ئەمریكا: ل دۆر مەترسیێن پەكەكێ ل سنۆرێ هەرێما كوردستانێ و توركیا د...

ئەمریكا: ل دۆر مەترسیێن پەكەكێ ل سنۆرێ هەرێما كوردستانێ و توركیا د ئاگەهدارین

وەزارەتا دەرڤەیا ئەمریكا راگەهاند: ئەم ئاگەهداری ئەوان مەترسیاینە یێن پەكەكێ ل سنۆرێ هەرێما كوردستانێ و توركیا دروست كرین، بەلێ پێدڤییە ئۆپەراسیۆنێن توركیا ب هەماهەنگییا ئیراقێ بیت.
ماتیۆ میلەر، پەیڤدارێ وەزارەتا دەرڤەیا ئەمریكا د كۆنفرانسەكێ رۆژنامەڤانیدا گۆت » مە داخواز ژ توركیا كریە ئۆپەراسیۆنێن دژی پەكەكێ ب هەماهەنگی بیت ل گەل دەستهەلاتدارێن هەرێما كوردستانێ و ئیراقێ».
میلەری گۆت ژی» ئەم وەكو ئەمریكا هەست ب ئەوان گەفان دكەین یێن كو چەكدارێن پەكەكێ ل دەڤەرێن سنۆریێن توركیا و ئیراقێ دروست كرینە، دوپات دكەین ژی كو پێدڤییە ئۆپەراسیۆن ب هەماهەنگی بهێنە كرن بۆ ئەوێ چەندێ گیانێ خەلكێ سڤیل بهێتە پاراستن».
ل دۆر ئۆپەراسیۆنا لەشكرییا توركیا ل دژی پەكەكێ د ناڤ ئاخا ئیراقێدا، ئیبراهیم سومەیدعی، شیرەتكارێ محەمەد شیاع سۆدانی، سەرۆك وەزیرێن ئیراقێ د دیدارەكا رۆژنامەڤانیدا ل گەل كەنالێ دیجلە یێ ئیراقی راگەهاندبوو» هەماهەنگییەكا تمام د ناڤبەرا بەغدا و ئەنقەرە دا هەبوو بۆ دەستپێكرنا ئۆپەراسیۆنا هەڤپشك یا لەشكرێ توركیا ل دەڤەرێن سنۆریێن هەرێما كوردستانێ».
شیرەتكارێ سودانی گۆت بوو ژی» پەكەكە ئۆپەراسیۆنێن تاوانكاری دكەت و حوكمەتا ئیراقێ ژی وەكو رێكخستیەكا تیرۆرستی هەژمارتییە».
پێشتر، هاكان فیدان، وەزیرێ دەرڤەیێ توركیا د دیدارەكا تەلەڤزیۆنیدا راگەهاندبوو» ئیراق بۆ توركیا جهێ گرنگیدانێیە و دخوازین ل گەل بەغدا بەرهنگارییا پەكەكێ بكەین، نە سەقامگیرییا ئیراقێ ژی د بەرژەوەندییا پەكەكێ و رێكخراوێن دی یێن تیرۆرستی یێن دی یە لەوما توركیا بەردەوامبوو د ئۆپەراسیۆنێن خوە یێن لەشكریدا».

کۆمێنتا تە