(په‌یامه‌ك ژ وژدانێ) به‌لاڤۆكه‌كا مه بوو ل سه‌ر فه‌یسبۆكى، ژ به‌ر گرنگیدانا خه‌لكى و لایك و كۆمێنتان، مه ڤیا بكه‌ینه گۆتاره‌كا فه‌رمیتر، مه ل سه‌ر هه‌لبه‌ستڤانه‌كێ دهۆكێ به‌لاڤكر، كو هه‌مى خه‌لك رۆلێ وى د شه‌ڕێ دژى داعشا خویناوى دا دزانیت چه‌ندێ مه‌زن بوو. ژ بلى هندێ كو وه‌كو هه‌ڤاله‌كێ دلسۆز و رحسڤك، كه‌سه‌كێ جوامێر و مرۆڤانی بوو، ژ بلى خزمه‌تكرنا وى ب هه‌لبه‌ستێ مه بێى وى پسیارا كه‌سێن نێزیكى وى كرن، هه‌مى دكۆك بوون كو یێ یێن دلۆڤانه و دلنازكه یێ نه‌رمه و حه‌ز دكه‌ت هاریكاریا خه‌لكه‌كێ پێدڤى بكه‌ت، مریێ هه‌ڤالێ خوه‌یه.به‌لێ حنێرێن وى ژ بلى داهێنه‌ریا وى یا هونه‌رى، مۆزیكێ و سترانێ و شانۆیێ و ئێكه‌م كه‌س بوویه د ڤى بیاڤى دا كاركرى، یا مه‌زنتر ئه‌و هاندانا وى یه كو ملێ خوه دایه به‌ر باره‌كێ گران پتر ژ سازیه‌كێ وه‌كو ئه‌ركێ خوه یى نشتیمانى دیتیه، پتر ژ وه‌زیره‌كى ب شیانێن خوه و ل ده‌مه‌كێ گونجایى بوویه خودان ل دۆزا خوه، ئه‌وى ب تنێ ل ره‌خه‌كی و پێشمه‌رگه‌ی ل ره‌خه‌كی ئه‌ڤ شه‌ڕێ دژوار دكر، ب ملیۆنان پاره هاتنه مه‌زاختن بۆ چه‌ك و ته‌قه‌مه‌نی، ئه‌وی جوامێری ژ به‌ریكا خوه مه‌زاختن كر، شه‌ڤ و رۆژ دكرنه ئێك بۆ پالدانا ملله‌تى و پێشمه‌رگه‌ى ژى ب هه‌ڤرا، ئه‌وی هه‌لبه‌ستڤانی مۆشه‌كێن مه‌زن ل دوژمنی ددان وه‌ختێ دگۆتێ “لكم عربستانكم و لی كوردستانی”، رۆلێ شڤان په‌روه‌ر دگیرا ده‌مێ ل سالێن هه‌شتێان، ژ بلی ئه‌و شه‌ڕێ وی دكر پێشمه‌رگه ژى گه‌رم دكرن ب په‌یڤا خوه یا ب هێز و ئاوازێن خوه، ژ ره‌خه‌كێ دی ڤه ژی ملله‌ت ب هه‌می چینێن خوه ڤه ب گه‌رم دكر، دینامۆیێ مۆرالا ملله‌تێ بوو، ئه‌رێ كێ گۆتیێ سحه‌ت خۆش یان یه‌لا خێر..؟؟ ئه‌و ژی شه‌عبان سلێمانێ مه كوردانه نه شه‌عبۆللا یێ مسرێ یه، فه‌ره ب وژدانا خوه ل گه‌ل ئاراسته‌كه‌ین؟ مانه هه‌ژى یه بهێته خه‌لاتكرن به‌رى ـ خودێ نه‌كه‌ت ـ ئه‌مانه‌تێ خوه‌دێ ژێ بهێته وه‌رگرتن؟ من خواست ئه‌ز ژى وه‌كو پێشمه‌رگه‌ك نه‌ك وه‌كو نڤیسه‌ره‌ك یان رۆژنامه‌نڤیس ڤێ گۆتارێ وه‌كو خه‌لاتكرنه‌كێ بیت، جۆره سپرایزه‌ك بیت، یانژى ببیته ده‌سپێشخه‌ریه‌ك كو لایه‌نه‌كێ پێشمه‌رگاتى وى هه‌لبه‌ستڤانى خه‌لات بكه‌ت، هه‌كه ئاماژێ بده‌مه سه‌ربۆرا خوه، گه‌له‌ك شه‌ڕا ئه‌م دچووینێ مه هه‌لبه‌ستێن وى بۆ خوه دكرنه مۆرال و مه‌تال ل وان چۆل و ده‌شتان ده‌نگێ وى وه‌كو كه‌وه‌كى دقه‌بیا ل به‌رامبه‌ر دوژمنى ئه‌م سه‌رگه‌رم دكرین و پێشمه‌رگێن مه ژى ب سه‌رگه‌رمى رادهێلانه دوژمنى. پشتى كۆمه‌كا كۆمێنتان هاتین هه‌مى بۆچوون بۆ هندێ دچوون كو ب دروستى ئه‌و هه‌لبه‌ستڤان هه‌ژى یه و هێژ كێمه مه ل همبه‌رى وى گۆتى، وه‌كو هه‌لبه‌ستڤانێ كورد به‌ده‌ل ره‌ڤۆیى دیاركری كو هۆزانێ په‌یامه‌كا مرۆڤاتى و نه‌ته‌وه‌ى و جوانى هه‌یه، ب زه‌حمه‌ت مرۆڤ بشێت جهێ خوه د دلێ هه‌ر زارۆ بچووك و مرۆڤێن راست دا بگریت، ب سه‌رفه‌رازى د ته‌وازوعا وى دا گه‌له‌كه هه‌ر وكو سه‌ره‌دانا من یا دووماهیێ بۆ دهۆك و ده‌مێ كاك شه‌عبان ل گه‌ل هنده‌ك هه‌لبه‌ستڤانان كرین، سه‌را من داین ل تاخى برۆشكێ و چاوا بچووك ل دۆر كاك شعبان كۆمبووین من ل گه‌ل خوه دگۆت: تو گه‌هشتیه دامێ شعبانێ ده‌لال د حه‌زژێكرنا جیلێ داهاتی دا، شه‌عبان عاشق و پێشمه‌رگه و خودان هه‌لویست و ما ل سه‌ر رێكا خوه.
هه‌لگرد قه‌هار هه‌لبه‌ستڤانێ پێشمه‌رگه گیان ژى دبێژیت: ئه‌وا شه‌عبانی كری بۆ خزمه‌تكرنا وه‌لاتێ خوه ژ یا چ پێشمه‌رگا كێمتر نینه، ده‌ستخۆشیێ لێ دكه‌م و دبێژمێ به‌رده‌وامبه قوربان، چونكو تو بهایه‌كێ پیرۆزی، هه‌ڤاله‌كێ وى دبێژیت، مرۆڤه‌كێ كوردپه‌روه‌ره، هه‌ڤاله‌كێ راسته، حه‌ز دكه‌ت ده‌ستێ هاریكاریێ بۆ هه‌ر كه‌سه‌كی درێژ بكه‌ت. ل دووڤ شیانێن خوه، خوه مه‌زن ناكه‌ت، حه‌زژ وه‌لات و وه‌ڵاتیێن خوه دكه‌ت، پێشمه‌رگه‌ك دبێژیت: هندى په‌سنا وى بكه‌ى كێمه ژ به‌ر رۆلێ وى د شه‌ڕێ مه ل گه‌ل تیرۆرستێن داعش هیڤی یه مافێ وى نه‌هَیته ژبیركرن. هه‌ڤاله‌ك دبێژیت: هێشتا ئه‌م فێرنه‌بووینه رێزێ ل وی كه‌سی بگرین یێ خزمه‌تێ دكه‌ت ب ساخی هه‌تا وه‌غه‌ردكه‌ت، ژنوی رێوره‌سمێن ماته‌مینی دێ گێرن و ب به‌ژنوبالا وی بێژن، ئه‌رێ بۆچی ده‌مێ یێ ساخ مه رێز لێ نه‌دگرت دا ب چاڤێن خوه دیتبان؟!
نووترين نووچه
- سەرۆك بارزانی ب گوهلێبوونا دەنگوباسێ مالئاڤاییكرنا ئیبراهیم گاباری خەمبار بوو
- ئامینا زكری: سەرۆك بارزانی ژێدەرێ باوەری و هێزا ئافرەتا كوردە
- رێككەفتن بۆ كڕینا پەترۆلا كوردستانێ هاتیە كرن و تنێ هنارتن مایە
- ژ ترسا كارڤەدانێن پارتی و بایكۆتكرنا هەلبژارتنان دێ بەغدا بڕیارەكێ ل دۆر مووچەی دەت
- هەرێما كوردستانێ بوویە پەناگەهەكا ئارام بۆ ئاشۆرییان
- نێچیرڤان بارزانی ل گەل شاندەكێ ئاشۆرییێن ئەمریكا كۆمبوو
- بۆ كونترۆلكرنا میلیشیایان ئیراقێ پێدڤی ب قانوون و دادگەهێ هەیە
- هەلبژارتن ل ئیراقێ گوهۆڕینان پەیدا ناكەن
- ئیراقێ پێدڤی ب دادگەهەكێ هەیە كو ب رێیا پشتەڤانییا مادەیا 92 یا دەستوورێ بهێتە دروستكرن
- سەركرداتی و حوكمەت و خەلكێ ئیماراتی هەردەم هاریكار و پشتەڤانێن كوردستانێ بوون
شیرزاد نایف
هه‌رێما عه‌ره‌بستانا كوردستانێ
پشتى ئه‌ڤ شلقا مه‌زن یا ده‌ڤه‌را مه‌كه‌ڤتى ژ ئه‌نجامێ وان گوهۆرینان هه‌ر ژ ده‌سپێكا بوهارا عه‌ره‌بى و هه‌تا كو هه‌مى ڤه‌رێژا وێ ب سه‌ر مه دتا هاتى و ل مه كریه زڤسته‌كا كوردى هه‌مى جۆرێن خوینان ته‌ڤلى هه‌ڤ بوون، ئه‌وبوو رێژه‌كا زۆر یا برایێن عه‌ره‌ب و ب گه‌له‌ك جۆرێن عه‌ره‌بان د ناڤا مه دا ئاكنجیبووین، بووینه هه‌ڤسووی و بووینه خودانێن مالێ وه‌كو ئه‌و دبێژن (ئه‌ڤه وه‌لاتێ مه‌یه) چونكو ب فه‌رمى راسته وه‌لاتێ وانه، دستوورێ عیراقێ ب پرانیا ده‌نگان په‌سه‌ند كرینه، ناڤبه‌ر ژى ماددێ 140 یه ژ دستوورى، ژبلى خزمانى و جۆتبوونێ ل گه‌ل وان وه‌كو وى كابرایێ عه‌ره‌ب یێ هینگى ئێك ژ كیخه‌یێن مووسل بوو ل ناڤا داعشان هاڤێتیه كوردان و پێشمه‌رگه‌ى و گۆتى لازم بكه‌ینه ده‌ر و پاشڤه ببه‌ین و پشتى هینگى ژى هاتیه هه‌ولێرێ و ل وێرێ ب به‌ژن و بالا پێشمه‌رگه‌ى گۆتى و گۆت كو ئه‌م خال و خارزاینه و ئه‌و نه‌مینیت یێ مه ژێكڤه‌بكه‌ت و .. هتد ژ ڤان سترانان، ل هه‌ولێرێ هند عه‌ره‌ب لێ دژین بووینه كه‌یمنه‌یه‌كا زۆرینه، ل هۆكێ خانى و عیماره و كۆمپانى هه‌نه، ئه‌ڤه پتریا وان عه‌ره‌بێن عیراقێ نه، یێن مووسل و به‌غدا و پارێزگه‌هێن دیتریێن عیراقێ هه‌ر وه‌سا هنده‌ك جۆرێن دى یێن عه‌ره‌بان هه‌نه، یێن لوبنانێ و یێن ئوردن و سووریێ و مسرى و .. هتد. ئێدى وه‌لێهاتیه ئه‌و ب خوه ژ ئێكو عاجز دبن، (مێهڤان ژ مێڤانى یێ عاجزه و خودان ژى ژ هه‌ردویان عاجزتره)!!، هه‌كه ب دیتنه‌كا لۆژیكى سه‌خكینه بابه‌تى ب راستى بابه‌ته‌كێ هه‌ستیاره، مرۆڤ راستیێ بێژیت نه‌كو خه‌لكێ مه یێ كورد ل كوردستانێ ژ مرۆڤى تۆره بن راستیێ نه‌بێژیت، ناچیته سه‌رى، چونكو هندى هند مه كوردان نه‌خۆشی و ئێش و ژان و سته‌م دیتیه ب ڤى زمانێ عه‌ره‌بى ئه‌ڤه ساله‌ها ساله ئه‌م ب وى زمانى دهیێنه ئه‌شكه‌نجه‌دان، ئێدى وه‌لێهاتیه خه‌لك ب بهیستنا ڤى زمانى بێچاره بوویه، ئێدى یێ هه‌ما ناڤێ عه‌ره‌بى ژى بینیت یان ب كوردى باغڤیت، یان تێكهه‌لیا وان بكه‌ت، خه‌لك ژ وى كه‌سى ژى سل دبن، ژ ره‌خه‌كێ دیڤه ژى عه‌ره‌ب ژى گازندان دكه‌ت و دبێژن كورد ژ پاتكێ ڤه سه‌رده‌رێ ل گه‌ل مه دكه‌ن، پرۆفیسۆره‌كێ عه‌ربێ مووسل ئه‌ز دنیاسم گه‌له‌كێ كه‌یفخۆشه ب كوردستانێ و گه‌له‌ك جاران هاریكاریا پێشمه‌رگه‌ى كریه ل دووڤ پێچێبوونا خوه وه‌كو خۆبه‌خشیه‌ك، دبێژیت مه عه‌ره‌بان ل كوردستانێ به‌س تاكه كه‌سه‌ك هه‌یه حه‌زژ مه دكه‌ت و به‌رگریێ ژ مافێن مه دكه‌ت، هه‌كه ئه‌و نه‌بیت دێ مه كه‌نه ده‌ر ژ كوردستانێ، ئه‌و ژى سه‌رۆك مه‌سعود بارزانى یه، گۆت ل ئۆفیسا مه وه‌كو دوژنه‌كێ ددانن، كه‌س خوه ل مه ناكه‌ته خودان. ئه‌ڤجا كى دێ ڤێ به‌لانسێ راگریت؟!. ئه‌ز دبێژم فه‌ره ل سه‌ر مه و بۆ مه باشه ئه‌م ره‌وشه‌نبیریه‌كا عه‌ره‌بى یا ب هێز ب خودان بكه‌ین كو بكارین ب زمانێ میدیایێ بزانین هه‌ما چو نه‌بیت به‌رسڤه‌كا ئه‌قلانه بده‌ین ل به‌رامبه‌رى وان، چو كه‌نالێن ئه‌سمانى چو ده‌زگه‌هێن عه‌ره‌بى یێن ب هێز مه‌نین، كو بكه‌ینه د سه‌رێ عه‌ره‌بان را كو ئه‌ڤه مه‌زلۆمیه‌تا مه‌یه ئه‌ڤه مافێ مه‌یه هه‌وه خواریه، ببنه پشتبه‌ستیه‌ك بۆ مه، مه چه‌ند پێدڤى ب تورك و فارسان هه‌یه كو ئێدى بۆ مه ببنه دۆست، عه‌ره‌بى پترن، هه‌ر وه‌كو راسپارده‌یێن بابێ كارێزما كوردى مسته‌فا بارزانى دگۆت كو چه‌ندى تو دوستان بۆ خوه زێده بكه‌ى باشتره ژ دوژمنان
زێده بكه‌ى. وه‌كو تو قه‌نجیا خوه بكه و د ئاڤێ دا به‌رده!!.
ئاخا سه‌را!
ئاخا سه‌را.. خۆلیا سه‌رایه، به‌لێ دبیته تاجا سه‌ران ژى، به‌لێ كه‌نگى؟! ب چه‌ند هه‌لۆیسته‌كان: ل ده‌ف ژنان به‌لێ هه‌كه ده‌مێ ب دوگیان و ئاریشا زارۆبوونێ هه‌بیت، ئه‌ڤ ئاخا ژن دخۆن یا سۆره ره‌نگێ، هنده‌ك ژن سه‌رێ خوه پێ دشوون، دا پرچا وان نه‌رم ببیت یان درێژبیت، ده‌مه‌كى ل مووسل هاته فرۆتن، فرۆشیارێن وێ دگه‌ریان و گازى دكر. یان دۆخه‌كێ ده‌روونى هه‌بیت، یان ل ده‌ف شیعه‌یان ژ گۆرا حوسینێ ئه‌و ژى ب قه‌بارێ نۆكه‌كێ ژ به‌ر پیرۆزیا وى، یانژى هه‌كه نه‌خۆشیه‌ك هه‌بیت، توخمه‌كێ ژ خوینا وى كێم بیت و د ناڤ ئاخێ دا هه‌بیت، ئه‌و ژى ب راسپارده‌یێن نۆشدارى.. ژبلى ڤان دۆخان مار ژى یێ به‌رنیاسه ب خوارنا ئاخێ چونكو یێ روویته و بێده‌رامه‌ته، ب ئاخێ دژیت!!. ڤان رۆژان فلمه‌كێ سینه‌مایى ده‌ركه‌فتبوو ل كه‌ناله‌كى، گرۆپه‌ك ل بیابانێ برێڤه دچن، خوارن و ڤه‌خوارن ب ده‌ست وان ناكه‌ڤیت، به‌را دخۆن و ئالیسن ژ برسان دا، پاشى دگه‌هنه جهه‌كى مارا دبینن، رادبن بۆ خوه سه‌رژێدكه‌ن و دبژێرن، به‌لێ هه‌كه تو ل جهێ وان بى و مار ژى ب ده‌ست نه‌كه‌ڤیت، دێ نه‌چار بى ئاخێ خۆی، دا نه‌مرى و هینگى حه‌لال دبیت، راسته چو حوكمێن شه‌رعى نین ب راشكاوى خوارنا ئاخێ حه‌لال كه‌ن یان حه‌رام بكه‌ن، به‌لێ هه‌كه ببیته ده‌رمان هینگى حه‌لال دبیت (قال (ص): المعده بیت كل دا‌و و الحمیه رأس كل دوا‌و فأعگ نفسك ما عودتها) به‌لێ وه‌كو هه‌كه یا حه‌رام بیت ژى (وكلوا من گیبات ما رزقناكم). خوارن هه‌ر چاوا بیت دێ خودێ قه‌تینیت، راسته ژى هه‌كه خودى زینده‌وه‌رى بده‌ت دێ ره‌زقێ وى ژى ل گه‌ل ده‌ت و ل گه‌ل سه‌رێ وى دێ ده‌ت، كه‌س ژى نه‌مریه ژ برسان دا، به‌لێ هه‌ر وه‌كو قه‌یرانا مه ژى نه‌ك یا برسێ یه، دبیت قه‌یرانا پشتى به‌ترانیێ بیت، یانژى یا بێداوه‌ریێ بیت، چونكو چ ژ مه یێ كێم نینه، برنجى هه‌ما كه‌س ناخۆت، ئارێ سپى خه‌لك دفرۆشیت، خه‌لك فێرى مه‌زاختنا گران بوو و نها كه‌فته له‌پێن خوه، قست و ده‌ین بوونه ئاریشه خه‌لك به‌ربوو ئێكودو، مانه ب سه‌ر و ستویێن ئێكدو ڤه، ڤێجا هه‌ما قه‌یران ئه‌وه ئه‌م لێك ببوورین، حه‌زژ هه‌ڤدو بكه‌ین، گۆشتێ ئێكودو نه‌خۆین، خوه ل گه‌ل خوه زه‌لال بكه‌ین، ئه‌ڤا ب سه‌رێ مه هاتى و دهێت هه‌مى (قه‌صاص) سزایێن حه‌مه‌ربوونا مه‌یه، مادێ چ ل مه‌هێت؟، ماده‌م ئازۆقه یێ مشه و به‌ریك دڤالانه، هه‌كه ب دروستى قه‌یران با، ئه‌م هه‌مى قه‌له‌و نه‌دبووین و مه‌شكا مه یا ل به‌ر ده‌ڤێ مه، برسا دروست ئه‌وه یا ئه‌فریقیا و كه‌مبۆدیا ئه‌وێن وه‌كو له‌ڤه‌نا زك مایه ب پشتێ ڤه، زكێن مه دتێرن و چاڤێن مه دبرسى، هه‌ر وه‌كو مێشكێن مه دبرسینه، ئه‌م دهشیارین و برێڤه‌دچین و ئه‌م خه‌ونێن نه‌خۆش ب ئێكودو ڤه دبینین، هه‌ر وه‌كو بایه‌كێ خرابكاریێ و نه‌دلۆڤنیبرنێ یێ ب سه‌ر مه‌دا هاتى و مه های ژ خوه نه، ئه‌م دبه‌ندكرینه ل نیڤا ئازادیێ دا، په‌نابه‌رین ل وه‌لاتێن خوه، هه‌ستا مه یا دیلكریه‌كى یه ئه‌ڤه ده‌هان ساله هێشتا كه‌هى و بسته نه‌بوویه، له‌ورا ئه‌م درازى نینین ب رزقێ خوه ئه‌ڤه گڕه، گڕه‌كه به‌ربوویه مه، چو جاران تێر نابین، مۆنیكا ل به‌ر ده‌رگه‌هێن مه‌نه و به‌ریك یا ڤالا، بۆچى دروار ئێدى به‌ریكا هه‌ما بلا نه‌به‌نه جلكێن مه، ما ده‌م ئه‌م هه‌مى بووینه خۆبه‌خش!!. هێشتا نه‌گه‌هشتیه وى راده‌یى ئاخێ بخۆین، به‌لێ ئه‌م هینگى دێ تێر بین، هه‌كو مسته‌ك ئاخێ دكه‌نه ده‌ڤێ مه. هه‌كه عه‌مه‌لێ مه یێ خراب بیت، هینگى ئه‌و ئاخا سه‌را دێ بیته خۆلیا سه‌را، به‌لێ هه‌كه عه‌مه‌لێ مه یێ باش بیت، هینگێ ئاخا سه‌را دێ بیته تاجا سه‌را!!.
شه‌ر ل سه‌ر پلانا شه‌ڕى
پلانه‌كا سه‌ربازى بۆ زرگاركرنا باژێرێ مووسل هاتیه دانان ژ لایێ گه‌له‌ك لایه‌نان ڤه، ئه‌وێن داناین ژى هه‌مى كه‌سانێن مه‌زن و خوه‌دى سه‌ربۆر و تایبه‌مه‌ندینه، پلانا ئۆپه‌راسیۆنا موووسل ئه‌ڤه پتره ژ دو هه‌یڤان یا به‌رده‌وامه و ل سه‌رێ زڤستانێ ده‌ستپێكر، پشتى مه ژى وه‌كو پێشمه‌گه ئه‌ركێ خوه یێ راسپارده‌كرى ب سه‌ركه‌فتیانه ئه‌نجامدا و نها ژى هێشتا ئه‌م یێن دهه‌لۆیستێ به‌رگیریكرنێ دا دبه‌رهه‌ڤین بۆ لێڤلێ ل دووڤدا، به‌لێ پشتى هێزێن عیراقى ژ حه‌شدا شه‌عبى و هێزێن دژى تیرۆرێ و پۆلیسێن فیدرال و یه كه‌یێن دیتر ژى كوو نها دناڤا شه‌ڕێ باژاران دا دكه‌ن، سه‌ختترین جۆرێن شه‌ری یه، نها ئه‌و وه‌كو یاریكه‌رێن یاریا فوتبۆلێ یێن شه‌رێن خوه دكه‌ن، ئه‌م ژى وكو ته‌ماشه‌ڤان یێن ل سه‌ر ده‌رجێن ستادیۆمێ دبینین، هه‌كه بخوینین راسته ئه‌و كه‌سێن دانانین بسپۆرێن سه‌ربازینه و خوه‌دى پله‌یێن مه‌زنن، به‌لێ جه‌ماوه‌رێ به‌رێ خوه دده‌ته ته‌پانێ باشتر دزانیت هه‌كه فلان یاریكه‌رى ئه‌م تشته كربا دا باشتربیت، نه‌خاسمه ئه‌و جه‌ماوه‌ر كه‌سێن نۆرمالن، ئه‌م ژی یێن ته‌ماشه‌دكه‌ینێ، نها ب ره‌نگه‌كێ گشتى پلانا مووسل دونیایێ هه‌میێ زانى كو باژار یێ هاتیه دۆرپێچكرن ژ هه‌مى لایه‌كى ڤه، ته‌نها ئێك میحوه‌ر مابوو ڤه‌كری ل دووڤ حیكمه‌یا سه‌ربازى یا به‌حت، به‌لێ پشتى ده‌مه‌كه‌ێ زووتر به‌رێ حه‌شدا كه‌فته ڤى میحوه‌رى ژ لایێ رۆژئاڤا و رۆژئاڤایێ باكۆر ڤه فرۆكخانه‌یا تله‌عفه‌ر ڤه، هاتن و ئه‌و رێك ژى لێ بڕى، ئێدى ئه‌و هه‌مى قه‌باره و هێزا داعشێ یا فه‌ره بوو به‌رێ وێ بكه‌ڤیته میحوه‌رێ گۆره‌پانا فلیێل ـ ئه‌سكى مووسل ـ وانكێ ـ كه‌سكێ ـ عیازیه ـ ته‌لعفه‌ر ـ ژێریا شنگال ـ به‌عاج. هه‌كه ئه‌ڤێ ته‌ڤلیبوونێ شرۆڤه بكه‌ین كا به‌ر ب كیژ ره‌هه‌ندى ڤه دچیت، مگرتى ده‌ستێن ئیرانێ ل پشت فه‌رمانێن وانرا هه‌نه، د اچو پیلین بلیاردێ بخیته ئارمانجێ، دێ بیته به‌ڤلاتیه‌ك ل به‌رامبه‌ر پلانا ئه‌مریكى، ژ لایه‌كێ دی ڤه شه‌ر و شه‌ماته ژ ناڤ شه‌رێ شیعه‌مه‌زهه‌ب دور كه‌ڤیت و سه‌ركه‌فتن دابینتر لێ هێت، نه‌مازه ده‌ڤه‌ریا رووته و ده‌شته، شه‌ر ل ده‌ڤه‌را ده‌ه‌شت مسۆگه‌رتر و ئارامتره، وه‌كو به‌ره‌یه‌كێ به‌رگیرێ دێ لێهێت، هه‌ر وه‌سا ده‌ڤه‌را ئه‌و گولمچكا به‌فرێ دا نه‌گندریته به‌ر ب سووریێ ڤه، شه‌رێ دێ درێژتر لێهێت ل ناڤا مووسل، زیان دێ دژواتر بن، گرارا وان دێ ب ئاكرێ نه‌رم كه‌لیت، دا حازر بهێنه سه‌ر و بخۆن!! دێ كه‌ڤیته د ناڤبه‌را شه‌رڤانێن سونى ـ سونى دا، داعشا سونى و سونه‌یێن عیراقێ (هه‌كه ده‌برین یا شاش نه‌بیت) دێ پتر ئێكودو كوژن بۆ عه‌بادى و ئیرانێ نه‌خه‌مه، هه‌ر وه‌سا دێ پتر ده‌مه‌كێ درێژتر ده‌ته به‌رده‌وامیا ئه‌ركێ سه‌ربازى كو ببیته ده‌ستكه‌فته‌ك بۆ شه‌رعیه‌تكرنا كو ئه‌و ژى یێن شه‌ره‌كێ فه‌رمى دكه‌ن، نها ستادیۆما مووسل بوویه مینا بۆرسه‌یه‌كا بارزگانى هه‌ر بازرگانه‌ك ریكلاما خوه تێدا دكه‌ت و متایێ خوه بۆ جیهانێ نه‌مایش دكه‌ت، پلانا هه‌نێ وه‌كو پلانه‌كا ڤه‌كرى هاتیه دانان پتر ژ پلانه‌كا له‌شكرى یا بسپۆر، وه‌كو خشته‌كێ ڤه‌كرى ـ خه‌وارزمى لێهاتیه، كو هه‌ر كه‌سێ خواست متایێ خوه بینیت و ببه‌ته وێ بازارێ ب ره‌واج، ئێدى ژ چارچووڤێ خوه یێ عه‌سكه‌رى ده‌ركه‌فتیه، هه‌كه بهێلن كه‌سانێن له‌شكرى ب یه‌كه‌یه‌كا خوه یا رێكوپێك بێى مایتێكرنێن سیاسى نیڤده‌ولى كارێ خو یێ به‌حت بكه‌ن، ئه‌و ژى دێ زانن كا چ دكه‌ن!!. نوكه رزگاركرنا مووسل یا نێزیك دبیت، ئه‌و سه‌رێن مه‌زن شوونگره‌كێ دیتر ددانن و یا داناى ژى ئه‌و ژى ب دیتنا من حه‌له‌به، چونكو رقه ناهێته به‌راوردكرن ل گه‌ل مووسل كو ئاكنجیێن وێ 150 هزار كه‌سه كو مووسل ژ ملیۆنێ دبۆریت، ل گه‌ل رقه دێ كارن كه‌نه ستادیۆمه‌كا جهگیر، هه‌ردو ژى دناڤدارن ل رۆژهه‌لاتا ناڤین، هه‌كه نه كوتلكێن حه‌له‌بێ و كوتلكێن مووسل و سابینا ره‌قێ باشترین گرۆڤه‌نه، بۆ فرۆتنا لۆجستى!!.
ڤاكسیندان ل به‌رامبه‌ر گاز
بیرۆكه‌كا لێكتێگه‌هشتنێ (مژكره تفاهم) یا جوان ڤان رۆژان هاتبوو واژۆكرن د ناڤبه‌را رێكخراوه‌كا ساخله‌مى یا فه‌ره‌نسى و وه‌زاره‌تا ساخله‌میا مه، هه‌مانه‌گى ژى ل گه‌ل وه‌زاره‌تا پێشمه‌رگه‌ى هاته كرن بۆ لێدانا شرنقه‌كا ڤاكسیندانێ ل دژى نه‌خۆشیا په‌رسیڤى، بۆ پێشمه‌رگێن قاره‌مان ل به‌رۆكێن شه‌رى هاته دانان، ژ به‌ر ئه‌ركێ وى یێ سه‌خت و زڤر ل به‌ر دلۆڤانیا ڤى سه‌قایێ مه‌غدۆر ڤێ سڕ و سه‌قه‌مێ كو ل هنده‌ك جهان گه‌هشتبوو نێزیكى هه‌شت ل بن صفڕێ دا، كو به‌رگرى بۆله‌شێ شه‌ڕڤانى دروست ببیت، ل دژى ڤایرۆسێ په‌رسیڤى، باشبوو مه ژى وه‌كو پێشمه‌رگه‌ك ل به‌ره‌یێ شه‌ره‌فێ، شه‌نسێ شه‌ره‌فا لێدانا ڤێ ڤاكسیندانێ بده‌ست مه‌ڤه‌كه‌فت و شه‌ش هه‌یڤێن خوه مه ژى گرێنتى كرن كو په‌رسیڤ نه‌هێته مه، من پرسیار ژ نۆشدارێ پێشمه‌رگه كر ل دۆر ڤێ ڤاكسیدانێ و مه‌ره‌ما هه‌وا هه‌نێ، كو ب تنێ بۆ پێشمه‌رگه‌ى دێ هێته كرن، دیاربوو كو بهایێ ڤێ شرنقێ یێ گرانه و بۆ هه‌مى كه‌سان ناهێته دانان، ب تنێ ل فرۆكخانه‌یان بۆ وه‌لاتیێن بیانى دهێنه دانان یێن ته‌ڤلى سنۆرێ وى دبن، كو بهایێ هه‌ر ئێكێ دگه‌هیته 200 $، یانكو ب دو وه‌رقا ل سه‌ر وى دراوه‌ستێت یێ بۆ ددانن، به‌لێ بۆ پێشمه‌رگه‌ى بێ به‌رامبه‌ره، دیالۆگا مه گه‌له‌ك ره‌هه‌ندێن دیتر ب خوه‌ڤه گرتن هه‌تا گه‌هشتیه نڤیشكێ گۆتارا مه كو مانشێتى دیاركریه، ئێك ژ وان كریارێن یه‌ده‌كه یێن ل به‌رچاڤ دهێنه وه‌رگرتن، چونكو سه‌رمایا ئه‌ڤ ساله دێ یا توندوتیژ بیت، هه‌روه‌سا گاز یا كێمه و قه‌یرانه و حوكمه‌تا عیراقێ چو دلۆڤانى ب وه‌لاتیان نه‌بریه و هه‌ر وه‌سا سه‌قا ژى دلۆڤانیێ ب كه‌سێ نابه‌ت نه‌مازه ل ڤان رووبه‌رێن به‌رفره‌ه یێن به‌رۆكێن شه‌رى، مه ژى ئه‌ڤ هه‌مى ئۆپشنه ئینانه زمان و هه‌ڤته‌ریپ كرن، كا بهایێ به‌رمیلا گازێ ب چه‌ندێ یه و یا ڤێ شرنقێ ب چه‌ندێ یه، دو وه‌رقه‌یێن دۆلارى هه‌كه دابانه هه‌ر پێشمه‌رگه‌كى دا چه‌ند پێ شاد بیت دشیا به‌رمیله‌كێ بۆ خێزانا خوه و ئێكا دى ژى بۆ خوه بۆ سه‌نگه‌رى بكڕیت و د خالا خوه یا پاسه‌وانیێ دا سۆپا خوه پێ هه‌لكه‌ت، تیرا دكر بلا شرنقا فره‌نسا بۆ فره‌نسا مابا، نه‌خاسمه ئه‌و ژ مه زه‌نگینترن ب پترۆلێ، هه‌ه‌ر وه‌سا ده‌رمانێن وان ژى نه ئاریشا مه بوو مابان ل سه‌ر دلێ وان یان نه، هه‌كه ئێك به‌رمیلا گازێ ل ماله‌كا مه زێده‌بیت، هینگى دێ هاریكاریا كهره‌بێ ژى كه‌ت، چونكو هه‌لكرنا ئاگرى ب كه‌هره‌بێ (هیته‌ر و سپلێت) دێ گه‌له‌ك گازێ ژى ب خوه مه‌زێخیت. دبیت ئه‌ڤه كاره‌كێ خێرخوازى بیت، یان بۆ ڤه‌ژاندنا ناڤوده‌نگیا رێكخراوه‌كێ بیت، به‌لێ هه‌ر تشته‌ك ل سه‌ر كیستێ تشته‌كێ دیتره، هه‌ر وه‌كو میناكا ڤى شه‌ڕى كا كى یێ مفاداره و كى ته‌قه‌مه‌نیێ خوه دفرۆشیت دا ژه‌نگى نه‌بیت د ناڤ كۆگه‌هێن وى دا، هنده‌ك وه‌لاتان هێشتا چه‌ك و ته‌قه‌مه‌نیێن شه‌ڕێ جیهانى یێ دوویێ ماینه ل سه‌ر گوهێن وان، بۆ نموونه من بخوه تۆپێن سالا 1940 ل توركیا دیتینه و سنفێ من ب خوه ئه‌و بوو، مه ژ ناڤ گلیزى ئینانه ده‌ر و د ڤان شه‌ڕ و شه‌ماتان دا بكارئیناینه. ئه‌ڤجا مرۆڤ د هزار خوه دا ڤێ قه‌ره‌بۆكرنا هه‌نێ تشته‌كى ب تشته‌كێ بهاگرانتر بكه‌ت، پنیه‌كێ ژ ده‌لنگى ڤه كه‌ت ببته هچكى دێ رۆژه‌ك هێت پێدڤى ب ده‌لنگى ژى بیت، تو تشته‌كێ ئه‌رزان بكڕى دێ گران ل سه‌ر ته راوه‌ستێت، جلكێن بالا بكڕه دێ گه‌له‌ك پاره‌ى ل ئۆتى و دروارێ ده‌ى، تو ته‌حینێ بخوى، دێ پارێ قه‌یماغێ ل په‌یالێن چایێ ده‌ى دا ب جوانى بچیته خار، ئها ئه‌وه مژاره، دێ كه‌لوپه‌لێن باش بده‌ته پاسه‌وانان، گازێ بده‌نه وى و خێزانا وى دا پاره‌ى ل ده‌رمانان نه‌ده‌ى و شرنقێن ب دو وه‌رقا بكڕى دا په‌رسیڤ نه‌هێتێ، مژارا گران یێ ئه‌رزانه و ئه‌رزان یێ گرانه و ئه‌و زلكێ پشتا حێشترێ شكاندى!.
چێلا ب مكیاج!!
سیاسه‌ت ژى وه‌كو گه‌له‌ك ژنانه یێن ڤى سه‌رده‌مى كو ب زۆرى خوه جوان دكه‌ن و كلوپل دده‌ن، كو دڤێت هه‌مى ده‌مان یا مكیاجكری بیت دا كو عه‌یبێن وێ نه‌بینین و بۆ دیار بیت كو یا جوان و قه‌شه‌نگه، به‌لێ هه‌كه بارانه‌ك بهێت هه‌مى بۆیاغا وێ دێ ژێ چیت و دیلێت دبیت و وه‌لێدهێت كه‌س نیاس نه‌كه‌ت، ب راستى ژى هه‌كه مكیاج نه‌با ژى گه‌له‌ك كچان بازارێ خوه ب ره‌واج نه‌دكر ژى، راسته هه‌كو دبێژن هه‌كه مرۆڤ چێله‌كێ ژى میكاج بكه‌ت، دێ بیته شاهجوان یان فاتیما مه‌غربى (وه‌كو جیلێ كه‌ڤن، دنیاسن)!، به‌لێ مه‌ره‌ما من ژێ سیاسه‌تا حزبه‌كا مه‌یه كو سیاسه‌تا خوه ب خه‌ملدئێخیت كو یا جوانه و رۆخسارێ خوه بۆ ڤى ملله‌تى دكه‌ته شاما شریف، به‌لێ وه‌سا نینه ب دروستاهى بۆ به‌رژه‌وه‌ندیا وه‌لاتێن دوژمن چه‌تیێ دكه‌ن و ئه‌ڤه ژى جۆره‌كێ چه‌تیایێ یه، كو دیارده‌یه هه‌ر ژ سه‌رێ خه‌بات و بزاڤا رزگاریخوازا ملله‌تێ كورد ب دووڤ ڤه مایه و هیمێن دژوار گه‌هاندینێ، به‌لێ پشتى چه‌ندین جارێن خۆخه‌ملاندنا ب مكیاجه‌كێ ئێكسپایه‌ر جاره‌كا دى و هه‌ر ده‌ملده‌ست باران لێهاتینه و كه‌فتیه له‌پێن خوه و روویێ وێ یێن ره‌ش دیار بوویه، هه‌مى بۆیاغا وێ ب سه‌روچاڤێن وێ چووینه و بوویه بووكا بارانێ، شاشی ب دوویڤ شاشیێ ڤه، هه‌ر وه‌كو ئێدى ئه‌و لایه‌نێ زلهێز ژى چو خێر ژێ نه‌دیت و ب كێر چه‌تاتیێ ژى نه‌هات، یان ژى وه‌كو ئه‌و سه‌ره‌ده‌رى و كریار و قه‌بحه‌تا ئه‌و ژنا ل ڤان رۆژان كه‌فتیه له‌پێن خوه و ب مخابنى ڤه هێرشه‌كا نه‌راسته‌وخوه بریه ل سه‌ر پێرۆزتیرین پیرۆزیێن ڤى ملله‌تى و دایه ناڤ ماشان ئه‌و هێرش كریه د هه‌سپێ (تڕواده) دا و ئینایه ل تێلا هه‌ستیار و ل هێلا سۆر دای و پشتى هینگى ژى په‌شێمان نه‌بووى و دا كو پشتى هینگى كلبده‌ت رابوو خوه كوره كره‌ڤه و بێبه‌ختى ژى دانا سه‌ر، كو فلان پێشمه‌رگه‌ى گه‌فێن لێ كرین (وه‌كو خه‌لێ بزنا به‌لێ)!!، جهێ داخێ یه بۆ من كو ئه‌زێ ل سه‌ر دنڤیسم و من نه‌ڤێت هند من مه‌زن كربا، ب پشتراستى ڤه ژى به‌ریا هه‌ر كه‌سه‌كى من شاشیێن وێ یێن رێنڤیسا عه‌ره‌بى یێن زیق بۆ راستڤه‌كرینه ل سه‌ر فه‌یسبۆكى و نیشا دایه كو هه‌ر پێشمه‌رگه‌یه ئه‌و زمانێ وێ یێ عه‌ره‌بى بۆ راستڤه كر، ده‌مێ گۆتى ملله‌ت زمانێ عه‌ره‌بى نزانن!. به‌لێ مه‌ره‌ما من نه‌ك ئه‌و ب خوه یه و ب ناڤونیشان ڤه ب ناڤزراندن ڤه (چونكو من چو ناڤ ژى نه‌ئیناینه)، به‌لێ مه‌ره‌ما من ئه‌و سیاسه‌تا (چێلا مه‌زنتر) ژ بابه‌تێ وێ و مژارا وێ (یا بچیك ـ یا مه‌زن) و من به‌حسێ كه‌ساتیا وێ نینه و هه‌كه من به‌حس بیت ژى ئه‌ز راناگه‌هینم و بكه‌ڤمه له‌پێن خوه كو ل سه‌ر خوه بكه‌مه مال و ب ناڤزران بهێته ل قه‌له‌مدان، سۆر و سۆر ئه‌زێ دبێژم من نه‌به‌حسا وێ یه، به‌لێ ئه‌ز یێ به‌حسێ سیاسه‌تا حزبه‌كێ دكه‌م ناڤێ وێ ژى نائینم!! هوون بخوینن، (مه‌ره‌ه‌ما من جۆرێ سیاسه‌ته‌كێ چێله و ئها ئه‌وه چێلا ب مكیاچ!!
دهۆكا شه‌رمین!
گرێك و ئالۆزیا هه‌مى قه‌یرانێن دهۆكێ ب دیتنا پارا پتر دكه‌ڤیته ساخله‌تا ژ خوشه‌مركرنێ و دروونا تاكى د ناڤ ڤان هه‌ردو چیایێن هه‌ڤتریب و هه‌وا و ئاڤا وێ، یه هه‌ر كه‌سێ هاتیه د ناڤا دهۆكێ ژى دا بوویه كه‌سه‌كێ شه‌رمین، گۆتنه‌كا مسری یا هه‌یى گه‌له‌ك ل سه‌ر مه دهۆكیا دهێته گونجاندن ده‌مێ دبێژن: اللی ختشو ماتو..
واته ئه‌وێن شه‌رم كرین مرن، گه‌له‌ك هاتیه گۆتن كو خه‌لكێ دهۆكێ گه‌له‌ك دترسن و نه‌وێرن خونیشادانان بكه‌ن، یان بلا خوه ل به‌ر سنگێ حوكمه‌تێ بده‌ن، بۆچى هه‌ولێر و سلێمانیێ و پاشى دهۆك؟! یان گه‌هشتیه وى راده‌یى دبێژن خوشكێن بادینان!!, ئه‌ز ڤێ چه‌ندێ پشتراست دكه‌م كو دهۆكى گه‌له‌ك ژ خه‌لكێ سلێمانیێ و هه‌ولێرێ ب جه‌رگتر و زیره‌كترن، به‌لێ مژار چیه؟ مرۆڤێن ژ خۆشه‌رمن، ده‌عیا وان قه‌بوول ناكه‌ت بهێنه ل سه‌ر جاده‌یان و ب قه‌بن و شه‌م ژ كامیرا نه‌كه‌ت و ببته حرحر و زڕزڕ ب تبلێ باخڤن و ب ده‌ستا و ب ده‌ڤى و ب سه‌رى و ب چاڤان و ب پیان و ب هه‌مى ئه‌ندامێن له‌شێ خوه ببنه له‌باق و باخڤن، ئها ئه‌ڤه یه ئاریشه‌یا دهۆكیان، هه‌كه ب شێوازێن دیتر جامێران ده‌ربرینێ دزانن و جهێ برینێ ڤێدكه‌ڤن و ب بێده‌نگى ده‌ستێ ددانه ل سه‌ر، خوه په‌یوه‌ندیا بایۆمه‌ترى ژى و تۆماركرنا ده‌نگێن خوه ل ویستگه‌هێن ده‌نگدانێ كو ئه‌ڤه هه‌یامه‌كه هاتیه ڤه‌كرن ب راستى رێژه‌یا تۆماركرنێ گه‌له‌ك ل كێمیێ دایه ل دهۆكێ، ب به‌راوردى ل گه‌ل هه‌مى پارێزگه‌هێن دیتر، دبیت ژى ئه‌ڤه ل شوونا وان بزاڤێن خونیشاندان بیت یێن نه‌هاتینه كرن، خه‌لك قه‌یرانا داریى یا هه‌رێمێ ب ده‌نگدانێ ڤه گرێدده‌ن، دبیت ئه‌ڤه مافێ وى بیت ژ وى بچیت خرابى هه‌ر دێ گه‌هیتێ، بۆ نموونه هه‌كه بێژین چه‌ندا گرنگه مله‌تى نوونه‌ر هه‌بن و ده‌نگێ وان یێ به‌رز بیت ل هه‌ردو په‌رله‌مانان، مه دیت قانوونیكرنا حه‌شدا شه‌عبی چه‌ندا ب گه‌رمى بوو ژ لایێ شیعه‌یان ڤه ل ناڤا په‌رله‌مانێ عیراقێ به‌لێ، نه‌خاسمه حه‌شد ئه‌ڤه ده‌مه‌كێ چه‌ندێ كێمه هاتیه هۆلى ب به‌راوردى ل گه‌ل هێزا پێشمه‌رگه‌ى یا دیرۆكى كو ئه‌ڤه ساله‌ها ساله خوینێ درێژیت هێشتا یا مایه هه‌لاویستى ل دستووێ عیراقێ؟!، ئه‌ز دشێم پشكه‌كێ ژ مه‌زلۆمه‌ی و غه‌درا هه‌نێ ب شه‌رمێ ڤه گرێبده‌م و ب تایبه‌ت ژى ل ده‌ڤه‌را مه، ل بیرا منه گه‌له‌ك مافێن مه ژ مه چووینه ژ به‌ر شه‌رمكرنێ، نموونه‌كا نێزیكتر و مللى تر، خوه ل ناڤ مزگه‌فتێ دا و ده‌مێ نڤێژا ب جماعه‌ت، دێ بینى رێز د ڤالانه و یا فه‌ره خێرخوازه‌ك گازى بكه‌ت وه‌رنه ژۆر یان هه‌رنه هێرڤه ب ده‌نگه‌كێ بلند، به‌لێ كه‌سى ئه‌و جورعه‌ت نینه گازى بكه‌ت، هه‌كه تو گازى ژى بكه‌ى دێ بیه ته‌شابه‌ت، هه‌ر وه‌كو ته قبحه‌ته‌ك یا كرى كه‌س ژ جهێ خوه نالڤیت و هه‌مى دێ سه‌حكه‌نه ته و ده‌نگێ ته ئێخنه به‌ر به‌حس و ڤه‌كۆلینان كانێ ئه‌و كی یه و كورێ كێ یه گازى كرى!، دێ چیه د ره‌فێ دا، نه‌فه‌ر شه‌م دكه‌ن گازى بكه‌ن، دێ ل فلان ویسگه‌هێ هێمه خار، دێ دوور كه‌ڤیت و دڤێت رووبه‌ره‌كێ برێڤه‌بچیت هه‌تات دگه‌هیته مالا خوه، به‌لێ هه‌كه ل هه‌ولێرێ و سلێمانیێ بى، ده‌نگ و قه‌به دبێژینه یێ دى وێڤه هه‌ره، هه‌مى پێكڤه دكه‌نه گازى، خوه ل ناڤر ێزێن مه‌شقا سه‌ربازى ژى دا، دڤێت تاكێ سه‌ربازى ب هه‌مى هێزا گازى بكه‌ت، به‌لێ نه‌فه‌رێن دهۆكێ ژ هه‌میان پتر شه‌رم دكه‌ن گازى بكه‌ن، دوهى راپۆرته‌ك د ڤێ رۆژنامێ دا هاتبوو وه‌شاندن ل سه‌ر كارێ پاقژكه‌ران كو دهۆكى شه‌رم دكه‌ن كارێ پاقژكرنێ بكه‌ن، لێ كرێكارێن بیانى خوه هه‌نه نۆشدارن هاتینه باژارێ مه كار دكه‌ن، له‌ورا بلا شه‌رم نه‌بیته ئه‌گه‌رێ مه‌غدۆربوونا مه، وێ كه‌ربا دلێ خوه ب په‌راوێزكرنا مافێ نه‌ده‌ن و بێژن ئه‌م ده‌نگێ خوه ناده‌ینه كه‌سێ و كه‌سێ چ بۆ مه نه‌كریه!!. هه‌ر باب و باپیران گۆتیه، مێرێ شه‌رمین ب كابه‌كى و ژنا شه‌رمین ب شاره‌كى، به‌لێ ئه‌م شاره‌كین و هه‌مى پێكڤه دشه‌رمین!!
بوخچكا ئاواره‌یان
نێزیكى 27 سالانه ب سه‌ر مه‌دا بۆرین و هێشتا یا ژ مه ڤه ئه‌م ل سه‌ر ئه‌ردێ خوه و وه‌لاتێ خوه په‌نابه‌رین، هێشتا برینێن ئاواره‌بوونێ ساخ نه‌بووینه، هێشتا ئه‌م د دل و چاڤ برسینه، د ناڤ ئاهه‌نگان سه‌مایێ دكه‌ین و دلێن خه‌مگینه، ئه‌م یێن بووینه سه‌میانێن ئاواره‌یان و یا ژ مه ڤه ئه‌م ئاواره‌یێن پله دوینه و مێهڤانێن دراگرانین ل سه‌ر ئه‌ردێ خوه، ئه‌م وه‌كو گایێ ئه‌رزیان لێهاتینه ده‌ڤێ مه بۆ هه‌میان یێ به‌شه یا ژ مه‌ڤه دێ ل مه‌یدانكێ فرۆشن!!، یت ژ مه‌ڤه هه‌مى خه‌لك رێكخراوێن مرۆڤاتینه و یێن هاوارهاتنێ نه دێ بۆ مه نانى و خوارنێ به‌رده‌ن، خوه گه‌شتێن مه ژى وه‌كو ره‌ڤێن ب كۆمن، بوخچكا مه یا ل بن كه‌فشێ مه و ژ به‌ر باران و بای و بارۆڤه‌ى ئه‌م دره‌ڤین، قات و ریباتێن ل به‌ر مه و هێشتا قرێژا چه‌لكێ و ده‌شتانێ یا ب پاتكا مه‌ڤه، ل ده‌مه‌كى مه دۆلار ل سه‌ر سه‌رێ خوه را دهاڤێتن و هێشتا ئه‌م یێن ل هیڤیا بیست و پێنج هزارى یا هاتیه سۆتن یا وێنه‌یێ هه‌سپان ل سه‌ر، مه دڤێت ئه‌م هه‌مى ئازۆقه‌یى خرڤه‌كه‌ینه سه‌ر ستێركێ دادێ و خوارنێ خرڤه‌كه‌ین نه‌كو ببیته ره‌ڤه‌كا ته‌ڤایى، هێشتا ده‌رگه‌هێن مالێن مه شوون پێنێن پستالێن رژێما سه‌دامى ماینه ژ مه ناهێت ئه‌م دروست بكه‌ین، ئه‌و تاخێن ب ئه‌ردى ڤه راستڤه‌كرین هێشتا نه‌كه‌فتینه سه‌ر سكه‌یى، بێهنا مه ب تنێ ل سویكا چه‌لێ دهێت و چه‌ندى به‌ریكا مه یا گه‌رم بیت به‌لێ هه‌تا ئه‌م جلكێن باله‌یان نه گلگلینین و بێهنا دیتۆلا ئه‌ورۆپا یێ جلكان ل دفنا مه نه‌ده‌ت، بێهنا مه فره‌ه نابیت، حه‌فحه‌فا مه ژى چو جاران بدووماهى ناهێت، چه‌ندى ل وه‌لاتێن جیهانێ بگه‌ریێن ئه‌و بیرهاتنا دۆمدرێژ و ئه‌و دیمه‌نێن چه‌ل و مه‌لان ژ مێشكێ مه ناهێنه ده‌ر، ئه‌ڤ ئاواره‌بوونا ڤان دووماهیان ل پێش یا مه ڤه گه‌شت و گوزاری یه، بلا بهێن ژ مه ب پرسن دا ئه‌م رامانا ئاواره‌بوونێ نیشا ڤان بده‌ین، دایك و باب و خیشك و برا و زارۆیێن مه ل پێشچاڤێن مه دمرین ژ برس و ترس و سارما و گه‌رما و بێزاربوونێ و چ ژ مه نه‌دهات، ئه‌و خه‌مێن چووینه د دلێن مه دا هه‌تا چركه‌یا داهێلانا ل سه‌ر گۆرێ مه دیمه‌نێن به‌رده‌وامن دهێنه ئوبدێت كرن و دێ مینن وه‌كو كرۆمۆسۆمێن د ناڤ خوینا مه‌دا و بنه میرات هه‌تا كور و نه‌ڤیێن مه ژى دێ میراتێ وێ ل گه‌ل خوینا خوه هه‌لگرن، ئها ئه‌ڤه یه ئاواره‌بوون، هه‌كه ئه‌و تراجیدیا ب سه‌ر ملله‌تێ من هاتى ببیته بارانه‌ك و ل سه‌ر چاییان بباریت ئه‌ز باوه‌رم دێ كه‌ڤران حه‌لینیت و ب ئه‌ردى ڤه راستڤه‌كه‌ت، رۆندكێن ئاواره‌یێن ئه‌ڤرۆ دێ شه‌رمێ ژ یێن مه‌كه‌ت، دربێن لابه‌لا یێن ئاگرین و تو نزانى كه‌نگى دێ گازێنه كیمیاوى ل ته بارینن، ب شه‌ڤ دنڤى ل سه‌ر سه‌قایێ سار و ته‌قنێ دنڤى و سپێدێ رادبى دبینى برایێ ته یێ ساڤا یێ ژ سه‌رمایێ قه‌رسى و مرى، فلمه‌كێ دێكۆمێنتى چ رۆژ ب سه‌ر مه‌دا ناچن و بیرا مه ل وێ كاره‌ساتا (تایتانیك) دهێته ڤه ئه‌ڤه بیست و حه‌فت سالن ئه‌م هه‌رۆژ دمرین و ساخ دبینه ڤه، ئه‌م فێربووینه هه‌ما ب تنێ سه‌رێ مه ل بن سیڤانده‌كێ ڤه بیت، بلا مه چو نه‌بیت، نه خوارن و نه ڤه‌خوارن و ئازۆقه و نه ئوكسجین ب تنێ خودێ گیانێ مه بپارێزیت، و بۆ مه ب قه‌نجى بهێته قه‌ربۆكرن، ئێدى خه‌ونا ده‌وله‌تبوونێ ژى یا ل مه بوویه قه‌ده‌غه، هزركرن و خه‌یال ژى یا ل مه كریه زه قنه‌بووت.. ما مه چه‌ند جۆرێن دوژمنان هه‌نه؟!. گه‌لۆ كى مفاداره ژ ده‌ربه‌رده‌ربوونا مرۆڤان؟! پترى 65 ملیۆن په‌نابه‌ر ل سه‌ر ئه‌ردى هه‌ین، كى مفاداره؟ مانه چه‌ندین كه‌مپ دێ دهێنه ڤه‌كرن ئازۆقه و كه‌لوپه‌لێن خوارنێ و ده‌رمان و نۆشدرا و رێخراوێن مرۆڤاتى (ب ناڤ) دێ كه‌ڤنه كارى و دێ په‌نابه‌ر قه‌ستا وه‌لاتان كه‌ن و هه‌كه مرۆڤ مشه بوون دێ بارزگانى گه‌شه كه‌ت. ئه‌م یێن بووینه تۆمكێ بازرگانیا زلهێزان.
ئه‌لغامێن سیاسى
به‌رى بیست سالان بیرا من دهێت مه بۆ خوه قه‌پاخێن مینێن (ڤالمارا) یێن پێنج شیشك بۆ خوه دكرنه ته‌بلێن جگاران و دكرنه قافكێن گولان و زارۆیێن مه یاریى بۆ خوه پێ دكرن، به‌ركێن تۆپێن نه‌مساوى مه دكرنه سندانێن نێرگزان، ژیانا مه هه‌مى ته‌قه‌مه‌نى بوو، چه‌ندین هه‌ڤال و كه‌سوكارێن مه بوونه قوربانیێن ڤان مین و ئه‌لغامێن ل وه‌لاتێ مه هاتینه چاندن، رۆژێن مه د ناڤ مین و ته‌قه‌مه‌نى و سیمێن تیژ دا دبۆرین، به‌رى ده‌مى ب ناڤ دهاتن، به‌لێ ئه‌ڤرۆ و پشتى دونیا بوویه مه‌دیا و ئه‌نترنێت، ئێدى ب به‌رزه‌یى ڤه وه‌كو دویپشكان یێن ب مه‌ڤه دده‌ن، هه‌مى ژى پێخه‌مه‌ت به‌رژه‌وه‌ندیێن شۆڤێنى ب هه‌مى ره‌نگان یێن ته‌پكان بۆ مه ددانن، دوژمنه‌كێ نه‌دیار و ڤه‌شارتى یه ئه‌ڤرۆ و چه‌ند دزۆرن تو كه‌سێ ژ یێ دى جودا ناكه‌ى، دێ ب ناڤێ مافێ مرۆڤى گازى كه‌ن و ژ بنڤه ژى دێ پیلانێن ئاگرین به‌رده‌نه مه. به‌لێ ئه‌ڤ ئیدیه‌مێ مودرن یێ ڤان رۆژان كه‌فتیه هۆلێ كه‌یفا خه‌لكه‌كى پێ هاتیه دبیت یا به‌ڤلان (نابێژم دوژمن) ژى به‌رى هه‌ڤالان، گۆتارا مه‌سعود بارزانى سۆر و سۆر و ژدل ده‌ستێ خوه دانا ل سه‌ر برینا ملله‌تێ بریندار، كو پشتى شكاندنا ڤى دوژمنێ دژوار داعش ئه‌و رسته‌یا د په‌یڤا خوه راگه‌هاندى شیا لایكێن خه‌لكى بده‌ست خوه ڤه بینیت، سیناریۆیا پێش دیتنا په‌یڤینا وى ده‌م ل ده‌ست كه‌فته كارى!، ئه‌و ژى كا چاوا ئه‌ڤ شه‌ڕێ ل دژى پێشمه‌رگه‌ى دهاته ئاراسته كرن، شه‌ره‌كێ ترسناكیێ بوو یێ تێكدانێ و تیرۆرێ، زێره‌ڤانێ ڤى ملله‌تى شیا ب زانین هه‌مى ب هه‌ڤرا ببیته ئه‌ندازیارێ ته‌قه‌مه‌نى و راكرنا مین و تێنتیان، سه‌ربۆره‌كا مجد وه‌رگرت، هه‌مان دوژمنه تیرۆرا هزرى ژى ل گه‌ل مه دكه‌ت، ل گۆر زانایێ له‌شكرى یێ ئه‌فسانه‌یى ده‌مێ خویا دكه‌ت كو ل گه‌ل هێرشبرنێ بلا شه‌رێ ده‌روونى ژى د ناڤ جه‌ماوه‌رى دا بهێته كرن. مه‌ره‌ما وى یا هه‌ڤده‌م بیت، ل گه‌ل لڤینا شه‌ڕى، ئه‌ڤ دوژمنه هه‌لبه‌ت بۆ خوه مفایى ژ ڤان پێزانینێن سه‌ربازى دبینن، بۆ نموونه ده‌مێ له‌شكرێ ئه‌مریكا، هه‌كه بێژین ل ده‌مێ هێرشا شه‌رێ كه‌نداڤى ل عیراقێ هه‌ر سه‌ربازه‌كێ خوه كۆپیه‌كا پرتووكا ماوتسى تۆنگ زانایێ سه‌ربازى دابوویێ، تشته‌كێ سه‌رسۆرمان بوو وه‌سا ب ڤێ له‌زێ سیناریۆیا نێرینا مه‌سعود بارزانى بهێته روودان، كو ب دروستى ژى پشتى ئه‌لغامێن داعشان هه‌مى هاتینه رامالین، نه‌كێشانه دو سێ رۆژان و ب گه‌رمى پێنگاڤا ئێكێ هاڤێت و په‌لگازكا خوه راكر شاره‌زایێ ئه‌ندازاریا ئه‌لغامێن سیاسى، گه‌له‌ك ب بێمنه‌تى ئه‌لغامێن ڤالمارا یێن پێنج شیشك ب پلائیسێ خوه قه‌تاندن و پرانیا رایا گشتى یا سیاسى ڤه‌كێشانه هۆلێ ب په‌سنینا وان، جۆره‌كێ گه‌شداریێ په‌یدا كر سه‌ره‌راى ڤان قه‌یرانان، ب دیتنا من به‌رسڤه‌كا ب هێز بوو ژ بۆ دینامۆیا خورتكرنا دوژمنێن ڤى ملله‌تى و ده‌قێ بلیاردێ ل وان ته‌پكان دان یێن دێ مه هه‌میان به‌ر ب ته‌پكێ ڤه به‌ن، گرنگترین كاریگه‌رى و سرنجراكێشانا ده‌سپێشخه‌ریا مه‌سعود بارزانى بێمنه‌تیا وى ب پۆستێ سه‌رۆكاتیێ یه، جوامێرێ خوه سه‌لماند كو نه‌پێدڤى وى پۆستى یه، به‌لكو پۆستێ سه‌رۆكاتیێ پێدڤى ب كه‌سه‌كێ وه‌كو وى خوه‌دى سه‌ربۆرا وى یه، چاوا پێشمه‌رگه‌ى خوه سه‌لماند كو ب دروستى شاره‌زا و قه‌هره‌مانه بۆ راكرنا مه‌ترسیا ئه‌لغامێن سه‌ربازى، هه‌ر وى پێشمه‌رگه‌ى ب خوه ژى ئه‌ڤ ئه‌لغامێن سیاسى سستكرن و ل به‌ره راببن، چونكو لێڤلێ ئێكێ ب دووماهى هات و یێ د دووڤ دا ژى دێ ب له‌زتر ب دووماهی هێت، چونكو سه‌ربۆر ده‌یكا گریمانێ یه، یێ سیێ و چارێ ژى ب دیتنا من دێ بنه سه‌رنشیڤى، چونكو ته‌نگاڤى د دوم كورتن ب هیڤیا بژاله‌كرنا قه‌یرانا ب سه‌ر مه‌دا هاتى، به‌لێ دڤێت وان ئه‌لغامان گوهێن مه سمتبن دا سه‌ربۆران بۆ خوه بكه‌ینه گوهارك و بكه‌ینه گوهێن خوه و هێشتا رێدیا مه مایه كو نه دانینه ل سه‌ر سمبێلان!!.
هیۆمان رویس و رویره‌ش!!
هه‌ر وه‌كو پۆشنا (B) یا پشتى شه‌رێ داعشێ ل سه‌ر ده‌رڤه‌را مه یا دلۆڤان و دلنازك یا جهێ خوه خۆش دكه‌ت و ب نیشانان دێ سه‌رێ خوه و یێ مه خۆت، ب ئارمانجا خۆرتكرنا بازرگانیكرنێ و ب ره‌وشخستنا ئابوورێ خوه، وه‌كو مشارى لێهاتیه ئه‌م ژ هه‌ردو ره‌خان هاتینه خوارن، ئۆپشنا ئێك ئه‌و بوو ئه‌ڤ شه‌رێ ئه‌ڤه سه‌رێ سێ سالان ب سه‌ر مه‌دا هاتى مینا دبێژن نانێ خوه ب ئاڤكا مه خوارى مه‌زاختنا له‌شكرى كرین، ب ناڤێ هاریكرن و پشته‌ڤانیكرنا پێشمه‌رگه‌ى هند دربێن ئه‌سمانى ل داعشێ داینه، كو وه‌سا ئاڤاهى ب سه‌رئێك دا ئیناینه ب راده‌كێ كو مێشكێ مرۆڤ باوه‌ر ناكه‌ت، چونكو هه‌كه ئه‌ڤه چاره‌سه‌ریه‌كا سه‌ربازى بیت د لۆته‌كه‌یا پیشه‌یا خوه دابیت، وه‌سا نینه چونكی زانایێن سه‌ربازى و زانستێ له‌شكرى وه‌نابێژن، به‌لكو دبێژن: هێرشا نموونه‌یى یا هه‌رى سه‌ركه‌فتى ئه‌وه كو تو باژاره‌كى بستینى و ئاڤاهیان خراب نه‌كه‌ى.
ئه‌ڤه هه‌لبه‌ت ژ بلى وێ ئێكێ كو چو شه‌هیدان نه‌ده‌ى و ژ دوژمنى ژى نه‌كوژى!!. ئه‌رێ هه‌ڤپه‌یمانان و ب دربێن خوه یێن زانستى و ته‌كنۆلۆجى و پێشكه‌فتى ئه‌ڤ چه‌نده كریه؟.! ژ ره‌خه‌كێ دى ڤه ژى داعشان ژى جامێران ته‌خسیرى نه‌كریه، هه‌لبه‌ت داعشێ ژ بلى ره‌ڤاندن و دزینا كه‌لوپه‌ل و شوونوارێن بهاگران، ئاڤاهى ژى ب سه‌رئێك داناینه بۆ هندێ كو رۆژه‌ك بهێت و ئه‌ڤ كاڤله هه‌مى خه‌رجیات لێ بهێنه كرن، و كارى بۆ بێكاران و رێكخراوێن كارى و به‌رهه‌مێن بیانى بهێنه ده‌ڤه‌رێ و ئابوورێ خوه بڤه‌ژینن، لێ ئه‌ڤرۆ و جاره‌كا دى ئه‌و رێكخراوێن خوه ب پارێزه‌رێن مافێ مرۆڤى دئیننه ده‌رێ كو به‌رى هه‌یامه‌كێ ژى دۆسیێن خوه لڤاندبوون و ڤێ تۆمه‌تێ بێخنه ستۆیێ پێشمه‌رگێ مه‌زلۆم و بكه‌نه زالم، ئه‌ڤ وێرانكرنا گوند و باژارن بكه‌نه كێشه‌كا مرۆڤاتى و هنده‌ك بهانه‌یێن خلوله بكه‌نه داتایێن به‌لگه، ب تنێ ب ئاخفتنێن دیده‌ڤانێن ده‌ستكرد، پێ نه‌ڤێت هه‌میان ده‌ست ل گه‌ل ئێك هه‌یه هه‌ر ژى درویسن ژ به‌لگه‌یان، به‌لێ نزا ئه‌ڤه هه‌مى شه‌ریفه ل كیڤه بوون ل ده‌مێ 5000 بارزانى هاتینه شه‌هیدكرن و كورد ب چه‌كێ كیمیاوى دهاتینه مراندن و ب سه‌دان گوندێن مه دهاتنه وێرانكرن؟! هه‌كه پێشمه‌رگه‌ى كه‌سه‌كێ سڤیل ژى كوشت بیت، ب چه‌قۆكان یان زیان گه‌هاندبیتێ یێن ده‌ست ل گه‌ل داعشێ ژى بلا دیار بكه‌ن، به‌لێ هه‌كه كریارێن قانوونى و ئه‌منى بهێنه كرن، دێ كه‌نه كێشه‌یێن مه‌زن، هه‌رێمێ ب ئاشكرایێ دیار كریه كو ئه‌وێن ده‌ست ل گه‌ل داعشێ هه‌ین تیرۆرستن بلا نه‌هێنه د ناڤ مه دا و ئاسایشا ملله‌تى هه‌میێ بێخنه د مه‌ترسیێ دا.
گه‌لۆ هه‌كه میناكه‌كێ بینین ل دۆر ستاندنا شنگالێ كو ئه‌و سه‌رێ دو سالان بوو فرۆكێن هه‌ڤپه‌یمانان بۆردومان دكر و ب تنێ د هه‌یڤه‌كێ دا 250 جاران لێدایه، دۆرپێچ بكه‌ن د تنێ د بیست و چار سه‌عه‌تان دا و بێخنه ستوویێ پێشمه‌رگه‌ى چونكو پێشمه‌رگه‌ى ب تنێ د 24 سه‌عه‌تان دا ئه‌و باژێر ستاندیه، گونه‌هه‌كا مه‌زنه، چونكو ما به‌رئه‌قله باژاره‌كى د شه‌ڤه‌ك و رۆژه‌كان دا ب سه‌رئێك دا بینى و هه‌ر مه ئه‌و شیانێن دارایى نینن هه‌تا وه‌بكه‌ین، به‌لكو ئه‌ڤه لۆتكه‌یا سه‌ركه‌فتنا سه‌ربازى یه كو تو باژاره‌كى بستینى و ئێك شه‌هید ژى نه‌ده‌یى. به‌لێ هه‌ر مه ئه‌و ئالیه‌تا هنده مه‌زن نینه كو بۆ خوه سه‌نگه‌رێن خوه و جاده‌یێن خوه پێ چاره‌سه‌ر بكه‌ین رابین ئه‌م خرابكرنێ بكه‌ین و د ڤى دۆخێ ئابوورى یێ ب قه‌یران دا؟! بێ به‌ختیه‌كا مه‌زنه و زیقه ل مه دهێته كرن، وه‌كو دى مه هه‌ر ئه‌و ته‌قه‌منیێن ساده نینن شه‌رى پێ بكه‌ین، دێ ژ كیڤه ئینین كو مالێن خه‌لكێ خوه خراب كه‌ین و هێشتا ئه‌و خه‌لك ب خوه ئاواره‌نه ل ده‌ف مه و مه د ناڤ مالێن خوه دا حه‌واندینه، ب سیسته‌مێ (موئاخات)و بووینه مهاجرین و ئه‌نسار!!. وه‌كو پێشمه‌رگه ل ژێر فه‌رمانا هه‌ڤپه‌یمانان كار دكه‌ت و نه‌ك به‌رۆڤاژى، هه‌كه ئه‌و دربێن ئه‌سمانى لێبده‌ن ژى نه ئه‌مین فه‌رمانان دده‌ینێ، به‌لكو هه‌ڤپه‌یمانان نوونه‌رێن خوه یێن له‌شكرى هه‌نه ل سه‌ر ئه‌ردى و ل هێلێن پاشیێ ل گه‌ل مه ئه‌ون راسپاره‌دیێن لێدانا ئارمانجێن فرۆكان دده‌نێ، وه‌كو دبێژن ئه‌م هێزه‌كا بچووكێن (لاحول و لا قوه)، ئه‌ركێ مه ب تنێ به‌رگریكرنه، ئارمانجا مه ئاڤاكرنه و نه‌ك خرابكرن، ئه‌م پێشمه‌رگه كاردكه‌ین ل ژێر راسپارده‌یێن فه‌رمانده‌یا گشتى یا مه ده‌ردئێخیت كو ئه‌و ژى سه‌رۆك بارزانى یه وه‌كو فه‌رماندێ گشتى یێ هێزێن پێشمه‌رگه‌ى، هه‌ر ل ده‌سپێكێ ل سه‌ر پێشمه‌رگه‌ى بژاندیه كو رێزێ ل خه‌لكێ سڤیل بگرن و دیلكریان نه‌كوژن و نه ئێَشینن و مال و ئه‌ملاكێن خه‌لكى بۆ بزڤرینین، رێزێ ل قانوونێن گشتێ بگرین یێن د قانوون و به‌لگه‌یێن نێڤدوه‌لى دا هاتین، سه‌رپێچیێن دژى مافێ مرۆڤى نه‌كه‌ن، ژ نوو ئه‌م رابین باژاران خراب بكه‌ین؟!، ئه‌ڤه هه‌مى پیلانێن مه‌زنن ل سه‌ر ملله‌تێ مه، بێ به‌ختى دهێنه ئاراسته‌كرن، هه‌كه ئه‌م ئه‌ڤرۆ نه‌بینه ئێك ل به‌ر سینگێ ڤى خه‌لكێ دوژمن و بێبه‌خت هه‌تا هه‌تایێ ژى نه‌ڤیێن مه دێ د ره‌زیل و بێ ئومێد بن، وه‌رن ببینه ئێك ده‌ست و دل ل به‌رامبه‌ر ڤان لایه‌نێن ب ناڤێ حه‌قیێ نه‌حه‌قیێ ل مه دكه‌ن و روویێ وان ره‌ش بكه‌ین.
نيشاندان
WP Facebook Auto Publish Powered By : XYZScripts.com