ئەڤرۆ نیوز ، زنار تۆڤی :

موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن:کو شڤێدی د روودانەکا ترافیکێ دا ل جادا مالتایێ شۆفێرێ ترۆمبێلەکێ برینداربوویە.

ناڤهاتی زێدەتر گوت:ل دەمژمێر ١٢:٤٥ خولەکی شەڤا ئەینی ل سەر شەمبی ١٩/٥/٢٠١٨ ل سەر جادا مالتایێ و ل نێزيك مزگەفتا كێسته روودانەکا ترافیکێ روودایە و ئەگەرێ ڤێ روودانێ شوفێری كونترۆل ل سەر ترومبێلا خوە نەمایە،لەوما وی ترۆمبێلا خوە ل پەرژانێ رەسیفی دایە و ژ ئەگەرێ ڤێ چەندێ ترومبێلا وی دبيته دوو پارچە و ئەو ژی برینداربوویە.

ئه‌ڤرۆ نيوز:

ھەلبەت ل ھەیڤا رەمەزانێ خەلک گەلەک ھەست ب تێھنیبوونێ دکەن ل رەمەزانێ و ب تایبەت ل وەرزێ ‏ھاڤینێ، پرسیار ل ڤێرێ ئەڤەیە، ئەم دێ چاوان ھاریکاریا لەشێن خۆ کەین کو ئاڤێ ب پارێزیت و مە پال ‏نەدەت کو ئاڤێ ڤەخوین یان ھەست ب تێھنیبوونێ بکەین.‏

ل ھەیڤا رەمەزانا پیرۆز مرۆڤێ رۆژیگر گەلەک ھەست ب تێھنیبوونێ دکەت و ب تایبەت ھەکە دونیا یا گەرم ‏بیت و مرۆڤ پتری 16 دەمژمێران چ نەخوت و نەڤەخوت، لەشێ مرۆڤی بەردەوام دێ ئاڤێ بەرزەکەت ھەتا دبیتە ‏وەختێ فتارێ و ل وی دەمی دێ گەلەک پێدڤی ب ئاڤێ و شلەمەنیان بیت بۆ دوبارە ڤەگەراندنا ئاڤا بەرزەبووی.‏

ھەر کەسەک ژ مە شیان ھەنە ھاریکاریا خۆ بکەین کو ئاڤێ د لەشێ خۆ دا ب پارێزین و ھەست ب تێھنیبوونێ ‏نەکەین، ئەوژی ب دۆڤچوونا ھندەک رێیان داکو پتر ھەست ب تێھناتیێ نەکەین.‏

ھەڤالێن مە یێن دژی تێھنیبوونێ:‏
‏* ئاڤ: سەرکێشا ھەموو شلەمەنیانە و چ شلەمەنیێن دیتر جھێ ئاڤێ ناگرن، شارەزا شیرەتان ل مە دکەن کو ‏رۆژانە دجو لیترێن ئاڤێ ڤەخوین و ب تایبەت ھەکە گەلەک خوھدان ل لەشێ مەدا پەیداببیت، باشترە ل دەمێ ‏سەرەدەریێ دگەل ئاڤێ دکەین ب ڤی رەنگی بیت:‏
‏- نابیت ب چ رەنگەکی تو بوتلێ ئاڤێ ڤەکری بھێلی بۆ دەمەکێ درێژ، ژبەرکو ئەو بەکتریایێن دناڤ دەڤێ مە و ‏دەوروبەرێن مە رەنگە دناڤدا چالاک ببن و ببنە ژێدەرێ نەخۆشیان.‏
‏- ھەکە تەڤیا دوبارە ئاڤێ بکەیە بوتلی، باشترە قەپاغێ وی و دەوروبەرێن قەباغی باش ب ئاڤا گەرم و سابوونێ ‏بشووی.‏
‏- تو دشێی ھندەک تشتا ل سەر ھەر کوپەکێ ئاڤا تو ڤەدخوی زێدەبکەی وەکو نیموکا و نەعنایێ و زەنجیلی.‏
‏- ژبۆ خۆ قورتالکرنێ ژ تاما کلۆری، باشترە ئاڤێ بدانیە دناڤ ئامانەکێ بەرفرەە دا بۆ دەمێ دەمژمێرەکێ بھێلە ‏بەری تو ڤەخوی.‏

* شلەمەنی ب ھەموو رەنگێن خۆڤە، ب تایبەت ڤەخوارنێن وەکو خوشاڤا و شەربەتا فێقیێ سروشتی کو خوێ ‏دناڤدا ھەیە دروستە تو ب کاربینی، شیرەتان خۆ دوور بکەن ژ شەربەتێن دەستکرد کو ب رێکێن پیشەسازی دھێنە ‏دروستکرن ژبەرکو گەلەک شەکر دناڤدا ھەیە و زیانێن مەزن دگەھینن ساخلەمیا مرۆڤی و ھەستداریێ ‏پەیدادکەن.‏
‏

* زەرزەوات و فێقیێ گەھشتی:دێ گەلەک باش بیت ب شەڤێ و ل دەمێ پاشیڤێ تو فێقی و زەرزەواتی بخوی، ‏ژبەرکو گەلەک ئاڤ دناڤدا ھەیە و بۆ دەمەکێ درێژ ئەو ئاڤ دناڤ رووڤیکان دا دمینیت و مرۆڤ ھەست ب برسیبوون ‏و تێھناتیێ ناکەت.‏
‏

* گیروکرنا پاشیڤی: باشترە پاشیڤ ل وەختێ خۆ بھێتە خوارن کو ژ نیڤ شەڤ پێدابیت، داکو رۆژیگر بشێت ‏بەرھنگاریا تێھنیبوونێ بکەت و ب تایبەت ل رۆژێن ئێکەم یێن رۆژیگرتنێ و ھندی خوارنا پاشیڤێ سڤکتر بیت ‏ھەلبەت باشترە.‏

ئەو دزیکەرێن ئاڤێ ژ لەشێ مە د دزن:
‏-‏ خوێ یا خوارنێ: خوارنا تشتێن سویر ھەلبەت پێدڤیا مە ب ئاڤێ زێدەدکەن، لەورا باشترە گەلەک خوێ ‏نەکەینە دناڤ خوارنێ دا و خۆ ژ خوارنێن سویرکری دوور بکەین، وەکو ماسیێن سویر و موخەللا و دێ ‏گەلەک باش بیت ئەم ئاڤا نیموکان ل جھێ خوێ ل زەرزەواتی بکەین ژبەرکو ئاڤا نیموکان خوارنێ ‏ھەڤسەنگ دکەت.‏
‏

-‏ دەرمانک و بھارات: ئەو خوارنێن گەلەک بھارات دناڤدا مرۆڤی پال ددەن کو گەلەک ئاڤێ ڤەخوت، ژبەرکو ‏ئەو خوارن ئاڤێ ژ گەوری و دەڤ و گەدەیا مرۆڤی دمێژن، دبنە ئەگەر ھشکاتی د لەشیدا پەیداببیت، پاشی ‏مرۆڤ ھەست ب تێھنی بوونێ دکەت، لەورا یا باشترە ل سەر رۆژیگری خو ژێ دوور بکەت و ب تایبەت ل ‏دەمێ پاشیڤی.‏
‏

-‏ چا و قەھوە: شیرەتان ل رۆژیگران دکەین ھندی دشیان دابیت خۆ ژ چایێ و قەھوێ دوور بکەت ژبەرکو ئەو ‏کارێ گولچیسکان چالاک دکەن و گولچیسکان پال ددەن خۆ ژ ئاڤێ قورتال بکەن، ددووڤدا دێ بنە ئەگەر ‏کو ئاڤ ژ لەشێ مرۆڤی کێم ببیت، نابیت ب چ رەنگەکی ئەم چایێ و قەھوێ وەکو شوونگر بۆ ئاڤێ ب ‏کاربینین، ژبەرکو ئەو ب سروشتێ خۆ دکەلن و رۆژیگری شیان نینن گەلەکێ ژێ ڤەخوت.‏
‏

-‏ ڤەخوارنێن غازی: ئەوێن کو کاربوون دناڤدا کو دبنە ئەگەرێ وەرمینا زکی و مرۆڤ ھەست ب تێربوونێ ‏دکەت و دبنە رێگر کو لەشێ مە مفای ژ شلەمەنیان نەبینیت، لەورا باشترە ب ئێکجاری دگەل فتارێ ‏ڤەنەخوین.‏
‏

-‏ ‏ تیرێژا ئێکسەر یا رۆژێ:ھندی دشیاندابیت خۆ ژ تیرێژا رۆژێ دوور بکە و ژبۆ ھندێ تیشکا رۆژێ گەلەک ‏کارتێکرنێ ل تە نەکەت و تو تێھنی نەبی.‏

ئه‌ڤرۆ نيوز:

پشکا چاڤدێری و سەلامەتیا خوراکی ل رێڤەبەریا کاروبارێن خوپاراستنا ساخلەمیێ ل گەل ھوبێن پەیوەندیدار چەندین رێنما بۆ خودانێن تەزیاتیا بۆ مەھا رەمەزانێ دانە دیار کرن.
عسمەت سلێمان وەیسی رێڤەبەرێ پشکێ ب ھەلکەفتا ھاتنا ھەیڤا رەمەزانا پیرۆز ئەڤ سالە ب تایبەت کو دکەڤیتە د وەرزێ ھاڤینێ دا وەکو یا دیار پلا گەرماتیێ زۆر یا بلندە ئەڤە ژی دبیتە ئەگەرێ تێکچوونا کەلوپەلێن خوارن و ڤەخوارنێ ب تایبەت شەربەتێن ب دەستی دھێنە دروست کرن و شریناھی و گوشت و بەرھەمێن سپیاتی، پێخەمەت پاراستانا ساخلەمیا گشتی و ساخلەمیا رۆژیگرێن بەرێز بڕیار ھاتە دان ئەڤ رێنماێن خوارێ بھێنە بەلاڤ کرن بۆ جھێن گشتی و پێگری پێ بھێتە کرن و نەپێگری پێکرن دێ کەڤیتە بەر قانوونا ساخلەمیا گشتی:

شەربەت:
١. دڤێت ھەموو جھێن تەزیاتیا ئامیرێ پالاوتنا ئاڤێ ب قەبارێ مەزن ھەبن بۆ ئامادەکرنا شەربەتێ و عەسیرا و شووشتنا ئامانێن بکار دئینن بۆ دروست کرنا وان.

٢. ئامیرێن پالاوتنێ دڤێت بەردەوام کار بکەن دا تافیلکرنا ئاڤێ ب شێوەکێ دروست بھێتە کرن و بەردەوام فیلتەرێن وان بێنە گوھاڕتن ل دووڤ قەبارێ کاری.

٣. شەربەت دڤێت د ناڤ تەزیکەرا دا بھێتە ھەلگرتن و دانان و نابیت ب چو رەنگەکی ل سەر ستێرکا و ژ دەرڤە بھێتە دانان.

٤. دڤێت ب تنێ شەربەت بۆ رۆژەکێ بھێتە دروست کرن، ھەکە ما دڤێت بھێتە ژ ناڤ برن.

٥. نابیت شەربەت ل سەر عەرەبانا و ل سەر جھێ پەیادێ بھێتە فرۆتن.

٦. فێقیێ تایبەت بۆ گڤاشتنێ دڤێت د ناف تەزینەران دا بھێتە دانان پشتی شووشتن و زوھا کرنێ.

چاوانیا دروستکرنا شەربەتا مێووژان ل مەھا رەمەزانێ:

١. ئەو جھێ شەربەت لێ دھێتە ئامادەکرن دڤێت یێ دەستوور دای بیت.

٢. جھەکێ گونجایی بۆ ھەلگرتنا مێووژێن ھشک.

٣. مێووژ ب ئاڤا پاقژ بھێنە شووشتن و تافیلکرن.

٤. نماندنا مێووژان ب ئاڤەکا پاقژ و ل جھەکێ گونجایی.

٥. ھێرانا مێووژا ب ئامیرێ ئوتوماتیک و پاقژ.

٦. بکار ئینانا ئاڤا فلتەر کری بۆ بکار ئینانێ.

٧. نابیت پینگ بھێتە بکار ئینان ب تنێ تاما وی.

٨. تنێ ئێک جار کیسک یان بتل بھێتە بکار ئینان بۆ داگرتنا شەربەتێ.

٩. نابیت شەربەت بۆ دو رۆژا بھێتە دروست کرن.

١٠. ئەو جھێن شەربەتێ ب کۆم د فرۆشن دڤێت پسولا فرۆتنێ ل گەل بیت دا ژێدەرێ وێ یێ دیار و ئاشکرا بیت.

١١. دڤێت شەربەت ژ جھەکی بۆ ئێکێ دی ب شێوەکێ ساخلەم بھێتە ڤەگۆھاستن.

١٢. بەردەوام نمونە دێ ھێنە وەرگرتن بۆ پشکنینا دێ ل دووڤ قانوونا ساخلەمێ بڕیار ل سەر ھێتە دان.

مادێ ١٠:
دەمێ رێنما نەھاتنە ئجھئینان بۆ جارا ئێکێ دێ ئەو جھـ ھێتە راوەستاندن بۆ ماوێ حەفتیەکێ ئەو جھـ دێ ھێتە پاقژ کرن و تافیلکرن و ھێتە ڤەکرن دەمێ بۆ جارا دویێ ئەڤ رێنمایە ھاتە پشت گوھـ ھاڤێتن ب رێیا قانوونی دێ کار ل گەل ھێتە کرن ل دووڤ ماددێ ٩٩ ژ قانوونا ساخلەمیا گشتی ٨٩ یا سالا ١٩٨١ و ھەموو ئەگەر ب رێیا پشکنینا دھێنە دیارکرن.

ئه‌ڤرۆ نيوز:

ئولدارێ ئێزدیان ل پەرستگەھا لالش دیارکر کو رۆژا چارشەمبی دێ رێورەسمێن جەژنا ‏سەرێ سالێ ھێنە گێران، ھەیڤا نیسانێ، دەمێ ڤەژین و بووژاندنا ھەموو گیاندارایە، ‏ئێزدی دڤێ مەھێ دا جۆتی ناکەن و عەردی ناکۆلن.‏

کەریم سلێمان، شێوەردارێ جڤاتا روحانیا ئێزدیان دیارکر کو ب ھەلکەفتا جەژنا ‏چارشەمبوویا سۆر کو دکەڤیتە 18ی نیسانا ئەڤ سالە، بڕیار ھاتە دان کو ئەڤ سالە ب ‏فەرمی رێورەسم بھێنە گێران و گۆت: “پشتی چار سالێن بۆری بۆ جارا ئێکێ یە دێ ‏رێورەسمێن جەژنا چارشەمبوویا سۆر ھێنە گێران”.‏

بابە چاویش ئولدارێ ئێزدیان ل پەرستگەھا لالش بۆ ئەڤرۆ دیارکر کو ئێزدی رێزەکا ‏مەزن ددەنە ھەیڤا نیسانێ ژن ئێنان نینە، چونکو ھەیڤا نیسانێ د باوەریا ئێزدیان دا ب ‏خوە بووکا سالێ یە و ب جوانترین رەنگ و خەمل یا خەملاندی یە و چو بووکا ل سەر ‏خوە قەبوول ناکەت، “ل پەرستگەھا لالش، فتیل و چرایا، ل سووکا مەعریفەتێ و ل بەر ‏نیشانگەھێن خاس و چاکا ڤێدخێن دیندار و قەولزان، قەول و بەیتا ب رێز دکەن و ‏سەما ژی دھێتە کێشان”.‏

ئەو ژی دیارکر کو کابانیێن مالێ ھێکا دکەلینن و رەنگاورەنگ دکەن، ھەروەسان سەکا ‏دپێژن و ب سەر دەر و جیناران دا بەلاڤ دکەن، و قەستا گورستانا گوندی دکەن و خێر و ‏خێراتا ل سەر ھەڤدۆ و بەلنگازان دا بەلاڤ دکەن، زەلام ب ھەڤڕا قەستا نیشانگەھێن ‏خاسێن گوندی دکەن و زیارەتی دبن ل رۆژا جەژنێ ھەر ئێزدیەک بەری رۆژھەلاتێ ‏دەست و چاڤێن خوە ب خۆناڤێ جوان دکەت.‏

ئاشکەرا کر کو ل گەل رۆژھەلاتێ، کابانیا مالێ، قەفتکەکا کولیلکێن نیسانێ و گیایێ ‏بێناڤێ ل گەل قالکێن ھێکێن رەنگاورەنگ، ب ھەڤیری و ھندەک ئاخێ ب سەر دەرێ مالا ‏و خانیان ڤە دکەت زارۆ و گەنج و زەلام، ل کۆلانێن گوندی کۆم ب کۆم دجڤیێن و ‏گەلەک جۆرێن یاریا ب ھێکا دکەن، دڤێ رۆژێ دا پەزی نادۆشن و بێچیکا بەرددەنە بەر ‏ماکا.‏

زێدەتر گۆت: “شڤان بەری نیڤرۆ پەزی دئینتە دەھنی، بێریڤان ب پارزوونکێن خوە و ‏خەلاتێ شڤانی ڤە دچنە بێریێ، دەمێ دگەھنێ پێکڤە دچنە شڤانی و گۆپالێ وی پرت ‏پرت دکەن و وان پرتا ب سەر ھەڤدوو دا بەلاڤ دکەن، پاشی پێکڤە د روودنن و خەلاتێ ‏شڤانی ددەنێ، دەمێ بێریڤان دزڤریتە مال، ھەر ئێک ژ وان وێ پرتا گۆپالی ب مەشکا ‏خوە ڤە دکەت”.‏

خۆیا ژی کر کو عەردی د مەھا نیسانێ دا ناکۆلن، چونکو ھەموو کەسکاتی، دەست ب ‏گەشبوونێ دکەن، ڤێجا کۆلانا عەردی دڤێ مەھێ دا ب گونەە دئێتە دانان، ھەتا کو ‏جوانتر روویێ عەردی ب خەملیت، ھێک ژی نیشانە بۆ دوورا پادشایی، ئەڤ کنیاتە ژێ ‏ئافراندی و شکاندنا ھێکێ، نیشانا پەقینا دوورێیە و کەلاندنا ھێکێ، نیشانا مەیین و ‏جەبرینا عەردی یە، رەنگکرنا ھێکێ، رامانا خەملینا عەردی ددەت و شکاندنا گۆپالێ ‏شڤانی، نیشانا نووژەنکرنا شڤانەتیێ یە و پرتا گۆپالێ ب مەشکێ ڤە بۆ خێر و بەرکەتێ ‏یە.‏

ئەو ژی دیارکر کو جەژنا سەرسالێ کەڤنترین جەژنا ئێزدیایە دکەڤیتە چارشەمبویا ‏ئێکێ ژ مەھا نیسانێ ب ھژمارا رۆژھەلاتی، کەڤناتیا وێ دزڤریتە دەستپێکا ئافراندنا ‏کنیاتێ، دەمێ پادشای دوور ژ نۆرا خوە نژاندی و ئاخ و ئاڤ و با و ئاگر ژێ پەیدا کرین ‏و کنیات پێ ئافراندی.‏

ئەڤرۆ نیوز ، زنار تۆڤی :

بالیۆزخانا ئه‌مریكا ل به‌غدا راگه‌هاندیە،کو رێكخراوا تیرۆریستى یا داعشێ شیان هه‌نە،کو جارەکادی هێرشێ بكەنە‌ سه‌ر عێراقێ،لەوما دووپاتكریه‌ كو هێشتا شەرێ ل دژی داعش ته‌مام نه‌بوویه‌.

بالیوزخانا ئه‌مریكا ل‌ عێراقێ د به‌یاننامه‌یه‌كێدا ب ئەگەرێ‌ کوشتنا 27 چه‌كدارێن میلیشیاتێن حه‌شدا شه‌عبى ب ده‌ستێ تیرۆریستێن داعش، دووپاتی ل هندێ کریە کو داعشێ شیانێن هه‌ین کو‌ هێرشێ بكەته‌ سه‌ر عێراقێ.

ل رۆژا ئێكشه‌مبیا بوری ل دەڤەرا سه‌عدونییه‌ ل باشورێ رۆژئاڤایێ كه‌ركووكێ هێزەکا میلیشیاتێن حه‌شدا شه‌عبى كه‌فته‌ بۆسه‌یا چه‌كدارێن رێكخراوا تیرۆریستى یا داعشێ و د ئه‌نجامدا 27 چه‌كدار ژێ هاتنە كوشتن.
هه‌ر چه‌نده‌ پێشتر سه‌رۆكێ حوکمه‌تا عیراقێ عەبادی سه‌ركه‌فتن ل ‌سه‌ر رێكخراوا داعشێ راگه‌هاندبوو،بەلێ د به‌یانناما بالیۆزخانا ئه‌مریكا دا هاتیه‌،هێشتا شەرێ ل دژی‌ داعشێ ب دوماهی نه‌هاتیه‌.

هەروەسا د وێ به‌یاننامێدا هاتیە‌ پاشماوێن چه‌كدارێن داعش هێشتا هزرێن خرابکاریێ د مێشکێ وان دا هەنە‌،دیسا وان شیان و كه‌ره‌ستێن پێدڤی هه‌نه‌، بۆ رێكخستنا هێرشێن خوە وان دڤێت نەسه‌قامگیریێ ل داڤەرێن هاتینە‌ ئازادكرن دروست بكه‌ن،جارەکادی ترسێ بێخنه‌ دلێ خەلکێ وان دەڤەران.

ئەڤرۆ نيوز:‏

‏ ھەموو ئالی و پارتێن بچووکێن کورد و سوونە و شیعە سەرەرای ‏ھەبوونا ھەڤپەیمانێن بچووک ژی، بەلی نوکە ھەر ئێک ژ کورد و سوننە ‏و شیعە ب پرت و بەلاڤی پشکداری ھەلبژارتنان دبن.‏

بریارە ل دوازدێ مەھا پێنچ یا ئەڤ ساڵە ھەلبژارتنێن عیراقێ بھێنە ‏ئەنجامدان، بەلێ ھەموو ئالی ژی ب پرت و بەلاڤ پشکداری ھەلبژارتنان ‏دبن.‏
نوکە دەمێ ب سەرڤەچوونا ھەڤپەیمانیا ب سەرڤەچوویە بەلێ کورد ‏ژی مینا نەتەوە و مەزھەبێن دی یێن عیراقێ دێ ب پرت و بەلاڤی ‏پشکداری ڤان ھەلبژراتنان بن. پارتی دیموکراتی کوردستان وەک ھێزا ‏سەرەکی یا کوردستانێ گەلەک جاران خواست ب ھەڤپەیمانیا کوردی ‏پشکداری ھەلبژارتنا ببیت، بەلێ ڵایەنێن دی یێن کوردی نەخواستن و ‏ھەر یەک ب ئالیەکی کەت.‏

دڤی بیاڤی دا بەرپرسێ دەزگەھێ ھەلبژارتنێن پارتی دیموکراتی ‏کوردستان بۆ رۆژناما ئەڤرۆ پشت راستکر، کو ئەو ھەتا داووماھیێ ژی ‏ل گەل وێ یەکێ بوون کو ھەڤپەیمانیەکا کوردی پشکداری ھەلبژاتنان ‏بن بەلێ ڵایەنێن دی نەخواستن، پارتی ژی نەچاربوو ب تەنێ ‏پشکداربیت.‏
پارتی دیموکراتی کوردستان بڕیارا وێ یەکێ دایە کو ل کەرکووکێ ‏پشکداری ھەلبژارتنان نەبیت و شەرعیەتێ ب داگیرکرنا حەشدا شەعبی ‏نەده‌تن.‏

ل چەندین دەڤەرێن دی پارتی بڕیاردا پشکداریێ د ھەلبژارتنان دا ‏بکەت، وەک خسرۆ گۆران بەرپرسێ دەزگەھێ ھەلبژارتنێن پارتی ‏دیارکری، ئەو دێ تەڤلی ھەلبژارتنان بن ل دەشتا نەینەوا و شنگالێ.‏

ئالیێن دن یێن کوردستانێ ئەوژی کۆمەلا ئیسلامی و بزاڤا گۆران و ‏ھەڤپەیمانیا بەرھەم ساڵەحی بڕیاردا ب ئیک لیست بچنە ھەلبژارتنان، ‏بەلێ ھەتا نوکە ئێکەتیا نشتیمانی و ئێکگرتوو ئیسڵامی بڕیارەکا ‏ئیکڵاکەر نەدایە. ئەڤە ژی وەێ دگەھینیت کو ھەتا نوکە ناڤمالیا ‏کوردی بۆ ھەلبژارتنان نەھاتیە رێکخستن .‏

‏ ژئالیەکێ دیڤە، سوننە ھەتا داووماھی ژی ل گەل پاشئێخستان ‏ھەلبژارتنان بوون، و نەدخواستن ھەلبژارتن وەرن ئەنجامدان ئەوژی ‏ژبەر وێ یەکێ کو نوکە سوننە نە دبەرھەڤن پشکداری ھەلبژارتنان بن، ‏چونکی پڕانیا وان ئاوارنە ژبەر ڤێ یەکێ وێ زرارێ ب سوننەیان ‏گەھینە.‏

ھەتا رۆژا ٢٢-١-٢٠١٨ جڤاتا نووێنەرێن عیراقێ ژی بڕیار ل سەر ‏رۆژا دەسنیشانکرنا ھەلبژارتنان دان، کو دڤێت ھەلبژارتن ددەمێ خۆیێ ‏دیارکری دا بھێن ئەنجامدان ئەوژی ١٢-٥-٢٠١٨ ـێ، و دادگەھا ‏ڤیدرال یا عیراقێ ژی دووپات ل ڤێ یەکێ کرن.‏

ھەیا نوکە سوننە ژی ل سەر دوو باسکێن سەرەکی بەلاڤبووینە ئەوژی ‏ئوسامە نوجەیفی کو باسکێ دروستکریە ژمارەیەکا زۆر یا پارت و ‏ئالیێن سیاسی دناڤدانە و باسکێ دی یێن بھێز ئەوژی ب سەرکێشیا ‏دکتور ئەیاد عەڵاوی یە کو کەسایەتی لیبرالی شیعە یە و سەرکێشیا ‏باسکێ دوێ یێ سوونیان دکەت و کارتێکرنەکا بھێز دناڤا عیراقێ دا ‏ھەیە و ل ساڵا ٢٠٠٥ـی کاریبوو ٩١ کورسیێن پەرلەمانی ب ‏دەستبێخیت و ھەیا نوکە سەنگا وی یا سیاسی ل دەڤەرێن سوونی د ‏ئاستەکی باش دایە و نوکە سەلیم جبوری و سالەح موتلەگ ژی ‏دھەڤپەیمانا وی دانە.‏

ئالیێ ھەرە گرنگ بۆ ھەلبژارتنان ژی شیھعەنە، شیعە ھەردەم ب وێ ‏یەکی دناڤداربوون کو د ھەلبژارتنا دا ھەڤپەیمانیا پێک دئینن و ‏زۆرینەیا سیاسی ب دەست دخن وەک چاوان ل ساڵا ٢٠٠٥ ئەیاد ‏عەڵاوی ل گەل لیستا ”ئەلعراقیە” کاری ٩١ کورسیان ب دەست بخت ‏بەڵی ھەڤپەیمانیا زۆر دناڤەرا جڤاتا نوێنەران دا شیا سەرۆ وەزیر ‏ببیتە پشکا شیعەیان .‏

بەلێ نھا ژی پرت و بەڵاڤیەک کەتیە ناڤ مالیا شیعە و حەیدەر عەبادی ‏و نوری مالکی وەک دوو سەرکردە ب دوو لیستێن جودا کو ئەڤە ژی دبە ‏دەستپیکا ژناڤچوونا ناڤمالیا شیعی و تایبەت پارتا ژناڤچونا دەعوا. و ‏نھا وەک شرۆڤەکارێن سیایی ێین عیراقی ددەنە خویاکرن دبە پۆستێ ‏سەرۆک وەزیرێن عیراقێ ببتە کێشەیەک دناڤا شیعەیاندا و کارڤەدانێن ‏خراپ ل ەپی خۆ بھێلیت.‏

کورسی یێن پەرلەمێنتویا ئیراقێ ٣٢٨ کورسینە، و زێدەتر ٢٥ پارتێن ‏عیراقی ھەڤرکیێ ل سەر ڤان کورسیکان دکەن، بەشەک ژ وان کورسیکان ‏ھاتینە تەرخانکرن بۆ کۆتا یێن پێکھاتە و نەتەوەیێن پچووک.‏