مژار ئابووره، قه‌یرانه، زانكۆیه، بێكارى یه، ئاریشه یا ب سه‌ر مه هه‌میان داهاتى و به‌ڤل و دوژمن و خیندار ل دۆر و به‌ر و د ناڤخوه دا زۆرن، وه‌كو ئه‌ركه‌كێ نشتیمانى و نه‌ته‌وى و مرۆڤاتى ئه‌م هه‌مى ملێ خوه بده‌ینه به‌ر و ل باشترین چاره‌سه‌رى بكه‌ریێن، بۆ مژارا ده‌رچوونا قوتابێن زانكۆیان و نه‌بوونا ده‌لێڤه‌یێن دامه‌زراندنێ ژ به‌ر نه‌بوونا بۆدجێ و ده‌لیڤه‌یێن كارى، زێده‌بارى گه‌له‌ك ئه‌گه‌رێن دیتر، یا ژ هه‌میان مه‌زنتر ئه‌ڤ ژیواره‌یه كو ئه‌ردێ مه راسته رووبه‌ره‌كێ مه‌زنه به‌لێ جهێن جهنشینیێ نه وه‌كو ده‌وله‌ته‌كا فه‌رمى یه ب هه‌مى لایه‌نان ڤه، مرۆڤ زۆرن و سازیێن حوكمه‌تێ كێمن و دارمه‌زرێنه‌ێن نه كاركه‌ر ژى د به‌ربه‌لاڤن. دزانم ژى كو حوكمه‌تێ چاره‌سه‌ریێن خوه یێن پرۆفشنال هه‌نه، به‌لى حه‌تا ئه‌ڤ چاره‌سه‌ریێن ئه‌تۆمى جهێ خوه دگرن، ئه‌وان ژى بۆدجه‌یێن خوه یێن مه‌زن دڤێن زێده‌بارى ده‌مى حه‌تا دكه‌ڤیته سه‌ر سكه‌ى و دبیته وه‌به‌رهێنان، به‌لێ ئه‌ڤ پێشنیازا من دبیت وێ رێكێ كورت بكه‌ت و ی ده‌مكى بیت هه‌تا پیچه‌كێ به‌ریكا حوكمه‌تێ گه‌رم ببیت. پێشنیازا من دبێژیت هه‌كه پرۆتۆكۆله‌ك بهێته گرێدان ل گه‌ل وه‌لاته‌كێ دی، بۆ نموونه توركیا، ئه‌لمانیا، ئه‌مریكا ..هتد. بۆ وه‌رگرتنا قوتابیێن ده‌رچوویى و مفاوه‌رگرتن ژ زانین و بسپۆریا وان ب ره‌نگه‌كێ رێژه‌یى، نابێژم وه‌كو دیارده‌یا ل سالێن هه‌شتییان یا مسرێ هاتیه كرن، بۆ كاركرنێ ب گشتى ڤه، به‌لێ ب تنێ بۆ ده‌رچوویان ب ره‌نگه‌كێ رێزگرتى و مه‌عه‌زه‌ز، هه‌كه توركیا بیت دێ باشتر بیت، ژ به‌ر گه‌له‌ك ئه‌گه‌ران، لێكتێگه‌هشتن، نێزیكیا رێیا و هاتنوچووان، هه‌ر وه‌سا توریكا وه‌كو تایبه‌تمه‌ندیه‌ك ئه‌ورۆپى هه‌ی ئه‌ز باوه‌رم دێ قه‌ردێ ده‌رچوویان گریت. وه‌كو دى ب هزاران ل توركیا كارمه‌ند هاتینه لادان و ده‌رخستن ژ كارێن وان ژ به‌ر كۆده‌تایا سه‌ربازى، توركیا د پلانا خوه یا ئابوورى دا حه‌زدكه‌ت بیانیان بدامه‌زرینبیت و مفایى ژ ده‌ستێن وان ببینیت، یا گازى دكه‌ت عه‌ره‌بان دده‌ته كارى، ئه‌ورۆپیان، كوردان و .. هتد. ئه‌ز یان پیدڤى یه، من باوره هه‌كه ئه‌ڤ ببیته پرۆپۆزه‌ل و یاداشتنامه دێ ئاردۆگان ب گه‌رمى پێشوازیێ لێكه‌ت هه‌ر وه‌سا ژ به‌ر ریكلاما خوه ژى و ئابوورى وان پێدڤى ب مرۆڤایه، وه‌كو دێ ئه‌و دێ به‌رێ مه ده‌ته كه‌رتێ تایبه‌ت، هه‌ر وه‌سا ده‌رچوویێن مه ژى دێ سه‌بۆره‌كا كارى و تایبه‌تمه‌ندیێ بینیت. قه‌باره‌كێ زۆرێ دراڤى دێ ژ توركیا هێته هه‌رێما كوردستانێ و ئه‌ڤ دراڤه دیسا دێ زڤریته ڤه بۆ توركیا ژ به‌ر هاوه‌رده‌كرنێ و كڕینا گه‌لوپلان، دێ ئه‌و دراڤ بیته دینامۆ، ساله‌كه دونه سێ نه، قه‌یرانا مه دێ بیته هه‌لم د ناڤبه‌را مه و توركی دا. ژ لایه‌نێ سیاسى ڤه ژى بۆ هه‌رێمێ بیته بیكه‌هه‌ك بۆ كیانبوونه‌كا سه‌ربه‌خوه‌یى، هه‌ر وه‌سا ره‌نگڤه‌دانه‌كه بۆ حوكمه‌تا ناڤه‌ندى كو ل خوه بزڤریت و شه‌رم ژ سیاسه‌تا خوه بكه‌ت، ل گه‌ل ئیرانێ و مایتێكرنا وێ، یا مه ژى گه‌هاندنا هزێ یه و راڤه‌كرنا وێ دێ بیته پلانا حوكمه‌تێ و وه‌زاره‌تێن وێ. هوون ژى گه‌لاله بكه‌ن و گه‌نگه‌شه بكه‌ن، ما چ هه‌وه‌یه؟!
نووترين نووچه
- سەرۆك بارزانی ب گوهلێبوونا دەنگوباسێ مالئاڤاییكرنا ئیبراهیم گاباری خەمبار بوو
- ئامینا زكری: سەرۆك بارزانی ژێدەرێ باوەری و هێزا ئافرەتا كوردە
- رێككەفتن بۆ كڕینا پەترۆلا كوردستانێ هاتیە كرن و تنێ هنارتن مایە
- ژ ترسا كارڤەدانێن پارتی و بایكۆتكرنا هەلبژارتنان دێ بەغدا بڕیارەكێ ل دۆر مووچەی دەت
- هەرێما كوردستانێ بوویە پەناگەهەكا ئارام بۆ ئاشۆرییان
- نێچیرڤان بارزانی ل گەل شاندەكێ ئاشۆرییێن ئەمریكا كۆمبوو
- بۆ كونترۆلكرنا میلیشیایان ئیراقێ پێدڤی ب قانوون و دادگەهێ هەیە
- هەلبژارتن ل ئیراقێ گوهۆڕینان پەیدا ناكەن
- ئیراقێ پێدڤی ب دادگەهەكێ هەیە كو ب رێیا پشتەڤانییا مادەیا 92 یا دەستوورێ بهێتە دروستكرن
- سەركرداتی و حوكمەت و خەلكێ ئیماراتی هەردەم هاریكار و پشتەڤانێن كوردستانێ بوون
شیرزاد نایف
25 سالێن زێرین و یۆبیلا زیڤى
ب ناڤێ خه‌بات ده‌ستپێكر و بوو خواندنگه‌هه‌كا میدیایى، ب ژارى و ژیرى كارێ خوه دكر، چه‌قێ ژ به‌قێ دكر، ده‌ریا ب ده‌رزیكێ دكۆلا، جوامێران ب پاكیا دلێ تاكێن شۆره‌شێ تلفزیۆنا مه یا دهۆكێ كارێ رێبازا خوه به‌رده‌وام كر، ژ هه‌ژی بوون كو د ڤێ ستوونا ره‌خنه‌یى دا، رۆناهیێ بێخمه سه‌ر گۆتنا راست، نه‌ك مه‌دحه و پێگۆتن، به‌لێ ره‌خنه بۆ مه‌یه هه‌كه ڤێ جارێ ژى نه‌بێژین: یه‌لا خێر..
مه دیت ده‌رگه‌هێن تلفزیۆنا دهۆك (خه‌باتا جاران) ڤان رۆژان د ڤه‌كری بوون، ببوو كونزڤریكا پتریا میدیاكارێن رێزدار و كه‌ساتیێن مه‌زن قه‌ستا ڤى ده‌رگه‌ى كرن، كو ب رێیا وێ وه‌كو دایكه‌كا دلۆڤان ئه‌و هه‌مى ده‌رخستن ب پله و پۆسته و زانین كرنه مال كو ب كێر خوه هاتن، پتریا وان بوونه خوه‌دى پله‌یین به‌رز د ناڤ سازیێن هه‌رێمێ دا، ستافێ ئه‌ڤرۆ یێ تلفزیۆنا دهۆك یا خه‌باتێ ده‌ركه‌فتن ب نان و خوێ، كو به‌رێ هه‌میان جاره‌كا دا وى سینگێ ب ره‌حم و ژ هه‌ژى خه‌لاتكرنێ دیتن، دبیت ژى گه‌له‌ك هاتبنه ژبیركرن و تۆره ببن، چونكو گه‌له‌كن، به‌لێ ژبیر نه‌كه‌ین مه‌زنترین كه‌س ـ رێڤه‌به‌ر ـ ل ڤێ تلفزیۆنێ مته‌وازعترین كه‌سه د ناڤ وان دا.
تلفزیۆنا دهۆك ب حوكمێ وێ ئێكێ كو مه‌دیا بینراو بوو، پتر چوو د ناڤ دل و مالێن خه‌لكى دا، شیا ناڤێ خوه مه‌زنتر لێبكه‌ت ژ ناڤێ ده‌زگه‌هى ب خوه، چونكو خه‌لكێ مه یێ بێبه‌هر بوو ژ تلفزیۆنه‌كا كوردى یا ب تام پارتى، شیا برینێن خه‌لكى ب نه‌رمى بكه‌وینیت و مه هه‌میان (كۆمانده‌كاته‌وه) ـ وه‌كو ریكلاما ئاسیاسێل دبێژیت! ـ. هه‌تا نۆكه خه‌لكه‌كێ شۆره‌شگێر و یێن ته‌خا ره‌وشه‌نبیر و رۆژنامه‌ڤان بۆ خوه ب ده‌رگه‌هى ب مالا مه‌زن دزانن، تلفزیۆنا (خه‌بات) مل ب ملێ رۆژناما ئه‌ڤرۆ شیان شوونتبلێن ره‌وشه‌نبیریا شۆرشا كوردى بهێلنه د ناڤ خه‌لكێ دا و ده‌سپێكه‌كا مه‌زن و موكم بۆ زمان و دابونه‌ریتێن ڤى باژارى بدانن. من ب خوه وه‌كو كارمه‌ند ل گه‌ل وان كارنه‌كریه، به‌لێ ب هه‌ڤالین و هه‌ڤكارى و هه‌ماهه‌نگى، دبینم وه‌كو سنگه‌كێ نه‌رم و گه‌رم دلۆڤانى من ژێ ڤه‌خواریه، من خوه بیانى نه‌دیتیه، رووێن پشكڤین یێن كارمه‌ندان ب زارۆ و كارمه‌ند و رێڤه‌به‌ر و بێژه‌ر ڤه، جۆره‌كێ بسته‌یێ هه‌یه، د بیست و پێنج سالان دا، گه‌له‌ك ئه‌تاكێت و سه‌ربۆر و پێكه‌نین بۆ چێبووینه، بیرهاتن ل گه‌ل وان كه‌سێن وه‌غه‌ركرین و گیانێ وان مایه ل هنداڤى بورجێ وه‌شاندنا به‌خشێ تلفزیۆنێ، ماینه د ناڤ دلێ دیرۆكا وێ دا، ب خێر و خۆشى ب پیتێن زێرین ناڤێن وان تۆمار بووینه، كوڕێن باژیرێ مه‌نه هێمایێن مه‌دیایێ و ستێرێن برسقى یێن زێرین د یۆبیلا زیڤى دا. ئه‌ز ل گه‌ل نڤیسینا ڤان په‌یڤان دترسم رێڤه‌به‌ر و كارمه‌ندێن وێ هه‌ڤكارێن من بخوینن، بێنه تانا من و بێژنه من تو نه‌هه‌ڤالێ مه‌یى، به‌لكو مالا ته‌یه و ئه‌م د بیانینه، چونكو ره‌وشتێ وان ئه‌و زێره یێ ژه‌نگى نه‌بیت، من ژ نێزیك ناسینه، به‌رهه‌مێ پێشمه‌رگاتیێ و شۆره‌شا كوردى نه. ئه‌و ده‌سپێكه‌ك بوو ژبۆ بجههاتنا خه‌ونا مه یا بچووكاتیێ، كو ئه‌م وێنه‌یێن بارزانیێ نه‌مر ببینین، سه‌روبه‌ر و جلوبه‌رگێن پێشمه‌رگه‌ى و دابونه‌ریتێن كورده‌وارى، سروودێن شڤان په‌روه‌ر یێن قه‌ده‌غه و حه‌سه‌ن شه‌ریف و گه‌له‌كێن دیتر، جارا ئێكێ بوو تلفزیۆنه‌كا كوردى یا خومالى كو چو ده‌ستێن بیانى و زلهێزان د ناڤدا نه‌بن، چو سمبێل بۆقێن عه‌ره‌ب فه‌رمانا نه‌ده‌ن، ژ به‌ر ڤان ئه‌گه‌ران مه ژ نیڤا دلى حه‌ز ژ تلفزیۆنا خه‌بات كر، سه‌ره‌راى هندێ كو ناڤێ وێ نها نه‌ك مایه خه‌بات!!، به‌لێ ئه‌م دهۆكى ئێكودو دنیاسین و هه‌كه مه ناڤه‌ك ب ده‌ڤێ خوه گرت، هه‌ر دێ ئه‌و ناڤ مینیت وه‌كو خوه. له‌ورا دبێژمه خوه و پاشى تلفزیۆنێ پیرۆزه ژ نیڤا دلى یۆبیلا زیڤى ب خه‌باتا زێرى.. دهۆكا خه‌باتێ!!. و ئه‌م هه‌مى خه‌باتین..
پێشمه‌رگێن رێكوپران
ئه‌و كه‌سێن گیانێ خوه كرینه پره‌ك كو پێشمه‌رگه ل سه‌ر ده‌رباز ببن و ئه‌و ژى بچن گیانێ خوه بكه‌نه مه‌تال بۆ قورتالكرنا ملله‌تێ خوه، ئه‌ون یێن دێ به‌حس ژێ كه‌م. بلا چپكه‌ك بیت ژ ده‌ریا رۆژانێن ئه‌فسه‌ره‌كێ كورد د ناڤ رێزێن پێشمه‌رگه‌ى دا خزمه‌ت كری، چه‌نده‌كێ ژ راستیا شه‌ڕێ مه یێ خۆراگریێ ل به‌رامبه‌ر چه‌كدارێن داعشا خویناوى د ڤان چه‌ند رێزه‌كێن كێم دا پێشچاڤ بكه‌م، بۆ ئه‌مانه‌تا وژدانى كا كێ كر و كێ نه‌كر و كێ زه‌حمه‌ت دیت و كێ قوربانى دان، كى بوو خوه‌كریه هه‌ڤسه‌نگه‌ر و هه‌ڤكارێ مرنێ؟!، ب راستى ئه‌ڤ شه‌ڕێ ب سه‌ر مه‌دا چوویى، ب هه‌مى رامانێ په‌یڤێ ناهێته سالۆخه‌كرن، كا سه‌ختیا وى و نه‌خۆشیا وى چه‌ندا تیژ و دوار بوو، هێشتا ژى یا به‌رده‌وامه، بۆراندنا شه‌ڤه‌كێ ب سه‌ر مه را چوویى، بۆراندنا ساله‌كێ بوو ژ ته‌حلاتیا ژیانێ، كو بگه‌هیته وى ئاستى تو سعه‌تا و رۆژان بهه‌ژمێرى كو ئه‌ڤرۆ ژى ب ئانه‌هیا خودێ تو مایه ساخ ل هه‌مبه‌ر دوژمنێن مرۆڤاتیێ و بێ باوه‌ریێ، ب وان شیانێن كێم ڤه و بێ حالیێ و سه‌روبه‌ریێ، كه‌سه‌ك دوژمنێ گیانێ خوه بیت و د خه‌ما رحا خوه نه‌بیت، دێ ب چ شێوه سه‌رده‌ریێ ل گه‌ل ته كه‌ت ب وى سروشتێ هه‌ی و شه‌رێ ژ نشكانڤه، درێژ ناكه‌م ب تنێ دخوازم قه‌رێ سازیه‌كا خزمه‌تگوزارى دیار بكه‌م بۆ خودێ و بۆ وژدانێ دیار بكه‌ین، باژێرڤانى و رێكوپر و ئه‌و ئۆفیسێن وه‌سا كو هاریكاریا پێشمه‌رگه‌ى كرین، هه‌لبه‌ت ژ بلى كه‌رتێن دیتر، دا دیرۆك نه‌عله‌تا نه‌بارینیت ل وى كه‌سى یێ راستیان دمرینیت، نه‌خاسمه گه‌له‌ك سازیێن جڤاكى ژ بلى هه‌مى ته‌خوچینێن ملله‌تى ب دلسۆزیه‌كا بێوه‌ینه رۆلێ چاك گێران و ب ئه‌ركێ نه‌ته‌وى و نشتیمانى رابووین، ده‌مێ گۆتین (ئه‌م هه‌مى پێشمه‌رگه‌ینه)، هه‌ر ئێك ب رێكه‌كێ، به‌لێ فلمێ ترسێ و موغامه‌ركرنێ د گه‌له‌ك هێرشێن پێشمه‌رگه‌ى دا، رۆلێ ئامیره‌یێن كۆلانێ و ڤه‌كرنا رێكان بوو د پێشڤه‌چوونێن مه دا، كا چه‌ند مه‌ترسی هه‌بوو ل سه‌ر وان، ئه‌ندازیا و كارمه‌ند و شۆفێرێن شه‌فه‌ل و بلدۆرزه و حه‌فاره‌یێن ئۆفیسێن خزمه‌تكێش د به‌رده‌وام بوون د ڤێ مه‌ترسیێ دا و پشكه‌كا مه‌زن یا پێشڤه‌چوونێن پێشمه‌رگه‌ى ب به‌ر وان ژى كه‌فتبوو، هه‌ر چه‌نده شه‌رڤان ل سه‌ر ئه‌ردى باشتر دكاریت به‌رگریێ ژ گیانێ خوه بكه‌ت، هونه‌رێن (پیشه‌یا مه‌یدانێ) خواندینه و مه‌شقا خوه ل سه‌ر كریه و بیردۆزێن بارانكرنا ئاگرى دزانیت، به‌لێ شۆفێرێ ره‌به‌ن و ئه‌ندازیارێ سڤیل چاوا به‌رگریێ ژ خوه بكه‌ت، چه‌ند شه‌هید و بریندار بووینه، چه‌ند رێكێن گرنگ بۆ پێشمه‌رگه ڤه‌كرینه، چه‌ند رێكێن درێژ كورت كرینه، چه‌ند سه‌نگه‌ر و په‌رژانێن موكم به‌رهه‌ڤكرینه، چه‌ند ره‌بیه به‌رهه‌ڤكرینه، هه‌ر وه‌كو ئه‌ندزیارێ تێكۆشه‌ر (ئیسماعیل دێركى) ل رێڤه‌به‌ریا رێكوپران ل دهۆكێ دانه‌رێ پرێن له‌شكرى، شه‌ڤ و رۆژ دكرنه ئێك و د سه‌نگه‌ران دا ب زانستێ خوه و ب گیانێ خوه و مالێ خوه، خزمه‌ته‌كا ژ دل دكر، نموونه‌یا دلسۆزیێ بوو، هه‌ر وه‌سا گه‌له‌كێن دیتر ژى دلیڤا ناڤئینانێ نینه، ل ده‌مه‌كى من ب خوه دیت به‌رده‌وام گوله‌بارانكرنا حه‌فاران دهاته‌كرن نه‌دگه‌هشتن سه‌نگه‌ران تمام بكه‌ن، ئێدى وان چ گرنگى نه‌ددا ئاگرێ دوژمنى، وه‌كو تو پێشیه‌كێ ژ خوه‌بره‌ڤینى!!، هه‌لبه‌ت دوژمن لێدگه‌ریێت كا كیڤه ده‌نگێ بلند هه‌یه، لڤینه‌كا شیم ل كیڤه هه‌یه، جه‌ختیا خوه ل وى جهى دكه‌ت، هینگى ئه‌و جهێن شه‌فه‌لا لێ شۆل دكر مه ژ پێشمه‌رگه‌ى ڤالا دكر، دا زیان نه‌بن، ل وێ سه‌رما و گه‌رما به‌رۆكێن شه‌رى ئه‌ڤ مرۆڤێن سڤیل كارێ خوه ب مۆرال ڤه‌دكر. من ڤیا رۆلێ وان و سازیێن وان بینمه بیرا رۆپه‌لێن دیرۆكێ و وژدانا خوه قه‌لس نه‌كه‌م د راستا وان دا، هیڤیدارم من قه‌رێ وان ل سه‌ر خوه راكربیت وه‌كو پێشمه‌رگه‌كێ بچووك یێ قه‌هرێن شه‌رێ دژى داعش خوارین.
مۆشه‌كێن ترامب یان ترواده؟!
هه‌یامه‌ك ئه‌مریكا ژ بیرا هه‌میان چوویه كو ئه‌وه خودانا بریارێ و سه‌ركێشا گۆیا زه‌ڤیێ، ده‌مه‌كى یا نڤستى بوو، ده‌مێ شێرێ دارستانێ دنڤیت، هرچا رۆسى ب دلێ خوه دكه‌ڤیت و دبیته هۆلكا وێ!!، به‌لێ شێر هشیاربوو و گۆته زه‌رڕافه‌یێ سووریێ (ب رێزگرتن ڤه): تو نه شێرى.. تو (ئه‌سه‌د)ـه‌كێ سه‌خته‌یی!! و هرچا خوه نه نڤینه، ئه‌ڤه ئه‌ز رابووم و شێرێ دێ خوڕیت!! ئه‌مریكا یه نوورا گه‌ردۆنى ل سه‌ر ئه‌ردى، ستراتیژیا وێ ئێكه. به‌لێ هه‌ر سه‌رۆكه‌كى ستایلێ خوه هه‌یه و مه‌سجا وێ ستراتیژیێ دگه‌هینته جیهانێ، له‌ورا ڤێ جارێ ترامب وه‌كو ئۆبامایى نه‌كر، ئه‌و ستایلێ نڤاندى ژ خه‌وه هشیاركر و ستراتیژیا ب هێز و رێكوپێك نیشا جیهانێ دا. ب راستى ڤێ بۆیه‌رێ بیرا من ل دارستانێ ئینا و ده‌مێ شێر دنڤیت، گیانه‌وه‌ر خوه ژ بیرڤه دكه‌ن، ژبیر دكه‌ن كو سه‌ركێشه‌ك هه‌یه، هه‌می خه‌لكێ دارستانێ ل راده‌یێ وان رادوه‌ستینیت، كو دپیگیر بن ب فه‌رمانا وى. پشتى ئه‌ڤ بۆیه‌ره هاتیه هۆلێ، دونیا رابوو و نه‌روونشت ژ گوهۆرینا دید و بۆچوونێن جیهانى، مژار مه‌زن بوو، رۆژهه‌لاتا ناڤه‌راست هه‌مى هاته هه‌ژاندن، ب ڤان مۆشه‌كێن گه‌ر و نه‌رم!! هه‌ر وه‌كو ئه‌ڤه ئه‌ڤه درایێ ترسێ یه و یێ ژ ره‌حمێ هاتى ژ ده‌ف بابێ ئیڤانكایێ، ره‌حما ترامپى كو چه‌ند به‌هانه‌یا وى یا ب هێزبوو بۆ لێدانا تۆماهۆكێن خوه ل سووریێ، ب راستى ئه‌ڤ مه‌سجا تراوده یا د ناڤا ڤان مۆشه‌كان دا، لیسته‌كا دوور و درێژ بوو، خواندنه‌كا ویكیپیدى ژێ دهێته ڤه‌هاندن، هه‌ر ئێك وه‌كو خوه تێدگه‌هیت، به‌لێ یا گرنگ ئه‌وه هه‌ر لایه‌نه‌ك چاوا چاره‌نڤیسێ خوه تێدا دبینیت؟! ئها ئه‌و یا گرنگه، هه‌كه ئه‌م وه‌كو چارگۆشا كوردستانى ل مه‌سجا خوه بگه‌ریێن، دبیت دو ره‌هه‌ند بن، ئێك یا سپى یا دى یا دكارین نه‌بێژین یا ره‌شه، به‌لكو یا خۆلیكى یه!!، یا سپى یه و گه‌له‌كا گه‌شبینه، نه‌حه‌زژێكرنا ترامپ بۆ لێده‌ر و بكارهێنه‌رێن چه‌كێ كیمیاوى و پاراستنا كه‌سێن لێقه‌ومى كو گه‌لێ كورد ئێكه‌م گه‌له تووشى ڤێ سته‌مێ بووی، نها ده‌لیڤا كوردى خۆشترین زه‌مینه‌یه بۆ هه‌ڤپه‌یمانیێ و جهێ دانانا پیاده‌یا ئه‌مریكى، وه‌كو شوونگرێ توركیا هه‌كه رازى نه‌بیت، توركیا یا علمانى ب سه‌رۆكاتیا ئه‌روگانێ ئیسلامى!!، هه‌كه هات و پوولێن ترامپ و وى نه‌كگه‌فتنه به‌رئێك!!، كورد و كوردستان و پێشمه‌رگه باشترین په‌ناگه‌هن بۆ بێهنڤه‌دانا وان، ئه‌ڤه پتره ژ سێ سالێن ره‌قن پێشمه‌رگه شه‌رى ژ پێشڤه دكه‌ت ل دژى تیرۆرێ!! ئه‌و شه‌هیدێن داین خوه داینه به‌ر سه‌رێ شه‌هیدێن هێزا ئه‌مریكى!!، سه‌ره‌راى هندێ ئه‌مریكا ب عاتیفێ كار ناكه‌ت و لڤێره دێ سالۆخا خوه یا دوویێ ئینم زمان یا (خۆلیكى)، كو مگرتیا سه‌ره‌ده‌ریكرنێ ل گه‌ل ژیوارى و سیاسه‌تێ دخوازیت، چنكو مه سه‌ربۆر هه‌نه ل گه‌ل ئه‌مریكا وه‌كو كسینجه‌ر و یێ دى و یێ دى..هتد. به‌لێ بلا ئه‌م ژى بۆ خوه بێژین: هه‌ر دێ ده‌ستێ خوه ب سه‌رێ مه دا ئیننه خار، چونكو ئه‌م نه د سه‌رره‌قین و زوو گوچكێ خوه دده‌ینه ئه‌مریكا، وه دیاره گوهۆینا دیمۆگرافى ده‌مێ وێ هاتیه كو نه‌خه‌شه‌یا رۆژهه‌لاتا ناڤه‌راست پێدڤى ب ئۆبدێتكرنێ یه، چونكو گرێبه‌ستا سایكس پیكۆت ده‌مێ وێ ئێكسپایه‌ر بوویه!! بۆ ڤێ ئێكێ ژى هه‌سپێ ترواده نها یێ ل ده‌ڤه‌رێ و گه‌هشتیه و نها حاكمه‌كێ مه‌له‌ڤانه د ده‌ریایا ناڤه‌راست دا و بنگه‌هێ مۆشه‌كێن ل سه‌ر ئاڤێ یێ د ده‌ست وێ دا، هه‌ر كه‌سێ خوه بلڤینیت، دێ حنگێنێ ژێ ئینیت و كه‌ته ترومپێن!!.
چاوا كارێزما دمیننه ساخ؟
هه‌كه مرۆڤى وه‌غه‌ر ژ ڤێ دونیایێ كر، دێ هێته دابڕین ژ كار و بزاڤێن خوه، ب تنێ سێ تشت تێ نه‌بن، وه‌كو فه‌رمۆده‌یێ شه‌ریف، ((اژا مات ابن ێدم انقگع عمله إلا من پلاپ: صدقه جاریه، أو علم ینتفع به، أو ولد صالح یدعو له)):
صدقه جاریه: چاندنا دارا ئۆتۆنۆمیا كوردینێ ل مه‌ها ئادارێ كو رێكدكه‌ڤیته 11 ڤێ مه‌هێ. ئادار واته ئاڤزانا داروباری یه،یازده‌ى ئادار ئه‌و دارا مسته‌فا بارزانى ب ده‌ستێن خۆ چاندی، ئه‌م هه‌می یێن ژ به‌رهه‌مێ وێ دخۆین، حوكمێ خۆیه‌تى (ئۆتۆنۆمی) ئه‌و تۆڤ بوو، یێ هند ب زه‌حمه‌ت پشتى چه‌ه‌ندین قووناغێن تێكۆشانێ، خرابترین دوژمن بابوباپیرێن داعشێن ئه‌ڤرۆ، نه‌چار كرین كو ل دووڤ حه‌ز و نیازێن ملله‌ته‌كێ كورد بهێن و دانپێدانێ ب هه‌بوونا كیانه‌كێ كوردى یێ خومالى بكه‌ن، هینگى و ل وى ده‌مێ سه‌خت یێ دوور ژ زۆما كامیرێن مۆبایلێن نها نه‌بوو، چاڤێ میدیایى یێ نڤستى بوو، ب راستى حنێره و سه‌ده‌قه‌كا به‌رده‌وامه، ره‌هێن وێ دراێ هند چووینه ئه‌ردی دا، هند موكم بووینه، بوویه چیایه‌ك بارۆڤه ناهژینیت، كو ئه‌م نها ب كۆنفیدرالێ ژی ب ته‌عدا درازینه. مه‌لا مسته‌فا یێ بارزانی جۆتیارێ بزاڤا كوردینێ كه‌دا ملێن ته ئه‌م یێن دخۆین، ئه‌ڤرۆ ل هنداڤى مه‌زارێ ته ئه‌م ب مۆنیكایێن خوه دهێین ل سه‌ر وى گۆرێ ته یێ ژ ئاخ و به‌ر و نێرگزا، شه‌رم ژ خۆ و ره‌فاهیه‌تا خوه دكه‌ین، ته ئه‌و سامانێ هنده مه‌زن بۆ مه هێلای هێشتا ئه‌م یێن ژێ دخۆین، تو ب ژارى و ژیرى چووی، وه‌سیه‌تا ته ئه‌و بوو كو گۆڕا ته یا موته‌وازوع بیت، هه‌مى شه‌ره‌فه، ئه‌م شانازیێ پێ دبه‌ین ده‌مێ خه‌لكه‌كێ بیانى دهێت و وێ ته‌وازوعا ته دبینیت، ته سه‌رێ مه ل دونیایێ بلندكر ل ده‌ف دۆست و هه‌ڤالێن مه، ل ئاخره‌تێ ژى سه‌رێ ته یێ بلنده، په‌یڤینا ته راست ده‌ركه‌فت وه‌ختێ ته گۆتى: هه‌مى دێ گه‌هنه مافێ خوه، ب تنێ ئه‌ز و فه‌قیر دێ مینین!!. ب دروستى ژى مافێ ته ما هه‌لاویستى و تو نه‌گه‌هشتیێ، ئه‌و ژى مرادا ته بوو گوت و ئالایێ كوردستانێ ببنى ل سه‌رێ هه‌مى گرك و كۆمتێن كوردستانێ. ئه‌ڤرۆ كوڕێن ته یێن دبینن و دوعا بۆ ته دكه‌ن. رۆژ ۆ رۆژ گیانێ ته بۆ مه دسه‌لمینیت كو مه‌زنیا ته ژ ته‌وازوعا ته بوو، هه‌ما ژ په‌یڤێن ته دیاربوو ده‌مێ ته دگۆت: ئه‌ز سه‌رۆكێ كه‌سێ نینم و من نه‌ڤێت ببمه سه‌رۆك، ئه‌و كه‌سێ ببیته سه‌رۆك دڤێت خه‌لكى وى بكه‌ته سه‌رۆك.
خالا دیتر یا فه‌رمۆدا پێغه‌مبه‌رى (س) دبێژیت (علم ینتفع به): علمێ وى ژى په‌یره‌وێ دیمۆكراسیێ كو ئه‌ڤه چه‌رخه‌كێ سالانه، هه‌تا ئه‌ڤرۆ ئه‌و په‌یره‌و بوویه كه‌توار ل سه‌رانسه‌ری جیهانێ، ئه‌ڤه پێنجى ملیۆن كورد یێن مفایى ژێ وه‌ردگرن، ژ بلى دانانا پارتى، نیشانه‌كا مه‌زنتر ژى شۆره‌شا ئیلۆنێ بوو، كو هه‌مى ته‌خوچینێن كوردستانێ خرڤه‌كرن د ئێك بوته‌قه دا، ب كورد و عه‌ره‌ب و ئاشۆرى و توركمان كوردێن هه‌ر چار پارچێن كوردستانێ، ل دژى دوژمنه‌كێ سته‌مكار، ژ بلى خه‌باتا چه‌كدارى به‌لێ دهه‌مى وارێن ژیانێ دا، ئیدیه‌مێ (پێكڤه‌ژیانێ) وه‌كو پشكه‌ك ژ زانسته‌كى ئینا پێش وه‌كو پێدڤیه‌كا سروشتى ئه‌م دكارین ناڤى زانستى بكه‌ینه (بارزانیزماتى).. كه‌سێ نه‌گۆتیه بلا ئه‌ڤ زانسته هه‌بیت، به‌لێ هه‌ما سروشتى ب خوه ئه‌ڤ ئیدیه‌مه ئینا پێش و ڤالاهیه‌كا مه‌زن داگرت.
نیشانا سیێ ولدا صالحا یدعو له: ژبلى وێ ئێكێ كو ئه‌م هه‌می یێن دوعا بۆ بابێ نه‌ته‌وا خۆ دكه‌ین. بۆ میناك بێژین هه‌كه ژ پێنچ ملیۆن كوردستانیان ملیۆنه‌ك دوعا سه‌ركێش و بابێ خوه یێ مه‌زن بكه‌ن، هه‌ر دێ دوعایا كه‌سه‌كى یا نه‌زیه بیت!!، وه‌كو یاریا داروبه‌رانێ هه‌تا بیست به‌ران بهاڤێژیه ئارمانجێ هه‌ر دێ ئێك ڤێكه‌ڤیت. ژ بلی هندێ كو زه‌لامه‌كێ ئایینی بوو، هه‌ر وه‌سا نه‌ژادێ وى ژى هه‌مان په‌روه‌رده‌یه، بلا ئه‌ز نموونه‌كا خوه یا كه‌ساتى بێژم، من ب خوه ل ڤێ شه‌رێ داعش دیتیه، سه‌رۆك مه‌سعود بارزانى چه‌ند پێگیرى نڤێژ و دوعایان بوو، سه‌رئه‌ڤراز ده‌ستان بلند دكه‌ت و دعایان دكه‌ن، ما ژ ڤى وه‌له‌دى سالحتر هه‌یه، چه‌ند جوانه، سه‌رۆكێ ملیۆنان مرۆڤان، سه‌رێ خوه بدانیته ئه‌ردى و خوه كێم بكه‌ت، بۆ خودایه‌كێ ئێكانه و دوعا بۆ بابێ خوه بكه‌ت؟!. بۆ زانین ژى سه‌رۆك حه‌ز ناكه‌ت بۆ روومه‌تى وێنه‌یێن نڤێژێن وى بهێنه بلاڤكرن، یان بۆ چاڤێن خه‌لكى عیباده‌تى بكه‌ت.. ئها ئه‌ڤه یه نه‌مریا بابێ كوردان. بارزانیێ نه‌مر كور و نه‌ڤیێن خوه راسپارد دكه‌م كو شانازیێ ب ره‌مزێ نه‌ته‌وا خوه ببه‌ن و به‌ده‌وام ببن ل سه‌ر دوعاكرنا نه‌مریا بارزانیێ باب..
كوردێن خومالى!!
كوردێن ئێزدى ل ده‌ف كوردستانێ و كوردستانیان وه‌كو زارۆیه‌كێ نازاندى یه، هه‌ر ژ ده‌سپێكا رۆژا ئۆبدێتكرنا كورداتیێ كو پشتى سه‌رهلدانا سالێن نوتان سه‌رۆكێ كوردستانێ شوونتبله‌كا دیرۆكى تۆماركر د ناڤ گۆتارا خوه دا و ئه‌و گۆتن هه‌تا ئه‌ڤرۆ بوویه ماركه‌ما تۆماركرى ل سه‌رانسه‌رى كوردستانێ ده‌مێ گۆتى: ئێزدى كوردێن ره‌سنن و چو كورد نینه هه‌كه ئێزدى كورد نه‌بن… ئه‌ڤه گۆتنه بوو جهێ خۆشحالیا هه‌ر كورده‌كى و هه‌ر ئێزدیه‌كى ل سه‌رانسه‌رى جیهانێ، به‌لێ ئه‌ڤرۆ گه‌له‌ك پیڤه‌ر یێن دهێنه گوهارتن، نه‌خاسه پشتى وێ پیلانا مه‌زنا و دژوار یا ل سه‌ر ملله‌تێ مه كه‌فتیه هۆلێ، ئه‌و مه‌رگه‌ساتێن ب سه‌رێ خه‌لكێ مه ئینایین، ب تایبه‌ت و ل ده‌سپێكێ ئێزدیێن شنگالێ. دووماهى تشتێ بۆ مه بوویه جهێ حێبه‌تیێ ئه‌و بوو كو میرێ وان گۆتیه سه‌رۆكاتیێ مه بدانن وه‌كو وه‌لاتیێن پله دو، چونكو ئه‌م یێن بووینه وه‌لاتیێن پله سێ!. مانێ ئه‌و گۆتنا سه‌رۆكى یا جاران گۆتى هێشتا ئێكسپایه‌ر نه‌بوویه و هه‌كه ئێكسپایه‌ر ببیت ژى، ئه‌ڤه كوردن هه‌مى ئێكسپایه‌ر بوون، وه‌لاتیێن نه‌ته‌وه‌یێ و وه‌لاتیێن ئاینى كارتێكرنێ ل هه‌ڤدو ناكه‌ن، ئه‌م هه‌مى كودین و پاشى موسلمان و ئێزدینه. یا جوانه میرێ كۆمه‌كا مرۆڤان خه‌مێن وان بخۆت و لێ ببیته خودان، وه‌كو وى كابرایێ گۆتى ئه‌م ئێزدى نه‌كوردین و هه‌ر ب وى زمانێ كوردى یێ دایك و زه‌لال. به‌لێ میر ژى مرۆڤه و تاكه و دبیت تۆره ببیت و دبیت ژ خه‌مێن گه‌لێ خوه دا فشارا وى یا خوینێ بلند ببیت، هنده داخۆیانیان بده‌ت، دبیت ب دلێ گه‌له‌ك ژ مه‌عیه‌تا وى ب خوه ژى نه‌بیت، ئێشا نه‌ته‌وه‌بوونێ و ئاینبوونێ وه‌كو ئێشا فشارێ خینێ و ئێشا شه‌كرێ یه، هه‌كه كه‌سه‌كى هه‌ردو ئێش هه‌بن، ئێك زیانێ ناگه‌هینته یا دیتر ب وى راده‌یێ مه‌ترسیێَ، ئه‌ڤجا دبێژم ئێزدى نه وه‌لاتیێن په‌له سێنه و نه یێن دوژ ى نه، دبیت یێن ئێك ژى نه‌بن، بلا زیرۆ بن، سۆپه‌ر، واته ژ عه‌زیزتریتن جۆرێن كوردان، ئه‌وان كه‌لتۆر و زماتن و تایبه‌تمه‌ندى و ره‌سناتیا مه د ناڤا خوه دا راگرتیه، ئه‌م هه‌مى شانازیێ پێ دبه‌ین، به‌لێ هه‌كه ئێزدى بێژن ئه‌م نه‌كوردین پا ئه‌م چ بێژین؟!. تشته‌كێ گه‌له‌كێ گرنگ هه‌یه ره‌وشه‌نبیرێن ته‌خا ئێزدیان باشتر ژ من دزانن، كو ئه‌ڤرۆ ئاماژه‌یێن په‌یداكرنا ده‌رزێن تائیفى و ناكۆكیان یێن دیار دبن د لاشێ كوردستانى دا، مه گه‌له‌ك دوژمن هه‌نه، ل سه‌ر هه‌مى وه‌ریسان دله‌یه‌زن، جار ب رێیا داعش، جار ب رێیا په‌كه‌كێ ، برینا بودجه و مووچان، پرسگێركا په‌كه‌كێ، توركمانێن كه‌ركووك، برایێن ئێزدى، حه‌شدا شه‌عبى و شیعه‌یاتى، شه‌رێ مووسل و كوشتنا سڤیلان ب رێیا به‌ربه‌ستێ به‌شه‌رى كو خوین بهێته رێتن، هه‌رێما مه ژى یا خوه راگره، هیڤیه كوردێن ئێزدى و ب تایبه‌تى كه‌ساتیێن ره‌وشه‌نبیرى بمه رابگه‌هن، ئه‌م هه‌مى پێدڤى ئێكودوینه!!. ئێزدى تاجا سه‌رانه خینا ره‌هێن كورداتیێ نه، هه‌روه‌كو من جاره‌كێ ل سه‌ر لاپه‌رێ خوه یێ فه‌یسبۆكى به‌لاڤكرى، كو ئێزدیاتى جوانترین رتمه د هه‌لبه‌ستا كوردینیێ دا. ئه‌ڤجا بێ پێگۆتنه‌ك.. ئه‌م هه‌مى ئێزدینه!!
ده‌وله‌تا په‌كه‌كێ ل عیراقێ و شامێ
توركیا و فه‌له‌ستین قودسێن وانه، په‌كه‌كه و داعش یێن هاتین ب لیڤا مه‌ڤه ماین، دو كێشه‌یێن وه‌كهه‌ڤن، هه‌ردو ژى دو روینه بۆ ئێك دراڤی، هه‌ردو هاتینه سه‌ر گوهێن مه ل هه‌رێمێ، هه‌ردو ژى هه‌كه ب وێ ئارمانجێ بكه‌ن، ئێك بۆ نه‌ته‌وه‌بوونێ و سه‌ربه‌خوه‌بوونێ بیت، په‌كه‌كه دزانیت جهێ خه‌باتا وێ یاكو د په‌یره‌وێ وێ دا هاتى دڤێت بۆ ئاخا كوردستانا باكۆر كار بكه‌ت، برا هه‌رنه توركیا وێرێ یه جهێ زه‌لاما، كه‌یسا خوه ل باشیا مه هه‌رێمێَ نه‌بینن، براینێ دكه‌نه پره‌ك و لێ سووار دبن، ده‌ركه‌فت هه‌مى ژى دره‌وانێ، هه‌ر وه‌كو مژارا داعش هه‌كه ب ناڤێ ئیسلامێ بیت، مه‌زنترین ده‌روه، ئیسلاما دروست یا ل قودسێ وێرێ جهێ زه‌لامینى و مێرانیا هه‌وه، نه‌ك بهێن ب لێڤا مه یێن هه‌ژار ڤه بمینن، مانێ هه‌ر ئه‌مین خودانێن قه‌نجیێ ل سه‌ر هه‌وه وه‌كو ـ هه‌كه موسلمان بن، وه‌كو هوون دبێژن ـ ئه‌مین نه‌ڤیێن سه‌لاحه‌دینێ ئه‌یۆبى ئێكه‌م جار د گه‌ردۆنى دا قودس بۆ هه‌وه ب خێرا قاره‌مانى و مێرانیا خوه رزگاركرى، هه‌كه هوون مێرێن قه‌نج بانه، دا هێن و ده‌ستێن خوه كه‌نه د ده‌ستێن مه‌دا و داخوازا هاریكایێ ژ مه‌كه‌ن، به‌لكو ملله‌تێ پێشمه‌رگه‌ى بۆ خێرا خوه هنده‌ك ئه‌و زیره‌كى و نه‌زاهه‌ت و دلپاكیا خوه پێشكێشى هه‌وه كربا، دا مینیت ل سه‌ر خاترا بیروباوه‌ریێ به‌لكو، هینگى دا كه‌یسا خوه گرن پیچه‌كا قاره‌مانیا خوه بۆ هه‌وه هنارده‌كربا، بلا نه ب ناڤێ ئاینى با، جیهاد ئه‌و نینه مرۆڤ خوه ب دوژمنێ خوه بپه‌قینیت، بیرا من دهێت و ب مخابنیڤه، برایێن مه یێن په‌كه‌كێ ژى خوه ب مه ڤه دپه‌قاند، دیسا بلا وانژى قه‌نجیا مه یا هه‌رێمێ زانیبا، ئێكه‌مین جار د گه‌ردۆنى دا، ئالایێ كوردستانا سه‌ربه‌خوه توركیا مه‌زن، توركیا ئوسمانلی یا مه‌زن و زلهێز كو حوكم ل نیڤه‌كا دونیایێ دكر، سه‌رۆكێ وێ ب هه‌ڤژینا خوه ڤه، ده‌ستێن خوه ل گه‌ل یێن شڤان په‌روه‌ر یێ باكۆرى و تاتلیسێ باكۆر و ده‌ستێ سه‌رۆك بارزانى پێكڤه بلند دكرن!! ما ئه‌ڤه نه‌ده‌ستكه‌فت و قه‌نجى یه؟!، به‌لێ په‌كه‌كه‌یێن برا دهاتن و خۆ ب مه پێشمه‌رگا ڤه دپه‌قاندن، هینگى ئه‌ز حێبه‌تى مام، ئه‌ڤ كه‌سێن ئایدۆلۆجى شیوعیى (ل گه‌ل رێزگرتنێ بۆ هه‌مى ئایدۆلۆجیان) خوه دپه‌قینن، ب مه‌ڤه، نه ئه‌م موشركین و نه‌ك مولحد و مورته‌دین!!، نه خۆفرۆشین، هینگى ژى ئه‌وان ده‌وله‌ته‌ك ب ناڤێ كۆمارا زاب دانابوو، ده‌رو ل تاكێن خوه دكرن، گه‌له‌ك توخم دهاتنه د ناڤ مه‌دا وه‌كو ده‌وله‌تا ئاشۆپ یا داعشێ د سه‌رخۆش بوون، گه‌له‌ك ده‌رو لێدكرن، وه‌كو ده‌وله‌تا (الحشاشین) یا دیرۆكى، گه‌نجان ده‌رمان دكه‌ن، گێژ دكه‌ن و راستیێ ل به‌ر ده‌كه‌نه خه‌ون، كو دێ چنه بحه‌شێ و ل وێرێ دێ جارییان ده‌نێ، هه‌مان سیناریۆیا یا وان دیلكریێن داعشان بوون، یێن به‌رى ڤان دو رۆژان كه‌فتینه ده‌ستێن مه ب خوه. ئه‌وا هنگ دكه‌ن، هه‌مان پیلانه یا داعش دكه‌ت یا یا كه‌رب و عیناده، چونكو چه‌نده‌كێ وێڤه‌ى مه‌نه، به‌لێ هوون پسمامێن مه‌نه، یا هه‌وه یا ب ژان و داخه، بۆچى؟! نه كو ژ به‌ر هندێ دێ زیانێ گه‌هیننه مه و خوه ژى، به‌لێ ب راستى هه‌وه هه‌تكا مه و یا خوه ژى بر، ئه‌ڤه نه‌براینیى یه، هه‌رن بۆ خوه بكه‌ن، هه‌رن بۆ باكۆرێ كوردستانا مه‌زن بكه‌ن، ب كێر خوه بهێن دێ كه‌یفا مه ژى ب هه‌وه هێت، تنه.. هوون زیانێ و گیانێ خوه دمه‌زێخن بۆ نه ئارمانجه‌كا ره‌وا، بلا ئه‌و مه‌زاختن جهێ خوه بگریت، بلا ببیته باجه‌یا ده‌وله‌تا كوردستانێ، كه‌نگى ئه‌م هاتینه باكۆرێ كوردستانێ و تێكدانا هه‌وه كریه؟!، هێشتا ئه‌م هه‌رێمه‌كا دارگرانین ل سه‌ر دلێ عیراقه‌كا ژنباب!!، ژ نیكا هه‌وه دڤێت ببنه ده‌وله‌ت د هه‌ریما مه‌دا، یا هێشتا ئه‌م نه‌بووینه ئۆتۆنۆمى، ئه‌و كه‌لها بچووك یا مه بۆ خوه ئاڤاكرى ب خوین و برین و ژ ده‌ستدانا قاره‌مانان و بابێن زارۆیێن بێگونه‌ه ـ بهێلن بۆ مه بمینیت، دونیا یا به‌فره‌هه، هه‌رن بۆ خوه بكه‌ن، مه شۆله‌ب هه‌وه‌یه، ئاپۆ د زیندانێ ڤه، ده‌مێ هه‌وه خوه ب مه‌ڤه دپه‌قاند، هینگى ئاپۆی سه‌ما و ئاهه‌نگ ل لوبنانێ دكرن!!، هێشتا هوون یێن بۆ دكه‌نه گری؟!، هه‌كه مرۆڤ پاته‌كێ سۆر و شین با نوكه ب ده‌رازینكا مالا خوه ڤه‌بوو، نه‌ك یا برایێ خوه‌ڤه!!.
بنڤه‌ره‌نگ بۆ توركیا!!
پشتى كو ئیرانێ عیراق ژ خودانا ب مساته‌حه وه‌رگرتى، سمبێل ب عیراقێ باداین هه‌مى تشت بۆ خوه برین ب وێ سیاسه‌تا نه‌رم كریه پاریه‌كێ مه‌زن و داعیرایى، ب ناڤێ شیعاتیێ و حوسێنیان كولاڤ كرینه سه‌رێن وان یێن ب زنجیران ب خوه دادده‌ن، كه‌سین وه‌كو مالكى بۆ خوه كرینه پێسترك، وه‌كو شێره‌كى وه‌ختێ كیڤیه‌كى دگریت و ژێكڤه‌دچریت و پشتى حه‌مه‌ر دبیت، هه‌ستى و چه‌رمى و گلێشى بۆ هه‌ڤالێن خوه یێن گیانه‌وه‌ر دهێلیت، ئیرانێ ژى ب حوكمێ جوگرافى و ده‌ڤه‌رێ هه‌ر وه‌كو تشته‌ك بۆ توركیا هێلایه دبه‌ر ددانێن خوه‌را، ب ناڤێ ئۆسمانیه‌تێ و توركمان و تله‌عفه‌ر و باشیكێ یا خوه نێزیكى هه‌رێما كوردستانێ دكه‌ت، ده‌سپیشخه‌ریه‌كه هه‌ر وه‌كو ل ڤان دووماهیان (كۆنفیدرالیه‌ك) بیته جهێ (حه‌ل وه‌سه‌ت)، نیشان یێن وێ ئاماژێ دده‌ن، توركیا نها ل دووڤ وێ سیاسه‌تا بۆ چاڤدێران دیار حه‌ز ل ئه‌ورۆپیبوونێ هه‌یه، به‌ره‌ڤاژى ئیرانێ، توركیا دخوازیت ب ستایله‌كێ شارستانى خوه برێڤه‌ببه‌ت، ب راستى ب زێده‌كرنا هه‌رێمه‌كا سه‌ربه‌خوه ل ئێكه‌تیا ئه‌ورۆپى مل ب ملێ توركیا ڤه هه‌كه بچنه ب سه‌رڤه، دێ به‌لانسه‌كێ په‌یدا كه‌ت، ئه‌ز ڤێ چه‌ندێ ب رۆهنى د وێ بۆیه‌را به‌رى چه‌ند رۆژه‌كان دا دبینم، یا بلندكرنا ئالایێ كوردستانێ ل فرۆكخانا ئه‌نقه‌رێ، بێهنا كۆنفیدرالیه‌كێ ژێ دهێت، توركیا حه‌ز ژ ب هێزخستنا ئابوورێ خوه دكه‌ت وه‌كو گرنگترین ستوونا ب هێزخستنا ژێرخانا خوه، هه‌كه هینگى هه‌رێما كوردستانێ ژ ناڤ كێلبێن ئیرانێ را ئیناده‌ر، بۆ وێ نه‌خه‌مه بهێته سه‌ر ب توركیا ڤه یان نه، یا گرنگ ئه‌وه ژ عیراقا ئیرانى ڤه‌ببیت، ژبلى ئه‌ڤێ هه‌میێ هه‌رێما كوردستانێ دێ كاریت هه‌تا راده‌كێ مه‌زن و شیایه ژى دارێ ترسێ یى په‌كه‌كێ و په‌یه‌دێ ل هنداڤ سه‌رێ توركیا سست بكه‌ت، نه‌خاسمه وه‌كو ئه‌و ده‌سپێشخه‌ریا فه‌رمانده‌كێ پێشمه‌رگێ هه‌رێما كوردستانێ (عه‌زیز وه‌یسی) پێشكێشكری، بۆ توركیا كو ب رێی وێ له‌شكرێ شۆره‌شگێرێ تازه‌دامه‌زراندى یێ كوردێن رۆژئاڤا دێ كاریت، په‌یه‌دێ دوورئێخیت ژ وێ ده‌ڤه‌را گه‌رم. ئیران ژى حسێبه‌كێ بۆ توركیا دكه‌ت، به‌هرا وێ یا كێكا عیراقێ لێ ناخۆت، دا د پاشه‌رۆژ دا به‌رژه‌وه‌ندیێن وێ یێن ئه‌قلمى تێنه‌چن، چونكو به‌هرا شێرى بۆ خوه بر، مالكى و عه‌بادى ته‌خسیرى ل گه‌ل نه‌كریه، نه یا ره‌وایه مرۆڤ و جیرانێ خوه هه‌ر ده‌م ب سه‌روستویێن ئێك ڤه‌ببیت، چونكو توركیا ژى تێرا خوه یا دژواره هه‌ر ئه‌و بوو یا به‌رى دیرۆكه‌كا نه‌یا دوور ده‌سهه‌لات ل رۆژهلاتا ناڤین دكر و حنێرا وێ هێشتا مایه، ئه‌ندامه د قولپا ناتۆ دا. ژ لایه‌كێ دى ڤه، توركیا خوه دبینیت ل به‌رامبه‌ر هه‌رێما كوردستانێ وه‌كو برایه‌كێ مه‌زن و برایێ مه‌زن ئه‌مر دكه‌ت، یێ بچووك ژى بجه دئینیت، هه‌ما سه‌روبه‌رێ هه‌رێمێ وه‌دبێژیت، هه‌ر ژ ئه‌نتالیا و ڤێدا وه‌ره به‌ره به‌ره هه‌تا دگه‌هیه زاخۆ و سێمێلێ و دهۆكێ و دپانزینخانێن دهۆكێ را وه‌ره و مزگه‌فت و جاده‌یێن وێ و ئاڤاهى و پاركێن وێ و جاده و شوسه‌تیێن وێ هه‌تا دگه‌هیه هه‌ولێرێ و ژۆردا دێ بێژى، هه‌رێم پارێزگه‌هه‌كه ژ توركیا.. هه‌كه بلا زنجیرێن سینه‌مایى یێن (گولو) ى ببنه گرۆڤه، ژ بلى جلكان و سه‌روبه‌رى.. ئه‌ز دوور نابینم توركیا هه‌رێما كوردستانێ بكه‌ته كۆنفیدرال.. وه‌كو ئه‌لمانیا یا جاران پشتى ئمبراتۆریا پیرۆز، وه‌كو راین، ئه‌راگۆن، ئه‌مریكا، سڕبیا، سنگال، گامبیا، سویسرا .. هتد. به‌لێ بیت چریسكه‌ك هه‌بیت، ژى كو رۆژه‌كێ ئه‌ڤ كۆنفیدرالیه ببیته فیدرالیه‌ت ڤه، به‌لێ نه ل گه‌ل عیراقێ هه‌لبه‌ت، دێ بۆ توریكیا بیت، وه‌كو ئه‌زمۆنا كۆمارا عه‌ره‌بى یا ئێكگرتى (مسر و سووریا سالا 1958 ـ 1961) ئێكه‌تیا كۆنفیدرالى بوو، پشتى هینگى ڤه‌گه‌ریا ڤه بۆ فیدرالی، چونكو هه‌ما مێشكێ رۆژهه‌لاتا ناڤینه، هه‌لبه‌ت ژى بۆ توركیا نه‌خه‌مه ریژه‌یا كوردان زێده‌ببیت ل توركیا چونكو مینا دبیژن (كون ژ پاته‌ى مه‌زنتر لێهاتیه)، بلا ئه‌و پێنچ ملیۆن ژى ل سه‌ر بن، چونكو ئه‌وێ به‌ڕكا ژ ئاڤێ ئینایه ده‌ر، هه‌كه ئه‌ڤێ نه‌كه‌ت، دێ وه‌لات به‌ر ب ئاژاوى ڤه چیت، چونكو ملله‌تان چاڤێن پێڤه چێبووین، كه‌س نه‌مایه ل دوورى مه‌دیایا جیهانێ بژیت!!.
هشیاربه ترامپ ل بن راهێنانێ یه!
عیراق وه‌كو ترومبێله‌كا فێركرنا شۆفێریێ لێهاتیه، بوویه كێلگه‌كا تاقیكرنا سه‌ربۆران، ترومبێلێن نڤیسینگه‌هێن فێركرنا شۆفێریێ یێن دهۆكێ، بووینه په‌لشقه و سكراب، هه‌ما یێن دهه‌لوه‌ریێن نه ستۆب مایه و نه كلاچ و نه گێر، ئه‌و ژى ڤێرا ناگه‌هن چه‌ندى چاكبكه‌ن، بۆ وان نه ئاریشه‌یه چونكو له‌زاتیا هاژۆتنێ نه یاگرنگه، چونكو نابیت كه‌سه‌ك ژ 40 كم/د ببۆریت، سه‌رۆكێن ئه‌مریكا ژى هه‌مى هاتن و خوه ل سه‌ر ڤێ ترومبێلێ فێركرنه هاژۆتنێ، ب گۆر ستراتیژیا ئه‌مر یكا و جڤاتێن برێڤه‌برنێ هنده‌ك هیلێن سه‌رچوونێ داناینه، وه‌كو دى هه‌ر سه‌رۆك و ستایلێ خوه یێ برێڤه‌برنێ هه‌یه، ده‌ستیردانا وان ژى هه‌ما (عمومى) یه، جۆرج بۆش گه‌له‌ك جوان هاژۆت و سیاسه‌تا وى وه‌كو تۆلڤه‌كرنێ بوو به‌رسڤدانه‌ك بۆ هنده‌ك ره‌فتارێن هاتینه كرن چ لایێ عیرقێ یان عیراقیان ڤه، كلنتون هات و شه‌نسێ وى گه‌له‌ك ئاریشه نه‌بوون، وه‌كو بێهنڤه‌دانه‌كێ بوو، ئه‌و ژى مابوو ب ئاره‌زو و خۆشیكێن دلێ خوه ڤه، ئۆباما هات و گه‌له‌ك ب هێدى هێدى برێڤه‌دچوو، ئه‌وێ نه‌رمیێ گه‌له‌ك گل و گازنده بۆ ئینان، پیستێ ره‌ش ل كۆچكا سپی و سیاسه‌ته‌كا خۆلیكى ئه‌نجامددا دخواست براگماتیك دارى بگریت، دلێ كه‌سێ ژ خوه نه‌هێلیت، باشترین بیرهاتنا مه ل گه‌ل وى ئه‌و بوو كو فرۆكێن سه‌ربازى هنارتینه سه‌ر داعشان ب دیتنه‌كا گشتى، به‌لێ ئه‌ڤه ترامپ هات و هێشتا وه‌كو ناڤه‌ندێن سیاسى یێن نێڤده‌ولى دبێژن (هێشتا یێ ل بن راهێنانا سه‌رۆكاتیێ دا)، هات و گه‌له‌ك سپرایز ل گه‌ل خوه ئینان، هه‌ر كو 180 پله‌یان به‌ره‌ڤاژى شێوه‌یێ ئۆبامایى یه، رۆلێ خوه پتر دده‌ته نیشادان، هه‌ر وه‌كو ئه‌و ترومبێلا مه به‌حس ژێ راهێنانا كو ژ 40 نه‌بۆریت، به‌لێ هه‌روه‌كو یێ ل سه‌ر 120 دفریت و به‌ر ب ئیرانێ ڤه یێ دچیت!!، گه‌فێن وى یێن راسته‌وخوه بوونه جهێ دلخۆشیا سه‌رانێن ئیرانێ، كو نیازێن دكفشن ل هه‌مبه‌ر یێ به‌رانبه‌ر، رویێ راست یێ ئه‌مریكا دا زانین د مه‌زنترین هه‌ڤسه‌نگیا سیاسیا جیهانێ دا، بۆ خه‌لكى دا دیاركرن، یا كو گه‌له‌ك سه‌رۆكێن ئه‌مریكى چاڤێن خوه لێ دنقاند، ترامبى د ساده‌یا خوه دا هه‌مى خال دانانه ل سه‌ر په‌یڤان، ب وێ ئێكى كو مرۆڤه‌كى سه‌رمایه‌داره و كه‌سێن سه‌رمایه‌دار ب مێشكه‌كێ بیركارى سه‌رده‌ریێ دكه‌ن ل گه‌ل هه‌مى كریاران، به‌لێ ئه‌ڤێ سه‌رده‌ریێ به‌رسڤدانا ئیرانێ ژى به‌ره‌ڤاژه، چونكو سیاسه‌تا وێ یا ئاڤى یه و ب نه‌رماتى سه‌رده‌ریێ دكه‌ت، دێ بیته ده‌رگه‌هه‌ك بۆ هندێ كو گه‌له‌ك داخۆیانێن وێ یێن پیچشاڤ بۆ جیهانێ بده‌ته په‌سه‌ندكرن، دبیت ل ده‌مێن بهێن بۆ هه‌مى جیهانى دیارببیت، ئیرانێ وه‌كو جۆره‌كێ سه‌رخۆشه‌كى، كو چو حسێب ل سه‌ر نه‌بن وه‌كو شێته‌كى ته‌ماشه‌كرنه گۆتارا ترامپ كر. ئۆپشنا لێدانا ئیرانێ ب رێیا عیراقێ ب نیازه‌كا ئه‌مریكى تشته‌كى دووره، ژ به‌ر دو ئه‌گه‌ران، ئێك به‌رى نوكه تاقیكریه، ب وى شه‌رێ هه‌شت سالى یێ سه‌دامى و به‌رهه‌مێ وێ و یا ل دووڤرا هاتى، كو پشتى هینگى كریه داگیرانا كۆێتێ تێرا خوه ئه‌و به‌رهه‌م ڤه‌چنى، چونكو هه‌م شه‌ڕ بازرگانیگرنه و مه‌زاختن و فرۆتنا چه‌ك و ته‌قه‌مه‌نیێ خوه‌یه. ئه‌ڤه ئێك یا دویێ ئیران شیایه ب رێیا شیعه‌یان ده‌ستێ خوه موكم بكه‌ت به‌لكو عیراق یا داعویرایى، گه‌له‌ك ب زه‌حمه‌ت ترامپ دشێت عیراقێ ژ ناڤ كێلبێن ئیرانا گه‌ور دا بینیته ده‌ر نه‌خاسمه پشتى كو حه‌شدا شه‌عبی كریه سازیه‌كا په‌سه‌ندكرى قانوونى ب رێیا په‌رله‌مانێ عیراقێ، ئیرانێ ب رێیێن قانوونى تبلا خوه كریه د چاڤێن ئه‌مریكا دا، ئه‌ڤجا ترامپ چاوا دێ كاریت ب وێ سه‌رده‌ریا زه‌رته‌كانه ئینیته ده‌ر، دووماهى ره‌نگڤه‌دان نڤیسنگه‌ها ترامپ بزاڤێن وێ ئێكێ دكه‌ن كو له‌شكرێ شۆرشگێرێ ئیرانێ بكه‌نه د ناڤ لیستا تیرۆرێ دا و بقه‌رسینن، دا ئه‌و و حه‌شد ب هه‌ڤرا نه‌بنه قه‌باره‌كێ ب هێز ل ده‌ڤه‌رێ، ئه‌رێ ئه‌و ب ڤێ سه‌رده‌ریێ دێ شێت سینگه‌كى لێده‌ت؟!. هه‌كه لێبده‌ت ژ دێ چاوابیت؟!.
سه‌ندیكایێن ریكلاما سیاسى!!
د لۆژیكا پیشه‌یى و جه‌ماوه‌رى و مللى و ئه‌كادیمى دا ئه‌ڤه دو ئیدیه‌مێن ژێك سل و ژێك دوورن، وه‌كو گونه‌هه‌كێ یه، كوفره‌كا سیاسى، عه‌شقه‌كا قه‌ده‌غه‌یه سه‌ندیكا سازیه‌كا پیشه‌یى یه وه‌كو پارێزه‌ره‌كى یه بۆ به‌ره‌ڤانیكرن ژ مافێن وێ ته‌خا پیشه‌یى یا ئه‌و سه‌ندیكا به‌رگریێ ژێ دكه‌ت، به‌لێ ل ڤێره پارێزه‌ریێ ژ كێ و ل به‌رامبه‌ر كیژ لایه‌نان گازى دكه‌ت؟!، هه‌لبه‌ت ژ ده‌سهه‌لاتێ و هه‌كه مافه‌كێ وى هاتبیته خوارن، ده‌سهه‌لات ژى ل ڤێره كینه؟ پێ نه‌ڤێت پێكهاته‌یا حزبێن سیاسینه، باشه چاوا سه‌ندیكایێن مه ژى بخوه وه‌كو په‌رله‌مانه‌كێ بچووك هاتینه دروستكرن؟!، هه‌كه نه‌ك ل سه‌ر بنیاته‌كێ پیشه‌یى یان مللى نه‌بیت؟!، باشه ئه‌و كه‌سێن خوه داینه ل ژێر خیڤه‌تا ڤێ سه‌ندیكایێ دێ دلۆڤانیا یه‌كسانیێ ژێگریت؟!، پا هه‌كه یێ سه‌ربه‌خوه بیت؟ ئه‌ڤه ژ چ دهێت، راسته ل سه‌ر بنیاتێ ففتى فتیى یه و موحاصصیێن حزبی هاتیه، ئه‌ڤه بۆ من ئه‌ڤه بۆ ته… نه‌به‌س سه‌ندیكایێن به‌ریك ڤالا یێن مه، وه‌كو دزانم به‌رى قه‌یرانێ به‌ریكا وان یا ڤالا بوو به‌لێ نها هه‌ما قه‌یرانه و هێشتا به‌ریكا وان پاقژتره ژ …، ژ بلى سازیێن دیتر یێن حوكمه‌تێ، به‌لێ یێ خانه‌نشیان بۆ نموونه ل سه‌ندیكایه‌كا كرێكاران بلا بیت ـ چونكو ئه‌ز كه‌سێ لێ نانیاسم و كه‌س نه‌بێژیت به‌حسا منه ـ كه‌سه‌ك عه‌رد و ئه‌سمانان زیره‌كتر و زاناتره و هه‌ژیتره وێ پلێ بده‌نێ یان به‌خشیه‌كێ بده‌نێ ژ هه‌ڤاله‌كێ خوه، به‌لێ چونكو ژ حزبه‌كا دیتره، دى َ بیته غه‌دره‌كا سۆر و سۆر، ئه‌ڤه ژى دێ بێژن ل سه‌ر بنیاته‌كێ دیمۆكراتى هاتینه ژێگرتن و ب ده‌نگدان، چو جاران ده‌نگێن مه دادوه‌ریێ ناكه‌ن، ئه‌و ژى ژ چ دهێت؟ دیمۆكراسی دچیته د خانه‌یا سیاسه‌تێ دا، سیاسه‌ت ژى یا دووره وان به‌هره‌یێن ل بن سیبه‌را سه‌ندیكایان ژیان دكه‌ن، له‌ورا داهێنه‌ره‌ك یان رۆژنانه‌نڤیسه‌ك یان نۆشداره‌ك یان ئه‌ندازیاره‌ك، مامۆستایه‌ك دێ بیته قوربانێ حزبان، مه‌زنترین گونه‌هه ئه‌م ڤێ غه‌درا هنده مه‌زن ل ره‌شه‌نبیریا خوه دكه‌ین، ما پیشه و تایبه‌تمه‌ندى دبنه ئێخسیرێن سیاسه‌تێ؟!، حزبه‌ك هندى ببیته پشك بۆ رۆژنامه‌نڤیسه‌كى، به‌لێ ئه‌و نه‌شیت شیانێن وى یێن به‌رهره و داهێنانێ بۆ بكڕیت، چونكو دهێنان و قاره‌مانى ناهێنه كڕین!!، خودێ دده‌ره‌ونا تاكان دا دده‌ت نه‌ك حزب و گرۆپان، ئه‌م هه‌مى د خه‌مسارین و گونه‌هبارین ب ڤێ گونه‌هێ، هه‌ر ئێك ژ مه دخوازیت خوه ل به‌ر حزبا خوه شرین كه‌ت و حلى بكه‌ت، خوه نیشا بده‌ت كو ئه‌ڤه ئه‌زێ هه‌ڤركیا فلان حزبێ دكه‌م و ئه‌و یێن هه‌ڤركیا حزبی كه‌ن ل گه‌ل حزبا مه، چونكو چو پایسیك نینن بۆ خوه پێ بسه‌ركه‌ڤم سیكه‌كا گه‌رمه و ب ره‌واجه بۆ ریكلاما من یا سیاسى، هه‌ما ئه‌ڤه باشترین شێوازه سیكا خوه پێ گه‌رم بكه‌م ل ده‌ف به‌رپرسێ خوه یێ حزبى یێ ل سه‌ر من دا، ئه‌ڤه ئه‌ز و ئه‌ڤه دلسۆزیا من بۆ حزبا من، ئه‌ز هنده یێ شه‌ریفم بۆ حزبێ به‌لكو بۆ جارێن بهێن بنگه‌ها حزب به‌حسا من ب باشى ل سه‌رى بكه‌ت و ناڤێ من ل ده‌ف فلانكه‌سى بینیت، ئه‌و ژى دێ ناڤێ من بهیسیت و به‌لكو تشته‌كى بۆ من بكه‌ت بۆ جارا بهێت ڤێجا كا گه‌را هه‌لبژارتنایه یان بۆ پارڤه‌كرنا كێكێ یه كا چو تشته، هه‌كه خوه ده‌رهه‌مه‌ك ب سه‌ندیكایان ڤه ناهێت ژ بلى سه‌رگێژى و ئیفلاسێ ژ كیستێ مالا خوه، هه‌ما ب تنێ سیكه‌كى بۆ حلیكرنا پیستێ خوه ل به‌رامبه‌رى جه‌نابێ جه‌نابى!!. راسته ل پرانیا جڤاكێن رۆژهه‌لاتى ئه‌ڤ فشار و مایتێكرنێن حزبى هه‌بووینه، به‌لێ پا مه ته‌خسیرى نه‌كریه و چ د چڕا نه‌هێلایه، شه‌رێن باره‌گایێن حزبى به‌س نینن، یێن پیشه‌یى ژى مه دانانه سه‌ر!، ب دیتنا من پێشكه‌فتنا پیشه‌یى بۆ بلندكرنا به‌رژه‌وه‌ندیا گشتى هه‌كه خودان به‌هره بكه‌ت، وه‌كو وه‌رزشڤانان، نڤیسه‌ران، هونه‌رمه‌ندان .. هتد. نه ب رێكا رێكخراو و سه‌ندیكایێن پیشه‌ى دێ شێت حنێرا خوه گه‌هینیت، سه‌ربۆر ژى بۆ مه دیارن، كو هه‌ر ملله‌ته‌ك ب ناڤێ به‌هره‌مه‌ندێن خوه دیرۆكا نه‌خشاندیه و شوونپلێن داهێنه‌ران ددیارن و ئه‌ون بالیۆزێن وه‌لاتین خوه ل بیابانا ڤێ جیهانا مه‌زن.
نيشاندان
WP Facebook Auto Publish Powered By : XYZScripts.com