ل ئیرانێ کەس نەشێت بڕیارا دووماهیێ بۆ رێککەفتنێ بدەت
ب، سهرجان مەحمود:
چاڤدێرێن سیاسی دیار دکەن، پشتی کوشتنا رێبەرێ ئیرانێ نها ئالۆزیێن گەلەک مەزن ل ئیرانێ هەنە، د ناڤ دەستهەلاتێ دا ژی هندەک کەس دخوازن ل گەل ئەمریکا بگەهنە رێكکەفتنێ، لێ ئیرادا رێککەفتنێ نینە و کەس نەشێت بریارا دووماهیێ بدەت.
د. هێمن سەیدی چاڤدێرێ سیاسی دیار کر، پشتی کوشتنا رێبەرێ ئیرانێ عەلی خامنەیی نها د ناڤ دەستهەلاتا ئیرانێ دا دو نێرینێن جودا سەبارەت ب دانوستاندنێن ل گەل ئەمریکا هەنە، سەرۆک کۆمارێ ئیرانێ و سەرۆکێ پەرلەمانێ وی وەلاتی ل گەل وەزیرێ دەرڤە دخوازن کو ئیران ب رێیا دانوستاندنان پرسێن هەی ل گەل ئەمریکا چارەسەر بکەت، چونکی ئەو ژی باش دزانن ئیران د قەیرانەکا گەلەک مەزن دایە و هەکە جارەکا دی شەڕ دەستپێ بکەت دێ ئەو یەک بیتە ئەگەرێ کارەساتێن گەلەک مەزن ل ئیرانێ.
ناڤهاتی ئەو یەک ژی دیار کر، ژ ئەنجامێ شەڕێ ٤٠ رۆژان ب سەدان کارگەهێن کاری هاتینە ژناڤبرن و ب هزاران کەس نها ل ئیرانێ بێکار بووینە، ئەو یەک د دەمەکێ دایە کو رێژەیا بێکاریێ ل ئیرانێ بەری نها ژی گەلەک بلند بوو، ئانکو شەڕەک دی روو بدەت دێ کارەساتێن مەزن روو دەن، لێ هندەک کەسێن توندرەو د ناڤ دەستهەلاتێ دا ل گەل هێزێن سوپایێ پاسداران وەسا دبینن دڤێت چو داخوازیێن ئەمریکا نەهێنە قەبوول کرن، ژ بەر ڤێ یەکێ ژی نها ل ئیرانێ سەبارەت ب دانوستاندنێن ل گەل ئەمریکا بریارەکا ئێکگرتی نینە و ل ئیرانێ ئەو ئیرادە ژی نینە کو بریارا دووماهیێ بدەت، ژ بەر ڤێ یەکێ ژی دانوستاندنێن ل گەل ئەمریکا د رەوشا نها دا چو ئەنجامێن خوە نابن، چونکی ئیران یا بەرهەڤ نینە.
ئەو یەک د دەمەکێ دایە کو بەری دو رۆژان سەرۆک کۆمارێ ئیرانێ مەسعود پزیکشیان دیار کر، هندەک کەس ل دژی دانوستاندنێن مە ل گەل ئەمریکا نە و دخوازن ئاریشەیان بۆ مە دروست بکەن، مە دڤێت ب رێیا دانوستاندنان پرسێن هەی چارەسەر بکەین و دانوستاندن ژی رامانا ڤێ یەکێ نادەت ئەم دێ خوە رادەستی ئەمریکا کەین.
سەبارەت ب دانوستاندنێن ل گەل ئەمریکا و دژبەریا هندەک کەسان ل ئیرانێ دوهی محەمەد باقر قالیباف سەرۆکێ پەرلەمانێ ئیرانێ ژی دیار کر، هندەک کەس ل ئیرانێ وەسا هزر دکەن هەکە ئەم ل گەل ئەمریکا دانوستاندنان بکەین دێ ئیران تووشی قەیرانێ بیت لێ ئەو یەک وەسا نینە، هەکە شەڕ بەردەوام بیت و ئالۆزی ژی وەکو خوە بمینن دێ رەوشا ئیرانێ گەلەک خراب بیت، راستە ترامپی دڤێت ل ژێر ناڤێ دانوستاندنان مە نەچار بکەت دا خوە رادەست بکەین، لێ ئیران وەلاتەک بهێزە و گەلێ ئیرانێ ژی سەلماندیە ئەو چو جاران خوە رادەستی دوژمنێ خوە ناکەت.
