%25 ژ باجا کۆمپانیێن حەج و عومرێ دێ ھێتە کێمکرن
ئه‌ڤرۆ نيوز:
جێگرێ سەرۆکێ لیژنا ئەوقافێ و کاروبارێن ئایینی ل ئەنجومەنێ پارێزگەھا دھۆکێ ئاشکرا کر کو نھا کاری ل سەر کێمکرنا باجا کۆمپانیێن حەج و عومرێ دکەن و گۆت “بزاڤێ دکەین کو 25% ژ باجا کۆمپانیێن حەج و عومرێ کێم بکەین”.
ئەکرەم فەتاح جێگرێ سەرۆکێ لیژنا ئەوقافێ و کاروبارێن ئایینی ل ئەنجومەنێ پارێزگەھا دھۆکێ ژ فراکسیۆنا پارتی دیمۆکراتی کوردستان بۆ رۆژناما ئەڤرۆ دیار کر پشتی کو ل گەل رێڤەبەرێ گشتیێ ئەوقافا دھۆکێ و رێڤەبەریا حەج و عومرێ ل دھۆکێ و سەرۆکێ ئێکەتیا زانایێن ئایینێ ئیسلامێ تایێ دھۆکێ کۆم بووین رێککەفتن کو 25% ژ باجا کۆمپانیێن حەج و عومرێ کێم بکەن.
جێگرێ سەرۆکێ لیژنا ئەوقافێ و کاروبارێن ئایینی ل ئەنجومەنێ پارێزگەھا دھۆکێ خویا ژی کر ئەڤ کارە دێ د بەرژەوەندیا کۆمپانیان و وان وەلاتیان دا بیت کو قەستا حەج و عومرێ دکەن و گۆت “نەمازە ل پارێزگەھێن ھەولێرێ و سلێمانیێ ئەڤ باجە ل سەر کۆمپانیێن حەج و عومرێ کێمترە”.
ل دووماھیێ ئەکرەم فەتاح ئاشکرا کر وەکو لیژنا ئەوقافێ و کاروبارێن ئایینی ل ئەنجومەنێ پارێزگەھا دھۆکێ ب ژڤانن ل ڤان نێزیکان ل گەل رێڤەبەرێ باجا کۆمپانیان کۆم ببن.
