ئاراس كۆیی ب مۆزیكێ مێژوو و جوانییا كۆیێ ڤه‌دگێڕیت
ره‌مه‌زان زه‌كه‌ریا:
هونه‌رمه‌ندێ مۆزیكژه‌نێ كورد ئاراس كۆیی نووترین به‌رهه‌مێ خوە ب ناڤێ شاری كۆیه، ب شێوازێ ڤیدیۆ كلیپ به‌لاڤكر.
هونه‌رمه‌ند ئاراس كۆیی بۆ ئه‌ڤرۆ گۆت: ئه‌ڤ به‌رهه‌مێ من یێ نوو یادنامه‌یه‌كا پڕ ژ سۆز و ناسنامه‌یه بۆ باژێره‌كێ كو ژیانا من ژێ ده‌ست پێكرییه، له‌ورا ئه‌ڤ چه‌نده ژ دلێ من هاتیه ده‌ر، چونكی كۆیه بۆ من نه تنی ناڤێ باژێره‌كێ یه جهێ ژدایكبوون، زارۆكینی، خویندن و دروستبوونا ئێكه‌م بیره‌وه‌ریێن ژیانا منه.
ناڤبری گۆت ژی: به‌رهه‌مێ من یێ نوو تێكست و ئاواز و مۆزیكا وێ من خوە داناییه و ژ ژه‌نینا ئۆرگ و عودێ مفا وه‌رگرتییه، هه‌روه‌سا ل ژه‌نینا 12 ئامێرێن مۆزیكێ شاره‌زایییا من هه‌یه. ڤیدیۆ كلیپا سترانێ ژ لایێ ئه‌ژی و ده‌وه‌ن مه‌ولوود ڤه ب بكارئینانا ته‌كنه‌لۆژیا ژیرییا ده‌ستكرد هاتیه دروستكرن، كو بزاڤ هاتیه‌كرن ب وێنه و دیمه‌نان، جوانیێن مێژوویی و سروشتی یێن باژێرێ كۆیه بێنه نیشاندان.
ئاراس كۆیی گۆت ژی: ناڤه‌رۆكا سترانێ به‌حس ل په‌یوه‌ندیه‌كا ئۆقیانوسی یا مرۆڤی ب جهێ ژ دایكبوونا وی دكه‌ت، تێدا وێنه‌یێ كۆلانان، قوتابخانه، هه‌ڤالێن زارۆكینیێ و وان بیره‌وه‌ریێن شیرین دهێنه لڤاندن كو ب ده‌ربازبوونا سالان ژ بیرا مرۆڤی ناچن. ستران بانگه‌وازه‌كه ل سه‌ر پاراستنا هه‌ستێن نیشتمانی و شارستانییانه و ته‌كه‌زێ ل سه‌ر وێ چه‌ندێ دكه‌ت كو جهێ ئێكێ یێ ژیانێ هه‌رده‌م جهه‌كێ تایبه‌ت ل دلێ مرۆڤی دا هه‌یه.
ناڤهاتی گۆت: ده‌ستپێكێ تنی ئاواز د هزرا من دا دروست بوو، پاشی بزاڤ كر تێكسته‌كێ گونجایی بۆ په‌یدا بكه‌م، به‌لێ چ هه‌لبه‌سته‌كێ ئه‌ڤ هه‌ست و په‌یامه نه‌گه‌هاند كو د ناخێ من دا هه‌بوو. له‌ورا من بڕیار دا ب خۆ هه‌لبه‌ستێ بنڤێسم، دا كو په‌یڤ ب ته‌مامی دگه‌ل وێ ئاوازێ بگونجن بن.
ل دووماهیێ ناڤهاتی خویا كر: باژێرێ كۆیه د دووماھیكێ دا نامه‌یه‌كا پڕ ژ حه‌ز ژێكرن و وه‌فاداریێ یه بۆ جهه‌كێ كو بیره‌وه‌ریێن زارۆكینیێ و بنه‌مایێ ژیانا من د هه‌مبێزا خوە دا گرتین.
