مەزلۆم عەبدی: ئەمریکا هێزێن خوە ژ سووریێ ڤەناکێشیت
مەزلوم عەبدی فەرماندارێ گشتی یێ هێزێن سووریا دیموکرات راگەهاند، نها دەنگوباسێ ڤەکێشانا هێزێن ئەمریکا ژ ئیراقێ و سووریێ د رۆژەڤێ دایە، لێ ل سووریێ و رۆژئاڤایێ کوردستانێ رەوشەکا جوداتر ژ ئیراقێ یا هەی و گۆت: (بەری چەند رۆژان ئەم ل گەل فەرماندارێ ئەمریکا ل سووریێ کۆمبووین و مە بەحسێ بابەتێ ڤەکێشانا هێزێن ئەمریکا ژ سووریێ و رۆژئاڤایێ کوردستانێ کر، فەرماندارێ ئەمریکا ئەم پشتراست کرین کو جارێ هێزێن ئەمریکا دێ ل سووریێ مینن و بابەتێ ڤەکێشانێ جارێ د رۆژەڤا ئەمریکا دا نینە).
ناڤهاتی ئەو یەک ژی دیار کر، رەوشا دەڤەرێ ب گشتی یا هەستیارە و رەوشا سووریێ ژی ئالۆزە، هەکە نها ئەمریکا هێزێن خوە ژ سووریێ و رۆژئاڤایێ کوردستانێ ڤەکێشیت دێ ئالۆزیێن هەی گەلەک مەزنتر لێ هێن و ئەو یەک دێ کاریگەریەکا گەلەک خراب ل پاشەرۆژا سووریێ ژی کەت، ژ بەر ڤێ یەکێ ژی نها مانا هێزێن ئەمریکا ل سووریێ و رۆژئاڤایێ کوردستانێ یا گرنگە.
