%60 ژ لەشفرۆشێن ئیرانێ ژ بەر گەمژەیا خوە وی کاری دکەن
ئەڤرۆ: فەرید منبەری و ناسر منبەری
رەحمەتۆللا حافزی سەرۆکێ کۆمسیۆنا ساخلەمی و ژینگەھا جڤاتا تەھرانێ دیار کر کو تنێ ل تەھرانێ پتر ژ سێ هزار ژن ل سەر کارتۆنان و ل جادان دنڤن. ناڤبری ئاماژە ب ڤێ چەندێ دکەت کو پتریا تەمەنێ وان ژنان بو 17 ھەتا 18 سالی ھاتیە خوارێ. ھۆکارا سەرەکی یا ڤێ دیاردەیێ ژی دزڤریتە سەر رەوشا ئابووری و بکارئینانا مادەیێن ھۆشبەر.
(ر.س) کچەکا 24 سالی یە کو ب مخابنی ڤە ژ مالا خوە رەڤیە و کەفتیە داڤێ زەلامێن تەھرانێ. ناڤبری بەحسا ژیانا خوە دکەت و دبێژیت و بۆ داھاتوویا خوە ھیچ ھیڤیەک نینە، ژبلی مرنێ.
(ر.س) دبیژیت: بۆ جارا ئێکێ دگەل کوڕکەکی مە ھەڤدوو نیاسی. ناڤێ وی فەریدون بوو. دەستپێکێ گەلەک باش و دلۆڤان بوو. بەلێ پاشی داخوازا تێکەلیا سێکسی ژ من کر. دەستپێکێ من قەبوول نەکر، بەلێ ئەوی دگۆت ھەکە قەبوول نەکەم دێ دەست ژ من بەر دەت و دێ چیت. من ژی گەلەک حەز ژ وی دکر، لەورا من قەبوول کر کو کریارا سێکسی دگەل ئەنجام بدەم. دھێتە بیرا من رۆژا ئێکێ یا نەورۆزێ چوومە مالا وی، پشتی چەند جارێن دی ئەز نەچار کر کو وی کاری بکەم. دەستپێکێ من نەدزانی مرۆڤەکێ چاوایە. دگۆتە من گەلەک ئەڤیندارێ تەمە و ھەر دەم پەیڤێن ئەڤینیێ بۆ من دگۆتن. پێکڤە دچوینە پارک، کافی شاپ، سینەما و ھتد… گەلەک جاران دگۆتە من ھەکە بۆ خۆ شولەکی پەیدا کەت دێ ھێتە خوازگینا من. لێ ھەیامەک دەرباز بوو، ھێدی ھێدی بەر ب خراپیێ ڤە چوو، ھەردەم بۆ من گۆتنێن سێکسی دگۆتن. ئەز وی ھنگی 16 سالی بووم، من گەلەک حەز ژ فەریدوونی دکر لەورا نەدشیام خوە ژێ خلاس کەم.
(ر.س) ل دۆر رەوشا بنەمالا خوە بەردەوامی ددەتە گۆتنێن خوە و دبێژیت: بابێ من کارمەند بوو، نوکە خانەنشین بوویە، رەوشا ئابووریا بنەمالا مە خراب نینە و نۆرمالە، باب و دایکا من نڤێژان دکەن بەس زێدە ئاییندار نینن، ل مالا مە سەتەلایت ھەبوو، موزیک و شاھی و سەما ژی مە دکر و ل رەخ وانڤە ژی مە نڤێژ و رۆژیێن خوە ژی دگرتن. چەند جاران دگەل بابێ خوە ب شەڕ و جرەیێ چووین، ژبەر کو ھەردەم بھانا ژ جلکێن من و ھەڤالێن من دگرت، ئێدی نەشیام تەحەمولێ بکەم و ژ مالێ رەڤیام و دگەل ئێک ژ ھەڤالێن خوە کو رەوشا وێ ژی وەکی من بوو، پێکڤە خانیەکێ کرێ گرت. بۆ پەیدا کرنا کڕیا وی ژی نەچار بووین شول بکەین، شولێ مە ژی بوو لەشفرۆشیێ! ھیڤیا من ئەڤ بوو کو رۆژەکی ببمە دکتۆر، لێ تەمەنێ من نەگەھشتە 20 سالی کو بوویمە لەشفرۆشەکێ.
ل دۆر رەوشا ژیانا خوە یا نوکە (ر.س) دبێژیت: پتریا جاران ل مالا خوە و دگەل ھەڤالەکا خوە دمینم، لێ حەفتیەک ئێک ئان دوو شەڤان ژی دچمە مالا بابێ خوە. مالا بابێ من نوکە دزانن چ شولەکێ دکەم، لێ تشتەک نابێژنە من. دەستپێکێ ژبەر کو ب شەڤێ دەردکەفتم دەرڤە گەلەک عاجز و تورە دبوون، بەلێ نوکە چ نابێژن، ژبەر کو ھەم وان وەستیاینە و ھەم ژی من!
ل دۆر چاوانیا کەفتنا ناف شولێ لەشفرۆشیێ (ر.س) دبێژیت: پشتی فەریدون، ھەتا دەمەکی دگەل چو کەسەکی من تێکەلی نەبوو، ژبەر کو ژ لایێ روحی و دەرونی ڤە گەلەک نەباش بووم، گەلەک جاران سەرەدانا دکتۆرەکی دەرونی کر، ھێدی ھێدی من وی رەوشی ژبیر دکر کو ئەو دکتۆرە ب خوە پێشنیازا ھەڤالینیێ دا من، ھنگی خوەش و جوان شرۆڤەیا دەرونی دکر کو ئەز ژی نەشیام خۆراگریێ کەم و قەبوول کر، لێ ئەو ژی پیچە مرۆڤەکی ژێ دەرکەفت!
پشتی کو تێکەلیا من دگەل دکتۆرێ دەرونی ب داڤی ھات، من بڕیار دا کو ل زانکۆیێ بخوینم و چوومە زانکۆیەکا ئەھلی ل پشکا (نەخشەسازیا خانیان) و ل باژێرەکی دی ناڤێ خوە تۆمار کر. دگەل 2 – 3 ھەڤالێن خوە مالەکێ کرێ گرتبوو. ئێک ژ ھەڤالێن مە چەند جاران دەزگرێ خوە یێ نەشەرعی ئینا مالا مە. ھێدی ھێدی ھەڤالێن دن ژی فێر بوون و وان ژی دەست ب ڤی کاری کرن. کورت و کورمانجی ئەو مالە بوو لەشفرۆشخانەیەک. من ژی دەما وێ رەوشێ دیت نەشیام ھزرێن خوە ل سەر خوەندنێ کۆم کەم لەورا زانکۆ ھێلا و زڤریمەڤە تەھرانێ.
سەبارەت ھۆکارێن پەیدا بوونا ژنێن جادان دکتۆرە “مەرجان زیبەندە” جڤاک ناس و بسپۆرا کاروبارێن جڤاکی دبێژیت: پەیدا کرنا بنکۆکێن ڤێ دیاردەیێ زێدە نە ب سانەھیە. ھۆکارێن جوربەجور دبنە ئەگەرێ پەیدا بوونا ڤێ دیاردەیێ. لێ ب رەنگەکێ گشتی دشێن وان ھۆکاران ل 6 خالان دا ئاماژە پێ بکەین، کو ھەر ئێک ژ وان خالان ژی چارەسەریەکا خوە یا تایبەت ھەیە. وەکی گەلەک نەخۆشیان کو نیشانێن وان ھەڤپشکە لێ بنکۆکا نەخۆشیێ جودایە. ھەر دکتۆرەکێ پێدڤیە ب ھووربینی نەخۆشیا کەسێ نەساخ پەیدا بکەت ب گۆرەی وی ژی دەرمانان بۆ بنڤیست.
ھۆکارا ئێکێ رەوشا ئابووریە. گەلەک ژ کچان و ژنان ژبەر رەوشا خوە یا ئابووری نەچارن لەشفرۆشیێ بکەن. وان جورە مرۆڤان، مرۆڤێن خراب نینن، رەنگە حەز ژ لەشفرۆشیێ ژی نەکەن لێ ژبۆ دابینکرنا خەرجیێن ژیانا خوە، رێیا لەشفرۆشیێ ھەلبژارتینە. ھەلبەت ھژمارا وان جورە ئافرەتان ل جڤاکێ دا کێمە رەنگە ٥% ھەتا 10% بن. لێ ھەر ئەو ھژمارە ژی نابیت ل پێش چاڤ نەھێنە وەرگرتن و حوکمەت نەچارە رێیەک بۆ وان پەیدا کەت.
ھۆکارا دویێ ئەز ناڤ لێ دکەم (گەمژەیی) و ھەر ئەڤەژی گەلەک بەربەلاڤە. رەنگە نێزیکێ 60% ژ جڤاکێ پێک بینن. وان جورە ئافرەتان دەستپێکێ تێکەلیەکا نۆرمال وەکی ھەڤالینی دگەل زەلامان دەست پێ دکەن. کچکن و ھەست و وەزیا وان گەلەکە، لەورا ب سانەھی دھێنە خاپاندن. پشتی دەمەکی ئەڤ تێکەلیا نۆرمال و ل شەکل دا ئەڤیندارانە، بەر ب تێکەلیەکا سێکسی ڤە دچیت، مینا رەوشا (ر.س) کو دگەل ھەوە ئاخڤیە.
ھۆکارا سێیێ، بجە ئینانا داخوازێن سێکسی یە. ژبەر کو دەرفەتا زەواجێ بۆ پرانیا کچکان ھەتا تەمەنێ 20 سالیێ نینە و ب مخابنی ڤە تەمەنێ زەواجێ گەلەک چوویە سەری. بۆ نموونە ھەکە کچکەکێ بخوازیت زوو بزەوجیت ل تەمەنێ کێمتر ژ 19 ـ 20 سالیێ ئەڤ ئیمکانیەتە دەست نادەت. بەر ڤێ چەندێ ھەکە کچکەک ل 9 سالیێ دا بگەھیتە بالغبوونێ و ب مخابنی ڤە ژی ل ڤێ جڤاکێ دا دژیت، دگەل جۆرێن کەنالێن سەتەلایتێ، فلمێن سێکسی، گۆتنێن سێکسی، نوکتەیێن سێکسی و ھتد… تووشی تەحریک بوونا سێکسی دبیت و ھەری کێم حەزا وی بۆ ئەنجاما دانا ڤی کریاری دێ پەیدا بیت. مە د ناڤ گەلەک ژ قۆتابخانەیێن کچکان دا پرسا دان و ستاندنا فلمێن سێکسی ھەیە! گەلەک ژ وان کچکان رەحەت کرنا حەزا خوە یا سێکسی ب رێیا خوە ئەنجام ددەن کو ب مخابنی ڤە ئەڤ کریارە گەلەک بەربلاڤە و ھندەک ژ وان ژی بەر ب تێکەلیا سێکسی دگەل رەگەزێ بەرامبەر ڤە دچن. ھەلبەت گەلەک کێم چێ بوویە کو پێشنیارا ئەنجام دانا کریارێن سێکسی ژ لایێ کچکێ ڤە بۆ زەلامی ھاتبیتە ئاراستە کرن. لێ ھەر ئەو داخوازاە ھۆکارەکی یە کو دەما کوڕکەک پێشنیازا ئەنجام دانا کریارا سێکسی بۆ کچکەکێ بدەت، کچەک ب سانەھی قەبوول بکەت.
ھۆکارا چارێ، خێزانە. ب مخابنی ڤە خێزان ل جڤاکا مە دا واتەیا خوە یا راست ژ دەست دایە. ئێدی مال و خێزان نە ئەو جھێ گەرم، ئەمن و دلۆڤانە کو بەرێ مە ژ باب و باپیرێن خوە گۆە لێ بوویە. مال ئێدی مینا (نڤینگەھەک) لێ ھاتیە. خوشک ئاگەە ژ پرس و ئاریشێن برایێ خوە نینە، دایک ئاگەە ژ کچا خوە نینە. مخابن ئاریشە و شەڕ ئەڤ ناوەندە (خێزان) تێک دایە ب رەنگەکێ کو ھەر ئێک ژ ئەندامێن مالباتێ حەز دکەن پتریا دەمێن خوە ل دەرڤەی مالێ و دگەل ھەڤالێن خوە ببورینن ھەتا کو دگەل خێزانا خوە.
ساخلەم نەبوونا خێزانێ بوویە ئەگەرێ ڤێ چەندێ کو ئەم دگەل دیاردەیا کچێن ناف کۆلان و جادان روبەروی بین. کچکەک کو ژ مالێ رەڤیە و نوکە ل دوف جھەکێ دگەریت، ژلایێ مرۆڤێن خراپ ڤە دھێنە نێچیر کرن و بۆ کارێ لەشفرۆشیێ ل لەشفرۆشخانەیێن نەھێنی دھێنە بکارئینان.
ھۆکارا پێنجێ ھەبوونا بازرگانێن لەشفرۆشیێ نە، گەلەک بازرگانێن بەرژەوندی خواز دھێن ب ئاڤا کرنا لەشفرۆشخانەیێن نەھێنی ب ھەماھەنگی دگەل دەزگەھێن ئەمنی، دخوازن پارەیەکێ زۆر قازانج بکەن.
ھۆکارا شەشێ ژی کو گەلەک گرنگە و پتریا ژ ٩٥% وەلاتیێن ئیرانێ سەرەدەریێ دگەل دکەن، نەبوونا ئیمان ب ئایین و مەزھەبێ یە. ھەکە کەسەک باوەریا خوە ب ئایین و مەزھەبا خوە ھەبیت بێ ھیچ گۆمانەکێ تووشی ئاریشێن سێکسی، ئابوری، خێزانی، مادەیێن ھۆشبەر و ھتد.. نابیت.
