ئازادیا منبیجێ نێزیک بوویە و رژێما ئەسەدی گەفان ل کوردان دکەت
ئەڤرۆ نیوز:
ل رۆژئاڤایێ کوردستانێ ژ ئالیەکی ڤە ئۆپەراسیۆنا ئازادکرنا منبیجێ بەردەوام دکەت و ل ئالیەکی دی ژی ل ھەردو تاخێن ئەشرەفیە و شێخ مەقسود یێن کوردی ل باژێرێ حەلەبێ کەڤتنە ئامادە باشیێ و مەترسیا دەستپێکرنا شەرەکی دژوار ل گەل رژێما ئەسەدی ھەیە.
ھێزێن ھەڤپەیمانیا نێڤدەولەتی و شەرڤانێن جڤاتا سەربازی یا منبیجێ ب دو داخۆیانیێن جودا راگەھاندن کو 80% یێ ناڤەندا باژێرێ منبیجێ ھاتیە ئازادکرن و ب تنێ 20% مایە و ھەردو ئالیان ژی راگەھاندن کو ژ بۆ پاراستنا ژیانا سڤیلان ئۆپەراسیۆن ھێدی برێڤە دچن و ھەتا نھا نێزیکی ١٠٠ ھزار وەلاتیێن سڤیل ژ ناڤەندا باژێر و دەوروبەرێن وێ ھاتنە ئازادکرن.
محەمەد عسا یەک ژ شەرڤانێن جڤاتا سەربازی یا منبیجێ د داخۆیانیەکی دا ل سەر تۆرا ئنترنێتێ بەلاڤ کریە کو د رەوشا نھا دا ئۆپەراسیۆنا ئازادکرنا منبیجێ ب سەرکەڤتی بەردەوام دکەت و گۆت: (د ناڤا دو رۆژان دا دو تاخێن ناڤەندا باژێر ھاتنە ئازادکرن و ب ھزاران وەلاتیێن سڤیل ژ دەستێ تیرۆرستان ھاتینە رزگار کرن و ئەم وەسا ھزر دکەین ھەتا ھەفتیەکی ئەم دێ مزگینیا ب تەمامی ئازادکرنا منبیجێ بدەینە گەلێن رۆژئاڤایێ کوردستانێ).
محەمەدی ھەروەسا دیار ژی کر کو تیرۆرستێن داعشێ وەلاتیێن سڤیل وەک مەرتالێن زندی ب کار دئینن و گۆت: (ژ بۆ پاراستنا ژیانا وەلاتیان ئەم ئۆپەراسیۆنێ گەلەک حەساس برێڤە دبەین و پرانیا وەلاتیێن سڤیل ژ ناڤەندا باژێر ھاتینە دەرخستن و ھژمارەک زێدە گەنجێن باژێر پشتی ژ دەستێ داعشێ دھێنە رزگار کرن دکەڤنە د ناڤا رەفێن مە و یەکینەیێن پاراستنا گەل دا و بۆ ئازادیا منبیجێ ھەڤکاریا مە دکەن).
ل ئالیێ دی ل حەلەبێ ئۆپەراسیۆنا رژێما سووریێ ل ئالیەکی و ئۆپەراسیۆنا پاقژکرنا تاخێن نێزیکی ئەشرەفیە و شێخ مەقسود یێن حەلەبێ ژ ئالیێ یەپەگێ ڤە بەردەوام دکەن و ھێزێن رژێما ئەسەدی ژ یەکینەیێن پاراستنا گەل خواستن کو کونترۆلا ھەردو تاخێن کوردی بدەنە د دەستێ وان دا ھەکە نە دێ ھێرشێ خالێن کۆنترۆلێ یێن کوردی بکەن و ل ھەمبەر دا فەرمانداریا گشتی یا یەپەگێ ژی راگەھاند کو ھێزێن وان ژ چو دەڤەرەکی دەرناکەڤن کو ب خوینا لاوێن کورد ھاتنە ئازادکرن و گۆت: (ھەکە ھێزێن رژێمێ ھێرشی سەر تاخێن کوردی بکەن و یەک گوللە ژی بھاڤێژن ئەم دێ ب دژواری بەرسڤا وان بدەین و ناھێلن بکەڤنە د تاخێن کوردان دا).
نھا پرانیا حەلەبێ ل ژێر کونترۆلا رژێما سووریێ دایە و ھەردو تاخێن کوردی ئەشرەفیە و شێخ مەقسود ژی ژ د بن کۆنترۆلا یەکینەیێن پاراستنا گەل دانە.