ب قه‌درترین ئیدیه‌م د ناڤ جڤاكێ مه دا په‌یڤا مامۆستا یه، واته هۆستا یان فێرخواز ب عه‌ره‌بى ژى (استاژ)، مام ئوستاد، ئه‌ڤه‌یه ئه‌و په‌یڤا ئه‌م دبێژینه قه‌ره‌چان، ژ به‌ر وێ قه‌نجیا مه‌زنا ئه‌وان ل مه هه‌میان كرى، بۆ نموونه لاندكێن مه هه‌مى ئه‌وان چێكرینه كو كاره‌كێ ب زه‌حمه‌ته و هونه‌ره‌ك ه‌پێدڤێت كڤانكرنا دارى و نكراندنا ده‌پى، ئه‌م هه‌مى د لاندكێن وان دا مه‌زن بووینه، ژ بیلیل و قه‌سیرك و كنفێن ده‌زبلینكان و هتد… عه‌ره‌بانكه و هه‌مى كار و كریارێن جوان یێن خه‌لكێ ئاسایى نه‌زانیت دروست بكه‌ت، بێ تۆرنه‌یێن داترتاشان یێن ڤى سه‌رده‌مى ده‌ركه‌فتین، له‌ورا ئه‌م هه‌مى قه‌ردارێن وان جوامێراینه. ملله‌تێ قه‌ره‌چان وه‌كو ملله‌ته‌كێ ره‌سه‌ن و خوه‌دى تایبه‌تمه‌ندى و بسپۆریێن بێوه‌نه د ناڤ مه‌دا، خوه‌دى حنێرێن بێ هه‌ڤرك و داهێنه‌ر د هه‌مى بیاڤێن ژیانێ هێڤێنه‌كێ خام بووینه، ژ قه‌ره‌چ و موتڕب و ده‌لى و به‌گزاده و قه‌وقاسى و هتد.. ملله‌ته‌كێ ئاشتیخواز بووینه حه‌ز ژ ژیانێ كرینه و ده‌سته‌كێ كارى یێ بالا هه‌یه دكارن ب هونه‌رێ خوه و پیشه‌یێن خوه خوه بخودان بكه‌ن، ل ده‌مه‌كى چێكرنا لاندكان و چه‌رخكرنا چه‌قۆكان و نكراندن ل سه‌ر دارى و ل سه‌ر په‌رۆكى ب هوورى و هر وه‌سا گۆتنا سترانان و چێكرن و ژه‌نینا ئامیرێن مۆزیكێ و لێدانا دهۆل و زڕنایێ و ددكێ هه‌بوونا گۆهه‌كێ مۆزیكى یێ شاره‌زا و ته‌حه‌ملا بۆفكرنا زڕنایێ بۆ چه‌ندین ده‌مژمێران نه تنێ به‌هره‌یه به‌لكو حه‌زژێكرنا جوانیێ یه و حنێره‌كا جوان بوویه، هنده‌ك سێنیك و حێسل و به‌ڕك وه‌سا جوان چێكرینه ئه‌ز باوه‌رم گه‌له‌ك ده‌رچویێن ئه‌كادیمى شیابن ب وى شێوه‌ى بده‌ربێخن، ملله‌ته‌كه شیاینه زمانه‌كێ تایبه‌ت ب خوه‌ڤه بپارێزیت، هزره‌كا ئازاد و چو ئاریشه‌یێن هشكباوه‌ریێ نه‌بووینه و سینگ به‌رفره‌هى ل جه‌م هه‌یه، ئازادی و مافێ مرۆڤى و دلۆڤانى و گیانێ ته‌ڤایى و هاریكاریكرنا هه‌ڤدو و خه‌لكى، جاره‌كێ چه‌رخا ژیانێ وه‌كر ل جاده‌یا ئالۆكا ترومبێلا من ژ تێكچوو ل شه‌ڤه‌كێ، كه‌سێ خوه ل من نه‌كرى خودان، جامێرن هاتن د هانا من و گه‌له‌ك هاریكاریا من كر و خزمه‌تا من كرن وه‌سا ب دله‌كێ خۆش به‌لێ ده‌لیڤا نشكان یا مه‌زنتر ئه‌وبوو كو هینگى دا چم گازێ بۆ مال كڕم، ده‌مێ وان دۆلكێن من دیتین زانین كو ئه‌ز پێدڤى ب گازێ مه، وه‌سا ب مه‌ردانه چوون گاز بۆ من داگرت ژ تانكێن خوه و هه‌ر وه‌سا ترومبێلا من ژى هه‌ر وان ب خوه دروستكر و چووینه بن ترومبێلێ و ل دووماهیێ من ده‌ستهاڤێته به‌ریكا خوه، وه‌سا خوه د من وه‌ركرن و بێى من بنیاسن هزار سویند خوارن كو ده‌رهه‌مه‌كێ ژى ژ من نه‌وه‌رگرن، ب راستى هه‌لویسته‌كێ جوامێرانه بوو و كێم خه‌لكى ئه‌ڤ جۆره قه‌نجیه كرینه، ئه‌ڤه چیرۆكه‌كا بچووك بوو ل هه‌مبه‌ر مرۆڤاتیا وان، هه‌ر وه‌كو بارودۆخێن ژیانێ به‌رى ده‌مى هند غه‌در لێ كربوو كو نه‌چار بن جاران خوازۆكێى بكه‌ن، بێخودانى بوو، پشتى كورد بووینه حوكمه‌ت و خوه‌دى ده‌سهه‌لات شیان هه‌تا راده‌كى ئه‌ڤێ ساخله‌تێ رابگرن و ده‌لڤێن كارى بۆ ببینن و رۆژ بۆ رۆژێ ره‌وشا وان باشتر لێهاتیه، پێشنیاز و پرسیار ل ڤێره دبنه ئێك، ئه‌رێ بۆچى لایه‌نیێن په‌یوه‌ندیدار مفایى بۆ خوه ژ وى هونه‌رى نابینن یان هه‌ما هونه‌رێ وان هه‌تا راده‌كى نائێخنه د قه‌رباره‌كێ ئه‌كادیمى دا و پتر سه‌رراست ببن؟! هینگى دێ دو چیچكان ب به‌ركى كوژن هه‌ر دێ هونه‌ره‌كێ پراكیتیكى و مفادار په‌یدا كه‌ن هه‌م ژى دێ ره‌وشا ملله‌ته‌كى و تایبه‌ته‌مه‌ندیا وان ژى پاكتر لێكه‌ت، نه‌خاسمه كو ل هه‌مى جیهانێ و وه‌لاتان كه‌سێن وه‌ها هه‌نه ل سه‌ر جادان هونه‌ران دكه‌ن و بۆ خوه نانه‌كێ ژیارێ په‌یدا دكه‌ن..!! به‌لێ بلا یێن مه ب خودان بن و ژهه‌میان باشتر بن، چونكو ئه‌م ئه‌ڤرۆ پێدڤى ب مرۆڤاینه و دونیا ب من و ته..
نووترين نووچه
- دڤێت ئالیێن سەركەفتی د هەلبژارتناندا ب پێكئینانا حوكمەتا نوو دلێ گەلێ كوردستانێ خوەش بكەن
- هیڤی یە قـانوونا بودجـەیێ ببیتـە ئەگـەرێ چـارەسەركـرنا كێشەیێن هـەلاویستی
- گرنگییا ڤەكرنا قونسلخانەیا عومانێ ل كوردستانێ گەنگەشەكر
- دوپاتی ل پێشڤەبرنا پەیوەندیێن هەرێمێ و ئیرانێ هاتە کرن
- سەرۆكێ حوكمەتێ دوپاتیێ ل پێكڤەژیانا ئاشتییانە دكەت
- ئارمانجا سەرەكییا كۆمبوونا مەزلۆم عەبدی ئێكگرتنا بەرەیێ كوردی بوو ل سووریێ
- سەرۆك بارزانی هیچ داخۆیانییەك ل دۆر پۆستێ سەرۆك وەزیرێن ئیراقێ نەدایە
- هیڤیدارین ببیتە دەستپێكا چارەسەكرنا هەموو كێشەیان
- پێشوازیێ ل دەنگدانا جڤاتا نوونەرێن ئیراقێ د راستڤەكرنا بودجەی دا دكەین
- ڤیان سەبری: قانوونێن زێدەتر بۆ بەرژەوەندییا ئیراقێ و هەرێما كوردستانێ دێ دەركەین
شیرزاد نایف
حوكمه‌تا سیقلبۆق .. حزبا بسك چیق
مرۆڤ دكاریت سه‌ره‌ده‌یكرنا حزب و حوكمه‌تێن خوه ب بیك و خه‌سوویان دیمه‌ن بكه‌ت، یا دروست ئه‌وه كو حوكمه‌ت خه‌سوو بیت و حزب بیك بیت، به‌لێ ل جه‌م مه به‌رۆڤاژى یه، حزب خه‌سوونه و حوكمه‌ت بیكه، به‌لێ هه‌ر چاوا بیت، یا گرنگ ئه‌وه هه‌ردو ب سه‌رڤه حه‌ز ژ هه‌ڤدو دكه‌ن و وه‌كو دى ژى ئاگرن ل سه‌ر سه‌رێ زه‌لامى، زه‌لامێ ره‌به‌ن، ب شه‌ڤ و رۆژ خه‌باتێ دكه‌ت و كار دكه‌ت، ب كه‌یف دهێته مال حه‌ز دكه‌ت مال یا خۆش بیت، به‌لێ مخابن وه‌نینه، چ جۆره حزبه پێیه‌كێ وێ د ناڤ حوكمه‌ت و په‌رله‌مانى دا، پێیه‌كێ دن ژى د ناڤ ئۆپوزسیۆنێ دا و ئاژاوێ ل سه‌ر جادێ چێ دكه‌ت و خه‌لكى هان بده‌ت كو ده‌ركه‌ڤنه سه‌ر جادان و تێكدانێ بكه‌ن و خوه‌نیشادانێن تێكده‌ر بكه‌ن ماركێتێن وه‌لاتیان بسۆژن و خه‌لكى بكوژن، من نه‌ڤێت ناڤێن چ حزبان بینم وه‌كو رێزگرتنه‌ك بۆ ئیراده و بۆچوونا ب كۆم، به‌لێ بێهنا حزبێ نه‌هات ب تێكدانا په‌رله‌مانى رابوو خوه تالۆقه‌تى حوكمه‌تێ ژى كر و پتر ئاڤ ل هه‌ڕیێ زێده‌كرن، ب پشكداریكرنا خوه د وێ حوكمه‌تێ دا ژى وه‌كو له‌نگ كریه و دانایه وێرێ، حوكمه‌ت یاریه‌كا شه‌تره‌نجێ یه د له‌پێن حزبان دا ب كه‌یفا خوه دئینن و دبه‌ن، هه‌ر وه‌سا ئه‌و ب خوه د له‌پێن ده‌وله‌تێن ده‌روبه‌ر دانه وان دئینن و دبه‌ن.
من سه‌رهاتیه‌ك گوه لێبوویه كو ل سه‌ر بیكه‌كێ و خه‌سوویه‌كێ چێ بوویه، دبێژن بیكێ سپێدێ گۆته خه‌سوویێ من نه‌زانى خۆشیا نڤستنێ ل گه‌ل هه‌ڤژینى یا چاوایه و حێبه‌تیا خوه دیار كر جامێرێ چونكو بۆ ئێكه‌مین جار بوو و به‌رى هینگێ نه‌دیتبوو، ئینا خه‌سوویێ چ به‌رسڤ دا؟؟ چ نه‌گۆت و چ كۆمێنت نه‌دان، ب تنێ هه‌ما بسكێن خوه یێن چیق ل بن ده‌رسووكێ هه‌ژاندن و ئینان و برن!!. و هند.. واته كو من هند سه‌ربۆر هه‌نه، هه‌ما ب به‌رناكه‌ڤیت بێژم ب تنێ بسكهه‌ژاندن به‌سه.. ئه‌ڤجا حوكمه‌تا هه‌ژار ل به‌رامبه‌ر ڤان حزبێن جه‌نگانه و بسكچیق هه‌ما چ نینه، هنده حزبان گه‌نده‌لیێن خوه ئیناینه د ناڤ دا و ب سه‌رێ خه‌لكى دا شكاندینه، ئه‌و ب خوه ژى ڤێك ناكه‌ن، هه‌كو سیاسه‌ت چوو د ناڤ كارێ حوكمه‌تێ دا و تایبه‌تمه‌ندیێن وێ یێن گرێدای ژین و ژیارا تاكێن جڤاكى دێ حالێ مه ئه‌ڤه بیت، هه‌ر ئه‌ون یێن مه بۆ خوه هه‌لبژارتین. ئه‌و پارتا بۆ خه‌لكى خه‌بات كری و خزمه‌تا هه‌میان كرى هه‌ڤال و دوژمنان، هه‌مى لێ بووینه دوژمن ل گه‌ل وه‌لاتێن مه‌زن خه‌نجه‌را خوه هسوویه، خوه ئه‌و ب خوه ژى ل خوه بوویه دوژمن، هنده‌ك كادرێن وێ یێن ب خێرا وێ گه‌هشتینێ و بووینه دام ئه‌ڤرۆ ب هه‌لۆیستێ ئه‌كتیڤ رانابن، ل نیڤا ئۆفیسان دهاڤێژنێ و ره‌خنه‌یا نه‌رێنى لێ دگرن، هه‌مى دزانن حزبان خۆلێ ب سه‌رێ حوكمه‌تێ وه‌ركر و مایتێكرن د ناڤ كاروبارێن وێ دا كریه ده‌زگه‌هه‌كێ كولند (مینا ب زارێ جادێ دبێژن)، حوكمه‌تا ته‌كنۆكرات ب تاكه چاره‌سه‌ریه بۆ قه‌یرانێن مه هه‌میان، نێ ئه‌م ب تنێ ب درووشمێن ته‌یسۆك ته‌كنۆقراتین، وه‌كو دووراتیا ئه‌رد و ئه‌سماناینه، دیمۆكراسیه‌ت كراسێ حزبێن مه یه و تێكدان و ئاژاو كارێ وانه و ستران و پێگۆتن ژى هه‌ما بسپۆریا مه‌یه، بلا نه مه‌هه‌میان بیت، به‌لێ پتریا مه، چونكو یا وه‌لێهاتى هه‌كه تو ژى ل دووڤ حه‌زا وان نه‌بى ئێدى تو ئاوتسایدى.
كه‌س و به‌رپرسێن نه‌زیه د ناڤ حزبان دا گه‌له‌ك د كێمن، ئێك ژ وان من ل ئامێدیێ دیتیه، تشته‌كێ جوان ل ده‌ف هه‌یه، جوامێرى ده‌ستێ هه‌مى خه‌لكى دگریت نه‌ك ب تنێ لایه‌نگیرێن حزبا ئه‌و تێدا، مه‌رجێن پشته‌ڤانیكرنا وى ژى ب تنێ ئه‌وه كو ب ناڤێ چ حزبان و مه‌لاقیان نه‌بیت، هه‌ما ب دروستى هه‌ژار بیت، چو حزب بیت چو ئاین و مه‌زهه‌ه‌ب بیت، ب دلێ وى نینه. ب راستى ژى ئه‌و هینگى مه‌زناهیا خوه و حزبا دسه‌لمینیت، له‌ورا هه‌ر ئه‌و تاكن وێ حزبێ چێ دكه‌ن. وه‌رن خوه چێ كه‌ین!!.
هه‌رێما ده‌وله‌تان
هه‌ر وه‌كو ئه‌و گه‌میا مه بۆ خوه ژ هه‌ستیكان چێكرى و ب خوینێ ئێخستیه به‌رئێك خه‌لكه‌كى ل به‌ره د ناڤ رۆندكێن شه‌هیدان دا نقۆم بكه‌ن و كه‌سێ چاڤ پێ رانابن و ئه‌و قۆرچكا مه ل تاما سه‌ربۆرا خوه یا دیمۆكراسى و ئازدایێ دای ژى، دێ د دفنێن مه دا ئیننه خار، هه‌رێما مه یا كوردستانا عیراقێ هێڤێنێ ده‌وله‌ته‌كا سه‌ربخوه یا كوردستانا مه‌زنه، هه‌كه ئه‌ڤ سه‌ربۆره بۆ بمینت و خودانێ وێ ئه‌م بۆ خوه بهێلین و بپارێزین، دێ خه‌ونا هه‌ر كورده‌كى ل سه‌رانسه‌رى جیهانێ كه‌ته راستى، هه‌كه نه‌هێته كرن، دێ بیته مه‌زنترین ده‌ستكه‌فت یان ژى دێ وێ خه‌ونێ به‌ر ب هشیاربوونێ ڤه‌به‌ت، مادبیت هه‌ر كۆمه‌ك ژ مه د نیڤا ڤێ هه‌رێما بریندار دا خوه بكه‌ته ده‌وله‌ته‌ك؟! هه‌ر حزبه‌كێ دڤێت ببیته ده‌وله‌ته‌ك، هێشتا خه‌ونا مه خه‌ونه، هنده‌ك لایه‌ن دخوازن خه‌ونا خوه تێدا بكه‌نه راستى، پارێزگه‌هه‌ك ژ هه‌رێمێ دخوازیت ئه‌و ژى ببیته هه‌رێم، ئه‌و ژى خه‌ونه‌كه د خه‌ونێ دا.. گه‌له‌ك شلق یێن ب سلێمانیێ دكه‌ڤن چونكو ده‌ڤه‌راكا ب ره‌هه‌نده و هه‌ڤسنوورا ئیرانێ، به‌غدایا نها یا شیعى نازدارا ئیرانێ یه، ئه‌ڤه بوو سێگۆشه‌كا رێگر ل به‌ر سینگێ كوردێن بێ خودان.. نها پێڤه‌دان یا دوژمن و نه‌یاران یا د جهێ خوه دایه، به‌لێ یا هه‌ڤالێ مرۆڤى و كه‌سوكاران، ژه‌هرا وێ گه‌له‌كا دژوار و تیژه، چونكو خیانه‌ت ژێ دباریت، كه‌نگى ئه‌و نیڤ خه‌ونا مه یا نها ب قه‌نجیا كه‌سه‌كێ كارێزما بجه هاتیه، هێشتا ئه‌و نیڤ خه‌ون یا بوویه نیڤ راستى و دلۆڤانیه‌كا نیڤنه‌ته‌وى یا دى ل مه دهه‌لێت، دێ بهێلن بلا بكه‌ڤیته به‌رى، نابیت هه‌ر گه‌میه‌كێ بیست شۆفێر هه‌بن، نه‌خاسمه هه‌كه رێكێ ڤێ نه‌كه‌ڤن و د ناڤ رووبه‌رێن مه‌زنێن ده‌ریایێ دا به‌رزه‌ببن، نها هه‌كه ئه‌ز نموونه‌كێ بینم، نه‌ك د ناڤ حزبه‌كێ دا به‌لێ ل ناڤ هه‌مى حزبان، هه‌كه سازیه‌ك و ئێكا دى ڤێك نه‌كه‌ن و ببنه ئاگر ل سه‌ر سه‌رێ هه‌ڤدو، هه‌ر ئێك ژ به‌ر یا دى نادانیت و هه‌ر سه‌رۆكێ ئێكێ خوه نه‌ده‌ته ب یێ دى، به‌لێ هه‌كه مه‌سعود بارزانى هاته ناڤ شۆلێ، ئه‌و هه‌ردو سازى دێ بنه ملحه‌مێ ل سه‌ر ده‌رێ برینان، واته نۆشداره‌كێ رۆحى یه و هه‌مى ملله‌تان ژى ئه‌ڤ سه‌رۆكه هه‌نه، به‌لێ چه‌ندى دوژمنێن كوردستانێ هند دزه‌به‌لاحن یێن دشێن ڤان رۆژان ژه‌هرا خوه به‌رده‌نه ناڤ ئاخا مه یا نازك و ئاگرى هه‌ر ژ ده‌همه‌نا مه به‌رده‌نه مه، ئه‌ڤا من گۆتى ئه‌و ژیواره یێ د ناڤ ئێك حزب دا، دێ بینى حزبه‌كا دى یا ب شه‌ش حه‌تا حه‌فت سه‌رۆكانه، هه‌مى ژى ڤێك ناكه‌ن د سه‌رجه‌مێ خوه دا، ل دووماهیێ ژى هه‌مى پێكڤه ل گه‌ل حزبا دایك دێ بنه ئاگر و به‌رنێ و ئاڤێ هاڤێژنه وێ كانیا وان ئاڤ ژێ ڤه‌خوارى، ته هند دیت هنده‌ك مێهڤانێن دارگران ئینانه سه‌ر دلێ شه‌هیدێن ڤى ئه‌ردى ڤێجا دێ ئینن و دێ فه‌تلا لێده‌ن.. هه‌ر ئایینه‌ك و مه‌زهه‌به‌ك یێ بۆ خوه ڤه‌دكێشیت، هه‌رێمه‌ك ب ناڤێ ده‌شتا نه‌ینه‌وا و ئێكا دى ب ناڤێ سلێمانێ و ئێكا دێ ب ناڤێ و… هتد. هه‌ما ئه‌ز و ئیجاخا خوه ژى دێ ژ گوندێ خوه ڤه‌بین و خوه كه‌ینه ده‌وله‌ت، خوه ل به‌حه‌شتێ ژى هوسا ب ده‌ست مه ناكه‌ڤیت!! بخوه و نه‌كه .. نێ له‌ورا ئه‌ڤه ب سه‌رێ مه هات، مینا دبێژن (عه‌مه‌لێ مه‌یه)، یان حزبێن پارچێن دى ده‌ستێن خوه ناكه‌نه تێكدا هه‌مى ب هه‌ڤرا بۆ ئێك ئارمانجا نه‌ته‌وه‌یى. خوه هه‌ر ئۆفیسه‌ك ده‌وله‌ته‌كه و بریارێن وێ د سه‌ربخوه‌نه، هۆب و پشكێن وێ هه‌ر ئێك خوه ناده‌ته ب ئێكێ دى، هه‌ر ره‌وشه‌نبیره‌كێ مه نڤیسه‌ره‌كێ مه ده‌وله‌ته‌كه و خوه ناده‌ته ب یێ دى، هه‌ر ئێك ب دهۆلا یێ دى دادده‌ت، ل شوونا هه‌مى ب هه‌ڤرا بۆ ئێك په‌یام بكه‌ن، ئه‌و ژى ده‌وله‌تبوون و سه‌ربخوه‌بوونه، به‌لێ پرانیا مه ب مخابنی ڤه بۆ په‌یاما دراڤى دكه‌ین، ئه‌ڤه هه‌مى ل ره‌خه‌كى و ل ئێكێ دى ئه‌ڤ شه‌رێ ل سه‌ر ئه‌ردێ مه و ئه‌ڤ دوژمنێ دیرۆك شه‌پرزه كری و ڤه‌جنقاندى هاتیه سه‌ر گوهێن مه و رۆژانه گه‌نجێن مه شه‌هید دئێخن.
خوارنه‌گه‌ها سویندان
هه‌مى دزانن ل باژارێ مه سویند ب هه‌ردو ملا دهێنه خوارن، چه‌ندى سویند یا مه‌زن بیت، واته ئه‌و دره‌و مه‌زنتره و هه‌ر وه‌نینه، ئه‌ڤ جۆرێ سویندێ وه‌كو تێكه‌لكرنا گورگى ل گه‌ل رویڤى یه و پێڤه‌دانا مارى. هه‌كه ده‌ڤێ هنده‌كا ئه‌وى تشتى بێژیت چاڤێن وان وه‌نابێژن، هه‌كه چاڤ بێژن، موزیكا ده‌نگى نابێژیت، هه‌كه نه‌بێژیت ژى، دل وه نابێژیت و ئه‌ڤه لاوازترین ئیمانه، باشه هنده دره‌و دهێنه كرن ما نامینته د حه‌فكا وانرا؟!، ل ڤى وه‌لاتى راستى یا شه‌هید بووی و دره‌و یا بوویه ئه‌ركێ پرانیا خه‌لكى، ما چ خۆشى و تام د سویندا دره‌و دا هه‌یه؟!، سویندخوارنا ژ قه‌ستا دبیته پاره‌یه‌كێ حه‌رام و ته‌ڤلى مالێ مرۆڤى دبیت، یان مرۆڤ دێ ده‌ڤخوین بیت و د هه‌مى بیاڤێن ژیانا خوه دا دێ فێر بیت، ل گه‌ل خێزانا خوه ل گه‌ل هه‌ڤكارێن خوه ل گه‌ل ده‌روونێ خوه، بۆ مفایه‌كێ به‌رنه‌كه‌فتى یێ ترۆمبێله‌كێ هنده‌ك ده‌لال دێ بنه پره‌ك كو فێلبازى سه‌رێ خوه بخۆن، باشه ته حیلا خوه كر، تو بۆچى سویندێ دخۆى؟! مانێ ئه‌و تو یێ حیلێ ل خوه دكه‌ى، هنده‌ك ده‌لال بۆ بده‌ستڤه‌ئینانا كارته‌كا كۆره‌ك یا ده‌ه هزارى دێ مالا هه‌ڤاله‌كێ خوه خراب بكه‌ن و نیڤ ده‌فته‌رێ خوساره‌ت بن، چونكو بكڕ باوه‌ریێ و دلسۆزیێ دده‌تێ، به‌لێ نها وه‌لێهاتیه هه‌كه بێژن (سویندێن مه‌عڕه‌زا..) هه‌مى دزانن شاشى ل كیڤه‌یه، ( ل گه‌ل رێزگرتنا هنده‌ك كه‌سێن هێژا و نه‌زیه ل وى جهى و سه‌رده‌ریا وان یا پیرۆز ـ وه‌كو فریشتانه، ژ بلى وان)، هه‌ر وه‌سا راسته دوور نینه هنده‌ك بكڕ ژى هه‌بن دارگرانن، مینا دبێژنێ (سه‌ڕه‌تان)ن، دنه‌خۆشن گه‌له‌ك پرسیاران دكه‌ن و چو تشته‌كى ب ترۆمبێله‌كا پاقژ ناده‌ن، دخوازن ترۆمبێله‌كا مۆدیل نوو و ره‌نگێ سپى، بێ بۆیاغ و بێى ده‌عم و بێ عه‌ته‌ل و فۆل مواسه‌فات و ب پاره‌كێ كێم بكڕن، به‌لێ ئه‌و جۆرێ مرۆڤان ژى ڤى سه‌رده‌مى ب ئاقل كه‌فتینه و دزانن تشتێ پاقژ ب بهایه‌كێ پاقژه، به‌لێ جه‌مبازێن فرۆتنا ترۆمبێلان ژى زۆر بووینه، هه‌كه مرۆڤ بكڕه‌كێ ژار بیت و یێ مسكین بیت، ستۆیێ خوه بدانیته سه‌ر ملێ خوه، ئه‌و مرۆڤ ئاڤ و ئاڤ تێچوو، دێ كه‌ڤیته له‌پێن نه‌هنگان و دێ ژێك ڤه‌چڕن، چونكو ئه‌و حه‌ز ژ مرۆڤێن ژار دكه‌ن، دا غه‌درێ لێ بكه‌ن و دبێژنێ (نه‌فه‌ر)!!، هێدى هێدى و ب ئه‌زمانه‌كێ خۆش دێ مارى ژ كونكێ ئیننه ده‌ر، دێ بنه ملحه‌مێ سه‌ر ده‌رێ برینا و هه‌ر وه‌كو ئێك ژ بنه‌مالا وى، به‌لێ پشتى دربێ خوه ددان و پێ ڤه‌دده‌ن و قاپویته‌كى پێ راِدده‌ن، ئه‌و یا وى ژ بنى چوو و ئێدى سلاڤ ژى ناكه‌نێ، ئه‌ز دبینم چه‌نده‌كێ رۆلێ دره‌وێ و خاپاندنێ ل بازارێن ره‌ش هه‌تا راده‌كێ ل كێمێ دایه، نه‌خاسمه پشتى هاتنا داگیركه‌رێن داعشێ بۆ سه‌ر وه‌لاتێ مه، چونكو وه‌دیاره ئه‌ڤه ئه‌و عه‌مه‌لێ مه بوو و ئه‌و غه‌ده‌ر و حیله و دره‌وێن مه ل ئێكودو دكرن، ئێدى ئه‌و سه‌رگه‌رمى ژى نه‌مایه ل ده‌ف وان كه‌سان كو سویندێن سۆپه‌ر بخۆن، چونكو هه‌مى ژ دفنا ده‌ركه‌فت، مووس ب هنده‌كا كه‌فتن، یێ ژ هه‌میان پتر سویند خارین، پتر دلێ وى رابوو و ژ سوحبه‌تێن ده‌فته‌ران بوو هیره‌ده‌وات و كه‌فته حوكمێ ده‌ه هزاران. دیسا تشته‌كێ دى ژى هه‌بوو، هه‌ر وه‌كو ئه‌و بازار ببوونه جهێ مه‌دحه و بلا ب زمانێ جادێ بیت (فه‌خفه‌فه) و های لای، به‌لێ نها ئه‌و ژى نه‌مایه و خه‌لكه‌ك گه‌هشته قه‌ناعه‌ته‌كێ كو پوفكرنێ چ پێڤه نائێت، هه‌مى یا ژ خوه‌یه، له‌ورا ئه‌ڤه سزایه‌كێ ئاسمانى بوو ب مه كه‌فتى هندى مه سویند خوارن، یا باش ئه‌وه بۆ مه ببیته سه‌ربۆر و پێڤه بچین، هه‌كه نه دێ پێشانگه‌هێن مه ب سه‌ر مه دا هێن، چونكو خه‌له‌كه‌ك حه‌مه‌ر بوویه ژ خوارنا سویندان و سمبێل پێ باداینه، له‌ورا دێ هه‌میێ هه‌لاڤێژین و بلا ل شوونا سویندان بخۆین، ب وژدان ده‌ستێ خوه ب سه‌رێ ئێكودو دا بینینه خار و ل ئێكدو ببینه سه‌میان و هه‌ڤال دلۆڤانیێ ب هه‌ڤدو ببه‌ین.
عه‌بادی یێ شرین!
مژار شرین عه‌بادى یه، نه‌ك عه‌بادى یێ سه‌رۆك وه‌زیرێ عیراقى، به‌لێ خانما هه‌نێ چالاكڤانا ئیرانى د وارێ مافپه‌روه‌ریێ و ئاشتیێ دا، ڤى ده‌قى دنڤیسم وه‌كو راستڤه‌كرنه‌كا بچووك و بلا جۆره‌كێ نه‌یێ نه‌مه‌ردیێ ژى بیت یان لێبۆرینێ هه‌ر ژ من بۆ من، سه‌را شاشیه‌كێ د گۆتارا رۆژا ئێكشه‌مبیا بۆری دا هه‌ر ل ڤێ رۆژنامێ وه‌شاندى، ب مانشێتێ (ئبیلیس د ناڤبه‌را عوبه‌یدى و عه‌بادى دا)، هه‌ر چه‌نده مژار یا سیاسى بوو و نه‌ك تنێ هه‌ما ل سه‌ر وێ خانمێ بوو، به‌لێ ل سه‌ر پرسگێركا ژكارئێخستنا عوه‌بیده‌ى وه‌زێرێ به‌رگریا عیراقێ بوو و حه‌یده‌ر عه‌بادیێ، تنێ وه‌كو پێكڤه‌گرێدان و وه‌كهه‌ڤیا ئیدیه‌م و نه‌ژادان كو عه‌بادى تاگیرێ ئیرانێ و شیعه‌مه‌زهه‌به و شرین عه‌بادى ژى هه‌ر یا شیعى ئیرانى یه، وه‌كو خۆشیه‌كێ بۆ گۆتارێ، ب سالوخه‌تا ئبلیسیێ چونكو ئه‌م د دیالۆگا خوه یا كورده‌وارى دا وێ سالۆخه‌تێ بۆ هندێ بكاردئینین، هه‌كه كه‌سه‌ك گه‌له‌كێ ب مێشك بیت و زانا و زیره‌ك بیت، چاوا دبێژن فلان یێ ئاقل جوهیى یه، وه‌سا دبێژین فلان یێ ئبلیسه، شاشی ژى ئه‌وبوو كو ئه‌و خانم هه‌لگرا خه‌لاتێ نۆبل یێ نه‌رۆیجى یه ب ئاشتیێ به‌لێ مه ب نڤیسینا رۆمانێ ئینایه زمان، چونكو ته‌كه‌زى باش نه‌هاته كرن و ل دووڤ پێزانینێن بیردانكا نڤیسه‌ره‌كێ عه‌ره‌ب كو ئه‌م خاپاندین، كو ئه‌وێ خانمێ خه‌لاتێ نۆبلێ ب رۆمانێ وه‌رگرتیه و یا زیره‌كه ب نڤیسنا رۆمانێ، چونكو ئه‌ڤه ژى ب راستى شاشیه‌كا نڤیسی یه و ئه‌ز دبینم وه‌كو شه‌رمه‌ك، نابیت چاڤێ خوه لێ بنقینین و بلا ل سه‌ر مه‌را نه‌بۆریت، هه‌ر چه‌نده جوامێرێ هه‌ر های ژ گۆتارێ نه‌بوویه و هه‌ر كه‌سێ به‌رسڤه‌ك نه نڤیسیه و تێ نه‌ئینیایه ده‌ر، ژ بلى دكتۆره‌كێ هێژا ل ده‌رڤه‌ى وه‌لاتى ڤێراگه‌هشت و هایدار كرم، خۆزى هه‌مى خوانده‌ڤان و نڤیسه‌ران ئه‌و ئه‌مانه‌ت هه‌با كو راستى بهێته پاراستن، دا گه‌له‌ك كه‌یفا من ئێت هه‌كه گه‌له‌كان ئه‌ڤ شاشیێن هۆسا مه‌یزاندبانه، دوور نینه مرۆڤ بۆ شاره‌زاتیا باوه‌ریێ و زانینا شه‌رعه‌تى ژى و حیله‌یێن شه‌رعى و قانوونى ژى بێژیت، فلانكه‌س یێ ئبلسیه یان عاقل جوهى یه، له‌ورا بۆ راستڤه‌كرنێ و ئه‌مانه‌تا نڤیسینێ بلا هه‌ر راستیه‌ك بچیته جهێ خوه، تشته‌كێ ئه‌كتیڤه هه‌مى خوانده‌ڤان كه‌ڕه‌دێ ل سه‌ر وان ده‌قان بكه‌ن یێن دهێنه نڤیسین، چ د وارێ زمانى دا بیت یان ژى پێزانینان، من دیت گه‌له‌ك ب به‌ردكه‌ڤیت ڤێ ستوونێ بۆ بمه‌زێخم و هه‌ر وه‌سا بزاڤێن وێ د بیاڤێ ئاشتیێ دا بینمه زمان، وه‌كو هه‌رلگرا هه‌مان خه‌لاتێ نیسلون ماندێلا وه‌رگرتى و گه‌له‌ك خه‌لاتێن دی، د تۆماركرینه د ویكیپیدیا گوگلى دا، خانمێ ره‌خنه ل سیسته‌مێ نها یێ ئیرانێ گرتیه بۆ رۆداووێ كو یێ خه‌مساره د بیاڤێ مافێ مرۆڤى دا و دیمۆكراسیه‌كا خاڤه، نه‌خاسمه ل ڤان دووماهیان په‌سنینا ژنێن كۆبانێ كریه كو رۆله‌كێ پێشچاڤ نیشا جیهانێ دایه، هه‌ر وه‌سا په‌سنینا بریارا مافێ چاره‌نڤیسێ سه‌ربه‌خوه‌بوونا ملله‌تێ كورد كریه. به‌لێ گۆتارا دى ل سه‌ر سه‌روبه‌رێ ئیراقێ یه و ئه‌و پێرابوونێن دهێنه كرن ژ لایێ فراكسیۆنا مه‌زنا عیراقێ ڤه كو شیعه‌مه‌زهه‌به، نه‌یێ دووره ژ كریارێن ئه‌جینه‌ده‌یێن وه‌لاته‌كێ وه‌كو ئیرانێ، كو ئه‌ردێ عیراقێ بۆ خوه كریه زه‌مینه‌ك و گه‌لێ وێ كریه تۆمك.. هه‌ر مینا نڤیسه‌ره‌كێ ئه‌لحیاه به‌رى ده‌مه‌كى نڤیسى (ئیرانێ عیراق خوار..)، وه‌دیاره هه‌ر كه‌سێ ل سه‌ر وان بنڤیسیت ژى دێ بیته هه‌ڤالێ قه‌لێ و دڤێت خوه د به‌ررا نه‌چیت هه‌كه دێ مرۆڤ تالۆقه‌تى ڤان جۆره شاشیان بیت و ئه‌ڤه بوو مه‌ره‌ما من.
ده‌ستێ ل بن به‌رى
شێرزاد نایف
وه‌رن چه‌نده‌كێ ئه‌وى به‌رى بلڤینین، چونكو كه‌ڤره گه‌له‌ك مایه ل سه‌ر ده‌ستێ مه، بلا پشتا ده‌ستى بخڕیێت، هه‌ر ئه‌م ب خوه‌ینه و كه‌س ژ مه یێ بیانى نینه، وه‌لاتێ مه هه‌موو بوویه ئێك مال و ئێك خێزان، ئه‌م ملله‌ت و ده‌ستهه‌لات ژى نه دو تشتێن ژێك دوورین، به‌لكو ئێك ڤیگه‌رین، ما حوكمه‌ت كی یه و ئه‌ز كی مه؟، تنێ ب ناڤ دژێك جودانه، هنده‌ك مال ل دهۆكێ هه‌نه برایه‌ك كۆمونیسته و یێ دى ئێكگرتوویه ئێك پارتى یه و یێ دى ئێكه‌تى و پۆستێن مه‌زن ژى د حوكمه‌تێ دا هه‌نه، ئه‌ڤه ژى تشته‌كێ جوانه و جهێ په‌سنینا دیمۆكراسیێ یه، له‌ورا هه‌مى ئاریشه و قه‌یرانێن مه ئێكن. به‌لێ هه‌ر وه‌كو هه‌یڤا هنگیڤینى د ناڤبه‌را مه دا یا ل كێمیێ دای و ئه‌م یێن ل به‌رئێك ره‌ش دبین، ئه‌ز دخوازم د ڤێ مژارێ دا هه‌مى تشتان ب بیرۆدزا ره‌وشتى ڤه گرێ بده‌م، له‌ورا هه‌ر ل ده‌ستپێكێ چونكو ل سه‌ر ڤێ ساخله‌تى دنڤیسم فه‌ره ب ره‌وشتى ژى راڤه‌كرنا خوه بكه‌ین، واته نه به‌ران ب ده‌ستێ چه‌پێ بهاڤێژین و نه به‌را بهاڤێژینه ئه‌و كانیا مه ژێ ڤه‌خوارى، هه‌ر وه‌سا مینا دبێژن: تفا سه‌رئه‌ڤرازه. ل ڤێره نه ئه‌ز به‌ره‌ڤانیێ ژ حوكمه‌تێ دكه‌م و نه ژى دهاڤێژمێ، ب تنێ دێ دو هه‌لویستێن به‌رۆڤاژى ئینم زمان و په‌یڤ بلا بمیننه بێ خال و ئه‌ز دزانم من چ گۆت! مژارا من مافێن وه‌لاتیانه و دابینكرن ژ حوكمه‌تێ، ئه‌و ب خوه مافێن مرۆڤاتیێ د سیسته‌مه‌كێ وه‌كو یێ مه دا كو ل بن سیبه‌را دیمۆكراسیێ حوكمه‌ت ئه‌ركێ خوه ئه‌نجام دده‌ت، فاكته‌رێ ره‌وشتى (اخلاق) مایێ خوه د هه‌مى كاروبارێن مه دكه‌ت، له‌ورا ژى گازندا وه‌لاتیان ل سه‌ر حوكمه‌تێ یا تیژه، به‌لێ هه‌ر وه‌كو به‌رسڤدانا حوكمه‌تێ ژى یا ره‌وشتى یه و دبیت خوه بێ ده‌نگ كربیت جاران و جارجار ژى گه‌فێن زیق دكه‌ت و ب بێ منه‌تى ئاراسته‌یا گۆتارا وێ یه، ” یێ بڤێت ئه‌ڤه‌یه و یێ نه‌ڤێت بلا بچیته مالا خوه”، واته ل ڤێره رێزگرتنا لێكگوهارتى نامینیت، نه‌مازه بیردۆزا حقوقی د ره‌وشتى دا دڤێت رێزگرتن هه‌بیت، د مافێن لیبرالى و یێن سیۆشالیست دا فه‌ره هه‌ر تاكه‌كى ماله‌ك و كاره‌ك هه‌بیت و حوكمه‌ت به‌رپرسه ژ هه‌مى مافێن وى، راسته حوكمه‌ت شیایه ئێكه‌مین مافێن جڤاكى دابین بكه‌ت كو ئه‌و ژى ئاسایشه، ئه‌ڤه ئه‌و حنێره یا حوكمه‌ت پێ دخوریت و مافێ وێ یه، چونكو گه‌له‌ك ده‌وله‌تێن ده‌ڤه‌رێ نه‌شیاینه بكه‌ن، یا دویێ حوكمه‌ت شیایه قانوونێ هه‌تا راده‌كێ باش و پێشچاڤ برێڤه ببه‌ت، یێ كوژه‌ك بگریت و سزاب ده‌ت و یێ دزیكه‌ر بگریت، هه‌ر وه‌سا نه ژ ره‌وشتى یه كو وه‌لاتى ژى هه‌ژار و موعیز ژى ببن و به‌ریكێن زه‌لامان ڤالا ببن و خه‌لك برسی ببن، وه‌لاتى شه‌رم ژ ده‌یندارێن خوه بكه‌ن و حوكمه‌ت شه‌رم ژ وه‌لاتیان نه‌كه‌ت، جابیێ حه‌قێ ئاڤێ و كه‌هره‌بێ و خه‌لك بمیننه ب سه‌ر و ستویێن ئێكڤه، مووچه نینن هه‌ما چ بكه‌ن وه بكه‌ن، ب راستى ئه‌و بێ منه‌تى ژى د چیته د خانه‌یا بیردۆزا ره‌وشتى دا، ئه‌ڤ قه‌یرانا ئابوورى باندۆرا وێ ل سه‌ر بیاڤێ ئه‌ته‌كێتێن ره‌وشتێ حوكمه‌تێ گه‌له‌كا دژوار بوو، ره‌نگه ژى ئه‌ڤه بوو ئه‌و ئه‌نجامێ شه‌رێ دوژمنێن هه‌رێما كوردستانى دخواست بده‌ستڤه بینیت و ب ده‌ستڤه ئینایه ژى كو خه‌لكه‌ك تۆره بیت و به‌را ب ده‌ستێ چه‌پێ بهاڤێژیت، حوكمه‌ت گه‌له‌ك كریاران دكه‌ت جهێ گله و گازندێ نه، كو نه‌خۆشیێن ده‌روونى ل جه‌م خه‌لكى په‌یدا ببن، به‌لێ ته هند دیت ژى ژ لایه‌كێ دیڤه كریاره‌ك یان ده‌سكه‌فته‌كێ مه‌زنتر ئه‌نجام دا ئه‌وا خرابى هه‌مى لادا، بۆ نموونه دابینكرنا مووچه‌یێن پێشمه‌رگى و بایه‌خدان ب وى پیرۆزه‌یه‌كا ره‌وشتى یه، راسته پێشمه‌رگه ژى یێ وان دپارێزیت ب مال و سامان و پرۆژه و سازیان ڤه، یێ خوه شه‌هید دكه‌ت، به‌لێ كه‌س نه‌كاره بێژیت كاره‌كێ خرابه، یان ژى وه‌كو مه دیتیى سه‌رۆك مه‌سعود بارزانى ده‌مێ د هه‌لویستێ شه‌رى دا راپێچانا پێشمه‌رگاتیێ كرى و پۆتا (ئه‌دیداس) كره پێ خوه و چوو و ب كورێن خوه‌ڤه چوونه د سه‌نگه‌رێ شه‌ره‌فێ دا، دبیته جهێ به‌ژن چه‌ماندنا هه‌مى وه‌لاتیان و ئه‌و سه‌رده‌ریێن حوكمه‌تێ یێن خه‌لك ئاراندین هه‌مى هاتنه فۆرماتكرن، هه‌ر وه‌سا گه‌له‌ك شاشیێن حزبێ ژى پێ دهێته ڤه‌ره‌ڤاندن، خوه دده‌ته به‌ر سه‌رێ هه‌می شاشڤانان، ئه‌ڤه ژى ئه‌و تشته یێ ئه‌و پێ ملله‌تێ خوه برێڤه دبه‌ت، ئه‌و ژى فاكته‌رێ ره‌وشتى یه. سه‌ره‌راى هندێ كو ئه‌ڤه پۆستێ وى یه وه‌كو ب فه‌رمى فه‌رماندێ هێزێن له‌شكرێ كوردستانێ یه، به‌لێ گه‌له‌ك سه‌ركردان وه نه‌كرینه و ئه‌و ته‌وازوع و ئه‌خلاق نه‌بوویه، ده‌مێ ل رۆژا رزگاكرنا شنگالێ مینه‌سا وى یا كۆنگرێ رۆژنامه‌ڤانى ته‌لیسێن سه‌نگه‌ران بوون و د ناڤ ئاخێ و دیكێلا شه‌رى دا دپه‌یڤى، ب راستى ژى ب وێ سه‌ره‌ده‌ریێ مرۆڤى قفل دكه‌ت و ئێدى به‌رسڤا هه‌میان دهێته دان، چونكو راگرتنا شه‌ره‌فێ سه‌رێ هه‌ڕه‌مێ یه د بیردۆزا ره‌وشتێ مه دا.
ره‌وشه‌نبیریا مرنێ
ره‌وشه‌نبیرى باره‌كێ گرانه، به‌لێ شێوازێ ده‌ربرینێ دڤێت ب گیانه‌كێ سڤك و وه‌رزشى بیت، مژارا مرنێ ژى گرانترین مێهڤانه. ئه‌رێ ئه‌م چاوا بزاڤێ بكه‌ین ببیته مێهڤانه‌كێ دارسڤك؟ چونكی مرن راستیه‌كا ته‌حله؟ ئه‌م چاوا شرین بكه‌ین؟ راسته سه‌ده‌م گه‌له‌كن و مرن ئێكه، مرن وه‌كو چه‌كێ میلانه وه‌كو مۆشه‌كا كرۆزه، كه‌س نكاریت ژێ قورتال بیت هه‌كه هات، ئه‌ڤه راسته به‌لێ ب دیتنا من دو جۆرێن مرنێ هه‌نه، ژ بلى یا قه‌ده‌رێ و یا ئێكسپایه‌را مرۆڤى و ئێكسپایه‌را وه‌ریسێ (ترشا ناڤۆكى)، فه‌ره خوه ل ئه‌گه‌رێن نێزیككرنا ئه‌نجامێن زیاندار هایدار بكه‌ین و خودێ ته‌عالا ژیێ مه درێژ بكه‌ت، چونكی بار هه‌مى مه ئێخستیه ل سه‌ر عه‌جلێ و نێزیكبوونا قه‌ده‌رێ، به‌لێ هه‌كه وه‌سا بیت، وه‌رن ته‌ماشه‌ى رێژه‌یێن وه‌فیاتان ل وه‌لاتێن رۆژئاڤا بكه‌ین كا چه‌ند ژ یێن مه كێمتره، چونكی ره‌وشه‌نبیریا ساخله‌میێ خورتتره ل ده‌ف تاكێن وان، گه‌له‌ك گیان بووینه قوربانى ژ سه‌ده‌ما نه‌بوونا زانینه‌كا ب سه‌رڤه سه‌رڤه یا هنده‌ك ئه‌ته‌كێت و پێزانینێن ساده و بێ ماندیبوون وه‌كو ئێمرجنسى یێن چاره‌سه‌ریێن ده‌سپێكى یان هنده‌ك راسپاردێن خوه پاراستن ژ گه‌له‌ك ئاریشێن گرێداى ساخله‌میا مرۆڤى و هه‌بوونا زانینه‌كا مفادار بۆ خه‌لكى، گه‌له‌ك كه‌سان د ناڤ جڤاكى دا گیان ژ ده‌ست داینه ژ ئه‌گه‌را هنده‌ك نه‌زانین و خوه تێنه‌گه‌هاندنا چاره‌سه‌ریێن بچووك، یان كه‌سێ خیره‌ت نه‌كریه ژ جهێ خوه رابیت و د هاوارا نه‌ساخى یان لێقه‌ومى چوو بیت، یان وه‌كو دبێژن چوكێن مرۆڤى دشكێن و چ ژ مرۆڤى ناهێت خوه هزر بكه‌ت كا دێ چ كه‌ت، ده‌روون تێك دچیت، هه‌كه هات و روودانه‌ك ب سه‌ر مرۆڤى دا هات.
دێ چی یه مه‌له‌ڤانگه‌هه‌كێ كه‌سه‌ك دێ نقۆم بیت و كه‌سێ هاى ژێ نه، چونكى چه‌ندقین ب پێنج خۆله‌كان دا چێ دبیت، یێن ب ره‌خ ڤه هاى ژێ نینه، یا فه‌ره هنده‌ك ئالاڤ و ئامیره هه‌بن، ڤان كه‌سێن لێقه‌ومى قورتال بكه‌ن، بلا چ تشتێن بها گران نه‌بن، هه‌مان ستوونه‌ك یا بۆریه‌ك هه‌بیت، بۆ نموونه وه‌كو گۆپاله‌كى بیت، هه‌ما داهێلنه بنێ مه‌له‌ڤانگه‌هێ و ئه‌وێ دخه‌ندقیت ب راكێشنه سه‌رى، یان بۆ نموونه روودانه‌كا ترۆمبێلا هاتبوو روودان، ل رێیه‌كێ ئه‌و كه‌سێن لێقه‌مى ڤه‌گوهاستنه د ترۆمبێله‌كا دى دا، ئێك ژ وان یێ گیانێ خوه ژ ده‌ست دایى، ب تنێ خوین د ده‌ڤى دا مابوو ژ به‌ر وێ خوینێ دمریت، هه‌كه به‌س ئه‌وان كه‌سان ئه‌و كه‌س وه‌رگه‌راندبا ره‌خێ وى یێ دیتر ئه‌و خوین دا ژ ده‌ڤى هێته خار و نه‌دمر، به‌لێ كا خیره‌ت نه‌كرینه یان دا ترۆمبێل نه‌بیته پنى وه‌نه‌كرینه. یان دێ بینى دیپشك دێ ب كه‌سه‌كى ڤه ده‌ت، ئه‌وێن ل ده‌وروبه‌ر نزانن چ لێ بكه‌ن، هه‌كه ئه‌و ئیمرجنسی یا گه‌له‌كا ب سه‌ناهى بكه‌ن دێ كابرا ژ مرنێ رزگار بیت، چونكی ژه‌هرا دویپشكى خوینێ ره‌ق دكه‌ت و ناهێلیت د ره‌هان دا بهێت و بچیت. گه‌له‌ك مرۆڤان كه‌هره‌بێ گرتینه ژ به‌ر نه‌زانینا تشتێن ساده وه‌كو نه‌كرنا ده‌ستگوركان یان پێلاڤه‌كا پلاستیكى، یان سست گرێدانا كێبلان، هنده‌ك دێ كێبلێن كاره‌بێ هێلنه ل به‌ر ره‌حما بارانێ و دێ په‌قینێن مه‌زن هێنه روودان. ژ لایه‌كێ دى ڤه خوه بۆ هاژووتنا ترۆمبێلێ هنده‌ك تشتێن ساده هنده‌ك شۆفێر ب چ ڤه وه‌رناگرن، به‌لێ دبنه ئه‌گه‌رێ ژده‌ستدانا گیانێ وان و ئه‌و نه‌فه‌رێن ل گه‌ل، بۆ نموونه پشتراست نابیت كا ترۆمبێل هه‌نه یان نه ل دووریانه‌كێ یان ئیشكه‌كێ ژ به‌ر كو یێ مژووله ب ئاخفتنێ یان ده‌نگێ سترانان هه‌ما دێ كه‌ته گۆتره و دێ چیت، ته هند دیت حنگێن ژێ هات و چوو به‌ر دلۆڤانیا خودێ. هه‌ر وه‌سا گه‌له‌ك و گه‌له‌ك تشتێن دیتر هه‌كه پیچه‌كێ مێشكێ خوه بده‌ینه كارى دێ ژ مرنێ قورتال بین و بلا زه‌حمه‌ته‌كا دو خۆله‌ك بیت، نه‌ك كاره‌ساتێن مه‌زن بن و خودێ ژیه‌كێ درێژ و ره‌وشه‌نبیریه‌كا باش بده‌ته مه.
سته‌ما سیسته‌ما
هه‌مى سیسته‌م و قانوون و دستوور نه د خرابن و بۆ رێخستن و ساناهیكرنا ژیانا مرۆڤان هاتینه دانان، هه‌ر وه‌سا هه‌مى ئاینێن ئاسمانى ژى چ نه‌هاتینه بۆ هندێ كو سته‌مێ بكه‌ن، گه‌له‌ك ئایدۆلۆجیا ده‌ركه‌فتینه وه‌كو ره‌نگڤه‌دانا سته‌ملێكرنێ و ئه‌م سته‌ملێكرن بوویه ده‌ستكه‌فته‌ك كو خوه پێ ئاڤا بكه‌ن و كیانه‌كى بۆ خوه به‌رهه‌ڤ كه‌ن، لێ ل دووماهیێ به‌ره‌ڤاژى لێهاتینه و ئه‌وان ژى هه‌مان رێ گرتیه. ل ده‌مه‌كى كوم ململانێن ئاینى سه‌رێ خوه دخار، بزاڤا ماسۆنى ده‌ركه‌فت، پاشى حزبێن سیاسى هاتنه دى، هه‌موو ژى هه‌مان كریار كو ئارمانجێن به‌ریا ده‌مى بوون، ژ به‌ر هندێ گه‌له‌ك سیسته‌مان بۆ خوه دین كریه ئالاڤه‌ك بۆ كارتێكرنێ ل سه‌ر ده‌روونا مرۆڤان، هه‌ر وه‌كو میكافللی دبێژیت: ئاین بۆ حوكمه‌تان گه‌له‌كێ گرنگه، نه‌ك ژ بۆ خزمه‌تكرنا قه‌نجیه‌كێ به‌لێ بۆ هندێ كو كونترۆلێ ل سه‌ر خه‌لكى بكه‌ت …. ). ئه‌ڤجا ئه‌ڤێن هه‌نێ ل ژێر ناڤه‌كێ دى ئه‌وا خوه به‌رده‌وام دكه‌ن، هه‌تا كو گه‌هشتیه به‌ره‌بابێ مه و مه ب چاڤێن خوه دیتن چه‌ندین حزبێن ده‌ستهه‌لات هه‌ر یێن ئه‌وێ دكه‌ن، چه‌ند سیسته‌مێن وان وه‌كو نڤیسین هه‌ما شاما شه‌ریف بوون، به‌لێ تاك و كه‌سان یێن د ناڤ دا چو سه‌رده‌رى ل گه‌ل خه‌لكێ سڤێل و بێچاره كرن، خه‌لك نه ب بلۆكان دكوشتن و خه‌لك ل سێدارێ ددان، ب هزاران خه‌لك ب ساخى بنئاخ دكرن و ژ لایه‌كى ڤه ژى خوه ددانان نه‌ڤیێن پێغه‌مبه‌ران، به‌لێ ڤایرۆسێ نه‌ساخیێن ده‌روونى یێن د ناڤا تاكان دا ئه‌م گه‌هاندینه ڤى ئاستى و ڤى سه‌رده‌مى كو ئه‌ڤرۆ سالا 2016 یه و سته‌م ل ده‌ڤه‌را مه گه‌هشتیه لۆتكه‌یا خوه و یا سه‌رێ خوه دخۆت، مه مرۆڤ و گرۆپان بۆ خوه سیسته‌م كریه هه‌سپه‌ك و مه لنگ تێ داناینه بۆ بجهكرنا حه‌زێن خوه یێن نه‌ساخ و ئه‌زمانێ مه هندێ درێژه هه‌ما دێ بێژى گۆپالێ عیسا یێ د ده‌ست مه‌دا و دێ ده‌ریایێ دڕینین و كه‌ینه دو كه‌ر. ئه‌و سه‌ربۆرێن ب سیسته‌مێن فاشیزم و شیۆعى ل چینێ و ئێكه‌تیا سۆڤێتى كه‌فتین، ژ وێ ئێكێ بوون كو ل سه‌ر دیكتاتۆری و سازیێن نه دیمۆكراتخواز بوون له‌ورا، وه‌كو دبێژن سێركێتێ وان هاته خوار, هه‌مى رۆخساره‌ك بوون بۆ ڤه‌هێلانا وان ل سه‌ر كورسیا ده‌سهه‌لاتێ. ل دونیایێ ژى ئه‌و سیسته‌مێن خه‌لكى دكوژن هه‌ر ئه‌و خه‌لك یێ ده‌ستێ وان ماچى دكه‌ن ل سه‌ر هندێ را. ئه‌م ژى ئه‌ڤرۆ دد دله‌كى دا ل دووڤ شۆپا ئه‌مریكا دچین، هه‌مى سیاسه‌ت و بزاڤ ل ڤێ دونیایێ بۆ ئێك ئارمانج دكه‌ن ئه‌و ژى بازرگانى یه. ئه‌و تێنه‌بن یێن د خوینێ راماین و سته‌ملێكرى حه‌تا حه‌فكێ وه‌كو مه، له‌ورا ئه‌ڤ قووناغا ل دووڤرا دهێت دێ ل سه‌ر مه یا هه‌ستیار بیت، چونكو ئه‌م ژى دێ وه‌كو وان لێهیێن، ته‌نانه‌ت ئه‌و هنگافتنێن ب سه‌ردا هاتین ژى ژ سه‌ده‌ما نه‌ژدلیا سیسته‌مێ هه‌لبژارتنان بوو، دیمۆكراسى ناڤه‌كێ خۆشه به‌لێ پێدڤى ب په‌لگازكێ یه بۆ راكرنا په‌لا و رازیكرنا هه‌مى خه‌لكى و نه‌هێلانا گازندان، چونكو خه‌لكى هه‌مى گازندا دئێخیته د خانا وان سیمایێن حزبێن دا یێن به‌رێ نها سته‌م لێ دكرن دا، ئه‌ڤجا ل ڤێره گونه‌ه دكه‌ڤیته ستویێ ملله‌تى ژى، ب چو ره‌نگێ بیت حوكمه‌ت ژ مله‌تى باشتره و زاناتره و ب مێشكتره ژى، هه‌ر چو نه‌بیت هه‌ر ئه‌وێ بۆ خوه هه‌لبژارتیه.. یانژى هه‌ر دو ئێكن، به‌لێ وه‌كو كور و بابێن وه‌سا كو ڤێكنه‌كه‌ن.. هه‌ر رۆژ شه‌ر و شه‌ماته‌نه، هه‌كه سته‌م ل مه بهێته كرن ژ لایێ مه‌ڤه هه‌ر ئه‌م ب خوینه.
ره‌وشتێ راوه‌ستاندنێ!
ئه‌و كه‌سێ گۆتى: شۆفێرى هونه‌ر و چیژ و ره‌وشته.. ژ هه‌واى نه‌گۆتیه. به‌لێ ب دیتنا من هه‌كه ئه‌ڤ په‌یڤینه د زنجیرا ده‌ستواژه‌یا خوه دا بهێته سه‌رك و بنككرن، دێ پتر ل گه‌ل ئه‌ڤرۆ گونجیت، یانژى هه‌ما ب بۆچوونا من ببیته: شۆفێرى ره‌وشته و ره‌وشته و ره‌وشته!!. دێ پتر ب كێر مه هێت و گونجیت، چونكو چو هونه‌رى ئێدى تێدا نه‌مایه، هه‌ر وه‌سا چو خۆشى ژى تێدا نه‌مایه، به‌لكو به‌ره‌ڤاژى بووینه نه‌خۆشى، خه‌لك ئێدى هیڤیان دكه‌ن ب پیاسه بچن، هه‌مى قه‌له‌و بووینه و ب ده‌ست ناكه‌ڤیت رێڤه‌چوونێ بكه‌ت، هه‌ما جاده‌یه و ترافیكه و رێزكا ترومبێلانه، به‌لێ سه‌روبه‌رێ مه هه‌مى كریه ره‌وشت و سه‌ره‌دریكرن. ئه‌ڤه نه ژ چونه‌یێ هاتیه، زانایه‌كێ كه‌ڤن (فۆگۆ) ژى پشتراست كریه كو ئه‌و ساخله‌ته‌كه گرێداى ئه‌نتۆلۆجیایه‌كا دیرۆكى یه د ناڤا مه دا، ئه‌م به‌رده‌وامیێ دده‌ینێ. به‌لێ رێژه‌یا ره‌وشتێ شۆفێریێ جار بۆ جارێ جودایه، هه‌كه تو ل سه‌ر جادێ بى، نه‌وه‌كو راوه‌ستاندنێ یه (ته‌بقاندن)، یانژى ل سه‌ر جادێ دبیت جاره‌كێ تو و كه‌سه‌ك رێزێ ل هه‌ڤ نه‌گرن، یان ئێك ژ به‌ر ئێكى نه‌دانیت، به‌لێ هه‌كه تو بى و هه‌ڤسویێ خوه، ئها ئه‌و كاره‌ساته. دڤێت ره‌وشتێ راوه‌ستاندنێ پاك و نه‌زیهتر بیت ژ یێ هاۆژتنێ. نه‌خاسمه جادێن مه یێن د ته‌نگن و دلێ مه ژى ته‌نگتره، مانه شه‌رمزاریه ئه‌ز ترومبێلا خوه ب مه‌لیمان نێزیكى دیوارێ خوه بكه‌م ژ به‌ر ترومبێلا ته، به‌لێ تو ل نیڤا جادێ براوه‌ستینى و چو حسێبا نه بۆ من و نه بۆ خه‌لكى بكه‌ى، یێ قه‌درێ شارعى بگریت، ئه‌وى قه‌ردێ خوه گرت، یان هه‌ر ئێك ترومبێلا خوه ژ كه‌ربێن جیرانێ خوه دا ل نیڤا جادێ براوه‌ستینیت و رێكێ بگریت، ئه‌ڤه گه‌له‌كا كرێته، جاده بهێته داگیركرن، یان دێ ل سه‌رێ كۆلانێ به‌تڕانه‌ك ترومبێلا خوه راوه‌ستینیت و چیت پالڤه‌ده‌ت. ئه‌ڤه گونه‌هه و پاشى بێ ره‌وشتى یه. سه‌روبه‌رێ كۆلان و جادێن مه وه‌لێهاتیه، كو مرۆڤ ژ خه‌مان دا نه‌ساخ بیت و فشارا مرۆڤى بلند ببیت چونكو ژ پێش هنده‌كا شه‌رم ژ خوه بكه‌ت. خۆزى دلێن هنده‌كان ژ مه سپى ببانه و جادێن مه فره‌ه بانه. ئه‌رێ چو مه‌زنى تێدایه، هه‌كه دو یان سێ بهۆستان تو ترومبێلا خوه وێڤه ببه‌ى دا رێیا رووباران ژى هه‌بیت كو ببوورن و ده‌رباز ببن، یێ هه‌یى نه‌ساخه‌ك هه‌یه، یێ هه‌ی حاله‌تێ بوونێ، یێ هه‌یى سه‌حدكه‌ته رۆخسارێ ده‌روونا ته دهه‌لسه‌نگینیت!!. تۆره بوون د شۆفێریێ دا كوراهیى و په‌شێمانى یه، باژارێ دهۆكێ ئێك گونده و ئێك خه‌لكه، هه‌مى ژى دگه‌هنه ئێك ناسیارن، هشیاربى هۆڕنه‌كا درێژ یان خه‌به‌ره‌كێ كرێت بێژیه كه‌سێ یان تۆره بى، ته هند دیت ده‌ركه‌فت كه‌سه‌كێ ته، یان دانعه‌مره‌ك یان ژنه‌كا بێچاره یان كه‌سه‌ك قه‌نجیه‌ك ل ته كرى. ژ لایه‌كێ دیڤه هه‌كه بێژین. نها راوه‌ستاندنا ترومبێلێ ل باژارى ئاریشه‌یه، چاره‌سه‌رى ژى چیه، دێ ب سه‌ر شۆسته‌یان ئێخین. به‌لێ راسته یا باژێرڤانیێ قه‌ده‌غه‌یه كو شوسته‌یى راست بكه‌ن و كربستونى بنڤینن و ل شوونێ پێدڤیه سێ نه‌مامكێن داروبارى بچیننن، ژ بۆ پاككرنا ژینگه‌هێ، یا ژمنڤه ژینگه‌ها دلێن مه هینگى دێ هێنه تێكدان، مانێ ژینگه‌هه‌ك ژ یا دیتر فه‌رتره. چاره‌كرنا (احتباسا حه‌رارى) ب شته‌له‌كێ ل سه‌ر شوسته‌یێ من ناهێته چاره‌سه‌ركرن، بلا رووبه‌رێن مه‌زن ببنه دارستان. گه‌له‌ك وه‌لاتان شوسته‌یێن خوه راستكرینه، بۆ به‌رژه‌وه‌ندیا رێكێ، هه‌كه ژ به‌ر هندێ بیت كو ترومبێل ب سه‌ر بلۆكى نه‌كه‌ڤیت، ئه‌و ب سه‌ر دیواران ژى دكه‌ڤیت. چو جاران شوسته‌یێن مه نابنه ئێك پارچه كو پیاده ل سه‌ر پیاسان بكه‌ن، باژارێ مه هه‌مى بلندى و ژۆرداهى یه، هنده‌ك شوسته هند دبلندن دڤێت پیاده ببنه مغاویر خوه تێدا بهاڤێژن. هنده‌ك ئاڤاهیان ژى ره‌مپه‌یێن خوه برینه نیڤا جادێ و حسێبا جادێ نه‌كرینه زێده‌بارى ڤێ ژى ته‌سه‌یه‌ك ژى بۆ جوانیێ و سه‌بڕێ ب ره‌خ ڤه هێلایه، ئه‌ڤه هه‌مى د چنه د خانا چ تشتى دا ؟ پێ نه‌ڤێت د ره‌وشتێ جڤاكى دا.
خه‌لێ بزنا به‌لێ!
هه‌ر وه‌كو ئێشه‌كا ڤه‌گره ل سه‌ر پۆستێن هنده‌ك جامێران ل ڤێره و وێرا هه‌نێ، ئه‌ڤجا دبیت ره‌هه‌ندێن سه‌رداچوونێ و ده‌ڤخوینیێ بن هنده‌ك كه‌س گه‌هاندبنه وى راده‌ی و ئیغرائا ده‌ستهه‌لاتدایێ و دكتاتۆریه‌كا جۆراتى، یان ژى چاڤلێكرنه چوویه د خانا ئه‌ته‌كێتێن حه‌فكستووران دا، ئێك یێ چاڤ ل یێ دى دكه‌ت، چونكى هه‌ر كه‌سێ گه‌هشته فارگۆنا سه‌ركێشیێ ئێدى ئه‌و گرنژینا جاران نامینیت و ژووردا ته‌ماشه‌ى كه‌فشتان دكه‌ت (هه‌كه ده‌ربرین یا دروست بیت). هه‌ر وه‌كو ئه‌و ب تنێ كۆرێن دایگوریكانه و یێن دی ژى حاشا (په‌زن)!! وه‌لاتیێن پله دو و سێنه، مه‌ره‌م ئه‌وه كا چاوا دێ سه‌رده‌ریێ ل گه‌ل جه‌نابێ به‌رپرسه‌كى یان رێڤه‌به‌ره‌كى كه‌ی كو بچی ل مافه‌كێ خوه بگه‌ری كو حه‌قێ ته‌یه، ستایلێ ئاخفتنێ و لێزڤرینێ یێ چاوا بیت و چاوا بچیه دیوانا جه‌نابێ وى و ب چ ره‌نگ بێژیێ و چاوا دانیشى، ئه‌و چ په‌یڤن و چ شێوازه موفاته‌حا وى بكه‌ى، ته‌له‌فۆنا وى بكه‌ى، نه‌كو بێژیت یا ژ ته زێده‌یه، (ئێس ئێم ئێسه‌كێ) فرێكه‌ى، نه‌كو ژ خه‌و رابیت، ئه‌رێ پێكه‌نین یان ئه‌و چ سوحبه‌تن كابرا حه‌ز ژێ دكه‌ت كو بگه‌هینیێ ب نه‌رماتى و قانع بكه‌ى كو مافێ ته بده‌ته ته، یان ساكالایا ته بمه‌شینیت، هه‌لبه‌ت دڤێت وى بریندار نه‌كه‌ى، دڤێت نه‌بێژیێ خه‌لێ بزنا به‌لێ، ئه‌رێ ب چ ده‌نگ باخڤى؟ یێ تۆره نه‌بیت، یێ ب كه‌یف بیت، ب چ مووزیكا گوهێن وى نه‌ئێشن، چونكى ئه‌وى گوهه‌كێ مووزیكى یێ بالا هه‌یه و پرانیا تونێن ده‌نگى بۆ وى دنه‌شازن، هه‌موو ئیقاعان ژى قه‌بوول ناكه‌ت، جاران ژ خواندنا شالویل و بلبل و كناریان ژى تۆره دبیت، حه‌ز كیژ زنجیرا درامایى دكه‌ت، كو ده‌مێ وى نه‌كوژى و حه‌لقه‌ك ژێ نه‌چیت!، ب كیژ زمانى دئاخڤیت، ئه‌رێ به‌رێ ل كیڤه بوو؟ ژ كیڤه هاتیه به‌رى نها؟ ژ ئیرانێ یان ژى ژ توركیا یان ژ خارێ یان ل سه‌ره؟!، دڤێت هه‌مى زمانان بزانى دا سوحبه‌تێن جه‌نابێ وى دڤێن بۆ وى بكه‌ى، هه‌مى ژى نه‌وه‌كو ئێكن، یێ هه‌ى حه‌ز ژ مه‌لاقی و مه‌دحه و پفكرنێ دكه‌ت، یێ هه‌یى ژى دینێ وى ژ ڤان تشتان دچیت، یێ هه‌یى ژ به‌ر ناڤێ عه‌شیره‌ته‌كێ كارێ ته برێڤه نابه‌ت، یان تو مرۆڤێ فلانى و بێڤانێ یان دبیت دیمه‌نێ رۆخسارێ ته ب دلێ وى نه‌بیت! یان شه‌كرنا پرچا ته ب دلێ وى نه‌بیت، سروشتێ كه‌ساتیا وى و ئایدولۆجیا وى چاوانه، حه‌ز ژ ئیلحادێ دكه‌ت، یان یێ ئایندار و ب ته‌قوایه، تو دێ ژ مژاره‌كێ چیه د ئێكا دى دا، كو تنێ دێ ئیمزایه‌كێ یان په‌راوێزه‌كێ بۆ ته بكه‌ت، مخابن كه‌سێن نه‌زیه دكێمن. جاره‌كێ به‌رپرسه‌كى گۆتبوو: بلا كچ بهێنه (موقابلێ) هه‌كه یا جوان نه‌بیت، ئه‌ز نا دامه‌زرینم. ئه‌رێ ئه‌ڤه چ فلمێ هندى یه هوسا ڤه‌مایى؟ ما قانوون و راسپارده‌یێن فه‌رمى گێولێ مرۆڤانه؟ ژ عه‌سمانان هاتینه خوار؟! دڤێت كه‌س ژى نه‌بێژیتێ، حاشاى روویێ خوانده‌ڤانان: (پێلاڤا ته یا خواره)، هه‌كه دێ تۆره بیت، به‌لێ ب راستى وه‌ریسێ خواریێ و شاشیێ چه‌ندى یێ درێژ بیت هه‌ر دێ كه‌ڤیت، چونكی مه ب چاڤێ خوه دیت، یێ ئه‌ڤ جۆره سته‌مه كرین، هنده‌ك ب هه‌ستیكێن وان هاتنه خه‌ندقاندن و هنده‌ك ژى بوونه ته‌شابه‌ت و خودى بۆ نه‌هێلا.. ئه‌ڤنه هه‌مى ل ره‌خه‌كى و فلته‌رێن گه‌هشتنا ده‌وروبه‌رێن وان ل ره‌خه‌كێ دیتر، چونكی ئه‌وان فلته‌ران ژى هه‌مان مه‌رج و ساخله‌تێن خوه هه‌نه، دڤیا ئه‌وان ژى رازى بكه‌ى كو ته بگه‌هیننه جه‌نابان. تو دێ گه‌هیه راده‌كێ كو دلێ ته ژ هه‌مى تشتا ره‌ش ببیت و هه‌ما ده‌ستان ژ وى كارى به‌رده‌ی و بهێلى مافێ بهێته خوارن و نه‌چار بى، ئه‌ڤه نه‌ك هه‌لویسته‌كێ تایبه‌ته ئه‌ز ئاماژێ پێ دده‌م به‌لێ گه‌له‌ك هه‌لویست هه‌نه، هه‌كه باوه‌ر نه‌كه‌ن سه‌حكه‌نه ده‌وروبه‌رێن خوه و ب وژدان ده‌رببرن و كه‌س خوه ژ من سل نه‌كه‌ت، ببه‌ته ده‌ف خوه و گومانان ژ خوه ببه‌ت، یان (ب پیندڤیت) دبن خوه بچیت و مه بكه‌ته عه‌بایه‌كێ ره‌ش ل پێشچاڤێن خوه. ئه‌ڤه چپكه‌كه ژ رووباره‌كى. كورت و كرمانج هه‌كه حه‌ساسێ مرۆڤى تێكچووی وایرمان نه‌كاره دروست بكه‌ت، له‌وما مه گۆت: خه‌لێ بزنا به‌لێ.
نيشاندان
WP Facebook Auto Publish Powered By : XYZScripts.com