكه‌كێ پێشمه‌رگه‌ى بوون، هند شه‌هیدبوون و بریندار و په‌ككه‌فتى، بوون، ئه‌ردێ خوه راده‌ست نه‌كر هه‌تا دووماهى هه‌ناسه، نه‌مازه هنده‌ك جرفێن كۆژه‌ك ب مه‌كه‌فتین، یا گرنگ د بابه‌تى دا ئه‌وه كو خه‌لكى و حوكمه‌تێ بهایێ ڤێ سازیا گرنگ و هه‌ستیار زانى، د ڤان دۆخێن وه‌كى ئه‌ڤى دا، هه‌مى وه‌لاتێن جیهانێ ره‌وشا له‌شكرێ خوه ب باشترین ره‌وش به‌رهه‌ڤدكه‌ن، دهێلنه د ناڤ مووچه و پیشته‌ڤانیان را، چونكو چه‌ندى پشته‌ڤانیێ لێ بكه‌ن، هه‌ر كێمه وناهێته به‌راورد كرن ل گه‌ل په‌خشینا گیانێ وى، راسته قه‌یرانه، راسته ژێرخانا مه یا له‌شكرى و لۆجستى یا بێسه‌روبه‌ره، خه‌مسارى ژى هه‌ر بۆ مه دزڤیت كو مه ژ بنیات بۆ نه‌دانان، به‌لێ یا مه دڤێت دیار بكه‌م، ئه‌ڤ جوداهیا مه‌زن و زیق یا د ناڤ رێزێن پێشمه‌رگه‌ى دا هه‌یى، بۆچى ناهێته راستڤه‌كرن؟ بۆچى مووچه‌یێ سه‌ربازه‌كێ هێزا زێره‌ڤانیێ پتره ژ یێ ئه‌فسه‌ره‌كێ پله‌یا بلند د ناڤ پێشمه‌رگێ وه‌زاره‌تێ ڤه، گونه‌هه‌كا مه‌زنه، هۆسا بمینیت، ئه‌رك و مه‌ترسی و هه‌مى تشت ئێك بن، به‌لێ مووچه‌یێ وان نه وه‌كو ئێكه؟!. بۆ پێشمه‌رگێن زێره‌ڤانیێ ده‌رماله‌یێن جۆره و جۆر هه‌نه، كه‌لوپه‌لێن باش، لۆجستیه‌كا باش پرچه‌ككرن، ته‌قه‌مه‌نى، سۆتنه‌مه‌نى، گرنگیدان، ناڤوده‌نگى، هه‌مى پشته‌ڤانیكرن، ترومبێل، كاروبارێن خێزانى، ئینان و بن، دادوه‌رى، دامه‌زراندن، قه‌درو قیمه‌ت، هه‌روه‌كو پێشمه‌رگێن یه‌كه‌یێن 70 و 80 و یێن وه‌زاره‌تێ و لیوایێن هه‌ڤپشك د پشتگوه هاڤێتینه، كه‌سێ های ژێ نینه یانكو خوه وه‌كو وه‌لاتیێن پله دو دبینن، یانژى د زێده ل سه‌ر دلێ هه‌رێمێ، هه‌ر وه‌كو هه‌ر له‌شكره‌ك یێ وه‌لاته‌كێ دیه و د ژێكجودانه، ئه‌م دزانین بۆدجه نینن، یانژى پشته‌ڤانى نینه، به‌لێ هه‌كه ئه‌م پسیارا خوه بكه‌ین، یان پسیارا خوه پێشمه‌رگێن سه‌ر ب زێره‌ڤانیێ بخوه ڤه ژى بكه‌ین، ئه‌رێ دروسته ئه‌ڤ نه دادوه‌ریه هه‌یه، بێگومان دێ خوه بێده‌نگ كه‌ن، و دێ یا دروست بێژن، به‌لێ مرۆڤ بۆ كێ بێژیت و كیژ لایه‌ن، ژێ به‌رپرسه، دبیت، به‌رسڤ (نزا) بیت، هه‌ر ئێك خوه‌ژ به‌ر دهاڤێت و كه‌س نزانیت كى به‌رپرسه، ئه‌ڤه نێزیكى پازده سالانه و پتر دبێژن، دێ چێبیت و دێ چێبیت، به‌لێ رۆژ بۆ رۆژێ خرابتره، كه‌سێ هار ژ كه‌سێ نینه.
توركیا بلا ده‌رچوویان وه‌ربگریت!
مژار ئابووره، قه‌یرانه، زانكۆیه، بێكارى یه، ئاریشه یا ب سه‌ر مه هه‌میان داهاتى و به‌ڤل و دوژمن و خیندار ل دۆر و به‌ر و د ناڤخوه دا زۆرن، وه‌كو ئه‌ركه‌كێ نشتیمانى و نه‌ته‌وى و مرۆڤاتى ئه‌م هه‌مى ملێ خوه بده‌ینه به‌ر و ل باشترین چاره‌سه‌رى بكه‌ریێن، بۆ مژارا ده‌رچوونا قوتابێن زانكۆیان و نه‌بوونا ده‌لێڤه‌یێن دامه‌زراندنێ ژ به‌ر نه‌بوونا بۆدجێ و ده‌لیڤه‌یێن كارى، زێده‌بارى گه‌له‌ك ئه‌گه‌رێن دیتر، یا ژ هه‌میان مه‌زنتر ئه‌ڤ ژیواره‌یه كو ئه‌ردێ مه راسته رووبه‌ره‌كێ مه‌زنه به‌لێ جهێن جهنشینیێ نه وه‌كو ده‌وله‌ته‌كا فه‌رمى یه ب هه‌مى لایه‌نان ڤه، مرۆڤ زۆرن و سازیێن حوكمه‌تێ كێمن و دارمه‌زرێنه‌ێن نه كاركه‌ر ژى د به‌ربه‌لاڤن. دزانم ژى كو حوكمه‌تێ چاره‌سه‌ریێن خوه یێن پرۆفشنال هه‌نه، به‌لى حه‌تا ئه‌ڤ چاره‌سه‌ریێن ئه‌تۆمى جهێ خوه دگرن، ئه‌وان ژى بۆدجه‌یێن خوه یێن مه‌زن دڤێن زێده‌بارى ده‌مى حه‌تا دكه‌ڤیته سه‌ر سكه‌ى و دبیته وه‌به‌رهێنان، به‌لێ ئه‌ڤ پێشنیازا من دبیت وێ رێكێ كورت بكه‌ت و ی ده‌مكى بیت هه‌تا پیچه‌كێ به‌ریكا حوكمه‌تێ گه‌رم ببیت. پێشنیازا من دبێژیت هه‌كه پرۆتۆكۆله‌ك بهێته گرێدان ل گه‌ل وه‌لاته‌كێ دی، بۆ نموونه توركیا، ئه‌لمانیا، ئه‌مریكا ..هتد. بۆ وه‌رگرتنا قوتابیێن ده‌رچوویى و مفاوه‌رگرتن ژ زانین و بسپۆریا وان ب ره‌نگه‌كێ رێژه‌یى، نابێژم وه‌كو دیارده‌یا ل سالێن هه‌شتییان یا مسرێ هاتیه كرن، بۆ كاركرنێ ب گشتى ڤه، به‌لێ ب تنێ بۆ ده‌رچوویان ب ره‌نگه‌كێ رێزگرتى و مه‌عه‌زه‌ز، هه‌كه توركیا بیت دێ باشتر بیت، ژ به‌ر گه‌له‌ك ئه‌گه‌ران، لێكتێگه‌هشتن، نێزیكیا رێیا و هاتنوچووان، هه‌ر وه‌سا توریكا وه‌كو تایبه‌تمه‌ندیه‌ك ئه‌ورۆپى هه‌ی ئه‌ز باوه‌رم دێ قه‌ردێ ده‌رچوویان گریت. وه‌كو دى ب هزاران ل توركیا كارمه‌ند هاتینه لادان و ده‌رخستن ژ كارێن وان ژ به‌ر كۆده‌تایا سه‌ربازى، توركیا د پلانا خوه یا ئابوورى دا حه‌زدكه‌ت بیانیان بدامه‌زرینبیت و مفایى ژ ده‌ستێن وان ببینیت، یا گازى دكه‌ت عه‌ره‌بان دده‌ته كارى، ئه‌ورۆپیان، كوردان و .. هتد. ئه‌ز یان پیدڤى یه، من باوره هه‌كه ئه‌ڤ ببیته پرۆپۆزه‌ل و یاداشتنامه دێ ئاردۆگان ب گه‌رمى پێشوازیێ لێكه‌ت هه‌ر وه‌سا ژ به‌ر ریكلاما خوه ژى و ئابوورى وان پێدڤى ب مرۆڤایه، وه‌كو دێ ئه‌و دێ به‌رێ مه ده‌ته كه‌رتێ تایبه‌ت، هه‌ر وه‌سا ده‌رچوویێن مه ژى دێ سه‌بۆره‌كا كارى و تایبه‌تمه‌ندیێ بینیت. قه‌باره‌كێ زۆرێ دراڤى دێ ژ توركیا هێته هه‌رێما كوردستانێ و ئه‌ڤ دراڤه دیسا دێ زڤریته ڤه بۆ توركیا ژ به‌ر هاوه‌رده‌كرنێ و كڕینا گه‌لوپلان، دێ ئه‌و دراڤ بیته دینامۆ، ساله‌كه دونه سێ نه، قه‌یرانا مه دێ بیته هه‌لم د ناڤبه‌را مه و توركی دا. ژ لایه‌نێ سیاسى ڤه ژى بۆ هه‌رێمێ بیته بیكه‌هه‌ك بۆ كیانبوونه‌كا سه‌ربه‌خوه‌یى، هه‌ر وه‌سا ره‌نگڤه‌دانه‌كه بۆ حوكمه‌تا ناڤه‌ندى كو ل خوه بزڤریت و شه‌رم ژ سیاسه‌تا خوه بكه‌ت، ل گه‌ل ئیرانێ و مایتێكرنا وێ، یا مه ژى گه‌هاندنا هزێ یه و راڤه‌كرنا وێ دێ بیته پلانا حوكمه‌تێ و وه‌زاره‌تێن وێ. هوون ژى گه‌لاله بكه‌ن و گه‌نگه‌شه بكه‌ن، ما چ هه‌وه‌یه؟!
25 سالێن زێرین و یۆبیلا زیڤى
ب ناڤێ خه‌بات ده‌ستپێكر و بوو خواندنگه‌هه‌كا میدیایى، ب ژارى و ژیرى كارێ خوه دكر، چه‌قێ ژ به‌قێ دكر، ده‌ریا ب ده‌رزیكێ دكۆلا، جوامێران ب پاكیا دلێ تاكێن شۆره‌شێ تلفزیۆنا مه یا دهۆكێ كارێ رێبازا خوه به‌رده‌وام كر، ژ هه‌ژی بوون كو د ڤێ ستوونا ره‌خنه‌یى دا، رۆناهیێ بێخمه سه‌ر گۆتنا راست، نه‌ك مه‌دحه و پێگۆتن، به‌لێ ره‌خنه بۆ مه‌یه هه‌كه ڤێ جارێ ژى نه‌بێژین: یه‌لا خێر..
مه دیت ده‌رگه‌هێن تلفزیۆنا دهۆك (خه‌باتا جاران) ڤان رۆژان د ڤه‌كری بوون، ببوو كونزڤریكا پتریا میدیاكارێن رێزدار و كه‌ساتیێن مه‌زن قه‌ستا ڤى ده‌رگه‌ى كرن، كو ب رێیا وێ وه‌كو دایكه‌كا دلۆڤان ئه‌و هه‌مى ده‌رخستن ب پله و پۆسته و زانین كرنه مال كو ب كێر خوه هاتن، پتریا وان بوونه خوه‌دى پله‌یین به‌رز د ناڤ سازیێن هه‌رێمێ دا، ستافێ ئه‌ڤرۆ یێ تلفزیۆنا دهۆك یا خه‌باتێ ده‌ركه‌فتن ب نان و خوێ، كو به‌رێ هه‌میان جاره‌كا دا وى سینگێ ب ره‌حم و ژ هه‌ژى خه‌لاتكرنێ دیتن، دبیت ژى گه‌له‌ك هاتبنه ژبیركرن و تۆره ببن، چونكو گه‌له‌كن، به‌لێ ژبیر نه‌كه‌ین مه‌زنترین كه‌س ـ رێڤه‌به‌ر ـ ل ڤێ تلفزیۆنێ مته‌وازعترین كه‌سه د ناڤ وان دا.
تلفزیۆنا دهۆك ب حوكمێ وێ ئێكێ كو مه‌دیا بینراو بوو، پتر چوو د ناڤ دل و مالێن خه‌لكى دا، شیا ناڤێ خوه مه‌زنتر لێبكه‌ت ژ ناڤێ ده‌زگه‌هى ب خوه، چونكو خه‌لكێ مه یێ بێبه‌هر بوو ژ تلفزیۆنه‌كا كوردى یا ب تام پارتى، شیا برینێن خه‌لكى ب نه‌رمى بكه‌وینیت و مه هه‌میان (كۆمانده‌كاته‌وه) ـ وه‌كو ریكلاما ئاسیاسێل دبێژیت! ـ. هه‌تا نۆكه خه‌لكه‌كێ شۆره‌شگێر و یێن ته‌خا ره‌وشه‌نبیر و رۆژنامه‌ڤان بۆ خوه ب ده‌رگه‌هى ب مالا مه‌زن دزانن، تلفزیۆنا (خه‌بات) مل ب ملێ رۆژناما ئه‌ڤرۆ شیان شوونتبلێن ره‌وشه‌نبیریا شۆرشا كوردى بهێلنه د ناڤ خه‌لكێ دا و ده‌سپێكه‌كا مه‌زن و موكم بۆ زمان و دابونه‌ریتێن ڤى باژارى بدانن. من ب خوه وه‌كو كارمه‌ند ل گه‌ل وان كارنه‌كریه، به‌لێ ب هه‌ڤالین و هه‌ڤكارى و هه‌ماهه‌نگى، دبینم وه‌كو سنگه‌كێ نه‌رم و گه‌رم دلۆڤانى من ژێ ڤه‌خواریه، من خوه بیانى نه‌دیتیه، رووێن پشكڤین یێن كارمه‌ندان ب زارۆ و كارمه‌ند و رێڤه‌به‌ر و بێژه‌ر ڤه، جۆره‌كێ بسته‌یێ هه‌یه، د بیست و پێنج سالان دا، گه‌له‌ك ئه‌تاكێت و سه‌ربۆر و پێكه‌نین بۆ چێبووینه، بیرهاتن ل گه‌ل وان كه‌سێن وه‌غه‌ركرین و گیانێ وان مایه ل هنداڤى بورجێ وه‌شاندنا به‌خشێ تلفزیۆنێ، ماینه د ناڤ دلێ دیرۆكا وێ دا، ب خێر و خۆشى ب پیتێن زێرین ناڤێن وان تۆمار بووینه، كوڕێن باژیرێ مه‌نه هێمایێن مه‌دیایێ و ستێرێن برسقى یێن زێرین د یۆبیلا زیڤى دا. ئه‌ز ل گه‌ل نڤیسینا ڤان په‌یڤان دترسم رێڤه‌به‌ر و كارمه‌ندێن وێ هه‌ڤكارێن من بخوینن، بێنه تانا من و بێژنه من تو نه‌هه‌ڤالێ مه‌یى، به‌لكو مالا ته‌یه و ئه‌م د بیانینه، چونكو ره‌وشتێ وان ئه‌و زێره یێ ژه‌نگى نه‌بیت، من ژ نێزیك ناسینه، به‌رهه‌مێ پێشمه‌رگاتیێ و شۆره‌شا كوردى نه. ئه‌و ده‌سپێكه‌ك بوو ژبۆ بجههاتنا خه‌ونا مه یا بچووكاتیێ، كو ئه‌م وێنه‌یێن بارزانیێ نه‌مر ببینین، سه‌روبه‌ر و جلوبه‌رگێن پێشمه‌رگه‌ى و دابونه‌ریتێن كورده‌وارى، سروودێن شڤان په‌روه‌ر یێن قه‌ده‌غه و حه‌سه‌ن شه‌ریف و گه‌له‌كێن دیتر، جارا ئێكێ بوو تلفزیۆنه‌كا كوردى یا خومالى كو چو ده‌ستێن بیانى و زلهێزان د ناڤدا نه‌بن، چو سمبێل بۆقێن عه‌ره‌ب فه‌رمانا نه‌ده‌ن، ژ به‌ر ڤان ئه‌گه‌ران مه ژ نیڤا دلى حه‌ز ژ تلفزیۆنا خه‌بات كر، سه‌ره‌راى هندێ كو ناڤێ وێ نها نه‌ك مایه خه‌بات!!، به‌لێ ئه‌م دهۆكى ئێكودو دنیاسین و هه‌كه مه ناڤه‌ك ب ده‌ڤێ خوه گرت، هه‌ر دێ ئه‌و ناڤ مینیت وه‌كو خوه. له‌ورا دبێژمه خوه و پاشى تلفزیۆنێ پیرۆزه ژ نیڤا دلى یۆبیلا زیڤى ب خه‌باتا زێرى.. دهۆكا خه‌باتێ!!. و ئه‌م هه‌مى خه‌باتین..
پێشمه‌رگێن رێكوپران
ئه‌و كه‌سێن گیانێ خوه كرینه پره‌ك كو پێشمه‌رگه ل سه‌ر ده‌رباز ببن و ئه‌و ژى بچن گیانێ خوه بكه‌نه مه‌تال بۆ قورتالكرنا ملله‌تێ خوه، ئه‌ون یێن دێ به‌حس ژێ كه‌م. بلا چپكه‌ك بیت ژ ده‌ریا رۆژانێن ئه‌فسه‌ره‌كێ كورد د ناڤ رێزێن پێشمه‌رگه‌ى دا خزمه‌ت كری، چه‌نده‌كێ ژ راستیا شه‌ڕێ مه یێ خۆراگریێ ل به‌رامبه‌ر چه‌كدارێن داعشا خویناوى د ڤان چه‌ند رێزه‌كێن كێم دا پێشچاڤ بكه‌م، بۆ ئه‌مانه‌تا وژدانى كا كێ كر و كێ نه‌كر و كێ زه‌حمه‌ت دیت و كێ قوربانى دان، كى بوو خوه‌كریه هه‌ڤسه‌نگه‌ر و هه‌ڤكارێ مرنێ؟!، ب راستى ئه‌ڤ شه‌ڕێ ب سه‌ر مه‌دا چوویى، ب هه‌مى رامانێ په‌یڤێ ناهێته سالۆخه‌كرن، كا سه‌ختیا وى و نه‌خۆشیا وى چه‌ندا تیژ و دوار بوو، هێشتا ژى یا به‌رده‌وامه، بۆراندنا شه‌ڤه‌كێ ب سه‌ر مه را چوویى، بۆراندنا ساله‌كێ بوو ژ ته‌حلاتیا ژیانێ، كو بگه‌هیته وى ئاستى تو سعه‌تا و رۆژان بهه‌ژمێرى كو ئه‌ڤرۆ ژى ب ئانه‌هیا خودێ تو مایه ساخ ل هه‌مبه‌ر دوژمنێن مرۆڤاتیێ و بێ باوه‌ریێ، ب وان شیانێن كێم ڤه و بێ حالیێ و سه‌روبه‌ریێ، كه‌سه‌ك دوژمنێ گیانێ خوه بیت و د خه‌ما رحا خوه نه‌بیت، دێ ب چ شێوه سه‌رده‌ریێ ل گه‌ل ته كه‌ت ب وى سروشتێ هه‌ی و شه‌رێ ژ نشكانڤه، درێژ ناكه‌م ب تنێ دخوازم قه‌رێ سازیه‌كا خزمه‌تگوزارى دیار بكه‌م بۆ خودێ و بۆ وژدانێ دیار بكه‌ین، باژێرڤانى و رێكوپر و ئه‌و ئۆفیسێن وه‌سا كو هاریكاریا پێشمه‌رگه‌ى كرین، هه‌لبه‌ت ژ بلى كه‌رتێن دیتر، دا دیرۆك نه‌عله‌تا نه‌بارینیت ل وى كه‌سى یێ راستیان دمرینیت، نه‌خاسمه گه‌له‌ك سازیێن جڤاكى ژ بلى هه‌مى ته‌خوچینێن ملله‌تى ب دلسۆزیه‌كا بێوه‌ینه رۆلێ چاك گێران و ب ئه‌ركێ نه‌ته‌وى و نشتیمانى رابووین، ده‌مێ گۆتین (ئه‌م هه‌مى پێشمه‌رگه‌ینه)، هه‌ر ئێك ب رێكه‌كێ، به‌لێ فلمێ ترسێ و موغامه‌ركرنێ د گه‌له‌ك هێرشێن پێشمه‌رگه‌ى دا، رۆلێ ئامیره‌یێن كۆلانێ و ڤه‌كرنا رێكان بوو د پێشڤه‌چوونێن مه دا، كا چه‌ند مه‌ترسی هه‌بوو ل سه‌ر وان، ئه‌ندازیا و كارمه‌ند و شۆفێرێن شه‌فه‌ل و بلدۆرزه و حه‌فاره‌یێن ئۆفیسێن خزمه‌تكێش د به‌رده‌وام بوون د ڤێ مه‌ترسیێ دا و پشكه‌كا مه‌زن یا پێشڤه‌چوونێن پێشمه‌رگه‌ى ب به‌ر وان ژى كه‌فتبوو، هه‌ر چه‌نده شه‌رڤان ل سه‌ر ئه‌ردى باشتر دكاریت به‌رگریێ ژ گیانێ خوه بكه‌ت، هونه‌رێن (پیشه‌یا مه‌یدانێ) خواندینه و مه‌شقا خوه ل سه‌ر كریه و بیردۆزێن بارانكرنا ئاگرى دزانیت، به‌لێ شۆفێرێ ره‌به‌ن و ئه‌ندازیارێ سڤیل چاوا به‌رگریێ ژ خوه بكه‌ت، چه‌ند شه‌هید و بریندار بووینه، چه‌ند رێكێن گرنگ بۆ پێشمه‌رگه ڤه‌كرینه، چه‌ند رێكێن درێژ كورت كرینه، چه‌ند سه‌نگه‌ر و په‌رژانێن موكم به‌رهه‌ڤكرینه، چه‌ند ره‌بیه به‌رهه‌ڤكرینه، هه‌ر وه‌كو ئه‌ندزیارێ تێكۆشه‌ر (ئیسماعیل دێركى) ل رێڤه‌به‌ریا رێكوپران ل دهۆكێ دانه‌رێ پرێن له‌شكرى، شه‌ڤ و رۆژ دكرنه ئێك و د سه‌نگه‌ران دا ب زانستێ خوه و ب گیانێ خوه و مالێ خوه، خزمه‌ته‌كا ژ دل دكر، نموونه‌یا دلسۆزیێ بوو، هه‌ر وه‌سا گه‌له‌كێن دیتر ژى دلیڤا ناڤئینانێ نینه، ل ده‌مه‌كى من ب خوه دیت به‌رده‌وام گوله‌بارانكرنا حه‌فاران دهاته‌كرن نه‌دگه‌هشتن سه‌نگه‌ران تمام بكه‌ن، ئێدى وان چ گرنگى نه‌ددا ئاگرێ دوژمنى، وه‌كو تو پێشیه‌كێ ژ خوه‌بره‌ڤینى!!، هه‌لبه‌ت دوژمن لێدگه‌ریێت كا كیڤه ده‌نگێ بلند هه‌یه، لڤینه‌كا شیم ل كیڤه هه‌یه، جه‌ختیا خوه ل وى جهى دكه‌ت، هینگى ئه‌و جهێن شه‌فه‌لا لێ شۆل دكر مه ژ پێشمه‌رگه‌ى ڤالا دكر، دا زیان نه‌بن، ل وێ سه‌رما و گه‌رما به‌رۆكێن شه‌رى ئه‌ڤ مرۆڤێن سڤیل كارێ خوه ب مۆرال ڤه‌دكر. من ڤیا رۆلێ وان و سازیێن وان بینمه بیرا رۆپه‌لێن دیرۆكێ و وژدانا خوه قه‌لس نه‌كه‌م د راستا وان دا، هیڤیدارم من قه‌رێ وان ل سه‌ر خوه راكربیت وه‌كو پێشمه‌رگه‌كێ بچووك یێ قه‌هرێن شه‌رێ دژى داعش خوارین.
نيشاندان
WP Facebook Auto Publish Powered By : XYZScripts.com