شێرزاد نایف
شه‌رێ هه‌رى دژوار بوو هه‌ر ژ ده‌سپێكا تیژبوونا ره‌نگڤه‌دانێن نێگه‌تیڤ و هسوینا كێرا كه‌ربوكینێ ل سه‌ر هه‌رێما كوردستانێ پشتى ئه‌نجامێن ریفراندۆمێ و دیاركرنا چاره‌نڤیسێ خوه، به‌لێ ب سیاسه‌تا نه‌رما كوردى و ب تایبه‌ت ژى كه‌سێ نێچیرڤان بارزانى ل هه‌مبه‌ر گه‌فوگۆرێن به‌غدا و ده‌وله‌تێن ده‌وربه‌ر رۆژ بۆ رۆژ ره‌وش ئارامتره و ده‌نگێن تیژ یێن دهێنه ئاشێ هوور!!. نها مایه چه‌نده‌كێ شه‌رێ ده‌روونى ل سه‌ر هه‌ڤوه‌لاتیێن كوردستانێ و دابڕینا بۆدجێ و قووتێ خه‌لكى و برسیكرنێ، دبیت خه‌لكه‌ك چه‌نده‌كێ بێزار ببیت ژ ڤێ ره‌وشێ به‌لێ هه‌رچاوا بیت، دونیا نه‌مایه وه‌كو به‌رێ كو سته‌ما به‌غدا به‌رده‌وام بمینیت پشتى كو چاڤێ دونیایێ هاتیه ڤه‌كرن ل به‌رامبه‌ر هه‌مى كریاران وه‌كو ئه‌وا رژێمێن كه‌ڤن ب سه‌رێ ملله‌تێ كورد دئینا، ئه‌ڤه زێده‌بارى وى سامانێ شاره‌زایى و په‌یوه‌ندیێن حوكمه‌تا هه‌رێمێ یا ڤان سالێن دووماهیێ. بۆ نموونه دووماهى سه‌ره‌دانا جێگرێ وه‌زیرێ ده‌رڤه‌یێ ئه‌مریكا و وه‌زیرا به‌ره‌ڤانیا ئه‌لمانیا و وه‌زێرێ زه‌رڤه‌یێ فره‌نسا ب نێرینا من هه‌وله‌كه و تێكۆشانه‌كه ژ یێن سه‌رۆكێ حوكمه‌تا هه‌رێمێ بۆ شكاندنا وێ دورپێچا ئیراقی بۆ سه‌ر هه‌رێما كوردستانێ دروستكری، چونكو هه‌مى بهانه‌یێن حوكمه‌تا به‌غدا هاتینه پێشكێشكرن، چو دمینیت، تنێ دیار دبیت ئه‌ڤ ملله‌ته بوویه قوربانى وان ململان و سیاسه‌تێن حوكمه‌تا به‌غدا ددانیته پێش، به‌ره‌ڤاژى لایه‌نێ كوردى كو هه‌مى تێكۆشان و قوربانى داین پێخه‌مه‌ت راگرتنا ره‌وشا خه‌لكى، كو چونه‌مایى و و ڤێ حوكمه‌تا شۆفێنێ نه‌كرى ل هه‌مبه‌رى هه‌ڤوه‌لاتیێن كوردستانێ وه‌كو هه‌ڤوه‌لاتیێن پله دو و سێ .. دمینیت ل سه‌ر شاره‌زاى و هێزا لایه‌نێ كوردى بۆ بده‌ستڤه‌ئینانا مافێن ره‌وا، وه‌كو دبێژن : ماف دهێنه ستاندن ناهێنه وه‌رگرتن!!. ئه‌ڤه هێزه ژى ل سه‌ر هه‌ولێن دیپلۆماسى دراوه‌ستن و زانینا سه‌رده‌ریكرنێ و نه‌چاركرنا جڤاكێ نیڤده‌ولى كو به‌رگریێ ژ گه‌لێن بنده‌ست بكه‌ن. ئه‌ڤان بزاڤان ژى بۆ خه‌لكى سه‌لماند كو هه‌رێمێ هه‌مى به‌هانه‌یێن به‌غدا بڕینه و چو نه‌ماینه ئه‌و پێ زیانا هه‌رێمێ بكه‌ن. ئێك ژ ڤان بزاڤان ژى یا نێچیرڤان بارزانی كو شیایى ئه‌وى وه‌زیرێ به‌رگری یێ ئه‌ڵمانیا بینیته هه‌ولێر
پشتى سه‌ردانا سه‌رۆك وه‌زیرانی كوردستان نێچیرڤان بارزانی بۆ وڵاتێ ئه‌ڵمانیا و كۆكبوون ل گه‌ڵ سه‌ركرده و كاربه‌ده‌ستێن ڤى وه‌ڵاتى جاره‌كا دیتر، ئاوایێ ژیانێ به گۆری بۆیه‌رێن كورستانێ ئه‌مڕڤ جاره‌كا دیتر ئه‌ڵمانیا به‌ڵێنه‌یا خۆی بۆ حوكمه‌تا هه‌رێمێ و پێشمه‌رگه‌ى و كوردستانییان ب سه‌ردانا وه‌زیرا به‌رگریێ بۆ هه‌ولێر دوپاتكره‌ڤه. چاڤدێرێن سیاسی د وێ باِوه‌ریێ دانه سعه‌ت ب سعه‌ت هه‌ست به گۆڕانكاریا ڕیشه‌یی دهێته‌ه كرن سه‌باره‌ت په‌یوه‌ندیێن هه‌ولێرێ و وه‌لاتێن زلهێز و به‌ر ب پێشڤه‌چوونا به‌رچاڤ ، ئه‌و ژى دوپات ده‌كه‌نه‌ڤه كو په‌یوه‌ندیێن دبلۆماسی یێن نێچیرڤان بارزانی، عه‌بادی دئێنیته سه‌ر خه‌ت و ناچار ب دیالۆگێ زێده‌تر بكه‌ت، پێشبینێن وان ئه‌ون كو هاتنا وه‌زیرێ به‌رگریێ بۆ هه‌ولێرێ دێ بیته په‌یامه‌ك بۆ به‌غدا كه حوكمه‌تا هه‌رێمێ ب تنێ نینه و ئه‌م ژى دگه‌لداینه!.
نووترين نووچه
- سەرۆك بارزانی ب گوهلێبوونا دەنگوباسێ مالئاڤاییكرنا ئیبراهیم گاباری خەمبار بوو
- ئامینا زكری: سەرۆك بارزانی ژێدەرێ باوەری و هێزا ئافرەتا كوردە
- رێككەفتن بۆ كڕینا پەترۆلا كوردستانێ هاتیە كرن و تنێ هنارتن مایە
- ژ ترسا كارڤەدانێن پارتی و بایكۆتكرنا هەلبژارتنان دێ بەغدا بڕیارەكێ ل دۆر مووچەی دەت
- هەرێما كوردستانێ بوویە پەناگەهەكا ئارام بۆ ئاشۆرییان
- نێچیرڤان بارزانی ل گەل شاندەكێ ئاشۆرییێن ئەمریكا كۆمبوو
- بۆ كونترۆلكرنا میلیشیایان ئیراقێ پێدڤی ب قانوون و دادگەهێ هەیە
- هەلبژارتن ل ئیراقێ گوهۆڕینان پەیدا ناكەن
- ئیراقێ پێدڤی ب دادگەهەكێ هەیە كو ب رێیا پشتەڤانییا مادەیا 92 یا دەستوورێ بهێتە دروستكرن
- سەركرداتی و حوكمەت و خەلكێ ئیماراتی هەردەم هاریكار و پشتەڤانێن كوردستانێ بوون
شیرزاد نایف
نۆبلا ئاشتیێ ب ده‌ست كێ دكه‌ڤیت؟!
شێرزاد نایف
نڤیسین ل سه‌ر خه‌لاتێ نۆبل نه‌ك تشته‌كێ رۆتینى و ساناهى یه، من گه‌له‌ك شه‌رم ژ مانشێتێ گران كر ده‌مێ من كیبۆرد گرتى و ل سه‌ر نڤیسى، باره‌كێ گرانه و نه‌كو حه‌قێ وى نه‌ده‌مێ!!. ل سه‌رانسه‌رى جیهانێ مه‌زنرین خه‌لاته و شه‌ره‌فا داهێنانێ یه د هه‌مى بیاڤان دا وه‌كو ئێكه‌مین جار ئه‌لفرێد نۆبل ئه‌و به‌سمه هێریه ب روویێ جیهانێ ڤه، دبیاڤێن فیزیا و كیمیا و ساخله‌مى و وێژه و ئاشتیێ دا. من گه‌له‌ك شه‌رم كر ده‌مێ من دیتى نڤیسه‌ره‌كێ ئه‌مریكى گۆتاره‌كا تێروته‌سل و پرىِ شرۆڤه ل سه‌ر سه‌رۆكێ وه‌لاتێ من نێچیرڤان بارزانى نڤیسى و ل هه‌ژى خه‌لاتێ نۆبل دیتى، و ئه‌م نڤیسه‌رێن كورد ماینه ب ره‌خنه‌یێن بێوژدان ڤه، ب خوه مه ئه‌و هزرنه‌كر ب وێ ده‌ربرینا جوان په‌سنا خودانێ خوه بكه‌ین، مخابن ده‌مێ زكێ مه برسى دبیت، ئه‌م دلسۆزیێ ژده‌ست دده‌ین و ئه‌و كه‌سێ ل رۆژا خۆشیێ گه‌له‌ك بۆ مه‌كرى و مه ل ده‌مێ نه‌خۆشیێ ژبیركرى!!. ئه‌ڤه نه‌ك مجامله‌یه یان مه‌زنكرنه‌كه، ئه‌ڤه راستیه‌كه، مانه ئه‌م هه‌مى ب مووچه ئێخستین، خوه گه‌هشتبوو وى راده‌ى موچه‌یێن رێزلێنانێ ژى بۆ نڤیسه‌ر و داهێنه‌ران ده‌رێخستبوو.. یا گرنگ ئه‌ڤه نه‌ك مژارا مه‌یه، به‌لێ ئه‌ڤا وى جامێرێ ئه‌مریكى نڤیسه‌ره‌كێ هێژا () ل سه‌ر كه‌سێ ناڤبرى دنڤیسیت و واشنتون تایمز به‌لاڤه دكه‌ت، بهێلن ئه‌ز ژى رۆناهیه‌كێ به‌رده‌مه سه‌ر خواندنا وى.
مانێ ب كوردى دبێژن، كوڕ مه‌ره‌كا بابێ رادكه‌ت.!! له‌ورا ژى میراتێ ئاشتیێ یێ بابێ وى شه‌هیدێ نه‌مر ئدریس بارزانى ب ناڤێ (ئه‌ندازیارێ ئاشتیێ) به‌رنیاس بوو، نێچریڤان بارزانى شیا وه‌كو میه‌كى ژ ناڤ هه‌ڤیرێ بینیته ده‌ر و مه و ده‌ڤه‌رێ ژ شه‌ڕه‌كى دژوار و كوژه‌ك قورتال بكه‌ت، گیانێن مه بپارێزیت و نه‌هێلا زێده‌تر خوین بهێته رێتن، ده‌ستێ خوه دابه‌ر له‌هیا ئاگرى ل هه‌مى ده‌وروبه‌ران و ب شاره‌زایا خوه یا سیاسى و ئه‌ڤ سالێن ب سه‌ربۆر جهێ خوه گرتن. چونكو هه‌ره‌شه نه‌ك تشته‌كێ ساده و ساناهى بوو، ئه‌ڤه ره‌نگڤه‌دانا مه‌زنترین وه‌لاتێن زلهێز بوو ل دژى هه‌رێمێ كو ب ئێكجارى ناڤێ كوردستان و كوردبوونێ ژناڤ ببه‌ن، به‌ره به‌ره شیا وێ ره‌وشێ بڤه‌گریت و مه ژ مه‌ترسیێن كوژه‌ك قورتال بكه‌ت و شه‌رێن مه‌زنێن تائیفى و ده‌ولى بهێنه‌كرن ل ده‌ڤه‌رێ، خه‌لاتێ نۆبل بۆ ئاشتیێ مه‌زنترین ده‌ستكه‌فته نه تنێ بۆ كه‌سێ وى به‌لكو بۆ ملله‌تێ كورد هه‌میێ، چونكو خه‌لاتێ نۆبل یێ ئاشتیێ مه‌زنترین حنێره كو ببیته شوونپبل بناڤ چاڤێن وان كه‌س و لایه‌نان دا، یێن خواستین ناڤێ تیرۆرێ و شه‌رخوازیێ بۆ لایه‌نێ كوردى بینن، نه‌شیان و به‌لكو نێچیرڤان بارزانى ئه‌و خه‌ون كرنه هه‌لم و به‌ره‌ڤاژى لێ زڤراندن، ب نه‌رماتى و حه‌لیمانیا خوه، توندره‌ویا لایه‌نێ به‌غدا هاته سه‌لماندن. چونكو سیاسه‌ت ئه‌ڤه‌یه، تو چاوا ب ته‌نازولاتان خوه بلندبكه‌ى و لایه‌نێ به‌رامبه‌ر نزم بكه‌ى.! بۆ هه‌میان دیاربوو كا كیژان لایه‌نه هند دره‌و ل خه‌لكى كرین.؟ دێ بودجه‌ى فرێكه‌ین و دێ مووچه‌یان فرێكه‌ین.. پا كا چ دیار نه‌بوو؟!. تشتێ ژ هه‌میێ ب حنێتر ئه‌وه كو كه‌سێ رۆژهه‌لاتى هه‌ر یێ دووربوویه ژ وه‌رگرتنا ڤى خه‌لاتى، ته‌نها یێن وه‌كو ڤان كه‌سێن مه گوه ل ناڤێن وان بووین، یاسر عه‌ره‌فات، ئه‌نوه‌ر سادات، د. به‌رادعی، ئه‌حمه‌د زویل دكیمیایێ دا، نه‌جیب مه‌حفۆز د وێژه‌یى دا ..هتد.
ده‌ستكه‌فته و هه‌ژى یه نڤیسه‌رێن وه‌كو مه شانازیێ پێ ببه‌ن و كه‌یفێ پێ بكه‌ن، بلا ئێكێ كورد ژى كو ژ هه‌مى مافان بێبه‌هر بووى… شانازیێ ژى پێ ببه‌ت، چونكو ئه‌ڤ جۆره خه‌لاته هه‌ژى ملله‌تانه، هه‌ژى گه‌لانه، ئه‌ڤجا چاوا سه‌رۆكێ مرۆڤى ببه‌ت، و د چ بیاڤ دا؟ ئاشتیێ.. سه‌رێ ژۆرى یه و دێ ل سه‌ر نڤیسم و چه‌ندى ب ئه‌كتیڤى ل سه‌ر بنڤیسین هه‌ر كێمه.. له‌ورا گه‌لى نڤیسه‌ران هه‌رن ل سه‌ر بنڤیسن و دیرۆكێ پێ ببخه‌ملینن. ما كى مایه خودان و چ مایه چ بلى ڤى كه‌سى و ڤى خه‌لاتى؟!.. هه‌میا مه هه‌یى هه‌ر ب كه‌ربا مه ب خوه مه ژده‌ست دا .. ما ب ده‌ست كێ دكه‌ڤیت ئه‌ڤ خه‌لاته؟! . هه‌كه ئه‌ڤ چه‌نده ژى بۆ مه نه‌هاتبا، دا هه‌ناسا مه ب چ فره‌ه بیت؟!.
چه‌كێ سیاسى یێ ڤه‌شارتى یێ حوكمه‌تا هه‌رێمێ!!
شێرزاد نایف
هه‌وه‌كو ده‌سپێكا ژۆرداهی یا ل به‌رامبه‌ر گه‌ل و حوكمه‌تا هه‌رێما كوردستانێ، وه‌كو دبێژن هه‌ر ژێهه‌لیه‌كى ژۆردانیه‌ك ل دووڤرا دهێت، ڤى دۆخێ شێل و بێل یێ یێ ئه‌م تێدا دپه‌ڕین، ب راستى ل ده‌سپێكێ ئه‌م گوهاشاندین و دربه‌كێ نه‌خۆش ب هه‌دارا مه كه‌فت، به‌لێ بزاڤێن كه‌سێ سه‌رۆكێ حوكمه‌تێ، ئه‌م هه‌مى دزانین و لایه‌نێن سه‌رده‌ریێ ژى ل گه‌ل كه‌ن، كا ئه‌و ب چو جۆر شه‌ڕێ نه‌رم دكه‌ت!!. نا هه‌لئێخیت و زیق ناكه‌ت، به‌لێ هه‌مى دزانن كو ئیراده‌یا گه‌ل و بریارا چاره‌نڤیس نه‌مازه ئه‌وا د ئه‌نجامێ ریفراندۆمێ دا هاتیه دان. وه‌كو زله‌هه‌كێ بوو ل رویێ هه‌مى وان لایه‌نان یێن نها رێگریێ ل ژین و ژیارا مه دكه‌ن. راسته یارى یا مه‌زن و ل پشت په‌رده‌یان و نه‌یا راسته و خوه ، ب تنێ هنده‌ك جاران ئاشكرابوویه.
وه‌كو په‌یڤینا دبێژیت (كێتكا میرا یا ب زنجیرا)، ئه‌نجامێن ریفراندۆمێ ژى دبیت نه دراسته وخوه بن، به‌لێ گه‌له‌ك مژارێن مری ساخكرن و یێن نڤستى هشیاركرن. هه‌روه‌كو تۆڤ یێ دپشكڤیت، چونكو هه‌ر زه‌حمه‌ته‌كا تو ببه‌ى هه‌ر دێ تشته‌ك هێته شوونێ، مه هه‌میان ده‌نگێن خوه دان و نها بارۆڤه ب سه‌ردا هات و مه وه‌كو ملله‌ت دڤێت خوه ژ به‌ر نه‌ڤاهێتبا و حوكمه‌ت هێلابا د ناڤدا، چونكو مه ژى تێرا خوه بریارا خوه دایه، دبیت رێژه‌كا پتر بكه‌ڤیته سه‌ر ستویێ حوكمه‌تێ. نها پشتى ئه‌و سه‌رهلدانێن ئیرانێ جرڤه‌ك ب ئیرانێ كه‌فت، راسته و 100% مه ده‌ست تێدا نینه، و شۆره‌ش یا ته‌نكۆلۆجی بوو و بهاره‌ك بوو به‌لێ ، گوهكێشه‌نه‌ك بوو كو ژبلى ته‌هران به‌غدا ژى تێكهه‌ژاند و نه‌چارى دانوستاندنێ كر ل گه‌ل نێچریڤان بارزانى روونن و بهێنه ئاشێ هوور. ئه‌ڤه ژلایه‌كى ڤه و ژ لایه‌كێ دى ڤه، حوكمه‌تا هه‌رێمى ب زمانێ دیالۆگێ و ئاشتیێ ونه‌رماتیێ بۆ خه‌لكى دیاركر، ئه‌ڤه ژى چه‌كه‌ك و شێوازه‌كه كو تبلا وان د چاڤێ مه دا نه‌بیت به‌لكو یێ مه دچاڤێ وان دابیت. ژبلى وان سه‌ركه‌فتێن پێشمه‌رگه‌ى ل گه‌له‌ك جهان تۆماركرین وه‌كو پردێ و عێن عوێز و مه‌حمودیه، هێز و به‌رگیریا خۆ نیشا جیهانێ داى، ده‌سكه‌فته‌ك بوو، ئه‌ڤ هه‌مى جۆره چه‌كه‌ن ب ده‌ستێن سه‌رۆكێ حوكمه‌تێ زێده‌بارى شه‌رعیه‌تا قانوونى و دستوورى هه‌یى. كه‌س نه‌شێت بۆ خوه بكه‌ته به‌هانه. هه‌لبه‌ت ژبلى وان كۆمپانیێن پترۆلێ یێن ل گه‌ل هه‌رێمێ گرێبه‌ست گرێداین مه دگه‌له‌ك گۆتاران دا ب تێر و ته‌سه‌ل ئاماژه‌پێ دایى، به‌لێ ئه‌ڤێ جارێ مه‌ره‌مان من چه‌كێ ریفراندۆمێ بوویه وه‌كو چه‌كه‌كێ ڤه‌شارتى.. هه‌بوونا وى خاله‌كا ره‌شه ب ناڤچاڤێن دوژمن و نه‌حه‌زێن ڤى ئه‌ردى یه و بۆ مه ده‌ستكه‌فته‌كه چو هاتبیته‌ه سركرن یان نڤاندن..
نێچیرڤان بارزانى د ماراسۆنا سیاسى دا
شێرزاد نایف
گه‌میڤانیا ده‌ریایا سیاسى كاره‌كێ ب سه‌رئیش و سه‌خته، پێلێن مه‌زن هه‌نه و باروبارۆڤه دنه‌خۆشن، دمینیت شاره‌زایى و رۆلێ سه‌ركێشێ پاپۆرێ، گیانه‌كێ وه‌رزشى و تێگه‌هشتنا لایه‌نێ به‌رامبه‌ر دمینیت، كا ب چو رێ سه‌رده‌ریێ ل گه‌ل بكه‌ى، ئها ئه‌ڤه ئه‌م یێن د بۆته‌كیا قه‌یران و كێشه‌یێن دوژمنان دا دژین زێده‌بارى یێن خوه بخوه ژى، كى یه به‌ره‌ڤانیێ ژ مافێن مه دكه‌ت؟!، ئه‌و هیڤیێن ڤى ملله‌تى ب خوینا خوه نه‌خشاندین كه‌فتنه سه‌ر ده‌ستێ سه‌رۆكێ حوكمه‌تى، به‌لێ هه‌كه ئه‌م فۆكسه‌كا هوور لێبكه‌ین ب ره‌نگه‌كێ بابه‌تیانه دێ دیار بیت كو ل ده‌سپێكا خواندنا مه كو ئێك ژ وان هه‌ولێن بتێكۆشان، دیدارا نێچریڤان بارزانى ل گه‌ل وى كه‌سێ ئاسێ یێ خوه ل ده‌سپێكا ئاریشێ به‌رسڤ نه‌ددان، كو حه‌یده‌ر ئه‌لعه‌بادى یه، ئاماژه‌كێ ئاشكه‌رایه كو جڤاكێ نیڤده‌ولى نه‌چاركریه ل گه‌ل نوونه‌رێ راسته‌قینه‌یێ خه‌لكێ هه‌رێما كوردستانێ كۆمببیته‌ڤه، كو ب دروستى هه‌رێمه‌كا شه‌رعى یه و حوكمه‌تا خوه هه‌یه و دڤێت دانوستان بهێنه كرن وه‌كو وێ دڤێت و نه‌ك ب زمانێ شه‌ر و هه‌ره‌شه‌یان. دپیلۆماسیه‌تا نێچریڤان بارزانى دسه‌لمینیت كو باش ده‌ستێ خوه دانایه سه‌ر برینێ كو ئاریشه دڤێت دناڤبه‌را هه‌ولێر و به‌غدا دا بهێته چاره‌سه‌ركرن، دوور ژ سلبوونا خه‌له‌كى كو دناڤا حزبا وى دایه، ئه‌ڤه تشته‌كێ دى یه، بلا د ناڤبه‌را دو كڤانان دابیت!!. هه‌مى كه‌سێن نێزیكى ڤێ دیپلۆماسیه‌تێ بووین دزانن كو سیاسه‌تا وى یا نه‌رم و جهگیره بۆ گه‌هشتنا ئارمانجان!!. و كه‌س جهێ كه‌یێ ناگریت، باش و باش د نیازێن به‌غدا دگه‌هیت و دزانى كو رۆژه‌ك دێ هێت كو به‌غدا بۆدجه‌یا هه‌رێمى كه‌ته كاره‌ته‌كا فشارێ ل سه‌ر خه‌لكێ هه‌رێمێ، له‌ورا ب دیتنا من زویكا ڤێڕا گه‌هشت هه‌ر چه‌نده ژیانا خه‌لكه‌كى كره د نه‌خۆشیێ دا و ئه‌ڤه بوو نیازا به‌غدا هێشتا ژى خرباتر بۆ دارێتیه، به‌لێ ب دیتنا من قه‌یران به‌ر ب ژۆرداهیێ یه ئێدى! كو ئه‌ڤه ببا سزادانا هه‌ڤوه‌لاتیێن هه‌رێمێ بۆ ریفراندۆمێ و بریاردانا سه‌ربخوه‌یێ. چونكو ب هه‌مى رێیان هاتن نه‌شیان زیانان بجه‌هینن، وه‌كو ده‌ست ژكاركێشانا سه‌رۆكى، وه‌كو به‌رسڤه‌دانه‌كتا ب هێزبوو بۆ به‌غدا كو به‌هانه‌یێن وێ لاواز ببن ل هه‌مبه‌ر هه‌رێمێ، ژ یه‌كێ دى ڤه، ئه‌و ده‌ركه‌فتنێن میدیایى و رۆژنامه‌ڤانى یێن سه‌رۆكێ حوكمه‌تا هه‌رێمێ هه‌مى به‌رسڤێن لۆژیكى بوون، چونكو هه‌رده‌م جه‌ختى ل سه‌ر زمانێ دانوستاندنێ و دیالۆگێ كریه، نه‌ك شه‌ر و هه‌ره‌شه. زێده‌بارى سه‌ره‌دانێن فه‌رمى و دلرحه‌تكرنا خه‌لكى، چه‌ند كه‌یفا دلێ مرۆڤێن كورد و جاده‌یا كوردى ئارام دبیت ده‌مێ دبهیسن كو نێچیرڤان بارزانى یێ ل كۆچكا سپى یان یێ ل ته‌هرانێ یان ل توركیا، یان ئه‌لمانیا و ..هتد؟ چونكو جڤاكێ نیڤده‌ولى، ئێكه‌تیا ئه‌ورۆپى، بریتانیا رۆسیا پشته‌ڤانیا خوه بۆ سیاسه‌تا بارزانى ده‌رێخستیه د ڤى بارى دا و هه‌رده‌م دوبات دكه‌ن. ئه‌ڤه نه زلهێزێن دونیایێ جهێ سرنج و گرنگیدانێ نه. ئه‌ڤه ژ لایه‌كى و ژلایه‌كێ ڤى ڤه، ده‌مێ هه‌لبژارتنێن هه‌مى لایه‌نان یێن نێزیك دبن دڤێت هه‌مى سیاسه‌تمه‌دار بۆ خۆشكرنا ژیانا هه‌ڤوه‌لاتیان گه‌له‌ك هه‌ولان بده‌ن، ده‌نگێن وان بده‌ستڤه‌ببینن، له‌ورا ژى عه‌بادى یێ هاتیه (ئاشێ هویر) و دخوازیت چاكسازیان بكه‌ت. هه‌لبه‌ت نیچیرڤان بارزانى ئه‌ڤ هه‌موو حسێبه‌كرینه و نها یێ د ماراسۆنا سیاسى دا و لیاقه‌كا باش هه‌یه ژ بلى به‌ژنه‌كا زارڤ و وه‌رزشى كو مه بگه‌هینته كنارێ ئارام و زێده‌تر هه‌وجى بیانیان نه‌بین!!.
دیلۆت بۆ دیلێتكرنا گه‌نده‌لیێ!!
شێرزاد نایف
دوهی د پرێسكۆنفرانسه‌كێ خوه دا نێچیرڤان بارزانی سه‌رۆكێ حوكمه‌تا هه‌رێما كوردستانێ، هنده‌ك مژارێن گرنگ د بیاڤێ شه‌فایه‌تا حوكمه‌تا خوه دا خستنه هۆلێ، دیاره بارێ كوردستانێ زۆرێ گران بووی ل ده‌مێ چووی و ل به‌ره سه‌رئه‌ڤرازیێ بكه‌ته نشیڤی!. من بهیستیه ژ هنده‌ك برادرێن نێزیك كو خه‌مێن وی خوارین ناهێنه وه‌سفكرن و هنده‌ك سۆز داینه كو چاوا ئه‌و قووناغێن ئاگرین ده‌بازكرین ژ كوشتن و تیرۆر و هێرشێن مه‌زن ل سه‌ر هه‌رێمێ، ئێدی هه‌میان بكه‌ته نشیفی و هه‌ڤوه‌لاتیێن هه‌رێمێ قورتال بكه‌ت. راسته خه‌لكه‌ك بێزار بوویه و ئێدی خۆ خیره‌ت ناكه‌ن د گه‌شبین بن، ئێدی خه‌لك ب ره‌خنگرتنا بێ مفا ژی تێربوو یا كو گه‌له‌ك ده‌ست چووینه د ناڤرا، به‌لێ بۆیه‌رێن ڤان دووماهیان ژی بۆ مه دیاركر كو گوهۆرین و سپرایرزه‌رێن نوو ژی د پێشهاتن. تشتێ ئه‌ز گه‌شبینكریم مرۆڤ ب زانستیانه و ژیواربینانه هزر لێ بكه‌ت، ئه‌و كۆمپانیا ئاماژه پێ دایی كو فلته‌ره‌كه دێ شه‌فافیه‌تا نیازێن خوه پێ گه‌هینیت و یا حوه‌كمه‌تا عیراقێ ل گه‌ل یا (سۆمۆ) ژی راستیا رێژه‌یا وێ ژی ئاشكرا كه‌ت. هه‌كه وه‌سا بیت، ئه‌ڤ كۆمپانیایه ل پله‌یا ئێكێ دهێت ل سه‌رانسه‌ری جیهانێ و ئه‌و دیرۆكا وێ یا كه‌ڤنار (دیلۆت ته‌چ توهماشۆ) كو باره‌گایێ وێ دكه‌ڤیته نیۆیۆرك، كو كۆمپانیێن برایس و وته‌رهاوس كۆبرز و ئه‌رنست یونج و كه‌ی بی ئێم ئێج هه‌ڤركیا وێ دكه‌ن ئه‌ركێ سه‌ره‌كی هووربینیا ژمێریاریانه، له‌شكره‌كێ كارمه‌ندان برێڤه دبه‌ت، نێزیكی سێ هزار كارمه‌ندان لێ كاردكه‌ت، مفایێن وێ ب ملیاران دۆلارانه. هه‌كه مفایێ وێ ل گه‌ل حوكمه‌تا هه‌رێمێ هه‌بیت و خودانا خوه و ئه‌ڤی سه‌رمایه‌داریێ، دوور نابینم ملێ خوه بده‌ته به‌ر ئاریشه‌یێن كوردستانێ و بۆ وێ زۆر نینه قه‌یرانا سێ چار پارێزگه‌هان چاره‌سه‌ر بكه‌ت، پشتی ئیمزا ل گه‌ل سه‌رۆكێ حوكمه‌تێ نێچیرڤان بارزانی كری ل سه‌ر به‌رئینان و هنارده‌كرنا پترۆلێ, ئه‌ڤجا كی دێ كاریت رێیێ ل به‌ر گریت، راسته كه‌رتێ تایبه‌ت و ب فه‌رمی سیاسه‌تێ چو په‌یوه‌ندی پێڤه نینه، به‌لێ سیاسه‌ت هه‌می بازرگانی یه، دوژمن ژی یێن ب حالێ خۆ ڤه مژوول بووین و دێ مه ژبیركه‌ن، هه‌كه چو نه‌كه‌ن، دێ خۆ بێده‌نگ كه‌ن. ئه‌ڤجا ب دیتنا من ماده‌م كی بازارێن مه دێ چنه ئه‌مریكا، ئاریشه‌یێن مه‌ژی دێ چنه به‌ر سیبه‌را شێرێ!!. هه‌تا نها ژی حه‌كمه‌تا به‌غدا و ب رێیا وه‌زاره‌تا نه‌فتێ خوه داینه به‌ر سیبه‌را كۆمپانیا (سۆمۆ) كو كه‌سێ نه دزانی هنارده‌كرنا پترۆلێ ب چ ره‌نگ بوو و عیراقێ ژی وه‌كو حه‌ز و به‌رژه‌وه‌ندیێن خوه یێن شێلی خۆیا دكر، ل شوونا هندێ كو حزبێن باشورێ عیراقێ بووینه خوه‌دی بیرێن نه‌فتێ و كه‌سێ پێچێنابیت لێپرسیا وان بكه‌ت، ته‌نها كوردستان ب ڤێ بژارێ دێ باشتر نه‌فتا خوه هنارده كه‌ت. ب راستی حوكمه‌تێ نێچیرڤان بارزانی دوهی گه‌له‌ك خال دانانه سه‌ر په‌یڤان و ئاریشا نه هنارتنا بۆدجه‌یا هه‌رێمێ ژ لایێ به‌غداڤه ژی هه‌ر ئه‌ڤ ئه‌گه‌ره بوون، هه‌كه چاو ابێ ئه‌گه‌ر ل مه‌ها شواتا 2014 به‌هر بڕی و پشتی سێ هه‌یڤان نه‌هنارت واته ئه‌ڤه بوون ئه‌گه‌ر!!. هه‌ر ئه‌ڤ ئه‌گه‌ره ژی دێ به‌لانسێ زڤرینته ڤه ل سه‌ر ئه‌وا به‌ری هینگی و به‌لكو ل پاشه‌رۆژێ وه‌لاتێ مه ب سامانێن خوه شاد ببیت، پشتی كو هه‌می لایه‌نان خوه جه‌رباندی و نه‌شیاین چو ژ چو ببه‌نه ده‌ر. ب هیڤینه رۆژه‌كا نێزیك جاره‌كا ئه‌م بكه‌ڤینه سه‌ر پیێن خوه..
سه‌رهلدانا حوكمه‌تێ!!
تشته‌كێ خوه‌زایی یه و پتریا تاكێن كوردستانی دزانن، كو هه‌رده‌م راستی دێ بسه‌ركه‌ڤیت و دادوه‌ریا دۆزێ دیه‌نامۆیا هێزا ڤی وه‌لاتێ برینداره. به‌لێ هندی ره‌نگڤه‌دانا هه‌ڤدوژ و سه‌دمه یا ب هێز بوو، سه‌رێن رێكا ل به‌ر مه به‌رزه‌كرن. پشتی ڤان پیلانێن مه‌زنن و هێرشێن ده‌وله‌تێن مه‌زن ل ب وێ گه‌فوگۆریێ و نه‌پشته‌ڤانیكرنا ئه‌مریكا و ده‌وله‌تێن مه ددانان دۆست، ب هه‌می جۆران هێرشكرنه سه‌ر هه‌رێما كوردستانێ ب گه‌ل و حوكمه‌ت ڤه، ب راستی تشته‌كێ سه‌یر بوو حوكمه‌تێ خوه ل به‌رگرت و هه‌تا نها ژی پێنگاڤه‌گا ژدل هاڤێتیه كو نه‌كه‌ڤیت و رابیته ڤه ل سه‌ر هشا خوه، مه‌زنترین سه‌ربۆر بوو ب سه‌ر داهاتی، ب دیتنا من ئێدی دێ گه‌له‌ك ب هێزكه‌ڤیت, ئه‌گه‌ر ژی گه‌له‌ك ئه‌گه‌رێن بابه‌تیانه خوه دانه به‌ر سه‌ری، وه‌كو ده‌ست ژكاركێشانا سه‌رۆكێ هه‌رێمێ و هه‌ر وه‌سا ئه‌و بێده‌نگی یا وان هه‌ره‌شه‌یان، خۆراگریا پێشمه‌رگه‌ی و شكاندنا هێرشێن سه‌ربازی یێن حه‌شدا شه‌عبی، تۆماركرنا داستانان، .. هتد. یا ژ هه‌میان ئه‌كتیڤتر سیاسه‌تا سه‌رۆكێ حوكمه‌تێ نێچیرڤان بارزانی و ئه‌و ته‌نازولاتێن حوكمه‌ت پتر پێ بلندكری و ب وی شێوازێ ره‌هایی و بێمه‌نه‌تانه، حیكمه‌ته‌ك بوو، كه‌س نه‌كاره ئینكار بكه‌ت. نها ژی رێككه‌فتن دگه‌ل حوكمه‌تا به‌غدا ژ ده‌سپێكێن ئه‌جینه‌ده‌یێن خوه دناینه دێ پتریا وه‌لاتێن مه‌زن په‌سنینا وێ سیاسه‌تێ كه‌ن وه‌كو كارته‌كا سیاسی یا سه‌ركه‌فتی یه، له‌ورا حوكمه‌ت یا هه‌ولێن رژد دده‌ت كیشه‌یان ل گه‌ل به‌غدا ب رێیا دیالۆگێ ئێكلابكه‌ت و بۆ ڤێ مه‌ره‌مێ ژی به‌رهه‌ڤه هه‌می پێنگاڤان بهاڤێت، به‌لێ ژ به‌ر ئه‌گه‌رێ وێ ئێكێ كو به‌غدا دزانیت نه‌حه‌قی ل هه‌مبه‌ری خه‌لكێ كوردستانێ كریه و سته‌م لێ كریه، هێَشتا ژی ئه‌و سته‌م یا به‌رده‌وامه ب بڕینا مووچه‌یی و بۆدجه‌یا كوردستانێ و نه‌دانا پاره‌ی و چه‌كی بۆ پێشمه‌رگه‌ی و جێبه‌جێنه‌كرنا ماده‌یێ 140 بۆ ئێكلاكرنا ناڤچه‌یێن كێشه‌دار هێرشكرنه سه‌ر كوردان ب رێیا میلیشیاتێن شیعه‌یان و ب هاریكاریا ئیرانێ و ب چه‌كێ ئه‌مریكی و داخستنا فرۆكه‌یان و هه‌ولدن بۆ هێرشكرن ل سه‌ر ده‌روازه‌یێن سنۆری یێن هه‌رێمێ ب رێیا چه‌كداری، هه‌می سه‌رپێچیێن دستوورینه ژ لایێ به‌غداڤه و د ده‌قێ دستووری دا دنڤیساینه، ل ده‌مه‌كی چو ده‌قێن دستووری نینن بێژیت ئه‌نجامێن ریفرۆاندۆمێ نابیت به‌ره‌ڤاژی دستووی ئاماژه ب وێ ئێكێ دده‌ت كو پاراستنا ئێكپارچه‌یا خاكێ عیراقێ به‌ند بكه‌ت ب جێبه‌جێكرنا دستووری ڤه، كو به‌غدا ده‌ستوری پێشێل بكه‌ت، مافێ خۆیه‌تی یه داخوازا سه‌ربخوه‌یێ بكه‌ت.
ئه‌ڤجا دمینیت ل سه‌ر حوكمه‌تێ د بیاڤێ ئابووری دا گه‌له‌ك خال بهێنه دانان ل سه‌ر په‌یڤان، ئه‌زێ گه‌شبینم كو دێ كه‌یسا سامانێ مه ل دووڤ بارودۆخێن داهاتی ئه‌كتیڤ بیت و كه‌ڤیته د به‌رژه‌وه‌ندیا هه‌ڤوه‌لاتیان دا و ئینانا بۆ نموونه كۆمپانیا دیلۆتی یا جیهانی یا ب ناڤوده‌نگ بۆ چاڤدێریكرنا داهاتێ نه‌فتێ ب شێوه‌كه‌كی به‌رسڤا هه‌می پسیاران دده‌ت كو ب شه‌فافترین شێواز دده‌ت د وارێ داهاتێ نه‌فتی دا. له‌ورا ژی په‌یڤینا سه‌رۆكێ حوكمه‌تێ نێچیرڤان بارزانی مه گه‌شبین دكه‌ت و ئۆمێدان دچینیت، ده‌مێ گۆتی: ئه‌ڤ قووناغه ژی دێ تێپه‌ریت و هه‌ر وه‌كو باش و باش یا تێدپه‌ریت و هێدی هێدی برین یێن تیمار دبن.. خودێ هاریكارێ ڤی وه‌لاتێ بریندار بیت و ب سه‌ركێشیه‌كا حه‌كیمانه بگه‌هینته كنارێ ئارام.
توندوتیژیا ژنان ل دژى ژنان!!
ئه‌ز گه‌له‌كێ كه‌یفخۆش بووم ده‌مێ رۆژه‌ك هاتى د هه‌لكه‌فتا ژنان دا رێكبكه‌ڤیت كو تشته‌كى ب ڤى جۆرى بنڤیسم، من هزره‌ك هه‌بوو كو پێشنیازه‌كێ بكه‌م ل رۆژه‌كێ هه‌لكه‌فتا ژنان بیت، ئه‌ڤجا چ رۆژا جیهانى یا ژنان بیت، یان مللى بیت، دامه‌زراندنا ئێكه‌تیه‌كا وان بیت یان هه‌ر رۆژه‌كا گرێداى ژنان بیت. پێشنیازا من ژى د بیاڤه‌كێ جێنده‌رى دابوو، ئه‌و ژى كو ل رۆژا نازاندنا ژنان دا، هه‌مى زه‌لام وێ رۆژێ شۆلێ مالێ بكه‌ن یێ گرێداى ژنان، هچكێن خوه هه‌لده‌ن و به‌رپێكا گرێبده‌ن و بازده‌نه شۆلى وه‌كو شووشتنا ئامانان، جلكشووشتن، مالێكدان، سه‌خبێركرنا مال و زارۆیان، به‌رمالیبوون و …هتد، ژ ڤان كاران، داكو زه‌لام هه‌ست بكه‌ت ژن چه‌ند زه‌حمه‌تێ دبینیت، چه‌ند پشتا وێ دئێشیت ل سه‌ر سینكێ لێنانگه‌هێ و ئه‌مان شووشتنێ، دا هه‌ست ب رۆلێ وێ بكه‌ت، ره‌نگه دلێن توند پیچه‌كێ نه‌رم بن و پشته‌ڤانیا وێ بكه‌ن خوه ب تشته‌كێ نۆرمال ژى بیت!!. ئه‌و نه‌خۆشیا ئه‌و دبه‌ت، نیڤه‌كا ژنان فه‌قه‌رات هاتینێ ژ ماندیبوونێ، ئه‌شكه‌نجه‌یا ده‌روونى.. هتد. به‌لێ وه‌سا بۆ من دیاربوو كو سه‌رده‌م هاتیه گوهۆرین و زه‌لام بارا پتر باش بووینه ل گه‌ل ژنان، دوورى مژارێن گرێداى شووشتنا شه‌رمێ و كوشتن و سۆتاندنا ژن و كچان. هنده‌ك ژن بخوه توندیێ ل هه‌ڤدو دكه‌ن، وه‌كو گه‌له‌ك دیارده‌یان، هنده‌ك ژن هه‌نه زۆریێ ل كچێن خوه دكه‌ن، بارێ وان گران دكه‌ن ب شۆلى، پالڤه‌دده‌ن و هه‌مى كارێ مالێ راده‌ستى وان دكه‌ن و وه‌كو ب كورده‌واى دبێژن (تكێ ل بنێ كلدانێ دده‌ن) بۆ خوه خۆش دكه‌ن، دلێ خوه ب پێ ناسۆژن، دلێ وان یێ ره‌قه و به‌ره و دبیت بابێ كچێ پتر دلێ خوه پێ بسۆژیت!، هنده‌ك ژن هه‌نه كه‌ربێن وان ژ كچێن وان ڤه‌دبن هه‌كه ژ وان جوانتر بن یان جلكێ وان جوانتربیت، غیره‌تێ ل سه‌ر دبه‌ن. هنده‌ك خووشكێن مه‌زن هه‌نه ل جڤاكێ مه دلۆڤانیێ ب خووشكێن خوه یێن بچووكتر نابه‌ن. پتریا ناكۆكیان و پێكنه‌كرنێ یا ژنانه پتر ژ زه‌لامان، گه‌هشتیه وى راده‌یى بووینه گۆتنێن ماڕكه ب درێژیا سه‌رده‌مان، وه‌كو خه‌سى و بیكێ وه‌كو تۆم و جیرى لێهاتینه، ستران پێ هاتینه گۆتن وه‌كو(خه‌سى د خه‌سیسن!!) یان (خۆزى خه‌سى نه‌بانه .. د ابیك ب دلێ خۆ بانه).. یان ئه‌و به‌ڤلاتیى و هه‌ڤدژیا د ناڤبه‌را ژنبابێ و نه‌ڤسیێ دا كو گه‌هشتیه هه‌ستى، ئه‌و به‌ڤلاتیا هه‌ویێن ئێك.. به‌ڤلاتیا ژنبرا و ژتیى و .. هتد.. ئه‌ڤه مژاره‌ك و مژارا دیتر ژى منه ڤێت جارێ خوه لێ بكه‌مه خودان، ئه‌و ژى توندوتیژیا ژنان ل دژى زه‌لامان، چونكو گه‌له‌ك جاران هنده‌ك ژن فتنه‌یێن مه‌زن و بێبه‌ختیا ب زه‌لامان ڤه‌دنن هه‌تا راده‌یێ كوشتنێ و میناكا یوسفێ راستگۆ و زوله‌یخایێ ژى باشترین میناكه و ئه‌ڤه هه‌مى دچنه د خانه‌یا توندوتیژیا ژنان دا.. چونكو ئه‌و توندوتیژیا ژنان گه‌هشتیه هه‌ستى و گیانى، هه‌كه نه كوشتن و فتنه‌یێن مه‌زن نه‌دبوون، سه‌ره‌راى ڤێ هه‌میێ ژى هیڤیخوازم چو ژنێن ره‌خنه‌گر ب ئاگر و ئاسنى به‌رسڤا من د ڤێ گۆتارێ دا نه‌ده‌ن، هه‌كه نه … ته‌سلیم.!!!!
سیاسه‌تا زمانێ راگه‌هاندنێَ!
دانوستاندن ئاریشه‌یا هه‌لاویستى یه د ناڤبه‌را حوكمه‌تا عیراقێ و یا هه‌رێما كوردستانێ، شێوازێن ئاشتیانه و زمانێ دیالۆگێ و رووره‌شكرنا زمانێ هێزێ و ب كارئینانا هێزێن چه‌كدار و خوین رێشتن، نیازا كوردان و حوكمه‌تا كوردستانێ یه، ئه‌ڤه هه‌مى ب زمانێ میدیایى و راگه‌هاندنێ یا دهێته كرن، داخۆیانیێن سه‌رۆك نێچیریڤان بارزانى یێن ئاشكرانه و رۆهنن و په‌یامێن ئاشتیانه تێدا دیار و زه‌لالن و دپێشچاڤن، (میراتیا ئه‌ندازیاریا ئاشتیێ ناڤێ بابێ وى ئدریس بارزانى بوو، دلۆڤانیا خودێ ل سه‌ر بیت)، جهێ دلنه‌رمیێ و ئارامیێ یه، خودوورخستنه ژ شه‌روشه‌ماته‌یان و شیا ب ڤێ چه‌ندێ ئه‌و شه‌ڕێ شۆفێنزم یێ حوكمه‌تا عیراقێ بۆ مه دڤێت و بزاڤێ بۆ دخوازیت، ئه‌و ده‌سپێشخه‌ریێن حوكمه‌تا هه‌رێمى پێشكێش دكه‌ت، یێن هنده لایه‌نێن ره‌شبین سه‌حدكه‌نێ وه‌ك ته‌نازوله‌ك، وه‌سا نینه، بلا ب مێشكه‌كێ هه‌ستدار د ڤێ سیاسه‌تێ بگه‌هین، چونكو ب راستى هه‌رێم یا ب هێز بوو و ب ساناهى نه دشكه‌ست و هێشتا مایه ژى، ماده‌م پێشمه‌رگه یێ دسه‌نگه‌ران دا و شیرێ وى یێ خۆشكریى و تیژه و د ئاماده‌باشیێ دایه، به‌لێ شیرێ خیانه‌تێ زۆرێ تیژ بوو ل سه‌ر حه‌فكا مرۆڤێ كوردستانى.. ئه‌و هه‌مى په‌یامێن نیازپاكیێنه و جهێ حیكمه‌تێ نه، بۆ نموونه ته‌نازوله‌كا سیاسى باشتره ژ رێتنا خوینا پێشمه‌رگه‌كێ خوه‌دى عه‌یال، یانژى خوه رێتنا سه‌ربازه‌كێ عیراقى ژى!. ئه‌ڤ په‌یره‌وه‌یێ مرۆڤاتى یێ دیاره د په‌روه‌رده‌یا كوردبوونا راسته‌قینه دا. ل به‌رمبه‌ر ژى به‌رسڤێن نه‌راسته‌وه‌خوه دهێنه دان ژ لایێ سه‌رۆك وه‌زیرێن عیراقێ حه‌یده‌رێ عه‌بادى ڤه، هه‌ر وه‌كو سه‌رۆك نێچیرڤان بارزانى ئاماژه پێ دای د گۆتارا خوه یا ڤان دووماهیان دا، كو به‌غدا ب زمانێ راگه‌هاندنێ په‌یامێن خوه دگه‌هینیت. به‌لێ هه‌مى ژى بۆ بهێنته‌نگكرن و گه‌فلێكرنا گه‌لێ كوردستانێ یه، هه‌كه نه بارزانى وه‌كو دبێژن (سیماهم فی وجههم)، د ئاراسته‌كرنا گۆتارێن وى دا راستی و نیازپاكى دئاشكرانه، چونكو هه‌كه مرۆڤ ل چه‌پ و چیر و (لعب و لیتێن) سیاسه‌تێ بگه‌ریێت، دێ ل پێشچاڤێن خه‌لكى ب ئاشكرای هه‌مى كار و ئه‌ركان دانیته پێش و ب ده‌نگه‌كێ بلند گازى بكه‌ت، كو هه‌مى ل سه‌ر وان راستیان د زالبن، وه‌كو دى خونیشادانا به‌رپرسان ل سه‌ر شاشه‌یێن تلفزیۆنێ ل سه‌ر كه‌نالێن میدیایى دلرحه‌تیه‌كه بۆ خه‌لكى و پشتراستبوونه‌كه.
بۆ میناك هه‌بوونا ئیدیه‌مێ هه‌بوونا مووچه‌ى د ناڤ گۆتارێن وى دا، دبیته پشتراستیه‌ك و هیڤیه‌ك بۆ خهه‌ڤوه‌لاتیێن هه‌رێمێ، ئه‌ڤجا چ گیرۆ بیت یان بهێته بڕین و پاشبكه‌ڤیت، ئه‌و نه‌گرنگه، یا گرنكه ئه‌وه هه‌بیت و بكه‌ته مال ل سه‌ر خوه و سۆزێ بده‌ته خه‌لكى، ئه‌ڤه گرنگتره و چه‌كه‌كه بۆ لایه‌نێن به‌رانبه‌ر كو یاریا (كه‌یسا ده‌مى) هێشتا گولا د به‌رژه‌وه‌ندیا هه‌رێمێ، دا چونكو ب راستى فاكته‌رێ مفاوه‌رگرتن ژ ده‌مى و كه‌یسا ده‌مى ژى چه‌كه‌كێ كاریگه‌ره د ڤێ شه‌رێ تایبه‌ت دا، ب شێوازێ شه‌رێ میدیایى و یى َدانا داخۆیانیان. یێ هزر بكه‌ت حوكمه‌تا هه‌رێمێ گه‌له‌ك ته‌نازولاتان دكه‌ت و ب نه‌رێنى بزڤرینیت، ئه‌ز دبیژم ئه‌وه هه‌مى دێ بیته هێز و فاكته‌ره‌كێ مفادار بۆ پاشه‌رۆژا هه‌رێمێ كو خوه ژ كڕینا شه‌روشه‌ماتام دووردئێخت و دكڕیت، پێنگاڤێن مه‌زنن بۆ گه‌نتیكرنا ئاشتیێ!!، چونكو هه‌رێمێ تێرا خوه هێزا یا پێشمه‌رگه‌ى نیشا خه‌لكى دا و زه‌بلكێن مه‌زن و هه‌ژى ژى دیاربوون، ل شه‌رێن وه‌كو پردێ و مه‌حموودیێ و به‌رگیریا عێن عوێز و هتد..هه‌ر چاوا زاۆیه‌كێ توند خوه نه‌قووله بكه‌ت، مرۆڤێ مه‌زن هه‌ر خوه بۆ ته‌نازولاتان بكه‌ت، دا خوه شێت نه‌كه‌ت.. ئه‌ز ڤێ بێمنته‌یا نێچیرڤان بارزانى وه‌سا دبینم و ئه‌و خواندنا منه بۆ بزاڤێن وى.. وه‌كو دى هه‌كه ئێكى بۆچوونه‌كا دى هه‌بیت.. بلا هه‌بیت و ما چ ژ مه‌یه و ئه‌م چو دخساره‌تین!. ئه‌م یێن ئێكین!!
قەنجی ب کێر بەغدا ناھێت
ھەکە پێشمەرگە نەبایە، ئەرێ عیراق دا کاریت تەڤلی مووسل بیت،؟ مانە ئەو عیراقە یا لەشکرێ وێ ب ساناھی مووسل بەردای و چەک و کەلوپەلێن زەبلاح بۆ بجە ھێلایی؟ ھەکە رۆلێ پێشمەرگێ کوردستانێ ب خواندنەکا سەربازی ئەکادیمی بەحت بھێتە خواندن دێ دیار بیت کو بەھرا شێری ب بەر وی دکەدڤیت، بۆ نەھێلانا رێخستیا دەولەتا ئیسلامی یا تیرۆرست (داعش)، دبیت ئەو ب خوە ژی د ناڤ وێ مەعمەعێ دا بم و پشکداریەکا ژنێزیک کربیت د پتریا وان شەڕان دا، ھەلبەت وی دەمێ مە زلەھا ئێکێ ل داعشێ دایی، ھینگی ئەکەیێن سەر ب حوکمەتا عیراقێ ڤە، دساڤا بوو یان ھەما ھەر نەبوون، ژنوو ژ سفڕێ دەسپێکریە، ب شکاندنا دەقێ داعشێ و ھەر وەسا ژی ئەو کۆما شەھیدان یا کوردستانێ پێشکێشی بەرگریێ کری، ژ بلی ئەو ئەورێ ئاسمانی یێ باردۆمانکرنا فرۆکەیان ب ھەول و بزاڤێن حوکمەتا ھەرێما کوردستانێ و ب تایبەت کەسێ سەرۆک مسعود بارزانی و وسەرۆکێ وەزیرێن حوکمەتێ نێچیرڤان بارزانی کو شەڤ و رۆژ دکرنە ئێک و خەو ب چاڤان نەدکەفتن ھەتا شیاین ئەو پشتەڤانیا نیڤدەولی بدەستڤەبێخن، رۆژانە ل سەنگەرێن شەرەفێ بوون. شیان ببنە عومقێ ستراتیجی بۆ ئۆپەراسیۆنا مووسلێ ژ ھەر لایەکی ڤە پشتەڤانی لێدکر، بیرا من دھێت ھەرۆژ مەزنە ئەفسەرێن حەشدێ و یەکەیێن عیراقی دھاتنە خواستنا زۆر جۆرێن ھاریکاریێ و ستویێ وان ل سەر ملێ وان و پشتەڤانیێ ژ ئیداریات و چەک و کەلوپەلان. ئەرێ حوکمەتا عەبادی چ بۆ کر؟ بەلکوبەرەڤاژی ئەو کارمەندێن خزمەتا داعش کری بۆ دەەمێ سێ سالان ل سەر ئێک مووچەیێن وان بۆ مەزاختن. بەلێ مووچەیێن پێشمەرگەی ئێک فلس ژی نەدایێ، ئێک فیشەک نەدایێ!!. تشتەکێ سەیرە وەەرە بەرگریێ ژ سەروەریا ئەردێ عیراقێ بکە، تیرۆرستێن کوژەک بکەدەر. دا شەرەفا عیراقێ پیس نەکەن. ل شوونێ تە سزا بدەت.! ب راستی کوردستان سەرەرای گەلەک کێماسیان یا ل عیراقێ و دستوورێ وێ بوویە خودان، کەفتیە گرفتیێ کا چاوا سەردەریێ بکەت، دوازدە سالان پێگێریێ ب دستووی و مادێن وی ناکەن، تو نەچار بۆ خوە جودابوونێ بگەریێ، ھەکە بکەی ژی، دێ ھەمی بنە ئاگر ل سەر سەرێ تە، نەکە دڤێت کوولەیێ وان بی!!. نھا د چارچووڤێ دستووریی دا حوکمەتا ھەرێمێ یا دخوازیت دانوستاندنێ بکەت. دا بەس خوینا ھەڤوەلاتیان ژ ھەردو لایان بھێتە رێشتن.!! چو دستوورە عیراق بخوازیت تشتێ د بەرژوەندیا وێ بجھبینیت و یێ د بەرژەوەندیا ھەرێمێ دا پاشگوە بێخیت؟!. تنێ دا کو قەبارێ سیاسیێ ھەرێمێ یێ ب ھێز یێ ھەی بھەلوەشینیت، یا دخوازیت پشتی ڤێ حنگودەنگێ ھەما ب ساناھی سەردەریێ ل گەل پارێزگەھێن باکۆر بکەت، ب نیازێن خراب وێ چەندێ بکەت, ھەر ناکەت ژی تنێ بۆ ریکلام و خۆشرینکرنێ یە، کورت و کورمانج عەبادی خوە ب غرۆرا خوە مەزنتر ژ دستووری دبینیت.
چه‌رخێ زێرینێ ئیراده‌تێ!
ناڤێ مانشێتێ من خواست ئه‌و په‌یڤا ئیراده‌تێ بینم چونكو ب نێڕینا من ب زه‌حمه‌ت په‌یڤه‌كا كوردى جهێ وێ بگریت، هه‌ر چه‌نده خۆراگرى نێزیكترینه، به‌لێ ژ به‌ر هه‌ستیاریا بابه‌تێ رامان ب دروستى بگه‌هیت مه‌رجه.
ئه‌م یێن د قووناغه‌كا هه‌ستیار دا دژین، هه‌ر چه‌نده مه گێمه‌كێ زۆرێ زۆرێ مه‌زن بۆراندن و ئه‌م نها یێن گه‌هشتینه وێ چه‌ندێ كو جینۆسایدا ئێكجارى و ژناڤبرنا ئێكجار (ائینقیراز)، ئێدى نه‌ما كو ناڤێ كورد قه‌ده‌غه بیت، پشتى كو ئه‌م گه‌هشتینه سه‌رێ لۆتكا گه‌هشتنا دووماهى ئارمانج، كو ئه‌و ژى سه‌ربخوه‌یى یه. به‌لێ مژارا من ل ڤێره سه‌ربازى یه، له‌شكرێ مه یێ (پێشمه‌رگه)، كو نها مه‌زنترین ده‌سكه‌فته بۆ ڤى ملله‌تێ بێگونه‌هـ، ب دیتنا ئه‌ڤ خۆراگرى و به‌رگریا ڤان رۆژان ل میحوه‌رێ رۆژئاڤایێ دیجله هاتیه كرن، هه‌ڤسه‌نگیا كوردستانێ هه‌میێ گوهارت ب پله‌یا 180. ئه‌و هێرشا حوكمه‌تا عیراقێ ب سه‌رۆكاتیا (حه‌یده‌رێ عه‌بادى) یا ڤه‌بڕینێ بوو، هه‌مى مه‌زنه هێزا خوه یا چه‌ندین ده‌وله‌تان د راستیا مژارێ دا، هاته پاشڤه‌برن، ب ئیرادا پێشمه‌رگه‌ى و هێزا وى، گه‌هشتبوو راده‌یێ هندێ مه‌زن، كو چو بوردۆمانێن سه‌ربازى ل چو هێرشێن له‌شكرى نه‌هاتینه كرن ب درێژیا نیڤ چه‌رخى، ژ زارده‌ڤێ گه‌له‌ك ئه‌فسه‌رێن كه‌ڤن كو ته‌ڤلى شه‌ڕێن عیراق و ئیرانێ بووینه، كو هێرشه‌كا جۆراتى بوو، ب دانپێدانا هێزێن حه‌شدا شه‌عبی و یه‌كه‌یێن له‌شكرێ عیراقێ، خۆراگریا شه‌ڕڤانێ كورد وه‌كو پێشمه‌رگه ئه‌و فۆلازه یێ نه‌هێته شكاندن، دگۆتن: ئه‌ڤه چ جۆره شه‌ڕڤانن هنده ب هێز هه‌ر هێزه‌كا دى با دا شكێنن ب ڤى دربێ مه‌زن. سه‌ره‌راى پێشكێشكرنا قۆربانیان، به‌لێ ب به‌راوردى ل گه‌ل یێن وان ئه‌رد و ئه‌سمانان بوو.
ب راستى شه‌ڕێ مانونه‌مانێ بوو. ئه‌ڤه ژى مه‌زنترین ده‌سكه‌فته، هه‌كه تاكێ كورد وكوردستانى بزانیت. به‌لێ ل ڤێره یا من دڤێت بێژم، ده‌برینا من نه ژ بۆ هندێ یه، كو ب تنێ په‌سنا وێ ئیرادێ و زیره‌كی وخۆراگریا پێشمه‌رگه‌ى بكه‌م، چونكو ئه‌ڤ ئیراده نها كه‌فتیه ل به‌ر ستێركا قه‌ناسه‌یێن دوژمنى و ژناڤبرنا وێ، ئه‌ڤه ننه ئاریشه‌یه، به‌لێ ئاریشه ئه‌وه ئه‌رێ ئه‌م بخوه بخوه نه هێلین ئه‌ڤ ئیراده لاواز ببیت، ژ ناڤا مه بخوه دا و ب دورستاهى ژى د ناڤ سه‌ركردێن پێشمه‌رگه‌ى دا، ئه‌و به‌رپرسێن پێشمه‌رگه‌ى برێڤه دبن، بلا ژنێزیكى هایداى ره‌وشا وان ببن، نه‌خاسمه كو گه‌له‌ك فه‌رمانده‌یێن دلسۆز و قه‌هره‌مان و نه‌زیهـ مه ژ ده‌ست داین، بلا ئه‌م ب خوه ڤێ ئیرادێ ژه‌نگى نه‌كه‌ین، كرمى نه‌كه‌ین، چونكو كرمێ دارێ ژ دارێ یه، وێ هه‌نێ چه‌كدارێ حه‌شدێ د ره‌بیا خوه دا ل به‌رامبه‌رى من، های ژ نهێنیێن من نینه، نزانیت پلانا به‌رگریا من چیه!. بۆ نموونه ئه‌و هزر دكه‌ن كو رۆژانێن مه ب خواندنا نه‌خشه‌یا له‌شكرى و دانانا پلانێن سه‌ربازى ڤه دچن، ب مه‌شق و راهێنانێ و دروستكرنا (ته‌حصینات)، ل شوونا هندێ ئه‌م ب هنده تشتێن بێ رامان ڤه مژوول ببین، جهێ میناكێ د ڤێره دا نینه نه‌مایش بكه‌م، به‌لێ ئیراده‌یا مه هه‌یى چه‌ندا ب هێزه بلا سه‌ربۆرا بكه‌ینه ئارمانج، ته‌ماشه‌ى سه‌ربۆرا داعشا بكه‌ین، چاوا تۆنێل دكۆلان بۆ خوه، چاوا چه‌كێن ساده چێدكرن، چاوا تێنتى چێدكرن، چونكو ئه‌و په‌یره‌وه‌كێ ناڤده‌وله‌تى یێ مه‌زن بوو، بلا مفای بۆخوه ژێ وه‌ربگرین، نه‌مینینه ب سه‌ر و ستویێن ئێكودو ڤه سه‌را پۆسته‌كێ شه‌هیده‌كى، یان حه‌نه‌كێن نه ل ئاستێ ڤێ ئیراده‌یێ، بلا مفا ژ هزرا وان پێشمه‌رگا وه‌ربگرین، یێن ئه‌ڤه چار ساله د چه‌په‌رى دا، ساده‌ترین سه‌رباز كا چ ب چاڤێ خوه دیتیه چو ته‌كنیك بۆ خوه ژ سه‌ربۆرا شه‌ڕى وه‌رگرتیه. هه‌ر سه‌ره‌ك ئاقله‌كه، ئها ب ڤان كریاران دێ كارین ئیرادا خوه پارێزین و نه‌هێلین لاواز ببیت، چونكو ئه‌ركێ مه ژى هندێ گرنگه، ئه‌ڤ ملله‌ته یێ ل سه‌ر به‌ختێ مه پێشمه‌رگه‌ى، تشته‌كه خۆكێمكرن پێ نه‌ڤێت، به‌ردكه‌ڤیت مرۆڤ گیانێ خۆ بۆ پێشكێش بكه‌ت، ژبلى پاراستنا ده‌ستكه‌فتان و چاره‌نڤیسى، پاراستا شه‌ره‌ف و كه‌رامه‌تا خێزان و كه‌سوكارین مه بخوه‌یه.. بلا ئیراده‌یا مه ب شێوه‌كێ زانستى بهێته پاراستن دا بكارین ببینه سه‌رى، بلا ئه‌م حه‌زژ ئێكودو بكه‌ین دا بكارین شه‌ڕى بكه‌ین، ماده‌م ئیراده‌ت عاتیفه‌یه و ده‌ستكه‌فته‌كێ مه‌زنه، بلا ب رێیا زانستى و عه‌قلى بهێته پاراستن. بلا سه‌رگه‌رمى ژى بهێته پاراستن، چونكو زانستێ له‌شكرى دبێژیت یێ زیره‌ك و قه‌هره‌مان و سه‌ركه‌فتى ئه‌وه یێ بزانیت چاوا نه‌هیلێت دوژمنى وى بكوژیت، واته سه‌ركه‌فتنێ بده‌ستڤه‌بینى و گیانێ ته بمینته ساخ.. ئه‌ڤجا هه‌كه گه‌له‌ك ده‌سكه‌فتێن جوسته‌یى مه ژده‌ستدابن، بلا ئیراده بمینت و لاواز نه‌بیت. ژ لایێ مه به‌رى یێ دوژمنى.. هیڤیه حه‌زژ ئێكودو بكه‌ین.!!.
نيشاندان
WP Facebook Auto Publish Powered By : XYZScripts.com