ئه‌ڤرۆ نیۆز:
ل گۆڕ راگه‌هاندنا ده‌وله‌تا ئیسلامى د به‌یاننا مه‌كێ كو ب ئێمزا ویلایه‌تا سه‌لاحه ددین هاتیه موركرن ئاشكراكر، تیرۆرستێ ره‌كه‌ز سعودى یێ ب ناڤێ ئه‌بو سمیرا ئه‌لجزراوى ب كارێ كریارا خوه‌شتن و په‌قاندنا ترۆمبێلا ئه‌ڤرۆ رابوویه كو 4 ته‌نێن TNT تێدا هه‌بوون و لنێزیكى خالا پشكنینا رۆژئاڤایا تكریت هاتیه ئه‌نجامدان.
ئه‌ڤرۆ نیۆز:
پشتى ئه‌مریكا چه‌ندێن بزاڤكرین بۆ رازیكرنا وه‌لاتێ توركیا د شه‌رێ دژى داعشێ دا و كومبوونێن ڤى دووماهیێ ل ئه‌نقره ل گه‌ل مه‌زنه به‌رپرسێن توركیا واشنتۆن راگه‌هاند، ددانوستاندنان دا پێشڤه‌چوون هه‌بوون، بتایبه‌تى سه‌باره‌ت رازیبوونا وه‌لاتێ توركیا ل دۆر مه‌شقكرن و پشته‌ڤانیكرنا ئۆپۆزسیۆنا سورى یێن نه توندڕه‌و، هه‌ڤده‌م به‌رپرسێن پناتگۆنێ دوپاتكرن، ره‌وشا له‌شكرێ عیراقێ نه‌یا دجهێ خوه‌دایه .
په‌یڤدارا ب ناڤێ وه‌زاره‌تا ده‌رڤه‌یا ئه‌مریكى مارى هارف گۆت: دانوستاندنێن د ناڤبه‌را سه‌رۆك وه‌زیرێن توركى ئه‌حمه‌د داود ئۆغلو و به‌رپرسێن له‌شكرى یێن ئه‌مریكى پێشڤه‌چوون هه‌بوون، هه‌روه‌سا دیاركر، جه‌نه‌رالێ خانه‌نشێن جون ئالان و هاریكارێ وى برێت ماكگورك ب سه‌ره‌دانه‌كا گرنگ بۆ ده‌مێ دو رۆژان ل توركیا بوون بۆ رازیكرنا وه‌لاتێ ئه‌ندام د قولپا ناتوى دا پشكداریا دشه‌رێ دژى داعشێ دا بكه‌ن، كو نها بوویه گه‌فه‌كا مه‌زن ل سه‌ر باژێرێ كوبانێ یێ سنۆرى ل گه‌ل توركیا.
ویلایه‌تێن ئێكگرتیا ئه‌مریكى نه‌رازیبوونا خوه ده‌ربڕى بوو ل سه‌ر هه‌لویستێ وه‌لاتێ توركیا و بێده‌نگیا وى هه‌مبه‌رى شه‌رێ دژى چه‌كدارێن ده‌وله‌تا ئیسلامى داعش.
هه‌ده‌م وان دانوستاندنان ژى و ل گۆڕ ئاژنسا ده‌نگوباسێن فرانس پرێس، رێڤبه‌رێ هه‌والگیریا توركیا حه‌قان فیدان ل گه‌ل جێگر وه‌زیرێ ده‌رڤه‌یێ ئه‌مریكى ولیام بیرنز كومبوو، زێده‌بارى هه‌ڤدیتنا ل گه‌ل مه‌زنه شیره‌تكارێ سه‌رۆكێ ئه‌مریكى باراك ئۆباما بۆ كاروبارێن به‌رهنگاربوونا تیرۆرى لیزا موناكو بۆ هندێ به‌حسێ میكانیزما ریێن هاریكارى و پشته‌ڤانیا ته‌مام بۆ به‌رسینكگرتنا تیرۆرێ و تێكه‌لكرنا شیانێن وه‌لاتێ توركیا ل گه‌ل وه‌لاتێن هه‌ڤپه‌یمان دژى ده‌وله‌تا ئیسلامى .
كوچكا سپى راگه‌هاند، لیزا موناكو هه‌مبه‌رى توركیا، هه‌ویستێ رێزگرتنێ ده‌ربرى، بۆ پشته‌ڤانیا توركیا و دوپاتكر، دڤێت بله‌ز ئه‌و هاریكارى بهێنه ئه‌نجامدان.
په‌یڤدارا ب ناڤێ ئه‌مریكا هارف خوه‌یاكر، د ڤێ حه‌فتیێ دا ب مه‌ره‌ما چڕكرنا وان دانوستاندنان شانده‌كێ دى یێ له‌شكرى دێ سه‌را ئه‌نقره ده‌ت و ل گه‌ل هه‌فكیفێن خوه یێن له‌شكرى كومبن.
ئه‌ڤرۆ نیۆز:
ب ئارمانجا دورپێچكرنا شه‌رڤانێن (ypk ) ل كوبانێ، چه‌كدارێن تیرۆرى یێن داعشێ هێرشێن جودا جودا و به‌رده‌وام ل سه‌ر ده‌ڤه‌رێن سنۆرى بتایبه‌تى خالا سنۆریا ل گه‌ل توركیا یا دكه‌فیته رۆژئاڤا باژێرێ كوبانێ و دبیته ده‌ره‌گه‌هێ پشته‌ڤان و هاریكاریا شه‌رڤانێن كورد ل سنۆرى، به‌لێ هه‌موو هێرشێن داعشێ ژ ئالیێ شه‌رڤانێن كورد ڤه هاتنه تێكشكاندن و ژناڤبرن.
هه‌ڤده‌م فرۆكێن وه‌لاتێن هه‌ڤپه‌یمان د هێرشێن خودا ل سه‌ر به‌روكێن شه‌رێ داعشێ ل كوبانێ دبه‌رده‌وامن، ژ ئالیه‌كێ دیڤه شه‌رڤانێن (ypk ) خوه‌یاكرن ئه‌و بتنێ نوكه پێدڤى ب هاریكاریا چه‌ك و ته‌قه‌منى و فیشه‌كان هه‌یه بۆ راگرتنا شه‌رێ داعشێ و سه‌ركه‌فتنا د شه‌رێ تیرۆرێ دا.
ژ ئالیه‌كێ دیڤه و هه‌ر دشه‌رێ دژى داعشێ دا به‌لێ ل رۆژئاڤایێ عیراقێ، به‌رپرسێن عیراقى خوه‌یاكر، پارێزگه‌ها ئه‌نبار پێدڤى ب هاریكاریه‌كا بله‌ز هه‌یه به‌رى هه‌موو ده‌ڤه‌رێن وان بكه‌ڤنه دده‌ستێن داعشێ دا.
هه‌روه‌سا سه‌رۆكێ جڤاتا پارێزگه‌ها ئه‌نبار هوشدارى دان كو دبیت پارێزگه‌ها ئه‌نبارێ بتنێ هه‌تا 10 رۆژێن دى هه‌مبه‌رى چه‌كدارێن ده‌وله‌تا ئیسلامى داعش خوه‌راگریت، ل گۆڕ ئاژانسا فرانس پرێس ژى ره‌وشا پارێزگه‌ها ئه‌نبار یا هشك و شله‌ژانه.
ئه‌ڤرۆ نیۆز:
رۆیته‌رز: ژێده‌ره‌كێ به‌رپرس ل نه‌خوشخانێن به‌غدا راگه‌هاند، تیرۆرسته‌كێ خوه‌كوژ ب كه‌مه‌ره‌كا هێرشكریه سه‌ر سویكا باكورێ به‌غدا و دئه‌نجامدا 11 كه‌س شه‌هید و 21 ێن دى بریندار بوون.
ئه‌و هێرش ل به‌غدا د ناڤبه‌را باژێركێ تارمیه و مه‌شهه‌د كو 28 كیلومتران باكورێ به‌غدایه هاتیه ئه‌نجامدان، ل هه‌مان ده‌ڤه‌رێ شه‌روپێكدادان د ناڤبه‌را هێزێن چه‌كدارێن داعشێ و له‌شكرێ عیراقێ ل باكورێ رۆژئاڤایا عیراقێ هاتینه ئه‌نجامدان.
هه‌ر دروودانه‌كا دى دیدا 4 له‌شكرێن عیراقێ ب گولله‌یێن هه‌ڤالێن خوه هاتینه كوشتن ل باژێركێ عوزه‌یم كو بدووراتیا 90 كیلومه‌تران باكورێ رۆژهه‌لاتا به‌غدایه.
تایبه‌ت، ئه‌ڤرۆ نیوز، چه‌كدار ئه‌ترووشى:
ئه‌فسه‌ره‌كێ پله بلند دناڤا پێشمه‌رگێ هه‌رێما كوردستانێ دا ئه‌و ده‌نگ و باسه ره‌تكرن كو پێشمه‌رگه‌ى هێرش كربیته سه‌ر قه‌زا شنگال.
ئه‌فسه‌ره‌كێ پله بلند دناڤا پێشمه‌رگێ كودستانێ دا ئه‌و ده‌نگو باسه ره‌تكرن كو پێشمه‌رگه‌یى هێرش كربیته سه‌ر شنگال و گوت:” چو پێشڤه‌چون ژ ئالیێ پێشمه‌رگه‌ێ كوردستانێ ڤه بۆ سه‌ر قه‌زا شنگال نینن و ئه‌و ده‌نگو باسێن به‌لاڤبوین چو راستى بو نینن.
ئه‌فسه‌رێ نه‌ڤیایى ناڤێ وى ئاشكه‌را بیت ئه‌و چه‌نده ژى دیاركر كو پێشمه‌رگه ب تمامى د ئاماده‌باشیێ دایى و گۆت:” هه‌موو ئاماده‌كارى بو هێرشا ل سه‌ر شنگالێ هاتینه كرن لێ نوكه بتنێ به‌ره‌ڤانیێ ژ هێرشێن داعش دكه‌ن هێشتا بریارا هێرشێ نه‌هاتیه دان.
تایبه‌ت، ئه‌ڤرۆ نیوز، چه‌كدار ئه‌ترووشى:
ژێده‌ره‌كێ هه‌والگیریا عیراقێ تایبه‌ت بو ئه‌ڤرۆ نیۆز دیاركر كو لبه‌رێ سپێدا ئه‌ڤرۆ فروكه‌یێن هێزێن هه‌ڤپه‌یمانان و فروكه‌ێن عیراقى قه‌زا به‌عاچ توپبارانكرن.
ژێده‌رێ پله بلندێ هه‌والگیریا عیراقێ بو ئه‌ڤرۆ نیوز گۆت: د به‌رنامێ نوكه دا ئه‌وه به‌عاچ توپاران بكه‌ن، هه‌روه‌سا پشتى كونترۆلكرنا ناحیا ره‌بیعه و رێگرتنا هاتنا هاریكاریان بو داعش ژ وى لایى ڤه به‌رنامه‌یه‌كێ چر هاتیه دانان بۆ توپارانكرنا به‌عاچ ژلایێ هێزێن هه‌ڤپه‌یمان و فروكه‌یێن عیراقى ڤه.
ژێده‌رێ نه‌ڤیایى ناڤێ وى بهێـته دیاركرن گۆت: به‌رێ سپێده‌یا ئه‌ڤرو هێرشه‌كا ئه‌سمانى به‌عاچ ب توندى توپارانكرن، پشتى فروكه‌یێن چاڤدێرى كرنێ كارى َخوه ئه‌نجامداى فروكه‌یێن هێزێن هه‌ڤپه‌یمانان و یێن عیراقى كاروانه‌كێ مه‌زن یێ تیرورستێن داعش ژ ناڤبر و هه‌موو كه‌سێن د ناڤا ترومبێلان دا هاتینه كوشتن.
ئه‌ڤرۆ نيوز:
ژێده‌رێن جيهانى يێن ده‌نگوباسان ديار دكه‌ن كو نوكه نيڤا كۆبانێ كه‌فته ده‌ست داعش و ره‌وانگه‌ها مافێن مرۆڤى ل سوريا ژى ديار دكه‌ت كو شه‌ر يێ به‌رده‌وامه.
كه‌نالێ سى ئێن ئێن يێ ئه‌مريكى راگه‌هاند كو سه‌ره‌راى هێرشێن ئه‌سمانى يێن فرۆكێن هه‌ڤپه‌يمانان بۆ سه‌ر كۆبانێ، به‌لێ داعش نوكه ده‌ستێ خوه يێ دانايه سه‌ر نيڤا كۆبانێ.
ره‌وانگه‌ها مافێن مرۆڤى ژى ل سوريا راگه‌هاند كو ژ بوو پێشڤه‌چوونا وان ل باشوورێ بارێژێ كۆبانێ ژ شڤێدى وه‌ره شه‌ر و پێكدادان د ناڤبه‌را هه‌ر ئێك ژ هێزێن يه‌كينه‌يێن پاراستنا گه‌ل و چه‌كدارێن ده‌وله‌تا ئيسلامى ل عيراق و شامێ دا د به‌رده‌وامن.
ره‌وانگه‌ها مافێن مرۆڤى ئه‌وا ب ره‌نگه‌كێ ئۆپۆسيۆن ل سوريا كار دكه‌ت و باره‌گايێ وێ ژى ل له‌نده‌ن ئاماژه ب وێ چه‌دێ كريه كو فرۆكێن هێزێن هه‌ڤپه‌يمانان ژى ب دژوارى هه‌ر ئێك ژ باشوورێ كۆبانێ و رۆژهه‌لاتا وێ تۆپبارنكريه.
ئه‌ڤه و به‌رپرسێن ئه‌مريكى ژى چه‌ندين جاران ئاماژه ب وێ چه‌ندێ كريه كو ئه‌و ب دربێن ئه‌سمانى ب تنێ نه‌شێن چه‌كدارێن داعش ژ ناڤ ببه‌ن، د ده‌مه‌كى دا كو ب رۆژانه ب ره‌نگه‌كێ به‌رده‌وام دربێن ئه‌سمانى ل كۆبانێ د داوه‌شيننه سه‌ر چه‌كدارێن داعش ل كۆبانێ.
سه‌ره‌راى وێ چه‌ندێ ژى كو ل چه‌ندين وه‌لاتێن جيهانێ و باشوورێ كوردستانێ ژى خۆنيشادان بۆ پشته‌ڤانيكرنا خه‌لكێ كۆبانێ دهێنه كرن، به‌لێ هه‌تا نوكه ژى چو لايه‌نان هه‌ڤكاريا شه‌رڤانێن يه‌په‌كێ نه‌كريه كو بۆ چه‌ككرنێ ب تايبه‌ت وه‌لاتێ توركيا كو زێده‌ترى 33 كه‌سان د خۆنيشادانێن وێرێ دا گيانێ خوه ژ ده‌ست دايه.
ئه‌ڤرۆ نيوز، ئه‌كره‌م ئيبراهيم:
پارێزگارێ دهۆكێ ئه‌ڤرۆ 10\11 ل گه‌ل ته‌ڤایا رێڤه‌به‌ریێن گشتی یێن ده‌زگه‌هێن خزمه‌تگوزاری ییێن توخیبێ پارێزگه‌ها دهۆكێ كوم بوو و ل سه‌ر چاوانیا گوهورینێن به‌رده‌وامێن ده‌ڤه‌رێ و سه‌رۆبه‌رێ ئاواران و قوناغێن كارێ چێكرنا كه‌مپان بو ئاواره‌یان و ره‌وشا خاندنێ و گیرۆبونا وێ ل پارێزگه‌هێ گه‌نگه‌شه ل سه‌ر هاته‌كرن و ته‌كست ل سه‌ر بله‌زكرنا كارین درۆستكرنا كه‌مپان د پێخه‌مه‌ت ڤالاكرنا خواندنگه‌هان و ده‌ست پێكرنا پرۆسیسا خاندنێ .
هه‌روه‌سا د پارێزگارێ دهۆكێ به‌حس ل سه‌ر كارۆ چالاكیێن ره‌وشه‌نبیری و هونه‌ری و جڤاكی بو خزمه‌تكرنا هشیاریا نه‌ته‌وه‌یی و جڤاكی كرن دڤێت ئه‌و هه‌مو خزمه‌ته بو ئاراسته‌كرنا تاكه كه‌سی ل بن كریارا به‌ر هه‌م ئینانێ و ئاڤاكرنێ و پیكڤه ژیانێ بهێنه پالدان.
فه‌رهاد ئه‌ترۆشیی پارێزگارێ دهۆكێ د وێ كوموبنا خو دا ل گه‌ل رێڤه‌به‌رێن گشتیی یێن خزمه‌تگوزاری ل سه‌ر هاتنا وه‌رزێ زڤستانێ و پرۆژێن خزمه‌تگوزاری ل دور رێك و پران و هاتنوچونێ چه‌وانیا رێكخستنا هاتنوچونێ و به‌لاڤكرنا كاره‌بێ و و سوته‌مه‌نیێ و ره‌وشا ساخله‌میێ شرۆڤه ل سه‌ر هاته كرن رێ و ئاوایێن پێدڤی بو داهتنه دانان.
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ ئێكه‌تا ناڤه‌ندى يا ته‌پا پێ ل هه‌رێما كوردستانێ راگه‌هاند كو ژڤانێ ده‌سپێكرنا خولا ناياب يا كوردستانێ هاته دياكرن.
سوبحى كامل نوونه‌رێ پارێزگه‌ها دهۆك و ئه‌ندامێ ئێكه‌تا ناڤه‌ندى يا ته‌پا پێ ل هه‌رێما كوردستانێ دياركر كو دێ ل رۆژانێن پێنج شه‌مبى و ئه‌ينى يێن 30 و 31\10 خولا ناياب كوردستانێ دێ ده‌ستپێكه‌ت.
سوبحى كامل ئه‌و چه‌نده ژى ئاشكه‌را كر كو نوكه ب تنێ خولا نايابا كورستانێ دێ ب رێڤه چيت و قاره‌مانيێن دى هێشتا بڕيار ل سه‌ر نه‌دايه و گۆت: “حارێ چاره‌نڤيسێ وان يێ ديار نينه”.
ديسا ئێكه‌تيا ناڤبرى ل مالپه‌رێ خوه ژى راگه‌هاند كو هه‌موو ياريێن خولا نايابا كوردستانێ دێ ب تنێ ل رۆژێن پێنجشه‌مبى و ئه‌ينى هێنه ئه‌نجامدان و ئێكه‌تيا ناڤبرى ب چو ره‌نگان ژڤانێ ياريان ناگوهۆڕيت.
ئه‌ڤرۆ نيوز:
رۆژناما واشنتۆن پۆست يا ئه‌ريكى ديار كر كو د رێيا كۆنترۆلكرنا پارێزگه‌ها ئه‌نبار يا رۆژئاڤايێ به‌غدا دا، چه‌كدارێن داعش يێ بزاڤێ دكه‌ن ده‌رگه‌هێ به‌غدا ب قوتن.
ڤێ رۆژنامێ د راپۆرته‌كا خوه دا دياركر كو ئه‌نبار دێ سه‌ركه‌فتنه‌كا مه‌زن بيت بۆ داعش ئه‌وا دێ ب وێ رێ چيته به‌ر ده‌رگه‌هێ به‌غدا و دێ رێ ل به‌ر وێ بۆ چوونا سوريا ژى خۆش بيت و دێ شێت ب ساناهى پێدڤيێن خوه ژ سوريا به‌ر ب عيراقێ ئينيت بۆ هێرشكرنا سه‌ر به‌غدا ئه‌وا وه‌كو داعش دبێژيت ئارمانجا وان يا سه‌ره‌كى.
ئاماژه ب وێ چه‌ندێ ژى كريه كو گرتنا ئه‌نبار دێ ده‌ليڤێ خوشت كه‌ت كو ده‌ست ب سه‌ر ئێك ژ گرنگترين به‌نداڤێن ئاڤێ ل عيراقێ بگريت و ديسا ده‌ست ل سه‌ر گه‌له‌ك جهێن چه‌كى ژى بگريت كو دێ د هاريكار بن بۆ هێرشكرنا سه‌ر به‌غدا.
ئه‌ڤێ رۆژناما ئه‌مريكى ئه‌و ژى دايه ئاشكه‌را كرن كو نوكه داعش ل وێ پارێزگه‌هێ ده‌ست ب سه‌ر گه‌له‌ك گوندان دا گرتيه و ده‌ستێ خوه دانايه سه‌ر بگه‌هێن له‌شكرى و پۆليسان و هێرش كريه سه‌ر له‌شكرێ عيراقى ژى ل رومادى.
واشنتۆن پۆست رۆنى خستيه سه‌ر وێ چه‌ندێ ژى كو نوكه داعش ده‌ستێ خوه دانايه سه‌ر روويه‌كێ به‌رفره‌هـ يێ وێ پارێزگه‌ها پتريا وێ سونى وه‌كو فه‌لۆجه و رومادى كو پايته‌خێ پارێزگه‌هێ يه.
نيشاندان