مژار شرین عه‌بادى یه، نه‌ك عه‌بادى یێ سه‌رۆك وه‌زیرێ عیراقى، به‌لێ خانما هه‌نێ چالاكڤانا ئیرانى د وارێ مافپه‌روه‌ریێ و ئاشتیێ دا، ڤى ده‌قى دنڤیسم وه‌كو راستڤه‌كرنه‌كا بچووك و بلا جۆره‌كێ نه‌یێ نه‌مه‌ردیێ ژى بیت یان لێبۆرینێ هه‌ر ژ من بۆ من، سه‌را شاشیه‌كێ د گۆتارا رۆژا ئێكشه‌مبیا بۆری دا هه‌ر ل ڤێ رۆژنامێ وه‌شاندى، ب مانشێتێ (ئبیلیس د ناڤبه‌را عوبه‌یدى و عه‌بادى دا)، هه‌ر چه‌نده مژار یا سیاسى بوو و نه‌ك تنێ هه‌ما ل سه‌ر وێ خانمێ بوو، به‌لێ ل سه‌ر پرسگێركا ژكارئێخستنا عوه‌بیده‌ى وه‌زێرێ به‌رگریا عیراقێ بوو و حه‌یده‌ر عه‌بادیێ، تنێ وه‌كو پێكڤه‌گرێدان و وه‌كهه‌ڤیا ئیدیه‌م و نه‌ژادان كو عه‌بادى تاگیرێ ئیرانێ و شیعه‌مه‌زهه‌به و شرین عه‌بادى ژى هه‌ر یا شیعى ئیرانى یه، وه‌كو خۆشیه‌كێ بۆ گۆتارێ، ب سالوخه‌تا ئبلیسیێ چونكو ئه‌م د دیالۆگا خوه یا كورده‌وارى دا وێ سالۆخه‌تێ بۆ هندێ بكاردئینین، هه‌كه كه‌سه‌ك گه‌له‌كێ ب مێشك بیت و زانا و زیره‌ك بیت، چاوا دبێژن فلان یێ ئاقل جوهیى یه، وه‌سا دبێژین فلان یێ ئبلیسه، شاشی ژى ئه‌وبوو كو ئه‌و خانم هه‌لگرا خه‌لاتێ نۆبل یێ نه‌رۆیجى یه ب ئاشتیێ به‌لێ مه ب نڤیسینا رۆمانێ ئینایه زمان، چونكو ته‌كه‌زى باش نه‌هاته كرن و ل دووڤ پێزانینێن بیردانكا نڤیسه‌ره‌كێ عه‌ره‌ب كو ئه‌م خاپاندین، كو ئه‌وێ خانمێ خه‌لاتێ نۆبلێ ب رۆمانێ وه‌رگرتیه و یا زیره‌كه ب نڤیسنا رۆمانێ، چونكو ئه‌ڤه ژى ب راستى شاشیه‌كا نڤیسی یه و ئه‌ز دبینم وه‌كو شه‌رمه‌ك، نابیت چاڤێ خوه لێ بنقینین و بلا ل سه‌ر مه‌را نه‌بۆریت، هه‌ر چه‌نده جوامێرێ هه‌ر های ژ گۆتارێ نه‌بوویه و هه‌ر كه‌سێ به‌رسڤه‌ك نه نڤیسیه و تێ نه‌ئینیایه ده‌ر، ژ بلى دكتۆره‌كێ هێژا ل ده‌رڤه‌ى وه‌لاتى ڤێراگه‌هشت و هایدار كرم، خۆزى هه‌مى خوانده‌ڤان و نڤیسه‌ران ئه‌و ئه‌مانه‌ت هه‌با كو راستى بهێته پاراستن، دا گه‌له‌ك كه‌یفا من ئێت هه‌كه گه‌له‌كان ئه‌ڤ شاشیێن هۆسا مه‌یزاندبانه، دوور نینه مرۆڤ بۆ شاره‌زاتیا باوه‌ریێ و زانینا شه‌رعه‌تى ژى و حیله‌یێن شه‌رعى و قانوونى ژى بێژیت، فلانكه‌س یێ ئبلسیه یان عاقل جوهى یه، له‌ورا بۆ راستڤه‌كرنێ و ئه‌مانه‌تا نڤیسینێ بلا هه‌ر راستیه‌ك بچیته جهێ خوه، تشته‌كێ ئه‌كتیڤه هه‌مى خوانده‌ڤان كه‌ڕه‌دێ ل سه‌ر وان ده‌قان بكه‌ن یێن دهێنه نڤیسین، چ د وارێ زمانى دا بیت یان ژى پێزانینان، من دیت گه‌له‌ك ب به‌ردكه‌ڤیت ڤێ ستوونێ بۆ بمه‌زێخم و هه‌ر وه‌سا بزاڤێن وێ د بیاڤێ ئاشتیێ دا بینمه زمان، وه‌كو هه‌رلگرا هه‌مان خه‌لاتێ نیسلون ماندێلا وه‌رگرتى و گه‌له‌ك خه‌لاتێن دی، د تۆماركرینه د ویكیپیدیا گوگلى دا، خانمێ ره‌خنه ل سیسته‌مێ نها یێ ئیرانێ گرتیه بۆ رۆداووێ كو یێ خه‌مساره د بیاڤێ مافێ مرۆڤى دا و دیمۆكراسیه‌كا خاڤه، نه‌خاسمه ل ڤان دووماهیان په‌سنینا ژنێن كۆبانێ كریه كو رۆله‌كێ پێشچاڤ نیشا جیهانێ دایه، هه‌ر وه‌سا په‌سنینا بریارا مافێ چاره‌نڤیسێ سه‌ربه‌خوه‌بوونا ملله‌تێ كورد كریه. به‌لێ گۆتارا دى ل سه‌ر سه‌روبه‌رێ ئیراقێ یه و ئه‌و پێرابوونێن دهێنه كرن ژ لایێ فراكسیۆنا مه‌زنا عیراقێ ڤه كو شیعه‌مه‌زهه‌به، نه‌یێ دووره ژ كریارێن ئه‌جینه‌ده‌یێن وه‌لاته‌كێ وه‌كو ئیرانێ، كو ئه‌ردێ عیراقێ بۆ خوه كریه زه‌مینه‌ك و گه‌لێ وێ كریه تۆمك.. هه‌ر مینا نڤیسه‌ره‌كێ ئه‌لحیاه به‌رى ده‌مه‌كى نڤیسى (ئیرانێ عیراق خوار..)، وه‌دیاره هه‌ر كه‌سێ ل سه‌ر وان بنڤیسیت ژى دێ بیته هه‌ڤالێ قه‌لێ و دڤێت خوه د به‌ررا نه‌چیت هه‌كه دێ مرۆڤ تالۆقه‌تى ڤان جۆره شاشیان بیت و ئه‌ڤه بوو مه‌ره‌ما من.
نووترين نووچه
- سەرۆك بارزانی ب گوهلێبوونا دەنگوباسێ مالئاڤاییكرنا ئیبراهیم گاباری خەمبار بوو
- ئامینا زكری: سەرۆك بارزانی ژێدەرێ باوەری و هێزا ئافرەتا كوردە
- رێككەفتن بۆ كڕینا پەترۆلا كوردستانێ هاتیە كرن و تنێ هنارتن مایە
- ژ ترسا كارڤەدانێن پارتی و بایكۆتكرنا هەلبژارتنان دێ بەغدا بڕیارەكێ ل دۆر مووچەی دەت
- هەرێما كوردستانێ بوویە پەناگەهەكا ئارام بۆ ئاشۆرییان
- نێچیرڤان بارزانی ل گەل شاندەكێ ئاشۆرییێن ئەمریكا كۆمبوو
- بۆ كونترۆلكرنا میلیشیایان ئیراقێ پێدڤی ب قانوون و دادگەهێ هەیە
- هەلبژارتن ل ئیراقێ گوهۆڕینان پەیدا ناكەن
- ئیراقێ پێدڤی ب دادگەهەكێ هەیە كو ب رێیا پشتەڤانییا مادەیا 92 یا دەستوورێ بهێتە دروستكرن
- سەركرداتی و حوكمەت و خەلكێ ئیماراتی هەردەم هاریكار و پشتەڤانێن كوردستانێ بوون
شیرزاد نایف
ده‌ستێ ل بن به‌رى
شێرزاد نایف
وه‌رن چه‌نده‌كێ ئه‌وى به‌رى بلڤینین، چونكو كه‌ڤره گه‌له‌ك مایه ل سه‌ر ده‌ستێ مه، بلا پشتا ده‌ستى بخڕیێت، هه‌ر ئه‌م ب خوه‌ینه و كه‌س ژ مه یێ بیانى نینه، وه‌لاتێ مه هه‌موو بوویه ئێك مال و ئێك خێزان، ئه‌م ملله‌ت و ده‌ستهه‌لات ژى نه دو تشتێن ژێك دوورین، به‌لكو ئێك ڤیگه‌رین، ما حوكمه‌ت كی یه و ئه‌ز كی مه؟، تنێ ب ناڤ دژێك جودانه، هنده‌ك مال ل دهۆكێ هه‌نه برایه‌ك كۆمونیسته و یێ دى ئێكگرتوویه ئێك پارتى یه و یێ دى ئێكه‌تى و پۆستێن مه‌زن ژى د حوكمه‌تێ دا هه‌نه، ئه‌ڤه ژى تشته‌كێ جوانه و جهێ په‌سنینا دیمۆكراسیێ یه، له‌ورا هه‌مى ئاریشه و قه‌یرانێن مه ئێكن. به‌لێ هه‌ر وه‌كو هه‌یڤا هنگیڤینى د ناڤبه‌را مه دا یا ل كێمیێ دای و ئه‌م یێن ل به‌رئێك ره‌ش دبین، ئه‌ز دخوازم د ڤێ مژارێ دا هه‌مى تشتان ب بیرۆدزا ره‌وشتى ڤه گرێ بده‌م، له‌ورا هه‌ر ل ده‌ستپێكێ چونكو ل سه‌ر ڤێ ساخله‌تى دنڤیسم فه‌ره ب ره‌وشتى ژى راڤه‌كرنا خوه بكه‌ین، واته نه به‌ران ب ده‌ستێ چه‌پێ بهاڤێژین و نه به‌را بهاڤێژینه ئه‌و كانیا مه ژێ ڤه‌خوارى، هه‌ر وه‌سا مینا دبێژن: تفا سه‌رئه‌ڤرازه. ل ڤێره نه ئه‌ز به‌ره‌ڤانیێ ژ حوكمه‌تێ دكه‌م و نه ژى دهاڤێژمێ، ب تنێ دێ دو هه‌لویستێن به‌رۆڤاژى ئینم زمان و په‌یڤ بلا بمیننه بێ خال و ئه‌ز دزانم من چ گۆت! مژارا من مافێن وه‌لاتیانه و دابینكرن ژ حوكمه‌تێ، ئه‌و ب خوه مافێن مرۆڤاتیێ د سیسته‌مه‌كێ وه‌كو یێ مه دا كو ل بن سیبه‌را دیمۆكراسیێ حوكمه‌ت ئه‌ركێ خوه ئه‌نجام دده‌ت، فاكته‌رێ ره‌وشتى (اخلاق) مایێ خوه د هه‌مى كاروبارێن مه دكه‌ت، له‌ورا ژى گازندا وه‌لاتیان ل سه‌ر حوكمه‌تێ یا تیژه، به‌لێ هه‌ر وه‌كو به‌رسڤدانا حوكمه‌تێ ژى یا ره‌وشتى یه و دبیت خوه بێ ده‌نگ كربیت جاران و جارجار ژى گه‌فێن زیق دكه‌ت و ب بێ منه‌تى ئاراسته‌یا گۆتارا وێ یه، ” یێ بڤێت ئه‌ڤه‌یه و یێ نه‌ڤێت بلا بچیته مالا خوه”، واته ل ڤێره رێزگرتنا لێكگوهارتى نامینیت، نه‌مازه بیردۆزا حقوقی د ره‌وشتى دا دڤێت رێزگرتن هه‌بیت، د مافێن لیبرالى و یێن سیۆشالیست دا فه‌ره هه‌ر تاكه‌كى ماله‌ك و كاره‌ك هه‌بیت و حوكمه‌ت به‌رپرسه ژ هه‌مى مافێن وى، راسته حوكمه‌ت شیایه ئێكه‌مین مافێن جڤاكى دابین بكه‌ت كو ئه‌و ژى ئاسایشه، ئه‌ڤه ئه‌و حنێره یا حوكمه‌ت پێ دخوریت و مافێ وێ یه، چونكو گه‌له‌ك ده‌وله‌تێن ده‌ڤه‌رێ نه‌شیاینه بكه‌ن، یا دویێ حوكمه‌ت شیایه قانوونێ هه‌تا راده‌كێ باش و پێشچاڤ برێڤه ببه‌ت، یێ كوژه‌ك بگریت و سزاب ده‌ت و یێ دزیكه‌ر بگریت، هه‌ر وه‌سا نه ژ ره‌وشتى یه كو وه‌لاتى ژى هه‌ژار و موعیز ژى ببن و به‌ریكێن زه‌لامان ڤالا ببن و خه‌لك برسی ببن، وه‌لاتى شه‌رم ژ ده‌یندارێن خوه بكه‌ن و حوكمه‌ت شه‌رم ژ وه‌لاتیان نه‌كه‌ت، جابیێ حه‌قێ ئاڤێ و كه‌هره‌بێ و خه‌لك بمیننه ب سه‌ر و ستویێن ئێكڤه، مووچه نینن هه‌ما چ بكه‌ن وه بكه‌ن، ب راستى ئه‌و بێ منه‌تى ژى د چیته د خانه‌یا بیردۆزا ره‌وشتى دا، ئه‌ڤ قه‌یرانا ئابوورى باندۆرا وێ ل سه‌ر بیاڤێ ئه‌ته‌كێتێن ره‌وشتێ حوكمه‌تێ گه‌له‌كا دژوار بوو، ره‌نگه ژى ئه‌ڤه بوو ئه‌و ئه‌نجامێ شه‌رێ دوژمنێن هه‌رێما كوردستانى دخواست بده‌ستڤه بینیت و ب ده‌ستڤه ئینایه ژى كو خه‌لكه‌ك تۆره بیت و به‌را ب ده‌ستێ چه‌پێ بهاڤێژیت، حوكمه‌ت گه‌له‌ك كریاران دكه‌ت جهێ گله و گازندێ نه، كو نه‌خۆشیێن ده‌روونى ل جه‌م خه‌لكى په‌یدا ببن، به‌لێ ته هند دیت ژى ژ لایه‌كێ دیڤه كریاره‌ك یان ده‌سكه‌فته‌كێ مه‌زنتر ئه‌نجام دا ئه‌وا خرابى هه‌مى لادا، بۆ نموونه دابینكرنا مووچه‌یێن پێشمه‌رگى و بایه‌خدان ب وى پیرۆزه‌یه‌كا ره‌وشتى یه، راسته پێشمه‌رگه ژى یێ وان دپارێزیت ب مال و سامان و پرۆژه و سازیان ڤه، یێ خوه شه‌هید دكه‌ت، به‌لێ كه‌س نه‌كاره بێژیت كاره‌كێ خرابه، یان ژى وه‌كو مه دیتیى سه‌رۆك مه‌سعود بارزانى ده‌مێ د هه‌لویستێ شه‌رى دا راپێچانا پێشمه‌رگاتیێ كرى و پۆتا (ئه‌دیداس) كره پێ خوه و چوو و ب كورێن خوه‌ڤه چوونه د سه‌نگه‌رێ شه‌ره‌فێ دا، دبیته جهێ به‌ژن چه‌ماندنا هه‌مى وه‌لاتیان و ئه‌و سه‌رده‌ریێن حوكمه‌تێ یێن خه‌لك ئاراندین هه‌مى هاتنه فۆرماتكرن، هه‌ر وه‌سا گه‌له‌ك شاشیێن حزبێ ژى پێ دهێته ڤه‌ره‌ڤاندن، خوه دده‌ته به‌ر سه‌رێ هه‌می شاشڤانان، ئه‌ڤه ژى ئه‌و تشته یێ ئه‌و پێ ملله‌تێ خوه برێڤه دبه‌ت، ئه‌و ژى فاكته‌رێ ره‌وشتى یه. سه‌ره‌راى هندێ كو ئه‌ڤه پۆستێ وى یه وه‌كو ب فه‌رمى فه‌رماندێ هێزێن له‌شكرێ كوردستانێ یه، به‌لێ گه‌له‌ك سه‌ركردان وه نه‌كرینه و ئه‌و ته‌وازوع و ئه‌خلاق نه‌بوویه، ده‌مێ ل رۆژا رزگاكرنا شنگالێ مینه‌سا وى یا كۆنگرێ رۆژنامه‌ڤانى ته‌لیسێن سه‌نگه‌ران بوون و د ناڤ ئاخێ و دیكێلا شه‌رى دا دپه‌یڤى، ب راستى ژى ب وێ سه‌ره‌ده‌ریێ مرۆڤى قفل دكه‌ت و ئێدى به‌رسڤا هه‌میان دهێته دان، چونكو راگرتنا شه‌ره‌فێ سه‌رێ هه‌ڕه‌مێ یه د بیردۆزا ره‌وشتێ مه دا.
ره‌وشه‌نبیریا مرنێ
ره‌وشه‌نبیرى باره‌كێ گرانه، به‌لێ شێوازێ ده‌ربرینێ دڤێت ب گیانه‌كێ سڤك و وه‌رزشى بیت، مژارا مرنێ ژى گرانترین مێهڤانه. ئه‌رێ ئه‌م چاوا بزاڤێ بكه‌ین ببیته مێهڤانه‌كێ دارسڤك؟ چونكی مرن راستیه‌كا ته‌حله؟ ئه‌م چاوا شرین بكه‌ین؟ راسته سه‌ده‌م گه‌له‌كن و مرن ئێكه، مرن وه‌كو چه‌كێ میلانه وه‌كو مۆشه‌كا كرۆزه، كه‌س نكاریت ژێ قورتال بیت هه‌كه هات، ئه‌ڤه راسته به‌لێ ب دیتنا من دو جۆرێن مرنێ هه‌نه، ژ بلى یا قه‌ده‌رێ و یا ئێكسپایه‌را مرۆڤى و ئێكسپایه‌را وه‌ریسێ (ترشا ناڤۆكى)، فه‌ره خوه ل ئه‌گه‌رێن نێزیككرنا ئه‌نجامێن زیاندار هایدار بكه‌ین و خودێ ته‌عالا ژیێ مه درێژ بكه‌ت، چونكی بار هه‌مى مه ئێخستیه ل سه‌ر عه‌جلێ و نێزیكبوونا قه‌ده‌رێ، به‌لێ هه‌كه وه‌سا بیت، وه‌رن ته‌ماشه‌ى رێژه‌یێن وه‌فیاتان ل وه‌لاتێن رۆژئاڤا بكه‌ین كا چه‌ند ژ یێن مه كێمتره، چونكی ره‌وشه‌نبیریا ساخله‌میێ خورتتره ل ده‌ف تاكێن وان، گه‌له‌ك گیان بووینه قوربانى ژ سه‌ده‌ما نه‌بوونا زانینه‌كا ب سه‌رڤه سه‌رڤه یا هنده‌ك ئه‌ته‌كێت و پێزانینێن ساده و بێ ماندیبوون وه‌كو ئێمرجنسى یێن چاره‌سه‌ریێن ده‌سپێكى یان هنده‌ك راسپاردێن خوه پاراستن ژ گه‌له‌ك ئاریشێن گرێداى ساخله‌میا مرۆڤى و هه‌بوونا زانینه‌كا مفادار بۆ خه‌لكى، گه‌له‌ك كه‌سان د ناڤ جڤاكى دا گیان ژ ده‌ست داینه ژ ئه‌گه‌را هنده‌ك نه‌زانین و خوه تێنه‌گه‌هاندنا چاره‌سه‌ریێن بچووك، یان كه‌سێ خیره‌ت نه‌كریه ژ جهێ خوه رابیت و د هاوارا نه‌ساخى یان لێقه‌ومى چوو بیت، یان وه‌كو دبێژن چوكێن مرۆڤى دشكێن و چ ژ مرۆڤى ناهێت خوه هزر بكه‌ت كا دێ چ كه‌ت، ده‌روون تێك دچیت، هه‌كه هات و روودانه‌ك ب سه‌ر مرۆڤى دا هات.
دێ چی یه مه‌له‌ڤانگه‌هه‌كێ كه‌سه‌ك دێ نقۆم بیت و كه‌سێ هاى ژێ نه، چونكى چه‌ندقین ب پێنج خۆله‌كان دا چێ دبیت، یێن ب ره‌خ ڤه هاى ژێ نینه، یا فه‌ره هنده‌ك ئالاڤ و ئامیره هه‌بن، ڤان كه‌سێن لێقه‌ومى قورتال بكه‌ن، بلا چ تشتێن بها گران نه‌بن، هه‌مان ستوونه‌ك یا بۆریه‌ك هه‌بیت، بۆ نموونه وه‌كو گۆپاله‌كى بیت، هه‌ما داهێلنه بنێ مه‌له‌ڤانگه‌هێ و ئه‌وێ دخه‌ندقیت ب راكێشنه سه‌رى، یان بۆ نموونه روودانه‌كا ترۆمبێلا هاتبوو روودان، ل رێیه‌كێ ئه‌و كه‌سێن لێقه‌مى ڤه‌گوهاستنه د ترۆمبێله‌كا دى دا، ئێك ژ وان یێ گیانێ خوه ژ ده‌ست دایى، ب تنێ خوین د ده‌ڤى دا مابوو ژ به‌ر وێ خوینێ دمریت، هه‌كه به‌س ئه‌وان كه‌سان ئه‌و كه‌س وه‌رگه‌راندبا ره‌خێ وى یێ دیتر ئه‌و خوین دا ژ ده‌ڤى هێته خار و نه‌دمر، به‌لێ كا خیره‌ت نه‌كرینه یان دا ترۆمبێل نه‌بیته پنى وه‌نه‌كرینه. یان دێ بینى دیپشك دێ ب كه‌سه‌كى ڤه ده‌ت، ئه‌وێن ل ده‌وروبه‌ر نزانن چ لێ بكه‌ن، هه‌كه ئه‌و ئیمرجنسی یا گه‌له‌كا ب سه‌ناهى بكه‌ن دێ كابرا ژ مرنێ رزگار بیت، چونكی ژه‌هرا دویپشكى خوینێ ره‌ق دكه‌ت و ناهێلیت د ره‌هان دا بهێت و بچیت. گه‌له‌ك مرۆڤان كه‌هره‌بێ گرتینه ژ به‌ر نه‌زانینا تشتێن ساده وه‌كو نه‌كرنا ده‌ستگوركان یان پێلاڤه‌كا پلاستیكى، یان سست گرێدانا كێبلان، هنده‌ك دێ كێبلێن كاره‌بێ هێلنه ل به‌ر ره‌حما بارانێ و دێ په‌قینێن مه‌زن هێنه روودان. ژ لایه‌كێ دى ڤه خوه بۆ هاژووتنا ترۆمبێلێ هنده‌ك تشتێن ساده هنده‌ك شۆفێر ب چ ڤه وه‌رناگرن، به‌لێ دبنه ئه‌گه‌رێ ژده‌ستدانا گیانێ وان و ئه‌و نه‌فه‌رێن ل گه‌ل، بۆ نموونه پشتراست نابیت كا ترۆمبێل هه‌نه یان نه ل دووریانه‌كێ یان ئیشكه‌كێ ژ به‌ر كو یێ مژووله ب ئاخفتنێ یان ده‌نگێ سترانان هه‌ما دێ كه‌ته گۆتره و دێ چیت، ته هند دیت حنگێن ژێ هات و چوو به‌ر دلۆڤانیا خودێ. هه‌ر وه‌سا گه‌له‌ك و گه‌له‌ك تشتێن دیتر هه‌كه پیچه‌كێ مێشكێ خوه بده‌ینه كارى دێ ژ مرنێ قورتال بین و بلا زه‌حمه‌ته‌كا دو خۆله‌ك بیت، نه‌ك كاره‌ساتێن مه‌زن بن و خودێ ژیه‌كێ درێژ و ره‌وشه‌نبیریه‌كا باش بده‌ته مه.
سته‌ما سیسته‌ما
هه‌مى سیسته‌م و قانوون و دستوور نه د خرابن و بۆ رێخستن و ساناهیكرنا ژیانا مرۆڤان هاتینه دانان، هه‌ر وه‌سا هه‌مى ئاینێن ئاسمانى ژى چ نه‌هاتینه بۆ هندێ كو سته‌مێ بكه‌ن، گه‌له‌ك ئایدۆلۆجیا ده‌ركه‌فتینه وه‌كو ره‌نگڤه‌دانا سته‌ملێكرنێ و ئه‌م سته‌ملێكرن بوویه ده‌ستكه‌فته‌ك كو خوه پێ ئاڤا بكه‌ن و كیانه‌كى بۆ خوه به‌رهه‌ڤ كه‌ن، لێ ل دووماهیێ به‌ره‌ڤاژى لێهاتینه و ئه‌وان ژى هه‌مان رێ گرتیه. ل ده‌مه‌كى كوم ململانێن ئاینى سه‌رێ خوه دخار، بزاڤا ماسۆنى ده‌ركه‌فت، پاشى حزبێن سیاسى هاتنه دى، هه‌موو ژى هه‌مان كریار كو ئارمانجێن به‌ریا ده‌مى بوون، ژ به‌ر هندێ گه‌له‌ك سیسته‌مان بۆ خوه دین كریه ئالاڤه‌ك بۆ كارتێكرنێ ل سه‌ر ده‌روونا مرۆڤان، هه‌ر وه‌كو میكافللی دبێژیت: ئاین بۆ حوكمه‌تان گه‌له‌كێ گرنگه، نه‌ك ژ بۆ خزمه‌تكرنا قه‌نجیه‌كێ به‌لێ بۆ هندێ كو كونترۆلێ ل سه‌ر خه‌لكى بكه‌ت …. ). ئه‌ڤجا ئه‌ڤێن هه‌نێ ل ژێر ناڤه‌كێ دى ئه‌وا خوه به‌رده‌وام دكه‌ن، هه‌تا كو گه‌هشتیه به‌ره‌بابێ مه و مه ب چاڤێن خوه دیتن چه‌ندین حزبێن ده‌ستهه‌لات هه‌ر یێن ئه‌وێ دكه‌ن، چه‌ند سیسته‌مێن وان وه‌كو نڤیسین هه‌ما شاما شه‌ریف بوون، به‌لێ تاك و كه‌سان یێن د ناڤ دا چو سه‌رده‌رى ل گه‌ل خه‌لكێ سڤێل و بێچاره كرن، خه‌لك نه ب بلۆكان دكوشتن و خه‌لك ل سێدارێ ددان، ب هزاران خه‌لك ب ساخى بنئاخ دكرن و ژ لایه‌كى ڤه ژى خوه ددانان نه‌ڤیێن پێغه‌مبه‌ران، به‌لێ ڤایرۆسێ نه‌ساخیێن ده‌روونى یێن د ناڤا تاكان دا ئه‌م گه‌هاندینه ڤى ئاستى و ڤى سه‌رده‌مى كو ئه‌ڤرۆ سالا 2016 یه و سته‌م ل ده‌ڤه‌را مه گه‌هشتیه لۆتكه‌یا خوه و یا سه‌رێ خوه دخۆت، مه مرۆڤ و گرۆپان بۆ خوه سیسته‌م كریه هه‌سپه‌ك و مه لنگ تێ داناینه بۆ بجهكرنا حه‌زێن خوه یێن نه‌ساخ و ئه‌زمانێ مه هندێ درێژه هه‌ما دێ بێژى گۆپالێ عیسا یێ د ده‌ست مه‌دا و دێ ده‌ریایێ دڕینین و كه‌ینه دو كه‌ر. ئه‌و سه‌ربۆرێن ب سیسته‌مێن فاشیزم و شیۆعى ل چینێ و ئێكه‌تیا سۆڤێتى كه‌فتین، ژ وێ ئێكێ بوون كو ل سه‌ر دیكتاتۆری و سازیێن نه دیمۆكراتخواز بوون له‌ورا، وه‌كو دبێژن سێركێتێ وان هاته خوار, هه‌مى رۆخساره‌ك بوون بۆ ڤه‌هێلانا وان ل سه‌ر كورسیا ده‌سهه‌لاتێ. ل دونیایێ ژى ئه‌و سیسته‌مێن خه‌لكى دكوژن هه‌ر ئه‌و خه‌لك یێ ده‌ستێ وان ماچى دكه‌ن ل سه‌ر هندێ را. ئه‌م ژى ئه‌ڤرۆ دد دله‌كى دا ل دووڤ شۆپا ئه‌مریكا دچین، هه‌مى سیاسه‌ت و بزاڤ ل ڤێ دونیایێ بۆ ئێك ئارمانج دكه‌ن ئه‌و ژى بازرگانى یه. ئه‌و تێنه‌بن یێن د خوینێ راماین و سته‌ملێكرى حه‌تا حه‌فكێ وه‌كو مه، له‌ورا ئه‌ڤ قووناغا ل دووڤرا دهێت دێ ل سه‌ر مه یا هه‌ستیار بیت، چونكو ئه‌م ژى دێ وه‌كو وان لێهیێن، ته‌نانه‌ت ئه‌و هنگافتنێن ب سه‌ردا هاتین ژى ژ سه‌ده‌ما نه‌ژدلیا سیسته‌مێ هه‌لبژارتنان بوو، دیمۆكراسى ناڤه‌كێ خۆشه به‌لێ پێدڤى ب په‌لگازكێ یه بۆ راكرنا په‌لا و رازیكرنا هه‌مى خه‌لكى و نه‌هێلانا گازندان، چونكو خه‌لكى هه‌مى گازندا دئێخیته د خانا وان سیمایێن حزبێن دا یێن به‌رێ نها سته‌م لێ دكرن دا، ئه‌ڤجا ل ڤێره گونه‌ه دكه‌ڤیته ستویێ ملله‌تى ژى، ب چو ره‌نگێ بیت حوكمه‌ت ژ مله‌تى باشتره و زاناتره و ب مێشكتره ژى، هه‌ر چو نه‌بیت هه‌ر ئه‌وێ بۆ خوه هه‌لبژارتیه.. یانژى هه‌ر دو ئێكن، به‌لێ وه‌كو كور و بابێن وه‌سا كو ڤێكنه‌كه‌ن.. هه‌ر رۆژ شه‌ر و شه‌ماته‌نه، هه‌كه سته‌م ل مه بهێته كرن ژ لایێ مه‌ڤه هه‌ر ئه‌م ب خوینه.
ره‌وشتێ راوه‌ستاندنێ!
ئه‌و كه‌سێ گۆتى: شۆفێرى هونه‌ر و چیژ و ره‌وشته.. ژ هه‌واى نه‌گۆتیه. به‌لێ ب دیتنا من هه‌كه ئه‌ڤ په‌یڤینه د زنجیرا ده‌ستواژه‌یا خوه دا بهێته سه‌رك و بنككرن، دێ پتر ل گه‌ل ئه‌ڤرۆ گونجیت، یانژى هه‌ما ب بۆچوونا من ببیته: شۆفێرى ره‌وشته و ره‌وشته و ره‌وشته!!. دێ پتر ب كێر مه هێت و گونجیت، چونكو چو هونه‌رى ئێدى تێدا نه‌مایه، هه‌ر وه‌سا چو خۆشى ژى تێدا نه‌مایه، به‌لكو به‌ره‌ڤاژى بووینه نه‌خۆشى، خه‌لك ئێدى هیڤیان دكه‌ن ب پیاسه بچن، هه‌مى قه‌له‌و بووینه و ب ده‌ست ناكه‌ڤیت رێڤه‌چوونێ بكه‌ت، هه‌ما جاده‌یه و ترافیكه و رێزكا ترومبێلانه، به‌لێ سه‌روبه‌رێ مه هه‌مى كریه ره‌وشت و سه‌ره‌دریكرن. ئه‌ڤه نه ژ چونه‌یێ هاتیه، زانایه‌كێ كه‌ڤن (فۆگۆ) ژى پشتراست كریه كو ئه‌و ساخله‌ته‌كه گرێداى ئه‌نتۆلۆجیایه‌كا دیرۆكى یه د ناڤا مه دا، ئه‌م به‌رده‌وامیێ دده‌ینێ. به‌لێ رێژه‌یا ره‌وشتێ شۆفێریێ جار بۆ جارێ جودایه، هه‌كه تو ل سه‌ر جادێ بى، نه‌وه‌كو راوه‌ستاندنێ یه (ته‌بقاندن)، یانژى ل سه‌ر جادێ دبیت جاره‌كێ تو و كه‌سه‌ك رێزێ ل هه‌ڤ نه‌گرن، یان ئێك ژ به‌ر ئێكى نه‌دانیت، به‌لێ هه‌كه تو بى و هه‌ڤسویێ خوه، ئها ئه‌و كاره‌ساته. دڤێت ره‌وشتێ راوه‌ستاندنێ پاك و نه‌زیهتر بیت ژ یێ هاۆژتنێ. نه‌خاسمه جادێن مه یێن د ته‌نگن و دلێ مه ژى ته‌نگتره، مانه شه‌رمزاریه ئه‌ز ترومبێلا خوه ب مه‌لیمان نێزیكى دیوارێ خوه بكه‌م ژ به‌ر ترومبێلا ته، به‌لێ تو ل نیڤا جادێ براوه‌ستینى و چو حسێبا نه بۆ من و نه بۆ خه‌لكى بكه‌ى، یێ قه‌درێ شارعى بگریت، ئه‌وى قه‌ردێ خوه گرت، یان هه‌ر ئێك ترومبێلا خوه ژ كه‌ربێن جیرانێ خوه دا ل نیڤا جادێ براوه‌ستینیت و رێكێ بگریت، ئه‌ڤه گه‌له‌كا كرێته، جاده بهێته داگیركرن، یان دێ ل سه‌رێ كۆلانێ به‌تڕانه‌ك ترومبێلا خوه راوه‌ستینیت و چیت پالڤه‌ده‌ت. ئه‌ڤه گونه‌هه و پاشى بێ ره‌وشتى یه. سه‌روبه‌رێ كۆلان و جادێن مه وه‌لێهاتیه، كو مرۆڤ ژ خه‌مان دا نه‌ساخ بیت و فشارا مرۆڤى بلند ببیت چونكو ژ پێش هنده‌كا شه‌رم ژ خوه بكه‌ت. خۆزى دلێن هنده‌كان ژ مه سپى ببانه و جادێن مه فره‌ه بانه. ئه‌رێ چو مه‌زنى تێدایه، هه‌كه دو یان سێ بهۆستان تو ترومبێلا خوه وێڤه ببه‌ى دا رێیا رووباران ژى هه‌بیت كو ببوورن و ده‌رباز ببن، یێ هه‌یى نه‌ساخه‌ك هه‌یه، یێ هه‌ی حاله‌تێ بوونێ، یێ هه‌یى سه‌حدكه‌ته رۆخسارێ ده‌روونا ته دهه‌لسه‌نگینیت!!. تۆره بوون د شۆفێریێ دا كوراهیى و په‌شێمانى یه، باژارێ دهۆكێ ئێك گونده و ئێك خه‌لكه، هه‌مى ژى دگه‌هنه ئێك ناسیارن، هشیاربى هۆڕنه‌كا درێژ یان خه‌به‌ره‌كێ كرێت بێژیه كه‌سێ یان تۆره بى، ته هند دیت ده‌ركه‌فت كه‌سه‌كێ ته، یان دانعه‌مره‌ك یان ژنه‌كا بێچاره یان كه‌سه‌ك قه‌نجیه‌ك ل ته كرى. ژ لایه‌كێ دیڤه هه‌كه بێژین. نها راوه‌ستاندنا ترومبێلێ ل باژارى ئاریشه‌یه، چاره‌سه‌رى ژى چیه، دێ ب سه‌ر شۆسته‌یان ئێخین. به‌لێ راسته یا باژێرڤانیێ قه‌ده‌غه‌یه كو شوسته‌یى راست بكه‌ن و كربستونى بنڤینن و ل شوونێ پێدڤیه سێ نه‌مامكێن داروبارى بچیننن، ژ بۆ پاككرنا ژینگه‌هێ، یا ژمنڤه ژینگه‌ها دلێن مه هینگى دێ هێنه تێكدان، مانێ ژینگه‌هه‌ك ژ یا دیتر فه‌رتره. چاره‌كرنا (احتباسا حه‌رارى) ب شته‌له‌كێ ل سه‌ر شوسته‌یێ من ناهێته چاره‌سه‌ركرن، بلا رووبه‌رێن مه‌زن ببنه دارستان. گه‌له‌ك وه‌لاتان شوسته‌یێن خوه راستكرینه، بۆ به‌رژه‌وه‌ندیا رێكێ، هه‌كه ژ به‌ر هندێ بیت كو ترومبێل ب سه‌ر بلۆكى نه‌كه‌ڤیت، ئه‌و ب سه‌ر دیواران ژى دكه‌ڤیت. چو جاران شوسته‌یێن مه نابنه ئێك پارچه كو پیاده ل سه‌ر پیاسان بكه‌ن، باژارێ مه هه‌مى بلندى و ژۆرداهى یه، هنده‌ك شوسته هند دبلندن دڤێت پیاده ببنه مغاویر خوه تێدا بهاڤێژن. هنده‌ك ئاڤاهیان ژى ره‌مپه‌یێن خوه برینه نیڤا جادێ و حسێبا جادێ نه‌كرینه زێده‌بارى ڤێ ژى ته‌سه‌یه‌ك ژى بۆ جوانیێ و سه‌بڕێ ب ره‌خ ڤه هێلایه، ئه‌ڤه هه‌مى د چنه د خانا چ تشتى دا ؟ پێ نه‌ڤێت د ره‌وشتێ جڤاكى دا.
خه‌لێ بزنا به‌لێ!
هه‌ر وه‌كو ئێشه‌كا ڤه‌گره ل سه‌ر پۆستێن هنده‌ك جامێران ل ڤێره و وێرا هه‌نێ، ئه‌ڤجا دبیت ره‌هه‌ندێن سه‌رداچوونێ و ده‌ڤخوینیێ بن هنده‌ك كه‌س گه‌هاندبنه وى راده‌ی و ئیغرائا ده‌ستهه‌لاتدایێ و دكتاتۆریه‌كا جۆراتى، یان ژى چاڤلێكرنه چوویه د خانا ئه‌ته‌كێتێن حه‌فكستووران دا، ئێك یێ چاڤ ل یێ دى دكه‌ت، چونكى هه‌ر كه‌سێ گه‌هشته فارگۆنا سه‌ركێشیێ ئێدى ئه‌و گرنژینا جاران نامینیت و ژووردا ته‌ماشه‌ى كه‌فشتان دكه‌ت (هه‌كه ده‌ربرین یا دروست بیت). هه‌ر وه‌كو ئه‌و ب تنێ كۆرێن دایگوریكانه و یێن دی ژى حاشا (په‌زن)!! وه‌لاتیێن پله دو و سێنه، مه‌ره‌م ئه‌وه كا چاوا دێ سه‌رده‌ریێ ل گه‌ل جه‌نابێ به‌رپرسه‌كى یان رێڤه‌به‌ره‌كى كه‌ی كو بچی ل مافه‌كێ خوه بگه‌ری كو حه‌قێ ته‌یه، ستایلێ ئاخفتنێ و لێزڤرینێ یێ چاوا بیت و چاوا بچیه دیوانا جه‌نابێ وى و ب چ ره‌نگ بێژیێ و چاوا دانیشى، ئه‌و چ په‌یڤن و چ شێوازه موفاته‌حا وى بكه‌ى، ته‌له‌فۆنا وى بكه‌ى، نه‌كو بێژیت یا ژ ته زێده‌یه، (ئێس ئێم ئێسه‌كێ) فرێكه‌ى، نه‌كو ژ خه‌و رابیت، ئه‌رێ پێكه‌نین یان ئه‌و چ سوحبه‌تن كابرا حه‌ز ژێ دكه‌ت كو بگه‌هینیێ ب نه‌رماتى و قانع بكه‌ى كو مافێ ته بده‌ته ته، یان ساكالایا ته بمه‌شینیت، هه‌لبه‌ت دڤێت وى بریندار نه‌كه‌ى، دڤێت نه‌بێژیێ خه‌لێ بزنا به‌لێ، ئه‌رێ ب چ ده‌نگ باخڤى؟ یێ تۆره نه‌بیت، یێ ب كه‌یف بیت، ب چ مووزیكا گوهێن وى نه‌ئێشن، چونكى ئه‌وى گوهه‌كێ مووزیكى یێ بالا هه‌یه و پرانیا تونێن ده‌نگى بۆ وى دنه‌شازن، هه‌موو ئیقاعان ژى قه‌بوول ناكه‌ت، جاران ژ خواندنا شالویل و بلبل و كناریان ژى تۆره دبیت، حه‌ز كیژ زنجیرا درامایى دكه‌ت، كو ده‌مێ وى نه‌كوژى و حه‌لقه‌ك ژێ نه‌چیت!، ب كیژ زمانى دئاخڤیت، ئه‌رێ به‌رێ ل كیڤه بوو؟ ژ كیڤه هاتیه به‌رى نها؟ ژ ئیرانێ یان ژى ژ توركیا یان ژ خارێ یان ل سه‌ره؟!، دڤێت هه‌مى زمانان بزانى دا سوحبه‌تێن جه‌نابێ وى دڤێن بۆ وى بكه‌ى، هه‌مى ژى نه‌وه‌كو ئێكن، یێ هه‌ى حه‌ز ژ مه‌لاقی و مه‌دحه و پفكرنێ دكه‌ت، یێ هه‌یى ژى دینێ وى ژ ڤان تشتان دچیت، یێ هه‌یى ژ به‌ر ناڤێ عه‌شیره‌ته‌كێ كارێ ته برێڤه نابه‌ت، یان تو مرۆڤێ فلانى و بێڤانێ یان دبیت دیمه‌نێ رۆخسارێ ته ب دلێ وى نه‌بیت! یان شه‌كرنا پرچا ته ب دلێ وى نه‌بیت، سروشتێ كه‌ساتیا وى و ئایدولۆجیا وى چاوانه، حه‌ز ژ ئیلحادێ دكه‌ت، یان یێ ئایندار و ب ته‌قوایه، تو دێ ژ مژاره‌كێ چیه د ئێكا دى دا، كو تنێ دێ ئیمزایه‌كێ یان په‌راوێزه‌كێ بۆ ته بكه‌ت، مخابن كه‌سێن نه‌زیه دكێمن. جاره‌كێ به‌رپرسه‌كى گۆتبوو: بلا كچ بهێنه (موقابلێ) هه‌كه یا جوان نه‌بیت، ئه‌ز نا دامه‌زرینم. ئه‌رێ ئه‌ڤه چ فلمێ هندى یه هوسا ڤه‌مایى؟ ما قانوون و راسپارده‌یێن فه‌رمى گێولێ مرۆڤانه؟ ژ عه‌سمانان هاتینه خوار؟! دڤێت كه‌س ژى نه‌بێژیتێ، حاشاى روویێ خوانده‌ڤانان: (پێلاڤا ته یا خواره)، هه‌كه دێ تۆره بیت، به‌لێ ب راستى وه‌ریسێ خواریێ و شاشیێ چه‌ندى یێ درێژ بیت هه‌ر دێ كه‌ڤیت، چونكی مه ب چاڤێ خوه دیت، یێ ئه‌ڤ جۆره سته‌مه كرین، هنده‌ك ب هه‌ستیكێن وان هاتنه خه‌ندقاندن و هنده‌ك ژى بوونه ته‌شابه‌ت و خودى بۆ نه‌هێلا.. ئه‌ڤنه هه‌مى ل ره‌خه‌كى و فلته‌رێن گه‌هشتنا ده‌وروبه‌رێن وان ل ره‌خه‌كێ دیتر، چونكی ئه‌وان فلته‌ران ژى هه‌مان مه‌رج و ساخله‌تێن خوه هه‌نه، دڤیا ئه‌وان ژى رازى بكه‌ى كو ته بگه‌هیننه جه‌نابان. تو دێ گه‌هیه راده‌كێ كو دلێ ته ژ هه‌مى تشتا ره‌ش ببیت و هه‌ما ده‌ستان ژ وى كارى به‌رده‌ی و بهێلى مافێ بهێته خوارن و نه‌چار بى، ئه‌ڤه نه‌ك هه‌لویسته‌كێ تایبه‌ته ئه‌ز ئاماژێ پێ دده‌م به‌لێ گه‌له‌ك هه‌لویست هه‌نه، هه‌كه باوه‌ر نه‌كه‌ن سه‌حكه‌نه ده‌وروبه‌رێن خوه و ب وژدان ده‌رببرن و كه‌س خوه ژ من سل نه‌كه‌ت، ببه‌ته ده‌ف خوه و گومانان ژ خوه ببه‌ت، یان (ب پیندڤیت) دبن خوه بچیت و مه بكه‌ته عه‌بایه‌كێ ره‌ش ل پێشچاڤێن خوه. ئه‌ڤه چپكه‌كه ژ رووباره‌كى. كورت و كرمانج هه‌كه حه‌ساسێ مرۆڤى تێكچووی وایرمان نه‌كاره دروست بكه‌ت، له‌وما مه گۆت: خه‌لێ بزنا به‌لێ.
بازارێ ره‌ش یان رویپێ ره‌ش؟
ئه‌رزانیه‌كا گران.. سیكه‌كا ره‌ش، به‌خته‌كێ ره‌ش، قه‌دا ب وى نانێ رووره‌شیێ بكه‌ڤن یێ ل سه‌ر ته‌شقه‌له و حیله و حه‌والان دهێته بده‌ستڤه‌ئینان، هه‌ر كه‌سێ مۆبایلا وى خراب بوو، ئه‌و ئاڤ و ئاڤ تێچوو، یان دڤێت وه‌كو مسڕى دبێژن شه‌ئه‌لعومر (شقى العمر) هه‌میێ لێبده‌ت، چه‌ندى دگرانن نه‌خاسمه ل ڤى سه‌رده‌مێ ئابوورى یێ ژبه‌رئێكچووى، چونكو هه‌كه مرۆڤى چار عه‌یال هه‌بن ل گه‌ل دایكا وان ئه‌ڤه مرۆڤ بوو شه‌ش كه‌س، هه‌ر مۆبایله‌كا باش بیت، ئه‌ڤه بوو هه‌قێ ترومبێله‌كێ، ڤێجا ژ بلى ڤان سه‌نى و مه‌نیێن نوكه ئه‌نترنتێ و به‌لانس و ..هتد. یانژى دڤێت قه‌ستا سیكا ره‌ش بكه‌ى جهێ رووره‌شیێ، ده‌ما تو دچیه وێ درێ، وه‌كو پێشیان ب مرۆڤى وه‌رئێن، جارا ئێكێ وه‌كو پێشیه‌كا ب تنێ دێ حه‌یرانۆكان ل به‌ر ده‌رێ گوهێ ته بێژیت و پاشى هێدى هێدى دبیته شه‌ره‌سه یا پێشیان و ئێدى دێ دبیته لێ لێ كنێ .. مالا منێ، دێ به‌ربنه ته و دێ ژێكڤه‌چڕن و خۆلیێ ب سه‌رێ ته وه‌ركه‌ن، ب ده‌ره‌و و ته‌شقه‌لان، یا ده‌ڤێ وان دبێژیت چاڤێن وان نابێژیت، بێهنا ده‌روان دچیته هنداڤى ئه‌سمانێ دهۆكێ و ئه‌وێ ژینگه‌ها پاك تێكدده‌ت، چه‌ندى ئاسایش به‌ره به‌ره وان رێكدئێخیت و خڕڤه‌دكه‌ته سه‌رئێك، به‌لێ یا ب زه‌حمه‌ته كه‌سێ پیر بسرمان بیت، چێكرى چێكریێ خودێ یه، چه‌ندى ببینى پوخچكا هنده‌ك كه‌سان یا ل بن كه‌فشێ وان و بۆ خوه ژ به‌ر پۆلیس و ئاسایشێ دره‌ڤنه به‌ر ڤى دیواركى و یێ دیترێ، چونكو ل سه‌ر شاشیێ برێڤه‌دچن، به‌لێ هنده‌ك كه‌سێن پیر و سه‌ر سپى بۆ خاپاندنێ گه‌له‌ك ژ سنێلان زیره‌كتر و داهێنه‌رترن، هونه‌رمه‌ندن رێستنا فندێن خوه دا، چونكو جحێلێن ڤى سه‌رده‌مێ نازك ئه‌ڤرۆ خلۆله‌ترن وه‌كو چیچه‌لۆكانه. یاباش ئه‌وه سێله‌كا تژى ته‌نى بداننه به‌ر ده‌رازینكا وێ سێكێ هه‌ر كه‌سێ به‌رى بچیته خارێ هنده‌ك ته‌نیێ د روویێن خوه بده‌ت به‌رى كو ئه‌و لێبده‌ن، چونكو ئه‌وان ب خوه ژى هه‌ر ژ رۆژا ئێكێ وه‌كو سه‌ربازێن مارێنز د ناڤ دارستانێ دا خوه ڤه‌شارتیه دا كه‌س نه‌بینیت، یانژى ناڤێ وێ سیكێ كربا سیكا قه‌سابان!!. خۆزى زكێن ره‌ش سپى ببان و سیكا ره‌ش سپى ببا، خۆزى ب خێرا خوه حوكمه‌تا دهۆكێ ئه‌و سیك گرتبا و بۆ وان كه‌سان كاره‌كێ حه‌لالتر ڤه‌دیتبا، سه‌ره‌راى هندێ كو ل هه‌مى دونیایێ هه‌مان بازار هه‌نه، به‌لێ دهۆك نه‌وه‌كو ڤێ دونیایێ هه‌مێى یه، هه‌را جودایه، بلا ئه‌و سروشتێ جوان و زه‌لال یێ خه‌لكێ دهۆكێ هه‌میى ببیته ئێك هێڤێن چونكو ژیێ شاشى و دره‌وێ ل دهۆكێ یێ كورته، ل سه‌رانسه‌رى جیهانێ تاكه باژاره یێ ته‌نا و پاك و نه‌زیه و ئارام، له‌ورا ئه‌و چپكا گه‌نده‌لیێ د وى گه‌لیێ بچووك دا نه‌یا ب سه‌رڤه‌یه، ب راستى هنده‌ك مۆبایل هه‌نه ـ حاشاى روویێ هنگۆ ـ یێن ب تفێ پێكڤه‌ناین، هنده‌ك هه‌نه دبێژنێ (زڤراندی یێ كۆمانیێ) كوڕێن وان خوه ل سه‌ر فێركرینه و بۆ مه هنارتینه وه‌كو ژه‌هره‌كێ، هه‌ر وه‌كو ئه‌م یێن بووینه قالبێ سه‌رخاران! ره‌نگه تنێ ل سیكا ره‌ش ئه‌ڤ سه‌روبه‌ره نه هه‌بیت، هه‌ر وه‌سا ره‌نگه پێشانگه‌هێن ترومبێلان و حزۆره و مامكانێ یا هنده‌ك فیته‌ران ل گه‌ل ترومبێلێن ژكاركه‌فتى و تێكچووى ژى خرابتر بیت، چه‌ندى سویندێن مه‌زنتر بخۆن ئه‌و دره‌و تشت خرابتره، به‌لێ ئه‌و خه‌لكه‌كێ سڤیل د سه‌ردا دبه‌ن و هه‌مى كه‌س دكه‌ڤنه داڤێن وان. ب راستى بازارێ وان ب ناڤه‌كێ ئه‌رزانه به‌لێ ببهایه‌كێ گرانه و گران ل سه‌ر مرۆڤى دراوه‌ستیت، ره‌نگه هنده‌ك ئه‌وێن ل سیكا ره‌ش كار دكه‌ن، نه‌هنگ و حویت بن، به‌لێ هنده‌كێن پێشانگه‌هان دێ بێژى ده‌یناسۆرن!، ل دووماهیێ دبێژم تنێ تشتێ گونجاى و ب كێرهاتى ل وێ سیكێ جهێ وێ یه، ئه‌و ئه‌و كۆلانكا ل بن وى جسرى و ئه‌و بایێ فێنك و رۆمانسى و ئه‌و رێچكا وه‌كو رێچكا ده‌واران، یا باشه و جلكێ وان یێ كارى ژى یێ ئازاده كو نێزیك كه‌لها دهۆكێ یا شوونه‌وارى یه، كو ئه‌و كه‌لهه ژى هه‌ر د وێ رێكێ دا چوو و به‌رزه بوو، ئه‌وان ئه‌و جه بۆ خوه ژێگرتى یه و لێ پیرۆز بیت، به‌لێ مۆبایلا مه نه‌پیرۆز بیت!!، چونكو ب ژیانا خوه ئه‌ز جاره‌كێ ب تنێ چوومه وێرێ ئه‌ز په‌شێمان بووم هه‌ر وه‌كو چوویمه جه‌هنه‌مێ. من هه‌ست ب ده‌رو و ته‌شقه‌لێن هنده‌ك جه‌مبازان كر له‌ورا هوون بۆ خوه ب مۆبایلێن خراب بقه‌تینن باشتره كو بكه‌ڤنه رۆیپا هنده‌ك ده‌یناسۆران.
بووینه ته‌ره‌كتر!!
هه‌می سیسته‌مێن ده‌وله‌تان وه‌كو سیسته‌مێ تبلێن ده‌ستێ مرۆڤینه، هه‌ر تبله‌ك كار و تایبه‌تمه‌ندیا خوه ئه‌نجام دده‌ت، هه‌می سازیێن وان ل سه‌ر بنیاته‌كێ ته‌كنۆقرات كار دكه‌ن، هه‌كه نه دێ تێك چیت، به‌لێ هنده‌ك وه‌لات ژی ب سیسته‌مێ ته‌ره‌كترێ كار دكه‌ن.. چاوا؟!. سیسته‌مێ ته‌ره‌كترێ بۆ ژینگه‌هه‌كا جودا دگونجیت، جهێ وێ یێ دروست هه‌می دزانن كو (گونده)، ل ناڤ زه‌ڤیا و كێلانێ و ل سه‌ر ئاخێ یه و حه‌ز ژ ته‌قنێ دكه‌ت، ل وێ ژینگه‌هێ گه‌له‌كا جان و ب مفایه و گونجایه گه‌له‌ك یا ب به‌رهه‌مه و ب حنێره، گه‌له‌كا عه‌زیزه ژی ل ده‌ف خودانێ خوه و د خزمه‌تا جۆتیاران دایه، به‌لێ پا ب ره‌نگه‌كێ دی گه‌له‌كا ده‌خه‌سه و جهێ دلگرانیێ یه ل ناڤ باژێری، لڤینا وێ وه‌كو كویسله‌یه و ناڤێ وێ (عنته‌ر 17)!! یا ژ مرۆڤی ڤه ئه‌و ژی وه‌كو (برنۆ ره‌قه‌م هه‌ڤده‌یه)، ژ به‌ر گه‌له‌ك ئه‌گه‌ران، یان دێ ژینگه‌هێ تێك ده‌ت ب دیكێلا خوه یان ده‌نگێ خوه یان ل سه‌ر جادێ دێ گێله‌شۆكێ په‌یدا كه‌ت، یان ژی زوو برێڤه‌ناچیت، یان دێ شۆفێرێ خوه هژینیت و ل ته‌سان ره‌قسینیت، ژ هه‌میێ خرابتر، تایرا بچووك به‌ری یا مه‌زن دچیت، ئها ل ڤێره ژی ب دروستی سیسته‌مێ وێ ل سه‌ر مه و ژینگه‌ها مه دگونحیت، سازیێن مه ب وی سیسته‌می برێڤه‌دچن، ئه‌م ب رۆخسارێ خوه گه‌له‌ك دجانین و ل ده‌ف ڤێ دونیایێ گه‌له‌ك پوفدكه‌ینێ كو ئه‌م خوه‌دی سیسته‌مه‌كێ رێكوپێكین و حوكمه‌تین و ب یه‌كسانین و ل سه‌ر بنیاته‌كێ زانستی و ئه‌كادیمی خوه برێڤه‌دبه‌ین، ئه‌م وه‌لاته‌كێ ته‌كنوقراتین و سیسته‌مێ مه وه‌كو تبلێن ده‌ستی یه، به‌لێ هه‌كه بهێیه ژ ناڤ گه‌هێن وێ دا هه‌می تشت به‌ره‌ڤاژینه، حوكمه‌ت بیێ په‌رله‌مان بریاران دسه‌پینیت، یان حزب حوكمه‌تێ دهژینیت و عه‌شیره‌ت حزبێ دلڤینیت، تاكه كه‌س ژ حوكمه‌تێ زه‌نگینترن، برایێ بچووك به‌ری یێ مه‌زن دژیته ژوورڤه، پۆلیس فه‌رمانان ل ئه‌فسه‌ران دكه‌ت و هه‌كه باغڤیت ژی دێ بیته نه‌خۆش مرۆڤ و ئه‌زمانێن بێكار دێ بۆ خوه كه‌نه مژار وبێبه‌ختی دێ چنه‌ر به‌ر ئه‌سمانان، هه‌ر پشكه‌كا ئۆفیسه‌كێ كارێ یا دیتر دێ كه‌ت، خودان خزمه‌ت و تێكۆشان یێ ل پشتگوه خستیه، دێ بینی قانوون به‌ره‌ڤانیێ ژ وی كه‌سی دكه‌ت یێ ته‌شقه‌له كری وپارێ خه‌لكی خاری، دێ بۆ كه‌نه قستێن (موریح)، دێ بینی ده‌همه‌ن پیسه‌ك دوهی یا هاتی ژ جهه‌كێ دیتر، به‌لێ ب ته‌له‌فۆنه‌كێ هه‌می كارێن وێ برێڤه‌دچن، یێ خودان زه‌حمه‌ت ژی دێ مینیته ل هیڤیا سرایێ و ل به‌ر په‌نجه‌رێ و ل به‌ر بارانێ، هه‌كه باغڤی ژی دێ بێژن ما چ قه‌ومی یه؟، ئه‌م یێن ل ناڤ بێسه‌روبه‌ریێ دگه‌ڤزین و هێشتا یێن دبێژین: پانێ ئه‌م چو نابینین ما چ روودایه!!، دێ بینی یێ بندیوار یێ پله‌به‌رز دبیت و یێ مالا خوه خرابكری ژی خه‌به‌ر و له‌عنه‌ت دچنێ. یێ خه‌بات كری و دكه‌ت، وه‌كو خشیم و نه‌زان و كێم دهێته ل قه‌له‌مدان و یێ زكێ خوه ل سه‌ر سیرامیكی پانكری دێ بیته شامێ شه‌ریف و گه‌له‌ك و گه‌له‌ك تشتێن ب ڤی ره‌نگی هه‌می به‌ره‌ڤاژی برێڤه‌دچن كو من گه‌له‌ك هزر ل ڤی سیسته‌می كرن، كو تشته‌كی وه‌كهه‌ڤ ببینم، من نه‌دیتن ژ بلی سیسته‌مێ ته‌راكتۆرێ كو هه‌ڤكاره‌كێ نێزیك خۆیاكری، ئه‌و ژی ته‌راكتۆره و سیسته‌مێ وێ یه ب كێر مه دهێت و وه‌كو مه‌یه و ئه‌م ژی بووینه ته‌راكتۆر!!!
شێتبوونا ئیبلیسی
ئه‌رك و پۆسته و ئه‌جیندایێن ئبلیسان د فه‌لسه‌فه و میتۆلۆجیێن ژیانێ دا ته‌وه‌رێ شه‌ڕ و خرابیێ یه، واته تێكدا جامێری یێ شووشتی یه و پێدڤی ناكه‌ت سه‌رێ خوه بشۆت، هه‌ر ل ده‌سپێكێ یێ خوه راگه‌هاندی كو یێ مه‌عسومه ژ خێر و قه‌نجی و چاكی و چاكسازیێ، نه مایێ خوه د خێران دكه‌ت و نه خوه ب نه‌زاهه‌تێ دئینیته ده‌ر، نه‌سه‌رێ خوه ب دۆسیا گه‌نده‌لیێ ڤه گێژ دكه‌ت، نه ل هیڤیا مووچه‌یێ هه‌یڤانه‌یه، ئه‌ڤه ژی ساخله‌ته‌كا ئه‌كتیڤه و باشه ل ده‌ف وی هه‌ی، كو ده‌ره‌وان ناكه‌ت یێ ب مایكێ گازی كری: ئه‌زێ خرابم و ئه‌زێ خرابم، ژ بلی وێ ئێكێ كو هه‌می بزاڤان دكه‌ت كو مرۆڤان بێخیته ته‌پكا خوه و سه‌ردا ببه‌ت، به‌لێ هه‌كه شیا مرۆڤی، دێ هێلیت سه‌ربه‌ردای، چونكو ئێدی دێ سه‌رێ وه‌ریسی ده‌ته‌ڤێ، ئها ل ڤێره لۆتكه‌یا مه‌رگه‌ساتێ یه، مرۆڤێن ئبلیس خرابترن، چونكو راستیێ نابێژن و خوه ب باشیێ دئیننه ده‌ر، بۆ خوه ئێك سالۆخه‌ت ژێگرتیه، ئه‌و ژی فند و حیله و حه‌واله بووینه حه‌لاوه!!، و هه‌می كریارێن وه‌سا كو ب هه‌ڤالێن خوه ڤه بده‌ت، ژ به‌ر ڤێ چه‌ندێ ژی ڤان رۆژان و ل ڤی سه‌رده‌می هنده‌ك ئاشكرا بوون كو ب دروستی چووینه د ناڤ وان سالۆخه‌تان دا و بووینه شوونگرێن وی كابرایی، ئه‌هریمه‌نی پییه‌كێ خوه راكریه و ئه‌وان ب جۆتكانی دانایه جهێ وی هه‌تا وی راده‌یی ئه‌وی یێ (عه‌زل) كری و باركری چوویه وه‌لاته‌كێ دی، چونكو كارگه‌هه‌كا ئبلیسان ل پاش خوه هێلا، ئه‌ڤجا د هه‌ر واره‌كی دا، ئه‌هریمه‌ن هند ته‌نا بوویه یا ژ من ڤه خوه سیبه‌را وی ژی نه‌مایه نه ل عیراقێ و نه ل سووریێ، چونكو گه‌هشته قه‌ناعه‌ته‌كێ كو به‌ره‌ڤانیێ ژ كه‌سێ نه‌كه‌ت، هه‌ر ئه‌ون به‌ره‌ڤانیێ ژ ئێك و دو دكه‌ن و ئه‌و تێرا خوه هه‌نه، هزار حزب و به‌ره و ئوپۆزسیۆن و گرۆپن. بۆ نموونه خوه ل ئۆفیسه‌كی ژی پۆلیسه‌ك و ئه‌فسه‌ره‌ك ڤێك ناكه‌ن، ئێك ئه‌ركن، ئێك حزبن، ئێك بنه‌مال و ڤێك ناكه‌ن. ئه‌ڤجا جوامێری ما چو د ناڤ مه‌دا شێت نه‌بیت جوامێری و نه ته‌قیێت و بۆ خوه ب چۆل و نه‌هالان نه‌كه‌ڤیت، نوكه ئه‌و ب خوه دبێژیته خوه ئه‌ڤه من چو ب سه‌رێ خوه ئینا.. دا كلده‌ین مه كوره كر. جاران مرۆڤ هه‌ست دكه‌ت كو دلێ مرۆڤی ب ئبیلسی دسۆژیت، چونكو گه‌له‌ك غه‌دره لێ هاتیه كرن، ماف و ئه‌رك و پۆستێن وی ژێ هاتینه داگیركرن ژ لایێ مرۆڤان ڤه، خوه جهێ وی ل بن دیواران ژی نه‌مایه، چونكو ئه‌وی واسته نینه، ب دروستی ئه‌و پێكه‌نین ل سه‌ر وی دهێته سه‌پاندن، ده‌مێ گۆتی: من دزی و حیزی و خرابی و حیله نیشا خه‌لكی دان و ل دووماهیێ زه‌نگین بوون و چوون ل سه‌ر ته‌لارێن خوه تشته‌كێ دی نڤیسان و ئاماژه ب رۆلێ وی نه‌كر، له‌ورا ژی چه‌ندین هه‌ڤالێن فه‌یسبۆكی مژارا ئه‌هریمه‌نی شاراندیه و مه‌دحێن وی كرینه و هنده‌كا ژ من خواست ل سه‌ر بنڤیسم، به‌لكو حه‌ق و حقوقێن وی بۆ بزڤرینن. چونكو قه‌یرانه و ئه‌و ژی یێ موفلس بووی، هه‌كه شێت نه‌بیت!!. ئه‌عوزبالله.
هۆسا نامینیت!!
دبێژن زه‌لامه‌كێ ب ئاقل وه‌سیه‌تكر بوو ده‌ما ئه‌وی وه‌غه‌ر كر، ل سه‌ر گۆڕا وی بنڤیسن”هۆسا نامینیت”. كه‌سێ ژی نه‌زانی بۆچی وه‌گۆتیه و پرسگرێك چیه؟!، نه‌خاسمه ئه‌و ره‌وشا ژینگه‌ها ئه‌و تێدا گه‌له‌كا نه‌خۆش بوو، هه‌می ئاریشه و قه‌یران بوون، به‌لێ خه‌لكی هه‌ر دگۆتنه ئێكودو: هۆسا نامینیت و دێ چێبیت و هه‌می قه‌یران دێ چاره‌سه‌ربن.. و هتد ژ ڤان په‌نج و ڤان موسه‌كنان!!، پشتی خودێ ئه‌مانه‌تێ خوه ژێ وه‌رگرتی و وه‌غه‌ركری، مرۆڤێن وی ژی وه‌سیه‌تا وی ب جهئینا و ل سه‌ر قه‌برێ وی نڤیسان”هۆسا نامینیت”.. ئه‌ڤجا ژ نوی بۆ وان دیار بوو كا مه‌ره‌ما وی چ بوو، چونكو جوامێری پشتی مری و چووی ژی قه‌یران و ئاریشه هه‌می هه‌ر وه‌سا مابوون، ئه‌م ژی دره‌وا ل خوه دكه‌ین پشتی پتپتێ دكه‌ین و گلوگازندان دكه‌ین، داویا مژارا خوه دێ قفل كه‌ین و بێژین”هۆسا نامینیت و دێ چێبیت و خودێ هاریكار بیت”.
ئه‌و ب خوه مه گێۆلێ ئێكودو ژی نه‌مایه و هه‌ما مه تنێ دڤێت سوحبه‌تێ ب دووماهی بینین. له‌ورا دخوازین زوو بچین، دا وه‌سا نه‌مینین. ب دروستی ژی چیرۆكا كابرایی نها ل سه‌ر مه دهێته سه‌پاندن. چونكو مه چو خۆشی و كه‌یف نه‌دیتن، چه‌ندی مه ل بیره دبێژین: هۆسا نامینیت.. بابوباپیرێن مه ژی گه‌له‌ك نه‌خۆشی دیتینه، دایكێن مه، چه‌ند ده‌رده‌سه‌ری دیتینه، برس، ترس، وه‌ستیان، لاندكێ و بلیلێ و قه‌سیركێ و هه‌ژاریێ و. .. هتد. هه‌ما ئه‌وان ژی بۆ چاره‌سه‌ركرنا ده‌روونا خوه ئه‌و هه‌ردو په‌یڤ ب ده‌ڤێ خوه گرتبوون و ئه‌ڤرۆ راده‌ستی مه كرینه و ئه‌م ژی ب ئه‌مانه‌ت دگه‌هینینه زارۆیێن خوه و دبێژینێ “دێ چێبیت و هۆسا نامینیت.. . ” ئه‌م خوه رازی دكه‌ین، دبیت ل ناڤ هنده ملله‌تان دا ئه‌وێ رستێ جهێ خوه نه‌بیت، به‌لكو ل جهێ وێ “چێنابیت” یا هه‌یی، بۆ نموونه ژی هه‌ڤاله‌كێ مه چه‌ندین سالان ل ئه‌ورۆپا ژیابوو، نها زڤریه ڤه و هه‌ر تشتێ تو بێژیێ دێ بێژیته ته ” چێنابیت” هه‌ر شۆلا هه‌بیت وه دبێژیت، ژ سپێدێ حه‌تا ئێڤاری هه‌ر دڤه‌گێریت “چێنابیت و چێنابیت” هه‌ما مه ژی كریه ناسناڤ ب دووڤ وی ڤه، چونكو ئه‌م بۆ هندێ د شاره‌زاینه.
به‌لێ ل ئه‌ورۆپا قانوون و سیسته‌م جهێ خوه دگرن و شاشیێ قه‌بوول ناكه‌ن، له‌ورا ل ده‌ف وان نه‌به‌س چێنابیت، به‌لێ هه‌ما خوه با دبه‌را ناچیت، چونكو گه‌ر خه‌له‌ل كه‌فته شۆلێ ئێدی چێنابیت و دێ ئاریشه په‌یدا بن، به‌س هه‌ما چو بهێته روودان ئه‌م دێ به‌هانان گرین و بارودۆخان ئینینه پێش. ئه‌ز نه‌یێ ره‌شبینم و ب چاڤه‌كێ تاری و ته‌حل به‌رێ خوه دده‌مه مژارێ، به‌لێ راستی یا ته‌حله و یا ب زه‌حمه‌ته و ناچیته سه‌ری.. له‌ورا حه‌تا دمرین هه‌ر و هه‌ر دێ بێژین” هۆسا نامینیت و هۆسا نامینیت و ئه‌م ژی دێ ل سه‌ر گۆرێن ئه‌وێ نڤیسین.
نيشاندان
WP Facebook Auto Publish Powered By : XYZScripts.com