شێرزاد نایف

ب دیتنا من ژینگه‌ها مرۆڤى باندۆره‌كا مه‌زن هه‌یه‌ دبریاركرنا ده‌روونا مرۆڤى دا، ئه‌ڤ باندۆره‌ دبیت پشكا شێرى بیت و سه‌رپشكا ئه‌گه‌رێن بابه‌تیانه‌ بیت. مه‌ زۆر حه‌زكر كو ئه‌م د دیمۆكراسخواز بین و مه‌ خوه‌ ددانا وه‌كو ویلایه‌ته‌كا ڤه‌قه‌تیایى ژ ئه‌مریكا، به‌لێ هه‌ر وه‌كو ژینگه‌ و نه‌خشه‌یێ جوگرافى ناهێلیت، ئه‌م هه‌ر یێن خوه‌ هزرڤه‌كرى دهێلین و ئازاد سه‌رده‌ریێ بكه‌ین، ژینگه‌ها مه‌ ژى یا پاك و فێنكه‌، به‌لێ هه‌ر وه‌كو ئه‌و یێن عه‌ورێن ده‌ستكرد بۆ هنداڤى مه‌ڤه‌ دئینن و ب زۆرى مه‌ دكه‌نه‌ دك راسێ رۆژهه‌لاتی دا، حه‌ز ناكه‌ن ئه‌م ژى د دیمۆكراسخوازبین، چونكو ل ده‌سپیكێ و حه‌تا نها ژى سه‌ربۆرا مه‌ ب ناڤێ دیمۆكراسیێ بسه‌ركه‌ڤت، حه‌تا كو گه‌هشتیه‌ لۆته‌كیا خوه‌ و مه‌ خواستى كیانێ خوه‌ یێ ب هێز راگه‌هینین، ب هه‌مى رێیان هاتنه‌ مه‌ كو مه‌ بشكێنن، نه‌شیان و ئه‌و خالا لاواز بكارئینا و ده‌ڤێ مه‌ گرێدان ب هۆیێ خیانه‌تێ، هه‌كه‌ نه‌ كیانێ هه‌رێمێ زۆرێ ب هێزبوو و دا پتر ب هێزكه‌ڤیت هه‌كه‌ كرمێ دارێ نه‌با!!. هێشتا ژى یا مایى و دێ مینیت ژى. چونكو ئه‌م ب زۆرى نه‌چارى ژیانا دیكتاتۆریانه‌ كرینه‌، مه‌ نه‌ ڤێت ل گه‌ل عیراقا جودا بژین، هه‌ر یێن مه‌ پالڤه‌دده‌ن، بریارا سیاسی یا كوردى ل هه‌رێمێ دخوازیت سه‌ربخوه‌یا خوه‌ هه‌بیت و ملكه‌چى چو ئه‌جینه‌دیێن دى نه‌بیت، به‌لێ عیراقا ـ نه‌یا خوه‌ ـ یا كریه‌ به‌ربه‌سته‌ك ل به‌رامبه‌رى ئه‌ڤێ بریارێ. ئه‌رێ ئه‌و چو ده‌وله‌ته‌ سه‌رۆكێ وێ نه‌یێ ب ده‌ستێ خوه‌ و د ده‌ستێن وه‌لاتیێن دى دابیت؟!. هزر و ره‌فتارێن كوردستانیان گه‌له‌ك د پێشكه‌فتى و ئازاد و دیمۆكراسى بوون، ژ هه‌مى لایه‌كى ڤه‌، ده‌رگه‌هێن وێ دڤه‌كرى بوون، ژ به‌ر ساخیا دلى، به‌لێ یا دیاره‌ كیژ لایه‌ن دخوازیت هه‌ر دگرتى بین و وه‌كو وان بین، بۆ نموونه‌ هه‌ره‌ سوشیال میدیا و سنابیێن وه‌لاتێن ده‌وربه‌ر ڤه‌كه‌، كیژ وه‌لاته‌ ب ره‌خ مه‌ڤه‌ یێ ڤه‌قه‌تیایه‌ ژ دونیایێ؟! هه‌ما دێ دیار بیت، ڤێجا بگره‌ ژ هه‌مى ته‌ماكاریێن دى كو دخوازیت ده‌ستێ خوه‌ بدانیته‌ سه‌ر و وه‌كو كۆمارا كوردستانا ئێكێ لێبكه‌ت!. ته‌ماكاریێن هه‌ڤبرى ئێك، ئه‌و هزرا دكتاتۆر یا د سه‌رێن مه‌ دا چاندین یا دوور و درێژبوو، له‌ورا زووبزوو ناهێته‌ ڤه‌مراندن، له‌ورا یا ب زه‌حمه‌ته‌ دیمۆكراسى جهێ وێ بگریت، كو نها خه‌له‌ك یێ خۆزیێن دكتاتۆریێ رادهێلن، یا دروست ل به‌ر بوویه‌ خه‌له‌ت، چونكو سیسته‌مێ دیمۆكراسى ده‌ردێ دلێ مه‌یه‌ و ئه‌م ب وێ دێ گه‌هینه‌ ئارمانج و خواسته‌كێن خوه‌، له‌ورا ژى بارزانیێ نه‌مر به‌رى ده‌هان سالان بزاڤا خوه‌ ب دیمۆكراسیێ دامه‌زراند، هینگى ئه‌و دزانى بها و رامانا دیمۆكراسیێ چه‌نده‌. نها ژى شه‌ره‌ د ناڤبه‌را دكتاتۆریێ و دیمۆكراسیێ دا ل نیڤا هزرا مه‌ دا، چونكو سه‌روبه‌رێ مه‌ یێ دیمۆكراسى یه‌ و هزر یا دكتاتۆره‌، هه‌ر وه‌كو دووماهى چه‌كێ وان ئه‌و بوو ب برسێ هاتنه‌ مه‌ وهه‌ر نه‌شیانه‌ مه‌!..

شێرزاد نایف
(ده‌سهه‌لات هه‌مى رێیا دبه‌ته‌ ئاشى ژبۆ مسۆگه‌ركرنا تۆماركرنا ده‌نگێن فه‌رمى یێن هه‌ڤوه‌لاتیان)
پشتى ڤان بۆیه‌ر و بارۆڤه‌یێن ب سه‌ر مه‌ دا هاتین و ئه‌م وه‌سا گوهشاندین، كو هه‌تا وى راده‌یى سه‌رێن رێكا ل به‌ر مه‌ به‌رزه‌كرین، ئێدى هزرا مه‌ ژى هاتێه‌ تێشێلاندن، هه‌ر ژ ده‌سپێكا ئه‌و دۆرپێچێن نوورى مالكى سه‌رۆك وه‌زیرێ عیراقێ یێ كه‌ڤن و پاشى هێرشێن داعش و گرتنا په‌رسیڤێ سووریێ بۆ سه‌ر ده‌ڤه‌رێن مه‌ و شه‌رێن مه‌ ل گه‌ل تیرۆرستان و پاشى ده‌سپَیكرنا پرۆسا تۆمارا بایۆمه‌ترى یا كۆسیۆنا هه‌لبژارتنێن عیراقێ و پاشى ئه‌نجامدانا پرۆسا گشتپرسیا كوردستانێ یا سه‌ركه‌فتیانه‌ ـ وه‌كو ده‌سكه‌فته‌كێ دیرۆكى ـ به‌لێ، ره‌نگڤه‌دانا وێ یا دژوار ل سه‌ر كوردستانێ و یا ژ هه‌میێ جه‌رگبرتر خیانه‌تا بوویه‌ ماركه‌ ـ مسجه‌له‌ ـ بۆ خرابیێ!! پشتى وه‌غه‌را مام جه‌لال و به‌رده‌وامبوونا ڤێ چیرۆكێ هه‌تا ل شه‌رێ به‌رگریا پێشمه‌رگه‌ى ل دژى هێرشێن حه‌شدا شه‌عبی ب سپۆنه‌سه‌ریا ئه‌مریكا و توركیا و سووریى و هه‌میان، و گه‌فێن حه‌یده‌رێ عه‌بادى، كوردستان شیا خوه‌ ل به‌ر ڤان هه‌مى پێلان گرتى. ئێدى هه‌سته‌كا بێزاریێ بۆ خه‌لكى په‌یدابوو و گوهشین، ب باشیا شه‌نسى لۆتكه‌یا هه‌دارا هه‌ڤوه‌لاتیان گه‌هشته‌
گوپیتكێ، هه‌ڤده‌م بوو ل گه‌ل بانگه‌شه‌یا هه‌لبژارتنێن سه‌رانسه‌رى ل عیراقێ. خه‌لكى دگۆتن هه‌ما هه‌ر ناچیته‌ ده‌نگدانێ و وه‌لێهات هه‌كه‌ ته‌ به‌حسا ده‌نگدانێ كربا دا حه‌نه‌كان ب ته‌ كه‌ن!!. به‌رپرسه‌كێ به‌رز جاره‌كى ل ده‌ف من وه‌كو ته‌به‌كێ ئینا خوه‌ وه‌ختێ من بابه‌تێ تۆمارا بایۆمه‌ترى بۆ كری، به‌لێ ئه‌ڤرۆ ئه‌و ب خوه‌ یێ هاندانا خه‌لكى بۆ ده‌نگدانێ دكه‌ت!!. مه‌ره‌م پێ ئه‌وه‌ كو ل عیراقێ و كوردستانێ چو تشت نینن ل سه‌ر ده‌سهه‌لاتێ ده‌رباز بكه‌ن، مینا ب كولانكى و مللى دبێژن: حوكمه‌ت كێڤریشكێ ب عه‌ره‌بانێ گریت.
ده‌سهه‌لاتا عیراقێ ژى ره‌هێن سه‌رى َوێ دساڕن و یا بێمنه‌ته‌ كو هه‌ڤوه‌لاتى بچن و ده‌نگێ تۆماربكه‌ن و كارتێن خوه‌ یێن ده‌نگده‌ریێ ببه‌ن و ببنه‌ ده‌نگده‌رێن پله‌ ئێك ب سیسته‌مێ ئیسپانى و ئه‌و سیسته‌م ددله‌كى دا به‌رهه‌ڤكرینه‌ كو هه‌مى تشت ل سه‌ر سه‌خته‌كاریێ دابن ل ده‌مێ پرۆسا ده‌نگدانێ.
دشێن بێژین كو ده‌سهه‌لاتێ ل سه‌ر هه‌ڤوه‌لاتیان سه‌پاندیه‌ كو خوه‌ تۆرمار بكه‌ن، هه‌كه‌ نه‌ گه‌فێن نه‌راسته‌وخوه‌ هه‌نه‌ بۆ برنا كارتێن خوه‌، چو ئه‌ڤ كریاره‌ یا قانوونى بیت یان یا قانوونى نه‌بیت، گرنگ حوكمه‌ته‌ و ده‌سهه‌لاته‌ و یا ب دلێ خوه‌یه‌، دبێژیت، دڤێت هه‌ر كه‌سى كارتا ده‌نگدانێ هه‌بیت و یێ تۆماركریى بیت، به‌لێ تو یێ ئازادى بچى ده‌نگى بده‌ى یان نه‌ده‌یى. به‌لێ هه‌ڤوه‌لاتى هینگى دێ گه‌هنه‌ وى ئه‌نجامى كو بچن و ده‌نگى بده‌ن و ب مۆراله‌كا ب هێز، نها حزب و عه‌شیره‌ت وه‌كو كو ئاراسته‌یێن هه‌ڤته‌ریب ئێكودو ته‌مام دكه‌ن، ئێك ده‌ستێ یا دى دگریت و عه‌قلێ عه‌شیره‌تێ ژ كیستێ حزبایه‌، رێكه‌كا نێزیكه‌ بۆ رازیكرنا ژیبوون و پیگریكرنا هه‌ڤوه‌لاتیان بێى زه‌حمه‌ته‌ یان زكئێشاندنه‌ك، كو وێ پێگیریا هه‌ڤوه‌لاتیان بۆ خوه‌ راكێشن و نا ژى به‌ره‌ به‌ره‌ هه‌ردو ده‌سهه‌لات یا عیراقێ و یا هه‌رێمێ به‌ره‌ به‌ره‌ یێن ژیانا هه‌لكى باشتر لێدكه‌ن، ئاریشه‌یێن وان به‌ر ب باشترڤه‌ دچن به‌ره‌ڤاژى ده‌سپێكا شۆلێ كو ره‌نگه‌ ته‌ ده‌نگدان كربا ل سه‌ر ده‌نگدانێ به‌هرا پتر خه‌لكى ب نه‌وه‌یێ به‌رسڤ دابا، به‌لێ ئه‌م یێن دبینین (ماشالا)، خه‌لكى یێن ب هه‌ردو ملان دچن و یێنن شه‌رى سه‌را ئینانا كارتێن خوه‌ یێن ده‌نگده‌ریێ دكه‌ن و یێن ل سه‌ر دیواران را دچن كو به‌س ده‌نگێ خوه‌ دابین بكه‌ن.. و ل داویێ دبێژم ده‌نگدان ده‌نگڤه‌دانه‌.!! به‌لێ بۆ ده‌نگدانێ ..

شێرزاد نایف
دبێژن ماف ناهێنه‌ وه‌رگرتن، به‌لێ دهێنه‌ ستاندن، خودانێ حه‌قى ژى هه‌رده‌م پشتا وى ل كه‌ڤرى یه‌ و یێ ژ خوه‌ پشتراسته‌، ئه‌ڤه‌ ژى ملله‌تێ مه‌ یێ كورد یێ فێرى نسكۆیان بووین هه‌ر ژ كه‌ڤندا و هه‌رده‌م پتر ژ دوسى دوژمنێن زلهێز هه‌بوویه‌ ژ بلى جوگرافیا وى و ژبلى ـ كرمێ دارا وى ـ له‌ورا ژى ئه‌ڤێ سالێ پتر ژ هه‌ر ساله‌كێ ژ دیرۆكا خوه‌ تووشى نه‌خۆشیێن پیلانگێریێ بوویه‌، ل چه‌رخه‌كى كو نیفاق و زكره‌شیى یا سه‌رێ خوه‌ دخۆت، به‌لكو رێكێن ته‌كنۆلۆجیایێ ب ساناهیكریه‌ كو ئاسته‌نگ پتر بكه‌ڤنه‌ ل به‌ر رێیا پێشڤه‌چوونێ. ب دیتنا من ژى ئه‌ڤا مه‌ ل ڤان مه‌هێن بۆری ئه‌نجامدای و ده‌نگێ خوه‌ دایى بۆ سه‌ربخوه‌یا كوردستانێ په‌یامه‌كا دیرۆكى و گرنگ بوو مه‌ گه‌هانده‌ جیهانێ ب به‌ردكه‌فت كو باجا وێ ته‌نها یا ئابوورى بیت ل گه‌ل رێتنا خینێ و چه‌ند تێكۆشانه‌كا چه‌كدارى كو ب وێ چه‌ندێ ژى پتر هێزا خوه‌ یا خۆراگر نیشا زلهێزان دا، چونكو ل ڤان دووماهیان و پشتى قه‌یرانا دارایى و هه‌مى جۆرێن هێرشان هاتینه‌ سه‌پاندن، دووماهى چه‌ك ژى ئه‌ڤان بۆدجه‌ و مووچه‌یان بوویه‌، ئه‌ڤ بارێ گران كه‌فتبوو ل سه‌ر شانێ سه‌رۆكێ حوكمه‌تا هه‌رێمێ كه‌سێ نێچیرڤان بارزانى، ب وێ هه‌مى كه‌ربێ و پیلانا مه‌زن دوژمن ب هه‌ڤرا راوه‌ستاین ب راستى چه‌كێ وى ژى نه‌رمترین چه‌ك بوویه‌ و ته‌حمول و خوه‌راگرتن بوویه‌ ل هه‌مبه‌رى هه‌مى هه‌ولێن شكه‌تن ئینای، چونكو چه‌ندى دوژمنان گه‌ف ل سه‌ر وى دشداندن و ب گه‌رمى دهاتن، به‌لێ ئه‌وى نه‌رمتر سیاسه‌ت ل گه‌ل بكارئینایه‌ و هه‌مى گه‌هاندنه‌ وێ چه‌ندێ كو ته‌نازولێ ژ وان سۆزێن ڤه‌بڕى و نه‌خۆش بكه‌ن، نێچیرڤان بارزان ل گۆتارا خوه‌ یا ڤان دووماهیان دا دلرحه‌تیه‌ك بۆ خه‌لكێ كوردستانێ په‌یداكر هه‌ر وه‌كو هه‌رده‌م جه‌ختى كرى كو ئه‌ڤ قه‌یرانه‌ بهێنه‌ چاره‌سه‌ركرن و ب دروستاهى ژى ئه‌و داخۆیانى بوونه‌ ژیوار و رۆژ بۆ رۆژێ یێن دهێنه‌ دى، هه‌لبه‌ت ژى گه‌نجینه‌یا ڤێ هێزێ ژى ئه‌و مه‌زلومیه‌ته‌ و ئیراده‌یا ڤى ملله‌تێ بنده‌ست و نه‌خۆشى برینه‌ سه‌ر. ئه‌و مه‌زلۆمیه‌ت هێزا خوه‌ ژ پێشمه‌رگێ كوردستانێ دبه‌ت ئه‌ولایه‌نێ هه‌رده‌م هه‌مى نه‌چار كرین دانپێدانێ بكه‌ن ب كیانێ وى یێ سه‌ربخوه‌ و خودان نه‌ژاد، له‌ورا ژى هه‌رده‌م ئه‌ڤ پیلانێن هه‌نێ ژى ئه‌و بوون كو ل سه‌ر ناڤخوه‌یا كوردستانێ كاربكه‌ن ب ڤان حزبێن هه‌رده‌م سست د نشتیمانبوون و ژیبوونا خوه‌ دا، خواستن ل سه‌ر تێلا نازك كاربكه‌ن ته‌خێن هه‌ژار برسی بكه‌ن و به‌رده‌نه‌ حوكمه‌تا وان، ئیرادا پۆلایى هێشتا یاماى و پتریا وێ ژى نه‌هاتیه‌ چه‌ماندن. یا من ب گۆتارا نێچیرڤان بارزانى خواندى كو گوهۆرێن ئه‌كتیڤ دێ هه‌بن چونكو هه‌ولێن خرابناك هه‌تا راده‌كێ ڤه‌برى گه‌هشتنه‌ پاشڤه‌زڤرینێ و ده‌ست به‌ردان ژ وێ گه‌فوگۆرا هه‌یى. مه‌ هیڤیى یه‌ وه‌كو یا وى خۆیاكرى كو هه‌ڤوه‌لاتیێن هه‌رێمێ دلخۆش بین و مافێن وان بهێنه‌ ستاندن ژ به‌غدا ب هه‌ر رێیه‌كا هه‌بیت، به‌لێ یا گرنگ ئه‌وه‌ نه‌كه‌ڤینه‌ داڤێن نه‌حه‌ز و دوژمنان و پیلان و ئه‌جینده‌یێن ده‌ره‌كى.

شێرزاد نایف
گه‌ر خواندنه‌كا خه‌وارزمی به‌رده‌ینه‌ سه‌ر ره‌وشا نها، ل هنداڤ نه‌خشه‌یا بۆیه‌رێن دراماتیك یێن ب سه‌ر مه‌ دا دهێن كو سه‌حكه‌ینه‌ مژارا مامۆستایان، دێ بینین كو هه‌ره‌شه‌ و گه‌فكرن ل سه‌ر هه‌رێما كوردستانێ دتیژ و دژوارن، ب هه‌می رێیان دوژمنێن ده‌ردور یێن شه‌رێ مه‌ دكه‌ن و گه‌له‌گ جاران شكه‌ستن ئیناینه‌، دووماهی شكه‌ستن یێن سه‌ربازی بوون، پێشمه‌رگه‌ی هێزا خوه‌ نیشا دایی و ل هه‌می میحوه‌ران هێرشێن وان پاشڤه‌برین، ئێدی په‌نا برنه‌ پیلانێن دیتر كو ل تێلا نازك بده‌ن، ل ناڤخوه‌یا هه‌رێمێ بكه‌نه‌ ئاژاو، هه‌لبه‌ت ئه‌وان ژی داروده‌سته‌كێن خوه‌ هه‌نه‌، وه‌كو ل ده‌سپێكا یا خیانه‌تا 16 ئه‌كتۆبه‌رێ، ئه‌م هه‌می بێزاربووین و پۆسیده‌ بووین، به‌لێ پشتی هینگی حوكمه‌تا هه‌رێمێ و ب تایبه‌ت كه‌سێ نێچیرڤان بارزانی ملێ خوه‌ دایه‌ به‌ر ڤێ كۆشپا مه‌زن و ئه‌جینده‌یێن وان ته‌لاشی كرین، ب وێ سیاسه‌تا خوه‌ یا نه‌ه‌رم و بێنفره‌هـ، یێن ئه‌ڤرۆ رادبن ب ڤان جۆره‌ پیلانان، هه‌تا ئه‌ڤرۆ گه‌هشتیه‌ راده‌یه‌كێ هه‌ڤده‌م ل گه‌ل خۆنیشادانا مامۆستایان كو ئه‌و ب خوه‌ تشته‌كێ خراب نه‌بوو، دلێ هه‌می ملله‌تی یێ ب ره‌وشا وان ڤه‌ و راسته‌ مافه‌كێ ره‌وایه‌ هه‌ر ته‌خه‌ت داخوازێ بكه‌ت، هه‌ر وه‌سا سه‌رۆكێ حوكمه‌تێ ژی به‌ری ڤان خوه‌نیشادانان به‌لێنیا چاكسازیێ دابوو ل سه‌ر سیسته‌مێ پاشكه‌وتیێ مووچه‌یان، هێشتا ئه‌ڤ داخۆیاینه‌ سه‌ردرێن سایت و كه‌نالێن میدیایی نه‌، خه‌لكی ژی چاڤه‌رێنه‌ ل هه‌یڤا بهێت ب كریار ئه‌وێ به‌لێنیێ ببینین، به‌لێ تشتێ نه‌ئاسایی و نه‌ قانوونی ئه‌وه‌ هنده‌ك مه‌خلۆقێن كه‌یسۆ و حزب په‌رێس خوه‌ د ناڤ گێله‌شۆیێ دا د هه‌لاڤێژن بۆ نیازێن به‌رته‌نگ و حزبی داخوازا مووچه‌یان دكه‌ن، كو حوكمه‌ت بهێته‌ هه‌لوشاندن، كو ب راستی رێبازا ڤان خرڤه‌بوون و خوه‌نیشادانان به‌رتڕ كریه‌، كود بیت ئه‌وێ چه‌ندێ چو په‌یوه‌ندی پێڤه‌ نه‌بیت!!. مافێ مامۆستایان ل كیڤه‌ و ئارمانجێن حزبان ل كیڤه‌؟! باشه‌ ما ئه‌ڤه‌ جهێ په‌رله‌مانتارانه‌ كو نیسابا قانوونی بكه‌ن یان بانگه‌شه‌یا خوه‌ نه‌مایش بكه‌ن؟! یان جهێ مامۆستایانه‌ كو ب رێكوپێكی داخوازا مافێن خوه‌ بكه‌ن ب ئاشتیانه‌ و ب ئاوایه‌كێ ئارام؟! هه‌ر ئێك بۆ له‌یلانا خوه‌ دستریت و راسته‌ ماسی د ئاڤێن شێلی دا دهێنه‌ گرتن. هه‌می ژی دزان و دهایدارن ل سه‌ر ڤێ ره‌وشێ، هه‌می ژی دزانن كا كی ڤاڤه‌رێی پۆست و به‌رژه‌وه‌ندیێن خوه‌یه‌، خوه‌ بكه‌ته‌ ملحه‌م بۆ وان لایه‌نێن ملله‌ت برسی كری و بۆدجا وان بڕی، ب به‌هانه‌كێ یان ئێكا دیتر. یا گرنگ ئه‌وه‌، راستی د ناڤ بێبه‌ختیێ دا نه‌هێته‌ پیسكرن و ته‌ر و هشك پێكڤه‌ بسۆژن، مینا ئه‌و وێنه‌یێن وی مامۆستایێ تونسی یێ بریندار و ب له‌فاف، ب بێبه‌ختی كریه‌ مامۆستایه‌كێ هه‌ولێرێ و مار ب ده‌ستیێن ده‌سهه‌لاتا هه‌رێمێ دایه‌ كوشتن!!. ئه‌ڤ راستیا ڤی وێنه‌ی هه‌ر هنده‌ك مامۆستایێن د ناڤا خرڤه‌بوونێ دا به‌لاڤكریه‌ و خواستینه‌ راستی دیار ببیت و بێبه‌ختی ل حوكمه‌تا نێچیرڤان بارزانی ژی نه‌هێنه‌ كرن. .
ل دووماهیێ دبێژم مله‌تێ مه‌یێ كورد چ جاران نانێ چاڤشۆریێ نه‌خواریه‌ و ناخۆت و هه‌ر دێ نانه‌ك هه‌بیت بخۆن. . دلێ مه‌ هه‌میان ل گه‌ل مامۆستایانه‌ و ئه‌وان رێیا زانستی نیشا مه‌هه‌میان دایه‌ و ئه‌م چاڤه‌رێ چاكسازیێن حوكمه‌تا خوه‌ینه‌..

شێرزاد نایف
پرۆژه‌كێ‌ مه‌زن ژ لایێ‌ ئه‌مریكا ڤه‌ هاته‌ راگه‌هاندن كو ل به‌ره‌ ل هه‌رێمێ‌ ب تایبه‌تی دێ‌ بهێته‌ گێران، ل به‌ره‌ ئاستێ‌ خزمه‌تگوزاری به‌ر ب پێشڤه‌ ببه‌ت ب بۆدجه‌یا 160 ملیۆن دۆلاران. راسته‌ برگه‌ و بیاڤێن ڤی پرۆژه‌ی دێ‌ دبه‌رهه‌مدار بن، به‌لێ‌ به‌ری هه‌یامه‌كا درێژه‌ حوكمه‌تا هه‌رێمێ‌ ژی ڤێ‌ گازیێ‌ دكه‌ت، گه‌له‌ك پێنگاڤ هاڤێتینه‌ ژی!!. وه‌كو راگه‌هاندنا پرۆژه‌یێ‌ شه‌فافیه‌تێ‌ و كاراكرنا پینگاڤێن چاكسازیێ‌ و نه‌هێلانا گه‌نده‌لیێ‌ و بایۆمه‌تریكرنا كارمه‌ندان و نه‌هێلانا بندیواران و ..هتد. ئه‌ڤان پێنگاڤان سه‌رۆكێ‌ حوكمه‌تا هه‌رێما كوردستانێ‌ نێچیرڤان بارزانی ب خوه‌ ل سه‌ر راوه‌ستایه‌ و تێكۆشانێن جه‌خت ل سه‌ر هاتینه‌ مه‌زاختن و ئه‌و بخوه‌ ژی ب پرۆژێ‌ شه‌فافیه‌تێ‌ هاتیه‌ خۆیاكرن، لێ‌ ئه‌ڤرۆ ژی یا دلخۆشتر ئه‌وه‌ كو ئه‌مریكا ب وێ‌ مه‌زنیا خوه‌ ڤێرا گه‌هشت كو پشته‌ڤانیه‌كا سۆپه‌ر دێ‌ هێته‌ مه‌زاختن، هه‌می خالێن لاواز بهێنه‌ ژبیركرن و دلێ‌ وه‌لاتیان خۆش بیت پشتی ماندیبوونه‌كا دوور و درێژ!!. وه‌كو په‌یامه‌كێ‌ یه‌ كو پێگه‌هێ‌ حوكمه‌تا هه‌رێمێ‌ و سه‌رۆكێ‌ وی دێ‌ بهێتر كه‌ڤیت و ئه‌مریكا دێ‌ ملێ‌ خوه‌ ده‌ته‌ به‌ر. هه‌روه‌كو به‌ری ده‌مه‌كێ‌ نه‌یێ‌ ژمێژ پرۆژه‌كێ‌ مه‌زن ژ لایێ‌ كۆمپانیا دیلۆت ڤه‌ هاتبوو ئیمزاكرن. هنده‌ به‌رهه‌مێن وێ‌ بگه‌هن.
ئه‌ڤه‌ پرۆژه‌كێ‌ دیتر ژی گه‌هشت و دێ‌ دیار بیت كو ئه‌مریكا دێ‌ پشتا كوردستانێ‌ گریت، چونكو ب راستی ئه‌دائه‌كا ئاشتیانه‌ و نیازه‌كا شه‌فاش نیشا جیهانێ‌ دا، ب وێ‌ سیاسه‌تا خوه‌ یا نه‌رم و تایبه‌ت هه‌ولێن نێچیرڤان بارزانی ئاڤ دراوه‌ستێت و ئه‌و ناراوه‌ستێت كو ڤی ملله‌تێ‌ بگه‌هینته‌ كنارێ‌ ئارام، من ب وژدان دیت یا راست بنڤیسم، هه‌كه‌ نه‌، كه‌سێ‌ ته‌مه‌ت من ره‌خنه‌ ل شاشیان نه‌گرتینه‌. بۆ نموونه‌ ئه‌ڤ پرۆژێ‌ شه‌فافیه‌تێ‌ ب زارێ‌ سه‌رپه‌رشتیارێ‌ پرۆژه‌ی جۆن لیسته‌ر د كۆنگره‌كێ‌ رۆژنامه‌ڤانی دا راگه‌هاند به‌ری چه‌نده‌كا كێم، ل گه‌ل قوباد تاله‌بانی جێگرێ‌ سه‌رۆكێ‌ حوكمه‌تێ‌ و هه‌ر وه‌سا ژی بالیۆزێ‌ ئه‌مریكا دۆگلاس سلێمان ل عیراقێ‌، نڤیسینگه‌هه‌ك ب ناڤێ‌ AID راگه‌هاند پێخه‌مه‌ت حوكمرانه‌یكا دروست و شه‌فاف ل هه‌رێمێ‌. ب هه‌می شه‌فافیه‌ت ژی خۆیاكر كو ئه‌وان ل به‌ره‌ وان په‌یوه‌ندیێن دناڤبه‌را ئه‌مریكا و هه‌رێما كوردستانێ‌ دا بهێز بێخن. جهێ‌ دلخۆشیا مه‌ هه‌میانه‌ وه‌دیاره‌ دێ‌ گۆشه‌یا قه‌یرانان به‌ره‌ڤاژی بیت 180 پله‌یان، كوره‌یۆ ته‌ چ دڤێت ؟ دو چاڤێن ره‌ش!.
وه‌كو دیار ئه‌ڤه‌ ئه‌و په‌یامه‌ یا هه‌ریمێ‌ ژی ل به‌ر دانای كو به‌رنامێ‌ بایۆمه‌تری سه‌ربگریت، چاكسازیێن میلاكاتان و رێخستنا هه‌یكه‌لیه‌تا حوكمه‌تێ‌ و باشتركرنا خزمه‌تگوزاریان. هه‌لبه‌ت كه‌توارێ‌ هه‌رێما كوردستانێ‌ ژی بۆ سه‌پاندنا ڤان جۆره‌ پرۆژه‌یان یا ب ساناهی یه‌ و هه‌می رێكخراو دخوازن پرۆژێن خوه‌ ل هه‌رێمێ‌ جێبه‌جێ بكه‌ن، چونكو فاكته‌رێ‌ ئه‌وله‌هی یێ‌ هاریكاره‌ و هه‌روه‌سا ژی جوگرافیا وێ‌ و بچووكیا پارچه‌یا نه‌خشا وێ‌. ئه‌ڤه‌ هه‌می زێده‌باری گه‌له‌ك پێنگاڤان حوكمه‌ت پێ‌ رابوویه‌ و ئه‌نجام ژی بده‌ستڤه‌ ئیناینه‌ وه‌كو لابرنا چه‌ندین كارمه‌ندێن ئاشۆپی!!.
به‌راوردكرنا داهاتێ‌ هه‌روه‌لاتیه‌كی ل به‌رامبه‌ر گه‌له‌ك ده‌وله‌تێن هه‌ڤسوی كو سه‌ره‌رای پاشكه‌فتیان به‌لێ‌ هه‌ر باشتره‌. جۆره‌كێ‌ ئازادیێ‌ هه‌یه‌، ل چو وه‌لاتان نینه‌، زێده‌باری حه‌واندنا هزاران ئاواره‌یان بیێ‌ بۆدجه‌ و ره‌وشه‌كا بێسه‌روبه‌ره‌ و ره‌هه‌ندێن شه‌رێ‌ ل سه‌ر هه‌رێمێ‌ یێ‌ تیرۆرێ‌ و یێن دیتر. ل سه‌رڤێ‌ هه‌میێ‌ را ژی ئاشكرایه‌ كو حوكمه‌تا هه‌رێمێ‌ ئه‌و هه‌می هزر كرینه‌ كو ئه‌مریكا پشتی هینگی كرین.. ئه‌ڤه‌ ژی نیشانه‌كه‌ كو ئه‌م كورد ژی دروست هزر دكه‌ین و پلان ددارێژین به‌لێ‌ هنده‌ك جاران هه‌وا به‌ره‌ڤاژی پاپۆرا مه‌ دهێت.. به‌لێ‌ ئه‌م هه‌ر دێ‌ گه‌هنه‌ كنارێ‌ ئێمن.. حاكم ژی سه‌ربۆره‌ و سه‌ركه‌فتنا ئه‌زمۆنا هه‌رێما مه‌ كوردستانێ‌.

شێرزاد نایف

ئاژانسا سپۆتینك یا رۆسى به‌رى سێ سالان نووچه‌یه‌كێ ئاشكراكرنا نهێنیێن بازارا كڕینا (36) فرۆكه‌یێن سه‌ربازى یێن ژ جۆرێ (F16) د ناڤبه‌را حوكمه‌تا به‌غدا و واشتنونێ دا به‌لاڤكربوو، هه‌لبه‌ت هێشتا پرۆسا ریفراندۆمێ چو به‌حسێن و خه‌به‌رێن وێ دا ناڤ چو (كوچ و ته‌نوویران) دا نه‌هاتبوونه‌ كرن!!، ئه‌ڤه‌ ژى هه‌ر ئه‌و به‌رده‌وامیدانه‌ یا نیازا نوورى مالكى ل سالا 2012 بۆ داخوازا كرینێ، كو ب گۆژمێ چار ملیار و نیڤ دۆلاران هاتبوو ته‌رخانكرن، هینگى ب ئاشكرایى هاتبوو به‌لاڤكرن كو مه‌ره‌م ژێ هه‌ره‌شه‌ركرنه‌ بۆ سه‌ر هه‌رێما كوردستانا عیراقێ، مالكى ب خوه‌ د كۆمبوونه‌كێ دا ئاشكراى خۆیاكربوو.
ئه‌ڤه‌ ژى خاله‌كا گرنگ و پێشچاڤه‌. خاله‌كا دیتر ژى باش بیرا مه‌ دهێت ل سالا ده‌مێ مالكى له‌شكرێ خوه‌ هێزا دیجله‌ ئینایه‌ سه‌ر قه‌ره‌ته‌په‌ و جه‌باره‌ و ده‌وربه‌رێن كه‌ركووكێ گرتین، مانه‌ گه‌فه‌ك بوو، هه‌ر بۆ سه‌ر هه‌رێمێ و ئه‌وا پشتى ریفراندۆمێ و شه‌رێن داعش و داگیركرنا كه‌ركووكێ ژ لایێ حه‌شدا شه‌عبی ڤه‌، كو گشتپرسى بۆ خوه‌ كرینه‌ به‌هانه‌، هه‌ر ئه‌و سیناریۆ بوو، كو ب مخابنى ڤه‌ ژ به‌ر خیانه‌تكرنێ شیا بكه‌ت و هه‌كه‌ نه‌هاتبا كرن، یا ب زه‌حمه‌ت بوو، بگریت، ژ به‌ر گه‌له‌ك ئه‌گه‌ران: ئێك سه‌نگه‌رێن پێشمه‌رگه‌ى و ته‌حصینات د به‌رهه‌ڤكرى بوون، بۆ شه‌ڕێ داعش، خه‌نده‌ك و تابى د كۆلایى بوون، كو هێرشێن چه‌كدارێن داعش نه‌كارن بهێنه‌ ژۆر. هه‌مى ئاماده‌باشى هه‌بوون بۆ شكاندنا هه‌ر هێرشه‌كا تیژ. دو. هێشتا ئه‌و جۆرێ هێرشێن دبیاڤێ سه‌ربازى دا دبێژنى (هجمات جس)، بۆ زانینا قه‌بار و چه‌نداتیا هێزانێ یێ به‌رامبه‌رى، حه‌شد نه‌ دشیا بكه‌ت و چ ژ سه‌روبه‌رێ پێشمه‌رگه‌ى نه‌دكر و هزره‌كا گه‌له‌ك مه‌زتر ژ كه‌توارى دكر، هه‌ر چه‌نده‌ نها ژى ئیراده‌یا پێشمه‌رگه‌ى میناكا له‌شكرێن خۆبه‌خشه‌ ل سه‌رانسه‌رى جیهانێ.
هه‌كه‌ هات و خیانه‌ت نه‌هاتبا كرن، حه‌شدا شه‌عبى دا شكه‌ستنه‌كا دژوار ئینیت و زیانێن مه‌ترسیدار ڤێ كه‌ڤن، هه‌ر وه‌كو ڤێ كه‌فتین ژى و شكه‌ستن ل گه‌له‌ك جهان ب ده‌ستڤه‌ ئینایى، به‌لێ دا پتر بن.
ئه‌و جهێن حه‌شدێ وه‌رگرتین، بیێ شه‌ڕ، پێشمه‌رگه‌ى شاره‌زایه‌كا باشتر لێ هه‌بوو، ب تایبه‌ت سنفێ مه‌دفه‌عیێ هه‌مى خال و ئارمانج ل سه‌ر نه‌خشێ سه‌ربازى و ل سه‌ر ئه‌ردى هه‌بوو، له‌ورا شیا دربێن كۆژه‌ك بداوه‌شینته‌ هێزێن حه‌شدێ، و قرا وان ئینابوو، به‌لێ نه‌هاتبوو راگه‌هاندن. به‌ره‌ڤاژى وان، ژنووى هاتبوون و چو سه‌ربۆره‌ نه‌بوون، ب راستى میلیشیایێن حه‌شدێ زۆر د بێ سه‌ربه‌ر بوون.
سێ. هه‌كه‌ به‌هه‌رمێ خیانه‌تێ هندێ مه‌زن نه‌با، ده‌ڤه‌رێن دیتر ژى یێن خلۆله‌ ب ئه‌گه‌ره‌كى یان یێ دیتر نه‌دكه‌فتن و جهێن خوه‌ به‌رنه‌ددا.
هه‌ر ژ سالا 2005 وه‌ره‌ و هه‌تا نها پرسا پێشمه‌رگه‌ى و فه‌رمیبوونا وى د دستوورێ عیراقێ دا، تشته‌كێ هه‌لاویستى بوو، پشتى هینگى ژى مالكى بۆدجه‌ و مووچه‌ یێن هه‌ین ژى بڕین، مانه‌ ئه‌ڤه‌ هه‌مى به‌رى ریفراندۆمێ بوون. مینا گولمچكا به‌فرێ لێهات و رۆژ بۆ رۆژێ مه‌زنبوون، هه‌تا كو ئه‌ڤه‌ كریه‌ بهانه‌. ئه‌ڤا حه‌یده‌ر ئه‌لعه‌بادى كرى، په‌یاما مالكى یه‌ و ئه‌وا مالكى ژى كری، هه‌ر په‌یاما داعشێ یه‌، یا داعشێ ژى هه‌ر یا سه‌دام حوسێنى یه‌، پرۆگرامێ پیلانێ نه‌یێ مه‌زهه‌بى یه‌ و نه‌یێ ئیسلامى یه‌، به‌لكو نه‌ته‌وه‌ى یه‌ و هه‌مى بهانه‌نه‌، له‌ورا ژى ستێركا ئارمامجا خوه‌ ل كارێزما ڤێ نه‌ته‌وێ گرتیه‌ كو سه‌رۆك مه‌سعود بارزانى یه‌ و میرات و مه‌رجه‌عێن كوردینیێ نه‌، له‌ورا ژى ب هه‌مى رێكا هاتن نه‌شیان چو رێكا ببه‌نه‌ هێرشكرنا كوردان و راوه‌ستاندنا دلێ وان كو كه‌ركووكه‌، ئینا رابوون، ل تێلا نازك دان و تاقمه‌ك بۆ خیاتنه‌تكاریێ به‌رهه‌ڤكرن و مه‌ره‌مێن خوه‌ د هه‌سپێ تراواده‌ دا ده‌ربازى كوردستانێ كرن. به‌لێ یا باش ئه‌وه‌ هێشتا ئه‌و دل یێ خوه‌ دقوتیت و دێ رابیته‌ ڤه‌ سه‌ر پێن و بێژیت، به‌لێ ئه‌ز كوردم و پێشمه‌رگه‌ مه‌ كا مافێ من؟!.

گه‌له‌ك كلیل هاتنه‌ جه‌رباندن بۆ ڤه‌كرنا گرێكا ئاریشێن هه‌رێما كوردستانێ، نه‌كه‌فتنه‌ به‌ر!!، هه‌روه‌كو ئه‌ڤ كۆنگرێ میۆنیخ یێ نه‌رمتر بیت و هیڤیێن ملله‌تى گه‌ش بكه‌ت؟!،
میۆنیخ وه‌كو ناڤه‌كێ دیرۆكا جیهانى ده‌مێ دهێته‌ گوهێن مرۆڤى هزرا شه‌ڕى جیهانى یێ دویێ و هیتله‌ر و …هتد. وه‌كو وه‌رچه‌رخانه‌كا دیرۆكى یا مه‌زن ده‌نگڤه‌دانا خوه‌ هه‌یه‌، ل ده‌سپێكا سالێن چلان ناڤێ بوو شوونتبل و حه‌تا بیست سال ب سه‌ر بۆرینا شه‌رێ جیهانى یێ دا چووین، ئه‌ڤ كۆنگره‌ هاته‌ هه‌بوونێ، هیتله‌ر دامه‌زرێنه‌رێ وێ بوو، ئه‌ڤ گۆنگره‌ ل ده‌سپێكێ یێ په‌یوه‌ندیدار بوو ب زانستێن له‌شكرى ڤه‌، به‌ره‌ به‌ره‌ گوهۆرین ب سه‌ر دا هاتن و حه‌تا گرنگیا وى ئه‌ڤرۆ بوویه‌ پاراستنا ئێمناهیا جیهانى.
گرنگیا وى مه‌زنتره‌ ژ ناساندنێ، ژ چ دیاره‌؟ ، بیست و ئێك وه‌لات راسته‌وخوه‌ پشكداربوون، ریكا گه‌هاندنا كێشه‌یا كوردستانێ نێزیكتر لێكر، چونكو ده‌نگێ حه‌قیێ بلندتره‌ و مژارا كۆنگره‌یى ئه‌منیه‌ته‌، ئه‌ڤ گرنگیه‌ ب 4000 زه‌لامێن ئاسایشێ دهاته‌ پاراستن. یا ژ هه‌میێ گرنكتر 80 وه‌زیرێن به‌رگریێ و ده‌رڤه‌ پشكدارن، ئه‌ون نیڤشكێ مه‌ره‌مێ، هه‌كه‌ تو ستیركا هه‌شتێ به‌ران ب ده‌ستى ل ئارمانجێ بده‌یى، هه‌ر دێ ئێك ڤێكه‌ڤیت، هه‌ردو به‌رپرسێن هه‌رێمێ سه‌رۆك وه‌زیران نێچیرڤان بارزانى و شیره‌تكارێ جڤاتا ئاسایشى مه‌سرۆر بارزانى، ب وێ نه‌رم و حه‌لینیا خوه‌ و پاریزینكێ وان یێ پڕى بهانه‌ و حه‌قی، هه‌ر دێ وه‌ریسیێن پاپۆرا ڤێ مله‌تێ هه‌ژار گرێده‌ن ب پاپۆرێن قورتالكرنا كنارێن ئارام، یا ژ هه‌میێ نێزیكتر خودانێ قه‌یرانێ ل وێرێ كه‌فته‌ (ئه‌مرلواقع)، كه‌رمكه‌ بهایێ سۆزێن خوه‌ پێشكێش بكه‌.. مانۆره‌ و مراوه‌غه‌یێن خوه‌ بچنه‌؟! ل به‌رامبه‌ر كه‌سێن مینا وه‌زیرا به‌رگریا ئه‌لمان، هه‌لبه‌ت گه‌رمترین مژار باده‌كا داعشێ بوو و ئه‌و لایه‌نێن ژناڤبرین، ب دیتنا من ئه‌نجام دێ دئه‌كتیڤ بن، ژ هه‌ر لایه‌كى ڤه‌، وه‌كو گرنگیدان ب پێشمه‌رگه‌ى و چه‌كداركرنا وى و په‌سنین بۆ هه‌ڤپه‌یمانیێن وه‌كو قولپا ناتۆ و باشتركرنا ژیانا وى، دێ هاریكاریا ئابوورێ هه‌رێمى كه‌ت. ب دیتنا من شاندێ مه‌ دێ پتر ژ دو چووچكان ب به‌ره‌كى كوژیت، باشتر بێژم هه‌كه‌ شاندێ هه‌رێما كوردستانێ یێ سه‌گڤان بیت دێ پتر ژ دو چووچكان ب به‌ره‌كى ئێخیت. نابێژم كوژیت دێ بێژم ئێخیت،، دا نه‌بیته‌ تیرۆر..!!
مه‌سرۆر بارزانى ب وێ سه‌ربۆرا چه‌ندین سالان ژبلى یا میراتێ شۆره‌شێ و تێكۆشانێن سه‌ركێشیا بزاڤا رزگاریخوازا گه‌لێ كورد، ئه‌و سه‌ربۆرا عه‌سلى یا مینا هنگڤێ چیا و شاخ و داخێن كوردستانێ و خه‌پاتا پارتى زانى، ئه‌ڤرۆ كه‌فته‌ سه‌ر مێزا رایخا ئه‌لمانى و میۆنیخ، ره‌هوریشالێن دیرۆكێ پێكڤه‌ هاتنه‌ گرێدان، ئه‌رێ ئێك دێ هه‌بیت، باشتر راستیا مه‌زلۆمه‌یه‌تا كورستانێ گه‌هینته‌ جیهانێ ژبلى خودانێ پاراستنا كوردستانێ و سنگێ ڤه‌كرى بۆ حه‌باندنا هه‌مى نه‌خۆشیان؟!. مه‌ دیت شاندێ كوردى ل كۆنگره‌ى یێ بسته‌ و چالاك و بلڤین، و چانتكا وان نه‌ یا ڤالا وه‌كو یا گه‌له‌ك خوه‌دیێن چاڤدێریكرنا تیرۆرێ.. ب ره‌خ ئێك ڤه‌ روونشتبوون و هیڤیى یه‌ ئه‌و گه‌شبینیا سه‌روسیمایێن وان ببیته‌ هێڤێنه‌ك بۆ ڤى ملله‌تێ هه‌ژار و به‌لنگاز یێ زۆر حه‌زژ سه‌ركێش و چاڤدێرێن خوه‌ دكه‌ت..

شێرزاد نایف
شه‌رێ هه‌رى دژوار بوو هه‌ر ژ ده‌سپێكا تیژبوونا ره‌نگڤه‌دانێن نێگه‌تیڤ و هسوینا كێرا كه‌ربوكینێ ل سه‌ر هه‌رێما كوردستانێ پشتى ئه‌نجامێن ریفراندۆمێ و دیاركرنا چاره‌نڤیسێ خوه‌، به‌لێ ب سیاسه‌تا نه‌رما كوردى و ب تایبه‌ت ژى كه‌سێ نێچیرڤان بارزانى ل هه‌مبه‌ر گه‌فوگۆرێن به‌غدا و ده‌وله‌تێن ده‌وربه‌ر رۆژ بۆ رۆژ ره‌وش ئارامتره‌ و ده‌نگێن تیژ یێن دهێنه‌ ئاشێ هوور!!. نها مایه‌ چه‌نده‌كێ شه‌رێ ده‌روونى ل سه‌ر هه‌ڤوه‌لاتیێن كوردستانێ و دابڕینا بۆدجێ و قووتێ خه‌لكى و برسیكرنێ، دبیت خه‌لكه‌ك چه‌نده‌كێ بێزار ببیت ژ ڤێ ره‌وشێ به‌لێ هه‌رچاوا بیت، دونیا نه‌مایه‌ وه‌كو به‌رێ كو سته‌ما به‌غدا به‌رده‌وام بمینیت پشتى كو چاڤێ دونیایێ هاتیه‌ ڤه‌كرن ل به‌رامبه‌ر هه‌مى كریاران وه‌كو ئه‌وا رژێمێن كه‌ڤن ب سه‌رێ ملله‌تێ كورد دئینا، ئه‌ڤه‌ زێده‌بارى وى سامانێ شاره‌زایى و په‌یوه‌ندیێن حوكمه‌تا هه‌رێمێ یا ڤان سالێن دووماهیێ. بۆ نموونه‌ دووماهى سه‌ره‌دانا جێگرێ وه‌زیرێ ده‌رڤه‌یێ ئه‌مریكا و وه‌زیرا به‌ره‌ڤانیا ئه‌لمانیا و وه‌زێرێ زه‌رڤه‌یێ فره‌نسا ب نێرینا من هه‌وله‌كه‌ و تێكۆشانه‌كه‌ ژ یێن سه‌رۆكێ حوكمه‌تا هه‌رێمێ بۆ شكاندنا وێ دورپێچا ئیراقی بۆ سه‌ر هه‌رێما كوردستانێ دروستكری، چونكو هه‌مى بهانه‌یێن حوكمه‌تا به‌غدا هاتینه‌ پێشكێشكرن، چو دمینیت، تنێ دیار دبیت ئه‌ڤ ملله‌ته‌ بوویه‌ قوربانى وان ململان و سیاسه‌تێن حوكمه‌تا به‌غدا ددانیته‌ پێش، به‌ره‌ڤاژى لایه‌نێ كوردى كو هه‌مى تێكۆشان و قوربانى داین پێخه‌مه‌ت راگرتنا ره‌وشا خه‌لكى، كو چونه‌مایى و و ڤێ حوكمه‌تا شۆفێنێ نه‌كرى ل هه‌مبه‌رى هه‌ڤوه‌لاتیێن كوردستانێ وه‌كو هه‌ڤوه‌لاتیێن پله‌ دو و سێ .. دمینیت ل سه‌ر شاره‌زاى و هێزا لایه‌نێ كوردى بۆ بده‌ستڤه‌ئینانا مافێن ره‌وا، وه‌كو دبێژن : ماف دهێنه‌ ستاندن ناهێنه‌ وه‌رگرتن!!. ئه‌ڤه‌ هێزه‌ ژى ل سه‌ر هه‌ولێن دیپلۆماسى دراوه‌ستن و زانینا سه‌رده‌ریكرنێ و نه‌چاركرنا جڤاكێ نیڤده‌ولى كو به‌رگریێ ژ گه‌لێن بنده‌ست بكه‌ن. ئه‌ڤان بزاڤان ژى بۆ خه‌لكى سه‌لماند كو هه‌رێمێ هه‌مى به‌هانه‌یێن به‌غدا بڕینه‌ و چو نه‌ماینه‌ ئه‌و پێ زیانا هه‌رێمێ بكه‌ن. ئێك ژ ڤان بزاڤان ژى یا نێچیرڤان بارزانی كو شیایى ئه‌وى وه‌زیرێ به‌رگری یێ ئه‌ڵمانیا بینیته‌ هه‌ولێر
پشتى سه‌ردانا سه‌رۆك وه‌زیرانی كوردستان نێچیرڤان بارزانی بۆ وڵاتێ ئه‌ڵمانیا و كۆكبوون ل گه‌ڵ سه‌ركرده‌ و كاربه‌ده‌ستێن ڤى وه‌ڵاتى جاره‌كا دیتر، ئاوایێ ژیانێ به‌ گۆری بۆیه‌رێن كورستانێ ئه‌مڕڤ جاره‌كا دیتر ئه‌ڵمانیا به‌ڵێنه‌یا خۆی بۆ حوكمه‌تا هه‌رێمێ و پێشمه‌رگه‌ى و كوردستانییان ب سه‌ردانا وه‌زیرا به‌رگریێ بۆ هه‌ولێر دوپاتكره‌ڤه‌. چاڤدێرێن سیاسی د وێ باِوه‌ریێ دانه‌ سعه‌ت ب سعه‌ت هه‌ست به‌ گۆڕانكاریا ڕیشه‌یی دهێته‌ه‌ كرن سه‌باره‌ت په‌یوه‌ندیێن هه‌ولێرێ و وه‌لاتێن زلهێز و به‌ر ب پێشڤه‌چوونا به‌رچاڤ ، ئه‌و ژى دوپات ده‌كه‌نه‌ڤه‌ كو په‌یوه‌ندیێن دبلۆماسی یێن نێچیرڤان بارزانی، عه‌بادی دئێنیته‌ سه‌ر خه‌ت و ناچار ب دیالۆگێ زێده‌تر بكه‌ت، پێشبینێن وان ئه‌ون كو هاتنا وه‌زیرێ به‌رگریێ بۆ هه‌ولێرێ دێ بیته‌ په‌یامه‌ك بۆ به‌غدا كه‌ حوكمه‌تا هه‌رێمێ ب تنێ نینه‌ و ئه‌م ژى دگه‌لداینه‌!.

شێرزاد نایف
نڤیسین ل سه‌ر خه‌لاتێ نۆبل نه‌ك تشته‌كێ رۆتینى و ساناهى یه‌، من گه‌له‌ك شه‌رم ژ مانشێتێ گران كر ده‌مێ من كیبۆرد گرتى و ل سه‌ر نڤیسى، باره‌كێ گرانه‌ و نه‌كو حه‌قێ وى نه‌ده‌مێ!!. ل سه‌رانسه‌رى جیهانێ مه‌زنرین خه‌لاته‌ و شه‌ره‌فا داهێنانێ یه‌ د هه‌مى بیاڤان دا وه‌كو ئێكه‌مین جار ئه‌لفرێد نۆبل ئه‌و به‌سمه‌ هێریه‌ ب روویێ جیهانێ ڤه‌، دبیاڤێن فیزیا و كیمیا و ساخله‌مى و وێژه‌ و ئاشتیێ دا. من گه‌له‌ك شه‌رم كر ده‌مێ من دیتى نڤیسه‌ره‌كێ ئه‌مریكى گۆتاره‌كا تێروته‌سل و پرىِ شرۆڤه‌ ل سه‌ر سه‌رۆكێ وه‌لاتێ من نێچیرڤان بارزانى نڤیسى و ل هه‌ژى خه‌لاتێ نۆبل دیتى، و ئه‌م نڤیسه‌رێن كورد ماینه‌ ب ره‌خنه‌یێن بێوژدان ڤه‌، ب خوه‌ مه‌ ئه‌و هزرنه‌كر ب وێ ده‌ربرینا جوان په‌سنا خودانێ خوه‌ بكه‌ین، مخابن ده‌مێ زكێ مه‌ برسى دبیت، ئه‌م دلسۆزیێ ژده‌ست دده‌ین و ئه‌و كه‌سێ ل رۆژا خۆشیێ گه‌له‌ك بۆ مه‌كرى و مه‌ ل ده‌مێ نه‌خۆشیێ ژبیركرى!!. ئه‌ڤه‌ نه‌ك مجامله‌یه‌ یان مه‌زنكرنه‌كه‌، ئه‌ڤه‌ راستیه‌كه‌، مانه‌ ئه‌م هه‌مى ب مووچه‌ ئێخستین، خوه‌ گه‌هشتبوو وى راده‌ى موچه‌یێن رێزلێنانێ ژى بۆ نڤیسه‌ر و داهێنه‌ران ده‌رێخستبوو.. یا گرنگ ئه‌ڤه‌ نه‌ك مژارا مه‌یه‌، به‌لێ ئه‌ڤا وى جامێرێ ئه‌مریكى نڤیسه‌ره‌كێ هێژا () ل سه‌ر كه‌سێ ناڤبرى دنڤیسیت و واشنتون تایمز به‌لاڤه‌ دكه‌ت، بهێلن ئه‌ز ژى رۆناهیه‌كێ به‌رده‌مه‌ سه‌ر خواندنا وى.
مانێ ب كوردى دبێژن، كوڕ مه‌ره‌كا بابێ رادكه‌ت.!! له‌ورا ژى میراتێ ئاشتیێ یێ بابێ وى شه‌هیدێ نه‌مر ئدریس بارزانى ب ناڤێ (ئه‌ندازیارێ ئاشتیێ) به‌رنیاس بوو، نێچریڤان بارزانى شیا وه‌كو میه‌كى ژ ناڤ هه‌ڤیرێ بینیته‌ ده‌ر و مه‌ و ده‌ڤه‌رێ ژ شه‌ڕه‌كى دژوار و كوژه‌ك قورتال بكه‌ت، گیانێن مه‌ بپارێزیت و نه‌هێلا زێده‌تر خوین بهێته‌ رێتن، ده‌ستێ خوه‌ دابه‌ر له‌هیا ئاگرى ل هه‌مى ده‌وروبه‌ران و ب شاره‌زایا خوه‌ یا سیاسى و ئه‌ڤ سالێن ب سه‌ربۆر جهێ خوه‌ گرتن. چونكو هه‌ره‌شه‌ نه‌ك تشته‌كێ ساده‌ و ساناهى بوو، ئه‌ڤه‌ ره‌نگڤه‌دانا مه‌زنترین وه‌لاتێن زلهێز بوو ل دژى هه‌رێمێ كو ب ئێكجارى ناڤێ كوردستان و كوردبوونێ ژناڤ ببه‌ن، به‌ره‌ به‌ره‌ شیا وێ ره‌وشێ بڤه‌گریت و مه‌ ژ مه‌ترسیێن كوژه‌ك قورتال بكه‌ت و شه‌رێن مه‌زنێن تائیفى و ده‌ولى بهێنه‌كرن ل ده‌ڤه‌رێ، خه‌لاتێ نۆبل بۆ ئاشتیێ مه‌زنترین ده‌ستكه‌فته‌ نه‌ تنێ بۆ كه‌سێ وى به‌لكو بۆ ملله‌تێ كورد هه‌میێ، چونكو خه‌لاتێ نۆبل یێ ئاشتیێ مه‌زنترین حنێره‌ كو ببیته‌ شوونپبل بناڤ چاڤێن وان كه‌س و لایه‌نان دا، یێن خواستین ناڤێ تیرۆرێ و شه‌رخوازیێ بۆ لایه‌نێ كوردى بینن، نه‌شیان و به‌لكو نێچیرڤان بارزانى ئه‌و خه‌ون كرنه‌ هه‌لم و به‌ره‌ڤاژى لێ زڤراندن، ب نه‌رماتى و حه‌لیمانیا خوه‌، توندره‌ویا لایه‌نێ به‌غدا هاته‌ سه‌لماندن. چونكو سیاسه‌ت ئه‌ڤه‌یه‌، تو چاوا ب ته‌نازولاتان خوه‌ بلندبكه‌ى و لایه‌نێ به‌رامبه‌ر نزم بكه‌ى.! بۆ هه‌میان دیاربوو كا كیژان لایه‌نه‌ هند دره‌و ل خه‌لكى كرین.؟ دێ بودجه‌ى فرێكه‌ین و دێ مووچه‌یان فرێكه‌ین.. پا كا چ دیار نه‌بوو؟!. تشتێ ژ هه‌میێ ب حنێتر ئه‌وه‌ كو كه‌سێ رۆژهه‌لاتى هه‌ر یێ دووربوویه‌ ژ وه‌رگرتنا ڤى خه‌لاتى، ته‌نها یێن وه‌كو ڤان كه‌سێن مه‌ گوه ل ناڤێن وان بووین، یاسر عه‌ره‌فات، ئه‌نوه‌ر سادات، د. به‌رادعی، ئه‌حمه‌د زویل دكیمیایێ دا، نه‌جیب مه‌حفۆز د وێژه‌یى دا ..هتد.
ده‌ستكه‌فته‌ و هه‌ژى یه‌ نڤیسه‌رێن وه‌كو مه‌ شانازیێ پێ ببه‌ن و كه‌یفێ پێ بكه‌ن، بلا ئێكێ كورد ژى كو ژ هه‌مى مافان بێبه‌هر بووى… شانازیێ ژى پێ ببه‌ت، چونكو ئه‌ڤ جۆره‌ خه‌لاته‌ هه‌ژى ملله‌تانه‌، هه‌ژى گه‌لانه‌، ئه‌ڤجا چاوا سه‌رۆكێ مرۆڤى ببه‌ت، و د چ بیاڤ دا؟ ئاشتیێ.. سه‌رێ ژۆرى یه‌ و دێ ل سه‌ر نڤیسم و چه‌ندى ب ئه‌كتیڤى ل سه‌ر بنڤیسین هه‌ر كێمه‌.. له‌ورا گه‌لى نڤیسه‌ران هه‌رن ل سه‌ر بنڤیسن و دیرۆكێ پێ ببخه‌ملینن. ما كى مایه‌ خودان و چ مایه‌ چ بلى ڤى كه‌سى و ڤى خه‌لاتى؟!.. هه‌میا مه‌ هه‌یى هه‌ر ب كه‌ربا مه‌ ب خوه‌ مه‌ ژده‌ست دا .. ما ب ده‌ست كێ دكه‌ڤیت ئه‌ڤ خه‌لاته‌؟! . هه‌كه‌ ئه‌ڤ چه‌نده‌ ژى بۆ مه‌ نه‌هاتبا، دا هه‌ناسا مه‌ ب چ فره‌ه بیت؟!.

شێرزاد نایف

هه‌وه‌كو ده‌سپێكا ژۆرداهی یا ل به‌رامبه‌ر گه‌ل و حوكمه‌تا هه‌رێما كوردستانێ، وه‌كو دبێژن هه‌ر ژێهه‌لیه‌كى ژۆردانیه‌ك ل دووڤرا دهێت، ڤى دۆخێ شێل و بێل یێ یێ ئه‌م تێدا دپه‌ڕین، ب راستى ل ده‌سپێكێ ئه‌م گوهاشاندین و دربه‌كێ نه‌خۆش ب هه‌دارا مه‌ كه‌فت، به‌لێ بزاڤێن كه‌سێ سه‌رۆكێ حوكمه‌تێ، ئه‌م هه‌مى دزانین و لایه‌نێن سه‌رده‌ریێ ژى ل گه‌ل كه‌ن، كا ئه‌و ب چو جۆر شه‌ڕێ نه‌رم دكه‌ت!!. نا هه‌لئێخیت و زیق ناكه‌ت، به‌لێ هه‌مى دزانن كو ئیراده‌یا گه‌ل و بریارا چاره‌نڤیس نه‌مازه‌ ئه‌وا د ئه‌نجامێ ریفراندۆمێ دا هاتیه‌ دان. وه‌كو زله‌هه‌كێ بوو ل رویێ هه‌مى وان لایه‌نان یێن نها رێگریێ ل ژین و ژیارا مه‌ دكه‌ن. راسته‌ یارى یا مه‌زن و ل پشت په‌رده‌یان و نه‌یا راسته‌ و خوه‌ ، ب تنێ هنده‌ك جاران ئاشكرابوویه‌.
وه‌كو په‌یڤینا دبێژیت (كێتكا میرا یا ب زنجیرا)، ئه‌نجامێن ریفراندۆمێ ژى دبیت نه‌ دراسته‌ وخوه‌ بن، به‌لێ گه‌له‌ك مژارێن مری ساخكرن و یێن نڤستى هشیاركرن. هه‌روه‌كو تۆڤ یێ دپشكڤیت، چونكو هه‌ر زه‌حمه‌ته‌كا تو ببه‌ى هه‌ر دێ تشته‌ك هێته‌ شوونێ، مه‌ هه‌میان ده‌نگێن خوه‌ دان و نها بارۆڤه‌ ب سه‌ردا هات و مه‌ وه‌كو ملله‌ت دڤێت خوه‌ ژ به‌ر نه‌ڤاهێتبا و حوكمه‌ت هێلابا د ناڤدا، چونكو مه‌ ژى تێرا خوه‌ بریارا خوه‌ دایه‌، دبیت رێژه‌كا پتر بكه‌ڤیته‌ سه‌ر ستویێ حوكمه‌تێ. نها پشتى ئه‌و سه‌رهلدانێن ئیرانێ جرڤه‌ك ب ئیرانێ كه‌فت، راسته‌ و 100% مه‌ ده‌ست تێدا نینه‌، و شۆره‌ش یا ته‌نكۆلۆجی بوو و بهاره‌ك بوو به‌لێ ، گوهكێشه‌نه‌ك بوو كو ژبلى ته‌هران به‌غدا ژى تێكهه‌ژاند و نه‌چارى دانوستاندنێ كر ل گه‌ل نێچریڤان بارزانى روونن و بهێنه‌ ئاشێ هوور. ئه‌ڤه‌ ژلایه‌كى ڤه‌ و ژ لایه‌كێ دى ڤه‌، حوكمه‌تا هه‌رێمى ب زمانێ دیالۆگێ و ئاشتیێ ونه‌رماتیێ بۆ خه‌لكى دیاركر، ئه‌ڤه‌ ژى چه‌كه‌ك و شێوازه‌كه‌ كو تبلا وان د چاڤێ مه‌ دا نه‌بیت به‌لكو یێ مه‌ دچاڤێ وان دابیت. ژبلى وان سه‌ركه‌فتێن پێشمه‌رگه‌ى ل گه‌له‌ك جهان تۆماركرین وه‌كو پردێ و عێن عوێز و مه‌حمودیه‌، هێز و به‌رگیریا خۆ نیشا جیهانێ داى، ده‌سكه‌فته‌ك بوو، ئه‌ڤ هه‌مى جۆره‌ چه‌كه‌ن ب ده‌ستێن سه‌رۆكێ حوكمه‌تێ زێده‌بارى شه‌رعیه‌تا قانوونى و دستوورى هه‌یى. كه‌س نه‌شێت بۆ خوه‌ بكه‌ته‌ به‌هانه‌. هه‌لبه‌ت ژبلى وان كۆمپانیێن پترۆلێ یێن ل گه‌ل هه‌رێمێ گرێبه‌ست گرێداین مه‌ دگه‌له‌ك گۆتاران دا ب تێر و ته‌سه‌ل ئاماژه‌پێ دایى، به‌لێ ئه‌ڤێ جارێ مه‌ره‌مان من چه‌كێ ریفراندۆمێ بوویه‌ وه‌كو چه‌كه‌كێ ڤه‌شارتى.. هه‌بوونا وى خاله‌كا ره‌شه‌ ب ناڤچاڤێن دوژمن و نه‌حه‌زێن ڤى ئه‌ردى یه‌ و بۆ مه‌ ده‌ستكه‌فته‌كه‌ چو هاتبیته‌ه‌ سركرن یان نڤاندن..