پارێزگارێ دهۆكێ بەرێ بنیاتی بۆ 34 پڕۆژەیان ل دێرەلۆكێ و شێلادزێ دانـا
ئامێدیێ، مەحمود نهێلی:
دكتۆر عەلی تەتەر، پارێزگارێ دهۆكێ و شاندێ د گەل دا دوهی 9/10/2024 سەرەدانا دەڤەرا ئامێدیێ كر و بەرێ بنیاتی بۆ 34 پڕۆژەیان ل سنوورێ ناوچەداریێن دێرەلۆكێ و شێلادزێ دانا.
دكتۆر عەلی تەتەر، پارێزگارێ دهۆكێ د كۆنگرەكێ رۆژنامەڤانی دا دیار كر، ئەو ئەڤرۆ ل دەڤەرا ئامێدیێ بەرهەڤبووینە ژ بۆ دانانا بەرێ بنیاتی بۆ 34 پڕۆژەیان ل سنوورێ ناوچەداریێن دێرەلۆكێ و شێلادزێ و گۆت: «مە ل بەرە سوبەهی 10/10/2024 سەرەدانا وان ناوچەداریێن مایی ژی بكەین و بەرێ بنیاتی بۆ پڕۆژەیان ل وان ناوچەداریان ژی بدانین، دیسا هەر ئەڤرۆ دێ هۆلەكا تازیان ل دێرەلۆكێ ڤەكەین و قوتابخانەیەكێ ژی ل ئامێدیێ ڤەكەین».
پارێزگاری دیار ژی كر، ئەڤ پڕۆژەیێن دوهی بەرێ بنیاتی بۆ هاتیە دانان ژ 13 پڕۆژەیێن باژێرڤانیێ و شەش پڕۆژەیێن كارەبێ و چار پڕۆژەیێن پەروەردێ دو پڕۆژەیێن ئەوقافێ و سێ پڕۆژەیێن ئاڤێ و دو پڕۆژەیێن رێك و پران و پێنج پڕۆژەیێن ئاڤدێریێ پێك دهێن، كو ل سەر داخوازیا خەلكی دێ هێنە بجهئینان و گۆت: «سوپاسیا مەسرور بارزانی، سەرۆكێ حكومەتا هەرێما كوردستانێ دكەین، كو گرنگیەكا تایبەت دایە ڤێ دەڤەرێ و ژ بەر كاودانێن تایبەت یێن ڤێ دەڤەرێ، لژنەیەكا تایبەت هەیە، كو دبێژنێ: لژنا گەشەپێدانا دەڤەرا ئامێدیێ، ئەڤ لژنەیە هاتیە راسپاردن بۆ ئاڤەدانكرن و گەشەپێدنا دەڤەرا ئامێدیێ، وەكو پێنگاڤا ئێكێ ژی 25 ملیار و 828 ملیۆن دینارێن دی هاتینە تەرخانكرن، ژبلی ڤان پڕۆژەیان، كو ئەو ژی د ڤان دو حەفتیان دا دێ هێنە رەوانەكرن بۆ بجهئینانێ«.
پارێزگاری گۆتژی: «بەری 10 رۆژان مە بەرێ بنیاتی بۆ پڕۆژەكێ زۆر گرنگ ل گەلیێ بالندا و دەسپێكرنا ئاڤەدانكرنا دەڤەرا نێروە و رێكان دانا، پاشی دەڤەرێن دیتر یێن سنوورێ ناوچەدارێن دێرەلۆكێ و شێلادزێ و نوكە شۆلەكێ باش ل وێ دەڤەرێ دهێتە كرن».
ناڤهاتی د كۆنگرێ رۆژنامەڤانی دا زێدەتر گۆت: «پشتی سەرەدانا سەرۆكێ حكومەتێ بۆ دەڤەرا ئامێدیێ، رازیبوون ل سەر 85 پڕۆژەیان كر، ژ وانا: 84 پڕۆژە كەفتینە د خزمەتا خەلكێ دەڤەرێ دا، پڕۆژەیێ نەخۆشخانێ یێ مای، ئەو ژی د ڤان رۆژان دا دێ ب دوماهی هێت و هێتە ڤەكرن و كەڤیتە د خزمەتا خەكێ دەڤەرێ دا، گیرۆبوونا وێ ژی ئەوە، دڤیا گەلەك ئامیرێن وێ ب فرۆكان هاتبانە ڤەگوهاستن، لێ دیارە ڤی شەڕی كارتێكرن ل كارێن مە ژی كریە، ئەو ژی دێ چارەسەربیت و دێ ئەو ژی گەهن چ ب رێكا فرۆكان بیت یان ژی ب رێكا بارهەلگران بیت».
پارێزگارێ دهۆكێ ئاشكرا ژی كر، بۆ سالا 2024 ب گوژمێ 57 ملیار دیناران پڕۆژە ل دەڤەرا ئامێدیێ ل ژێر بجهئینانێ دانە، هندەك ژ وانا د ڤان رۆژان دا دێ بەرێ بنیاتی بۆ هێتە دانان.
