شەڕێ‌ رێزبەندیێ‌ شاریایە و حەفتییا بهێت بۆ دهۆك و زاخۆ ئاگرینە

شەڕێ‌ رێزبەندیێ‌ شاریایە و حەفتییا بهێت بۆ دهۆك و زاخۆ ئاگرینە

5

ب دووماهی هاتنا یاریێن گەڕا 28ێ‌ ژ هەڤڕكیێن خولا ستێرێن ئیراقێ‌ یا فوتبۆلێ‌، یانەیێن دهۆك و هەولێر ڤەگەڕیانە سەركەفتنان و ب خەلەتیا بڕیارا دادڤانێن ڤارێ‌ زاخۆ دو خال ژ دەست دان، د یاریێن واندا ئەوا ل دوشەمبییا بوری هاتینە كرن.
ڤەگەڕاندنا سەركەفتنان و ئەنجامێن نە پێشبینیكری
د ناڤ پشتەڤان و ئەردێ‌ خوە دا تیما زاخۆ دو خالێن گرنگ ژ دەستدان سەرباری ئاستێ‌ وێ‌ و ژ دەستدانا كۆمەكا دەلیڤەیان لێ‌ لەز د شۆتكرنێ‌ دا بوو ئەگەر گۆلا نە هێتە تۆماركر، د خولەكا 23ێ‌ دا و د ەرئەنجامێ‌ كۆرنەرەكێ‌ دا یاریزانێ‌ زاخۆ داروین گۆلێرمۆیی ب سەری شۆتكرە گۆلا كەرخ و تەپە چوو ل بنێ‌ ئاسنێ‌ گۆلێ‌ كەت ژ هێلا گۆلێ‌ دەربازبوو، دادڤانی ل سەر بڕیارا دادڤانێ‌ ڤارێ‌ نەهژمارت گۆل، تا دووماهی هاتنا یاریێ‌ بێ‌ گۆل، ژلایێ‌ خوەڤە یانەیا دهۆك ڤەگەڕیا سەركەفتنان پشتی سێ‌ وەكهەڤیێن ل دووڤ ئێك د خولێ‌ داین و شیا ب گۆلەكا یاریزانێ‌ خوە هێران ئازاد د خولەكا 34ێ‌ دا گۆلا سەركەفتنێ‌ ل سەر یانەیا نەورۆز بینت، پشتی بورینا هەشت گەڕان تیما یانەیا هەولێر ڤەگەڕیا سەركەفتنان و شیا ژ دەرڤەیی یاریگەها خوە ب گۆلا هێرشبەرێ‌ خوە شێركو كەریم سێ‌ خالێن گرنگ دگەل نەفتێ‌ بینت.
ژڤانێ‌ گەڕا 29ێ‌ هاتنە دیاركرن
بڕیارە سوبەهی یاریێن گەڕا 29ێ‌ ژ هەڤڕكیێن خولا ستێرێن ئیراقێ‌ ب ئەنجامدانا دو یارییان بهێنە كرن دناڤبەرا یانەیا نەورۆز و یانەیا نەفت ئەلوەسەت، یارییا دویێ‌ ئەلقاسم دێ‌ بیتە مێڤانانا یانەیا كەربلا، سوبەهی رۆژا ئەینی چار یاریێن دی ژی بهێنەكرن دێ‌ یانەیا هەولێر ل یاریگەها خوە شەهید فرانسو حەریری ل دەمژمێر 6:15 مێڤاندارییا یانەیا حدود كەت، كوڕێن كەلهە و منارە ب 27 خالان رێزا 15ێ‌ دهێن، ژ یاریێن دی،كەرخ- نەفت، كەربەلا- شورتە، ئەمانەت بەغدا- نەفت ئەلبەسرا.
دهۆك و زاخۆ دێ‌ شەڕێ‌ هەڤڕكێن خوە یێن رێزبەندیێ‌ كەن
چاڤەڕێ‌ دهێتە كرن ل شەمبییا بهێت چار یاریێن مایی ژ گەڕا 29ێ‌ بهێنە ئەنجامدان، ل دەمژمێر 6:16 یانەیا دهۆك دێ‌ ل یاریگەها نەجەف بیتە مێڤانا یانەیا نەجەف د یارییەكا بهێز دا و شەڕ بۆ رێزبەندیێن پێشیێ‌ و بەردەوامییا سەركەفتنان، ئەلهۆیێن چیا خودانێن 44 خالانە رێزا شەشێ‌ پاراستیە و نەجەف 46 خال هەنە رێزا پێنجێ‌ یە، ژلایێ‌ خوەڤە یانەیا زاخۆ د هەمان دەمژمێر دا دێ‌ ل پایتەختێ‌ ئیراقێ‌ بەغدا بیتە مێڤانا یانەیا زەورا د تاقیكرنەكا ب هێز دا بۆ كوڕێن خابووری و دێ‌ بزاڤێن قەرەبوویا یارییا بوری كەت ئەوێن نوكە دا 48 خال كۆمكرین و رێزاچارێ‌ دهێت و زەورا ب52 خالان رێزا سێیێ‌ دهێت، ژ یاریێن دی یێن رۆژا شەمبی، مینا- جەوییە، نەفت میسان- تەلەبە.

کۆمێنتا تە