ئاستێ هه‌ژاريێ ل ھەرێمێ بۆ ڤێ رێژێ بلند بوو
ئه‌ڤرۆ نيوز:
مالپەرەکێ ئەمریکی دیار دکەت کو ئەڤە دو سالە ژ ئەگەرێ قەیرانا دارایی، ھەرێما کوردستانێ چو گەشە ب خوە ڤە نەدیتیە و بەروڤاژی گەشەیا خوە پاشڤەچوویە و ئاشکرا کریە کو ھەتا دەستپێکا سالا 2014 ھەرێما کوردستانێ د پێشڤەچوونێن بلەز دا بوو، بەلێ د ماوێ دو سالان دا وێ گەشەیێ چو پێشڤەچوون ب خۆڤە نەدیتینە.
مالپەرێ (زە ئیکونۆمیست) سەبارەت رەوشا نھا یا ھەرێما کوردستانێ یا ئابووری و سیاسی رابۆرتەکێ بەلاڤ دکەت و تێدا بەحسێ ھەرێما کوردستانێ دکەت کو ھەتا سالا 2014 د گەشەیەکا ئابووری یا گەلەک مەزن دابوویە، بەلێ ژ ئەگەرێ قەیرانا دارایی ئەڤە دو سالە ئەو گەشەیا ئابووری راوەستیای و بەرەڤ پاشڤە دچیت.
د وێ راپۆرتێ دا ھاتیە ژی کو ھەرێما کوردستانێ پشتی دو سالێن گەشەیەکا مەزن، ژ سێ لایان ڤە تووشی کێشەیان بوو، لایەنێ ئێکێ دورپێچا ئابووری ی عیراقێ بو ل سەر کوردستانێ دەمێ بۆدجە و مۆچەیێن فەرمانبەران بڕین، لایەنێ دویێ شەرێ ھەرێما کوردستانێ بوویە ل گەل مەنترین رێکخراوا تیرۆرستی یا داعش، لایەنێ سیێ یێ کارتێکرن ل سەر ھەرێما کوردستانێ کری دابەزینا بۆھایێ پترۆلێ بوویە ل جیھانێ.
رۆژناما دیارکری ئاشکرا کریە کو ژ سالا 2006 وەرە عیراق تووشی قەیرانەکا مەزن یا نەبوونا ئاسایشێ بوویە، بەلێ د وی دەمی دا و ھەتا سالا 2014 ھەرێما کوردستانێ بەروڤاژی عیراقێ د ئاسایشەکا مۆکۆم دابوو و گەشەیەکا ئابووری یا بەرچاڤ بخۆڤە ددیت و گەھشتبوو وی رادەی 10% ئابوورێ وێ بەرەڤ پێشڤە دچوو و وەبەرھێنانا بیانی ژی بەردەوام قەستا کوردستانێ دکر بۆ ئەنجامدانا پرۆژێن مەزن.
ئاشکرا ژی کریە کو 60% ژ ئاکنجیێن ھەرێما کوردستانێ ژیانا خوە ل سەر مۆچەی دەرباز دکەن و نەدانا مۆچان کارتێکرنەکا مەزن ل سەر ئابوورێ ھەرێما کوردستانێ ھاتیە کرن و ئەڤ رەوشا خراب ژی بوویە ئەگەر کو رێژا ھەژاریێ ل ھەرێما کوردستانێ ژ 3% بۆ 12% بەرز ببیت و ڤێ ژی کارتێکرنەکا مەزن ل سەر ھەرێما کوردستانێ کریە.