غیاس خالد زێباری

پشتى بۆرینا زێده‌تر ژ حه‌فت سالا ب سه‌ر خوه‌نیشاندانێن خه‌لكێ سووریا بۆ ئازادی و داخوازیێن ئازادی و رزگاریێ و پاشى شه‌ڕێ ناڤخوه‌یی و هاتنه‌ ناڤا ده‌ستێن وه‌لاتان بۆ ناڤ ڤی شه‌ری، ئه‌ڤ شه‌ڕه‌ ژ شه‌ره‌كێ ناڤخۆیی بوویه‌ شه‌ره‌كێ نیڤده‌وله‌تی و سه‌رنه‌گرتنا هه‌می گاڤێن ئاشتیانه‌ و دیالۆگێ بۆ چاره‌سه‌ركرنا كێشا سووریا، سووریا بوویه‌ گۆره‌پانا پاراستنا به‌رژه‌وه‌ندێن هژماره‌كا وه‌لاتان مینا ئیران و رۆسیا و توركیا ژی ل ڤێ دووماهیێ د گۆره‌پانا سووریا دا خوه‌ وه‌كی وه‌لاته‌كێ خودان زه‌ڤله‌ك دیاركر و هه‌ولا بده‌ستڤه‌ئینانا ده‌سكه‌فتان دده‌ت. ل دووماهیێ ل شه‌ڤا ١٣ ـ ١٤/٤/٢٠١٨ وه‌لاتێن ئه‌مریكا و بریتانیا و فه‌ره‌نسا ب مۆشه‌ك و فرۆكه‌یان چه‌ندین بنگه‌هێن له‌شكری و ستراتیژی كرنه‌ ئارمانج و زیانێن مه‌زنێن ماددی و له‌شكری گه‌هاندینێ. ڕه‌نگه‌ وه‌كی هێرش د ئاسته‌كێ پێدڤی دا نه‌بیت كو رژێم پێ بهێته‌ هه‌لوه‌شاندن، لێ ب ڤێ دڕبێ شیانێن وان یێن له‌شكری لاواز بوونه‌، ب ڕه‌نگه‌كێ دیتر ئه‌ڤه‌ وه‌شاندنا دڕبه‌كا هه‌ره‌ گرانه‌ دژی وه‌لاتێن رۆسیا و ئیرانێ، چونكی ئه‌ڤ هه‌ردو وه‌لاته‌ شپونسه‌رێن سه‌ره‌كیێن مانه‌ڤه‌ و خۆراگریا رژێما ئه‌سه‌دی نه‌ ل ده‌سهه‌لاتا سووریا، د ڤان چه‌ند سالان دا وه‌لاتێ ئیرانێ ب شاكرا به‌ره‌ڤانیێ ل وێ رژێمێ دكه‌ت داكو به‌رده‌وامیێ بده‌ته‌ پاراستنا به‌رژه‌وه‌ندێن خوه‌ یێن سیاسی و هزری ل سووریا و خه‌ونا خوه‌ یا چه‌ند سالی بۆ ته‌مامكرنا هیلالا شیعی. رۆسیا ژی پشتی ڤان سالێن دووماهیێ وه‌كی زلهێزه‌ك بۆ پاراستنا به‌رژه‌وه‌ندیێن خوه‌ و دیاركرنا هێزا خوه‌ بۆ جیهانێ و ئه‌مریكا و وه‌لاتێن رۆژئاڤا، راسته‌وخوه‌ به‌رڤانیێ ل مانه‌ڤا رژێما نهو یا سووریا دكه‌ت و چه‌ندین بنگه‌هێن له‌شكری لێ دامه‌زراندینه‌، ل سه‌ر ئاستێ نیڤده‌وله‌تی ژی هه‌رده‌م رۆسیا ل كۆمبوونێن جڤاتا ته‌ناهیێ و نه‌ته‌وه‌یێن ئێكگرتی دا به‌ره‌ڤانی لێ كریه‌ و فاكته‌رێ ده‌رنه‌كه‌فتنا بریارێ، دژی سووریا بوویه‌ و چه‌ندین جاران مافێ ڤیتۆ بكارئینایه‌. ئه‌ڤ بریارا ڤان سێ وه‌لاتێن زلهێزێن جیهانێ (ئه‌مریكا و بریتانیا و فه‌ره‌نسا)، ل وه‌شانا دربه‌كا له‌شكری ل سووریا، ڕه‌نگه‌ ب ڤی ئاوایی نه‌مینیت و ب پالپشتیا وه‌لاتێن دیتر یێن رۆژئاڤا و عه‌ره‌بی دڕبێن مه‌زنتر ل دووڤ خوه‌ بینیت. ب ڤێ گورزا نهو هاتیه‌ وه‌شاندن سووریا پێ ئێشایه‌، لێ مه‌زنترین پڕووشكێن ڤێ گۆرزی ل سووریا دوور كه‌فتینه‌ و ب ئیران و رۆسیا كه‌فتینه‌، ئه‌ڤ هه‌ردو وه‌لاته‌ پتر ل سووریا پێ شه‌رمزار بوونه‌، ژبه‌ركو ژلایێ سیاسی ئه‌ڤه‌ دڕبه‌كا گران و رووسته‌می بوو بۆ رۆسیا و ئیرانێ، ئاریشا سووریا شه‌ره‌كێ سار د ناڤبه‌را ئه‌مریكا و به‌رامبه‌ر رۆسیا و ئیرانێ دروستكریه‌، گه‌ر ئه‌مریكا و رۆژئاڤا به‌رامبه‌ر شه‌رێ سووریا بێ ده‌نگ و بینه‌ر بن، سووریا ب ته‌مامی ژلایێ ئیرانێ ب پالپشتیا رۆسیا دێ هیتـه‌ داگیركرن، ئه‌ڤه‌ژی مه‌زنترین شكه‌ستنه‌ بۆ ئه‌مریكا و رۆژئاڤا، چونكی جوگرافیا سووریا كاكلكا رۆژهه‌لاتا ناڤینه‌، ئه‌وێ ده‌ستێ خوه‌ بسه‌ردا بسه‌پینیت ده‌ست ب سه‌ر هه‌می رۆژهه‌لاتا ناڤین سه‌پاند.  ئیسرائیل ژی كو مه‌زنترین هه‌ڤپه‌یمانا ستراتیژیا ئه‌مریكا و رۆژئاڤایه‌ ل ده‌ڤه‌رێ و به‌رژه‌وه‌ندیێن وان پێ دهێنه‌ پاراستن، ب هه‌بوونا سووریایه‌كا ئیرانی جهێ مه‌ترسیێ یه‌، دیسان سووریایه‌كێ ب وی ره‌نگی ژبلی كو مه‌ترسیه‌كا دژواره‌ بۆ وه‌لاتێن كه‌نداڤێ عه‌ره‌بی ژلایێ هزری و جڤاكی ژی یا مه‌ترسیداره‌، ژبه‌ر به‌لاڤكرنا هزرا شیعه‌گه‌ریێ، له‌وما وه‌لاتێن كه‌نداڤێ عه‌ره‌بی دێ پالپشتیا ئه‌مریكا كه‌ن. د ڤێ ره‌شه‌بایێ دا باران ل گورگی هات و شڤان پێ ته‌ربوو، چونكی رژێما ئه‌سه‌دێ گۆرگێ وه‌لات و وه‌لاتیێن خۆیه‌، لێ رۆسیا و ئیران شڤانێن وێ رژێمێ نه‌. كورد ژی د ڤێ هه‌ڤكێشێ دا بێبه‌هرنابن، چونكی لاوازیا سووریا و نه‌ماڤێ رژێما وان با نهو باندۆره‌كا كاریگه‌ر ل سه‌ر لاوازكرنا نه‌یارێن كوردان هه‌یه‌ وه‌ك ئیران و عیراقا شیعی و توركیا، دووركه‌تنا ئیرانێ ژ سووریا لاوازبوونا ئیرانێ یه‌ ل عیراقێ. توركیا ژی كو نهو زێده‌تر ل به‌رێ چه‌ند سالیَِن بووری دژبه‌ریا كوردان دكه‌ت، دبیت ب ڤێ هه‌ڤكێشێ هه‌ڤسه‌نگیا وێ تێكبچیت و زێده‌تر نه‌شێت نیڤه‌كا وه‌ریسی بگریت، ژلایه‌كی ئه‌نداما ناتۆ و هه‌ڤپه‌یمانا ئه‌مریكا و رۆژئاڤا بیت و ژلایه‌كێ دی هه‌ڤپه‌یما رۆسیا بیت بۆ چه‌سپاندنا پلانا وێ ل سووریا، كو ركه‌به‌رێ سه‌ره‌كێ ئه‌مریكا ناتۆ یه‌، ره‌نگی به‌رده‌وامیا لێدانا سووریا ژلایێ ئه‌مریكا و هه‌ڤپه‌یمانێن وێ ببیته‌ ئه‌گه‌رێ دووركه‌تنا توركیا ل رۆسیا. بۆ ڤان گۆهۆرینا پێدڤی یه‌ كورد به‌ری هه‌ر تشته‌كی ئێكگۆتاریا سیاسی دروست بكه‌ن، خوه‌ بۆ ڤان گۆرانكاریا به‌رهه‌ڤ بكه‌ن و حوكمه‌تا هه‌رێما كوردستانێ خورتر بكه‌ن و پشته‌ڤانیا سه‌رۆكێ وێ بن كو نوونه‌رایه‌تیا هه‌می لایه‌نان بكه‌ت بۆ به‌رده‌وامیدان ب گه‌شه‌كرنا ئابووری و سیاسی و سه‌ره‌ده‌ریكرنێ ل گه‌ل وه‌لاتێن هه‌ڤپه‌یمان، چونكی د ڤان ده‌مێن بووری دا خۆیا بوویه‌ كو سه‌رۆكێ حوكمه‌تا هه‌رێما كوردستانێ جهێ باوه‌ریا وه‌لاتێن جیهانێ و دۆستێ، كوردستانێ یه‌ و دشێت خواندنێن دروست بۆ كێشه‌ و هه‌ڤكێشێن سیاسی و ئابووری بكه‌ت.

دیدار: محسن عه‌وه‌زوللا و غیاس زێبارى
مانشیت
(سه‌عده‌نى: به‌رى 54 سالان ده‌ربازبووینه‌، مه‌لا مسته‌فایێ بارزانى ب گڤاشتن گۆت به‌حسێ هزرا سه‌رخۆبوونێ و مافێ كوردان كر ژ ده‌سهه‌لاتا خوه‌ برێڤه‌برنێ)
چیرۆكا دیداره‌كا نه‌ به‌لاڤكرى د گه‌ل بارزانى نه‌مر، نڤیسه‌ره‌كێ ناڤدارێ مسرى رۆلێ (احمد حسن البكر و جمال عبد الناصر و محمد حسنین هیكل)، ئاشكرا دكه‌ت ل سه‌ر قه‌ده‌غه‌كرنا به‌لاڤكرنا دیداره‌كا وى ل گه‌ل رێبه‌رێ مه‌زن و نه‌مرێ گه‌لێ كورد مسته‌فا بارزانى بۆ رۆژناما ئه‌هرام یا مسرى. ئه‌ڤ ناما بارزانى نه‌مر بۆ جه‌مال عه‌بدولناسرى ل ده‌مه‌كى ئاشكرا دبیت كو ئه‌م بیرهاتنا وه‌غه‌ركرن و ژدایكبوونا ڤى رێبه‌رێ مه‌زن دكه‌ین و تێدا هنده‌ك نهێنى و هه‌لویست ل سه‌ر ژیانا ڤى مرۆڤێ مه‌زن ئاشكرا دبن.
ژ نشكه‌كى ڤه‌ زانیارى دگه‌هنه‌ من ل سه‌ر دیداره‌كا نڤیسه‌رێ رۆژنامه‌ڤان و نڤیسه‌رێ مه‌زنێ مسرى (عزه‌ت ئه‌لسه‌عده‌نى)، ل هاڤینا سالا 1964 ل گه‌ل مه‌لا مسته‌فایێ بارزانى.
د دیداره‌كا تایبه‌ت دا بۆ رۆژناما ئه‌ڤرۆ عزه‌ت سه‌عده‌نى كو ئێكه‌ ل ستێرێن رۆژناما ئه‌هرام یا مسرى ل سه‌رده‌مێ خوه‌ یێ زێرین ب سه‌رنڤیسه‌ریا خودێ ژێ رازى (محمد حسنین هیكل), ئه‌وێ نێزیكى رێبه‌رێ وى ده‌مى یێ مسرێ (جمال عبد الناصر) و پڕانیا گۆتاران بۆ نڤیسین.
هه‌رچه‌نده‌ ب ته‌مه‌ن كه‌فتیه‌ و ده‌مه‌كێ درێژ ب سه‌ر دیدارا وى دا یا هاڤینا سالا 1964 ل گه‌ل بارزانى ده‌رباز بوویه‌ و پرانیا وێ د بیردانكێ دا نه‌مایه‌، لێ سه‌عده‌نى د ڤێ دیدارا مه‌ دا هنده‌ك خالێن گرنگ و چاوانیا گه‌هشتنا وى بۆ لایێ بارزانى ڤه‌دگێریت و دبێژیت “د وێ سالێ دا من سه‌ره‌دانا عیراقێ كر و د وى ده‌مى دا ل زۆر باژێرێن وێ گه‌ریام و رێنمایى ژلایێ له‌شكرێ عیراقێ ب من هاتبوونه‌ دان كو نابیت ب هیچ ره‌نگه‌كى چاڤپێكه‌فتنێ ل گه‌ل چ سه‌ركردێن كورد بكه‌م و زێده‌تر گۆت” ئه‌ز چوومه‌ ده‌ڤه‌را شه‌قلاوێ ئه‌وا سه‌ر ب هه‌ولێرێ ڤه‌ و له‌شكرێ عیراقێ هۆشدارى دانه‌ من كو ژبه‌ر ره‌وشا ئێمناهیێ نابیت بچمنه‌ د ناڤ دا ل دووڤ گۆتنا وان. سه‌ره‌راى هه‌بوونا فرقه‌كا له‌شكرێ وان ل باژارێ شه‌قلاوه‌ و من ب چاڤێن خوه‌ دیتن، ل دووماهیا رۆژێ پشتى روونشتنا من ل گه‌ل سه‌رۆكێ باژارى، ل شه‌ڤا پاشتر پشتى نیڤه‌كا شه‌ڤێ من گۆه ل لێدانا ده‌رگه‌هى بوو، من نه‌ د وێرا ده‌رگه‌هى ڤه‌كه‌م، ژ به‌ر كو ئه‌ز بیانى مه‌ و به‌رى وه‌خت هاتیمه‌ هوشداریكرن ژ لایێ هێزێن ئێمناهیێن باژێرى ڤه‌. لێ من ده‌رگه‌ه ڤه‌كرن، كو كه‌سكێ ل به‌ر ده‌رگه‌هى و گۆت ئه‌زێ ژ لایێ مه‌لا مسته‌فاى بارزانى هاتى و نامه‌یه‌كا رێبه‌رێ نه‌مر بۆ من ب ده‌ستێ من دا و تێدا هاتبوو نڤیسین (ئه‌ز دزانم تۆ یێ ل عیراقێ و رێنمایى داینه‌ته‌، نابیت په‌یوه‌ندیێ ل گه‌ل كوردان بكه‌ى، لێ ئه‌گه‌ر ته‌ بڤێت دیدارێ ل گه‌ل من بكه‌ى، ئه‌زێ ل به‌ندا ته‌ و هنارتیێ من دێ ته‌ گه‌هینیت).
سه‌عده‌نى به‌رده‌وامى دا و گۆت “هه‌تا رادده‌یه‌كێ ئه‌زێ شكداربووم و پاشى من داخواز ژێ كر ل به‌ندا من بیت هه‌تا جلكێن خوه‌ دگوهۆرم، پاشى ئه‌م ژ مال ده‌ركه‌فتین و من دیت هێستره‌كا د گه‌ل دا و ده‌مه‌كى ئه‌م ل ده‌شتایه‌كێ چووین، پاشى سیاربووینه‌ ئۆتۆمبێله‌كا جێب هه‌تا گه‌هشتینه‌ باژێیرى من زانى كو هه‌ولێره‌، باژێره‌كێ زۆرێ جوان من هه‌ست كر ئه‌زێ زڤریه‌ڤ رۆژانێن سه‌رده‌مێ (الف لیله‌ و لیله‌)، نڤیسه‌ر و رۆژنامه‌ڤانى گۆت” چووینه‌ د ماله‌كێ دا، بارزانى ب جلوبه‌رگێن خوه‌ به‌رنیاسێن كوردى پێشوازیا من كر. وى ده‌مێ من دیدار كر ئامیرێ تۆماركرن نه‌بوو، ده‌مێ بارزانى د ئاخفت ل دووڤرا من دنڤیسى و كامیره‌یه‌كا ل گه‌ل من، هنده‌ك وێنه‌ من بۆ گرتن، من داخواز ژێ كر، به‌حسێ ڤێ دیدارێ نه‌كه‌ت هه‌تا كو به‌لاڤ دبیت. پشتى دیدارێ ئه‌ز زڤریمه‌ڤ جهێ خوه‌ ب هه‌مان ئۆتۆمبێل و هێستر. نڤیسه‌ر به‌رده‌وامیێ پێ دده‌ت و دبێژیت “به‌رى سپێدێ ئه‌ز گه‌هشمه‌ڤ جهێ خوه‌ و ژماندیبوونێ ئێكسه‌ر ئه‌ز نڤستم، من هه‌ست دكر ئه‌ڤه‌ خوه‌نه‌ و من باوه‌ر خوه‌ نه‌دكر تاكو من په‌رێن دیدارێ به‌رامبه‌ر خوه‌ دیتى. په‌یوه‌ندیێن من د گه‌ل كوردان یێن به‌رده‌وام بوون، من هزر دكر حوكمه‌تا عیراقێ ئه‌ڤ چه‌نده‌ زانى یه‌، لێ وێ چه‌ندێ روونه‌دا، وى ده‌مى من زانى من زانى كورد چه‌ند دشاره‌زانه‌ بۆ پلاندانانا دیدارێ و شیانێن وان بۆ پاراستن و گه‌هشتنا من بێ كو حوكمه‌تا به‌غدا بزانیت. ده‌مێ ئه‌ز زڤریمه‌ڤ قاهیره‌ و من دیدار نڤیسى و دایه‌ ده‌ستێ (محمد حسنین هیكل)، سه‌رنڤیسه‌رێ رۆژناما ئه‌هرام، وى ده‌مى ئه‌ڤه‌ ئێكه‌م دیدارا مسرى و عه‌ره‌بى بوو ل گه‌ل مه‌لا مسته‌فایێ بارزانى، لێ بێ شانسیا من یا هه‌ڤده‌م بوو ل گه‌ل سه‌ره‌دانا سه‌رۆكێ عیراقێ (احمد حسن البكر) بۆ قاهیره‌، ئه‌رێ یا به‌رئاقله‌ ئه‌م ڤێ دیدارا بارزانى به‌لاڤ بكه‌ین و سه‌رۆكێ عیراقێ ل قاهیره‌ بیت و هه‌تا نهو دیدار به‌لاڤ نه‌بووى؟!، سه‌ره‌راى باشبوونا په‌یوه‌ندیێن كوردان ل گه‌ل مسرێ ل سه‌رده‌مێ عبد الناسرى..!، ناڤه‌رۆكا وێ ل ده‌ف من نه‌ما، لێ هه‌یكه‌لى هه‌لگرت و گۆته‌ من نابیت داخوازا وێ ژ من بكه‌ى. ده‌رباره‌ى ناڤه‌رۆكا دیدارێ و گۆتنێن بارزانى، سه‌عده‌نى گۆت “پێنجى و چار سال ب سه‌ر ده‌رباز بووینه‌، ئه‌ڤه‌ ژى ده‌مه‌كێ درێژه‌ و ل بیرا من نه‌ماینه‌، لێ بیرا من دهێته‌ ره‌حمه‌تى مه‌لا مسته‌فایێ بارزانى ب گڤاشتن گۆت به‌حسێ هزرا سه‌رخۆبوونێ و مافێ كوردان كر ژ ده‌سهه‌لاتا خوه‌ برێڤه‌برنێ و یا پێدڤى یه‌ وه‌لاتێ مسرێ پشته‌ڤانیا مافێ كوردان بكه‌ت، د گۆتنه‌كا خوه‌دا گۆت “ئه‌گه‌ر عبد الناسر راستیا مه‌ بزانیت، دێ ئه‌م ڤێین و پشتگیریا مه‌كه‌ت. ل دووماهیێ نڤیسه‌ر و رۆژنامه‌ڤانێ مه‌زنێ مسرى عزه‌ت سه‌عده‌نى پشته‌ڤانیا خوه‌ بۆ گه‌لێ كورد دیاركر بۆ ئاڤاكرنا ده‌وله‌ته‌كێ كو ته‌عبیرێ ژ ره‌وشه‌نبیریا وان بكه‌ت و ل گه‌ل به‌غدا ل سه‌ر ژێده‌رێن گازێ پێك بهێن و سوپاسیا رۆژناما ئه‌ڤرۆ كر ل سه‌ر ڤێ دیدارێ.

دكتۆر مه‌حموود زاید مامۆستایێ زانینگه‌ها ئه‌زهه‌ر ل مسرێ ل پشكا دیرۆكێ و شارستانیه‌تێ، تایبه‌تمه‌ند د وارێ “دیرۆكا نوو و سه‌رده‌م” دا و ڤه‌كۆله‌ر د كاروبارێن كوردى دا، چه‌ندین به‌رهه‌م ل سه‌ر دوۆا كوردى و مسر و فه‌له‌ستین و ئه‌مریكا و ئه‌ورۆپا و جیهانا ئیسلامى ب گشتى، دبێژیت خۆشتڤیترین به‌رهه‌مێن من ئه‌ون یێن من ل سه‌ر كوردان نڤیسى. سه‌ره‌راى به‌لاڤكرنا چه‌ندین گۆتاران ل سه‌ر دۆزا كوردى و كوردستانێ ل كۆڤار و رۆژنامێن كوردستانێ و یێن وه‌لاتێن عه‌ره‌بى. د دیداره‌كا تایبه‌ت دا بۆ رۆژناما ئه‌ڤرۆ هاته‌ ئاخفتن.

ل دۆر پرسه‌كا مه‌ ل ده‌سپێكێ كا چاوا گه‌لێ كورد ناسكریه‌، فه‌رمۆت كو ئه‌ڤێ چه‌ندێ زۆر قووناغ برینه‌ ل ئاماده‌یى ل ده‌مێ وانه‌یا جوگرافیێ مامۆستایى ل سه‌ر دابه‌شكرنا ئاكنجیبوونێ ل چیایێن زاگرۆس ده‌ست پێ دكه‌ت، ل وى ده‌مى بۆ من بوویه‌ مه‌ره‌ق كوردان بناسم و ب هه‌ول و ماندیبوونه‌كا زۆر تا گه‌هشتیه‌ ڤى راده‌ى. پاشى ل دۆر خواندن و شرۆڤه‌یێن وى بۆ ره‌وشا نهو یا هه‌رێما كوردستانێ تێدا دبۆریت گۆت، ره‌وشا نهو هه‌رێمێ نه‌ ژ به‌ر كارڤه‌دانێن راپرسیا (52) ئیلۆنا بوورى بوون، به‌لكى بۆ به‌رێ دزڤریت ده‌مێ حوكمه‌تا مالكى ب برینا بۆدجه‌ و مۆچه‌ زۆردارى ل خه‌لكێ كوردستانێ كرى ئالۆزیێن سیاسى ل ڤێره‌ و وێراهه‌ دروست بوون. هه‌ر چه‌نده‌ وى ده‌مێ پێشمه‌رگه‌ى ئه‌ركه‌كێ قه‌هره‌مانانه‌ بۆ پاراستنا ده‌ڤه‌رێن عیراقێ ل هێرشێن تیرۆرستێن داعش دگێرا، ئه‌وێن له‌شكرێ عیراقێ به‌رامبه‌ر وان ل سه‌ر ده‌مێ مالكى ل مووسل و ده‌ڤه‌رێن دى ره‌ڤى، مالكى هه‌ول دا ب دروستكرنا دوبه‌ره‌كى و هه‌ڤركیان د ناڤبه‌را پارتێن عیراقێ و ب تایبه‌ت یێن هه‌رێمێ شكه‌ستنێن خوه‌ په‌رده‌پۆش بكه‌ت. ب مخابنیڤه‌ ژ بۆى به‌رژه‌وه‌ندێن ته‌سكێن پارتایه‌تى هنده‌ك لایه‌ن ل گه‌ل دهاریكار بوون كو كاریگه‌ریه‌كا نه‌رێنى ل سه‌ر به‌رژه‌وه‌ندیێن گه‌لێ كوردستانێ كر ل ناڤ خوه‌ و ده‌رڤه‌. ئه‌ڤ ره‌وشه‌ بوویه‌ فاكته‌ره‌كێ هاریكار و حوكمه‌تا عه‌بادى زێده‌تر وێره‌كیێ بده‌ته‌ خوه‌ ژ لایێ ده‌ستوورى و جوگرافى و جڤاكى زێده‌تر زۆرداریێ ل هه‌رێما كوردستانێ بكه‌ت پشتى راپرسیا (25) ئیلۆنێ، نابیت خوه‌ ب سه‌ردا ببه‌ین كو به‌رژه‌وه‌ندیێن هه‌رێمى و پیلانێن نیڤده‌وله‌تى ل گه‌ل عه‌بادى بوون ل دژى هه‌رێمێ. لێ ئه‌ز دبێژم: هه‌كه‌ ره‌وشا ناڤخۆ یا هه‌رێمێ یا نه‌جهگیر نه‌با، دا رێكێن دى هه‌بن كو كێمتر زیان گه‌هشتبا گه‌لێ كورد و دۆزا وان. دكتۆر مه‌حموود زاید مامۆستایێ زانینگه‌ها ئه‌زهه‌رێ ل گۆر دیتنا خوه‌ بۆ راپرسیا 25/9/2017 كانێ گاڤه‌كا ئاشتیانه‌ و شه‌رعى و ده‌ستوورى بوو یان نه‌، دبێژیت من ژى وه‌ك خه‌لكه‌كێ دى نه‌ رۆهنى د هه‌لویستێن نیڤ ده‌وله‌تى دا ددیت، لێ ئه‌وا ئه‌ز ته‌كه‌زیێ ل سه‌ر دكه‌م ناڤخوه‌یا كوردستانێ یه‌، ژ به‌ر وێ چه‌ندێ من چاڤدێریا بزاڤێن سه‌ره‌تایى یێن رێزدار مه‌سعود بارزانى سه‌رۆكێ وى ده‌مى یێ هه‌رێمێ دكرن بۆ ئاماده‌كاریان، چ هه‌ولێن وى بۆ ئێكرێزیا ناڤمالا كوردى د رێیا ته‌وافقه‌كا حزبى دا، دیسا ره‌زامه‌ندى و شه‌رعیه‌تا په‌رله‌مانى دبن سێبه‌را خه‌لكى و … هتد. ب ڤان بزاڤان و بن سیبه‌را به‌لگه‌نامێن نیڤده‌وله‌تى و هنده‌ك مادێن ده‌ستوورێ عیراقێ، من ئه‌ڤ گاڤا كوردستانیان بۆ بریاردان ل مافێ چاره‌نڤیسى ب شه‌رعى و دستوورى دیت، چونكى سه‌ركردێن هه‌رێمێ یێن سیاسى ب ئاشكرایى دگۆت راپرسى نه‌ رامانا جودابوونێ یه‌، به‌لكى زانینا دیتنا جادێ یه‌، پاشاى وه‌ك رێزگرتن ل ده‌نگێ خه‌لكێ كوردستانێ ب رێیا دیالۆگێ بگه‌هینه‌ رێكه‌كا گونجایى كۆ كاریگه‌ری ل سه‌ر ره‌وشا عیراقێ نه‌بیت.
ژبۆ نێزیك زانینا ره‌وشێ به‌رى راپرسیێ ب ده‌ه رۆژا هه‌تا پشتى راپرسیێ ئه‌ز ل هه‌رێما كوردستانێ بووم و پشكدارى باژێر بۆ باژێر دچووم بۆ دیتنا كه‌رنه‌ڤالان، ژ وانا ئاماده‌ى كه‌رنه‌ڤالا 20 ئیلۆنێ بووم ل سلێمانیێ ب ئاماده‌بوونا سه‌رۆك بارزانى، من هه‌ستا بلندا نشتیمانی د ناڤ خه‌لكێ كوردستانێ دیت به‌ره‌ڤ بریاردانێ ل سه‌ر مافێ چاره‌نڤیس و ل وێرێ چ په‌یڤ بلندتر نینه‌ ل مافێ مله‌ته‌كى كو بنه‌مایێن مافێ چاره‌نڤیسى هه‌بن.
خواندنا دكتۆرێ ئه‌زهه‌رێ ل دۆر هه‌لویستێن حوكمه‌تا عیراقێ یێن پشتى راپرسیێ به‌رامبه‌ هه‌رێمێ ب نه‌رێنى هاته‌ هه‌لسه‌نگاندن و گۆت، هه‌لۆیستێن حوكمه‌تا عیراقێ به‌ره‌ڤ نه‌رێنى ڤه‌ دچن ل دژى خه‌لكێ هه‌رێمێ، ب سه‌رپێچیێن هنده‌ك مادێن ده‌ستوورى و مفا وه‌رگرتن ژ نه‌روونا هنده‌ك مادان، هه‌روه‌سا بكارئینانا هنده‌ك كه‌سایه‌تیێن خودان به‌رژه‌وه‌ندیێن تایبه‌ت د ناڤ هه‌رێمێ دا، ب وى ره‌نگى راگه‌هاندن به‌رچاڤ دكه‌ت كو دوبه‌ره‌كیه‌كا تیژ ل ناڤ هه‌رێمێ هه‌یه‌. له‌وما دانۆسكارێن كورد تووشى ئاسته‌نگێن دژوار دبن ل گه‌ل به‌غدا و پشته‌ڤانیا هه‌رێمى هه‌یه‌ و هنده‌ك به‌رژه‌وه‌ندێن نیڤ ده‌وله‌تى ژى پشته‌ڤانن.
رۆژناما ئه‌ڤرۆ خواست پرسه‌كێ ئاراسته‌ى مامۆستایێ (ئه‌زهه‌ر) بكه‌ت، كا ئه‌رێ سه‌ركردایه‌تیا كوردى شیایه‌ گه‌ماروویا ئابوورى و دبلۆماسى بشكێنیت ئه‌وا ژلایێ حوكمه‌تا ناڤه‌ندى ڤه‌ ل سه‌ر هاتیه‌ سه‌پاندن یان نه‌، دبێژت: ئه‌وا من تێبینى كرى ل كارڤه‌دانێن راپرسیێ، سه‌ركردایه‌تیا كوردى هه‌ول دده‌ت ئه‌ڤ چه‌ندا به‌غدا ل سه‌ر سه‌پاندى بهۆژینیت، لێ ململانه‌ نه‌یا ب ساناهى بوو، پێدڤى ب كاره‌كێ زۆر و به‌رده‌وام هه‌یه‌ ب هه‌ولێن ئێكگرتى د ناڤ هه‌رێمێ دا، ئه‌وا هه‌رێم ژبه‌ر دنالیت و نیمچه‌ كوشتنه‌كه‌ ل سه‌ر ئاستێ حزبى و ل هنده‌ك جهان ل سه‌ر ئاستێ مللى. ل سه‌ر ڤێ ره‌وشا دژوار، مه‌ دیت سه‌ركردایه‌تیا كوردستانى ب ره‌نگه‌كێ رێژه‌یى شیا كارڤه‌دان و گه‌فێن گه‌ماروویا ئابوورى كێم بكه‌ن بۆ سه‌رنه‌گرتنا وێ، ب تایبه‌ت هه‌ولێن
گرتنا ده‌رگه‌هێن سنوورى یێن هه‌رێمێ ئانكو هه‌ولێن كونترۆلكرنه‌كا گشتى بسه‌ر، دێ شێین بێژین ئه‌و بخۆ بزاڤه‌كا دبلۆماسیا هه‌رێمى و نیڤده‌وله‌تى بوو.
دكتۆر مه‌حموود خواندنا خوه‌ دا بۆ سیاسه‌تا ئاشتى و میانره‌وانه‌یا سه‌رۆكێ حوكمه‌تا هه‌رێما كوردستانێ چ د ڤان كاودانان دا وه‌سا خوه‌یاكر كو ئه‌ڤ قووناغا حوكمه‌تا رێزدار نێیرڤان بارزانى پشتى بدووماهى هاتنا ده‌مێ سه‌رۆك مه‌سعود بارزانى دژوارترین و ب زه‌حمه‌تترین قووناغه‌، كو ده‌مێ چار سالانه‌ هه‌رێم تووشى گرفتێن ئابوورى بووى ل گه‌ل ناكۆكیێن حزبى و سیاسى، هه‌ڤده‌م دگه‌ل خوه‌ ل به‌رڤه‌نانێن هه‌رێمى ژلایێ ئیران و توركیا و هنده‌كێن دى. سه‌ره‌راى مانا مه‌ترسیێن تیرۆرێ ل ده‌ڤه‌رێ، نه‌ تنێ داعش به‌لكى هنده‌ك هه‌ول دده‌ن شه‌رعیه‌تێ بده‌نه‌ بزاڤ و رێكخراوێن توندره‌وتر، هه‌ر چه‌نده‌ ب مافێن هنده‌كان ل ڤێره‌ و وێراهه‌نێ هاتینه‌ هه‌لوه‌شاندن.
له‌وما دكتۆرێ ئه‌زهر دبێژیت: حوكمه‌تا نهو یا رێزدار نێچیرڤان بارزانى یا بێ شانسه‌ و به‌رپرسیاریه‌كا مه‌زن ل سه‌ره‌ و قه‌پخوازیێن مه‌زن ل به‌رامبه‌ر هه‌نه‌. شیانه‌ هنده‌ك ژ وێ به‌ستیى و جه‌مه‌دێ بوهژینیت و هنده‌ك كاران برێڤه‌ببه‌ت، لێ هێشا زۆرێ ل پێش ماى. لێ بێ ئێكرێزیا ناڤخۆیى نه‌شێت سه‌ركه‌فتنه‌كا زوو بده‌ستڤه‌ بینیت، به‌رژه‌وه‌ندیێن بلندێن كوردستانیان بیننه‌ به‌رى هه‌ر تشته‌كى.
ته‌ چ پێشنیار بۆ سه‌ركردایه‌تیا كوردستانێ هه‌نه‌ ..؟
ل ده‌سپێكێ پێدڤى یه‌ ب هه‌ر رێیه‌كا هه‌بیت ب له‌ز ب ره‌نگه‌كێ یاسایى و شه‌رعى بشێن مووچێ خه‌لكێ هه‌رێمێ دابین بكه‌ن، دیسا و پێدڤى یه‌ گرنگیێ بده‌نه‌ بنه‌مایێن دابینكرنا پێكهاتنا ناڤخوه‌یى و نه‌خشه‌رێكه‌كا به‌رچاڤ و ئاشكرا بۆ خه‌لكى دیار بكه‌ن ده‌رباره‌ى هه‌لبژارتنێن په‌رله‌مانى و سه‌رۆكایه‌تیێ ل سه‌ر بنه‌مایێ ده‌ستووره‌كێ ته‌وافقى بۆ هه‌مى كوردستانیان، پاشى ئاڤاكرنا ژێرخانه‌كا ئابوورى بۆ گه‌شه‌پێدانه‌كا كوردستانى و نشتیمانى كو یا گرێدایى بیت ب جیرانێن خوه‌ڤه‌ وه‌ك توركیا و ئیرانێ یان هنده‌كێن دیتر. پێشنیار دكه‌م ئه‌و به‌ستیا د ناڤبه‌را پێكهاتێن كوردى ل ده‌رڤه‌ى هه‌رێمێ بهێته‌ بوهژاندن، ب تایبه‌ت دگه‌ل رۆژئاڤا و باكۆرێ كوردستانێ. ئه‌گه‌ر هه‌ماهه‌نگى ل گه‌ل پارچێن دیتر یێن كوردستانێ هه‌بیت ره‌وش زۆر دێ هێته‌ گوهۆرین. ل سه‌ر ئاستێ نیڤده‌وله‌تى ژى پێشنیار دكه‌م زێده‌تر شیانان بۆ پشته‌ڤانیا مافێن كوردستانیان بكاربینن و لۆبیه‌كێ وه‌سا دروست بكه‌ن كۆ كاریگه‌رى ل سه‌ر ره‌ئیا گشتى یا جیهانێ و درۆستكه‌رێن بریارێ هه‌بیت. ب زمانێ خه‌لكى ل گه‌ل خه‌لكى باخڤن، خوه‌ بۆ عه‌ره‌بان بده‌نه‌ نیاسین ب كه‌نالێن ئاسمانیێن زمانێ عه‌ره‌بى، مه‌ دڤێت ب ڤان كه‌نالان دۆزا كوردى بناسین، نه‌ د رێیا شۆفینیێن نه‌ته‌وێن دیتر.
مه‌ وه‌ك ئه‌ڤرۆ خواست خواندنا ڤى دكتۆرێ ئه‌زهه‌رێ بزانین ل دۆر رۆلێ ئیرانێ و كاریگه‌ریا وێ ل سه‌ر حوكمه‌تا عیراقێ، دكتۆرى ژى ئه‌ڤ رۆله‌ ل عیراقێ خۆیاكر مو نه‌ یێ نوویه‌ و نه‌ سوپرایزه‌ (رۆلێ ئیرانێ)، زۆرێ كه‌ڤنه‌ ئانكۆ هاتیه‌ڤ نووكرن، ئیرانێ زۆر به‌رژه‌وه‌ندیێن خوه‌ ب ڤێ ره‌وشێ دابین دكه‌ن، ئه‌ڤێ ژى دووریێن دیرۆكى و جوگرافى و مه‌زهه‌بى و ئابوورى هه‌نه‌، به‌لگه‌نامه‌ و سه‌ره‌ده‌ریێن ئیرانێ ل سه‌ر ڤێ چه‌ندێ دیده‌ڤانن و سه‌ركردایه‌تیا كوردستانێ باش ڤێ چه‌ندێ دزانیت، سه‌ره‌راى ره‌وشا رۆژهه‌لاتا كوردستانێ، رۆلێ به‌رچاڤ و كاریگه‌رێ ئیرانێ ل سه‌ر بریارا سیاسى یا عیراقا عه‌ره‌بى ناهێته‌ وندا كرن و رێكه‌فتنه‌ بۆ به‌رفره‌هبوونا كارگه‌ریا خوه‌ ل سه‌ر وه‌لاتێن دیتر یێن عه‌ره‌بى، ژ به‌ر ڤێ چه‌ندێ تشته‌كێ ئاسیى یه‌ ماف و دیتنێن كوردان هه‌ڤدژ بن ل گه‌ل ئیرانێ.
خاله‌كا گرنگ مه‌ ڤیا بكه‌ینه‌ پرسه‌ك و به‌رسڤا ناڤبرى بزانین، كا بۆچى پرانیا وه‌لاتێن عه‌ره‌بى ل به‌رامبه‌ر كارێن دوژمنانه‌ یێن حوكمه‌تا عیراقێ ل دژى كوردان ب تایبه‌ت ل كه‌ركووكێ بێ ده‌نگ مان؟! دكتۆر هات ده‌نگ و گۆت: ئه‌ڤێ زۆر هۆكار هه‌نه‌، ژ وانا سنوورداریا زانیاریێن عه‌ره‌بان ل سه‌ر كوردان ده‌رباره‌ى مافێن كوردستانیان ل كه‌ركووكێ و نه‌پێرابوونا لایه‌نێ كوردى دیاركرنا ڤێ چه‌ندێ بۆ ره‌ئیا گشتى یا عه‌ره‌بى، سه‌ره‌راى شۆفینیه‌تا هنده‌ك دژى كوردستانیبوونا كه‌ركووكێ و ده‌ڤه‌رێن دیتر یێن كوردستانێ یێن ده‌رڤه‌ى هه‌رێمێ، كو دبێژنێ ده‌ڤه‌رێن كێشه‌ ل سه‌ر.
ل دۆر خیانه‌تا ناڤخۆیى ئه‌م پرسین كانێ ئه‌گه‌رێ كه‌فتنا كوركووكێ و ده‌ڤه‌رێن دیتر بوو، ژبۆ بن ده‌سهه‌لاتا حوكمه‌تا ناڤه‌ندى یان نه‌؟ دكتۆرێ مه‌ گۆت، روونشتنا هه‌مى لایه‌نێن كوردستانێ ل سه‌ر مێزا دیالۆگا ئاشتیانه‌ ئه‌ركه‌كێ پێدڤى یه‌، داكو هه‌مى نشتیمان په‌روه‌ر وه‌كهه‌ڤ و بكاریگه‌ریه‌كا ئه‌كتیڤ هه‌ست ب ده‌سهه‌لاتداریێ و رێڤه‌برنێ دا بكه‌ن د چارچوڤه‌كێ دیمۆكراسی و ل هه‌ڤ هاتنێ. وى ده‌مێ خیانه‌تكارى و په‌یڤێن دى نه‌هێنه‌ بكارئینان، لێ یێن بچووك به‌رى یێن مه‌زن هه‌ڤركریێ ل سه‌ر پاراستنا ئاخ و ده‌سكه‌فتێن خوه‌.
خاله‌كا دیتر یا گرنگ مه‌ كره‌ پرسیار و هاڤێته‌ به‌ر دكتۆرێ ئه‌زهه‌رێ، كو ئه‌رێ عه‌ببادى یێ رژده‌ ل سه‌ر چاره‌كرنا ناكۆكیێان ل گه‌ل كوردان ل سه‌ر بنه‌مایێ ده‌ستوورىـ گۆت كو هه‌تا ناڤمالا كوردستانى د ناڤخوه‌دا دناكۆك بن، هه‌ر حوكمه‌ته‌كا عیراقى بێت یا رژد نابیت ل سه‌ر چاره‌كرنا ڤان پرسان، ڤێجا: ته‌په‌ ل گۆره‌پانا هه‌رێمێ یه‌ به‌رى ئه‌وێن دى. كۆمێنتا ڤى دكتۆرى ل دۆر هێرشێن حه‌شدا شه‌عبى ده‌مێ ب پشكدارى و رێنمایێن پاسدارێن ئیرانى بۆ سه‌ر هه‌رێما كوردستانێ پشتى راپرسیێ بێ ده‌نگ ماین، گۆتى ئه‌وا ل سه‌ر وه‌لاتێن عه‌ره‌بى ل سه‌ر ڤان ژى بجه دهێت، یا جودا ئه‌وه‌ وه‌لاتێن رۆژئاڤا ب چاڤێ دابونه‌ریت و پره‌نسیپان به‌رێ خوه‌ ناده‌نه‌ بوویه‌رێن ده‌ڤه‌را رۆژهه‌تا ناڤین، به‌لكى تنێ د گۆشه‌یا به‌رژه‌وه‌ندیان دا. ڤێجا نابیت سه‌ركردایه‌تیا كوردستانى زۆر پشتا خوه‌ پێ گه‌رم نه‌كه‌ت، مه‌ مسڕیان سه‌رهاتیه‌كا هه‌ى دبێژیت: “ئه‌وێ رۆژئاڤا بۆ خوه‌ بكه‌ته‌ سه‌یوان، یێ رویسه‌”، دێ چاوا چاڤه‌رێ پشته‌ڤانیا نیڤده‌وله‌تى بن و هوون دناڤخوه‌دا د رێككه‌فتى نه‌بن؟!.

دكتۆێ مسڕى حه‌زژێكرنا خوه‌ بۆ هێزێن پێشمه‌رگێ كوردستانێ نه‌ڤه‌شارت و رۆلێ وى بۆ شكاندا تیرۆرستێن داعش، گۆت شرۆڤه‌یێن من ل دۆر پێشمه‌رگه‌ى بۆ شكاندنا داعشێ وه‌ك شرۆڤه‌ و دیتنێن هه‌مى راستگۆیێن جیهانێ یه‌، كو ده‌مه‌كێ نه‌یێ كورته‌ ل جهێ جیهانێ شه‌رێ تیرۆرێ دكه‌ت و ل سه‌ر ڤێ چه‌ندى من زۆر ل سه‌ر نڤیسى یه‌ ل گۆتار و ڤه‌كۆلینا، نیشا قوتابیێن خوه‌ ل زانكۆ یێ ل مسڕێ داینه‌. ژ بلى ڤێ چه‌ندێ من رۆلێ پێشمه‌رگه‌ ژناڤبرنا داعشێ پشتى ره‌ڤینا له‌شكرێ كربوو پسیارا دووماهى یا سالێ و ب دیتنا من وى ده‌مى ره‌ئیا گشتى یا كوردستانێ دیڤچوون بۆ كر و ئازراندن.
به‌رێ خوه‌دانا وى بۆ پرۆسا دیمۆكراسیا ل هه‌رێما كوردستانێ هه‌یى، ناڤه‌شێریت كو د ناڤبه‌را 2005 هه‌تا ده‌سپێكا كو هنده‌ك دبێژنێ بوهارا عه‌ره‌بى كو ئه‌وان د كۆڕ و سمینارێن خوه‌دا په‌سنا پرۆسا دیمۆكراسیا كوردستانێ دكر ب ره‌نگه‌كێ گشتى، چ ل سه‌ر ئاستێ حزبى یان په‌رله‌مانى یان ژى كار و سه‌ره‌ده‌ریێن حكومى، گۆت كو ئه‌وان هه‌میان ب ده‌نگه‌كێ بلند داخواز دكر پێدڤى یه‌ ئه‌زمۆنا دیمۆكراسیا هه‌رێما كوردستانێ بهێته‌ شرۆڤه‌كرن و هه‌ول بهێته‌دان ئه‌رێنیا وێ ل مسرێ بهێته‌ پراكتیزه‌كرن. لێ پشتى پێشكه‌فتنێن نه‌رینیا ب ناڤێ بوهارا عه‌ره‌بى ره‌وشا كوردستانێ ژى هێدى هێدى به‌ر ب خرابیێ ڤه‌ چوو .. به‌لگه‌ ل سه‌ر ڤێ چه‌ندێ شكه‌ستن و دوژمنیا هنده‌ك حزبێن هه‌رێمێ نهو ل سه‌ر دچن و گونه‌هباركرنێن ئێره‌ و وێرا هه‌نێ.
ل دۆر مه‌به‌ستا تركیا ژ هێرشكرنا عه‌فرینێ چیه‌، دبێژیت عه‌فرینا بریندار دیاره‌ ده‌نگڤه‌دانه‌كا نموونه‌یى یه‌ ژ به‌ره‌ڤانیێ ژ ئاخ و ئازادى و ئیراده‌ و روومه‌تێ دژى دوژمنكاریا تركیا و میلیشیایێن پشته‌ڤانیێ لێ وه‌ردگرن ل پاشمایێن داعش و نوسره‌ و هنده‌كێن دى. تركیا دڤێت بێژیته‌ كوردێن رۆژئاڤا ئه‌م دێ دووماهیێ ب حه‌زێن وه‌ یێ كوردایه‌تى ئینین، پشتى مه‌ پرۆژێ راپرسیا سه‌رخوه‌بوونا هه‌رێما كوردستانێ هه‌لوه‌شاندى. تركیا دڤێت بێژیت ئه‌م دێ ب داگیركرنا پشكه‌كا ئه‌ردێ رۆژئاڤا دێ (هه‌سه‌دێ) پاداشت كه‌ین پشتى رۆله‌كێ به‌رچاڤ گێراى ل ناڤبرنا داعشێ. هه‌ر وه‌كى دژایه‌تیا پێشمه‌رگه‌ى كری پشتى وى رۆلێ به‌رچاڤ گێراى ل ناڤبرنا داعشێ ل عیراقێ، ل دژایه‌تیا راپرسیا 25 ێ ئیلونێ. ژبلى كو تركیا دڤێت ئه‌مریكا و رۆسیا و ئیرانێ پشكدار بكه‌ت ل ده‌سكه‌فت و ده‌سهه‌لاتداریێ ل سووریا.
دكتۆر مه‌حموود و وژدان بۆچوونا خوه‌ ل سه‌ر مافێ سه‌رخۆبوونا كوردستانى َ ئاشكرا دكه‌ت و دبێژیت: هه‌رده‌م ئه‌زێ ل گه‌ل دۆزێن راست و دۆزێن گه‌لێن بنده‌ست و مافێ بریاردانێ ل سه‌ر چاره‌نڤیسێ وان، مله‌تێ كوردستانێ ژى ئێكه‌ ل ڤان مله‌تان. لێ ناهێته‌ مانده‌لكرن كو هنده‌ك ژ كوردان به‌رپرسیاریا پشكه‌كا ئاسته‌نگێن ڤێ زۆرداریێ هه‌لدگرن، ره‌وشا نهو باشترین به‌لگه‌یه‌ ل سه‌ر ڤێ چه‌ندێ.
مامۆستایێ مسڕى دیتنا خوه‌ ل دۆر په‌یوه‌ندیێن كوردستانى ـ عه‌ره‌بى و كانێ چ گرنگى هه‌یه‌، دبێژیت: په‌یوه‌ندیێن خورت د ناڤبه‌را هه‌ر مله‌ته‌كى و ئێكێ دى دا زۆر دفه‌رن و پتر خۆشیێ و ته‌ناهیێ دابین دكه‌ت، چونكى چ مله‌ت نه‌شێن ب تنێ بژین، هێزا ده‌وله‌تان، ل دووڤ موكومیا په‌یوه‌ندیا یه‌، هه‌ردو گه‌لێن عه‌ره‌بى و كوردى ژى د ڤى چارچووڤه‌ى دانه‌، ب تایبه‌ت كۆ زۆر خالێن هه‌ڤپشك هه‌نه‌، وه‌ك جیرانى، ئایین، دیروكا هه‌ڤپشك ل ده‌سپێكا ئیسلامێ، شاۆستانیه‌ت و په‌یوه‌ندیێن جڤاكى و زانستى. د ڤێره‌ دا دیاردبیت په‌یوه‌ندیێن عه‌ره‌بى ـ كوردى بۆ هه‌ردو مله‌تان وه‌ك ئێك گرنگیه‌كا مه‌زن هه‌یه‌. لێ ره‌وشا نهو ڤێ چه‌ندێ ناچه‌سپینیت، ژبه‌ر شۆفینیه‌ت و نه‌ته‌وه‌په‌رست و خوه‌ ل سه‌ر ئێك بلندركرنێ، كۆ ژلایێ زۆر رژێمێ عه‌ره‌بى به‌رامبه‌ر كوردستانیان كار پێ هاتیه‌ كرن. مخابن ئه‌ڤ تیۆره‌ هه‌تا نهو ژى ل ده‌ڤ هنده‌كا یا ماى.
دووماهى په‌یڤا خوه‌ دكتۆرى دیاركر بۆ گه‌لێ كورد و سه‌ركردایه‌تیا وان گۆتى، دبێژمێ : “سه‌رخۆبوونا كوردستانێ بێخنه‌ ناڤ دلێ خوه‌، دێ كه‌ڤیته‌ سه‌رعه‌ردێ وه‌.

دیدار ئه‌ڤرۆ: غیاس خالد زێبارى
محسن عه‌وزوللا نڤیسه‌رێ رۆژنامه‌ڤانێ مسرى كو گرنگیێ ب كاروبار و دۆزا كوردى دده‌ت و چه‌ندین گۆتار ل گۆڤار و رۆژنامان ل سه‌ر دۆزا كوردى به‌لاڤكرینه‌ د دیداره‌كا تایبه‌ت دا بۆ رۆژناما ئه‌ڤرۆ دبێژیت، من دۆزا كوردى ڤیایه‌ ژبه‌ركو ئه‌ڤ دۆزه‌ بۆ كه‌رته‌كێ مه‌زنێ جڤاكێ مسرى و عه‌ره‌بى یا روون نه‌بوویه‌ و هه‌تا ژ لایێ پشكه‌كا ره‌وشه‌نبیر و رۆژنامه‌ڤانان ژى، له‌وما ئه‌ز هه‌ول دده‌م ببمه‌ پره‌ك بۆ لێكنێزیكركرنا د ناڤبه‌را كورد و عه‌ره‌بان دا، ژبه‌ركو من باوه‌ریه‌كا موكوم هه‌یه‌ كو كورد مه‌زنترین هێزا هاریكار و پشته‌ڤانن و دشێن كۆده‌تایه‌كێ د نه‌خشێ رۆژهه‌لاتێ دا بكه‌ن هه‌كه‌ ل گه‌ل عه‌ره‌بان ببنه‌ هه‌ڤپه‌یمان.
ده‌رباره‌ى كێشا كوردى، ئه‌ڤ نڤیسه‌ره‌ دبێژیت: كێشا كوردى ب ره‌نگه‌كێ گشتى زێده‌تر ژ هه‌مى كێشان زانیارى ل سه‌ر تێكهه‌ل بوونه‌ و كێشه‌كا دیرۆكى یه‌ و بۆچوونێن به‌رچاڤ ل سه‌ر هه‌نه‌ و ل هه‌مى پارچێن كوردستانێ تاگیرى بۆ ڤێ دۆزێ هه‌یه‌.
ده‌رباره‌ى خالێن ئه‌رێنى و نه‌رێنى یێن هه‌رێما كوردستانێ عه‌وزوللا دبێژیت: هه‌رێما كوردستانێ زێده‌تر پارچێن دیتر چانسێ خوه‌ برێڤه‌برنێ هه‌یه‌، ژبه‌ركو خودان په‌رله‌مان و حوكمه‌ت و سازیێن دیتر یێن خۆبرێڤه‌برنێ نه‌، باشتره‌ بێژین خۆدان نیمچه‌ ئازادى و سه‌ربخۆبوونه‌ و كوردێن هه‌مى پارچێن دیتر خه‌ون ب وانڤه‌ دیتینه‌، مخابن ئه‌ڤ ته‌ناهیا چه‌ندین سال یێن ڤێ هه‌رێمێ بوویه‌ قوربانى ده‌سهه‌لاته‌كا نه‌دادپه‌روه‌را نه‌، چونكى حزبان و حوكمه‌تێ وه‌كى پێدڤى خزمه‌ت نه‌كر و گه‌نده‌لیێ و نه‌دادوه‌رى به‌ربه‌لاڤ بوو، ملله‌ت ژى تووشى قه‌یرانا دارایى بوو و مووچه‌ دبه‌رده‌ست نینه‌. ده‌مێ سه‌رۆكاتیێ ژى بداوى هات و نهو دبێ سه‌رۆكن، مخابن سه‌رۆكاتیا په‌رله‌مانى ژى ده‌رباره‌ى سه‌رخۆبوونێ یا رژد نه‌بوو.
ـ ده‌رباره‌ى راپرسیا سه‌رخۆبوونا كوردستانێ محسنى گۆت : هه‌رتشێ پشتى راپرسیێ رووداى من پێشبینى دكر و من ئاگادار كرن، تشته‌كێ نوو نه‌بوو عیراق و وه‌لاتێن ده‌ورو به‌ر گه‌فێن تۆلڤه‌كرنێ بكه‌ن و كر ژى، ئه‌م گازندێ ژ وان ناكه‌ین هه‌مى گازنده‌ ل وانه‌ ئه‌وێن خوه‌ بۆ ڤێ رۆژێ به‌رهه‌ڤنه‌كرى.
ـ ده‌رباره‌ى ئه‌وا ل 16 ێ ئكتۆبه‌رێ رووداى، ئه‌ڤ چاڤدێره‌ دبێژیت: كورد چ جاران ڤێ چه‌ندێ ژبیر ناكه‌ن و ملله‌ت ژ وان حزب و سه‌ركردا نابووریت ئه‌وێن ئه‌ڤ سه‌فه‌قاتێن دژوار بۆ به‌رژه‌وه‌ندیێن حزبى كرین و تۆلڤه‌كرن دێ لێ هێته‌كرن.
ـ ده‌رباره‌ى هه‌ولێن حوكمه‌تا هه‌رێما كوردستانێ بۆ خۆرتكرنه‌ڤا په‌یوه‌ندیان ل گه‌ل جیهانێ و شكاندنا ئابلۆقا سیاس، ناڤبرى گۆت: سه‌ركردایه‌تیا كوردستانێ هه‌ولدده‌ت سه‌ركه‌فتنێن به‌رى 25 ئیلۆنێ بزڤرینیت و ئه‌ڤ چه‌نده‌ ل سه‌ره‌دانێن سه‌رۆكێ حوكمه‌تا هه‌رێما كوردستانێ دا دیاره‌ ده‌مێ سه‌ره‌دانا تركیا و بۆ غدا و ئیران و وه‌لاتێن دیتر كرى، مخابن راپرسى بوو رابردوو، لێ ئه‌ز باوه‌رم هێدى هێدى ئابلۆقه‌ دێ هێته‌ شكاندن و ره‌وش دێ وه‌كى به‌رى راپرسیێ زڤریت، لێ ملله‌تى باوه‌رى ب سه‌ركردایه‌تیێ نه‌مایه‌،
ـ ده‌رباره‌ى رۆلێ ئیرانێ ل عیراقێ ئه‌ڤ نڤیسه‌ره‌ دبێژیت: ئه‌ز دبین عیراق یا بوویه‌ نیمچه‌ ویلایه‌كا ئیرانى ب ده‌سهه‌لاتداریه‌كا عیراقیا سه‌ر ب ده‌سهه‌لاتداریا مه‌لایى یا ئیرانێ و به‌غدا نه‌شێت بێ ره‌زامه‌ندا ته‌هرا چ بكه‌ن.
ـ ده‌رباره‌ى هێرشێن توركیا بۆ سه‌ر عه‌فرین . (محسن عه‌وزوللا)ى گۆت: بۆ شكاندنا یه‌كینه‌یێن پاراستنا گه‌لى ل رۆژئاڤایێ كوردستانێ تۆركیا یا به‌رهه‌ڤه‌ ل گه‌ل شه‌یتانى هه‌ڤپه‌یمانیێ بكه‌ت، ب دیتنا من ئه‌ڤ ئۆپه‌راسیۆنه‌ درێژ نابن و د ڤان رۆژان دا توركیا دێ دووماهیێ پێ ئینیت ب به‌هانه‌یا بجه گه‌هشتنا ئارمانجێن خوه‌، ژ به‌ر ره‌خنه‌ و كڤاشتنێن نیڤده‌وله‌تى ل سه‌ر توركیا چونكى به‌رته‌نگ بوونه‌، هه‌ر وه‌كى ل ئۆپه‌راسیۆنا (مه‌تالا فورات) كو چ سه‌ركه‌فتن بده‌ستڤه‌ نه‌ئیناى و كوردێن رۆژئاڤا شیان هه‌نه‌ ب دژوارى به‌رسڤا هێرشێن توركیا بده‌ت.
ـ ده‌رباره‌ى پاشه‌رۆژا نێزیك یا كوردستانێ، چاڤدێرى گۆت: ئه‌ز باوه‌رم ره‌وش دێ بۆ به‌رى راپرسیێ زڤریت و سنوور دێ ڤه‌بن و ئابلۆقه‌ دێ هێته‌ شكاندن. ژلایێ سیاسى ژى ره‌وش دێ هێته‌ گۆرین و رۆلێ ده‌سهه‌لاتا هه‌رێمێ دێ زڤریت و نێچیرڤان بارزانى دێ بیته‌ ستێره‌ك و سه‌رۆكێ داهاتیێ كوردستانێ ئه‌گه‌ر ئه‌ڤ سیسته‌مێ سه‌رۆكاتیێ بمینیت.
ـ ده‌رباره‌ى سه‌رخۆبوونا كوردستانێ ژى گۆت: خۆزى ده‌ولته‌كا كوردستانیا دیموكراتى لدایك ببا، لێ د ڤان كاودانان دا هه‌رێمه‌كا فیدرالى باشتره‌ ل ده‌وله‌ته‌كا فاشل و ته‌مه‌ن كورت، چونكى هه‌رێمێ هه‌مى پێكهاتێن ده‌وله‌تێ هه‌نه‌ ژ بلى سه‌رخۆبوونێ و دبیت د ڤان كاودانان دا یا سه‌ركه‌فتى نه‌بیت.

غیاس خالد زێبارى

مه‌به‌ست ژ ڤێ مانشێتێ به‌رده‌وامبوونا حزب و كه‌سایه‌تیانه‌ ل ده‌سهه‌لاتێ و بكار و ره‌فتارێن خوه‌ ببنه‌ جهێ شانازیا ملله‌تێ خوه‌. د ژیانێ دا ئه‌و كه‌سایه‌تیێن ژپێخه‌مه‌ت ئازادى و رزگاریا ملله‌تێ خوه‌ یان مرۆڤاتیێ ب گشتى خه‌باتێ دكه‌ت، یان د قۆناغێن رزگاریێ ژى دا ب قانوون و سه‌ره‌ده‌رى و ده‌سهه‌لاتداریه‌كا راستگۆیانه‌ و دادوه‌رانه‌ ده‌سهه‌لاتداریێ رێڤه‌دبه‌ن، دژیێ وان ل ده‌سهه‌لاتداریێ درێژ دبیت و دبنه‌ جهێ شانازیا ملله‌تێ و ملله‌تێن دیتر. ناڤێ وان ب په‌یڤێن زێرین د دیرۆكێ دا دهێته‌ تۆماركرن و چ جار ناڤوده‌نگێ وان نامریت، شێوازێ ده‌سهه‌لاتداریێ ژى وه‌سا لێ دكه‌ن كو ته‌ڤایا به‌رپرسێن وه‌لاتى نه‌چاربن ب ره‌نگه‌كێ دادوه‌رانه‌ و كیانێ خۆشكاندنێ و سه‌روه‌ریا قانوونێ و وه‌كهه‌ڤیێ سه‌ره‌ده‌ریێ ل گه‌ل تاكێن جڤاكى بكه‌ن. د دیرۆكا مرۆڤاتیێ ئه‌ڤ ره‌نگه‌ كه‌سایه‌تیه‌ دزۆرن. ژ لایێ ئاینێن ئاسمانى ژى ئه‌ڤ سه‌ره‌ده‌ریه‌ ئێك بوونه‌ ژ ئه‌ركێن په‌یامبه‌ران. د ناڤ گه‌لێ كورد ژى دا بارزانیێ نه‌مر ئه‌ڤ هه‌مى سالۆخه‌ته‌ هه‌مبێز كربوون و ب كه‌سایه‌تیه‌كێ دادوه‌ر و ته‌وازع و دادكۆكیكار ل مافێن هه‌ژار و به‌له‌نگازا و راستیێ و …هتد، ژبلى كۆ كه‌سایه‌تیه‌كێ سیاسیێ بێ وێنه‌ بوو. له‌وما بوویه‌ خودان رێبازه‌كا تایبه‌ت یا سیاسى و جڤاكى و ناڤێ وى هه‌رده‌م وه‌ك ستێره‌گا گه‌شه‌ د ئاسمانێن ئازادیخوازیێ و عه‌داله‌تێ دا نه‌ تنێ ل سه‌ر ئاستێ كوردستانێ به‌لكى ل سه‌ر ئاستێ جیهانێ. جهێ پسیارێ یه‌ ئه‌رێ ده‌سهه‌لاتدارێن نهو یێن ده‌ڤه‌رێ ب گشتى ب هه‌رێما كوردستانێ ژى ڤه‌ درێژه‌ده‌رێن ڤێ رێبازێ نه‌ یان سه‌رده‌ریێن وان به‌رۆڤاژى نه‌؟، مینا وان ده‌سهه‌لاتدارێن شۆفینى و دكتاتۆریێن ب كوته‌كى و ب هێزا له‌شكرى ده‌مێ چه‌ندین سالان جهێ خوه‌ ل سه‌ر ده‌سهه‌لاتێ مۆكۆم كرى و هه‌مى سه‌روه‌رت و سامانێ وه‌لاتى ئێخستیه‌ بن ده‌ستێن خوه‌ و هیچ حسابه‌ك بۆ ملله‌تى نه‌كر، هه‌روه‌كى چ جار ده‌ستهه‌ت و وه‌لات ل سه‌ر ناڤێ وان هاتیه‌ تاپۆكرن بۆ هه‌تا هه‌تا..!. ده‌مێ لێ قه‌ومى و ملله‌تى تۆڕه‌بوونا خوه‌ لێ ده‌ركرى، نه‌ وان چ دۆست هه‌بوون، نه‌ ژى سه‌روه‌رت و سامانێ وان بۆ بوونه‌ په‌ناگه‌ه و چه‌ند رۆژه‌كان خوه‌ رانه‌گرت و بێ سه‌رۆبه‌رترین شێواز و ب بێ رێزى هاتنه‌ كوشتن و ناڤێ وان چوو د زبلدانا دیرۆكێ دا. مه‌به‌ستا من نه‌ ئه‌وه‌ وه‌كهه‌ڤیێ د ناڤبه‌را ده‌سهه‌لاتدارێن مه‌ و وان دكتاتۆر و شۆفینیا دا ببینم، لێ هه‌كه‌ ده‌سهه‌لاتدارێن مه‌ بڤێت درێژیێ ب ده‌سهه‌لاتداریێ بده‌ن و ببنه‌ جهێ شانازیا ملله‌تى و ناڤێ وان ب په‌یڤێن زێرین د دیرۆكێ دا بهێته‌ نڤیسین، پێدڤى یه‌ ده‌ستا ل ته‌ماعیێ و كۆمكرنا سه‌روه‌رت و سامانى و ده‌ست ب سه‌رداگرتنا ب سه‌ردان دۆنه‌مێن عه‌ردى و خوه‌ پكداركرن ل گه‌ل پرانیا كۆمپانى و بازرگانا به‌رده‌ن، ژ لایێ جڤاكى ژى خوه‌ و ئه‌ندامێن خێزانێ و كه‌سوكارێن خوه‌ ب چینه‌كا بلندتر جڤاكێ خوه‌ نه‌بینن، به‌لكى ل گه‌ل ئێش و ئازارێن ملله‌تى بژین. ژبۆى برێڤه‌برنا ده‌ستهه‌لاتداریێ ژى جورئه‌تێ بده‌نه‌ خوه‌ و ل دووڤ قانوونێ سه‌ره‌ده‌ریێ بكه‌ن و بلا قانوون سه‌روه‌ر بیت و جوداهى د ناڤبه‌را كه‌سى دا نه‌بیت، ده‌ست ب چاكسازیێن بنه‌ره‌تى بكه‌ت دز و گه‌نده‌لكار ل پێش چاڤێن خه‌لكى بهێنه‌ سزادان. داكو باوه‌ریا خه‌لكى ب ده‌سهه‌لاتا هه‌رێما كوردستانێ بزڤریته‌ڤه‌ و ژلایێ ئابوورى ژى ب ملیاران دۆلار دێ بۆ خه‌زینا حوكمه‌تێ زڤریت و هه‌رێم دێ ب سه‌رفیرازى ل ڤێ قه‌یرانا ئابوورى و دارایى رزگار بیت. هه‌ر وه‌كى میرێ جێنشینێ عه‌ه‌ربیا سعوودیێ ل ڤان دووماهیان بۆ بنبركرنا گه‌نده‌لیێ و سزادانا گه‌نده‌لكاران، ل مالباتا خوه‌ ده‌سپێكرى و هژماره‌كا هه‌ره‌ زۆرا وان كه‌سێن مالباتێ ده‌سته‌سه‌ركرى و ده‌ست ب سه‌ر سه‌روه‌ت و سامانێ وان گرتى و ئاراسته‌ى دادگه‌هێ كرى، پێگه‌ها وى ل سه‌ر ئاستێ ناڤخوه‌یى و ده‌رڤه‌ بلندبووى. بلا ده‌سهه‌لاتدارێن مه‌ ژى مفاى ل ئه‌زمۆنا وى وه‌ربگرن و هه‌رێما كوردستانێ ل ڤێ قه‌یرانێ رزگار بكه‌ن و جهێ خوه‌ ژى ل سه‌ر ده‌ستهه‌لاتێ موكومتر بكه‌ن و ببنه‌ جهێ شانازیا ملله‌تى، هه‌ر كه‌سایه‌تیه‌كێ ب ڤى ره‌نگى چاكسازیان راببیت بێ ئیكودو دێ حزبا وى بیته‌ مه‌زنترین حزب ل كوردستانێ.

غیاس خالد زێباری
پشتی ژیێ حوكمه‌تا هه‌رێما كوردستانێ به‌ر ب دووماهیێ هاتی و ژ ئه‌نجامێ گه‌مارۆدانا هه‌رێمێ ژ لایێ سیاسی و ئابووری و دارایی ژ لایێ حوكمه‌تا تائیفی یا شیعه‌گه‌ریا عیراقێ، كو ئه‌و ژی ده‌رئه‌نجامێ خیانه‌تكاریا باله‌كێ وه‌لات فرۆشێن (ێ.ن.ك) و دووڤه‌لانكێن وان بوو، ل (١٦) ئكوتۆبه‌رێ ل كه‌ركووك و ده‌ورروبه‌، هه‌رێما كوردستانێ ئێخسته‌ د قه‌یرانه‌كا دژوارا یا ئابووری و دارایی دا، ئه‌وا بوویه‌ ئه‌گه‌رێ ژده‌ستدانا ژێده‌رێن سه‌ره‌كیێن داهاتێ كوردستانێ یێ نه‌فتێ و بڕینا بۆدجه‌ و مووچێ كوردستانێ.
هه‌ر چه‌نده‌ حوكمه‌تا هه‌رێما كوردستانێ حوكمه‌ته‌كا بنكه‌فراوان بوو ب پشكداریا پرانیا حزبێن مه‌زنێن كوردستانێ و هه‌می حزب ل ده‌سكه‌فت و ئاریشێن حوكمه‌تێ پشكدارن.
مخابن ل جهێ خوه‌ ب خودان زانینا هه‌می ئالیێن پشكدار ل ڤێ حوكمه‌تێ بۆ ده‌ربازبوون ل قێ قه‌یرانێ، ژ بووی كورتكرنا قه‌یرانێن هه‌رێمێ، بزاڤا گۆران و كۆمه‌لا ئیسلامێ د مه‌هێن دووماهیا ژیێ حوكمه‌تێ خۆڤه‌كێشا. ل سه‌ر ڤان قه‌یرانێن ئابووری و سیاسی یێن ب سه‌ر هه‌رێمێ هاتی دا، ل چه‌ند ده‌ڤه‌رێن سلێمانیێ و هه‌له‌بچه‌ هه‌ولێن راپه‌رینه‌كا دوژمنانه‌ بۆ هه‌لوه‌شاندنا هه‌رێما كوردستانێ وه‌ك كیانه‌كێ سیاسیێ كوردستانی كۆ هیڤیا پاشه‌رۆژه‌كا گه‌شا خه‌لكێ كوردستانێ ب ناڤێ خۆنیشادانان دهێنه‌ هاڤێتن. ئه‌گه‌ر مه‌به‌ستا وان تێكده‌را ئه‌ڤه‌ نه‌بیت، سۆتنا رێڤه‌به‌ری و فه‌رمانگه‌هێن میری و باره‌گایێن حزبێن كوردستانێ و كوشتنا خه‌لكی چ په‌یوه‌ندی ب خۆنیشادانێن ئاشتیانه‌ ڤه‌ هه‌یه‌. هه‌كه‌ هه‌می حزبێن پشكدار ل حوكمه‌تێ خوه‌ ب خودانێ هه‌رێمێ ب گشتی زانی با دا ده‌ستێن ئێكگرن و پێكڤه‌ هه‌ولێن چاره‌سه‌ریا ڤان قه‌یرانان كه‌ن، نه‌ د ڤان كاودانان دا پشته‌ڤانیا خه‌لكه‌كێ تێكده‌ر كه‌ن بۆ خرابكاریا و خۆڤه‌كێشان ل حوكمه‌تێ.
خۆنیشادان د ڤان كاودانان دا نیشانێ ترسنۆكی و به‌رژه‌وه‌ند په‌رستیا وان حزبا یه‌. چونكی ژبلی كورتبوونا ژیێ حوكمه‌تێ، سه‌رۆكێ حوكمه‌تێ داخوازا هه‌لبژارتنێن پێشوه‌خت دكه‌ت و ل سێ مه‌هێن دی ده‌رباز نه‌بیت، ئه‌ڤ داخوازا حوكمه‌تێ باشترین رێیا ده‌ربازبوونا هه‌رێمێ یه‌ ل قه‌یرانێن ناڤخۆیی و ده‌رڤه‌، چونكی ئه‌ڤ حزبێن خۆڤه‌دكێشن د سێ مه‌هێن ئۆپوزسیۆنیێ دا دێ چ ده‌سكه‌فتێن نه‌ته‌وی و نشتیمانی و خزمه‌تگۆزاری بده‌ستڤه‌ ئینن…؟!.
ئه‌گه‌ر ترسنۆكی و به‌رژه‌وه‌ندى په‌رستی نه‌بیت. لێ دیار دبیت بۆ ڤان حزبا به‌رژه‌وه‌ندیێن وان ل به‌رژه‌وه‌ندیێن خه‌لكی و وه‌لاتی فه‌رتر و گرنگترن، ل جهێ هندێ هه‌ول بده‌ن خوه‌ ل ئه‌جینده‌یێن داگیركه‌ران رزگار بكه‌ن، كو ئه‌ڤرۆ زێده‌تر ژ هه‌ر ده‌مه‌كی ده‌ستئینایه‌ ناڤ كاروبارێن هه‌رێما كوردستانێ ل سلێمانیێ و هه‌له‌بچه‌ نه‌خاسمه‌ حوكمه‌تا عیراقا و ئیرانێ.
خۆڤه‌كێشان د ڤان كاودانان دا ژبلێ ڤێ چه‌ندا مه‌ دیاركری، هاریكاره‌ بۆ به‌رفره‌هبوون و خۆشكرنا سفرا عیراقێ و ئیرانێ ل كوردستانێ كۆ پیلانه‌كا دارشتی یه‌ و هیڤی یا وان یا مێژینه‌یه‌. ل سه‌ر ئاستێ نیڤده‌وله‌تی ژی دوبه‌ره‌كی د ناڤبه‌را حزبێن كوردستانی و چوونا هنده‌كان بۆ به‌ره‌یێ عیراقی بوونێ دێ كاریگه‌ریه‌كا نیگه‌تیڤ هه‌ربیت و فاكته‌رێن دۆمداركرنا قه‌یرانێن سیاسی و دارایی یه‌ ل كوردستانێ. ئه‌ز باوه‌رم پرانیا خه‌لكێ كوردستانێ ژی ڤان راستیان دزانیت كو چ حزب د سێ مه‌هێن ئۆپۆزسیۆنبوونێ دا نه‌شێت خزمه‌تا به‌رژه‌وه‌ندیێن گشتی بكه‌ت.
لێ دیار دبیت ئه‌ڤان حزبا ل پشكداریكرن ل ده‌سهه‌لاتێ دا شكه‌ستن ئینایه‌، هه‌ر وه‌كی ل سالێن بووری ل ده‌مێ ئۆپۆزسیۆنبوونێ دا شكه‌ستن ئینای و وه‌لات تووشی دوبه‌ره‌كیێ و كه‌ربوكینێ كری.
پشتی پیلانا خیانه‌تكاریا (١٦) ێ ئكتۆبه‌رێ زێده‌تر بۆ خه‌لكێ كوردستانێدیار بوو كی حزبێ و كی سه‌ركردا به‌ره‌ڤانی ل ماف و ئارمانجێن نه‌ته‌وی و نشتیمانی یێن كوردستانێ كرن و كی شوونه‌ به‌ره‌یێ خیانه‌تكاریێ و هه‌ولێن نه‌هێلانا مۆركا نه‌ته‌وه‌یی ل كوردستانێ دان. ئه‌ڤ رۆژێن پشتی ڤێ خیانه‌تێ دبێژنه‌ خه‌لكێ كوردستانێ ئه‌گه‌ر سه‌رۆك بارزانی و پێشمه‌رگه‌هێن پارتی نه‌بان، ئه‌ڤرۆ حالێ هه‌می ده‌ڤه‌رێن هه‌رێما كوردستانێ دا مینا حه‌وێجه‌ و كه‌ركووكێ و ده‌ڤه‌رێن دیتر یێن داگیركری تووشی جینۆسایدكرنێ و عه‌به‌ركرنێ و ئاواره‌بوونێ بیت. ئه‌گه‌ر بلیمه‌تا پارتی و سه‌رۆك بارزانی نه‌با ئه‌ڤرۆ دا ئالایێن ئیرایێن شیعه‌گه‌ریێن عیراقێ سێبه‌رێ ل مالێن مه‌كه‌ن و ئه‌بۆ به‌كر و عومه‌ر و عوسمان و عائیشایێن مه‌ یان دا سه‌ربڕی بن یانژی دا بنه‌ علی و حوسه‌ین و فاتیما.
ئه‌گه‌ر بلیمه‌تا سه‌رۆكێ حوكمه‌تا هه‌رێما كوردستانێ نه‌با بچووكترین فه‌رمانبه‌رێ بالیۆزخانه‌یێن مینا وه‌لاتێن فه‌ره‌نسا و ئه‌لمانیا و بریتانیا و ئه‌مریكا و… هتد، پێشواز رێبه‌ر و سه‌ركردێن مه‌ نه‌دكر.
ئه‌وا ئه‌ڤرۆ ئه‌ڤ حزبه‌ دكه‌ن ترسنۆكی یه‌ و ڕه‌ڤینه‌ ژ به‌رپرسیاریا نه‌ته‌وی و نشتیمانی و چاوا د ئه‌زموونا پشكداریێ ل حكومه‌تێ تووشی دۆراندنێ بوون و ل ئۆپۆزسیۆن بوونێ دا دێ تووشی دۆراندنه‌كا مه‌زنتر ئیننه‌ سه‌ر دۆراندنێن خوه‌ یێن به‌رێ و حوكمه‌تا هه‌رێما كوردستانێ ب رێڤه‌به‌ریا پارتی دێ ب سه‌ركه‌ڤیت و ب سه‌ر بلندی و شانازی ڤان قه‌یراندان ده‌رباز كه‌ت و دێ كوردستانێ به‌ر ب ئاسۆیێن گه‌ش به‌ت تا دووماهی قووناغ و كۆپیتكا خزمه‌تكرنێ و به‌رخته‌وه‌ریێ.

جڤاكێ كوردستانێ ب گشتی ب راستگۆیی و میانڕه‌ویێ هاتیه‌ نیاسین، ئه‌ڤێ چه‌ندێ كاریگه‌ری ل سه‌ر بزاڤا سیاسیا كوردستانی ژی كریه‌، ئانكۆ بزاڤا سیاسی یا كوردستانی ل وی ژێده‌ری هه‌لاڤێتی یه‌، ئه‌ڤه‌ ژی باشترین رێكه‌ بۆ پێكڤه‌ژیانێ و دابینكرنا داهاته‌كێ گه‌ر یێ سیاسی و جڤاكی.
ئه‌ڤرۆ پشتی ره‌وشا كوردستانێ یا سیاسی ئه‌وا ژ ئه‌نجامێ خیانه‌تكاریا ١٦ ئكتۆبه‌رێ ژلایێ بانده‌كێ حزبه‌كا سیاسی یا كوردستانێ ل كه‌ركووك و ده‌ڤه‌رێن دیتر یێن كوردستانێ كو بوویه‌ ئه‌گه‌رێ داگیركرنا زۆر ده‌ڤه‌رێن كوردستانێ ژلایێ حوكمه‌تا ب ناڤ فیدرالا عیراقێ ب پشكداری و رێنمایێن له‌شكرێ ئیرانێ و بێ ده‌نگان جڤاكیێن نیڤده‌وله‌تی، سه‌ره‌رای ره‌فتار و سه‌ره‌ده‌ریێن نه‌ یاسایی و دستووری یێن حوكمه‌تا عیراقێ ل به‌رامبه‌ر هه‌رێما كوردستانێ ، بتایبه‌ت گرتن و كوشتنا خه‌لكه‌كێ سڤیل و بێ تاوان و ب عه‌ره‌بكرنه‌ڤا ده‌ڤه‌رێن كوردستانی و هه‌ولێن به‌رده‌وام بۆ له‌شكركێشیكرنێ بۆ سه‌ر هه‌رێما كوردستانێ، هه‌رچه‌نده‌ پێشمه‌رگه‌هێن كوردستانێ ب تۆماركرنا داستانێن مه‌زن حه‌شدا شیعی و پاسدارێ، ئیرانێ شكاندن، به‌رده‌وام داكۆكیێ ل سه‌ر پره‌نسیپێ ئاشتیانه‌ و دیمۆكراسی دكه‌ت ل سه‌ر بنه‌مایێ دستوورێ هه‌رده‌میێ عیراقێ، هه‌ر چه‌نده‌ هه‌تا نهو حوكمه‌تا عیراقێ ل دووڤ ڤێ بانگه‌وازا كوردستانێ نه‌هاتیه‌ و ب فه‌رمی ده‌ست ب دانوستاندنان نه‌كریه‌. لێ ئه‌ڤ سیاسه‌تا حوكمه‌تا هه‌رێما كوردستانێ ب سه‌رۆكاتیا نێچیرڤان بارزانی، رێكه‌كا سه‌رده‌مانه‌ و دیمۆكراسی یه‌ و پێدڤی یه‌ به‌رده‌وامیێ ل سه‌ر ڤی هه‌لویستی بكه‌ت.
چونكی ئه‌گه‌ر حوكمه‌تا عیراقێ ل سه‌ر ڤی هه‌لویستێ خوه‌ یێ ڕكونی و دوژمنكارانه‌ به‌رامبه‌ر كوردستانێ به‌رده‌وام بیت جڤاكێ نیڤ ده‌وله‌تی یان دێ حوكمه‌تا عیراقێ نه‌چار كه‌ت ده‌ست ب دانوستاندنا كه‌ت ل دووڤ بنه‌مایێ دستووری یان ژی دێ پشته‌ڤانیا حوكمه‌تا كوردستانێ دكه‌ت، ژبه‌ركو هه‌بوونا عیراقه‌كا شیعه‌ په‌رستی و جێبجێكارێن به‌رژه‌وه‌ندێن ده‌وله‌تا ئیرانێ دژی به‌رژه‌وه‌ندیێن جڤاكێ نیڤده‌وله‌تی و وه‌لاتێن زلهێز و وه‌لاتێن سونی یێن عه‌ره‌ب و پشكه‌كا زۆرا خه‌لكێ عیراقێ یه‌. ب هێزبوونا ئیرانێ ل عیراقێ هه‌وا شیعه‌كرنێ ده‌ست پێ كریه‌ و گه‌هشتیه‌ ئاستێ جینۆسایدكرنا كورد و سوننه‌یان ب گشتی. ئه‌ڤه‌ ژی مه‌ترسیه‌كا زۆره‌ بۆ موسلمانێن سوننه‌ ب گشتی و جڤاكێ عیراقێ ب تایبه‌ت. له‌وما وه‌لاتێن سوننه‌ ل سه‌ر بێده‌نگ نابن. دبیت عه‌ره‌بێن سوننه‌یێن عیراقێ ژی كارڤه‌دانێن دژوار هه‌بن و ل ئاینده‌كێ نێزیك دا شه‌ڕێ تائیفی سه‌رهه‌ل بده‌ت. ئه‌ز باوه‌رم سازیێن نێڤده‌وله‌تی و وه‌لاتێن زل هێز نه‌خاسمه‌ ئه‌مریكا ڤێ راستیا باش دزانیت و هه‌ست ب شاشیا خوه‌ كریه‌ به‌رامبه‌ر كوردستانێ، له‌وما هه‌لویستێ وان هێدی هێدی به‌رامبه‌ر كوردستانێ به‌ر ب ئاسایی بوونه‌ڤێ دچیت و ل سه‌ر ئاستێ سیاسه‌تمه‌داێن مه‌زن و به‌رنیاس ته‌كه‌زیێ ل سه‌ر پشته‌ڤانیا كوردستانێ دكه‌ن و گه‌لێ كورد و حوكمه‌تا كوردستانێ ب دوستێن خوه‌ دزانن و بالا ده‌ستیا ئیرانێ ژی ل ده‌ڤه‌رێ ب مه‌ترسی دبینن. ل سه‌ر ئاستێ ناڤخوه‌یی ژی گاڤێن حككمه‌تا هه‌رێما كوردستانێ زۆر د ئه‌رێنی نه‌ بۆ دروستكرنا كۆده‌نگیا سیاسی به‌رامبه‌ر ره‌فتار و سه‌ره‌ده‌ریێن حوكمه‌تا عیراقێ دژی كوردستانێ و پێدڤی هه‌می حزبێن كوردستانێ ب ئه‌ركێ خوه‌ یێ نه‌ته‌وی و نشتیمانی و جڤاكی راببن داكۆ بشێن ڤێ قۆناغێ ده‌رباز بكه‌ن، نه‌خاسمه‌ پشتی سه‌رنه‌گرتنا پیلانا دوژمن و داگیركه‌را بۆ به‌رپاكرنه‌ڤا شه‌ه‌ركێ ناڤخوه‌یی ل كوردستانێ و دابه‌شكرنا هه‌رێما كوردستانێ ژلایێ جڤاكی و سیاسی و ئیداری، ئه‌ڤ قووناغا داهاتی ب ساناهی تره‌ ل قۆناغا پشتی ٢٦ /١٠/٢٠١٧ و خۆراگریا خه‌لك و پێشمه‌رگه‌هێن كوردستانێ كۆ ب حیكمه‌تا سه‌رۆك بارزانی و هه‌ڤچه‌په‌رێن وی بوون. نهو ژی هه‌ول و گاڤێن سه‌رۆكێ حوكمه‌تا كوردستانێ د به‌رژه‌وه‌ندیا گشتی یا كوردستانێ دانه‌ ژلایێ سیاسی و ئیداری ڤه‌. دوباره‌ دكه‌ینه‌ڤه‌ راستی و میانڕه‌ویا حوكمه‌تا كوردستانێ به‌رامبه‌ر ڤێ ره‌وشێ و ره‌فتارێن هۆڤانه‌ یێن حوكمه‌تا عیراقێ فاكته‌رێن خورتن بۆ ده‌ربازبوونا كوردستانێ دڤێ ره‌وشێ دا ل ده‌مه‌كێ كورت و دابینكرنه‌ڤا پشته‌ڤانیا نیڤده‌وله‌تی بۆ كوردستانێ و مه‌حاله‌ جڤاكێن نیڤده‌وله‌تی و وه‌لاتێن زلهێز و عه‌ره‌بی و خه‌لكێ عه‌ره‌بێن سوننه‌ ل سه‌ر ڤێ تائیفه‌په‌رستیا شیعه‌گه‌ری ل عیراقێ رازی ببن.

ڕه‌نگه‌ خه‌لكه‌كێ زۆر پرسا سه‌رخوه‌بوونا ملله‌تان وه‌ك پرسه‌كا سیاسى ببینن، لێ د بنه‌ره‌ت دا پرسه‌كا جڤاكى یه‌، به‌لێ ب پلانێن سیاسى دهێته‌ بده‌ستڤه‌ئینان، هه‌ر چه‌ندى سه‌رخوه‌بوون ڕه‌شا سیاسه‌تێ ژى بۆ قووناغێن باشتر و پێشكه‌فتیتر دگۆریت هه‌ر وه‌كى پرسا سه‌رخوه‌بوونا كوردستانێ ل قووناغێن ده‌سپێكى ب سیاسه‌تا حه‌كیمانه‌یا سه‌ركردایه‌تیا سیاسى یا بزاڤا رزگاریخوازیا گه‌لێ كو زێده‌تر ل حه‌فتێ سالایه‌ پارتى دیمۆكراتى كوردستان سه‌ركێشیێ دكه‌ت و قووناغێن دژوار بڕینه‌ تا گه‌هشتیه‌ ڤى ئاستى، نها ژى پشتى ئه‌زموونا زێده‌تر ژ بیست و پێنج سالیا حوكمڕانیا هه‌رێما كوردستانێ سه‌رۆك مه‌سعود بارزانى سه‌رۆكێ هه‌رێما كوردستانێ و حزبێن هه‌ڤپه‌یمان پرسا سه‌رخوه‌بوونا كوردستانێ گه‌هانده‌ گاڤا دووماهیێ و چاڤه‌رێ راپرسیا خه‌لكێ كوردستانێى نه‌ ل رۆژا 25 ێ ئیلۆنا ئه‌ڤ ساله‌ بریارا دووماهیێ ل سه‌ر بده‌ت. بنده‌ستیا ملله‌تا و نه‌بوونا كیانه‌كێ سه‌ربخوه‌ وى جڤاكى تووشى زۆر ده‌رده‌سه‌رى و نه‌هامه‌تیان دكه‌ت، ژ به‌ر كو هه‌ر ده‌مێ ملله‌ت كه‌فتنه‌ بن حوكمرانیا نه‌ته‌وه‌یه‌كا دیتر، ملله‌تێ سه‌رده‌ست ئانكۆ یێ حوكمڕان رێكێ ل هه‌مبه‌ر پێشڤه‌چوونا ملله‌تێن بن ده‌ست دگریت، هه‌ر وه‌كى گه‌لێ كورد و خه‌لكێ كوردستانێ كۆ ب درێژایا سه‌د سالان ل بن ده‌ستێ ده‌سهه‌لاتدارێن عه‌ره‌بێن عیراقێ ژیایه‌ و ڤێ ده‌سهه‌لاتێ ب به‌رنامه‌ و پلانێن دارشتى و دۆمدرێژ جڤاكێ كوردستانێ په‌رت و به‌ڵاڤ كریه‌. هه‌ر ل ب عه‌ره‌بكرنا ده‌ڤه‌رێن كوردستانى و ده‌ر ب ده‌ركرنا خه‌لكێ ب سه‌دان گوندێن كوردستانێ و ده‌سته‌سه‌ركرنا ملك و سامانێ وان تا گه‌هشته‌ هه‌وێن ب ناڤ ئه‌نفالكرنا گوندێن كوردستانێ و كیمیا بارانكرنا هه‌له‌بچه‌ و چه‌ندین گوند و ده‌ڤه‌رێن دیكه‌ كۆ بووینه‌ ئه‌گه‌رێن شه‌هید كرن و بێ سه‌ر و شوینكرنا بسه‌ردان هزار خه‌لكێ كوردستانێ و ئه‌ڤ چه‌نده‌ بوویه‌ ئه‌گه‌رێ ژێكڤه‌بوونا ب هزاران خێزانان و هه‌تا نها ژى كاریگه‌ریا وێ مایه‌. ژ لایێ ئاڤه‌دانى و سه‌خبێریا وه‌لاتى ڤه‌، ژى ب هزاران گوندێن كوردستانێ هاتیه‌ وێرانكرن . ڤان هه‌مى قوربانى و وێرانكرنێ خه‌لكێ كوردستانێ تووشى ئاریشێن جڤاكى و نه‌ساخیێن ده‌روونى كرن . ئه‌گه‌ر مه‌ وه‌ك كورد ده‌وله‌تا سه‌ربخۆ یا كوردستانى هه‌با لجێ ڤێ وێرانكرنێ و قوربانیدانێ دا هه‌وێن به‌رفه‌ره یێن ئاڤه‌دانى و پێشڤه‌چوونێن جڤاكى و ساخله‌مى ل كوردستانێ هه‌بن . هه‌ر وه‌كى دڤان سالێن ده‌سهه‌لاتداریا كوردستانێ یا پشتى سالا 1991 تا رادده‌یه‌كى گۆرانكاریێن ئه‌رێنى بسه‌ر ره‌وشا جڤاكى ل هه‌رێما كوردستانێ هاتن لێ هێشتا د ئاستێ پێدڤى دا نیه‌ و نه‌شیایه‌ شوونوارێن وان روودانێن سه‌رده‌مێن رژێمێن به‌رێ بن بڕ بكه‌ت ، ئه‌ز باوه‌رم هه‌تا ئه‌م دبێ ده‌وله‌ت بین ئه‌ڤ شوونواره‌ هه‌ر دێ مینن . ژبووى گۆڕینا ره‌وشا جڤاكێ كوردستانێ بۆ قووناغێن باشتر و نه‌هێلانا وان شوونواران پێدڤیه‌ هه‌مى خه‌لكێ كوردستانى بێ دو دلى ب ده‌نگێن به‌لێ پشكداریێ د راپرسیا سه‌رخۆبوونا كوردستانێ بكه‌ن، چونكى ده‌وله‌ته‌كا كوردستانى ژبلى پاراستنا مافێ خه‌لكێ و سنوورێن كوردستانێ ب دامه‌زراندنا سازیێن جودا جودا یێن ده‌وله‌تا كوردستانى و سه‌نته‌ر و رێكخراوێن تایبه‌ت د وارێن جڤاكى دا. ژ لایێ ئاڤه‌دانى ژى هه‌وێن به‌رفره‌ه دێ هێنه‌كرن و ب پشته‌ڤانیا نێڤده‌وله‌تى گوند و ده‌ڤه‌رێن كوردستانێ دێ هێنه‌ ئاڤه‌دانكرن و ئاریشا ئاكنجیبوونێ ل باژێران كۆ ئاریشه‌كا جڤاكى یه‌ دێ هێته‌ چاره‌كرن، ره‌وشا ئابوورى ژى دێ به‌ر ب باشتربوونێ ڤه‌ چیت. ب ره‌نگه‌كێ گشتى هه‌بوونا ده‌وله‌ته‌كا سه‌ربخوه‌ یا كوردستانى پڕانیا ئاریشێن جڤاكى و فاكته‌رێن په‌یدابوونا وان دێ چاره‌سه‌ر كه‌ت، له‌وما گرنگى هه‌مى پارتیێن كوردستانى بۆ به‌رژه‌وه‌ندیا گشتى یا خه‌لكێ كوردستانێ پشته‌ڤانێن سه‌ركه‌فتنا پرسا راپرسى و سه‌رخۆبوونا كوردستانێ بن و هه‌ر لایه‌نه‌كێ د گه‌ل نه‌بیت ئه‌و دژى چاره‌سه‌ركرنا پرسێن جڤاكى یێن هه‌رێما كوردستانێ نه‌ و دیاره‌ دڤێت ئه‌و هه‌مى نه‌خۆشى و ده‌رده‌سه‌ریێن بسه‌ر ملله‌تێ مه‌ هاتى دووباره‌ ببنه‌ڤه‌ و كێشه‌ و ئاریشێن نافخۆیى یێن جڤاكێ كوردستانێ بێ چاره‌سه‌رى بمینن.

باژێرێ سلێمانیێ ئه‌و باژێرێ باشوورێ كوردستانێ یه‌ كو هه‌رده‌م جهێ شانازیا خه‌لكێ كوردستانێ، ژ به‌ر پێگه‌ها وێ یێ ره‌وشه‌نبیرى و سیاسى و نه‌ته‌وایه‌تى و كلتۆرى و ….هتد، ل به‌ر ڤێ پێگه‌ها پیرۆز ناسناڤێ پایته‌ختێ ره‌وشه‌نبیرى یێ هه‌رێما كوردستانێ پێ هاتیه‌دان. ئه‌ڤه‌ژى بریار و ناسناڤه‌كێ د جهێ خوه‌ دا بوو چونكى باژارێ سلێمانیێ ب درێژاهیا دیرۆكێ هه‌رده‌م بنگه‌ه و كانگه‌هه‌كا په‌روه‌رده‌یا ره‌وشه‌نبیرى و نه‌ته‌وایه‌تى بوویه‌ و یا پڕه‌ ل كه‌سایه‌تیێن وه‌لات پارێز و نشتیمانپه‌روه‌ر و كه‌سایه‌تیێن بلیمه‌ت د وارێن سیاسى و ئه‌ده‌بى و پرانیا خه‌لكێ ڤى باژارى و ده‌وروبه‌ر راستیا ڤێ چه‌ندێ دزانن و ل سه‌ر رێیا وان هاتینه‌ په‌روه‌رده‌كرن و د به‌رهه‌ڤن ل سه‌ر وێ رێیێ به‌رده‌وامیێ ب ژیانا خوه‌ بده‌ن. مخابن د ڤان سالان دا گرۆپه‌كێ دوور ژ ره‌وشتێ سلێمانیێ و سلێمانیان كو هه‌لگر و په‌روه‌رده‌كارێن قوتابخانه‌یه‌كا دوبه‌ره‌كیێ و ئاژاوه‌گیریێ و خۆسه‌پاندنێ نه‌ و دژى هه‌ر تشتى نه‌ كو د به‌رژه‌وه‌ندیا وان یا تایبه‌ت نه‌بن و ژمێژه‌یه‌ كار ل سه‌ر گوهۆرینا سه‌ر و سیما و ڕه‌وشت بلندیا سلێمانیێ دكه‌ن ئه‌ڤرۆ خوه‌ كریه‌ زمان حالێ ڤى باژارێ هه‌لمه‌ت و قوربانى. پرانیا سه‌ركردایه‌تیا بزاڤا گوڕان ده‌رچوویێن ڤێ قوتابخانێ نه‌ و دڤێت ل سه‌ر ڤى بنه‌مایى جاره‌كادى دوبه‌ره‌كیێ و ده‌ڤه‌رده‌ڤه‌ركانێ ل هه‌رێما كوردستانێ به‌لاڤ بكه‌ن و ئازادی و دیمۆكراسیا كوردستانێ كریه‌ ده‌لیڤه‌ بۆ شاراندنا سازیێن خوه‌ یێن راگه‌هاندنێ دژى به‌رژه‌وه‌ندێن گشتى یێن نه‌ته‌وى و نشتیمانى و خه‌لكه‌ك پێ هاتیه‌ سه‌ردابرن. هه‌كه‌ نه‌ ب درێژاهیا دیرۆكێ كه‌نگى خه‌لكێ سلێمانیێ و ده‌ورو به‌ر دژى رزگاریا كوردستانێ و راپرسى و سه‌رخۆبوونێ بوونه‌ …! ، به‌رۆڤاژى خه‌لكێ ڤێ ده‌ڤه‌را نشتیمانپه‌روه‌ر ستوونا شۆره‌ش و سه‌رهه‌لدان و خه‌بات و قوربانیێ بوونه‌ و ژبه‌ر هه‌لویستێ خوه‌ یێ نه‌ته‌وى تووشى ئه‌نفال و كیمیا باران و وێرانكرنێ بوونه‌، هه‌ر ژبه‌ر هندێ ب هزاران ژ خه‌لكێ وێ ده‌ڤه‌رێ ب گشتى كه‌فتینه‌ دزیندانێن رژێمێن عیراقێ. جهێ پسیارێ یه‌، چما ئه‌و خه‌لكێ ژ پێخه‌مه‌ت ئازادى و رزگاریێ ب ڤى ره‌نگى خه‌بات كربیت و قوربانى دابن، ل ده‌رفه‌تا دووماهیێ بیر و باوه‌ر دێ هێنه‌ گوهۆڕین و دژى وێ ئارمانجێ راوه‌ست ئه‌وا خه‌بات بۆ كربیت و قوربانى بۆ دابن..! . ئه‌ز ب باوه‌ریه‌كا موكۆم ڤه‌ دبێژم ئه‌ڤ سیاسه‌ت و به‌رنامێ بزاڤا گۆڕان ئه‌ڤرۆ په‌یڕه‌و دكه‌ت نه‌ به‌رنامه‌ و سیاسه‌تا خه‌لكێ سلێمانیێ یه‌، به‌لكى به‌رۆڤاژى راسته‌ . لێ گرۆپه‌كێ بچووكێ تێكده‌ر و ڕه‌شكه‌رێن روویێ سپى و زێرینێ خه‌لكێ سلێمانیێ یه‌ و دڤێت دیرۆكا پر سه‌روه‌ریا وێ ده‌ڤه‌رێ د هه‌مى واران دا به‌زر و به‌رۆڤاژى بكه‌ت. ب سه‌رگرتنا پیلانا وان مه‌زنترین شه‌رمزارى یه‌ بۆ سلێمانیێ و خه‌لكێ وى به‌رى ده‌ڤه‌رێن دیتر یێن كوردستانێ، ئه‌ز باوه‌رم خه‌لكێ پایته‌ختێ ره‌وشه‌نبیریێ هه‌رێما كوردستانێ ل ڤێ چه‌ندێ مه‌زنتر و بلندتره‌ و چ جاران ناكه‌ڤیته‌ بن ئه‌جندایێن ڤى گرۆپێ كێم و دێ به‌رده‌وام بیت ل سه‌ر ڕه‌وشت و ره‌وشه‌نبیریا خوه‌ یا نه‌ته‌وى و كوردایه‌تى و ب كه‌رنه‌ڤال و ب هه‌سته‌كا مۆكۆنا نه‌ته‌وى دێ پشكداریێ ل راپرسیا سه‌رخۆبوونا كوردستانێ كه‌ن و ب ده‌نگه‌كێ بلند بانگه‌وازیا به‌لێ كه‌ن. چونكى ره‌وشه‌نبیر به‌لكى هه‌ركه‌سه‌كى به‌رژه‌وه‌ندیا گشتى دپارێزن و داكۆكیێ ل سه‌ر بده‌ستڤه‌ئینانا ماف و ئارمانجێن نه‌ته‌وى دكه‌ن و د ئاماده‌نابن سه‌رخۆبوونا كوردستانێ بكه‌نه‌ قوربانى به‌رژه‌وه‌ندێن وى گرۆپێ بچیك و رێكێ ناده‌ن ئه‌و نوونه‌رایه‌تیا سلێمانیێ بكه‌ن، چونكى پرۆژێ ده‌وله‌تبوونێ پرۆژه‌یه‌كێ نشتیمانى یه‌ و نه‌ مولكێ پارتى و سه‌رۆك بارزانى و وان پارتیێن داكۆكیێ ل سه‌ر سه‌رخۆبوونێ دكه‌ن, به‌لكى ئه‌وێن كار ل سه‌ر چه‌سپاندنا وێ دكه‌ن.

گه‌لێ كورد د دیرۆكا خوه‌ یا دوور و درێژ دا تووشى ده‌ردێن جۆرا و جۆر و كوشتنده‌ بوویه‌، ئه‌گه‌ر دوونێ ئێشا مه‌ بن ده‌ستى و زۆلم و زۆرداریا دوژمنان با ئه‌ڤرۆ د هه‌رێما كوردستانا ئازاد دا ب ده‌هان ده‌ردێن دیتر ل جۆخوینا ده‌ردێن كوردان دا كۆم بووینه‌، ژ لایێ سیاسى هه‌رێما كوردستانێ هه‌مى جۆرێن پێكڤه‌ ژیانێ د گه‌ل عیراقێ تاقیكرن ، ل مافێن ره‌وشه‌نبیرى و ئۆتۆنۆمى و فیدرالى، چ ژ وان سه‌رنه‌گرتن و ده‌سهه‌لاتدارێن عیراقێ یا به‌رهه‌ڤ نه‌بوویه‌ ب وان ره‌نگان ل گه‌ل كوردان د عیراقێ دا بژین و پێگیرى ب رێكه‌فتن و یاسا و دستووران نه‌كریه‌. ل سه‌ر ئاستێ ناڤخۆیى ژى ژبلى ده‌ردێ هه‌رده‌م و كه‌ڤنار د ناڤ لایه‌نێن سیاسى یێن كوردستانێ كو دووبه‌ره‌كى و هه‌ڤدژى بوویه‌، ده‌رێن قه‌یرانێن دارایى و ئیدارى ژى هاتنه‌ سه‌ر ده‌ردێن گه‌نده‌لیێ و بێ یاسایى یێ و نه‌دادوه‌ریێ و …..هتد. تاكه‌ نۆشدران ده‌رمانێ ڤان هه‌مى ده‌ردێن گه‌لێ كورد سه‌رخۆبوونا كوردستانێ یه‌، ژ به‌ر كو ب هه‌بوونا ده‌وله‌ته‌كا كوردستانێ ژ لایێ سیاسى سنوورێن نیڤده‌وله‌تى دێ هێنه‌ دانان و ئه‌ركێ جڤاك و سازیێن نیڤ ده‌وله‌تى یه‌ ڤان سنوورا ل مه‌ترسى و به‌زاندنێ ب پارێزیت، ل سه‌ر ئاستێ ناڤخۆیى و كارگێرى و دارایى ژى گره‌نتى دێ هه‌بن و ده‌ستوورێ خوه‌ یێ تایبه‌ت و یاسا و سازیێن ئیدارى دێ هه‌بن و هه‌مى حزب و كه‌س و لایه‌ن بڤێت یان نه‌ڤێن دێ د چارچۆڤێ ڤى دستوورى و یاسایان سه‌ره‌ده‌ریێ كه‌ن و بۆ دووڤچوونا هه‌ر خه‌مسارى و گه‌نده‌لیه‌كێ پێدڤى ب پێكئینانا لیژنێن دیاركرنا راستیان نابین. ژ لایێ له‌شكرى ژى پێشمه‌رگه‌هێن كوردستانێ بۆ جیهانێ خۆیاكر كو دشێن مه‌زنترین دۆژمن بشكێنن و ب مه‌ردانه‌ به‌ره‌ڤانیێ ل كوردستانێ و جیهانێ بكه‌ن. له‌وما دێ شێین بێژین هه‌بوونا ده‌وله‌ته‌كا كوردستانى، ڤان هه‌مى ده‌ردان دێ ل گوول ملله‌تێ كورد ڤه‌كه‌ت، هه‌كه‌ گه‌لێ كورد هشیاریا سیاسى و ره‌وشه‌نبیرى هه‌بیت، ئه‌ز باوه‌رم ڤان سالێن ده‌ربازبووى مه‌ زۆر سه‌ربوور و ئه‌زمۆن دیتن و بۆ ده‌ستنیشانكرنا شێوازێ ده‌سهه‌لاتداریا ده‌وله‌ته‌كا كوردستانیا داهاتى د ئاستێ پێدڤى دانه‌ و باشترین شێواز دێ هێته‌ هه‌لبژارتن كو ببینه‌ ده‌وله‌ته‌كا نمۆنه‌یى ل دیمۆكراسیێ و پێكڤه‌ژیانێ و سه‌روه‌ریا یاسایى و دادوه‌ریا جڤاكى. ب ڤى ره‌نگى وه‌لاتێن جیران ژى دێ بێژن خوزى ژ مێژه‌ مه‌ جیرانه‌كێ هۆسا هه‌با. ژ بۆى خوه‌ به‌رهه‌ڤكرنێ بۆ ده‌وله‌ته‌كا كوردستانى یا نموونه‌ و ده‌رمانێ هه‌مى ده‌ردێن مه‌ پێدڤى خوه‌به‌رهه‌ڤ بكه‌ین و گڤاشتنان ل سه‌ر لایه‌نێن سیاسى بهێنه‌ كرن، ب ئێك ده‌نگى پشته‌ڤانێن سه‌رۆك بارزانى بن بۆ بجه ئینانا پرۆژێ خوه‌ یێ راپرسى و سه‌رخۆبوونا كوردستانێ و درووشمێ شۆره‌شێن خوه‌ یێن به‌رێ نوو بكه‌ینه‌ڤه‌ و ب ئێك ده‌نگى بێژین (یان كوردستان، یان نه‌مان) و ئه‌ز ب باوه‌ریه‌كا مۆكۆم و ووره‌یه‌كا مه‌زنڤه‌ دبێژم برگا ئێكێ یا ڤى درووشمى دێ به‌رجه‌سته‌ بیت و نه‌حه‌ز و نه‌یارێن سه‌رخۆبوونا كوردستانێ دێ شه‌رمزار بن.