نێچیرڤان بارزانی ل گەل سەركردەیێن وەلاتێن جیهانێ پشكداری د رێوڕەسمێن دەستپێكرنا ئۆلمپیادێن پاریس دا كر
پشتی كو نێچیرڤان بارزانی، سەرۆكێ هەرێما كوردستانێ ب ڤەخواندنەكا فەرمی بۆ پشكداریكرنێ د رێوڕەسمێن ڤەكرنا ئۆلۆمپیادێن 2024 گەهشتە پاریس، ل گەل سەرۆك و شاهـ و سەركردەیێن وەلاتێن جیهانێ، ژ ئالیێ ئیمانوێل ماكرۆن، سەرۆكێ فرەنسا، ل كۆچكا ئەلیزێ پێشوازی لێ هاتەكرن.
نێچیرڤان بارزانی د چارچۆڤەیێ رێوڕەسمیدا دیدار ل گەل هەژمارەكا سەرۆك و شاهـ و سەركردەیێن وەلاتێن جیهانێ ئەنجامدان، پاشی هەموویان پێكڤە پشكداری د رێوڕەسمێن فەرمی یێن ڤەكرنا ئۆلۆمپیادێن پاریس 2024 دا كر كو ل كۆچكا شاییۆ ل دەڤەرا ترۆكادێرۆ ل پاریس ب پشكدارییا دەهان هزار كەسان ژ سەرانسەری جیهانێ بڕێڤەچوو.
نێچیرڤان بارزانی، سەرۆكێ هەرێما كوردستانێ ل دۆر پشكداریكرنێ د ئۆلۆمپیادێن پاریس 2024 راگەهاند» ئۆلۆمپیاد دەلیڤەیەكا مەزنە بۆ نیشادانا ئێكگرتنا جیهانێ».
هەر ب ئەوێ هەلكەفتێ سەرۆكێ هەرێما كوردستانێ ل گەل ئەنتۆنیۆ گۆتێرێز، سكرتێرێ گشتیێ نەتەوەیێن ئێكگرتی و كیەر ستامەر، سەرۆك وەزیرێن بریتانیا وئۆلاف شۆلتز، شیرەتكارێ ئەلمانیا و شێخ تەمیم بن حەمەد ئەلسانی، میرێ قەتەر و چەندین سەرۆك و سەركردەیێن دی یێن وەلاتێن جیهانێ دیدار هەبوون.
