زانست و ته‌كنۆلۆجیا ل ده‌ف خه‌لكه‌كی گه‌هشتیه راده‌یه‌كی كو هه‌ما هه‌می تشت بووینه ئۆتوماتیك، ئێدی بیركاری و سیسته‌مێ هه‌ژماران هندی چوویه د ناڤ ئێك دا، هه‌می سیسته‌م و قانوون ئه‌و ب خوه كه‌فتینه د خزمه‌تا مرڤاتیی دا، به‌لێ هه‌ر وه‌كو ل ده‌ف مه نه‌وه‌كو چو وانست و بیركاریێن ڤێ جیهانێ یه، خه‌لك ب زمانێ ماتماتیكێ پێشدكه‌ڤیت، به‌لێ ئه‌م پێ نقۆم دبین و دبینه تایتانیك!!، له‌ورا ژی ره‌وشا مه یا رێنگزه، ئه‌ز دبینم بیركاریا مه ب تایبه‌ت د دو پۆلینان دا یا بێسه‌روبه‌ره، ئێك سیسته‌مێ رێكخستنا هه‌ژماران، دو ژی نه‌بوونا چو خه‌وارزمیێن هزرێ یێن به‌رئاقل. هه‌لبه‌ت ئه‌ز به‌حسێ زانست و بابه‌تێن ئه‌كادیمی یێن خواندنگه‌هان و بیاڤێ په‌روه‌رده و فیرَكرنێ و سازیێن وێ ب خواندگه‌هان ڤه ناكه‌م، به‌لێ ئه‌زێ به‌حسێ سه‌روبه‌ر و ئه‌تیكێكت و قانوونێن ژیانا مه دكه‌م، برا هه‌ر وه‌كو چو قانوون حوكمی ل مه ناكه‌ن، به‌لكو كه‌س یێن بووینه قانوون و گێۆلێ وان قانوونه، ئه‌ڤجا سیسته‌مێ رێكخستنا هه‌ژماران دبیت گه‌له‌ك میناك د سه‌رێ وه دا هه‌بن، به‌لێ ئه‌ز ژی دێ ئێكێ ئینم و گه‌له‌ك دوور ناچم، هه‌ما دوهی ئه‌ز ل ئۆفیسه‌كێ بووم گۆتنه من هه‌ره ژۆرا هه‌ژمار (5)، به‌لێ ئه‌ز ژی ل دووڤ زنجیرا ماتماتیكێ چووم، سه‌حدكه‌مێ ئه‌زێ گه‌هشتیمه هه‌ژمارا (11) و من چو پێنچ نه‌دیتن، حه‌تا ب رێڤه پۆلیسه‌ك ل من تشقلی و نیشا من دای و ده‌ركه‌فت ل دووماهیا ئاڤاهی بوو، هه‌ر وه‌سا هه‌ژمارا (1) ل نیڤا ئۆفیسێ بوو، هه‌ر وه‌كو ته‌عبیه‌كرنا سه‌ركردێن عه‌سكه‌ری كو د زانستی دا هاتیه فه‌رمانده جهێ وی ل نیڤا گۆره‌پانا شه‌ری بیت، دا كۆنترۆلێ ل سه‌ر هه‌می هێزێ بكه‌ت، به‌لێ ئۆفیسێن سڤیل نه د عه‌سكرینه و نه د شه‌ری دانه. ئه‌ڤجا ماده‌م ناڤه‌رۆك ب هه‌ژماران یا رێكخستی نه‌بیت، بلا رۆخسار زنجیره بیت، تشتێ باش ئه‌وه جاران ئمتیازات و به‌خشین و پارڤه‌كرنا (كێكێ) ـ بلا بیت ـ (خال) ل به‌رچاڤ دئێنه وه‌رگرتن، كو ئێك ژ وان سالێن خزمه‌تێ نه، تشته‌كێ جوانه خزمه‌ت ل به‌رچاڤ بهێته وه‌رگرتن، به‌س ژبیر نه‌كه‌ین ڤایرۆس مه‌له‌ڤانیان د راستڤه‌كرنا خزمه‌تێ ژی دا دكه‌ت. مه گه‌له‌ك غه‌دره یا ل هه‌ژمارێن خوه كری، هه‌ژمارا ئێك مه دانایه سه‌ری و نیڤێ و دووماهیێ، هه‌ژمارا دو مه دانایه دووماهیا هه‌میان. هه‌ژمارا سفر مه‌دانایه سه‌رێ دیوانێ، سێ چوویه جهێ چارێ و هه‌شت هاتیه جهێ دویێ و ب ڤی ره‌نگی. سیسته‌مێ خه‌وارزمیاتان گه‌له‌ك تشته‌كێ حه‌كیمانه‌یه و بابوبیرێن مه گه‌له‌ك كه‌ڕه‌ده ل سه‌ر كریه و فه‌لسه‌فه و چه‌رخێن ره‌وشه‌نگیریێ ل سه‌ر هاتینه ئاڤاكرن، به‌لێ ب لۆژیكه‌ك و ب ده‌ستپاكی، مه ژی بۆ خوه كریه گه‌نده‌لی و هنده‌ك ئعتیباراتێن نه گونجای خستینه د ناڤ دا نه یێن هه‌مان تایبه‌تمه‌ندیێ نه، بۆ نموونه تو بهێی وه‌زیره‌كی بكه‌یه جۆكه‌ر هه‌ر پۆستێ بده‌یێ دروسته چه‌ندی بزانیت ناڤێ بنڤیسیت، چونكو د حزبێ دا یێ پیگیر و دلسۆزه، یان دابه‌شكرنا كێكێ ل سه‌ر بنیاتێ ده‌ڤه‌رێ و عه‌شیره‌تێ و به‌رژه‌وه‌ندیێن ته‌سك بدانی و پێ ل هه‌می قانوونان بده‌ی. واته هه‌ژماران ب بهانا خه‌وارزمیێ تێكبده‌ی و پشتی هینگی هه‌می بهه‌ڕفیت و ژ به‌ر ده‌ستێن ته بده‌ركه‌ڤیت، چونكو هێرشێن زانستی یێن ژنشكاڤه ژی هه‌نه، دهێن و هه‌كه هه‌ژماره د رێكخستی نه‌بن، كاره‌ساتێن مه‌زن ب سه‌ردا دهێن، وه‌كو كاره‌ساتا هاتنا ڤایرۆسێ داعش، یان په‌یدابوونا قه‌یرانێن ئابووری و تووشبوونا ئه‌وێن دزی كرین، كو پرانیا وان ب خه‌باتكه‌ر هاتینه دانان، نه‌ك ب (خصخصه) و (ما أدراك ما خصخصه)؟!.. هه‌كه شۆل یا دروست نه‌بیت، دێ كه‌ڤینه له‌پێن خوه و ئه‌م هه‌می دێ كه‌ڤینه شه‌رمێ و شه‌رم ژ هه‌ڤدو كه‌ین، نها كوردستان هه‌می یا كه‌فتیه شه‌رمێ و هه‌می شه‌رم ژ ئێكودو دكه‌ن، هه‌می قه‌رداێن ئێكن هه‌می كه‌فتینه و به‌ریك ڤالا بووینه و كه‌س ژی دلناده‌ت زێرێن ژنا خوه بفرۆشیت. ئاسایی یه ل ده‌ف خودانێ ماركێتێ بكه‌ته گری، به‌س فرۆتنا زێران ئه‌سته‌مه و خوه با د به‌ررا ناچیت. له‌ورا ئه‌ڤرۆ قه‌یرانه و نه قه‌یرانه!! ئه‌ز خه‌مدارێ چ مه خوه مامۆستایێ بیركاریێ ژی یێ ب مه ڤه شه‌پلی جامێری و نزانیت چاوا هه‌ژماران بێخیته به‌ر ئێك د سه‌رێ مه دا!!. چونكو هێشتا هێمایێ (=) ل ده‌ف مه نینه.
نووترين نووچه
- سەرۆك بارزانی ب گوهلێبوونا دەنگوباسێ مالئاڤاییكرنا ئیبراهیم گاباری خەمبار بوو
- ئامینا زكری: سەرۆك بارزانی ژێدەرێ باوەری و هێزا ئافرەتا كوردە
- رێككەفتن بۆ كڕینا پەترۆلا كوردستانێ هاتیە كرن و تنێ هنارتن مایە
- ژ ترسا كارڤەدانێن پارتی و بایكۆتكرنا هەلبژارتنان دێ بەغدا بڕیارەكێ ل دۆر مووچەی دەت
- هەرێما كوردستانێ بوویە پەناگەهەكا ئارام بۆ ئاشۆرییان
- نێچیرڤان بارزانی ل گەل شاندەكێ ئاشۆرییێن ئەمریكا كۆمبوو
- بۆ كونترۆلكرنا میلیشیایان ئیراقێ پێدڤی ب قانوون و دادگەهێ هەیە
- هەلبژارتن ل ئیراقێ گوهۆڕینان پەیدا ناكەن
- ئیراقێ پێدڤی ب دادگەهەكێ هەیە كو ب رێیا پشتەڤانییا مادەیا 92 یا دەستوورێ بهێتە دروستكرن
- سەركرداتی و حوكمەت و خەلكێ ئیماراتی هەردەم هاریكار و پشتەڤانێن كوردستانێ بوون
شیرزاد نایف
قانوونا ژ مه چێتركا!
ل ده‌سپێكێ (بسم الله.. ) دا كو ئه‌وێن دبێژنێ (ژ مه‌چێترك) یانكۆ ( ئه‌جنه ـ هه‌لامه‌ت، شه‌به‌ح. . هتد)، ژ مه تۆره نه‌بن و چو ته‌پا ل پشتا مه نه‌ده‌ن و مه دین نه‌كه‌ن! چونكو جوامێران مه چ ل گه‌ل نینه، به‌لكو به‌ره‌ڤاژی دڤێت سۆپاسیا مه بكه‌ن كو ئه‌م وان ددانین ژ خوه چێتر، هه‌ر چه‌نده ئه‌م هه‌ردو عه‌بدێن گونه‌هكارین، ئه‌ڤ ده‌سته‌واژه‌یا هه‌نێ به‌رێ پیره‌ژنان گۆتبوو، ب وێ مه‌ره‌مێ كو چو زیانان نه‌گه‌هیننه مه، به‌لێ مه‌ره‌ما مه د ڤێ گۆتارێ دا مه چو ل گه‌ل جوامێران نینه و دبیت ئه‌وان ژی قانوونا خوه هه‌بیت و ژ مه نه‌زیهتر بن، به‌لكو ئه‌و جاران دبوونه عه‌فریت و مرادێن مرۆڤان ب جه دئینان چو ب خه‌رافه بیت یان دروستی، ئه‌ڤه نه مژارا مه‌یه، به‌لێ جۆره‌كێ دی یێ مرۆڤان ده‌ركه‌فتیه ئه‌ڤ هه‌مان ناڤ ل سه‌ر دهێته سه‌پاندن، كو ئه‌ون یێن (موسته‌سنی) كو ل سه‌ر قانوونێ دانه و چو قانوون ژێ ناگرن، هه‌كه ژی دربه‌كی ل پشتا مرۆڤی بده‌ن ب راستی یان دێ مرۆڤی جه‌لاد كه‌ن یا خه‌لات كه‌ن، كو ده‌ستێ دلۆڤانیێ ل سه‌ر مرۆڤی دا بیننه خار و مرۆڤی بكه‌نه هه‌می تشت، یانژی دێ مرۆڤی شێت كه‌ن به‌رده‌نه كولانێن پشتێ (بلا بیت)، ئه‌ڤ جۆره كه‌سه ئه‌م چاوا دبینن؟ و چاوا ده‌ستنیشان بكه‌ین، كو چه‌ندین قانوونێن ل وه‌لاتێ مه ده‌ربكه‌ڤن، دێ وه‌سا خۆشكه‌ن، به‌حشت دێ ئێته ده‌ڤێ مه و دێ گه‌له‌ك پێ شاد بین، به‌لێ ل دووماهیا بریاران، ته هند دیت، بڕگه‌كێ هنده‌ك كه‌س خستنه ل ده‌رڤه‌ی بازنه‌ی كو ئه‌و چێترن ژ یێن دیتر، یا نكو ژ بلی فلانی، من چو كه‌سێن ده‌ستنیشانكری نینن و بلا كه‌س ژ هه‌ڤالێن خۆشتڤی گومانێ نه‌به‌نه ده‌ف خوه، ئه‌زێ ب گشتی دپه‌یڤم و زمانێ جادێ دكه‌مه قۆچ، به‌لێ هه‌ر كه‌سێ بهێته لادان ژ قانوونێ وێ رامانێ دده‌ت كو ژ یێن ئاسایی چێتره و وه‌لاتیێ پله ئێكه، دوور نینه ئه‌ز بخوه ژی جاران بكه‌ڤمه د وێ خانێ دا یا ژ مه چێتركان. چو قانوون ژ یا مرنێ جانتر نینن، ل پرانیا وه‌لاتان قانوونا له‌شكری هه‌یه بۆ نموونه وه‌كو ئه‌ڤێ قانوونێ یه، دبێژن كورێ وه‌زیری و كورێ فه‌قیری د ئێك قانوون دانه و كه‌س ژ یێ دی چێتر نینه، چاوا كفن و چاوا فه‌رش و ئاخ، هه‌ر وه‌سا ژی به‌دلا خاكی و پوستال (دوور ژ روویێ خوانده‌ڤانێن رێزدار)، وه‌كو پاپه‌لیسكا سه‌ركه‌فتنێ ئێك ل پشت یێ دی یه، به‌لێ دبیت ل هنده‌ك وه‌لاتێن مینا عیراقێ ئه‌ڤ بیاڤه نه‌هاتبیته كۆنترلكرن، ژ به‌ر نه به‌رقه‌راریا سیاسی و جڤاكی و مرۆڤاتی و. . هتد. له‌ورا قانوونا له‌شكری یا جانه و كه‌س ژ كه‌سێ چێتر نینه، ته‌نانه‌ت د قانوونا سڤیل ژی دا ژ بلی مافێن كه‌ساتی، هه‌ر دیسا یێن مافێن گشتی ژی هه‌نه، قانوونا عورفی ل هه‌می جیهانێ سه‌ره‌وه‌ره هه‌كه چو ده‌ستوور و قانوونێن دانایی ل به‌ر ده‌ست نه‌بن، ل سه‌ر بنه‌مایێ ره‌وشتی دهێته گێران، یانكو د ناخێ وژدانا هه‌می ئۆل و گرۆپێن مرۆڤان دا هه‌یه تشته‌كێ وه‌سا هه‌یه، د شه‌ریعه‌تێ ژی دا هه‌كه چو تشتێ دانایی نه‌بیت، مرۆڤ قانوونه، كو هه‌می مرۆڤ د وه‌كهه‌ڤن، كه‌س ژ یێ دن چێتر نینه، ئه‌ڤ ره‌وشته ل جه‌م ملله‌تێ مه یێ كورد د كه‌ڤن دا هه‌بوویه، كه‌سێن مه‌زن و زه‌لامیێن ئایینی گه‌له‌ك ده‌روونا خوه نزم دكرن بۆ بده‌ستڤه‌ئینانا دلۆڤانیا خه‌لكێ خوه و سه‌پاندنا قانوونێن جوان ل سه‌ر وان دا ئێكودو نه‌خۆن، بۆ نموونه بابێ نه‌ته‌وا كورد مسته‌فا بارزانی هه‌رده‌م پشته‌ڤانێ فه‌قیری بوو و چو كه‌س نه‌بوون د موسته‌سنی، ده‌مێ فه‌رمۆتی: هه‌می كه‌س دێ گه‌هنه مافێن خوه به‌س ئه‌ز و فه‌قیر دێ مینین. ب دروستی ژی گیانێ پاكێ وی نه‌شیا ب كوردستانه‌كا سه‌ربه‌خوه شاد ببیت. به‌لێ ئه‌م و قانوونێن مه هاریكاریا ده‌سهه‌لاتێن خوه ناكه‌ین و ژ مه‌چێتركا ژ ئه‌زمانسۆركا چێدكه‌ین!، ئۆمێده‌وارین كو ژ مه‌چێترك ئه‌ڤ په‌یڤا (كاف) ژێ ڤه‌نه‌بیت و نه‌بیته چێتر هه‌كه دێ بنه ده‌یناسۆر و حێشتر!.. هه‌ما دێ مه‌خۆن و مه كه‌نه ژ هه‌میان خرابتر!!.
كه‌نیا وه گریا مه‌یه!!
چه‌ندی ببینین ل ده‌مێ سه‌ره‌دانێن فه‌رمی یێن مه‌زنه‌به‌رپرس و وه‌زیرێن ده‌رڤه و هنارتیان و سه‌رۆكان، چ به‌ڤل بن یان دۆست بن، ل ده‌سپێكێ و ل دووماهیا هه‌ڤدیتنان، دێ چنه ده‌ستێن ئێك و وینه‌یان گرن و بۆ چاڤكێن كامیرا كه‌نه كه‌نی و ته‌ماشه‌ی مه كه‌ن و ب مه كه‌نن، سه‌ره‌رای وێ خینا هاتیه رێتن ئه‌و برسا وه‌لاتیێن هه‌ژار دیتیی و ده‌رده‌سه‌ری ب سه‌رێ خوه، یان بۆ چه‌ندین سالان شه‌روشه‌ماته و كورێن مه خینا خوه رێتین شه‌هید بووین، باشه دێ چو ب رووی دایك و هه‌ڤژین و خێزانا وی شه‌هیدی به‌رێ خوه ده‌ته نووچه‌یان؟! دیمه‌نه‌كێ خه‌مگینه، دێ بێژن فلان هاته فلان وه‌لاتی هه‌ما دێ هه‌می ئاریشه و قه‌یرانان چاره‌سه‌ر كه‌ن، چونكو چوونه سه‌رێ ئێكودو و وێنه ل گه‌ل ئێك گرتن و ب مه كرنه كه‌نی!!، ڤێجا دۆلار دێ هێته خار یان بازار دێ لڤیت چونكو فلانی ئاخفت یان گرنژی یان پێكه‌نین بۆ هه‌ڤ گۆت، به‌لێ ته هند دیت پشتی كابرا به‌رێڤه دبیت و پشتا وی دكه‌ڤیته لایه‌نێ لێ بوویه مێهڤان، هه‌ما نه ئه‌و سیك و نه ئه‌و بازار و به‌لكو سه‌روژنوو دێ قه‌یران ده‌سپێكه‌ن و دلته‌نگی بۆ خه‌لكی په‌یدا بیت و بێزار بن. دبیت خوینده‌ڤانه‌ك هزر بكه‌ت كو ئه‌ڤه تشته‌كێ نۆرماله ما خوه‌نه نه‌چنه ده‌ستێن ئێك؟!، وه‌یه به‌لێ هه‌ر تشته‌كی راده‌یێ خوه هه‌یه، نه‌چه سه‌رێ وی و هه‌مبێز نه‌كه، هه‌ر وه‌كو مه‌سعود بارزانی گه‌له‌ك جاران بۆ سه‌ره‌دانا به‌غدا و دانوستاندنان سه‌دام هه‌مبێز نه‌دكر ب تنێ د چوو ده‌ستێ وی چونكو ئه‌و بخوه ب سروشتێ خوه و هه‌می ژی دزانن كو حه‌زژ ماچانێ ناكه‌ت، ئه‌ڤه بۆ نموونه كو هه‌ر تشته‌كی ژیوارێ خوه هه‌یه، یانژی نابێژم هه‌كه سه‌دام روویێ خوه نێزیك كربیت ب زۆری چووبیته سه‌ری ئه‌و تشته‌كێ جودایه و هه‌می تشت دیارن، رۆخسار دپه‌یڤیت، به‌لێ ئه‌وی هزرا هه‌ستا كوردستانیان دكر و ئه‌و به‌لا و سته‌مێن ب سه‌رێ وی و خه‌لكێ كوردستانێ دئینا، گه‌له‌ك جاران ژ بۆ چاره‌سه‌ركرنا گه‌له‌ك ئاریشان جوامێری نه‌چار دبوو ل گه‌ل هنده‌ك كه‌ساتیێن بێخێر دروونشت و ل سه‌ر خوه قه‌بیل دكر ل گه‌ل بجڤیێت، ب تنێ بۆ به‌رژه‌وه‌ندیا ڤی ملله‌تی. ئه‌ڤجا ب راستی باره‌كێ گرانه به‌رپرساتی كو مرۆڤ بدانیته سه‌ر ملێن خوه و ئه‌ته‌كێتێن سه‌ره‌ده‌ریكرنێ گه‌له‌ك د هه‌ستیارن پێدڤی بهێنه خواندن ژ لایێ سه‌ركرده و وه‌زیران ڤه كو ل سه‌ر هشا خوه بن و هه‌می ئۆپشنان ل به‌رچاڤوه‌ربكرن، راسته ته چو ل گه‌ل فلان لایه‌نی یان كه‌سی نینه، به‌لێ وه‌لاتیێ ساده تووشی هه‌سته‌كا ده‌روونی دبیت، كا چاوا فلانی كورێ من كوشتیه و خوینا وی ب ده‌ستێن فلان وه‌لاتی ڤه‌یه، وه‌زیرێ من یان سه‌رۆكێ من دێ وی هه‌مبێز كه‌ت و ماچی كه‌ت ل به‌ر چاڤێن من چنكو (كلكم راع و كلكم مسۆول عن رعیته) هه‌كه دۆستی َمن ببیته دۆستێ دوژمنێ من، ئه‌و ژی د خانه‌یا دژاتیێ دایه، ئه‌ڤه دبیته هه‌ستا وی چونكو ئه‌و وه‌لاتیێ ساده‌یه و دڤێت ژ به‌رپرسێ خوه دلۆڤانیێ پێ ببه‌ت، ئه‌و دبینیت ئه‌و بخێرهاتن و سه‌رده‌ریكرنا رۆخساری و گۆتنا پێكه‌نینان و تیقتیقا مه‌زنه به‌رپرسان، مرۆڤ دبێژیت چو نه‌قه‌ومیه و چو ئاریشه و قه‌یران نینن، دێ بینی جڤینه‌ك ل سه‌ر نه‌بوونا مووچه‌یه یان قه‌یرانه‌كێ و كولبه‌كێ، به‌لێ هه‌می قات و ریبات یێن چووینه هۆله‌كا حه‌فت ستێر و یێن دكه‌نن و پێكه‌نینان دبێژن و مێڤانداریه‌كا درێژ شیفخوارنه‌كا مه‌زن نه سه‌رێ دیار و نه بن، دێ وه‌سا گرنژن و كه‌نه كه‌نی هه‌ر وه‌كو ئه‌م پوولێن شه‌تره‌نجێ مه دئینن و دبه‌ن، ئه‌م یێن ل سه‌ر سَیلا سۆر ئاریشێن مه یێن فیریاین عه‌یالێ مه ژ ده‌ستێن مه ده‌ركه‌فت ژ برسان، هیڤیێن مه ل به‌ر چاڤێن هه‌وه‌نه، ئه‌م یاریان ناكه‌ین، ئه‌ڤه پرسه‌كا ژدله، پێكه‌نین و كه‌شخه گیزن ل سه‌ر دلێن مه دئێنه شكاندن له‌ورا كه‌نیا وه گریا مه‌یه!!.
بێ مه‌عنه!!
ره‌وشت و سیمایێن ملله‌تان د زمان و ئه‌ته‌كێتێن وان دا دیار دبن، تشتێن كرێت هه‌می ده‌مان ناهێنه گۆتن، هه‌كه بهێنه گۆتن ژی ل سه‌ر مژارا بابه‌تێ گه‌نگشێ دراوه‌ستێت، یانژی هه‌كه په‌یڤ یا ره‌پ و ریت بیت، واته رامانا گۆتنا وێ په‌یڤێ هه‌كه یا حه‌رفی بیت، ئه‌و په‌یڤ دهێته پژاندن و رامانه‌كا به‌حت دده‌ت، دمینیته ل وێرێ سه‌رجه‌مێ ئه‌و گوهێن گوهدده‌نێ كا (انگباعا) وان ل سه‌ر چیه و چو تشت بۆ دلێ وان حه‌سه‌ره‌ته، ب مخابنی ڤه دبێژم، پرانیا خه‌لكێ مه گوه و چاڤ و هه‌ستێن وان ل تشتێ سكسی دگه‌ریێن و كولا دلێ وان هه‌ما حیزاتی یه (هه‌كه ئه‌م د راستگۆ بین)، دیسا ژی ب مخابنی ڤه، تشتێن گرێدای بیاڤێ سكسی گه‌له‌ك ناڤ هه‌نه، واته ئه‌م د بیاڤێ سكسی دا د زه‌نگینین ب زمانی، ئێك تشتی گه‌له‌ك په‌یڤێن (مرادف) هه‌نه، دبیت ژی ئه‌ڤ بیاڤه نه ب تنێ د ناڤ مه‌دا یێ سه‌رگر بیت و ده‌ڤه‌را رۆژهه‌لاتا ناڤین یا ب ڤی بیاڤی ڤه یا گرێدایی بیت، هه‌ر وه‌كو هه‌لبه‌ستڤانێ سووری نه‌زار قه‌بانی دبێژیت، هه‌می كاروبارێن مه یێن گرێدای گۆرا ژنكێ بووین.. له‌ورا ده‌مێ ئه‌م دپه‌یڤین هه‌ما به‌س به‌رێ مه یێ لێ كا دێ چو مه‌عنا دده‌ت، له‌ورا هه‌ر تشتێ ژ ده‌ڤێ مه ده‌ركه‌ڤیت دێ بێژین: بێ مه‌عنه!!.
گه‌له‌ك جاران مرۆڤی های ژ چو مه‌عنا نینه و دلێ مرۆڤی یێ پاكه، به‌لێ ژ به‌ر ڤێ گۆتنێ ژ نوو ب مه‌عنا دكه‌ڤیت، پتریا په‌یڤان ل ده‌ف مه ب تیفكلن، خوه ئاڤ و با و خوارن ژی ب رامانن، جاران دڤێت هه‌ما چو نه‌بێژین هه‌كه بێژین ژی دێ هزرێن خراب ژ مه هێنه وه‌رگرتن، هنده‌ك په‌یڤ و په‌یڤین هه‌ما هاتینه ژێبرن و كه‌س نه‌شێت بینیت، ئه‌م نه‌چار دبین ل هزار مورادفێن دیتر بگه‌ریێن دا هه‌تكا مه نه‌چیت، ب تایبه‌ت ژی بۆ ژنان هه‌تكا گۆتنا ڤان په‌یڤان هه‌ما ب دوجاركی یه، چونكو ژن ل ده‌ف مه بوونه‌وه‌ره‌كێ هاڤی یه و گۆهێ مه یێ لێ كا دێ چو شاشی كه‌ت دا ب چاڤێن خراب به‌رێ خوه بده‌ینێ و ئه‌م لێ ب هه‌جه‌تین. بۆ نموونه جاره‌كێ ئه‌ز ل دیوانه‌كێ بووم، هه‌ردو ره‌گه‌ز لێ بوون، مژار ل سه‌ر (جێنده‌ری) یێ بوو، جوداهی د ناڤبه‌را ژن و زه‌لامی دا، من ژی پشكداری كر و من ڤیا پشگیریا ژنان بكه‌م كو ئه‌وان ئیراده‌كا ب هێزتر هه‌یه ژ زه‌لامی، من ژی ب دله‌كێ پاك و ب ده‌نگه‌كێ بلند گۆت: نه‌خێر ژن جاران ژ زه‌لامی ب هێزتره و ژنێ تشته‌كێ هه‌یی زه‌لامی نینه.. . هوون د زانن ئه‌و چیه؟! هێش من نه‌گۆتی هنده‌ك ژنان سه‌رێ خوه چه‌ماند و ده‌ركه‌فتن و ژ بنڤه گرنژین و زه‌لامان ژی كه‌نین، ئه‌زی ژی یێ ل سه‌ر حه‌مدا خوه به‌لێ من تمام كر په‌یڤین و من گۆتی: ئه‌و تشت ژی ئیراده‌یه و ئیرادا ژنێ هه‌كه بگه‌هیته گوپیتكان ژ زه‌لامێ زێده‌تره، به‌لێ سوحبه‌تا من ما ب رێڤه و هه‌تكا من چوو و من چو نه‌گۆتی.. ما ئه‌ز دكارم ل به‌ر خوه ب راوه‌ستم، دا خێره‌كێ كه‌م به‌لێ بیێ من زمانی غه‌دره ل من كر!! به‌لێ تشتێ سه‌یر ئه‌و بوو كو ئه‌ز د ناڤ هه‌میان دا ب ره‌وشتی و په‌یڤینێن شرین یێ به‌رنیاس بووم.. هه‌ڤاله‌كێ مه ژی جاره‌كێ ل دۆر مژارا لێنانێ به‌حسێ چاوانیا بژارتنا سینگێ مریشكێ بۆ كارمه‌نده‌كێ دكر، گۆتێ ل ده‌سپێكێ دێ سینگێ خوه ئینیه ده‌رێ و دێ عه‌سلی شۆی،، كه‌سه‌كێ دیتر ژی یێ سه‌خته‌چی به‌ردا كه‌نیێ و گۆت جان باخڤه كورۆ !!كابرا ژی َیێ دلپاك. .. باشه گونه‌ها كێ یه. . یا من یان یا وی یان یا زمانی؟.. !!!.
گومان راستیێ ب هێزدئێخیت به‌رسڤه‌ك بۆ هشیار رێكانی
چه‌ند تێبینیه‌ك ل سه‌ر گوتاره‌كا من ژ گۆشا حه‌فتیانه یا “قۆچ” د هژمارا چوویی هاتینه نڤیسین ژ لایێ رۆژنامه‌ڤان “هشیار رێكانی”ڤه، جوامێری (650) په‌یڤ نڤیسینه، ژ سه‌رجه‌می (205) په‌یڤ كۆپی و پێست ژ تێكستێ من پێ پركریه. ل ده‌سپێكێ دێ ژ دووماهیێ ده‌سپێكه‌م چونكو ب راستی ب قه‌له‌مه‌كێ بێسه‌رۆچاڤ قۆچانێ ل گه‌ل من كریه و نه‌ك ل گه‌ل تێكستێ من. كه‌كێ رێكانی دبیت تێبیینێن ته هنده‌ك د جان بن و ته ئه‌ز ب دیتنا خوه رازی كربام، به‌لێ ل دووماهیا مژارێ ته نه‌هێن من ب سه‌ر ده‌هێن خوه ئێخستینه، ده‌مێ ته گوتی من نه‌ڤێت سه‌رێ وه گێژكه‌م، چنكو ل ته ناڤه‌شێرم ژ به‌رێ وێ برینداركرنێ یا ته گوتێ “ئه‌و بخوه ژی نزانیت چو دبێژیت” ب درستی ژی ئه‌وا من دزانی ژی ته ژبیرا من بر، چونكو په‌یڤا “نه‌زان” بۆ مرۆڤان دهێته گوتن و نه‌ك بۆ ناڤه‌رۆكا تێسكتی. كه‌كێ رێكانی ئه‌ڤه دیتنا ته‌یه و دیتنا ته ژی نه دستووره، بۆ نموونه نابیت هه‌ر تشتێ تو دبێژی واته هه‌می رێكانی وه بێژن!! یانژی ئه‌ز دبێژم تو د هنده‌ك هه‌لبه‌ستێن خوه دا نزانی چو دبێژی یان هه‌ر قۆچه‌كێ ل كه‌نداله‌كی دده‌ی، باشه ماده‌م تو هۆسا یێ زانای ل سه‌ر زمان و دیرۆكان، بۆچی ته نه دنڤیسا؟! هه‌ر چه‌نده پێزانین د زۆرن چه‌ندی مامێ گۆگل هه‌بیت، به‌س ئه‌وا من نڤیسی ب تنێ مژارێن ل سه‌ر جادێ نه كا خه‌لك چاوا دپه‌یڤیت، ماده‌م رۆژنامه یا لۆكاله. باشبوو هه‌یڤا ل بن عه‌وری ده‌ركه‌فت و پشتی چه‌ندین سالان من گوتاره‌كا ته دیته ڤه چونكو ئه‌ڤه پێنچ هه‌تا شه‌ش ساله د ئه‌ڤرۆ و وار دا ئه‌ز كار دكه‌م، به‌لێ دو حه‌تا سێ جاران نڤیسنێن ته من نه دیتینه، به‌لێ تشتێ من كه‌یف پێ هاتی باشبوو ب ئێكه‌م قۆچ من تو كێشایه د مژاره‌كا هۆسا پیرۆز دا و بیرا ته ل نه‌ورۆزێ ئینا ڤه. ل دۆر ئێكه‌م تێبینی” نوو” بیت یان “نی”، ئه‌ڤه ل سه‌ر ده‌ڤۆكا مه دراوه‌ستێت و ئه‌ز یێ بۆ دهۆكێ دئاخڤم چونكو (زمانحالێ لۆكاله). ل دۆر تێبینیا دویێ و پیتا (ز) و (ژ) مانێ ئه‌ز ژی یێ وه‌دبیژم، په‌یڤا”رۆز” فارسی یه نه‌ك كوردی یه، ل ئیرانێ ژی جه‌ژنا نه‌ورۆزێ هه‌یه و 14 رۆژان بێهنڤه‌دانه. ل دۆر مژارا ئالایی و بیست و ئێك تیشكان ژی په‌یوه‌ندی هه‌بیت یا نه‌بیت هه‌ر وه‌لێدهێت، كه‌چه‌ل حه‌سه‌ن. . حه‌سه‌ن كه‌چه‌ل. تێبینا دیتر ته گوتی كو جه‌ژنا هه‌موو گه‌لێن ئاری یه، به‌لێ كه‌كێ رێكانی جه‌ژنا رۆژهه‌لاتا ناڤین هه‌میێ یه، بۆ نموونه ل ده‌ف عه‌ره‌بان ژی (جه‌ژنا داروباری یه). هه‌ر دیسا ل دۆر مژارا گومانێ یا ژ من ڤه بلا ئه‌م د ژیوار بین، گومان راستیێ ب هێز دئێخیت، به‌س ماته ژی گومان نینه كو ئه‌ژده‌هاكی دو مارێن ئه‌ژده‌هاك ب ملێن ویڤه بوون و رۆژێ دو مرۆڤ بۆ وی سه‌رژێدكرن مێشكێ وان دخار دا ئه‌و مار ته‌نا ببن ل دووڤ راسپارده‌یێن ئه‌هریمه‌نی؟.. خوه زارۆیه‌ك ژی ئه‌ڤێ باوه‌ر ناكه‌ت. كه‌كێ رێكانی دبێژیت من گه‌له‌ك مژار تێكهه‌ل كرینه، دبێژمێ ماده‌م بابه‌ت دیرۆكه ئه‌م دكارین كیمیا و فیزیایێ ژی تێكهه‌ل بكه‌ین. مژارا كاوه‌یی ژی گومان تێدایه مه‌ره‌ما من وه‌كو قاره‌مانێ ئه‌فسانێ هه‌كه یێ كورد با دا ب وی ناڤی راگه‌هینیت، به‌لێ گومان هه‌نه كو ئه‌و فارس بوو، به‌لێ تو یێ وێ گومانێ رادكه‌ی كو كورد و فارس ئێك بوون به‌لێ یێن ژێكڤه‌بووین، هه‌ر وه‌كو (ابن ته‌یمیه) نه‌ژادێ كوردان ب نه باشی ڤه‌گه‌رینیت بۆ سه‌ر ب فارسان ڤه، (من نه‌ڤێت ئه‌وێ بێژم)، سه‌ره‌رای وێ ئێكێ كو دیرۆكێ گه‌له‌ك غه‌ده‌ره ل كوردان كریه, میناكا سه‌لاحه‌دینێ ئه‌یۆبی ژی و ناڤێ عرۆبه‌تێ ـ برایێ رێكانی ـ مانێ دو مژارێن وه‌كو ئێكن، هه‌ردو قاره‌مانێن كوردێن دیرۆكینه، له‌ورا من به‌حس ژێ كریه، نه‌خاسمه كورد ژێ دتۆره نه، پشتی هینگی گوتنا سه‌دامێ گۆر به‌گۆر مه ئینایی، مه‌ره‌ما من پێ ئه‌و بوو (اژا جائتنی ژمه الناقص فاشهد انی كامل)، رێكانی ئه‌ز نه وه‌ك ته‌مه یان پشتا ئێكی بگرم یان ره‌خنێ لێ بگرم، دخوازم ب كه‌تواری باغڤم، نه مه‌دحێن وان بكه‌م و نه‌پاڤێژمێ هه‌كه یێ خراب بیت بۆچی ئه‌و ره‌فتار دكرن و هه‌كه یێ باش بیت بۆچی ئه‌ڤ گازنده ل سه‌ر هه‌نه؟! ل دووماهیێ ژی سوپاسیا ته دكه‌م كو ته ئه‌ز ب ره‌خنا خوه پله‌كێ بلندكرم.
نه‌ورۆز یان نیرۆژ؟!
هه‌ر وه‌كو ره‌ه و رووشالێن ڤی په‌یڤا رۆژ بۆ وێ ئێكێ دچن كو رۆژه و نه‌ك رۆز، نه‌خاسمه د هه‌می ده‌ڤه‌رێن كوردستانێ دا (ژ) ب زه‌حمه‌ت دبیته (ز)، به‌لێ ده‌مێ ناڤێ نه‌ورۆزێ دهێته بهیستن، ئێكسه‌ر ناڤێ كوردان ژی دهێته بیرا خه‌لكی، هه‌ر وه‌كو ئه‌ڤ بیرهاتنه دلێ پیرۆزیێن كوردانه، چونكو خوه د نیڤا ئالایێ كوردستانێ دا تیرۆژكێن رۆژێ بیست و ئێكن، ئه‌ڤه نیشانا وێ ئێكێ یه كو ملله‌تێ كورد ژ كه‌ڤن دا تووشی ده‌رده‌سه‌ری و سته‌م و چه‌وساندنێ بوویه، پاشی رابوویه و سه‌رهلدایه، نه‌ورۆز ژی ئه‌و مه‌زنه هه‌لكه‌فته یاكو كوردان بۆ خوه كریه نیشانا هه‌بوونا خوه، ئه‌ڤه هه‌می تشته‌كێ جوانه و بلا جهێ شانازیا مه هه‌میانه، به‌لێ مه پسیارا خوه كریه، كا چه‌ند ئه‌ڤ ئه‌ڤسانه یا راسته یانژی خه‌رافی یه، ئه‌رێ راستیه‌كا زانستی بۆ ڤێ ئێكێ هه‌یه و ئه‌و چو ژێده‌رن یانژی هه‌ما تنێ چیڤانۆكێن داپیران بوون ل به‌ر تاریا شه‌ڤێن تاری بۆ نه‌ڤیێن خوه دگۆتن ل گه‌ل هاتنا پیرهه‌ڤیر و ئه‌زمانسۆركان دا زارۆیێن خوه پێ بنڤینن، بۆچی ئه‌م ب گومانین ل سه‌ر ڤێ پیرۆزیێ؟! ما چێدبیت جه‌رگێ پیرۆزیێن ملله‌ته‌كی گومانه‌ك تێدا هه‌بیت؟! هه‌می ئاماژه بۆ لایه‌نێ فارسی دچن، كو ئه‌ڤ بۆیه‌ره (ئه‌و ژی هه‌كه راست بیت) ل وێرێ روودایه، چونكو فارس ژی ئه‌ڤێ بیرهاتنێ بۆ خوه دبه‌ن، به‌لێ نه ب وێ سه‌رگه‌رمیا مه كوردان، ژ به‌ر وێ په‌یڤارۆژ، یان تو بێژی ئه‌و یا هاتیه فارسیكرن (نابێژم ته‌فریسكرن دا نه‌هێـته عه‌ره‌بكرن ((نه‌ك ته‌عربیكرن)).. )؟! هه‌كه نه‌هاتبیته فارسیكرن ژی ب ره‌نگه‌كێ ئۆتۆماتیكی دێ ته‌فریس بیت، چونكو زمانێ پرانیێ یه ل وێ ده‌ڤه‌رێ، ئه‌ڤ هه‌لكه‌فته ل هه‌می دونیایێ هه‌یه، به‌لێ ب هنده‌ك ناڤێن دیتر، چونكو جه‌ژنه‌كا سروشتی یه و كۆده‌تایا بوهارێ یه ل سه‌ر زڤستانێ، ئاگر هه‌لكرن ژی ئه‌و ب خوه هه‌لدبیت ل وی ده‌می چو سپلێت و سوپێن عه‌شتار نه‌بوون، مرۆڤ ڤان رۆژان بده‌ركه‌ڤیته چۆلی ئێكه‌م پێنگاڤ دێ ژ سه‌رما دا ئاگری هه‌لكه‌ت چونكو سه‌رمایا بوهارێ باوه‌ری پێ ناهێته كرن و بژاتنا گۆشتی و تكه‌ی سه‌رێ خوه دخۆت، یا ژمن ڤه هه‌كه ئه‌ڤ هه‌لكه‌فته وه‌كو پیرۆزترین پیرۆزیێن ڤی ملله‌تی كو د نامه‌یێن زانستی دا و قوتابیێن زانستی ماسته‌ر و دكتوریێ ل سه‌ر دروست بكه‌ن پتر گرنگی پێ پێته دان، دبیت ژی گه‌له‌ك كه‌سان چێكربیت، هه‌كه ئه‌نجامه‌كێ زانستی ده‌ربێخیت ژی دێ ئه‌و په‌یام د دیرۆكێ ژی دا جهێ خوه گریت، به‌لێ دوور نینه ئه‌ڤ پیرۆزیا هنده‌ك پیرۆز جهێ نه‌خۆشیا گوهێن مامۆستا و قوتابیێن زانكۆیێن مه بیت و گوهێن خوه بگرن ژ چێكرنا بابه‌ته‌كێ وه‌كو ئه‌ڤی بۆ زانستیكرنێ و ب تایبه‌ت یێن پشكا دیرۆكێ. به‌لێ تشتێ مرۆڤی ته‌نا دكه‌ت، ئه‌وه كو ئه‌ڤ جۆره ره‌خنه‌یا ئه‌ز نوكه ل ڤی بابه‌تی دكه‌م وه‌كو پیرۆزترین پیرۆزی تشته‌كێ گه‌له‌كێ نۆرماله و دوور نینه پتریا ملله‌تی ترانێن خوه ب ڤێ ئه‌فسانا كاوه و زۆحاكی بكه‌ن، نه‌مازه هنده‌ك ل سه‌ر جادێ به‌ره‌ڤاژی ڤێ ئه‌فسانێ ڤه‌دگێرن كو زۆحاك كورد بوو و كاوه فارس بوو و هه‌كه خیره‌ك د سه‌رێ كاوه‌ی د ابا بلا ئه‌و پیتا (ز) كربا (ژ)، وه‌كو سه‌لاحه‌دینێ ئه‌یۆبی ژی ب ناڤێ عرۆبه‌تێ دونیا هه‌ژاندی، دبیت جوامێری ئه‌وی ژی عورزا خوه هه‌بیت كو هینگی ناڤێ ئیسلامێ سه‌رپشكا هه‌می تشتان بوو، به‌لێ سه‌دام حوسێن ژی جاره‌كێ گۆتبوو كو سه‌لاحه‌دینێ ئه‌یۆبی گۆتبوو ئه‌ز عیراقیمه و پتر ژ كوردینیا خوه ئاماژه كربوو، به‌لێ هه‌ر دمینیت كو كورد كه‌سه‌كێ ب هێزه و حه‌ز ژ چه‌كی دكه‌ت، له‌ورا ژی خه‌لكه‌كی په‌نا دبره چه‌تییێ و زوو د سه‌ردا دچوون ژ لایێ وه‌لاتێن زلهێز ڤه كو كوردان ل دژی هه‌ڤ چه‌كدار بكه‌ن!! كو دزانن تاكێ كورد مراد و حه‌زێن وی چه‌ك و ره‌ختن و حه‌ز ژ زۆرانبازیێ دكه‌ن، چونكو راسته د رامانا خوه دا ئه‌و چه‌ته‌یی جاشاتی بوو، سه‌رۆكێن بیانیان یاریێن خوه پێ دكرن، به‌لێ هنده‌ك تشتێن رۆخسار د پاراستن وه‌كو جلوبه‌رگ و تایبه‌تمه‌ندیێن كورده‌واری، جاران ژی كۆده‌تا ل سه‌ر ده‌سهه‌لاتان دكرن، وه‌كو سه‌رهلدانا نوتان، وه‌كو سووارێن حه‌میدی و. . هتد، ئه‌ڤ پیرۆزیا نه‌ورۆزێ ژی ب گه‌رمی دهاته ساخكرن، هه‌می لایه‌نێن كوردی دكره یا خوه، نوكه ژی داعشان ئه‌ڤ پیرۆزه ل مووسلێ قه‌ده‌غه‌كریه و ئاگرهه‌لكرن كریه په‌ریستن، هه‌ر وه‌كو سه‌دامێ خوینمێژ رێز ل ڤێ پیرۆزێ دگرت به‌لێ داعشان ئه‌و په‌رژان ژی په‌لخاند و هه‌می كه‌رب و زكره‌شیا خوه دانا سه‌ر به‌ركێ و خوه‌دێ دزانیت، كا پشتی زوحاكی و سه‌دامی و به‌غدادی كی دێ هێت و سته‌ما خوه ل سه‌ر مه دارێژیت به‌لێ كه‌س ژ وان نه‌شێت ئاگرێ نه‌ورۆزێ ڤه‌مرینیت؟!
هه‌كه تو نه‌بایی چێنه‌دبوو!!
كورت و كرمانج یا ژ منڤه په‌یاما من گه‌هشت، خوانده‌ڤان د هه‌می مژارا من گه‌هشتن كا ئاریشه د كیڤه‌دایه، بلا خوانده‌ڤانێ خۆشتڤی بریارێ ل سه‌ر ڤێ رسته‌په‌یڤێ بده‌ت و بۆ خودێ و بۆ وژدان باخڤیت، ئه‌رێ یا دروسته ئه‌ڤ په‌یڤینه یان نه؟!، ئه‌ڤجا چیرۆكا سیناریۆیا ڤێ رستێ هه‌میێ باوه‌ر بكه‌ن، ئه‌ز هه‌ردو مرۆڤا نانیاسم یێن وه‌گۆتینه ئێكودو، به‌لێ ئه‌زێ روونشتی بووم ل پرسگه‌ها ئۆفیسه‌كێ، دو مرۆڤان خاترا خوه ژ هه‌ڤ دخواست و جوامێرێ كارمه‌ند ل دووڤ مێڤانێ خوه یێ (مراجع) را ده‌ركه‌فتبوو، خاترا خوه ژێ دخواست، پشتی شۆلا وی ته‌مام بووی، تشته‌كێ جانه بلا دابونه‌ریت و رێزگرتنا په‌روه‌ردا كوردینی هه‌بیت، به‌لێ هاته گوهێ من پتر ژ شه‌ش جاران مێهڤانێ وی دگۆتێ: (هه‌كه تو نه‌بایه معامه‌لا من چێنه دبوو)!!. . و ئه‌ز گه‌له‌كێ ممنونی ته‌مه و چاڤێ ته ماچی دكه‌م.. .. باشه پا یێ ئه‌وی كارمه‌ندی نه نیاسیت چو بكه‌ت؟!، هه‌ما كه‌سه‌كێ نورمال بیت، واته معامه‌لا وی نه دهاته برێڤه‌برن؟! ژ جهه‌كێ دویر هاتبا ژ زاخۆ یان شێلادزێ یان ئاكرێ؟! ئه‌و چو قانوونه شه‌فاعه‌تێ دده‌ته كارمه‌ندی كو بۆ (زه‌ید) چێببیت و بۆ (عوبه‌ید) چێنه‌بیت؟!، دزانم دبیت ئه‌ڤ سوحبه‌ته چپكه‌ك بیت ژ ده‌ریایه‌كا مه‌زن و هنده‌ك بێژن ئه‌ڤه مه‌سه‌لا: ئاڤێ نزا چ تشتێن به‌رئاشان برن، تو یێ پسیارا كه‌نگرپه‌ڕان دكه‌ی؟!. به‌لێ ئه‌ڤ سوحبه‌ته دو بابه‌تێن نێگه‌تیڤ د ناڤا خوه دا دحه‌بینیت، ئێك یا سه‌رمه‌زنكرن و موجامه‌له و ته‌مولقێ و ته‌یساندنێ، یا دویێ گه‌نده‌لیكرن د قانوونێ دا، واته كارمه‌ند ل سه‌ر قانوونێ دایه، پا بۆچی سه‌رۆكێ مه گۆتبوو: نا بیت كه‌س ل سه‌ر قانوونێ دا بیت؟!. ما خوه سه‌رۆك نائێت تاك تاك ده‌ستێ مه بگریت و مه ژ ل سه‌ر پشتا قانوونێ بینیته خار!! توبه توبه.. .
ژ لایه‌كێ دی ڤه هه‌مان مژار ئه‌م به‌ره‌ڤاژی سه‌رده‌ریێ ل گه‌ل دكه‌ین، هه‌كه كارمه‌نده‌ك حه‌ز موراجعه‌كی نه‌كه‌ت دیسا دێ مامه‌لا وی تێكده‌ت ژ به‌ر ناكۆكیه‌كا كه‌ساتی یان كه‌ربه‌كێ و دێ خوه ژ قانوونێ شه‌ریفتر دانیت و به‌هانه‌یێن بچووك گریت، چونكو گه‌له‌ك بژاره و رێیێن ب ساناهیكرنێ ژی هه‌نه د ئۆفیسان دا بۆ وه‌لاتیان دا وه‌كو رێیێن قانوونی، قوتابی یه، پێشمه‌رگه‌یه، ئه‌فسه‌ره، دانعه‌مره و. .. هتد. یا ب سه‌رێ من هاتی دیسا جاره‌كێ به‌رپرسێ پشكه‌كا ئۆفیسه‌كێ نه‌ڤیا معاملا من برێڤه‌ببه‌ت، رابوو خوه كره سیقلبۆق و به‌هانه‌كا ده‌ستكرد و (مفبرك) بۆ من ده‌رێخستن و ژ بنێ پێ خوه چێكر به‌س دا ڤێ قه‌یرانێ مه‌لیۆنه‌كێ ژ من چێكه‌ت، هه‌ر چه‌نده ئاسانكاریێن قانوونی هه‌بوون نه‌خاسمه ئه‌م ژ ته‌خا پێشمه‌رگه‌ینه، به‌لێ پشتی ئاسته‌نگ رێستی و چێكری، نه‌چاری رێڤه‌به‌ری بووین بۆ ئینانا فه‌رمانه‌كا ل سه‌رداتر، چووینه ده‌ف رێڤه‌به‌ری جوامێری قه‌درێ مه و یێ خوه گرت نه‌ك ژ به‌ر ناسینه‌كێ یان به‌رژه‌وه‌ندیه‌كێ یان سلاڤێن فلانكه‌سی، به‌لێ ژ به‌ر كو گیانێ مه ل سه‌ر ده‌ستێ مه‌یه دچینه ئه‌ركێ مرنێ كو پێشمه‌رگاتیا مه، رێڤه‌به‌ری گۆته مه هه‌رن معامله‌كا دی چێكه‌ن، به‌س بێی هندێ كو به‌رپرسێ پشكێ (عه‌ورێ گوڕگۆڕی) بزانیت ـ سه‌ره‌رای هندێ كو ل بن وی دا بوو ـ به‌لێ خوه ددانیت ژ رێڤه‌به‌ری مه‌زنتر. رێڤه‌به‌ری شۆلا مه برێڤه‌بر و چێكر وه‌كو میه‌كی ژ ناڤ هه‌ڤیری دا ئیناده‌ر و به‌رپرسێ پشكێ ژی سه‌رێ خوه شۆر كر كو پشتی هه‌یامه‌كێ من ئه‌و ل سه‌ر جادێ دیت كو ده‌واما وی یا ژ ئۆفیسێ هاتیه ڤه‌گوهاستن بۆ سه‌ر جادێ ژ به‌ر كو گه‌نده‌لی كربوو و خانیێ خوه ژ كیسێ نه‌سریێ سیرامیك كربوو دزی كربوون، من ژی گۆتێ: ماشا الله تو چه‌ندێ جانی ل سه‌ر جادێ پیرۆزه و.. .. هه‌كه تو نه‌بایی معاملا من دا چێبیت!! ئه‌ڤجا ئه‌ڤه هه‌لویسته‌ك بوو ژ سه‌دان.. هه‌كه هوون باوه‌ر نه‌كه‌ن دێ ناڤان ژی ئینم!!.
پترۆلا مه.. به‌لا سه‌رێ مه!!
ئه‌ڤی مانشێتی ئه‌ز دودل كرم، نه‌كو ئه‌ڤ به‌لایه پتر سه‌رێ مه بخۆت و خه‌لكه‌ك (هه‌مه‌جه‌ك) بزانیت كو مه ئه‌ڤ سامانه یێ هه‌یی و پتر خوین و ئاگر ل سه‌ر سه‌رێ مه ببارینن، نه‌كو یێ نه‌زانی بیت ئه‌و ژی بزانیت و ل سه‌ر ئێش و ئازارێن مه زێده ببیت، به‌لێ لۆكالیا زمان و وه‌شانێ ئه‌ز ته‌نا كرم، ب دیتنا من پشتی راگه‌هاندن و داخۆیانیێن مه وه‌كو حوكمه‌ت و وه‌كو ملله‌ت یێن جیهان هایدار كری كوم مه ئه‌ڤ پیچا پترۆلێ ل بن پیێن خوه هه‌یه، ئه‌ڤ هه‌می ئاریشه و قه‌یرانه بۆ مه په‌یداكرن، چونكو ل ده‌سپێكا یاریێ بوو گڕێ بگروڤه‌كێشا د ناڤبه‌را مه و مالكی دا، هه‌تا ئه‌ڤ گڕه بوویه گولمچكا به‌رفرێ و هه‌تا ئه‌ڤێ چڕكێ ژی هێشتا یا دگندڕیت و نزا دێ گه‌هیته كیڤه، دبیت هه‌تا خودانێ ڤان رێزكان شه‌هید ببیت، یانژی خودێ عه‌مرێ وی درێژ بكه‌ت!!. ئینا ئه‌و بوو ئه‌و چه‌ته‌یێن دبێژنێ ده‌وله‌تا ئیسلامێ د هه‌سپێ ترواده دا هاتین و ل شوونا پترۆلا مه خوینا مه بۆ خوه كریه ئارمانج و ڤه‌خواری، ئه‌وان خواست ب رێیا سترانا (داعش) وی سامانێ ل بن ئه‌ردی بۆ خوه ببه‌ن ب رێیا ئه‌و بیرۆزدا دبێژنێ (شه‌ڕ بازرگانی یه)، هه‌ر وه‌كو جحایی گۆتی: سه‌یێن خوه یێن هار ب مه‌را به‌ردان و به‌رێن خوه یێن گوندی ب ئه‌ردی ڤه گرێدان!!. هه‌كه ده‌وله‌تا چ حالێ چ؟! ما خوه‌نه كورد دوژمنێ ئیسلامێ یه؟! كه‌رمكه هه‌ره شه‌رێ دوژمنێ بوسلمانیه‌تێ یێ دروست بكه دبیت نێزیكتر بیت ژ كوردستانێ، هه‌ر وه‌كو سه‌دامێ گۆر به‌گۆر گۆتێ: بلا پارچه‌كا ئه‌ردێ جیران بده‌نه مه دێ بینن ئه‌م دێ چ كه‌ین!!. یانژی شیعه‌یێن ره‌به‌ن یێن سه‌دامێ هنگۆ قرا وان دئینا، هه‌كه وه‌سا بیت ژی، بلا كورد و شیعه پلا دویێ بن ژ خویندارێن هه‌وه، ما به‌ردكه‌ڤیت هند گیان ببنه قوربان بۆ تشته‌كێ به‌رنه‌كه‌ڤتی، ما ده‌م هوون هۆسا د دلگرانن ژ خوه و ڤێ دونیایا (متاغ الغرور) هه‌ما هوون هه‌می پێكڤه خوه ب ئێكجار بكوژن و بالا خوه ژ (كه‌فره ـ وه‌كو هوون دبێژن) ڤه‌كه‌ن، زێده‌باری ڤان هه‌ردو ئاریشه و قه‌یرانان، ئه‌ڤ جوداهیا مه‌زنا ب سه‌ر بهایێن دۆلاری دا هاتی، ژ كیڤه هات؟! كو چو جاران د دیرۆكێ دا هۆسا پترۆل ئه‌رزان نه‌بوویه، دێ بێژن مانێ ئه‌ڤ دابه‌زینا پترۆلێ یا دراماتیكی بوو ئه‌و بخوه هاته خوار، باشه هه‌كه وه‌سا بیت، ما خوه‌نه شه‌نسێ كوردان ژی دوژمنێ وانه؟!، ژ بلی ره‌هه‌ندێن مه‌زن یێن دونیا هه‌می هه‌ژاندی و جه‌مسه‌رێن وێ ئیناینه سه‌ر خه‌تی و هه‌می ئازریاین، توركیا ژ ره‌خه‌كی ڤه، رۆسیا و ئیران و لوبنان و سووریێ هه‌ر به‌حس ژێ نه‌كه ( ئه‌و پیلێ شه‌ترنجێ یێ هه‌می به‌لانس هه‌رفاندین)، دبێژن تشته‌كێ خرابتر ب سه‌رێ مه ناهێت پشتی ئه‌ڤا هاتیه سه‌رێ مه، به‌لێ ئه‌ز دبێژم نه‌خێر تشته‌كێ دی مایه و ژیواره‌كه دڤێت ب عاتیفه سه‌رده‌ریێ ل گه‌ل نه‌كه‌ین، ژ بلی شانازی برن ب پترۆلا بوویه (كولند)، ئێدی راگه‌هاندنا ده‌وله‌تا مه‌یا سه‌ربه‌خوه یه، هه‌ر وه‌كو بۆیه‌ران نیشا مه دا كو دێ بهایێ وێ هێشتا یێ مه‌زنتر بیت و نه دووره نه‌ڤیێن مه ژی ببنه سۆته‌مه‌نیێ وێ، هه‌ر وه‌كو بۆیه‌ر یێن دبێژنه مه (ڤه‌گه‌ریان بۆ عیراقا سه‌خته باشتره بۆ چارسه‌ركرنا قه‌یرانان)، به‌لێ مه خه‌و دڤێت و مه كه‌و ژی دڤێت، ل دووماهیێ ئه‌ز دبێژم، سه‌رده‌ریكرنا باش ئه‌وه هه‌می پرسگرێك بمیننه هه‌لاویستی به‌لكو خودێ یه، بارانه‌كا به‌ران یان ته‌یرێن ئه‌بابیل ل سه‌ر سه‌رێ حه‌سوود و نه‌حه‌زان بهێن و به‌لا وان ژ مه ڤه‌بیت، بهێلێن سه‌رێن خوه پێكڤه‌نین و نانه‌كی ب سه‌لامه‌تی بخۆین. به‌لێ هه‌تا ڤێ چركێ ژی ئه‌م نزانین كینه دوژمنێن مه یێن دروست، ئه‌رێ (.. . ینه)، یانژی (.. .. ایه) یانژی (.. بن)؟ یانژی هه‌ر ئه‌م بخوه‌ینه، یانژی ئه‌زم؟!.
به‌ڤلاتیا گرگره!!
گرگره و كه‌نكه و حه‌فكستویر و جه‌مسه‌رێن باژێری و پتریا زلكێن د شاختێ دا، تووشی نه‌خۆشیه‌كا دۆمدرێژ بووینه، چه‌ندی ببینی هه‌ر ئێك ژ یێ دی تۆره‌یه و كه‌س خوه ناده‌ته ب كه‌سێ و پتریا وان د ژێك سلن، ئه‌رێ هه‌كه ب نێرینه‌كا زانستی ته‌ماشه بكه‌ینێ، تو بێژی ئه‌گه‌ر دێ چ بن؟! هه‌ر ئه‌و بخوه د ژینگه‌ها خوه دا د وه‌نه، یانژی باردۆخان مه‌غروور كرینه، یانژی هه‌ر ئه‌م ب خوه‌ینه وان د نازینین و ئه‌وێ ململانێ ل به‌ر وان شرین دكه‌ین و زه‌مینا تۆره‌بوونێ و چاڤپێنه‌رابوونێ بۆ وان خۆش دكه‌ین ئه‌وان سیر دده‌ین؟!، ل گۆر نێرینا زانایێ سویسریی جان جاك رۆسۆد ڤه‌كۆلینه‌كا خوه دا (ڤه‌كۆلینه‌ك د پێكه و بنیاتێن نه‌وه‌كهه‌ڤیێ داـ 1755ز)،دیار دكه‌ت كو مرۆڤ نه‌ك زینده‌وه‌رێن جڤاكینه ب سروشتێ خوه، به‌لێ ئه‌و ب تاك د فتڕه‌ت دا د ڤه‌ده‌رن ژ جڤاكی، دلێن وان د نازكن، حه‌ز ناكه‌ن زیانێ بگه‌هیننه ئێك یانژی د توندوتیژ بن، به‌لێ هه‌كه پێكڤه ژیان و بوونه ئێك جڤاك هینگی دێ به‌ربنه ئێك و دێ خراب بن. ئه‌ڤجا هه‌ر جڤاكه ئه‌وان خراب و گه‌نده‌ل دكه‌ت و ئه‌و ساخله‌ت ل جه‌م وان په‌یدا دبن ژ به‌ڤلاتیی و هه‌ڤدوژیێ و ئه‌زۆكیێ. له‌ورا ژی دێ بینی گرگره‌یێن مه یێن بووینه ئاگر ل هه‌مبه‌ری ئێكودو، دو به‌رپرسن، هه‌مان حزبن و حوكمه‌تن و باژێرن و جاران ئیك عه‌شیره‌تن. كارێن وان ب هه‌ماهه‌نگی د گرێداینه، ئێك تایبه‌تمه‌ندیه، به‌لێ سه‌رێ ئێكو دو نه‌ڤێت و هه‌می ئه‌رك و پۆسته‌یێن خزمه‌تا ملله‌تی دمیننه راگرتی و هه‌لاویستی ژ به‌ر ململانا جه‌نابێ وان!!، ئێك به‌رپرسێ ئێكی یه به‌لێ وی ب چ حساب ناكه‌ت، هه‌ر ئێك یێ سه‌ربخوه‌یه، ما دێ چاوا بیت هنده دۆسیه ب سالان بمیننه ل جهێ خوه ژ به‌ر كه‌ربێن وان ژ ئێكودو ڤه‌دبن، هنده‌ك ئۆفیس و سازیێن مه، هه‌كه تو ب ناڤێ فلان كه‌سی بچی یان ب سه‌ر ئۆفیسا وی ڤه‌بی، تو قه‌ستا ئێكا دی بكه‌ی، دو بژاره دێ هێنه پێش، یان دێ شۆلاته تێكچیت چونكو تو نێزیكی فلانكه‌سی، یانژی دێ بۆ بیته ملحه‌م و زێده‌تر ژ مافێ ته دێ هێته دان، واته نه ب وان دقه‌تیێت و نه یێ بێی وان دقه‌تیێت!! بۆ نموونه جاره‌كێ ئه‌ز هاتمه راسپاردن كو بچمه ده‌ف حاكمه‌كی به‌س هه‌كه بكارم ترومبێلا تومه‌تباره‌كی بزڤرینم، به‌لێ ده‌مێ چوویمه ده‌ف حاكمی، ئه‌وی گۆت ل سه‌ر خاترا ته و ژ كه‌ربێن فلان به‌رپرسی دێ، ئه‌وی تۆمه‌تباری و تورمبێلا وی دێ به‌رده‌م، من ژی گۆتێ، قوربان: ما قانوونێ خاتر تێدا هه‌یه؟! ما نه گه‌نده‌لیه بۆ مه هه‌ردویان؟!، وی ژی گۆت نه‌خێر رۆژا قیامه‌تێ ژی شه‌فاعه‌ت هه‌یه، وه‌لحاسل من جوامێر ل گه‌ل خوه بره ڤه ب ترومبێلا وی ڤه، ئه‌و به‌رپرسێ ئه‌ز راسپاردیم، حێبه‌تی بوو، چونكو ئه‌وی و مه‌زنه به‌رپرسان بنێن هاونان كون كرن و نه‌شیان خوه وی ببینن، و ئه‌زێ هه‌ژار من بۆ وان ئه‌و حنێر كر، گۆتنه من: تو چاوا شیایی؟؟ من ژی گۆتێ ئه‌ڤه سێربه‌ندیه، به‌س دا ژ حاكمی تۆره نه‌بن!! ئێ پا دێ چ بێژمێ؟! ئه‌لا هه‌لااااااا. ئه‌ڤجا ئه‌ڤرۆ هه‌می كار و كریارێن وان به‌ڤلان ژ كه‌ربێن ئێكودو دانه، هه‌ڤركی ل سه‌ر ترومبێلانه، ل سه‌ر موبایلانه، ل سه‌ر هه‌ڤیژینانه، بلیاردێ ب كه‌سێن ل ژێر خوه دا دكه‌ن، دێ كاره‌كی كه‌ن و ب ناڤێ وان. جاره‌كا دی ژی مه‌زنه به‌رپرسه‌كێ ل سه‌ر ئاستێ عیراقێ ژ من خواست كو معاملا شۆفێری وی برێڤه‌ببه‌م چونكو رێڤه‌به‌رێ وێ ئۆفیسێ ژ كه‌ربێن وی دا راگرتیه، كو ب وی ره‌نگی ناڤێ وی نه‌ئینم و ب ناڤێ من بیت وگۆت: كه‌س گوچكێ خوه ناده‌ته من.. من ژی نه‌ڤێت مایێ خوه تێ بكه‌م. مخابن هۆسا سه‌رده‌ری بهێته كرن!! ئه‌م پێدڤینه ئێكودونه دا ب پێش بكه‌ڤین، هه‌كه ئه‌ڤه بیت ره‌فتارا گرگره و حه‌فستویران باشه پا یا حه‌فك زراڤان دێ یا چاوا بیت؟!.
شیاینه دوژمنی و نه شیاینه خوه!!
كه‌س د دنیایێ دا ژ مه كوردان ب هێزتر نینه، به‌س ئه‌ز هێز و قوه‌تا مه دزانم كو ناهێته ل هه‌مبه‌ر یا چو گه‌لان، به‌س ئاریشه ئه‌وه مه هند حه‌زژێكرن نینه ل به‌رامبه‌ر ئێكودو، مه‌زنترین دوژمن نه‌شیاینه مه ب هێزا كۆم ڤه، هه‌ر ژ ده‌سهه‌لاتێن كه‌ڤن بگره هه‌تا ئه‌ڤرۆ گه‌هشتیه داعشا خویناوی، راسته ل ده‌سپێكێ هنده‌ك ڤه‌جنقین په‌یدابوون ـ ئه‌و ژی هه‌ر ژ ده‌وله‌ت سه‌رێ دوژمنیا سه‌رێ خوه ب خوه یا مه ـ به‌لێ نها ئه‌م وه‌كو جگاره‌كێشانێ دوژمنێ خوه پاشڤه دبه‌ین، نه به‌س ئه‌م ب هێز و شیانین، به‌لێ هه‌ر وه‌سا مه عاقله‌كێ مه‌زن ژی هه‌یه، بوویه خوه‌دی سه‌ربۆر، به‌لێ ئاریشه‌یا هه‌ری مه‌زن ئه‌وه كو ئه‌م نه‌شیێن حه‌زژ هه‌ڤدو بكه‌ین!!، ب دروستی مه‌سه‌لا “كه‌و دوژمنێ سه‌رێ خوه و هه‌می دونیا دوژمنێ وی یه” ل سه‌ر مه دهێته سه‌پاندن، ئه‌م دزانین كو ئه‌م ب كێر خوه ناهێین، به‌لێ ئه‌م نه‌شیێنه خوه، هه‌كه ئه‌م شیایینه خوه، دێ شیێنه هه‌می جیهانێ، شاشی هه‌ر ژ ناڤا مه ب خوه‌یه، ئێك وه‌لاته دو حزب یان سێ ڤێكناكه‌ن، ئێك حزبه دو ده‌ڤه‌ر ڤێك ناكه‌ن، ئێك ئۆفیسه دو كارمه‌ند ڤێك ناكه‌ن، ئێك ماله دو برا ڤێك ناكه‌ن، نزا بۆچی مه هند ئێك و دو نه‌ڤێت، بۆ ئێكو دو ئه‌م ئاگرین، ئه‌ڤا هاتیه سه‌رێ مه ژی هه‌ر عه‌مه‌لێ مه‌یه، مه شكه‌ستن ئینا د پتریا بیاڤان دا و ئه‌سته‌مه ئه‌م ڤێك بكه‌ین، ب بله‌گه‌یێن دیرۆكی دلسه‌مینین كو هه‌ر مه سه‌رێ ئێك خواریه، ئه‌زمانێ مه گه‌له‌كێ خۆشه به‌س ئه‌م ئاگرین، به‌س ئه‌و گاڤه یا ئه‌ز ل ده‌ف ته، پشتی ئێك چركه پشتا من بكه‌ڤیته ته، دێ من كه‌یه زرنا و ب تمتمكا من داده‌یی و بێی چو ئه‌گه‌ر، ما خوه‌نه من بابێ ته كوشتیه؟!، ئه‌م هه‌می گه‌نده‌لین ئه‌م هه‌می بندیوارین، ئه‌م هه‌می ته‌شقه‌لچینه (بلا ژ بلی هنده‌كا بیت ـ دا چو ئاریشان بۆ مه چێنه‌كه‌ن)!!، هه‌ر وه‌سا ئه‌م گه‌له‌ك به‌حسێ گیانێ براینی و هه‌ڤالینیێ دكه‌ین، به‌س هه‌می كه‌یسا خوه ل باشیا هه‌ڤالێ خوه دبینن، قانوون و رۆتین و كاروبارێن فه‌رمی ژی تشته‌كێ رۆخساره ل جه‌م مه، ئه‌م چو دخوازین بۆ خوه دكه‌ینه قانوون، هه‌ر وه‌كو ئه‌م هه‌می د شه‌ریفین و كه‌سێ خراب نینه، خوه زانست یێ بوویه پێترانك د ده‌ستێن مه دا!! كه‌س ل ڤێ دونیایێ نه‌شیایه زانستی بكه‌ته ئاژاو و گه‌نده‌ل له‌ورا ئه‌م هه‌ڕفتین، ئه‌و مێشكێ رێخستی مه نینه، ئه‌م نزانین د بیركاریێ دا كو هه‌ژمار (1) به‌ری هه‌ژمار (2) دئێت، هه‌ما چو ل ده‌ف مه چونینه، دێ كه‌ره‌مكه مه‌سه‌لا بندیواران چاره كه، هه‌ر كه‌سێ ته گۆتێ: تو بندیواری،، دێ تو بیه كولند د ده‌ستان دا و هه‌ر وه‌كو تو بندیواری و ئه‌و یێ حه‌قه، دێ بۆ ته به‌حسا هه‌می شۆره‌ش و راپه‌رینان كه‌ت، كه‌س ژی دلناهێلیت بێژیته ئێكی: پێلاڤا ته یا خواهره!!. كه‌سێ نه‌ڤێت خوه ماندی بكه‌ت، بۆ نموونه چونكو بیاڤێ چاندنێ یێ خێر به‌ره‌كه‌ت و وه‌رزشی و ساخله‌میێ یه و ستوونا ب هێزا ئابوورێ هه‌می وه‌لاتانه، به‌لێ ل جه‌م مه چو نه‌خشیێن رێخستی و پلانا ئابووری ئه‌ڤ چه‌نده بۆ خوه نه‌دانایه، چاندن ل جه‌م مه ته‌نها بۆ خواندن و ڤه‌كۆلین و وه‌رگرتنا ماسته‌ر و باوه‌رنامایه.. ژنوو مه بهایێ وێ ماندیبوون و ئابووری زانی. ئه‌ڤرۆ هه‌می كاروبارێن مه یێن فاشل چووینه د ناڤ ئێك دا، خوه‌زی مه ئه‌و قه‌بارێ هێزێ كربا قه‌بارێ حه‌زژێنه‌كرنێ و ده‌ستێ ئێكودو گرتبا، مه حه‌ز ژ هه‌ڤدو كربا، كا دا بینه ده‌وله‌ت یان نه، نها خه‌ونا مه حه‌زژێكرنا هه‌ڤدویه پتر ژ خه‌ونا سه‌رخوه‌بوون و ده‌وله‌تبوونێ!!. باوره‌كه هه‌كه ئه‌م د ناڤ مالا خوه ببینه ئێك مه كوردان چو بڤێت دێ گه‌هینێ و كه‌س نابێژیته مه وره ئه‌ڤه ده‌وله‌ت بۆ ته یان ئه‌ڤه مووچه بۆ ته. . له‌ورا به‌س دزیا ژ من بكه، هه‌كه چو لایه‌نێن دونیه‌وی نه‌بن ته سزابده‌ن، رب العالمین دێ ته سزاده‌ت هه‌ر وه‌كو تو سزادای ژی و كریه ته‌شابه‌ت و هه‌تكبه‌ری، ما زێده‌تر دێ چو ل ته هێت به‌س یا مایی ده‌رگه‌هێن خوه بگری و بچیه مال.. نێ خوه جه‌بهه‌ی ژی ئه‌م یێن ل سه‌ر كیسێ خوه برێڤه‌دبه‌ین!!
نيشاندان
WP Facebook Auto Publish Powered By : XYZScripts.com