کورد دێ چەندین پۆستان ل سووریێ وەرگرن
بەرپرسەکێ رێڤەبەریا خوەسەر یا رۆژئاڤایێ کوردستانێ کو ناڤێ وی نەهاتیە ئاشکرا کرن بۆ کەنالێ رۆناهی دیار کریە، پشتی رێککەفتنا ڤێ دووماهیێ یا ل شامێ دێ کورد چەندین پۆستێن مەزن ل دەولەتا سووریێ وەرگرن، د ئاستێ وەزارەتان، رێڤەبەریێن گشتی و هەروەسا بالیۆزیێن سووریێ.
هەمان بەرپرسی ئەو یەک ژی دیار کریە، نها رێڤەبەریا خوەسەر دەست ب خەباتەکا مەزن کریە دا ناڤێ وان کەسان رادەستی شامێ بکەت، چونکی رێڤەبەریا خوەسەر کار دکەت دا کەسێن دهێنە دەستنیشانکرن ژ هەموو پێکهاتەیێن ل رۆژئاڤایێ کوردستانێ بن و نوونەراتیا هەموو خەلکێن ل رۆژئاڤایێ کوردستانێ بکەن، ژ بۆ ڤێ یەکێ ژی دێ دانوستاندن ل گەل کەسایەتیێن رۆژئاڤایێ کوردستانێ ژی هێنە کرن.
ئەو یەک د دەمەکێ دایە کو ل گۆر رێککەفتنا ١٥ ڤێ مەهێ یا ل شامێ دڤێت چەندین بالیۆزێن سووریێ یێن ل وەلاتێن جیهانێ کورد بن و هەروەسا کورد دێ گەلەک پۆستێن دی یێن سیاسی و سەربازی و خزمەتگوزاری ل سووریێ وەرگرن.
